Tibetan
ནི༔ དལ་ཞེས་པའི་དོན་ནི་དལ་བ་བརྒྱད་ཡིན་ཏེ༔ དེ་ལ་ཕྱིའི་མི་ཁོམ་པ་བཞི་དང་༔ ནང་གི་མི་ཁོམ་པ་བཞི་ཡོད་པ་ལས༔ དང་པོ་ཕྱིའི་མི་ཁོམ་པ་བཞི་ནི༔ དམྱལ་བ་ལ་སྐྱེས་ན་ཚ་གྲང་གི་སྡུག་བསྔལ་འཁོར་མོར་སྤྱོད་པས་དལ་ཁོམ་མེད་པ་དང་༔ ཡི་དྭགས་ཀྱི་གནས་སུ་སྐྱེས་ན་བཀྲེས་སྐོམ་གྱི་སྡུག བསྔལ་དྲག་པོས་རྟག་ཏུ་གདུངས་པས་དལ་ཁོམ་མེད་པ་དང་༔ དུད་འགྲོ་རུ་སྐྱེས་ན་བླུན་རྨོངས་ཀྱི་མུན་པ་ཆེན་པོའི་མལ་དུ་དུབ་པས་དལ་ཁོམ་མེད་T11616 - 103 པ་དང་༔༷ ལྷ་ཚེ་རིང་པོ་རྣམས་སུ་སྐྱེས་ན་ཆོས་བྱེད་པའི་འདུ་ཤེས་མེད་པས་མི་ཁོམ་པ་སྟེ༔ དེ་དག་གང་དུའང་མ་སྐྱེས་པར་མི་ལུས་ཐོབ་པ་ནི་དལ་བའོ༔ ནང་གི་མི་ཁོམ་པ་བཞི་ནི༔ གལ་ཏེ་མི་ལུས་ཐོབ་ཀྱང་དེའི་ནང་ནའང་མི་ཁོམ་པ་འདི་ལྟ་སྟེ༔ ཀླ་ཀློར་སྐྱེས་ན་སངས་རྒྱས་ཀྱི་བསྟན་པ་ལ་མི་དད་པས་མི་ཁོམ་པ་དང་༔ ལོག་ལྟ་ཅན་དུ་སྐྱེས་ན་ཆོས་དང་གང་ཟག་ལ་རྒྱབ ཀྱིས་ཕྱོགས་པས་མི་ཁོམ་པ་དང་༔ སངས་རྒྱས་ཀྱི་བསྟན་པ་མེད་པའི་ཡུལ་མཐའ་འཁོབ་ཏུ་སྐྱེས་ན་ཆོས་ཀྱི་སྒྲ་ཙམ་ཡང་མེད་པས་མི་ཁོམ་པ་དང་༔ ལྐུག་པ་རུ་སྐྱེས་ན་ཚིག་དོན་གྱི་བརྡ་འཕྲོད་པའི་ནུས་པ་མེད་པས་མི་ཁོམ་པ་སྟེ༔ བརྒྱད་པོ་གང་དུའང་མ་གྱུར་བ་ལ་དལ་བའི་ཡོན་ཏན་བརྒྱད་ཐོབ་པ་ཡིན་པས་དལ་བ་ཞེས་བྱའོ༔ འབྱོར་པ་ཞེས་པ་ལའང་བཅུ་ཡོད་དེ༔ དེ་ཡང་རང་ངོ་ལ་ལྟོས་པའི་འབྱོར་པ་ལྔ་དང་༔ གཞན་ཡུལ་ལ་ལྟོས་པའི་འབྱོར་པ་ལྔ་ཡོད་དེ༔ རང་འབྱོར་ལྔ་ནི༔ མི་ལུས་མ་ཐོབ་ན་ཆོས་དང་མི་མཇལ་བ་ལས༔ ད་རེས་མི་ལུས་རྟེན་གྱི་འབྱོར་པ་ཐོབ་པ་དང་༔ ཡུལ་གྱི་དབུས་སུ་མ་སྐྱེས་ན་ཆོས་མི་དར་བ་ལས༔ ད་རེས་ཆོས་ཚིག་གི་ཡུལ་དབུས་སུ་སྐྱེས་པས་སྐྱེ་གནས་ཀྱི་འབྱོར་པ་ཐོབ་པ་དང་༔ དབང་པོ་མ་ཚང་ན་ཆོས ཨོཾཿ ཀྱི་སྣོད་དུ་མི་རུང་བས་ད་ལྟ་དབང་པོ་ཐམས་ཅད་ཚང་བས་དབང་པོ་སྣོད་ཀྱི་འབྱོར་པ་ཐོབ་པ་དང་༔ ལས་ཀྱི་མཐའ་ལོག་པའི་ཁོལ་པོ་ཁོལ་མོ་དག་ནི་རང་དབང བརྟན་པ་དང་བྲལ་ན༔ མི་ཕལ་པ་དག་ཆོས་ལ་འཇུག་པའི་བློ་སྐད་ཅིག་ཙམ་ཡང་མི་སྐྱེ་བ་དང་༔ སྒོ་གསུམ་ཆོས་ལམ་ལས་ལོག་ནས་མི་ནག་སྐྱེ་བོའི་གྲལ་དུ་སྙོགས་པ་དག་ནི་སྐལ་པ་དམན་ཅིང་བདུད་ཀྱིས་རྒྱུད་བསླུས་པ་ཡིན་ཏེ༔ དེ་ལྟར་མ་གྱུར་བར་ད་ལྟ་ལས་ཀྱི་མཐའ་མ་ལོག་པར་ཆོས་ལ་དད་ཅིང་རང་དབང་ཐོབ་པ་ལས་འཕྲོ་བཟང་པོའི་འབྱོར་པ་ཐོབ་པ་དང་༔ དད་པའི་གནས་ཕྱིན་ཅི་ལོག་པའི་ཡུལ་ངན་ཀླ་ཀློ་དང་མུ་སྟེགས་སོགས་ལ་མི་དད་ཅིང་༔ དད་ནས་མི་བསླུ་བའི་བསྟན་པ་ཁྱད་པར་ཅན་དཀོན་མཆོག་གསུམ་ལ་དད་པ་ནི་དད་པའི་ནོར་གྱི་འབྱོར་པ་སྟེ༔ ལྔ་པོ་ནི་རང་ངོས་ལ་ཚང་བ་དང་༔ གཞན་ཡུལ་ལ་ལྟོས་པའི་འབྱོར་པ་ལྔ་ནི༔ སངས་རྒྱས་འཇིག་རྟེན་དུ་མ་བྱོན་ན་ཆོས་མི་དར་བ་ལས༔ ད་རེས་སྟོན་པ་བླ་ན་མེད་པ་རྫོགས་པའི་སངས རྒྱས་རིན་པོ་ཆེ་འཇིག་རྟེན་གྱི་ཁམས་འདིར་བྱོན་པའི་དུས་ལ་ཐུག་པས་སྟོན་པ་ཁྱད་པར་ཅན་གྱི་འབྱོར་པ་དང་༔ སངས་རྒྱས་བྱོན་ཀྱང་ཆོས་མ་གསུངས་ན་མི་ཕན་པ་ལས༔ ད་རེས་སྐྱེས་བུ་ གསུམ་གྱི་འཇུག་སྒོ་སོ་སོར་བསྟན་པའི་ལམ་ཟབ་མོའི་འབྱོར་པ་དང་༔ རྒྱལ་བའི་བསྟན་པ་རིན་པོ་ཆེ་བྱོན་ཡང་ནུབ་པའི་དུས་དང་འཕྲད་ན་མི་ཕན་པ་ལས༔ ད་རེས་བསྟན་པ་མ་ནུབ་པར་གནས་པའི་སྐབས་ལ་ཐུག་པའི་བསྟན་པ་རིན་པོ་ཆེའི་འབྱོར་པ་དང་༔ སངས་རྒྱས་ཀྱི་བསྟན་པ་ཡོད་ཀྱང་རང་ཉིད་དེའི་སྒོ་རུ་མ་ཞུགས་ན་མི་ཕན་པ་ལས༔ ད་ལྟ་རང་ཡང་བསྟན་པའི་སྒོ་རུ་ཞུགས་སུ་ཟིན་པ་རང་གི་སྐལ་པའི་འབྱོར་པ་དང་༔ བསྟན་པ་ལ་འཇུག་སེམས་ཡོད་ཀྱང་བླ་མ་དགེ་བའི་བཤེས་གཉེན་དང་མ་འཕྲད་ན་ཆོས་ཀྱི་དེ་ཉིད་མི་ཤེས་པ་ལས༔ ད་རེས་དགེ་བའི་བཤེས་གཉེན་བཟང་པོ་དང་འཕྲད་ཅིང་རང་ཉིད་རྗེས་སུ་བཟུང་བ་བླ་མ་དམ་པའི་འབྱོར་པ་སྟེ་འབྱོར་པ་བཅུ་ཞེས་བྱའོ༔ དེ་དག་གཅིག་ཆར་དུ་རྫོགས་པ་ལ་དལ་འབྱོར་གྱི་མི་ལུས་རིན་པོ་ཆེར་གྲགས་པ་སྟེ༔ གཏན་དུ་བདེ་བའི་དངོས་གྲུབ་ཀྱི་འབྱུང་གནས་སུ་གྱུར་པ་ཡིད་བཞིན་གྱི་ནོར་བུ་ལྟ་བུའོ༔ དེ་དག་གི་གཅིག་ཤོས་ཙམ་མ་ཚང་ཡང་མི་ལུས་སུ་སྣང་ཙམ་པ་ལས་དལ་འབྱོར་གྱི་མི་ལུས་ཞེས་འབོད་དུ་མི་རུང་ངོ་༔ དེ་ལྟ་བུའི་མི་ལུས་རིན་པོ་ཆེ་འདི་སྔོན་དགེ་བ་བཟང་པོ་ཞིག་གི་འབྲས་བུ་ཡིན་ཏེ་ལྷ་བས་ལྷག་པའི་ལུས་རྟེན་བཟང་པོ་འདི་མཐོ་རིས་གསུམ་གྱི་མཆོག་ཏུ་ ཨོཾཿ གྱུར་བ་ཡིན༔ ད་ལྟ་སྤྱིར་འགྲོ་བ་རིགས་དྲུག་གི་ནང་མི་ལུས་རིན་པོ་ཆེ་ཐོབ་ཚད་ཀྱི་སྐྱེ་འགྲོ་འདི་དག་གིས་རྒྱུ་མི་དགེ་བ་ཁོ་ན་ལ་སྤྱོད་པའི་འབྲས་བུ་ངན་འགྲོ་ཤ་སྟག་ཏུ་འགྲོ་བ་ལས་མེད་པ་ལ་བློས་གཞིག་པར་བྱ་བ་དང་༔ རང་གིས་ད་ལྟ་མི་ལུས་རིན་པོ་ཆེ་འདི་ལ་བརྟེན་ནས་ཐར་པ་དོན་དུ་གཉེར་བ་ཞིག་མ་བྱས་ན་དལ་འབྱོར་གྱི་མི་ལུས་ནི་ཡང་ཡང་རྙེད་པར་མི་འགྱུར་ཞིང་༔ གལ་སྲིད་ད་རེས་རྒྱུ་དགེ་བ་ལ་བརྩོན་ནས་ཕྱི་མར་འབྲས་བུ་མི་ལུས་ཞིག་ཐོབ་སྲིད་ནའང་དེའི་རིང་ལ་དགེ་མི་དགེའི་ལས་ཅི་བྱེད་ཆ་མི་ཆོད་པས་ཐར་ལམ་ཐོབ་པ་དཀའ་མོད༔ ཅིས་ཕྱིར་མི་ལུས་དཀོན་ན་རྒྱུ་དགེ་བ་ལས་འབྲས་བུ་མི་ལུས་བསྐྱེད་པའི་ཕྱིར༔ རྒྱུ་དགེ་བ་ལ་བརྩོན་པའི་སེམས་ཅན་ཤིན་ཏུ་དཀོན་པས་ན་འབྲས་བུ་མི་ལུས་ཀྱང་ཤིན་ཏུ་དཀོན་པར་ཤེས་པར་བྱའོ༔ དལ་འབྱོར་གྱི་མི་ལུས་ནི་དཔེར་ན་རིན་པོ་ཆེ་ཐམས་ཅད་ལས་ཆེས་ཆེར་དཀོན་པའི་ཡིད་བཞིན་གྱི་ནོར་བུ་ལྟ་བུར་བསོད་ནམས་དང་དབང་ཐང་འཛོམ་པའི་འཁོར་ལོས་སྒྱུར་བའི་རྒྱལ་པོ་ལས་མི་རྙེད་པ་ལྟར༔ མི་ལུས་ཀྱང་སྔོན་བསགས་ལས་འཕྲོ་བསོད་ནམས་དུས་འཛོམ་པ་མ་གཏོགས་གང་རུང་རུང་གི་སེམས་ཅན་ཕལ་གྱིས་ཐོབ་པ་མ་ཡིན་པའི་ཚུལ་ལ་ བློས་གཞིག་པར་གྱིས་ཤིག༔ ལར་འགྲོ་བ་རིགས་དྲུག་སྤྱིའི་གྲངས་ལ་བསམ་ནས་མི་ལུས་དཀོན་ཚུལ་དང་༔ སྒོས་སུ་མཐོང་ཚོར་གྱི་བྱ་ཁྱི་དང་རི་དྭགས་དང་༔ གཡུང་དྭགས་འབུ་སྲིན ཡན་ཆད་ཀྱི་གྲངས་དང་རིམ་པ་ལ་བསམ་མནོ་བཏང་ནས་མི་ལུས་དཀོན་ཚུལ་དང་༔ མི་ལུས་ཐོབ་པའི་ནང་ནའང་དལ་འབྱོར་ཐོབ་པ་ཤིན་ཏུ་དཀོན་པ་ལ་བརྟག་ཅིང་དཔྱད་ནས་བློ་སྦྱང་བ་ལ་འབད་པར་བྱ་བ་གནད་ཀྱི་ཡང་ཟབ་དམ་པ་ཡིན་ཏེ་ཤེས་པར་བྱའོ༔ སྔོན་བྱོན་གྱི་སངས་རྒྱས་རྣམས་དང་རིག་འཛིན་གྲུབ་ཐོབ་དམ་པ་དེ་དག་ཀྱང་མི་ལུས་རིན་པོ་ཆེ་འདི་ལ་བརྟེན་ནས་རྣམ་པ་ཐམས་ཅད་མཁྱེན་པ་སངས་རྒྱས་ཀྱི་གོ་འཕང་ལ་གཤེགས་པ་ཤ་སྟག་སྟེ༔ འདི་ལས་ལྷག་པའི་སངས་རྒྱས་བསྒྲུབ་པའི་རྟེན་ཁྱད་པར་ཅན་ནི་གནས་རིགས་གང་ནའང་མེད་དེ་ཡོན་ཏན་དྲན་པར་བྱའོ༔ ད་རེས་དལ་འབྱོར་གྱི་ལུས་རྟེན་ཁྱད་པར་ཅན་འདིས་རང་ལ་ཐར་པའི་ལམ་སྣ་ཞིག་ཟིན་པར་མ་བྱས་ན་དབུལ་པོས་ཡིད་བཞིན་གྱི་ནོར་བུ་ར་གན་ལ་བརྗེ་བ་དང་འདྲ་མཚུངས་པ་དང་༔ མི་ཚེ་སྟོང་ཟད་ལ་གཏོང་བའི་མི་དེའི་ཁོང་པའི་ནང་དུ་དོན་སྙིང་མེད་པ་དང་འདྲ་སྟེ༔ མི་ཚེ་འདི་ལ་བདེ་སྐྱིད་ཅི་ཙམ་ཡོད་ཀྱང་མི་ལུས་སོས་དལ་དུ་རྒ་བའི་མདོ་མེད་རྣམས་ནི་སྡུག་བསྔལ་རིན་T11616 - 108 ཨོཾཿ གྱིས་ཉོ་བའི་ལས་ངན་ཡིན་པས༔ ད་རེས་དལ་འབྱོར་དོན་ཡོད་པ་ཞིག་བྱེད་དགོས་སྙམ་པའི་བློ་དང་མི་འབྲལ་བ་ནི་གནད་ཀྱི་ཡང་གཅེས་དམ་པ་ཡིན་ཏེ་ཤེས་པར་གྱིས་ཤིག༔ དེ་དོན་ཡིད་ལ་བསྒོམ་ཞིང་དལ་འབྱོར་དོན་ཡོད་པ་ཞིག་འགྲུབ་པར་བླ་མ་ལ་གསོལ་བ་འདེབས་པ་ནི༔ དལ་འབྱོར་འདི་ནི་ཤིན་ཏུ་རྙེད་པར་དཀའ༔ མི་ལུས་དོན་ལྡན་སྙིང་པོ ལོན་པ་ཞིག༔ གསོལ་བ་འདེབས་སོ་བླ་མ་རིན་པོ་ཆེ༔ བྱིན་གྱིས་རློབས་ཤིག་བཀའ་དྲིན་མཚུངས་མེད་རྗེ༔ ཞེས་པའི་དོན་བློ་ལ་བསྒོམ་ཞིང་ཚིག་ཁ་ཏོན་དུ་བརྗོད་པར་བྱའོ༔ གཉིས་པ་ཚེ་མི་རྟག་པར་འཆི་བ་ལ་བསམ་པ་ནི༔ དལ་འབྱོར་གྱི་མི་ལུས་ཐོབ་ཟིན་གྱིས་དེ་ཙམ་གྱི་ཆོག་བསམ་ནའང་མི་ཚེ་འདི་ཉིད་རྨི་ལམ་གྱི་སྣང་བ་ཙམ་ལས་སོ་ཟིན་མེད་པར་འཆི་ངེས་པ་ཅན་ཡིན་ཏེ༔ ཕྱི་སྣང་བ་སྣོད་ཀྱི་འཇིག་རྟེན་རྒྱ་ཆེ་ལ་ཁྱོན་ཡངས་པ༔ ནང་གཡོ་བ་བཅུད་ཀྱི་སེམས་ཅན་གྲངས་མང་ཞིང་འཕེལ་ཁ་ཆེ་བར་ཡོད་ཀྱང་འདི་ཡང་མི་རྟག་སྟེ༔ མཐར་བསྐལ་པ་འཇིག་པའི་དུས སུ༔ དང་པོ་བཅུད་ཀྱི་སེམས་ཅན་ཐམས་ཅད་སྔ་མ་ཤི་སྟེ་ཕྱི་མ་མི་འབྱུང་ཞིང་མཐར་ས་སྟེང་འདི་རུ་སེམས་ཅན་གཅིག་ཀྱང་མེད་པར་ཡུན་རིང་དུ་གནས་མཐར༔ ཉི་མ་དཔག་ཚད་བདུན་དུ་ བབ་པའི་རིམ་པ་རེ་རེ་བཞིན་དུ་དངོས་པོ་ཕྲན་བུ་ནས་རིམ་བཞིན་བསྲེགས་ཏེ་ས་རྡོ་རི་བྲག་ཐམས་ཅད་མེའི་རང་བཞིན་དུ་འབར་ཞིང་ཚིག་ནས་བསམ་གཏན་དང་པོའི་ལྷ་གནས་མན་ཆད་ཐལ་བ་ཙམ་ཡང་མེད་པར་འགྱུར་བ༔ སླར་ཡང་ཆགས་ནས་དེ་ལྟར་ལན་བདུན་རེའི་མཐར་ཆུ་ཡིས་ཞིག་ཚེ་བསམ་གཏན་གཉིས་པའི་ལྷ་གནས་མན་ཆད་ལན་ཚྭ་ཆུ་རུ་ཞུ་བ་ལྟ་བུ་ལན་བདུན་དུ་བྱུང་མཐར་རླུང་གིས་འཇིག་པའི་ཚེ་བསམ་གཏན་གསུམ་པའི་ལྷ་གནས་མན་ཆད་ཞིག་ནས་ཐམས་ཅད་ནམ་མཁའ་སྟོང་པ་གཅིག་ཏུ་འགྱུར་བའི་སྐབས་འབྱུང་ངེས་པ་ཅན་ཡིན་ཏེ༔ བརྟན་གཡོའི་ཁམས་འདི་ལྟ་བུ་ཡང་དེ་ལྟར་མི་རྟག་ན་རང་ལུས་ཆུའི་ལྦུ་བ་ལྟ་བུའམ་མེ་ཏོག་ལྟ་བུ་རྐྱེན་གྱིས་འཇིག་སླ་བ་འདི་ལ་ལྟ་ཅི་སྨོས་བསམ་ཞིང་བློ་སྦྱོང་བ་དང་༔ གཞན་ཡང་སྔོན་བྱོན་གྱི་སངས་རྒྱས་མཚན་དང་དཔེ་བྱད་ཀྱིས་བརྒྱན་པའི་རྡོ་རྗེའི་སྐུ་རྣམས་ཀྱང་མི་རྟག་པར་མྱ་ངན་ལས་འདའ་བས་ན་རང་ཅག་ལ་ལྟ་ཅི་སྨོས་བསམ་པ་དང་༔ དེ་འོག་ལྷ་དང་དྲང་སྲོང་ཚངས་པ་བརྒྱ་བྱིན་ལ་སོགས་བསོད་ནམས་དང་ཏིང་ངེ་འཛིན་གྲུབ་པ་དཔལ་དང་སྟོབས་དབང་གི་བདག་ཉིད་རྣམས་ཀྱང་མི་རྟག་ན་རང་ལ་སྨོས་ཅི་དགོས་བསམ་པ་དང་༔ དེ་འོག་འཁོར་ལོས་སྒྱུར་རྒྱལ་རྣམས་དང ཨོཾ༔ སྔོན་སྐྱེས་ཚད་ཀྱི་སྐྱེ་འགྲོ་ཐམས་ཅད་མ་ཤི་བ་གཅིག་ཀྱང་མེད་པས་རང་ཡང་འཆི་ངེས་པ་ཅན་ཏེ༔ དེ་འོག་རང་གི་ཡིད་ལ་དྲན་ཚུན་ཆད་ཀྱི་སེམས་ཅན་རྣམས་ཤི བའི་གྲངས་དང་རིམ་པ་ལ་བསམ་ནས་ནམ་འཆི་ཆ་མེད་བསྒོམ༔ ལོ་མི་རྟག་པར་དབྱར་དགུན་གཉིས་སུ་འགྱུར་བ་དང་༔ ཟླ་བ་མི་རྟག་པར་དཀར་ནག་གཉིས་སུ་འགྱུར་བ་དང་༔ ཞག་མི་རྟག་པར་ཉིན་མཚན་གཉིས་ཀྱིས་འགྱུར་བ་དང་༔ ཉིན་མོ་མི་རྟག་པར་དུས་ཚིགས་གསུམ་གྱིས་འགྱུར་བ་རྣམས་ལ་བློས་གཞིག་ནས་རང་གི་ཚེ་མི་རྟག་པ་དྲན་པར་བྱའོ༔ ལར་སྐྱེས་ཙམ་ནས ཤི་ལ་མ་ཐུག་གི་ཚེ་ནི་སྐད་ཅིག་ཙམ་ཡང་མི་སྡོད་པར་ཟད་པ་སྐྱེན་པོའི་མདའ་ལས་ཀྱང་མྱུར་བ་ཡིན་ཏེ༔ མཐོང་ཚོར་གྱི་སེམས་ཅན་འདི་དག་ཐམས་ཅད་ཀྱི་རང་རང་གི་ཚེ་ཟད་པ་དང་འཆི་དགོས་པའི་ཚུལ་རྒྱུས་མེད་པར་ལོང་བ་ཐང་སྟོང་དུ་མགོ་འཁོར་བ་ལྟ་བུ་རྣམས་ལ་ཞེ་ཁྲེལ་ཞིང་རང་གིས་མི་རྟག་པ་བསྒོམ༔ གཞན་ཡང་མི་ཚེ་སྟོང་ཟད་ལ་བཏང་ནས་མགོ་སྐྲ་དཀར་པོར་སོང་ཁ་ཡི་སོ་རྣམས་འཐོར༔ ལུས་ཀྱི་སྟོབས་ཉམས་ནས་ལངས་འདུག་མི་ཐུབ་པ་དག་ཀྱང་འཁོར་བ་བཟུང་ནས་ད་དུང་འཁོར་བའི་འདུག་ཆས་བསྒྲུབ་ཅིང་ལོ་ཚད་བཅུ་དང་བཅོ་ལྔའི་དུས་ལ་ཁ་ ཚད་འདོམས་པ་རྣམས་ལ་བསམ་ནས་རང་གི་མི་རྟག་འཆི་བ་བརྗེད་ཀྱི་དོགས་པ་བསྐྱེད༔ དེ་ལས་ཀྱང་བད་ཀན་གྲེ་ཐོག་དང་ཕོ་འགགས་ལ་སོགས་པ་མི་ཤོར་བའི་ནད་དྲག་པོས་ཐེབས་པ རྣམས་ཀྱིས་ཀྱང་ད་དུང་སང་ཕོད་དང་གནང་ཕོད་ལ་སོགས་པའི་ལོ་གྲངས་མང་པོའི་བྱ་སྤྱོད་ལ་ཁ་ཚད་འདོམས་པ་རྣམས་ལ་བསམ་ནས་འཆི་བ་བརྗེད་ཀྱི་དོགས་པ་བསྐྱེད་དགོས་པ་ཡིན་པས་གཟབ་པར་བྱ༔ མི་འགའ་རེས་མི་ཚེ་མང་པོར་ལོངས་སྤྱོད་པའི་བློ་སྣ་རིང་པོར་བསྐྱེད་ནས་ཟས་ནོར་གསོག་འཇོག་བྱེད་པ་ལ་དཀའ་ཚེགས་རྒྱ་ཆེན་པོར་སྤྱོད་ནས་ཡོད་པའི་སྐབས་ན་འཆི་བ་ཐོག་རྒྱུག་ཏུ་བྱུང་ནས་ལུས་ལོངས་སྤྱོད་ཐམས་ཅད་ཤུལ་དུ་བོར་ནས་ཡི་ཆད་སྐྱོ་དུང་ངེ་འཇིག་རྟེན་ཕ་རོལ་དུ་འགྲོ་ཞིང་༔ གཅེས་པར་བསྐྱངས་པའི་རོ་ནི་བྱ་ཁྱིར་གཏོང་ཞིང་ཟས་ནོར་ཐམས་ཅད་གཞན་གྱིས་ལོངས་སྤྱོད་པ་དེ་ཚོ་ལ་བསམ་ནས་འཆི་བ་མི་རྟག་པ་བསྒོམ་པར་བྱ༔ མི་འགའ་རེས་སྟོབས་རྒྱ་དང་ཐོབ་ཐང་ཆེན་པོར་བསྐྱེད་ནས་ལྷ་ལེ་ལོར་གཡེང་བ་ལྟ་བུར་མི་ཚེ་སྟོང་ཟད་ལ་སོང་ནས་མཐར་འཆི་བ་བྱུང་ཚེ་བདེ་སྐྱིད་དང་དཔལ་ལ་ཆགས་ནས་ཡི་མུག་ཅིང་ཞེ་འཁུམས་ཏེ་ཤི་མིག་གསོན་ལ་བལྟ་བའང་ཡོད་ཀྱི། དེར་བསམ་ནས་ཚེ་འདིའི་བྱ་བ་བསྒྲུབ་པ་དོན་མེད་དུ ཨོཾཿ ཤེས་ནས་སྤངས་དགོས༔ མི་འགའ་རེས་ཆེ་བ་དང་སྙན་གྲགས་ཀྱི་ཆེད་དུ་གཞན་ལ་འཐབ་རྩོད་དང་སྡང་བཅོམ་བྱེད་ཅིང་ཡོད་པའི་སྐབས་ན་གློ་བུར་གྱི་ནད་དང་རྐྱེན་དྲག་པོ་ཞིག་གིས་ཤི་ཚེ་ཁེ་རྒྱལ་དང་སྙན་གྲགས་ཐམས་ཅད་དུས་དེ་ཙམ་ནས་རྨི་ལམ་བཞིན་དུ་ཡལ་བ་ལ་བློས་གཞིག་ནས་འཆི་བ་མི་རྟག་པ་བསྒོམ༔ མི་ཚེ་ལ་ཚོད་ཟིན་ནི་མེད༔ ལ་ལ་ནི་སྐྱེས་ནས་ཞག་གཉིས་གསུམ་ཙམ་གྱིས་འཆི་བ་དང་༔ ལ་ལ་ནི་གཞོན་ནུའི་དུས་དང་༔ ལ་ལ་ནི་དར་ལ་བབ་པ་དང་༔ ལ་ལ་ནི་རྒས་ནས་འཆི་བ་ལ་སོགས་པ་ཚེ་ལ་ངེས་པ་མེད པས་ནམ་འཆི་ཆ་མེད་ལ་བློ་སྦྱོང་༔ ལ་ལས་ནི་སྔོན་ཆད་ཁེ་རྒྱལ་དང་ལོངས་སྤྱོད་བསྒྲུབ་ཅིང་ཕྱིས་ཆོས་ཞིག་བསྒྲུབ་པར་འདོད་ཀྱང་འགྲུབ་དུས་མེད་པའི་ངང་དུ་དུས་ཟད་ནས་ཤི་ལ་ཐུག༔ ལ་ལས་ནི་ལོངས་སྤྱོད་བསགས་པ་དང་དགྲ་འདུལ་གཉེན་སྐྱོང་བྱེད་ཅིང་ནམ་ཞིག་གྲུབ་ཟིན་ནས་བདེ་སྐྱིད་དང་ལྡན་པའི་དུས་ཞིག་འོང་བར་རེ་ཞིང་འབད་པས་མི་ཚེ་གར་ཟད་དང་ནམ་ཟད་མེད་པར་འཆི་བའི་ནངས་པར་ལ་ཐུག་པའི་དུས་སུ་ཡང་དཔུང་ལས་དང་བྱ་བའི་འཕྲོ་མ་ཟད་པར་ཡོད་པ་ལ་བསམ་ནས་ནམ་འཆི་ཆ་མེད་བསྒོམ་པ་ལ་འབད་པར་བྱའོ༔ རང་གིའང་ད་ལྟ་ཕན་ཆད་ ཀྱི་ཚེ་ནི་སྟོང་ཟད་ལ་སོང་ཞིང་ཉིན་མོ་རྣམས་སུ་རྣམ་གཡེང་དང་ལེ་ལོར་འབྱམས༔ མཚན་མོ་རྣམས་སུ་གཉིད་རོ་ཉལ་ལ་དུས་འདའ་བ་ཡིན༔ ད་སྔོན་མི་ཚེ་འདི་ལ་ལོ་གྲངས་ཟླ་ཞག་གྲངས མང་པོ་ཐལ་ཟིན་ཡང་སྐད་ཅིག་ཙམ་གྱི་ཡུན་དང་སྣང་བ་ནི་མ་སྐྱེས༔ ད་དུང་ཡང་ལོ་བརྒྱ་ཐུབ་ཀྱང་ཤི་བའི་ཚེ་ན་ས་སྟེང་མིག་གིས་མཐོང་ཙམ་ལས་ནི་མི་སྐྱེ༔ མདོ་མེད་ཀྱི་བྱ་བ་གྲུབ་ཟིན་མེད་པ་འདིའི་འཕྲོ་བཅད་ནས་འཆི་ཆོས་གཤའ་མ་ཞིག་མི་བྱེད་རེ་སྙམ་ནས་བློ་སྣ་བསྟུངས༔ དུས་དང་རྣམ་པ་ཀུན་ཏུ་ངས་མི་ཚེ་ནི་ཟད་སོང་ད་ནི་འཆི་བའི་དུས་ལ་བབ་པའོ༔ ཉེ་འབྲེལ་དང་རྩ་ལག་དག་གིས་ཕན་ནི་མི་ཐོགས༔ རྗེས་སུ་ཡང་མི་འབྲང་༔ ད་ཤི་ནས་ཁོས་ཁྱིམ་མཚེས་ཞིག་ལ་སྐྱེས་ན་དེ་དུས་ཕན་ཚུན་གྱིས་ངོ་ནི་མི་ཤེས་ཤིང་གནོད་བྱེད་དུ་མཐོང་ནས་སྡང་ཡུལ་དུ་གྱུར་པ་ལ་ཆ་ཅི་ཡོད༔ ངས་ཀྱང་ཁོང་རྣམས་ལ་ཕན་སེམས་ཡོད་ཀྱང་རང་རང་གི་བསོད་ནམས་དང་ལས་ཀྱི་དབང་དུ་འགྲོ་བ་ལས་ཕན་ཐོགས་ཀྱང་མེད༔ ད་ནི་རང་གཞན་ཀུན་གྱི་དོན་དུ་ཆོས་ཟབ་མོ་ཞིག་བསྒྲུབ་ན་དེ་ནི་ཕན་ཐོགས་ངེས་པ་ཡིན་སྙམ་དུ་ཡང་ཡང་རྒྱུན་དུ་དྲན་པར་བྱའོ༔ ཟས་ཅི་ཟ་ཡང་འཇིག་རྟེན་འདིའི་ཟས་ཀྱི་ཐ་མའོ་སྙམ་དུ་འཆི་བ་དྲན་པར་བྱ༔ གོས་ཅི་གྱོན་ ཨོཾཿ ཡང་འཇིག་རྟེན་འདིའི་གོས་ཀྱི་ཐ་མའོ༔ བྱ་བྱེད་གང་གི་དུས་སུ་ཡང་འཇིག་རྟེན་འདིའི་སྤྱོད་ལམ་ཐམས་ཅད་ཀྱི་ཐ་མའོ༔ བསམ་ཞིང་བློ་སྦྱང་བ་ལ་འབད་པར་བྱའོ༔ མདོར་ན་དུས་དང་རྣམ་པ་ཀུན་ཏུ་ནམ་འཆི་ཆ་མེད་དེ་མི་ཚེ་འདི་ནི་རྨི་ལམ་གྱི་གནས་སྐབས་ཙམ་ལས་ཡུན་མི་རིང་སྟེ༔ ཟས་ལ་མང་ཉུང་མེད༔ གོས་ལ་བཟང་ངན་མེད༔ སྲོག་འཚོ་བ་ཙམ་དང་ལྷག་སྐྱོབ་ཙམ་གྱིས་ངེས་པར་ཆོག་པ་ཡིན༔ གལ་སྲིད་མ་ཤི་ནའང་ཐབས་ཆགས་མི་འོང་སྙམ་ནས་འདུས་བྱས་མི་རྟག་པ་བསྒོམ་པ་འདི་ལ་འབད་པར་གྱིས་ཤིག༔ རྣམ་གཡེང་དང་ལེ་ལོ་མེད་པར་མྱུར་དུ་སྲིད་པའི་ཕ་རོལ་ཏུ་བརྒལ་བའི་དུས་འདའ་བས་དལ་ཁོམ་མེད་པར་ཐར་པ་བསྒྲུབ༔ ལོ་དང་ཟླ་བའི་གསར་རྙིང་བརྗེ་བའི་དུས་སུ་ཡང་རང་གི་མི་ཚེ་ལ་ལོ་ཟླ་ཙམ་བསྟུང་བ་དྲན་ནས་རིག་པར་མཛོད༔ དེ་ལྟ་བུའི་འཆི་བ་ལ་བློ་སྦྱོང་བ་འདི་ནི་ངེས་པར་འབྱུང་བ་ཐམས་ཅད་ཀྱི་ངོ་བོ༔ བརྩོན་འགྲུས་དང་སྙིང་རུས་ཐམས་ཅད་ཀྱི་སྙིང་རྡོ༔ ། ཐར་པ་དང་རྣམ་མཁྱེན་གྱི་བསྐུལ་མ༔ ཡེ་ཤེས་ཡོན་ཏན་གྱི་འབྱུང་གནས༔ གདམས་ངག་ཐམས་ཅད་ཀྱི་སྣོད་མཆོག༔ དད་པ་དང་དམ་ཚིག་ཐམས་ཅད་ཀྱི་སྲོག་རྩ་ཡིན་པས་ཆོས་པ་ ཐམས་ཅད་ཐ་མལ་ལས་ཁྱད་དུ་འཕགས་པའི་ཁྱད་ཆོས་གཅིག་པུ་དང་༔ ཆོས་ལམ་དུ་འཇུག་པའི་སྐྱེས་བུ་ཐམས་ཅད་ཀྱི་སྤྱི་ནོར་བླ་ན་མེད་ཅིང་གོང་ན་མ་མཆིས་པའོ༔ འཆི་བ་མི་རྟག་པའི་ཚུལ་འདི་རྒྱུད་ལ་མ་སྐྱེས་པ་དག་གིས་ཆོས་གང་བསྒྲུབ་ཀྱང་ཡུལ་རྐྱེན་གྱི་ཁ་རུ་འཆོར་ཞིང་༔ ལེ་ལོ་དང་རྣམ་གཡེང་གི་དབང་དུ་བསྒྱུར་སླ་སྟེ་ཆོས་ལམ་དུ་འགྲོ་བ་ནི་རི་བོང་གི་རྭ་དང་མོ་གཤམ་གྱི་བུ་ལྟ་བུའི་ཕྱོགས་སུ་ངེས་པ་ཡིན་ནོ༔ ཅིའི་ཕྱིར་ཞེ་ན༔ དཔེར་ན་རྒྱལ་པོ་ཆེན་པོའི་ཁྲིམས་ཀྱིས་བསྡམ་པའི་དམངས་རྣམས་ཀྱིས་ལས་གང་བཅོལ་ཀྱང་དེ་མ་འགྲུབ་ཀྱི་བར་དུ་གཞན་གང་ལའང་འཆུག་དབང་མེད་པ་ལྟ་བུར༔ འཆི་བ་འདི་རྒྱུད་ལ་ངེས་པར་སྐྱེས་ན་རྣམ་མཁྱེན་གྱི་ལམ་དུ་གྲོལ་བ་མ་ཐོབ་ཀྱི་བར་དུ་ཡུལ་རྐྱེན་དང་ལེ་ལོའི་དབང་དུ་མི་འགྱུར་བའི་ཆིངས་ཆེན་པོ་བླ་ན་མེད་པ་ཡིན་ནོ༔ དེ་དོན་ཡིད་ལ་བསམ་ཞིང་རྟག་ཏུ་རྒྱུད་ལ་འདྲེས་ངེས་པ་ཞིག་ཏུ་བླ་མ་ལ་གསོལ་བ་འདེབས་པ་ནི༔ ཚེ་འདིའི་སྣང་བ་རྨི་ལམ་གནས་སྐབས་ཙམ༔ མི་རྟག་འཆི་བ་སྙིང་ནས་དྲན་པ་ཞིག༔ གསོལ་བ་འདེབས་སོ་བླ་མ་རིན་པོ་ཆེ༔ བྱིན་གྱིས་རློབས་ཤིག་བཀའ་དྲིན་མཚུངས་མེད་རྗེ༔ ཞེས་གསོལ་བ་སྙིང་ནས་གདབ་བོ༔ དོན་གསུམ་པ་འཁོར་ ཨོཾཿ བའི་སྡུག་བསྔལ་ལ་བསམ་པ་ནི༔ ལར་ལུས་འདི་བོར་མ་ཐག་ཏུ་སེམས་ནི་ཅང་མེད་དུ་མི་འགྲོ་སྟེ༔ སླར་ཡང་འགྲོ་བ་རིགས་དྲུག་གི་གནས་རིགས་གང་ཡང་རུང་བ་ཞིག་ཏུ་ལས་ཀྱི་དབང་གིས་འཕངས་ནས་སྡུག་བསྔལ་ལ་སྤྱོད་དགོས་ངེས་པ་ཅན་ཡིན་ཏེ༔ དེ་ལའང་སེམས་ཅན་གྱི་ལས་དབང་གིས་འཁོར་བའི་གནས་རིགས་དྲུག་ཏུ་ཡོད་པ་ལས༔ དང་པོ་དམྱལ་བ་ལའང་ཚ་དམྱལ་བརྒྱད་དང་གྲང་དམྱལ་བརྒྱད༔ ཉི་ཚེ་ཉེ་འཁོར་གཉིས་དང་བཅོ་བརྒྱད་ཡོད་ལ༔ ཚ་དམྱལ་བརྒྱད་པོའི་ཡུལ་སྤྱི་མཐུན་ལས་གཞི་ཐམས་ཅད་ལྕགས་བསྲེགས་མེ་འབར་བའི་ས་གཞི་དང་༔ བར་སྣང་ཐམས་ཅད་མེ་ལྕེའི་འཁོར་ལོའི་རང་བཞིན་ཅན་དུ་ཡོད་པ་ལས༔ ཐོག་མར་ཡང་སོས་ཞེས་བྱ་བ་ནི་མདག་མེ་འབར་བའི་ཀློང་དུ་དམྱལ་བའི་སེམས་ཅན་ཁ་ཆར་བབ་པ་ལྟར་ལས་རླུང་གིས་བསྡུས་པ་དེ་དག་ཐམས་ཅད་ཀྱི་གཅིག་གིས་གཅིག་མཐོང་ཚེ་དགྲ་མི་ཤ་བོ་མཐོང་བ་ལྟ་བུའི་ཞེ་སྡང་དྲག་པོ་སྐྱེས་ཏེ་སྐྱེས་ཙམ་ནས་ལས་ཀྱི་དབང་གིས་མཚོན་ཆ་རྣམ་པ་སྣ་ཚོགས་ལག་ཏུ་བབས་ནས་བརྡེག་རེས་བྱས་ཚེ་ཤ་ཁྲག་ཕྱེ་མར་འཐག་ཅིང་གཅིག་ཀྱང་མེད་པར་གྱུར་པའི་ཚེ་