Tibetan
ལས། བསླབ་པ་གསུམ་ནི་རབ་སྟོན་ཞིང༌། ཕྱག་རྒྱ་གསུམ་དང་ཡང་དག་ལྡན། ། ཐོག་མ་བར་དང་མཐར་དགེ་བ། ། སངས་རྒྱས་གསུང་དུ་མཁས་པས་རྟོགས། ། ཞེས་གསུངས་པ་ལྟར་རོ། ། འདིར་ཚད་མ་གསུམ་ནི། མངོན་སུམ། རྗེས་དཔག །ལུང་ཚད་མའོ། ། ཡང་ན། རྒྱུད་བླ་མ་ལས། གང་ཞིག་དོན་ལྡན་ཆོས་དང་ཉེར་འབྲེལ་ཞིང༌། ། ཁམས་གསུམ་ཀུན་ནས་ཉོན་མོངས་སྤོང་བྱེད་གསུང༌། ། ཞི་བའི་ཕན་ཡོན་སྟོན་པར་མཛད་པ་གང༌། ། དེ་ནི་དྲང་སྲོང་གསུང་ཡིན་བཟློག་པ་གཞན། ། ཞེས་པ་ལྟར། བརྗོད་བྱ་དོན་ལྡན་གྱི་ཆོས་དང་ཉེ་བར་འབྲེལ་ཞིང༌། བྱེད་ལས་ཁམས་གསུམ་གྱི་ཉོན་མོངས་སྤོང་བའི་ཐབས་སུ་གྱུར་བ། འབྲས་བུ་མྱ་ངན་ལས་འདས་པ་ཞི་བའི་ཕྱོགས་སུ་གཞོལ་ཞིང་འབབ་པའི་ངག །བདག་རྐྱེན་གཙོ་བོར་རྫོགས་པའི་སངས་རྒྱས་ལ་བརྟེན་ནས་བྱུང་བའོ། ། དེའང་ངེས་ཚིག་གི་དབང་དུ་བྱས་ན། སུ་བྷཱ་ཥི་ཏ། ཞེས་ལེགས་པར་གསུངས་པ་སྟེ། རྣམ་བཤད་རིགས་པར། དེ་ལ་ཕྱིན་ཅི་མ་ལོག་པར་ཡང་དག་པར་གསུངས་པའི་ཕྱིར། ལེགས་པར་གསུངས་པའོ། །ཞེས་སོ། ། དེའི་དོན་ཡང་མདོ་ལས། དམ་པའི་ཆོས་ནི། ཐོག་མར་དགེ་བ། བར་དུ་དགེ་བ། ཐ་མར་དགེ་བ། དོན་བཟང་པོ། ཚིག་འབྲུ་བཟང་པོ། མ་འདྲེས་པ། ཡོངས་སུ་རྫོགས་པ། ཡོངས་སུ་དག་པ། ཡོངས་སུ་བྱང་བ། ཞེས་གསུངས་པའི་ཚུལ་གྱིས་ཏེ། དེའང་སློབ་དཔོན་ཐོགས་མེད་ཀྱིས། ཐོག་མར་དགེ་བ་ནི། ཉན་པ་རྣམས་རབ་ཏུ་དགའ་བ་སྐྱེད་པའོ། ། བར་དུ་དགེ་བ་ནི། རབ་ཏུ་སྦྱོར་བ་རྣམས་ཚེགས་ཆུང་ངུས་མཐའ་གཉིས་རྣམ་པར་སྤངས་པ་དབུ་མའི་ལམ་ལ་ཡང་དག་པར་བརྟེན་པའོ། ། ཐ་མར་དགེ་བ་ནི། ཤིན་ཏུ་དྲི་མ་མེད་པ་དང༌། ཤིན་ཏུ་མཐར་ཕྱིན་པའི་ཕྱིར་དང༌། ཐམས་ཅད་(༩༢ན)ལ་འདོད་ཆགས་དང་བྲལ་བ་དང༌། ཤིན་ཏུ་འདོད་ཆགས་བྲལ་བའི་མཐར་གྱུར་བའི་ཕྱིར་རོ། ། དོན་བཟང་པོ་ནི། ཕན་པ་དང་བདེ་བ་དང་ལྡན་པའི་ཕྱིར་རོ། ། ཚིག་འབྲུ་བཟང་པོ་ནི། མིང་གི་ཚོགས་ལ་སོགས་པར་ལེགས་པར་སྦྱར་བ་དང༌། ཚིག་ཏུ་འདོན་པ་ཟུར་ཕྱིན་པ་དང་ལྡན་པའོ། ། མ་འདྲེས་པ་ནི། འདི་ལས་ཕྱི་རོལ་པ་རྣམས་དང་ཐུན་མོང་མ་ཡིན་པའོ། ། ཡོངས་སུ་རྫོགས་པ་ནི། ཚད་མེད་པའི་ཕྱིར་ཐམས་ཅད་ཀྱི་མཆོག་ཏུ་བྱུང་བའོ། ། ཡོངས་སུ་དག་པ་ནི། རང་བཞིན་རྣམ་པར་གྲོལ་བའོ། ། ཡོངས་སུ་བྱང་བ་ནི། རྒྱུད་རྣམ་པར་གྲོལ་བའོ། །ཞེས་སོ། ། པ༢ གཉིས་པ་[དབྱེ་བ་]ལ་བཞི། ཕ༡ བདག་རྐྱེན་གྱི་སྒོ་ནས་དབྱེ་བ། ཕ༢ བརྗོད་བྱའི་སྒོ་ནས་དབྱེ་བ། ཕ༣ རྗོད་བྱེད་ཀྱི་སྒོ་ནས་དབྱེ་བ། ཕ༤ དབང་པོའི་རིམ་པས་དབྱེ་བའོ། ། ཕ༡ དང་པོ་ནི། བདག་རྐྱེན་སངས་རྒྱས་ཞལ་ནས་གསུངས་པ་དང༌། ། སྐུ་གསུང་ཐུགས་བྱིན་བརླབས་དང་རྗེས་གནང་ངོ༌། ། དེ་བཞིན་གཤེགས་པའི་གསུང་རབ་ལ་དབྱེ་སྒོ་མང་ཡང་གསུང་བ་པོ་བདག་པོའི་རྐྱེན་གྱི་སྒོ་ནས་དབྱེ་ན་གསུམ། ཞལ་ནས་གསུངས་པའི་བཀའ་དང༌། བྱིན་གྱིས་བརླབས་པའི་བཀའ་དང༌། རྗེས་སུ་གནང་བའི་བཀའོ། ། དང་པོ་ནི། མདོ་སྡུད་པ་ལྟ་བུ་བཅོམ་ལྡན་འདས་ཉིད་ཀྱིས་དཔལ་གྱི་མགུར་ནས་གསུངས་པའི་ཚུལ་བསྟན་པ་དང༌། གཉིས་པ་ནི། སྐུ་གསུང་ཐུགས་ཀྱི་བྱིན་གྱིས་བརླབས་པ་གསུམ་དུ་སློབ་དཔོན་སེང་གེ་བཟང་པོས་བཤད་དེ། དེ་ཡང་སྐུས་བྱིན་གྱིས་བརླབས་པའི་བཀའ་ནི། རྡོ་རྗེ་སྙིང་པོའི་སྤྱི་བོར་ཕྱག་བཞག་ནས་བྱིན་གྱིས་བརླབས་པས། མདོ་སྡེ་ས་བཅུ་པ་འཆད་པའི་སྤོབས་པ་སྐྱེས་ནས། རྣམ་པར་གྲོལ་བའི་ཟླ་བས་དྲིས་པ་ལྟ་བུའོ། ། གསུང་གིས་བྱིན་གྱིས་བརླབས་པའི་བཀའ་ནི། འཇམ་དཔལ་ལ་མ་སྐྱེས་དགྲའི་འགྱོད་པ་སོལ་ཅིག་ཅེས་བཀའ་སྩལ་པས། འཇམ་དཔལ་གྱིས་མ་སྐྱེས་དགྲའི་འགྱོད་པ་བསལ་བའི་མདོ་བྱུང་བ་ལྟ་བུའོ། ། ཐུགས་ཀྱིས་བྱིན་གྱིས་བརླབས་པའི་བཀའ་ནི། བཅོམ་ལྡན་འདས་ཟབ་མོ་སྣང་བའི་ཏིང་ངེ་འཛིན་ལ་བཞུགས་ནས། ཤཱ་རིའི་(༩༢བ)བུ་དང་སྤྱན་རས་གཟིགས་ལ་བྱིན་གྱིས་བརླབས་པས། ཤེས་རབ་སྙིང་པོ་གསུངས་པ་ལྟ་བུའོ། ། གཞན་ཡང་། ཡོན་ཏན་དང་ཕྲིན་ལས་ལྷུན་གྱིས་གྲུབ་པའི་བྱིན་རླབས་འོད་ཟེར་བཀྱེ་བ་ལས་དེ་བཞིན་གཤེགས་པའི་སྐུ་སྣང་ནས་ཆོས་སྟོན་པ་འབུམ་གྱི་གླེང་གཞི་ལས་བཤད་པ་ལྟ་བུ་དང༌། རི་དང༌། ཤིང་དང༌། བྱ་དང༌། པདྨ་དང༌། རྔ་བོ་ཆེ་ལ་སོགས་པ་ལས་ཆོས་ཀྱི་སྒྲ་དབྱངས་འབྱུང་བ་ལྟ་བུ་དང༌། ཉན་ཐོས་གང་དག་བྱིན་གྱིས་བརླབས་པའི་མཐུ་ལས་ཆོས་སྨྲ་བ་དང༌། སྐྱེས་པ་དང༌། བུད་མེད་དང༌། ཁྱེའུ་དང༌། བུ་མོ་ལ་སོགས་པ་ཕྲིན་ལས་ཆེན་པོའི་མཐུས་ཆོས་སྨྲ་བ་དག་ཀྱང་བཀར་བསྡུ་བ་ནི། སྡུད་པ་ལས། རྒྱལ་བའི་ཉན་ཐོས་པ་དག་ཇི་སྙེད་ཆོས་སྟོན་དང༌། ། འཆད་དང་རིགས་པ་དག་དང་ལྡན་པར་བརྗོད་པ་དང༌། ། མཆོག་འཕགས་བདེ་བ་བྱེད་དང་དེ་ཡི་འབྲས་ཐོབ་པ། ། དེ་དག་ཀུན་ཀྱང་དེ་བཞིན་གཤེགས་པའི་སྐྱེས་བུའི་མཐུ། ། ཅི་ཕྱིར་ཞེ་ན་རྒྱལ་བས་ཆོས་ཚུལ་གང་བསྟན་པ། ། དེ་ལ་མི་མཆོག་སློབ་མར་བཅས་པས་སྔོན་བསླབས་ཤིང༌། ། མངོན་སུམ་བྱས་ནས་བསླབ་པ་ཇི་བཞིན་སྟོན་བྱེད་པ། ། སངས་རྒྱས་མཐུས་བྱེད་རང་གི་སྟོབས་ཀྱི་མཐུས་མ་ཡིན། ། ཅེས་སོ། ། དེས་ན་སྔ་འགྱུར་གཏེར་མའི་ཕྱོགས་སུ་གཏེར་སྟོན་སྤྲུལ་པའི་སྐྱེས་མཆོག་རྣམས་ཀྱིས་ཤོག་སེར་གྱི་བརྡ་དང༌། དག་སྣང་དང༌། དགོངས་པའི་རྩལ་ལས་བྱུང་བ་རྣམས་ཀྱང་ལུང་དང་རིགས་པ་འདིས་ཚད་མར་གྲུབ་པ་ཡིན་ནོ། ། གསུམ་པ་ནི། བཀའི་སྡུད་པ་པོ་རྣམས་ཀྱིས། མགོར་གླེང་གཞི། བར་དུ་མཚམས་སྦྱོར། མཐར་མཐུན་འགྱུར་ལ་སོགས་པ་བཀོད་པ་རྣམས་ཏེ། སྙིང་རྗེ་ཆེན་པོ་པད་དཀར་ལས། ཀུན་དགའ་བོ། དེ་ན་དགེ་སློང་དེ་དག་གིས་ཁྱོད་ལ་དེ་སྐད་དྲིས་པ་དང་འདི་སྐད་ལུང་སྟོན་ཅིག །འདི་སྐད་བདག་གིས་ཐོས་པ་དུས་གཅིག་ན་བཅོམ་ལྡན་འདས་དང་པོ་མངོན་པར་རྫོགས་པར་སངས་རྒྱས་ནས་ཡུལ་མ་ག་དྷཱ་ན་བྱང་ཆུབ་ཀྱི་སྙིང་པོ་ལ་བཞུགས། ཞེས་སོགས་ནས། (༩༣ན) དོན་དང་ཚིག་དང་ཡི་གེ་གང་དང་གང་དག་གིས་རྣམ་གྲངས་གང་དང་གང་གསུངས་པ་དེ་ལ་ཁྱོད་ཀྱིས་གླེང་གཞི་དང་བཅས་པ་དང༌། རྒྱུ་དང་བཅས་པ་དང༌། རྐྱེན་དང་བཅས་པ་དང༌། དོན་བཟང་པོ་དང༌། ཚིག་འབྲུ་བཟང་པོ་རྒྱས་པར་སྟོན་ཅིག །མདོ་སྡེའི་མཇུག་ཏུའང་བཅོམ་ལྡན་འདས་ཀྱིས་དེ་སྐད་ཅེས་བཀའ་སྩལ་ནས་ཐམས་ཅད་དང་ལྡན་པའི་འཁོར་ཡི་རངས་ཏེ། བཅོམ་ལྡན་འདས་ཀྱིས་གསུངས་པ་ལ་མངོན་པར་བསྟོད་དོ་ཞེས་བྲིས་ཤིག །ཀུན་དགའ་བོ་ཆོས་ཀྱི་ཚུལ་འདི་དེ་ལྟར་ཡང་དག་པར་བསྡུ་བར་བྱའོ། །ཞེས་དང༌། ལུང་ལས་ཀྱང༌། གནས་མ་དྲན་ན་གྲོང་ཁྱེར་དྲུག་པོ་གང་རུང་སྨྲོས་ཤིག ། ཅེས་སོགས་རྗེས་སུ་གནང་བར་མཛད་པའོ། ། ཕ༢ གཉིས་པ་[བརྗོད་བྱའི་སྒོ་ནས་དབྱེ་བ་]ནི། བརྗོད་བྱའི་དབང་བྱས་རྗོད་བྱེད་སྡེ་སྣོད་གསུམ། ། དེ་ཡང་ཚུལ་ཁྲིམས་འདུལ་བ་ཏིང་འཛིན་མདོ། ། ཤེས་རབ་བསླབས་པ་མངོན་པས་གཙོ་བོར་སྟོན། ། བཀའ་ཐམས་ཅད་བརྗོད་བྱ་བསླབ་པ་གསུམ་གཙོ་བོར་སྟོན་པའི་དབང་དུ་བྱས་ནས་རྗོད་བྱེད་སྡེ་སྣོད་གསུམ་དུ་དབྱེ་ན། འདུལ་བ། མདོ་སྡེ། མངོན་པ་གསུམ་མོ། ། དེ་ཡང༌། ལྷག་པ་ཚུལ་ཁྲིམས་ཀྱི་བསླབ་པ་བརྗོད་བྱའི་གཙོ་བོར་སྟོན་པའི་རིགས་སུ་གནས་པའི་གསུང་རབ་ནི་འདུལ་བའི་སྡེ་སྣོད། ལྷག་པ་སེམས་ཀྱི་བསླབ་པ་བརྗོད་བྱའི་གཙོ་བོར་སྟོན་པའི་རིགས་སུ་གནས་པའི་གསུང་རབ་ནི་མདོ་སྡེའི་སྡེ་སྣོད། ལྷག་པ་ཤེས་རབ་ཀྱི་བསླབ་པ་བརྗོད་བྱའི་གཙོ་བོར་སྟོན་པའི་རིགས་སུ་གནས་པའི་གསུང་རབ་ནི་མངོན་པའི་སྡེ་སྣོད་ཀྱི་མཚན་ཉིད་དོ། ། དེ་དག་གི་མཚན་གཞི་ནི་རིམ་པ་བཞིན། ལུང་སྡེ་བཞི་སོགས་དང༌། ཤེར་ཕྱིན་འབུམ་པ་སོགས་དང༌། མངོན་པ་སྡེ་བདུན་སོགས་སོ། ། དེ་དག་གི་མིང་དོན་ཡང་། སྤྱིར་སྡེ་སྣོད་ཅེས་བྱ་བ་ལེགས་སྦྱར་སྐད་དུ་པིཊ་ཀ་སྟེ། དེ་གོང་བུ་དང་བྲེའོ་ཆེ་ལ་འཇུག་ཕྱིར། དོན་མང་པོ་འདུས་པས་བྲེའོ་ཆེ་ལྟ་བུ་སྟེ། བྲེའོ་ཆེ་ལ་བྲེའུ་ཆུང་མང་པོ་འདུས་པ་བཞིན་ནོ། ། དེ་ལྟར་ཡང༌། སློབ་དཔོན་ཐོགས་མེད་ཀྱིས། ཅིའི་ཕྱིར་སྡེ་སྣོད་ཅེས་(༩༣བ)བྱ་ཞེ་ན། སྨྲས་པ། བསྡུས་པའི་ཕྱིར་ཏེ་ཞེས་བྱ་བ་ནི། དོན་ཐམས་ཅད་བསྡུས་པའི་ཕྱིར་རོ། །ཞེས་སོགས་གསུངས་སོ། ། ནང་གསེས་འདུལ་བའི་མདོ་སོགས་དགུར་དབྱེ་བས། ། དོན་གྱི་དབང་དུ་བསླབས་པའང་དགུ་རུ་འགྱུར། ། སྡེ་སྣོད་གསུམ་པོ་དེ་ལ་ནང་གསེས་འདུལ་བའི་འདུལ་བ། འདུལ་བའི་མདོ་སྡེ་ལ་སོགས་པ་དགུར་དབྱེ་བ་གསུངས་པས། དོན་ཐོབ་ཀྱི་དབང་དུ་བསླབས་པ་གསུམ་ལའང་ནང་གསེས་ཀྱི་དབྱེ་བས་དགུ་རུ་འགྱུར་བར་བཞེད་པ་ཡིན་ནོ། ། དེའང་འདུལ་བའི་སྡེ་སྣོད་ཚུལ་ཁྲིམས་ཀྱི་བསླབ་པ་གཙོ་བོར་སྟོན་པ་ལས་བརྩམས་ཏེ། འདུལ་བའི་འདུལ་བ་བཅས་པ་དང་རང་བཞིན་གྱིས་རྣམ་པར་གཞག་