Tibetan
གུས་པས་ཚོགས་རྫོགས་ཆོས་ཉིད་རྟོགས། ། དཀོན་མཆོག་གསུམ་ལ་དད་པ་ཐོབ། ། མཐོང་ཆོས་བདེར་གནས་འབེལ་གཏམ་ནུས། ། ཞེས་སོ། ། དབྱངས་ཀྱིས་བསྙད་པའི་སྡེ་ནི། མདོའི་སྡེ་དེ་ཉིད་ཀྱི་བར་མཐའ་རྣམས་སུ་ཚིགས་སུ་བཅད་པའི་དབྱངས་ཀྱིས་བསྙད་པ་དག་དང༌། བརྟག་པར་བྱ་བ་གཞན་ཡོད་པའི་ཕྱིར་དྲང་བའི་དོན་གྱི་མདོ་སྡེ་གང་ཡིན་པ་རྣམས་སོ།། ལུང་དུ་བསྟན་པའི་སྡེ་ནི། ཉན་ཐོས་ལ་སོགས་པ་འདས་པ་དང་སྐྱེ་བ་ལུང་སྟོན་པ་རྣམས་དང༌། བྱེ་བྲག་ཏུ་དགོངས་པ་གསལ་བར་བསྟན་པའི་ཕྱིར་ངེས་དོན་གྱི་མདོ་སྡེ་རྣམས་སོ། ། ཚིགས་སུ་བཅད་པའི་སྡེ་ནི། ཚིགས་བཅད་རྐང་པ་གཉིས་པ་ནས་དྲུག་པའི་བར་གྱིས་གསུངས་པ་རྣམས་སོ།། ཆེད་དུ་བརྗོད་པའི་སྡེ་ནི། གཞན་གྱིས་མ་བསྐུལ་བར་ཐུགས་དགྱེས་པའི་ཚུལ་གྱིས་ཆེད་དུ་གསུངས་པར་སྣང་བ་རྣམས་སོ། །(༩༦ན) གླེང་གཞིའི་སྡེ་ནི། གང་ཟག་གི་ཆེད་དུ་གསུངས་པ་དང༌། བྱུང་བ་དང་བཅས་པའི་བསླབ་པ་གསུངས་པ་རྣམས་སོ། ། རྟོགས་པ་བརྗོད་པའི་སྡེ་ནི། དཔེ་དང་བཅས་ནས་གསུངས་པ་རྣམས་ཏེ། བམ་གཉིས་ལས། ཆོས་ཉན་པ་རྣམས་ཀྱིས་གོ་ཞིང་རྟོགས་པར་བྱ་བའི་ཕྱིར་སྔོན་བཏགས་པར་བྱུང་བ་གཞན་ལས་དྲངས་ཏེ། དཔེ་རྒྱས་པར་བསྟན་པས་ན་རྟོགས་པ་བརྗོད་པའི་སྡེ་ཞེས་བྱ་ཞེས་སོ། ། དེ་ལྟ་བུ་བྱུང་བའི་སྡེ་ནི། སྔོན་གྱི་གཏམ་རྒྱུད་སོགས་གསུངས་པ་རྣམས་སོ། ། སྐྱེས་རབས་ཀྱི་སྡེ་ནི། བྱང་ཆུབ་སེམས་དཔའི་སྤྱོད་པ་སྟོན་པ་རྣམས་ཏེ། ཐམས་ཅད་སྒྲོལ་བའི་སྐྱེས་རབས་ལྟ་བུའོ། ། ཤིན་ཏུ་རྒྱས་པའི་སྡེ་ནི། བྱང་ཆུབ་སེམས་དཔའི་སྡེ་སྣོད་ཐེག་ཆེན་འབའ་ཞིག་སྟོན་པ་རྣམས་ཏེ། དེ་ལ་རྣམ་པར་འཐག་པའི་སྡེ་དང་མཚུངས་པ་དང་བྲལ་བའི་སྡེ་ཞེས་ཀྱང་བྱའོ། ། དེའང་ཀུན་བཏུས་ལས། སེམས་ཅན་ཐམས་ཅད་ལ་ཕན་པ་དང་བདེ་བའི་གནས་ཡིན་པ་དང༌། རྒྱས་པ་དང༌། རྒྱ་ཆེ་བ་དང༌། ཟབ་པའི་རྣམ་པར་ཆོས་སྟོན་པའི་ཕྱིར་རོ། ། ཅིའི་ཕྱིར། རྣམ་པར་འཐག་པ་ཞེས་བྱ་ཞེ་ན། སྒྲིབ་པ་ཐམས་ཅད་རྣམ་པར་འཐག་པའི་ཕྱིར་རོ། །ཅིའི་ཕྱིར། མཚུངས་བྲལ་ཞེས་བྱ་ཞེ་ན། མཚུངས་པ་མེད་པའི་ཕྱིར་རོ། །ཞེས་སོ། ། རྨད་དུ་བྱུང་བའི་སྡེ་ནི། ཉན་ཐོས་དང་བྱང་ཆུབ་སེམས་དཔའ་དང་སངས་རྒྱས་རྣམས་ཀྱི་མཁྱེན་པ་དང་རྫུ་འཕྲུལ་དང་བྱིན་རླབས་སོགས་ངོ་མཚར་རྨད་དུ་བྱུང་བའི་ཆོས་བསྟན་པ་རྣམས་སོ། ། གཏན་ལ་དབབ་པའི་སྡེ་ནི། གང་དུ་ཆོས་རྣམས་ཀྱི་མཚན་ཉིད་ཅི་ལྟ་བར་གཏན་ལ་ཕབ་ནས་མདོ་སྡེ་ལ་སོགས་པའི་དོན་གསལ་བར་གསུངས་པ་རྣམས་སོ། ། དེ་ལྟར་གསུང་རབ་ཡན་ལག་བཅུ་གཉིས་པོ་རྣམས་སྔར་བཤད་པའི་སྡེ་སྣོད་རྣམས་སུ་སོ་སོར་བསྡུ་ན། འདི་ལྟར་ཤེས་དགོས་ཏེ། མདོའི་སྡེ་ནས་ཆེད་དུ་བརྗོད་པའི་སྡེའི་བར་ལྔ་ནི་ཉན་ཐོས་ཀྱི་མདོ་སྡེའི་སྡེ་སྣོད་དོ། །དེ་ནས་གླེང་བཞིའི་སྡེ་ལ་སོགས་པ་བཞི་ནི། འདུལ་བའི་(༩༦བ)སྡེ་སྣོད་དེ། དེ་ལ་དང་པོ་ནི་ལྟུང་བ་བསླབ་བྱ་དང་བཅས་པ་སྟོན་པའི་ཕྱིར་གཙོ་བོ་ཡིན་ལ། ཕྱི་མ་རྣམས་ནི་དེའི་འཁོར་རོ། ། དེ་ནས་ཤིན་ཏུ་རྒྱས་པའི་སྡེ་སོགས་གཉིས་ནི། བྱང་ཆུབ་སེམས་དཔའི་མདོ་སྡེའི་སྡེ་སྣོད་ཡིན་ཏེ། བསམ་གྱིས་མི་ཁྱབ་ཅིང་རྒྱ་ཆེ་བའི་ཁྱད་པར་དང་ལྡན་པའི་ཕྱིར་རོ། ། དེ་ནས་གཏན་ལ་དབབ་པའི་སྡེ་གཅིག་པུ་ནི་གཉིས་ཀའི་མངོན་པའི་སྡེ་སྣོད་དུ་ཤེས་པར་བྱའོ། ། ཕ༤ བཞི་པ་[དབང་པོའི་རིམ་པས་དབྱེ་བ་]ནི། དབང་པོའི་རིམ་ལས་ཆོས་འཁོར་རྣམ་གསུམ་མ་མོ། ། ཡང་ན། བཀའ་ཐམས་ཅད་གདུལ་བྱའི་དབང་པོའི་རིམ་པ་དང་སྦྱར་ན། ཆོས་ཀྱི་འཁོར་ལོ་རྣམ་པ་གསུམ་དུ་དབྱེ་བ་རིགས་ཏེ། མདོ་སྡེ་དགོངས་པ་ངེས་འགྲེལ་གྱི་ལུང་དོན་ཀུན་མཁྱེན་དྲི་མེད་འོད་ཟེར་གྱི་ཞལ་ནས། དེ་ལ་ལས་དང་པོ་པའི་ཚེ། གཟུང་འཛིན་རང་རྒྱུད་པས་བཅིངས་པའི་ཉོན་མོངས་པ་ལས་སེམས་བསྲུང་བའི་ཕྱིར་སྤང་གཉེན་བླང་དོར་བྱེད་པའི་རིམ་པ་གཙོ་བོར་སྟོན་པས་བདེན་པ་བཞིའི་ཆོས་ཀྱི་རྣམ་གྲངས་དང༌། བར་པ་གཉེན་པོ་ལ་མངོན་པར་ཞེན་པ་དགག་པའི་ཕྱིར་མཚན་ཉིད་མེད་པ་དང༌། ཐ་མ་གཤིས་ཇི་ལྟར་གནས་པ་བསྟན་པ་དོན་དམ་རྣམ་པར་ངེས་པའི་ཆོས་ཀྱི་རྣམ་གྲངས་གསུམ་དུ་བྱུང་བ་ཡིན་ནོ། ། དབང་པོའི་སྒོ་ནས་དབྱེ་ན། ཉན་ཐོས་དང༌། རང་སངས་རྒྱས་དང༌། བླ་ན་མེད་པའི་ཐེག་པ་སྟེ་གསུམ་ནི། མཚན་བརྗོད་ལས། ཐེག་པ་གསུམ་གྱིས་ངེས་འབྱུང་ལ། ། ཐེག་པ་གཅིག་གི་འབྲས་བུར་གནས། ། ཞེས་སོགས་གསུངས་པས་སོ། ། ན༢ གཉིས་པ་དགོངས་འགྲེལ་བསྟན་བཅོས་བཤད་པ་ལ་ལྔ། པ༡ རྩོམ་པ་པོ། པ༢ བསྟན་བཅོས་ཀྱི་མཚན་ཉིད། པ༣ ངེས་ཚིག ། པ༤ དབྱེ་བ། པ༥ ཞར་བྱུང་བླང་དོར་གྱི་གནས་བཤད་པའོ། ། པ༡ དང་པོ་ནི། རབ་འབྲིང་ཐ་མའི་ཚད་ལྡན་རྩོམ་པ་པོས། ། དེའང་བསྟན་བཅོས་རྩོམ་པ་པོ་མཚན་ཉིད་རབ་འབྲིང་ཐ་མ་གསུམ་གང་རུང་གི་ཚད་དང་ལྡན་པ་དགོས་ཏེ། ཀུན་མཁྱེན་ཆོས་རྗེས། རབ་ཆོས་ཉིད་ཀྱི་བདེན་པ་མཐོང་བ་སྟེ། ཀླུ་སྒྲུབ་དང༌། འཕགས་པ་ལྷ། ཐོགས་མེད་(༩༧ན)ལ་སོགས་པ་ལྟ་བུའོ། ། འབྲིང་ཡི་དམ་ལྷའི་ཞལ་གཟིགས་ཏེ་གནང་བ་ཐོབ་པ། ཐུགས་རྗེ་ཆེན་པོས་བྱིན་གྱིས་བརླབས་པ་ཙནྡྲ་པ་དང༌། ཞི་བ་ལྷ་ལ་སོགས་པ་ལྟ་བུའོ། ། ཐ་མ་ཡང་རིག་པའི་གནས་ལྔ་ལ་མཁས་ཤིང་བླ་མ་བརྒྱུད་པའི་བཤད་པའི་གདམས་ངག་ཡོད་པ་སྟེ། སློབ་དཔོན་དཔལ་སྦས་དང༌། ཡེ་ཤེས་སྙིང་པོ་དང༌། ཤཱཀྱ་བློ་གྲོས་ལ་སོགས་པ་ལྟ་བུའོ། །ཞེས་གསུངས་པ་ལྟར་ཏེ། ད་ལྟའང་མཚན་ཉིད་གསུམ་རྗེས་མཐུན་པ་དང་ལྡན་པའི་གང་ཟག་ནི་རྩོམ་པ་པོའི་ཚད་དུ་རུང་བའོ། ། པ༢ གཉིས་པ་[བསྟན་བཅོས་ཀྱི་མཚན་ཉིད་]ནི། རྒྱལ་བསྟན་དབང་བྱས། ཞེས་པ་སྟེ། རྒྱུད་བླ་མ་ལས། གང་ཞིག་རྒྱལ་བའི་བསྟན་པ་འབའ་ཞིག་གི། ། དབང་བྱས་རྣམ་གཡེང་མེད་ཡིད་ཅན་གྱིས་བཤད། ། ཐར་པ་ཐོབ་པའི་ལམ་དང་རྗེས་མཐུན་པ། ། དེ་ཡང་དྲང་སྲོང་བཀའ་བཞིན་སྤྱི་བོས་བླང༌། ། ཞེས་བཤད་པ་ལྟར། དངོས་དང་བརྒྱུད་ནས་བདེ་བར་གཤེགས་པའི་གསུང་རབ་ཀྱི་དགོངས་པ་འགྲེལ་པའི་དབང་དུ་བྱས་ནས་རྩོམ་པ་པོ་ལྟ་བ་ངན་པ་དང་ཐེ་ཚོམ་སོགས་རྣམ་གཡེང་མེད་པའི་བློ་གྲོས་ཅན་གྱིས་བཤད་པའི་ངག་གང་ཞིག །ཐར་པ་ཐོབ་པའི་ལམ་དང་རྗེས་སུ་མཐུན་པའོ། ། པ༣ གསུམ་པ་[བསྟན་བཅོས་ཀྱི་ངེས་ཚིག་]ནི། འཆོས་སྐྱོབ་ཡོན་ཏན་ཅན། ། བསྟན་བཅོས་དེ་ནི་དྲུག་བྲལ་གསུམ་དུ་འདོད། ། མཚན་ཉིད་དེ་དང་ལྡན་པའི་བསྟན་བཅོས་ཀྱི་ངེས་ཚིག་ནི། ལེགས་སྦྱར་གྱི་སྐད་དུ་ཤཱསྟྲ་ཞེས་བྱ་སྟེ། དེའང་ཤཱ་ས་ནི་འཆོས་པ། ཏྲ་ཡ་སྐྱོབ་པའི་ཕྱིར་བསྟན་བཅོས་ཞེས་བྱ་སྟེ། རྣམ་བཤད་རིགས་པར། ཉོན་མོངས་དགྲ་རྣམས་མ་ལུས་འཆོས་པ་དང༌། ། ངན་འགྲོའི་སྲིད་ལས་སྐྱོབ་བྱེད་གང་ཡིན་པ། ། འཆོས་སྐྱོབ་ཡོན་ཏན་ཕྱིར་ན་བསྟན་བཅོས་ཏེ། ། གཉིས་པོ་འདི་དག་གཞན་གྱི་ལུགས་ལ་མེད། ། ཅེས་སོ། ། ཡང་ཤཱསྟྲ་ཞེས་པ་ངེས་པར་བསྟན་པ་དང༌། གཞུང་ལུགས་ལ་འཇུག་པ་འཆི་མེད་མཛོད་དུ་བཤད་པ་ལྟར། ས་སྡེ་ལས། (༩༧བ) དོན་མེད་དོན་ལོག་དོན་དང་ལྡན། ། ཐོས་རྩོད་སྒྲུབ་པ་ལྷུར་ལེན་དང༌། ། ངན་གཡོ་བརྩེ་བྲལ་སྡུག་བསྔལ་སྤོང༌། ། བསྟན་བཅོས་དྲུག་བྲལ་གསུམ་དུ་འདོད། ། ཅེས་སོ། ། དེའང་རིག་བྱེད་བཞི་ལ་སོགས་པ་ཡང་དག་པའི་དོན་མེད་པའི་བསྟན་བཅོས་དང༌། རྟག་ཆད་དུ་ལྟ་བ་ལ་སོགས་པས་གྲོལ་བ་འགྲུབ་པར་སྨྲ་བ་སོགས་དོན་ལོག་པའི་བསྟན་བཅོས་དང༌། སྙན་ངག་ལ་སོགས་པ་ཐོས་པ་ལྷུར་ལེན་པའི་བསྟན་བཅོས་དང༌། རྟོག་གེ་ལ་སོགས་པའི་རྩོད་པ་ལྷུར་ལེན་དང༌། གཡུལ་ལས་རྣམ་པར་རྒྱལ་བ་ལ་སོགས་པའི་ངན་གཡོ་དང༌། བ་གླང་ལ་སོགས་པའི་མཆོད་སྦྱིན་ཆོས་སུ་སྨྲ་བའི་རང་གཞན་ལ་འཚེ་བ་ཅན་བརྩེ་བ་དང་བྲལ་བའི་བསྟན་བཅོས་ངན་པ་དྲུག་དང་བྲལ་ཞིང༌། གནས་སྐབས་བདེ་ཞིང་མཐར་ཐུག་གྲོལ་བ་འགྲུབ་པའི་དོན་ཆེན་པོ་དང་ལྡན་པ་དང༌། བྱང་ཆུབ་སྒྲུབ་པ་དང༌། འཁོར་བའི་སྡུག་བསྔལ་མཐའ་དག་སྤོང་བའི་བསྟན་བཅོས་གསུམ་ནི། སངས་རྒྱས་པ་དག་གིས་དང་དུ་བླང་བྱར་འདོད་པ་ཡིན་ནོ། ། པ༤ བཞི་པ་[བསྟན་བཅོས་ཀྱི་དབྱེ་བ་]ལ་གསུམ། ཕ༡ བྱེད་ལས་ཀྱི་སྒོ་ནས་དབྱེ་བ། ཕ༢ བཤད་བྱའི་སྒོ་ནས་དབྱེ་བ། ཕ༣ བརྗོད་བྱའི་སྒོ་ནས་དབྱེ་བའོ། ། ཕ༡ དང་པོ་ནི། དེ་ཡང་བྱེད་ལས་སྒོ་ནས་རྒྱ་ཆེན་སྡུད། ། ཟབ་མོ་རྣམ་འབྱེད་འཁྲུགས་པ་སྡེབ་དང་གསུམ། ། དེའང་བསྟན་བཅོས་དེ་ལ་བྱེད་ལས་ཀྱི་སྒོ་ནས་དབྱེ་ན། རྒྱ་ཆེན་པོ་སྡུད་པའི་བསྟན་བཅོས་དང༌། ཟབ་མོ་རྣམ་པར་འབྱེད་པའི་བསྟན་བཅོས་དང༌། འཁྲུགས་པ་གོ་རིམ་དུ་སྡེབ་པའི་བསྟན་བཅོས་དང་གསུམ་དུ་བཤད་པ་ལས། དང་པོ་ནི། མངོན་པ་མཛོད་ལྟ་བུ། གཉིས་པ་ནི། མངོན་རྟོགས་རྒྱན་ལྟ་བུ། གསུམ་པ་ནི། མདོ་སྡེ་རྒྱན་ལྟ་བུའོ། ། ཕ༢ གཉིས་པ་[བཤད་བྱའི་སྒོ་ནས་དབྱེ་བ་]ནི། བཤད་བྱ་སྤྱི་དང་བྱེ་བྲག་དགོངས་འགྲེལ་ལ། ། འཁོར་ལོ་གསུམ་གྱི་ལྟ་སྤྱོད་ཐ་དད་དང༌། ། བཤད་བྱ་བཀའི་སྒོ་ནས་བསྟན་བཅོས་ཀྱི་དབྱེ་བ་གཉིས་སུ་འགྱུར་ཏེ། བཀའ་སྤྱིའི་དགོངས་འགྲེལ་དང༌། བྱེ་བྲག་གི་དགོངས་འགྲེལ་ལོ། ། དང་པོ་ཀཙཱན་ལ་སོགས་བརྡ་སྤྲོད་པ་དང༌། སྡེ་བདུན་སོགས་ཚད་མ་རིག་(༩༨ན)པའི་བསྟན་བཅོས་རྣམས་སོ། ། གཉིས་པ་ལའང་། འཁོར་ལོ་གསུམ་གྱི་ལྟ་སྤྱོད་འགྲེལ་པའི་དབྱེ་བ་ཐ་དད་པ་མང་དུ་འགྱུར་ཏེ། འཁོར་ལོ་དང་པོའི་ལྟ་བའི་ཆ་འགྲེལ་པ་ལ། ཉན་ཐོས་ཀྱི་མངོན་པ་སྡེ་བདུན། བྱེ་བྲག་བཤད་མཛོད་ཆེན་མོ། དེ་དག་གི་དོན་བསྡུས་མངོན་པ་མཛོད་ལ་སོགས་པའོ། ། སྤྱོད་པའི་ཆ་འགྲེལ་པ་ལ། འདུལ་བ་མདོ་རྩ་དང་མེ་ཏོག་ཕྲེང་རྒྱུད་ལ་སོགས་པའོ། ། འཁོར་ལོ་བར་པའི་ལྟ་བའི་ཆ་འགྲེལ་པ་ལ། དངོས་བསྟན་སྟོང་ཉིད་ཀྱི་རིམ་པ་གསལ་བར་བྱེད་པ་དབུ་མ་རིགས་ཚོགས་དྲུག་སོགས་དང༌། སྦས་དོན་མངོན་རྟོགས་ཀྱི་རིམ་པ་གསལ་བར་བྱེད་པ་མངོན་རྟོགས་རྒྱན་སོགས་སོ། ། སྤྱོད་པའི་ཆ་འགྲེལ་པ་བསླབ་པ་ཀུན་ལས་བཏུས་སོགས་དང༌། ལྟ་སྤྱོད་གཉིས་ཆར་འགྲེལ་པ་བྱང་ཆུབ་སེམས་དཔའི་སྤྱོད་པ་ལ་འཇུག་པ་སོགས་སོ། ། འཁོར་ལོ་ཐ་མའི་ལྟ་བའི་ཆ་འགྲེལ་པ་མདོ་སྡེ་རྒྱན་དང་རྣམ་འབྱེད་གཉིས། རྒྱུད་བླ་སོགས་དང༌། སྤྱོད་པའི་ཆ་འགྲེལ་པ་སྡོམ་པ་ཉི་ཤུ་པ་སོགས་སོ། ། ཕ༣ གསུམ་པ་[བརྗོད་བྱའི་སྒོ་ནས་དབྱེ་བ་]ནི། བརྗོད་བྱ་ཇི་སྙེད་པ་དང་ཇི་ལྟ་བ། ། ཐར་དང་རྣམ་མཁྱེན་གཙོ་བོར་སྟོན་རྣམས་ཏེ། ། བསྟན་བཅོས་རྣམས་བརྗོད་བྱའི་སྒོ་ནས་དབྱེ་བ་གསུམ་སྟེ། ཇི་སྙེད་པ་སྟོན་པ་དང༌། ཇི་ལྟ་བ་སྟོན་པ་དང༌། ཐར་པ་དང་ཐམས་ཅད་མཁྱེན་པ་སྟོན་པའོ། ། ཇི་སྙེད་པ་སྟོན་པ་ལའང་། ཕལ་པ་དང་། མཆོག་གཉིས་ལས། སྔ་མ་ནི་ལུགས་ཀྱི་བསྟན་བཅོས་སོགས་དང༌། ཕྱི་མ་ནི་རིག་པའི་གནས་ལྔའི་བསྟན་བཅོས་རྣམས་ཏེ། དེ་ལས་ནང་རིག་པ་སྟོན་པ་ནི་ཕུང་པོ་ལྔའི་རབ་བྱེད་སོགས་སོ། ། ཇི་ལྟ་བ་སྟོན་པ་ནི། བདེན་གཉིས་རྣམ་ངེས་དང༌། སུམ་ཅུ་པ་དང༌། དབུ་མ་རྒྱན་སོགས་དང༌། ཐར་པ་དང་ཐམས་ཅད་མཁྱེན་པ་སྟོན་པ་ནི། བྱང་ས་དང་དགོངས་རྒྱན་ལ་སོགས་པའོ། ། པ༥ ལྔ་པ་ཞར་བྱུང་བླང་དོར་གྱི་གནས་བཤད་པ་ནི། ས་བཅུའི་དབང་ཕྱུག་རྒྱན་དྲུག་ལ་སོགས་པའི། ། གཞུང་རྣམས་རྒྱལ་བའི་བཀའ་བཞིན་སྤྱི་བོར་བླང༌། ། བོད་གཞུང་རྙིང་པ་(༩༨བ)རྣམས་ཀྱང་ཁྱད་འཕགས་སོ། ། བསྟན་པ་ནུབ་ཀ་མའི་སྐབས་འདིར་མི་རྣམས་བསོད་ནམས་དང་བློ་གྲོས་ཆུང་བའི་དབང་གིས་རྒྱལ་བའི་བཀའ་ལས་བསྟན་བཅོས། དེའང་རྒྱ་གཞུང་ལས་བོད་གཞུང༌། དེའང་སྔར་བྱུང་རྣམས་ལས་ཕྱིས་བྱུང་རྣམས་རིམ་གྱིས་རྩིས་སུ་བྱེད་དོ། ། དེ་ལ་འཇིག་རྟེན་གྱི་ཁམས་འདི་ན་ཚིག་གི་ནང་ནས་མཆོག་གམ་ཕུལ་དུ་གྱུར་པ་ནི་རྒྱལ་བའི་གསུང་རབ་རིན་པོ་ཆེ་ཡིན་པས་དོན་མ་གོ་ཡང་ཚིག་ཀློག་པ་ཁོ་ན་ཙམ་ལ་བྱིན་རླབས་དང་དགོས་པ་བསམ་གྱིས་མི་ཁྱབ་པ་དང་ལྡན་པས་སྲོག་ལྟར་དུ་གཅེས་པར་བྱ་བ་ཡིན་ལ། དེའི་འོག་ཏུ་བྱམས་ཆོས་སྡེ་ལྔ། སེམས་འགྲེལ་སྐོར་གསུམ་སོགས་ས་བཅུའི་དབང་ཕྱུག་གི་གསུང་རྣམས་དང༌། སངས་རྒྱས་གཉིས་པ་པདྨཱ་ཀ་རའི་རྡོ་རྗེའི་གསུང་ཡིན་ངེས་པ་རྣམས་དང༌། ཛམ་གླིང་མཛེས་པར་བྱེད་པའི་རྒྱན་དྲུག །སོགས་ཁོངས་ནས་ཆེན་པོ་བཞི། རྨད་དུ་བྱུང་བའི་སློབ་དཔོན་གཉིས། མཁས་པ་སྒོ་དྲུག །ཇོ་བོ་རྗེ་དང་ཨ་བྷ་ཡཱ་ཀ་ར་སོགས་གྲུབ་པའི་སློབ་དཔོན་ཆེན་པོ་རྣམས་ཀྱིས་མཛད་པར་ངེས་པའི་གཞུང་རྣམས་ཀྱང་རྒྱལ་བའི་བཀའ་བཞིན་དུ་སྤྱི་བོར་བླང་བར་རིགས་ཤིང༌། བོད་དུ་སྔ་འགྱུར་གྱི་ལོ་ཙཱ་ཆེན་པོ་རྣམས་དང༌། ཕྱི་དར་བཤད་སྒྲུབ་ཀྱི་རྩ་བའི་ཤིང་རྟ་ཆེན་པོ་རྣམས་ཀྱི་བསྟན་བཅོས་ཕྱོགས་སུ་མ་ལྷུང་བ་རྣམས་ཀྱང་ཁྱད་པར་དུ་འཕགས་པ་ཡིན་པས། རྒྱ་གཞུང་རྩོད་མེད་རྣམས་དང་རྗེས་མཐུན་པར་བལྟ་ཞིང་དང་དུ་བླང་བར་བྱ་བ་ཡིན་ལ། པཎྜི་ཏ་ཕལ་པས་མཛད་པའི་རྒྱ་གཞུང་དང༌། བོད་ཀྱི་བསྟན་བཅོས་ཕྱོགས་རེའི་མིག་ཅན་དག་གིས་སྦྱར་བ་རྣམས་དང༌། ཁྱད་པར་ཕྱི་རབས་ཀྱི་རྟོག་གེ་བ་རྣམས་དང༌། བློ་གྲོས་རྨོངས་ཀྱང་གཡར་ཁྲལ་དུ་ལད་མོ་ཟློ་བ་རྣམས་དང༌། ཆོས་ལུགས་སོ་སོའི་ཁ་འཛིན་ཅན་རྣམས་ཀྱིས་ཅི་ཐོད་དུ་སྦྱར་བའི་ཡིག་བྲིས་རྣམས་ནི་དུས་དང་བློ་གྲོས་གྲོན་པའི་རྒྱུ་དང༌། དེ་ལྟ་བུས་མི་དགེ་བའི་བཤེས་གཉེན་བྱེད་པའི་ཉེན་ཡོད་པས་ཡིད་བརྟོན་བྱ་བའི་ཡུལ་མ་ཡིན་ཏེ། རྗེ་བཙུན་ཐམས་ཅད་མཁྱེན་(༩༩ན)པ་སྒྲོལ་བའི་མགོན་པོས། ཕྱི་རབས་ཀྱི་གཏམ་ལ་མ་དགེས་ཤིག །སྔོན་གྱི་མཁས་པ་གྲུབ་ཐོབ་ཡིན། དེང་སང་གི་མཁས་པ་མཁས་རྫུ་རུ་འདུག །ཅེས་གསུངས་པ་བཞིན་ནོ། ། བསྟན་པ་དམ་པའི་ཆོས་ངོས་བཟུང་བའི་སྐབས་སོ། ། བསྟན་པ་དམ་པའི་ཆོས་ངོས་བཟུང་བ་སྐབས་དང་པོའི་འགྲེལ་པའོ།། །། གཉིས་པ། ལུང་གི་ཆོས་འཁོར་བྱེ་བྲག་ཏུ་ཕྱེ་བའི་སྐབས། ཅ༢ སྐབས་གཉིས་པ་ལུང་གི་ཆོས་འཁོར་བྱེ་བྲག་ཏུ་བཤད་པ་ལ་གཉིས། ཆ༡ བཞེད་པ་སྤྱིར་བསྟན་པ། ཆ༢ ཆོས་འཁོར་བྱེ་བྲག་ཏུ་བཤད་པའོ། ། ཆ༡ དང་པོ་ནི། སྟོན་པ་མངོན་སངས་རྒྱས་ཏེ་བདུན་ཕྲག་བདུན། ། རྫོགས་མཐར་ཆོས་འཁོར་བསྐོར་ནས་མྱང་འདས་བར། ། ཐེག་དམན་འབའ་ཞིག་གསུངས་ཞེས་ཉན་ཐོས་སྨྲ། ། ཐེག་ཆེན་པ་རྣམས་འཁོར་ལོ་གསུམ་དུ་བཞེད། ། སྟོན་པ་བཅོམ་ལྡན་འདས་ཤཱཀྱའི་དབང་པོ་བྱང་ཆུབ་ཀྱི་སྙིང་པོར་མངོན་པར་རྫོགས་པར་སངས་རྒྱས་ནས་ཞག་བདུན་ཕྲག་བདུན་དུ་ཆོས་མ་གསུངས་ལ། ཞག་གྲངས་ཞེ་དགུ་རྫོགས་པའི་མཐར་ཚངས་པས་གསོལ་བ་བཏབ་སྟེ་ཝ་ར་ཎཱ་སིར་ཆོས་ཀྱི་འཁོར་ལོ་ཐོག་མར་བསྐོར་ནས་མྱ་ངན་ལས་འདས་ཀྱི་བར་དུ་ཐེག་དམན་ཉན་ཐོས་ཀྱི་སྡེ་སྣོད་བདེན་པ་བཞིའི་ཚུལ་ལས་བརྩམས་པ་འབའ་ཞིག་གསུངས་སོ་ཞེས་ཉན་ཐོས་སཻནྡྷ་པ་རྣམས་དེ་སྐད་དུ་སྨྲ་ཞིང༌། འཁོར་ལོ་ཕྱི་མ་གཉིས་ཀྱི་རྣམ་གཞག་ཁས་མི་ལེན་ནོ། ། ཐེག་ཆེན་པ་རྣམས་ནི་ཆོས་ཀྱི་འཁོར་ལོ་རིམ་པ་གསུམ་དུ་བསྐོར་བར་བཞེད་ཅིང་། དེའི་ཚུལ་རྒྱས་པར་འཆད་པར་འགྱུར་རོ། ། ཆ༢ གཉིས་པ་[ཆོས་འཁོར་བྱེ་བྲག་ཏུ་བཤད་པ་]ལ་གསུམ། ཇ༡ ཆོས་འཁོར་གྱི་ངོ་བོ། ཇ༢ ངེས་ཚིག ། ཇ༣ རྣམ་པར་དབྱེ་བའོ། ། ཇ༡ དང་པོ་ལའང་གཉིས། ཉ༡ སྤྱིར་ཆོས་འཁོར་གྱི་ངོ་བོ། ཉ༢ བྱེ་བྲག་ལུང་ཆོས་ཀྱི་མཚན་ཉིད་དོ། ། ཉ༡ དང་པོ་ནི། ཆོས་འཁོར་ངོ་བོ་དམ་ཆོས་མི་མཐུན་གཅོད། ། སྤྱིར་ཆོས་ཀྱི་འཁོར་ལོ་ཞེས་བྱ་བ་སྟོན་པས་གསུངས་པའི་དམ་པའི་ཆོས་གང་ཞིག །མི་མཐུན་ཕྱོགས་འཇོམས་ཤིང་གཅོད་པའི་ནུས་པ་ཅན་ནོ། ། བྱེ་སྨྲས་མཐོང་ལམ་མདོ་སྡེས་མཐོང་སྒོམ་དང༌། ། མི་སློབ་ལམ་སྟོན་ཆོས་(༩༩བ)ཀྱི་རྣམ་གྲངས་བཅས། ། དེའང་བྱེ་བྲག་ཏུ་སྨྲ་བ་རྣམས་ཀྱིས་མཐོང་ལམ་ཁོ་ན་ཆོས་འཁོར་དུ་འདོད་དེ། མཛོད་ལས། ཆོས་ཀྱི་འཁོར་ལོ་མཐོང་བའི་ལམ། ། མྱུར་བར་འགྲོ་སོགས། ཞེས་བཤད་པ་ལྟར། འཁོར་ལོས་སྒྱུར་བའི་འཁོར་ལོ་རིན་པོ་ཆེ་ནི་འདོང་བར་འདོད་པའི་སར་མྱུར་དུ་འགྲོ་བ་དང༌། ཡུལ་གཞན་འདོར་ཞིང་གཞན་དུ་འཇུག་པ་དང༌། གྲོང་དང་གྲོང་རྡལ་སོགས་མ་རྒྱལ་བ་ལས་རྒྱལ་བ་དང༌། རྒྱལ་བ་རྣལ་དུ་འགོད་པ་དང༌། གནས་ལ་ལར་འཕར་ཞིང་། ལ་ལར་འབབ་པ་ལྟར། སྐད་ཅིག་བཅོ་ལྔས་བདེན་པ་རྟོགས་པའི་ཕྱིར་མྱུར་དུ་འགྲོ་བ་དང༌། བར་ཆད་མེད་ལམ་འདོར་བ་དང༌། རྣམ་གྲོལ་ལམ་མངོན་དུ་བྱ་བའི་ཕྱིར་འཇུག་པའམ། བདེན་པའི་དམིགས་པ་གཞན་འདོར་ཞིང༌། གཞན་དུ་འཇུག་པ་དང༌། བར་ཆད་མེད་ལམ་གྱིས་འཇིག་ལྟ་སོགས་ཉོན་མོངས་པ་མ་རྒྱལ་བ་རྣམས་ལས་ཐོབ་པ་གཅོད་པའི་སྒོ་ནས་རྒྱལ་བར་བྱེད་པ་དང༌། རྣམ་གྲོལ་ལམ་གྱིས་ཉོན་མོངས་བྲལ་བའི་ཐོབ་པ་དང༌། ལྷན་ཅིག་སྐྱེས་པའི་སྒོ་ནས་རྒྱལ་བ་རྣལ་དུ་དགོད་པ་དང༌། གཟུགས་དང་གཟུགས་མེད་པའི་ཁམས་ལ་དམིགས་ནས་འཕར་བ་དང༌། འདོད་པའི་ཁམས་ལ་དམིགས་ནས་འབབ་པ་ལ་སོགས་པ་རྣམས་ཀྱི་ཕྱིར། ཆོས་འཁོར་ནི་མཐོང་ལམ་ཁོ་ནའོ་ཞེས་སོ། ། མདོ་སྡེ་པ་རྣམས་ཀྱིས་ནི། མཐོང་སྒོམ་མི་སློབ་ལམ་གསུམ་ག་དེ་སྟོན་པར་བྱེད་པའི་ཆོས་ཀྱི་རྣམ་གྲངས་དང་བཅས་པ་ཆོས་འཁོར་དུ་འདོད་དེ། སློབ་དཔོན་རྒྱལ་པོའི་སྲས་ཀྱིས། དེ་ལྟ་བས་ན། ཆོས་ཀྱི་རྣམ་གྲངས་དེ་ཉིད་ཆོས་ཀྱི་འཁོར་ལོ་ཡང་ཡིན་ཏེ། ཆོས་ཀྱི་འཁོར་ལོ་རབ་ཏུ་སྟོན་པའི་ཕྱིར་རོ། །ཞེས་དང༌། མཐོང་བ་དང་སྒོམ་པ་དང་མི་སློབ་པའི་ལམ་ཡང་ཆོས་ཀྱི་འཁོར་ལོ་ཡིན་ཏེ། གདུལ་བྱའི་སྐྱེ་བོའི་རྒྱུད་ལ་འཇུག་པས་འཁོར་ལོ་ཞེས་བྱ་བའི་ཕྱིར་རོ། །ཞེས་བཤད་པས་སོ། ། ཐེག་ཆེན་ལམ་ལྔ་གསུང་རབ་ཀུན་ལ་འཇོག ། ཐེག་ཆེན་པ་ལྟར་ན། ཚོགས་ལམ་ནས་མི་སློབ་ལམ་གྱི་བར་