Tibetan
གཉིས་གང་བསགས་ཀྱང་འབྲས་བུ་མི་འབྱུང་བ་ཡིན སྙམ་ནའང་མ་ཡིན་ཏེ། འདི་དགེ་བ་ཡིན་སྙམ་པའི་རྣམ་རྟོག་དཀར་པོ་དེ་གཞི་བདེ་གཤེགས་སྙིང་པོའི་ཉག་ཕྲན་ཡིན་པའི་ཕྱིར་ན། ལུས་ངག་ཡིད་གསུམ་དགེ་བ་གང་བསགས་ཀྱང་འབྲས་བུ་ བདེ་འགྲོ་ལྷ་མིའི་གོ་འཕང་ཙམ་ཐོབ་ནུས་པ་ཡིན་ཀྱང་། རྣམ་མཁྱེན་གྱི་ལམ་ལ་ནི་སྤུ་ཙམ་ཡང་ཉེ་བར་མི་འགྱུར་བའི་སྐྱོན་དེས་བཅིང་བར་འགྱུར་བ་དང་། གཞི་བསམ་སྦྱོར་བ་མཐར་ཐུག བཞིའི་སྒོ་ནས་མི་དགེ་བའི་ལས་གང་བསགས་ཀྱང་། སྡིག་པའི་ཡན་ལག་ཁ་ཚང་བའི་དུག་གསུམ་གང་རུང་གི་ཀུན་སློང་ཤུགས་ཆེ་ཆུང་གི་དབང་གིས་འབྲས་བུ་ངན་སོང་གསུམ་དུ་འཕེན་པར་འགྱུར་བ་ཡིན་ཀྱང་།དེ་གཉིས་གང་ཡིན་ཡང་འཁོར་བ་ལས་མི་འདའ་བའི་ཕྱིར་ན་འཁོར་བར་བསོད་ནམས་བསགས་པ་ཙམ་ལས་མེད། ཕྱི་མ་དོན་དུ་གཉེར་ནས་མི་མེད་ཀྱི་ལུང་སྟོང་དུ་ཕྱིན་ཏེ་སྟོང་ཉིད་བསྒོམ་པའི་ཚེ་ན་མྱོང་ཞེན་གང་ཡང་མེད་པས་དེའི་བློ་ཡིད་མི་ཚིམས་ནས། གཞན་དགེ་བ་ཟབ་ཟབ་འདྲ་བའི་ཟག་བཅས་ཀྱི་དགེ་ལ་གཞོལ་བ་དང་། ཡང་སྟོང་ཉིད་བསྒོམ་པའི་ཡོན་ཏན་སོགས་མཐོང་ཚེ་སྟོང་ཉིད་ཀྱི་དོན་ལ་མཉམ་པར་འཇོག་པ་སོགས་བྱས་ཀྱང་། ཁབ་རྩེ་གཉིས་ཀྱིས་ཚེམ་དྲུབས་མི་འོང་བ་དང་། བློ་རྩེ་གཉིས་ཀྱིས་དོན་མི་གྲུབ་ཟེར་བའི་དཔེ བཞིན་དུ། ཆོས་ཉིད་ཀྱི་དོན་ལ་གདིང་ཐོབ་མི་ནུས་པའི་སྐྱོན་དེས་བཅིང་བའི་ཕྱིར་ན་དགེ་སྡིག་གཉིས་གཏན་ལ་འབེབས་དགོས་པའི་རྒྱུ་མཚན་དེ་ཡིན་མ་གཏོགས། ཉོན་མོངས་པ་ཆགས་སྡང་ ༄༅། །རྨོངས་གསུམ་གྱི་ལས་རང་ཁར་སྤྱོད་པ་ལས་ནི་ཟག་བཅས་ཀྱི་དགེ་བ་སྣ་རེ་འགྲུབ་ཀྱང་དེ་ལོས་དགའ། དེ་མིན་ཆོས་ཉིད་ཀྱི་དོན་ནི་དགེ་བ་གང་གིས་འགྲན་ཟླ དང་བྲལ་བ་ཡིན། དེའི་དོན་ལ་མཉམ་པར་འཇོག་ཚེ་བློས་བྱས་ཡིད་དཔྱོད་ཀྱི་དགེ་བ་དང་། མི་དགེ་བའི་ལས་གཉིས་གང་གིས་ཀྱང་བྱར་མེད་ལ། ངོ་བོ་བསