Tibetan
མཆོད་སྡེ་གཉིས་ཞབས་བཞག་པ་ལ་མཆོད་ཅིང་བཀུར་བ་སོགས་རྒྱལ་བསྟན་རིན་པོ་ཆེ་བླ་རུ་བཀུར་བའི་མཛད་པ་མཐའ་ཡས་ཤིང༌། སྐྱིད་སྨད་འོན་ཅང་རྡོ་དཔེ་མེད་བཀྲ་ཤིས་དགེ་འཕེལ་གྱི་གཙུག་ལག་ཁང་བཞེངས། རྒྱ་གར་ནས་སུ་རེནྡྲ་བོ་དྷི། ཤཱི་ལེནྡྲ་བོ་དྷི། དཱ་ན་ཤཱི་ལ་སོགས་པཎྜི་ཏ་མང་པོ་སྤྱན་དྲངས། བོད་ཀྱི་མཁན་པོ་རཏྣ་རཀྵི་ཏ་དང་དྷརྨ་ཏཱ་ཤཱི་ལ། ལོ་ཙཱ་བ་ཛྙཱ་ན་སེ་ན་ལ་སོགས་པས་སྔོན་ཡབ་མེས་ཀྱི་དུས་ལོ་པཎ་རྣམས་ཀྱིས་ཆོས་བསྒྱུར་བའི་ཚེ་བོད་སྐད་ལ་མ་གྲགས་པའི་མིང་བཏགས་པའི་ཁྲོད་ནས་ཆོས་ཀྱི་གཞུང་དང་བྱཱ་ཀ་ར་ཎའི་ལུགས་དང་མི་མཐུན་པ་དང་གོ་དཀའ་བ་རྣམས་ཡུལ་སྐད་ཀྱི་མིང་གཅེས་སོ་འཚལ་ནས་ཀྱང་བསྣན་ནས་ཐེག་པ་ཆེ་ཆུང་གི་གསུང་དང་མཐུན་པར་སྒྱུར་བཅོས་གྱིས་ཞེས་བཀའ་སྩལ་བ་ལྟར་འཕན་ཡུལ་ཀ་བ་ན་མོ་ཆེར་ཡུམ་རྒྱས་པ་ལ་འགྱུར་བཅོས་ནས་དུམ་བུ་བཅུ་དྲུག་ཏུ་མཛད། དེས་མཚོན་ཡབ་མེས་ཀྱི་དུས་སུ་བསྒྱུར་བའི་གསུང་རབ་ཕལ་ཆེར་སྐད་གསར་བཅད་ཀྱིས་གཏན་ལ་ཕབ། གསང་སྔགས་ནང་གི་རྒྱུད་རྣམས་བཀའ་གཉན་པས་སྣོད་ལྡན་མ་གཏོགས་སྣོད་མིན་བྱིངས་ཀྱི་སྤྱོད་ཡུལ་དུ་མ་གྱུར་པས་སྔ་འགྱུར་རང་མལ་དུ་འཇོག་པར་མཛད། དེས་ན་གངས་ཅན་གྱི་ལྗོངས་འདིར་རྒྱལ་བའི་བསྟན་པ་ལ་ཕྱག་རྗེས་ཆེ་ཞིང་འགྲོ་བ་རྣམས་ལ་བཀའ་དྲིན་ཆེ་ཤོས་ནི་ཆོས་རྒྱལ་མེས་དབོན་དུ་གྲགས་པ་དེ་དག་དང༌། དེའི་ནང་ནས་ཀྱང་སྲོང་བཙན་དང་ཁྲི་སྲོང་གཉིས་ཆེས་བཀའ་དྲིན་ཕུལ་དུ་བྱུང་ཞིང༌། པཎྜི་ཏ་ཞི་འཚོ་དང་པད་འབྱུང༌། ལོ་ཙཱ་བ་ཐོན་མི་བཻ་རོ་སྐ་ཅོག་ཞང་གསུམ་རྣམས་བཀའ་དྲིན་དང་ངོ་མཚར་ཆེའོ། ། ཅ༢ གཉིས་པ་བསྟན་རྩ་ཆོས་འདུལ་ཇི་ལྟར་བྱུང་བ་ལའང་གསུམ། ཆ༡ སྨད་འདུལ། ཆ༢ ཁ་ཆེ་ལུགས། ཆ༣ སྟོད་འདུལ་ལོ། ། ཆ༡ དང་པོ་ནི། རྒྱལ་བསྟན་གཞི་མ་དམ་ཆོས་འདུལ་བ་ནི། ། བསྟན་པའི་མངའ་བདག་མཁན་ཆེན་ཞི་བ་འཚོས། ། སད་མི་མི་བདུན་ཐོག་མར་རབ་ཏུ་བྱུང༌། །(༡༣༩ན) སྐྱེས་མཆོག་ལོ་ཙཱ་བཙུན་པ་བགྲང་ཡས་བྱོན། ། རྒྱལ་བའི་བསྟན་པ་ཡོད་མེད་ནི་སོ་ཐར་གྱི་བསླབ་པ་དང་ལག་ལེན་ཡོད་མེད་ཁོ་ན་ལ་ལྟོས་པས་སངས་རྒྱས་ཀྱི་བསྟན་པ་ཐམས་ཅད་ཀྱི་གཞི་མ་དམ་ཆོས་འདུལ་བའི་སྡེ་སྣོད་འཛིན་པ་ཇི་ལྟར་བྱུང་བའི་ཚུལ་ནི། ཆོས་རྒྱལ་ཁྲི་སྲོང་ལྡེའུ་བཙན་གྱིས་སྡེ་སྣོད་དང་བསྟན་པ་ཐམས་ཅད་ཀྱི་མངའ་བདག་ཟ་ཧོར་གྱི་མཁན་ཆེན་བོདྷི་ས་ཏྭའམ་ཤཱནྟ་རཀྵི་ཏ་བལ་ཡུལ་དུ་བཞུགས་པ་གསན་ནས་རྦ་གསལ་སྣང་ཕོ་ཉར་བཏང་སྟེ་སྤྱན་དྲངས། གུས་པ་ཆེན་པོས་ཉེ་བར་བསྙེན། འཕགས་ཡུལ་ནས་ཡོད་སྨྲའི་དགེ་སློང་བཅུ་གཉིས་སྤྱན་དྲངས། སྐབས་ཤིག་བོད་ཀྱི་མི་ལ་རབ་བྱུང་བཏུབ་བམ་མི་བཏུབ་སད་པའི་ཕྱིར། ཞང་བློན་དད་པ་ཅན་རྦ་ཁྲི་གཟིགས་རབ་ཏུ་བྱུང་བར་རྒྱལ་པོས་གསོལ་པས། བོ་དྷི་ས་ཏྭས་མཁན་པོ་མཛད་དེ། དཱ་ན་ཤཱི་ལ་དང་ཛི་ན་མི་ཏྲ་གཉིས་ཀྱིས་ལས་སློབ་དང་གསང་སྟོན། པཎྜི་ཏ་གཞན་བཅུ་པོས་ཁ་སྐོང་མཛད་ནས་རབ་ཏུ་བྱུང་ཞིང་བསྙེན་པར་རྫོགས། མཚན་དཔལ་དབྱངས། བཙན་པོས་བསྔགས་པ་རྦ་རཏྣར་ཡང་གྲགས། བསྒོམས་པས་མངོན་ཤེས་ལྔ་དང་ལྡན་པར་གྱུར་ཏོ། ། དེ་ནས་རིམ་བཞིན་རྦ་གསལ་སྣང་དང༌། པ་གོར་བཻ་རོ་ཙ་ན། ངན་ལམ་རྒྱལ་བ་མཆོག་དབྱངས། རྨ་རིན་ཆེན་མཆོག །འཁོན་ཀླུའི་དབང་པོ་སྲུང་བ། ལ་གསུམ་རྒྱལ་བ་བྱང་ཆུབ་རྣམས་རབ་ཏུ་བྱུང་ཞིང་མིང་ཡེ་ཤེས་དབང་པོ་སོགས་སུ་སྤོས་བསྙེན་པར་རྫོགས། དེ་བདུན་ལ་སད་མི་མི་བདུན་དུ་གྲགས་ཤིང་བོད་ཀྱི་རབ་བྱུང་རྣམས་ཀྱི་ཐོག་མ་ཡིན། དེ་ནས་རྒྱལ་པོས་བོད་ལ་རབ་བྱུང་བཏུབ་པར་དགོངས་ནས། ཞང་བློན་དྲྭ་མ་དང༌། འབངས་བློ་གསལ་བ་སུམ་བརྒྱ་ཙམ་རབ་ཏུ་བྱུང༌། སྐྱེ་བོ་ཐམས་ཅད་ཀྱིས་རྗེའི་བཀའ་ཉན་ཅིང༌། རྗེ་འབངས་ཐམས་ཅད་ཀྱིས་རབ་ཏུ་བྱུང་བ་དབུའི་མཆོད་གནས་སུ་ཕྱུངས་ནས། ཕྱག་མཆོད་བཀུར་སྟི་བྱ་བའི་ཆོས་ཀྱི་བཀའ་ཁྲིམས་ཆེན་མོ་བཅས། བཀའ་གཙིགས་ཀྱི་རྡོ་རིངས་བཙུགས། སད་མི་མི་བདུན་ལས་བློ་སྦྱངས་པ་སྐ་བ་དཔལ་བརྩེགས་སོགས་ལོ་ཙཱ་བ་བརྒྱ་རྩ། དེ་དག་ལས་(༡༣༩བ)བློ་སྦྱངས་པ་ཅོག་རོ་ཀླུའི་རྒྱལ་མཚན་སོགས་མཆན་བུ་སྟོང་རྩ་སྟེ། སྐྱེས་མཆོག་སྤྲུལ་པའི་སྐུ་ལོ་ཙཱ་བ་དང་བཙུན་པ་བགྲང་བ་ལས་འདས་པ་བྱོན་ནོ།། དར་མས་བསྣུབས་རྗེས་སྨར་གཡོ་གཙང་གསུམ་བརྒྱུད། ། བླ་ཆེན་མཁན་བུ་དབུས་གཙང་མི་བཅུ་ཡིས། ། བསྟན་པ་གསོས་ཤིང་གནས་གཞི་རྒྱ་ཆེར་བཏིང༌། ། མངའ་བདག་ཁྲི་རལ་གཅུང་གླང་དར་མ་འུ་དུམ་བཙན་ལོག་པའི་སྨོན་ལམ་གྱི་དབང་གིས་ཐུགས་ལ་གདོན་གསོལ་ཏེ་བསྟན་པ་བསྣུབས་པའི་ཚེ། རྦ་རཏྣའི་མཁན་བུ་སྨར་ཤཱཀྱ་མུ་ནི། གཡོ་དགེ་འབྱུང༌། གཙང་རབ་གསལ་གསུམ་གྱིས་འདུལ་བ་དྲེལ་ཁལ་གཅིག་བཀལ་ནས། གར་ལོག་དང་ཧོར་ཡུལ་དུ་ཕྱིན་ཀྱང་བསྟན་པ་སྤེལ་མ་བཏུབ་སྟེ་ཁམས་སུ་བྱོན། རྨ་ལུང་རྡོ་རྗེའི་བྲག་ར་ཨན་ཆུང་གནམ་རྫོང་ངམ། དན་ཏིག་ཤེལ་གྱི་ཡང་དགོན་དུ་བསྒོམ་ཞིང་བཞུགས་པའི་ཚེ། དམུ་གཟུགས་ལ་འབར་གྱིས་བལྟར་ཕྱིན་པས་དད་དེ། རབ་ཏུ་བྱུང་བར་ཞུས་པ་ལ། སྨར་གྱིས་མཁན་པོ་དང་གཡོས་སློབ་དཔོན་བྱས་ཏེ་རབ་ཏུ་བྱུང༌། མིང་ཤཱཀྱ་དགེ་བ་རབ་གསལ་ཏུ་བཏགས། བསྙེན་རྫོགས་ཞུས་པས་དགེ་སློང་ལྔ་མ་ཚང་བ་དང༌། འདོན་དུ་ལྷ་ལུང་དཔལ་རྡོར་བཞུགས་པ་བཙལ་ཀྱང་ཁོ་བོས་རྒྱལ་པོ་སྡིག་ཅན་བསད་པས་ཁ་སྐོང་མི་འོང་གི་འོན་ཀྱང་གཞན་བཙལ་ནས་བཏང་ངོ་ཞེས་རྒྱའི་ཧྭ་ཤང་ཀེ་ཝང་དང༌། གྱི་ཕན་གཉིས་མངགས་ཏེ་ལྔའི་ཚོགས་ཀྱིས་བསྙེན་པར་རྫོགས། མཁན་སློབ་རྣམས་ལས་འདུལ་བ་ལོ་བཅོ་ལྔར་ཉན། ཕྱིས་གོ་རོང་སེང་གེ་བྲག་ལས་འདུལ་བ། ཀ་བ་འོད་མཆོག་གྲགས་ལས་ཕར་ཕྱིན། གཡུ་སྒྲ་སྙིང་པོ་ལས་རྫོགས་ཆེན་སེམས་ཕྱོགས་སྐོར་གསན་ཅིང་ཀུན་བྱེད་རྒྱལ་པོའི་རྒྱུད་བཤད་དུས་ཕྱིས་བར་བྱུང་བའང་ཁོང་ལས་བརྒྱུད་པས་མཚོན། ཕྲིན་ལས་ཁྱད་པར་འཕགས་ཤིང་མཁྱེན་རབ་ཆེ་བས་བླ་ཆེན་དགོངས་པ་རབ་གསལ་དུའང་གྲགས། ཁོང་གིས་བསྙེན་པར་རྫོགས་ནས་ལོ་ལྔ་བཞེས་པ་ན། (༡༤༠ན)མངའ་བདག་ཡེ་ཤེས་རྒྱལ་མཚན་སོགས་ཀྱིས་བོད་ཡུལ་དབུས་སུ་བསྟན་པ་ཉམས་པ་གསོ་བའི་ཕྱིར། དབུས་ནས་ཀླུ་མེས་ཚུལ་ཁྲིམས་ཤེས་རབ་སོགས་ལྔ། གཙང་ནས་ལོ་སྟོན་རྡོ་རྗེ་དབང་ཕྱུག་སོགས་ལྔ་ཁམས་སུ་བརྫངས་པ་སྟན་ཐོག་གཅིག་ཏུ་ཚིགས་གསུམ་རིམ་ནོད་ཀྱིས་ཆིག་རྫོགས་སུ་བསྙེན་པར་རྫོགས་ཏེ་འདུལ་བ་ལ་མཁས་པར་བསླབ། འདི་ལྟ་བུའི་ཆིག་རྫོགས་མཛད་པ་དང༌། བརྟན་པའི་ཡན་ལག་ལོ་བཅུ་མ་ཚང་བ་སོགས་ནི་བླ་ཆེན་འདི་བྱང་སེམས་མོས་སྤྱོད་པར་གྲགས་ཤིང༌། དེ་སྐབས་སྨར་གཡོ་གཙང་གསུམ་གྱིས་གང་ཟག་ཁྱད་པར་ཅན་ཡིན་པ་དང༌། བསྟན་པའི་འཕེལ་འགྲིབ་མཚམས་སུ་ཐུག་པའི་དགོས་གལ་ཆེ་བ་ལ་ནི་དེ་ལྟར་རུང་ངོ་ཞེས་གནང་བ་བྱིན་པས་སྐྱོན་མེད་དོ་ཞེས་དམ་པ་རྣམས་བཞེད། དེ་སྐབས་སྨར་གཡོ་གཙང་གསུམ་བཞུགས་ཀྱང་སྐུ་བགྲེས་པས་མཁན་བུ་བསྐྱངས་པ་མི་འཁྱོངས་གསུངས་ནས་ལས་སློབ་མཛད། བླ་ཆེན་གྱིས་ཀླུ་མེས་མཁན་པོར་བསྐོས། དབུས་གཙང་མི་བཅུ་ཡར་ཕེབས་པས་བཙན་པོ་རྣམས་ཀྱི་བླ་མཆོད་དུ་གྱུར། ཀླུ་མེས་སློབ་བུ་ཀ་བ་བཞི། གདུང་མ་བརྒྱད། ཕྱམ་སོ་གཉིས། དྲལ་མ་སྟོང་རྩ་སོགས་བྱུང་བས་བསྟན་པ་ཉམས་པ་རྨངས་ནས་གསོས་ཤིང་ལ་མོ་ར་འགྱེལ། ཡེར་པ། བ་རེད་ཚོང་འདུས་སོགས་གནས་གཞི་མཐའ་ཡས་པ་བཏིང༌། ཡམ་ཤུད་ཀྱི་མཁན་བུ་དགེ་བཤེས་གྲྭ་པ་ཁོ་ནས་གནས་བཞི་བརྒྱ་རྩ་བརྒྱད་བཏིང་བར་གྲགས་པ་སོགས་ས་སྟེང་ཐམས་ཅད་ཀླུ་མེས་དབོན་སློབ་ཀྱི་གནས་གཞིས་ཁྱབ་པ་ལྟར་སོང་ནས། ཉིན་རེ་བཞིན་ཡང་རབ་ཏུ་བྱུང་བའི་དགེ་འདུན་གྱི་སྡེ་མང་པོ་འཕེལ་བ་ལ་སྨད་འདུལ་གྱི་རྒྱུན་ཅེས་གྲགས་ཤིང་སྔ་འགྱུར་བའི་སྔར་རབ་ཏུ་བྱུང་བ་རྣམས་དང༌། ཕྱིས་སུ་གཡུ་སྒྲའི་རྣམ་འཕྲུལ་ལོ་ཆེན་དྷརྨ་ཤྲཱིས་བཤད་པ་དང་ལག་ལེན་རྒྱས་པར་སྤེལ་ཏེ་བོད་གངས་ཅན་གྱི་རྒྱན་གཅིག་ཨོ་རྒྱན་སྨིན་གྲོལ་གླིང་གི་ཆོས་གྲྭ་དང་དེ་ལས་གྱེས་པ་རྣམས་སྡོམ་རྒྱུན་འདི་ཉིད་(༡༤༠བ)ཡིན་ཅིང༌། བསྟན་པ་ཕྱི་དར་གྱི་སྡོམ་བརྩོན་སྐྱེས་མཆོག་སྔ་རབས་པ་ཕལ་ཆེར་དང་བཀའ་གདམས་གསར་རྙིང་གི་དགེ་བའི་བཤེས་གཉེན་ཕལ་ཆེར་རྣམས་ཀྱང་སྡོམ་རྒྱུན་འདི་ལ་བརྩོན་པར་མཛད། རྒྱ་འདུལ་འཛིན། རྨ་ཚོ་བྱང་རྡོར། བྱ་འདུལ་འཛིན། ཤ་མི་སྨོན་ལམ་རྡོ་རྗེ་སོགས་འདུལ་འཛིན་ཁྱད་པར་ཅན་མང་པོ་དང༌། ལོ་ཆེན་རིན་ཆེན་བཟང་པོ། པུ་ཏོ་པ། ཕུ་ཆུང་པ། ཤ་ར་བ། རྔོག་ལོ་ཙཱ་བ་བློ་ལྡན་ཤེས་རབ། འབྲེ་ཤེས་རབ་འབར། དྭགས་པོ་ལྷ་རྗེ། འགྲོ་མགོན་ཕག་གྲུ། བཅོམ་ལྡན་རིག་རལ་སོགས་སྐྱེས་མཆོག་ཡོངས་སུ་གྲགས་པ་དུ་མ་བར་མ་ཆད་དུ་བྱོན་ནོ། ། ཆ༢ གཉིས་པ་ཁ་ཆེའི་ལུགས་ནི། པཎ་ཆེན་སློབ་མ་དཔལ་མཚན་རྣམ་གཉིས་ཀྱི། ། སྡོམ་པའི་རྒྱུན་བཅས་ད་ལྟའི་བར་དུ་དར། ། མ་འོངས་པའི་སངས་རྒྱས་གསུམ་པ་རབ་གསལ་གྱི་རྣམ་འཕྲུལ་དུ་གྲགས་པ་ཁ་ཆེ་པཎ་ཆེན་ཤཱཀྱ་ཤྲཱི་མདོ་རྒྱུད་མཐའ་དག་ལ་མངའ་བརྙེས་ཤིང་ཡི་དམ་གྱི་ལྷ་མང་པོ་གཟིགས། སྦྱངས་པའི་ཡོན་ཏན་བཅུ་གཉིས་སྐུ་ཉམས་སུ་བསྟར། དུས་དེའི་འདུལ་བ་འཛིན་པ་ཐམས་ཅད་ཀྱི་གཙོ་བོར་གྱུར། འདི་ལ་བསོད་སྙོམས་ཐེངས་རེ་ཕུལ་ན་ཡང་སུམ་ཅུ་རྩ་གསུམ་དུ་སྐྱེའོ་ཞེས་པའི་སྙན་པས་ཁྱབ། དེ་རྒྱ་གར་དུ་བཞུགས་པའི་དུས་ཉིད་དུ་བོད་ནས་དཔྱལ་ལོ་ཙཱ་བ་ཆོས་ཀྱི་བཟང་པོ་དང༌། ཆག་དགྲ་བཅོམ་སོགས་ཀྱིས་དེའི་དྲུང་དུ་བསྙེན་པར་རྫོགས། པཎ་ཆེན་དེ་ཉིད་ཁྲོ་ཕུ་ལོ་ཙཱ་བ་བྱམས་པ་དཔལ་གྱིས་བོད་དུ་གདན་དྲངས་ཏེ་ཕྲིན་ལས་དཔག་མེད་བྱུང༌། ཆུ་ཤུལ་སྲོག་མ་དགོན་པར་ཉིན་གཅིག་ལ་མི་བཅུ་གཅིག་བསྙེན་པར་རྫོགས་པའི་ནང་ནས་གྲོ་ཤུལ་ཁེར་གད་བྱང་ཆུབ་དཔལ་དང༌། གཙང་པ་རྡོ་རྗེ་དཔལ་གཉིས་མཁན་བུའི་གཙོ་བོར་གྱུར། བྱང་ཆུབ་དཔལ་གྱིས་དགེ་འདུན་སྒང་དང༌། རྡོ་རྗེ་དཔལ་གྱིས་སྙེ་མོ་ཚལ་མིག་བཙུགས། དེ་གཉིས་ལ་སློབ་མ་དབུ་མཛད་བསོད་ནམས་དང༌། དཀོན་མཆོག་རྒྱལ་མཚན་གཉིས་བྱུང་སྟེ་ཆོས་ལུང་དང་བྱེ་རྫིང་གཉིས་དང་བཅས་ཚོགས་པ་བཞི་བཙུགས་པས་(༡༤༡ན)ཚོགས་སྡེ་བཞི་ཞེས་དེ་ནས་འཕེལ་བ་དང༌། ཉང་སྟོད་རྒྱན་གོང་གི་གཙུག་ལག་ཁང་དུ་འཇམ་དབྱངས་ས་སྐྱ་པཎ་ཆེན་བསྙེན་པར་རྫོགས་པ་ལས་རྒྱ་ཆེར་འཕེལ་ཞིང༌། ཁྱད་པར་དཔལ་མཚན་རྣམ་གཉིས་ལས་བྱང་ཆུབ་དཔལ་བའི་སྡོམ་རྒྱུན་ཐམས་ཅད་མཁྱེན་པ་ཀརྨ་པ་ན་རིམ་གྱིས་བཞེས་པ་དང༌། རྡོ་རྗེ་དཔལ་བའི་སྡོམ་རྒྱུན་ངོར་ཆེན་རྡོ་རྗེ་འཆང་ཀུན་དགའ་བཟང་པོས་བཞེས་ཏེ་ཀར་ལུགས་པ་དང་ས་ལུགས་པ་རྣམས་ལ་ད་ལྟའི་བར་དུ་དར་ཞིང་རྒྱས་པ་ས་པཎ་སྡོམ་རྒྱུན་ཕྱིས་སུ་རྒྱལ་དབང་ལྔ་པ་ཆེན་པོའི་ཕྲིན་ལས་ཀྱིས་དར་རྒྱས་མཛད། ཆོས་ལུང་པ་དང་བྱེ་རྫིང་པའི་སྡོམ་རྒྱུན་ནི་དེང་སང་མི་བཞུགས་པར་མངོན་ལ། སྤྱིར་ཚོགས་སྡེ་བཞི་རང་རང་གི་ཆོས་སྡེར་ནི་ཕྱིས་སུ་རང་རང་གི་སྡོམ་རྒྱུན་ཆད་མོད་གཞན་དུ་བརྒྱུད་ནས་འཕེལ་ཞིང༌། སྡོམ་རྒྱུན་འདི་ལས་ཕྱི་དར་གྱི་སྐབས་སུ་ཡོངས་སུ་གྲགས་པའི་སྐྱེས་མཆོག་མཁས་གྲུབ་བགྲང་ལས་འདས་པ་བྱོན་ཅིང༌། ཁྱད་པར་རྩོད་དུས་ཀྱི་ཐམས་ཅད་མཁྱེན་པ་བུ་སྟོན་རིན་ཆེན་གྲུབ་དང༌། རྗེ་རིན་པོ་ཆེ་བློ་བཟང་གྲགས་པ་ཡབ་སྲས་རྣམས་ཀྱིས་དམ་ཆོས་འདུལ་བའི་བཤད་པ་དང་ལག་ལེན་ཆེས་ཁྱད་པར་དུ་འཕགས་པས་ས་ཆེན་པོའི་ཁོངས་སུ་ཁྱབ་པར་མཛད་པ་ཡིན་ནོ། ། ཆ༣ གསུམ་པ་སྟོད་འདུལ་ནི། པཱ་ལའི་བརྒྱུད་པ་སྟོད་འདུལ་གྲགས་པའང་བྱུང༌། ། གླང་དར་མས་བསྟན་པ་བསྣུབས་པའི་རྗེས་བོད་སིལ་བུར་འཐོར་ཡང༌། སྟོད་མངའ་རིས་སུ་ཆོས་རྒྱལ་གྱི་གདུང་ལས་ཆབ་སྲིད་ཞྭ་ཙམ་ཞིག་ཆགས་པའི་སྐབས་བསྟན་པ་ཕྱི་དར་གྱི་འགོ་རྩོམ་པའི་དུས་སུ། ལྷ་བླ་མ་ཡེ་ཤེས་འོད་ཀྱིས་འཕགས་ཡུལ་ནས་པཎྜི་ཏ་དྷརྨ་པཱ་ལ་སྤྱན་དྲངས་ནས་པཱ་ལ་གསུམ་སོགས་མང་པོ་རབ་ཏུ་བྱུང་ཞིང་བསྙེན་པར་རྫོགས་སུ་བཅུག །དེ་ལས་པྲཛྙཱ་པཱ་ལའི་མཁན་བུ་ཞང་ཞུང་རྒྱལ་བའི་ཤེས་རབ། དེས་པཎྜི་ཏ་མང་པོ་ལ་གཏུགས་ཤིང༌། ཁྱད་པར་བལ་པོའི་འདུལ་འཛིན་པྲེ་ཏ་ཀ་ལས་(༡༤༡བ)འདུལ་བའི་ལག་ལེན་ཐམས་ཅད་ལ་མཁས་པར་སྦྱངས། ཁ་ཆེ་ཛྙཱ་ན་ཤཱི་ལ་ལས་སོ་ཐར་མདོའི་འགྲེལ་པ་འདུལ་བ་བསྡུས་པ་དང༌། ཁ་ཆེ་ཤྲཱི་སུ་བྷུ་ཏི་ཤཱནྟ་ལས་སུམ་བརྒྱ་པ་རྩ་འགྲེལ། ས་མནྟ་ཤྲཱི་ཛྙཱ་ན་ལས་ཀཱ་རི་ཀཱ་ལྔ་བཅུ་པ་དང་ལོ་དྲི་བ་གཉིས་སོགས་ལེགས་པར་མཉན་ནས་འགྱུར་བཅོས་དང་བསྒྱུར་ཅིང་བཤད་པ་སོགས་ཀྱིས་ལེགས་པར་གཏན་ལ་ཕབ། ཞང་ཞུང་བའི་སློབ་མ་ལོ་ཙཱ་བ་དཔལ་འབྱོར་གྱིས་བལ་པོ་ཛ་ཡ་ཀ་ར་ལས་དགེ་སློང་གི་ཀཱ་རི་ཀཱ་དང༌། ཁ་ཆེ་བ་ར་ཧི་ཏ་དང་མ་ཧཱ་ཛ་ན་ལས་དགེ་ཚུལ་གྱི་བསླབ་པའི་གཞི་མདོ་རྣམས་གསན་ཅིང་དེ་དག་ལས་རིམ་པར་བརྒྱུད་དེ། མདོར་ན། པཱ་ལའི་རྒྱུན་ལས་སྟོད་འདུལ་དུ་གྲགས་པ་ཧ་ཅང་དར་རྒྱས་མི་ཆེ་བའི་འབྲེང་ངེ་བ་བྱུང་ཞིང༌། དེ་ལས་ཀྱང་མཁས་གྲུབ་ཁྱད་འཕགས་འགའ་ཞིག་བྱུང་བ་དང༌། འགོས་ལོ་གཞོན་ནུ་དཔལ། སྤྱན་སྔ་ཆོས་ཀྱི་གྲགས་པ་སོགས་ཀྱང་སྡོམ་རྒྱུན་འདི་ལས་བསྙེན་པར་རྫོགས་པ་ཡིན་ནོ། ། སྡོམ་རྒྱུན་དེ་གསུམ་གའང་གཞི་ཐམས་ཅད་ཡོད་པར་སྨྲ་བའི་ལུགས་ཡིན་ཏེ་བོད་ཡུལ་འདིར་ལྟ་བ་དབུ་མ་དང་སྤྱོད་པ་ཡོད་སྨྲའི་ལུགས་ལས་གཞན་བྱུང་དུ་མི་དབང་བར་ཆོས་རྒྱལ་གྱི་བཀས་བཅད་པའི་ཕྱིར་ཇོ་བོ་རྗེ་ཕལ་ཆེན་སྡེ་པ་ཡིན་པས་སྡོམ་རྒྱུན་སྤེལ་བར་མ་ཞུས་པས་མཚོན་ནོ། ། ཅ༣ གསུམ་པ་ལུང་ཆོས་འཛིན་པའི་བཤད་རྒྱུན་ཇི་ལྟར་བྱུང་བ་བརྗོད་པ་ལ་གཉིས། ཆ༡ བཤད་སྒྲུབ་སྤྱིའི་གླེང་བསླང་བ། ཆ༢ བཤད་རྒྱུན་བྱེ་བྲག་ཏུ་འཆད་པའོ། ། ཆ༡ དང་པོ་ནི། ལུང་རྟོགས་འཛིན་བྱེད་བཤད་དང་སྒྲུབ་པ་སྟེ། ། དེ་ལ་བསྟན་པ་དམ་པའི་ཆོས་ནི་ལུང་དང་རྟོགས་པ་གཉིས་ཀྱིས་བསྡུས་པ་སྟེ། བསྟན་པ་དེ་དག་འཛིན་བྱེད་ཀྱི་ཐབས་ཀྱང་ལུང་གི་ཆོས་བཤད་ཉན་གྱིས་གཏན་ལ་ཕབ་ཅིང༌། རྟོགས་པའི་བསྟན་པ་ཐོས་དོན་སྒྲུབ་པའི་སྒོ་ནས་ལམ་བྱང་ཕྱོགས་སོ་བདུན་རང་རྒྱུད་ལ་ཉམས་སུ་ལེན་ཅིང་འཛིན་དགོས་པ་སྟེ། སློབ་དཔོན་ཆེན་པོ་དབྱིག་གཉེན་ཞབས་ཀྱིས། སྟོན་པའི་བསྟན་པ་རྣམ་གཉིས་ཏེ། ། ལུང་དང་རྟོགས་པའི་བདག་ཉིད་དོ། ། དེ་འཛིན་(༡༤༢ན)བྱེད་པ་སྨྲ་བྱེད་དང༌། ། སྒྲུབ་པར་བྱེད་པ་ཁོ་ན་ཡིན། ། ཞེས་གསུངས་པ་ལྟར་རོ། ། ཆ༢ གཉིས་པ་[བཤད་རྒྱུན་བྱེ་བྲག་ཏུ་འཆད་པ་]ལ་གསུམ། ཇ༡ ཐེག་པ་ཐུན་མོང་གི་བཤད་རྒྱུན། ཇ༢ ཐུན་མིན་གསང་སྔགས་ཀྱི་བཤད་རྒྱུན། ཇ༣ བཤད་པའི་བཀའ་བབ་མདོར་བསྡུ་བའོ། ། ཇ༡ དང་པོ་ལ་བཞི། ཉ༡ འདུལ་བ། ཉ༢ མངོན་པ། ཉ༣ ཕར་ཕྱིན། ཉ༤ དབུ་མའི་བཤད་རྒྱུན་བྱུང་ཚུལ་ལོ།། ཉ༡ དང་པོ་ནི། འདུལ་བའི་བཤད་རྒྱུན་ལྷོ་ཕྱོགས་འཕགས་ཡུལ་དུ། ། ཡོད་སྨྲའི་དགོངས་འགྲེལ་ཡོན་ཤཱཀ་རྣམ་པ་གཉིས། ། བཤེས་གཉེན་དྲུག་ལ་སོགས་པས་རྒྱ་ཆེར་སྤེལ། ། དེ་ལ་དང་པོ་དམ་ཆོས་འདུལ་བའི་བཤད་རྒྱུན་གྱི་བྱུང་བ་སྨོས་པ་ལ། ཐོག་མར་ལྷོ་ཕྱོགས་རྒྱ་གར་འཕགས་པའི་ཡུལ་དུ་ཉན་ཐོས་རྩ་བའི་སྡེ་པ་བཞི་ལ་ལེགས་སྦྱར་སོགས་སྐད་རིགས་སོ་སོས་བཅིངས་པའི་རྩ་བའི་ལུང་སོ་སོར་ཐར་པ། བཤད་པའི་ལུང་འདུལ་བ་སྡེ་བཞི་མི་འདྲ་བ་རེ་རེ། བཞི་པོ་དེ་ལས་གྱེས་པ་བཅོ་བརྒྱད་ལའང་རྩ་བ་དང་བཤད་པའི་ལུང་ཐ་དད་པ་རེ་ཡོད་པར་གྲགས་པ་ལས། འདིར་གཞི་ཐམས་ཅད་ཡོད་པར་སྨྲ་བའི་ལུགས་ཀྱིས་བཤད་བྱའི་བཀའ་ལུང་སྡེ་བཞིའི་གོ་རིམ་དང་བརྗོད་བྱའི་གནས་ཚུལ་གསེར་མདོག་པཎ་ཆེན་བཞེད་པ་ལྟར་ན། ལུང་རྣམ་འབྱེད་སོ་ཐར་གྱི་མདོའི་ཚིག་འགྲེལ་ལྟ་བུ། ལུང་ཕྲན་ཚེགས་བསླབ་བྱ་ཕྲ་མོ་ཐམས་ཅད་རྒྱས་པར་བསྟན་པའི་སྒོ་ནས་སོ་ཐར་གྱི་སྤྱི་དོན་ལྟ་བུ། ལུང་གཞི་མ་ཚང་བ་ཁ་སྐོང་བ་ལྟ་བུ། ལུང་བླ་མ་དཀའ་བའི་གནས་གཏན་ལ་འབེབས་པ་ལ་ཤིན་ཏུ་གཅེས་པ་རྣམས་སོ། ། འཆད་བྱེད་ཀྱི་བསྟན་བཅོས་ནི། ཉན་ཐོས་ཐུན་མིན་གྱི་འདུལ་བ་བྱེ་བྲག་བཤད་མཛོད་ཆེན་མོས་འཆད་པར་གྲགས་ལ། ཐེག་ཆེན་དང་ཐུན་མོང་བའི་འདུལ་བ་ནི། དབྱིག་གཉེན་གྱི་སློབ་མ་རང་ལས་མཁས་པ་བཞིའི་ཡ་གྱལ་འདུལ་བ་རང་ལས་མཁས་པ་བྲམ་ཟེའི་སློབ་དཔོན་ས་གསུམ་པ་འོད་བྱེད་ལ་གནས་པ་ཡོན་ཏན་འོད་ཀྱིས་ལུང་སྡེ་བཞི་འཁྲུགས་པ་གོ་རིམ་དུ་བསྡེབས་ནས་གཞི་བཅུ་བདུན་གྱི་(༡༤༢བ)ཁོངས་སུ་བསྡུས་པ་མདོ་རྩ་བ། ལས་ཀྱི་ཆོ་ག་ཕྱོགས་གཅིག་ཏུ་བསྡུས་པ་ཀརྨ་ཤ་ཏཾ་སོགས་མཛད་པ་དང༌། དགྲ་བཅོམ་པ་ས་གའི་ལྷས་མེ་ཏོག་ཕྲེང་བརྒྱུད། ཁ་ཆེ་དགེ་འདུན་བཟང་པོས་ཀཱ་རི་ཀཱ་ལྔ་བཅུ། སློབ་དཔོན་ཤཱཀྱ་འོད་ཀྱིས་འདུལ་བ་སུམ་བརྒྱ་པ་རྩ་འགྲེལ་མཛད་པ་སོགས་ལས་ཀྱང་གཙོ་བོར་ཡོན་ཤཱཀ་གཉིས་ཡོངས་སུ་གྲགས་ཤིང༌། ཡོན་ཏན་འོད་ལ་འདུལ་བ་འབུམ་སྡེ་ཐོན་པའི་སློབ་མ་ཁོ་ནའང་ལྔ་བརྒྱ་ཙམ་བྱུང་བར་གྲགས་པ་ལས། ཆོས་ཀྱི་བཤེས་གཉེན་གྱིས་འདུལ་བ་མདོའི་རྒྱ་ཆེར་འགྲེལ་རྒྱ་བོད་ཀུན་ཏུ་ཚད་མར་བྱེད་པ་དེ་མཛད། གཞན་ཡང་དྲི་མེད་བཤེས་གཉེན། ཁྱད་པར་བཤེས་གཉེན། དགེ་ལེགས་བཤེས་གཉེན། དགེ་བའི་བཤེས་གཉེན། ཚུལ་ཁྲིམས་བཤེས་གཉེན་ཏེ་བཤེས་གཉེན་དྲུག་ལ་སོགས་པས་རྒྱ་ཆེར་འཆད་ཅིང་སྤེལ་ལོ། ། ལྗོངས་འདིར་དཱ་ན་ཛི་ན་ཅོག་རོའི་བརྒྱུད། ། གཟུས་ལ་བཤད་རྒྱུན་གཉིས་འདྲེས་བུ་བཞི་ལས། ། རིམ་མཆེད་མཚོ་སྣ་རྒྱ་དང་བྱ་འདུལ་སོགས། ། ཁྱད་འཕགས་མང་བྱོན་ཀུན་མཁྱེན་བུ་སྟོན་ལ། ། བཀའ་བབ་ཐུབ་དབང་གཉིས་པའི་ཕྲིན་ལས་མཛད། ། གངས་ཅན་གྱི་ལྗོངས་འདིར་འཕགས་ཡུལ་གྱི་སློབ་དཔོན་དཱ་ན་ཤཱི་ལ་དང༌། ཛི་ན་མི་ཏྲ་གཉིས་ལས་ཅོག་རོ་ཀླུའི་རྒྱལ་མཚན་གྱིས་གསན། དེ་ལས་སྨར་གཡོ་གཙང་གསུམ་གྱིས་ཞུས། དེས་བླ་ཆེན་དགོངས་པ་རབ་གསལ། དེ་བཞི་ཀས་ཀླུ་མེས། དེས་གཟུས་རྡོ་རྗེ་རྒྱལ་མཚན་ལ་བཤད། ཡང་ཛི་ན་དཱ་ན་གཉིས་ལས་ཤཱཀྱ་སེ་ན། དྷརྨ་པཱ་ལ། ཀླུ་བ་ལོ་ཙཱ་དང༌། སྐྱོགས་འདུལ་འཛིན་གཉིས། དེ་གཉིས་ལ་གཟུས་ཀྱིས་ཐུག་སྟེ། དེ་ནས་སྟོད་སྨད་ཀྱི་བཤད་རྒྱུན་གཉིས་གཅིག་ཏུ་འདྲེས་པ་དེ་ཉིད་གཟུས་ཀྱི་བུ་བཞིར་གྲགས་པ། འཛིམ་པ་ཤེས་རབ་འོད་དང་སྣེ་སོ་གྲགས་པ་རྒྱལ་མཚན་ཏེ་གཙང་གི་བུ་གཉིས། སྤོ་ཆུང་ཚུལ་ཁྲིམས་བླ་མ་དང་གླན་ཚུལ་བྱང་སྟེ་དབུས་ཀྱི་བུ་གཉིས་ལས་རྒྱ་