Tibetan
ཐམས་ཅད་རང་སྣང་རང་ལ་ཤར་བ་ཙམ་ལས་གཞན་ན་བདེན་གྲུབ་ཏུ་སྤུ་རྩེ་ཙམ་ཡང་ཡོད་མ་མྱོང་གསུངས དེ་དག་གཞན་ཞིག་ཡིན་ཏེ་མངོན་སུམ་མིག་གིས་མཐོང་རྒྱུ དོན་དམ་ལག་པས་འཛིན་རྒྱུ དབང་པོའི་སྒོ་རུ་མངོན་རྒྱུ་གཞན་རང་རྒྱུད་པར་ཡོད་དེ། གཟུགས་བཟང་པོ་མཐོང་ན་བཟང་པོའི་འདུ་ཤེས གཟུགས་ངན་པ་མཐོང་ན་ངན་པའི་འདུ་ཤེས། གཟུགས་བར་པ་ལ་བཏང་སྙོམས་སུ་འདུ་ཤེས། དེ་བཞིན་དུ་སྒྲ་བཟང་པོ་ཐོས་ན་བཟང་པོའི་འདུ་ཤེས སྒྲ་ངན་པ་ཐོས་ན་ངན་སྒྲ་བར་པ་ཐོས་ན་བཏང་སྙོམས་སུ་དྲི་བཟང་པོ་ཚོར་ན༴ དྲི་ངན་པ་ཚོར་ན༴ དྲི་བར་པ་ཚོར་ན་བཏང་སྙོམས་སུ༔ རོ་བཟང་པོ་མྱོང་ན༴ རོ་ངན་པ་མྱོང་ནཿ རོ་བར་པ་ལ་བཏང་སྙོམས་སུ༔ རེག་བྱ་བཟང་པོ་མྱོང་ནཿ རེག་བྱ་ངན་པ་ལ། རེག་བྱ་བར་པ་ལ་བཏང་སྙོམས་སུ་འདུ་ཤེས་རྣམས་མངོན་སུམ་མིག་གིས་ མཐོང་རྒྱུ། དོན་དམ་ལག་པས་འཛིན་རྒྱུ། དབང་པོའི་སྒོར་མངོན་རྒྱུ་ཡོད་སྙམ་ན། མདང་གི་རྨི་ལམ་གྱི་སྐབས་སུ་ཁྱོད་ཀྱི་མིག་འདིས་གཟུགས་བཟང་པོ་ལྷ་དང་མི་དང་བདེ་བར་གཤེགས་པའི་སྐུ་གཟུགས་ལ་སོགས་པ་དང་། གཟུགས་ངན་པ་ཡིད་དུ་མི་འོང་བའི་གཟུགས་ལ་སོགས་པ་མཐོང་ཡང་། དེ་རིང་ཉིན་མོའི་སྐབས་ཀྱི་མིག་འདིས་གཟུགས་གཅིག་ཀྱང་མཐོང་མ་མྱོང་། དེ་བཞིན་དུ་རྣ་བ་འདིས་སྒྲ་སྙན་པ་པི་ཝང་དང་གླིང་བུ་ལ་སོགས་པའི་སྒྲ་དང་། སྒྲ་ངན་པ་བོང་ལི་དང་ཁྱི་ལ་སོགས་པས་ངུ་ཟུག་བྱེད་པ་ཐོས་ཀྱང་།དེ་རིང་ཉིན་མོའི་སྐབས་ཀྱི་རྣ་བ་འདིས་སྒྲ་གཅིག་ཀྱང་ཐོས་མ་མྱོང་། སྣ་འདིས་དྲི་བཟང་པོའི་རིགས་གླ་རྩི་དང་ག་བུར་གུར་གུམ་ལ་སོགས་པ་དང་། དྲི་ངན་པའི་རིགས་རྟ་རོ་དང་ཁྱི་རོ་རུལ་པ་ལ་སོགས་པ་ཚོར་ཡང་། དེ་རིང་ཉིན་མོའི་སྐབས་ཀྱི་སྣ་འདིས་དྲི་གཅིག་ཀྱང་ཚོར་མ་མྱོང་ལྕེ་འདིས་རོ་མངར་བ་བུ་རམ་དང་ཀ་ར་སྦྲང་རྩི་ལ་སོགས་པ་བཟང་པོ་དང་། རོ་ངན་པའི་རིགས་ཁ་བ་དང་སྐྱར་བ་ལ་སོགས་པ་མྱོང་ཡང་། དེ་རིང་ཉིན་མོའི་སྐབས་ཀྱི་ལྕེ་འདིས་རོ་གཅིག་ཀྱང་མྱོང་མ་མྱོང་། ལུས་འདིས་རེག་བྱ་བཟང་པོའི་གོས་དར་རས་ཕྲུག་ལ་སོགས་པ་འཇམ་པོའི་རིགས་དང་། རེག་བྱ་ངན་པ་རྩུབ་ ༄༅། །མོའི་རིགས་ལ་སོགས་པ་རེག་ཀྱང་། དེ་རིང་ཉིན་མོའི་སྐབས་ཀྱི་ལུས་འདིས་རེག་བྱ་གཅིག་ཀྱང་རེག་མ་མྱོང་། དེ་ལྟ་བུའི་སྣང་བ་སྣང་དུས་ཉིད་ནས་བདེན་གྲུབ ཏུ་མ་མྱོང་། དེའི་ཕྱིར་ན་དེ་གཉིས་འདྲ་མཚུངས་པ་དེས་ཀྱང་སྟོན་པར་འགྱུར་བ་ཡིན་གསུངས། ཚེ་འཁོར་བ༔སོགས། ཤེས་པར་བྱའོ། །ཚེ་འཁོར་བ་ཐོག་མ་མེད་པའི་དུས་ནས་གནས་འཕོ་ནས་གཞན་དུ་འགྲོ་མ་མྱོང་། གནས་གཞན་དུ་སྡོད་མ་མྱོང་བའི་ཚུལ་ནི་རྨི་ལམ་གྱི་སྣང་བས་སྟོན་ཏོ། །རྨི་ལམ་དང་ཉིན་སྣང་གཉིས་ཀའི་བདེན་རྫུན་མི་མཉམ་བསམ་ན། རྨི་ལམ་དོ་ནུབ་རྨིས་རྒྱུ་དེ་སང་ཉིན་ཡང་རྨིས་པ་མ་ཡིན། ཉིན་སྣང་དེ་རིང་ཡོད་རྒྱུ་དེ་སང་ཉིན་ཡང་ཡོད་བསམ་ན། ཁྱོད་ཆུང་དུས་ལོ་བཅུ་ལོན་ཚུན་ཆད་དུ་གྲོགས་སུ་དང་འགྲོགས། གཏམ་ཅི་བཤད། ཟས་ཅི་ཟོས། རྒྱུ་ཟས་གསོག་འཇོག་བྱས་པ་གང་ན་ཡོད། ཆུང་དུས་ལོ་བཅུ་ལོན་ཚུན་ཆད་དུ་རྨི་ལམ་གྱི་སྐབས་སུ་གྲོགས་སུ་དང་འགྲོགས། གཏམ་ཅི་བཤད། ཟས་ཅི་ཟོས། དེ་དུས་སུ་རྒྱུ་ཟས་བསོག་འཇོག་བྱས་པ་གང་ན་ཡོད ཡོད་ན་མངོན་སུམ་མིག་གིས་མཐོང་རྒྱུ དོན་དམ་ལག་པས་འཛིན་རྒྱུ དབང་པོའི་སྒོ་རུ་མངོན་རྒྱུ་ཞིག་ཡོད་དགོས་ཀྱང་དེ་ནི་ཡོད་པ་མ་ཡིན། དེ་དག་ཐམས་ཅད་མི་དྲན་པ་བརྗེད་པའི་ཡུལ་དུ་གྱུར་པ་ལ། དྲན་པའི་ཡུལ་བདེན་རྫུན་ཡོད་མེད་འདྲ་འདྲ་ཡིན། རྨི་ལམ་གྱི་སྣང་བ་ཀུན་གཞིའི་རྣམ་ཤེས་ཀྱི་སྟེང་དུ་མཆེད་པ་དང་། ཉིན་མོའི་སྣང་བ་ཀུན་གཞིའི་ཡིད་ཀྱི་སྟེང་དུ་མཆེད་པ་ཡིན་པས དེ་གཉིས་ཁ་ཕྱི་བལྟ་དང་ནང་བལྟའི་ཁྱད་པར་གྱིས་འཛིན་སྟངས་དམ་མི་དམ་ཞིག་ཡོད་པ་དེའི་ལན་གྱིས་ཡིན། དེའི་ཡུན་གྱི་རིང་ཐུང་ལ་བརྟགས་ནའང་ཉིན་ཆུ་ཚོད་སུམ་ཅུ། མཚན་ཆུ་ཚོད་སུམ་ཅུ ཉིན་ཞག་གཅིག་ལ་ཆུ་ཚོད་དྲུག་ཅུ་ཐམ་པ་ཡོད་པས་ཡུན་ཡང་འདྲ གྲངས་ཀྱི་མང་ཉུང་ལ་བརྟགས་ནའང་ལོ་གཅིག་ལ་ཉིན སྣང་སུམ་བརྒྱ་དང་དྲུག་ཅུ། མཚན་སྣང་སུམ་བརྒྱ་དང་དྲུག་ཅུ། ཉིན་ཞག་བདུན་བརྒྱ་དང་ཉི་ཤུ་ཐམ་པ་ཡོད་པས་གྲངས་ཡང་འདྲ་བ་ཡིན་ལ། རྟོག་དཔྱོད་ཞིབ་ཏུ་ཐོང་དང་ངེས་པར་ཐག་ཆོད་པར་འགྱུར་རོ་གསུངས། རི་རབ་ལྟ་བུའི་ཟས་ཞིག་ཟོས། རྒྱ་མཚོ་ལྟ་བུའི་སྐོམ་ཞིག་འཐུང་ཡང་འགྲང་སྣང་མེད་པ་དང་། གོས་ལྷོ་སྤྲིན་ཙམ་ཞིག་གྱོན་རུང་དྲོ་སྣང་མེད་པ་རྣམས་བྱས་པ་འདི་སྣང་ཙམ་ཞིག་ལས་བདེན་གྲུབ་ཏུ་གྲུབ་མ་མྱོང་བའི་རྟགས་ཡིན། ལུས་སུ་སྣང་བ་སོགས། མ་གྲུབ་པའོ། །ཚེ་འདིར་རྩེ་གཅིག་ཏུ་དམ་པའི་ཆོས་བསྒྲུབ་ན་རྣམ་མཁྱེན་གྱི་འབྲས་བུ་ཚེ་ ༄༅། །གཅིག་པོ་འདིའི་སྟེང་དུ་འགྲུབ་པར་འགྱུར་ནའང་། དེ་ལ་མི་བརྩོན་པར་ལུས་མེད་པ་ལ་ལུས་སུ་སྣང་བ་འདིའི་ཆེད་དུ་ཁ་ལ་ཟ་རྒྱུ་རྒྱབ་ལ་གྱོན་རྒྱུ་སོགས་ལ་འབད རྩོལ་བྱས་པས་རྣམ་མཁྱེན་གྱི་འབྲས་བུ་ཟ་བའི་ཟ་འདྲེ་ཡང་ཡིན། ཚེ་འདིར་དམ་པའི་ཆོས་ཁོ་ན་བསྒྲུབ་ན་སྐྱེ་འཆིའི་སྣང་བ་རྒྱུན་གཅོད་ཐུབ་ནའང་། དེ་མ་བྱས་པར་ཚེ་འདི་ཁོ་ནའི་དོན་འབའ ཞིག་ཏུ་གཉེར་བའི་འཁོར་བ་ནས་ཁ་བརྒྱུད་པའི་སྐྱེ་བའི་སྣང་བ་སྟོན་ཏེ། སྐྱེ་བའི་མཐའ་ན་འཆི་བ་མེད་པའི་ཐབས་མེད་པ་ཡིན་པས་སྐྱེ་འཆིའི་སྣང་བ་རྒྱུན་མི་ཆད་པར་སྟོན་པའི་ཤི་གཤེད་ཀྱང་ཡིན། ཟས་སྐོམ་འགྲང་ཙམ་དང་གོས་ལྷག་སྐྱོབ་ཙམ་ལ་བརྟེན་ནས་ཚེ་གཅིག་ལ་རྣམ་མཁྱེན་སངས་རྒྱས་ཀྱི་གོ་འཕང་བསྒྲུབ་ན་ཚེ་འདིར་ཐར་པའི་སྲོག་ཐོབ་པར་འགྱུར་ནའང་། དེ་མ་བྱས་པར་ལུས་སྣང་ཙམ་པ་ལ་ལུས་སུ་བཟུང་ནས་དེའི་ཆེད་དུ་གོས་བཟང་པོ་དྲོ་འཇམ་ཟས་བཟང་པོ་ཞིམ་པོ་དང་། བདེ་བ་ཁོ་ན་དོན་དུ་གཉེར་ཞིང་བཟང་པོ་ལ་རེ་བ་དང་། ངན་པ་ལ་དོགས་པ་མ དང་། དགྲ་ལ་སྡང་བ་དང་། གཉེན་ལ་ཆགས་པ་དགྲ་འདུལ་གཉེན་སྐྱོང་ལ་སོགས་པའི་ཚེ་འདིའི་བྱ་བ་འབའ་ཞིག་ལ་དོན་དུ་གཉེར་བས་ཐར་པའི་སྲོག་རྩ་བཅད་པའི་སྲོག་གཅོད་ཀྱང་ཡིན། ཚེ་འདིར་འོད་གསལ་རྫོགས་པ་ཆེན་པོའི་དོན་བསྒོམ་ན་གཏན་དུ་བདེ་བའི་རྣམ་མཁྱེན་གྱི་འབྲས་བུ་ཚེ་ལུས་གཅིག་པོ་འདིའི་སྟེང་ནས་ཐོབ་པར་འགྱུར་ནའང་། དེ་མ་བྱས་པས་རྣམ་མཁྱེན་གྱི དབུགས་འཕྲོག་པས་དབུགས་ལེན་ཀྱང་ཡིན། ཚེ་འདིར་གསང་སྔགས་རྡོ་རྗེ་ཐེག་པའི་སྒོར་ཞུགས་ནས་དམ་ཚིག་མ་ཉམས་པར་ཚུལ་བཞིན་དུ་བསྲུང་ན་ཚེ་ལུས་འདི་ཉིད་ལ་རྡོ་རྗེ་འཆང་གི་གོ་འཕང་ཐོབ་ནུས་ནའང་།དེ་ཚུལ་བཞིན་དུ་མ་བསྲུང་ཞིང་ཚེ་འདིའི་དགྲ་འདུལ་གཉེན་སྐྱོང་མི་དགེའི་སྤྱོད་པ་ཁོ་ན་ལ་དུས་འདས་པའི་དབང་གིས་དམ་ལས་ཉམས་པར་བྱེད་པས་ན་དམ་སྲི་ཡང་ཡིན་ནོ། །དེའི་ཕྱིར་ན་ཚོགས་དྲུག་གི་ཡུལ་སྣང་ལ་ཞེན་པ་ཐམས་ཅད་རི་དྭགས་ཀྱིས་སྨིག་རྒྱུ་ཆུ་རུ་མཐོང་ནས་རྒྱུག་པ་ལྟ་བུ་ལས་སྙིང་པོ་རྡུལ་ཕྲན་ཙམ་ཡང་མ་གྲུབ་པས་ན་ཡུལ་སྣང་ཐམས་ཅད་སྟོང་པའི་རང་བཞིན་དུ་རྟོགས་པར་བྱའོ། །འདི་ལྟར་སྣང་བའི་ཆོས་ཐམས་ཅད་སྣང་དུས་ཉིད་ནས་རང་བཞིན་མ་གྲུབ་པ་དཔེར་ན་ནམ་མཁའི་འཇའ་ཚོན་དང་གློག་འོད་ལྟ་བུ་ཡིན་ནོ།། ཡང་འདི་ལྟར་སྟོང་པར་ཤེས་ཀྱང་༴སོགས