Tibetan
པ་གསང་བ་བསམ་གྱིས་མི་ཁྱབ་པའི་གནས་སུ་ཤེས་པར་བྱ་སྟེ། གསང་བ་སྙིང་པོ་ལས། སྟོང་གསུམ་ཡུངས་འབྲུར་འཇུག་ཚུལ་གྱིས། ། དབྱིངས་ནས་དཀྱིལ་འཁོར་སྤྱན་དྲངས་མཆོད། ། ཅེས་གསུངས་པ་བཞིན་ནོ། ། སྟོན་པ་ཁྱད་པར་བདུན་དང་ཕྱི་ནང་གསང༌། ། མཚན་དཔེའི་རྒྱན་ལྡན་རྣམ་དག་དཀྱིལ་འཁོར་འཕྲོ། ། ཞིང་ཁམས་དེ་དག་ལ་མངའ་དབང་མཛད་པའི་སྟོན་པ་ལོངས་སྤྱོད་རྫོགས་པའི་སྐུ་དེའང་རང་བཞིན་བདུན་གྱི་ཁྱད་པར་དང་ལྡན་པ་ཡིན་ཏེ། དེ་བཞིན་ཉིད་དུ་ནར་སོན་པའི་རང་བཞིན། ཡོན་ཏན་མ་བཙལ་བར་ལྷུན་གྱིས་གྲུབ་པའི་རང་བཞིན། ཡེ་ཤེས་མཐའ་དབུས་དང་བྲལ་བའི་རང་བཞིན། འབྲས་བུ་ལ་མངའ་མཛད་ཀྱང་རང་གི་ངོ་བོ་བསྟན་དུ་མེད་པའི་རང་བཞིན། མཉམ་པ་ཉིད་མངོན་དུ་མཛད་ཀྱང་སྤྱོད་ཡུལ་དང་བྲལ་བའི་རང་བཞིན། གཅིག་དང་དུ་མ་ལས་གྲོལ་བའི་རང་བཞིན། དུས་གསུམ་འདུ་འབྲལ་མེད་པའི་རང་བཞིན་ཏེ་བདུན་གྱི་བདག་ཉིད་ཆེན་པོར་ལྷུན་གྱིས་གྲུབ་པ་ཉིད་གདུལ་བྱའི་དབང་གིས་སྐུ་གསུང་ཐུགས་ཀྱི་མཚན་མ་སྣ་ཚོགས་པར་སྣང་བའི་རྣམ་འགྱུར་གྱི་ཆ་ལས་མཚན་དང་དཔེ་བྱད་ཀྱི་རྣམ་པར་འབར་བ་སྟེ། དེའང་སྟོན་པའི་ཐུགས་ཡེ་ཤེས་བཞིས་ཕྱེ་བའི་རྩལ་ལས་ཕྱིའི་མཚན་དཔེ། རྩ་འཁོར་ལོ་རྣམ་པར་དག་པའི་ཆ་ལས་ནང་གི་མཚན་དཔེ། ཁམས་བྱང་ཆུབ་སེམས་ཀྱི་རྣམ་པར་དག་པའི་ཆ་ལས་གསང་བའི་མཚན་དཔེ་སྟེ་མཛེས་བྱེད་ཕུལ་དུ་གྱུར་པའི་རྒྱན་དང་རང་བཞིན་གྱིས་ལྡན་ཅིང༌། ཟག་པ་མེད་པའི་ཕུང་པོ་ལྔ་གཤེགས་པ་ཡབ་ལྔ། ཁམས་ལྔ་གཤེགས་མ་ཡུམ་ལྔ། སྤྱན་སྙན་ཤངས་ལྗགས་ཏེ་དབང་པོ་བཞི་ས་སྙིང་སོགས་(༨༣བ)ནང་སེམས་བཞི། གཟུགས་སྒྲ་དྲི་རོ་སྟེ་ཡུལ་བཞི་སྒེག་སོགས་བཞི། མཐོང་ཐོས་སྣོམ་མྱང་བཞི་བྱམས་པ་སོགས་ཕྱི་སེམས་བཞི། དུས་བཞི་མེ་ཏོག་མ་སོགས་བཞི། རེག་པ་རེག་བྱེད་རེག་བྱ་རེག་ཤེས་བཞི་ཁྲོ་བོ་བཞི། རྟག་ཆད་བདག་མཚན་དུ་ལྟ་བ་བཞི་ཁྲོ་མོ་བཞིར་རང་བཞིན་གྱིས་རྣམ་པར་དག་པས་མཐའ་ཡས་པའི་འཁོར་ལོའི་བཀོད་པ་དཀྱིལ་དང་འཁོར་གྱི་ཚུལ་དུ་སྣང་བ་སྟེ། གསང་བ་སྙིང་པོ་ལས། རང་རིག་མཐའ་དབུས་མེད་པའི་དཀྱིལ། ། ཡེ་ཤེས་བཞི་འཕྲོ་འཁོར་ལོའི་ཚུལ། ། ཞེས་དང༌། ཁོག་གཞུང་ལས། འབྲས་བུ་མཐར་ཕྱིན་འོག་མིན་ན། ། བཞུགས་པ་དཀྱིལ་དང་འཁོར་གྱི་ཚུལ། ། ཞེས་བཤད་པ་ལྟར་དང༌། དེ་དག་ཀྱང་སངས་རྒྱས་རང་སྣང་གི་ཡེ་ཤེས་རྣམ་པ་ཐམས་ཅད་པའི་བདག་ཉིད་སྒྱུ་འཕྲུལ་དྲྭ་བའི་རོལ་པ་རྣམ་པ་ཀུན་ཏུ་ཞིང་དང་ཀུན་ཏུ་གདན་ལ་སོགས་པར་སྣང་ཞིང༌། དབང་པོ་རེ་རེས་ཀྱང་དབང་པོ་ཐམས་ཅད་ཀྱི་བྱ་བ་བྱེད་པ་སྟེ་ཡེ་ཤེས་རྩལ་འགག་པ་མེད་པས་ཆོས་ཀྱི་དབྱིངས་མཐའ་ཀླས་པར་ཁྱབ་གདལ་བའི་ཕྱིར་ཏེ། སེང་གེ་རྩལ་རྫོགས་ལས། ཀུན་ཏུ་བཟང་པོའི་ཞལ་ནི་ཕྱོགས་བཅུར་གཟིགས། ། ཀུན་གཟིགས་ཀུན་བཟང་སྐུ་ལ་མདུན་རྒྱབ་མེད། ། ཕྱོགས་བཅུ་གང་བར་སྤྱན་གྱིས་རྣམ་པར་གཟིགས། ། ཞེས་སོ། ། སངས་རྒྱས་ཀྱི་ཡུལ་དེ་ནི་སངས་རྒྱས་ཁོ་ནའི་རྒྱུད་ཀྱིས་བསྡུས་པའི་ཕྱིར་ས་བཅུའི་དབང་ཕྱུག་རྣམས་ཀྱིའང་སྤྱོད་ཡུལ་ལས་འདས་པ་སྟེ། རང་སྣང་གཞིའི་འོད་གསལ་ཆེན་པོའི་སྣང་ཆ་དག་པ་རབ་འབྱམས་ཀྱི་འཁོར་ལོའི་སྣོད་བཅུད་དུ་ཤར་བ་རྨི་ལམ་དག་པ་དང་ཆོས་མཚུངས་པ་ལས་རྡུལ་རྫས་རང་མཚན་དུ་གྲུབ་པ་ཅུང་ཟད་ཀྱང་མེད་དོ། ། སྔ་ཕྱིར་བཤད་པའི་ལོངས་སྐུ་ཆེན་པོ་འདི་གཉིས་འཆར་གཞི་དང་འཆར་ཆའི་དབྱེ་བའང་ཤེས་པར་བྱའོ། ། ཇ༢ གཉིས་པ་སྤྲུལ་པའི་སྐུ་བཤད་པ་ལ་གཉིས། ཉ༡ སྤྱི་དང་། ཉ༢ བྱེ་བྲག་གོ། ། ཉ༡ དང་པོ་ལ་གསུམ། ཏ༡ རང་བཞིན་སྤྲུལ་པ། ཏ༢ འགྲོ་འདུལ་སྤྲུལ་པ། ཏ༣ སྣ་ཚོགས་སྤྲུལ་པའོ། ། ཏ༡ དང་པོ་ནི། (༨༤ན) དེ་ཉིད་ཤེལ་ལ་གཟུགས་བརྙན་འཕོས་པ་ལྟར། ། ས་བཅུ་པ་ལ་རང་བཞིན་སྤྲུལ་སྐུའི་ཞིང༌། ། སྐུ་དང་ཡེ་ཤེས་ཆོས་སོགས་ལྔ་ལྔར་སྟོན། ། དབྱིངས་སྣང་ལོངས་སྐུ་ཆེན་པོའི་སྟོན་པ་དེ་ཉིད་ཇི་ལྟར་དྭངས་ཤེལ་ལ་གཟུགས་བརྙན་འཕོས་པ་ལྟར་ཅུང་ཟད་དག་པའི་གདུལ་བྱ་ས་བཅུའི་དབང་ཕྱུག་རྣམས་ལ་སྣང་བ་ནི་འདི་ལྟར་རང་བཞིན་སྤྲུལ་སྐུའི་ཞིང་ཁམས་དབུས་ན་འོག་མིན་དང༌། ཕྱོགས་བཞིར་རིམ་པ་བཞིན། མངོན་པར་དགའ་བ། དཔལ་དང་ལྡན་པ། པདྨ་བརྩེགས་པ། ལས་རབ་གྲུབ་པ་ལྔར་སྟོན་པ་དེ་བཞིན་གཤེགས་པ་གཟུགས་ཀྱི་རྒྱལ་པོ་ལ་སོགས་པ་ལྔ་པོ་མཚན་དང་དཔེ་བྱད་རྒྱ་མཚོའི་བདག་ཉིད་ཅན་ཞི་བ་དང་ཁྲོ་བོའི་རྣམ་འགྱུར་དཔག་ཏུ་མེད་པའི་སྐུས་ཆོས་རྣམས་འཇལ་ཞིང་སྟོན་པ་དང༌། གདུལ་བྱའི་ཉོན་མོངས་པ་ལྔའི་གཉེན་པོར་ཆེ་བའི་ཞིང་ཁམས་ལྔ་དང༌། སྐུ་ལྔ་དང་ཆོས་ལྔ་ཡེ་ཤེས་ལྔ་ལ་སོགས་པས་བརྗོད་དུ་མེད་ཅིང་བསམ་མི་ཁྱབ་པའི་ཆོས་ཀྱི་འཁོར་ལོ་བསྐོར་བ་དེ་ཉིད་སྟོན་པ་ལོངས་སྤྱོད་རྫོགས་སྐུ་དང་འཁོར་རྒྱུད་གཞན་གྱིས་བསྡུས་པའི་ཕྱིར་ཕྱེད་སྣང་རང་བཞིན་སྤྲུལ་པ་ཞེས་ཉི་ཟླ་ཁ་སྦྱོར་གྱི་རྒྱུད་ཆེན་པོ་ལས་གསལ་བར་བསྟན་ཏོ། ། ཏ༢ གཉིས་པ་[འགྲོ་འདུལ་སྤྲུལ་པ་]ནི། དེ་ཡི་ངང་ལས་འགྲོ་འདུལ་སྤྲུལ་པའི་སྐུ། ། མཆོག་དང་རིག་པའི་སྐྱེས་བུ་ཐུབ་པ་དྲུག ། འགྲོ་དྲུག་གནས་སུ་འདུལ་བཞིའི་ཆོ་འཕྲུལ་སྟོན། ། དེ་ཉིད་ཀྱི་ངང་ལས་འགྲོ་བ་འདུལ་བའི་སྤྲུལ་པའི་སྐུ་ནི་འཇིག་རྟེན་གྱི་ཁམས་མ་ལུས་པར་གདུལ་བྱའི་ཚོགས་ཡོངས་སུ་སྨིན་པར་མཛད་པའི་ཕྱིར་ཚད་མེད་པའི་ཐབས་ལ་མཁས་པས་རྣམ་པར་རོལ་པ་བསམ་གྱིས་མི་ཁྱབ་པའི་ཚུལ་གྱིས། དུས་གཅིག་ཏུ་ཕྱོགས་བཅུའི་འཇིག་རྟེན་གྱི་ཁམས་རབ་འབྱམས་ཐམས་ཅད་དུ་མཛད་པ་བཅུ་གཉིས་ཀྱི་ཚུལ་སྟོན་པ་མཆོག་གི་སྤྲུལ་པའི་སྐུ་སྟེ། དེ་རེ་རེ་ལའང་གདུལ་བྱ་རིགས་དྲུག་སོ་སོའི་དབང་ཤེས་ལ་རང་རང་གི་རིགས་དང་མཐུན་པའི་འདུལ་བྱེད་རིག་པའི་སྐྱེས་བུ་ཐུབ་པ་དྲུག་ཏུ་སྤྲུལ་ནས་འགྲོ་བ་རིགས་དྲུག་(༨༤བ)སོ་སོའི་དོན་མཛད་པ་སྟེ། སྒྱུ་འཕྲུལ་བླ་མ་ལས། ལྷ་ཡི་གནས་ན་བརྒྱ་བྱིན་མགོན། ། ལྷ་མ་ཡིན་ན་ཐགས་བཟང་རིས། ། མི་ལ་བདུད་འདུལ་ཤཱཀྱའི་མགོན། ། ཡི་དྭགས་གནས་ན་ཁ་འབར་ཏེ། ། བྱོལ་སོང་སེང་གེ་ཉིད་དུ་སྨྲ། ། དམྱལ་བ་ལས་ཀྱི་གཤིན་རྗེ་མགོན། ། ཞེས་སོ། ། དེ་ལྟར་གདུལ་བྱ་འདུལ་བྱེད་ཐབས་ཀྱི་ཁྱད་པར་ཡང་། སྐུ་བསོད་ནམས་ཆེན་པོས་འདུལ་བ། ཐུགས་མངོན་སུམ་པས་འདུལ་བ། རྫུ་འཕྲུལ་བསམ་གྱིས་མི་ཁྱབ་པས་འདུལ་བ། གསུང་རིག་པས་འདུལ་བ་སྟེ། འདུལ་བ་རྣམ་པ་བཞིའི་ཆོ་འཕྲུལ་ཆེན་པོ་མཆོག་གི་སྤྲུལ་པའི་སྐུ་རྣམས་ཀྱིས་དངོས་སུ་སྟོན་ལ། གཞན་དག་གིས་ཀྱང་ཤུགས་སམ་རྗེས་མཐུན་པར་བསྟན་ནས་འགྲོ་བ་རྣམས་འདུལ་བར་མཛད་དོ། ། ཏ༣ གསུམ་པ་[སྣ་ཚོགས་སྤྲུལ་པ་]ནི། སྣ་ཚོགས་སྤྲུལ་པ་ནོར་བུ་ལྗོན་ཤིང་གཏེར། ། གྲུ་ཟམ་ཟས་སྨན་བཟོ་སྐྱེ་ངེས་པ་མེད། ། དེ་དག་གི་རྩལ་ལམ་བྱིན་རླབས་ལས་ཤར་བའི་སྣ་ཚོགས་སྤྲུལ་པ་ནི། སེམས་ཅན་རྣམས་ལ་གང་ཕན་པ་ཆེན་པོའི་གཞིར་གྱུར་ཏོ་ཅོག་རྣམས་ཏེ་འདི་ལྟར་རང་བཞིན་དང་འདུ་བྱེད་ལས་བྱུང་བའི་གཟུགས་ཀྱི་སྐུ་དང༌། ཁང་བཟང༌། སྐྱེད་མོས་ཚལ། གནྡྷོ་ལ། མྱ་ངམ་གྱི་ཐང་ལ་གྲོང་ཁྱེར་དུ་སྤྲུལ་པ་དང༌། དཔག་བསམ་གྱི་ཤིང༌། ཡིད་བཞིན་ནོར་བུ། གྲུ་གཟིངས། ཟམ་པ། ཤིང་རྟ། ཟས་གོས། སྨན་སོགས་བེམ་པོའི་དངོས་པོ་དང༌། མུ་གེའི་ཚེ་ཉ་བོ་ཆེ། ནད་ཀྱིས་གདུངས་པ་ལ་སྲོག་ཆགས་དེས་པ། སྲིན་མོའི་གླིང་དུ་ཅང་ཤེས་བྷ་ལ་ཧ། འདམ་ཁྲོད་དུ་གསེར་གྱི་བུང་བ་སོགས་བཟོ་དང་སྐྱེ་བའི་སྤྲུལ་པ་ངེས་པ་མེད་པ་སྣ་ཚོགས་སུ་སྟོན་པ་སྟེ། དཀོན་མཆོག་ཏ་ལ་ལའི་མདོ་ལས་རྒྱ་ཆེར་གསུངས་པ་བཞིན་ནོ། །ཕྱི་མ་འདི་དག་ནི་རྡོ་རྗེ་འཆང་གིས་བཀོད་པའི་ཚངས་ཆེན་གྱི་བསྐལ་པ་ཞེས་དབྱེ་བ་ཕྱེ་བ་ཡིན་ནོ། ། ཉ༢ གཉིས་པ་བྱེ་བྲག་རྫོགས་ཆེན་ཐུན་མོང་མ་ཡིན་པའི་སྤྲུལ་པའི་སྐུ་ཕྱོགས་གཅིག་གི་འཆད་ཚུལ་ལ་གཉིས། ཏ༡ དངོས་དང༌། ཏ༢ བསྟན་པའི་བཙས་གསུམ་བཤད་པའོ། ། ཏ༡ དང་པོ་ནི། ཁྱད་པར་ལོངས་སྐུའི་(༨༥ན)སྣང་ཆར་བསྐལ་པ་འདིར། ། དགའ་ལྡན་བརྩེགས་པར་སྣང་བ་དམ་པ་ནས། ། རྒྱལ་བྱེད་ཚལ་དུ་ཤཱཀྱ་ཐུབ་པའི་བར། ། གནས་རིས་བཅུ་གཉིས་སྟོན་པ་བཅུ་གཉིས་བྱོན། ། སྤྲུལ་པའི་སྐུའི་བྱེ་བྲག་ཁྱད་པར་དུ་དབྱེ་བ། རྫོགས་ཆེན་ཐུན་མོང་མ་ཡིན་པའི་འཆད་ཚུལ་ཕྱོགས་གཅིག་གི་དབང་དུ་བྱས་ན། ལོངས་སྤྱོད་རྫོགས་པའི་སྐུའི་སྣང་ཆ་ལས་བསྐལ་པ་བཟང་པོ་འདི་ཉིད་དུ་ཚེ་ལོ་དཔག་མེད་ནས་བརྒྱ་པ་ཡན་གྱི་བར་ལ་སྤྲུལ་པའི་སྐུ་བཅུ་གཉིས་སུ་བྱོན་ཏེ། དེ་ཡང་བསྐལ་པ་དང་པོར་གནས་དགའ་ལྡན་བརྩེགས་པ་ཞེས་བྱ་བར། སྟོན་པ་ཁྱེའུ་སྣང་བྱེད་དམ་པ་བསམ་གྱིས་མི་ཁྱབ་པ། འཁོར་སངས་རྒྱས་སྟོང་རྩ་གཅིག །སྟོན་པ་ཀུན་གྱི་རྩ་བ་སྒྲ་ཐལ་འགྱུར། སྡུད་པ་པོ་ལྷའི་བུ་དགའ་བྱེད་དབང་ཕྱུག །གྲོགས་ལྷའི་བུ་ཉི་མ་རབ་ཏུ་སྣང་བྱེད། སེམས་ཅན་རྣམས་ཚེ་ལོ་དཔག་ཏུ་མེད་པ་ཐུག་པའི་དུས་ནའོ། ། གནས་འཇིག་རྟེན་མི་མཇེད་དུ། སྟོན་པ་ཁྱེའུ་འོད་མི་འཁྲུགས་པ། འཁོར་མཁའ་འགྲོ་མ་འབུམ་ཕྲག་གཉིས། བསྟན་པ་སྐུ་གསུང་ཐུགས་ཡོན་ཏན་ཕྲིན་ལས་ཀྱི་རྒྱུད། དུས་ཚེ་ལོ་བྱེ་བའི་དུས་ནའོ། ། གནས་དྲོད་ཤེར་འདུས་པ་འོད་ཀྱིས་སྤུངས་པར། སྟོན་པ་དཔལ་འཇིགས་པ་སྐྱོབ་པའི་ཡིད། འཁོར་བྱང་ཆུབ་སེམས་དཔའ་འབུམ་ཕྲག་དྲུག །བསྟན་པ་འཁོར་བ་དོང་སྤྲུགས་དང༌། རྨ་བྱ་འཇིང་བསྣོལ། དཔལ་འབྱུང་བཞི་ཟད་པའི་རྒྱུད་རྣམས་དང༌། དུས་ཚེ་ལོ་འབུམ་པའི་དུས་སུའོ། ། གནས་ཆགས་འབྱུང་མངལ་དུ་སྣང་བར། སྟོན་པ་གཞོན་ནུ་རོལ་པ་རྣམ་པར་རྩེ་བ། འཁོར་གནོད་སྦྱིན་དང་སྲིན་པོ་སྟོང་ཕྲག་གཅིག །བསྟན་པ་སེམས་སྡེ་རྩ་བའི་རྒྱུད་ལྔ་དང༌། ཡན་ལག་གི་རྒྱུད་དྲུག །དུས་ཚེ་ལོ་བརྒྱད་ཁྲིའི་དུས་སུའོ། ། གནས་འཚོ་བྱེད་གཞོན་ནུའི་ལྡུམ་རར། སྟོན་པ་དྲུག་པ་རྡོ་རྗེ་འཆང༌། འཁོར་སངས་རྒྱས་རབས་བདུན་ལ་སོགས་པ། བསྟན་པ་ཕ་རོལ་ཏུ་ཕྱིན་པ་དྲུག་སོགས་དང༌། དུས་ཚེ་ལོ་བདུན་ཁྲིའི་དུས་སུའོ། ། གནས་གསང་ཆེན་རོལ་(༨༥བ)པ་དུར་ཁྲོད་མེ་རི་འབར་བར། སྟོན་པ་གཞོན་ནུ་དཔའ་བོ་སྟོབས་ལྡན། འཁོར་བྱང་ཆུབ་སེམས་དཔའ་སྤྲིན་གྱི་ཤུགས་ཅན་བདུན། ཆོས་ཕ་རྒྱུད་མ་རྒྱུད་ལ་སོགས་པ་རྒྱུད་སྡེ་དུ་མ་དང༌། དུས་ཚེ་ལོ་དྲུག་ཁྲིའི་དུས་སུའོ། ། གནས་སྲིན་ཕུག་རུ་ལུའི་སྒྲ་དང་ལྡན་པར། སྟོན་པ་དྲང་སྲོང་ཁྲོས་པའི་རྒྱལ་པོ། འཁོར་སྲིན་པོ་བྱེ་བ་གཅིག་ལ། ཆོས་རགས་པ་འདུལ་བའི་རྒྱུད་བཅུ་ལ་སོགས་པ། དུས་ཚེ་ལོ་ཁྲིའི་དུས་ནའོ། ། གནས་བྱ་རྒོད་ཕུང་པོའི་རྒྱལ་པོའི་ཁབ་ན། སྟོན་པ་དགྲ་བཅོམ་པ་གསེར་འོད་དམ་པ། འཁོར་འཕགས་པ་ཉན་ཐོས་རྫུ་འཕྲུལ་དང་ལྡན་པ་དཔག་ཏུ་མེད་པ་ལ། དམ་པའི་ཆོས་འདུལ་བ་ཁྲི་ཕྲག་དཔག་ཏུ་མེད་པ། དུས་ཚེ་ལོ་ལྔ་སྟོང་ཐུབ་པའི་དུས་སུའོ། ། གནས་སོག་པོ་གཡུའི་སྨིན་མ་ཅན་བྱང་ཆུབ་ཀྱི་ཤིང་རྣམ་པར་རྒྱས་པའི་དྲུང་དུ། སྟོན་པ་བརྩེ་བས་རོལ་པའི་བློ་གྲོས། འཁོར་ས་བརྒྱད་པའི་བྱང་ཆུབ་སེམས་དཔའ་རྣམས་ལ། ཆོས་ཕྲ་རྒྱུད་བདུན་པ་ལ་སོགས་པ་རྣམས་གསུངས། དུས་ཚེ་ལོ་སྟོང་གི་དུས་སུའོ། ། གནས་བྱ་རྒོད་སྤུངས་པར། སྟོན་པ་འོད་སྲུང་བགྲེས་པོ། འཁོར་ཚེ་དང་ལྡན་པ་བདུན། དམ་པའི་ཆོས་མདོ་སྡེ་དང་ཀྲི་ཡ། ལུང་ཨ་ནུའི་ཆོས་ཁྲི་ཕྲག་བརྒྱད་ལ་སོགས་པ་གསུངས། དུས་ཚེ་ལོ་ལྔ་བརྒྱ་པའི་དུས་སུའོ། ། གནས་རྡོ་རྗེ་གདན་བྱང་ཆུབ་འབྱུང་བའི་ཤིང་དྲུང་དུ། སྟོན་པ་ཡབ་མངོན་རྫོགས་རྒྱལ་པོ། འཁོར་རིགས་གསུམ་མགོན་པོ་ལ། ཆོས་ངེས་པའི་དོན་འབའ་ཞིག་གསུངས། དུས་ཚེ་ལོ་སུམ་བརྒྱ་པའི་དུས་སུའོ། ། གནས་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་བྱིན་གྱི་ཀུན་དགའ་ར་བར། སྟོན་པ་ཤཱཀྱ་ཐུབ་པ། འཁོར་རྣམ་པ་བཞི་ལ། ཆོས་བདེན་པ་བཞིའི་འཁོར་ལོ། སྡུག་བསྔལ་བ། སྟོང་པ། བདག་མེད་པ། ཀུན་འབྱུང༌། རྒྱུ་དང༌། རྐྱེན་གྱི་རྣམ་པ། ལམ། རིག་པ། སྒྲུབ་པ། འགོག་པ། ཞི་བ། གྱ་ནོམ་པ་སྟེ་ལན་བཅུ་གཉིས་སུ་བསྐོར། དུས་ཚེ་ལོ་བརྒྱ་པའི་དུས་སུ་སྟེ། དེ་ལྟར་གནས་རིས་མི་འདྲ་བ་བཅུ་གཉིས་སུ་སྤྲུལ་པའི་(༨༦ན)སྐུ་སྟོན་པ་བཅུ་གཉིས་སུ་བྱོན་པའོ། ། ཕུན་ཚོགས་ལྔ་ལྡན་ཆོས་སྒོ་དྲུག་ཅུའི་བདག ། མཛད་པའི་རྣམ་གྲངས་དགུ་བཅུ་རྩ་དྲུག་ཚོགས། ། དེ་དག་ཀྱང་འགྲོ་བ་རྣམས་ཀྱི་ཕུང་པོ་ལྔ་དག་པར་བྱ་བའི་ཕུན་སུམ་ཚོགས་པ་ལྔ་ལྡན་གྱི་རང་བཞིན་ཅན་ལན་བཅུ་གཉིས་སུ་སྣང་བར་མཛད་པས་བསྡམས་ན་ཆོས་སྒོའི་རྣམ་གྲངས་དྲུག་ཅུ་ཐམ་པའི་བདག་ཉིད་ཅན་དུ་གྱུར་པ་དང༌། མཛད་པ་ཕྲིན་ལས་ཀྱི་གྲངས་ཀྱང༌། ཀུན་མཁྱེན་ཀློང་ཆེན་པས། སྐུའི་མཛད་པ་བཅུ་གཉིས་ནི་གནས་མི་འདྲ་བ་བཅུ་གཉིས་སུ་སྟོན་པ་ཉིད་སྐུ་མདོག་ཕྱག་མཚན་མི་འདྲ་བ་བཅུ་གཉིས་སུ་སྤྲུལ་ནས་བྱོན་པས་གདུལ་བྱ་རིགས་མི་མཐུན་པ་བཅུ་གཉིས་ཀྱི་ཚོགས་མི་འདྲ་བ་དཔག་ཏུ་མེད་པའི་དོན་མཛད་པ་མི་འདྲ་བ་བཅུ་གཉིས་མཛད་པའི་མཛད་པ་ཞེས་སྐུའི་གཟི་མདངས་ལ་བརྟེན་ནས་སྐུའི་བསྟན་པ་འཕེལ་བའི་དོན་དུ་བྱུང་བའོ། །སྐུ་དེ་དག་གི་དུས་སུ་གསུང་ཆོས་ཀྱི་འཁོར་ལོ་མི་འདྲ་བ་བཅུ་གཉིས་གསུངས་པས་འགྲོ་བའི་ངག་གི་བཅིངས་པ་མི་འདྲ་བ་བཅུ་གཉིས་ལས་གྲོལ་བར་མཛད་པའི་མཛད་པ་ཞེས་གསུང་གི་བསྟན་པ་འཕེལ་བའི་དོན་དུ་བྱུང་བའོ། །གསུང་དེ་ཙམ་ཞིག་གི་ཚེ་ན་ཐུགས་ཀྱི་དགོངས་པ་མི་འདྲ་བ་བཅུ་གཉིས་ཀྱིས་འགྲོ་བའི་རིགས་མི་འདྲ་བ་རྣམས་ཀྱི་རྟོག་པ་བཅུ་གཉིས་ལས་གྲོལ་བར་མཛད་པའི་མཛད་པ་ཞེས་ཐུགས་ཀྱི་བསྟན་པ་འཕེལ་