Tibetan
འབྱུང་བཞི་ཉི་ཟླ་སྒྲ་གཅན་གྱི་ཁམས་བདུན་དག་པའི་མདོར་བསྡུས་བདུན་གྱིས་ནང་དུས་ཀྱི་འཁོར་ལོ་བསྟན། གསུམ་པ་དབང་ལེ་ལ་ཁམས་དྲུག་རྒྱལ་བ་རིགས་དྲུག་ཏུ་དག་པའི་ངོ་བོ་མདོར་བསྡུད་དྲུག་དང༌། བཞི་པ་སྒྲུབ་ལེ་ལ་རྒྱལ་བ་རིགས་ལྔ་དག་པའི་མདོར་བསྡུས་ལྔ་དང༌། ལྔ་པ་ཡེ་ཤེས་ལེའུ་ལ་རྡོ་རྗེ་བཞི་དག་པའི་མདོར་བསྡུས་ཆེན་པོ་བཞི་རྣམས་ལས། མདོར་བསྡུས་གསུམ་པ་ཡན་གྱིས་གཞན་དུས་ཀྱི་འཁོར་ལོ་དེ་ཁོ་ན་ཉིད་ཀྱི་ཚུལ་དང་བཅས་པ་བསྟན་ཅིང༌། མདོར་བསྡུས་ཐ་མས་སངས་རྒྱས་ཀྱི་ཞིང་སྦྱོང་བ། སེམས་ཅན་གྱི་དོན་མཛད་པ། མཇུག་དོན་བསྔོ་སྨོན་བཅས་རྒྱས་པར་བསྟན། གནས་པའི་དབང་དུ་བྱས་ན། ལེའུ་དང་པོ་ལ་རྟེན་(༡༦༩བ)འབྲེལ་བཅུ་གཉིས་ལུགས་འབྱུང་ལྡོག་དག་པའི་གནས་པ་ཉེར་བཞི། གཉིས་པ་དབང་པོ་དྲུག་ཡུལ་དྲུག་རང་བཞིན་དྲུག་དག་པའི་གནས་པ་བཅོ་བརྒྱད། གསུམ་པ་ལ་བྱིས་འཇུག་དབང་བཅུ་གཉིས་དག་པའི་གནས་པ་བཅུ་གཉིས། བཞི་པ་ལ་སྐྱེ་བའི་གནས་བདུན་དག་པའི་གནས་པ་བདུན། ལྔ་པ་ལ་རྣམ་པ་ཉི་ཤུས་བྱང་ཆུབ་པར་མཚོན་པའི་གནས་པ་ཉི་ཤུ་ཡོད་དེ། དེའང་མདོར་བསྡུས་ཞེས་པ་ནི་བྲེ་མང་པོ་བྲེ་ཆེན་ལ་འདུས་པ་ལྟར་ཚིག་དོན་རྒྱས་པའི་མདོ་མང་དུ་བསྡུས་པའི་དོན་དང༌། གནས་པ་ཞེས་པ་ནི་བྲེ་ཆེན་ལ་བྲེའུ་ཆུང་མང་དུ་གནས་པ་བཞིན་བྱེ་བྲག་གི་ཚིག་དོན་དུ་མ་གནས་པའི་དོན་ཏེ། མདོར་བསྡུ་ན་ཕྱི་ནང་གཞན་གསུམ་གྱི་བཤད་བྱར་བསྡུས་ནས་འཆད་པར་མཛད་དོ། ། ཉ༢ གཉིས་པ་གསང་སྔགས་རྙིང་མའི་བཤད་རྒྱུན་ནི། སྔ་འགྱུར་བཤད་སྲོལ་ད་ལྟའི་བར་གནས་པ། ། རྡོར་སེམས་སྒྱུ་དྲྭ་ཏནྟྲ་རྩ་བའི་རྒྱུད། ། རྒྱུད་ཀུན་སྤྱི་བོར་རྒྱལ་མཚན་ལྟ་བུར་འཕགས། ། སྔ་འགྱུར་གསང་སྔགས་སྙིང་མ་ལ་བསྟན་པ་སྔ་དར་གྱི་ལོ་པཎ་སྤྲུལ་པའི་སྐྱེས་མཆོག་རྣམས་ཀྱི་བཀའ་དྲིན་ལས། ཇོ་བོ་རྗེས་བསམ་ཡས་ཀྱི་རྒྱ་དཔེ་རྣམས་གཟིགས་པ་ན་སྔར་མ་གསན་པའི་རྒྱུད་དུ་མ་གཟིགས་པས། བོད་དུ་གསང་སྔགས་ཀྱི་བསྟན་པ་དར་བ་འདྲ་བ་རྒྱ་གར་དུའང་མ་བྱུང་བ་འདྲ་ཞེས་བསྔགས་པས་མཚོན་མདོ་སྔགས་ཀྱི་དབང་བཤད་མན་ངག་མཐའ་ཡས་པ་བྱུང་ཡང༌། གསང་སྔགས་ནི་དེ་སྐབས་གསང་བ་ལྷུར་ལེན་པས། བཤད་གྲྭ་ལ་མཚན་ཉིད་ཐེག་པ་དང་སྒོམ་གྲྭ་ལ་སྔགས་ཉིད་རྩལ་དུ་འདོན་པས་གསང་སྔགས་ཕྱི་རྒྱུད་འགའ་ཞིག་མ་གཏོགས་ནང་རྒྱུད་སྡེ་གསུམ་གྱི་བཤད་གྲྭ་མ་བྱུང་བར་མངོན་ལ། དུས་དེ་ནས་བརྩམས་ད་ལྟའི་བར་དབང་བཤད་ཀྱི་བཀའ་མ་ཆད་པར་གནས་པ་ནི། རྡོ་རྗེ་སེམས་དཔའ་སྒྱུ་འཕྲུལ་དྲྭ་བ་གསང་བའི་སྙིང་པོ་དེ་ཁོ་ན་ཉིད་ངེས་པས་རྒྱུད་ཀྱི་རྒྱལ་པོ་ཉིད་དེ་ཏནྟྲ་ཆེན་པོ་སྡེ་བཅོ་བརྒྱད་ཀྱི་སྤྱིའམ་རྩ་བ་ལྟ་བུར་གྱུར་ཅིང༌། རྒྱུད་ཀུན་གྱི་སྤྱི་བོར་རྒྱལ་མཚན་ལྟ་བུར་ཁྱད་པར་དུ་མས་འཕགས་པ་ཡིན་ནོ། །(༡༧༠ན) སྒེག་རྡོར་ཉི་སེང་སངས་རྒྱས་གསང་བས་བཀྲལ། ། བི་མ་རྨ་གཉགས་རྣམས་ཀྱིས་བསྒྱུར་ཅིང་བཤད། ། རོང་ཟོམ་ཀློང་ཆེན་རིག་རལ་སོགས་ཀྱིས་སྤེལ། ། ཁྱད་འཕགས་ཟུར་པའི་བཀའ་སྲོལ་ཉག་ཕྲ་བ། ། སྨིན་གླིང་མཆེད་ཀྱིས་བསྟན་པའི་མེ་རོ་གསོས། ། རྒྱུད་རྒྱལ་དེ་རྣམས་རྒྱལ་པོ་ཛ་ལས་བརྒྱུད་དེ་སྲས་མོ་ཀུ་ཀུ་ར་ཛ་ལས་སྒེག་པ་རྡོ་རྗེ་དང་སངས་རྒྱས་གསང་བས་ཞུས་སྔ་མས་འགྲེལ་པ་རིན་པོ་ཆེའི་སྤར་ཁབ་དང༌། ཕྱི་མས་རྣམ་དབྱེ་འགྲེལ་མཛད། དེ་གཉིས་ཀྱིས་བི་མ་མི་ཏྲ་ལ་གནང༌། དེས་འགྲེལ་པ་ཁོག་གཞུང་མཛད། གཞན་ཡང་ཙནྡྲ་གོ་མིའི་རྒྱ་མདུད་འགྲེལ། ཉི་འོད་སེང་གེའི་རྒྱ་ཆེར་འགྲེལ། པདྨའི་རྣམ་བཤད་ཆེན་མོ་རྣམས་རྒྱ་གར་དུ་བྱུང༌། བོད་དུ་པན་ཆེན་བི་མ་ལ་མི་ཏྲས་རྨ་རིན་ཆེན་མཆོག་དང་གཉགས་ཛྙཱ་ན་ཀུ་མ་ར་ལ་གནང༌། རྨས་རྒྱུད་བོད་སྐད་དུ་བསྒྱུར། ཡང་སློབ་དཔོན་ཆེན་པོས་ཀྱང་གཉགས་ལ་གནང༌། དེས་སོག་པོ་དཔལ་ཡེ། དེས་གནུབས་ཆེན་ལ་བཤད། རྨས་མདོ་ཁམས་སུ་གཙུག་ཏུ་རིན་ཆེན་གཞོན་ནུ་དང་གྱེ་རེ་མཆོག་སྐྱོང་ལ་བཤད། དེ་གཉིས་ཀས་དར་རྗེ་དཔལ་གྲགས་དང་ཞང་རྒྱལ་བའི་ཡོན་ཏན་ལ་བཤད། ཞང་གིས་གནུབས་ཆེན་པོ་ལ་བཤད། ཡང་སློབ་དཔོན་བཻ་རོ་ཙ་ནས་ཁམས་འོར་རུ་བྱམས་ཆེན་གྱི་གཙུག་ལག་ཁང་དུ་ཉི་འོད་སེང་གེའི་འགྲེལ་པ་བསྒྱུར་བཤད་མཛད། གནུབས་ཆེན་ནས་རིམ་པར་བརྒྱུད་དེ་ཟུར་པ་མེས་དབོན་ལ་བཀའ་བབས་ཏེ་ཟུར་ལུགས་སུ་གྲགས་པ་དང༌། ལྷ་རྗེ་སྒྲོ་ཕུག་པའི་སློབ་མ་འཛོམ་འགྲོ་བའི་མགོན་པོ་ལ་རྒྱལ་བ་ཀཿཐོག་པ་དམ་པ་བདེ་གཤེགས་ཀྱིས་གསན། དེའི་བརྒྱུད་པ་ལས་བྱོན་པའི་བུ་འབོར་བ་ཡེ་ཤེས་རྒྱལ་མཚན་གྱིས་འགྲེལ་ཊཱིཀ་མཛད་པ་སོགས་བཤད་སྒྲུབ་ཀྱི་རྒྱུན་དབུས་སུ་ཡར་འཕེལ་བ་ལ་ཕྱིས་སྒྱུ་འཕྲུལ་ཁམས་ལུགས་སུ་གྲགས་པ་དང༌། རོང་ཟོམ་ཆོས་ཀྱི་བཟང་པོ་ལ་པདྨ་བཻ་རོ་བི་མ་ལ་སོགས་ཀྱི་བརྒྱུད་པའི་བཀའ་ཐམས་ཅད་བབས། གསང་སྙིང་ལ་དཀོན་མཆོག་འགྲེལ་དུ་(༡༧༠བ)གྲགས་པ་མཛད་པ་རོང་ལུགས་དང༌། ཀུན་མཁྱེན་ཀློང་ཆེན་རབ་འབྱམས་བཟང་པོས་འགྲེལ་པ་ཕྱོགས་བཅུ་མུན་སེལ་ཨ་ཏི་ཡོ་གའི་ལུགས་སུ་བཀྲལ་བ་དང༌། རོག་ཤེས་རབ་འོད་ལ་སོ་ཟུར་སྐྱོ་ལུགས་སོགས་མང་དུ་འདུས་ཤིང་དེ་ལས་རོག་ལུགས་སུ་གྲགས་པ་བྱུང༌། ཕྱིས་གསར་མའི་མཁས་པ་རྣམས་ཀྱིས་དགག་པ་བྱས་པ་ལ་བཅོམ་ལྡན་རིག་པའི་རལ་གྲིས་སློབ་དཔོན་པདྨའི་ཕྱག་དཔེ་རྒྱ་དཔེ་ངོ་མ་ཕྱག་ཏུ་རྙེད་པས་ཐར་ལོ་ལ་བསྒྱུར་བར་བསྐུལ་ཞིང་གསང་སྙིང་སྒྲུབ་པ་རྒྱན་གྱི་མེ་ཏོག་མཛད་པ་སོགས་ཀྱིས་སྤེལ་བས་ཕྱིས་ཀྱི་རྟོག་གེ་བ་རྣམས་ལའང་རྩོད་མེད་དུ་གྱུར་ཅིང༌། ལུགས་སྲོལ་ཀུན་གྱི་ནང་ནས་ཁྱད་པར་དུ་འཕགས་པ་ཟུར་པའི་བཀའ་སྲོལ་ཕྱིས་སུ་ཉག་ཕྲ་བར་གྱུར་པ་ན། ལོ་ཆེན་བཻ་རོ་ཙ་ན་དང་རྒྱལ་མོ་གཡུ་སྒྲ་སྙིང་པོ་སྔ་འགྱུར་བསྟན་པའི་མེ་རོ་སློང་བ་ལ་བསམ་བཞིན་དུ་སྐྱེ་བ་བཞེས་པ་སྨིན་གླིང་སྐུ་མཆེད་གཉིས་ལས། གཏེར་ཆེན་རིན་པོ་ཆེས་རྒྱུད་རྒྱལ་འདི་ཉིད་ཀྱི་གཙོས་སྔ་འགྱུར་བཀའ་མའི་སྐོར་རྣམས་འབད་རྩོལ་དུ་མས་གསན་ཅིང་སོ་སོའི་སྒྲུབས་ཐབས་དཀྱིལ་ཆོག་གི་ཡིག་ཆ་ཁྱད་པར་ཅན་དུ་མ་མཛད་ཅིང༌། སྒྱུ་འཕྲུལ་ཞི་ཁྲོ་ལའང་སྒྲུབ་དཀྱིལ་ཉུང་ལ་གསལ་བར་མཛད་ནས་དེ་དག་གི་སྒྲུབ་མཆོད་ལག་ལེན་གྱི་རྒྱུན་བཙུགས་པ་དང༌། ལོ་ཆེན་དྷརྨ་ཤྲཱིས་རྒྱུད་རྒྱལ་གསང་བ་སྙིང་པོའི་སྤྱི་དོན་གསང་བདག་ཞལ་ལུང༌། འབྲུ་འགྲེལ་གསང་བདག་དགོངས་རྒྱན། དེ་དག་གི་ཞལ་སློབ་རབ་འབྱམས་པ་ཉེར་གཅིག་བྱུང་བར་གྲགས་པའི་ནང་ཚན་རབ་འབྱམས་པ་ཨོ་རྒྱན་ཆོས་གྲགས་ཀྱིས་ཟིན་བྲིས་རིན་ཆེན་ཕྲེང་བ་སོགས་ལ་བརྟེན་ཏེ་བཤད་པའི་རྒྱུན་ཁྱད་པར་དུ་འཕགས་པ་ད་ལྟའི་བར་དུ་བྱུང་བས་བསྟན་པའི་མེ་རོ་རྨངས་ནས་གསོས་པ་ཡིན་ནོ། ། དེ་ལ་ཆེ་བའི་ཡོན་ཏན་བརྒྱད་ཀྱིས་འཕགས་པའི་རྒྱུད་རྒྱལ་གསང་བ་སྙིང་པོ་ནི་འཆད་བྱ་ཡིན་ལ། འཆད་བྱེད་བཤད་རྒྱུད་རྒྱ་མཚོ། ཐལ་བ། ཡེ་ཤེས་སྙིང་པོ། རྡོ་རྗེ་མེ་ལོང་བཞི་དང་ཚད་མ་གསུམ་གྱིས་འཆད། ཇི་ལྟར་འཆད་ན། (༡༧༡ན)སྤྱིར་མཧཱ་ཡོ་ག་རྒྱན་བདུན་གྱི་སྒོ་ནས་འཆད། བྱེ་བྲག་རྒྱུད་ཆེན་འདི་ཉིད་སྔ་རབས་པ་རྣམས་ཀྱི་མདའ་ལྟར་རྩེ་མོ་ནས་བཟུང་སྟེ་འཆད་པ་ཞེས་མཚན་གྱི་ནང་དུ་ཆོས་ཐམས་ཅད་གཞི་ལམ་འབྲས་གསུམ་དུ་བསྡུས་ནས་འཆད་པ་དང༌། མདུང་ལྟར་རྐེད་པ་ནས་བཟུང་སྟེ་འཆད་པ་ལ་ལེའུ་ལྔ་པར། ཤེས་འཇུག་མཚན་ཉིད་འབྱོར་པའི་གཟུངས། ། འབྲས་བུ་སྨིན་བྱེད་རྒྱུ་དང་རྐྱེན། ། ནུས་མཐུ་ཅན་དུ་གང་གྱུར་པ། ། རིག་འཛིན་རྒྱལ་བའི་ཞིང་དུ་གྲགས། ། ཞེས་གསུངས་པས། རྒྱུ་ཤེས་པའི་མཚན་ཉིད་ལྟ་བ། རྐྱེན་འཇུག་པའི་མཚན་ཉིད་ཏིང་ངེ་འཛིན། ལམ་གྱུར་གྱི་འབྲས་བུ་རིག་འཛིན་བཞི་སྟེ་མཚན་ཉིད་གསུམ་དུ་དྲིལ་ནས་འཆད། རལ་གྲི་ལྟར་ཡུ་བ་ནས་བཟུང་སྟེ་འཆད་པ་ཞེས་ལེའུ་ཐ་མའི་ཤློ་ཀ་གཉིས་ཀྱི་དོན། གཞི་རང་བཞིན་གྱི་སྣང་བ་ལོག་རྟོག་འཁྲུལ་པའི་སྣང་བ། གདུལ་བྱ་ལམ་གྱི་སྣང་བ། འབྲས་བུ་བདེ་གཤེགས་ཀྱི་སྣང་བ་བཞིར་བསྡུས་ནས་འཆད། བཀའ་སྡེ་ཟུར་པའི་བཤད་སྲོལ་ནི། རང་བཞིན་དངོས་པོའི་གནས་ཚུལ། མ་རྟོགས་འཁྲུལ་པའི་སྣང་བ། ཐམས་ཅད་མཁྱེན་པས་གཟིགས་ཚུལ། བརྩེ་བས་ཐུགས་རྗེ་སྐྱེས་ཚུལ། འགྲོ་དོན་ཇི་ལྟར་མཛད་ཚུལ་ལྔའི་སྒོ་ནས་འཆད། ད་ལྟའི་འཆད་ཚུལ་ནི། བི་མ་ལའི་ཁོག་གཞུང་ལས། རབ་ལ་མཚན་བསྟན་འབྲིང་ལ་དབྱེ། ། ཐ་མ་འབྲུ་གཉེར་བཀྲོལ་བའོ། ། ཞེས་གསུངས་པ་ལྟར། དབང་པོ་རབ་ལ། མཚན་བསྟན་ཏེ་བཤད་པ། འབྲིང་ལ་རྒྱུད་ཀྱི་སྤྱི་དོན་རྣམ་པར་དབྱེ་བ། ཐ་མ་ལ་འབྲུ་རེ་གཉེར་བའི་སྒོ་ནས་བཀྲོལ་བ་གསུམ། དང་པོ་ལ། རྒྱུད་ལུང་མན་ངག་དང་མཐུན་པའི་མཚན་གསུམ། ཐབས་ལམ་སྟེང་སྒོ་གསང་བ་འོག་སྒོ་དང་སྦྱར་ཏེ་བཤད་པ་གཉིས་རྣམས་ཡོད། གཉིས་པ་ལ། དོན་གྱི་རྣམ་གྲངས་རྣམ་པར་དབྱེ་བ། ཚིག་གི་རྣམ་གྲངས་རྣམ་པར་དབྱེ་བ་གཉིས། སྔ་མ་ལ། རྒྱུད་འབྱུང་བའི་རྒྱུ་གླེང་གཞི། རྐྱེན་གླེང་སློང༌། འབྲས་བུ་ཡོངས་ཤེས་རྒྱུད་དོན། རྒྱུད་ཀྱི་དགོས་འབྲེལ། (༡༧༡བ)འཁོར་ལ་གདམས་ཤིང་བསྟན་པ་གཏད་པ་དང་ལྔ། གསུམ་པ་ལ། ངོ་བོ། ངེས་ཚིག །དབྱེ་བ་རྣམས་ཀྱི་སྒོ་ནས་འཆད་པར་མཛད་དོ། ། ཉ༣ གསུམ་པ་ཞར་ལས་འཕྲོས་པ་ནི། ཕྱག་རྒྱ་ཆེན་པོའི་བཤད་སྲོལ་རྣམ་བརྒྱད་དང༌། ། ཀུན་བྱེད་རྒྱལ་སོགས་རྒྱུད་དང་གཞུང་གདམས་ཀྱི། ། བཤད་སྲོལ་གསར་རྙིང་ཕྲན་ཚེགས་སྨོས་མི་ལངས། ། གོང་དུ་བཤད་པ་དེ་དག་ད་ལྟའི་བར་དུ་རྒྱུན་བཞུགས་པ་ལས་ཡོངས་གྲགས་གཙོ་ཆེ་བ་རྣམས་སྨོས་པ་ཡིན་གྱི་གསར་མའི་ཕྱོགས་སུ་མཚན་ཉིད་ཀྱི་སྐོར་བ། འདུལ་བ་མེ་ཏོག་ཕྲེང་བརྒྱུད། དབུ་མ་རྩ་ཤེ། བྱམས་ཆོས་ལྷག་མ་གསུམ། བཤེས་སྤྲིང་དང་སྤྱོད་འཇུག་སོགས་གཞུང་ཆེ་ཕྲ་དུ་མའི་བཤད་སྲོལ་སྔར་བྱུང་ཞིང་ད་ལྟ་དེ་དག་གི་རྩ་བ་དང་འགྲེལ་པ་འགའ་རེའི་ལུང་རྒྱུན་ཙམ་ལས་མི་བཞུགས་ཀྱང་སོ་སོའི་རྩལ་བཤད་ཀྱིས་འཆད་པར་སྣང་བ་དང༌། སྔགས་ཀྱི་ཕྱོགས་ལ་སྔོན་དུ་རྒྱུད་ཕལ་མོ་ཆེའི་བཤད་པ་བྱུང་ཞིང༌། གདམས་ངག་ཕག་མོ་གཞུང་དྲུག་གིས་མཚོན་རྒྱ་གཞུང་མངོན་རྟོགས་ཀྱི་རིགས་མང་པོར་བཤད་སྲོལ་བྱུང་བ་དང༌། ཕྱག་རྒྱ་ཆེན་པོའི་བཤད་སྲོལ་རྣམ་པ་བརྒྱད་དུ་གྲགས་པ་སོགས་དང༌། རྙིང་མའི་ཕྱོགས་སུ་སེམས་སྨད་བཅོ་བརྒྱད་ཀྱི་རྩ་བ་ཀུན་བྱེད་རྒྱལ་པོ། ཨ་ནུ་ལུང་གི་མདོ་བཞིའི་རྩ་བ་ཀུན་འདུས་རིག་པའི་མདོ། བཤད་རྒྱུད་དགོངས་པ་འདུས་པ་ལ་གནུབས་ཆེན་པོའི་འགྲེལ་པ་མུན་པའི་གོ་ཆ་སོགས་ཀྱིས་འཆད་པ་དང༌། སངས་རྒྱས་གསང་བའི་ལམ་རྣམ་བཀོད། སྒེག་རྡོར་གྱི་དམ་ཚིག་གསལ་བཀྲ་སོགས་ལ་དུས་ཕྱི་མོའི་བར་དུ་བཤད་པའི་རྒྱུན་བྱུང་ཞིང་འགོལ་ལོ་གཞོན་ནུ་དཔལ་བས་རྒྱུད་གཞུང་བཞི་བཅུ་ལྷག་གཅིག་གི་བཤད་ལུང་དེ་སྐབས་སུ་བཞུགས་པར་གསུངས་པས་མཚོན། རྒྱུད་གཞུང་ལུགས་གདམས་ངག་གི་བཤད་སྲོལ་གསང་སྔགས་གསར་རྙིང་ལ་བྱུང་བ་ཕྲན་ཚེགས་ནི་སྨོས་ཀྱིས་མི་ལངས་སོ། ། དེ་ལས་ཕྱག་རྒྱ་ཆེན་པོའི་བཤད་སྲོལ་ནི། ཐོག་མར་ཇོ་བོ་རྗེས་(༡༧༢ན)རྒྱུད་བླ་མ་བསྒྱུར་བཤད་དང་མཆིམས་ཕུར་དོ་ཧ་དང་སྒྱུ་འཕྲུལ་གྱི་སྐོར་གསུངས། དེ་ནས་རྗེ་མར་པས་གདམས་ངག་གི་བཤད་རྒྱུན་གནང་བ་ད་ལྟའི་བར་དུའང་མ་ཆད་པར་བཞུགས། དེ་ནས་ཀོ་ས་ལའི་པཎྜི་ཏ་ཆེན་པོ་བཻ་རོ་ཙ་ན་རཀྵི་ཏ་བོད་དུ་བྱོན་ནས་དོ་ཧ་སྐོར་གསུམ་བསྒྱུར་ཅིང་བཤད། དེ་ནས་སྐོར་ནི་རཱུ་པས་སྙིང་པོའི་དོན་རྒྱ་ཆེར་བཤད། དེ་ནས་རྒྱ་གར་ཕྱག་ན་སྟེ་སློབ་དཔོན་བཛྲ་པཱ་ཎིས་གྲུབ་པ་སྡེ་བདུན་དང༌། སྙིང་པོ་དོན་གསུམ་ཞེས་དོ་ཧ་རྣམ་གསུམ་སྟེ་གྲུབ་སྙིང་ཕྲ་མོ་དང་བཅས་པའི་གཞུང་དང༌། གདམས་ངག་མཚན་ཉིད་ཀྱི་རྗེས་སུ་འབྲང་པའི་བྲུལ་ཚོ་དགུ། ཕ་རྒྱུད་ཀྱི་རྗེས་སུ་འབྲངས་པའི་བྲུལ་ཚོ་དགུ། མ་རྒྱུད་ཀྱི་རྗེས་སུ་འབྲངས་པའི་བྲུལ་ཚོ་དགུ་སྟེ་ཉི་ཤུ་རྩ་བདུན་པོ་རྣམས་ལས་ཀྱི་ཕྱག་རྒྱ། ཆོས་ཀྱི་ཕྱག་རྒྱ། ཕྱག་རྒྱ་ཆེན་པོ། དམ་ཚིག་གི་ཕྱག་རྒྱ་སྟེ་ཕྱག་རྒྱ་བཞིས་བཅིངས་ཤིང༌། ལྟ་བ་ལུང་རིགས་དང་འབྲེལ་པ། སྒོམ་པ་ཉམས་མྱོང་དང་འབྲེལ་པ། སྤྱོད་པ་དུས་ཚོད་དང་འབྲེལ་པ། འབྲས་བུ་གཞན་དོན་དང་འབྲེལ་པ། ལམ་དྲོད་རྟགས་དང་འབྲེལ་པ། དབང་གདམས་ངག་དང་འབྲེལ་པ་སྟེ་འབྲེལ་པ་དྲུག་ལྡན་དུ་གསུངས་པ་ལ་སྟོད་ལུགས་སུ་གྲགས། དེ་ནས་བལ་པོ་ཨ་སུས་དོ་ཧ་སོགས་བཤད་པས་རྒྱུན་འཛིན་པ་ཁྲི་ཕྲག་མང་པོ་བྱུང་བ་ལ་སྨད་ལུགས་སུ་གྲགས། དེ་ནས་རྗེ་རས་ཆུང་པས་ལུས་མེད་མཁའ་འགྲོས་ཆོས་སྐོར་དང་ཨ་སུའི་གདམས་པ་སོགས་སྤེལ། དེ་ནས་མངའ་རིས་པ་ནག་པོ་ཤེར་དད་ཀྱིས་རྒྱ་གར་ཕྱག་ནའི་ཞལ་སྔ་ནས་སྐུ་གསུང་ཐུགས་ཀྱི་མཛོད་སོགས་ཡིད་ལ་མི་བྱེད་པའི་ཆོས་བཅུ་གསན་ཅིང་བསྒྱུར་བཤད་མཛད་པ་སྟེ་ད་ལྟ་ནི་དེ་དག་གི་ལུང་རྒྱུན་ཙམ་བཞུགས་པ་ཡིན་ལ། བཀའ་དེ་དག་ཐམས་ཅད་ཀྱང་བྲམ་ཟེ་ཡབ་སྲས་དང་མངའ་བདག་རྒྱལ་བ་མཻ་ཏྲི་པ་ཁོ་ན་ལས་བརྒྱུད་པའོ། ། ཛྙཱ་ན་ཤྲཱི་སོགས་ལུང་མང་རབ་གྲགས་ཤིང༌། ། བོད་དུ་རིག་རལ་གཞོན་ཚུལ་སོགས་ཀྱང་ངོ༌། ། བསྟན་པ་འདིའི་ལུང་གི་དམ་ཆོས་དངོས་གཞི་རྒྱལ་བའི་བཀའ་(༡༧༢བ)འགྱུར་རོ་ཅོག་དང༌། དེའི་དགོངས་འགྲེལ་བསྟན་བཅོས་འགྱུར་རོ་ཅོག་ཕལ་མོ་ཆེའི་བཀླགས་ལུང་མཐར་ཆགས་སོགས་ལ་བཀའ་དྲིན་ཆེ་བའང་འཕགས་ཡུལ་དུ་དུས་ཕྱིས་རྡོ་རྗེ་གདན་པ་གསུམ་གྱི་འཕྲོས་སུ་ཇོ་བོ་ཛྙཱ་ན་ཤྲཱི། པུཎྱ་ཤྲཱི་སོགས་ལུང་མང་འཛིན་པར་རབ་ཏུ་གྲགས་ལ། བོད་དུ་བསྟན་པ་ཕྱི་དར་ལ་ཐོག་མར་སྣར་ཐང་པ་བཅོམ་ལྡན་རིག་པའི་རལ་གྲིས་བཀའ་བསྟན་འགྱུར་རོ་ཅོག་ཕྱོགས་སུ་བསྡེབ་ཅིང་དཀར་ཆག་མཛད། དེའི་སློབ་མ་དབུས་པ་བློ་གསལ་སངས་རྒྱས་འབུམ་