Tibetan
པར་བྱ་དགོས་སོ། ། ཐེག་པ་ཆེན་པོ་ལ་མངོན་པའི་སྡེ་སྣོད་ལོགས་ན་ཡོད་པ་བཞིན་ཉན་ཐོས་ལ་ཡང་འབྱུང་དགོས་ལ། སྡེ་སྣོད་གསུམ་དོན་ཕན་ཚུན་དུ་འབྲེལ་བར་གནས་པ་བདེན་མོད་ཀྱང་སྡེ་སྣོད་གཞན་གཉིས་ལ་གླེགས་བམ་ཐ་དད་པར་འབྱུང་ཞིང༌། མ་མོ་ལ་དེ་ལྟར་མི་འབྱུང་བའི་རྒྱུ་མཚན་མེད་དོ་ཞེས་འདོད་དོ། ། འདོད་པ་ཕྱི་མ་འདི་འཐད་འཐད་འདྲ་ཡང་། སློབ་དཔོན་ཆེན་པོ་དབྱིག་གཉེན་ནི་མདོ་སྡེ་པའི་འདོད་པ་དང་མཐུན་པར་བཞེད་འདྲ་བས། རེ་ཞིག་དེ་ལྟར་ཁས་བླང་ངོ༌ཞེས་རྗེ་བཙུན་ཐམས་ཅད་མཁྱེན་པས་གསུངས་སོ།། བཙུན་པ་ཆེན་པོ་བཞི་སོགས་དགེ་སློང་ནི། ། འབུམ་ཕྲག་དུ་མས་སྡེ་འཛིན་ཉན་ཐོས་སོ། ། ཁ་ཆེའི་བཙུན་པ་ཆེན་པོ་ཆོས་སྐྱོབ་དང༌། ནུབ་ཕྱོགས་མ་རུའི་བཙུན་པ་ཆེན་པོ་དབྱིག་བཤེས། ཐོ་གར་གྱི་བཙུན་པ་ཆེན་པོ་དབྱངས་སྒྲོག །ཝ་ར་ཎཱ་སིའི་བཙུན་པ་སངས་རྒྱས་ལྷ་སྟེ། བྱེ་བྲག་ཏུ་སྨྲ་བའི་སློབ་དཔོན་ཆེན་པོ་བཞིར་གྲགས་པ་དེ་རེ་རེ་ལའང་སློབ་མ་འབུམ་ཕྲག་བགྲང་བར་ཡོད་ལ། བྱེ་བྲག་ཏུ་སྨྲ་བའི་ལུང་ནི་སྤེལ་མ་གསུམ་གྱི་ཕྲེང་བ་དང་གདམས་ངག་བརྒྱ་པ་ཞེས་པ་དག་གོ། ། སོགས་ཁོངས་ནས་མདོ་སྡེ་པའི་བཙུན་པ་ཆེན་པོ་གནས་བརྟན་དང༌། དཔལ་ལེན། གཞན་ཡང་། གཞོན་ནུ་ལེན་དང་མིའུ་ཐུང་ལ་སོགས་པ་བཙུན་པ་ཆེན་པོའི་སྡེ་རེ་རེ་ལའང་དགེ་སློང་འབུམ་ཕྲག་དུ་མར་འཕེལ་ནས་སོ་སོའི་སྡེ་འཛིན་པར་མཛད་དེ་ཉན་ཐོས་ཕལ་ཆེར་སྤྱོད་པའི་སྐབས་སོ། །(༡༢༡བ) ཆ༢ གཉིས་པ་[ཐེག་པ་ཆེན་པོའི་རིང་ལུགས་ཕལ་ཆེ་བར་སྤྱོད་པའི་སྐབས་བཤད་པ་]ལ་གསུམ། ཇ༡ ཐེག་ཆེན་ཐུན་མོང་བའི་སྡེ་སྣོད། ཇ༢ ཐུན་མིན་སྔགས་ཀྱི་སྡེ་སྣོད། ཇ༣ ད་ལྟ་དང་མ་འོངས་པར་ཇི་ལྟར་དར་བའི་ཚུལ་བཤད་པའོ། ། ཇ༡ དང་པོ་ལ་གཉིས། ཉ༡ སེམས་ཙམ་དང༌། ཉ༢ དབུ་མའོ། ། ཉ༡ དང་པོ་ནི། དེ་ནས་བཙུན་པ་ཨ་བི་ཏརྐ་སོགས། ། ས་བཅུའི་དབང་ཕྱུག་རྣམས་ལས་ཆོས་གསན་ཅིང༌། ། ཆོས་རྒྱུན་ཏིང་འཛིན་ཐོབ་པ་དུ་མ་བྱུང༌། ། ཐེག་ཆེན་ཕལ་ཆེར་མི་ཡུལ་དུ་ཕེབས། ། དེ་ནས་འཕགས་པ་དགའ་བའི་བཤེས་གཉེན་ལ་སོགས་པ་བྱོན་པའི་འོག་ཏུ་ཡུལ་ཨངྒར་འཁྲུངས་པའི་གནས་བརྟན་དགྲ་བཅོམ་པ་དགའ་བོ་ཞེས་བྱ་བ་ཐེག་པ་ཆེན་པོ་ཐོག་མར་འཛིན་པ་ཞིག་བྱུང་བ་དེའི་ཚེ། བཙུན་པ་ཆེན་པོ་ཨ་བི་ཏརྐ་དང༌། སོགས་ཁོངས་ནས། བི་ག་ཏ་རཱ་ག་དྷཱ་ཛ་དང༌། དི་བྱཱ་ཀ་ར་གུཔྟ་དང༌། རཱ་ཧུ་ལ་མི་ཏྲ་དང༌། ཛྙཱ་ན་ཏཱ་ལ་སོགས་པ། བྱམས་པ་དང༌། འཇམ་དཔལ་དང༌། སྤྱན་རས་གཟིགས་དང༌། གསང་བའི་བདག་པོ་སོགས་ས་བཅུའི་དབང་ཕྱུག་རྣམས་ལས་དངོས་སུ་ཆོས་གསན་པ། ཆོས་ཀྱི་རྒྱུན་གྱི་ཏིང་ངེ་འཛིན་ཐོབ་པ་ཤ་སྟག་ལྔ་བརྒྱ་ཙམ་བྱུང་བ་ལ། རྒྱལ་པོ་ལཀྵ་ཨ་ཤྭས་དད་པས་མཆོད་ཅིང་གཙུག་ལག་ཁང་དང་སློབ་མ་ཕུལ། སྡེ་སྣོད་རྣམས་གླེགས་བམ་དུ་བྲིས་ཏེ་འཆད་ཉན་བཙུགས། ཐེག་ཆེན་སྤྱོད་པ་ལྔ་བརྒྱ་ཕྲག་གསུམ་བྱུང་བ་ཐམས་ཅད་ཀྱང་མདོ་སྡེ་དཔག་ཏུ་མེད་པ་འཛིན་པ། བློ་གྲོས་ཐོགས་པ་མེད་པ། བཟོད་པ་ཐོབ་པ་ཤ་སྟག་སྟེ། སྐྱེ་བོ་རྣམས་ཀྱི་མངོན་དུ་རྫུ་འཕྲུལ་དང་མངོན་པར་ཤེས་པའི་རོལ་པ་ཅུང་ཟད་སྟོན་པ་ཁོ་ནའོ།། དེ་དག་ལས་ཐེག་ཆེན་པ་དུ་མ་འཕེལ་ཞིང༌། དེ་རྣམས་དང་དུས་མཚུངས་སུ་འཕགས་པ་དཀོན་མཆོག་བརྩེགས་པ་འབུམ་པ། འཕགས་པ་ཕལ་པོ་ཆེ་འབུམ་པ། ལང་ཀར་གཤེགས་པ་ཉི་ཁྲི་ལྔ་སྟོང་པ། རྒྱན་སྟུག་པོ་བཀོད་པ་སྟོང་ཕྲག་བཅུ་གཉིས་པ། ཆོས་ཡང་དག་པར་སྡུད་པ་སྟོང་ཕྲག་གཅུ་གཉིས་པ་སོགས་ཐེག་ཆེན་གྱི་མདོ་སྡེ་ཕལ་མོ་ཆེ་ཡང་། ལྷ་དང༌། ཀླུ་དང༌། དྲི་ཟ་དང༌། སྲིན་པོ་ལ་སོགས་པའི་ཡུལ་ཐ་དད་པ་(༡༢༢ན)རྣམས་ནས་མིའི་ཡུལ་དུ་ཕེབ་ཅིང༌། ཁྱད་པར་ཀླུའི་ཡུལ་ནས་བྱུང་བ་མང་ངོ༌། ། དེའི་ཚེ་ཐེག་པ་ཆེན་པོའི་སྙན་པས་ཕྱོགས་ཐམས་ཅད་དུ་ཁྱབ་པས་ཉན་ཐོས་པ་དག་གི་བློར་མ་ཤོང་ནས་ཐེག་པ་ཆེན་པོ་སངས་རྒྱས་ཀྱི་བཀའ་མ་ཡིན་ནོ་ཞེས་སྐུར་པ་བཏབ་པས་ཕྱིས་འཕགས་ཞབས་སོགས་ཀྱིས་ཐེག་ཆེན་བཀའ་རུ་བསྒྲུབས་པ་ཡིན་ནོ། ། ནཱ་ལནྡ་རུ་ཐོ་བཙུན་གཙུག་ལག་བཞེངས། ། དགའ་བོ་སོགས་ཀྱིས་བསྟན་བཅོས་མང་དུ་བརྩམས། ། དེ་དག་རྣམ་རིག་སྨྲ་བ་ཡིན་པར་གྲགས། ། དེ་ནས་ཐེག་ཆེན་གྱི་སློབ་དཔོན་ལྔ་བརྒྱ་པོ་བཀའ་བགྲོས་ནས་མོའུ་གལ་གྱི་བུ་འཁྲུངས་པའི་གནས་སུ་ཆོས་བསྟན་ན་ནི་དབང་ཆེ་བ་ཙམ་དུ་འགྱུར་ལ། ཤཱ་རིའི་བུ་འཁྲུངས་པའི་གནས་སུ་ཆོས་བསྟན་ན་ནི་བསྟན་པ་རྒྱ་ཆེར་རྒྱས་པའི་རྟེན་འབྲེལ་གཟིགས་ནས། སྔོན་འཕགས་པ་ཤཱ་རིའི་བུ་གང་དུ་འཁྲུངས་པའི་གནས་བྲམ་ཟེའི་གྲོང་ཁྱེར་ན་ལ་དའམ། ན་ལནྡྲ་སྟེ། བོད་སྐད་དུ། རྒྱུན་སྟེར་རམ། འདམ་བུས་བྱིན་དུ་གྲགས་པ། ཕྱིས་གྲོང་ཁྱེར་སྟོངས་པའི་ཤུལ་རྒྱལ་པོ་མྱ་ངན་མེད་ཀྱིས་ཤཱ་རིའི་བུའི་མཆོད་རྟེན་གསོས་ཤིང་ལྷ་ཁང་ཞིག་ཀྱང་བཞེངས་ནས་ཡོད་པ་དེར་བཞུགས་ནས་ཆོས་བསྟན་པར་མཛད། དེ་སྐབས་བྲམ་ཟེ་མཐོ་བཙུན་གྲུབ་རྗེ་དང་བདེ་བྱེད་བདག་པོ་སྐུ་མཆེད་ཀྱིས་ཀྱང་དེར་གཙུག་ལག་ཁང་བརྒྱད་བཞེངས་ནས་ཐེག་ཆེན་གྱི་གླེགས་བམ་ཐམས་ཅད་དེར་བཞུགས་སུ་གསོལ། ཕྱིས་བཙུན་པ་དགའ་བོ། དམ་པའི་སྡེ། ཡང་དག་བདེན་གསུམ་གྱིས་རྣལ་འབྱོར་སྤྱོད་པའི་གཞུང་ལུགས་གསལ་བར་བྱེད་པའི་བསྟན་བཅོས་ཀྱང་མང་དུ་བརྩམས་ཤིང༌། དེ་གསུམ་ལ་སྔོན་གྱི་རྣལ་འབྱོར་སྤྱོད་པ་པ་ཞེས་ཟེར། སྔོན་གྱི་སློབ་དཔོན་ལྔ་བརྒྱ་པོ་རྗེས་འབྲང་དང་བཅས་པ་ཐམས་ཅད་གྲུབ་མཐའ་རྣམ་རིག་སྨྲ་བ་ཡིན་པར་གྲགས་སོ། ། ཉ༢ གཉིས་པ་[དབུ་མ་]ནི། གྲུབ་པའི་སྤྱི་མེས་སྒྲ་གཅན་འཛིན་ཞབས་ཀྱིས། ། ཐེག་མཆོག་དབུ་མའི་ཚུལ་ལུགས་ཐོག་མར་གསལ། ། དེ་ཙམ་ན་གྲུབ་པ་ཡོངས་ཀྱི་སྤྱི་མེས་བྲམ་ཟེ་སྒྲ་གཅན་འཛིན་བཟང་པོས་བཙུན་པ་(༡༢༢བ)ནག་པོ་བྱ་བ་ཞིག་ལས་བསྙེན་པར་རྫོགས། རྣམ་པར་མི་རྟོག་པ་སོགས་སློབ་དཔོན་མང་པོ་དང༌། གསང་བའི་བདག་པོས་སོགས་ལྷག་པའི་ལྷ་མང་པོ་ལས་ཐེག་པ་ཆེན་པོའི་མདོ་རྒྱུད་རྒྱ་མཚོ་ལྟ་བུ་གསན་ནས་ནཱ་ལནྡར་ཆོས་བསྟན་ཏེ་ཐེག་པ་ཆེན་པོ་དབུ་མའི་ཚུལ་ལུགས་ཐོག་མར་ཡོངས་སུ་གསལ་བར་མཛད། འདི་སྐབས་བཙུན་པ་ཀ་མ་ལ་གརྦྷ་སོགས་དབུ་མའི་སྲོལ་འཛིན་པའི་སློབ་དཔོན་བརྒྱད་ཙམ་བྱུང་བ་ལས། བཙུན་པ་ཆེན་པོ་པྲ་ཀཱ་ཤ་དྷརྨ་མ་ཎི་ཞེས་བྱ་བ་འཕགས་པ་སྒྲིབ་སེལ་ལས་དངོས་སུ་ཆོས་ནོས་པས་མི་སྐྱེ་བའི་ཆོས་ལ་བཟོད་པ་ཐོབ་པ་དེས་ས་འོག་གི་འཇིག་རྟེན་ནས་འདུས་པ་ཆེན་པོ་སྟོང་ཕྲག་བརྒྱ་པ་ལེའུ་སྟོང་ཡོད་པ་སྤྱན་དྲངས་སོ། ། དེ་ནས་སངས་རྒྱས་གཉིས་པ་འཕགས་པ་ཀླུས། ། ཤེར་ཕྱིན་འབུམ་པ་སྤྱན་དྲངས་ཚོགས་གསུམ་གྱིས། ། འཁོར་ལོ་གསུམ་གྱི་དགོངས་པ་འགྲེལ་པར་མཛད