Tibetan
ཏ༡ བྱ་རྒྱུད། ཏ༢ སྤྱོད་རྒྱུད། ཏ༣ རྣལ་འབྱོར་རྒྱུད། ཏ༤ བླ་མེད་རྒྱུད། ཏ༥ གསུངས་ཚུལ་གཞན་བཤད་པའོ། ། ཏ༡ དང་པོ་ནི། རྒྱུད་སྡེ་བཞི་ལས་བྱ་རྒྱུད་འོག་མིན་དང༌། ། རི་རབ་རྩེ་མོ་འཇམ་དཔལ་སོགས་ལ་གསུངས། ། གསང་སྔགས་རྡོ་རྗེ་ཐེག་པ་ལ་རྒྱུད་སྡེ་རྣམ་པ་བཞིར་གྲགས་པའི། ཐོག་མར་བྱ་བའི་རྒྱུད་ནི། གནས་འོག་མིན་དུ་དཀྱིལ་འཁོར་ལ་བཀོད་པ་དང་སངས་རྒྱས་བྱང་སེམས་དཔག་ཏུ་མེད་པའི་འཁོར་ལ་གཙོ་བོར་གསུངས་ཤིང༌། རི་རབ་ཀྱི་རྩེ་མོ་སུམ་ཅུ་རྩ་གསུམ་དང་མི་ཡུལ་སོགས་སུ་འཇམ་དཔལ་སོགས་གཙོ་བོར་གྱུར་པའི་འཁོར་ལོ་ཅི་རིགས་པར་གསུངས་པ་དང༌། དཔུང་བཟང་གི་རྒྱུད་ལྕང་ལོ་ཅན་དུ་གསུངས་པར་བཤད་པ་སོགས་ཀྱང་ཡོད་དོ། ། དེའང་སྟོན་པས་ཞལ་ནས་གསུངས་པ་དང༌། སྟོན་པའི་མཐུས་འཇམ་དཔལ། སྤྱན་རས་གཟིགས། ཕྱག་རྡོར་སོགས་ཀྱིས་བཤད་པ་དང༌། འཇིག་རྟེན་པའི་ལྷ་ལ་སོགས་པས་སྨྲས་པ་སྟོན་པས་བྱིན་གྱིས་བརླབས་པ་སོགས་ཅི་རིགས་པར་མཆིས་སོ། ། ཏ༢ གཉིས་པ་[སྤྱོད་རྒྱུད་]ནི། སྤྱོད་རྒྱུད་(༡༠༤བ)རྣམ་སྣང་ཞིང་དང་ཞིང་བར་མ། ། རྩ་གསུམ་སོགས་སུ་སྲས་བཅས་རྒྱལ་ལ་སྟེ། ། གསུང་བ་པོ་ནི་མཆོག་གི་སྤྲུལ་སྐུའོ། ། སྤྱོད་པའི་རྒྱུད་ནི། གནས་རྣམ་སྣང་སངས་རྒྱས་པའི་ཞིང་ཁམས་མེ་ཏོག་གི་སྙིང་པོའི་རྒྱན་བཀོད་པ་དང༌། དེའི་ཞིང་ཁམས་བར་མ་དང་ལྕང་ལོ་ཅན་ལ་སོགས་པའི་གནས་སུ། འཁོར་དཀྱིལ་འཁོར་ལ་བཀོད་པ་དང་སྲས་དང་བཅས་པའི་རྒྱལ་བ་རྒྱ་མཚོ་ལ་བསྟན་པ་སྟེ། བྱ་སྤྱོད་གཉིས་ཀའང་གསུང་བ་པོའི་སྟོན་པ་ནི་མཆོག་གི་སྤྲུལ་པའི་སྐུ་ཉིད་ཀྱི་རྣམ་པས་སོ། ། ཏ༣ གསུམ་པ་[རྣལ་འབྱོར་རྒྱུད་]ནི། རྣལ་འབྱོར་རྒྱུད་ནི་སྟོན་པ་འོག་མིན་དུ། ། སངས་རྒྱས་ལས་སྤྲུལ་ལོངས་སྐུ་ཆུང་ངུ་ཡིས། ། རི་རབ་རྩེ་མོར་དཀྱིལ་འཁོར་སྤྲུལ་པ་དང༌། ། གཞན་འཕྲུལ་དབང་བྱེད་ལ་སོགས་མ་ངེས་གསུངས། ། རྣལ་འབྱོར་རྒྱུད་ནི། སྟོན་པ་འོག་མིན་དུ་ལོངས་སྤྱོད་རྫོགས་སྐུར་སངས་རྒྱས་ནས། ལོངས་སྐུ་ཆུང་ངུའམ། སྤྲུལ་སྐུའི་རྣམ་སྣང་རི་རབ་ཀྱི་རྩེ་མོར་གཤེགས་ནས། དེ་བཞིན་གཤེགས་པའི་དཀྱིལ་འཁོར་ཆེན་པོར་སྤྲུལ་བཤད་མཛད་པའི་ཚུལ་གྱིས་གཙོ་བོར་གསུངས་ཤིང༌། གཞན་ནི་གཞན་འཕྲུལ་དབང་བྱེད་ཀྱི་གནས་སོགས་སུ་མ་ངེས་པར་བསྟན་པར་མཛད་དོ། ། ཏ༤ བཞི་པ་[བླ་མེད་རྒྱུད་]ནི། བླ་མེད་གསང་འདུས་སྟོན་པས་བདུད་བཏུལ་རྗེས། ། དགའ་ལྡན་ཡང་ན་གཞན་འཕྲུལ་གནས་སུ་གཤེགས། ། དཀྱིལ་འཁོར་སྤྲུལ་ནས་མཁའ་ཁྱབ་འཁོར་ལ་གསུངས། ། ཨཱ་ལངྐཱ་ར་ཀུན་སྙིང་དག་གིས་བཞེད། ། རྣལ་འབྱོར་བླ་ན་མེད་པའི་རྒྱུད་རྣམས་ལས། ཕ་རྒྱུད་གསང་བ་འདུས་པ་ནི། སྟོན་པ་ནམ་ཕྱེད་ལ་སངས་རྒྱས་པའི་ཐོ་རངས་བདུད་བཏུལ་ཏེ་དགའ་ལྡན་དུ་བྱོན་ནས། དེར་སྐུའི་འབྱུང་བ་ཆེན་པོ་ལས་གཞལ་ཡས་ཁང་སྤྲུལ། ཕུང་ཁམས་སོགས་ལས་དཀྱིལ་འཁོར་བཀོད་པའི་ལྷ་རྣམས་སྤྲུལ་ཏེ། འཁོར་ནམ་མཁའ་ཁྱབ་པས་བཅོམ་ལྡན་འདས་ལ་གསོལ་བ་བཏབ་པས། འདོད་ཆགས་ཅན་རྗེས་སུ་བཟུང་བའི་ཕྱིར་གསུངས་པར་བཞེད་ཅིང༌། རབ་ཏུ་སྒྲོན་གསལ་ལས་ཀྱང་དགའ་ལྡན་དུ་གསུངས་པར་བཤད། ཡང་ན། ཁྱབ་འཇུག་སོགས་ཀྱི་རྒྱུད་ལ་དགའ་བའི་སྐྱེ་བོ་འདོད་ཆགས་ཅན་(༡༠༥ན)རྣམས་ཀྱི་དོན་དུ་གཞན་འཕྲུལ་དབང་བྱེད་ཀྱི་གནས་སུ་གཤེགས་ནས་དཀྱིལ་འཁོར་སྤྲུལ་ཏེ་མཁའ་ཁྱབ་ཀྱི་འཁོར་ལ་གསུངས་པའང་བཤད་དོ། ། སྔ་མ་ནི་པཎྜི་ཏ་ཨ་ལངྐཱ་ར་ཀ་ལཱ་ཤ་དང༌། ཕྱི་མ་ནི་ཡོ་གའི་ཤིང་རྟ་པ་ཆེན་པོ་སློབ་དཔོན་ཀུན་དགའ་སྙིང་པོ་དག་གིས་བཞེད་པ་ཡིན་ནོ། ། བོད་སོགས་སྟོན་པ་མཉན་ཡོད་བཞུགས་པའི་ཚེ། ། ཨིནྡྲ་བྷཱུ་ཏིས་གསོལ་བཏབ་ཨོ་རྒྱན་གཤེགས། ། སྤྲུལ་པའི་དལ་དུ་དབང་རྒྱུད་གནང་བར་བཤད། ། བོད་ཀྱི་མཁས་པ་རྣམས་དང་། སོགས་ཁོངས་ནས་རྒྱ་གཞུང་ཁ་ཅིག་ནས་ཀྱང་སྟོན་པ་མཉན་ཡོད་ན་བཞུགས་པའི་ཚེ། ཨོ་རྒྱན་གྱི་རྒྱལ་པོ་ཨིནྡྲ་བྷཱུ་ཏིས་བཅོམ་ལྡན་འདས་ཀྱི་ཆེ་བའི་ཡོན་ཏན་ཐོས་ནས་སྤྱན་འདྲེན་པའི་གསོལ་བ་བཏབ་པས། སྟོན་པ་འཁོར་བཅས་བྱོན་པ་ལ་མཆོད་དེ་སྲིད་པ་ལས་ཐར་བར་གསོལ་བ་ལས། རབ་ཏུ་བྱུང་ཞིག་གསུངས་པ་ལ། འདོད་ཡོན་སྤྱོད་བཞིན་དུ་འཚང་རྒྱ་བ་ཞིག་ཞུས་པས། སྟོན་པས་སྤྲུལ་སྐུའི་སྣང་བ་སྡུས་ཏེ་དཔལ་གསང་བ་འདུས་པའི་དཀྱིལ་འཁོར་སྤྲུལ་ནས། ཨིནྡྲ་བྷཱུ་ཏི་སོགས་ཉན་པའི་སྐལ་བ་ཅན་རྣམས་ལ་དབང་བསྐུར་རྒྱུད་བསྟན་