རྟོགས་པར་བྱའོ། །དེ་ལྟར་སྟོང་པར་ཤེས་ཀྱང་སྟོང་པ་དེ་མེད་དུ་མི་འགྲོ་བར་སེམས་ན། དེ་མ་ཡིན་ཏེ་བསྒོམ་གྱི་ངོ་བོ་སྟོང་ཉིད་ཡིན་པས ༄༅། །དེའི་གནས་ལུགས་དང་ཡིན་ལུགས་ཐམས་ཅད་ཚུལ་བཞིན་དུ་མ་ཤེས་ན། ཕྱི་སྣང་བ་ལ་དངོས་པོར་འཐས། ནང་རང་ལུས་ལ་གཅེས་འཛིན་དུ་གོལ་ནས སེམས་ཀྱི་གསལ་ཆ་ཙམ་ལ་གདིང་བཅས་ནས་བསྒོམས་ཀྱང་། སྟོང་ཉིད་ཇི་བཞིན་པར་མ་མཐོང་བའི་རྐྱེན་གྱིས་བསྒོམ་ཐམས་ཅད་ལུང་མ་བསྟན་གྱི་ཕྱོགས་སུ་ངེས་པ་ཡིན། དེའི་ན་གཞི་སྟོང་ཉིད་ཀྱི་ལྟ་བ་ཇི་བཞིན་པ་ཤེས་ཤིང་རིག་པ་ནི་གནད་གལ་པོ་ཆེ་ཡིན་ནོ། །དེའི་ཕྱིར་ན་ཆོས་ཐམས་ཅད་ཀྱི་རང་བཞིན་སྟོང་པ་ཉིད་ཡིན་པ་དེ་ཤེས་ཤིང་རྟོགས་དགོས། ལར་ཁྱོད་ཀྱིས་ཟེར་བ་ལྟར་ཡིན་ན་ལྷ་བསྐྱེད་པ་ཙམ་གྱིས་ལུས་ལྷ་རུ་འགྱུར་བ་དང་། སྔགས་བཟླས་པ་ཙམ་གྱིས་ངག་གྲགས་སྟོང་སྔགས་སུ་སྨིན་པ་དང་། སེམས་ཏིང་ངེ་འཛིན་བསྒོམ་པ་ཙམ་གྱིས་སེམས་འོད གསལ་དུ་རྟོགས་པའི་ནུས་པ་ཡོད་དགོས་ཀྱང་དེ་དག་རྣམས་གོ་ཙམ་རྟོགས་ཙམ་གྱིས་གྲོལ་བར་མི་འགྱུར་བས་ན། སྟོང་ཉིད་རྟོགས་ཙམ་གྱིས་དངོས་པོའི་ཆོས་ཐམས་ཅད་མེད་པར་འགྱུར་བ་དང་རྟོགས་དགོས་པའི་རྒྱུ་མཚན་ཡང་ཡོད་པ་མ་ཡིན། ཡང་འགའ་ཞིག་གིས་གདོད་ནས་སྟོང་ན་སྟོང་ས་གསུམ་ན་སྟོང་ཡོད་པ་ཡིན། སྟོང་པར་ཤེས་དང་མ་ཤེས་མེད་ཟེར་བ་འབྱུང་སྲིད དེ། དེའི་ཕྱིར་ན་ཆོས་ཐམས་ཅད་ཀྱི་རང་བཞིན་སྟོང་པ་ཉིད་དུ་ངོ་ཤེས་དགོས་ཏེ། རིག་དང་མ་རིག་ཤེས་དང་མ་ཤེས་གཉིས་ཀའི་ཁྱད་པར་གྱིས་འཁོར་བ་དང་འདས་པ་གྲོལ་བ་དང་འཁྲུལ་པ་ཐམས་ཅད་འབྱུང་བ་ཡིན། དེའི་ཕྱིར་ན་ཤེས་ཤིང་རིག་པ་ནི་གནད་ཀྱི་ཡང་གཅེས་དམ་པ་ཡིན་གསུངས། ཡང་འགའ་ཞིག་གིས༴སོགས། མེད་པ་ལྟ་བུའོ། །འགའ་ཞིག་གིས་རང་སྟོབས