Tibetan
མཁས་ཤིང་མཐོང་ལམ་གྱི་ཡོན་ཏན་བརྙེས། སློབ་མའང་པི་ཊོ་བ་ཆེན་པོ་སོགས་རྡོ་རྗེ་འཛིན་པ་མང་དུ་བྱོན། ཁྱད་པར་གངས་ཅན་གྱི་ལྗོངས་སུ་བཀའ་དྲིན་དང་ཕྲིན་ལས་ལྷག་པར་ཆེའོ།། ཨ་བྷ་ཡས། རྡོ་རྗེ་གདན། བི་ཀྲ་མ། ནཱ་ལནྡ་གསུམ་གྱི་མཁན་པོ་མཛད་ཅིང་། དུས་དེ་ཙམ་ན་འགྲན་དུ་མེད་པའི་བསྟན་པའི་བདག་པོ་ཆེན་པོར་གྱུར་ཏེ་ཐེག་པ་ཆེ་ཆུང་གི་བསྟན་པ་ཐམས་ཅད་དང༌། ཁྱད་པར་ཤེར་ཕྱིན་གྱི་ཆོས་ཚུལ་ཤིན་ཏུ་རྒྱས་པར་མཛད་དེ་རྒྱན་དྲུག་གི་དུས་ཡོལ་ནས་མཁས་པ་སྒོ་དྲུག་གི་ཡ་གྱལ་རིན་འབྱུང་ཞི་བ་དང༌། སློབ་དཔོན་འདི་གཉིས་ལས་བསྟན་འགྲོའི་དོན་རྒྱ་ཆེ་བར་མ་བྱུང་བར་གྲགས། རྡོ་རྗེ་རྣལ་འབྱོར་མས་བྱིན་གྱིས་བརླབས་ཤིང་གནང་བ་སྩལ་ནས། སམྦུ་ཊའི་འགྲེལ་པ་མན་སྙེ་དང་ཕྲེང་བ་སྐོར་གསུམ་སོགས་སྔགས་ཀྱི་བསྟན་བཅོས་ཟབ་ཅིང་རྒྱ་ཆེ་བ་དུ་མའང་མཛད། འདིས་མཛད་པའི་བསྟན་བཅོས་རྣམས་ནི་ཕྱི་རབས་བདག་ལ་སྲོག་ཆད་ཀ་མའི་བདུད་རྩི་ལྟ་བུར་གྱུར་པ་ཡིན་ཏེ། འདི་ལས་ཕྱིས་འདི་དང་མཉམ་པའི་བསྟན་པའི་གསལ་བྱེད་མཁས་པ་ཆེན་པོའང་མ་བྱུང་བར་གྲགས་པ་དང༌། དེ་ལྟར་མི་བྱུང་བར་ཡང་མཁྱེན་ནས་མི་གསལ་བ་རྣམས་གསལ་བར་འགྲེལ་ཞིང༌། འཐོར་བ་རྣམས་བསྡུ་བ་དང༌། འཁྲུགས་པ་གོ་རིམ་དུ་བསྡེབས་པ་སོགས་ཀྱིས་ལེགས་པར་བཤད་པའི་བསྟན་(༡༣༤བ)བཅོས་རྣམས་ཕྱི་རབས་པ་དག་ལ་ངག་ལོན་ལྟ་བུར་བཞག་པ་ཡིན་པའི་ཕྱིར་རོ། ། ཨ་བྷ་ཡའི་སློབ་མ་ཤུ་བྷཱ་ཀ་ར་གུཔྟ་སོགས་རྡོ་རྗེ་འཛིན་པ་དང་སྡོམ་བརྩོན་གསུང་རབ་རྒྱ་མཚོའི་ཕ་རོལ་ཏུ་སོན་པ་དུ་མས་བསྟན་པ་གསལ་བར་མཛད་པ་ལས། ཁྱད་པར་གྲུབ་པ་བརྙེས་པ་རཏྣ་རཀྵི་ཏས་སྡོམ་འབྱུང་གི་འགྲེལ་པ་སོགས་བརྩམས། བི་ཀྲ་མ་ཤཱི་ལར་སྔགས་ཀྱི་སློབ་དཔོན་མཛད་པའི་ཚེ་མ་ཧཱནྟ་ཉི་ཤུ་རྩ་བཞིར་གྲགས་པའང་བྱོན་པ་རྣམས་ཀྱིས་རྡོ་རྗེ་ཐེག་པའི་བསྟན་པ་ཆེར་སྤེལ་བར་མཛད་དོ། ། ཇ༣ གསུམ་པ་ད་ལྟ་དང་འབྱུང་འགྱུར་མདོ་ཙམ་བརྗོད་པ་ནི། ཤར་ཕྱོགས་ཀོ་ཀི་ལྷོ་ཕྱོགས་འབིགས་བྱེད་ཁོངས། ། སྔགས་དང་ཤར་ལྷོ་ལྷོ་ནུབ་ཡུལ་ཕྲན་འགར། ། རྒྱལ་བསྟན་དུས་ཕྱིས་བར་དུ་གནས་པ་ཡིན། ། རྒྱ་གར་ཤར་ཕྱོགས་པ་དུམ་བུ་གསུམ་ལས་ཀོ་ཀིའི་ཡུལ་རྣམས་སུ་རྒྱལ་པོ་མྱ་ངན་མེད་ཀྱི་དུས་ཙམ་ནས་བཟུང་སྟེ་དགེ་འདུན་གྱི་སྡེ་བྱུང་ལ་ཕྱིས་ཇེ་འཕེལ་དུ་སོང་སྟེ་ཤིན་ཏུ་མང་བར་ཡོད་པ་ལས། དབྱིག་གཉེན་མ་བྱོན་གོང་དུ་ཉན་ཐོས་ཁོ་ན་ཡིན། དབྱིག་གཉེན་གྱི་སློབ་མ་འགའ་ཞིག་གིས་ཐེག་ཆེན་དར་བ་བྱས་ནས་ཅུང་ཟད་ཙམ་རྒྱུན་མ་ཆད་པར་ཡོད་པ་ལས། རྒྱལ་པོ་དྷརྨ་པཱ་ལ་མན་ཆད་དུ་ཡུལ་དབུས་སུ་དེ་དག་གི་སློབ་གཉེར་བ་ཤིན་ཏུ་མང་ཞིང༌། ལྷག་པར་སེན་བཞིའི་དུས་སུ། མ་ག་དྷཱར་ཚོགས་པའི་དགེ་འདུན་གྱི་ཕྱེད་ཙམ་ཀོ་ཀིའི་ཡུལ་ནས་བྱུང་བ་ཡིན་ཏེ། དེའི་ཕྱིར་ཐེག་ཆེན་ཤིན་ཏུ་དར་བར་གྱུར་ནས་བོད་ཀྱི་རྒྱལ་ཁམས་བཞིན་དུ་ཐེག་པ་ཆེ་ཆུང་གི་དབྱེ་བ་མེད་པར་སོང༌། ཨ་བྷ་ཡཱ་ཀ་ར་བྱོན་པའི་དུས་ཙམ་ནས་སྔགས་ཀྱི་ཐེག་པ་ཡང་ཇེ་དར་ལ་སོང༌། མ་ག་དྷཱ་དུ་རུཥྐས་བཅོམ་པའི་ཚེ། ཡུལ་དབུས་ཀྱི་མཁས་པ་ཕལ་ཆེར་ཡུལ་དེར་བྱོན་པས་བསྟན་པ་ལྷག་པར་དར། ཕྱིས་བོད་དུ་བྱོན་ཅིང་སྔགས་ཀྱི་ཚུལ་ལ་བཀའ་དྲིན་ཆེ་བ་དཔལ་ཤ་བ་རི་པས་རྗེས་སུ་བཟུང་བའི་སློབ་དཔོན་བཱ་ན་རཏྣ་ལ་སོགས་པའང་ཡུལ་དེ་ནས་བྱོན། དུས་ཕྱིས་རྒྱལ་པོ་བཱ་སུནྡྷ་ར་ཞེས་བྱ་བ་བྱུང་(༡༣༥ན)སྟེ། ཡུལ་དེ་ཀུན་ན་འདུལ་བ་དང༌། མངོན་པ་དང༌། ཐེག་ཆེན་གྱི་གཞུང་ལུགས་རྣམས་ཤིན་ཏུ་དར་བར་ཡོད་ཀྱང༌། དུས་ཀྱི་འཁོར་ལོ་དང་ཕྲེང་བ་སྐོར་གསུམ་ལ་སོགས་པ་འགའ་ཞིག་མ་གཏོགས། གསང་སྔགས་ཀྱི་ཆོས་རྣམས་ཤིན་ཏུ་དཀོན་པར་སོང་བ་ལ། ཡུལ་དེའི་པཎྜི་ཏ་ཉིས་བརྒྱ་ཙམ་འགྲོ་ལྡིང་དང༌། ལྷོ་ཕྱོགས་ཁ་གེནྡྲའི་ཡུལ་དུ་གྲུབ་ཆེན་ཞི་བ་སྦས་པ་ལ་སོགས་པའི་དྲུང་དུ་བརྫངས་ནས་གསང་སྔགས་ཀྱི་ཆོས་ལ་སྦྱོང་དུ་བཅུག་སྟེ་སླར་ཡང་སོར་ཆུད་པར་བྱས། འཕགས་ཡུལ་ལྷོ་ཕྱོགས་སུའང་བསྟན་པ་རྒྱ་ཆེ་ལ་རྒྱུན་མ་ཆད་པ་བྱུང་ཞིང་། ཁྱད་པར་ཕྱིས་སུ་གྲུབ་པའི་དབང་ཕྱུག་ཞི་བ་སྦས་པའི་བྱིན་རླབས་ཀྱི་སྟོབས་ཀྱིས་ཁ་གེནྡྲ་དང༌། འབིགས་བྱེད་ཀྱི་རི་བོའི་ཁོང་དུ་གསང་སྔགས་གཙོ་བོར་གྱུར་པའི་བཤད་སྒྲུབ་ཀྱི་བསྟན་པ་རྣལ་མ་ལྷག་པར་དར་ཞིང་འཕེལ་ལ། ཤར་ལྷོ་དང་ལྷོ་ནུབ་ཀྱི་ཡུལ་ཕྲན་འགར་ཡང་མདོ་སྔགས་ཀྱི་བསྟན་པ་ཐོར་བུ་དུས་ཕྱིས་བར་དུ་གནས་པར་གསུངས་སོ། ། འབྱུང་འགྱུར་གནས་