Tibetan
དུ་བསྟན་ཅིང་གྲགས་པའི་གསང་བའི་རྒྱུད་ཐམས་ཅད་ཟློས་ཏེ་བསྟན་པར་མཛད་དོ། ། དེ་ལ་དམ་པའི་རིགས་ཅན་དྲ་མ་ལྔ་ནི། ལྷ་གྲགས་ལྡན་མཆོག་སྐྱོང༌། ཀླུ་རྒྱལ་འཇོག་པོ། གནོད་སྦྱིན་སྐར་མདའ་གདོང༌། སྲིན་པོ་བློ་གྲོས་ཐབས་ལྡན། མི་ལིཙྪ་བཱི་དྲི་མ་མེད་པར་གྲགས་པ་རྣམས་སོ། ། གདུང་ཚིག་ཉེར་གསུམ་ནི། སྤྱི་མདོ་དགོངས་འདུས་ཀྱི་ལེའུ་གསུམ་པ་ལས་འབྱུང་ངོ༌། ། དེ་དག་སྲིན་པོ་བློ་གྲོས་ཐབས་ལྡན་གྱིས། ། ཡི་གེར་བཀོད་ནས་མཁའ་ལ་རྩལ་གྱིས་སྦས། ། དེ་ནི་རིག་འཛིན་བརྡ་ཡི་བརྒྱུད་པའོ། ། དེ་ལྟར་གསང་བདག་གིས་(༡༡༧ན)གསུངས་པའི་ཐེག་པ་མཐའ་དག་སྲིན་པོ་བློ་གྲོས་ཐབས་ལྡན་གྱིས་གསེར་གྱི་གླེགས་བམ་ལ་བཻ་ཌཱུརྱཞུན་མས་ཡི་གེར་བྲིས་ནས་ནམ་མཁའ་ལ་དགོངས་པའི་རྩལ་བདུན་གྱིས་སྦས་སོ། ། དེ་ལ་དགོངས་པའི་རྩལ་བདུན་ནི། གསེར་གྱི་བྱང་བུ་བྲི་གཞི་ཕུན་སུམ་ཚོགས་པར་དགོངས་པ། བཻ་ཌཱུརྱཞུན་མས་བྲིས་པ་རྒྱུད་ཕུན་སུམ་ཚོགས་པར་དགོངས་པ། རིན་པོ་ཆེ་སྣ་ཚོགས་པའི་སྒྲོམ་བུ་སྣོད་ངོ་མཚར་བའི་དགོངས་པ། ནམ་མཁའ་འབྱུང་བཞིས་མི་འཇིག་པས་གཏེར་གནས་དམ་པར་དགོངས་པ། མ་དང་མཁའ་འགྲོ་རྣམས་ཡེ་ཤེས་ཀྱི་སྤྱན་དང་ལྡན་པས་གཏེར་སྲུང་ཁྱད་པར་ཅན་དུ་དགོངས་པ། ཆོས་བདག་རྒྱལ་པོ་ཛཿལས་ཅན་དབང་པོ་ཡང་རབ་རྟོགས་གྲོལ་དུས་མཉམ་དུ་དགོངས་པ། སྐྱེ་འཕགས་བྱང་སེམས་ས་ལ་གནས་པ་སོགས་གྲུབ་བརྙེས་བརྒྱུད་འཛིན་དར་རྒྱས་སུ་འབྱུང་བ་ལ་དགོངས་པ་རྣམས་སོ། ། དེ་དག་ནི་ཆོས་དོན་མ་ལུས་པ་བརྡ་ཙམ་གྱིས་ཁོང་དུ་ཆུད་པས་རིག་འཛིན་བརྡའི་བརྒྱུད་པ་ཞེས་བྱའོ། ། ཉ༣ གསུམ་པ་གང་ཟག་སྙན་བརྒྱུད་ནི། དེ་ཚེ་དེ་ཡི་བྱིན་རླབས་སྣང་བ་ལས། ། རྒྱལ་པོ་ཛཿལ་རྨིས་ལྟས་བདུན་ཤར་ཏེ། ། ཕྱག་རྡོར་སྐུ་དང་ཏནྟྲ་སྡེ་བཅོ་བརྒྱད། ། ཡང་ཐོག་བབས་ཤིང་རིམ་པར་དོན་རྟོགས་ནས། ། ཀུ་ཀུ་རཱ་ཛ་སོགས་ལས་བརྒྱུད་དེ་དར། ། དེའང་སྡོམ་འབྱུང་གི་རྒྱུད་ཕྱི་མ་ལས། ང་ནི་འདི་ནས་མི་སྣང་ནས། ། ལོ་ནི་བརྒྱ་དང་བཅུ་གཉིས་ན། ། ལྷ་གནས་གསུམ་དུ་གྲགས་པ་ཡི། ། བསྟན་པའི་སྙིང་པོ་དམ་པ་ཞིག ། འཛམ་གླིང་ཤར་གྱི་ཕྱོགས་མཚམས་ཀྱི། ། རྒྱལ་པོ་ཛཿཞེས་གྲགས་པ་ལ། ། བསོད་ནམས་ཆེན་པོའི་མཐུས་སྣང་བའི། ། གསང་བའི་བདག་པོས་སྣང་བར་འགྱུར། ། ཞེས་གསུངས་པ་དང་མཐུན་པར། གསང་བའི་བདག་པོས་རིགས་ཅན་དྲ་མ་ལྔ་ལ་ཆོས་བསྟན་པ་དེའི་ཚེ་དེའི་བྱིན་རླབས་ཀྱི་སྣང་བ་ལས་ས་ཧོ་རའི་རྒྱལ་པོ་ཛཿལ་རྨིས་ལྟས་(༡༡༧བ)ངོ་མཚར་བ་བདུན་རྨིས་ཏེ། ཇི་སྐད་དུ། སྐུ་གསུང་ཐུགས་རྟགས་ཐིམ་པ་དང༌། ། རིན་ཆེན་གླེང་བམ་བབས་པ་དང༌། ། ཆོས་ཀྱི་བགྲོ་བ་བྱས་པ་དང༌། ། ཀུན་གྱིས་དམ་པར་བསྒྲགས་པ་དང༌། ། མཆོད་པ་ཆེན་པོ་བྱས་པ་དང༌། ། རིན་ཆེན་ཆར་དུ་བབས་པ་དང༌། ། སངས་རྒྱས་ས་ལ་ལུང་བསྟན་པའོ། ། ཞེས་པའི་རྨིས་ལྟས་དང་མཐུན་པར་ཐོག་མར་ཕྱག་རྡོར་གྱི་སྐུ་ཁྲུ་གང་པ་རྙེད། དེ་ལ་བརྟེན་ཏེ་སྒྲུབ་པ་ཟླ་བ་བདུན་མཛད་པས་ཁང་པའི་ཡང་ཐོག་ཏུ་ཏནྟྲ་ཆེན་པོ་སྡེ་བཅོ་བརྒྱད་ཀྱི་གླེགས་བམ་རྣམས་དངོས་སུ་བབས། རྡོ་རྗེ་སེམས་དཔའ་ཞལ་མཐོང་གི་ལེའུ་བརྡ་མཇལ་ཏེ་བསྒྲུབས་པས་རྡོ་རྗེ་སེམས་དཔའི་ཞལ་མཇལ་ཞིང་བྱིན་གྱིས་བརླབས། བསྐྱེད་རིམ་གྱིས་ཕུང་པོ་སྦྱངས་པས་གསང་བའི་བདག་པོས་ཞལ་བསྟན་ཅིང་དབང་བསྐུར་རྒྱུད་བཤད་པས་དོན་རྟོགས་ནས་རིམ་པར་སློབ་དཔོན་ཀུ་ཀུ་རཱ་ཛ། ཨིནྡྲ་བོ་དྷི། སིཾ་ཧ་རཱ་ཛ་སོགས་ལ་བརྒྱུད་དེ་དར་བའོ། ། དེ་དང་དུས་མཚུངས་ཕྱི་རྒྱུད་སྡེ་གསུམ་ནི། ། ཝ་ར་ཎཱ་སི་བྱ་རྐང་མེ་རི་འབར། ། ཨ་ནུ་སིངྒ་གླིང་གི་ནགས་ཚལ་དུ། ། གླེགས་བམ་དངོས་སུ་བབས་ཤིང་ཨ་ཏི་ཡང༌། ། དྷ་ན་ཀོ་ཥར་དགའ་རབ་རྡོ་རྗེ་ལ། ། རྡོ་རྗེ་སེམས་དཔས་གསུངས་ཏེ་ཡི་གེར་བཀོད། ། གཞན་དང་གཞན་ནས་བྱུང་བ་ཆེས་མང་ངོ༌། ། དེ་དག་གང་ཟག་སྙན་ཁུང་བརྒྱུད་པ་སྟེ། ། དེ་དག་དང་དུས་མཚུངས་པར་ཕྱི་རྒྱུད་སྡེ་གསུམ་སོགས་གནས་སོ་སོར་རིམ་པར་བབས་ཏེ། ཀྲི་ཡའི་རྒྱུད་རྣམས་ཝ་ར་ནཱ་སི་དང༌། ཨུ་པ་ཡའི་རྒྱུད་རྣམས་རི་བོ་བྱ་རྐང་ཅན་དང་བསིལ་བའི་ཚལ་དུ་བབས། ཡོ་གའི་རྒྱུད་རྣམས་དུར་ཁྲོད་མེ་རི་འབར་བའི་རྩེར་བབས། ཨ་ནུ་ཡོ་གའི་རྒྱུད་རྣམས་ལངྐའི་ཡུལ་དུ་གྲགས་པ་སིངྒ་ལའི་གླིང་དུ་གླེགས་བམ་དང་བཅས་ཏེ་དངོས་སུ་བབས། ལུགས་འདིའི་བཤད་སྲོལ་དུ་ཨ་ཏི་ཡོ་གའི་རྒྱུད་རྣམས་ཀྱང་ནུབ་ཕྱོགས་ཨོ་ཌཱི་ཡ་ནའི་བྱེ་བྲག་དྷ་ན་ཀོ་ཥར་སློབ་དཔོན་ཆེན་པོ་དགའ་རབ་རྡོ་རྗེ་ལ་རྡོ་རྗེ་སེམས་(༡༡༨ན)དཔས་དངོས་སུ་གསུངས་ཤིང་ཡི་གེར་བཀོད་པར་མཛད་དོ་ཞེས་འབྱུང་ངོ༌། ། གྲུབ་པའི་སློབ་དཔོན་རྣམས་ལ་ལྷག་པའི་ལྷས་སྩལ་བ་སོགས་གཞན་དང་གཞན་དག་ནས་བྱུང་བའི་ཆེས་མང་བས་གསང་སྔགས་ཀྱི་རྒྱུད་སྡེ་ལ་མཐའ་ཡོད་པ་མ་ཡིན་ནོ། ། དེ་དག་ནི་གང་ཟག་གཅིག་ནས་གཅིག་ཏུ་ཚིག་གི་སྒྲ་ལ་བརྟེན་ཏེ་རྣ་བར་བརྒྱུད་པས་གང་ཟག་སྙན་ཁུང་བརྒྱུད་པ་ཞེས་བྱའོ། ། རྟོགས་འདུལ་དབང་གིས་ཐེག་པ་ཇི་སྙེད་པ། ། རང་བཞིན་རྫོགས་པ་ཆེ་ལས་འཕྲོས་པའོ། ། དེ་ལྟར་འགྲོ་བ་མཐའ་ཡས་པའི་རྣམ་པར་རྟོག་པ་མཐའ་ཡས་པ་འདུལ་བའི་དབང་གིས་ཆོས་ཀྱི་འཁོར་ལོ་དང་ཐེག་པའི་སྒོ་མོ་ཇི་སྙེད་པར་སྣང་བ་དེ་དག་ཐམས་ཅད་རང་བཞིན་རྫོགས་པ་ཆེན་པོའི་བསྟན་པ་བྱིན་རླབས་ལས་འཕྲོས་པ་སྟེ། དཔལ་གསང་བའི་སྙིང་པོ་ལས། སྐུ་དང་གསུང་དང་ཐུགས་ཀྱི་རྒྱུད། ། ཕྱོགས་བཅུ་ཀུན་ཏུ་རབ་གྲགས་པ། ། གསང་བའི་སྙིང་པོ་ལས་འཕྲོས་ཏེ། ། ཞེས་གསུངས་པ་བཞིན་ནོ། ། ཆ༢ གཉིས་པ་སྒྲུབ་སྡེའི་བབ་ལུགས་བྱེ་བྲག་ཏུ་བཤད་པ་ནི། སྒྲུབ་སྡེ་ཞི་ཁྲོས་གསུངས་ཤིང་གསང་བདག་བསྡུས། ། མཁའ་འགྲོར་གཉེར་གཏད་མཆོད་རྟེན་བུམ་པར་སྦས། ། སློབ་དཔོན་བརྒྱད་ཀྱིས་དགུང་བདུན་དགོངས་པའི་ཚེ། ། ལས་ཀྱི་དབང་མོས་སྒྲོམ་བུ་སོ་སོར་གཏད། ། ཀུན་འདུས་བཀའ་བབས་སློབ་དཔོན་ཆེན་པོའོ། ། སྒྲུབ་པའི་སྡེ་རྣམས་ནི། གནས་འོག་མིན་གསང་བ་མཆོག་གི་དཀྱིལ་འཁོར་ཆོས་འབྱུང་དབྱིངས་ཀྱི་ཞིང་མེ་རི་འབར་བར། སྟོན་པ་དཔལ་ཆེན་ཀུན་བཟང་རྡོ་རྗེ་སེམས་དཔའ་ཞི་བ་དང༌། རང་བྱུང་ཆེ་མཆོག་ཧེ་རུ་ཀ་ཁྲོ་བོའི་དཀྱིལ་འཁོར་དུ་བཞེངས་ནས་འཁོར་རང་རིག་གི་ཚོམ་བུར་སྣང་བ་རྣམས་ལ། དུས་ཐོག་མཐའ་མེད་པ་མཉམ་པ་ཉིད་ཀྱི་ངང་དུ་ཆོས་ཉིད་རྡོ་རྗེའི་རང་སྒྲས་རྡོ་རྗེ་ཐེག་པ་སྤྱི་དང༌། བྱེ་བྲག་ཏུ་བདེ་གཤེགས་འདུས་པའི་སྤྱི་རྒྱུད་ལྔ། སྒོས་རྒྱུད་བཅུ། ཡན་ལག་སོ་སོའི་སྒྲུབ་ལུགས་དཔག་ཏུ་མེད་པ་ལ་སོགས་པར་གསུངས་པའི་རྒྱུད་རྣམས། (༡༡༨བ)གསང་བདག་རྡོ་རྗེ་ཆོས་ཀྱིས་རང་ཉིད་ཚོམ་བུ་དགུའི་དཀྱིལ་འཁོར་གྱི་ནང་དུ་སྣང་བར་མཛད་ནས་ཐོག་མར་ངག་ཏུ་བསྡུས། དེ་ནས་གླེགས་བམ་ལ་བཀོད་དེ་དགོངས་འགྲེལ་དུ་ལུང་ལྔ་ཡང་མཛད་ནས་མཁའ་འགྲོ་མ་ལས་ཀྱི་དབང་མོ་ཆེ་ལ་གཏད། དེས་སྤྱི་དང་བྱེ་བྲག་གི་རྒྱུད་རྣམས་ཕྱེས་ནས་རིན་པོ་ཆེའི་སྒྲོམ་སོ་སོར་བཅུག་སྟེ་མཆོད་རྟེན་བདེ་བྱེད་བརྩེགས་པའི་བུམ་པ་གཙོ་བོར་གྱུར་པའི་གནས་རྣམས་སུ་སྦས་པ། ནམ་ཞིག་གི་ཚེ། དཔལ་ཧེ་རུ་ཀའི་ཐུགས་ཡེ་ཤེས་དགུའི་རང་མདངས་ལས་ཤར་བ་རང་བྱུང་གྲུབ་པ་བརྙེས་པའི་རིག་འཛིན་ཆེན་པོ་རྣམ་པ་དགུ་ལས་པདྨ་སཾ་བྷ་བ་མ་གཏོགས་པའི་སློབ་དཔོན་བརྒྱད་ཀྱིས་དུས་ལ་བབས་པར་མཁྱེན་ཏེ་རྫུ་འཕྲུལ་གྱིས་འདུས་ནས་དགུང་ཞག་བདུན་དུ་དགོངས་པ་ལ་བཞུགས་པའི་ཚེ། མཁའ་འགྲོ་མ་ལས་ཀྱི་དབང་མོ་ཆེས། འཇམ་དཔལ་བཤེས་གཉེན་ལ་ལྕགས་ཀྱི་སྒྲོམ་བུ་སོགས་རིག་འཛིན་བརྒྱད་ལ་སྒྲོམ་བུ་རྣམས་སོ་སོར་གཏད་ཅིང་འཇམ་དཔལ་གཤིན་རྗེའི་གཤེད་ལ་སོགས་པ་སོ་སོའི་བཀའ་བབས། སྒྲུབ་པའི་ཚུལ་མཛད་པས་སྒྲུབ་སྡེ་སོ་སོ་ལ་མཁས་ཤིང་དངོས་གྲུབ་བརྙེས་ཏེ་རིགས་ཀྱི་གཙོ་བོ་རྣམས་དང་མི་གཉིས་པའི་གོ་འཕང་ཐོབ། དེ་དག་ལ་གསུང་རྡོ་རྗེ་པདྨ་ཀ་རས་སོ་སོར་ཞུ་བའི་ཚུལ་བསྟན་ཅིང་སྒྲུབ་པ་མཛད་པས་སློབ་དཔོན་སོ་སོ་ལས་ཀྱང་མཁས་ཤིང་གྲུབ་པའི་གོ་འཕང་མཐོན་པོར་གཤེགས་པ་ན། མཁའ་འགྲོ་མས་བསྐུལ་ཏེ་མཆོད་རྟེན་བདེ་བྱེད་བརྩེགས་པ་ནས་སྔར་རྒྱ་མ་ཁྲོལ་བའི་སྤྱི་རྒྱུད་ཀྱི་སྒྲོམ་བུ་རིན་པོ་ཆེ་སྣ་བརྒྱད་ལས་བྱས་པ་སོགས་རྒྱུད་ལུང་མན་ངག་ཡོངས་རྫོགས་སྤྱན་དྲངས་པས་ཀུན་འདུས་བཀའ་བབ་ཡོངས་སུ་རྫོགས་པ་ནི་སློབ་དཔོན་ཆེན་པོ་ཉིད་ལ་འདུས་ཤིང་གསང་སྔགས་ཀྱི་སྟོན་པ་ཆེན་པོར་གྱུར་ཏེ་དུས་གསུམ་དུ་འགྲོ་བའི་དོན་མཛད་པ་ནི་ནམ་མཁའ་དང་མཉམ་པའོ། ། སྔ་འགྱུར་རྙིང་མའི་བབ་ལུགས་བཤད་པའི་སྐབས་སོ། ། སྔ་འགྱུར་རྙིང་མའི་བབ་ལུགས་བཤད་པ་སྐབས་བཞི་པའི་འགྲེལ་པའོ། ། ཐེག་པའི་སྒོ་ཀུན་ལས་བཏུས་པ་གསུང་རབ་རིན་པོ་ཆེའི་མཛོད་བསླབ་(༡༡༩ན)པ་གསུམ་ལེགས་པར་སྟོན་པའི་བསྟན་བཅོས་ཤེས་བྱ་ཀུན་ཁྱབ་ཅེས་བྱ་བ་ལས་བསྟན་པ་དམ་པའི་ཆོས་ཀྱི་རིམ་པར་ཕྱེ་བ་སྟེ། གནས་གསུམ་པའི་རྣམ་པར་བཤད་པ་གྲུབ་བོ།། །། གནས་བཞི་པ། རྒྱལ་བསྟན་འཛམ་བུའི་གླིང་དུ་ཇི་ལྟར་དར་བའི་རིམ་པར་ཕྱེ་བ། དང་པོ། རྒྱལ་བསྟན་འཕགས་པའི་ཡུལ་དུ་ཇི་ལྟར་དར་བའི་སྐབས། དེ་ལྟར་བསྟན་པ་དམ་པའི་ཆོས་ཀྱི་རྣམ་པར་གཞག་པ་སྤྱི་དང་བྱེ་བྲག་གི་ཚུལ་ལེགས་པར་བཤད་ནས། ག༤ བསྟན་པ་དེ་ཉིད་ཛམྦུས་མཚན་པའི་གླིང་འདིར་ཇི་ལྟར་འཕེལ་ཞིང་རྒྱས་པར་གྱུར་པའི་རིམ་པར་ཕྱེ་བ་སྟེ་གནས་བཞི་པ་ལ་སྐབས་བཞི། ང༡ རྒྱལ་བསྟན་འཕགས་པའི་ཡུལ་དུ་ཇི་ལྟར་དར་བ། ང༢ གངས་ཅན་གྱི་ལྗོངས་སུ་བསྟན་རྩ་འདུལ་བ་དང་བཤད་རྒྱུན་གྱི་བྱུང་བ་བརྗོད་པ། ང༣ སྒྲུབ་བརྒྱུད་ཤིང་རྟ་ཆེན་པོ་བརྒྱད་ཀྱི་རིང་ལུགས་ཇི་ལྟར་བྱུང་བ། ང༤ རིག་པའི་གནས་དང་ཞར་བྱུང་ཡུལ་གཞན་དུ་བསྟན་པ་དར་བའི་ཚུལ་བཤད་པའོ། ། ང༡ དང་པོ་ལ་གཉིས། ཅ༡ སྤྱི་དང༌། ཅ༢ བྱེ་བྲག་ཏུ་བཤད་པའོ། ། ཅ༡ དང་པོ་ནི། བསྟན་པ་འཛམ་གླིང་འདི་རུ་དར་བའི་ཚུལ། ། ཞེས་པའོ། ། ཅ༢ གཉིས་པ་[བྱེ་བྲག་ཏུ་བཤད་པ་]ནི། འཕགས་པའི་ཡུལ་དུ་ཉན་ཐོས་ཐེག་པ་ཆེ། ། ཕལ་ཆེར་སྤྱོད་སྐབས་གཉིས་བྱུང༌། ཞེས་པ་སྟེ། འཛམ་གླིང་གི་བྱེ་བྲག་ཡུལ་དྲུག་གི་ཐོག་མ་སངས་རྒྱས་དངོས་སུ་བྱོན་པའི་ཞིང་འཕགས་པའི་སྐྱེ་བོས་གང་བ་རྒྱ་གར་གྱི་ཡུལ་དུ་ཉན་ཐོས་ཀྱི་སྡེ་སྣོད་ཕལ་ཆེར་སྤྱོད་པ་དང༌། ཐེག་པ་ཆེན་པོའི་རིང་ལུགས་ཕལ་ཆེ་བར་སྤྱོད་པའི་སྐབས་གཉིས་བྱུང་ངོ༌ཞེས་སོ། ། དེ་ལ་གཉིས། ཆ༡ དང་པོ་ཉན་ཐོས་ཕལ་ཆེར་སྤྱོད་པའི་སྐབས་བཤད་པ་ནི། རྒྱལ་བའི་ཚབ། ། འོད་སྲུང་ཀུན་དགའ་བོ་དང་ཤ་ནའི་གོས། ། ཉེར་སྦས་དྷཱི་ཏི་ཀ་དང་ནག་པོའི་ཞབས། ། ལེགས་མཐོང་ཉི་མ་གུང་བསྣན་གཏད་རབས་བརྒྱད། ། དགེ་སློང་སེང་གེའི་བར་དུ་བྱུང་བའང་བཤད། ། སངས་རྒྱས་ཉིད་ཀྱིས་ང་དང་འདྲ་བའི་ཉན་ཐོས་ཆེན་པོ་ཞེས་ཚངས་པའི་དབྱངས་ཀྱིས་གཟེངས་བསྟོད་ནས་རྒྱལ་ཚབ་ཏུ་དབང་བསྐུར་བ་འོད་སྲུང་ཆེན་པོས་བཀའི་བསྡུ་བ་སོགས་བསྟན་པའི་བྱ་བ་མཐར་ཕྱིན་པར་མཛད་དེ་ཀུན་དགའ་བོ་ལ་བསྟན་པ་གཏད་ནས་ལྷོ་(༡༡༩བ)ཕྱོགས་བྱ་གག་རྐང་གི་རི་གསུམ་གྱི་དབུས་སུ་སྟོན་པའི་ན་བཟའ་ཕྱག་དར་ཁྲོད་པས་སྐུ་ལུས་གཡོགས་ཏེ་གདུང་བཅོམ་ལྡན་འདས་བྱམས་པ་མ་བྱོན་གྱི་བར་དུ་མི་འཇིག་པར་བྱིན་གྱིས་བརླབས་ནས་མྱ་ངན་ལས་འདས་ཏེ་སྐུ་གདུང་ལྷ་ལ་སོགས་པས་མཆོད་ཅིང་རིགས་གསུམ་སྦྱར་ནས་གཡོགས། ཀུན་དགའ་བོས་ཚོང་དཔོན་གྱི་བུ་ཤ་ནའི་གོས་ཅན་རབ་ཏུ་བྱུང་ཞིང་བསྟན་པ་གཏད་ནས་གངྒཱའི་དབུས་སུ་ཆུའི་གླིང་སྤྲུལ་ཏེ་དྲང་སྲོང་ལྔ་བརྒྱ་བསྙེན་པར་རྫོགས་ཤིང་དགྲ་བཅོམ་པར་གྱུར་པ་ལ་ཆུ་དབུས་པའམ་ཉི་མ་གུང་པར་གྲངས་པའི་གཙོ་བོ་ལ་སྤྱིར་བསྟན་པ་སྐྱོངས་ཤིག་པ་དང༌། བྱེ་བྲག་ཏུ་ཁ་ཆེའི་ཡུལ་དུ་བསྟན་པ་སྤེལ་བར་གདམས་ནས་ལྷག་མ་མེད་པའི་དབྱིངས་སུ་མྱ་ངན་ལས་འདས། དེས་ཀྱང་ཁ་ཆེའི་ཡུལ་དུ་བྱོན་ནས་ཀླུ་མི་སྲུན་པ་ཨཽ་དུཥྚ་འཁོར་དང་བཅས་པ་བཏུལ་ནས་ས་གཞི་བླངས། རི་སྤོས་ཀྱི་ངད་ལྡང་ལས་གུར་གུམ་གྱི་ས་བོན་བླངས་ཏེ་བཏབ་ནས་སངས་རྒྱས་ཀྱི་བསྟན་པ་ཇི་སྲིད་གནས་ཀྱི་བར་དུ་སྐྱེ་བར་བྱིན་གྱིས་བརླབས། ཤ་ནའི་གོས་ཅན་གྱིས་ཆོས་བསྟན་པས་དགྲ་བཅོམ་པ་ཁྲི་ཕྲག །བདེན་པ་མཐོང་བ་འབུམ་ཙམ་བྱུང་བར་གྲགས་ཤིང་སྤོས་འཚོང་སྦས་པའི་བུ་ཉེར་སྦས་རབ་ཏུ་བྱུང་ནས་བསྟན་པ་གཏད། སྟོན་པས་ང་མྱ་ངན་ལས་འདས་ནས་ལོ་བརྒྱ་ན་མཚན་མེད་པའི་སངས་རྒྱས་ཀྱིས་སངས་རྒྱས་ཀྱི་བྱ་བ་བྱེད་དོ་ཞེས་ལུང་བསྟན་པ་འཕགས་པ་ཉེར་སྦས་ཀྱིས་བདུད་སྡིག་ཅན་རྫུ་འཕྲུལ་གྱིས་བཏུལ། སྲིད་དུ་ཁྲུ་བཅོ་བརྒྱད་པ། རྒྱར་ཁྲུ་བཅུ་གཉིས་པ། དཔང་དུ་ཁྲུ་དྲུག་ཡོད་པའི་ཕུག་པ་ཞིག་ཏུ་གདམས་ངག་བསྟན་ནས་དགྲ་བཅོམ་ཐོབ་པ་རེ་རེས་ཤིང་བུ་སོར་བཞི་པ་རེ་རེ་འཕངས་པས་ཕུག་དེ་ཁེངས་པའི་ཚེ་གྲོང་ཁྱེར་འཕགས་རྒྱལ་གྱི་བྲམ་ཟེའི་བུ་དྷཱི་ཏི་ཀ་རབ་ཏུ་ཕྱུངས་ནས་བསྟན་པ་གཏད། དྷཱི་ཏི་ཀས་ལོག་པའི་ལམ་ལ་ཞུགས་པའི་རྒྱལ་རིགས་བྲམ་ཟེའི་རིགས་མང་པོ་རྫུ་འཕྲུལ་གྱིས་བཏུལ་བ་སོགས་སྟོན་པའི་བསྟན་པ་རབ་ཏུ་གསལ་བར་མཛད་ནས་ཁྱིམ་བདག་གི་བུ་ཀྲྀཥྞ་རྒྱ་མཚོའི་གླིང་གི་འཇིགས་པ་ལས་བསྐྱབས་ཏེ། (༡༢༠ན)རབ་ཏུ་བྱུང་ཤིང་བསྟན་པ་གཏད། འཕགས་པ་ནག་པོའི་ཞབས་ཀྱིས་སོ་སྐྱེའི་དགེ་སློང་བདག་ལྟ་ཅན་མང་པོ་ལྟ་བ་དྲང་པོ་ལ་བཀོད་ཅིང་སིངྒ་ལའི་གླིང་དུ་བསྟན་པ་གསལ་བ་སོགས་མཛད་པ་རྒྱ་ཆེན་པོ་མཛད་ནས་སྐྱ་བསེང་གི་རིགས་མཐོང་བ་ཞེས་བྱ་བའི་བུ་ལེགས་མཐོང་ཞེས་བྱ་བ་དགྲ་བཅོམ་པ་སུ་ཀཱ་ཡ་ནས་རྣམ་གྲོལ་ལ་བཀོད་པ་དེ་ལ་བསྟན་པ་གཏད། ལེགས་མཐོང་ཆེན་པོས་བསྟན་པ་ལ་མི་དད་པའི་ཀླུ་དང་གནོད་སྦྱིན་ལྔ་བརྒྱ་བཏུལ། ལྷོ་ཕྱོགས་ཀྱི་རྒྱུད་ཀུན་ཏུ་གཙུག་ལག་ཁང་དང་དགེ་འདུན་གྱིས་ཁྱབ་པར་མཛད། གླིང་ཕྲན་མང་པོར་ཡང་བསྟན་པ་བཙུགས། རྒྱ་ཡུལ་དུའང་ཆོས་ཅུང་ཟད་དར་བར་མཛད་ནས་མྱ་ངན་ལས་འདས་སོ། ། འོད་སྲུང་ཆེན་པོ་དང་ལེགས་མཐོང་བར་གཏད་རབས་བདུན་ནམ། དེ་སྟེང་གོང་སྨོས་ཉི་མ་གུང་པ་ཆེན་པོ་བསྣན་པའི་གཏད་རབས་བརྒྱད་པོ་དེ་དག་ནི་གཉིས་ཀའི་ཆ་ལས་རྣམ་པར་གྲོལ་བའི་དགྲ་བཅོམ་པ་རྣམ་པར་ཐར་པ་བརྒྱད་ལ་བསམ་གཏན་པ་གསུང་རབ་ཡོངས་སུ་རྫོགས་པའི་ཐོས་པ་འཛིན་ཅིང་བསྟན་པ་རྫོགས་པར་སྐྱོང་བ། སངས་རྒྱས་ཉིད་དང་ཕྱོགས་མཚུངས་པའི་མཛད་པ་ཅན་ཡིན་ལ། དེའི་རྗེས་སུ་དགྲ་བཅོམ་པ་མང་དུ་བྱོན་ཀྱང་དེ་དག་དང་མཛད་པ་མཉམ་པ་མ་བྱུང་ངོ༌། ། དེ་ལྟར་འདུལ་བ་ལུང་ཕྲན་ཚེགས་ལས་འབྱུང་བའི་བསྟན་པའི་གཏད་རབས་བདུན་ནི་དེས་རྫོགས་ལ། འདི་ཕྱིན་ཆད་ཉན་ཐོས་རྣམས་ལ་གྲགས་པའི་གཏད་རབས་མི་གསལ་ཡང༌། ཐེག་ཆེན་པར་གྲགས་པ་ལངྐར་གཤེགས་པའི་འགྲེལ་པ་ལས་དགེ་སློང་སེང་གེའི་བར་དུ་བྱུང་བའང་བཤད་དེ། དེའང་སྟོན་པ་ནས་དྷཱི་ཏི་ཀའི་བར་གོང་དང་མཚུངས་པ་ལས། དེས་བི་བྷ་ག །དེས་བཙུན་པ་བུདྡྷ་ནནྡཱི། དེས་བུདྡྷ་མི་ཏྲ། དེས་དགེ་སློང་རྩིབས། དེས་སུ་ཤན་ཏ། དེས་རྟ་སྐད། དེས་མ་ཤི་བ། དེས་ཀླུ་སྒྲུབ། དེས་ཨཱརྱདེ་བ། དེས་རཱ་ཧུ་ལ། དེས་སངྒྷ་ནནྡཱི། དེས་དགེ་སློང་དགྲ་བཅོམ་པ། དེས་ཀ་ལཱ་ཤ། དེས་(༡༢༠བ)ཀུ་མཱ་ར་ལ། དེས་ཤ་པ་ཏ། དེས་བ་སུ་བནྡྷུ། དེས་མ་ནོ་ཏ། དེས་ཧ་ག་ལི་ཀ་ན་ཡ་ན་ཤ། དེས་དགེ་སློང་སེང་གེ་ལ་བསྟན་པ་གཏད་པར་བཤད་དོ། ། བསྟན་བཅོས་ཐོག་མ་བྱེ་བྲག་བཤད་མཛོད་དར། ། འབྲས་བུ་བཞི་ཐོབ་ས་ཡི་རྡུལ་ལྟར་མང༌། ། དེ་དག་གི་སྐབས་སུ་བསྟན་བཅོས་རྣམས་ཀྱི་ཐོག་མ་བྱེ་བྲག་བཤད་མཛོད་ཆེན་མོ་འཆད་ཉན་གྱི་སྲོལ་དར། བསྙེན་པར་རྫོགས་ཏེ་བསམ་གཏན་ལ་བརྩོན་པས། རྒྱུན་ཞུགས། ལན་ཅིག་ཕྱིར་འོང༌། ཕྱིར་མི་འོང༌། དགྲ་བཅོམ་པ་སྟེ། འབྲས་བུ་བཞི་ཐོབ་པའང་ཉིན་རེ་བཞིན་འཕེལ་བས་སའི་རྡུལ་ལྟར་མང་ངོ༌། ། དེ་ལ་བྱེ་བྲག་ཏུ་བཤད་པའི་དོན་ནི། ཞིབ་མོར་བཤད་པའི་དོན་ཡིན་ཞིང༌། དེ་ཡང་སྔོན་སྟོན་པ་ཉིད་ཀྱི་བཀའ་ཇི་ལྟ་བའི་ཚིག་བརྗོད་ནས་དེའི་གདམས་ངག་སྟོན་པ་དང༌། དེ་ཉིད་དུ་བཀའི་དོན་འགྲོལ་བར་བྱེད་པ་ལས། མདོ་སྡེ་ལས་གོ་སླ་བའི་བསྟན་བཅོས་ལོགས་སུ་བྱེད་པ་མེད་དོ། ། ཕྱིས་མ་འོངས་པའི་སེམས་ཅན་གྱི་དོན་དུ་བྱེ་བྲག་ཏུ་བཤད་པའི་བསྟན་བཅོས་བྱས་ཏེ། ཁ་ཅིག་ནི་ཉེ་སྦས་ཀྱི་དུས་སུ་དགྲ་བཅོམ་པ་རྣམས་ཀྱིས་སྤྱི་མཐུན་དུ་བརྩམས་ཞེས་དང༌། ཁ་ཅིག་ནི་གྲགས་པ་དང་ཐམས་ཅད་འདོད་ལ་སོགས་པས་བྱས་པར་འདོད་ཅིང༌། བོད་རྣམས་ནི་ཐམས་ཅད་འདོད་དང༌། སྒུར་པོ་ལ་སོགས་པ་དགྲ་བཅོམ་པ་ལྔ་བརྒྱས་བྱང་ཕྱོགས་རི་བོ་འབིགས་བྱེད་གར་མཁན་གྱི་གཙུག་ལག་ཁང་དུ་མཛད་ཟེར་བ་ནི་ལུགས་སྔ་མ་དེ་གཉིས་བསྲེས་པའི་གཏམ་དུ་སྣང་ཞིང༌། གང་ལྟར་ཡང་དགྲ་བཅོམ་པ་དེ་དག་གི་གསུང་རྒྱུན་ཕྱོགས་གཅིག་ཏུ་བསྒྲིགས་པ་གནས་བརྟན་རྣམས་ཀྱི་རྣ་བ་ནས་རྣ་བར་བརྒྱུད་པ་ཕྱིས་ཡི་གེར་བཀོད་པའོ། ། བྱེ་བྲག་ཏུ་སྨྲ་བ་རྣམས་ཀྱི་ལུགས་ལྟར་ན། མངོན་པ་སྡེ་བདུན་བཀར་འདོད་པས་དགོངས་འགྲེལ་གྱི་བསྟན་བཅོས་ཀྱི་ཐོག་མ་ནི་བྱེ་བྲག་ཏུ་བཤད་པ་ཡིན་པར་འདོད་ལ། མདོ་སྡེ་པ་རྣམས་ལྟར་ན། བྱེ་བྲག་ཏུ་བཤད་པའི་སྔོན་ལ་བྱུང་བའི་མངོན་པ་སྡེ་བདུན་ཡང་ཉན་ཐོས་སོ་སོ་སྐྱེ་བོ་དག་གིས་བྱས་ནས། (༡༢༡ན)སྟོན་པའི་གསུང་ཤཱ་རིའི་བུ་ལ་སོགས་པས་བསྡུས་པར་ཁ་འཕངས་པར་འདོད་པས། དགོངས་འགྲེལ་གྱི་བསྟན་བཅོས་ཀྱི་ཐོག་མ་སྡེ་བདུན་ཡིན་ནོ། ། སློབ་དཔོན་འགའ་ཞིག་ནི། སྡེ་བདུན་ཉིད་དང་པོར་སངས་རྒྱས་ཀྱི་བཀའ་ཡིན་ཡང་། བར་དུ་ཉན་ཐོས་སོ་སོ་སྐྱེ་བོ་དག་གིས་བྱས་པའི་ཚིག་བཅུག་པའང་ཡིན་དུ་རུང་སྟེ། ཐེག་པ་ཐ་དད་པའི་མདོ་སྡེ་འགའ་ཞིག་བཞིན་ནོ། ། དེས་ན་ཚད་མ་གསུམ་དང་འགལ་བའི་ནོར་བ་ཡོད་པ་དག་ནི་ཕྱིས་ལྷད་དུ་བཅུག་པའི་ཚིག་ཡིན་