Tibetan
པར་བྱས། དེ་ནས་འོད་སྲུང་ཆེན་པོས་རང་ཉིད་མ་བསྐོས་པར་སེང་གེའི་ཁྲི་ལ་འཁོད་དེ། ཚེ་དང་ལྡན་པ་དག་མ་མོ་ལྟ་བུ། མ་མོ་(༡༠༨བ)ལྟ་བུ་ཞེས་བྱ་བ་དེ་བདག་ཁོ་ནས་སྨྲ་བར་བྱ་སྟེ། མ་མོ་ལྟ་བུ་ནི། ཤེས་བྱའི་མཚན་ཉིད་རབ་ཏུ་གསལ་བར་བྱེད་པ་ཡིན་ཏེ། འདི་ལྟར་དྲན་པ་ཉེ་བར་གཞག་པ་བཞི་དང༌ཞེས་སོགས་བཤད་ནས། དགྲ་བཅོམ་པ་རྣམས་ཀྱིས་ཕན་ཚུན་དུ་ངེས་པར་བྱས་ནས་ས་བླའི་ལྷ་རྣམས་ཀྱིས་ཀྱང་ཆེད་དུ་བརྗོད་པ་འོག་མིན་གྱི་བར་དུ་ཡུད་ཙམ་གྱིས་གྲགས་ཏེ་བཀའ་བསྡུ་བ་དེ་ལ་ལྔ་བརྒྱས་ཡང་དག་པར་བསྡུས་པ་ཞེས་གྲགས་སོ། ། དེ་ཡང་ཕུང་པོ་རྟེན་འབྲེལ་བྱང་ཕྱོགས་ལུང༌། ། རིང་པོ་བར་མ་གཅིག་ལས་འཕྲོས་སོགས་བཞག ། འདུལ་དང་མངོན་པ་དག་ཀྱང་དེ་བཞིན་ནོ། ། དེའང་བསྡུ་བའི་ཚུལ་ཇི་ལྟར་ཞེ་ན། མདོ་སྡེ་རྣམས་ནི། ཕུང་པོ་དང་རབ་ཏུ་ལྡན་པ་ཕུང་པོར། སྐྱེ་མཆེད་དུ་ལྡན་པ་སྐྱེ་མཆེད་དུ། རྟེན་ཅིང་འབྲེལ་འབྱུང་འཕགས་པའི་བདེན་པས་རིག་པ་དང་ཡང་དག་པར་ལྡན་པ་ནི། དེ་གླེང་གཞི་དང་ལྡན་པར། ཉན་ཐོས་ཀྱི་བཤད་པ་མང་བ་ནི་ཉན་ཐོས་ཀྱི་བཤད་པར། སངས་རྒྱས་ཀྱི་བཤད་པ་མང་བ་ནི་སངས་རྒྱས་ཀྱི་བཤད་པར། བྱང་ཕྱོགས་སོ་བདུན་དང་ལྡན་པ་ལམ་གྱི་ཡན་ལག་ཏུ་ཡང་དག་པར་བརྗོད་པ་མང་བ་ཡང་དག་པར་བརྗོད་པའི་སྡེར། ཚིགས་བཅད་དང་ལྡན་པ་ཡང་དག་པར་ལྡན་པའི་ལུང་རྣམས་སུ་སོ་སོར་བསྡུས་ཤིང༌། གང་མདོ་སྡེ་དང་པོ་ནི་ལུང་རིང་པོར། བར་མ་ནི་ལུང་བར་མར། ཚིགས་གཅིག་ནས་ཚིག་བཅུའི་བར་ནི་གཅིག་ལས་འཕྲོས་པའི་ལུང་སོགས་སུ་བཞག་གོ། ། འདུལ་བའང་། ལྟུང་བ་སྡེ་ལྔ། རྩོད་པ་ཞི་བྱེད་ཀྱི་ཆོས་བདུན། བཅས་པ་དང་རྗེས་བཅས། སོ་སོར་སྤང་བ་དང་གནང་བ། གསོལ་བའི་ལས། གཞི་བཅུ་བདུན་སོགས་སྡེ་སྡེར་བསྡུ་བ་དང་སོ་སོར་དབྱེ་བའི་སྒོ་ནས་གཞུང་དུ་བྱས་ཤིང༌། མངོན་པའང་སྡེ་ཚན་དུ་བསྒྲིལ་བའི་ཚུལ་དེ་བཞིན་དུ་མཛད་དོ། ། དེ་ལྟར་བཀའ་བསྡུ་དང་པོར་གྲགས་པ་འདི་ནི་ཉན་ཐོས་པ་རྣམས་དང་ཐུན་མོང་གི་སྡེ་སྣོད་བསྡུ་བའི་དངོས་གཞི་ཡིན་ནོ། ། བསྟན་པའི་གནས་ཚད་ལོ་གྲངས་སྟོང་དུ་བཤད། ། ཉན་ཐོས་ཀྱི་(༡༠༩ན)ལུགས་འདི་ལ་བསྟན་པའི་གནས་ཚད་འདུལ་བ་ལུང་ཕྲན་ཚེགས་ལས་བཤད་པ་ལྟར། གཙོ་ཆེར་ལོ་གྲངས་སྟོང་ཕྲག་གཅིག་ཏུ་གནས་པར་འདོད་ཅིང༌། དེའང་ལྔ་བརྒྱ་ནི་བསྟན་པ་དངོས་དང་། ལྔ་བརྒྱ་ནི་གཟུགས་བརྙན་དུ་འགྱུར་པའོ། །རིང་མཐའ་དགའ་བའི་བཤེས་ཀྱི་རྟོགས་བརྗོད་ལས་ཡར་འཕེལ་དྲུག་བརྒྱའི་བར་དུ་གནས་པའང་བཤད་དེ། རགས་པ་ཙམ་འོག་ཏུ་འབྱུང་ངོ༌། ། ཇ༣ གསུམ་པ་[ཐེག་ཆེན་བསྡུས་ཚུལ་]ནི། ཐུན་མིན་ཐེག་པ་ཆེ་རྣམས་མ་ག་དྷཱའི། ། ལྷོ་ཕྱོགས་དྲི་མེད་འབྱུང་བ་ཞེས་བྱའི་རིར། ། བྱང་སེམས་འབུམ་ཕྲག་བཅུ་འདུས་རྡོ་རྗེ་འཛིན། ། བྱམས་དང་འཇམ་དཔལ་མདོ་འདུལ་མངོན་པ་བསྡུས། ། ཐུན་མོང་མ་ཡིན་པའི་བསྡུ་བ་ལ། རྒྱུའི་ཐེག་པ་ཆེན་པོའི་སྡེ་སྣོད་རྣམས་ནི། འཕགས་ཡུལ་གྱི་མཁས་པ་དག་གིས་ཡུལ་མ་ག་དྷཱ་ན་གྲོང་ཁྱེར་རྒྱལ་པོའི་ཁབ་ཀྱི་ལྷོ་ཕྱོགས། བི་མ་ལ་སམ་བྷ་བ་ཞེས་བྱ་བའི་རི་ལ་བྱང་ཆུབ་སེམས་དཔའ་འབུམ་ཕྲག་བཅུ་འདུས་ཏེ། ཕྱག་ན་རྡོ་རྗེས་ནི་མདོ་སྡེ། བྱམས་པས་ནི་འདུལ་བ། འཇམ་དཔལ་གྱིས་མངོན་པ་རྣམས་བསྡུས་པར་བཤད་དོ། ། རྟོག་གེ་འབར་བ་ལས་ཀྱང༌། ཐེག་པ་ཆེན་པོ་སངས་རྒྱས་ཀྱིས་གསུངས་པ་ཡིན་ཏེ། རྩ་བའི་སྡུད་པ་བྱེད་པ་པོ་ཀུན་ཏུ་བཟང་པོ་དང༌། འཇམ་དཔལ་དང༌། གསང་བ་པའི་བདག་པོ་དང༌། བྱམས་པ་ལ་སོགས་པ་རྣམས་ཀྱིས་བསྡུས་པའི་ཕྱིར་རོ། །བདག་ཅག་གི་རྩ་བའི་སྡུད་པར་བྱེད་པ་ཉན་ཐོས་ནི་མ་ཡིན་ཏེ། ཐེག་པ་ཆེན་པོའི་གསུང་ནི་དེ་དག་གི་ཡུལ་མ་ཡིན་པའི་ཕྱིར་རོ། །ཞེས་བཤད་དོ། ། ལུགས་འདིར་བསྟན་པའི་གནས་ཚད་མང་ན་ཡང༌། ། ཡོངས་གྲགས་ལྔ་བརྒྱ་ཕྲག་བཅུ་ད་ལྟ་ནི། ། ལུང་གི་ལེའུ་ཡིན་གསུངས་ཀློང་ཆེན་སོགས། ། སྒྲུབ་དུས་གསུམ་ལས་ཤེས་རབ་སྐབས་སུ་བཞེད། ། ཐེག་པ་ཆེན་པོའི་ལུགས་འདིར། ཐུན་མོང་ལ་སྣང་བའི་དབང་དུ་བྱས་ནས་ཚད་རིང་ཐུང་མདོ་སྡེ་སོ་སོའི་དགོངས་པ་ལྟར་བཤད་པ་དང༌། ཐུན་མོང་མ་ཡིན་པའི་དབང་དུ་བྱས་ནས་ཚད་མེད་པར་གསུངས་པ་སོགས་མང་དུ་སྣང་(༡༠༩བ)ནའང༌། ལྗོངས་འདིའི་དཔྱོད་ལྡན་རྣམས་ལ་ཡོངས