ཀྱིས་མ་ཤེས་ན་བསླབ་སྦྱང་གིས་གོ་མི་ཆོད་ཟེར་བ་ཡང་འབྱུང་སྲིད་དེ། ཡེ་ཐོག་མ་མེད་པའི་དུས་ནས་ད་ལ་ཐུག་གི་བར་དུ་རང་སྟོབས་ཀྱིས་ལྟ་བ་མ་རྟོགས་ཤིང་མ་རིག་པའི་དབང་གིས་འཁོར་བར་འཁྱམས་པ་ཡིན། རང་སྟོབས་ཀྱིས་ད་དུང་ཡང་རྟོགས་པར་མི་འགྱུར།དེའི་ཕྱིར་ན་བསླབ་ཅིང་སྦྱངས་ཏེ་རྒྱལ་བའི་བཀའ་ཚད་མ། བླ་མའི་མན་ངག་ཚད་མ། རང་གི་རིག་པ ཚད་མ་རྣམ་པ་གསུམ་གྱི་སྒོ་ནས་རྒྱུད་ལུང་མན་ངག་ཐམས་ཅད་དང་མཐུན་པའི་ལྟ་བ་དང་སྟོང་ཉིད་རྟོགས་དགོས་པ་ཡིན་པས་ཤེས་པར་གྱིས་ཤིག །རྟོགས་པའི་རང་ངོས་ནས་བསླབ་ཅིང་སྦྱངས་ཏེ་དཀའ་བ་ཆེན་པོ་སྤྱད་ནས་སྟོང་ཉིད་རྟོགས་པ་དང་། དཀའ་བ་སྤུ་རྩེ་ཙམ་ཡང་མ་སྤྱད་པར་སྟོང་ཉིད་རྟོགས་པ་གཉིས་ལ་ཁྱད་པར་སྤུའི་རྩེ་མོ་ཙམ་ཡང་ཡོད་པ་མ་ཡིན། དཔེར་ན་ ༄༅། །དཀའ་བ་ཆེན་པོ་སྤྱད་ནས་གསེར་རྙེད་པ་དང་། དཀའ་བ་སྤུ་ཙམ་མ་སྤྱད་པར་གསེར་མལ་འོག་ནས་རྙེད་པ་གཉིས་ལ་གསེར་གྱི་ངོ་བོ་བཟང་ངན་མེད་པ་ལྟ་བུ་དང་། དཀའ་ཚེགས་དཀའ་ལས་བྱས་ནས་ལྷ་སའི་ཇོ་བོ་མཇལ་བ་དང་དཀའ་ཚེགས་སྤུ་རྩེ་ཙམ་ཡང་མ་སྤྱད་པར་ལྷ་སའི་གླིང་གི་གང་ཟག་ཞིག་གིས་ཇོ་བོ་མཇལ་བ་གཉིས་ལ་བྱིན་རླབས་ཀྱི་ངོ་བོར་ཡོ་རིང་མེད་པ་ལྟ་བུ་དང་འདྲ་མཚུངས་སོ། །དེ་ལྟར་སྣང་བ་ཐམས་ཅད་སྟོང་ཉིད༴སོགས སྟོན་ཏོ། །དེ་ལྟར་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་སྟོང་ཉིད་ཆེན་པོ་གཅིག་གི་ངང་དུ་གཏན་ལ་དབབ་པར་བྱེད་པའི་དཔྱོད་བྱེད་ཀྱི་ཤེས་པ་དེ་ལ་སོ་སོར་རྟོག་པའི་ཤེས་རབ་ཅེས་བརྗོད་པ་དང་། འཁོར་འདས་སྟོང་ཉིད་ཆེན་པོ་རུ་ངེས་པར་ཐག་ཆོད་དེ་དེའི་རྗེས་ཤེས་རྒྱུན་ཆགས་པ་ལ་བདག་མེད་རྟོགས་པའི་ཤེས་རབ་ཅེས་བྱའོ། །དེའི་ན་དང་པོ་ངོ་ཤེས་ཤིང་རྟོགས། བར་དུ་མྱོང་ཞིང་འདྲིས། ཐ་མ་གདིང་ཐོབ་པར་བྱ་བ་ནི་གནད་ཀྱི་ཡང་གཅེས་དམ་པ་ཡིན་གསུངས གོ་ཙམ་རྟོགས་ཙམ་གྱི་གང་ཟག་ཞིག་གིས་ཁྱོད་ཀྱིས་ནི་སྟོང་ཉིད་རྟོགས་ཡོད་པ་ཡིན་ཏེ། ངས་ཁྱོད་ལ་མེས་བཙུགས་པས་ཚ་སྣང་། ཆུས་བརྒྱབ་པས་འཁྱག་སྣང་། མདའ་མདུང་དབྱུག་པ་སོགས་ཀྱིས་བརྒྱབ་པས་ན་སྣང་དང་ཚ་སྣང་ཡོད་ཟེར་ན། ཆོས་ཅན་གྱི་སྣང་བ་ཐམས་ཅད་ཆོས་ཉིད་ཀྱི་དབྱིངས་སུ་མ་ཟད་ཀྱི་བར་དུ་བདག་གཞན་དུ་འཛིན་པའི་གཉིས་སྣང་མི་ནུབ།དེ་མ་ནུབ་ཀྱི་བར་དུ་མེས་བཙུག་ན་ཚ་སྣང་ཆུས་བརྒྱབ་ན་འཁྱག་སྣང་མདའ་མདུང་དབྱུག་པ་སོགས་ཀྱིས་བརྒྱབ་པས་ཚ་སྣང་དང་ན་སྣང་གི་ཕན་གནོད་ཀྱི་སྣང་བ་རྒྱུན་མི་ཆད་པར་འབྱུང་ཡང་།དོན་ལ་ནི་དམྱལ་བའི་མེའི་ཚ་བས་མ་ཚིག །གྲང་དམྱལ་གྱི་གྲང་བས་མ་འཁྱག །ལྷ་མ་ཡིན་གྱི་མདའ་མདུང་དབྱུག་པའི་བསྣན་པས་མ་ཤི་བར་བདག་ཡོད་པ་ནི། སྣང་བ་དེ་དག་ཐམས་ཅད་སྣང་ཙམ་པ་ལས་བདེན་པར་གྲུབ་པ་མེད་པའི་མཚང་དེས་སྟོན་པ་ཡིན་ནོ། །ཞེས་གསུངས་ཤིང་མི་སྣང་བར་གྱུར་ཏོ། །གསུམ་པ་ཕན་གནོད་ཀྱི་མཚང་ལ་རྒོལ་བ་ནི ཡང་རེ་ཞིག་གི་དུས་སུ༴སོགས། འགྱུར་པ་ཡིན ཡང་རེ་ཞིག་གི་དུས་སུ་གྲུབ་ཆེན་ས་ར་ཧ་པ་དང་ཞལ་མཇལ་བའི་ཚེ། བདག་གིས་གྲུབ་པའི་དབང་ཕྱུག་ཆེན་པོ་ལགས སྒྲིབ་པ་གང་གིས་སྦྱངས། ལྷ་ཇི་ལྟར་བསྒྲུབ འདྲེ་བགེགས་གང་གིས་སྒྲོལ བདག་ལ་བཀའ་སྩལ་དུ་གསོལ་ཞུས་ཚེ་བཀའ་སྩལ་པ ཀྱེེ་ཞེས་བོས་ཏེ་སྐྱེས་བུ་ཆེན་པོ་ཁྱོད་ཀྱིས་ཕན་གནོད་ཀྱི་མཚང་ ༄༅། །ལ་རྒོལ་དགོས་པས། སྒྲིབ་པ་ཞེས་བྱ་བ་ནི་གཞི་སྟོང་ཉིད་ཀྱི་ངོ་བོ་མ་རིག་པ་ལ་སྒྲིབ་པ་དང་། མ་རིག་པ་དེ་བརྟན་ཅིང་ལས་བྱས་པ་དེ་དག་ཐམས་ཅད་ཀུན གཞིའི་ཁམས་སུ་འཐས་པ་ལ་བག་ཆགས་ཞེས་བརྗོད། དེ་ནི་ལུས་ཀྱིས་ཕྱག་དང་སྐོར་བ། ངག་གིས་ཁ་འདོན་བཟླས་བརྗོད། སེམས་ཀྱིས་བསམ་པ་བཟང་པོའི་དགེ་སྦྱོར་ཙམ་ལ་འབད་པ ལྟ་བུའི་རྩོལ་བ་བྱས་པས་སྦྱོང་བར་མི་འགྱུར་ཏེ། དཔེར་ན་གནམ་ངོས་སྤྲིན་དེངས་འདོད་དེ། ས་གཞིའི་རྡུལ་ཕྱགས་པ་དང་འདྲ་མཚུངས་པ་ཞིག་ཡིན། དེའི་ན་མ་རིག་པའི་སྒྲིབ་པ་དང་བག་ཆགས་སྦྱོང་བར་བྱེད་འདོད་ན། འདི་ལྟར་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་སོ་སོར་རྟོག་པའི་ཤེས་རབ་ཀྱིས་གཞི་ཆོས་ཉིད་ཆེན་པོར་གཏན་ལ་དབབ་པ་ན་མ་རིག་པའི་སྒྲིབ་པ་དང་བག་ཆགས་ངང་གིས་འདག་པར་འགྱུར་བ་ཡིན། དེའི་ན་ཕན་བྱེད་ལུས་ངག་གི་དགེ་བ་དང་གནོད་བྱེད་ཀྱི་ལུས་ངག་ཡིད་གསུམ་གྱི་སྡིག་པ་གཉིས་གཏན་ལ་དབབ་དགོས་ཏེ། ཕན་བྱེད་ལུས་ངག་གི༴སོགས། ཙམ་དུ་ཟད་དོ། །དང་པོ་ཕན་བྱེད་ཀྱི་ལུས་ངག་ཡིད་གསུམ་གྱི་དགེ་བ་གཏན་ལ་དབབ་པ་དེ་ལ། ལུས་ཀྱིས་ཕྱག་དང་སྐོར་བ། ངག་གིས་ཁ་འདོན་བཟླས