Tibetan
གཉིས་ཀྱིས་བསྟན་པ་ལ་མི་མཐུན་པར་ཟིང་ཟིང་པོར་གྱུར་ཏེ། མདོ་འདོན་པའང་སྣ་ཚོགས་སུ་གྱུར་ཅིང་དགྲ་བཅོམ་པ་རྣམས་ཀྱིས་ཀྱང་རྩོད་པ་ཞིར་མ་བཏུབ། དེ་དག་ཤི་བ་ན་དགེ་སློང་རྣམས་ཀྱིས་ཤེས་སོ། ། དེའི་རྗེས་སུ་དགེ་སློང་ཀླུ་ཞེས་བྱ་བས་ཀྱང་གཞི་ལྔ་བསྒྲགས་པས། སླར་ཡང་དགེ་འདུན་གྱི་རྩོད་པ་ཆེར་བསྐྱེད་ནས་ཕལ་ཆེན་པ། ཐམས་ཅད་ཡོད་སྨྲ་བ། གནས་བརྟན་པ། མང་བཀུར་བ་སྟེ། རྩ་བའི་སྡེ་པ་བཞིར་གྱེས། ཀླུའི་སློབ་མ་ཡིད་བརྟན་ཅེས་བྱ་བས་ཀྱང་གཞི་ལྔ་བསྒྲགས་ཏེ་རྩོད་པ་རྒྱ་ཆེར་བསྐྱེད་པས་རྩ་བའི་སྡེ་པ་བཞི་པོ་དག་ཀྱང་རིམ་གྱིས་གྱེས་ནས་བཅོ་བརྒྱད་དུ་གྱུར་ཏོ། ། དེ་ལས་གྱེས་པ་བཅོ་བརྒྱད་ནི། སྡེ་པ་ཐ་དད་བཀླག་པའི་འཁོར་ལོ་ལས། ཤར་དང་ནུབ་དང་གངས་རིར་གནས། ། འཇིག་རྟེན་འདས་པར་སྨྲ་བའི་སྡེ། ། བཏགས་པར་སྨྲ་བའི་སྡེ་པ་དང༌། ། ལྔ་ཚན་དགེ་འདུན་ཕལ་ཆེན་པ། ། གཞི་ཀུན་པ་དང་འོད་སྲུང་སྡེ། ། ས་སྟོན་སྡེ་དང་ཆོས་སྲུང་སྡེ། ། མང་ཐོས་གོས་དམར་སློབ་མ་དང༌། ། རྣམ་པར་ཕྱེ་སྟེ་སྨྲ་བའི་སྡེ། ། ཐམས་ཅད་ཡོད་པར་སྨྲ་བ་ཡིན། ། རྒྱལ་བྱེད་ཚལ་གནས་འཇིགས་མེད་གནས། ། གཙུག་ལག་ཁང་ཆེན་གནས་བརྟན་པ། ། ས་སྒྲོགས་རི་དང་སྲུང་བ་པ། ། གནས་མ་བུ་ཡི་སྡེ་རྣམས་ནི། ། ཀུན་གྱིས་བཀུར་བ་རྣམ་པ་གསུམ། །(༡༡༣བ) ཡུལ་དོན་སློབ་དཔོན་བྱེ་བྲག་གིས། ། ཐ་དད་རྣམ་པ་བཅོ་བརྒྱད་གསུངས། ། ཞེས་པ་ལྟར་ཡིན་ཞིང༌། འདི་སྐབས་རྩ་བའི་སྡེ་པའི་གྲངས་དང༌། དེ་ལས་གྱེས་ཚུལ་སོགས་སྡེ་པ་རྣམས་ཀྱི་འདོད་ཚུལ་མི་འདྲ་བ་ཡོད་མོད་ཀྱི། འདིར་བཀོད་པ་ནི་ཐམས་ཅད་ཡོད་སྨྲ་ཉིད་ཀྱི་ལུགས་ལྟར་རོ། ། རྩིབས་ལོགས་ལ་སོགས་དགྲ་བཅོམ་ལྔ་བརྒྱ་དང༌། ། བཙུན་པ་བཞི་བརྒྱ་རྒྱལ་པོ་ཀ་ནཥྐིས། ། སྤྱན་དྲངས་གྱེས་པ་དཀར་བསྒྲུབས་སྡེ་སྣོད་གསུམ། ། ཡི་གེར་བཀོད་དེ་བཀའ་བསྡུ་གསུམ་པར་མཛད། ། དེའི་ཚེ་འཕགས་པ་རྩིབས་ལོགས་ཞེས་བྱ་བ་མང་དུ་ཐོས་པ་མཐར་ཕྱིན་པ་གཙོ་བོར་གྱུར་པའི་དགྲ་བཅོམ་པ་ལྔ་བརྒྱ་དང༌། བ་སུ་མི་ཏྲ་ལ་སོགས་པའི་བཙུན་པ་བཞི་བརྒྱ་རྣམས་དང༌། བྱང་ཆུབ་སེམས་དཔའ་ལྔ་བརྒྱ་རྣམས་ཀྱང་རྒྱལ་པོ་ཀ་ནིཥྐས་སྤྱན་དྲངས། ཁ་ཆེའི་ཡུལ་དུ་རྣ་རྒྱན་གྱི་གཙུག་ལག་ཁང་གསར་དུ་བཞེངས་པ་ལ་བཞུགས་སུ་གསོལ་ཞིང་བསྙེན་བཀུར་ཏེ། གྱེས་པ་བཅོ་བརྒྱད་པོ་ཐམས་ཅད་ཀྲྀ་ཀྲྀ་རྨི་ལམ་ལུང་བསྟན་གྱི་མདོ་ལས། རྒྱལ་པོ་ཆེན་པོ་ཁྱོད་ཀྱིས་རས་ཡུག་གཅིག་མི་བཅོ་བརྒྱད་ཀྱིས་བགོས་ཀྱང་མ་རལ་བ་རྨི་ལམ་དུ་མཐོང་བ་གང་ཡིན་པ་དེ་ནི་དེ་ཉིད་ཀྱི་བསྟན་པ་སྡེ་བཅོ་བརྒྱད་དུ་གྱེས་པར་གྱུར་ཀྱང་རྣམ་པར་གྲོལ་བའི་རས་ནི་རལ་བར་བྱ་བར་མི་ནུས་ཏེ། དེའི་སྔ་ལྟས་ཡིན་ནོ། །ཞེས་པའི་ལུང་གིས་བཀར་བསྒྲུབས་ཤིང་ཆོས་མངོན་པ་རྣམ་པར་བཤད་དེ། འདི་ལ་བཀའ་བསྡུ་གསུམ་པར་གྲགས། དེའི་ཚེ་འདུལ་བ་ཐམས་ཅད་ཡི་གེར་བཀོད། མདོ་སྡེ་དང་མངོན་པ་སྔར་ཡི་གེར་མ་འཁོད་པ་རྣམས་ཀྱང་ཡི་གེར་བཀོད། བཀོད་པ་རྣམས་ལ་དག་ཐེར་བྱས་སོ། ། འདི་སྐབས་ཁ་ཆེ་བ་རྣམས་ཀྱིས་འདི་ལྟར་འདོད་པ་ལས། ཡུལ་དབུས་ཀྱི་མཁས་པ་དག་གིས་ནི་ཛཱ་ལནྡྷཱ་རའི་དགོན་པར་ཀུ་ས་ན་ཞེས་བྱ་བའི་གཙུག་ལག་ཁང་དུ་དེ་ལྟར་བཀའ་བསྡུ་གསུམ་པ་མཛད་པར་བཞེད་དོ། ། བཀའི་བསྡུ་བ་རྣམས་བཤད་པའི་སྐབས་སོ། ། བཀའི་བསྡུ་བ་རྣམས་བཤད་པ་སྐབས་གསུམ་པའི་འགྲེལ་པའོ།། །། བཞི་པ། སྔ་འགྱུར་རྙིང་མའི་བབ་ལུགས་བཤད་པའི་སྐབས། ཅ༤ སྐབས་བཞི་པ་སྔ་འགྱུར་རྙིང་མའི་བབ་ལུགས་བཤད་པ་ལ་གཉིས། ཆ༡ རྒྱུད་སྡེའི་བབ་ལུགས་སྤྱིར་བཤད་པ། ཆ༢ སྒྲུབ་སྡེ་བྱེ་བྲག་ཏུ་དབྱེ་བའོ། ། ཆ༡ དང་པོ་ལ་གཉིས། ཇ༡ མདོར་བསྟན། ཇ༢ རྒྱས་བཤད་དོ། ། ཇ༡ དང་པོ་ནི། སྔ་འགྱུར་རྙིང་མའི་ལུགས་སུ་གསང་ཆེན་གྱི། ། བསྟན་པའི་བབ་ལུགས་ཆེན་པོ་རྣམ་པ་གསུམ། ། སྔ་འགྱུར་རྙིང་མའི་རང་ལུགས་སུ་གསང་ཆེན་རྡོ་རྗེ་ཐེག་པའི་བསྟན་པ་ལ་བབ་ལུགས་ཆེན་པོ་གསུམ་གྱི་ཚུལ་དུ་རྣམ་པར་བཞག་པ་ཡིན་ཏེ། བཤད་རྒྱུད་རྒྱ་མཚོ་ལས། རྒྱལ་བ་སེམས་དཔའ་རྣལ་འབྱོར་མ། ། དགོངས་པ་རིག་པ་རྣ་བར་བརྒྱུད། ། གང་ལ་ཐུག་གི་བར་དུའོ། ། ཞེས་གསུངས་པས་སོ། ། ཇ༢ གཉིས་པ་རྒྱས་པར་བཤད་པ་ལ་གསུམ། ཉ༡ རྒྱལ་བ་དགོངས་བརྒྱུད། ཉ༢ རིག་འཛིན་བརྡ་བརྒྱུད། ཉ༣ གང་ཟག་སྙན་བརྒྱུད་ཞར་འཕྲོས་དང་བཅས་པའོ། ། ཉ༡ དང་པོ་ལ་གསུམ། ཏ༡ སྟོན་པས་གསུངས་ཚུལ། ཏ༢ འཁོར་གྱིས་བསྡུས་ཚུལ། ཏ༣ བསྟན་པའི་གཉེར་གཏད་ཚུལ་ལོ། ། ཏ༡ དང་པོ་ནི། རང་སྣང་རྣམ་དག་འོག་མིན་ཆོས་དབྱིངས་སུ། ། ཀུན་ཏུ་བཟང་པོས་ཡེ་ཤེས་རྒྱ་མཚོ་ལ། ། འོད་གསལ་འདུས་མ་བྱས་པའི་དགོངས་པ་ནི། ། བསམ་མི་ཁྱབ་དུས་རང་བཞིན་སྣང་བར་མཛད། ། སྟོན་པ་ལ་ཆོས་སྐུ་གཟུགས་སྐུའི་རྣམ་བཞག་གཉིས་སུ་ཡོད་པའི། དང་པོ་ནི། ངོ་བོ་ཀ་ནས་དག་ཅིང་གློ་བུར་རང་སྣང་འཁྲུལ་པའི་དྲི་མ་གཞི་ཐོག་ཏུ་རྣམ་པར་དག་པ་ལ་འོག་མིན་ཅེས་སྒྲས་བཏགས་པའི་ཆོས་ཀྱི་དབྱིངས་སྙིང་པོ་བྱང་ཆུབ་ཀྱི་དཀྱིལ་འཁོར་རང་སྣང་བ་ཕྱོགས་བཅུའི་རྒྱུད་དུ་མི་གཏོགས་ཤིང་རྒྱ་ཚད་རིས་སུ་མ་ཆད་པའི་གནས་སུ། སྟོན་པ་རང་བྱུང་རིག་པའི་ངོ་བོ་ཆོས་ཉིད་བྱ་རྩོལ་ལས་འདས་པ་སངས་རྒྱས་ཐམས་ཅད་ཀྱི་སྤྱི་མེས་འཁོར་འདས་ཀུན་གྱི་སྤྱི་དཔལ་གདོད་མའི་མགོན་པོ་ཀུན་ཏུ་བཟང་པོས། འཁོར་གདངས་གསལ་མ་འགག་པར་སྐུ་དང་ཡེ་ཤེས་ཀྱི་དཀྱིལ་འཁོར་རྒྱ་མཚོ་ཅིར་ཡང་སྣང་བ་ལ། འཁོར་འདས་ཐམས་ཅད་ཡེ་ནས་མངོན་པར་བྱང་ཆུབ་པའི་ངོ་བོ་ལྷུན་གྱིས་གྲུབ་པའི་འོད་གསལ་ཟང་ཐལ་འདུས་མ་བྱས་པའི་(༡༡༤ན)དགོངས་པ། སྐྱེ་འགག་འཕོ་འགྱུར་མེད་པ་བསམ་གྱིས་མི་ཁྱབ་པའི་དུས་སུ་རང་བཞིན་གྱིས་སྣང་བར་མཛད་པ་སྟེ། འདི་ལྟར་ཆོས་སྐུའི་ཕུན་སུམ་ཚོགས་པ་ལྔ་ལྡན་ནི་དབྱིངས་སྟོང་པ་ངོ་བོ་ཉིད་གཞོན་ནུ་བུམ་པ་སྐུའི་ཡོན་ཏན་གྱི་ཆ་ལ་མིང་གིས་སྒྲོ་བཏགས་པ་ཙམ་ལས་མཚན་མར་བཟུང་བ་གང་ཡང་མ་མཆིས་སོ། ། སྣང་ཆར་སྟུག་པོ་བཀོད་པར་མཚན་རྫོགས་སྐུས། ། རང་སྣང་འཁོར་ལ་དུས་བཞི་མཉམ་ཉིད་དང༌། ། རྫོགས་པ་ཆེན་པོ་མིང་ཚིག་རང་མཚན་ལས། ། འདས་པའི་གསུང་གིས་རྒྱུན་མི་འཆད་དུ་སྤྲོ། ། གཉིས་པ་གཟུགས་སྐུ་རྣམས་ཀྱི་ཐོག་མར་རང་སྣང་ལོངས་སྐུ་ནི། ཆོས་སྐུའི་དབྱིངས་ལས་གཞི་སྣང་ཡེ་ཤེས་ཆེན་པོའི་སྣང་ཆར་རང་བྱུང་བའི་གནས་ལྷུན་གྲུབ་སྟུག་པོ་བཀོད་པར། སྟོན་པ་རིགས་ཐམས་ཅད་ཀྱི་ཁྱབ་བདག་རྡོ་རྗེ་འཆང་མཚན་དཔེ་གསལ་རྫོགས་ཀྱི་སྐུར་ཤར་བས། རིགས་ལྔའི་ཚོམ་བུ་ཡེ་ཤེས་ཀྱི་རང་མདངས་སུ་སྣང་བ་གཅིག་དང་ཐ་དད་ཀྱི་སྤྲོས་པ་དང་བྲལ་བའི་འཁོར་ལ། དུས་བཞི་མཉམ་པ་ཉིད་འཕོ་འགྱུར་དང་བྲལ་བའི་ངང་དུ། ཆོས་རང་བཞིན་རྫོགས་པ་ཆེན་པོ་བསྟན་པ་ཐམས་ཅད་ཀྱི་སྙིང་པོ་ཡང་དག་པའི་དགོངས་པ་ཉིད་མིང་ཚིག་རང་མཚན་ལས་འདས་པའི་གསུང་གིས་དུས་གསུམ་རྒྱུན་མི་འཆད་དུ་སྤྲོ་བར་མཛད་དེ། གདུལ་བྱ་འདུལ་བྱེད་དུ་ཤར་བ་མ་ཡིན་པས་ས་བཅུ་པ་རྣམས་ཀྱི་སྤྱོད་ཡུལ་ལས་ཀྱང་འདས་པར་བཞུགས་སོ། ། ཐུགས་རྗེའི་གཞན་སྣང་རིགས་ལྔའི་ཁང་བརྩེགས་སུ། ། སྟོན་པ་རྣམ་ལྔས་ཟབ་དབང་གསུམ་ལ་སོགས། ། དགོངས་པ་བརྡ་དང་འཆད་པའི་ཚུལ་དྲུག་གིས། ། ཐབས་ཀྱི་ཐེག་པ་རྒྱལ་ཚབ་རྣམས་ལ་སྟོན། ། དེའི་ངང་ལས་གདུལ་བྱ་རྣམས་ལ་ཡང་དག་པའི་ཐུགས་རྗེའི་དབང་གིས། ས་བཅུའི་དབང་ཕྱུག་རྣམས་ཀྱི་གཞན་སྣང་དུ། དབུས་ན་སྟུག་པོ་བཀོད་པ། ཤར་དུ་མངོན་དགའ། ལྷོར་རིན་པོ་ཆེས་བརྒྱན་པ། ནུབ་ཏུ་བདེ་བ་ཅན། བྱང་ན་ལས་རབ་གྲུབ་པ་སྟེ། རིགས་ལྔའི་ཞིང་ཁམས་འོད་ཀྱི་ཁང་བུ་བརྩེགས་པ་རྣམས་སུ། སྟོན་པ་(༡༡༤བ)དེ་བཞིན་གཤེགས་པ་རིགས་ལྔའི་རྒྱལ་བ་རྣམ་པ་ལྔས། ལྷན་ཅིག་པའི་འཁོར་རྣམས་ལ་ཟབ་མོའི་དབང་གསུམ་བསྐུར་བས་བརྗོད་བྱ་དོན་གྱི་རྒྱུད་རྟོགས་ཏེ་རང་དོན་དུ་སངས་རྒྱས་སོ། ། དེ་ནས་གཞན་དོན་དུ་ཞུ་བ་ཕུལ་བས་སྟོན་པ་ཐུགས་རྗེ་སྐྱེས་ཏེ། དགོངས་པ་བརྡའི་གསུང་དང་འཆད་པའི་ཚུལ་དྲུག་གིས་ནང་པ་དབང་སྒྱུར་ཐབས་ཀྱི་ཐེག་པའི་ཆོས་སྒོ་རྒྱལ་ཚབ་ཀྱི་ས་ལ་གནས་པའི་འཁོར་རྣམས་ལ་བསྟན་པར་མཛད་དོ། ། འདིར་འཆད་ཚུལ་དྲུག་ནི། སྐུ་དྲང་པོར་བསྲངས། སྨིན་མ་གཟེངས་གཏོད། སྤྱན་ཟིམ་བུར་གཟིགས། ཞལ་གྱི་སྒོ་དབྱེ། དུང་གི་ཚེམས་བར་ནས་ལྗགས་ཀྱི་དབང་པོ་བརྐྱངས་ཏེ་ཚངས་པའི་དབྱངས་སུ་གསུངས་སོ། ། དེ་ཚེ་མ་དག་ཞིང་དུ་བཅའ་གཞི་ཡི། ། སྟོན་པ་དྲུག་གིས་ལམ་སྟེགས་ཆོས་སྒོ་སྤྲོ། ། ཕྱེད་སྤྲུལ་ལོངས་སྐུའི་ཆོས་བསྟན་པ་དེའི་ཚེ་མ་དག་པའི་ཞིང་འགྲོ་བ་རིགས་དྲུག་གི་གནས་རྣམས་སུ་ཐུན་མོང་བཅའ་གཞིའི་སྟོན་པ་དྲུག་སྤྲོས་ཏེ། དེ་དག་གིས་འདུལ་བྱ་རྒྱུད་མ་དག་པ་དང་བློ་དམན་པ་རྣམས་ལ་ཐུན་མོང་ལམ་སྟེགས་ཀྱི་ཐེག་པའི་ཆོས་སྒོ་མཐའ་ཡས་པ་བསྟན་ཅིང་སྤྲོ་བར་མཛད་དོ། ། གཞན་ཡང་། དེ་དག་གི་ཚེ་དྲག་པོ་འཇིགས་བྱེད་གཏུམ་པོ་སོགས་གདུལ་བྱ་གདུག་པ་ཅན་རྣམས་ཀྱི་ངོར་དཔལ་ཧེ་རུ་ཀའི་རྣམ་པར་སྣང་བས་ཁྲོ་བོའི་དཀྱིལ་འཁོར་སྤྲུལ་པར་མཛད་པ་སོགས་གང་འདུལ་ཞི་ཁྲོའི་རྣམ་པ་དཔག་ཏུ་མེད་པ་སྟོན་པར་གསུངས་སོ། ། གཙང་མའི་གནས་སུ་སངས་རྒྱས་འབྱུང་བའི་སྔོན། ། ཆོས་མཐུན་ལོངས་སྐུས་གྲུབ་པའི་རིག་འཛིན་ལ། ། ཕ་རོལ་ཕྱིན་དང་ཕྱི་རྒྱུད་སྡེ་གསུམ་གསུངས། ། མི་མཇེད་ལ་སོགས་པའི་གནས་ཀྱི་མཆོག་གཙང་མ་རིས་ཀྱི་འོག་མིན་དུ་འཇིག་རྟེན་ན་སངས་རྒྱས་འབྱུང་བའི་སྔོན་རོལ་དུ། ལོངས་སྐུ་ཆེན་པོ་དང་ཆོས་མཐུན་པའི་མཚན་དཔེ་རྒྱན་ལྡན་གྱི་སངས་རྒྱས་སུ་བསྟན་ནས། ལྷ་དང་གྲུབ་པ་དང་རིག་པ་འཛིན་པའི་འཁོར་ཚད་མེད་པ་ལ། ཀུན་འབྱུང་འདྲེན་པའི་ཐེག་པ་ཕ་རོལ་ཏུ་ཕྱིན་པ་དང༌། དཀའ་ཐུབ་(༡༡༥ན)རིག་བྱེད་ཀྱི་ཐེག་པ་ཕྱི་རྒྱུད་སྡེ་གསུམ་གསུངས་པ་ཡིན་ནོ། ། ཏ༢ གཉིས་པ་[འཁོར་གྱིས་བསྡུས་ཚུལ་]ནི། གཞན་སྣང་བརྡ་དང་ཚིག་ལས་བྱུང་བའི་རྒྱུད། ། རྡོ་རྗེ་ཆོས་རབ་མི་ཡི་ཐོད་པ་ཅན། ། ཌཱ་ཀི་པཱུརྞ་ཉེར་ཞི་སོགས་ཀྱིས་བསྡུས། ། ཐུགས་རྗེས་གཞན་སྣང་དུ་སྣང་བའི་སྟོན་པ་རྣམས་ཀྱིས་གཞན་སྣང་ཙམ་དུ་བརྡ་ཡིས་གོ་བར་མཛད་པ་དང༌། རྔ་སྒྲ་དང་སྒྲ་བརྙན་བཞིན་ངག་ཚིག་ཏུ་ཉེ་བར་སྣང་བ་ལས་བྱུང་བའི་རྒྱུད་རྣམས་ནི། གསང་བདག་རྡོ་རྗེ་ཆོས་དང༌། བྲམ་ཟེ་མི་ཡི་ཐོད་པ་ཅན། ཌཱ་ཀི་མ་པཱུརྞ་ཉེ་བར་ཞི་བ་དང༌། སོགས་ཁོངས་ནས་མན་ངག་རྫོགས་པ་ཆེན་པོ་རྣམས་རྒྱལ་ཚབ་རྡོ་རྗེ་སེམས་དཔའ་དང༌། ལུང་ཨ་ནུ་ཡོ་ག་རིག་འཛིན་གྱི་རྒྱལ་པོ་ཀུཉྫ་ར་སོགས་ཀྱིས་སངས་རྒྱས་རྣམས་ཀྱི་སྐུའི་རྣམ་འགྱུར། གསུང་གི་བརྡ། ཐུགས་ཀྱི་དགོངས་དོན་མ་ལུས་པ་རྒྱུད་ཀྱི་རང་བཞིན་དུ་གཏན་ལ་ཕབ་ནས་མི་མངོན་རིག་པ་འཛིན་པའི་གནས་སུ་བསྡུས་ཤིང་། སྡུད་པ་པོ་དེ་དག་ཀྱང་གདོད་མའི་མགོན་པོའི་ཐུགས་ཡེ་ཤེས་ཆེན་པོའི་རང་རྩལ་བཅོམ་ལྡན་འདས་གསང་བའི་བདག་པོའི་ངོ་བོར་གཅིག་པས་སྟོན་འཁོར་དབྱེར་མེད་དགོངས་པ་མཉམ་ཉིད་ངང་ལས་གང་ཟག་གཞན་རྒྱུད་ཀྱིས་བསྡུས་པ་མ་ཡིན་ནོ། ། ཏ༣ གསུམ་པ་[བསྟན་པའི་གཉེར་གཏད་ཚུལ་]ནི། རིགས་གསུམ་མཁའ་འགྲོ་ཆོས་ཀྱི་སྤྱན་ཅན་ལ། ། བསྟན་པའི་གཉེར་གཏད་མདོར་ན་སྐུ་གསུམ་གྱི། ། སྟོན་པའི་གླེང་གཞི་རྒྱལ་བ་དགོངས་བརྒྱུད་དོ། ། དེ་ལྟ་བུའི་རྒྱུད་སྡེ་ཟབ་མོ་རྣམས་སྡུད་པ་པོ་གསང་བའི་བདག་པོ་གཙོ་བོར་གྱུར་པའི་རྒྱལ་སྲས་རིགས་གསུམ་མགོན་པོ་དང༌། འཁོར་འདས་ཐམས་ཅད་ཀྱི་བདག་མོ་སྐུ་གཅིག་ལ་མཚན་གྱི་རྣམ་གྲངས་དུ་མ་དང་ལྡན་པ་མཁའ་འགྲོ་མ་ལས་ཀྱི་དབང་མོ་ཆེ་ཡེ་ཤེས་ཀྱི་མཁའ་འགྲོ་མའི་ཚོགས་དང་བཅས་པ་རྣམས་ལ་དངོས་སུ་གཉེར་གཏད་ནས་བཀའ་བསྒོས་ཤིང༌། བརྒྱུད་ནས་ཕྱི་རབས་བརྒྱུད་འཛིན་གྱི་གང་ཟག་ཆོས་ཀྱི་སྤྱན་ཅན་རྣམས་ལའང་ལུང་བསྟན་ཅིང་བསྟན་པའི་གཉེར་གཏད་དེ། ཁོག་གཞུང་ལས།(༡༡༥བ) སྡུད་པ་པོ་དང་བུད་མེད་དང༌། ། རྣལ་འབྱོར་མིག་ལྡན་སོགས་ལའོ། ། ཞེས་གསུངས་པས་སོ། ། དེ་ལྟར་བཤད་པ་དེ་དག་མདོར་བསྡུ་ན། སྟོན་པ་སྐུ་གསུམ་གྱི་གླེང་གཞི་དང་འབྲེལ་བ་དགོངས་པ་རོ་གཅིག་ཏུ་མཉམ་པས་ཆོས་བསྟན་བྱ་སྟོན་བྱེད་མེད་ཀྱང་། ཡེ་ཤེས་ཀྱི་རྩལ་ལས་ཚུལ་ཙམ་དུ་སྣང་བས་རྒྱལ་བ་དགོངས་པའི་བརྒྱུད་པ་ཞེས་བྱའོ། ། ཉ༢ གཉིས་པ་རིག་འཛིན་བརྡ་བརྒྱུད་བཤད་པ་ལ་གཉིས། ཏ༡ ཨ་ཏིའི་ལུགས། ཏ༢ ཡོ་ག་ཕྱི་མ་གཉིས་ཀྱི་ལུགས་སོ། ། ཏ༡ དང་པོ་ནི། དུས་དྲུག་ཚེ་ན་རྩོལ་མེད་ཐེག་པ་ནི། ། སེམས་ལྷག་ཅན་ལ་རྡོར་སེམས་དབང་སྐུར་སྩལ། ། ལྷ་ཡི་གནས་དར་དེ་ཉིད་མི་ཡུལ་དུ། ། སྤྲུལ་པའི་སྐུར་བཞེངས་དགའ་རབ་རྡོ་རྗེ་ཡིས། ། དབང་རྒྱུད་མཛོད་ཐོབ་བསྟན་པའི་བདག་པོར་གྱུར། ། རྫོགས་པ་ཆེན་པོའི་བསྟན་པ་ནི། ཇི་སྐད་དུ། ཉོན་མོངས་རྒྱུད་དྲག་ནུས་མཐུ་ཞན། ། ལས་ཀྱིས་ཚེ་ཐུང་བཀའི་དོན་སྟོར། ། བསྟན་སྙིང་གྲུབ་མཐའ་ངན་པས་བསྒྱུར། ། གཉེན་པོས་མི་ནོན་སྒྲུབ་ཚུག་ཞན། ། དེ་ཚེ་རིག་པའི་རྣམ་རྟོག་ཤར། ། ཞེས་གསང་ཆེན་གྱི་བསྟན་པ་འབྱུང་བའི་དུས་དྲུག་ལ་བབ་ཚེ། ཤན་འབྱེད། ལ་བཟླ། རང་གྲོལ། མངོན་སུམ་དུ་སྟོན་པ་རྩོལ་མེད་ཨ་ཏིའི་ཐེག་པ་འབྱུང་བའི་དུས་ལ་བབས་པས། སུམ་ཅུ་རྩ་གསུམ་གྱི་ལྷ་དེ་བ་བཟང་སྐྱོང་གི་བུ་སེམས་ལྷག་ཅན་ལ་རྨིས་ལྟས་ཁྱད་པར་ཅན་བཞི་བྱུང་བ་དང་མཐུན་པར་རྡོ་རྗེ་སེམས་དཔས་རྒྱལ་ཐབས་སྤྱི་བླུགས་ཀྱི་དབང་བསྐུར་ཞིང་མན་ངག་བྱིན་པས་ལྷའི་གནས་སུ་དར། དེ་ནས་མི་ཡུལ་དུ་དར་ཚུལ་ནི། རྒྱ་གར་ནུབ་ཕྱོགས་ཨོ་རྒྱན་གྱི་རྒྱལ་པོ་དྷརྨ་ཨ་ཤོ་ཀའི་སྲས་མོ་པྲ་ཧ་ར་ཎི་མཚོ་འགྲམ་དུ་ཁྲུས་ལ་ཞུགས་ཚེ། གསང་བདག་སྤྲུལ་པའི་ངང་པ་ཞིག་གིས་སེམས་ལྷག་ཅན་ཡི་གེ་ཧཱུྃ་དུ་བསྡུས་ཏེ་ཞལ་དུ་མིད་ནས་སྲས་མོའི་ཐུགས་ཀར་མཆུ་ལན་གསུམ་གཏུགས་ནས་ཧཱུྃ་འོད་འབར་བ་ཞིག་ཐུགས་ཀར་བསྟིམས་པས། ཟླ་དུས་རྫོགས་པ་ན་སྲས་མོའི་ཐུགས་ཀ་ནས་གསེར་གྱི་རྡོ་རྗེ་རྩེ་དགུ་འོད་འབར་བ་ཞིག་བྱུང་སྟེ། འོད་དུ་ཞུ་བ་ལས་(༡༡༦ན)སྲས་ཁྱེའུ་མཚན་དཔེ་དང་ཕྱག་རྒྱས་སྤྲས་པ་རྡོར་སེམས་ནམ་མཁའ་ཆེའི་རྒྱུད་ཞལ་འདོན་མཛད་བཞིན་དུ་བྱོན་པ་དེ་ནི་མི་ལས་འདས་པའི་སྐྱེས་མཆོག་སྤྲུལ་སྐུ་དགའ་རབ་རྡོ་རྗེ་སྟེ། སླར་ཡང་རྡོར་སེམས་མངོན་དུ་བྱོན་ནས་དབང་བསྐུར་རྫོགས་པ་ཆེན་པོའི་རྒྱུད་འབུམ་ཕྲག་དྲུག་ཅུ་རྩ་བཞིའི་མཛོད་རང་དབང་དུ་ཐོབ་སྟེ་བསྟན་པའི་བདག་པོར་གྱུར་ཏོ། ། འོད་དུ་ཐིམ་ཚེ་འཇམ་དཔལ་བཤེས་གཉེན་སོགས། ། རྒྱལ་ཚབ་རྣམས་ལ་འདས་རྗེས་རིམ་པར་བབས། ། མཐར་གདོད་མའི་ཟད་སར་འོད་ཕུང་དུ་ཐིམ་པའི་ཚེ། སློབ་དཔོན་ཆེན་པོ་འཇམ་དཔལ་བཤེས་གཉེན་ལ་འདས་རྗེས་སྩལ་ཞིང༌། སོགས་ཁོངས་ནས། ཤྲཱི་སིང་ཧ། ཛྙཱ་ན་སཱུ་ཏྲ། བི་མ་ལ་སྟེ། རིམ་པར་སོ་སོའི་རྒྱལ་ཚབ་ཏུ་དབང་བསྐུར་བའི་འདས་རྗེས་རིམ་པར་བབས། སློབ་དཔོན་ཆེན་པོ་པདྨཱ་ཀ་རས་ཀྱང་དངོས་སུ་ཤྲཱི་སིཾ་ཧ་བླ་མར་བསྟེན་ཅིང༌། དགའ་རབ་རྡོ་རྗེའི་ཡེ་ཤེས་ཀྱི་སྐུ་དང་ཡང་མཇལ་ནས་གདོས་བཅས་འོད་ཕུང་དུ་གྲོལ་བའི་ཚུལ་བསྟན་ནས་འཕོ་བ་ཆེན་པོ་རྡོ་རྗེའི་སྐུས་འཁོར་བ་ཇི་སྲིད་དུ་འགྲོ་བའི་དོན་མཛད་ཅིང་། ད་ལྟ་པདྨ་འོད་ཀྱི་གཞལ་མེད་ཁང་ཆེན་པོར་དངོས་སུ་འཚོ་ཞིང་གཞེས་ལ་ཆོས་ཀྱང་སྟོན་པ་ཡིན་ནོ། ། ཏ༢ གཉིས་པ་[ཡོ་ག་ཕྱི་མ་གཉིས་ཀྱི་ལུགས་]ལ་གཉིས། ཐ༡ རིག་འཛིན་མི་མ་ཡིན་པ་ལས་བརྒྱུད་པ་དང༌། ཐ༢ མི་དང་མི་མ་ཡིན་པ་གཉིས་ཀ་ལས་བརྒྱུད་པའོ། ། ཐ༡ དང་པོ་ནི། རིག་གསུམ་མཁྱེན་བརྩེ་ནུས་པའི་མངའ་བདག་གིས། ། ལྟ་བ་སྒྲུབ་པ་སྤྱོད་ཕྱོགས་གཙོ་བོར་བཤད། ། ལྷ་ཀླུ་གནོད་སྦྱིན་ཚོམ་བུ་འབུམ་སྡེ་གྲོལ། ། རྒྱལ་སྲས་སེམས་དཔའི་འཁོར་རྒྱ་མཚོ་ཙམ་གྱི་ནང་ནས་སྟོན་པ་ཉིད་ཀྱི་སྤྲུལ་པ་རིགས་གསུམ་མགོན་པོ་མཁྱེན་རབ་ཀྱི་མངའ་བདག་འཕགས་པ་འཇམ་དཔལ། ཐུགས་རྗེའི་མངའ་བདག་སྤྱན་རས་གཟིགས། མཐུ་སྟོབས་ནུས་པའི་མངའ་བདག་ཕྱག་ན་རྡོ་རྗེ་གསུམ་གྱིས་རིམ་བཞིན་ལྷ་དང་ཀླུ་དང་མི་རྣམས་ཀྱི་གནས་སུ་ལྷ་གྲགས་ལྡན་མཆོག་སྐྱོང༌། ཀླུ་རྒྱལ་མགྲིན་པ་ནག་པོ། གནོད་སྦྱིན་ཀུན་ཏུ་བཟང་པོ་རྣམས་ལ་(༡༡༦བ)ལྟ་བ་དང་སྒྲུབ་པ་སྤྱོད་པའི་ཕྱོགས་གཙོ་བོར་སྨོས་པའི་ཚུལ་གྱིས་བཤད་པས། སོ་སོའི་གནས་སུ་རིམ་པར་བརྒྱུད་དེ་དར་ཞིང་ལྷ་དང་ཀླུ་དང་གནོད་སྦྱིན་ཚོམ་བུ་འབུམ་སྡེ་དང་བཅས་པ་གྲོལ་ཞིང༌། དེ་དག་ཀྱང་བྱང་ཆུབ་སེམས་དཔའི་ཚུལ་འཛིན་ཅིང་སངས་རྒྱས་ཀྱི་གདུང་གསོབ་པར་གྱུར་ཏོ། ། ཐ༢ གཉིས་པ་[མི་དང་མི་མ་ཡིན་པ་གཉིས་ཀ་ལས་བརྒྱུད་པ་]ནི། རྒྱལ་བ་འདས་ནས་ཉི་ཤུ་རྩ་བརྒྱད་ལོར། ། མ་ལ་ཡ་རྩེར་རིགས་ཅན་དྲ་མ་ལྔས། ། གདུང་ཚིག་ཉེར་གསུམ་བཏོན་པས་གསང་བའི་བདག ། མངོན་སུམ་བྱོན་ནས་གསང་རྒྱུད་ཟློས་ཏེ་བསྟན། ། རྒྱལ་བ་ཤཱཀྱའི་དབང་པོ་མྱ་ངན་ལས་འདས་པའི་ཚུལ་བསྟན་ནས་བགྲང་བྱ་ཉི་ཤུ་རྩ་བརྒྱད་ཀྱི་ལོ་གྲངས་བརྒལ་བའི་ཚེ། དམ་པའི་རིགས་ཅན་དྲ་མ་ལྔ་ནང་དུ་ཡང་དག་འཇོག་ལས་ལངས་པ་ན་འཇིག་རྟེན་གྱི་སྒྲོན་མེ་ནུབ་པར་ཤེས་ཏེ། རི་མ་ལ་ཡ་གནམ་ལྕགས་ཡོད་པའི་རྩེར་རྫུ་འཕྲུལ་གྱིས་འདུས་ནས་རིགས་ཅན་དྲ་མ་ལྔ་པོས་ཕྱོགས་བཅུའི་སངས་རྒྱས་ཡིད་ལ་བྱས་ཏེ། ཀྱེ་མ་ཀྱེ་ཧུད་ཀྱེ་མ་བློང༌། ། སྟོན་པ་སྒྲོན་མེའི་འོད་ནུབ་ན། ། འཇིག་རྟེན་མུན་པ་གང་གིས་སེལ། ། ཞེས་སོགས་གདུང་ཚིག་ཉི་ཤུ་རྩ་གསུམ་བཏོན་པས། རྒྱལ་བ་རྣམས་ཀྱིས་གསང་བའི་བདག་པོ་བསྐུལ་ཏེ་དོན་དུ་ཁྱབ་བདག་རིགས་དྲུག་པ་ཉིད་གསང་བའི་བདག་པོའི་རྣམ་པར་མངོན་སུམ་དུ་བྱོན་ནས། སྔོན་འོག་མིན་དང༌། དགའ་ལྡན་དང༌། སུམ་ཅུ་རྩ་གསུམ་སྟེ། ལྷ་གནས་གསུམ་