་སུ་གྲགས་ཤིང་དོན་ལ་གནས་པར་བཞེད་པ་ནི་ལྔ་བརྒྱ་ཕྲག་བཅུ་སྟེ་ལྔ་སྟོང་དུ་གནས་པ་ཉིད་ཡིན་ལ། དེ་ལས་ད་ལྟའི་སྐབས་སུ་འབྲས་བུ་དང་སྒྲུབ་པའི་སྐབས་ཡོལ་ནས་ལུང་གི་ལེའུའི་སྐབས་ཡིན་པར་གསུངས་ཤིང༌། ཀུན་མཁྱེན་ཀློང་ཆེན་པ་སོགས་ནི་ལུང་དང་སྒྲུབ་པ་གོ་བརྗེས་ནས་སྒྲུབ་དུས་གསུམ་ལས་ཚུལ་ཁྲིམས་དང་སེམས་ཀྱི་དུས་རྫོགས་ཟིན་ནས་ཤེས་རབ་ཀྱི་བསླབ་པ་གཙོ་བོར་སྒྲུབ་པའི་སྐབས་སུ་སླེབས་པར་བཞེད་དོ། ། བསྟན་པའི་གནས་ཚད་སྔ་ཕྱི་ཐམས་ཅད་ཀྱི་བཞེད་པ་སྙིང་པོར་དྲིལ་ན། ལོ་ཆེན་དྷརྨ་ཤྲཱིས། མདོ་ལུགས་བསྟན་པའི་གནས་ཚད་ནི། ། བསྐལ་བཟང་འདུལ་ལུང་ཕྲན་ཚེགས་དང༌། ། འཕགས་པ་བློ་གྲོས་མི་ཟད་པས། ། བསྟན་པའི་མདོ་ཡི་འགྲེལ་པ་དང༌། ། གསེར་ཕྲེང་ཅན་གྱི་རྟོགས་བརྗོད་དང༌། ། མཛོད་འགྲེལ་རྣམས་ལས་ཐུབ་པའི་བསྟན། ། དངོས་བཏགས་ལྔ་བརྒྱ་ལྔ་བརྒྱ་སྟེ། ། ལོ་སྟོང་བར་དུ་གནས་པར་གསུངས། ། སྙིང་རྗེ་པདྨ་དཀར་པོ་ལས། ། དངོས་སྟོང་བཏགས་པ་ལྔ་བརྒྱར་བཤད། ། ཟླ་བའི་སྙིང་པོས་ཞུས་པའི་མདོར། ། ཉིས་སྟོང་གནས་པར་གསུངས་པ་དང༌། ། ཆོས་ཉིད་རང་ངོ་མི་གཡོ་བར། ། ཐ་དད་སྣང་བའི་མདོ་དང་ནི། ། རྡོ་རྗེ་གཅོད་པའི་འགྲེལ་པ་ལས། ། ཉིས་སྟོང་ལྔ་བརྒྱར་གནས་པར་གསུངས། ། དགའ་བའི་བཤེས་ཀྱི་རྟོགས་བརྗོད་ལས། ། སྐྱེ་དགུའི་ཚེ་ལོ་ཡར་འཕེལ་གྱི། ། དྲུག་བརྒྱའི་བར་དུ་གནས་པར་བཤད། ། དཾཥྚ྄་སེ་ནའི་འབུམ་ཊཱིཀ྄་དང༌། ། དབྱིག་གཉེན་ཞབས་ཀྱི་གནོད་འཇོམས་དང༌། ། སློབ་དཔོན་འཇམ་དཔལ་གྲགས་པ་རྣམས། ། ལྔ་སྟོང་བར་དུ་གནས་པར་བཞེད། ། དེ་ཡང་ལྔ་བརྒྱ་ཕྲག་བཅུ་ལས། ། ལྔ་བརྒྱ་དང་པོར་དགྲ་བཅོམ་དང༌། ། དེ་བཞིན་གཉིས་པར་ཕྱིར་མི་འོང༌། ། གསུམ་པ་ལ་ནི་རྒྱུན་ཞུགས་ཏེ། ། ཡེ་ཤེས་ཁོང་ཆུད་ལེའུ་གསུམ། །(༡༡༠ན) དེ་ནས་ལྔ་བརྒྱ་ཕྲག་གསུམ་ལ། ། རིམ་པར་ཤེས་རབ་ཏིང་འཛིན་དང༌། ། ཚུལ་ཁྲིམས་བསླབ་པ་གཙོར་སྟོན་གསུམ། ། སྒྲུབ་པའི་དུས་ཀྱི་ལེའུ་ཟེར། ། དེ་ནས་ལྔ་བརྒྱ་ཕྲག་གསུམ་ལ། ། མངོན་པ་མདོ་སྡེ་འདུལ་བ་རྣམས། ། སྟོན་པ་མང་དུ་འབྱུང་བས་ན། ། ལུང་གི་ལེའུ་གསུམ་དུ་གྲགས། ། བཅུ་པ་ལྔ་བརྒྱ་ཐ་མ་ལ། ། རབ་བྱུང་རྟགས་ཙམ་མ་གཏོགས་པ། ། ལྟ་སྤྱོད་རྣལ་མ་མེད་པའི་ཕྱིར། ། རྟགས་ཙམ་འཛིན་པའི་ལེའུར་བཞེད། ། དེ་ལས་གཞན་རྣམས་དགོངས་པ་ཅན། ། ལྔ་སྟོང་དོན་ལ་གནས་པར་ཟུང༌། ། ཞེས་གསུངས་པ་ལྟར་རོ། ། དེ་དག་འདས་ལུས་བལྟ་བའི་གཞི་སངས་རྒྱས་ཀྱི་འཁྲུངས་ལོའི་རྣམ་གྲངས་དང༌། འདས་ལུས་རྣམ་གྲངས་ཐ་དད་པ་ནི་གསར་རྙིང་གི་མཁས་པ་དག་གིས་མཛད་པའི་བསྟན་བརྩིས་ཀྱི་ཡིག་ཆ་དུ་མ་ལས་ཁོང་དུ་ཆུད་པར་བྱའོ། །འདིར་བསྟན་པ་གནས་མི་གནས་ཀྱི་མཚམས་འཛིན་ཀྱང༌། བསླབ་པ་གསུམ་བརྗོད་བྱེད་སྡེ་སྣོད་དང་བཅས་པ་ལ་སློབ་པ་ཡོད་མེད་དང༌། ལས་བརྒྱ་རྩ་གཅིག་གི་ཆོ་གའི་ལག་ལེན་ནུབ་མ་ནུབ་དང༌། ཉན་ཐོས་ཀྱི་རྟགས་དང་ཆ་ལུགས་ཚུལ་བཞིན་འཛིན་པ་ཡོད་མེད་ལ་ལྟོས་པ་ཡིན་གྱི། ངེས་དོན་གྱི་དབང་དུ་བྱས་ན། མདོ་སྡེ་གསེར་འོད་དམ་པ་ལས། སངས་རྒྱས་མྱ་ངན་ཡོངས་མི་འདའ། ། ཆོས་ཀྱང་ནུབ་པར་མི་འགྱུར་ཏེ། ། སེམས་ཅན་ཡོངས་སུ་སྨིན་མཛད་ཕྱིར། ། ཡོངས་སུ་མྱ་ངན་འདའ་བར་སྟོན། ། སངས་རྒྱས་བཅོམ་ལྡན་བསམ་མི་ཁྱབ། ། དེ་བཞིན་གཤེགས་པ་རྟག་པའི་སྐུ། ། སེམས་ཅན་རྣམས་ལ་ཕན་པའི་ཕྱིར། ། བཀོད་པ་རྣམ་པ་སྣ་ཚོགས་སྟོན། ། ཞེས་གསུངས་པ་དང༌། སྔ་འགྱུར་ཡིད་བཞིན་རྣམ་པར་བཀོད་པའི་རྒྱུད་ལས། སེམས་ཅན་ཀུན་གྱི་ཚོགས་ཆེན་པོ། ། ཇི་སྲིད་རྣམ་པར་གནས་དེ་སྲིད། ། སངས་རྒྱས་སྤྲུལ་པ་རྒྱུན་མི་འཆད། ། གྲོལ་བའི་ཆོས་ཀྱང་ནུབ་པ་མེད། ། ཅེས་གསུངས་པ་ལྟར་རོ། ། ཇ༤ བཞི་པ་[རྡོ་རྗེ་ཐེག་པ་བསྡུས་ཚུལ་]ནི། བྱ་སྤྱོད་རྣལ་འབྱོར་རྒྱུད་རྣམས་སུམ་རྩེན་བྱང༌། ། ལྕང་ལོ་ཅན་ཏུ་ཕྱག་ན་རྡོ་རྗེས་བསྡུས། །(༡༡༠བ) རྒྱུད་སྡེ་བཞི་ལས། བྱ་བའི་རྒྱུད་ནི། གཙོ་བོར་སུམ་རྩེན་ཏེ་སུམ་ཅུ་རྩ་གསུམ་གྱི་གནས་ཀྱི་མཐའ་རི་རབ་ཀྱི་བྱང་ཕྱོགས་ཀྱི་ལྕོགས་ལྕང་ལོ་ཅན་ན་ས་བཅུའི་བྱང་ཆུབ་སེམས་དཔའ་ཀུན་ཏུ་བཟང་པོ་དང༌། རྡོ་རྗེ་ཆོས་ལ་སོགས་པས་བླ་གོས་ལྔ་བརྒྱ་བཏིང་བའི་སྟེང་དུ་ལག་ན་རྡོ་རྗེ་བཞུགས་