བརྟན་བཅུ་དྲུག་འཕགས་པ་སོགས། ། བྱོན་ནས་རྒྱལ་བསྟན་ཡུན་རིང་སྤེལ་བར་བཞེད། ། མ་འོངས་འབྱུང་འགྱུར་ཡར་འཕེལ་ཚེ་ལོ་དྲུག་བརྒྱ་པའི་སྐབས་སུ་འཕགས་པའི་གནས་བརྟན་ཆེན་པོ་བཅུ་དྲུག་དངོས་སུ་བྱོན་ནས་སྐལ་བ་དང་ལྡན་པ་རྣམས་རབ་ཏུ་དབྱུང་ཞིང་བསྟན་པ་སྤེལ་བར་གསུངས་པ་དང༌། སློབ་དཔོན་འཕགས་པ་ཀླུ་སྒྲུབ་ཀྱང་ད་ལྟ་རྒྱ་གར་དུ་སྔོན་གྱི་དབུ་དང་སྐུ་ལུས་སོ་སོ་ཡོད་པ་ལ་ཞུགས་ནས་དེ་གཉིས་འགྲིགས་ཤིང་འབྱར་ཏེ་འགྲོ་བའི་དོན་མཛད་པར་བཤད་པ་དང༌། སོགས་ཁོངས་ནས་རིགས་ལྡན་དྲག་པོའི་དཔུང་གིས་ཀླ་ཀློ་བཅོམ་སྟེ་ལྷོ་གླིང་དབུས་མའི་ཁོངས་འདིར་རྫོགས་ལྡན་གསར་དུ་འཇོག་ནས་བསྟན་པ་སྤེལ་ཏེ་རྒྱལ་བསྟན་ཡུན་རིང་དུ་གནས་པར་མཁས་པ་རྣམས་བཞེད་དོ། ། བསྟན་པ་འཕགས་པའི་ཡུལ་དུ་ཇི་ལྟར་དར་བའི་སྐབས་སོ། ། བསྟན་པ་འཕགས་པའི་ཡུལ་དུ་ཇི་ལྟར་དར་བ་སྐབས་དང་པོའི་འགྲེལ་པའོ།། །། གཉིས་པ། གངས་ཅན་ལྗོངས་སུ་བསྟན་རྩ་འདུལ་བ་དང་བཤད་རྒྱུད་གྱི་བྱུང་བ་བརྗོད་པའི་སྐབས། ང༢ སྐབས་གཉིས་པ་རྒྱལ་བསྟན་གངས་ཅན་གྱི་ལྗོངས་སུ་ཇི་ལྟར་བྱོན་(༡༣༥བ)པའི་ཚུལ་བཤད་པ་ལ་གསུམ། ཅ༡ བསྟན་པའི་གཞི་མ་ཆོས་རྒྱལ། ཅ༢ བསྟན་པའི་རྩ་བ་ཆོས་འདུལ། ཅ༣ ལུང་ཆོས་འཛིན་པའི་བཤད་རྒྱུན་ཇི་ལྟར་བྱུང་བ་བརྗོད་པའོ། ། ཅ༡ དང་པོ་ལ་གསུམ། ཆ༡ བསྟན་པའི་དབུ་བརྙེས་ཚུལ། ཆ༢ བསྟན་པའི་སྲོལ་གཏོད་ཚུལ། ཆ༣ བསྟན་པ་དར་རྒྱས་མཛད་ཚུལ་ལོ། ། ཆ༡ དང་པོ་ནི། བོད་ཡུལ་ཆོས་རྒྱལ་ལིཙྪ་བཱི་ཡི་རིགས། ། ཐོ་རིའི་དུས་སུ་དམ་ཆོས་དབུ་བརྙེས་ཤིང༌། ། འཛམ་གླིང་ཡུལ་ཆེན་དྲུག་གི་ནང་ཚན་འཕགས་པ་ཐུགས་རྗེ་ཆེན་པོས་བདག་གིར་བཟུང་བའི་གདོང་དམར་བོད་ཡུལ་ཁ་བ་ཅན་དུ་སངས་རྒྱས་ཀྱི་བསྟན་པ་དུས་ནམ་གྱི་ཚེ་བྱོན་ན། འཇམ་དཔལ་རྩ་རྒྱུད་ལས། ཁ་བ་ཅན་དུ་མཚོ་བྲི་ནས། ། སཱ་ལའི་ནགས་ནི་འབྱུང་བར་འགྱུར། ། ཞེས་ལུང་བསྟན་པ་ལྟར། དང་པོར་མཚོ་ཡོད་པ་རིམ་གྱིས་བྲི་ནས་ནགས་ཚལ་སྟུག་པོ་རྒྱས་པར་གྱུར་བའི་སྐབས་ཤིག་ན། ཡུལ་གྲུ་འཛིན་ནས་ཐུགས་རྗེ་ཆེན་པོས་བྱིན་གྱིས་བརླབས་པའི་སྤྲེའུ་ཞིག་འོངས་པ་དེ་དང་བྲག་སྲིན་མོ་འདུས་པ་ལས། བོད་རྣམས་ཉེ་བར་མཆེད་པ་ཡིན་ཞེས་བོད་ཀྱི་ལོ་རྒྱུས་རྙིང་པ་རྣམས་སུ་འཆད་ལ། སློབ་དཔོན་ཤེས་རབ་གོ་ཆས་མཛད་པའི་ལྷ་ལས་ཕུལ་བྱུང་གི་བསྟོད་འགྲེལ་ལས། རྩོད་དུས་ཀྱི་ཐོག་མར་བྱུང་བའི་སྐྱ་བསེང་བུ་ལྔས་འཐབ་ཀ་དཔུང་ཚོགས་བཅོ་བརྒྱད་ཕམ་པར་བྱས་པའི་དུས་སུ། རཱུ་པ་ཏི་ཞེས་བྱ་བའི་རྒྱལ་པོ་དཔུང་གི་ཚོགས་གཅིག་དང་བཅས་པ་གཡུལ་འགྱེད་པའི་ཚེ་བུད་མེད་ཀྱི་ཆ་ལུགས་སུ་བྱས་ཏེ་བྲོས་ནས་རི་ཁ་བ་ཅན་གྱི་རི་ཁྲོད་དུ་ཞུགས་ཏེ་གནས་པའི་རིགས་ལས་བོད་ཀྱི་མི་རྣམས་མཆེད་པ་སོགས་བཤད་ཚུལ་མང་དུ་སྣང་ཞིང༌། གང་ལྟར་ཡུལ་འདི་དང་པོ་མི་མ་ཡིན་གྱིས་བདག་ཏུ་བཟུང༌། རིམ་གྱིས་མིའི་འགྲོ་བ་ཆགས་ཏེ་རྒྱལ་ཕྲན་བཅུ་གཉིས་དང་སིལ་མ་བཅུ་བཞིས་དབང་བྱས། དེ་ནས་བོད་སྤྱི་ལ་དབང་བསྒྱུར་བའི་མིའི་རྒྱལ་པོའི་ཐོག་མ་གཉའ་ཁྲི་བཙན་པོ་བྱུང་སྟེ། དེའང་ཆོས་རྒྱལ་རྣམས་ལིཙྪ་བཱིའི་རིགས་ལས་བྱོན་པར་ལུང་གིས་གྲུབ་ཅིང་ཁ་ཅིག་སྒྲ་ངན་གྱི་རིགས། ལ་ལས་(༡༣༦ན)ཤཱཀྱའི་རྒྱལ་བརྒྱུད་དང༌། རྒྱལ་པོ་དམག་བརྒྱ་པའི་སྲས་སུའང་འདོད་པ་དང༌། ཀོ་ས་ལའི་རྒྱལ་པོ་གསལ་རྒྱལ་གྱི་སྲས་ལྔ་ཚིགས་ཡིན་ཟེར་བ་དང༌། རྒྱལ་པོ་གཟུགས་ཅན་སྙིང་པོའི་སྲས་ཆུང་བ་སྟོབས་ཆུང་གི་སྲས་ལྔ་ཚིགས་ཡིན་ཟེར་བ་དང༌། བཏྶའི་རྒྱལ་པོ་འཆར་བྱེད་ཀྱི་སྲས་མིག་སྨིན་མས་འགེབས་པ་སོར་མོ་དྲྭ་བས་སྦྲེལ་བ་ཞིག་བྱུང་བས་ལྟས་ངན་དུ་དོགས་ནས་ཟངས་ཁ་སྦྱོར་དུ་བཅུག་སྟེ་གངྒཱ་ལ་བསྐུར་བ་ཞིང་པས་རྙེད་དེ་གསོས། ཆེར་སྐྱེས་པ་ན་སྔར་གྱི་གཏམ་བཤད་པ་ན་ཡིད་སྐྱོ་སྟེ། གངས་རིའི་བྲག་ཏུ་བྲོས་པ་ན་རིམ་གྱིས་ལྷ་རི་ཡོལ་བའི་ཁར་བྱུང་སྟེ། བཙན་ཐང་སྒོ་བཞིར་འཐོན་པ་ལ་བོན་པོ་རྣམས་རྨུ་ཐག་ལས་བྱོན་པས་ལྷ་ཡིན་ཟེར། ཁྱོད་སུ་ཡིན་དྲིས་པས་བཙན་པོ་ཟེར། གང་ནས་བྱོན་དྲིས་པས་ནམ་མཁའ་ལ་མཛུབ་མོ་སྦྲེང༌། དེར་ཤིང་གི་ཁྲི་ལ་བཞག་སྟེ་མི་བཞིས་གཉའ་བ་ལ་ཁུར་བས་གཉའ་ཁྲི་བཙན་པོར་བཏགས་པར་བཤད། དེའི་སྲས་མུ་ཁྲི་བཙན་པོ་སོགས་གནམ་ལ་ཁྲི་བདུན། ས་ལ་ལེགས་དྲུག །སིལ་མ་བདུན། ཚིགས་ལ་བཙན་ལྔ་སོགས་རིམ་པར་བྱོན་པ་ལས་རྒྱལ་རབས་སྔ་མ་རྣམས་ཀྱི་སྐབས་ཆབ་སྲིད་སྒྲུང་དང་ལྡེའུ་བོན་གྱིས་བསྐྱངས། དེ་ནས་ལྷ་མོ་དྲི་མ་མེད་པ་ལུང་བསྟན་པ་ལས། ང་ཡོངས་སུ་མྱ་ངན་ལས་འདས་ནས་ལོ་ཉིས་སྟོང་ལྔ་བརྒྱ་ན་གདོང་དམར་ཅན་གྱི་ཡུལ་དུ་དམ་པའི་ཆོས་དར་བར་འགྱུར་རོ། །ཞེས་ལུང་བསྟན་པ་ལྟར། རྒྱལ་རབས་ཉེར་བདུན་པ་བྱང་སེམས་ཀུན་ཏུ་བཟང་པོའི་སྤྲུལ་པ་ལྷ་ཐོ་ཐོ་རི་གཉན་བཙན་ཕོ་བྲང་ཡུམ་བུ་གླ་སྒང་ན་བཞུགས་པའི་ཚེ་ཕོ་བྲང་གི་རྩེར་ཟ་མ་ཏོག་ཅིག་བབ་པ་ཁ་ཕྱེས་པས་སྤང་སྐོང་ཕྱག་བརྒྱ་པ། ཙིནྡ་མ་ཎིའི་གཟུངས་ཀྱི་བརྐོས་ཕོར། མདོ་སྡེ་ཟ་མ་ཏོག །ཡི་གེ་དྲུག་པ། གསེར་གྱི་མཆོད་རྟེན་རྣམས་བྱུང༌། གང་ཡིན་མི་ཤེས་ཀྱང་བཟང་པོར་གོ་སྟེ་མིང་གཉན་པོ་གསང་བར་བཏགས་ནས་མཆོད་ཅིང་བསྐུར་བའི་བྱིན་རླབས་ཀྱིས་རྒྱལ་པོ་ལོ་རེ་གཅིག་པ་སླར་ཡང་བཅུ་དྲུག་པའི་བར་དུ་ལོག་ནས་(༡༣༦བ)གཞོན་ཤ་ཅན་དུ་གྱུར་ཏེ་ལོ་དྲུག་ཅུ་འཕར་བས་ལོ་བརྒྱ་དང་ཉི་ཤུ་ཐུབ། གདུང་རབས་ལྔ་ནས་འདིའི་དོན་ཤེས་པར་འགྱུར་ཞེས་ལུང་བསྟན་ཐོབ་སྟེ་དམ་པའི་ཆོས་ཀྱི་དབུ་བརྙེས་སོ། ། བབ་ཚུལ་འདི་ལ་བཤད་སྒྲོས་སྣ་ཚོགས་ཞིག་འདུག་ཀྱང༌། ནེལ་པ་པཎྜི་ཏས་ནམ་མཁའ་ལས་བབས་ཟེར་བ་བོན་ནམ་མཁའ་ལ་དགའ་བས་བོན་གཏམ་ཡིན་གྱི། དོན་ལ་པཎྜི་ཏ་བློ་སེམས་འཚོ་དང་ལོ་ཙཱ་བ་ཐི་ལེ་སེས་ཆོས་དེ་གཉིས་ཁྱེར་ནས་འོངས་པ་ལ་རྒྱལ་པོས་ཡི་གེ་ཡང་མི་ཤེས་དོན་ཀྱང་མི་གོ་བས་པཎྜི་ཏ་དང་ལོ་ཙཱ་བ་ཕྱིར་ལོག་ཟེར་བ་འདི་དག་པ་འདྲ་སྟེ། དུས་ཕྱིས་སྦ་གསལ་སྣང་གིས་བལ་པོར་ཕྱིན། མཁན་པོ་ཞི་བ་འཚོ་དང་མཇལ་བའི་ཚེ་མཁན་པོའི་གསུངས་ལས། བོད་ཀྱི་བཙན་པོ་དང་ཁྱོད་དང་ང་དང་གསུམ་གྱིས་འོད་སྲུང་གི་བསྟན་པ་ལ་བྱ་རྫི་མའི་བུ་གསུམ་དུ་གྱུར་ནས་བོད་དུ་བསྟན་པ་སྤེལ་བའི་སྨོན་ལམ་བཏབ་པ་ཡིན་ཏེ། བཙན་པོ་ཡང་མ་སྐྱེས། ཁྱོད་ཀྱང་ནར་མ་སོན་པས། ངས་འདི་ན་རྒྱལ་རབས་དགུའི་བར་སྒུགས་ཤིང་བསྡད་པ་ཡིན་གསུང་བ་སྦ་བཞེད་གཙང་མན་སྣང་བའི་ཕྱིར་ཞེས་བཤད་པ་ལྟར་དོན་ལའང་གནས་པ་མཁས་པ་ཕལ་ཆེར་བཞེད་དོ། ། ཆ༢ གཉིས་པ་[བསྟན་པའི་སྲོལ་གཏོད་ཚུལ་]ནི། སྤྱན་རས་གཟིགས་དབང་སྲོང་བཙན་སྒམ་པོ་ཡིས། ། གཙུག་ལག་ཁང་བཞེངས་དམ་ཆོས་སྲོལ་ཆེན་གཏོད། ། དེའང་འཇམ་དཔལ་རྩ་བའི་རྒྱུད་ལས། ལྷ་ལྡན་ཡུལ་ཞེས་བྱ་བ་ཡི། ། གངས་ཅན་རི་ཡི་ནང་གནས་པའི། ། རྒྱལ་པོ་མི་ཡི་ལྷ་ཞེས་པ། ། ལིཙྪ་བཱི་རྣམས་རིགས་སུ་འབྱུང༌། ། ཞེས་སོགས་ཀྱིས་ལུང་བསྟན་པ་ལྟར། ཐོ་རི་ནས་གདུང་རབས་ལྔ་པ། སྤྱན་རས་གཟིགས་དབང་མི་རྗེའི་ཚུལ་དུ་བསྟན་པ་ཆོས་ཀྱི་རྒྱལ་པོ་སྲོང་བཙན་སྒམ་པོས་དགུང་ལོ་བཅུ་གསུམ་པ་ལ་རྒྱལ་སྲིད་བཟུང༌། བཅོ་ལྔ་པ་ལ་སྤྲུལ་པའི་དགེ་སློང་ཨཱཀ་ར་མ་ཏི་ཤཱི་ལས་རང་བྱོན་འཕགས་པ་སྤྱན་དྲངས། ཕྱག་རྡོར་སྤྲུལ་པ་ཆོས་བློན་མགར་ལ་བཀའ་བསྒོས་ཏེ། འོ་སྐོལ་གྱི་སྟོན་པ་དགུང་ལོ་བརྒྱད་པ་དང་བཅུ་གཉིས་པའི་སྐུ་ཚད་སངས་རྒྱས་དངོས་(༡༣༧ན)ཀྱི་ཞལ་སྐྱིན་གདན་འདྲེན་པའི་ཆེད་འཇིག་རྟེན་མཐུན་འཇུག་གི་ཚུལ་དུ་ཁྲོ་གཉེར་ཅན་གྱི་སྤྲུལ་པ་བལ་མོ་བཟའ་ཁྲི་བཙུན་དང༌། སྒྲོལ་མའི་རྣམ་སྤྲུལ་རྒྱ་མོ་བཟའ་འུན་ཤིང་ཀོང་ཇོ་ཞེས་མཚོ་ནང་གི་པདྨར་གྲགས་པ་གཉིས་ཁབ་ཏུ་བསུས། འཕྲུལ་སྣང་གི་གཙུག་ལག་ཁང་བརྩིགས་པར་མི་མ་ཡིན་གྱིས་འཚེ་བ་ལ་བརྟེན། སྐྱིད་ཤོད་ཉང་བྲན་ཕ་བོང་ཁ་ཕོ་བྲང་མ་རུ་ར་གྲགས་པར་རྒྱལ་པོ་ཡབ་ཡུམ་གསུམ་སྐུ་མཚམས་མཛད་ནས་ཡི་དམ་གྱི་བསྒྲུབས་པས་གྲུབ་སྟེ། ལུང་བསྟན་ལྟར་བོད་སྲིན་མོ་གན་རྐྱལ་དུ་བསྒྱེལ་བའི་ས་གནད་རྣམས་སུ་མཐའ་འདུལ་རུ་གནོན་གྱི་གཙུག་ལག་ཁང་རྣམས་བརྩིགས་ཤིང་ས་དགྲ་ངན་པ་རྣམས་བཅོས། འཕྲུལ་སྣང་ར་མོ་ཆེའི་རྟེན་བརྟེན་པར་བཅས་པ་རྣམས་བཞེངས། རྒྱ་གར་ནས་སློབ་དཔོན་ཀུ་ས་ར་དང་བྲམ་ཟེ་ཤཾ་ཀ་ར། བལ་པོའི་སློབ་དཔོན་ཤཱི་ལ་མཛྙུ། རྒྱ་ནག་གི་སློབ་དཔོན་ཧྭ་ཤང་ཡཱ་ན་ལ་སོགས་པ་སྤྱན་དྲངས་ནས་སྡེ་སྣོད་གསུམ་དང༌། རྒྱུད་ཀྱི་ཆ་ལག་མང་རབ་བསྒྱུར་ཞིང་བསྟན་པའི་སྲོལ་བཏོད། དངོས་སུ་འཆད་ཉན་མ་བྱུང་ཡང་རྒྱལ་པོ་རང་གིས་སྐལ་ལྡན་མང་པོ་ལ་ལྐོག་ཆོས་སུ་ཐུགས་རྗེ་ཆེན་པོ་ཞི་ཁྲོའི་གདམས་པ་ཕོག་སྟེ་ཉམས་སུ་བླངས་ཤིང༌། སད་མི་མི་བདུན་རབ་ཏུ་མ་བྱུང་ཕན་ཆད་ཉང་བྲན་ཕ་བོང་ཁར་ཐུགས་རྗེ་ཆེན་པོའི་རྣལ་འབྱོར་སྤྱོད་པའི་རལ་པ་ཅན་བརྒྱ་ཕྲག་ཙམ་རྒྱུན་དུ་བྱུང་བར་བཤད། དུས་དེར་གསུངས་པ་རྣམས་ཕྱོགས་གཅིག་ཏུ་བསྡོམས་པའི་རྒྱལ་པོ་བཀའ་ཆེམས་ཀྱི་སྐོར་རྣམས་གཏེར་ཁ་གསུམ་དུ་སྦས་པ། གྲུབ་ཐོབ་དངོས་གྲུབ། མངའ་བདག་ཉང༌། སྟོན་པ་ཤཱཀ་འོད་གསུམ་གྱིས་གཏེར་ནས་གདན་དྲངས་པའི་དེང་སང་མ་ཎི་བཀའ་འབུམ་ཞེས་གྲགས་པ་འདི་ཉིད་བོད་ཆོས་ཀྱི་ཐོག་མ་ཡིན་ནོ། ། ཐོན་མིས་ཡི་གེའི་གཟུགས་དང་བརྡ་སྤྲོད་བརྩམས། ། གངས་ལྗོངས་སྨྲ་བའི་སྒོ་ཆེན་ཐོག་མར་ཕྱེས། ། འཇམ་དབྱངས་སྤྲུལ་པ་ཐོན་མི་སཾ་བྷོ་ཊ་རྒྱ་གར་དུ་མངགས་ནས་སྒྲ་དང་(༡༣༧བ)ཡི་གེ་བསླབ། རྒྱ་ཡིག་ལ་དཔེར་བྱས་བོད་ཀྱི་ཡི་གེའི་གཟུགས་དང་བརྡ་སྤྲོད་པའི་བསྟན་བཅོས་བརྒྱད་བརྩམས། གངས་ཅན་གྱི་ལྗོངས་སུ་སྔོན་ཆད་བླང་དོར་ཆོས་བཞིན་དུ་སྨྲ་བ་མེད་པ་ལ། དེ་ཕྱིན་ཆད་དམ་པའི་ཆོས་དང་ཆོས་བཞིན་དུ་སྨྲ་བའི་སྒོ་ཆེན་ཐོག་མར་ཕྱེས་པ་ཡིན་ནོ། ། ཆ༣ གསུམ་པ་[བསྟན་པ་དར་རྒྱས་མཛད་ཚུལ་]ནི། འཇམ་དབྱངས་རྣམ་འཕྲུལ་མངའ་བདག་ཁྲི་ལྡེ་ཡིས། ། མཁན་སློབ་སྤྱན་དྲངས་དཔལ་གྱི་བསམ་ཡས་བཞེངས། ། དམ་ཆོས་ཀུན་བསྒྱུར་བཤད་སྒྲུབ་སྡེ་ཆེན་བཙུགས། ། དེ་ནས་རྒྱལ་རབས་ལྔ་འདས་པ་ན་འཇམ་དབྱངས་རྣམ་འཕྲུལ་མངའ་བདག་ཁྲི་སྲོང་ལྡེའུ་བཙན་བྱོན་ཏེ། དེའང་མེས་སྲོང་བཙན་གྱིས། ད་སྟེ་གདུང་རབས་ལྔ་ན་པའི་དབོན་སྲས་རྒྱལ་པོ་ལྡེ་ཞེས་བྱ་བའི་རིང་ལ་དམ་པའི་ཆོས་འབྱུང་ཞེས་པའི་ལུང་བསྟན་ཟངས་ཀྱི་བྱང་བུ་ལ་བྲིས་ནས་རྗེའི་ཕྱག་སྦལ་དུ་བཅུག་པའི་དོན་ཐོག་ཏུ་བབས་ཏེ་དམ་པའི་ཆོས་དར་བར་མཛད་པའི་ཐུགས་བསམ་བསྐྱེད་ནས་ཟ་ཧོར་གྱི་མཁན་པོ་ཤཱནྟ་རཀྵི་ཏ་སྤྱན་དྲངས། འགའ་ཞིག་ལ་ཡན་ལག་བརྒྱད་པའི་ཁྲིམས་ཕབ། དགེ་བ་བཅུ་དང་ཁམས་བཅོ་བརྒྱད་དང་མཐུན་པའི་ཆོས་གསུངས་པ་ལ་བོད་ཀྱི་ལྷ་སྲིན་གདུག་པ་ཅན་རྣམས་ཁྲོས་ཏེ་བར་ཆད་སྣ་ཚོགས་ཀྱིས་ཐོ་མཚམས་པ་ལ་བརྟེན་སྔོན་གྱི་ཐུགས་བསྐྱེད་དང་སྨོན་ལམ་དུས་སུ་སོན་ཅིང་མཁན་པོས་ལུང་བསྟན་པ་ལྟར། ཨོ་རྒྱན་གྱི་སློབ་དཔོན་པདྨ་འབྱུང་གནས་སྤྱན་དྲངས། རྒྱལ་པོ་དགུང་ལོ་ཉེར་གཉིས་ལོན་པ་ན་དཔལ་གྱི་བསམ་ཡས་ཀྱི་འགྲམ་བཏིང་སྟེ། ས་ཆོག་པདྨ་སཾ་བྷ་ཝ་དང༌། ས་དཔྱད་བོ་དྷི་ས་ཏྭས་མཛད། ཨོ་ཏནྟ་པུ་རིའི་གཙུག་ལག་ཁང་ལ་དཔེ་བླངས་ཏེ། རི་རབ་གླིང་བཅུ་གཉིས་ཉི་ཟླ་ཟུང༌། ལྕགས་རི་དང་བཅས་པའི་བཀོད་པ་མཛད། ལོ་སྐོར་གཅིག་གིས་རྫོགས་པར་གྲུབ་ནས་མཁས་གྲུབ་དེ་གཉིས་ཀྱིས་རབ་གནས་མཛད། མཁན་སློབ་དེ་དག་དང་སློབ་དཔོན་བི་མ་ལ་མི་ཏྲ། ཤཱནྟིཾ་གརྦྷ། དྷརྨ་ཀཱིརྟ་སོགས་པཎ་ཆེན་བརྒྱ་རྩ་བརྒྱད་དུ་(༡༣༨ན)གྲགས་པ་རྣམས་དང༌། བོད་ཀྱི་ལོ་ཙཱ་བ་བཻ་རོ་ཙ་ན་དང་སྐ་ཅོག་ལ་སོགས་པ་རྣམས་ཀྱིས་འདུལ་བ། ཐེག་པ་ཆེ་ཆུང་གི་མདོ་སྡེ་མཐའ་དག་པ། དགོངས་འགྲེལ་གྱི་བསྟན་བཅོས་གཙོ་ཆེ་བ་རྣམས་བསྒྱུར་ཅིང་བཤད་པ་དང་སྒྲུབ་པའི་སྡེ་ཆེན་པོ་བཙུགས། གསང་སྔགས་ཀྱི་ཆོས་བསྒྱུར་བཤད་ནི་ཤིན་ཏུ་གསང་སྟེ་ལྐོག་ཆོས་སུ་མཛད་ཅིང༌། ཆོས་གྲྭ་ཆེན་པོ་བཅུ་གཉིས། ཡེར་བ་དང་ཆུ་བོ་རིར་གྲུབ་ཐོབ་བརྒྱ་དང་བརྒྱད་རེ། མཆིམས་ཕུར་གྲུབ་ཆེན་ཉེར་ལྔ་སོགས་བྱུང་བར་གྲགས། ཁྱད་པར་སློབ་དཔོན་ཆེན་པོ་པདྨས་རྗེ་འབངས་ཉེར་ལྔ་སོགས་སྐལ་ལྡན་དཔག་ཏུ་མེད་པ་སྔགས་བླ་མེད་ཀྱི་ཐེག་པས་རྗེས་སུ་བཟུང་སྟེ་གྲུབ་པ་ཆེན་པོའི་གོ་འཕང་ལ་གཤེགས་པ་བགྲང་བ་ལས་འདས་པ་བྱུང༌། ཆོས་དང་ནོར་གྱི་གཏེར་ཁ་དཔག་ཏུ་མེད་པ་སྦས། ལྷ་སྲིན་གདུག་པ་ཅན་ཐམས་ཅད་བཏུལ། བསྟན་མ་བཅུ་གཉིས་ལ་བཀའ་བསྒོས་ཏེ་མུ་སྟེགས་པ་མི་འབྱུང་བར་མཛད། རི་བྲག་སོགས་ཕལ་ཆེར་སྒྲུབ་གནས་སུ་བྱིན་གྱིས་བརླབས། རྒྱལ་ཚབ་ཀྱི་སྐྱེས་བུ་བརྒྱུད་མར་སྤྲུལ་པ་སོགས་གངས་ཅན་གྱི་འགྲོ་ལ་བཀའ་དྲིན་གྱི་གོ་སྐབས་ནམ་མཁའི་ཁམས་སུའང་མི་ཤོང་བར་གྱུར་ཏོ། ། ལྷ་སྲས་མཆེད་དང་ཁྱད་པར་ཁྲི་རལ་གྱིས། ། བསྟན་པ་སླར་སྤེལ་གསར་བཅད་ཞུས་ཆེན་མཛད། ། ཆོས་རྒྱལ་དེ་ལ་ལྷ་སྲས་མཆེད་གསུམ་བྱོན་པའི་ཆེ་བ་མུ་ནེ་བཙད་པོ། འབྲིང་བ་མུ་རུབ་བཙད་པོ། ཆུང་བ་མུ་ཏིག་བཙད་པོའམ་སད་ན་ལེགས་མཇིང་ཡོན་དུ་གྲགས་པ་རྣམས་ཀྱིས་ཀྱང་བསྟན་པ་བླ་ནས་སླར་སྤེལ་ཞིང༌། ཁྱད་པར་མུ་ནེས་ཆབ་སྲིད་མཛད་པའི་ཚེ་བསམ་ཡས་སུ་མཆོད་པ་ཆེན་པོ་བཞི་བཙུགས། བོད་འབངས་ལྟོགས་ཕྱུག་ལན་གསུམ་སྙོམས། མུ་ཏིག་གིས་སྐར་ཆུང་རྡོ་རྗེ་དབྱིངས་ཀྱི་གཙུག་ལག་ཁང་བཞེངས། དེ་ལ་སྲས་ལྔ་ཙམ་བྱོན་པའི་ནང་ནས་ཁྱད་པར་དུ་འཕགས་པ་ཕྱག་རྡོར་རྣམ་འཕྲུལ་ཁྲི་རལ་པ་ཅན་ནམ། ཁྲི་ལྡེ་གཙུག་བརྟན་གྱིས་རབ་ཏུ་བྱུང་བ་རེ་རེ་ལ་འབངས་མི་ཁྱིམ་བདུན་བདུན་ཕུལ་(༡༣༨བ)བ་དང༌། གཙུག་ལག་ཁང་སྟོང་རྩ་བཞེངས་པར་གྲགས། དབུ་སྐྲ་ལ་དར་ཡུགས་གཉིས་བཏགས་པའི་སྣེར་བླ་