པ་ཆེ་ལོང་རྣམས་དང༌། འདུལ་བའི་མདོ་སྡེ་ཏིང་ངེ་འཛིན་དང་ཚངས་པར་སྤྱོད་པ་རྣལ་འབྱོར་དུ་བྱ་བའི་རིམ་པ་དང༌། འདུལ་བའི་མངོན་པ་དེ་དག་གི་རབ་ཏུ་དབྱེ་བ་རྒྱ་ཆེར་བཤད་པ་ལ་སོགས་པ་རྣམས་སོ། ། མདོ་སྡེའི་སྡེ་སྣོད་གཙོ་བོར་སེམས་ཀྱི་བསླབ་པ་སྟོན་པ་ལས། མདོ་སྡེའི་འདུལ་བ་བྱང་ཆུབ་སེམས་དཔའི་སྡོམ་པའི་ཚོགས་རྣམ་པར་གཞག་པ་དང༌། མདོ་སྡེའི་མདོ་སྡེ་ཏིང་ངེ་འཛིན་ཟབ་ཅིང་རྒྱ་ཆེ་བ་དང༌། མདོ་སྡེའི་མངོན་པ་ས་དང་ལམ་དང་གཟུངས་དང་ཏིང་ངེ་འཛིན་གྱི་རབ་ཏུ་དབྱེ་བ་ཇི་སྙེད་པ་རྣམས་སོ། ། མངོན་པའི་སྡེ་སྣོད་ཤེས་རབ་ཀྱི་བསླབ་པ་གཙོ་བོར་སྟོན་པ་ལས། མངོན་པའི་འདུལ་བ་ཚེགས་ཆུང་ཞིང་སླ་བའི་ཐབས་ཀྱིས་ཉོན་མོངས་པ་འདུལ་བ་རྣམས་དང༌། མངོན་པའི་མདོ་སྡེ་དེ་ཁོ་ན་ཉིད་ལ་འཇུག་པའི་ཚུལ་རྒྱ་མཚོ་དང༌། མངོན་པའི་མངོན་པ་ཕུང་ཁམས་སྐྱེ་མཆེད་དབང་པོ་རྣམ་ཤེས་སོགས་དང༌། དེ་བཞིན་གཤེགས་པའི་སྙིང་པོའི་ཁམས་རང་བཞིན་གྱིས་རྣམ་པར་དག་པའི་རབ་ཏུ་དབྱེ་བ་ཆ་དང་བཅས་པ་རྣམས་སོ། ། གཞན་ཡང་སོ་བྱང་སྔགས་ལ་སྡེ་སྣོད་དགུ། ། མིང་རྐྱང་དང་ནི་ལྷག་དང་ཟབ་སྒྲས་བརྒྱན། ། བཤད་མ་ཐག་པ་དེར་མ་ཟད་སྡེ་སྣོད་གསུམ་པོ་ལ་དབྱེ་ཚུལ་གཞན་ཡང་ཡོད་དེ། ཐེག་དམན་སོ་ཐར་གྱི་དབང་དུ་བྱས་པ་གསུམ། ཐེག་(༩༤ན)ཆེན་བྱང་སེམས་ཀྱི་དབང་དུ་བྱས་པ་གསུམ། གསང་སྔགས་རྡོ་རྗེ་ཐེག་པའི་དབང་དུ་བྱས་པ་གསུམ་སྟེ་བསྡམས་པས་སྡེ་སྣོད་དགུ་རུ་འགྱུར་ཞིང༌། དེ་དག་ཀྱང་རིམ་པར་འདུལ་མདོ་མངོན་པའི་སྡེ་སྣོད་མིང་རྐྱང་ཙམ་ཕྱིའི་སྡེ་སྣོད་དང༌། ལྷག་པའི་བསླབ་པ་གསུམ་སྟོན་པའི་ཆ་ནས་སྟོན་བྱེད་སྡེ་སྣོད་ལའང་ལྷག་པའི་སྒྲ་དོན་གྱིས་ཐོབ་པ་དང༌། ཟབ་མོ་ནང་གི་དོན་སྟོན་པས་ཟབ་མོའི་འདུལ་བ་སོགས་ཀྱི་སྒྲས་བརྒྱན་པ་ནང་གི་སྡེ་སྣོད་དེ། འདུལ་དང་མདོ་སྡེ་ཕྱིར་ཤེས་པས། ། ཉན་རང་འབྲས་བུ་ཐོབ་བྱེད་དེ། ། ཟབ་མོའི་མདོ་འདུལ་མངོན་པ་རྣམས། ། སྤྱོད་བྱེད་བྱང་ཆུབ་སེམས་དཔར་འགྱུར། ། ཞེས་སོགས་འབྱུང་བས་རྒྱལ་བ་གཉིས་པ་རང་བྱུང་ཞབས་ཀྱི་དོན་གྱི་བཞེད་པ་ཡང་དག་པའོ། ། མདོ་འདུལ་མངོན་པ་རྒྱུ་མཚན་བཞི་བཞིས་བརྗོད། ། མདོ་འདུལ་མངོན་པ་ཞེས་བྱ་བའང་ངེས་ཚིག་གི་དབང་དུ་བྱས་ན། རྒྱུ་མཚན་བཞི་བཞི་ལྡན་པས་དེར་བརྗོད་པ་སྟེ། དེ་ལ་མདོ་སྡེ་ཞེས་བྱ་བ་སཱུ་ཏྲ་སྟེ་དོན་གྱི་སྡོམ་སྨོས་པ་ཡིན་ལ། དེའང་རྣམ་པ་བཞི་སྟེ། མདོ་སྡེ་རྒྱན་ལས། གནས་རྣམས་དང་ནི་མཚན་ཉིད་དང༌། ། ཆོས་དོན་སྨོས་ཕྱིར་མདོ་ཡིན་ནོ། ། ཞེས་འབྱུང་བ་ལྟར། ཡུལ་གང་དུ་གང་ཟག་གང་གི་ཕྱིར་གསུངས་པ་སྨོས་པས་གནས་དང༌། ཀུན་རྫོབ་དང་དོན་དམ་པའི་བདེན་པའི་མཚན་ཉིད་སྨོས་པས་མཚན་ཉིད་དང༌། ཕུང་ཁམས་སྐྱེ་མཆེད་ལ་སོགས་པ་སྨོས་པས་ཆོས་དང༌། དགོངས་པའི་དོན་ཟབ་མོ་དག་སྟོན་པས་དོན་ནོ། ། འདུལ་བ་ཞེས་བྱ་བ་ནི་བི་ན་ཡ་སྟེ། མདོ་རྒྱན་ལས། ལྟུང་དང་འབྱུང་དང་ལྡང་བ་དང༌། ། ངེས་པར་འབྱུང་དང་གང་ཟག་དང༌། ། བཅས་པ་དང་ནི་རབ་དབྱེ་དང༌། ། རྣམ་པར་ངེས་ཕྱིར་འདུལ་བ་ཉིད། ། ཞེས་བཞི་ཚན་གཉིས་ཀྱིས་བཤད་པ་ལས། ལྟུང་བ་ནི། ལྟུང་བ་སྡེ་ལྔ་དང༌། ལྟུང་བ་དེ་དག་གང་ལས་འབྱུང་བ་ནི། མི་ཤེས་པ། བག་མེད་པ། ཉོན་མོངས་པ་མང་བ། མ་གུས་པ་རྣམས་དང༌། ལྟུང་བ་དེ་དག་ལས་ལྡང་བ་ནི་སྤང་བའི་(༩༤བ)སེམས་པ་སོར་ཆུད་པ་དང༌། ལྟུང་བ་ལས་ངེས་པར་འབྱུང་བ་ནི་ཆད་པའི་ལས་ཁས་ལེན་པ་དང༌། རྗེས་ནས་གནང་བ་དང༌། བག་ཡངས་སུ་བྱ་བ་དང༌། རྟེན་དུ་གྱུར་པ་དང༌། ཡང་དག་པ་སོ་སོར་རྟོག་པ་དང༌། ཆོས་ཉིད་ཐོབ་པ་རྣམས་སོ། ། དེ་ལྟར་གནས་བཞི་པོ་དེ་སྟོན་པས་འདུལ་བའི་ཕྱིར་རམ། གང་ལ་བརྟེན་ནས་བསླབ་པ་བཅའ་བ་གང་ཟག །བསླབ་པ་བཅས་པ་དངོས། དེ་རབ་ཏུ་དབྱེ་བ། ལྟུང་བ་དང་ལྟུང་མེད་རྣམ་པར་ངེས་པ་སྟེ་རྣམ་པ་བཞི་སྨོས་པའི་ཕྱིར་རོ། ། མངོན་པ་ཞེས་བྱ་བ་ནི། ཨ་བྷི་སྟེ། མདོ་རྒྱན་ལས། མངོན་དུའི་ཕྱིར་དང་ཡང་དང་ཡང༌། ། ཟིལ་གནོན་རྟོགས་ཕྱིར་མངོན་པའི་ཆོས། ། ཞེས་པ་ལྟར། རྒྱུ་མཚན་བཞིས་དེ་ལྟར་བརྗོད་དེ་མྱ་ངན་ལས་འདས་པ་ལ་མངོན་དུ་ཕྱོགས་པའི་བདེན་པ་ལ་སོགས་པ་སྟོན་པའི་ཕྱིར་དང༌། ཆོས་རེ་རེ་ལའང་གཟུགས་ཅན་དང་གཟུགས་ཅན་མ་ཡིན་པ་སོགས་ཞིབ་མོར་ཕྱེ་ནས་ཡང་ནས་ཡང་དུ་སྟོན་པའི་ཕྱིར་དང༌། ཕས་རྒོལ་ཟིལ་གྱིས་གནོན་པའི་ཕྱིར་དང༌། འདིས་མདོ་སྡེའི་དོན་རྟོགས་པར་འགྱུར་བའི་ཕྱིར་རོ། ། ཐེ་ཚོམ་སྤྱོད་དང་ལྟ་བ་ཕྱིན་ལོག་སྤོང༌། ། དེ་ལྟར་སྡེ་སྣོད་གསུམ་པོ་དེ་ཉིད་དུ་རྣམ་པར་གཞག་པའི་རྒྱུ་མཚན་ཅི་ཞེ་ན། ཐར་པ་སྒྲུབ་པ་རྣམས་ཀྱི་སྤང་བྱའི་གཙོ་བོ། ལམ་གོང་མ་ལ་ཐེ་ཚོམ་ཟ་བ་དང༌། རང་ལམ་ལ་སྤྱོད་པ་ཕྱིན་ཅི་ལོག་པ་དང༌། ལྟ་བ་ཕྱིན་ཅི་ལོག་པ་སྟེ་གསུམ་ཡིན་པའི་ཕྱིར། དེ་དག་གི་གཉེན་པོར་མདོ་འདུལ་མངོན་པའི་སྡེ་སྣོད་གསུམ་གསུངས་པ་སྟེ། སྡེ་སྣོད་དང་པོ་ནི། གང་ཞིག་དོན་གང་ལ་ཐེ་ཚོམ་པ་དེ་ལ་ངེས་པར་བྱ་བའི་ཕྱིར་བཤད་པ་གང་ཞིག ། གཉིས་པ་ནི། ཁ་ན་མ་ཐོ་བ་དང་བཅས་པའི་ཡོངས་སུ་སྤྱད་པ་འདོད་སྲེད་ཀྱི་དབང་གིས་གསོག་འཇོག་བྱེད་པ་སོགས་བཀག་པའི་སྒོ་ནས་འདོད་པ་བསོད་སྙོམས་ལ་རྗེས་སུ་སྦྱོར་བའི་མཐའ་སྤོང་བ་དང༌། ཁ་ན་མ་ཐོ་བ་མེད་པའི་ཡོངས་སུ་སྤྱད་པ་ཚུལ་ཁྲིམས་དག་ཅིང་(༩༥ན)མ་ཞེན་པར་ལྷག་པར་རྙེད་ན། བརྒྱ་སྟོང་རི་བའི་གོས་ལ་སོགས་པའང་རྗེས་སུ་གནང་བའི་སྒོ་ནས་བདག་ཉིད་དུབ་པ་ལ་སྦྱོར་བའི་མཐའ་སྤོང་བ་སྟེ་མཐའ་གཉིས་སྤོང་བའི་སྤྱོད་པ་སྟོན་པའི་ཕྱིར་དང༌། གསུམ་པ་ནི། ཆོས་རྣམས་ཀྱི་རང་དང་སྤྱིའི་མཚན་ཉིད་ཕྱིན་ཅི་མ་ལོག་པར་སྟོན་པའི་ཕྱིར་བཤད་པ་ཡིན་པས་སོ། ། ཡང་ན་ཆོས་དོན་བཤད་སྒྲུབ་འབེལ་གཏམ་ཕྱིར། ། སྡེ་སྣོད་གསུམ་བཞག་གདུལ་བྱའི་དབང་བྱས་ནས། ། ཐེག་པ་ཆེ་ཆུང་སྡེ་སྣོད་གཉིས་སུ་འདུ། ། སྡེ་སྣོད་གསུམ་དུ་ངེས་པའི་རྒྱུ་མཚན་ཡང་། ཆོས་དོན་བཤད་པ་དང༌། ཆོས་དོན་སྒྲུབ་པ་དང༌། ཆོས་དོན་འབེལ་བའི་གཏམ་གཏན་ལ་དབབ་པ་རྣམས་ཀྱི་ཆེད་དུ་རིམ་པ་བཞིན་དུ་གསུངས་པའི་ཕྱིར། སྡེ་སྣོད་གསུམ་དུ་རྣམ་པར་གཞག་སྟེ། དེ་ལ་ཆོས་དང་དོན་ནི། མདོ་སྡེ་རྒྱན་གྱི་འགྲེལ་བཤད་ལས། མིང་དང་ཚིག་དང་ཡི་གེ་རྣམས་ལ་ནི་ཆོས་ཞེས་བྱའོ། །དེས་བརྗོད་པར་བྱ་བ་ཕུང་པོ་དང་ཁམས་དང༌། སྐྱེ་མཆེད་རྣམས་ལ་ནི་དོན་ཞེས་བྱའོ། ། ཡང་ན། ཕུང་པོ་དང་ཁམས་དང་སྐྱེ་མཆེད་ལ་སོགས་པ་ལ་ནི་ཆོས་ཞེས་བྱའོ། །དགོངས་པ་བཞི་དང་ལྡེམ་དགོངས་བཞི་ལ་ནི་དོན་ཞེས་བྱའོ། ། ཡང་ན། མཐོ་རིས་ཐོབ་པར་བྱེད་པའི་རྒྱུ་དགེ་བ་བཅུ་ལ་ནི་ཆོས་ཞེས་བྱའོ། །མྱ་ངན་ལས་འདས་པ་ཐོབ་པར་བྱེད་པའི་རྒྱུ་བྱང་ཆུབ་ཀྱི་ཕྱོགས་ཀྱི་ཆོས་སུམ་ཅུ་རྩ་བདུན་ལ་སོགས་པ་ལ་ནི་དོན་ཞེས་སོགས་བཤད་དོ། ། འདི་དག་ལ་དགོངས་ནས། མདོ་རྒྱན་དུ། སྡེ་སྣོད་དག་ནི་གསུམ་མམ་གཉིས་ཀྱང་རུང༌། ། བསྡུས་པའི་ཕྱིར་ཏེ་རྒྱུ་ནི་དགུར་འདོད་དོ། ། ཞེས་འབྱུང་ངོ༌། ། ཡང་གདུལ་བྱའི་གང་ཟག་གི་དབང་དུ་བྱས་ན། ཐེག་ཆེན་ལ་ཞུགས་པའི་གང་ཟག་དང་ཐེག་པ་ཆུང་ངུར་ཞུགས་པའི་གང་ཟག་གཉིས་སུ་ངེས་པས་བྱང་ཆུབ་སེམས་དཔའི་སྡེ་སྣོད་དང་ཉན་ཐོས་ཀྱི་སྡེ་སྣོད་གཉིས་སུའང་འདུ་བ་ཡིན་ལ། དེའང་བཤད་མ་ཐག་པའི་སྡེ་སྣོད་གསུམ་སོ་སོ་ལ་གཉིས་གཉིས་སུ་དབྱེ་བ་སྟེ། དམན་པ་ལ་མོས་པ་རྣམས་ཀྱི་ངོར་གསུངས་པ་དང༌། རྒྱ་ཆེན་པོ་(༩༥བ)ལ་མོས་པ་རྣམས་ཀྱི་ངོར་གསུངས་པའི་ཁྱད་པར་གྱིས་སོ། ། དེ་ལ་ཐོགས་མེད་ཞབས་ཀྱིས། གསུམ་པོ་དེ་ཉིད་ཐེག་པ་དམན་པ་དང༌། ཐེག་པ་མཆོག་གི་བྱེ་བྲག་གིས་གཉིས་སུ་འགྱུར་ཏེ། ཉན་ཐོས་ཀྱི་སྡེ་སྣོད་དང༌། བྱང་ཆུབ་སེམས་དཔའི་སྡེ་སྣོད་དོ་ཞེས་གསུངས་པ་ལྟར་རོ། ། ཕ༣ གསུམ་པ་[རྗོད་བྱེད་ཀྱི་སྒོ་ནས་དབྱེ་བ་]ནི། རྗོད་བྱེད་ཙམ་གྱི་སྒོ་ནས་རྒྱལ་བའི་བཀའ། ། མདོ་སྡེ་དབྱངས་བསྙད་ལུང་བསྟན་ཚིགས་སུ་བཅད། ། ཆེད་བརྗོད་གླེང་གཞི་རྟོགས་བརྗོད་དེ་ལྟར་བྱུང༌། ། སྐྱེས་རབས་རྒྱས་དང་རྨད་བྱུང་གཏན་ལ་དབབ། ། གསུང་རབ་ཡན་ལག་བཅུ་གཉིས་རྣམས་སུ་དབྱེ། ། རྗོད་བྱེད་དམ་རྗོད་ཚུལ་ཙམ་གྱི་སྒོ་ནས་དབྱེ་ན། རྒྱལ་བའི་བཀའ་རྣམས་གསུང་རབ་ཡན་ལག་བཅུ་གཉིས་སུ་དབྱེ་བར་རིགས་ཏེ། དེ་ལ་དང་པོ་མདོའི་སྡེ་ནི། འདུས་བྱས་འདུས་མ་བྱས་རྣམ་ངེས་སུ། དེ་ལ་ཚིག་རྐྱང་ལྷུག་གིས་མདོ་མདོར་བརྗོད་པ་དེ་ནི་མདོའོ་ཞེས་བཤད་པ་བཞིན་དུ། སྨོས་པའི་ཚུལ་གྱིས་ཚིག་ལྷུག་པས་དོན་མདོར་བསྟན་པའི་གསུང་རབ་ཡིན་ཞིང༌། སྨོས་པའི་ཚུལ་གྱིས་གསུངས་པ་ལ་ཕན་ཡོན་བཅུ་ཡོད་པ་ཀུན་བཏུས་ལས་གསུངས་ཏེ། སྡོམ་ནི། བཞག་དང་བཤད་དང་བཟུང་བར་སླ། །