ཏེ། འདི་སྐད་བདག་གིས་ཐོས་པ་ཞེས་སོགས་བཤད་པའི་ཚུལ་གྱིས་བསྡུས་པ་ཡིན་ཏེ། གཙུག་ཏོར་གདུགས་དཀར་གྱི་འགྲེལ་པ་ཤཱུ་རཱངྒ་ཝརྨས་མཛད་པ་ལས་དེ་ལྟར་དུ་བཤད་པའི་ཕྱིར། སྤྱོད་པའི་རྒྱུད་ཀྱང་། ལག་ན་རྡོ་རྗེ་དང་ཀུན་ཏུ་བཟང་པོ་སོགས་ཀྱིས་བསྡུས་པར་གསལ་ཏེ། སྔ་མ་དེས་དེ་ལྟར་བཤད་པ་དང༌། ཕྱག་ན་རྡོ་རྗེ་དབང་བསྐུར་བའི་རྒྱུད་ལས་སྟོན་པས་གསང་བའི་བདག་པོར་དབང་བསྐུར་ཅིང་བསྟན་པ་གཏད་པའི་ཚུལ་སོགས་འབྱུང་བའི་ཕྱིར་རོ། ། རྣལ་འབྱོར་རྒྱུད་ནི། ལྕང་ལོ་ཅན་དུ་རྡོ་རྗེ་འཆང་ས་བཅུའི་དབང་ཕྱུག་གི་ཚུལ་བསྟན་པ་ཕྱག་ན་རྡོ་རྗེ་ཉིད་ཀྱིས་ཀུན་ཏུ་བཟང་པོ་ལ་སོགས་པ་བྱང་ཆུབ་སེམས་དཔའ་ཆེན་པོ་རྣམས་ཀྱིས་གསོལ་བ་བཏབ་པའི་ངོར་བསྡུས་པ་ཡིན་ཏེ། སློབ་དཔོན་ཀུན་དགའ་སྙིང་པོའི་ཡོ་གའི་འགྲེལ་པར་ཚུལ་དེ་གསལ་བར་བཤད་པའི་ཕྱིར་རོ།། བླ་མེད་ཞུ་བ་པོ་དང་གཏད་པ་དེས། ། བསྡུས་ཤིང་སྟོན་པ་པོས་ཀྱང་སྡུད་སོགས་ལས། ། བྱེ་བྲག་མ་རྒྱུད་རྡོ་རྗེ་མཁའ་འགྲོ་རྣམས། ། དྲི་བ་དྲིས་ལན་ཚུལ་གྱིས་གཏན་ལ་ཕབ། ། བརྟག་པ་གཉིས་པ་རྡོ་རྗེ་སྙིང་པོས་ཏེ། ། དུས་འཁོར་རྩ་རྒྱུད་ཟླ་བ་བཟང་པོ་དང༌། ། བསྡུས་རྒྱུད་འཇམ་དཔལ་གྲགས་པས་སྙིང་པོར་དྲིལ། ། རྣལ་འབྱོར་བླ་ན་མེད་པའི་རྒྱུད་སྡེ་རྣམས་ནི། རྒྱུད་ཐོག་མར་ཞུ་བ་པོ་དང་རྒྱུད་གང་ལ་གཏད་པ་དེས་བསྡུས་པ། དཔེར་ན། དུས་འཁོར་རྩ་བའི་རྒྱུད་ཆོས་རྒྱལ་ཟླ་བ་བཟང་པོས་བསྡུས་པ་ལྟ་བུ་མང་ཞིང༌། དཔལ་གསང་བ་གྲུབ་པའི་རྒྱུད་ལས། འདི་ཡི་སྡུད་པར་བྱེད་པ་པོ། ། གཞན་དག་ཡོད་པ་མ་ཡིན་ཞེས། ། བདག་ཉིད་འབའ་ཞིག་སྨྲ་བར་བྱེད། ། ཞེས་གསུངས་པ་ལྟར། རྒྱུད་(༡༡༡ན)སྟོན་པ་པོས་ཀྱང་བསྡུས་པར་བཤད་པ་སོགས་ཡོད་པ་ལས། བྱེ་བྲག་མ་རྒྱུད་འགའ་ཞིག་ནི་རྡོ་རྗེ་ཕག་མོ་སོགས་རྣལ་འབྱོར་མ་རྣམས་ཀྱིས་རྡོ་རྗེའི་གནས་རྣམས་སུ་དྲི་བ་དང་དྲིས་ལན་གྱི་ཚུལ་གྱིས་གཏན་ལ་ཕབ་པ་མཁའ་འགྲོ་རྒྱ་མཚོ་ལས་བཤད་པ་དང༌། དགྱེས་པ་རྡོ་རྗེའི་རྩ་བའི་རྒྱུད་བརྟག་པ་གཉིས་པ་ནི་ས་བཅུའི་དབང་ཕྱུག་རྡོ་རྗེ་སྙིང་པོས