སོགས་ཀྱིས་བརྩོན་པ་ཆེན་པོས་གླེགས་བམ་བཞེངས་པ་སོགས་ལས་མང་དུ་མཆེད་ཅིང་བུ་སྟོན་གྱིས་ཀྱང་དབྱེ་གསལ་ཤིན་ཏུ་ཞིབ་མོ་དང་དཀར་ཆག་མཛད། ལུང་ནི་སྟེང་པ་ལོ་ཙཱ་བ་ཚུལ་ཁྲིམས་འབྱུང་གནས། བ་རི་ལོ་ཙཱ། དབུས་པ་བློ་གསལ་སོགས་ཀྱི་བཀའ་དྲིན་ལས་བྱུང་ཞིང༌། ཁྱད་པར་ཆོས་ཀྱི་གཏེར་ཆེན་བག་སྟོན་གཞོན་ནུ་ཚུལ་ཁྲིམས་དང༌། རྡོ་རྗེ་གདན་པ་ཀུན་དགའ་རྣམ་རྒྱལ། དཔལ་ལྡན་དཔའ་བོ་གཙུག་ལག་ཕྲེང་བ། མགོན་པོ་བསོད་ནམས་མཆོག་ལྡན་སོགས་ལུང་མང་བར་ཡོངས་སུ་གྲགས་པ་རྣམས་ཀྱིས་འཛིན་ཅིང་སྤེལ་བར་མཛད་དོ། ། ཇ༣ གསུམ་པ་བཤད་བཀའ་བབ་ཚུལ་གྱི་དོན་བསྡུ་བ་ལ་གསུམ། ཉ༡ བཀའ་བབ་སྤྱིར་བཤད་པ། ཉ༢ རང་ལུགས་དམིགས་སུ་བསལ་བ། ཉ༣ གཞན་ལུགས་ལ་བསྔགས་པ་བརྗོད་པའོ། ། ཉ༡ དང་པོ་ནི། ཆོས་བློན་ཐོན་མི་བཻ་རོ་སྐ་ཅོག་ཞང༌། ། གནུབས་ཆེན་རིན་བཟང་རྔོག་ལོ་ས་སྐྱ་པ། ། བུ་སྟོན་བཤད་རྒྱུན་འདེགས་པའི་ཀ་ཆེན་བཅུ། ། བྱང་ཕྱོགས་ལྗོངས་འདིར་ཐུབ་པའི་ཕྲིན་ལས་ཅན། ། དེ་དག་བཀའ་དྲིན་ནམ་མཁས་གཞལ་དུ་མེད། ། ཐོག་མར་འཇམ་དབྱངས་རྣམ་འཕྲུལ་ཐོན་མི་སཾ་བྷོ་ཊས་ཡི་གེ་དང་བརྡ་སྦྱོར་གྱི་སྲོལ་བཏོད། དེ་ནས་སྤྲུལ་པའི་ལོ་ཙཱ་བ་ཆེན་པོ་བཻ་རོ་ཙ་ན། སྐ་བ་དཔལ་བརྩེགས། ཅོག་རོ་ཀླུའི་རྒྱལ་མཚན། ཞང་སྣ་ནམ་གྱི་བཙུན་པ་ཡེ་ཤེས་སྡེ་རྣམས་ཀྱིས་མདོ་སྔགས་ཀྱི་ཆོས་མཐའ་དག་བསྒྱུར་ཅིང་སྐད་གསར་བཅད་ཀྱིས་གཏན་ལ་ཕབ། (༡༧༣ན)གནུབས་ཆེན་སངས་རྒྱས་ཡེ་ཤེས་རིན་པོ་ཆེས་མདོ་དང་སྒྱུ་འཕྲུལ་ལ་སོགས་པའི་བཤད་རྒྱུན་རྒྱ་ཆེར་སྤེལ། ཕྱི་དར་ཐོག་མར་ལོ་ཆེན་རིན་ཆེན་བཟང་པོ་དང༌། དེ་ནས་རྔོག་ལོ་བློ་ལྡན་ཤེས་རབ་ཀྱིས་རྒྱུད་དང་དགོངས་འགྲེལ་གྱི་བསྟན་བཅོས་དཔག་ཏུ་མེད་པ་བསྒྱུར་ནས་བཤད་རྒྱུན་ཕལ་མོ་ཆེའི་སྲོལ་བཏོད། དེ་དག་དང་གཞན་ལས་འོངས་པའི་བཤད་རྒྱུན་མཐའ་དག་རྗེ་བཙུན་ས་སྐྱ་པ་ཁུ་དབོན་དང༌། བུ་སྟོན་རིན་པོ་ཆེ་རྣམས་ཀྱིས་བཟུང་བས་དེ་དག་ལ་བཤད་རྒྱུན་འདེགས་པའི་བཀའ་ཆེན་བཅུ་ཞེས་གཏམ་དུ་གྲགས་པ་སྟེ་བྱང་ཕྱོགས་བོད་ཡུལ་མུན་པའི་ལྗོངས་སུ་སངས་རྒྱས་ཀྱི་བསྟན་པ་ཉི་མ་ལྟར་སྣང་བར་ནུས་པའི་ཐུབ་པའི་དབང་པོའི་ཕྲིན་ལས་མཛད་པ་དེ་དག་གི་བཀའ་དྲིན་ནམ་མཁའི་མཐས་ཀྱང་གཞལ་དུ་མེད་དོ། ། ཕྱིས་ནས་བཤད་བཀའ་གཙོ་བོར་ས་དགེ་གཉིས། ། སྒྲུབ་བརྒྱུད་བཀའ་རྙིང་དག་ལ་བབས་ལྟར་སྣང༌། ། བསྟན་པ་ཕྱི་དར་ཆོས་ལུགས་ཐ་དད་དུ་གྱེས་པ་ནས་བརྩམས་ཐམས་ཅད་ལ་བཤད་སྒྲུབ་གཉིས་ཀ་ཡོད་མོད་ཀྱང༌། བཤད་བཀའ་ནི་གཙོ་བོར་ས་དགེ་གཉིས་ལ་བབས་པ་དང༌། སྒྲུབ་བརྒྱུད་ཀྱི་བཀའ་ནི་གཙོ་བོར་བཀའ་བརྒྱུད་དང་རྙིང་མ་དག་ལ་བབས་པ་ལྟར་སྣང་ངོ༌། ། དེ་ལ་བཀའ་བཞིན་པའི་མཚན་ནི་རྗེ་རེད་མདའ་བ་མན་ཆད་དུ་གྲགས་ཆེ་ཞིང༌། རྒྱལ་ཚབ་དར་མ་རིན་ཆེན་གྱིས་པུསྟི་བཅུ་ལ་བཤད་པའི་སྲོལ་བཏོད་པ་ཕྱིན་ཆད་ནས་བཀའ་བཅུ་པར་གྲགས་ཆེ་ལ། བཀའ་བཞི་ནི་དབུ་ཕར་འདུལ་མཛོད་བཞི་དང༌། བཀའ་བཅུ་ནི་དེའི་སྟེང་དུ་ཚད་མ་རྣམ་འགྲེལ་སོགས་ཅི་རིགས་བསྣན་པའོ། ། ས་ལུགས་སུ་ཕར་ཚད་གཉིས། འདུལ་མཛོད་གཉིས། དབུ་མ་སྡོམ་གསུམ་སྟེ་གཞུང་ལུགས་དྲུག་གི་གྲངས་ངེས་མཛད་ཅིང༌། རབ་འབྱམས་པའི་མཚན་ཡང་རོང་སྟོན་ཆེན་པོའི་སློབ་མ་བྱམས་ཆེན་རབ་འབྱམས་པ་སངས་རྒྱས་འཕེལ་མན་ཆད་ནས་བྱུང་བ་ཡིན་ནོ། ། ཉ༢ གཉིས་པ་[རང་ལུགས་དམིགས་སུ་བསལ་བ་]ནི། (༡༧༣བ) རང་ལུགས་ཀུན་མཁྱེན་རང་བྱུང་རྒྱལ་བ་ནས། ། ནང་བརྟག་རྒྱུད་བླའི་བཤད་བཀའ་གཙོ་བོར་མཛད། ། མངའ་བདག་མར་པའི་བཀའ་བརྒྱུད་པ་རྣམས་ཀྱི་རང་ལུགས་སུ་བཤད་བཀའ་མེས་རྔོག་མཚུར་གསུམ་ལ་བབས་ཤིང་དེའང་རྒྱུད་ཀྱི་བཤད་སྲོལ་ཁོ་ན་སྟེ་དེ་དག་ནི་ཕྱིས་སུ་ཀར་དགེ་ཇོ་ཞལ་དག་གིས་ཅི་རིགས་པ་བཟུང་ལ། ཀུན་མཁྱེན་རང་བྱུང་རྒྱལ་བ་འཇིག་བརྟེན་དུ་བྱོན་པ་ནས་ནང་བརྟག་རྒྱུད་གསུམ་ཞེས་གྲགས་པའི་བཤད་བཀའ་གཙོ་བོར་མཛད་དེ་དེའི་རྒྱུ་མཚན་ཀྱང་དྭགས་པོ་བཀའ་བརྒྱུད་ཆེ་བཞི་ཆུང་བརྒྱད་དུ་གྲགས་པ་རྣམས་ནི་མེས་རྔོག་མཚུར་གསུམ་ལས་བརྒྱུད་པའི་རྒྱུད་སྡེའི་དབང་བཀའ་ཅི་རིགས་སྤེལ་བ་ཙམ་ལས། རྗེ་བཙུན་མི་ལའི་སྒྲུབ་བརྒྱུད་ཀྱི་བརྒྱུད་འཛིན་ཁོ་ན་ཡིན་པས་མཚན་ཉིད་ཕྱོགས་ཀྱི་བཤད་ཉན་ཆེར་མི་མཛད་པ་སྒྲུབ་པ་ཁོ་ན་ལ་བརྩོན་པ་ལྷུར་བཞེས་པ་ཡིན་ལ། བསྒྲུབ་བྱའི་ཉམས་ལེན་ཐོས་བསམ་གྱིས་གཏན་ལ་འབེབས་པ་ལ་གོང་གི་གཞུང་རྣམ་པ་གསུམ་པོ་དེས་ཆོག་ཅིང་དེ་དག་མ་ཤེས་ཐབས་མེད་པ་ཡིན་ཏེ།