བརྗོད། སེམས་ཀྱིས་བསམ་པ་བཟང་པོའི་དགེ་སྦྱོར་བྱས་ཚད་ཐམས་ཅད་འབྲུའི་ཕུང་པོ་བཞིན་དུ་སྤུངས་པ་དང་། རྒྱལ་པོའི་བང་མཛོད་བཞིན་དུ་བསགས་ཡོད་དགོས། ཡོད་ན་མངོན་སུམ་མིག་གིས་མཐོང་རྒྱུ། དོན་དམ་ལག་པས་འཛིན་རྒྱུ དབང་པོའི་སྒོར་མངོན་རྒྱུ་ཞིག་ཡོད་དགོས་ཀྱང་དེ་ནི་ཡོད་པ་མ་ཡིན། ཕན་བྱེད་ལུས་ངག་ཡིད་གསུམ་གྱི་དགེ་བ་འདི་དང་པོ་བྱུང་བའི ཁུང་ཞིག་ཡོད་ན། ཕྱི་འབྱུང་བ་ལྔའི་ཁམས་ནས་བྱུང་བ་ཡིན་ན་འབྱུང་བ་སའི་ཁམས་ནས་བྱུང་ངམ། འབྱུང་བ་ཆུའི་ཁམས་ནས་བྱུང་ངམ། འབྱུང་བ་མེའི་ཁམས་ནས་བྱུང་ངམ འབྱུང་བ་རླུང་གི་ཁམས་ནས་བྱུང་བ་ཡིན། བྱུང་ན་མངོན་སུམ་མིག་གིས༴སོགས ཡོད་པ་མ་ཡིན། ཕན་བྱེད་ལུས་ངག་ཡིད་གསུམ་གྱི་དགེ་བ་འདི་དངོས་པོ་ཡོད་པ་ལས་བྱུང་ངམ། དངོས་པོ་མེད་པ་ལས་བྱུང་བ་ཡིན། དངོས་པོ་ཡོད་པ་ལས་བྱུང་ན་འདི་ནས་བྱུང་བ་ཡིན་ཟེར་རྒྱུའི་མངོན་སུམ་མིག་གིས༴སོགས མ་ཡིན། དངོས་པོ་མེད་པ་ལས་བྱུང་བ་ཡིན་ན་དངོས་པོ་མེད་པ་ལས་ལུས་ངག་ཡིད་གསུམ་གྱི་དགེ་བ་གཟུགས་ཅན་ཞིག་ཡོད་དགོས། དེ་ཡོད་ན་ལུས་ངག་ཡིད་གསུམ་གྱི་དགེ་བ་འདིའི་གཟུགས་དབྱིབས་ཁ་དོག་སོགས་མངོན་སུམ་མིག་གིས༴སོགས། མ་ཡིན། ༄༅། །ཕན་བྱེད་ལུས་ངག་ཡིད་གསུམ་གྱི་དགེ་བ་འདི་བར་དུ་གནས་པའི་ས་ཞིག་ཡོད་ན་མགོའི་སྐྲ་རྩེ་མན་ཆད།རྐང་གི་སེན་རྩེ་ཡན་ཆད་ཀྱི་བར་ལ་བརྟགས་ནས་གནས ས་འདི་ཡིན་ཟེར་རྒྱུ་ཞིག་ཡོད་དགོས། ཡོད་ན་མངོན་སུམ་མིག་གིས༴སོགས མ་ཡིན། ཕན་བྱེད་ལུས་ངག་ཡིད་གསུམ་གྱི་དགེ་བ་འདི་ཐ་མ་འགྲོ་བའི་ཡུལ་ཞིག་ཡོད་ན་ཤར་ལྷོ་ནུབ་བྱང་ཕྱོགས་བཞི་མཚམས་བརྒྱད་སྟེང་འོག་བར་གསུམ་གང་གི་ཕྱོགས་སུ་འགྲོ་ས་འགྲོ་ཡུལ་ཡོད།ཡོད་ན་མངོན་སུམ་མིག་གིས༴སོགས།མ་ཡིན། དེའི་ན་བྱུང་གནས་འགྲོ་གསུམ་གྱིས་གཏན་ལ་ཕབ་ནས་མེད་པ་ཡིན་མ་གཏོགས། ཕན་བཏགས་པ་དེ་དགེ་བ་ཡིན་སྙམ་ན། སེམས་ཉིད་སྟོང་པའི་ཕྱི་ནང་བར་གསུམ་མགོ་མཇུག་གང་གི་ཐད་ནས་ཕན་བཏགས་ཏེ་དཀར་པོར་བཏང་བ་འདི་མངོན་སུམ་མིག་གིས་༴སོགས། མ་ཡིན། དེའི་ན་རང་གི་བློས་བཏགས་པ་ཙམ་མ་གཏོགས་དགེ་བ་རང་ངོས་ནས་བདེན་གྲུབ་ཅན་དུ་མ་གྲུབ་པ་ཡུལ་མེད་དུ་ཐག་ཆོད་ཚེ་གནས་སྐབས་སུ་འཁོར་བ་རུ་བསོད་ནམས་བསགས་པ་ཙམ་ཞིག་ལས་ཡོད་པ་མ་ཡིན། དེ་བཞིན་དུ་སྡིག་པ༴སོགས། མ་འདས་སོ། །དེ་བཞིན་དུ་ལུས་ངག་ཡིད་གསུམ་ལ་གནོད་པའི་སྡིག་པ་བསགས་པའི་ ཕུང་པོ་འདི་འབྲུའི་ཕུང་པོ་བཞིན་དུ་སྤུངས་པ་དང་། རྒྱལ་པོའི་བང་མཛོད་བཞིན་དུ་བསགས་ཡོད་དགོས། ཡོད་ན་མངོན་སུམ་མིག་གིས༴སོགས མ་ཡིན། བྱུང་གནས་འགྲོ་གསུམ་གོང་ལྟར་གཏན་ལ་ཕབ། གནོད་བསྐྱལ་བ་དེ་སྡིག་པ་ཡིན་སྙམ་ན། ཡང་སེམས་ཉིད་སྟོང་པའི་ཕྱི་ནང་མགོ་མཇུག་བར་གསུམ་གང་གི་ཐད་དུ་གནོད་པ་བྱས་པས་ནག་པོར་བཏང་བ་འདི་མངོན་སུམ་མིག་གིས་སོགས། མ་ཡིན། དེའི་ན་རང་གི་བློས་བཏགས་པ་ཙམ་མ་གཏོགས་སྡིག་པ་རང་ངོས་ནས་བདེན་པར་གྲུབ་པ་རྡུལ་ཙམ་ཡང་ཡོད་པ་མ་ཡིན། ཚེ་གཅིག་ཏུ་ལུས་ངག་ཡིད་གསུམ་དགེ་སྦྱོར་ལ་འབད་པའི་སྐྱེས་བུ་ཞིག་དང་། ཚེ་གཅིག་ཏུ་ལུས་ངག་ཡིད་གསུམ་སྡིག་པ་ལ་སྤྱོད་པའི་སྐྱེས་བུ་དེ་གཉིས་ཀའི་ཤེས་རྒྱུད་ལ་ཞིབ་ཏུ་བརྟག་ན་གཉེན་ལ་ཆགས་པ་དང་། དགྲ་ལ་སྡང་བ་དང་། བཟང་པོ་ལ་རེ་བ་དང་། ངན་པ་ལ་དོགས་པའི་ཉེར་ལེན་ཐམས་ཅད་ལ་ཁྱད་པར་རྡུལ་ཙམ་མེད་ན་གྲོལ་ཀྱང་ཤེས་རྒྱུད་གྲོལ་བས་གྲོལ་ལ། འཁྲུལ་ཡང་ཤེས་རྒྱུད འཁྲུལ་པས་འཁྲུལ་ཏེ་འཁོར་བར་འཁྱམས་པ་ཡིན། ཤེས་རྒྱུད་དེ་གཉིས་ཀ་ཁྱད་པར་མེད་ན་ཐམས་ཅད་འཁོར་བ་ལས་མི་འདའ་སྟེ། གནས་སྐབས་ཀྱི་བདེ་བ་ཙམ་དང་། སྡུག་བསྔལ་ཙམ་ ༄༅། །ལས་ཁྱད་པར་མེད་ན་འཁོར་བའི་སྣོན་པ་ཙམ་ལས་མ་འདས་པ་ཡིན། འདི་ལྟར་དགེ་བ་གཏན་ལ༔སོགས ཤེས་པར་བྱའོ། །དགེ་བ་གཏན་ལ་མ་ཕབ་ཀྱང་དགེ་བ བསྒྲུབ་མཁན་སུ་མི་འདུག །སྡིག་པ་གཏན་ལ་མ་ཕབ་ཀྱང་ཀུན་གྱི་ཐུན་མོང་དུ་སྤྱད་འདུག་པས། དགེ་སྡིག་གཏན་ལ་ཕབ་པ་ལ་དགོས་པ་མི་འདུག་སྙམ་ན། དགེ་བ་མི་བསྒྲུབ་པའི་ཕྱིར་དང་། སྡིག་པ་བསྒྲུབ་པའི་ཕྱིར་དུ་ནི་གཏན་ལ་ཕབ་པ་མ་ཡིན་ཏེ། འདི་ལྟར་དགེ་བ་གཏན་ལ་མ་ཕབ་ན་རྣམ་པར་གྲོལ་བའི་ལམ་དང་། གནས་སྐབས་སུ་འཁོར་བར་བསོད་ནམས་བསགས་པའི་དགེ་བ་གཉིས་ནོར་ནས་རྣམ་མཁྱེན་གྱི་འབྲས་བུ་ཐོབ་པ་མ་ཡིན། སྡིག་པ་གཏན་ལ་མ་དབབ་ན་རང་ངོ་རང་གིས་མ་རིག་པ་ཉིད་སྒྲིབ་པ་དང་སྡིག་པ་འཁྲུལ་གཞི་ཡིན་པར་མི་ཤེས་ཏེ་འཁོར་བ་མཐའ་མེད་དུ་འཁྲུལ་པ་ལས་འོས་མེད་པའི་ཕྱིར་ན་དགེ་སྡིག་གཉིས་གཏན་ལ་དབབ་པ་ནི་གནད་ཀྱི་ཡང་གཅེས་དམ་པ་ཡིན། དེའི་ན་དགེ་སྡིག་