Tibetan
བཅས་རྣམས་སུ་ཡོད་པའི་སྔ་མ་གསུམ་འདིའི་སྣོད་དངོས་མ་ཡིན་ཀྱང༌། རྒྱུད་འདིར་ཆོས་སྒོ་ཐམས་ཅད་འདུས་པས་ཕྱོགས་སྔ་མར་ཚིག་གིས་བཟུང་བའོ། ། ཆགས་བཅས་ལའང་གཉིས། ཉོན་མོངས་པ་དང་གཉེན་པོའི་འདོད་ཆགས། དང་པོ་ལ་ལྟ་དགོད་འཁྱུད་སྦྱོར་བཞི་ལས་ཕྱི་མ་དང༌། གཉེན་པོའི་འདོད་ཆགས་ལ། གུས་པ་སྙིང་རྗེ་དད་པ་ཡེ་ཤེས་རྣམས་ཀྱིས་རིམ་བཞིན་སློབ་དཔོན་སེམས་ཅན་ལྷ་དང་ཆོས་ཉིད་ལ་ཆགས་པ་བཞི་དང༌། དེ་ལའང་ཤེས་རབ་ལ་དགའ་བའི་དབང་རྟུལ་དང༌། ཐབས་ལ་དགའ་བའི་དབང་རྣོན་གཉིས་ལས་རྒྱུད་འདིའི་སྣོད་ལྡན་ནི་ཕྱི་མ་ཉིད་ཡིན་པར་བསྟན་ཅིང༌། དེ་ལ་གང་ཟག་གི་ངོ་བོ། དུས་དང་རྒྱས་པའི་དབྱེ་བ། སྤྱི་དང་བྱེ་བྲག་སྣོད་རུང་གསུམ་གྱི་མཚན་ཉིད། སྒྲ་འཇུག་པའི་རྒྱུ་མཚན་རྣམས་ཀྱིས་བསྡུས་པའོ། ། གཉིས་པ་སྦྱང་གཞི་ལ་གཉིས། སྐྱེ་བ་ཀུན་རྫོབ་བདེན་པ་དང༌། འཆི་བ་དོན་དམ་བདེན་པའི་སྦྱང་གཞིའོ། སྔ་མ་ལ་རྟེན་དང་བརྟེན་པ་རྒྱལ་མཆོག་གཉིས་དང་བཅས་པ། ཕྱི་མ་ལ་རིམ་པ་ལྔའི་སྦྱང་གཞི་སོ་སོར་སྦྱར་བའོ། ། གསུམ་པ་ལམ་གྱི་དྲི་མ་ལ་གསུམ། དྲི་མ་སྟོབས་ཆེ་བ་དངོས་པོ་ཐ་མལ་པའི་རྟོག་པ་རང་ག་མ། དྲི་མ་ཕྲ་བ་གཟུང་འཛིན་བྱ་བྱེད་ཀྱི་རྟོག་པ། ཤིན་ཏུ་ཕྲ་བ་དངོས་པོ་ངོ་བོ་ཉིད་ཀྱི་རྟོག་པ། དེ་རེ་རེ་ལའང་གཉེན་པོ་སྟོབས་ཆུང་བས་སྤང་བྱ་དྲི་མ་རགས་པ་དང༌། སྟོབས་ཆེན་པོས་(༡༥༦བ)སྤང་བྱ་ཕྲ་བ་གཉིས་སུ་དབྱེའོ། ། བཞི་པ་དམིགས་བྱའི་ཡུལ་ནི། སྐུ་གསུམ་དུས་གསུམ་ཐེག་པ་གསུམ་དཀྱིལ་འཁོར་གསུམ་བདེན་པ་གསུམ་གྱི་བདག་ཉིད་ཡན་ལག་བདུན་ལྡན་མི་སློབ་པའི་ཟུང་འཇུག་རྡོ་རྗེ་འཆང་ཆེན་པོའོ། ། ལྔ་པ་ཉམས་སུ་ལེན་པའི་ཐབས་ལ་གཉིས། རྒྱུད་མ་སྨིན་པ་སྨིན་ཅིང་དངོས་གྲུབ་རྣམ་གསུམ་འགྲུབ་པའི་སྣོད་རུང་དུ་བྱེད་པ་སྨིན་ལམ། རྒྱུད་རྟོག་པ་གསུམ་ལས་མ་གྲོལ་བ་གྲོལ་བར་བྱེད་པའི་ལམ་མོ། ། དང་པོ་ལ་གསུམ། སྔོན་དུ་བསྙེན་པ་བྱ་བ། སློབ་དཔོན་འཇུག་པ། སློབ་མ་གཞུག་པའོ། ། དང་པོ་ལ། རབ་ལྷ་ཡིས་གནང་བ་ཐོབ་པ། འབྲིང་མཚན་མ་རྙེད་པ། ཐ་མ་བསྙེན་གྲངས་ཐེམ་པའི་ཚུལ་གསུམ། གཉིས་པ་ལ། ས་དང་། སྟ་གོན། ཐིག་ཚོས་ཀྱི་ཆོ་ག་གསུམ། དཀྱིལ་འཁོར་བྱིན་གྱིས