Tibetan
ཆོས་ཉིད་མྱ་ངན་ལས་འདས་པ་གཉིས་སུ་ཕྱེ་ནས་སྟོན། རྒྱུད་བླ་མར། རྡོ་རྗེའི་གནས་བདུན་གྱིས་བདེ་བར་གཤེགས་པའི་སྙིང་པོ་གཙོ་བོར་གཏན་ལ་དབབ་པར་མཛད་དོ། ། དེའང་བོད་སྤྱི་རྣམས་མདོ་རྒྱན་དང་འབྱེད་གཉིས་ཀྱིས་གཙོ་བོར་བཀའ་ཐ་མའི་དགོངས་པ་འགྲེལ། ལྟ་བ་(༡༢༥བ)སེམས་ཙམ་སྟོན། དེའང་མདོ་རྒྱན་གྱིས་ལྟ་སྤྱོད་ཆ་མཉམ། འབྱེད་གཉིས་ལྟ་བ་གཙོ་བོར་སྟོན་གསུངས་པ་དང་། མངོན་རྒྱན་ཤེར་ཕྱོགས་ཡིན་པ་ལ་མི་མཐུན་པ་མེད་དོ། ། རྒྱུད་བླ་མ་ནི། བོད་སྔ་རབས་པ་རྣམས་བཀའ་བར་པའི་དགོངས་འགྲེལ་ལྟ་བ་རང་རྒྱུད་སྟོན་པར་བཞེད། རྗེ་བཙུན་གྲགས་པ། མཉམ་མེད་དྭགས་པོ་རྗེས་འབྲང་དང་བཅས་པ་རྣམས་ཀྱིས་ཀྱང་དབུ་མའི་གཞུང་དུ་བཞེད་ཅིང༌། བུ་སྟོན་རིན་པོ་ཆེས་བཀའ་ཐ་མའི་དགོངས་འགྲེལ། ལྟ་བ་དབུ་སེམས་གང་རུང་བསྟན་གསུངས། རྗེ་ཙོང་ཁ་པས་ཐལ་འགྱུར། ཀླུ་སྒྲུབ་རྒྱ་མཚོ་སེམས་ཙམ་དུ་གནས་པར་བཞེད་པ་སོགས་མི་མཐུན་པ་ཅི་རིགས་ཡོད། མངོན་རྟོགས་རྒྱན་ནི། སློབ་དཔོན་དབྱིག་གཉེན། ཕྱོགས་གླང༌། ཤཱནྟི་པ་སོགས་ཀྱིས་རྣམ་རིག་ཏུ་བཀྲལ། འཕགས་སེང༌། ཡེ་ཤེས་ཞབས། ཨ་བྷཱ་ཡ། ཇོ་བོ་རྗེ་སོགས་ཀྱིས་ངོ་བོ་ཉིད་མེད་པར་སྨྲ་བའི་ལུགས་སུ་བཀྲལ། བོད་སྔ་ཕྱི་ཕལ་མོ་ཆེས་བཀའ་བར་པའི་དགོངས་འགྲེལ། ལྟ་བ་རང་རྒྱུད་སྟོན་པར་བཞེད། རྗེ་མི་བསྐྱོད་ཞབས་དང༌། ཙོང་ཁ་པ་སོགས་ཐལ་འགྱུར་སྟོན་པར་བཞེད་ལ། ཇོ་ནང་ཀུན་མཁྱེན་ཆོས་རྗེ་ཡབ་སྲས་རྣམས་ཀྱིས་ནི། གཙོ་ཆེ་ཆུང་ཙམ་ལས། བྱམས་ཆོས་ལྔ་ཀའང་དབུ་མའི་གཞུང་དང༌། དེ་ལས་ཀྱང་ཕལ་ཆེར་གཞན་སྟོང་དབུ་མ་ཆེན་པོའི་ལྟ་བ་སྟོན་པར་བཞེད་དོ། ། ས་སྡེ་ལྔ་ནི། དངོས་གཞི་དང་བསྡུ་བ་བཞི་སྟེ། དེ་ལ་སའི་དངོས་གཞི་ནི། ས་བཅུ་བདུན་དུ་བསྡུས་ནས་སྟོན་པ་སྟེ། དེ་ཉིད་ལས། སྡོམ་ནི། རྣམ་ཤེས་ལྔ་དང་ལྡན་པའི་ས། ། ཡིད་ཀྱི་ས་དང་གཞན་གསུམ་སྟེ། ། རྟོག་དཔྱོད་བཅས་ལ་སོགས་པ་དང༌། ། ཏིང་འཛིན་བཅས་དང་མ་ཡིན་དང༌། ། སེམས་ཡོད་པ་དང་སེམས་མེད་དང༌། ། ཐོས་དང་བསམ་དང་བསྒོམ་ལྡན་དང༌། ། དེ་བཞིན་ཐེག་པ་གསུམ་ལྡན་དང༌། ། ཕུང་པོར་བཅས་དང་ཕུང་མེད་གཞན། ། ཞེས་པས་བཅུ་བདུན་པོ་དེ་ཡང་། རྟེན་དང་། སྤྱོད་པ་དང་། འབྲས་བུ་གསུམ་གྱི་དབང་དུ་མཛད་ནས་བསྟན་ཏེ། རྣམ་ཤེས་ལྔ་ལྡན་གྱི་ས་དང་ཡིད་ཀྱི་ས་གཉིས་རྟེན་གྱི་རང་(༡༢༦ན)བཞིན། རྟོག་བཅས་དཔྱོད་བཅས་དང༌། རྟོག་མེད་དཔྱོད་བཅས་དང༌། རྟོག་མེད་དཔྱོད་མེད་ཀྱི་ས་སྟེ་གསུམ་རྟེན་གྱི་འཇུག་ཚུལ། མཉམ་པར་བཞག་མ་གཞག་དང༌། སེམས་ཡོད་མེད་ཀྱི་ས་སྟེ་བཞི་རྟེན་གྱི་གནས་སྐབས་སོ། ། སྤྱོད་པའི་དབང་དུ་བྱས་པ་ཐོས་བསམ་སྒོམ་གསུམ་གྱི་ས་གསུམ་མོ། ། འབྲས་བུ་ལ། གནས་སྐབས་ཀྱི་འབྲས་བུ་ཉན་རང་བྱང་ས་དང་ས་གསུམ། མཐར་ཐུག་གི་འབྲས་བུ་ཕུང་པོ་ལྷག་བཅས་ལྷག་མེད་དོ། ། དེ་དག་གི་འགྲེལ་པ་ལྟ་བུ་གཏན་ལ་དབབ་པ་བསྡུ་བ། སྔར་གྱི་གཞུང་དེ་དག་སྡེ་སྣོད་གསུམ་དུ་སྡུད་ཚུལ་བསྟན་པ་ནི་གཞི་བསྡུ་བ། རྗོད་བྱེད་མིང་གི་རྣམ་གྲངས་བསྟན་པའམ། ཀུན་ནས་ཉོན་མོངས་དང་རྣམ་བྱང་གི་རྣམ་གྲངས་བྱེ་བྲག་ཏུ་འཆད་པ་རྣམ་གྲངས་བསྡུ་བ། དེ་དག་འཆད་ཚུལ་སྟོན་པས་རྣམ་པར་བཤད་པའི་སྒོ་བསྡུ་བ་སྟེ། དེ་ལྟར་གསུང་རབ་ཀྱི་དོན་དང་གཞུང་དང་བཤད་ཚུལ་གྱི་དབང་གིས་སྡེ་ཚན་ལྔར་བསྟན་པ་ཡིན་ནོ། ། དབྱིག་གཉེན་སོགས་ཀྱིས་བསྟན་པ་རྒྱ་ཆེར་སྤེལ། ། དེའང་འཇམ་དཔལ་རྩ་རྒྱུད་ལས། དེ་འོག་རྣམ་པར་གྲགས་པ་ནི། ། ལྷོ་ཡི་ཕྱོགས་སུ་བྲམ་ཟེ་ནི། ། ཡི་གེ་དང་པོ་བ་བསྟན་པ། ། སྟོན་པའི་བསྟན་པ་གཅེས་འཛིན་བྱེད། ། མཆོད་རྟེན་ཀུན་དགའ་ར་བར་གནས། ། སྒྲོན་པའི་གཟུགས་བརྙན་ཡིད་འོང་གི། ། ས་ནི་རྒྱ་མཚོ་གཉིས་མཐར་ཐུག ། ཐམས་ཅད་ཀྱི་ནི་རྒྱན་དུ་བྱས། ། ཅེས་ལུང་བསྟན་པ་གཅུང་སློབ་དཔོན་ཆེན་པོ་དབྱིག་གཉེན་ནི། སྟོན་པ་མྱ་ངན་ལས་འདས་པའི་འོག་ཏུ་འདི་ལྟ་བུའི་མང་དུ་ཐོས་པ་མ་བྱུང་བར་གྲགས་ཤིང༌། ཐེག་པ་ཆེ་ཆུང་གི་དགེ་འདུན་ཀུན་གྱིས་སྤྱིར་བཀུར། གཞན་འགྲེལ་གྱི་བསྟན་བཅོས་ལྔ་བཅུ་ཙམ་དང་རང་རྐང་དུ་པྲ་ཀ་ར་ཎ་སྡེ་བརྒྱད་བརྩམས། ཆོས་གཞི་དྲུག་བརྒྱ་ལྔ་བཅུ་རྩ་བཞི་བཙུགས། ཐེག་ཆེན་གྱི་དགེ་སློང་དྲུག་ཁྲིར་ལོངས་པ་སོགས་བསྟན་པའི་བྱ་བ་རྒྱ་ཆེན་པོ་མཛད་ཅིང༌། གོང་གི་ལུང་ལས་ས་བརྒྱད་པའི་འཕགས་པར་རྒྱ་བོད་འགའ་ཞིག་བཞེད། དེའི་སློབ་མ་རང་ལས་མཁས་པ་བཞི། གཞན་ཡང་། (༡༢༦བ)སྨྲ་བའི་དབང་ཕྱུག་དཀོན་མཆོག་འབངས། དུལ་བའི་ལྷ། ཙནྡྲ་གོ་མཱི། སློབ་དཔོན་ཆོས་སྐྱོང་ལ་སོགས་པ་མཁས་ཤིང་དངོས་གྲུབ་བརྙེས་པ་དུ་མ་ཟམ་མ་ཆད་པར་བྱོན་ཏེ་སངས་རྒྱས་ཀྱི་བསྟན་པ་རྒྱ་ཆེར་སྤེལ་ལོ། ། སློབ་དཔོན་ཉིད་ཀྱིས་རང་རྐང་དུ་མཛད་པའི་པྲ་ཀ་ར་ཎ་སྡེ་བརྒྱད་ནི། ཆོས་ཐམས་ཅད་སེམས་ཙམ་དུ་སྟོན་པ་སུམ་ཅུ་པ། དེ་རིག་པས་སྒྲུབ་པ་ཉི་ཤུ་པ། དེའི་གཞི་ཕུང་པོ་ལྔ་འཐད་པར་སྟོན་པ་ཕུང་པོ་ལྔ་པ། དེ་ལྟར་བཤད་ཉན་འཐད་པར་སྟོན་པ་རྣམ་བཤད་རིག་པ། སྒོ་གསུམ་གྱི་ལས་འཐད་པར་སྟོན་པ་ལས་གྲུབ་པའི་རབ་ཏུ་བྱེད་པ་སྟེ། རང་རྒྱུད་དུ་བརྩམས་པ་ལྔ། ཕྱིན་དྲུག་སོགས་སྤྱོད་པ་རྒྱ་ཆེན་དང༌། རྟེན་འབྲེལ་བཅུ་གཉིས་དང༌། མཚན་ཉིད་གསུམ་འཐད་པར་སྟོན་པ་མདོ་སྡེ་རྒྱན། རྟེན་འབྲེལ་གྱི་མདོ། དབུས་མཐའ་རྣམ་འབྱེད་གསུམ་གྱི་འགྲེལ་པ་སྟེ། གཞན་འགྲེལ་དུ་བརྩམས་པ་གསུམ་བཅས་བརྒྱད་དོ་ཞེས་གསུངས་སོ། ། ཁ་ཅིག །སློབ་དཔོན་འདིས་ས་བཅུ་པའི་འགྲེལ་པ་ལ་སོགས་པ་མང་དུ་མཛད་པས་སྡེ་བརྒྱད་ངེས་པ་མེད་ཅིང༌། བྱམས་པ་དང་འབྲེལ་བའི་ཆོས་ཉི་ཤུའི་གྲངས་ངེས་ཀྱང་མེད་ཟེར། གྲངས་ངེས་མཛད་པ་རྣམས་ནི། ས་སྡེ་ལྔ། སྡོམ་གཉིས། བྱམས་ཆོས་ལྔ། རབ་ཏུ་བྱེད་པ་སྡེ་བརྒྱད་དེ་དག་ལ་ཆོས་ཉི་ཤུར་འདོད་དོ། ། རིག་པའི་དབང་ཕྱུག་ཕྱོགས་གླང་ཆོས་གྲགས་ཀྱིས། ། ཚད་མའི་ལམ་གསལ་རྒོལ་ངན་རྩོད་པས་བཅོམ། ། རིག་པའི་དབང་ཕྱུག་རྣམ་པ་གཉིས་ནི། དུས་འཁོར་རྒྱུད་ལས། ཕྱོགས་ཀྱི་གླང་པོ་གཞན་ལ་ཕན་པའི་བསམ་པ་ཅན་ནི་ཟླ་བ་པདྨའི་མྱུ་གུ་ཞེས། ། ཞེས་དང༌། འཇམ་དཔལ་རྩ་རྒྱུད་ལས། ཡི་གེ་དྷ་ཞེས་སྡོམ་བརྩོན་ཉིད། ། ལྷོ་ཡི་ཕྱོགས་སུ་རྣམ་པར་བསྒྲགས། ། ཕ་རོལ་རྒོལ་བ་བཟློག་ནས་ནི། ། དེ་བཞིན་སྡོམ་བརྩོན་སྔགས་ཀྱང་འགྲུབ། ། ཞེས་ལུང་བསྟན་པའི་ཐོགས་མེད་དབྱིག་གཉེན་སློབ་མ་ཚད་མ་རང་ལས་མཁས་པ་ཕྱོགས་ཀྱི་གླང་པོ་ནི། འཇམ་དཔལ་ལས་ཆོས་དངོས་སུ་གསན། མདོ་སྡེ་དུ་མ་རྣམ་པར་བཤད་ཅིང་ཆོས་མངོན་པའང་(༡༢༧ན)རྒྱས་པར་མཛད། ཐུན་མོང་མིན་པའི་རང་སྟོབས་ཁོ་ནས་རྟོག་གེའི་བསྟན་བཅོས་ཐོར་བུ་མང་དུ་བརྩམས་པ་ཕྱིས་ཕྱོགས་གཅིག་ཏུ་བསྡུ་བར་བཞེད་ནས། མཆོད་བརྗོད་བྲིས་པའི་ལྟས་ཀྱིས་བྲམ་ཟེ་ནག་པོ་ཞེས་བྱ་བ་བསྐུལ་བ་དང་རྩོད་པས་ཕམ་པར་བྱས། སླར་ཚང་བར་བརྩམས་པ་ཚད་མ་མདོ་སོགས་སྔ་ཕྱིར་བསྟན་བཅོས་ཀྱང་བརྒྱར་ལོངས་པར་མཛད། ཚད་མའི་ལམ་སྲོལ་ཐོག་མར་གསལ། ཆོས་གཞི་ཉམས་པ་མང་པོ་གསོས་ཤིང་གསར་པ་དུ་མ་བསྐྲུན། རྩོད་པའི་ཁྱུ་མཆོག་ཆེན་པོ་གྲགས་ཤིང་ལོག་པར་སྨྲ་བའི་རྒོལ་ངན་ཕལ་མོ་ཆེ་རྩོད་པས་ཚར་བཅད། སློབ་མའི་ཚོགས་ཀྱིས་ཕྱོགས་ཀྱི་ཐ་གྲུ་བཀང་སྟེ་བསྟན་པ་གསལ་བར་མཛད། ཆོས་ཀྱི་གྲགས་པ་ནི། ཐོག་མར་ཕྱོགས་གླང་སློབ་མ་དབང་ཕྱུག་སྡེ་ལས་ཚད་མ་གསན། དཔལ་ཧེ་རུ་ཀས་ཕྱོགས་ལས་རྣམ་རྒྱལ་གྱི་དངོས་གྲུབ་སྩལ། མུ་སྟེགས་བྱེད་རྩོད་པའི་ཁྱུ་མཆོག་ཏུ་གྲགས་པ་རྣམས་དང་བྲམ་ཟེ་བསམ་གྱིས་མི་ཁྱབ་པ་རྣམས་རྩོད་པས་ཕམ་པར་བྱས་ཏེ་ཐམས་ཅད་བསྟན་པ་འདི་ལ་བཅུག །ཡུལ་ཐམས་ཅད་དུ་ཆོས་གཞི་དང༌། དགེ་འདུན་གྱི་སྡེས་ཁྱབ་པར་མཛད། ཚད་མ་སྡེ་བདུན་སོགས་ཀྱི་བསྟན་བཅོས་ཀྱང་མང་དུ་བརྩམས་ཏེ། མདོར་ན། ཆོས་ཀྱི་གྲགས་པ་ཉིད་ཀྱིས། གལ་ཏེ་ཆོས་ཀྱི་གྲགས་པ་ཡི། ། སྨྲ་བའི་ཉི་མ་ནུབ་པ་ན། ། ཆོས་རྣམས་གཉིད་ལོག་ཡང་ན་ཤི། ། ཆོས་མ་ཡིན་རྣམས་ད་གདོད་ལང༌། ། ཞེས་གསུངས་པ་ལྟར། འགྲན་ཟླ་དང་བྲལ་བའི་བསྟན་པའི་ཉི་མ་གཅིག་པུ་པའོ། ། མདོར་ན་འཛམ་གླིང་རྒྱན་དྲུག་ཆེན་པོ་བཞི། ། རྨད་བྱུང་གཉིས་སོགས་རྒྱལ་བས་ལུང་བསྟན་བཞིན། ། བསྟན་པ་བསྐྱངས་པའི་རྣམ་ཐར་དཔག་པར་དཀའ། ། མདོར་ན། འཕགས་པའི་ཡུལ་དུ་རྫོགས་པའི་སངས་རྒྱས་འཇིག་རྟེན་དུ་བྱོན་པ་ནས་བཟུང༌། ཕྱིས་བི་ཀྲ་མ་ཤཱི་ལའི་གཙུག་ལག་ཁང་ཀླ་ཀློས་བཅོམ་གྱི་བར་དུ་མཁས་པ་དང་གྲུབ་པའི་སྐྱེ་བོ་ཁྱད་པར་འཕགས་པ་བར་མ་ཆད་དུ་བྱོན་པ་ལས་ཉི་ཟླ་ལྟར་ཡོངས་སུ་གྲགས་ཤིང་གཙོ་བོར་གྱུར་པ་(༡༢༧བ)སློབ་དཔོན་ཀླུ་སྒྲུབ། ཐོགས་མེད། ཕྱོགས་གླང་གསུམ་ནི་གཞུང་བྱེད་པ་པོ་དང༌། ཨཱརྱདེ་བ། དབྱིག་གཉེན། ཆོས་ཀྱི་གྲགས་པ་གསུམ་ནི་འགྲེལ་པ་བྱེད་པ་པོ་སྟེ། འཛམ་གླིང་མཛེས་པར་བྱེད་པའི་རྒྱན་དྲུག་ཏུ་གྲགས་པ་དང༌། དཔའ་བོ། སྒྲ་གཅན་འཛིན་བཟང་པོ། ཡོན་ཏན་འོད། ཆོས་སྐྱོང་སྟེ་སློབ་དཔོན་ཆེན་པོ་བཞི། ཞི་བ་ལྷ་དང༌། ཙནྡྲ་གོ་མཱི་སྟེ་རྨད་དུ་བྱུང་བའི་སློབ་དཔོན་གཉིས། གཞན་ཡང་། ཤཱཀྱ་འོད་དང༌། སེང་གེ་བཟང་པོ་སོགས་དུ་མ་བྱོན་པ་དེ་དག་ཕལ་ཆེར་རྒྱལ་བས་མདོ་རྒྱུད་རྣམས་སུ་བསྟན་པ་སྤེལ་ཞིང་མཐར་བྱང་ཆུབ་བརྙེས་པར་ལུང་བསྟན་པ་བཞིན་དུ་ངོ་མཚར་བའི་ཕྲིན་ལས་ཀྱིས་བསྟན་པ་བསྐྱངས་པའི་རྣམ་པར་ཐར་པ་རེ་རེའི་ཚུལ་ཡང་དཔག་པར་དཀའ་ཞིང་བསམ་གྱིས་མི་ཁྱབ་བོ། ། ཇ༢ གཉིས་པ་ཐུན་མིན་སྔགས་ཀྱི་སྡེ་སྣོད་དར་བའི་ཚུལ་ལ་གཉིས། ཉ༡ རྒྱུད་སོ་སོའི་བྱུང་ཚུལ། ཉ༢ སྔགས་གྲྭ་དར་ཚུལ་ལོ། ། ཉ༡ དང་པོ་ནི། བྱ་སྤྱོད་རྒྱུད་རྣམས་ཐེག་ཆེན་དར་ནས་སྤྱོད། ། སྔགས་གྲུབ་རིག་འཛིན་སྟོང་ཕྲག་བརྒྱ་རྩ་བྱོན། ། རྒྱུད་སྡེ་ཆེན་པོ་བཞི་ལས། བྱ་བ་དང་སྤྱོད་པའི་རྒྱུད་ནི་སྤྱིར་བཅོམ་ལྡན་འདས་ཀྱིས་འཛམ་བུའི་གླིང་འདི་ཉིད་དུ་མི་རྣམས་ལ་བསྟན་པ་དང༌། གཞན་དུ་ལྷ་གནོད་སྦྱིན་སོགས་ལ་བསྟན་པ་དག་ལས་ཅི་རིགས་པར་དུས་དེ་ཉིད་ནས་བཟུང་སྟེ་འཕགས་པའི་ཡུལ་ལ་སོགས་པར་སྐལ་ཅན་རྣམས་ཀྱིས་གསང་ཞིང་སྤྱད་པས་སྔགས་ཀྱི་དངོས་གྲུབ་ཆེན་པོ་འགྲུབ་པར་གྱུར་པ་མང་དུ་བྱུང་ཞིང་། ཁྱད་པར་བཀའ་བསྡུ་གསུམ་པ་དང་མི་རིང་བར་ཐེག་ཆེན་གྱི་མདོ་སྡེ་རྣམས་ཅིག་ཅར་ཕེབས་ཏེ་དར་བ་ནས་བརྩམས་མངོན་དུ་སྤྱོད་ཅིང་རྒྱས་པར་གྱུར་ལ། དེ་དག་གི་རིག་སྔགས་གྲུབ་པའི་རིག་འཛིན་སྟོང་ཕྲག་བརྒྱ་རྩ་སོགས་བྱོན་པར་གསུངས་སོ། ། ས་ར་ཧ་ཡིས་སངས་རྒྱས་ཐོད་པ་སོགས། ། རྒྱུད་སྡེ་རྒྱ་མཚོ་ཨོ་རྒྱན་ཡུལ་ནས་དྲངས། ། སྟོན་པ་མྱ་ངན་ལས་འདས་ནས་ལོ་སུམ་བརྒྱ་ཙམ་འདས་པ་ཤམྦྷ་ལར་ཆོས་རྒྱལ་ཟླ་བས་བྱིན་ལོངས་སྐུར་གཤེགས་(༡༢༨ན)ཀ་ཙམ་གྱི་དུས་སུ་ལཱ་ཌའི་ཡུལ་དུ་བྲམ་ཟེ་ཆེན་པོ་སྒྲ་གཅན་འཛིན་བྱུང༌། སློབ་དཔོན་རྣམ་པར་མི་རྟོག་པ་དང༌། ཨོ་ཌི་བི་ཤའི་རྒྱལ་པོ་བི་སུ་ཀལྤ་ཞེས་བྱ་བ་ཨཽ་ཌྱན་དུ་བྱོན་ནས་ཀླུ་ལས་གྱུར་པའི་རྣལ་འབྱོར་མས་གསང་བ་འདུས་པའི་དབང་བསྐུར་ཏེ་གྲུབ་པ་ཐོབ་པ་དེ་སོགས་བླ་མ་མང་པོ་དང༌། ཁྱད་པར་གསང་བའི་བདག་པོ་སོགས་ལྷག་པའི་ལྷ་རྣམས་ལས་དངོས་སུ་རྒྱུད་མང་པོ་གསན་ནས་མཆོག་གི་དངོས་གྲུབ་བརྙེས་ཏེ་སྤྱོད་པ་སྐྱོང་བའི་ཚེ་ས་ར་ཧར་གྲགས། སངས་རྒྱས་ཐོད་པ་སོགས་རྒྱུད་སྡེ་རྒྱ་མཚོའི་གླེགས་བམ་མང་པོའང་ཨཽ་རྒྱན་གྱི་ཡུལ་ནས་སྤྱན་དྲངས་ཏེ་སངས་རྒྱས་ཐོད་པའི་བཀའ་འགྲེལ་སོགས་མཛད་དོ། ། དེའང་སློབ་དཔོན་འདི་ཡན་ཆད་ལ་རྣལ་འབྱོར་དང་རྣལ་འབྱོར་བླ་མེད་གཉིས་ནི་གདུལ་བྱ་མཆོག་གི་སྐལ་པ་ཅན་ཐོད་རྒལ་དུ་སྣང་བ་ཙམ་ལས་རྒྱུན་ཆགས་པར་གནས་པ་ཞིག་ནི་མེད་པར་མངོན་པས། ཕྱིས་སློབ་དཔོན་ཆེན་པོ་འདིའི་དུས་ནས་རྒྱས་ཤིང་རྒྱུན་ཆགས་སུ་གནས་པས་རྒྱུད་དང་གྲུབ་པ་ཡོངས་ཀྱི་འབྱུང་ཁུངས་ཆེན་པོའོ། ། དེ་ཡང་ཨིནྡྲ་འཁོར་བཅས་གྲུབ་པའི་རྒྱུས། ། ཡུལ་དེ་རྡོ་རྗེ་ཐེག་པའི་འབྱུང་ཁུངས་སོ། ། ཨོ་རྒྱན་གྱི་ཡུལ་ནས་སྔགས་རྒྱུད་སྤྱན་དྲངས་པར་བཤད་པས་ཡུལ་དེར་སྔགས་རྒྱུད་ཐམས་ཅད་བཞུགས་པའི་དོན་དེའང་ཇི་ལྟ་བུ་ཞེ་ན། གོང་དུ་སྨོས་པ་ལྟར། བཅོམ་ལྡན་འདས་ཉིད་བཞུགས་པའི་དུས་མཉན་ཡོད་ནས་ནུབ་ཏུ་དཔག་ཚད་ལྔ་བརྒྱ་བརྒལ་བ་ན། ནུབ་ཕྱོགས་ཨཽ་ཌྱན་གྱི་ཡུལ་དུ་རྒྱལ་པོ་ཨིནྡྲ་བྷཱུ་ཏི་ཞེས་བྱ་བ་ཡོད་པ་དེས་བཅོམ་ལྡན་འདས་ཀྱི་མཚན་ཐོས་པས་དད་དེ་ཕྱག་འཚལ་ཞིང་ཡིད་ཀྱིས་གསོལ་བ་བཏབ་པས་བཅོམ་ལྡན་འདས་བྱོན་ཏེ། གསང་བ་འདུས་པ་མི་བསྐྱོད་པའི་དཀྱིལ་འཁོར་སྤྲུལ་པ་ལ་རྒྱལ་པོ་འཁོར་བཅས་དབང་བསྐུར་ཞིང༌། འདོད་ཡོན་མི་སྤོང་བར་ལམ་དུ་བྱེད་པའི་ཐབས་ཁྱད་པར་ཅན་སྟོན་པའི་རྒྱུད་བསྟན་ནས་རྗེས་སུ་གདམས་པར་མཛད་དོ། །(༡༢༨བ) རྒྱལ་པོས་ཀྱང་དོན་དེ་ཐམས་ཅད་ཁོང་དུ་ཆུད་ནས་སྤྲོས་བཅས་ཀྱི་སྤྱོད་པ་རྒྱ་ཆེན་པོ་བརྩམས་པས་འཁོར་བཅས་ཀྱིས་རིག་པ་འཛིན་པའི་ས་བརྙེས་ཏེ་ཡུལ་དེ་ལན་ཅིག་སྟོངས་སོ་ཞེས་གྲགས་ཤིང༌། དེ་མ་ཐག་ལྷོ་ཕྱོགས་ཀྱི་མཚོ་ཞིག་ཡོད་པ་འཕེལ་ཏེ་ཀླུ་མང་པོ་དང་བཅས་པས་ཡུལ་དེ་གང་བར་གྱུར་ཏོ། ། ཀླུ་དེ་རྣམས་ལ་ལག་ན་རྡོ་རྗེས་རྒྱུད་ཀྱི་གླེགས་བམ་གཏད་ཅིང་ཀླུ་རྣམས་ཀྱིས་ཀྱང་མིར་བསྒྱུར་ནས་མཚོ་དེའི་འགྲམ་དུ་གྲོང་ཁྱེར་བྱས་ཏེ་འབོད་ཅིང༌། ལམ་ཉམས་སུ་བླངས་པས་ཕལ་ཆེར་གྱིས་གྲུབ་པ་ཐོབ་པར་གྱུར་ཏོ། ། གྲུབ་པ་མ་ཐོབ་པ་རྣམས་ཀྱང་མིར་གྱུར་ནས་དེ་སྐྱོང་བའི་རྒྱལ་པོ་རྣམས་ཀྱང་ཆོས་དང་ལྡན་པ་ཤ་སྟག་ཏུ་གྱུར་པ་དང༌། ཕྱིས་མཚོ་བསྐམས་པའི་ཤུལ་དུ་དྷརྨ་གཉྫ་སྟེ་ཆོས་ཀྱི་མཛོད་ཅེས་སྔགས་རྒྱུད་ཐམས་ཅད་བཞུགས་པའི་ཕོ་བྲང་ལ་རིག་པ་འཛིན་པའི་དཔའ་བོ་དང་རྣལ་འབྱོར་མ་དུ་མ་གནས་པའི་གྲོང་ཁྱེར་གྱིས་བསྐོར་བ་རིམ་གྱིས་ཚོགས་པའི་རྒྱུ་ལས། ཡུལ་དེ་ལ་ཨོ་རྒྱན་མཁའ་འགྲོའི་གླིང་ཞེས་གསང་སྔགས་རྡོ་རྗེ་ཐེག་པའི་འབྱུང་ཁུངས་ཆེན་པོར་འགྱུར་བའི་རྟེན་འབྲེལ་གྱི་སྒོ་མཆོག་ཏུ་འགྲིགས་པར་གྱུར་ཏོ། ། འཕགས་པ་ཡབ་སྲས་འདུས་པ་ཆེས་གསལ་མཛད། ། སློབ་དཔོན་འཕགས་པ་ཡབ་སྲས་རྣམས་ཀྱིས་དཔལ་ལྡན་གསང་བ་འདུས་པའི་ལམ་སྲོལ་ཆེས་གསལ་བར་མཛད་དེ། དེའང་བྲམ་ཟེ་ཆེན་པོས་སློབ་དཔོན་འཕགས་པ་ལ་དབང་བསྐུར་རྒྱུད་བཤད་མན་ངག་སྩལ་ཏེ་གསང་སྔགས་ཀྱི་བསྟན་པ་གཏད། སློབ་དཔོན་ཉིད་ཀྱིས་ཀྱང་ལྷག་པའི་ལྷ་སོགས་ལས་གསན་ཏེ་སྔགས་སྤྱི་དང་ཁྱད་པར་འདུས་པ་ལ་བསྐྱེད་རིམ་གྱི་ཕྱོགས་སུ་སྒྲུབ་ཐབས་མདོར་བྱས་དང་མདོ་བསྲེ། རྫོགས་རིམ་ལ་རིམ་པ་ལྔ་པའི་གཞུང་ཆེན་པོར་མཛད། ཐུགས་སྲས་ཨཱརྱདེ་བས་འཕགས་གཞུང་དེ་དག་གི་དོན་གསལ་ཞིང་རྒྱས་ལ་མ་འཛིངས་པ། ཁ་སྐོང་གཞན་ལ་རགས་མ་ལས་པའི་མཚན་ཉིད་ཅན་སྤྱོད་བསྡུས་སྒྲོན་མེ། སྒྱུ་ལུས་བདག་བྱིན་རླབས་པའི་སྒོས་ཀྱི་གཞུང་ཆུང་སོགས་དང་འཕགས་པའི་དངོས་སློབ་ཀླུའི་བྱང་(༡༢༩ན)ཆུབ་ཀྱིས་དཀྱིལ་ཆོག་ཉི་ཤུ་པ། བསྐྱེད་རིམ་རྣམ་གཞག་རིམ་པ། རྫོགས་རིམ་ལས་མཐའ་རྣམ་འབྱེད། ཟླ་བ་གྲགས་པས་རྒྱུད་ཀྱི་འགྲེལ་པ་སྒྲོན་མ་གསལ་བ་མཛད། ཕྱིས་ནཱ་རོ་ཏཱ་པས་རིམ་ལྔ་བསྡུས་པ་གསལ་བ་མཛད་པ་སོགས་སྤྱིར་འདུས་པའི་ཕྱོགས་ལ་རྒྱ་གཞུང་དུ་གྲགས་པ་ལྔ་བཅུ་རྩ་གྲངས་ཡོད་ཀྱང༌། འཕགས་སྐོར་རྩ་བའི་གཞུང་འགྲེལ་གོང་དུ་སྨོས་པ་དེ་དག་རྩོད་པ་དང་བྲལ་བའི་ཆོས་ཀྱི་ཕྱི་མོ་ཡིན་ལ། དེའང་ཚོགས་གསུམ་ལ་སོགས་པ་བཞིན་དུ་འཕགས་པ་ཡབ་སྲས་སྐུ་དངོས་བཞུགས་པའི་དུས་ན་ཐུན་མོང་དུ་དར་བ་ནི་མ་ཡིན་གྱི། འཕགས་པའི་དངོས་གྲུབ་ཀླུའི་བྱང་ཆུབ་འཇའ་ལུས་རྡོ་རྗེའི་སྐུ་བརྙེས་ཏེ་དཔལ་གྱི་རི་བོར་བཞུགས་པ་ལས་ཀླུ་སྒྲུབ་སྐུ་འདས་ནས་ལོ་བདུན་བརྒྱ་ཙམ་འདས་པ་ན་གདོལ་པའི་བུ་མ་ཏངྒི་པ་དང་རྒྱལ་སྲས་ས་འདྲེས་པ་གཉིས་རྗེས་སུ་བཟུང་ནས་འཕགས་སྐོར་རྣམས་གནང༌། ཀོངྐ་ནའི་སློབ་དཔོན་སྲུང་བའི་ཞབས་ཀྱིས་ཟླ་གྲགས་མཇལ་ནས་སྒྲོན་གསལ་གྱི་གླེགས་བམ་རྙེད་དེ་སྔགས་ཀྱི་ཐེག་པ་མངོན་ཚན་དུ་སྤྱོད་པའི་སྐབས་སུ་དར་ཞིང་རྒྱས་སོ། ། ལཱུ་དྲིལ་ནག་གསུམ་བདེ་མཆོག་སྲོལ་འབྱེད་དེ། ། སློབ་དཔོན་ལཱུ་དྲིལ་ནག་གསུམ་གྱིས་དཔལ་འཁོར་ལོ་བདེ་མཆོག་གི་ཤིང་རྟའི་སྲོལ་ཐོག་མར་འབྱེད་པ་སྟེ། དེའང་སློབ་དཔོན་ཐོགས་མེད་ཞབས་དང་བོད་ཀྱི་རྒྱལ་པོ་ཐོ་ཐོ་རི་གཉན་བཙན་དང་རགས་པར་དུས་མཚུངས་པར་ཙམ་ལ་སློབ་དཔོན་ལཱུ་ཡི་པ་བྱོན། འདི་ཨོ་རྒྱན་གྱི་རྒྱལ་པོ་ཡིག་མཁན་ཡིན་ཅིང་མཚན་ཀུན་ཏུ་དགེ་བར་གྲགས། དང་པོའི་བླ་མ་གྲུབ་ཐོབ་ཤ་བ་རི་པ་ཡིན་ཅིང༌། རྒྱ་གར་ཤར་ཕྱོགས་བྷཾ་ག་ལར་ཉའི་རྒྱུ་ལྟོ་གསོལ་ཞིང་སྒྲུབ་པ་མཛད་པས་རྒྱ་སྐད་དུ་ལཱུ་ཡི་པ། བོད་སྐད་དུ་ཉ་ལྟོ་པར་གྲགས། གྲུབ་པ་བརྙེས་ནས་ཡུལ་ཨོ་ཌི་བི་ཤའི་རྒྱལ་པོ་དང་བློན་པོ་རྫུ་འཕྲུལ་གྱིས་བཏུལ། ཕྱིས་རྒྱལ་པོས་གྲུབ་པ་ཐོབ་པ་དཱ་རི་ཀ་པ་སྟེ་འཁོར་ཁྲི་དྲུག་སྟོང་དང་བཅས་པ་འཇའ་ལུས་(༡༢༩བ)ཐོབ། བློན་པོ་གྲུབ་པ་ཐོབ་པ་ནི་ཌིངྒི་པ་སྟེ་འཁོར་ལྔ་བརྒྱ་དང་བཅས་པ་འཇའ་ལུས་བརྙེས་སོ། ། སློབ་དཔོན་འདིས་རྣལ་འབྱོར་མ་ཀུན་སྤྱོད་ཀྱི་རྒྱུད་སོགས་སྤྱན་དྲངས་ཤིང་འཁོར་ལོ་སྡོམ་པའི་མངོན་རྟོགས་ཀྱི་གཞུང་མཛད། དེ་ལ་ལྭ་བ་པས་འགྲེལ་པ་མཛད། རྒྱ་བོད་ཐམས་ཅད་དུ་ཤིན་ཏུ་དར་ཞིང་འཁོར་ལོ་སྡོམ་པའི་ཆོས་ཚུལ་གྱི་ཆུ་འགོ་ལྟ་བུར་གྲགས་སོ། ། གྲུབ་ཐོབ་དཱ་རི་ཀ་པའི་སློབ་མ་རྡོ་རྗེ་དྲིལ་བུ་པ་ནི། མཚན་དངོས་བློ་གྲོས་སྙིང་པོའི་དཔལ་ཞེས་བྱ། མུ་སྟེགས་པའི་རྒོལ་བ་འཇོམས་ནུས་པའི་མཁས་པ་ཡིན་པ་ལ་རྡོ་རྗེ་ཕག་མོས་དངོས་སུ་ལུང་བསྟན། ཨོ་ཌི་བི་ཤའི་ཡུལ་དུ་སྒྲུབ་པ་མཛད་ཚེ། དང་པོ་རྒྱལ་པོས་སྤྱན་དྲངས་པ་ལ་མ་བྱོན། ཕྱིས་རིག་མ་དང་བཅས་པར་གྱུར་བ་ལ་སྐྱེ་བོ་རྣམས་མ་དད་པས་དེ་རྣམས་འདུལ་བའི་དོན་དུ་ཁྱེའུ་གཅིག་དང༌། བུ་མོ་གཅིག་སྤྲུལ་ཞིང་ལན་ཅིག་གྲོང་ཁྱེར་དུ་དེ་དག་དང་བཅས་ཏེ་བྱོན་པས་སྐྱེ་བོ་རྣམས་ཀྱིས་སྨད་པ་ན། རྭའི་གཤོར་ཞལ་ས་ལ་བརྡབས་པས་ས་འོག་ནས་ཆུ་བྱུང༌། ཁྱེའུ་རྡོ་རྗེར་བྱས། བུ་མོ་དྲིལ་བུར་སོང་