Tibetan
ཐུབ་པའི་དུས་ཕན་ཆད་ལ་སྐུས་འདུལ་བའི་བསྟན་པ་སྟེ། ལོ་ལྔ་བརྒྱ་ལྔ་སྟོང་ཕྲག་གསུམ་ཡོད་དོ། ། དེ་ནས་ཚེ་ལོ་བདུན་ཅུ་པའི་བར་དུ་གསུང་གིས་འདུལ་བའི་བསྟན་པ་སྟེ། ལོ་ལྔ་བརྒྱ་ལྔ་སྟོང་ཕྲག་གཅིག་གོ། །དེ་ནས་ཚེ་ལོ་བཅུ་པའི་བར་དུ་ཐུགས་ཀྱིས་འདུལ་བའི་བསྟན་པ་སྟེ། ལོ་ལྔ་བརྒྱ་ལྔ་སྟོང་ཕྲག་གཅིག་གོ། ། ཚེ་ལོ་དེ་དག་ནི་བསྟན་པ་དེ་དག་གིས་འདུལ་བའི་ལོ་གྲངས་ཏེ། དུས་(༨༧བ)སྤྱིའི་ཡུན་ཚད་མ་ཡིན་ནོ། །འདིར་ཚེ་ལོ་བཅུ་པ་འདས་ནས་བཙས་གསུམ་ལྷོ་ཕྱོགས་མཛེས་ལྡན་བཀོད་པ། བྱང་ཕྱོགས་ལངས་པ་སྐྱོབ། ནུབ་ཕྱོགས་གཙུག་ཕུད་དབྱངས་རྣམས་སུ་རིམ་པར་འཕར། དེ་དག་ཐམས་ཅད་ལའང་འབྱུང་བའི་དུས་བདུན། མི་འབྱུང་བའི་དུས་བདུན་ཏེ་བཅུ་བཞི་རེས་བསྟན་པ་དར་ནུབ་ཏུ་འགྱུར་རོ། ། དེ་ལ་དུས་བདུན་ནི། སྙིང་པོ་ལྡན་དང་རྫོགས་ལྡན་དང༌། ། རྫོགས་ལྡན་ཆེ་དང་ཉིས་ལྡན་དང༌། ། སུམ་ལྡན་རྩོད་ལྡན་རྩོད་ལྡན་ཆེ། ། ཞེས་སོ། ། དེ་དག་གི་བར་བར་དུ་ནུབ་པ་ནི་མི་འབྱུང་བའི་དུས་ཏེ་མུན་པའི་བསྐལ་པར་གསུངས། ཞིང་དེ་དག་ཏུ་མཛད་པ་རྫོགས་ནས་རྡོ་རྗེ་འཆང་གིས་བཀོད་པའི་ཚངས་ཆེན་གྱིས་བསྐལ་པར་ཡོད་དོ་ཅོག་གདོད་མའི་སར་གྲོལ་ཏེ་སྣོད་བཅུད་སྟོངས་ནས་བཙས་གསུམ་པོའང་ཆོས་ཉིད་ཀྱི་ངང་དུ་རང་ཡལ་ཏེ་མི་སྣང་ངོ༌། །སླར་གདུལ་བྱ་དབྱིངས་ནས་སྣང་བ་དང་སྤྲུལ་པས་ཚངས་ཆེན་བཀོད་དེ་བཙས་གསུམ་པོའང་རང་ཤར་བ་སོགས་རྟག་པ་རྒྱུན་གྱི་འཁོར་ལོར་འགྲོ་བའི་དོན་མཛད་པ་ཉིད་དོ། ། གཞན་ཡང་། སྐུ་གསུམ་རེ་རེ་ཞིང་སྐུ་གསུང་ཐུགས་ལ་ཕྱི་ནང་གསུམ་རེ། དེ་རེ་རེ་ལ་བཞི་བཞིར་དབྱེ་བའི་མཛད་པ་སུམ་ཅུ་རྩ་དྲུག་རེ། བསྡམས་པས་མཛད་པ་བརྒྱ་རྩ་བརྒྱད་དུ་སྣང་བ་དང༌། ལོངས་སྐུ་རྣམ་པར་སྣང་མཛད་ཀྱི་ཕྱག་མཐིལ་པདྨའི་ཟེའུ་འབྲུར་ཞིང་ཁམས་ཚད་མེད་པ་རྣམས་ཉི་ཤུ་རྩ་ལྔ་རེའི་ཚུལ་དུ་བརྩེགས་མར་ཡོད་པའི་བཅུ་གསུམ་པ་ཐུགས་ཀའི་ཐད་དུ་མི་མཇེད་འཇིག་རྟེན་འདི་ཡོད་པས་རང་བཞིན་རྫོགས་པ་ཆེན་པོའི་བསྟན་པ་འབྱུང་བའི་བབས་སུ་གྱུར་པ་སོགས་ཆགས་གནས་འཇིག་སྟོང་གི་ཁྱད་པར་དུ་མ་དང༌། འཇིག་རྟེན་ཆགས་པའི་རྗེས་སུ་རིན་པོ་ཆེ་པདྨའི་ལྗོན་ཤིང་ལ་ཆུ་རླུང་གི་ལྷ་མོ་སོགས་འཇིག་རྟེན་སྲིད་པའི་སེམས་ཅན་རྣམས་ཀྱི་ཡིད་ཞུགས་པ་ལས་པདྨ་གསུང་སྒྲ་ཕྱོགས་བཅུར་འཕྲོས་པས་བསྐུལ་ཏེ། སྔོན་གྱི་གཟུགས་མེད་ཡིན་རུང་རྣམ་ཤེས་གཟུང་བའི་ཆར་གནས་པའི་ས་བོན་བག་ལ་ཉལ་མངོན་གྱུར་དུ་སད་དེ་རྣམ་པར་ཤེས་པ་ཏིང་ངེ་འཛིན་གྱིས་སྤྲུལ་(༨༨ན)པའི་ལུས་སུ་གྲུབ་ནས་ཡོད་མིན་མེད་མིན་སོགས་ཁམས་གསུམ་རིམ་པར་མཆེད་པས། ད་ལྟའང་དབྱིངས་ཀྱི་རིག་པ་ལུང་མ་བསྟན་གཡོས་པས་སེམས་ཅན་གློ་བུར་བའི་འཁྲུལ་པ་འབྱུང་བ་ཡོད་པ་སོགས་ཐུན་མོང་མ་ཡིན་པའི་བཤད་ཚུལ་རྒྱ་ཆེ་བ་རྣམས་ནི་ཀུན་མཁྱེན་ཆོས་རྗེའི་གསུང་རབ་ལས་རྟོགས་པར་བྱ་བ་ཁོ་ནའོ། ། ཆ༤ བཞི་པ་ཞར་བྱུང་འཕྲོས་སྲོལ་གཞན་གྱི་གླེང་བསླང་བ་ནི། མདོ་དང་སྒྱུ་འཕྲུལ་ལ་སོགས་བཤད་སྲོལ་ནི། ། མཐའ་ཡས་ཕྱིར་ན་སོ་སོའི་གཞུང་དུ་རྟོགས། ། འདིར་སྐུ་དང་ཞིང་ཁམས་ཀྱི་རྣམ་གཞག་མན་ངག་རྫོགས་པ་ཆེན་པོ་ཨ་ཏི་ཡོ་གའི་རྒྱུད་ཀྱི་རྩ་བ་སྒྲ་ཐལ་འགྱུར། ཨ་ཏི་བཀོད་པ་ཆེན་པོ། དཔག་བསམ་ལྗོན་ཤིང་རྒྱས་པའི་རྒྱུད་ཆེན་པོ་སོགས་ཀྱི་དགོངས་དོན་ཞང་མཁས་པ་ཉི་འབུམ་དང་ཀུན་བཟང་དྲི་མེད་འོད་ཟེར་གྱིས་ཞིབ་མོར་བཀྲལ་བའི་རྗེས་སུ་སྔ་འགྱུར་གྱི་མཁས་པ་ཕྱི་མ་ཐམས་ཅད་འབྲངས་ཏེ་བཤད་པ་ལྟར་སྨྲས་པ་ཡིན་གྱི། གཞན་དུ་མདོའི་ལུང་ཆེན་པོ་རྣམས་དང་རྡོ་རྗེ་སེམས་དཔའ་སྒྱུ་འཕྲུལ་དྲྭ་བ། འཇིག་རྟེན་ལས་འདས་པའི་སྒྲུབ་སྡེ་ལྔ་ལ་སོགས་པའི་བཤད་སྲོལ་འཛིན་པའི་མཁས་པ་ཇི་སྙེད་ཅིག་བྱོན་པ་ཐམས་ཅད་ཀྱི་བཞེད་ཚུལ་ཅུང་ཟད་མི་འདྲ་བ་མཐའ་ཡས་པའི་ཕྱིར་ན་ཕྱོགས་གཅིག་ཏུ་བསྡུ་མི་ནུས་པས་ཤེས་པར་འདོད་ན་སོ་སོའི་གཞུང་འགྲེལ་རྣམས་ལས་རྟོགས་པར་བྱའོ། ། འོད་གསལ་རྡོ་རྗེ་རྩེ་མོའི་ལུགས་ཀྱི་སྐུ་དང་ཞིང་ཁམས་ཁྱད་པར་དུ་དབྱེ་བའི་སྐབས་སོ། ། འོད་གསལ་རྡོ་རྗེ་རྩེ་མོའི་ལུགས་ཀྱི་སྐུ་དང་ཞིང་ཁམས་ཁྱད་པར་དུ་དབྱེ་བ་སྐབས་བཞི་པའི་འགྲེལ་པའོ།། ཐེག་པའི་སྒོ་ཀུན་ལས་བཏུས་པ་གསུང་རབ་རིན་པོ་ཆེའི་མཛོད་བསླབ་པ་གསུམ་ལེགས་པར་སྟོན་པའི་བསྟན་བཅོས་ཤེས་བྱ་ཀུན་ཁྱབ་ཅེས་བྱ་བ་ལས། འདུལ་བྱེད་སྟོན་པ་བྱོན་ཚུལ་རིམ་པར་ཕྱེ་བ་སྟེ། གནས་གཉིས་པའི་འགྲེལ་པ་གྲུབ་བོ།། །། གནས་གསུམ་པ། བསྟན་པ་དང་དམ་པའི་ཆོས་ཀྱི་རིམ་པར་ཕྱེ་བ། དང་པོ། བསྟན་པ་དམ་པའི་ཆོས་ངོས་བཟུང་བའི་སྐབས། དེ་ལྟར་འདུལ་བྱེད་འཇིག་རྟེན་གྱི་སྒྲོན་མེ་ཇི་ལྟར་སྣང་བའི་ཚུལ་ལེགས་པར་བཤད་ནས། ག༣ སྟོན་པ་དེའི་བསྟན་པ་དམ་པའི་ཆོས་ཀྱི་རྣམ་པར་གཞག་པ་རིམ་པར་ཕྱེ་བ་སྟེ། གནས་གསུམ་པ་ལ་(༨༨བ)སྐབས་བཞི། ཅ༡ དམ་པའི་ཆོས་ངོས་བཟུང་བ། ཅ༢ ལུང་གི་ཆོས་འཁོར་བྱེ་བྲག་ཏུ་དབྱེ་བ། ཅ༣ བཀའི་བསྡུ་བ་འབྱུང་ཚུལ། ཅ༤ སྔ་འགྱུར་རྙིང་མའི་བབས་ལུགས་བྱེ་བྲག་ཏུ་བཤད་པའོ། ། ཅ༡ དང་པོ་ལ་གཉིས། ཆ༡ བཤད་བྱ་ངོས་བཟུང་བས་མཚམས་སྦྱར། ཆ༢ དེའི་དོན་རྒྱས་པར་བཤད་པའོ།། ཆ༡ དང་པོ་ནི། ལྷ་མིའི་བླ་མས་གདུལ་བྱ་འདུལ་བ་ཡི། ། ཆོ་འཕྲུལ་གཙོ་བོ་ཆོས་ཀྱི་འཁོར་ལོ་སྟེ། ། སངས་རྒྱས་བཅོམ་ལྡན་འདས་ལྷ་དང་མི་ལ་སོགས་པ་འགྲོ་བ་ཐམས་ཅད་ཀྱི་བླ་མར་གྱུར་པ་དེས་འདུལ་བྱ་འདུལ་ཐབས་ཀྱི་ཆོ་འཕྲུལ་བསམ་གྱིས་མི་ཁྱབ་པ་བསྟན་པ་ཐམས་ཅད་འདུལ་བ་རྣམ་པ་བཞིའི་ཁོངས་སུ་འདུ་ཞིང༌། དེ་ཐམས་ཅད་ཀྱི་ནང་ནས་མཆོག་གམ་གཙོ་བོར་གྱུར་པ་ནི་དམ་པའི་ཆོས་ཀྱི་འཁོར་ལོ་བསྐོར་བ་ཉིད་ཡིན་པས་རྒྱས་པར་བཤད་པར་བྱ། སྟེ་ཞེས་ལྷག་བཅས་ཀྱི་སྒྲས་མཚམས་སྦྱར་བའོ། ། ཆ༢ གཉིས་པ་[དེའི་དོན་རྒྱས་པར་བཤད་པ་]ལ་གསུམ། ཇ༡ ངོ་བོ། ཇ༢ ངེས་ཚིག ། ཇ༣ དབྱེ་བའོ། ། ཇ༡ དང་པོ་ནི། ངོ་བོ་སྒྲིབ་པའི་གཉེན་པོ་རྣམ་དཀར་ཕྱོགས། ། དམ་པའི་ཆོས་ཀྱི་ངོ་བོ་ནི། ཇི་སྐད་དུ། སྡུག་བསྔལ་དག་ནི་ཐམས་ཅད་དང༌། ། སྒྲིབ་ཀུན་སེལ་བྱེད་དམ་པའི་ཆོས། ། ཞེས་པ་ལྟར། གང་ལ་ཚུལ་བཞིན་དམིགས་ན་ལུས་ཅན་རྣམས་ཀྱི་སྒྲིབ་པ་ཟད་པའི་གཉེན་པོ་རྣམ་དཀར་ཕྱོགས་སུ་གྱུར་པའི་ཡོན་ཏན་ཞིག་སྟེ། མཚན་གཞི་ནི། འགོག་ལམ་གྱིས་བསྡུས་པའི་ཟག་མེད་ཀྱི་ཆོས་རྣམས་དང་ཚད་ལྡན་གྱི་བཀའ་བསྟན་བཅོས་རྣམས་ཡིན་ཞིང༌། དེའང་སྔ་མ་ནི་བརྗོད་བྱ་དང༌། ཕྱི་མ་ནི་རྗོད་བྱེད་ཀྱི་ཚུལ་གྱིས་སོ། ། ཇ༢ གཉིས་པ་[ངེས་ཚིག་]ནི། ངེས་ཚིག་ངྷརྨའི་སྒྲ་ལས་དོན་བཅུ་འཛིན། ། ཆོས་ཞེས་བྱ་བའི་ངེས་ཚིག་ནི་ལེགས་སྦྱར་གྱི་སྐད་དུ། ཌུདྷྲྀཉ྄་འཛིན་པའི་བྱིངས་ལས་བསྒྲུབས་པའི་ངྷརྨ་ཞེས་བྱ་བའི་སྒྲ་ལས་དོན་བཅུ་འཛིན་པའམ། དེ་དག་ལ་འཇུག་སྟེ། འདོད་འཇོ་ལས། ཐམས་ཅད་འཛིན་པས་ན་ངྷརྨ་སྟེ་ཆོས་སོ། །ཞེས་བཤད་དོ། ། དོན་བཅུ་ནི། རྣམ་བཤད་རིགས་པ་ལས། ཆོས་ནི་ཤེས་བྱ་ལམ་དང་ནི། ། (༨༩ན)མྱ་ངན་འདས་དང་ཡིད་ཀྱི་ཡུལ། ། བསོད་ནམས་ཚེ་དང་གསུང་རབ་དང༌། ། འབྱུང་འགྱུར་ངེས་དང་ཆོས་ལུགས་ལའོ། ། ཞེས་འབྱུང་བ་ལྟར་ཆོས་ཀྱི་སྒྲ་ཤེས་བྱ་ལ་འཇུག་པ་ནི། དཔེར་ན། མདོ་ལས། ཆོས་གང་ལ་ལ་འདུས་བྱས་སམ། འདུས་མ་བྱས་སམ། ཞེས་དང༌། ཆོས་རྣམས་ཐམས་ཅད་དེ་འདྲར་ཤེས་པར་གྱིས། ། ཞེས་པ་ལ་སོགས་པ་ལྟ་བུའོ། ། ལམ་ལ་འཇུག་པ་ནི། དགེ་སློང་དག་ལོག་པའི་ལྟ་བ་ནི་ཆོས་མ་ཡིན་ལ་ཡང་དག་པའི་ལྟ་བ་ནི་ཆོས་ཡིན་ནོ། །ཞེས་པ་ལྟ་བུ་དང༌། མྱང་འདས་ལ་འཇུག་པ་ཆོས་ལ་སྐྱབས་སུ་སོང་བ། ཞེས་པ་ལྟ་བུ། ཡིད་ཀྱི་ཡུལ་ལ་འཇུག་པ་ཆོས་ཀྱི་སྐྱེ་མཆེད། ཅེས་པ་ལྟ་བུ། བསོད་ནམས་ལ་འཇུག་པ། བཙུན་མོའི་འཁོར་དང་ཞོན་ནུ་མ་རྣམས་དང་ལྷན་ཅིག་ཏུ་ཆོས་སྤྱོད་ཅེས་པ་ལྟ་བུ། ཚེ་ལ་འཇུག་པ། བྱིས་པ་ནི་མཐོང་བའི་ཆོས་གཅེས་པར་འཛིན་པ་ཡིན། ཅེས་པ་ལྟ་བུ། གསུང་རབ་ལ་འཇུག་པ། དགེ་སློང་ཆོས་ཞེས་པ་ནི། འདི་ལྟ་སྟེ། མདོའི་སྡེ་དང༌། དབྱངས་ཀྱིས་བསྙད་པའི་སྡེ་དང༌། ཞེས་པ་ལྟ་བུ། འབྱུང་འགྱུར་ལ་འཇུག་པ། འདུ་བྱེད་ཀྱི་རྫས་རྣམས་ནི་དེའི་ཆོས་སོ། །ཞེས་དང༌། ང་ཡང་འཆི་བའི་ཆོས་དང་འཆི་བའི་ཆོས་ཉིད་ལས་མ་འདས་སོ། །ཞེས་པ་ལྟ་བུ། ངེས་པ་ལ་འཇུག་པ། དགེ་སློང་གི་ཆོས་བཞི་ཞེས་དང༌། དགེ་སློང་དག་སྲོག་གཅོད་པ་ནི་ཆོས་མ་ཡིན་ལ། སྲོག་གཅོད་པ་སྤང་བ་ནི་ཆོས་ཡིན་ནོ། །ཞེས་སོགས་འབྱུང་བ་ལྟ་བུ། ལུགས་ལ་འཇུག་པ། ཡུལ་ཆོས་དང་རིག