Tibetan
ཐམས་ཅད་ཤེས་པ་ཉིད། ། ཞེས་རྣམ་མཁྱེན་ལམ་ཤེས་གཞི་ཤེས་ཏེ་ཐོས་བསམ་གྱི་ཡུལ་མཁྱེན་པ་གསུམ། རྣམ་ཀུན་མངོན་རྫོགས་རྟོགས་པ་དང༌། ། རྩེ་མོར་ཕྱིན་དང་མཐར་གྱིས་པ། ། སྐད་ཅིག་གཅིག་མངོན་རྫོགས་བྱང་ཆུབ། ། ཅེས་རྣམ་རྫོགས་སྦྱོར་བ། རྩེ་མོའི་སྦྱོར་བ། མཐར་གྱིས་པའི་སྦྱོར་བ། སྐད་ཅིག་མའི་སྦྱོར་བ་སྟེ་ཉམས་སུ་བླང་བྱའི་སྦྱོར་བ་བཞི། ཆོས་ཀྱི་སྐུ་དང་དེ་རྣམས་བརྒྱད། ། ཅེས་ཆོས་སྐུ་ཕྲིན་ལས་དང་བཅས་པ་ཐོབ་པའི་འབྲས་བུ་སྟེ་དབྱེ་གཞི་དངོས་པོ་བརྒྱད་དེ། དེ་ལ་དང་པོ་རྣམ་པ་ཐམས་ཅད་(༡༤༧བ)མངོན་པར་མཁྱེན་པ་ཉིད་ནི། ཇི་ལྟ་ཇི་སྙེད་ཀྱི་རྣམ་པ་མ་ལུས་པ་སྐད་ཅིག་མ་གཅིག་ལ་མངོན་སུམ་དུ་མཁྱེན་པ་དང༌། གཉིས་པ་ལམ་ཤེས་པ་ཉིད་ནི། ལམ་གསུམ་རང་བཞིན་མེད་པར་རྟོགས་ཤིང་རྫོགས་སྨིན་སྦྱང་ནས་ཡང་དག་མཐའ་མངོན་དུ་བྱེད་པའི་སློབ་ལམ་དང༌། གསུམ་པ་གཞི་ཐམས་ཅད་ཤེས་པ་ཉིད་ནི། གཞི་ཐམས་ཅད་གང་ཟག་གི་བདག་གིས་སྟོང་པར་རྟོགས་པའི་ཉི་ཚེ་བའི་མཁྱེན་པ་དང༌། བཞི་པ་རྣམ་ཀུན་མངོན་རྫོགས་རྟོགས་པའི་སྦྱོར་བ་ནི། མཁྱེན་གསུམ་གྱི་རྟོགས་པ་ལ་རང་དབང་ཐོབ་པར་བྱ་བའི་ཕྱིར་དུ་སྐྱེ་མེད་གསུམ་བསྡུས་ཏེ་སྒོམ་པའི་སེམས་པའི་རྣལ་འབྱོར་དང༌། ལྔ་པ་རྩེ་མོར་ཕྱིན་པའི་སྦྱོར་བ་ནི། རྣམ་རྫོགས་སྦྱོར་བ་ལ་བརྟེན་ནས་སྐྱེ་མེད་གསུམ་བསྡུས་ཏེ་སྒོམ་པ་ལ་དབང་དུ་གྱུར་པའི་སེམས་པའི་རྣལ་འབྱོར་དང༌། དྲུག་པ་མཐར་གྱིས་པའི་སྦྱོར་བ་ནི། མཁྱེན་གསུམ་གྱི་ཤེས་རྣམ་ཅིག་ཆར་དུ་སྐྱེ་བའི་རྟོགས་པ་བརྟན་པོར་བྱ་བའི་ཕྱིར་མཁྱེན་གསུམ་གྱི་རྣམ་པ་རྣམས་ཆོས་བཅུ་གསུམ་ལ་རིམ་གྱིས་སློབ་པའི་སེམས་པའི་རྣལ་འབྱོར་དང༌། བདུན་པ་སྐད་ཅིག་མ་གཅིག་ལ་མངོན་པར་རྫོགས་པ་བྱང་ཆུབ་པའི་སྦྱོར་བ་ནི། མཁྱེན་གསུམ་རིམ་གྱིས་སྒོམ་ལ་མཐར་ཐུག་པའི་སེམས་པའི་རྣལ་འབྱོར་དང༌། བརྒྱད་པ་འབྲས་བུ་ཆོས་སྐུ་ནི། སྦྱོར་བཞི་བསྒོམས་པའི་རྣམ་སྨིན་ནམ། འབྲས་བུ་མཐར་ཐུག་ཟག་མེད་ཀྱི་ཡན་ལག་དུ་མ་དང་ལྡན་པ་སྟེ། བདེན་གཉིས་ལས། ཆོས་རྣམས་ཀུན་གྱི་ལུས་ཡིན་ཕྱིར། ། ཡོན་ཏན་བསམ་ཡས་ཀུན་རྟེན་ཕྱིར། ། རིག་པའི་རྗེས་འབྲངས་ངོ་བོའི་ཕྱིར། ། སྐྱོབ་པ་རྣམས་ཀྱི་ཆོས་སྐུ་ཡིན། ། ཅེས་སོ། ། དེ་དག་ཀྱང་མདོ་ལས་རབ་འབྱོར་གྱི་ལེའུས་རྣམ་མཁྱེན། མཐའ་གཉིས་རྣམ་དག་གི་ལེའུས་ལམ་ཤེས། སྤྱོད་པ་ཁྱད་པར་ཅན་གྱི་ལེའུས་གཞི་ཤེས། དེ་བཞིན་ཉིད་ཀྱི་ལེའུས་རྣམ་ཀུན། བསླབ་པ་ཡོངས་སུ་དག་པའི་ལེའུས་རྩེ་སྦྱོར། རིམ་གྱིས་འཇུག་པའི་ལེའུས་མཐར་གྱིས་པ། བསླབ་(༡༤༨ན)པ་ཡོངས་སུ་རྫོགས་པའི་ལེའུས་སྐད་ཅིག་མ། བསླབ་པ་འབྲས་བུའི་ལེའུས་ཆོས་སྐུ་རྣམས་བསྟན་པ་ཡིན་ནོ། ། དངོས་པོ་བརྒྱད་དུ་ངེས་པའི་རྒྱུ་མཚན་ཀྱང༌། གང་ཟག་གཅིག་འཚང་རྒྱ་བ་ལ། ཤེས་པར་བྱ་བ་ཡུལ་མཁྱེན་པ་གསུམ། ཉམས་སུ་ལེན་པའི་ལམ་སྦྱོར་བ་བཞི། དེ་བླངས་པའི་འབྲས་བུ་ཆོས་ཀྱི་སྐུ་སྟེ། དོན་བསྡུས་རིན་ཆེན་སྒྲོན་མེ་ལས། ཤེས་བྱའི་ཡུལ་དུ་མཁྱེན་པ་གསུམ། ། སྒོམ་པའི་དུས་སུ་སྦྱོར་བ་བཞི། ། འབྲས་བུ་མཐར་ཐུག་ཆོས་ཀྱི་སྐུ། ། ཞེས་གསུངས་པ་ལྟར་རོ། ། དེ་དག་གི་དབྱེ་བ་སྦས་དོན་ཡན་ལག་བདུན་ཅུར་གྲགས་པ་ཡང༌། སེམས་བསྐྱེད་ལ་སོགས་པ་རྣམ་མཁྱེན་མཚོན་བྱེད་ཀྱི་ཆོས་བཅུ། འབྲས་བུ་རྣམ་མཁྱེན་ཐོབ་པ་ལ་རྒྱུ་ལམ་ཤེས་བསྒོམ་དགོས་པས་དེ་མཚོན་བྱེད་ཀྱི་ཆོས་བཅུ་གཅིག །ལམ་ལེགས་པར་ཤེས་པ་ལ་གཞིའི་མི་མཐུན་ཕྱོགས་དང་གཉེན་པོའི་རབ་དབྱེ་ཤེས་དགོས་པས་གཞི་ཤེས་མཚོན་བྱེད་དགུ། མཁྱེན་གསུམ་ཐོས་བསམ་གྱིས་གཏན་ལ་དབབ་པའི་དོན་བརྒྱ་བདུན་ཅུ་རྩ་གསུམ་དུ་བསྡུས་ནས་བསྒོམ་དགོས་པས་རྣམ་རྫོགས་སྦྱོར་བ་མཚོན་བྱེད་བཅུ་གཅིག །བྱང་སེམས་ཚོགས་ལམ་དུ་རྫོགས་སྦྱོར་རེས་འཇོག་ཏུ་བསྒོམ་པས་སྒོམ་བྱུང་གཙོ་བོར་གྱུར་པའི་ཉམས་སྐྱེས་པ་ནི་རྩེ་མོའི་སྦྱོར་བ་སྟེ་དེའི་མཚོན་ཆོས་བརྒྱད། མཁྱེན་གསུམ་གྱི་དོན་སོ་སོ་བ་དང་རྣམ་པར་བསྡུས་པའི་དོན་རྣམས་ལ་གོ་རིམ་བཞིན་དུ་ཡིད་བརྟན་ནས་བསྒོམ་པ་མཐར་གྱིས་པའི་སྦྱོར་བ་སྟེ་དེའི་མཚོན་ཆོས་བཅུ་གསུམ། མཐར་གྱིས་པའི་སྒོམ་རིམ་དེ་ལྟ་བུ་སྦྱོར་ལམ་དྲོད་ཀྱི་རྗེས་ཐོག་ནས་ཡོད་མོད། ས་དང་པོ་ཡན་ཆད་དུ་སྒོམ་པས་རྟོགས་རིགས་རྣམས་དུས་གཅིག་ཏུ་མངོན་དུ་གྱུར་པ་ལ་བརྟན་པ་ཐོབ་ནས། ཡེ་ཤེས་སྐད་ཅིག་མ་གཅིག་གིས་མཁྱེན་གསུམ་གྱི་རྣམ་པ་བསྒོམས་པས། དེ་མ་ཐག་རྫོགས་པའི་བྱང་ཆུབ་མངོན་དུ་བྱེད་ངེས་ཀྱི་སྦྱོར་བ་ནི་སྐད་ཅིག་མའི་སྦྱོར་བ་སྟེ་དེའི་མཚོན་ཆོས་བཞི། དེའི་སྐད་ཅིག་གཉིས་པར་སྐུ་གསུམ་ཕྲིན་(༡༤༨བ)ལས་དང་བཅས་པ་བསྐྱེད་པ་སྦྱོར་བ་བཞི་བསྒོམས་པའི་རྣམ་སྨིན་མཐར་ཐུག་པ་སྟེ་དེ་ལ་སྐུ་གསུམ་མཛད་པ་དང་བཅས་བཞི་སྟེ་བསྡམས་པས་བདུན་ཅུའོ། ། དེ་ལ་དངོས་པོ་བརྒྱད་ཀྱི་དང་པོར་རྣམ་མཁྱེན་སྟོན་པ་ནི་འབྲས་བུ་ལ་སྤྲོ་བ་བསྐྱེད་པའི་ཆེད་དུ་ཡིན་ཞིང༌། དོན་བདུན་ཅུའི་དང་པོར་སེམས་བསྐྱེད་སྟོན་པ་ནི་སེམས་བསྐྱེད་ཐེག་ཆེན་གྱི་ཆོས་ཐམས་ཅད་ཀྱི་རྩ་བ་ཡིན་པར་ཤེས་པའི་ཆེད་དུའོ། ། དེ་ཐམས་ཅད་ཀྱང་དབྱེ་གཞིའི་སྟེང་དུ་མདོར་དྲིལ་ན། ཐོབ་བྱའི་འབྲས་བུ་མཐར་ཐུག་པ་རྣམ་མཁྱེན། དེ་འཐོབ་བྱེད་ཀྱི་རྒྱུ་ལམ་ཤེས། དེའི་བླང་དོར་བྱ་བའི་ཡན་ལག་ཏུ་གཞིའི་མི་མཐུན་ཕྱོགས་དང༌། གཉེན་པོའི་རབ་དབྱེ་ཤེས་པའི་གཞི་ཤེས་རྣམས་ནི་སྒྲོ་འདོགས་གཅོད་ཡུལ་མཁྱེན་པ་གསུམ། ཐོས་བསམ་གྱིས་གཏན་ལ་ཕབ་པའི་དོན་རྣམ་པ་བརྒྱ་བདུན་ཅུ་རྩ་གསུམ་དུ་བསྡུས་ནས་རེས་འཇོག་ཏུ་བསྒོམ་པ་རྣམ་རྫོགས་སྦྱོར་བ། བསྡུས་བསྒོམ་དེ་ལས་རྟོགས་པ་རབ་ཏུ་གྱུར་པ་རྩེ་མོའི་སྦྱོར་བ། དེ་ལ་བརྟན་པ་ཐོབ་པའི་ཆེད་དུ་དུས་གཅིག་ཏུ་གོ་རིམ་བཞིན་བསྒོམ་པ་མཐར་གྱིས་པའི་སྦྱོར་བ། བརྟན་པ་ཐོབ་ནས་ཡེ་ཤེས་སྐད་ཅིག་མ་གཅིག་གིས་མཁྱེན་གསུམ་གྱི་རྣམ་པ་བསྒོམས་པས་དེ་མ་ཐག་འབྲས་བུ་མངོན་དུ་བྱེད་ངེས་པ་སྐད་ཅིག་མའི་སྦྱོར་བ་དང་བཞི་ནི་ཉམས་ལེན་སྦྱོར་བ་བཞི། དེ་ལྟར་ཉམས་སུ་བླངས་པ་ལས་དབྱིངས་དང་ཡེ་ཤེས་དབྱེར་མེད་པ་ངོ་བོ་ཉིད་ཀྱི་སྐུ་དང༌། ཐེག་ཆེན་གྱི་ཆོས་ལ་རྫོགས་པར་ལོངས་སྤྱོད་པ་ལོངས་སྤྱོད་རྫོགས་པའི་སྐུ། གང་ལ་གང་འདུལ་གྱི་ཐབས་སྣ་ཚོགས་པས་སེམས་ཅན་གྱི་དོན་སྣ་ཚོགས་པ་མཛད་པ་སྤྲུལ་པའི་སྐུ་དང༌། ཕྲིན་ལས་ཉེར་བདུན་གྱིས་བསྡུས་པའི་གཞན་དོན་མཛད་པ་ཕྲིན་ལས་དང་བཞི་ནི་འབྲས་བུ་ཆོས་ཀྱི་སྐུའོ། །དེ་ལས་མཁྱེན་གསུམ་གཅིག་ཏུ་བསྡུས་ཏེ་མངོན་རྟོགས་དྲུག་དང༌། སྦྱོར་བཞིའང་འཐོབ་བྱེད་ཀྱི་རྒྱུ་ཞེས་གཅིག་ཏུ་བསྡུས་ཏེ་གསུམ་གྱི་རྣམ་བཞག་ཀྱང་མཛད་དོ། ། ཉ༤ བཞི་པ་ལ་[དབུ་མའི་བཤད་རྒྱུན་བྱུང་ཚུལ་]གཉིས། ཏ༡ རང་སྟོང་པ་དང༌། ཏ༢ གཞན་སྟོང་པའི་དར་ཚུལ་ལོ། ། ཏ༡ དང་པོ་ནི། (༡༤༩ན) དངོས་བསྟན་སྟོང་ཉིད་སྟོན་པ་དབུ་མའི་ཚུལ། ། འཕགས་པའི་དགོངས་པ་འགྲེལ་བྱེད་རྣམ་གཉིས་ལས། ། ཐལ་རང་སྲོལ་གྱེས་ཟླ་གྲགས་ཞི་བ་ལྷ། ། ཤར་གསུམ་ལ་སོགས་ལུགས་གཉིས་རྗེས་འབྲང་མང༌། ། ཕར་ཕྱིན་གྱི་དངོས་བསྟན་སྟོང་པ་ཉིད་ཀྱི་ཚུལ་བསྟན་ཅིང་བཤད་པ་དང་ཉམས་སུ་ལེན་པ་རྣམས་ལ་དབུ་མ་པ་ཞེས་གྲགས་ཤིང་དེའི་དོན་ཕྱིན་ཅི་མ་ལོག་པར་སྟོན་པ་སློབ་དཔོན་འཕགས་པའི་གཞུང་རྣམས་ཀྱི་གཙོ་བོ་རྩ་བ་ཤེས་རབ་ཀྱི་དགོངས་པ་འབྲེལ་བྱེད་སློབ་དཔོན་སངས་རྒྱས་བསྐྱངས་དང་ལེགས་ལྡན་བྱེད་རྣམ་པ་གཉིས་ལས་དབུ་མ་ཐལ་འགྱུར་པ་དང༌། རང་རྒྱུད་པའི་སྲོལ་གཉིས་སུ་གྱེས་ཤིང༌། སྔ་མའི་སྲོལ་འཛིན་པ་ཟླ་གྲགས་དང་ཞི་བ་ལྷ་ལ་སོགས་པ། ཕྱི་མའི་སྲོལ་འཛིན་པ། ཡེ་ཤེས་སྙིང་པོ། ཞི་བ་འཚོ། ཀ་མ་ལ་ཤཱི་ལ་སྟེ་རང་རྒྱུད་ཤར་གསུམ་དུ་གྲགས་པ་ལ་སོགས་པ་དབུ་མ་ལུགས་གཉིས་ཀྱི་རྗེས་སུ་འབྲང་བའི་སློབ་དཔོན་ཤིན་ཏུ་མང་ངོ༌། ། དེའང་རྩ་ཤེ་ལ་རྒྱ་འགྲེལ་བརྒྱད་ཡོད་པར་གྲགས་ཤིང་བོད་དུ་བཞི་འགྱུར་བ་ནི་ག་ལས་འཇིགས་མེད། སློབ་དཔོན་སངས་རྒྱས་བསྐྱངས་ཀྱིས་མཛད་པའི་བུདྡྷ་པཱ་ལི་ཏ། ཟླ་བ་གྲགས་པའི་ཚིག་གསལ། ལེགས་ལྡན་བྱེད་ཀྱི་ཤེས་རབ་སྒྲོན་མའི་ཕྲེང་བ་བཅས་ཡོད་པ་ལས་ག་ལས་འཇིགས་མེད་ནི་སྔོན་གྱི་དཀར་ཆག་རྣམས་དང་ཇོ་ནང་ཀུན་མཁྱེན་སོགས་རང་འགྲེལ་དུ་བཞེད། མཁས་གྲུབ་དགེ་ལེགས་དཔལ་བཟང་གིས། འཕགས་པའི་སློབ་མ་རྣམས་ཀྱིས་གཞུང་དུ་དེའི་ལུང་དྲངས་པ་གཅིག་ཀྱང་མ་བྱུང་བའི་ཕྱིར་དང༌། རབ་བྱེད་ཉི་ཤུ་རྩ་བདུན་པའི་ཐད་ཀྱི་འགྲེལ་པར་བཙུན་པ་འཕགས་པ་ལྷའི་ཞལ་སྔ་ནས་ཀྱང༌། ཞེས་བཞི་བརྒྱ་པའི་ལུང་དྲངས་པའི་ཕྱིར་རང་འགྲེལ་མ་ཡིན་པར་གསུངས། ཤེས་རབ་སྒྲོན་མ་ལས་སྤྱན་རས་གཟིགས་བརྟུལ་གྱིས་ཡང་ན། བརྟུལ་ཞུགས་ཀྱིས་མཛད་པའི་འགྲེལ་བཤད་སྤྱན་རས་གཟིགས་བརྟུལ་ཞུགས་ཅེས་བྱ་བ། ཕྱི་རོལ་པའི་འདོད་བརྗོད་དང༌། ཉན་ཐོས་སྡེ་པ་བཅོ་བརྒྱད་ཀྱི་འདོད་བརྗོད་(༡༤༩བ)རྒྱས་པ་བམ་པོ་བརྒྱད་ཅུ་པ་ཞིག་ཡོད་དེ། ཕྱི་རོལ་པའི་འདོད་པ་བརྗོད་པ་དེ་ལས་རྒྱས་པའི་བསྟན་བཅོས་བོད་དུ་མ་འགྱུར་རོ། ། ཡེ་ཤེས་སྙིང་པོའི་དབུ་མ་བདེན་གཉིས་རང་འགྲེལ་དང་བཅས་པ། ཞི་བ་འཚོའི་དབུ་མ་རྒྱན་རང་འགྲེལ་དང་བཅས་པ། ཀ་མ་ལ་ཤཱི་ལའི་དབུ་མ་སྣང་བ་བམ་པོ་དགུ་པ་སྒོམ་རིམ་ཐོག་མཐའ་བར་གསུམ་བཅས་ཕྱི་མ་བཞི་ནི་རང་རྒྱུད་པའི་གཞུང་ཡིན་ལ། ཟླ་བ་གྲགས་པའི་དབུ་མ་ལ་འཇུག་པ། ཞི་བ་ལྷའི་སྤྱོད་འཇུག །ཟླ་གྲགས་སློབ་མ་རིག་པའི་ཁུ་བྱུག་ཆེ་ཆུང་གི་རྗེས་འབྲང་ཇོ་བོ་རྗེའི་བདེན་གཉིས་རྩ་འགྲེལ་རྣམས་ནི་ཐལ་འགྱུར་བའི་གཞུང་ཡིན་ནོ། ། དེའང་སངས་རྒྱས་བསྐྱངས་ཀྱི་འགྲེལ་པ་ལེགས་ལྡན་འབྱེད་ཀྱིས་གཟིགས་ནས་དགག་པ་བརྗོད་དེ་རང་སྲོལ་གསར་དུ་ཕྱེས། དེ་ཟླ་གྲགས་ཀྱིས་བཀག་ནས་སངས་རྒྱས་བསྐྱངས་ཀྱི་རིང་སྲོལ་བཟུང་བར་མཛད་པས་སྲོལ་གཉིས་སུ་གྲགས་པ་ནི་དོན་དམ་གྱི་ལྟ་བ་བརྒྱུད་ལ་སྐྱེད་ཚུལ་གྱི་སྒོ་ནས་ཁྱད་པར་འབྱེད་པ་ཡིན་གྱི། དོན་དམ་རང་གི་ངོ་བོ་འདོད་ཚུལ་ལ་ནི་ཁྱད་པར་མེད་པ་གཟུར་གནས་ཀྱི་མཁས་པ་དག་གིས་བཤད་པ་ལྟར་འཐད་དེ་གཉིས་ཀ་དབུ་མ་མཚན་ཉིད་པ་ཡིན་པའི་ཕྱིར་རོ། ། འཕགས་གཞུང་ཅོག་རོ་རྔོག་ལོ་དག་གིས་སྤེལ། ། ཕྱྭ་པ་སེང་ཆེན་བརྒྱད་དང་རོང་སྟོན་སོགས། ། རང་རྒྱུད་སྲོལ་བཟུང་པ་ཚབ་བུ་བཞི་བཅས། ། དཔལ་ལྡན་ཟླ་བའི་གཞུང་གི་ལམ་སྲོལ་ཕྱེས། ། གངས་ཅན་ཐལ་འགྱུར་སྨྲ་རྣམས་དེ་ལས་གྱེས། ། དེ་ལ་བོད་འདིར་ཐོག་མར་པཎྜི་ཏ་ཛྙཱ་ན་གརྦྷ་དང་ཅོག་རོ་ཀླུའི་རྒྱལ་མཚན་གྱིས་རྩ་ཤེ་དང༌། ཤེས་རབ་སྒྲོན་མ་བསྒྱུར། ཞི་བ་འཚོའི་གསུང་ལ་བརྟེན་རང་རྒྱུད་པའི་ལུགས་ཀྱི་བཤད་ཉན་དར། ཕྱི་དར་གྱི་སྐབས་རྔོག་ལོ་ཙཱ་བ་བློ་ལྡན་ཤེས་རབ་ཀྱིས་ཤེས་རབ་སྒྲོན་མ་གཙོ་བོར་གྱུར་པའི་གཞུང་ལ་འཆད་ཉན་མཛད་པས་རྒྱ་ཆེར་སྤེལ་བའི་རྒྱུན་དཔལ་ལྡན་གསང་ཕུའི་གདན་ས་འཛིན་པ་རྣམས་དང༌། ཁྱད་པར་གདན་རབས་ལྔ་པ་ཕྱྭ་པ་ཆོས་ཀྱི་སེང་གེ་དང༌། (༡༥༠ན)དེའི་སློབ་མ་གཙང་ནག་པ་བརྩོན་འགྲུས་སེང་གེ། དན་འབག་པ་སྨྲ་བའི་སེང་གེ། བྲུ་ཤ་བསོད་ནམས་སེང་གེ། རྨ་བྱ་བ་རྩོད་པའི་སེང་གེ། རྩགས་དབང་ཕྱུག་སེང་གེ། མྱང་བྲན་ཆོས་ཀྱི་སེང་གེ། ལྡན་མ་དཀོན་མཆོག་སེང་གེ། མཉལ་པ་ཡོན་ཏན་སེང་གེ་སྟེ་སེང་ཆེན་བརྒྱད་དུ་གྲགས་པ་དང༌། ཇོ་སྲས་གསུམ། ཤེས་རབ་ཅན་གསུམ། གྲུབ་ཐོབ་གསུམ་སོགས་བྱུང་བ་ལས་གཙང་ནག་པ་དང་རྨ་བྱ་བ་ཕལ་ཆེར་ཟླ་གྲགས་ཀྱི་རྗེས་སུ་འབྲང་བ་ལས་གཞན་རྣམས་དང༌། ཕྱིས་སུ་སྨྲ་བའི་སེང་གེ་རོང་སྟོན་ཆེན་པོའང་ཀ་མ་ལ་ཤཱི་ལའི་བག་ཆགས་སད་ནས་རང་རྒྱུད་པའི་ལྟ་བ་ལ་ངེས་པ་གཏིང་ཚུགས་པའི་སྟོབས་ཀྱིས་དགོངས་པ་གཏོད་ཅིང༌། དེ་དག་གི་རྗེས་སུ་འབྲང་བ་འགའ་ཞིག་དང༌། སྔ་འགྱུར་བའི་ཆོས་གྲྭ་འགའ་ཤས་སོགས་ཀྱིས་ཀྱང་ད་ལྟའི་བར་དུ་རང་རྒྱུད་པའི་སྲོལ་བཟུང་བར་མཛད་ཀྱང་བཤད་རྒྱུན་རྐང་ཚུགས་པ་ནི་ཕྱིས་སུ་མ་བྱུང་ངོ༌། ། ཐལ་འགྱུར་ནི། པ་ཚབ་ལོ་ཙཱས་ཁ་ཆེར་བྱོན་ནས་སཛྫ་ནའི་སྲས་གཉིས་སོགས་ལ་བསྟེན་ཏེ་ལོ་ཉི་ཤུ་རྩ་གསུམ་དུ་སྦྱངས་པ་མཛད་ནས་བོད་དུ་རྩ་འཇུག་བཞི་གསུམ་སོགས་ཀྱི་འགྲེལ་པ་ཟླ་བས་མཛད་པའི་རིགས་རྣམས་བསྒྱུར། འཆད་ཉན་གྱི་སྒོ་ནས་ལེགས་པར་གཏན་ལ་ཕབ། དེའི་སློབ་མ་ཚིག་ལ་མཁས་པ་གངས་པ་ཤེའུ། དོན་ལ་མཁས་པ་གཙང་པ་འབྲེ་སྒུར། གཉིས་ཀ་ལ་མཁས་པ་རྨ་བྱ་བྱང་བརྩོན། གཉིས་ཀ་ལ་མི་མཁས་པ་ཞང་ཐང་སག་པ་ཡེ་ཤེས་འབྱུང་གནས་ཏེ་པ་ཚབ་བུ་བཞིར་གྲགས་པ་སློབ་ཚོགས་དང་བཅས་པས་དཔལ་ལྡན་ཟླ་བ་གྲགས་པའི་གཞུང་ལུགས་འཆད་རྩོད་རྩོམ་གསུམ་གྱི་ལམ་སྲོལ་ཆེན་པོ་ཕྱེས་ཤིང༌། གངས་ཅན་ལྗོངས་ཀྱི་དབུ་མ་ཐལ་འགྱུར་སྨྲ་བ་ཐམས་ཅད་དེ་ལས་གྱེས། ཁྱད་པར་ཞང་ཐང་སག་པ་རང་ལ་གདན་ས་འཛིན་པ་སྨྲ་བའི་དབང་ཕྱུག་རྣམས་དང༌། ས་སྐྱ་པའི་རྗེ་བཙུན་རྗེས་འབྲང་དང་བཅས་པ། མཁས་མཆོག་བུ་སྟོན་རིན་པོ་ཆེ། རྗེ་རེད་མདའ་བ། དེའི་སློབ་མ་ཐམས་ཅད་མཁྱེན་པ་རྗེ་རིན་པོ་ཆེ་བློ་(༡༥༠བ)བཟང་གྲགས་པ་བརྒྱུད་པ་དང་བཅས་པ། རྒྱལ་དབང་མི་བསྐྱོད་ཞབས་དང་ཀུན་མཁྱེན་པདྨ་དཀར་པོ་རྗེས་འབྲང་དང་བཅས་པ་ལ་སོགས་པ་བོད་ཡུལ་མཁས་པའི་དབང་པོ་ཕལ་མོ་ཆེས་བཤད་སྲོལ་འདི་འཛིན་པར་མཛད་དེ། དེའི་ཉམས་ལེན་གྱི་རྒྱུན་ཀྱང་ཇོ་བོ་ཡབ་སྲས་ལས་བརྒྱུད་དེ་གཙོ་བོར་བཀའ་གདམས་རིན་པོ་ཆེ་ལ་དར་རོ། ། དེ་ལ་དབུ་མ་རྩ་བ་ཤེས་རབ་ལ་རབ་བྱེད་དང་པོ་རྐྱེན་བརྟག་པ་ནས། ལྟ་བ་བརྟག་པའི་བར་རབ་བྱེད་ཉི་ཤུ་རྩ་བདུན་ཡོད་ཅིང༌། དེའི་དོན་འགྲེལ་དབུ་མ་ལ་འཇུག་པ་ད་ལྟ་བཤད་རྒྱུན་མ་ཉམས་པ་འདིའི་ལུས་རྣམ་པར་གཞག་པའང་རྒྱུ་བྱང་ཆུབ་སེམས་དཔའི་ས་དང༌། འབྲས་བུ་སངས་རྒྱས་ཀྱི་ས་བཤད་པ་གཉིས། དང་པོ་ལ། ས་བཅུའི་ངོ་བོ་སོ་སོར་བཤད་པ་དང༌། སའི་ཡོན་ཏན་ཐུན་མོང་དུ་བཤད་པ་གཉིས། དང་པོ་ལ། ཁྱད་གཞི་སའི་ངོ་བོ་མདོར་བསྟན། ཁྱད་ཆོས་སའི་ཡོན་ཏན་རྒྱས་པར་འཆད། སའི་ཡོན་ཏན་བརྗོད་པའི་སྒོ་ནས་འཇུག་བསྡུ་བ་གསུམ། འབྲས་བུ་སངས་རྒྱས་ཀྱི་ས་བཤད་པ་ལའང༌། གནས་གང་དུ་བྱང་ཆུབ་བརྙེས་པ། ཚུལ་ཇི་ལྟར་བྱང་ཆུབ་པ། བྱང་ཆུབ་པའི་ངོ་བོ་སྐུའི་རྣམ་གཞག །བྱང་ཆུབ་གསུམ་དགོངས་པ་ཅན་དུ་བཤད་པ། བྱང་ཆུབ་པ་དང་བཞུགས་པའི་དུས་བསྟན་པ་ལྔའི་སྒོ་ནས་བསྡུས་ཤིང༌། དེ་དག་གི་ནང་ནས་ཀྱང་སེམས་བསྐྱེད་པ་དྲུག་པ་ཤེས་རབ་ཀྱི་ཕ་རོལ་ཏུ་ཕྱིན་པས་དབུ་མའི་དོན་གསལ་ཞིང་རྒྱས་པར་བསྟན་ཏོ། ། ཏ༢ གཉིས་པ་[གཞན་སྟོང་པའི་དར་ཚུལ་]ནི། འཁོར་ལོ་ཐ་མ་བྱམས་པ་ཀླུ་སྒྲུབ་ཀྱིས། ། ཆོས་བཞི་བསྟོད་ཚོགས་ཀྱིས་བཀྲལ་ཐོགས་མེད་མཆེད། ། ཙནྡྲ་གོ་མཱི་སོགས་ཀྱིས་འཆད་ཅིང་སྤེལ། ། འཁོར་ལོ་ཐ་མ་སྙིང་པོའི་མདོ་སྡེ་ཉི་ཤུ་ལ་སོགས་པའི་དགོངས་པ་རྒྱལ་ཚབ་བྱམས་པ་དང་འཕགས་པ་ཀླུ་སྒྲུབ་ཞབས་ཀྱིས། མདོ་སྡེ་རྒྱན། འབྱེད་གཉིས། རྒྱུད་བླ་མ་སྟེ་ཆོས་བཞི་དང༌། བསྟོད་ཚོགས་ལ་གཞིའི་སྐབས་སུ་ཆོས་ཅན་ཆོས་ཉིད། ལམ་གྱི་སྐབས་སུ་ཐབས་དང་ཤེས་རབ། འབྲས་བུའི་དུས་སུ་སྐུ་གསུམ་ལ་སོ་སོར་བསྟོད་པ་དང༌། ལྟ་བ་རང་གི་ངོ་བོའི་སྒོ་ནས་(༡༥༡ན)བསྟོད་པ་རྣམས་ཀྱིས་ལེགས་པར་བཀྲལ་བའི་དོན་དེ་ཉིད། ཐོགས་མེད་སྐུ་མཆེད་དང༌། སློབ་དཔོན་ཙནྡྲ་གོ་མཱི། དེ་དག་གི་རྗེས་འབྲང་དང་བཅས་པ། རྩོད་དུས་ཀྱི་ཐམས་ཅད་མཁྱེན་པ་ཤཱནྟི་པ་སོགས་ཀྱིས་འཆད་ཅིང་རྒྱ་ཆེར་སྤེལ་ལོ། ། སཛྫ་ན་ལས་རྔོག་དང་བཙན་གྱིས་ཞུས། ། བཤད་སྒྲུབ་བཀའ་བབས་དབུ་སེམས་གཉིས་སུའང་བཞེད། ། གཙང་ནག་རང་བྱུང་ཀུན་མཁྱེན་ཡབ་སྲས་སོགས། ། ཕྱིར་མི་ལྡོག་པ་སེང་གེའི་སྒྲ་ཆེན་བསྒྲགས། ། བོད་དུ་སྔ་དར་ཕྱི་དར་གཉིས་ཀ་ལ་འཁོར་ལོ་ཐ་མའི་མདོ་དང་དགོངས་འགྲེལ་གྱི་བསྟན་བཅོས་མཐའ་ཡས་པ་བསྒྱུར་ཞིང༌། ཁྱད་པར་བསྟན་པ་ཕྱི་དར་གྱི་སྐབས་ཁ་ཆེའི་སློབ་དཔོན་སཛྫ་ན་ལས་རྔོག་ལོ་ཆེན་པོས་བྱམས་ཆོས་ཕྱི་མ་བཞི་གཞུང་འགྲེལ་བཤད་པ་དང་བཅས་པ་གསན་ནས་རྒྱ་ཆེར་སྤེལ་བ་དང༌། སློབ་དཔོན་དེ་ལས་གྲྭ་པ་མངོན་ཤེས་ཀྱི་མཁན་བུ་བཙན་ཁ་བོ་ཆེས་རྒྱུད་བླ་སོགས་ཞུས། ལྕང་ར་བ་སོགས་ལ་བཤད་པའི་སྲོལ་ཕྱི་མའི་བར་དུ་བྱུང་ཞིང་སྔ་མ་ལ་བཤད་པ་དང༌། ཕྱི་མ་ལ་སྒྲུབ་པའི་བཀའ་བབས་ཤིང༌། རིམ་བཞིན་དབུ་མ་དང་སེམས་ཙམ་གྱི་ལྟ་བ་འཛིན་པའི་ལུགས་གཉིས་སུའང་བཞེད་དེ། ཕྱི་མའི་ཡིག་ཆ་རྣམས་སུ་གཉིས་སྟོང་གི་ཤེས་པ་རང་རིག་རང་གསལ་བདེན་གྲུབ་དེ་སངས་རྒྱས་ཀྱི་རྒྱུ་གྲུང་པོར་ཁས་བླངས་པས་སོ། །ཞེས་ཀུན་མཁྱེན་དྷརྨ་ཀ་རས་གསུངས་སོ། ། དེ་དག་གི་རྒྱུན་ལས་མཁས་པ་གཙང་ནག་པ་དང༌། རྒྱལ་བ་གཉིས་པ་རང་བྱུང་ཞབས། ཇོ་ནང་ཀུན་མཁྱེན་ཆེན་པོ་ཡབ་སྲས། ཀུན་མཁྱེན་དྲི་མེད་འོད་ཟེར། སྨིན་གླིང་གཏེར་ཆེན་སྐུ་མཆེད། རྗེ་བསྟན་པའི་ཉིན་བྱེད་རྗེས་འབྲང་དང་བཅས་པ་སོགས་ཀྱིས་ཕྱིར་མི་ལྡོག་པ་སེང་གེའི་སྒྲ་ཆེན་པོ་བསྒྲགས་ཤིང་སེམས་ཙམ་ལས་འདས་པའི་ངེས་དོན་དབུ་མ་ཆེན་པོའི་རིང་ལུགས་སྣང་བར་མཛད་པ་ཡིན་ནོ། ། དཔལ་ལྡན་ཆོས་སྐྱོང་ཞབས་ཀྱིས་རིག་པའི་ཚོགས། ། འཁོར་ལོ་ཐ་མའི་དགོངས་པར་བཀྲལ་ཞེས་གྲགས། ། འཕགས་ཡུལ་དུའང་སློབ་དཔོན་ཆེན་པོ་(༡༥༡བ)དཔལ་ལྡན་ཆོས་སྐྱོང་ཞབས་ཀྱིས་དབུ་མ་རིག་པའི་ཚོགས་དྲུག་དང་ཁྱད་པར་རྩ་བ་ཤེས་རབ་འཁོར་ལོ་ཐ་མའི་དགོངས་པར་བཀྲལ་བའི་བསྟན་བཅོས་དཀར་པོ་རྣམ་པར་འཆར་བ་ཞེས་མཛད་པར་ཡང་གྲགས་སོ། ། དེ་ལྟར་འཕགས་བོད་གཉིས་ཀར་ཡོངས་སུ་གྲགས་པའི་གྲུབ་མཐའ་འདིའི་ཁུངས། རྒྱུད་བླ་མ་ལས། སངས་རྒྱས་ཆོས་ཚོགས་ཁམས་དང་བྱང་ཆུབ་དང༌། ། སངས་རྒྱས་ཡོན་ཏན་ཕྲིན་ལས་ཐ་མ་སྟེ། ། བསྟན་བཅོས་ཀུན་གྱི་ལུས་ནི་མདོར་བསྡུ་ན། ། རྡོ་རྗེ་ཡི་ནི་གནས་བདུན་འདི་དག་གོ། ། ཞེས་བརྗོད་བྱ་དོན་དམ་གྱི་རྡོ་རྗེའི་ལུས་བདུན། རྗོད་བྱེད་རྡོ་རྗེའི་གནས་བདུན་སྐབས་བཞིས་བསྟན་པར་མཛད་པའི་གོ་རིམ་གྱི་འབྲེལ་ཡང༌། སངས་རྒྱས་ལས་ཆོས་ཆོས་ལས་འཕགས་པའི་ཚོགས། ། ཚོགས་ལས་སྙིང་པོ་ཡེ་ཤེས་ཁམས་ཐོབ་མཐར། ། ཡེ་ཤེས་དེ་ཐོབ་