བའི་དོན་དུ་བྱུང་བ་སྟེ། དེ་ལྟར་བསྟན་པ་ངེས་པའི་སྤྲུལ་པའི་སྐུ་གཅིག་ལ་ཆོས་ཀྱི་རྣམ་གྲངས་དགུ་བཅུ་རྩ་དྲུག་ཚོགས་དགོས་ཏེ། དེ་དག་དང་ལྡན་པ་ནི་བསྟན་པའི་བདག་པོ་ཞེས་བྱའོ། །གལ་ཏེ་མི་ལྡན་ན་སངས་རྒྱས་འཇིག་རྟེན་དུ་བྱོན་པ་ཁོལ་བུའི་བསྟན་པ་ཞེས་བྱ་སྟེ། དེ་དག་ཀྱང་སྔོན་གྱི་སེམས་བསྐྱེད་པ་ལས་བྱུང་བའོ། ། ཞེས་ཁྱད་པར་དུ་མ་དང་བཅས་ཏེ་གསུངས་སོ། ། ཏ༢ གཉིས་པ་[བསྟན་པའི་བཙས་གསུམ་བཤད་པ་]ནི། དེ་དང་དུས་མཚུངས་སྐུ་གསུམ་བསྟན་པའི་བཙས། ། རང་བྱུང་རྡོ་རྗེ་གླེགས་བམ་སྐུ་གཟུགས་ནི། ། འགྲོ་བ་གང་གིས་མཐོང་ཐོས་རེག་པས་ཀྱང༌། ། གདོས་བཅས་རང་སར་གྲོལ་བའི་ཕྲིན་ལས་ཅན། །(༨༦བ) གང་འདུལ་གནས་འཕར་ད་ལྟ་ཞིང་འདིར་བཞུགས། ། སྤྲུལ་པ་དེ་དག་དང་དུས་མཚུངས་པར་སྐུ་གསུམ་གྱི་བསྟན་པའི་བཙས་ཆེན་པོ་སྐུ་གསུང་ཐུགས་ཀྱི་སྤྲུལ་པར་རང་བྱུང་དུ་སྣང་བས་འགྲོ་བའི་དོན་མཛད་པ་སྟེ། ཛམྦུའི་གླིང་འདིར་ཆོས་སྐུའི་བསྟན་པ་དངོས་རྫོགས་པ་ཆེན་པའི་བྱིན་རླབས་ལས་རང་ཤར་བ་རིན་པོ་ཆེ་བརྒྱ་རྩ་ལས་འཁྲུངས་པའི་རྡོ་རྗེ་ཕྱག་གང་བ་དང༌། ལོངས་སྐུ་ཡོངས་སུ་རྫོགས་པར་སྤྱོད་པའི་བསྟན་པ་དངོས་རང་བྱུང་བསྟན་པ་བུ་གཅིག་པའི་བྱིན་རླབས་ལས་རང་ཤར་བའི་རིན་པོ་ཆེ་བརྒྱ་རྩ་གཅིག་ལས་འཁྲུངས་པའི་གླེགས་བམ་སོར་བཞི་པ་ཆོས་ཉིད་ཀྱི་རང་སྒྲ་སྒྲོགས་པ་དང༌། སྤྲུལ་པའི་སྐུ་སྟོན་པ་བཅུ་གཉིས་ཀྱི་བྱིན་རླབས་ལས་རང་ཤར་བ་རིན་པོ་ཆེ་བརྒྱ་རྩ་གཅིག་ལས་རང་བྱུང་བའི་སྐུ་གཟུགས་འགྲོ་བའི་ལུས་བོངས་དང་མཉམ་པ་སྟེ། དེ་གསུམ་ནི་འདུས་མ་བྱས་པས་སྐྱེ་འཇིག་མེད་ཅིང་བྱིན་རླབས་ལས་རང་བྱུང་དུ་ཤར་བས་རྫུ་འཕྲུལ་དང་ཡོན་ཏན་དཔག་ཏུ་མེད་པ་འཇིག་རྟེན་གྱི་ཁམས་སུ་བྱོན་དང་འབྱོན་འགྱུར་གྱི་སངས་རྒྱས་སྤྲུལ་པའི་སྐུ་རྣམས་ཀྱི་སྐུ་གསུང་ཐུགས་ཀྱི་བསྟན་པ་འཕེལ་བར་བྱེད་པའི་རྟེན་ཡིན་ལ་མཐོང་ཐོས་རེག་པས་གདོས་བཅས་རང་དེངས་སུ་འགྲོ་བའི་ཕྲིན་ལས་ཀྱི་བདག་ཉིད་ཅན་ནོ། ། དེ་ལྟར་བཙས་གསུམ་པོ་དེ་འོད་གསལ་རྡོ་རྗེ་རྩེ་མོས་གང་ལ་འདུལ་བའི་གདུལ་བྱ་སྣང་བའི་གནས་དེར་འཕར་བས་ད་ལྟ་ཞིང་འདིར་བཞུགས་ཤིང་མ་འོངས་པར་ཞིང་གཞན་དུ་འཕར་བ་ན་ཞིང་འདིར་རྫོགས་པ་ཆེན་པོའི་བསྟན་པའང་མི་འབྱུང་ངོ༌། ། དེའང་ཞིང་འདི་ཐོག་མར་ཆགས་པའི་ཚེ་བསྟན་པའི་བཙས་གསུམ་བྱང་ཕྱོགས་གཡོ་བ་ལྡན་ཅེས་བྱ་བའི་ཞིང་ན་བཞུགས། ཞིང་འདིར་སྟོན་པ་ཁྱེའུ་སྣང་བ་དམ་པ་བྱོན་པའི་ཚེ་བཙས་གསུམ་ཞིང་འདིར་འཕར་ཏེ་སྐུ་གསུང་ཐུགས་ཀྱི་བསྟན་པས་འདུལ་བའི་དུས་ཀྱི་དབང་གིས་གནས་སོ་སོར་བཞུགས་ཤིང༌། སྐུའི་བསྟན་པའི་དུས་སུ། རྡོ་རྗེ་ནི་ཨོ་རྒྱན་གྱི་ཡུལ་རྒྱ་མཚོའི་གླིང་ན་བཞུགས་ཤིང་འོད་དང་སྒྲ་དང༌། དགེ་སློང་རྫུ་འཕྲུལ་(༨༧ན)དང་ལྡན་པའི་སྤྲུལ་པ་གྲངས་མེད་པ་འབྱུང་བར་བྱེད། གསུང་གིས་བསྟན་པའི་དུས་སུ། རི་མ་ལ་ཡ་ལག་ན་རྡོ་རྗེའི་གནས་སུ་གནོད་སྦྱིན་གྱི་རྒྱལ་པོ་རྣམས་ཀྱིས་ཕྱག་བྱེད་དོ། ། ཐུགས་ཀྱི་བསྟན་པའི་དུས་སུ། རྡོ་རྗེ་གདན་གྱི་སྟེང་གི་ནམ་མཁའ་ལ་གནས་སོ། ། གླེགས་བམ་ནི། སྐུའི་བསྟན་པའི་དུས་སུ། རྡོ་རྗེ་གདན་གྱི་སྟེང་དུ་དཔག་ཚད་ལྔ་བརྒྱ་འཕགས་པའི་ནམ་མཁའ་ལ་ཌཱ་ཀི་མ་རྣམས་ཀྱིས་བཟུང་ནས་གནས་སོ། ། གསུང་གི་བསྟན་པའི་དུས་སུ། སྐུ་གཟུགས་རྡོ་རྗེ་ཉིད་དང་ལྷན་ཅིག་ཏུ་གནས་སོ། ། ཐུགས་ཀྱི་བསྟན་པའི་དུས་སུ། རབ་ཏུ་ཁྲོས་པ་དྲང་སྲོང་གི་ཕུག་པར་གནས་སོ། ། སྐུ་གཟུགས་ནི། སྐུའི་བསྟན་པའི་དུས་སུ། འདི་ཉིད་ཀྱི་བྱིན་རླབས་ཀྱིས་སྐུ་དངོས་དང༌། སྤྲུལ་པ་དང༌། ཡང་སྤྲུལ་རྣམས་དང་ལྷན་ཅིག་ཏུ་གནས་ཤིང༌། དེ་དག་གིས་ཞལ་གྱི་དཀྱིལ་འཁོར་ལ་དངོས་སུ་སྤྱོད་པའོ། ། གསུང་གི་བསྟན་པའི་དུས་སུ། གཅིག་ཏུ་མ་ངེས་པར་འཛམ་གླིང་ཀུན་ཏུ་འཁོར་བར་གནས་ཏེ། ལྷ་དང་མིའི་འདུ་བ་ཁྱད་པར་ཅན་རྣམས་ཀུན་གྱིས་མཆོད་པའི་གནས་སུ་འགྱུར་ཞིང༌། སྐབས་སུ་བསྟན་པ་ལ་གནོད་པ་བྱུང་བའི་ཚེ་སྐུ་ལས་འོད་འབྱུང༌། ཞལ་ནས་ཧཱུྃ་འབྱུང༌། སྤྱན་ནས་ཡེ་ཤེས་ཀྱི་མེ་འབྱུང་ངོ༌། ། ཐུགས་ཀྱིས་འདུལ་བའི་བསྟན་པ་ལ། སུམ་ཅུ་རྩ་གསུམ་པའི་ལྷ་རྣམས་ཀྱི་གཞལ་མེད་ཁང་ལག་ན་རྡོ་རྗེའི་ཁང་བརྩེགས་ཀྱི་ཡང་ཐོག་ན་མཉམ་པའི་རང་བཞིན་དཔལ་ཆེན་པོ་ཞེས་བྱ་བས་ཕྱག་མཛད་ཅིང་ཆོ་འཕྲུལ་རྒྱ་མཚོའི་བདག་ཉིད་ཅན་དུ་བཞུགས་སོ། ། དེའང་ཚེ་ལོ་དཔག་མེད་ནས་སྟོང་