Tibetan
ངས་པ་ཟད་མི་སྲིད་ཉོན་མོངས་པ་མ་ཟད་ན་སངས་རྒྱ་མི་སྲིད་པས༔ དངོས་པོ་ཟད་པར་བྱེད་པ་ལ་ལུས་ངག་གི་གནད་གཅུན་དགོས་ཏེ༔ དེ་ཡང་དང་པོ་ལུས་ཀྱི་གནད་འདུག་སྟངས་གསུམ་ཡིན་ནོ༔ འདི་རབ་ཏུ་ཟབ་པས་འདི་མ་བྱས་ན་ཉམས་སུ་བླངས་ཀྱང་ཡེ་ཤེས་སྐྱེ་མི་སྲིད་དོ༔ ཡེ་ཤེས་དེ་ལུས་ལ་གནས་ཤིང་ལུས་ལ་བརྟེན་པའི་ཕྱིར་རོ༔ ལྷག་མ་ནི་དཔེ་ན་ཞིབ་བོ༔ དེས་ན་རིག་པའི་ཡེ་ཤེས་དེ་ཚིག་གིས་གཏན་ལ་མི་ཕེབས་པའི་གནད་ནི་ངག་ཡིན་ཏེ་ཉམས་སུ་ལེན་པའི་རྣལ་འབྱོར་པས་རྟག་ཏུ་ངག་བཅད་པ་གནད་ཡིན༔ ངག་མ་བཅད་ན་བརྗོད་དུ་མེད་པའི་དོན་བློ་ལ་སྐྱེ་མི་སྲིད་དོ༔ དེའི་ཕྱིར་ཡིད་དཔྱོད་འཛིན་པའི་ལྟ་བ་རྣམས་ལ་བརྗོད་དུ་མེད་ཅེས་པ་ནི༔ ངག་འགགས་པས་རང་བརྗོད་འགགས༔ རང་བརྗོད་འགགས་པས་གཞན་བརྗོད་ཀྱི་རྣམ་རྟོག་སྐྱེ་མི་སྲིད༔ དེས་ན་ངག་བཅད་པ་ནི་རབ་ཏུ་ཟབ་བོ༔ དེའི་ཕྱིར་ན་ལུས་ངག་གཉིས་ཀྱི་གནད་ཀྱི་མན་ངག་དངོས་པོ་ཡིན་པས་དངོས་པོ་འདི་ཀུན་རང་ཟད་ལ་འགྲོ་བའི་གནད་ཡིན་ནོ༔ དེ་གཉིས་ཀྱི་གནད་གཅུན་པས་ཡིད་ཀྱི་གནད་ནི་རང་ཤུགས་ལ་འབེབས་པ་ཡིན་པས་འདི་བཅོས་ཤིང་དཔྱད་དུ་མེད་དོ༔ དེ་ལྟར་ལུས་ངག་གི་གནད་ལ་བརྟེན་ནས་དབྱིངས་ནམ་མཁའ་ལ་གཏད་པས་འོད་ལྔའི་སྣང་བ་མི་འཆར་མི་སྲིད་དོ༔ དེ་ཤར་བའི་དུས་ན་ལུ་གུ་རྒྱུད་ལ་རང་དབང་མི་ཐོབ་མི་སྲིད་དོ༔ དེ་ཐོབ་པས་ཆོས་ཉིད་ཟད་པའི་ས་ལ་རང་སྤྱོད་པས་ན་རྒྱུད་ལུང་གི་ཚིག་ལ་བརྟེན་མི་དགོས་པས་གཞི་ཡི་ཚིག་དང༔ འཁྲུལ་པ་དང༔ དེ་ལྡོག་ཚུལ་རྣམས་གཏན་ལ་འབེབས་པ་ནི་བླུན་པོ་ཡིན་ཏེ༔ རང་གི་ངོ་བོ་མཐོང་བ་ལ་ཅི་ཡང་བྱ་མི་དགོས་པའི་གནད་ཡིན་ནོ༔ ཚིག་འདི་ཀུན་གྱིས་ནི་ངོ་བོ་མཐོང་མི་སྲིད་དོ༔ ངོ་བོ་མ་མཐོང་ན་ཚིག་ལ་དགོས་པ་ཅི་ཡང་མེད་པའི་ཕྱིར་རོ༔ ཀུན་ཏུ་བཟང་པོ་ཐུགས་ཀྱི་མེ་ལོང་གི་རྒྱབ་ཡིག་མན་ངག་གི་རྒྱལ་པོ་དུང་ཡིག་ཅན་གྱི་སྙིང་ཏིག་ལ་འབེབས་པའི་གསང་བ་རྫོགས་སོ༔ ཨི་ཏི༔ རྒྱ་རྒྱ་རྒྱ༔ རྒྱུད་ཀྱི་རྒྱལ་པོ་སྒྲོན་མ་འབར་བའི་ཁོང་དོན་གྱི་མན་ངག་ལྔ་ལ༔ ལྷག་མ་ནི་ཤེས་པར་བྱ་བའི་ཆོས་ཡིན་གྱི་ཡེ་ཤེས་རྟགས་ཀྱི་སྒྲོན་མའི་མན་ངག་ནི་ཉམས་སུ་བླང་དུ་བཏུབ་པ་མ་ཡིན་ནོ༔ དེ་ཡང་འཁོར་འདས་རུ་ཤན་འབྱེད་པའི་སྤྱོད་པ་ལ་སོགས་སྔོན་དུ་མ་བྱས་ན་རྣལ་འབྱོར་པའི་ལུས་ངག་གི་ཞེན་པ་མི་ལྡོག༔ དེའི་ཞེན་པ་མ་ལོག་ན་འཁོར་འདས་རུ་ཤན་མི་ཕྱེད༔ དེ་མ་ཕྱེད་ན་འཇིག་རྟེན་པ་དང་ཁྱད་མེད་པས་ཉམས་སུ་བླངས་ཀྱང་ངོ་བོ་ཉིད་མཐོང་མི་སྲིད་དོ༔
Tibetan
དེས་ན་འཁོར་འདས་རུ་ཤན་འབྱེད་པའི་གདམས་ངག་ཟབ་བོ༔ དེ་ནས་ལུས་ངག་གི་གནད་གཅུན་པ་གལ་ཆེའོ༔ དེ་ཡང་ལུས་གནད་སྙིང༔ སྙིང་གནད་རྩ༔ རྩའི་གནད་མིག་ཡིན་པས་ནི་དཔེ་ལྟར་གྱིས་འགྲུབ༔ དེ་ཡང་ཉིན་མོ་ལྟ་སྟངས་བཞིས་བལྟས་པས་ཉམས་གོང་ནས་གོང་དུ་འཕེལ་བ་འབྱུང༔ མཚན་མོ་ཤེས་བྱ་བུམ་པར་བཅུག་པ་ནི་དུས་བཞིའི་ཡི་གེར་བལྟ༔ ཐིག་ལེ་རྩའི་ནང་དུ་སྦ་བའི་གནད་ནི་དབུགས་ནང་དུ་རྔུབ༔ སྟེང་འོག་དབུགས་ཀྱི་སྐད་འདོན༔ དེ་ནི་སོ་དང་མཆུ་བསྟུན་ཏེ་ལྕེ་ཡང་འགྱུར་ལྡོག་མེད་པར་འབྱུང་བ་ཡིན༔ འདི་ནི་མཚན་མོའི་རིམ་པ་བཞིན་ཏེ་ཨིག་སྐད་ནི་བརྩེགས་མ་དང་རིང་པོ་གཉིས་རེས་འཇོག་ཏུ་བྱའོ༔ འདི་ལྟར་ཉམས་སུ་བླངས་པའི་ནི་ཉིན་མཚན་མེད་པའི་སྣང་བ་མྱུར་དུ་སྐྱེ་བའི་གནད་ཡིན་ནོ༔ དེ་ལྟར་གྱི་ཡེ་ཤེས་ཉམས་སུ་བླངས་པས་ནི་རྟགས་འབྱུང་བ་ཡིན་ཏེ༔ འདི་ཀུན་དགོས་པའི་རྒྱུ་མེད་དགོས་པ་ཡང་ཡོད་པ་ཡིན་ཏེ༔ རང་བྱུང་དུ་འབྱུང་བ་ཡིན་ཏེ༔ དེ་ཡང་ལུས་ངག་གི་གནད་གཅུན་པའི་གནད་ཀྱིས་སྔོན་དུ་ལུས་ངག་ལ་རྟགས་རྣམས་འོང༔ དེ་ནས་རིག་པའི་ཡེ་ཤེས་མངོན་སུམ་དུ་ཉམས་སུ་བླངས་པས་སྐུ་རྣམ་པ་གསུམ་གྱི་ལམ་རྟགས་འབྱུང་ངོ༔ དེ་ལྟར་རིག་པ་ཚད་ལ་ཕེབས་ནས་རྟགས་ལས་འདས་པའི་སྣང་བྱེད་ཅེས་བྱའོ༔ དེ་ཡང་སྐྱེས་བུ་ཡང་རབ་ལ་ཟླ་བ་བདུན་རྟགས་འབྱུང༔ འབྲིང་ལ་ལོ་བདུན་ན་རྟགས་དེ་ཀུན་འབྱུང༔ ཐ་མ་ལ་ལོ་བཅུ་བཞི་ལ་འབྱུང་བ་ལ་ཐེ་ཚོམ་མེད་དོ༔ སྐྱེས་བུ་ལ་ལ་ནི་ཉི་མ་བདུན་ན་འབྱུང་བ་ཡང་ཡོད་དོ༔ དེའི་ཕྱིར་ན་འདི་ཀུན་ལ་མ་ཡེངས་པ་རབ་ཏུ་གཅེས་སོ༔ ཉམས་སུ་མ་བླངས་ན་ཉམས་སུ་མྱོང་བ་རྒྱུད་ལ་སྐྱེ་སྲིང་མི་སྲིད་དོ༔ ཉམས་སུ་མྱོང་བ་རྒྱུད་ལ་མ་སྐྱེས་ན་ཡིད་དཔྱོད་ཀྱི་ལྟ་བ་ཡིན་ཏེ་ཡིད་དཔྱོད་ཀྱི་ལྟ་བས་སངས་མི་རྒྱ་བར་ལ་ཆོད་དོ༔ དེའི་ཕྱིར་ན་སྙིང་གི་གདམས་གསང་བའི་ཡི་གེ་མ་རུ་གཅེས་སོ༔ དེ་ནི་སུ་ལ་ཡང་གྲགས་སུ་མི་རུང་ངོ༔ སྒྲོན་མ་འབར་བའི་རྒྱུད་ཀྱི་རྒྱབ་ཡིག་མན་ངག་རྒྱལ་པོ་དུང་ཡིག་ཅན་གྱི་སྙིང་ཏིག་རྫོགས་སོ༔ རྒྱ་རྒྱ་རྒྱ༔ རྡོ་རྗེ་སེམས་དཔའི་སྙིང་གི་མེ་ལོང་གི་ཁོང་དོན་གྱི་མན་ངག་ནི་གསུམ་ལས༔ ལྷག་མ་ནི་ཤེས་པར་བྱ་བའི་ཆོས་ཡིན་གྱིས་ཉམས་སུ་བླང་བྱ་མ་ཡིན་པས༔ སྐུ་གསུམ་གྱི་ངོ་སྤྲོད་ནི༔ ལུས་ངག་ཡིད་གསུམ་གཅུན་པ་ལས་ལམ་དུ་སྐུ་གསུམ་གྱི་སྣང་བ་རང་འཆར་བ་ཡིན་ཏེ༔ དེའི་སྔོན་དུ་འཁོར་འདས་རུ་ཤན་འབྱེད་པའི་སྤྱོད་པ་བསྟན་པ་ནི་ཚིག་གི་སྤྱོད་པ་རྣམས་ལས་རང་ལོག་