། ། དངོས་སྨྲའི་རྩོད་བཟློག་ཐེག་ཆེན་བཀའ་རུ་བསྒྲུབས། ། དེ་ནས་ལྷོ་ཕྱོགས་བཻ་དརྦྷའི་ཡུལ་དུ་སངས་རྒྱས་གཉིས་པའི་ཕྲིན་ལས་ཅན་སློབ་དཔོན་ཆེན་པོ་ཀླུ་སྒྲུབ་བྱུང་སྟེ། ལང་ཀར་གཤེགས་པ་ལས། ལྷོ་ཕྱོགས་བཻ་དའི་ཡུལ་དུ་ནི། ། དགེ་སློང་དཔལ་ལྡན་ཆེར་གྲགས་པ། ། དེ་མིང་ཀླུ་ཞེས་འབོད་པ་སྟེ། ། ཡོད་དང་མེད་པའི་ཕྱོགས་འཇིག་པ། ། ང་ཡི་ཐེག་པ་འཇིག་རྟེན་དུ། ། བླ་མེད་ཐེག་ཆེན་རབ་བཤད་ནས། ། རབ་ཏུ་དགའ་བའི་ས་བསྒྲུབས་ཏེ། ། བདེ་བ་ཅན་དུ་དེ་འགྲོའོ། ། ཞེས་དང༌། གཞན་ཡང་རྔ་བོ་ཆེའི་མདོ། འཇམ་དཔལ་རྩ་རྒྱུད། དུས་ཀྱི་འཁོར་ལོ་སོགས་མདོ་རྒྱུད་དུ་མར་རྒྱལ་བས་ལུང་བསྟན་པ་དེ་ཉིད་ཀྱིས་ལོ་ཉིས་བརྒྱར་ཡུལ་དབུས། ཉིས་བརྒྱར་ལྷོ་ཕྱོགས། བརྒྱ་དང་ཉི་ཤུ་རྩ་དགུར་དཔལ་གྱི་རི་ལ་བཞུགས་ཏེ་ཉན་བཤད་སྒོམ་པ་དང༌། གཙུག་ལག་ཁང་དང་མཆོད་རྟེན་བྱེ་བ་བཞེངས་པ་དང༌། དགེ་འདུན་ལ་འཚོ་བ་སྦྱར་ཞིང་ཀླུ་སོགས་མི་མ་ཡིན་གྱི་དོན་མཛད་པ་དང༌། མུ་སྟེགས་ཀྱི་རྒོལ་བ་བཟློག་པ་སོགས་སྒོ་ཐམས་ཅད་ནས་དམ་པའི་ཆོས་བསྐྱངས་ཤིང་ཁྱད་པར་ཐེག་པ་ཆེན་པོའི་བསྟན་པ་ལ་སྐུ་(༡༢༣ན)དྲིན་ཟླ་མེད་པར་མཛད། ཀླུའི་ཡུལ་ནས་ཤེར་ཕྱིན་འབུམ་པ་སྤྱན་དྲངས་ཤིང་། དེ་ཕྱིན་ནས་ཐེག་ཆེན་གྱི་མདོ་སྡེ་གསར་དུ་བྱོན་པ་མེད། གཏམ་གྱི་ཚོགས་དང༌། རིག་པའི་ཚོགས་དང༌། བསྟོད་པའི་ཚོགས་གསུམ་གྱིས་བཀའ་འཁོར་ལོ་དང་པོ་བར་པ་ཐ་མ་གསུམ་གྱི་དགོངས་པ་ཕྱིན་ཅི་མ་ལོག་པར་འགྲེལ་པའི་ཤིང་རྟ་ཆེན་པོའི་ལམ་སྲོལ་ཐོག་མར་དབྱེ་བར་མཛད། ཉན་ཐོས་དངོས་སྨྲ་བ་རྣམས་ཀྱི་རྩོད་པ་བཟློག་ཅིང་ཐེག་ཆེན་བཀའ་རུ་སྒྲུབ་པའི་སེང་གེའི་ང་རོ་བསྒྲགས་ཏེ། མཐར་མཚན་བཟང་སོ་གཉིས་གསལ་བར་རྫོགས་པ་ན། རྒྱལ་པོ་བདེ་སྤྱོད་ཀྱི་བུ་རབ་ནུས་ལ་དབུ་སྦྱིན་པ་སྩལ་ཞིང་། དབུ་དང་སྐུ་ལུས་མི་འཇིག་པར་བྱིན་གྱིས་བརླབས་ཏེ་བདེ་བ་ཅན་དུ་གཤེགས་ནས་སངས་རྒྱས་ཀྱི་ཞིང་སྦྱོང་བར་མཛད་ཅིང༌། རིང་པོར་མི་ཐོགས་པར་སྐུ་ལུས་ལ་འཇུག་སྟེ་བསྟན་པ་སྤེལ་ཞིང་འགྲོ་བའི་དོན་མཐའ་ཡས་པ་མཛད་པར་འགྱུར་རོ། ། འདིར་ཚོགས་གསུམ་གྱི་ངོས་འཛིན་ཀྱང༌། བོད་ཕལ་ཆེར་གཏམ་ཚོགས་ལའང་། རྒྱལ་པོ་ལ་ཐག་རིང་ནས་ཕྲིན་དུ་བསྐུར་བ་བཤེས་སྤྲིང༌། དངོས་སུ་གཏམ་མཛད་པ་རིན་ཆེན་ཕྲེང་བ་དང་གཉིས། རིགས་ཚོགས་ལ། བསྒྲུབ་བྱ་སྤྲོས་པའི་མཐའ་འགོག་པའི་རིགས་ཚོགས། རྩ་བ་ཤེས་རབ། རིག་པ་དྲུག་ཅུ་པ། སྟོང་ཉིད་བདུན་ཅུ་པ། རྩོད་ཟློག་སྟེ་བཞི། སྒྲུབ་བྱེད་རྟོག་གེའི་རིགས་པ་འགོག་པའི་རིགས་ཚོགས། ཞིབ་མོ་རྣམ་འཐག་བཅས་ལྔ། བསྟོད་ཚོགས་ལ། གཞིའི་སྐབས་སུ་ཆོས་ཅན་ལ་གསལ་བར་བསྟོད་པ་དང༌། ཆོས་ཀྱི་དབྱིངས་ལ་བསྟོད་པ་གཉིས། ལམ་གྱི་སྐབས་སུ། ཐབས་སྙིང་རྗེ་ཆེན་པོ་དང༌། ཤེས་རབ་འཕགས་བཞིའི་ཡུམ་ལ་བསྟོད་པ་གཉིས། འབྲས་བུའི་དུས་སུ། སྐུ་གསུམ་སོ་སོར་བསྟོད་པ་དང༌། སོ་སོར་མ་ཕྱེ་བར་ལྟ་བ་རང་གི་ངོ་བོའི་སྒོ་ནས་བསྟོད་པ་ལ་དོན་དམ་པར་བསྟོད་པ། དཔེ་མེད་པར་བསྟོད་པ། བསམ་གྱིས་མི་ཁྱབ་པར་བསྟོད་པ། འཇིག་རྟེན་ལས་འདས་པར་བསྟོད་པ་རྣམས་སུ་ཡོད་པར་བཞེད་ཅིང༌། དེ་དག་ཀྱང་ཟླ་(༡༢༣བ)བས་ཚིག་གསལ་ལས། གཏམ་བྱ་རིན་ཆེན་ཕྲེང་བ་དང་ནི་ཡང་དག་བསྟོད་པ་དང༌། ཞེས་དང༌། དེའི་འཕྲོས་སུ་རིག་ཚོགས་ལྔ་དངོས་སུ་བགྲངས་པའི་དོན་ཡིན་པས་མི་མཐུན་པ་ཆེར་མེད་ཅིང༌། ཁུ་ལོ་ཙཱ་བ་སོགས་སྔ་རབས་པ་རྣམས་རིག་ཚོགས་ལྔའི་སྟེང་དུ་ཐ་སྙད་གྲུབ་པ་བསྣན་ནས་རིག་ཚོགས་དྲུག་ཏུ་བཞེད་པ་ལ། རྗེ་རིན་པོ་ཆེས་སོགས་གཞུང་དེ་འདྲ་ཡོད་ན་ཚིག་གསལ་དུ་མ་བགྲང་བ་དང༌། འཕགས་པའི་དངོས་སློབ་རྣམས་ཀྱིས་དྲངས་རིག་པ་ལ་གང་དུའང་མ་དྲངས་པས། རིན་ཆེན་ཕྲེང་བ་བསྣན་ཏེ་རིག་ཚོགས་དྲུག་ཡིན་གསུངས། དེ་ལ་རྩ་ཤེས་ནི་ཆོས་ཐམས་ཅད་སྟོང་ཉིད་དུ་གཏན་ལ་དབབ་པ་རིག་པའི་རྣམ་གྲངས་དུ་མའི་སྒོ་ནས་རྒྱས་པར་སྟོན་ཅིང་ཐབས་ཀྱི་ཆ་མི་སྟོན། རིག་པ་དྲུག་ཅུ་པ་དབུ་མའི་ལུས་རྣམ་པར་གཞག་པ་དང༌། གཞན་གསུམ་གྱིས་ཀྱང་སྟོང་ཉིད་ཁོ་ན་སྟོན། རིན་ཆེན་ཕྲེང་བས་ནི་བདག་མེད་གཉིས་རྒྱས་པར་སྟོན་ཅིང་ཐབས་ཀྱི་ཆ་ཡང་ཅི་རིགས་པ་སྟོན་ཏོ། ། དེས་ན། རྩ་ཤེས། དྲུག་ཅུ་པ། རིན་ཕྲེང་གསུམ་ནི་བསྟན་བཅོས་ལུས་ཡོངས་སུ་རྫོགས་པ་ཡིན་ལ། གཞན་གསུམ་རྩ་ཤེས་ལས་འཕྲོས་པའི་ཡན་ལག་ལྟ་བུའོ། ། འཕགས་པ་ལྷ་སོགས་རིམ་བྱོན་བསྟན་སྤེལ་བསྐྱངས། ། བསྡུས་པའི་རྒྱུད་ལས། དགེ་བཅུའི་ལམ་གྱིས་གྲུབ་པར་གྱུར་པ་འཕགས་པའི་ལྷ་དང་ལྭ་བའི་ན་བཟའ་རྟ་དབྱངས་དང༌། ། ཞེས་སོགས་ལུང་དུ་བསྟན་པ་སིངྒ་གླིང་གི་རྒྱལ་པོའི་སྲས་སློབ་དཔོན་ཆེན་པོ་ཨཱརྱདེ་བས་སློབ་དཔོན་ཀླུ་སྒྲུབ་བརྟེན་ཅིང་དངོས་གྲུབ་མང་པོ་ཐོབ། འཕགས་ཞབས་ཀྱིས་བསྟན་པ་གཏད་ཅིང་བཤད་ཉན་དང་གཙུག་ལག་ཁང་བཞེངས་ཤིང་ཐེག་ཆེན་གྱི་ཆོས་གཞི་བཙུགས་པ་སོགས་ཀྱིས་བསྟན་པ་ཡུན་རིང་བསྐྱངས། རྣལ་འབྱོར་སྤྱོད་པ་བཞི་བརྒྱ་པ་རབ་བྱེད་བཅུ་དྲུག་ཡོད་པ། དབུ་མ་ལག་པའི་ཚད་རྩ་འགྲེལ། སྐྱེ་མེད་རིན་པོ་ཆེའི་མཛོད། ཡེ་ཤེས་སྙིང་པོ་ཀུན་ལས་བཏུས་པ་སོགས་མཛད། མུ་སྟེགས་ཀྱི་སྟོན་པ་མངལ་སྐྱེས་སུས་ཀྱང་མི་ཐུབ་པའི་དངོས་གྲུབ་དབང་ཕྱུག་ཆེན་པོས་(༡༢༤ན)བྱིན་པ་མ་ཁོལ་དང་ཕ་ཁོལ་དང༌། མ་ཏི་ཙི་ཏྲ་སོགས་མིང་གི་རྣམ་གྲངས་དུ་མ་དང་ལྡན་པ་དེ་བཏུལ་ནས་སངས་རྒྱས་ཀྱི་བསྟན་པའི་སྒོར་འཇུག་པར་མཛད་པས། ཕྱིས་སློབ་དཔོན་དཔའ་བོ་ཞེས་པ་ཐུབ་པའི་སྐྱེས་རབས་སོ་བཞི་པ་སོགས་མཛད་དེ་བསྟན་པ་ལ་ཕན་པ་ཆེན་པོ་མཛད་པ་དེ་བྱུང༌། དམངས་རིགས་ལས་རབ་ཏུ་བྱུང་ཞིང་དངོས་གྲུབ་ཆེན་པོ་བརྙེས་པ་སྒྲ་གཅན་འཛིན་བཟང་པོ་སོགས་སློབ་བརྒྱུད་རིམ་པར་བྱོན་པ་རྣམས་དང༌། གཞན་ཡང་། སློབ་དཔོན་ཀླུས་བོས། ཕྱག་རྒྱ་ཆེན་པོའི་དངོས་གྲུབ་བརྙེས་པ་ཀླུའི་བྱང་ཆུབ། གྲུབ་ཆེན་ཤྭ་བ་རི་པ། སངས་རྒྱས་བསྐྱངས། ལེགས་ལྡན་བྱེད། སློབ་དཔོན་ཟླ་བ་གྲགས་པ། རྒྱལ་སྲས་ཞི་བ་ལྷ་ལ་སོགས་འཕགས་པ་ཡབ་སྲས་དངོས་དང་བརྒྱུད་པའི་ཞལ་སློབ་ཏུ་གྱུར་པ་བཟང་ལ་བར་མ་ཆད་དུ་བྱོན་པ་རྣམས་ཀྱིས་རྒྱལ་བསྟན་བཤད་སྒྲུབ་གཉིས་ཀྱིས་སྤེལ་ཞིང་བསྐྱངས་སོ། ། ས་གསུམ་ལ་གནས་འཕགས་པ་ཐོགས་མེད་ཀྱིས། ། བྱམས་པའི་ཞལ་ནས་ཆོས་ལྔ་དངོས་སུ་གསན། ། ས་སྡེ་ལྔ་དང་སྤྱི་སྡོམ་གཉིས་སོགས་མཛད། ། ཡུལ་དབུས་ནཱ་ལནྡར་ཐེག་པ་ཆེན་པོ་ལ་དགྲ་ལན་གསུམ་བྱུང་བས་ཐེག་ཆེན་གྱི་སྡེ་སྣོད་ཆ་བཅོ་ལྔར་བཏང་བའི་ཆ་གཅིག་ཙམ་ལས་མ་ལུས་པའི་སྐབས་སུ། འཇམ་དཔལ་རྩ་རྒྱུད་ལས། ང་ནི་མྱ་ངན་འདས་འོག་ཏུ། ། ལོ་ནི་དགུ་བརྒྱ་ལོན་པ་ན། ། ཐོགས་མེད་ཅེས་བྱའི་དགེ་སློང་ནི། ། བསྟན་བཅོས་ཀྱི་ནི་དོན་ལ་མཁས། ། མདོ་སྡེ་ངེས་དོན་དྲང་བའི་དོན། ། རྣམ་པ་མང་པོ་རབ་ཏུ་འབྱེད། ། འཇིག་རྟེན་རིག་པ་སྟོན་བདག་ཉིད། ། གཞུང་བྱེད་ངང་ཚུལ་ཅན་དུ་འགྱུར། ། ཞེས་ལུང་གིས་བསྟན་ཅིང་ས་གསུམ་གྱི་རྟོགས་པ་བརྙེས་པ་འཕགས་པ་ཐོགས་མེད་ཞབས་བྱོན་ཏེ། རིག་པའི་གནས་དང་ཐེག་པ་ཆེ་ཆུང་གི་སྡེ་སྣོད་ཐམས་ཅད་ལ་ཤིན་ཏུ་མཁས་ཀྱང་ཤེར་ཕྱིན་ཅུང་ཟད་རྟོགས་དཀའ་བར་བྱུང་ནས་ལོ་གཅུ་གཉིས་སུ་རི་བོ་བྱ་རྐང་ཅན་དུ་བྱམས་པ་བསྒྲུབས་པས་ཕྱིས་དངོས་སུ་ཞལ་མཐོང་བ་ཙམ་(༡༢༤བ)གྱིས་ཆོས་རྒྱུན་གྱི་ཏིང་ངེ་འཛིན་ཐོབ། ན་བཟའ་ལ་འཇུས་ནས་དགའ་ལྡན་དུ་བྱོན། མི་ལོ་ཉེར་ལྔར་ཆོས་ལྔ་ལ་སོགས་པ་དངོས་སུ་གསན་ནས་སླར་མི་ཡུལ་དུ་འགྲོ་དོན་མཛད། མངོན་པར་ཤེས་པ་སོགས་ཡོན་ཏན་བསམ་གྱིས་མི་ཁྱབ་པའི་བདག་ཉིད་ཆེན་པོར་གྱུར་པ་དེས། བྱམས་པའི་ཆོས་ལྔ་ཡི་གེར་བཀོད། དེ་དག་གི་དགོངས་འགྲེལ་རྒྱས་པའི་བསྟན་བཅོས་ས་སྡེ་ལྔ་དང༌། ཐེག་པ་ཆེ་ཆུང་གི་སྤྱི་སྡོམ་མངོན་པ་ཀུན་ལས་བཏུས་དང་ཐེག་བསྡུས་སོགས་མཛད། ཁྱད་པར་ཐེག་པ་ཆེན་པོའི་མངོན་པའི་སྡེ་སྣོད་ཤེས་པ་སུའང་མེད་པ་ལ་སློབ་དཔོན་འདིས་གསལ་བ་དང༌། ཐེག་ཆེན་པའི་དགེ་སློང་ཁྲི་ཕྲག་གཉིས་གསུམ་ཙམ་བྱུང་བ་འགའ་ཞིག་མི་སྐྱེ་བའི་ཆོས་ལ་བཟོད་པ་ཐོབ་པ་སོགས་ཐེག་པ་ཆེན་པོའི་རིང་ལུགས་ཉི་མ་ལྟར་གསལ་བར་མཛད་པས་ཤིང་རྟ་ཆེན་པོ་གཉིས་པར་གྲགས་པ་ཡིན་ནོ། ། བྱམས་པའི་ཆོས་སྡེ་ལྔ་ནི། མདོ་སྡེ་རྒྱན་དང་མངོན་རྟོགས་རྒྱན་གཉིས། དབུས་མཐའ་རྣམ་འབྱེད་དང་ཆོས་ཉིད་རྣམ་འབྱེད་གཉིས། རྒྱུད་བླ་མ་རྣམས་ཏེ། དེ་ལས་ཆོས་ཉིད་རྣམ་འབྱེད་ཚིག་ལྷུག་མ་ནི་བྱམས་ཆོས་དངོས་དང་། ཚིག་བཅད་མ་མཁས་པ་དག་གིས་བསྡེབས་པར་བཞེད། བྱམས་ཆོས་གསུམ་པོ་ཐོག་མ་ནས་ཡོངས་གྲགས་སུ་དར་བ་ཡིན་ལ། རྒྱུད་བླ་མ་དང་ཆོས་ཉིད་རྣམ་འབྱེད་གཉིས་པཎྜི་ཏ་གཞན་ལ་མ་གྲགས་པར། དུས་ཕྱིས་མཻ་ཏྲི་པས་མཆོད་རྟེན་གྱི་སེར་ཁ་ནས་འོད་འབྱུང་བ་འདུག་པ་གཟིགས་པས་དེ་གཉིས་ཀྱི་དཔེ་བྱུང༌། རྗེ་བཙུན་བྱམས་པར་གསོལ་བ་བཏབ་པས་སྤྲིན་གྱི་མཐོངས་སུ་གསལ་བར་བྱོན་ཏེ་ལེགས་པར་གནང༌། དེས་པཎྜི་ཏ་དགའ་བའི་གྲགས་པར་གནང༌། དེས་ཁ་ཆེ་སཛྫན་ལ་གནང་ནས་རིམ་གྱིས་བརྒྱུད་པས་སེང་གེ་བཟང་པོའི་བརྒྱད་སྟོང་འགྲེལ་ཆེན་སོགས་སུའང་འདི་གཉིས་ཀྱི་ལུང་དྲངས་པ་མེད་པ་དང༌། མཻ་ཏྲི་པའི་ཕྱག་རྒྱ་ཆེན་པོའི་ལྟ་བའི་ཁུངས་རྒྱུད་བླ་དང་འབྲེལ་བའི་དོན་ཀྱང་དེ་ཡིན་པར་གསུངས། འདི་དག་གི་(༡༢༥ན)གོ་རིམ་བོད་ཀྱི་མཁས་པ་དག །ཤེས་རབ་ཀྱི་ཕ་རོལ་ཏུ་ཕྱིན་པའི་མདོ་རྣམས་ཀྱི་དགོངས་པ་འགྲེལ་བར་བྱེད་པའི་མན་ངག་གི་བསྟན་བཅོས་མངོན་རྟོགས་རྒྱན་མཆོད་བརྗོད་དང་བཅས་པ་དང་པོར་མཛད་ལ། དེ་ནས་ཐེག་ཆེན་གྱི་མདོ་སྡེ་སྣ་ཚོགས་འཐོར་བ་བསྡུས་པ་ལྟ་བུའི་སྒོ་ནས་མདོ་རྒྱན་མཛད། འདི་གཉིས་ཀྱི་དོན་ཅུང་ཟད་བསྡུས་པ་དབུས་མཐའ་རྣམ་འབྱེད་མཛད། དེ་དག་གི་དོན་ཤིན་ཏུ་བསྡུས་པ་ཆོས་དང་ཆོས་ཉིད་རྣམ་པར་འབྱེད་པ་མཛད། དེ་ནས་ཆོས་འཁོར་ཕྱི་མའི་དབང་དུ་བྱས་པའི་ངེས་དོན་གྱི་གསུང་རབ་ཕུལ་དུ་ཕྱིན་པའི་དགོངས་པ་འགྲེལ་བྱེད་ཐེག་པ་ཆེན་པོ་རྒྱུད་བླ་མའི་བསྟན་བཅོས་བསྔོ་བ་དང་བཅས་པ་མཛད། དེ་ཡང་བར་པ་གསུམ་ལ་ནི་མཆོད་བརྗོད་དང་བསྔོ་བ་གང་ཡང་མེད་ཅིང༌། དང་པོ་ལ་བསྔོ་བ། ཐ་མ་ལ་མཆོད་བརྗོད་མེད་པས་ཆོས་ལྔ་པོ་འདི་ལྟ་བུ་གོ་རིམ་འདི་ལྟར་དཀྱུས་ཐོགས་གཅིག་ཏུ་མཛད་པ་ཡིན་ནོ། །ཞེས་བཤད་དོ། ། དེ་ལ་མདོ་སྡེ་རྒྱན་ནི། ཐེག་པ་ཆེན་པོའི་ཆོས་ཐམས་ཅད་དོན་ལྔར་བསྡུས་ཏེ་སྟོན་པས་ཐེག་ཆེན་གྱི་མདོ་སྡེ་མཐའ་ཡས་པའི་དགོངས་འགྲེལ་ཡིན་ལ། ཐེག་ཆེན་བཀར་སྒྲུབ་སོགས་སྐབས་ཉི་ཤུ་རྩ་གཅིག་གི་སྒོས་གཏན་ལ་ཕབ། ལམ་རིམ་ནི། རིགས་དང་ཆོས་ལ་མོས་པ་དང༌། ། སོགས་དོན་ཚན་བཅུར་བཤད་ཅིང་དྲང་ངེས་ཀྱི་ཆ་ཅི་རིགས་པ་ཡོད། མངོན་རྟོགས་རྒྱན་ནི། དངོས་པོ་བརྒྱད། ཡན་ལག་བདུན་ཅུས་ཤེར་ཕྱིན་གྱི་སྦས་དོན་གཏན་ལ་ཕབ། དབུས་མཐའ་རྣམ་འབྱེད་ནི། བརྗོད་བྱ་མཚན་ཉིད་གསུམ་གྱི་སྒོ་ནས་སྒྲོ་འདོགས་སྐུར་འདེབས་ཀྱི་མཐའ་གཉིས་སུ་མ་ལྷུང་བའི་དབུས་དང༌། དེར་ལྷུང་བའི་མཐའ་རྣམ་པར་ཕྱེ་ནས་དབུ་མའི་ལམ་འཆད། ཆོས་ཉིད་རྣམ་འབྱེད་ནི། ཆོས་ཐམས་ཅད་ཆོས་ཅན་འཁོར་བ་དང་