Tibetan
དེ་གཉིས་ཕྱག་གཉིས་སུ་བསྣམས། སློབ་དཔོན་ཡབ་ཡུམ་བདེ་མཆོག་ལྷན་སྐྱེས་ཀྱི་རྣམ་པར་གྱུར་ནས་ནམ་མཁའ་ལ་གཤེགས་པའི་རྫུ་འཕྲུལ་བསྟན་པས་མཚན་ཡང་རྡོ་རྗེ་དྲིལ་བུ་པར་གྲགས། དེ་ནས་བརྩམས་ཏེ་སྔགས་ཀྱི་ཐེག་པའི་འགྲོ་དོན་མཛད། སློབ་དཔོན་འདིས་བདེ་མཆོག་ལུས་དཀྱིལ་སྒྲུབ་ཐབས། དབང་ཆོག །རྫོགས་རིམ་རིམ་ལྔ་སྟེ་དྲིལ་བུ་སྐོར་གསུམ་དུ་གྲགས་པ་མཛད། སློབ་མ་གྲུབ་ཐོབ་དུ་མ་བྱོན་ཀྱང་གཙོ་བོར་རུ་སྦལ་ཞབས། དེས་ཛཱ་ལནྡྷ་རི་པ། དེས་ནག་པོ་པ་སོགས་རིམ་བཞིན་གྲུབ་པའི་གནས་སུ་བཀོད། དེ་ལ་སློབ་དཔོན་ནག་པོ་སྤྱོད་པ་ནི། དུས་ཀྱི་འཁོར་ལོའི་རྒྱུད་ཕྱི་མ་ལས། ཁ་ཊཱཾ་ཅང་ཏེའུ་ཆང་སྣོད་ཐོགས་པ་ནག་པོའི་མིང་ཅན་རྣལ་འབྱོར་འབྱུང་བར་འགྱུར། ། ཞེས་དང༌། ནག་པོ་ཆེན་པོ་མགོན་པོ་མངོན་འབྱུང་གི་རྒྱུད་ལས། ཡུལ་ཨུ་རུ་བི་ཤ་དེར་སྐྱེས་བུ་བརྩོན་འགྲུས་དང་ལྡན་ཞིང་སྦྱོར་བ་ལ་བརྩོན་པ། རཱ་མ་ཎའི་བཀའི་འཇུག་པ་དང་མཐུན་པ་སྡེ་ཚན་དང་པོའི་དང་པོ་བདུན་པའི་བཞི་པ་(༡༣༠ན)ཅུང་ཟད་རྣལ་ཞོན་པ་སྐྱེས་བུའི་མཆོག་འདིས་རལ་གྲི་ལ་སོགས་པའི་དངོས་གྲུབ་བརྒྱད་ཐོབ་པར་འགྱུར་རོ། །འཛམ་བུའི་གླིང་དུ་མ་བྱུང་ཞིང་འབྱུང་བར་མི་འགྱུར་རོ། །དེའི་སློབ་མ་དྲུག་གིས་ལུས་ཀྱི་དངོས་པོ་སྤངས་པའི་ཕྱག་རྒྱ་ཆེན་པོའི་དངོས་གྲུབ་ཐོབ་པར་འགྱུར་རོ། །ཞེས་ལུང་གིས་བསྟན་ཅིང༌། གྲུབ་ཐོབ་སྟོང་དང་བཞི་བརྒྱའི་འཁོར་གྱིས་བསྐོར་བ། ཡུལ་གྲུ་ཆེན་པོ་བཅུ་གསུམ་གྱི་སྐྱེ་བོ་ཐམས་ཅད་རྡོ་རྗེ་འཛིན་པའི་ས་ལ་བཀོད་ཅིང་མཁའ་འགྲོ་མ་སྐལ་པ་བཟང་མོའི་ཕྱག་ནས་སམྦུ་ཊའི་རྒྱུད་སྤྱན་དྲངས་པ་སོགས་གྲུབ་པའི་སློབ་དཔོན་ཆེས་ཆེ་བ་དེ་ལ་དཔལ་ཧེ་རུ་ཀའི་བཀས་བསྐུལ་བ་བཞིན་དུ་འཁོར་ལོ་སྡོམ་པའི་སྒྲུབ་ཐབས་དབང་ཆོག་སྦྱིན་སྲེག་སྟེ་བསྐྱེད་རིམ་གཞུང་གསུམ་དང༌། དཔྱིད་ཀྱི་ཐིག་ལེ་དང་རིམ་པ་བཞི་པ་དང་གསང་བའི་དེ་ཁོ་ན་ཉིད་དེ་རྫོགས་རིམ་གཞུང་གསུམ་སྟེ་ནག་པོ་གཞུང་དྲུག་ཏུ་གྲགས་པ་མཛད་ཅིང་བདེ་མཆོག་གི་ཆོས་སྐོར་ཁུངས་མ་རྣམས་ཀྱི་ནང་ནས་ལུགས་འདི་རྒྱས་ཤོས་ཡིན། ཕྱིས་ཇོ་བོ་ནཱ་རོ་པ་ཡང་ལུགས་འདི་ཁོ་ན་གཙོ་བོར་མཛད་དོ། ། བི་རཱུ་པཱཀྵ་མཚོ་སྐྱེས་ལ་ལི་ཏས། ། གཤེད་དམར་དགྱེས་རྡོར་རྟོག་པ་བདུན་སོགས་བླངས། ། སློབ་དཔོན་ལཱུ་ཡི་པའི་འོག་ཙམ་དུ་ནཱ་ལནྡའི་མཁན་པོ་རྒྱལ་བའི་ལྷའི་སློབ་མ་བི་རཱུ་པ་བྱུང་སྟེ་སློབ་དཔོན་ཀླུའི་བྱང་ཆུབ་ལས་གཤིན་རྗེ་གཤེད་ཀྱི་དབང་དང་གདམས་ངག་ཞུས་ཏེ་བསྒོམས་པས་གྲུབ། བདག་མེད་ལྷ་མོ་བཅོ་ལྔའི་དཀྱིལ་འཁོར་དངོས་སུ་བྱོན་ནས་དབང་བསྐུར་བས་རིམ་གྱིས་ས་དྲུག་པ་བརྙེས། ཝ་ར་ཎཱ་སིའི་མུ་སྟེགས་ཀྱི་རྒྱལ་པོ་སོགས་མུ་སྟེགས་བྱེད་མང་པོ་རྫུ་འཕྲུལ་གྱིས་བཏུལ། ཨཽ་ཌྱན་ནས་གཤིན་རྗེ་གཤེད་དམར་པོའི་རྒྱུད་སྤྱན་དྲངས། དེའི་སྒྲུབ་ཐབས་སོགས་བརྩམས་ཏེ་འགྲོ་དོན་དང་བསྟན་པ་ལ་བྱ་བ་བླ་ལྷག་ཏུ་མཛད། སློབ་དཔོན་ས་རོ་རུ་ཧ་སྟེ་མཚོ་སྐྱེས་ནི་ཀུ་ཀུ་རཱ་ཛར་ཡང་གྲགས་ཤིང་ཁྱིའི་རྣམ་པ་ཅན་གྱི་དཔའ་བོ་རྣལ་འབྱོར་མ་མང་པོ་དང་ལྷན་ཅིག་ཚོགས་ཀྱི་འཁོར་(༡༣༠བ)ལོ་སོགས་དམ་ཚིག་གི་སྤྱོད་པ་མཛད་ཅིང་ཟླ་གསང་ཐིག་ལེའི་རྒྱུད་ལ་བརྟེན་ནས་གྲུབ་པ་ཐོབ་པ་དེས་ཨོ་ཌྱན་ནས་དགྱེས་པ་རྡོ་རྗེའི་རྒྱུད་སྤྱན་དྲངས། སྒྲུབ་ཐབས་སོགས་བསྟན་བཅོས་ཀྱང་མཛད། ནང་རྒྱུད་སྡེ་ལྔ་དང་རྣལ་འབྱོར་རྒྱུད་རྒྱ་ཆེར་བཤད། སློབ་དཔོན་ལ་ལི་ཏ་བཛྲ་ནི་རྡོ་རྗེ་རོ་ལངས་མས་ཞལ་མངོན་སུམ་དུ་བསྟན་ནས་གཤིན་རྗེ་གཤེད་ཀྱི་དཀྱིལ་འཁོར་དུ་དབང་བསྐུར། མན་ངག་བསྒོམས་པས་དྲོད་ཐོབ། རིག་པ་བརྟུལ་ཞུགས་ཀྱི་སྤྱོད་པ་མཛད། ཨོ་ཌྱན་ནས་སྐུ་གསུང་ཐུགས་གཤིན་རྗེ་གཤེད་ནག་པོའི་རྒྱུད། སྡོམ་པ་གསུམ་པ། རྟོག་བདུན་སོགས་མང་པོ་ཐུགས་ལ་བཟུང་ནས་བྱོན། འཕགས་པའི་ཡུལ་སོགས་སུ་དེ་དག་གསལ་བར་མཛད། མངོན་སྤྱོད་ཀྱི་ཕྲིན་ལས་ཀྱིས་བསྟན་ལ་སྡང་བའི་མུ་སྟེགས་དང་ཏ་ཟིག་སོགས་མང་པོ་ཚར་བཅད་ནས་བསྟན་པ་བསྐྱངས་སོ། ། མཉམ་སྦྱོར་ལ་སོགས་ཟ་ཧོར་ཡུལ་དུ་བྱོན། ། སངས་རྒྱས་མཉམ་སྦྱོར་ལ་སོགས་པའི་རྒྱུད་སྡེ་བཅོ་བརྒྱད་ཙམ་ཟ་ཧོར་གྱི་ཡུལ་དུ་བྱོན་པ་ཡུལ་དེའི་རྒྱལ་པོ་ཨིནྡྲ་བྷཱུ་ཏི་ལ་སློབ་དཔོན་ཀུ་ཀུ་རཱ་ཛས་བཀྲོལ་ཏེ་བཤད་ཅིང་རྒྱལ་པོ་འཁོར་བཅས་ཀྱིས་རྡོ་རྗེ་དབྱིངས་ཀྱི་དཀྱིལ་འཁོར་ལྟར་བྱས་ནས་བསྒོམས་པས་ཐམས་ཅད་ཀྱིས་མཆོག་གྲུབ་པ་དང༌། དེའི་སྲས་ཤཱཀྱ་པྲ་བུ་དྷི་འཁོར་བཅས་ཀྱིས་ཀྱང་དེ་བཞིན་དུ་བསྒོམ་པས་གྲུབ། དེའི་སྲས་མོ་གོ་མ་དེ་བཱི་འཁོར་བཅས་ཀྱང་གྲུབ་པ་ཐོབ་པ་སོགས་ཤེར་ཕྱིན་ཚུལ་བརྒྱ་ལྔ་བཅུ་པའི་འགྲེལ་པ་ལས་བཤད་དེ། སྔ་འགྱུར་ཏནྟྲ་སྡེ་བཅོ་བརྒྱད་བབས་ལུགས་ཀྱི་བཤད་སྲོལ་དང་དོན་མཐུན་པར་སྣང་ངོ༌། ། གཞན་ཡང་རྟ་མཆོག་ཌོམྦྷི་ལྭ་བ་པ། ། ཀུ་ཀུ་རཱི་པ་ཟབ་རྡོར་ཏེ་ལོ་པ། ། ཞི་སྦས་ཞབས་སོགས་རྩོད་པའི་ཐ་མའི་བར། ། གྲུབ་པའི་དབང་ཕྱུག་གྲངས་མེད་བྱོན་རྣམས་ཀྱིས། ། རྡོ་རྗེ་ཐེག་པའི་བསྟན་པ་ཉི་ལྟར་གསལ། ། འཕགས་ཡུལ་དུ་སྔ་ཕྱིར་གྲུབ་པ་ཐོབ་པ་བྱོན་པའི་རྣམ་གྲངས་དང་དེ་དག་གིས་རྡོ་རྗེ་ཐེག་པའི་ཆོས་ཚུལ་སྤེལ་བའི་རྣམ་གྲངས་ནི་བསམ་གྱིས་མི་ཁྱབ་ཀྱང༌། (༡༣༡ན)གཙོ་བོར་གྱུར་པ་བཤད་མ་ཐག་པ་དེ་དག་དང༌། གཞན་ཡང་རྒྱ་ནག་ཏུ་འཁྲུངས་ཞིང་རྟ་མགྲིན་དང་གཤིན་རྗེ་གཤེད་ཀྱི་གྲུབ་ཐོབ་སློབ་དཔོན་རྟ་མཆོག་ཞབས་ཀྱིས་ཨཽ་ཌྱན་ནས་འཇམ་དཔལ་རྩ་བའི་རྒྱུད་སྒྱུ་འཕྲུལ་དྲྭ་བ་ཁྲི་དྲུག་སྟོང་པ་སྤྱན་དྲངས། བི་རཱུ་པའི་སློབ་མ་ཀོ་མཁན་ལས་གྲུབ་པ་བརྙེས་པ་ཌོམྦྷི་པས་ཀྱང་ཤར་ཕྱོགས་ཀྱི་རྒྱལ་པོ་སེ་ན་ར་བཏུལ། ཡུལ་ཁམས་དེའི་མི་ཕྱུགས་ཐམས་ཅད་གྲོལ་ནས་མཁའ་སྤྱོད་གྲུབ། ཨཽ་ཌྱན་ནས་ཀུ་རུ་ཀུལླེའི་རྟོགས་པ་དང༌། ཨཱ་རལླིའི་རྒྱུད་གཉིས་སྤྱན་དྲངས། མངོན་ཤེས་ཀྱིས་རྒྱུད་དོན་གཟིགས་པའི་ཕྱིར་ཡེ་ཤེས་ཀྱི་མཁའ་འགྲོ་མ་རྣམས་དང་བཀའ་བགྲོས་ནས། དགྱེས་པ་རྡོ་རྗེའི་རྒྱུད་ཀྱི་སྙིང་པོ་བླངས་ཏེ་བདག་མེད་མའི་སྒྲུབ་ཐབས་དང༌། ལྷན་ཅིག་སྐྱེས་གྲུབ་སོགས་བསྟན་བཅོས་ཀྱང་མང་དུ་མཛད། ཌོམྦྷི་ཧེ་རུ་ཀས་ཨོ་རྒྱན་གྱི་ཡུལ་དུ་ཆང་འཚོང་མ་བི་ན་ས་བཏུལ་ནས། དེས་ལྭ་བ་པ་ལ་དབང་བསྐུར་ཅིང་རྒྱུད་མཐའ་དག་གཏད། ལོ་བཅུ་གཉིས་མནལ་འོད་གསལ་དུ་ལོག་པས་མཆོག་གྲུབ། ཨཽ་ཌྱན་ནས་དགྱེས་པ་རྡོ་རྗེའི་རྒྱུད་སྤྱན་དྲངས། སྭ་སཾ་བེ་ད་པྲ་ཀྲྀ་ཏ་ཞེས་བྱ་བ་རྫོགས་རིམ་གཙོ་བོར་སྟོན་པ་སོགས་བསྟན་བཅོས་མང་དུ་བརྩམས། ཨཽ་ཌྱན་གྱི་རྒྱལ་པོ་ཨིནྡྲ་བྷཱུ་ཏི་བར་པ་དད་པར་བྱས་ཏེ་མཆོག་གི་གྲུབ་པ་ལ་བཀོད། ཤར་ཕྱོགས་བྷངྒ་ལའི་གྲུབ་ཆེན་ཀུ་ཀུ་རཱི་པས་ཨཽ་ཌྱན་ནས་མ་ཧཱ་མཱ་ཡཱའི་རྒྱུད་སྤྱན་དྲངས། སྒྲུབ་ཐབས་ལ་སོགས་པའི་བསྟན་བཅོས་དྲུག་མཛད། ཁ་ཆེའི་པཎྜི་ཏ་ཟབ་པའི་རྡོ་རྗེས་རྡོ་རྗེ་བདུད་རྩིའི་རྒྱུད་སྤྱན་དྲངས་ཤིང༌། སློབ་དཔོན་བདུད་རྩི་གསང་བ་དང༌། དེས་ཀྱང་སློབ་དཔོན་བྷ་གོ་རྗེས་སུ་བཟུང་ནས་དར། ཤར་ཕྱོགས་ཛ་གོའི་ཡུལ་གྱི་གྲུབ་ཆེན་ཏིལླི་པས་ཙརྱཔ་སོགས་བཀའ་བབ་བཞིའི་བླ་མ་བསྟེན། སྔགས་རྒྱུད་སྤྱི་དང་ཁྱད་པར་བླ་མེད་ཀྱི་སྐོར་ཡོད་དོ་ཅོག་གི་དབང་རྒྱུད་མན་ངག་ཐམས་ཅད་ཡོངས་སུ་རྫོགས་ནས་བྷངྒ་ལར་ལོ་བཅུ་གཉིས་སུ་ཏིལ་བརྡུང་བའི་སྤྱོད་(༡༣༡བ)པ་སྤྱད་པས་མཆོག་གི་དངོས་གྲུབ་མངོན་དུ་མཛད། གཙོ་བོར་ལྷག་པའི་ལྷ་ཤྲཱི་ཧེ་རུ་ཀ་ཉིད་ལས་དངོས་སུ་རྡོ་རྗེ་ཐེག་པ་མཐའ་དག་གསན་ཅིང་གཞན་ལ་བསྟན་པས་བྷངྒ་ལའི་རྒྱལ་ཁམས་ཁོ་ན་ལན་གསུམ་དུ་སྟོངས་པར་གྲགས། མདོར་ན། སྙིང་པོའི་ངེས་གསང་གི་བསྟན་པ་ཉིན་མོ་ལྟར་གསལ་བར་མཛད། དུས་ཕྱིས་རབ་བྱུང་བཅུ་པའི་ནང་འཕགས་ཡུལ་ལྷོ་ཕྱོགས་ཁ་གེནྡྲར་གྲུབ་ཆེན་ཞི་བ་སྦས་པ་བྱོན་ཏེ་གྲུབ་ཐོབ་ཆེན་པོ་ཡེ་ཤེས་བཤེས་གཉེན་དཀའ་སྤྱད་བསམ་གྱིས་མི་ཁྱབ་པས་བསྟེན་པས་མཆོག་གི་དངོས་གྲུབ་མངོན་དུ་གྱུར་ཏེ་སྔོན་གྱི་སློབ་དཔོན་ཆེན་པོ་ལཱུ་ཡི་པ་སོགས་དང་གོ་འཕང་ཡོན་ཏན་མཉམ་པར་ངེས་པ་སོགས་ངོ་མཚར་ཁྱད་དུ་འཕགས་པ་དེས་ལྷོ་ཕྱོགས་ཀྱི་རྒྱུད་དང༌། ཀོ་ཀིའི་ཡུལ་སོགས་སུ་གསང་སྔགས་ཀྱི་བསྟན་པ་རྒྱ་ཆེར་སྤེལ་ཞིང༌། དེའི་སློབ་མ་གྲུབ་ཆེན་སངས་རྒྱས་སྦས་པ་སོགས་རྩོད་པའི་དུས་ཀྱི་ཐ་མ་ལ་ཐུག་གི་བར་གྲུབ་པའི་དབང་ཕྱུག་གྲངས་མེད་པ་བྱོན་པ་རྣམས་ཀྱིས་གསང་སྔགས་རྡོ་རྗེ་ཐེག་པའི་བསྟན་པ་འཕགས་ཡུལ་དུ་ཉིན་མོ་ལྟར་གསལ་བར་མཛད་དོ། ། འདིར་ཇོ་ནང་རྗེ་བཙུན་ཆེན་པོའི་ཞལ་ནས། སྤྱིར་རྒྱ་གར་དུ་གསང་སྔགས་ལ་རིག་པ་འཛིན་པ་འབུམ་ཕྲག་ཐོག་མར་བྱོན། དེ་ནས་དཔལ་ས་ར་ཧ་བྱོན་ནས་བཟུང་རྒྱལ་པོ་དྷརྨ་པཱ་ལ་འདས་པའི་བར་དུ་གྲུབ་ཐོབ་རྒྱུན་མ་ཆད་པར་མ་ཟད་གྲུབ་ཐོབ་མང་པོ་དུས་གཅིག་ཏུ་བཞུགས་པར་བྱུང་བ་ཡིན། དེ་ནས་ཨ་བྷ་ཡཱ་ཀ་ར་འདས་ཀྱི་བར་ལའང་གྲུབ་ཐོབ་རྒྱུན་མ་ཆད་པར་བྱུང་ལ། དེ་མན་ཆད་དུ་རེས་འགའ་ལན་རེ་རེ་ལས་མ་བྱུང༌། ཁྱད་པར་དུས་ཕྱིས་གྲུབ་ཐོབ་གཞན་མེད་པར་ཡུན་རིང་རབ་ཞིག་ན་ཡེ་ཤེས་བཤེས་གཉེན་དང༌། ཨོ་ཀ་ར་ནཱ་ཐ་བྱོན་ཀྱང་སངས་རྒྱས་ཀྱི་བསྟན་པ་ལ་ཕན་ཆེ་བ་ཙམ་མ་བྱུང༌། ཨོ་ཀ་ར་སྐུ་འདས་ནས་ལོ་བརྒྱད་ཅུ་ལོན་ཙམ་ན་གྲུབ་ཆེན་ཞི་བ་སྦས་པས་གྲུབ་པ་བརྙེས་ཏེ། དུས་ཀྱི་དབང་ལས་སངས་རྒྱས་པ་མང་ཉུང་གིས་གཞན་ཕན་ཆེ་ཆུང་མ་གཏོགས་ཇོ་བོ་ནཱ་རོ་པ་ཆེན་པོ་དང་གཞན་ཕན་ཆེ་ཆུང་འདྲ་བ་ལ་(༡༣༢ན)གོ་འཕང་སློབ་དཔོན་འདི་མཐོ་བ་ཡིན་ནོ། །ཞེས་གསུངས་སོ། ། རྒྱལ་རིགས་རབ་གསལ་ཟླ་བས་རྣལ་འབྱོར་རྒྱུད། ། བཤད་ཅིང་རྗེས་འབྲང་མཁས་པ་གསུམ་སོགས་ཀྱིས། ། ཡོ་གའི་རྒྱུད་ཀྱི་རིང་སྲོལ་རྒྱ་ཆེར་ཕྱེས། ། ཡོ་གའི་སྐོར་ནི། ཐོག་མར་རྒྱ་གར་ཤར་ཕྱོགས་ཀྱི་ཡུལ་བྷངྒ་ལར་ཙནྡྲའི་རིགས་ཀྱི་རྒྱལ་ཕྲན་པྲཀཱ་ཤ་ཙནྡྲར་གྲགས་པ་དེ་ལག་ན་རྡོ་རྗེས་དངོས་སུ་བྱིན་གྱིས་བརླབས་པས་གྲུབ་པ་ཐོབ་པར་གྱུར་ཏེ་རྣལ་འབྱོར་རྒྱུད་རྒྱ་ཆེར་བཤད་ཅིང༌། དེའི་རྗེས་འབྲང་ཡོ་ག་ལ་མཁས་པའི་མི་གསུམ་དུ་གྲགས་པ་ལས་སློབ་དཔོན་ཤཱཀྱ་བཤེས་གཉེན་གྱིས་ཡོ་ག་དེ་ཉིད་བསྡུས་པའི་འགྲེལ་པ་ཀོ་ས་ལའི་རྒྱན་སོགས་མཛད་པས་རྣལ་འབྱོར་རྒྱུད་ལ་ཕྱག་རྗེས་ཆེ། སློབ་དཔོན་སངས་རྒྱས་གསང་བས་ཀྲི་ཡོག་སྡེ་གསུམ་གྱི་བསྟན་པ་རྒྱས་པར་མཛད་ཅིང༌། རྣམ་སྣང་མངོན་བྱང་གི་བསྡུས་འགྲེལ། བསམ་གཏན་ཕྱི་མའི་རྒྱས་འགྲེལ། རྡོ་རྗེ་དབྱིངས་ཀྱི་སྒྲུབ་ཐབས་སོགས་མཛད། མ་ག་དྷཱའི་སློབ་དཔོན་ཀུན་དགའ་སྙིང་པོས་བྷངྒ་ལ་ན་རབ་གསལ་ཟླ་བའི་སློབ་མ་རབ་འབྱོར་སྐྱོང་སོགས་མང་པོ་ལ་གཏུགས་ནས་རྣལ་འབྱོར་རྒྱུད་མཐའ་དག་ལ་མཁས་པར་མཛད། བསྒོམས་པས་རྡོ་རྗེ་དབྱིངས་ཀྱི་དཀྱིལ་འཁོར་གཟིགས་ཤིང་བསྟན་བཅོས་བརྩམས་པར་ལུང་བསྟན་ཐོབ། དཔལ་མཆོག་དང་པོ་དང༌། དེ་ཉིད་བསྡུས་པ་སོགས་ཡོ་གའི་རྒྱུད་མང་པོ་ལ་འགྲེལ་པ་བརྩམས་ཤིང་བཤད། གཞན་ཡང་། གསང་བ་འདུས་པ་སོགས་རྒྱུད་མང་པོའི་འགྲེལ་པ་མཛད་དེ་སྔགས་སྤྱི་དང་ཁྱད་པར་ཡོ་གའི་ཚུལ་གསལ་བར་མཛད། གཞན་ཡང་སངས་རྒྱས་ཞི་བ་དང༌། པྲཛྙཱ་པཱ་ལི་ཏ་སོགས་ཀྱིས་ཀྱང་བཤད་སྒྲུབ་རྩལ་དུ་བཏོན་ཏེ་ཡོ་གའི་རྒྱུད་ཀྱི་རིང་སྲོལ་རྒྱ་ཆེར་ཕྱེས་སོ། ། ཙི་ལུ་པ་དང་དུས་ཞབས་ཆེ་ཆུང་གིས། ། དུས་འཁོར་རྒྱུད་བླངས་སེམས་འགྲེལ་དར་བར་མཛད། ། ཤར་ཕྱོགས་ཨོརྦི་པར་ཙི་ལུ་པའམ་པི་ཊོ་ཨཱ་ཙརྱཆེ་བ་བྱོན་ཏེ། མཁས་པ་ཆེན་པོར་གྱུར་པ་དེས་ནཱ་ལནྡ་དང་བི་ཀྲ་མ་ཤཱི་ལ་དང༌། རིན་ཆེན་རི་བོའི་གཙུག་ལག་(༡༣༢བ)ཁང་དུ་སྡེ་སྣོད་དང་རྒྱུད་ཀྱི་གླེགས་བམ་མཐའ་དག་གཟིགས་པའི་ཚེ། སྔགས་ཀྱི་སྦས་དོན་མཐར་ཐུག་འབྱེད་པ་ལ་བྱང་ཆུབ་སེམས་འགྲེལ་དགོས་པས། དེ་ཤམྦྷ་ལ་ན་སྤྲུལ་པའི་རྒྱལ་པོས་སྟོན་པ་ཡོད་ཅེས་འདུག་པ་གཟིགས་པ་དང༌། ལྷག་པའི་ལྷས་ཀྱང་བསྐུལ་ནས་ཤམྦྷ་ལར་བྱོན་པར་དགོངས་ཏེ། བྱོན་པའི་ལམ་ཁར་རིགས་ལྡན་གྱིས་སྤྲུལ་པའི་དགེ་སློང་གི་ཚུལ་དུ་བྱོན་ནས་བྱིན་གྱིས་བརླབས་ཤིང༌། དུས་ཀྱི་འཁོར་ལོའི་དབང་རྒྱུད་མན་ངག་དང་བཅས་གནང་བ་མཐའ་དག་ཐུགས་ལའང་ཟིན་ནས་ཐུགས་ཚིམས་ཏེ་སླར་ལོག །ཝ་རེནྡྲར་པིཎྜོ་པ་ཆུང་བ་རྗེས་སུ་བཟུང་ནས་དབང་རྒྱུད་སོགས་མཐའ་དག་གནང༌། འདིས་དམག་གིས་གནོད་པ་བྱུང་བའི་ཚེ་རྒྱུད་འགྲེལ་རྣམས་སྦས་པ་ལས་ཕྱིས་རྩ་རྒྱུད་རྩ་འགྲེལ་མ་ཚང་བ་ཡིན་ནོ། ། ཁྱད་པར་ཝ་རེནྡྲར་དུས་ཞབས་པ་ཆེན་པོར་གྲགས་པ་བྱོན་ཏེ། དེས་ཙི་ལུ་པ་ཆུང་བ་ལ་ཐུག །དེས་ཀྱང་ཐུགས་མ་ཚིམས་པར་ཤམྦྷ་ལར་བྱོན་པའི་ལམ་ཁར་རིགས་ལྡན་རྣམ་འཕྲུལ་ཞིག་དང་མཇལ་ཏེ། དེས་དབང་བསྐུར། མན་ངག་བསྟན། བསྒོམ་པས་གྲུབ་སྟེ་ཤམྦྷ་ལ་ཉིད་དུ་བརྟོལ། རིགས་ལྡན་ཉིད་ལས་དབང་རྒྱུད་འགྲེལ་མན་ངག་དང་བཅས་པ་དངོས་སུ་ཐོབ། ཚུར་བྱོན་ནས་འཕགས་ཡུལ་དུ་སེམས་འགྲེལ་སྐོར་ཆེས་དར་བར་མཛད། དེའི་སློབ་མ་རྣམས་ལས་དུས་ཞབས་པ་ཆུང་བ་ཤྲཱི་བྷ་དྲས་དཔལ་ནཱ་ལནྡར་པཎྜི་ཏ་ལྔ་བརྒྱ་དང་འབེལ་གཏམ་བྱས་པས། དེ་ཐམས་ཅད་སྨྲ་བས་ཟིལ་གྱིས་མནན། ངག་དབང་གྲགས་པ་དང༌། ཤེས་རབ་འབྱུང་གནས་མ་གཏོགས་ཐམས་ཅད་ཀྱིས་ཞབས་ལ་གཏུགས། ཆོས་འདིས་ས་སྟེང་ཐམས་ཅད་ཁྱབ་པར་མཛད་དེ། རྒྱལ་པོ་དང༌། བློན་པོ་དང༌། ཚོང་དཔོན་ཆེན་པོ་རྣམས་ཀྱིས་ཀྱང༌གླེགས་བམ་བཞེངས་པ་དང༌། བག་ཆགས་འཇོག་པ་བྱུང༌། རྒྱ་གར་དུ་དུས་འཁོར་མ་ཕེབ་གོང་ཕར་བཞག །དེ་ཕྱིན་དུས་འཁོར་གྱི་གྲུབ་ཐོབ་ཕྱོགས་གཅིག་ཏུ་བཞག །ཆོས་གཞན་གྱི་གྲུབ་ཐོབ་ཐམས་ཅད་ཕྱོགས་གཅིག་ཏུ་བཞག་ཀྱང་(༡༣༣ན)དུས་འཁོར་གྱི་གྲུབ་ཐོབ་མང་ངོ༌། ། དུས་ཞབས་པ་ཆུང་བ་དེ་ཉིད་ཀྱི་སྲས་ན་ལེནྡྲ་པའམ་བོདྷི་བྷ་དྲས་ཁ་ཆེའི་པཎྜི་ཏ་ཟླ་བ་མགོན་པོ་ལ་གདམས་པ་སོགས་ལས་ཕྲིན་ལས་རྒྱ་ཆེར་འཕེལ་ཞིང༌། དཔལ་ནཱ་རོ་པས་ཀྱང་དུས་ཀྱི་འཁོར་ལོའི་ཆོས་ཚུལ་རྩལ་དུ་བཏོན་ནས་སྤེལ་བར་གྲགས་སོ། ། ཉ༢ གཉིས་པ་[སྔགས་གྲྭ་དར་ཚུལ་]ནི། ཕྱིས་སུ་དྷརྨ་པཱ་ལས་བཞེངས་པ་ཡི། ། རྣམ་གནོན་ཚུལ་གྱིས་བསྔགས་པའི་གཙུག་ལག་ཏུ། ། ཡེ་ཤེས་ཞབས་སོགས་སྔགས་ཀྱི་སློབ་དཔོན་དང༌། ། མཁས་པ་སྒོ་དྲུག་ཇོ་བོ་འཇིགས་མེད་འབྱུང༌། ། ཤཱཀྱ་ཤྲཱི་སོགས་ཀྱིས་བསྟན་པ་བསྐྱངས། ། འཕགས་པའི་ཡུལ་དུ་ཐེག་པ་ཆེ་ཆུང་གི་ཆོས་གྲྭ་དཔག་ཏུ་མེད་པ་བྱུང་ཡང་སྔགས་ཀྱི་ཆོས་གྲྭ་ཡོངས་སུ་གྲགས་པ་ནི་ཙནྡྲའི་རིགས་ཀྱི་རྒྱལ་པོ་རྣམས་རྫོགས་པའི་ཕྱིས་སུ་པཱ་ལའི་རིགས་ཅན་བཅུ་བཞི་བྱུང་བའི་བཞི་པ་རྒྱལ་པོ་དྷརྨ་པཱ་ལ་ཞེས་མངའ་ཐང་ཤིན་ཏུ་ཆེ་བ་དེས་མ་ག་དྷཱའི་བྱང་ངོས་གངྒཱའི་འགྲམ་དུ་རི་དེའུ་ཞིག་གི་རྩེར་བཞེངས་པ་བི་ཀྲ་མ་ཤཱི་ལ་སྟེ་རྣམ་གནོན་ངང་ཚུལ་ཞེས་པའི་མཚན་གྱིས་བསྔགས་པའི་གཙུག་ལག་ཁང་ཆེན་པོར་བསྟན་པ་གསལ་བྱེད་ཀྱི་པཎྜི་ཏ་དང༌། ཡེ་ཤེས་ཞབས་སོགས་སྔགས་ཀྱི་སློབ་དཔོན་ཆེས་ཆེ་བ་མང་ངོ༌། ། མཁས་པ་སྒོ་དྲུག་ཏུ་གྲགས་པ་རྣམས་དང༌། ཇོ་བོ་རྗེ་དཔལ་ལྡན་ཨ་ཏི་ཤ། རྩོད་དུས་ཀྱི་སངས་རྒྱས་གཉིས་པ་ཨ་བྷཱ་ཡཱ་ཀ་ར་གུཔྟ། མ་བྱོན་སངས་རྒྱས་བདུན་པ་པཎ་ཆེན་ཤཱཀྱ་ཤྲཱི་ལ་སོགས་པ་རིམ་པར་བྱོན་པ་རྣམས་ཀྱིས་མདོ་སྔགས་ཀྱི་བསྟན་པ་ཟུང་འབྲེལ་དུ་བསྐྱངས་སོ། ། དེ་ལས་སློབ་དཔོན་སེང་གེ་བཟང་པོའི་སློབ་མ་སངས་རྒྱས་ཡེ་ཤེས་ཞབས་ཀྱིས་ཨོ་ཌྱན་དུ་བྱོན་ནས། ལཀྵྨཱི་ཆེན་མོ་མཉེས་པར་བྱས། གཞན་ཡང་། སྲུང་བའི་ཞབས་དང་འཇམ་དཔལ་བཤེས་གཉེན་སོགས་ལས་གསང་བ་འདུས་པའི་དབང་རྒྱུད་མན་ངག་བཅས་པ་ནོས་ནས་བསྒོམས་པས་ཀྱང་གྲུབ་སྟེ། བི་ཀྲ་མ་ཤཱི་ལར་སྔགས་ཀྱི་རྡོ་རྗེ་སློབ་དཔོན་ཆེན་པོ་མཛད་དེ་ཀྲི་ཡོག་སྡེ་གསུམ་དང༌། ནང་(༡༣༣བ)རྒྱུད་སྡེ་ལྔ་སྟེ། འདུས་པ། སྒྱུ་འཕྲུལ་དྲྭ་བ། སངས་རྒྱས་མཉམ་སྦྱོར། ཟླ་གསང་ཐིག་ལེ། འཇམ་དཔལ་ཁྲོས་པ་རྣམས་དང༌། ཁྱད་པར་གསང་བ་འདུས་པའི་རྒྱུད་གཙོ་བོར་བཤད་པས་རྡོ་རྗེ་ཐེག་པའི་བསྟན་པ་རྒྱ་ཆེར་རྒྱས་པར་མཛད། སྒྲུབ་ཐབས་ཀུན་བཟང༌། རྫོགས་རིམ་གྲོལ་བའི་ཐིག་ལེ་སོགས་མཛད་ཅིང་འདུས་པ་ཡེ་ཤེས་ཞབས་ལུགས་ཞེས་སྲོལ་ཆེན་གཅིག་ཏུ་གྲགས། འཇམ་དཔལ་གྱི་གསུང་ལ་ཟིན་བྲིས་སུ་མཛད་པ་འཇམ་དཔལ་ཞལ་ལུང་སོགས་གཞུང་བཅུ་བཞི་དང་གཞན་ཡང་གཞུང་མང་པོ་མཛད། སློབ་མ་ཤིན་ཏུ་མང་ཡང་གཙོ་བོར་རྒྱལ་ཚབ་ཀྱི་ས་ལ་གནས་པ་བཅོ་བརྒྱད་དང༌། མཐོང་བའི་ཆོས་ལ་མྱ་ངན་ལས་འདས་པ་མར་མེ་མཛད་བཟང་པོ། རབ་ཞི་བཤེས་གཉེན། སྒྲ་གཅན་འཛིན་བཟང་པོ། རྡོ་རྗེ་བདེ་བ་ཆེན་པོ་སྟེ་མཆོག་བཞི་བྱོན་ནོ། ། དེའི་རྗེས་སུ་རིམ་པར་བྱོན་པའི་སྡོམ་ནི། ཡེ་ཤེས་ཞབས་དང་མར་མེ་མཛད་བཟང་པོ། ། ལང་ཀ་རྒྱལ་བཟང་དཔལ་འཛིན་བྷ་བ་ལྷ། ། སྐལ་ལྡན་གྲགས་པ་ལཱི་ལ་བཛྲ་དང༌། ། མི་ཐུབ་ཟླ་བ་དམ་ཚིག་རྡོ་རྗེ་དང༌། ། དེ་བཞིན་གཤེགས་སྲུང་བྱང་ཆུབ་བཟང་པོ་དང༌། ། པདྨ་སྲུང་བ་ཞེས་བྱ་བཅུ་གཉིས་པོ། ། རྣམ་གནོན་ཚུལ་གྱིས་བསྔགས་པའི་སློབ་དཔོན་ཡིན། ། དེ་ནས་མཁས་པ་སྒོ་དྲུག་ལ་སོགས་དང༌། ། གསང་སྔགས་སློབ་དཔོན་རྣམ་པ་སྣ་ཚོགས་བྱོན། ། ཞེས་རྗེ་བཙུན་ཆེན་པོས་གསུངས་པ་ལྟར་རོ། ། མཁས་པ་སྒོ་དྲུག་ནི། གཙུག་ལག་ཁང་དེ་ལ་མུ་སྟེགས་ལ་སོགས་པའི་རྒོལ་བ་རིགས་པ་དང་ནུས་པས་སྲུང་བ་པོ་སྟེ། དེའང་ཤར་སྒོ་སྲུང་བ་རྩོད་དུས་ཀྱི་ཐམས་ཅད་མཁྱེན་པ་རཏྣཱ་ཀ་ར་ཤཱནྟི་པ། ལྷོ་སྒོ་སྲུང་བ་ཤེས་རབ་འབྱུང་གནས། ནུབ་སྒོ་སྲུང་བ་ངག་གི་དབང་ཕྱུག་གྲགས་པ། བྱང་སྒོ་སྲུང་བ་ནཱ་རོ་པ། དབུས་ཀྱི་ཀ་ཆེན་དང་པོ་བྲམ་ཟེ་རིན་ཆེན་རྡོ་རྗེ་དང༌། གཉིས་པ་ཛྙཱ་ན་ཤྲཱི་མི་ཏྲ་རྣམས་སོ། ། དེ་དྲུག་པོ་སོ་སོར་ཟླ་མེད་པའི་མཁས་པ་ཆེན་པོར་གྱུར་ཏེ། མུ་སྟེགས་ཀྱི་རྒོལ་བ་མཐའ་དག་ཟློག་པ་དང༌། མདོ་སྔགས་ཀྱི་བསྟན་བཅོས་མང་པོ་རྩོམ་(༡༣༤ན)པ་དང༌། ཆེས་ངོ་མཚར་བའི་མཛད་པ་མང་པོས་དེ་སྐབས་ཀྱི་སྐྱེ་བོ་དག་ཆོས་ལ་བཙུད་དེ་བདེ་བར་གཤེགས་པའི་བསྟན་པ་སྤྱི་དང༌། ཁྱད་པར་ཐེག་པ་ཆེན་པོའི་བསྟན་པ་ཉི་མ་ལྟར་གསལ་བར་མཛད་པ་ཡིན་ནོ། ། ཇོ་བོ་རྗེ་དཱི་པཾ་ཀ་ར་ཤྲཱི་ཛྙཱ་ནས་བི་ཀྲ་མ་ཤཱི་ལ་དང༌། ཨོ་ཏནྟ་པུ་རིར་གཙོ་བོར་བསྟན་པ་བསྐྱངས་ཏེ་འདི་ནི་གཙོ་བོར་གསེར་གླིང་པ་ལ་བརྟེན་ནས་བྱང་ཆུབ་ཀྱི་སེམས་ལྷག་པར་བསྒོམས་པ་ཞིག་ཡིན་ལ་མཁས་གྲུབ་ཀྱི་ཡོན་ཏན་དང་བསྟན་པ་སྤེལ་བའི་མཛད་པ་ནི་སློབ་དཔོན་སྔ་མ་རྣམས་ལས་མི་དམན་པར་གྲགས། གསང་སྔགས་ཀྱི་རྒྱུད་སྡེ་མཐའ་དག་ལ་