Tibetan
(༡༠༠ན)ལམ་ལྔ་པོ་ཐམས་ཅད་ཆོས་ཀྱི་འཁོར་ལོ་ཡིན་ཏེ། དབུ་མ་པ་ཆོས་བཤེས་ཀྱིས། ཆོས་ཀྱི་འཁོར་ལོ་ཁ་ཅིག་ནི་ཚོགས་ཀྱི་ལམ་མོ། །ཁ་ཅིག་ནི་སྦྱོར་བའི་ལམ་མོ། །ཁ་ཅིག་ནི་བར་ཆད་མེད་པའི་ལམ་གྱི་བར་རོ། །ཞེས་བཤད་ཅིང་། རྣམ་གྲོལ་གྱི་ལམ་ཡང་ཆོས་ཀྱི་འཁོར་ལོ་ཐམས་ཅད་ཀྱི་མཆོག་ཏུ་གྱུར་པ་སྟེ། རྒྱ་ཆེར་རོལ་པའི་མདོར། བྱམས་པ་ཆོས་ཀྱི་འཁོར་ལོ་དེ་ནི་གཏིང་མི་དམིགས་པའི་ཕྱིར་ཟབ་པའོ། །ཞེས་པ་ལ་སོགས་པ་རྒྱ་ཆེར་གསུངས་པས་སོ། ། ལམ་དེ་དག་བརྗོད་བྱེད་སྟོན་པའི་གསུང་རབ་ཀུན་ཀྱང་ཆོས་ཀྱི་འཁོར་ལོར་འཇུག་པ་སྟེ། སློབ་དཔོན་དབྱིག་གཉེན་གྱིས། ཀུན་རྫོབ་ཀྱི་ཆོས་ཀྱི་ངོ་བོ་བསྟན་པའི་རང་བཞིན་གྱི་འཁོར་ལོ་ནི་ཆོས་ཀྱི་འཁོར་ལོ་ཡིན་ནོ། །ཞེས་དང༌། ཤེར་ཕྱིན་དང་མངོན་པ་སོགས་ཀྱི་མིང་ཡང་གཞུང་ལུགས་ལ་འཇུག་པ་མི་འགལ་བ་བཞིན་དུ་འདིར་ཡང་རིགས་པའི་ཕྱིར་རོ། ། ཡང་ན། ཆོས་འཁོར་དངོས་རྟོགས་པའི་ཆོས་དང་ཚོགས་སྦྱོར་གྱི་ལམ་དེའི་ཡན་ལག་ཡིན་ཞིང༌། གསུང་རབ་ནི་དེ་དག་གཞན་རྒྱུད་ལ་གོ་བར་བྱེད་པའི་ཕྱིར་ཆོས་འཁོར་བསྐོར་བ་ཞེས་བྱ་བར་བཤད་ཀྱང་། ལེགས་པའི་ཕྱོགས་གཅིག་ཡིན་ནོ། ། ཉ༢ གཉིས་པ་[བྱེ་བྲག་ལུང་ཆོས་ཀྱི་མཚན་ཉིད་]ནི། ལུང་གི་ངོ་བོ་ངག་གི་རྣམ་རིག་སྟེ། ། རྒྱལ་བའི་ཡེ་ཤེས་འགྲོ་སེམས་དག་པ་ལས། ། གདུལ་བྱའི་ཤེས་པ་མིང་ཚིག་ཡི་གེར་སྣང༌། ། བྱེ་མདོས་མིང་ཚིག་ཕུང་པོ་གཉིས་སུ་སྨྲ། ། དེ་ལ་བྱེ་བྲག་ལུང་གི་ཆོས་འཁོར་གྱི་ངོ་བོ་ནི། སྟོན་པས་གསུངས་པའི་དམ་ཆོས་གང་ཞིག །མྱ་ངན་ལས་འདས་པའི་རྒྱུ་འབྲས་ངོ་བོ་ཉིད་གསུམ་གང་རུང་བརྗོད་བྱའི་གཙོ་བོར་གྱུར་པ་ངག་གི་རྣམ་པར་སྣང་བའི་རྣམ་རིག་གོ། ། དེའི་མཚན་གཞིའང༌། བདག་རྐྱེན་སངས་རྒྱས་ཀྱི་ཡེ་ཤེས་དང༌། རྒྱུ་རྐྱེན་གདུལ་བྱའི་འགྲོ་བ་རྣམས་ཀྱི་རྒྱུད་དག་པ་གཉིས་ལ་བརྟེན་ནས། གདུལ་བྱ་དེའི་ཤེས་པ་མིང་ཚིག་ཡི་གེའི་རྣམ་པར་སྣང་བ་ཉིད་ཡིན་གྱི། བཅོམ་ལྡན་འདས་ལ་ངག་ཀུན་ནས་སློང་བའི་བག་ཆགས་མི་མངའ་བའི་ཕྱིར་དང༌། (༡༠༠བ)ནང་གི་ཤེས་པ་ཕྱི་རོལ་གྱི་སྒྲར་ཞེན་པའི་མ་རིག་པ་མེད་པའི་ཕྱིར། དོན་དམ་པར་དེ་བཞིན་གཤེགས་པས་བཞེད་པའི་དབང་གིས་བསྟན་པ་ནི་མ་ཡིན་ནོ། ། དེ་ལྟ་བས་ན་ཐེག་ཆེན་གྱི་མདོ་སྡེ་འགའ་ཞིག་ལས། བདེ་བར་གཤེགས་པས་ཆོས་ཚིག་འབྲུ་གཅིག་ཀྱང་མ་བསྟན་པར་བཤད་པའང་དོན་འདི་ལ་དགོངས་སོ། ། ཐེག་དམན་པ་དག་གིས་དེ་ལྟར་མི་འདོད་དེ། མཛོད་ལས། གང་རྣམས་ཐུབ་པས་གསུངས་དེ་དག ། ཚིག་གམ་མིང་ཡིན་དེ་དག་ནི། ། གཟུགས་དང་འདུ་བྱེད་དག་ཏུ་འདུས། ། ཞེས་བཤད་པ་ལྟར། བྱེ་སྨྲས་གསུང་རབ་ཀྱི་ངོ་བོ་མིང་ཚིག་ཡི་གེའི་ཚོགས་པ་སྒྲ་སྤྱིའི་ཕྲེང་བར་འདོད་པས་ལྡན་མིན་འདུ་བྱེད་དང༌། མདོ་སྡེ་པས་དེ་སྒྲ་རང་མཚན་པར་འདོད་པས་གཟུགས་ཕུང་སྟེ་དངོས་པོའི་མཐའ་གཉིས་སུ་སྨྲ་བར་བྱེད་དོ། ། ཇ༢ གཉིས་པ་ངེས་ཚིག་ནི། ངེས་ཚིག་དྷརྨ་ཙཀྲའི་སྒྲ་ཕྱི་མ། ། རྟོགས་པ་འཕོ་དང་ལུང་གི་ཆོས་ཕུང་ཚོགས། ། ལེགས་སྦྱར་གྱི་སྐད་དུ། དྷརྨ་ཙཀྲ་ཞེས་བྱ་བ། དྷརྨའི་སྒྲ་བཤད་གོང་དུ་སོང༌། ཙཀྲའི་སྒྲ་འཕོ་བ་དང་ཚོགས་པ་ལའང་འཇུག་པས། རྟོགས་པའི་ཆོས་འཁོར་གདུལ་བྱའི་རྒྱུད་ལ་འཕོ་བ་ལྟར་སྣང་བའི་ཕྱིར་དང༌། ལུང་གི་ཆོས་འཁོར་ཆོས་ཀྱི་ཕུང་པོ་མང་པོའི་བདག་ཉིད་ཡིན་པའི་ཕྱིར། དེ་སྐད་ཅེས་བྱ་སྟེ། ཆོས་བཤེས་ཀྱིས་ཀྱང༌། འཁོར་ལོ་ནི་གདུལ་བྱའི་རྒྱུད་ལ་འཕོ་བར་སྣང་བས་ནའམ། ཚོགས་ཀྱི་དོན་གྱི་ཕྱིར་འཁོར་ལོ་སྟེ། སྒྲའི་དོན་ནི་དེ་དག་དང་ཉེ་བའི་ཕྱིར་རོ། །ཞེས་སོ། ། ཡང་མིང་གི་རྣམ་གྲངས་ཚངས་པའི་འཁོར་ལོ་ཞེས་བྱ་བའང༌། མཛོད་ལས། དེ་ཉིད་ཚངས་ཚུལ་ཚངས་པ་ཡི། ། འཁོར་ལོ་ཚངས་པས་བསྐོར་ཕྱིར་རོ། ། ཞེས་འབྱུང་བ་ལྟར་རོ། ། ཇ༣ གསུམ་པ་རྣམ་པར་དབྱེ་བ་ལ་གཉིས། ཉ༡ ཐུན་མོང་དང༌། ཉ༢ ཐུན་མོང་མ་ཡིན་པའོ། ། ཉ༡ དང་པོ་ལ་གཉིས། ཏ༡ ཆོས་འཁོར་གསུམ་དུ་དབྱེ་བ། ཏ༢ དེ་ཆོས་ཕུང་དུ་རྣམ་པར་གཞག་པའོ། ། ཏ༡ དེའི་དང་པོ་ལ་གཉིས། ཐ༡ སྤྱི་དང་། ཐ༢ སོ་སོའི་རྣམ་གཞག་གོ། ། ཐ༡ དང་པོ་ནི། (༡༠༡ན) དབྱེ་ན་དང་པོ་བདེན་བཞི་བར་པ་ནི། ། མཚན་ཉིད་མེད་དང་ཐ་མ་ལེགས་པར་ཕྱེ། ། ངེས་འབྱུང་རྣམ་ཐར་ཕྱིར་མི་ལྡོག་པའི་གཏམ། ། ཞིར་འཇུག་སྨིན་དང་ལུང་སྟོན་ཐོབ་ཕྱིར་གསུངས། ། བསོད་ནམས་མ་ཡིན་བདག་དང་ལྟ་ཀུན་ཟློག ། ལུང་གི་ཆོས་དེ་ལ་དབྱེ་ན། ཆོས་ཀྱི་འཁོར་ལོ་རྣམ་པ་གསུམ་ཞེས་ཐེག་ཆེན་པ་རྣམས་ལ་གྲགས་ཤིང་གྲུབ་པ་སྟེ། དེའང་བཀའ་དང་པོ་བདེན་པ་བཞིའི་ཆོས་འཁོར། བར་པ་མཚན་ཉིད་མེད་པའི་ཆོས་འཁོར། ཐ་མ་ལེགས་པར་རྣམ་པར་ཕྱེ་བའི་ཆོས་འཁོར་རོ། ། དེའང་གཟུངས་ཀྱི་དབང་ཕྱུག་རྒྱལ་པོས་ཞུས་པའི་མདོ་ལས། དེ་བཞིན་གཤེགས་པས་ཡོངས་སུ་མ་དག་པའི་སེམས་ཅན་གྱི་ཁམས་རིག་ནས། མི་རྟག་པ་དང༌། སྡུག་བསྔལ་བ་དང༌། བདག་མེད་པ་དང༌། མི་སྡུག་པ་ཡིད་འབྱུང་བར་འགྱུར་བའི་གཏམ་གྱིས་འཁོར་བ་ལ་མངོན་པར་དགའ་བའི་སེམས་ཅན་རྣམས་ཡིད་འབྱུང་བར་བྱེད། འཕགས་པའི་ཆོས་འདུལ་བ་ལ་འཇུག་པར་བྱེད་དོ། །དེ་ཙམ་གྱིས་དེ་བཞིན་གཤེགས་པ་བརྩོན་འགྲུས་རྒྱུན་མི་གཅོད་ཅིང༌། དེའི་འོག་ཏུ་སྟོང་པ་ཉིད་དང༌། མཚན་མ་མེད་པ་དང༌། སྨོན་པ་མེད་པའི་གཏམ་གྱིས་དེ་བཞིན་གཤེགས་པའི་ཚུལ་ཁོང་དུ་ཆུད་པར་བྱེད་དོ། ། དེ་ཙམ་གྱིས་ཀྱང་དེ་བཞིན་གཤེགས་པ་བརྩོན་འགྲུས་རྒྱུན་མི་གཅོད་ཀྱི། དེའི་འོག་ཏུ་ཕྱིར་མི་ལྡོག་པའི་འཁོར་ལོའི་གཏམ་དང༌། འཁོར་གསུམ་ཡོངས་སུ་དག་པའི་གཏམ་གྱིས་སེམས་ཅན་དེ་དག་དེ་བཞིན་གཤེགས་པའི་ཡུལ་ལ་འཛུད་དོ། །ཞེས་ཆོས་འཁོར་གསུམ་ལ་གཏམ་གསུམ་གྱིས་བསྟན་པར་མཛད་དེ། དང་པོ་འཁོར་བ་ལས་ཡིད་ངེས་པར་འབྱུང་བའི་གཏམ་དང༌། གཉིས་པ་རྣམ་ཐར་སྒོ་གསུམ་གྱི་གཏམ་དང༌། གསུམ་པ་ཕྱིར་མི་ལྡོག་པའི་འཁོར་ལོའི་གཏམ་མོ། ། དེ་ལྟར་འཇོག་པའི་རྒྱུ་མཚན་ནི། གདུལ་བྱ་བྱང་ཆུབ་མཆོག་ཏུ་དཀྲི་བའི་རིམ་པས་བཞག་པ་སྟེ། རྒྱུད་བླ་མ་ལས། འཇིག་རྟེན་ཞི་བའི་ལམ་ལ་འཇུག་པ་དང༌། ། རབ་ཏུ་སྨིན་དང་ལུང་སྟོན་རྒྱུ་ཡི་གཟུགས། ། ཞེས་(༡༠༡བ)བཤད་པ་ལྟར། དང་པོ་གདུལ་བྱ་འཁོར་བ་ལ་ཆགས་པ་རྣམས་ཡིད་འབྱུང་བའི་གཏམ་གྱིས་བསྐུལ་ནས་ཞི་བའི་ལམ་ལ་འཇུག་པ་དང༌། དེ་ནས་སྟོང་ཉིད་ཀྱི་གཏམ་གྱིས་ཐེག་པ་ཆེན་པོར་ཡོངས་སུ་སྨིན་པ་དང༌། དེ་ནས་ཕྱིར་མི་ལྡོག་པའི་འཁོར་ལོའི་གཏམ་གྱིས་དེ་བཞིན་གཤེགས་པའི་ཡུལ་ལ་འཇུག་ཅིང་ལུང་སྟོན་པ་ཆེན་པོ་འཐོབ་པར་བྱེད་པའི་ཕྱིར་གསུངས་སོ། ། གཞན་ཡང་འཕགས་པ་ལྷས། བསོད་ནམས་མ་ཡིན་དང་པོར་ཟློག ། བར་དུ་བདག་ནི་ཟློག་པ་དང༌། ། ཐ་མར་ལྟ་གཞི་ཀུན་ཟློག་པ། ། གང་གིས་ཤེས་དེ་མཁས་པ་ཡིན། ། ཞེས་བཤད་པའང་ཆོས་འཁོར་གསུམ་ལ་སྦྱོར་བར་བཞེད་དེ། རྒྱས་པར་ཕྱི་ནས་འབྱུང་ངོ༌། ། ཐ༢ གཉིས་པ་སོ་སོའི་རྣམ་གཞག་ལ་གསུམ། ད༡ འཁོར་ལོ་དང་པོ། ད༢ བར་པ། ད༣ ཐ་མའོ། ། ད༡ དང་པོ་ནི། བདེན་བཞི་ལན་གསུམ་བཟླས་པ་བཅུ་གཉིས་ཏེ། ། དེ་ལ་དང་པོ་བདེན་བཞིའི་ཆོས་འཁོར་གྱི་མཚན་ཉིད་ནི། སྟོན་པས་གསུངས་པའི་དམ་ཆོས་གང་ཞིག །ཐེག་ཆེན་གྱི་ལམ་སྟེགས་སུ་དགོངས་ནས། གཙོ་བོར་ཐེག་དམན་གྱི་རིགས་ཅན་རྣམས་ལ་བསྟན་པའོ། ། དེའི་མཚན་གཞི་ནི། ཉན་ཐོས་རྣམས་ལ་གྲགས་པའི་འདུལ་མངོན་མདོ་སྡེའི་གསུང་རབ་རྣམས་ཏེ། ལུང་སྡེ་བཞི་སོགས་སོ། ། དེ་དག་ལ་ཅིའི་ཕྱིར་བདེན་བཞིའི་ཆོས་འཁོར་ཞེས་བྱ་ཞེ་ན། གཙོ་བོར་བདེན་པ་བཞི་ལས་བརྩམས་ཏེ་དམན་པ་ལ་མོས་པ་རྣམས་དྲང་བའི་ཕྱིར་ལྟ་སྤྱོད་ཡང་དག་པར་སྟོན་པས་ན། དེ་སྐད་ཅེས་བྱའོ། ། དེའང་འཁོར་ལོ་དང་པོའི་དངོས་གཞི་ཡུལ་ཝ་ར་ཎཱ་སི་དྲང་སྲོང་ལྷུང་བ་རི་དྭགས་ཀྱི་ནགས་སུ་འཁོར་ལྔ་སྡེ་བཟང་པོ་ལ་བདེན་བཞི་ལན་གསུམ་དུ་བཟླས་པ་རྣམ་པ་བཅུ་གཉིས་ཀྱི་འཁོར་ལོ་བསྐོར་བའི་ཚུལ་བསྟན་པ་དེ་ཡིན་ཏེ། དེའི་ཚུལ་ཡང་བྱེ་བྲག་སྨྲ་བས། བདེན་བཞིའི་ངོ་བོ་བསྟན་པ། བྱ་བ་བསྟན་པ། འབྲས་བུ་བསྟན་པའི་ཚུལ་གྱིས་བཟླས་པ་གསུམ། བཟླས་པ་རེ་རེ་ལའང་། ཡིད། ཤེས་པ། རིག་པ། བློ་སྐྱེས་སོ་ཞེས་བཞི་བཞི་དང་བཅས་པའི་རྣམ་པ་བཅུ་གཉིས་སུ་བསྟན་པར་བཞེད། མདོ་སྡེ་པས། བདེན་བཞི་རང་(༡༠༢ན)གི་ངོ་བོ་ལ་དམིགས་པའི་ཚུལ་གྱིས་བཟླས་པ་དང་པོ། བྱ་བའི་ངོ་བོ་ལ་དམིགས་པའི་ཚུལ་གྱིས་བཟླས་པ་གཉིས་པ། མཐར་ཐུག་པ་ལ་དམིགས་པའི་ཚུལ་གྱིས་གསུམ་པ་སྟེ། བཟླ་བྱ་ནི་བདེན་བཞིའི་ཆོས་ཀྱི་རྣམ་གྲངས་ཉིད་ཡིན་ཞིང༌། བཟླས་པ་གསུམ་ལ། བདེན་པ་བཞི་སོ་སོར། ངོ་བོ། བྱ་བ། འབྲས་བུ་རྣམས་ལ་དམིགས་པའི་རྣམ་པ་བཞི་བཞིར་འགྱུར་བའི་ཕྱིར། རྣམ་པ་བཅུ་གཉིས་ཡིན་ནོ་ཞེས་འདོད་པ་ནི་འཐད་པའི་ཕྱོགས་སོ། ། ཆོས་འཁོར་དེའི་དངོས་ཀྱི་དགོས་པ་ལྔ་སྡེ་བཟང་པོས་དགྲ་བཅོམ་ཐོབ་པ་སོགས་དང༌། ཁྱད་པར་གྱི་དགོས་པ་དེ་ནས་བརྩམས་འབྲས་བུའི་བསྟན་པ་རྫོགས་ཀྱི་བར་འབྲས་བུ་བཞི་ཐོབ་པ་ས་ཆེན་པོའི་རྡུལ་ཙམ་བྱུང་བ་དེའི་ཕྱིར་རོ། ། འདི་ལས་གཞན་པ་བདེན་བཞིའི་ཆོས་འཁོར་དུ་གཏོགས་པ་རྣམས་ནི་འདུལ་ལུང་གྲོང་ཁྱེར་དྲུག་སོགས་སུ་ཐོར་བུར་གསུངས་པས་མཚོན་གནས་དང་དུས་མ་ངེས་པ་སྣ་ཚོགས་པའོ། ། ད༢ གཉིས་པ་[འཁོར་ལོ་བར་པ་]ནི། མཚན་ཉིད་མེད་ལ་དངོས་བསྟན་རྣམ་ཐར་གསུམ། ། སྦས་དོན་མངོན་རྟོགས་བརྒྱད་པོ་ཡན་ལག་བཅས། ། འཁོར་ལོ་བར་པའི་མཚན་ཉིད་ནི། སྟོན་པས་གསུངས་པའི་དམ་ཆོས་གང་ཞིག །ཐེག་པ་ཆེན་པོའི་ལམ་དངོས་ལ་དགོངས་ནས་གཙོ་བོར་ཐེག་ཆེན་པའི་རིགས་ཅན་རྣམས་ལ་བསྟན་པའོ། ། དེའི་མཚན་གཞི་ནི། ཡུམ་རྒྱས་འབྲིང་བསྡུས་གསུམ་སོགས་ཤེར་ཕྱིན་གྱི་མདོ་སྡེ་གཙོ་བོར་གྱུར་པ་རྣམས་སོ།། དེ་དག་ལ་ཅིའི་ཕྱིར་མཚན་ཉིད་མེད་པའི་ཆོས་ཀྱི་འཁོར་ལོ་ཞེས་བྱ་ཞེ་ན། གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་རང་རང་གི་མཚན་ཉིད་ཤིན་ཏུ་དབེན་པའི་སྨྲ་བསམ་བརྗོད་བྲལ་གྱི་དེ་ཁོ་ན་ཉིད་སྟོན་པར་སྣང་བའི་ཕྱིར། དེ་སྐད་ཅེས་བྱའོ། ། དེའང་གནས་རྒྱལ་པོའི་ཁབ་བྱ་རྒོད་ཕུང་པོའི་རི་ལ་འཁོར་རྣམ་པ་བཞི་དང་བྱང་ཆུབ་སེམས་དཔའི་ཚོགས་དཔག་ཏུ་མེད་པ་རྣམས་ལ། དངོས་བསྟན་རྣམ་པར་ཐར་པའི་སྒོ་གསུམ་ལས་བརྩམས་ཏེ། ཟབ་མོ་སྟོང་པ་ཉིད་ཀྱི་ཚུལ་བསྟན་པས་སྦས་དོན་མངོན་རྟོགས་(༡༠༢བ)བརྒྱད་གདུལ་བྱའི་རྒྱུད་ལ་ཇི་ལྟར་སྐྱེ་བའི་རིམ་པ་ཡན་ལག་གི་དོན་བདུན་ཅུ་དང་བཅས་པ་ལེགས་པར་རྟོགས་པའི་ཐབས་སུ་སྒོ་གསུམ་རྣམ་གྲངས་བཅུ་གཅིག་གི་སྒོ་ནས་འཆད་པར་མཛད་དོ། ། དེ་ལ་རྣམ་ཐར་སྒོ་གསུམ་ནི། གཞི་སྟོང་པ་ཉིད། ལམ་མཚན་མ་མེད་པ། འབྲས་བུ་སྨོན་པ་མེད་པའོ། ། སྦས་དོན་མངོན་རྟོགས་བརྒྱད་ནི། མངོན་རྒྱན་ལས། ཤེས་རབ་ཕ་རོལ་ཕྱིན་པ་ནི། ། དངོས་པོ་བརྒྱད་ཀྱིས་ཡང་དག་བཤད། ། རྣམ་ཀུན་མཁྱེན་ཉིད་ལམ་ཤེས་ཉིད། ། དེ་ནས་ཐམས་ཅད་ཤེས་པ་ཉིད། ། རྣམ་ཀུན་མངོན་རྫོགས་རྟོགས་པ་དང༌། ། རྩེ་མོར་ཕྱིན་དང་མཐར་གྱིས་པ། ། སྐད་ཅིག་གཅིག་མངོན་རྫོགས་བྱང་ཆུབ། ། ཆོས་ཀྱི་སྐུ་དང་དེ་རྣམས་བརྒྱད། ། ཅེས་པ་ལྟར་དང༌། དོན་བདུན་བཅུ་ནི། རྣམ་མཁྱེན་མཚོན་བྱེད་ཀྱི་ཆོས་བཅུ། ལམ་ཤེས་མཚོན་བྱེད་བཅུ་གཅིག །གཞི་ཤེས་མཚོན་བྱེད་དགུ། རྣམ་རྫོགས་སྦྱོར་བ་མཚོན་བྱེད་བཅུ་གཅིག །རྩེ་སྦྱོར་མཚོན་བྱེད་ཆོས་བརྒྱད། མཐར་གྱིས་པའི་སྦྱོར་བ་མཚོན་བྱེད་བཅུ་གསུམ། སྐད་ཅིག་མའི་སྦྱོར་བ་མཚོན་བྱེད་བཞི། འབྲས་བུ་ཆོས་སྐུ་མཚོན་བྱེད་ཀྱི་ཆོས་བཞི་རྣམས་སོ། ། དེ་དག་སྟོན་བྱེད་སྒོ་གསུམ་ནི། མགོ་སྨོས་པས་གོ་བ་རྣམས་ཀྱི་ངོར་བསྡུས་ཏེ་བསྟན་པའི་སྒོ། སྤྲོས་པ་ཙམ་གྱིས་གོ་བ་རྣམས་ཀྱི་ངོར་འབྲིང་དུ་བསྟན་པའི་སྒོ། ཚིག་ལ་འཆེལ་བ་རྣམས་ཀྱི་ངོར་རྒྱས་པར་བཤད་པའི་སྒོ་རྣམས་སོ། ། རྣམ་གྲངས་བཅུ་གཅིག་ནི། ཤཱ་རིའི་བུ། རབ་འབྱོར། བརྒྱ་བྱིན། ཡང་རབ་འབྱོར། བྱམས་པ། ཡང་རབ་འབྱོར། བརྒྱ་བྱིན། རབ་འབྱོར། བྱམས་པ། རབ་འབྱོར། ཀུན་དགའ་བོ་རྣམས་གོ་རིམ་བཞིན་དུ་དྲིས་ལན་སོགས་ཀྱིས་བསྟན་པ་རྣམས་སོ། ། འཁོར་ལོ་འདིའི་དགོས་པ་ནི། དངོས་སུ་བསྐོར་བའི་ཚུལ་བསྟན་ཡུལ་གྱི་གདུལ་བྱ་ངེས་པར་རྒྱུར་གྲོལ་བ་འདི་ལ་ལྟོས་དགོས་པ་རྣམས་དེ་བཞིན་གཤེགས་པའི་ཡུལ་ལ་འཇུག་པ་དང༌། བརྒྱུད་ནས་སེམས་ཅན་ཐམས་ཅད་ཀྱི་ལྟ་བ་ངན་པའི་སྒྲིབ་གཡོགས་བསལ་ནས་ཆོས་ཐམས་ཅད་(༡༠༣ན)ཀྱི་གནས་ལུགས་ཕྱིན་ཅི་མ་ལོག་པར་མངོན་སུམ་དུ་རྟོགས་ནས་མཐའ་གཉིས་ལ་རབ་ཏུ་མི་གནས་པའི་མྱ་ངན་ལས་འདས་པ་ཆེན་པོ་འཐོབ་པའི་ཕྱིར་རོ། ། ད༣ གསུམ་པ་[འཁོར་ལོ་ཐ་མ་]ནི། ཐ་མས་མཚན་ཉིད་རྣམ་གསུམ་གཙོ་བོར་སྟོན། ། འཁོར་ལོ་ཐ་མའི་མཚན་ཉིད་ནི། སྟོན་པས་གསུངས་པའི་དམ་ཆོས་གང་ཞིག །མཐར་ཐུག་པའི་དོན་ལ་དགོངས་ནས་གཙོ་བོར་ཕྱིར་མི་ལྡོག་པའི་བྱང་ཆུབ་སེམས་དཔའ་རྣམས་ལ་བསྟན་པའོ། ། དེའི་མཚན་གཞི་ནི། ཕལ་པོ་ཆེ་དང་ལང་ཀར་གཤེགས་པ་སོགས་དེ་བཞིན་གཤེགས་པའི་སྙིང་པོའི་གཏམ་གཙོ་བོར་སྟོན་པའི་ཕྱོགས་ཀྱི་གསུང་རབ་རྣམས་ཡིན་ནོ། ། དེ་དག་ལ་ཅིའི་ཕྱིར་ལེགས་པར་རྣམ་པར་ཕྱེ་བའི་ཆོས་འཁོར་ཞེས་བྱ་ཞེ་ན། གཟུགས་ནས་རྣམ་མཁྱེན་གྱི་བར་གྱི་ཆོས་ཐམས་ཅད་ཀུན་བརྟགས་གཞན་དབང་ཡོངས་གྲུབ་སྟེ། མཚན་ཉིད་གསུམ་དུ་ལེགས་པར་ཕྱེས་ནས་གཙོ་བོར་གསུངས་པའི་ཕྱིར། དེ་སྐད་ཅེས་བྱའོ། ། དེ་ལ་འཁོར་ལོ་ཐ་མའི་དངོས་གཞི་ནི། དོན་དམ་པར་ཚད་གཟུངས་ཅི་ཞིག་ཀྱང༌། རང་རེ་བྱིས་པ་རྣམས་ཀྱི་མཐོང་ཐོས་ཀྱི་ཡུལ་ཙམ་དུའང་། རི་མ་ལ་ཡ་དང༌། བྱང་ཆུབ་ཀྱི་སྙིང་པོ་དང༌། ཡངས་པ་ཅན་སོགས་སུ་དུས་མ་ངེས་པར་གསུངས་པས་འདི་ཉིད་ཁོ་ནའོ་ཞེས་མཐའ་གཅིག་ཏུ་གཞག་དཀའ་མོད་ཀྱི། གོང་སྨོས་རྣམས་དང་དཀོན་མཆོག་བརྩེགས་པ་སོགས་ཚིག་དོན་གཉིས་ཀ་རྒྱས་པའི་ཕྱོགས་རྣམས་ནི་དེར་བཞག་པར་འོས་ཤིང༌། དེའང་ཐེག་པ་ཆེ་ཆུང་གི་མདོ་སྡེ་ཕལ་ཆེ་བ་ཞིག་ལས་དགོངས་པ་ཅན་དུ་གསུངས་པ་མང་པོ་འདི་དག་ཏུ་གསལ་བར་བསྟན་པ་ཤས་ཆེ་སྟེ། དཔེར་ན། འདུལ་བའི་མདོར། དགེ་སློང་དག་གིས་རུང་བའི་ཤ་བཟའ་བར་གནང་བ། རྣམ་གསུམ་དག་པའི་ཤ་འདི་ནི། ། མ་བརྟགས་པ་དང་མ་བསླངས་དང༌། ། མ་བསྐུལ་བ་ནི་ཡོང་མེད་པས། ། དེ་ཕྱིར་ཤ་ནི་མི་ཟའོ། ། ཞེས་སོགས་ཀྱིས་དགོངས་པ་ཅན་དུ་བསྟན་པ་སོགས་མང་བའི་ཕྱིར་རོ། ། ཏ༢ གཉིས་པ་དེ་ཆོས་ཕུང་དུ་རྣམ་པར་གཞག་པ་ནི། ཐམས་ཅད་ཆོས་ཀྱི་ཕུང་པོ་ཞེས་བྱ་སྟེ། ། དེ་ཡང་བརྒྱད་ཁྲི་དང་ནི་བཞི་སྟོང་ངོ༌། ། དེ་ལྟར་ལུང་གི་ཆོས་ཐམས་ཅད་ལ་སྤྱིར་ཆོས་ཀྱི་ཕུང་པོ་ཞེས་བྱ་སྟེ། བརྗོད་བྱ་དོན་དང་རྗོད་བྱེད་ཀྱི་ཚིག་དུ་མ་སྤུངས་པའི་ཕུང་པོར་སྣང་བའི་ཕྱིར་རོ། ། དེའང་མཛོད་ལས་ཆོས་ཕུང་བརྒྱད་ཁྲིར་བཤད་ཅིང་། མཛོད་ཊཱིཀ་ཏུ་སྡེ་པ་ཁ་ཅིག་བརྒྱད་ཁྲི་བཞི་སྟོང་དུ་འདོད་པའང་བཤད་ལ། ཐེག་ཆེན་པ་རྣམས་ཀྱིས་ཕྱི་མ་འདོད་པ་ནི་ཡོངས་སུ་གྲགས་པ་ལྟར་རོ། ། དེ་ལྟར་ཡང༌། ཀུན་མཁྱེན་དྲི་མེད་འོད་ཟེར་གྱིས། གཉེན་པོ་རྣམ་གྲངས་ཀྱི་སྒོ་ནས་དབྱེ་ན། ཆོས་ཀྱི་ཕུང་པོ་བརྒྱད་ཁྲི་བཞི་སྟོང་སྟེ། སྒྲོན་གསལ་ལས། ཐུབ་པ་ཆེན་པོས་ཆོས་ཕུང་པོ། ། བརྒྱད་ཁྲི་བཞི་སྟོང་གསུངས་པ་ལས། ། ཞེས་གསུངས་སོ། ། ཕུང་པོའི་ཚད་ལ་ཉན་ཐོས་འདོད་ཚུལ་གསུམ། ། ཆོས་ཀྱི་ཕུང་པོ་རེ་རེའི་ཚད་ལ་འདོད་ཚུལ་མང་ཡང༌། ཉན་ཐོས་ཀྱི་འདོད་ཚུལ་གཙོ་བོ་གསུམ་སྟེ། སྡེ་པ་ཁ་ཅིག་གིས་ནི། བྱེ་སྨྲས་བཀའ་དང༌། མདོ་སྡེ་པས་བསྟན་བཅོས་སུ་འདོད་པའི་མངོན་པ་སྡེ་བདུན་གྱི་ནང་ཚན། ཆོས་ཀྱི་ཕུང་པོ་ཤཱ་རིའི་བུས། ཞེས་བཤད་པ་དེ་ལ་གཞུང་ཚད་ཤོ་ལོ་ཀ་དྲུག་སྟོང་ཡོད་པས། དེ་ཆོས་ཕུང་གཅིག་གི་ཚད་ཡིན་ཞིང་བརྒྱད་ཁྲིའི་ནང་ནས་དེ་ཙམ་ཞིག་ལུས་ཀྱི་གཞན་ནི་ནུབ་བོ་ཞེས་ཟེར་རོ། ། ཡང་སྡེ་པ་ཁ་ཅིག་གིས་ནི། ཕུང་པོ་ཁམས་དང་སྐྱེ་མཆེད་དང༌། རྟེན་འབྲེལ་ལ་སོགས་པའི་རྣམ་གྲངས་རེ་རེའི་གཏམ་རྫོགས་པ་ནི་ཆོས་ཕུང་རེ་རེའི་ཚད་དུ་འགྱུར་ཞིང་དབྱེ་བའང་དེ་ལྟར་བྱས་པར་འདོད་དོ། ། ཡང་ཁ་ཅིག །ཉོན་མོངས་པ་འདོད་ཆགས། ཞེ་སྡང༌། གཏི་མུག །ང་རྒྱལ། ལོག་ལྟ། ཐེ་ཚོམ་རྣམས་ནང་གསེས་སུ་དབྱེ་བ་དང༌། ཕན་ཚུན་སྦྱོར་བ་སོགས་ཀྱིས་བརྒྱད་ཁྲིར་འགྱུར་ལ། དེ་དག་རེ་རེའི་གཉེན་པོར་ཆོས་ཕུང་རེ་རེ་བསྟན་ཅིང༌། རང་རང་གི་གཉེན་པོའི་བྱ་བ་ཡོངས་སུ་རྫོགས་པར་སྟོན་པའི་གཏམ་ནི་དེའི་ཚད་དུ་འདོད་དོ། ། གཞན་དག་གླང་པོ་རབ་བརྟན་རྒྱབ་ཚད་བཞེད། །(༡༠༤ན) དེ་ལས་གཞན་དག་ཐེག་པ་ཆེན་པོ་དག་གི་དབང་དུ་བྱས་ཏེ། ནཱ་ག་བོདྷི་ལ་སོགས་པ་ནི། ཆོས་གང་ཞིག་གི་མིང་ཚིག་ལྷའི་གོས་ལྟར་སྲབ་པའི་གྲོ་གའམ་ཏཱ་ལར། སྐྲའི་རྩེ་མོའི་ཆ་ཤས་ཀྱིས་མཐའ་རྒྱགས་མེད་པར་བྲིས་པ། གླང་པོ་ཆེ་དར་མའི་རྒྱབ་ནོན་པའི་ཚད་ལ་ཕུང་པོ་གཅིག་ཏུ་བཞེད་ཅིང༌། ཚིག་གསལ་ལས། ཐེག་པ་བླ་ན་མེད་པའི་དབང་དུ་བྱས་ཏེ། དབང་པོའི་གླང་པོ་ཆེ་རབ་བརྟན་གྱིས་བཀུར་བར་འོས་པའི་སྣག་ཚས་ནི་ཆོས་ཀྱི་ཕུང་པོ་གཅིག་འདྲི་བར་ནུས་སོ། །ཞེས་གསུངས་ཏེ། དེ་ལྟར་བྱས་ན། མདོ་གང་དག་ལས། འཕགས་པ་ལྷས་བྱིན་གྱིས་གླང་པོ་ཆེ་ལྔ་སྟོང་གིས་བཀུར་བར་བྱ་བའི་གླེགས་བམ་རྣམས་ཁ་ཏོན་དུ་བརྗོད་པར་བྱེད་དོ་ཞེས་གསུངས་པ་འདི་ཡང་རིགས་པར་འགྱུར་རོ། །ཞེས་བཤད་ཅིང་། མདོ་གང་དག་ལས་ཞེས་པའི་མདོ་ནི་དྲིན་ལན་བསབ་མདོར་གྲགས་པ་དེ་ཉིད་དོ། ། ཉ༢ གཉིས་པ་ཐུན་མོང་མ་ཡིན་པ་གསང་སྔགས་ཀྱི་ཆོས་འཁོར་བཤད་པ་ལ་ལྔ།