Tibetan
THE COLLECTED TREASURE -TEXT OF BDUD - JOMS - GLING -PA VOLUME - 16 2017 T11616 - 002 ༄༅། །སྤྲུལ་པའི་གཏེར་ཆེན་བདུད་འཇོམས་གླིང་པའི་ཟབ་གཏེར་གསང་བའི་ཆོས་སྡེའི་གླེགས་བམ་བཅུ་དྲུག་པ་བཞུགས་སོ། T11616 - 003 T1616 - 004 ཨོཾཿ དག་སྣང་ཡེ་ཤེས་དྲྭ་བ་ལས༔ ཚོགས་ཀྱི་འཁོར་ལོར་འདུ་བའི་གནས་ལྐོག་གྱུར་རིན་ཆེན་གླིང་གི་ཆགས་ཚུལ་བཞུགས༔ འགྲོ་བའི་བླ་མ་ཆེན་པོ་ལ་ཕྱག་འཚལ་ལོ༔ སློབ་བུ་སྔགས་སྐྱེས་འཇམ་དཔལ་རྡོ་རྗེའི་གསང་བའི་གནས་མཆོག་འདིའི་ཡིན་ལུགས་ཞིག་དགོས་ཞེས་ནན་དུ་བསྐུལ་བ་སེམས་ལ་བཏགས་བཞིན་གཉིད་ལོག་པའི་མོད་ལ་རྨི་ལམ་དུ་གསེར་གྱི་རི་དང་༔ དངུལ་གྱི་རི་དེ་བཞིན་ཟངས་དང་ལྕགས་ཀྱི་རི་བོ་མང་དུ་འདུག་པའི༔ རི་གཅིག་གི་རྩེ་མོར་བདག་སླེབ་འདུག་པ་རྨིས༔ དེའི་ཚེ་དེའི་དུས་ན་སྟེང་ཕྱོགས་ནས་འཇའ་ཚོན་གཅིག་ཤར་བ་དང་ཆབ་གཅིག་ཏུ་མཁའ་འགྲོ་ཀུན་ཏུ་རྒྱུ་བ་གཡུ་ཞལ་མ་ཡིན་སྐད་པའི་བུད་མེད་སྔོ་ལྗང་རིན་པོ་ཆེའི་རྒྱན་གྱིས་སྤྲས་པ་ལག་ན་མར་མེ་དང་མེ་ལོང་ཐོགས་པ་ཞིག་ཆུ་ལས་ཆུ་ལྦུར་རྡོལ་བ་བཞིན་ཤར་བྱུང་བ་དེ་ལ་བདག་གིས༔ ཀྱེེ༔ ཨ་ལྕམ་བུ་མོ་བཞིན་ལེགས་མ༔ གང་ནས་འོང་སྟེ་ཇི་ལྟར་བྱུང་༔ གནས་འདི་གང་ལགས་གནས་སྲུང་སུ། ཡོན་ཏན་ཇི་ལྟར་མཆིས་ལགས་ཤོད༔ སྨྲས་པའི་ལན་དུ༔ ཡ༔ བརྡལ་ཁྱབ་ཡངས་པའི་ནམ་མཁའ་ནི༔ སྣོད་བཅུད་འདོད་ཡོན་ཀུན་གྱི་མཛོད༔ མཁའ་སྤྱོད་ཨ་མའི་ཀློང་མཛོད་ནས༔ ང་མེད་ཁྱོད་ ལ་ང་ཉིད་སྣང་༔ བྱུང་ཁུངས་མེད་དེ་ཟང་མ་ཐལ༔ ཁྱོད་བློའི་འཛིན་པ་དེ་དཀྲོལ་ཕྱིར༔ ཇི་ལྟར་འདོད་པ་དེ་བཞིན་སྣང་༔ གནས་འདིར་མི་འབྱིན་ས་ཡི་རྟེན༔ གཏེར་ཁ་བརྒྱ་དང་རྩ་བརྒྱད་ཡོད༔ བསྟན་པ་མི་ནུབ་དར་རྒྱས་ཕྱིར༔ བདེ་གཤེགས་བདུན་གྱི་རིང་བསྲེལ་ཡོད༔ རིགས་གསུམ་མགོན་དང་པད་འབྱུང་གི༔ སྐུ་འདྲ་བརྒྱ་ཕྲག་བཅུ་གཉིས་གདའ༔ རྒྱ་བལ་ཀ་ལ་ཙི་ན་དང་༔ སོག་འཇང་བེར་བ་ལ་སོགས་པའི༔ གནས་ཡུལ་ལྔ་བཅུ་རྩ་དྲུག་གི༔ ས་སྣ་དུང་གི་སྒྲོམ་བུར་བླུག༔ རིན་ཆེན་སྤུངས་པའི་རི་ལ་སྦས༔ བསྐལ་པའི་མར་མེ་ནུབ་མེད་ཞིག༔ ཆུ་སྣ་འདུས་པའི་རི་ལ་སྦས༔ དབང་ཕྱུག་ཆེན་པོའི་གསང་བའི་ཆབ༔ ཟངས་ཀྱི་བུམ་པ་འགེངས་བྱས་ནས༔ བདེ་ཆེན་ཚོགས་འདུས་ཁང་ཕུག་སྦས༔ ནོར་འཛིན་དབང་རྒྱལ་ཞེས་བྱ་བ༔ གནས་ཆེན་སྤྱི་ཡི་སྲུང་མར་བསྐོས༔ དྲེགས་རྒྱལ་མིང་སྲིང་བཅུ་བདུན་ནི༔ ས་མིག་སོ་སོའི་སྲུང་མར་བསྐོས༔ དྲག་ཤུལ་རྡོ་རྗེ་ཐོགས་མེད་རྩལ༔ ས་མིག་འདི་ཡི་སྒོས་སྲུང་ལགས༔ སྨན་མོ་འཛུམ་མེད་ནོར་འཛིན་མ༔ དེ་ཡི་གྲོགས་སུ་བསྔགས་པ་སྟེ༔ འཛམ་གླིང་བརྟན་མ་བཅུ་གཉིས་དང་ཿ གནས་ཆེན་ཉེར་ལྔ་ཡུལ་སོ་གཉིས༔ ཧེ་རུའི་གནས་བཅུ་ ཨོཾཿ དུར་ཁྲོད་བརྒྱད༔ དེར་བརྟེན་དཔའ་བོ་མཁའ་འགྲོའི་ཚོགས༔ ལོ་ཁྱིམ་རེ་བཞིན་རེ་རེ་འདུ༔ ཟླ་བ་བཞི་པའི་ཚེས་གྲངས་སྟག་གི་ཉི་མ་དུས་ཚོད་སྟག་གི་དུས་འདུ་བ་ཡིན ཞལ་ཤེས། སྔོན་ཚེ་དུས་ཀྱི་བསྐལ་པ་ལ༔ ཁམས་རི་ནག་གྲོགས་ནག་པོ་ཟེར༔ དེང་སང་བོད་སོག་མི་རྣམས་ཀྱིས༔ ལུང་པ་རེ་ལ་མིང་རེ་གདགས༔ གཉན་པོའི་གངས་རར་ཟླ་བ་དགུ༔ རྨ་ཆེན་གངས་ལ་ལོ་ལྔ་ཕྲག༔ ལོངས་སྤྱོད་འདུ་བར་ཟླ་གཅིག་དང་༔ རིག་འཛིན་འདུ་བར་ཞག་བདུན་ཕྲག༔ དཔའ་བོའི་མཁར་ལ་ཞག་ཉེར་གཅིག༔ ཚོགས་ཆེན་འདུ་བར་ལོ་གཅིག་ཏུ༔ བསྒྲུབ་པའི་དལ་ཞལ་ཕྱེས་ནས་སུ༔ སྣང་སྲིད་དྲེགས་པ་སྡེ་བརྒྱད་དང་༔ ཡུལ་ལྷ་ཟོ་དོར་མི་མ་ཡིན༔ སྣང་སྲིད་ལྷ་འདྲེ་དབང་དུ་འདུས༔ དམ་བཏགས་དབང་བསྐུར་ལས་གཉེར་བཅོལ༔ བོད་ཁམས་ས་སྟེང་ཐམས་ཅད་དུ༔ བདག་གི་ཞབས་ཀྱིས་མ་བཅག་པ༔ ཏིལ་མིག་ཙམ་ཡང་ཡོད་མ་ཡིན༔ དེ་ཡང་སྤྲུལ་སྙིང་ཡང་སྤྲུལ་དང་༔ རྫུ་འཕྲུལ་སྤྲུལ་པའི་ཆོ་རོལ་ཏེ༔ དེ་ལྟར་གསུངས་པའི་ནང་ཚན་ལས༔ འདི་ནི་གསང་དང་སྦས་པའི་གནས༔ ཤིན་ཏུ་གསང་བའི་ཡང་གསང་སྟེ༔ འདིར་བརྟེན་རྩེ་གཅིག་སྒྲུབ་བྱེད་པའི༔ གསང་བ་སྔགས་ཀྱི་རྣལ་ འབྱོར་པ༔ ཉིན་སྐར་ཙམ་རེ་མཆིས་སྲིད་ནས༔ ཤི་བའི་མཐའ་ལ་གཏུག་གྱུར་ན༔ ཕུང་པོ་ལྷག་མ་མེད་པ་རུ༔ མངོན་སངས་རྒྱས་པར་གདོན་མི་ཟ༔ བཙན་ཕོ་བཙན་མོ་ཀླུ་ཕོ་མོ༔ ཚོགས་བདག་སྤྲུལ་པའི་སྐྱེས་བུ་དང་༔ ཨུ་མས་སྤྲུལ་པའི་སྨན་མོ་གཉིས༔ ཡང་གསང་གནས་ཀྱི་སྲུང་མར་བཞག༔ གནས་བདག་གསོལ་མཆོད་བསྐང་བ་དང་༔ སྤོས་སྦྱོར་བསང་མཆོད་བྱ་བ་དང་༔ དུས་ཆེན་དྲུག་ཏུ་ཚོགས་བསྐང་བཏང་༔ བསྒོམ་པས་མི་རྟོག་ཡེ་ཤེས་འཆར༔ བསྐྱེད་པས་སྣང་ཞེན་ལྷ་སྐུར་འཕོ༔ ཆོས་མིན་བསམ་སྤྱོད་ཞོར་ལ་འགྲིབ༔ བྱ་བྱེད་ཆོས་ཀྱི་འཁོར་ལོ་འགྱུར༔ ཤེས་པར་གྱིས་ཤིག་སྐལ་ལྡན་བུ༔ ཧེ་ཧེ༔ མཁའ་འགྲོ་མི་མངོན་དབྱིངས་སུ་ཆ༔ རྨི་ལམ་སྒྱུ་སྣང་ཅི་བཞིན་དུ༔ གནས་ནི་མེད་བཞིན་སྣང་བ་སྟེ༔ ཤེས་ན་རང་སྣང་རྣམ་དག་ཞིང་༔ མ་ཤེས་འཁྲུལ་པར་འཕྱན་པའི་ས༔ རང་སྣང་དོན་གྱི་འོག་མིན་ཞིང་༔ ངོ་ཤེས་ངང་དུ་གདིང་ཐོབ་ན༔ ཞིང་ཁམས་དེ་ལས་ཡོད་མ་ཡིན༔ གྲོལ་ས་དེ ལས་མ་མཆིས་པས༔ སྒྱུ་མའི་དགའ་སྟོན་བདེན་འཛིན་ལྟར༔ སྣང་བའི་ཡུལ་ལ་བདེན་ཞེན་ཆོད༔ སྣང་སྟོང་ཟུང་འཇུག་སྦྱོར་མ་ཡི༔ བྱང་ཆུབ་སེམས་ཀྱི་ཐིག་ལེ་སྟེ༔ མཁའ་སྤྱོད་ཨ་ ཨོཾ༔ མའི་མཁའ་གསང་དུ༔ ཐེ་ཚོམ་མེད་པར་རྒྱངས་ཀྱིས་འཕོ༔ གཉིས་སུ་མེད་པར་ཆམ་བརྡལ་ཡན༔ ང་ནི་ནམ་མཁའི་ལུས་ཅན་ཏེ༔ ནམ་མཁའ་ཉིད་དུ་དག་མཉམ་རོལ༔ ཅེས་ཟེར་ཡལ༔ ཅེས་པ་འདི་སློབ་བུ་འཇམ་དཔལ་རྡོ་རྗེས་ནན་དུ་བསྐུལ་ངོར་ཁྲག་འཐུང་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བ་ཡི་གེ་པ་ནི་བཙུན་པ་དགེ་ལེགས་དཔལ་བཟང་ངོ་། །དགེའོ །དགེའོ། །དགེའོ །སརྦ་མངྒ་ལཾ། ཡང་སྐབས་ཤིག་ཏུ༔ བུ་སྣོད་ལྡན་འཇམ་དཔལ་རྡོ་རྗེ་ལ༔ མ་ལྷ་ལྕམ་རྒྱལ་མོས་འདི་སྐད་ཟེར༔ མ་རེ་མ་ཏཱི་ཡི་གསང་བའི་མཛོད༔ གནས་རྫ་རི་གནམ་ལྕགས་འབར་བ་ནི༔ ལྷ་རྡོ་རྗེ་ཕུར་པའི་དཀྱིལ་འཁོར་ཏེ༔ དུས་བཟང་པོ་ཚེས་བཅུ་ཉེར་ལྔ་ལ༔ མ་མཁའ་འགྲོ་འདུ་བ་རྒྱ་ཆེར་ཚོགས༔ དེར་བཀའ་སྲུང་བཙན་དང་མ་བདུད་དེ༔ དེ་མཆོད་གསོལ་ནན་དུ་མ་བྱས་ན༔ རྐྱེན་ཀོ་ལོང་ཆོ་འཕྲུལ་སྐབས་སུ་སྟོན༔ དེར་སྒྲུབ་པ་བྱེད་པའི་གང་ཟག་རྣམས༔ ཚོགས་བསྐང་བ་མང་པོ་བཏང་བ་དང་༔ གནས་དེ་ཡི་བཀའ་སྲུང་གཙོ་བོ་མཆོག༔ ལྷ་དབང་ཕྱུག་ཆེན་པོ་ནན་དུ་མཆོད༔ གཟའ་ཁྱབ་འཇུག་ཆེན་པོ་བྲན་དུ་བཀོལ༔ མ་མཁའ་འགྲོའི་ྋ འཁྲུགས་བསྐང་སྐབས་སུ་བྱ༔ གནད་དེ་ལྟར་ཚུལ་བཞིན་ལྡན་གྱུར་ནས༔ རྩེ་གཅིག་ཏུ་བསྒྲུབ་ལ་འབད་ནུས་ན༔ མཆོག་ཐུན་མོང་དངོས་གྲུབ་ཉེ་བར་ཐོབ༔ ཅེས་ཟེར་ཡལ༔ བདུད་འཇོམས་རྡོ་རྗེས་སྨྲས༔ T11616 - 010 ༄༅། །ངང་བ་རི་ལྷ་མོའི་ལྟོ་བའི་གནས་བདུད་འདུལ་མཆོད་རྟེན་གྱི་དཀར་ཆག་ནི། བྱ་ལོ་བྱ་ཡི་ཟླ་བའི་ཚེས་བཅུའི་ནུབ། །མཁའ་འགྲོ་ཡེ་ཤེས་མཚོ་རྒྱལ་མས། ས་སྤྱོད་འོག་མིན་ཆེན་པོ་ནི། །བསྒྲུབ་པ་བྱེད་པའི་གནས་སུ་ལེགས །དོན་ལ་བཀོད་པ་ལྷུན་གྲུབ་དངོས། །བདུད་འདུལ་རང་བྱུང་མཆོད་རྟེན་ནི། །བསོད་ནམས་བསགས་པའི་གནས་སུ་ལེགས། །བསྒྲུབ་དང་བསོད་ནམས་བསགས་ལ་འབད། །གནས་འབྲེལ་ཙམ་གྱིས་ཐར་ལམ་འཐོབ། །དུས་ལ་བབ་པོ་སྐལ་བཟང་རྣམས། །གསུངས་པའི་ལན་དུ་ངས་སྨྲས་པ །ཨེ་མ་ཡེ་ཤེས་མཁའ་འགྲོ་ལགས། །ས་སྤྱོད་འོག་མིན་གནས་དེ་དང་། །བདུད་འདུལ་རང་བྱུང་མཆོད་རྟེན་གཉིས །གང་ཡིན་ང་ལ་རྒྱུས་མེད་པས། །མངོན་སུམ་ཚིག་གིས་བསྟན་དུ་གསོལ། ཞུས་པའི་ལན་དུ་མཁའ་འགྲོ་མས། །ཀྱེ་ཧོ་གསོན་དང་སྐལ་བཟང་བུ། །ཙ་རི་ཙ་ཀོང་ཙ་འདྲ་དང་། །པདྨ་བཀོད་དང་པདྨ་ཆུང་། །དུར་ཁྲོད་བརྒྱད་དང་གནས་ཉེར་བཞི། །ཧེ་རུའི་གནས་བཅུ་ཡུལ་སོ་གཉིས །སྙིང་པོའི་བཅུད་དྲིལ་ཞིང་གི་མཆོག །བྱིན་རླབས་དངོས་གྲུབ་ཐམས་ཅད་འདུ། །དཔའ་བོ་དང་ནི་རྣལ་འབྱོར་མ། །མ་ལུས་གནས་མཆོག་འདི་རུ་རྫོགས། །ཁྱད་ པར་སྒྲུབ་པ་བཀའ་བརྒྱད་ཀྱི། །རྟེན་དང་བརྟེན་པའི་དཀྱིལ་འཁོར་རྫོགས། །ཡོངས་གྲགས་བཀྲ་ཤིས་རྫོང་ཞེས་གྲགས། །འདི་རུ་སྒྲུབ་པ་བྱེད་པའི་མི །ཚེ་འདིར་གྲོལ་གྱུར་ཐེ་ཚོམ་མེད། བདུད་འདུལ་རང་བྱུང་མཆོད་རྟེན་ནི། །ངང་བའི་ལྷ་མོ་བཞིན་བཟང་མས། །ལྟོ་བ་མར་འདས་མཁའ་གསང་ན། །གནས་ཞེས་ཡོངས་སུ་གྲགས་པ་དེ། །སྔོན་ཚེ་ཆོས་རྒྱལ་མྱ་ངན་མེད།། སངས་རྒྱས་ལུང་བསྟན་རྒྱལ་པོ་དེས། །ཐུགས་བསྐྱེད་སྨོན་ལམ་རྣམ་དག་མཐུས། །འཛམ་གླིང་ས་གནས་བྱེ་བ་རུ། །ནུབ་གཅིག་མཆོད་རྟེན་བྱེ་བ་གཅིག །འབྱུང་བའི་སྨོན་ལམ་བཏབ་བཞིན་གྲུབ། །དེ་ལས་བདུད་འདུལ་མཆོད་རྟེན་འདིར། །རྫོགས་པའི་སངས་རྒྱས་རབ་བདུན་གྱི། །རིང་བསྲེལ་བྲེ་གང་ཐུགས་ཀྱི་རྟེན། །རྒྱལ་ཀུན་ཡང་སྙིང་ཡི་གེ་རུ། །བཀོད་ནས་སྒྲོམ་བཅུག་གསུང་གི་རྟེན །དུས་གསུམ་སངས་རྒྱས་རིགས་གསུམ་མགོན། །རྡོ་སྐུ་རང་བྱོན་སྐུ་ཡི་རྟེན། །ཤཱནྟིཾ་གརྦྷའི་མགུལ་ཕུར་བཅས། །གནམ་ལྕགས་འབར་བའི་ཁང་བཟང་དུ། བཀོད་ནས་བུམ་མཐིལ་གཏེར་དུ་བཞག །མཁའ་འགྲོ་ལས་ཀྱི་དབང་མོ་ཆེས། །བསྒྲུབ་པ་མཛད་ཅིང་རབ་གནས་བྱས །དཔལ་ལྡན་ལྷ་མོ་ལྷ་ཡི་ལྕམ། །གཡུ་སྒྲོན་དུང་ཕྲེང་ཀླུ་ཡི་ལྕམ། ༄༅། གནས་ཀྱི་སྲུང་མ་མཆོག་ཏུ་བསྐོས། །མཚོ་སྨན་ཏིང་ཏིང་གཉེར་དུ་བསྐོས། །ལྟ་བ་རྟོགས་པའི་རྣལ་འབྱོར་གྱིས། །རང་སྣང་དོན་གྱི་འོག་མིན་དུ། །ཤེས་ནས་བསྐོར་བ་གཅིག་བྱས་ན། །བཀའ་དང་བསྟན་བཅོས་ཆོས་སོ་ཅོག །དུས་གཅིག་ཀློག་དང་བསོད་ནམས་མཉམ། །སེམས་བསྐྱེད་འགྲོ་ཀུན་ཕན་བདེའི་ཕྱིར། །ལན་གཅིག་བསྐོར་ན་ཡིག་དྲུག་པ། །དུང་ཕྱུར་བཟླས་དང་བསོད་ནམས་མཉམ །སྐྱེས་པ་ཕོ་མོས་དད་གུས་ཀྱིས། །བསྐོར་བ་ཁྲི་གཅིག་བྱས་པ་ན། །ཡིག་དྲུག་དུང་ཕྱུར་བསྒྲང་དང་མཉམ །ཕྱི་ནང་གསང་བའི་བར་ཆད་སེལ། །ནད་ཞི་གདོན་བགེགས་ཀུན་དང་བྲལ། །རིམ་གྲོ་ཕལ་གྱི་དོ་ཟླ་མིན། །དངོས་གྲུབ་པྲ་ལྟས་མངོན་དུ་འབྱུང་། །དེ་ཕྱིར་ཕྱག་མཆོད་བསྐོར་བ་ལ། །འབད་ཅིག་ཡུལ་འདིར་སྐྱེས་པའི་མི། །གང་འདོད་དོན་ལ་གསོལ་བ་ཐོབ། །དངོས་གྲུབ་འབྱུང་བར་གདོན་མི་ཟ། །དུས་བབ་མཁའ་འགྲོའི་ལུང་བསྟན་ཡིན། །ཡལ་བར་མ་དོར་ཡུལ་མི་རྣམས། །ཞེས་གསུངས་ཆོས་ཉིད་མཁའ་ལ་ཐིམ། །ཞེས་བདུད་འཇོམས་རྡོ་རྗེའི་དག་པའི་སྣང་བའོ། T1616 - 014 ཨོཾཿ ལེགས་ལྡན་ཞྭ་ཡི་རྒྱང་གླུ་བཞུགས་སོ༔ ཆུ་ཕོ་སྤྲེའུའི་ལོ་ཧོར་ཟླ་གསུམ་པའི་ཚེས་བཅུ་དགུའི་ནུབ་མོ་མགོན་པོ་ལེགས་ལྡན་ཡིན་ཟེར་བའི་རྟ་ནག་རྟིང་དཀར་ཅན་ཞིག་གིས་འདི་སྐད༔ ཧོཿ ལྷ་ནི་ཀུན་ཏུ་བཟང་པོ་ཡིན༔ མི་ནི་ལེགས་ལྡན་ནག་པོ་ཡིན༔ རྟ་ནི་བདུད་རྟ་རྟིང་དཀར་ཡིན༔ གོས་ནི་རྒྱ་བེར་བརྗིད་ལྡན་ཡིན༔ མཚོན་ནི་ཙནྡན་བིང་ཆེན་ཡིན༔ རྒྱན་ནི་རིན་ཆེན་སྣ་ཚོགས་ཡིན༔ ཞྭ་ནི་གཙུག་ཏོར་ནོར་བུ་ཡིན༔ བཟོ་མཁན་ལྷ་ཆེན་ཚངས་པ་ཡིན༔ དབྱིབས་ནི་རིན་ཆེན་རི་བོ་ཡིན༔ ཏོག་ནི་རྒྱལ་བའི་གཙུག་ཏོར་ཡིན༔ ཆིངས་ནི་འཁོར་འདས་གཉིས་མེད་ཡིན༔ མཁའ་འགྲོ་འབུམ་གྱི་ལྕང་ལོའི་ཏོག༔ ཟར་བུ་མ་བཅོས་འདབས་ཚར་ཡིན༔ ལར་ནི་ཞྭ་འདིའི་མཚན་ཉིད་ལ༔ རྩེ་མོ་རབ་ཏུ་རྣོ་བ་ནི༔ ཆེ་བཙན་འགྲན་ཟླ་བྲལ་བའི་རྟགས༔ ནོར་བུའི་དབྱིབས་སུ་འདུག་པ་ནི༔ དགོས་འདོད་རེ་བ་སྐོང་བའི་རྟགས༔ ཁ་དོག་སྔོ་མདངས་ཆགས་པ་ནི༔ ཆོས་སྐུ་སྐྱེ་བ་མེད་པའི་རྟགས༔ དར་ཆིངས་ཁ་དོག་དམར་བ་ནི༔ ལོངས་སྐུ་འགགས་པ་མེད་པའི་རྟགས༔ ཕྲག་པ་ཡངས་ཤིང་རྒྱས་པ་ནི༔ གསང་སྔགས་བསྟན་པ་རྒྱས་པའི་རྟགས༔ སྐེད་ཞོལ་དྲང་ལ་སྨད་འཁྱུག པ༔ མདོ་སྔགས་ཟུང་དུ་འབྲེལ་བའི་རྟགས༔ གཉེར་མ་དྲུག་ཅུ་རྩ་བཞི་ནི༔ འབུམ་ཕྲག་དྲུག་ཅུའི་ཐེག་བཅུད་རྟགས༔ གཉེར་རྩེ་ཆིངས་འོག་འདུད་པ་ནི༔ འུབ་ཆུབ་རོལ་པར་གཅིག པའི་རྟགས༔ འདབ་འཁོར་རབ་ཏུ་རྒྱས་པ་ནི༔ ཆོས་འཁོར་ཡོངས་ལ་དབང་བའི་རྟགས༔ འདབས་ཞལ་འཐུག་ལ་ཟུར་མཛེས་པ༔ བསྟན་པ་མཐའ་ནས་རྒྱས་པའི་རྟགས༔ ནང་ཚར་སྣ་ལྔ་ཞོལ་བ་ནི༔ ཆོས་ཕུང་བརྒྱད་ཁྲིར་དབང་འབྱོར་རྟགས༔ ཁ་ཏོག་དཀར་ལ་གསལ་བ་ནི༔ སྤྲུལ་སྐུས་འགྲོ་དོན་མཐར་ཕྱིན་རྟགས༔ ཁྲ་དང་ཉི་མ་རྒྱལ་ཕུར་བུ༔ འཕྲད་ཚེ་ཞྭ་འདི་བཟོ་བའི་དུས༔ རྩེ་ནང་རྣམ་རྒྱལ་འཁོར་ལོ་བཞུགས༔ བསྟན་པའི་སྙིང་པོའི་རབ་གནས་བྱ༔ གྱོན་ན་ཕྱོགས་ལས་རྣམ་རྒྱལ་ཏེ༔ དོན་ཀུན་འགྲུབ་པར་གདོན་མི་ཟ༔ ང་འོང་དགའ་ལྡན ཡུལ་ནས་འོང་༔ འགྲོ་ཡང་དགའ་ལྡན་གནས་སུ་འགྲོ༔ མི་ཡུལ་བདེ་སྐྱིད་བཀྲ་ཤིས་ཤོག༔ ཅེས་ཟེར་མི་སྣང་བར་ཡལ་ལོ༔ བདུད་འཇོམས་ཁྲོ་ལོད་རྩལ་གྱིས་སོ།། །། ༄༅། །ནུབ་གཅིག་གི་རྨི་ལམ་ན་ཐང་ཆེན་པོ་ཞིག་གི་དཀྱིལ་ན་བུད་མེད་རྒྱ་མོ་གོས་སྔོན་གྱོན་པ་མང་པོས། ལ་ལས་ཁྲོ་བླུགས། ལ་ལས་གོ་ལྗང་མང་པོའི་ལས་ཀ་བྱེད་པ་མཐོང་ནས། བདག་གིས་བུད་མེད་རྒན་པ་ཞིག་ལ་གོ་སྔོན་དང་ཀོ་རུ་འདི་ཇི་ལྟར་སྦྱོར་བ་ཡིན་དྲིས་པས་ལན་དུ་འདི་སྐད་ཟེར་རོ། །སྐྱི་སྔོན་བྱེད་པར་འདོད་ན། དང་པོ་ར་ལྤགས་ཀྱི་སྤུ་ལ ཁ་གཏིང་མེད་པར་བུར་ཐོག་ཐུག་ནས་རུལ་ཏེ་དཀར་དང་ངེ་སོང་རྗེས། ཤིང་གིས་བརྒྱང་ནས་མེ་ལོང་གི་བྱད་ལྟར་དྭངས་པར་བྱས་ནས་བསྐམ། དེ་ནས་ས་ལ་དོང་ཁྲུ་དོ་བྲུས་པའི་ནང་དུ་རྟ ལུད་དང་ཐལ་བ་བླུགས་ཏེ་ཆུས་འདག་སླ་མོ་བྱས་ནས་བཞག །དེ་སྟེང་མཐོ་གང་འཕགས་པའི་སར་རའི་ལྤགས་པ་བཞག་པའི་ངོར། ཚ་འབིག་བྱེད་ཞོ་བདུན་གྱི་ཆུ་བྱུག །དེ་སྟེང་ཟངས་ཕྱེ་བར་མཚམས་མེད་པར་བརྡར་ནས་ཆ་སྙོམས་པར་བྱས། གོས་འཐུག་ཅིང་དྲོ་བ་གཅིག་གིས་ཁ་བཅད་ནས་རླུང་མི་རྒྱུ་བར་བྱས་ཏེ་ཞག་བདུན་ལ་བཞག་པས་ལྗང་ལ་འོད་དང་ལྡན་པ་ཡིད་དུ་འོང་བར་འགྱུར་ངེས་སོ། །རྒྱས་འབིག་བྱེད་མང་བས་ཕྱི་སྔོ་བ་མ་ཟད་ནང་ཡང་སྔོན་པོར་འགྲོ། བོད་ཀྱི་འབིག་བྱེད་ཉུང་བས་ཕྱི་སྔོ་བ་ཙམ་ལས་མི་ཡོང་། རྒྱས་ཟངས་ཕྱེ་ཤ་སྟག་ཡིན་པས་ལྗང་ སྔོན་དཀར་མདངས་འོད་དང་ལྡན་པ་ཡོང་། བོད་ཀྱི་རག་ཕྱེ་འདྲེས་པས་ལྗང་ནག་ལས་མི་འོང་ཟེར། ཁྲོ་ཡི་ཀོ་རུ་ལ། ཀོ་པ་སྲང་གང་སོལ་བ་དང་ཆ་མཉམ། བསྐལ་པའི་ཕྱེ་མ་ཞོ་ལྔ་རྨིག་གཞོབ སྐར་གང་སྦྱར་ནས་ཁྲོའི་ཀོ་རུ་བྱས་ན་ཐུབ་པ་ཡིན། ཆེ་ན་རིག་པས་དཔགས་པར་བྱའོ། །ཅེས་ཟེར་བ་ཆུ་སྤྲེལ་ལོའི་ཟླ་ཚེས་ལ་བདུད་འཇོམས་རྡོ་རྗེ་ཁྲོ་ལོད་རྩལ་གྱིས་ཐོས་སོ།། ས ྋ T11616- 018 ༄༅། །བསྐལ་པ་ལྕགས་རྟའི་ལོ་ཟླ་བཅུ་པའི་ཚེས་བཅུ་བདུན་གྱི་ནང་མོ་དྲོས་ཐུན་དུ་ཉམས་སྣང་ལ་ཤིང་ལྗོན་པ་རིང་ཐུང་གཉིས་ཡོད་པ་ལས་རིང་པོའི་རྩེར་ཐིག་ལེའི་ནང་དུ་བྱ་ཁྱུང་ཞིག་དང་། ཐུང་ངུའི་རྩེར་བྱ་ནག་པོ་མགུལ་ལ་འོད་ལྔའི་སྤུ་མདངས་ཅན་ངོ་མི་ཤེས་པ་ཞིག་གིས་གྱེན་དུ་བྱ་ཁྱུང་ལ་བལྟས་ནས་གུས་པས་འདི་སྐད་ཟེར་བ་ཐོས། ཨེ་ཨེ། མཁའ་ལྡིང་རྒྱལ་པོ་ཆོ་རེ་ཆེ། །ཐིག་ལེ་ཉག་གཅིག་གི་ལུས་པོ་ཅན །ཐབས་དང་ཤེས་རབ་ཀྱི་འདབ་གཤོག་འཛོམ །རྫུ་འཕྲུལ་བཞི་ལྡན་གྱི་རྐང་ལག་ཅན། །སྐུ་གསུམ་ལྷུན་གྲུབ་ཀྱི་སྤྱན་མིག ལ། །བདེན་པ་གཉིས་རྫོགས་ཀྱི་རྭ་ཅོ་ཅན། །འཁོར་འདས་དག་མཉམ་གྱི་ཟངས་ལྕགས་མཆུ། །ཉོན་མོངས་དབྱིངས་སྒྲོལ་གྱི་སྦྲུལ་ནག་ཟ། །ཆོས་ཕུང་ཡོངས་རྫོགས་ཀྱི་སྤུ་ཕྲན་ཅན།། སྐུ་ལྔ་ལྷུན་གྲུབ་ཀྱི་མཇུག་སྒྲོ་ལ །ཡེ་ཤེས་འོད་ཟེར་གྱི་མདུང་རྩེ་ཅན །རྣམ་ཐར་གསུམ་ལྡན་གྱི་མཁའ་ལྡིང་ཁྱོད །ཉོན་མོངས་གཡུལ་བཟློག་གི་ཕོ་ཉར་སྦྲན། །གཉིས་འཛིན་འགོང་པོ་ཡི་གཤེད་དུ་བསྐོས། །ང་ཡང་ངར་འཛིན་གྱི་དགྲས་འཇིགས་ནས། ཁྱོད་ཀྱི་ཆེ་ཆེ་ལ་རེའོ་བལྟ། །ཞེས་ཟེར། བྱ་ཁྱུང་ན་རེ། ཨང་ཨང་ཞེས་ཟེར་བའི་སྒྲ་ལ་ཉན་པས་འདི་སྐད་ཟེར་བ་ཐོས འཁོར་འདས་ཀྱི་ཡེ་གཞི་ཆེན་པོ། །རང་ངོ་རུ་སངས་པའི་རྒྱལ་ས། །གང་གིས་ཀྱང་སུ་ལ་མ་ཤོར། །རང་མལ་དུ་ཚུད་ན་དེ་ཀ །ཡང་ཨང་ཨང་ཟེར་བའི་སྒྲ་ལ། སངས་རྒྱས་དང་སེམས ཅན་མི་གཉིས། །འཁོར་བ་དང་མྱང་འདས་མི་གཉིས །ལྷ་བཟང་དང་འདྲེ་ངན་མི་གཉིས། །བདེ་བ་དང་སྡུག་བསྔལ་མི་གཉིས། །ཕྱི་ཡུལ་དང་ནང་སེམས་མི་གཉིས། །མི་གཉིས་འདིར་ལྟོས་དང་ཨེ་གོ །ཡང་ཨང་ཨང་ཟེར་བའི་སྒྲ་ལ གཉིས་མེད་ཀྱི་མཐའ་གྲོལ་ཆེན་པོར། །སད་ཙམ་དུ་སྐུ་དང་ཞིང་ཁམས། །རང་སྣང་ངོར་རང་བྱུང་ལྷུན་རྫོགས། །འབྲས་བུ་ལ་རྙེད་ཐོབ་མ་རེ། །ཨང་ཨང་ཞེས་གཞི་ལམ་འབྲས་བུའི་ཚིག་དེ་སྐད་ཟེར་ནས་ཡལ་ལོ། །བདུད་འཇོམས་རྡོ་རྗེ་ཁྲོ་ལོད་རྩལ་གྱིས་ཡིག་རིས་སུ་བཀོད་པ་དགེ ༄༅། །བསྐལ་པ་ལྕགས་རྟའི་ལོར་ཧོར་ཟླ་དྲུག་པའི་ཉེར་གཅིག་ནུབ་རྨི་ལམ་ན་བཙུན་ཆུང་གཉིས་ལག་པ་འབྲེལ་འདུག་པ་བུད་མེད་གཞོན་ནུ་མ་ཞིག་གིས་ཤིན་ཏུ་ཆགས་པའི་ཉམས་ཀྱིས་འདི་སྐད་ཟེར་བ་ཐོས། ཡུལ་མེད་སྟོང་རའི་ཁྱིམ་འདི་ན །དུར་ཁྲོད་རོ་ལ་ཉུལ་མོ། །བདེ་བའི་རེག་ལ་ཆགས་ནས། །གཟུགས་ཀྱི་རྣམ་འགྱུར་སྟོན་ཅིང་། །སྒྲ་སྙན་མཁའ་འགྲོའི་རྒྱང་གླུ། །སྐལ་ལྡན་རིགས་ལ་ལེན་ཅིང་། །ཡེ་གཞི་ཀ་དག་ཆེན་པོར། །བདེ་སྟོང་ལྷུན་གྲུབ་རྒྱས་འདེབས། །གསོན་དང་ཆགས་པའི་རྡོ་རྗེ། །དགའ་བཞིའི་ཡེ་ཤེས་ཆེན་པོ།། བསྐྱེད་ཅིང་སྦར་བའི་གཏེར་གནས། །ཤེས་རབ་སྙེམས་མའི་མཁའ་གསང་། །དཔའ་བོ་རིག་པ་གཞོན་ནུ། །ཡེ་ཤེས་དྲོད་དང་འགྲོགས་ཏེ། །ལོངས་སྤྱོད་གཏེར་ལ་ཕེབས་རོལ། །ཆོས་ཉིད་གསང་ཆེན་རོལ་པ། །དོན་གྱི་འོག་མིན་ཞིང་ནས། །སྣང་སྟོང་བདེ་ཆེན་རོལ་པའི། །སངས་རྒྱས་པདྨ་ཀ་ར། །སྒྱུ་འཕྲུལ་རོལ་པའི་སྟོན་འཁོར། །དབྱེར་མེད་བདེ་སྟོང་ཆེན་པོ།། ཟུང་འཇུག་རོལ་པའི་ཆོ་འཕྲུལ །གདུལ་བྱ་ཐབས་ཀྱིས་འདུལ་ཕྱིར། །ཕོ་ཉ་དཔའ་བོ་ཟུང་འདི། །དབྱིངས་དང་ཡེ་ཤེས་མཉམ་ཉིད། །བདེ་ཆེན་འགྱུར་མེད་ས་ལ། །སྦྱོར་བའི་ལམ་མཆོག བདག་མོ། །མ་ཚོགས་ལས་ལ་འགྱེད་པའི། །མ་མོ་འཁོར་འདས་དབང་མོ། །མ་གདུང་བུ་ལ་བརྩེ་བའི། །མ་བུ་རང་ངོ་མཇལ་འཕྲོད། །ཡུལ་ངན་སྡིག་པའི་གྲོང་ན། །གྲོགས་ངན་དམ་སྲིས བརླབས་ནས། །ཟས་ངན་དུག་ཆང་བླུད་དེ། །ལམ་ངན་འཁོར་བར་མྱོས་ལ། །མ་ཡིས་གློ་སྙིང་འདར་ནས། །མ་བཟོད་བརྡ་གསུམ་སྟོན་འདི། །མ་དང་དགོངས་པ་འདྲེས་པའི། །བུ་ལས་གཞན་དུ་སུས་ཤེས། །ནམ་མཁའི་ཉི་ཟླ་སྐར་གསུམ །བསྒྲིབ་ན་སྤྲིན་གྱིས་སྒྲིབ་པ། །ཡེ་གཞི་ཡེ་ཤེས་ཆམ་བརྡལ །ཉམས་ཆག་སྒྲིབ་པའི་བརྡའོ། །མེ་ཏོག་པདྨ་རྒྱས་པ། །བཅོམ་བྱེད་གྲང་ལྷག་ཐན་པ། །ཆོས་འཛིན་ལམ་ཞུགས་གང་ཟག །བདུད་ཀྱི་དགྲ་རུ་བརྡའོ། །གླིང་བཞི་རི་རབ་བརྟན་པ། །བསྐལ་པ་མེ་ཡིས་གཞོམ་ནུས། །གྲོང་དང་གྲོང་ཁྱེར་ལེགས་ཀྱང་།།ཆོམ་པོའི་དཔུང་ཆེན་བརྡའོ། །ཧར་ཏིང་ཨ་རུ་པདྨ། །ཡ་རག་སྨུ་རུ་ཀར་ཀ །སིདྡྷི་པཉྩ་ཨ་ལ། །ངྷརྨ་དྷཱ་ཏུ་ཨ་ཨེ། །