ནས་རྡོ་རྗེ་ཆོས་ལ་རྒྱུད་གཏད་པར་བཤད་དོ། ། གཤེད་སྐོར་བདུད་དཔུང་འདུལ་ཚེ་གསང་གསུམ་གྱི། ། རྡོ་རྗེ་ལས་བྱུང་དཀྱིལ་འཁོར་སྤྲུལ་སོགས་མང༌། ། གཤིན་རྗེ་གཤེད་ཀྱི་སྐོར་ནི། སྟོན་པ་མངོན་པར་བྱང་ཆུབ་པའི་དུས་བདུད་དཔུང་རྣམས་ཀྱིས་བར་དུ་གཅོད་པའི་ཚེ། སྟོན་པས་བདུད་ཆེན་པོ་ལས་མཆོག་ཏུ་རྒྱལ་བ་ཞེས་པའི་ཏིང་ངེ་འཛིན་ལ་བཞུགས་ཏེ། སྐུ་གསུང་ཐུགས་ཀྱི་རྡོ་རྗེ་ལས་ཁྲོ་བོ་གཤིན་རྗེ་གཤེད་ཕྱུང་ནས་དཀྱིལ་འཁོར་སྤྲུལ་ཏེ་བདུད་ཐམས་ཅད་བཏུལ་ནས་རྒྱུད་རྒྱས་པར་གསུངས། སོགས་ཁོངས་ནས་གཤེད་སྐོར་སོ་སོ་ལ་གླེང་བཞི་ཡོད་པས་མང་སྟེ། སྟོན་པ་གཤིན་རྗེ་གཤེད་ལྷ་བཅུ་གསུམ་དང་བཅས་པའི་འཁོར་ཚོགས་མང་པོ་དང་ཐབས་གཅིག་ཏུ་བཞུགས་ནས་བསྡུས་རྒྱུད་གསུངས། སྟོན་པ་རྡོ་རྗེ་བཙུན་མོའི་བྷ་ག་ཞེས་པ་ཆོས་འབྱུང་གི་ནང་གི་གཞལ་ཡས་ཁང་ན་(༡༠༥བ)གཏི་མུག་རྡོ་རྗེ་སོགས་དང་ལྷན་ཅིག་བཞུགས་པའི་ཚེ། ཕྱག་རྡོར་ལ་ཉན་པར་གདམས་པས། དེས་ཞུས་ནས་གཤེད་དམར་གསུངས་སོ། ། དགྱེས་རྡོར་བདུད་འཇོམས་ཚེ་ན་ཆོས་འབྱུང་དུ། ། རྩ་བའི་རྒྱུད་བསྟན་བཤད་རྒྱུད་གཞན་དུའོ། ། མ་རྒྱུད་དགྱེས་པ་རྡོ་རྗེ་ནི། རྡོ་རྗེ་ཕྲེང་བའི་འགྲེལ་པར། གནས་ཛམྦུའི་གླིང་དུ་སྤྲུལ་པའི་སྐུས་མ་ག་ངྷར་བདུད་བཞི་འཇོམས་པའི་དུས་གསུངས་པར་བཤད་ལ། དེ་ཡང་རྡོ་རྗེ་བཙུན་མོའི་བྷ་ག་ཞེས་པ་ཆོས་འབྱུང་སྟེ། དེའི་ནང་དུ་གནས་པའི་གཞལ་ཡས་ཁང་དུ་སྟོན་པ་བཅོམ་ལྡན་འདས་འཁོར་འཇིག་རྟེན་དང་འཇིག་རྟེན་ལས་འདས་པ་དུ་མས་བསྐོར་ཏེ་བཞུགས་པ་ལ། རྡོ་རྗེ་སྙིང་པོ་དང་བདག་མེད་མ་ལ་སོགས་ཀྱིས་ཞུས་ནས་རྩ་རྒྱུད་རྒྱས་པ་དང་བསྡུས་རྒྱུད་བརྟག་གཉིས་གསུངས། སྟོན་པ་གཞལ་ཡས་ཁང་གི་དབུས་སུ་འཁོར་ལོས་སྒྱུར་བ་ལྔའི་ལྷ་ཚོགས་དང་འཇིག་རྟེན་དང་འཇིག་རྟེན་ལས་འདས་པའི་འཁོར་བཅས་ཏེ་བཤད་རྒྱུད་རྡོ་རྗེ་གུར་གསུངས་ཏེ་དུས་རྩ་རྒྱུད་ལས་གཞན་དུའོ། ། བདེ་མཆོག་ཐོག་མ་མེད་ནས་རྒྱལ་བས་གསུངས། ། གཉིས་ལྡན་དུས་སུ་འབྲས་བུའི་ཧེ་རུ་ཀས། ། ཛམྦུའི་གླིང་དུ་འཁོར་ལ་བསྐྱར་ནས་བཤད། ། རྩོད་དུས་དྲག་པོ་ཆུང་མ་འཁོར་བཅས་ཀྱིས། ། གནས་ཡུལ་དུར་ཁྲོད་རྣམས་ལ་དབང་བྱེད་ཚེ། ། སྤྲུལ་པས་བཏུལ་ནས་དཀྱིལ་འཁོར་བཀོད་དེ་གསུངས། ། འཁོར་ལོ་བདེ་མཆོག་གི་རྒྱུད་རྣམས་ནི། ཐོག་མ་མེད་པའི་དུས་ནས་སངས་རྒྱས་ཐམས་ཅད་ཀྱིས་བསྟན་པར་བཤད་པ་དང༌། ཐོག་མ་མེད་པར་སྟོན་པ་འདི་སངས་རྒྱས་ནས་བསྟན་པར་བཞེད་པ་དང༌། གཉིས་ལྡན་གྱི་དུས་དྲག་པོ་འཇིགས་བྱེད་བཏུལ་བའི་གནས་ཛམྦུའི་གླིང་འདིར་སྟོན་པ་སྤྲུལ་པའི་སྐུ་འབྲས་བུའི་ཧེ་རུ་ཀས་འཁོར་སངས་རྒྱས་བྱང་སེམས་རིགས་ལྔའི་དཔའ་བོ་དང་དཔའ་མོ། སྡུད་པ་པོ་གསང་བདག །དྲག་པོ་འཇིགས་བྱེད་འཁོར་དང་བཅས་པ་རྣམས་ལ་དབང་བསྐུར་ཞིང་རྒྱུད་བསྐྱར་ནས་བསྟན་པར་བཤད་པ་དང༌། རྩོད་ལྡན་གྱི་དུས་དྲག་པོ་འཇིགས་བྱེད་དབང་ཕྱུག་ཆེན་པོ་ཞི་རྒྱས་(༡༠༦ན)དབང་དྲག་གི་སྐུ་བཞི་ཆུང་མ་དང་བཅས་པས་རི་རབ་ཀྱི་བྱང་ཤར་དང་དབུས་དང་གཞན་འཕྲུལ་དབང་བྱེད་དང་མ་ག་དྷཱ་རྣམས་སུ་གནས་ཏེ། ཡུལ་ཉེར་བཞི་དང་དུར་ཁྲོད་བརྒྱད་རྣམས་དེའི་རྗེས་འཇུག་གི་ལྷ་དང་དྲི་ཟ་དང་གནོད་སྦྱིན་དང་སྲིན་པོ་དང་ཀླུ་དང་མི་མ་ཡིན་རྣམས་བཞི་བཞིར་དབྱེ་བས་ཉེར་བཞི་དང༌། མིའམ་ཅི་བཞི་དང་ཕྲ་མེན་བཞི་སྟེ་བརྒྱད་ཀྱིས་བཟུང་ནས་ཛམྦུའི་གླིང་ཐམས་ཅད་དབང་དུ་བསྡུས་ཤིང་ལས་ལོག་པ་ལ་རང་ཡང་ཞུགས་ནས། གཞན་ཡང་འགོད་པར་བྱེད་པའི་དུས་སྟོན་པ་རྡོ་རྗེ་འཆང་བྱང་ཆུབ་པ་ལྔས་མངོན་པར་རྫོགས་པར་སངས་རྒྱས་ཏེ་ཆོས་ཀྱི་དབྱིངས་ཀྱི་ངང་ནས་འོག་མིན་དུ་སངས་རྒྱས་བྱང་སེམས་དཔག་ཏུ་མེད་པ་ལ་འོད་གསལ་ལྷན་ཅིག་སྐྱེས་པའི་ཆོས་བསྟན། དྲག་པོ་དབང་ཕྱུག་འཁོར་བཅས་འདུལ་བའི་དུས་ལ་བབ་པར་མཁྱེན་ཏེ། སྤྲུལ་སྐུ་འབྲས་བུའི་ཧེ་རུ་ཀར་བཞེངས་ནས་རི་རབ་ཀྱི་རྩེ་མོར་བྱོན་པ་ལ། རིགས་ལྔའི་རྒྱལ་བས་གཞལ་ཡས་ཁང་དང་དཔའ་བོ་དཔའ་མོ་ལ་སོགས་པའི་ལྷ་རྣམས་སྤྲུལ་ཏེ་ཕུལ་བས། སྟོན་པ་ཉིད་ལོངས་སྐུའི་ཏིང་ངེ་འཛིན་ལ་བཞུགས་ནས་གདུལ་བྱ་ལ་གཟིགས་ཏེ། གླིང་བཞི་བྱེ་བ་ཕྲག་བརྒྱར་དཀྱིལ་འཁོར་གྱི་འཁོར་ལོ་སྣ་ཚོགས་པ་སྤྲོས། ཛམྦུའི་གླིང་འདིར་བདེ་མཆོག་ཞལ་བཞི་ཕྱག་བཅུ་གཉིས་པར་སྤྲུལ་ནས་འཇིགས་བྱེད་དང་དུས་མཚན་ཞབས་འོག་ཏུ་མནན་ཞིང་བཏུལ། སྤྲུལ་པའི་འཁོར་རྣམས་ཀྱིས་ཀྱང་ཡུལ་ཉེར་བཞི་དང་དུར་ཁྲོད་བརྒྱད་བཟུང་བའི་མ་རུངས་པ་རྣམས་བཏུལ། རི་རབ་ཀྱི་རྩེ་མོར་བཅོམ་ལྡན་འདས་གཞལ་ཡས་ཁང་དུ་འཁོད་དེ། འཁོར་དཀྱིལ་འཁོར་ལ་འཁོད་པ་དང་སངས་རྒྱས་བྱང་སེམས་རི་རབ་ཀྱི་རྡུལ་དང་མཉམ་པ་དང༌། དྲག་པོ་འཇིགས་བྱེད་འཁོར་བཅས་དང༌། སྐལ་བ་དང་ལྡན་པའི་ལྷ་མི་དང་བཅས་པ་ལ། རྡོ་རྗེ་རྣལ་འབྱོར་མས་ཞུས་ཏེ་རྩ་རྒྱུད་དང༌། ཕྱག་རྡོར་གྱིས་ཞུས་ཏེ་བཤད་རྒྱུད་རྣམས་གསུངས་པར་བཞེད་པ་དང༌། གཞན་ཡང་བཤད་ཚུལ་སྣ་ཚོགས་པ་སྣང་ངོ༌། ། དུས་འཁོར་མྱ་ངན་(༡༠༦བ)འདས་པའི་སྔ་ལོགས་ཀྱི། ། ནག་ཉར་དཔལ་ལྡན་འབྲས་སྤུངས་མཆོད་རྟེན་གྱི། ། འོག་ཏུ་ཆོས་དབྱིངས་གསུང་དབང་སྟེང་མར་ནི། ། དཔལ་ལྡན་རྒྱུ་སྐར་དཀྱིལ་འཁོར་ལེགས་སྤྲུལ་ནས། ། ཟླ་བཟང་ལ་སོགས་སྐལ་ལྡན་འཁོར་ལ་གསུངས། ། དཔལ་དུས་ཀྱི་འཁོར་ལོ་ནི། སྟོན་པ་མྱ་ངན་ལས་འདས་པའི་ཚུལ་བསྟན་པའི་སྔ་ལོགས་ཀྱི་ལོར། ནག་པའི་ཉ་ལ་སངས་རྒྱས་ཀྱི་མཐུས་ལྷོ་ཕྱོགས་དཔལ་ལྡན་འབྲས་སྤུངས་ཀྱི་མཆོད་རྟེན་དུ་གཤེགས་ཏེ། འོག་ཏུ་ཆོས་དབྱིངས་གསུང་གི་དབང་ཕྱུག་དང་སྟེང་དུ་དཔལ་ལྡན་རྒྱུ་སྐར་གྱི་དཀྱིལ་འཁོར་ལེགས་པར་སྤྲུལ་ནས་རྡོ་རྗེ་སེང་གེའི་ཁྲི་ལ་བཞུགས་ཏེ་དཀྱིལ་འཁོར་ལ་བཀོད་པའི་འཁོར་རྣམས་དང༌། ཞུ་བ་པོ་རྒྱལ་པོ་ཟླ་བ་བཟང་པོ་དང་གཞན་ཡང་རྒྱལ་པོ་དགུ་བཅུ་རྩ་དྲུག་ལ་སོགས་པ་སྐལ་བ་དང་ལྡན་པའི་འཁོར་རྣམས་ལ་རྩ་བའི་རྒྱུད་ཀྱི་རྒྱལ་པོ་སྟོང་ཕྲག་བཅུ་གཉིས་པ་གསུངས་སོ། ། འདི་ནི་ཀུན་མཁྱེན་རང་བྱུང་ཞབས་སོགས་བོད་ཀྱི་དུས་འཁོར་བ་ཡོངས་གྲགས་རྣམས་ཀྱི་ལུགས་ལྟར་བཤད་ཀྱི། ཇོ་ནང་རྗེ་བཙུན་ཆེན་པོ་རྗེས་འབྲངས་དང་བཅས་པ་རྣམས་ནི་སྟོན་པ་སངས་རྒྱས་པའི་ཕྱི་ལོར་གསུངས་པར་བཞེད་དོ། ། ཏ༥ ལྔ་པ་[གསུངས་ཚུལ་གཞན་བཤད་པ་]ནི། འབྲས་སྤུངས་ཁོ་ནར་རྒྱུད་སྡེ་མ་ལུས་པ། ། བསྟན་པར་བཞེད་དང་ཀུན་རྫོབ་དོན་དམ་གྱི། ། ཐ་དད་གནས་སུ་འཁོར་ལོའི་མགོན་པོའི་སྐུར། ། བཞེངས་ཏེ་སྟོན་འཁོར་དབྱེར་མེད་བདེ་ཆེན་དང༌། ། ནཱ་དའི་དབྱངས་ཀྱིས་དུས་ཀུན་བསྒྲགས་པའོ། ། བཤད་མ་ཐག་པ་དེ་རྣམས་ཀྱང་ཕྱོགས་རེ་བའི་དབང་དུ་བྱས་པ་ཡིན་གྱི་གཞན་དུ་ན། ཐེག་པ་ཆེན་པོ་གསང་སྔགས་ཀྱི་ཚུལ་ནི་ཟབ་པ་དང་རྒྱ་ཆེ་བའི་མཐར་ཐུག་པ་ཡིན་པའི་ཕྱིར། འདི་ཁོ་ནར་ཟད་ཀྱི། འདི་ལས་གཞན་མ་གསུངས་སོ་ཞེས་སྨྲ་བར་མི་ནུས་ཏེ། དཔལ་ལྡན་འབྲས་སྤུངས་ཀྱི་མཆོད་རྟེན་ཁོ་ནར་རྒྱུད་སྡེ་མ་ལུས་པ་རྫོགས་པར་བསྟན་པར་བཞེད་པའང་ཡོད་ཅིང་། དེ་ལའང་ཕྱོགས་འདིར་མ་བྱོན་པའི་རྒྱུད་སྡེ་དུ་མའི་ལུང་ཁུངས་གྲུབ་(༡༠༧ན)ཐོབ་བརྒྱུད་པའི་བཤད་རྒྱུན་ལས་བྱུང་བར་གྲགས་པ་དང༌། འོག་མིན་དང༌། དགའ་ལྡན་དང༌། རི་རབ་ཀྱི་རྩེ་དང༌། ཨཽཌྱན་དང༌། དཔལ་ལྡན་འབྲས་སྤུངས་ཀྱི་མཆོད་རྟེན་ལ་སོགས་པ་གནས་ཀྱི་བྱེ་བྲག་ཀུན་རྫོབ་པའི་དབྱེ་བ་བསྟན་པ་དང༌། རྡོ་རྗེ་བཙུན་མོའི་བྷ་ག་དང༌། བདེ་བ་ཆེན་པོའི་གནས་དང༌། ཆོས་ཀྱི་འབྱུང་གནས་ཐར་པ་ཆེན་པོའི་ཕོ་བྲང་སོགས་སྤྲོས་མཚན་གྱི་ཡུལ་ཐམས་ཅད་ལས་འདས་པ་ཆོས་ཀྱི་དབྱིངས་འགྱུར་བ་མེད་པ་དོན་དམ་པའི་གནས་རྣམས་སུ་སྟོན་པ་དཔལ་འཁོར་ལོ་སྡོམ་པ་དང༌། དགྱེས་པ་རྡོ་རྗེ་དང༌། དུས་ཀྱི་འཁོར་ལོ་ལ་སོགས་པ་དཀྱིལ་འཁོར་རྒྱ་མཚོའི་འཁོར་ལོའི་མགོན་པོའི་སྐུར་བཞེངས་ཏེ། ཇི་སྐད་དུ། འཆད་པ་པོ་ང་ཆོས་ཀྱང་ང༌། ། རང་གི་ཚོགས་ལྡན་ཉན་པ་ང༌། ། འཇིག་རྟེན་སྟོན་པ་བསྒྲུབ་བྱ་ང༌། ། འཇིག་རྟེན་འཇིག་རྟེན་འདས་པ་ང༌། ། ཞེས་པ་ལྟར། སྟོན་འཁོར་ཐ་མི་དད་པ་བདེ་བ་ཆེན་པོ་གཅིག་གི་རང་བཞིན་ལས། རྡོ་རྗེ་ནཱ་ད་མི་ཤིགས་པའི་སྒྲའི་གསང་བ་ཆེན་པོས་ཆོས་ཀྱི་འཁོར་ལོ་དུས་རྟག་ཏུ་བསྐོར་ཞིང་བསྒྲགས་པར་ཤེས་པར་བྱའོ། ། ལུང་གི་ཆོས་འཁོར་བྱེ་བྲག་ཏུ་དབྱེ་བའི་སྐབས་སོ། ། ལུང་གི་ཆོས་འཁོར་བྱེ་བྲག་ཏུ་དབྱེ་བ་སྐབས་གཉིས་པའི་འགྲེལ་པའོ།། །། གསུམ་པ། བཀའ་ཡི་བསྡུ་བ་རྣམས་བཤད་པའི་སྐབས། ཅ༣ སྐབས་གསུམ་པ་བཀའི་བསྡུ་བ་བཤད་པ་ལ་གསུམ། ཆ༡ བཀའ་བསྡུ་དང་པོ། ཆ༢ བར་པ། ཆ༣ ཐ་མའོ། ། ཆ༡ དང་པོ་ལ་བཞི། ཇ༡ བསྡུ་བ་བྱ་བའི་དགོས་པ། ཇ༢ ཐེག་དམན། ཇ༣ ཐེག་ཆེན། ཇ༤ རྡོ་རྗེ་ཐེག་པ་བསྡུས་ཚུལ་ལོ། ། ཇ༡ དང་པོ་ནི། སྟོན་པ་འདས་པའི་ཕྱི་ལོར་ལྷ་རྣམས་ཀྱིས། ། འཕྱ་བ་སེལ་དང་བསྟན་པ་ཡུན་གནས་ཕྱིར། ། སྟོན་པ་མཆོག་ཟུང་འཁོར་དགྲ་བཅོམ་པ་དུ་མ་དང་བཅས་མྱ་ངན་ལས་འདས་པའི་ཕྱི་ལོར་བཀའི་བསྡུ་བ་དང་པོ་བྱུང་སྟེ། དེའང་ལྷ་རྣམས་ཀྱིས་བཅོམ་ལྡན་འདས་དང་དགེ་སློང་དབང་ཡོད་པ་དག་ཀྱང་འདས་པས་བཅོམ་ལྡན་འདས་ཀྱི་མདོ་སྡེ་དང་འདུལ་བ་དང་མ་མོ་དག་མི་སྒྲོགས་སོ་ཞེས་འཕྱ་བར་བྱེད་པ་སེལ་བ་དང༌། མ་འོངས་པའི་དུས་ཀྱི་དགེ་སློང་རྣམས་(༡༠༧བ)བརྗེད་ངས་ཆེ་བ་སོགས་ཀྱིས་ཚིག་དོན་འཛིན་པར་མི་ནུས་པ་ལ་ཕན་གདགས་ཤིང་བསྟན་པ་རིན་པོ་ཆེ་ཡུན་རིང་དུ་གནས་པར་བྱ་བའི་ཕྱིར་བསྡུ་བ་མཛད་པ་ཡིན་ནོ། ། ཇ༢ གཉིས་པ་[ཐེག་དམན་བསྡུས་ཚུལ་]ནི། ནྱ་གྲོ་དྷ་ཡི་ཕུག་ཏུ་དགྲ་བཅོམ་པ། ། ལྔ་བརྒྱ་འདུས་ཏེ་ཀུན་དགའ་ཉེ་བར་འཁོར། ། འོད་སྲུང་གསུམ་གྱིས་མདོ་འདུལ་མངོན་པ་བསྡུས། ། དེ་ཡང་འོད་སྲུང་ཆེན་པོས་རྩྭ་ཅན་ཉིད་དུ་དགྲ་བཅོམ་པ་གང་པོ་ལ་དགེ་འདུན་སྡུས་ཤིག་པར་བསྒོས་པས། དེས་གཎྜི་བརྡུང་པ་དང་བ་ལང་བདག་མ་གཏོགས་པ་ཡུལ་ཐ་དད་ན་གནས་པའི་དགེ་སློང་ཐམས་ཅད་འདུས་སོ། །བ་ལང་བདག་སུམ་ཅུ་རྩ་གསུམ་དུ་འགོག་སྙོམས་ལ་གནས་པ་གང་པོ་འབོད་དུ་ཕྱིན་པས་སངས་རྒྱས་མི་བཞུགས་པར་ཤེས་ནས་མྱ་ངན་ལས་འདས། དེ་ཕྱིན་ཆད་སུའང་མྱ་ངན་ལས་མི་འདའ་བ་འོད་སྲུང་ཆེན་པོས་ཁྲིམས་སུ་བཅས་ནས། རྒྱལ་པོ་མ་སྐྱེས་དགྲས་ཡོ་བྱད་བསྟབས་ཏེ་འོད་སྲུང་ཆེན་པོ་སོགས་དགེ་སློང་ལྔ་བརྒྱར་གཅིག་གིས་ལྷག་པ་མ་ག་དྷཱའི་ནྱ་གྲོ་དྷའི་ཕུག་ཏུ་འདུས་ནས་དབྱར་གནས་པར་ཁས་བླངས་སོ། ། དེའི་ཚེ་སྔོན་བཅོམ་ལྡན་འདས་ཀྱིས་འོད་སྲུང་ཆེན་པོ་ལ་བཞུགས་གདན་གྱི་ཕྱེད་བསྟབས་ཏེ། མ་མོའི་སྡེ་སྣོད་གཙོ་བོར་གྱུར་པའི་བསྟན་པ་མཐའ་དག་དང༌། སྒྲ་གཅན་ཟིན་དང་ཀུན་དགའ་བོ་སོགས་འཁོར་བཞི་དང་བཅས་པ་གཏད་ནས་རྒྱལ་ཚབ་ཏུ་དབང་བསྐུར་བ་ཡིན་པ་དང༌། བྱེ་བྲག་ཏུ་མདོའི་སྡེ་སྣོད་ཀུན་དགའ་བོ་དང༌། འདུལ་བ་ཉེ་བར་འཁོར་ལ་གཏད་པ་ཡིན་ནའང༌། དགེ་སློང་ལྔ་བརྒྱ་ལས་གཞན་ཐམས་ཅད་དགྲ་བཅོམ་པ་ཡིན་ལ། ཀུན་དགའ་བོ་ཁོ་ན་སློབ་པ་རྒྱུན་ཞུགས་ཡིན་པའི་ཕྱིར་ཆགས་བྲལ་དུ་མ་གྱུར་ན་ཆོས་བགྲོ་བའི་འོས་མ་ཡིན་པས། འོད་སྲུང་ཆེན་པོས་དེ་ཚུལ་ཇི་ལྟ་བུས་འདུལ་བར་གཟིགས་ཏེ་ཉེས་པ་བརྒྱད་གླེངས་ནས་བསྐྲད་པ་དང༌། ཀུན་དགའ་བོ་མྱ་ངན་དང་བཅས་ཏེ་མཆོག་གི་འདུས་པ་ལས་ཕྱིར་བྱུང་སྟེ་བྲྀ་ཛིའི་ལྗོངས་སུ་དབྱར་ཚུལ་ལ་ཞུགས་ནས་བྲྀ་ཛིའི་བུ་སོགས་འཁོར་བཞི་ལ་ཆོས་སྟོན་པ་ན་བྲྀ་ཛིའི་བུས་དགྲ་བཅོམ་པ་ཐོབ་སྟེ། མངོན་(༡༠༨ན)པར་ཤེས་པས་མཁན་པོའི་སེམས་ལ་བལྟས་པ་དང༌། དེ་འདོད་ཆགས་དང་མ་བྲལ་བའི་སློབ་པར་མཐོང་སྟེ། སྨྲས་པ། གཽ་ཏམ་ཁྱོད་ནི་བག་མེད་མ་མཛད་པར། ། ཤིང་དྲུང་ཐིབས་པོར་བརྟེན་ནས་མྱ་ངན་འདས། ། ཐུགས་ལ་བཞག་སྟེ་བསམ་གཏན་མཛོད་ཅིག་དང༌། ། རིང་པོར་མི་ཐོགས་ཞི་བའི་གནས་ཐོབ་འགྱུར། ། ཞེས་བསྐུལ་བའི་གདམས་ངག་ལ་བརྟེན་ནས་རབ་ཏུ་བསྒྲིམས་པས་ཀུན་དགའ་བོས་དགྲ་བཅོམ་པ་ཉིད་ཐོབ་བོ། ། དེ་ནས་ཀུན་དགའ་བོའང་ནྱ་གྲོ་དྷའི་ཕུག་ཏུ་ཕྱིན་ནས་དགྲ་བཅོམ་པ་ལྔ་བརྒྱ་དང་ལྷན་ཅིག་ཏུ་གནས་པའི་ཚེ། འོད་སྲུང་ཆེན་པོ་དང་དགྲ་བཅོམ་པ་རྣམས་ཀྱིས་ཆོས་བསྡུ་བར་བགྲོས་ཏེ། ཐོག་མར་ཀུན་དགའ་བོ་གསོལ་གཉིས་ཀྱི་ལས་ཀྱིས་མདོ་སྡེ་སྡུད་པ་པོར་བསྐོས། དགྲ་བཅོམ་པ་ལྔ་བརྒྱས་སྣམ་སྦྱར་བཏིང་བའི་ཁྲི་ལ་ཀུན་དགའ་བོ་བཞུགས་ཏེ་བྱང་ཆུབ་སྙིང་པོའི་ཕྱོགས་སུ་རྣམ་པར་བལྟས་ནས་སངས་རྒྱས་རྗེས་སུ་དྲན་བཞིན་དུ་ཐལ་མོ་སྦྱར་ཏེ་སྒྲས་ཁྱབ་པར་བྱས་ནས། འདི་སྐད་བདག་གིས་ཐོས་པའི་དུས་གཅིག་ན། ཞེས་གླེང་གཞི་ནས་བརྩམས། མདོ་སྡེ་ཐམས་ཅད་རྫོགས་པར་བཤད་པ་དང༌། དགྲ་བཅོམ་པ་དེ་དག་བསམ་གཏན་བཞི་ལ་སྙོམས་པར་ཞུགས་ནས་སྨོན་ཤེས་ཀྱིས་བལྟས་ཏེ་ཏིང་ངེ་འཛིན་ལས་ལངས་ནས་ཕན་ཚུན་ངེས་པར་བྱས། དེ་ནས་ཉེ་བར་འཁོར་འདུལ་བ་སྡུད་པ་པོར་བསྐོས་ཏེ། དེ་ཉིད་སེང་གེའི་ཁྲི་ལ་འཛེགས་པ་དང༌། འོད་སྲུང་གིས་བཅོམ་ལྡན་འདས་ཀྱིས་དང་པོར་བསླབ་པའི་གཞི་གང་དུ་བཅས། དེས་སྨྲས་པ་ཝ་ར་ཎཱ་སིར་རོ། །གང་དག་གི་དོན་དུ། དགེ་སློང་ལྔ་སྡེའི་ཆེད་དུ་སྟེ། གང་གི་ཕྱིར། འདི་ལྟ་སྟེ། ཤམ་ཐབས་ཟླུམ་པོར་བགོ་བར་བྱའོ་ཞེས་བསླབ་པ་བཅའ་བར་མཛད་དོ། །ཞེས་སོགས་དྲི་ལན་གྱི་སྒོ་ནས་འདུལ་བ་ཡོངས་སུ་རྫོགས་པར་བསྙད་པ་དང༌། དེ་དག་གིས་མངོན་པར་ཤེས་པས་བལྟས་ཏེ་ཕན་ཚུན་ངེས་