་ཆོས་ལྟ་བུ་རྣམས་སོ། །དེ་དག་འཛིན་པའི་སྒྲ་དོན་དང་ཇི་ལྟར་འབྲེལ་སྙམ་ན། ཤེས་བྱ་རྣམས་ཀྱིས་ནི་རང་དང་སྤྱིའི་མཚན་ཉིད་འཛིན་པ་སྟེ། དཔེར་ན། ས་ནི་སྲ་བའོ། །ཆུ་ནི་གཤེར་བའོ། །མེ་ནི་ཚ་བའོ། །རླུང་ནི་ཡང་ཞིང་གཡོ་བའོ། །ཞེས་པ་ལྟ་བུ། རང་མཚན་དང༌། འདུས་བྱས་ཐམས་ཅད་ནི་མི་རྟག་པའོ། །ཟག་བཅས་ཐམས་ཅད་ནི་སྡུག་བསྔལ་བའོ། །ཆོས་ཐམས་ཅད་ནི་(༨༩བ)བདག་མེད་པའོ། །མྱ་ངན་ལས་འདས་པ་ནི་ཞི་བའོ། །ཞེས་པ་ལྟ་བུ། སྤྱི་མཚན་འཛིན་པ་དང༌། ལམ་དང་མྱང་འདས་ཀྱིས་ནི་འཁོར་བར་ལྟུང་བ་ལས་འཛིན་པ་དང༌། ཡིད་ཡུལ་གྱིས་ནི་ཡིད་འཛིན་པ་དང༌། བསོད་ནམས་ཀྱིས་ངན་འགྲོར་ལྟུང་བ་ལས་འཛིན་པ་དང༌། ཚེའམ་སྲོག་གིས་ནི་ལུས་སམ་རིས་མཐུན་འཛིན་པ་དང༌། གསུང་རབ་ཀྱིས་ནི་དོན་ཕྱིན་ཅི་མ་ལོག་པར་འཛིན་པ་དང༌། འབྱུང་འགྱུར་གྱིས་འབྱུང་རྒྱུའི་ཆོས་དེ་འཛིན་པ་དང༌། ངེས་པས་ངེས་པར་བྱ་བའི་གཞི་འཛིན་པ་དང༌། ལུགས་ཀྱིས་ནི་རང་དང་མཚུངས་པའི་སྤྱོད་པ་འཛིན་པ་དང༌། རིག་པས་ནི་འཁྲུལ་པའི་ཕྱོགས་ལས་འཛིན་པ་ལྟ་བུར་རིགས་པས་དཔག་པར་བྱའོ། ། ཇ༣ གསུམ་པ་[དབྱེ་བ་]ལ་གཉིས། ཉ༡ དབྱེ་གཞི་དང༌། ཉ༢ དབྱེ་བ་དངོས་སོ། ། ཉ༡ དང་པོ་ནི། དེ་ལས་འགོག་ལམ་གྱིས་བསྡུས་དམ་པའི་ཆོས། ། བཤད་མ་ཐག་པ་དེ་དག་རྣམས་ལས་སྐབས་འདིར་བསྟན་པར་བྱ་བ་ནི། འགོག་པ་དང་ལམ་གྱི་བདེན་པས་བསྡུས་པའི་དམ་པའི་ཆོས་ཉིད་ཡིན་ལ། མཚན་དེ་ལྡན་གྱི་རྒྱུ་མཚན་ཀྱང༌། ཆོས་ཐམས་ཅད་ཀྱི་མཆོག་ཡིན་པས་སམ། དམ་པ་ཞེས་བྱ་བ་རྫོགས་པའི་སངས་རྒྱས། ཆོས་ནི་དེས་བསྟན་པ་ཡིན་པས་སམ། ཡང་ན། སྐྱེས་བུ་དམ་པ་རྣམས་ཀྱིས་སྤྱད་པར་བྱ་བའི་ཆོས་ཡིན་པའི་ཕྱིར། དེ་སྐད་ཅེས་བྱའོ། ། ཉ༢ གཉིས་པ་[དབྱེ་བ་དངོས་]ལ་གཉིས། ཏ༡ མདོར་བསྟན། ཏ༢ རྒྱས་བཤད་དོ། ། ཏ༡ དང་པོ་ནི། དབྱེ་ན་བརྗོད་བྱ་རྟོགས་པ་རྗོད་བྱེད་ལུང༌། ། ཞེས་པའོ། ། ཏ༢ གཉིས་པ་[རྒྱས་བཤད་]ལ་གཉིས། ཐ༡ བརྗོད་བྱ་རྟོགས་པ་དང༌། ཐ༢ རྗོད་བྱེད་ལུང་ངོ་། ། ཐ༡ དང་པོ་ནི། རྟོགས་པའི་དམ་ཆོས་འགོག་ལམ་བདེན་པ་སྟེ། ། འཕགས་བཞིའི་ཐུགས་རྒྱུད་གང་ཞིག་བྲལ་བ་དང༌། ། གང་གིས་བྲལ་བྱེད་གཉེན་པོའི་རང་བཞིན་ཉིད། ། དེ་ལ་རྟོགས་པ་དམ་པའི་ཆོས་ལའང་རྣམ་པ་གཉིས་ཏེ། འགོག་པ་དང་། ལམ་གྱི་བདེན་པའོ། ། དང་པོ་ནི། རྣམ་པར་རྟོག་པས་མ་བརྟག་ཅིང་བརྗོད་པའི་ཡུལ་ལས་འདས་པས་འཕགས་པ་ཁོ་ནས་མཁྱེན་པའི་ཕྱིར་བསམ་དུ་མེད་(༩༠ན)པ་དང༌། རང་བཞིན་གྱིས་ཞི་བའི་ཕྱིར་གཉིས་སུ་མེད་པ་དང༌། གཟུང་འཛིན་གྱིས་སྤྲོས་པས་དབེན་པས་རྟོག་པ་མེད་པ་སྟེ་མཚན་ཉིད་གསུམ་ལྡན་འཕགས་བཞིའི་ཐུགས་རྒྱུད་ཀྱི་གཉེན་པོས་སྤང་བྱ་སྤངས་པ་གང་ཞིག་ཆགས་པ་བྲལ་བ་དོན་དམ་པའི་བདེན་པའི་ངོ་བོ་རྟོགས་པའི་སྟོབས་ཀྱིས་ཐོབ་པ་ཡིན་ལ། གཉིས་པ་ནི། ཉི་མའི་དཀྱིལ་འཁོར་རང་བཞིན་གྱིས་དག་ཅིང་འོད་གསལ་ལ་མུན་པའི་གཉེན་པོར་གྱུར་པ་བཞིན་དུ་ཉེས་པའི་དྲི་མ་དག་ཅིང་ཡོན་ཏན་གྱི་འོད་གསལ་ལ་སྒྲིབ་པ་དང་ཉོན་མོངས་པའི་གཉེན་པོར་གྱུར་པ་སྟེ་མཚན་ཉིད་སུམ་ལྡན་ཟག་མེད་ཀྱི་ཡེ་ཤེས་འཁོར་དང་བཅས་པ་གང་གིས་ཆགས་པ་དང་བྲལ་བར་བྱེད་པ་ཀུན་རྫོབ་གཉེན་པོའི་རང་བཞིན་ཉིད་དེ། རྒྱུད་བླ་མ་ལས། བསམ་མེད་གཉིས་མེད་རྟོག་མེད་པ། ། དག་གསལ་གཉེན་པོའི་ཕྱོགས་ཉིད་ཀྱིས། ། གང་ཞིག་གང་གིས་ཆགས་བྲལ་བ། ། བདེན་གཉིས་མཚན་ཉིད་ཅན་དེ་ཆོས། ། ཆགས་བྲལ་ཉིད་ནི་འགོག་པ་དང༌། ། ལམ་གྱི་བདེན་པ་དག་གིས་བསྡུས། ། གོ་རིམ་ཇི་བཞིན་དེ་དག་ཀྱང༌། ། ཡོན་ཏན་གསུམ་གསུམ་གྱིས་རིག་བྱ། ། བརྟག་མིན་ཕྱིར་དང་བརྗོད་མིན་ཕྱིར། ། འཕགས་པས་མཁྱེན་ཕྱིར་བསམ་མེད་ཉིད། ། ཞི་ཉིད་གཉིས་མེད་རྟོག་མེད་དེ། ། དག་སོགས་གསུམ་ནི་ཉི་བཞིན་ནོ། ། ཞེས་པ་ལྟར་རོ། ། ཐ༢ གཉིས་པ་རྗོད་བྱེད་ལུང་བཤད་པ་ལ་གཉིས། ད༡ མདོར་བསྡུས་ཏེ་བསྟན་པ་དང༌། ད༢ དེ་ཉིད་རྒྱས་པར་བཤད་པའོ། ། ད༡ དང་པོ་ནི། ལུང་ནི་ངོ་བོའི་སྒོ་ནས་རྣམ་པ་བཅུས། །(༩༠བ) ལེགས་གསུངས་བཀའ་དང་དགོངས་འགྲེལ་བསྟན་བཅོས་གཉིས། ། དེ་ལ་ལུང་གི་དམ་པའི་ཆོས་ཀྱང་ངོ་བོའི་སྒོ་ནས་དབྱེ་ན་རྣམ་པ་བཅུས་ལེགས་པར་གསུངས་པའི་བཀའ་དང༌། བཀའི་དགོངས་པ་འགྲེལ་བའི་བསྟན་བཅོས་གཉིས་ཏེ། ལྷའི་བུས་ཞུས་པའི་མདོ་ལས། ཆོས་རྣམས་ཐམས་ཅད་བཀའ་དང་བསྟན་བཅོས་གཉིས་སུ་འདུས། ། ལེགས་པར་གསུངས་དང་དེ་ཡི་དགོངས་འགྲེལ་བ། ། ཞེས་གསུངས་སོ། ། རྣམ་པ་བཅུ་ནི། རྣམ་བཤད་རིགས་པར། ཇི་ལྟར་ན་ལེགས་པར་གསུངས་པ་ཡིན་ཞེ་ན། རྣམ་པ་བཅུ་དག་གིས་ཏེ། ཡང་དག་པར་བསླང་བ་ཉིད་ཀྱིས་དང༌། དབང་དུ་མཛད་པ་ཉིད་ཀྱིས་དང༌། འཇུག་པ་ཉིད་ཀྱིས་དང༌། རབ་ཏུ་བསྟན་པ་ཉིད་ཀྱིས་དང༌། རབ་ཏུ་དབྱེ་བ་ཉིད་ཀྱིས་དང༌། རྟེན་ཉིད་ཀྱིས་དང༌། གོ་བར་མཛད་པ་ཉིད་ཀྱིས་དང༌། གདགས་པ་ཉིད་ཀྱིས་དང༌། དུས་ཉིད་ཀྱིས་དང༌། ཡོན་ཏན་ཡོངས་སུ་འཛིན་པ་ཉིད་ཀྱིས་སོ། །ཞེས་བསྟན་པ་སྟེ། དེའང་རིམ་པ་བཞིན། ཡང་དག་པར་མངོན་པར་རྫོགས་པར་སངས་རྒྱས་ནས་གསུངས་པའི་ཕྱིར་དང༌། སེམས་ཅན་ཐམས་ཅད་ཀྱི་དབང་དུ་མཛད་པའི་ཕྱིར་དང༌། རེས་འགའ་བ་མ་ཡིན་པར་རྒྱུན་དུ་གསུངས་པའི་ཕྱིར་དང༌། སློབ་དཔོན་གྱི་དཔེ་མཁྱུད་མི་མངའ་བའི་ཕྱིར་དང༌། སེམས་ཅན་གྱི་བསམ་པ་ཇི་ལྟ་བ་བཞིན་དུ་གསུངས་པའི་ཕྱིར་དང༌། དབྱངས་ཀྱི་ཡན་ལག་ལྔ་དང་ལྡན་པར་གསུངས་པའི་ཕྱིར་དང༌། དབྱངས་གཅིག་གིས་འཇིག་རྟེན་མཐའ་ཡས་ཁྱབ་པར་མཛད་པའི་ཕྱིར་རམ། འཁོར་གྱི་དཀྱིལ་འཁོར་ཇི་སྙེད་པས་གོ་བར་མཛད་དེ་གསུངས་པའི་ཕྱིར་དང༌། མཐའ་གཉིས་སྤངས་པའི་ལམ་གསུངས་པའི་ཕྱིར་དང༌། གདུལ་བྱ་ཡོངས་སུ་སྨིན་པ་རྣམས་ལ་གསུངས་པའི་ཕྱིར་དང༌། ཡོན་ཏན་དྲུག་ཅུ་དང་ལྡན་པར་གསུངས་པའི་ཕྱིར་རོ། ། དེ་ལ་དབྱངས་ཀྱི་ཡན་ལག་ལྔ་ནི། འབྲུག་སྒྲ་ལྟར་ཟབ་པ་དང༌། སྙན་ཅིང་འཇེབས་ལ་རྣར་སྙན་པ་དང༌། ཡིད་དུ་འོང་ཞིང་དགའ་བར་བྱེད་པ་དང༌། རྣམ་པར་གསལ་ཞིང་རྣམ་པར་རིག་པར་བྱེད་པ་དང༌། མཉན་པར་འོས་ཤིང་མི་མཐུན་པ་མེད་པ་རྣམས་སོ། ། དེ་དག་ལ་རྒྱ་ཆེ་བ་ལ་སོགས་པའི་ཡོན་ཏན་ལྔ་ཡོད་པས། མཉན་པ་ལ་སོགས་པའི་བྱ་བ་ལྔ་བྱེད་དེ། ཇི་སྐད་དུ། སློབ་དཔོན་དབྱིག་གཉེན་གྱིས། (༩༡ན) ཡོན་ཏན་ལྔ་ནི་རྒྱ་ཆེན་དང༌། ། སྙན་དང་རིག་དོན་ལྡན་ཉིད་དང༌། ། གཟུང་སླ་སྣ་ཚོགས་ཅི་འདོད་ཉིད། ། འདི་དག་ལྔ་ཡི་ཡན་ལག་སྟེ། ། མཉན་དང་རྣམ་པར་མི་གཡེང་དང༌། ། རྣམ་གྲོལ་ཁོང་དུ་ཆུད་པ་དང༌། ། སྨིན་པར་བྱེད་པ་ཡིན་ཏེ་དེས། ། ཐུབ་ཆེན་གསུང་ནི་ཡན་ལག་ལྔ། ། ཞེས་ལེགས་པར་བཤད་དོ། ། གསུང་གི་ཡོན་ཏན་དྲུག་ཅུ་ནི། དེ་བཞིན་གཤེགས་པའི་གསང་བའི་མདོ་ལས་དྲུག་ཅུ་རྩ་གཉིས་སུ་འབྱུང་བ་ཐུབ་པ་དགོངས་རྒྱན་དུ་སོ་སོར་རྒྱས་པར་བཤད་པའི། སྡོམ་ནི། མཉན་འཇམ་ཡིད་འོང་ཡིད་འཐད་དག ། དྲི་མེད་གསལ་འཇེབས་མཉན་པར་འོས། ། མི་ཚུགས་སྙན་འདུལ་མི་རྩུབ་དང༌། ། མི་བརླང་རབ་དུལ་རྣ་བར་སྙན། ། ལུས་སེམས་ཚིམ་དང་སྙིང་དགའ་བྱེད། ། བདེ་སྐྱེད་ཡོངས་སུ་གདུང་བ་མེད། ། ཤེས་བྱ་རིག་བྱ་རྣམ་པར་གསལ། ། དགའ་བྱ་དགའ་འོས་ཀུན་ཤེས་གཞུག ། རྣམ་རིག་རིགས་འབྲེལ་ཟློས་སྐྱོན་མེད། ། སེང་གེ་གླང་འབྲུག་ཀླུ་དབང་སྒྲ། ། དྲི་ཟ་ཀ་ལ་པིངྐའི་དབྱངས། ། ཚངས་དང་ཤང་ཤང་ཏེའུའི་སྒྲ། ། སྒྲ་དང་དབྱངས་དང་གྲགས་པ་བཟུང༌། ། ལྷ་དབང་རྔ་སྒྲ་མ་ཁེངས་པ། ། མི་དམའ་སྒྲ་ཀུན་རྗེས་སུ་ཞུགས། ། ཟུར་མ་ཆག་ཅིང་མ་ཚང་མེད། ། མ་ཞུམ་མ་ཞན་ཁྱབ་དང་ཆུབ། ། རྒྱུན་ཆགས་འབྲེལ་ཞིང་སྒྲ་ཀུན་རྫོགས། ། དབང་པོ་ཚིམས་བྱེད་མ་སྨད་དང༌། ། མི་འགྱུར་མ་བརྟབས་ཁོར་ཡུག་གྲགས། ། རྣམ་པ་ཐམས་ཅད་མཆོག་དང་ལྡན། ། ཅེས་སོ། ། ད༢ གཉིས་པ་རྒྱས་པར་བཤད་པ་ལ་གཉིས། ན༡ བཀའ་དང༌། ན༢ བསྟན་བཅོས་སོ། ། ན༡ དང་པོ་ལ་གཉིས། པ༡ ངོ་བོ་དང༌། པ༢ དབྱེ་བའོ། ། པ༡ དང་པོ་ནི། བསླབ་པ་གསུམ་བརྗོད་ངག་ཚིག་དྲི་མ་མེད། ། ཚད་མ་གསུམ་ལྡན་ཐོག་མཐའ་བར་དགེ་བ། ། ཞེས་པ་སྟེ། དེ་ལ་བཀའི་ངོ་བོ་ནི། བརྗོད་བྱ་བསླབ་པ་གསུམ་སྟོན། རྗོད་བྱེད་ངག་ཚིག་དྲི་མེད། སྒྲུབ་བྱེད་ཚད་མ་གསུམ་ལྡན། འབྲས་བུ་ཐོག་མཐའ་བར་དུ་དགེ་བ་ཅན་ཡིན་ཏེ། མགོན་པོ་བྱམས་པས། (༩༡བ) བསླབ་པ་གསུམ་བརྗོད་ངག་ཚིག་དྲི་མ་མེད། ། ཚད་མ་གསུམ་ལྡན་ཐོག་མཐའ་བར་དགེ་བ། ། དེ་ནི་ཆེན་པོར་གསུངས་བ་རྒྱལ་བའི་བཀའ། ། བཟློག་པ་གཞན་གྱི་གཞུང་དུ་ཤེས་པར་བྱ། ། ཞེས་དང༌། འདུལ་བ་འོད་ལྡན་