་བསྡུས་ཤིང་འགྲེལ་པའང་མཛད་པ་དང༌། དུས་ཀྱི་འཁོར་ལོའི་རྩ་བའི་རྒྱུད་སྟོང་ཕྲག་བཅུ་གཉིས་པ་ཆོས་རྒྱལ་ཟླ་བ་བཟང་པོས་བསྡུས་ཤིང་འགྲེལ་ཆེན་སྟོང་ཕྲག་དྲུག་ཅུ་པའང་མཛད། བསྡུས་པའི་རྒྱུད་ནི་འཕགས་པ་འཇམ་དཔལ་གྱི་སྤྲུལ་པའི་སྐུ་རྡོ་རྗེའི་རིགས་ལྡན་འཇམ་དཔལ་གྲགས་པས་རྩ་བའི་རྒྱུད་ལས་སྙིང་པོར་དྲིལ་ཏེ་ཕྲེང་འཛིན་གྱི་སྡེབ་སྦྱོར་གྱིས་བཅིངས་པའི་ལེའུ་ལྔ་པར་མཛད་པ་སོགས་མཐའ་ཡས་སོ། ། ཀུན་ཀྱང་གསང་བདག་རྣམ་པར་རོལ་པའི་ཕྱིར། ། སྡུད་པོ་གཅིག་ཅིང་གསང་ཆེན་བསྟན་པ་ནི། ། ཡུན་རིང་ཁྱད་པར་མ་རྒྱུད་ནུབ་པ་མེད། ། སྟོན་པ་པོ་དེ་དག་ཀྱང་གསང་བའི་བདག་པོ་དངོས་སམ་དེའི་རྣམ་པར་རོལ་པ་མཚན་གཞན་དུ་བསྟན་པ་ཙམ་ཡིན་པའི་ཕྱིར། ཐམས་ཅད་ཀྱང་སྡུད་པ་པོ་ནི་གསང་བའི་བདག་པོ་ཉིད་དུ་གཅིག་སྟེ། ཕ་རྒྱུད་ལ་མཚོན་ན། གསང་བ་འདུས་པ་ལས་རྡོ་རྗེ་ཆོས་ལ་རྒྱུད་གཏད་པར་གསུངས་ཤིང༌། རྡོ་རྗེ་ཆོས་ནི་ཕྱག་ན་རྡོ་རྗེ་ལ་རྒྱུད་གཏད་ཅིང་དབང་བསྐུར་བའི་མཚན་དུ་ཟླ་བ་བཟང་པོ་སོགས་བཞེད་ཅིང༌། སྡུད་པ་པོའང་དེ་ཡིན་པར་བཤད་པ་དང༌། མ་རྒྱུད་ཕལ་ཆེ་བ་གསང་བདག་དངོས་ཀྱིས་བསྡུས་པར་གསུངས་ཤིང་། ཨིནྡྲ་བྷཱུ་ཏི་རྡོ་རྗེ་སྙིང་པོ་ཟླ་བ་བཟང་པོ་རྣམས་ཀྱང་གསང་བདག་གི་སྤྲུལ་པ་འབའ་ཞིག་ཏུ་ངེས་པའི་ཕྱིར་རོ། ། དེ་ལྟར་གསང་ཆེན་སྔགས་ཀྱི་བསྟན་པ་ནི། གནས་གཅིག་ཏུ་ནུབ་ཀྱང་གཅིག་ཏུ་སྣང་བ་དང༌། ཐུན་མོང་དུ་མ་གྲགས་ཀྱང་སྐལ་ལྡན་དག་གི་ངོར་སྣང་བ་སོགས་ཡུན་རིང་པོར་གནས་ཤིང༌། ཁྱད་པར་རྣལ་འབྱོར་མའི་རྒྱུད་རྣམས་ནམ་དུའང་ནུབ་པ་མེད་པར་གནས་པར་གསུངས་ཏེ། (༡༡༡བ) མཁའ་འགྲོ་རྒྱ་མཚོ་ལས། ཤེས་རབ་རྒྱུད་ནི་རང་བྱུང་ཉིད། ། རང་གི་རང་བཞིན་རྟག་ཏུ་གནས། ། བྱང་ཆུབ་ཕྱོགས་ཀྱི་ཆོས་རྣམས་སུ། ། མི་འཇིག་གོ་འཕང་རྗེས་འགྲོ་བ། ། བསྐལ་པ་བསྲེག་པའི་དུས་སུ་ནི། ། གཞན་དུ་སོང་ནས་ཡང་དག་གནས། ། ཞེས་གསུངས་སོ། ། ཆ༢ གཉིས་པ་བཀའ་བསྡུ་བར་པ་ནི། སྟོན་པ་གཤེགས་ནས་བརྒྱ་དང་བཅུ་ལོན་ཚེ། ། རུང་བ་མིན་པའི་གཞི་བཅུ་སུན་དབྱུང་ཕྱིར། ། གྲགས་པ་ལ་སོགས་དགྲ་བཅོམ་བདུན་བརྒྱ་ནི། ། ཀུསྨ་པུ་རིའི་གཙུག་ལག་ཁང་དུ་འདུས། ། བདུན་བརྒྱས་ཡང་དག་བརྗོད་པ་ཞེས་བྱ་བ། ། ཆ་ཤས་བསྡུ་བར་མཛད་ཅིང༌། ཞེས་པ་སྟེ། སྟོན་པ་ཞི་བར་གཤེགས་ནས་ལོ་གྲངས་བརྒྱ་དང་བཅུ་ལོན་པའི་ཚེ། ཡངས་པ་ཅན་གྱི་དགེ་སློང་རྣམས་ཀྱིས་རུང་བ་མ་ཡིན་པའི་གཞི་བཅུ་བྱས་ཏེ། དེ་ཡང་ཇི་སྐད་དུ། ཧུ་ལུ་ཧུ་ལུ་ཡི་རངས་དང༌། ། ཀུན་སྤྱོད་སྣོད་དང་ལན་ཚྭ་དང༌། ། ལམ་དང་སོར་གཉིས་དཀྲུག་དང་འདིང་། ། གསེར་གྱི་རུང་བ་དག་དང་བཅུ། ། ཞེས་པ་སྟེ། ཆོས་མིན་གྱི་ལས་བྱས་ཤིང་འཇུག་ཏུ་ཐལ་མོ་བརྡབས་ཏེ་ཧུ་ལུ་ཧུ་ལུ་ཞེས་བརྗོད་པའམ། ཡང་ན། དགེ་འདུན་ལྷག་མ་རྣམས་རྗེས་སུ་ཡི་རངས་བྱས་བཅུག་པས་དག་གོ། །ཞེས་པ་དང༌། ས་གཞི་འདི་ཀུན་གྱིས་སྤྱོད་རུང་བས་ཉེས་པ་མེད་པ་ཡིན། ཞེས་ཁྱིམ་པ་བཞིན་དུ་ས་བརྐོ་བ་དང༌། ན་བར་གྱུར་ན་ཆང་སྣོད་སྲིན་བུ་པད་པས་འཇིབ་པ་ལྟར་གཞིབ་ནས་ཆང་བཏུང་རུང་བ་དང༌། ལན་ཚྭ་འདེབས་ན་ཟས་ཀྱི་རོ་འགྱུར་བས་དུས་མིན་གྱི་ཁ་ཟས་ཟ་རུང་བ་དང༌། ཟས་སྤངས་ཟིན་ནས་རྒྱང་གྲགས་ཕྱེད་ཙམ་ལམ་དུ་བརྒལ་ནས་སླར་ཡང་ཟར་རུང་བ་དང༌། ཟས་སྤངས་ནས་ལྷག་པོ་བྱས་མི་དགོས་པར་སླར་སོར་མོ་གཉིས་ཀྱིས་རེག་ནས་ཟར་རུང་བ་དང༌། འོ་མ་དང་ཞོ་གཉིས་བྲེ་གང་རེ་བསྲེས་ཏེ་དཀྲུགས་ནས་ཕྱི་དྲོ་འཐུང་རུང་བ་དང༌། གདིང་བ་རྙིང་པ་ནས་བདེ་བར་གཤེགས་པའི་མཐོ་གང་ལྷན་མི་དགོས་ཞེས་པ་དང༌། དགེ་ཚུལ་གྱི་མགོ་ལ་ཁྲིའུ་ཅིང༌། དེའི་སྟེང་དུ་མེ་ཏོག་གི་ཕྲེང་(༡༡༢ན)བས་བརྒྱན་པའི་ལྷུང་བཟེད་བཞག་སྟེ། གསེར་དངུལ་སོགས་འབུལ་བ་དེར་འཕེན་བཅོལ་ན་ཕྱིས་དགེ་སློང་རང་ཉིད་ཀྱིས་རེག་ཆོག་པར་འདོད་པ་བཅས་རུང་བ་མ་ཡིན་པའི་བཞི་བཅུ་སྤྱོད་ནས། འདི་ནི་ཆོས་ཡིན། འདུལ་བ་ཡིན། སྟོན་པའི་བསྟན་པ་ཡིན་ནོ་ཞེས་བསྒྲགས་པ་དེ་དག་སུན་དབྱུང་ཞིང་བསྟན་པའི་དྲི་མ་བསལ་བའི་སླད་དུ། རྣམ་ཐར་བརྒྱད་དང་ལྡན་པའི་དགྲ་བཅོམ་པ་གྲགས་པ་ལ་སོགས་པ་གཉིས་གའི་ཆ་ལས་རྣམ་པར་གྲོལ་ཞིང་མང་དུ་ཐོས་པའི་དགྲ་བཅོམ་པ་བདུན་བརྒྱ། ཀུསྨ་པུ་རི་ཞེས་བྱ་བའི་གཙུག་ལག་ཁང་དུ་འདུས་ཏེ། ལི་ཙྪ་བཱིའི་རིགས་ལས་བྱུང་བའི་རྒྱལ་པོ་དགའ་བྱེད་ཅེས་བྱ་བས་སྦྱིན་བདག་བྱས་ཏེ། དངོས་པོ་བཅུ་བསྒྲགས་ནས། དེ་དག་མདོ་སྡེ་ལ་མི་འཇུག །འདུལ་བ་ལ་མི་སྣང༌། ཆོས་ཉིད་དང་འགལ་བས་དོར་བར་བྱ་བར་བཅས་ཏེ། མི་རུང་བར་སྤྱོད་པ་རྣམས་བསྙིལ་བས། འདི་ལ་བདུན་བརྒྱས་ཡང་དག་པར་བརྗོད་པ་ཞེས་གྲགས་ཤིང་ཆ་ཤས་ཀྱི་བསྡུ་བ་མཛད་དོ། ། ཆ༣ གསུམ་པ་བཀའ་བསྡུ་ཐ་མ་ནི། དེ་ཡི་རྗེས། ། དགེ་སློང་མ་ཧཱ་དེ་བ་སློབ་མར་བཅས། ། གཞི་ལྔ་བསྒྲགས་པས་རྩ་བའི་སྡེ་བཞི་དང༌། ། དེ་ལས་གྱེས་པ་བཅོ་བརྒྱད་ཉིད་དུ་གྱུར། ། དེའི་རྗེས་གཏད་རབས་བདུན་པོ་སོགས་རྫོགས་པའི་ཕྱིས་ཞིག་ན་ཡུལ་མ་རུ་ཌའི་ཚོང་དཔོན་གྱི་བུ་ལྷ་ཆེན་པོ་ཞེས་པ་མཚམས་མེད་གསུམ་བྱས་པ་ཞིག་རང་གི་སྡིག་པ་གསང་སྟེ་ཁ་ཆེར་བྱིན་ནས། རབ་ཏུ་བྱུང༌། སྡེ་སྣོད་གསུམ་ག་བྱང་བར་ཤེས་ནས་དབེན་པར་ཏིང་ངེ་འཛིན་ལ་བརྩོན་པ་ན་བདུད་ཀྱིས་བྱིན་གྱིས་བརླབས་ཏེ་དགྲ་བཅོམ་པར་གྲགས་ཤིང་རྙེད་བཀུར་དང་གྲགས་པ་འཕེལ་ནས་འཁོར་མང་པོ་དང་བཅས་གཙུག་ལག་ཁང་འདམ་བུ་ཅན་དུ་འོངས་པ་ན། དགེ་སློང་རྣམས་ཀྱིས་སོ་ཐར་གྱི་མདོ་རེས་མོས་སུ་འདོན་པའི་ཚེ། ལྷ་ཆེན་པོས་མདོ་བཏོན་པའི་འཇུག་ཏུ། ལྷ་རྣམས་མ་རིག་པ་ཡིས་སླུས། ། ལམ་ནི་སྒྲ་ཡི་རྒྱུན་ལས་བྱུང༌། ། ཐེ་ཚོམ་ཅན་རྣམས་གཞན་གྱིས་འཇུག ། འདི་ནི་སངས་རྒྱས་བསྟན་པ་ཡིན། ། (༡༡༢བ)ཞེས་བཏོན་པས་འཕགས་པ་རྣམས་དང་དགེ་སློང་རྒན་པོ་མང་དུ་ཐོས་པ་དག་གིས་མདོའི་ཚིག་མ་ཡིན་ནོ་ཞེས་བརྗོད་པ་ན། གཞོན་པ་ཕལ་ཆེར་ལྷ་ཆེན་པོའི་གྲོགས་བྱས་ཏེ་རྩོད་པར་གྱུར་ཅིང༌། གཞན་ཡང་དེས་བཀའི་དོན་ལ་ལོག་པར་བརྟགས་པ་མང་དུ་བྱས་སོ། ། དེ་ཤི་ནས་དེའི་སློབ་མ་བཟང་པོ་ཞེས་པས་ཀྱང་བཀའི་དོན་ལ་བརྒལ་བརྟག་དང་ཐེ་ཚོམ་གྱི་གནས་མང་པོ་བསྐྱེད་ནས་གཞན་ལ་ལན་གདབ་པ་དང༌། མི་ཤེས་པ་དང༌། ཡིད་གཉིས་དང༌། ཡོངས་སུ་བརྟག་པ་དང༌། བདག་ཉིད་གསོབ་སྟེ། གཞི་ལྔ་ཡོངས་སུ་བསྒྲགས་པས་དགེ་འདུན་སོ་སོའི་སྐྱེ་བོ་རྣམས་ཐེ་ཚོམ་དང་ཡིད་