་རློབ་པ་དང་སྒྲུབ་ཅིང་མཆོད་པ། བདག་ཉིད་འཇུག་པ་སྟེ་ལྔ། གསུམ་པ་ལ། ལྷ་དང་སྐལ་བ་མཉམ་པའི་ཕྱིར་དཀྱིལ་འཁོར་དུ་འཇུག་པ། ལྷ་ངོ་ཤེས་པར་བྱ་བའི་ཕྱིར་དཀྱིལ་འཁོར་བསྟན་པ། བསྐྱེད་རྫོགས་གཉིས་བསྒོམ་པར་དབང་བའམ་གནང་བ་ཐོབ་པར་བྱ་བའི་ཕྱིར་དབང་བསྐུར་བ། ཚེ་འདི་ཉིད་ལ་དངོས་གྲུབ་རྣམ་གཉིས་ཐོབ་པར་བྱ་བའི་ཕྱིར་སྔགས་དང་ཕྱག་རྒྱ་གཏད་པ། ཐེག་པ་ཆེན་པོའི་ཚུལ་ལས་མི་ཉམས་པར་བྱ་བའི་ཕྱིར་དམ་ཚིག་དང་སྡོམ་པ་བསྟན་པ་ལྔ། དེ་དག་སོ་སོ་ལ་ནང་གསེས་ཀྱི་དབྱེ་བ་མང་པོ་རྣམས་ཀྱིས་བསྡུས་པའོ། ། གཉིས་པ་གྲོལ་བྱེད་ཉམས་ལེན་གྱི་ཐབས་ལ་གཉིས། རྗེས་ཀྱི་སྤྱོད་པ་དང༌། མཉམ་གཞག་གི་སྒོམ་པའོ། ། སྤྱོད་པ་ལ། ཐེག་པ་ཆུང་ངུ་དམན་པའི་སྤྱོད་པ་དང༌། ཐེག་ཆེན་མཆོག་གི་སྤྱོད་པ་གཉིས། ཕྱི་མ་ལ། རྒྱ་ཆེ་བ་ཆགས་བྲལ་ཕར་ཕྱིན་དང་། ཟབ་པ་ཆགས་བཅས་སྔགས་ཀྱི་སྤྱོད་པ་གཉིས། སྔགས་སྤྱོད་ལ། རྒྱུད་སྡེ་བཞིའི་ཚུལ་དུ་སྤྱིར་བཤད་ནས། འདི་ནི་ཕྱི་མ་རྣལ་འབྱོར་ཆེན་པོའི་སྤྱོད་པ་ཁྱད་པར་དུ་བསྟན་པ་ལ་མགོན་པོ་ཀུན་ཏུ་སྤྱོད་པ་དང༌། སྔགས་ཀྱི་སྤྱོད་པ་གཉིས་ཏེ། དེ་དག་རིམ་བཞིན་ཕྱོགས་ལས་རྣམ་རྒྱལ་དང༌། (༡༥༧ན)རྒྱལ་པོ་གཞོན་ནུའམ་དཔལ་ལྡན་རྒྱལ་ཚབ་ཀྱི་སྤྱོད་པ་ཞེས་བྱ་ཞིང༌། ཕྱི་མ་ལ། འདོད་འཇུག་དང་བརྟེན་སློབ་ཐུན་མོང་གི་སྤྱོད་པ། རིག་པ་བརྟུལ་ཞུགས་ཀྱི་སྤྱོད་པ་གཉིས། དེ་རེ་རེ་ལའང་། སྤྲོས་བཅས། སྤྲོས་མེད། ཤིན་ཏུ་སྤྲོས་མེད་གསུམ་གསུམ་གྱི་ཚུལ་དུ་བསྟན་ཅིང༌། རིག་བརྟུལ་སྤྲོས་བཅས་ལ། ཕྱག་རྒྱའི་གྲངས། དབྱེ་བ་རིགས་དང་རིགས་ཅན་གཉིས། མཚན་ཉིད། ལོ་ཚིགས། ཆ་ལུགས་བསྒྲུབ་པ་ལྔ། དེའི་སྤྲོས་མེད་ལ། བརྩོན་འགྲུས་ཅན་ཚེ་འདིར་འཚང་རྒྱ་བ་ལ་ཡེ་ཤེས་ཕྱག་རྒྱའི་སྙོམས་འཇུག་འདོད་ཆགས་ཀྱི་སྤྱོད་པ། ལེ་ལོ་ཅན་བར་དོར་འཚང་རྒྱ་བ་ལ་རྒྱུའི་གཙོ་བོ་འཆི་བ་དང་སྲེ་བའི་སྤྱོད་པ། བར་ཆོད་ཅན་སྐྱེ་བ་བརྒྱུད་ནས་འཚང་རྒྱ་བ་ལ་རྒྱུའི་གཙོ་བོ་གཉིད་དང་སྲེ་བའི་སྤྱོད་པ། མཚན་ཉིད་ཐེག་པས་ལམ་གྱི་འགོ་བཟུང༌། སྔགས་ཀྱི་ཐེག་པས་ལམ་གྱི་ཞབས་སྡུད་པ་སྟེ་སྔ་མས་ས་བཅུ་ཐོབ་ནས་ཕྱི་མས་དབང་གོང་མ་གསུམ་འོག་མིན་དུ་སྐུར་ཏེ་འཚང་རྒྱ་བ་ལ་ཤཱཀ་ཐུབ་འཚང་རྒྱ་ཚུལ་གྱི་སྤྱོད་པ། སྤྱོད་པ་གོང་མ་གསུམ་གྱི་རྒྱས་འདེབས་བདག་མེད་པའི་ཆོས་དང་སྙོམས་འཇུག་གི་སྤྱོད་པ་དང་ལྔར་བསྟན། སྤྲོས་བཅས་སྤྲོས་མེད་ཀྱི་ཆོ་ག་ནི་གནས་དང་ཡོ་བྱད་སྒྲུབ་པའི་ཚུལ་རྣམས་ཀྱིས་བསྡུས་ཤིང་སྤྱོད་བྱེད་གང་ཟག་གི་ཁྱད་པར་ཞར་ལས་བསྟན་པའོ། ། མཉམ་གཞག་གི་སྒོམ་པ་ལ་གཉིས། སྒྲུབ་པའི་སྔོན་དུ་འགྲོ་བ་སངས་རྒྱས་ཐེག་པའི་བསམ་པ་ལ་སློབ་པའི་ཚུལ་དང༌། སྒྲུབ་པ་དངོས་སོ། ། ཕྱི་མ་ལ་གཉིས། ཡེ་ཤེས་བརྒྱུད་ནས་སྐྱེ་བར་བྱེད་པ་བསྐྱེད་པའི་རིམ་པ་དང༌། ཡེ་ཤེས་དངོས་སུ་སྐྱེད་པར་བྱེད་པ་རྫོགས་པའི་རིམ་པའོ། ། དང་པོ་ལ། སྦྱང་གཞི་བསྐྱེད་པའི་རིམ་པ་མཚན་ཉིད་པ་ངོ་བོ་དབྱེ་བ་སྒྲ་འཇུག་པའི་རྒྱུ་མཚན་གསུམ་གྱིས་བསྟན། སྦྱོང་བྱེད་བསྐྱེད་པའི་རིམ་པ་བཏགས་པ་བ་བསྙེན་པ་སྒྲུབ་པ་གཉིས་ཀྱིས་བསྡུས། ཡེ་ཤེས་ལྷ་མཉེས་པར་བྱེད་པ་བསྙེན་པ་ལ་གཉིས། ལྷ་རྣམས་འདྲིས་པའི་དངོས་པོས་རགས་པ་ལ་རྩེ་(༡༥༧བ)གཅིག་ཏུ་བསླབ་པ་དྲན་པ་གཅིག་པ་དང༌། ཤིན་ཏུ་ཕྲ་བའི་དངོས་པོ་ལ་ཞེན་ཅིང་རྟོག་པ་རྟོག་པའི་རྣལ་འབྱོར་རོ། ། སྔ་མའི་དབྱེ་བ་ལ། དཀྱིལ་འཁོར་འཁོར་ལོ་དང༌། དཔའ་བོ་གཅིག་པ་གཉིས། རེ་རེ་ལའང་། རྟེན་གཞལ་ཡས་ཁང་དང་། བརྟེན་པ་ལྷ་གཉིས་གཉིས་སམ། དཀྱིལ་འཁོར་འཁོར་ལོ་ནི་བསྒོམ་བྱ་ལྷ་སུམ་ཅུ་རྩ་གཉིས། རིགས་ཀྱི་མེ་ཏོག་གང་ལ་ཕོག་པའི་གཙོ་བོ་འཕོ་བས་དེའི་གྲངས་སུ་འགྱུར་ཞིང༌། དེ་རེ་རེ་ལའང་། དམ་ཚིག་སེམས་དཔའ་དང་ཡེ་ཤེས་སེམས་དཔའ་དེའི་གྲངས་སུ་འགྱུར་བས་སྦྱོར་བ་དགུ་བཅུ་རྩ་དྲུག་གོ། ། དཔའ་བོ་གཅིག་པ་ལ། གང་ཟག་དབང་པོ་རབ་རྣལ་འབྱོར་བཞིས་བསྐྱེད། འབྲིང་མངོན་བྱང་ལྔས་བསྐྱེད། ཐ་མ་རྡོ་རྗེ་བཞིས་བསྐྱེད། རེ་རེ་ལའང་གཙོ་བོ་འཕོ་བའི་དཀྱིལ་འཁོར་སུམ་ཅུ་རྩ་གཉིས། སྦྱོར་བ་དགུ་བཅུ་རྩ་དྲུག་སྟེ། ཉམས་སུ་ལེན་པའི་ཐབས་སྔོན་འགྲོ་དངོས་གཞི་གཉིས་ཀྱིས་བསྡུས། རྟོག་པའི་རྣལ་འབྱོར་ལ་གཉིས། དབང་རྣོན་བསྒོམ་པ་ལ་དགའ་བའི་དོན་དུ་ནང་ལ་གཞོལ་བ་བསྟན། དབང་རྟུལ་བཟླས་པ་ལ་དགའ་བའི་དོན་དུ་སྔགས་ལ་གཞོལ་བ་བསྟན་ཏོ། ། དང་པོ་ལའང་། འབྱུང་བ་དང་ཉོན་མོངས་པ་དང་ནད་ཁམས་ཀྱི་གཉེན་པོར་སྦྱར་བའི་སྟེང་སྒོ་དང་འོག་སྒོ་གཉིས། དེ་དག་ཀྱང་ངེས་པ་ལྔ་ལྡན་གྱི་ཏིང་ངེ་འཛིན་ལ་བསླབ་པའོ། ། སྔགས་ལ་གཞོལ་བ་ལའང་གཉིས། བསྡུས་དང་རྒྱས་པ་ལ་དགའ་བའི་དོན་དུ་འབྲུ་གསུམ་དང་ཕྲེང་སྔགས་གཉིས་པོ་གྲངས་སུ་བཟླ་ཞིང་སྦྱིན་སྲེག་གིས་ཁ་སྐོང་བའོ། ། སྔ་ཕྱིའི་དབྱེ་བ་བཞི། རེ་རེར་ཡང་སྔ་མ་ལྟར་སུམ་ཅུ་རྩ་གཉིས་སུ་འགྱུར་བས་སྦྱོར་བ་བརྒྱ་ཉི་ཤུ་རྩ་བརྒྱད་དོ། ། འདོད་པའི་དངོས་གྲུབ་སྒྲུབ་པ་ལས་དང་པོ་པའི་ཏིང་ངེ་འཛིན་ལ། སྔོན་འགྲོ་རིག་བརྟུལ་གྱི་སྤྱོད་པ་ཟླ་བ་དྲུག་ཏུ་སྤྱད་ནས། དངོས་གཞི་ལ་གཉིས། འཇིག་རྟེན་པའི་དངོས་གྲུབ་ཕྲིན་ལས་བཞི་དང༌། ཐུན་མོང་བའི་དངོས་གྲུབ་གྲུབ་པ་ཆེན་པོ་བརྒྱད་སྒྲུབ་པའོ། ། དང་པོ་སྒྲུབ་པའི་ཐབས་བསྐྱེད་པ་དང་རྫོགས་པའི་རིམ་པས་བསམ་གཏན་དང༌། (༡༥༨ན)ཁྱད་པར་བརྒྱད་ལྡན་གྱི་བཟླས་བརྗོད་དང༌། དེ་བཞིན་དུ་སྦྱིན་སྲེག་དང༌། ཡནྟྲ་རྫས། མནྟྲ་སྔགས། ཏནྟྲ་ཏིང་ངེ་འཛིན་གྱི་ཁྱད་པར་དང་ལྡན་པའི་འཁྲུལ་འཁོར་བཞི། རེ་རེ་ལའང་སྒྲུབ་པ་པོས་དབྱེ་བ་སུམ་ཅུ་རྩ་གཉིས་གཉིས་དང་སྦྱོར་བ་བརྒྱ་ཉེར་བརྒྱད་དང༌། ལས་བཞི་རེ་རེ་ལའང་བསྒྲུབ་བྱའི་དབྱེ་བས་ནང་གསེས་དུ་མར་བཤད་དོ། ། ཐུན་མོང་བའི་དངོས་གྲུབ་ལ་རྩ་རྒྱུད་ལས་དྲུག །བཤད་རྒྱུད་ལས་བརྒྱད་དུ་གསུངས་པའི་དང་པོ་རལ་གྲི་དང༌། གཉིས་པ་རིག་འཛིན་ལ་རིགས་ལྔའི་དབྱེ་བས་ལྔ་རེ། གསུམ་པ་རིལ་བུ་ལ་སྐུ་གསུང་ཐུགས་ཀྱི་སྔགས་ཀྱི་རིལ་བུ་དང༌། སྤྱི་དང་བྱེ་བྲག་རྫས་ཀྱི་རིལ་བུ་གཉིས། བཞི་པ་མངོན་ཤེས་ལ་བྱང་ཆུབ་སེམས་དཔའ་དང་དེ་བཞིན་གཤེགས་པའི་བཀོད་པ་སྒྲུབ་པ་གཉིས། ལྔ་པ་རྐང་མགྱོགས་ལ་འཇིག་རྟེན་པ་དང་འཇིག་རྟེན་ལས་འདས་པའི་སྐུ་གསུང་ཐུགས་ཀྱི་རྐང་མགྱོགས། དྲུག་པ་མིག་སྨན། བདུན་པ་བུམ་བཟང༌། བརྒྱད་པ་མཆིལ་ལྷམ་སྦུབ་པ་གསུམ་ལ་དབྱེ་བ་མེད་དོ། ། གཉིས་པ་རྫོགས་པའི་རིམ་པ་ལ་གཉིས། སྦྱང་གཞི་རྫོགས་རིམ་མཚན་ཉིད་པ་ངོ་བོ་དབྱེ་བ་ངེས་ཚིག་གསུམ་གྱིས་འཆད། སྦྱོང་བྱེད་རྫོགས་རིམ་བཏགས་པ་བ་ལ་བསྙེན་པ་རིམ་པ་ལྔ་དང༌། སྒྲུབ་པ་ཟུང་འཇུག་སྟེ་མཆོག་གི་བསྙེན་སྒྲུབ་ཡན་ལག་དྲུག་གི། དང་པོ་བསྙེན་པ་རིམ་པ་ལྔ་ནི། དབེན་གསུམ། སྒྱུ་ལུས། འོད་གསལ་རྣམས་སུ་བཤད་པའི། དང་པོ་ལུས་དབེན་ལ། རྟེན་གྱི་གང་ཟག །ལུས་དབེན་གྱི་ངོ་བོ། ངེས་ཚིག །དེའི་ཤེས་བྱ། སྤང་བྱའི་དྲི་མ། གཟུགས་དང་རང་བཞིན་དང་རྣམ་ཤེས་དང་ཏིང་ངེ་འཛིན་གྱི་ལུས་དབེན་གྱི་དབྱེ་བ་དབེན་གཞི་དབེན་པ་ཤེས་བྱས་བསྡུས་པ། ཉམས་སུ་ལེན་པའི་ཐབས། རྟགས་ཚད། ཉམས་སུ་བླངས་པའི་འབྲས་བུ་སྟེ་དགུའོ། ། གཉིས་པ་ངག་དབེན་ལ། རྟེན་དང་ངོ་བོ་སོགས་དགུ་པོ་ལུས་དབེན་ལྟར་འཆད་ཅིང༌། དབྱེ་བ་ལ། རྟེན་རླུང་གི་དེ་ཁོ་ན་ཉིད། བརྟེན་པ་སྒྲའི་དེ་ཁོ་ན་ཉིད། དེ་གཉིས་ཀྱི་རྩ་བ་ཤེས་བྱ་སྒྲའི་དེ་ཁོ་ན་ཉིད་གསུམ། དང་(༡༥༨བ)པོ་ལ། ངོ་བོ། ངེས་ཚིག །ཕྱི་ནང་གི་དབྱེ་བ། བྱེད་ལས། འབྱུང་བའི་གནས། རྒྱུ་བའི་སྒོ། སོ་སོའི་མིང༌། ཁ་དོག །གོ་རིམ། གྲངས་ངེས། སློབ་པའི་ཐབས། རྟགས་ཚད། འབྲས་བུ་སྟེ། བཅུ་གསུམ། གཉིས་པ་ལ། སྤྱིར་རྒྱུ་རྒྱུད། ཐབས་རྒྱུད། འབྲས་རྒྱུད་ཀྱི་སྔགས་གསུམ་སོ་སོའི་ངོ་བོ། ངེས་ཚིག །དབྱེ་བ། འཁོར་འདས་ཀྱི་བྱེད་ལས་བཞིས་འཆད། བྱེ་བྲག་ཐབས་རྒྱུད་ཀྱི་སྔགས་ལ། དེ་བཞི་པོའི་སྟེང་དུ་མིང་གི་རབ་དབྱེ། སྔགས་ཀྱི་སྤེལ་ཚུལ། སྔགས་དོན། སྔགས་ཀྱི་བརྡ། སྔགས་བཏུ། བརྗོད་ཐབས། སྔགས་གྲངས། རྟགས་ཚད། འབྲས་བུ་སྟེ། བཅུ་གསུམ་ལས་ཕྱི་མ་རྣམས་ལ་བསྐྱེད་རྫོགས་གཉིས་རེ་དང་འབྲེལ་བར་བསྟན་ཏོ། ། གསུམ་པ་སེམས་དབེན་ལ། རྟེན་གྱི་གང་ཟག །ངོ་བོ། ངེས་ཚིག །ཡུལ་སེམས་ཀྱི་སྣང་བ་དང༌། ཡུལ་ཅན་སེམས་ལ་དམིགས་པའི་ཡེ་ཤེས་ཀྱི་སྣང་བའི་དབྱེ་བ། འཁོར་འདས་སྒྲུབ་པའི་བྱེད་ལས། སེམས་བྱུང་གི་དུས། འཇུག་པའི་དུས་ཚོད། སེམས་ཀྱི་མཚན་ཉིད། མིང་གི་རྣམ་གྲངས། རྟོགས་མ་རྟོགས་ཀྱི་སྐྱོན་ཡོན། སེམས་དབེན་གྱི་ཤེས་བྱ། ཡུལ་ཡུལ་ཅན་གྱི་སྒྲུབ་པ། མཐར་ཕྱིན་པའི་རྟགས་ཚད། དེ་ཡི་འབྲས་བུ་སྟེ། བཅུ་བཞིའམ། རྟེན། ཤེས་བྱ། སྤང་བྱ། དབྱེ་བ་སོ་སོའི་མཚན་ཉིད་དང་བཅས་པ། ངེས་ཚིག་སྟེ། ལྔའི་སྒོ་ནས་བསྟན་ཏོ། ། བཞི་པ་སྒྱུ་ལུས་ལ། རྟེན། ངོ་བོ། ངེས་ཚིག །དག་པ་དང་མ་དག་པའི་དབྱེ་བ། རྒྱུ་འབྲས། རྒྱུ་རྐྱེན། རྙེད་ཚུལ། སྣོད་དུ་བྱ་བའི་ལམ་རིམ། རྙེད་མ་རྙེད་ཀྱི་སྐྱོན་ཡོན། དངོས་པོ་དང་བྱ་བའི་ཁྱབ་པ། སྤང་བྱ། ཤེས་བྱ། མིང་གི་རྣམ་གྲངས། མཚོན་དཔེ། ཉམས་སུ་ལེན་པའི་ཐབས། རྟགས་ཚད། འབྲས་བུ་སྟེ་བཅུ་བདུན་ནོ། ། ལྔ་པ་འོད་གསལ་གྱི་རིམ་པ་ལ། རྟེན། ངོ་བོ། ངེས་ཚིག །སྟོང་ཉིད་བཅོ་བརྒྱད་དམ་ཕྱི་ནང་གི་མངོན་བྱང་ལ་སོགས་པའི་དབྱེ་བ། སྣོད་དུ་བྱ་བའི་རིམ་པ། ཤེས་བྱ། སྤང་བྱ། གཉེན་པོ་མངོན་བྱང་གཉིས། སྒྲུབ་ཐབས་བསམ་གཏན་གཉིས། མིང་གི་རྣམ་གྲངས། ཁྱབ་ཚུལ། རྒྱུ་འབྲས། (༡༥༩ན)དབྱེ་བ། མཚན་ཉིད། འཇུག་ལྡོག །མན་ངག་གི་རབ་བྱེད། སྒོམ་པ། རྟགས་ཚད། འབྲས་བུ་སྟེ་བཅོ་བརྒྱད་དོ། ། ཟུང་འཇུག་སྒྲུབ་པའི་རྣལ་འབྱོར་ལ། རྟེན་གྱི་གང་ཟག །ངོ་བོ། ངེས་ཚིག །སློབ་མི་སློབ་ཀྱི་དབྱེ་བ། འོད་གསལ་ལས་སྡང་ཚུལ། མིང་གི་རྣམ་གྲངས། མཚན་ཉིད། སྒྲུབ་བྱེད་རྒྱུ་རྐྱེན། ཤེས་བྱ། ཉམས་སུ་ལེན་པའི་ཐབས། རྟགས་ཚད། འབྲས་བུ་སྟེ་བཅུ་གཉིས་སམ། ཡང་ན་རྟེན། ཤེས་བྱ། སྤང་བྱ། མཚོན་བྱེད་ལ། འགོག་པ། སྣང་བ། འབྲེལ་བ་ཟུང་འཇུག་གི་མཚན་ཉིད་གསུམ། སློབ་ཚུལ་གཉིས། མཐར་ཕྱིན་པའི་ཚད་དང་ཕན་ཡོན་རྣམས་ཀྱིས་འཆད་དོ། ། དེ་དག་ལས་དབེན་གསུམ་ནི་ཐོག་མར་སྒོ་གསུམ་ལས་རུང་དུ་བྱེད་པ་ཞི་གནས་ཀྱི་གཞི་བཏིང་བ་ཡིན་ལ། ཕྱི་མ་གསུམ་ནི་ལྷག་མཐོང་དངོས་པོའི་གནས་ལུགས་གཙོ་བོར་སྟོན་པ་སྟེ། དེའང་སྒྱུ་མ་ཡུལ་གྱི་སྟོང་ཉིད་ལོངས་སྐུའི་ཉེ་བར་ལེན་པའི་རྒྱུ། འོད་གསལ་སེམས་ཀྱི་སྟོང་ཉིད་དོན་དམ་པའི་བདེན་པ། ཟུང་འཇུག་ཡུལ་སེམས་གཉིས་མེད་ཀྱི་སྟོང་ཉིད་བདེན་གཉིས་དབྱེར་མེད་འབྲས་བུའི་ཚུལ་དུ་གནས་པའོ། ། རྩ་བའི་དྲུག་པ་འབྲས་བུ་ལ་གཉིས། ཐུན་མོང་དང་མཆོག་གི་དངོས་གྲུབ་བོ། ། ཐུན་མོང་ལ་ལས་ཆེན་བརྒྱད། གྲུབ་པ་བརྒྱད། མཆོག་ལ་ཟུང་འཇུག་གི་ཡོན་ཏན་བརྒྱད་དེ་ཉི་ཤུ་རྩ་བཞིར་དབྱེ་བའོ། ། དེ་དག་གིས་བརྗོད་བྱའི་དོན་བསྟན་ནས། གཉིས་པ་རྗོད་བྱེད་སྒྲའི་རྒྱུད་མཐའ་དྲུག་དང་ཚུལ་བཞིའི་སྒོ་ནས་འཆད། དང་པོ་ལ། དྲང་དོན་ངེས་དོན་གཉིས་ནི་དོན་གྱི་མཐའ་ལ་བརྟེན་པ་སྟེ། ཚིག་གཅིག་གིས་དོན་མཚན་བཅས་མཚན་མེད་གཉིས་སུ་བསྟན། དགོངས་དགོངས་མིན་གཉིས་ཚིག་གི་མཐའ་ལ་བརྟེན་པ་སྟེ་ཚིག་དྲང་ངེས་གཉིས་ཀྱིས་དོན་ངེས་པ་གཅིག་ཏུ་སྟོན། སྒྲ་ཇི་བཞིན་ཡིན་མིན་གཉིས་ནི་གཉིས་ཀའི་མཐའ་ལ་བརྟེན་པ་སྟེ། ཚིག་གཉིས་ཀྱིས་དོན་གཅིག་ཏུ་སྟོན་པ་དང༌། ཚིག་གཅིག་ལ་དོན་གཉིས་སུ་གནས་པའི་ཕྱིར། དེ་ལ་དྲང་དོན་གྱིས་བསྐྱེད་རིམ་དང་ངེས་དོན་(༡༥༩བ)གྱིས་རྫོགས་རིམ་ངེས་པ་ཁོ་ནར་སྟོན། དགོངས་བཤད་ཀྱིས་ཤས་ཆེར་རྫོགས་རིམ་སྟོན་ལ་བསྐྱེད་རིམ་སྟོན་པའང་ཡོད་ཅིང༌། དགོངས་མིན་དེ་ལས་ལྡོག་སྟེ་འཆད། སྒྲ་ཇི་བཞིན་མ་ཡིན་པས་ཕལ་ཆེར་རྫོགས་རིམ་སྟོན་ལ་བསྐྱེད་རིམ་སྟོན་པའང་ཡོད་ཅིང་ཇི་བཞིན་པ་དེ་ལས་ལྡོག་པའོ། །དེའང་ཚིག་གཅིག་ལས་དོན་གཉིས་སུ་གོ་བ་ནི་ངེས་པར་དྲང་དོན་ངེས་དོན་དུ་བཟུང༌། རིམ་གཉིས་གང་བསྟན་ཀྱང་དོན་གྱི་ནང་འགལ་བའི་ཚིག་གཅིག་བྱུང་ན་དགོངས་བཤད་དང་དེ་ལས་ལྡོག་པ་དགོངས་མིན། དེ་བཞིན་དུ་བརྡ་བཤད་གཅིག་ཙམ་བྱུང་ན་སྒྲ་ཇི་བཞིན་མ་ཡིན་པ་དང༌། མཁས་བླུན་ཀུན་གྱིས་གོ་བ་ནི་སྒྲ་ཇི་བཞིན་པར་བཟུང་སྟེ་འཆད་དོ། །ཚུལ་བཞིས་འཆད་ཚུལ་ནི་འོག་ནས་རྒྱས་པར་འབྱུང་ངོ༌། ། དེའང་མདོར་ན། རྒྱུད་ཀྱི་ཚིག་གཅིག་གིས་དོན་བཞི་སྟོན་ནུས་པ་སྟེ། ཡི་གེའི་དོན་དང་སྤྱིའི་དོན་གཉིས་སྒྲ་ལ་བརྟེན་ནས་བཤད། སྦས་དང་མཐར་ཐུག་གཉིས་དོན་ལ་བརྟེན་ནས་བཤད། དེ་བཅུ་པོའང་ཚོགས་བཤད་དང་སློབ་བཤད་གཉིས་སུ་བསྡུས་ནས་འཆད་དོ། ། གསུམ་པ་བརྗོད་བྱ་རྗོད་བྱེད་ཀྱི་འབྲེལ་སྦྱར་བ་ནི། བརྗོད་བྱའི་དོན་དྲུག་པོ། རྗོད་བྱེད་བཅུ་གཉིས་ཇི་ལྟར་བཤད་པའི་འབྲེལ་དགོད་པ་སྟེ། དཔེར་ན། བརྗོད་བྱ་དང་པོ་རྟེན་གྱི་གང་ཟག་ལ་ཙནྡན་ལྟ་བུ་ལ་སོགས་པ་བཞི་ནི་དྲང་དོན་དང་ཡི་གེའི་ཚུལ་དུ་བཤད། རིན་པོ་ཆེ་ལྟ་བུའི་གང་ཟག་ནི་ངེས་དོན་དང་མཐར་ཐུག་གི་ཚུལ་དུ་བཤད། བསྐྱེད་རིམ་གྱི་སྦྱང་གཞི་དྲི་མ་དངོས་པོ་ཐ་མལ་པའི་རྟོག་པ། བསྐྱེད་རིམ་གྱི་དམིགས་ཡུལ། བུམ་དབང༌། བསྐྱེད་པའི་ལམ། ལུས་དབེན་ཕྱེད་ཡན། འཇིག་རྟེན་པ་དང་ཐུན་མོང་གི་དངོས་གྲུབ་རྣམས་དྲང་དོན་དང་ཡི་གེ་དང་སྤྱིའི་ཚུལ་རྣམས་སུ་བཤད། རྫོགས་རིམ་གྱི་སྦྱང་གཞི། གཟུང་འཛིན་བྱ་བྱེད་ཀྱི་རྟོག་པ། རྫོགས་རིམ་གྱིས་དམིགས་ཡུལ། དབང་གོང་མ་གསུམ། རྫོགས་པའི་རིམ་པ་དྲུག །མཆོག་གི་དངོས་གྲུབ་རྣམས་ངེས་དོན་དང་སྦས་པ་མཐར་ཐུག་གི་ཚུལ་རྣམས་སུ་འཆད། (༡༦༠ན)དགོངས་དགོངས་མིན་སོགས་བཞི་པོ་ནི་བརྗོད་བྱ་དྲུག་ཀ་ལ་སྦྱར་ནས་འཆད་དོ། ། མདོར་ན་བརྗོད་བྱ་དོན་གྱི་གསང་བ་འདུས་པ་ནི། སྐུ་གསུང་ཐུགས་ནི་རྣམ་པ་གསུམ། ། གསང་བ་ཞེས་ནི་བཤད་པ་ཡིན། ། ཚོགས་པ་འདུས་པར་རབ་བརྗོད་དེ། ། སངས་རྒྱས་ཐམས་ཅད་མངོན་རྗོད་བྱེད། ། ཅེས་གསུངས་པའི་ཕྱིར། ཉན་རང་དང་ཐེག་པ་ཆེན་པོ་པའང་ཤིན་ཏུ་སྐལ་བ་ཅན་མ་ཡིན་པ་དག་ལ་གསང་བར་བྱ་བ་ཉིད་ཀྱི་ཕྱིར། སངས་རྒྱས་རྣམས་ཀྱི་དོན་དམ་པའི་སྐུ་གསུང་ཐུགས་ལ་གསང་བ་ཞེས་བྱ་ཞིང༌། དེའང་ཞིང་དང་གདུལ་བྱ་ཕྱོགས་གཅིག་གི་དབང་དུ་བྱས་པའི་སངས་རྒྱས་ཀྱི་མ་ཡིན་པར། སངས་རྒྱས་ཐམས་ཅད་ཚོགས་པའམ་འདུས་པའི་བདག་ཉིད་ཅན་ཟུང་དུ་འཇུག་པའི་སྐུ་ལ་རྡོ་རྗེ་འཆང་ཆེན་པོའམ་སངས་རྒྱས་ཐམས་ཅད་པ་ཞེས་བྱའོ། ། དེ་ནི་མཐར་ཐུག་པའི་གནས་ཡིན་པའི་ཕྱིར། རྗོད་བྱེད་སྒྲའི་གསང་བ་འདུས་པའང་རྒྱུད་ཐམས་ཅད་ཀྱི་སྤྱི་བོ་ཡིན་ནོ། །ཞེས་བཤད་ཅིང༌། དུས་ཀྱི་འཁོར་ལོ་སེམས་འགྲེལ་དང་བཅས་པའང་འདུས་པའི་དོན་འཆད་བྱེད་དུ་གྱུར་པ་དང༌། ཀྱེའི་རྡོ་རྗེའི་རྒྱུད་འདུས་པ་ལ་མངོན་དུ་ཕྱོགས་པ་དང༌། བདེ་མཆོག་འཁོར་ལོས་འདུས་པའི་དེ་ཁོ་ན་ཉིད་གསལ་བར་བྱེད་པའང་བཞེད་དོ། ། ད༢ གཉིས་པ་[ཞེ་སྡང༌གི་རིགས་ཀྱི་རྒྱུད་]ནི། གཤིན་རྗེའི་གཤེད་ལ་དུས་ཀྱི་རིམ་པ་ལྔ། ། འདོད་པའི་དངོས་གྲུབ་སྤྱོད་པ་སྣ་ཚོགས་དང༌། ། གནོད་ལྡན་ངེས་སྤྱོད་ཆ་ཤས་ཅན་རྣམས་བྱུང༌། ། གཤིན་རྗེ་གཤེད་པོའི་ཆོས་སྐོར་ལ་འཕགས་ཡུལ་དུ་དུས་ཀྱི་རིམ་པ་ལྔར་བྱུང་སྟེ། བཀའ་བསྡུ་གསུམ་པའི་རྗེས་མི་རིང་བ་ནས་གཤིན་རྗེ་གཤེད་པོའི་སྔགས་རྒྱུད་དར་ཏེ་ལོ་ཉིས་བརྒྱ་ཙམ་ནི་དུས་དང་པོ་འདོད་པའི་དངོས་གྲུབ་ཀྱི་དུས་ཏེ་ཚོམ་བུ་སྟོང་ཕྲག་དུ་མ་ཕྱག་རྒྱ་ཆེན་པོའི་མཆོག་འབའ་ཞིག་གྲུབ། དུས་གཉིས་པ་སྤྱོད་པ་སྣ་ཚོགས་པ་གྲུབ་པ་ལོ་སུམ་བརྒྱ་ཙམ་བྱུང་སྟེ་དཀྱིལ་འཁོར་འདིར་ཞུགས་པ་ཐམས་ཅད་དོན་མ་གྲུབ་པ་ནི་གཅིག་ཀྱང་མེད་དེ། (༡༦༠བ)མཆོག་གྲུབ་པའང་ཤིན་ཏུ་མང༌། དུས་གསུམ་པ་གནོད་པ་ཅན་ནི་ལོ་ལྔ་བརྒྱ་ལྷག་ཙམ་བྱུང་སྟེ་དངོས་གྲུབ་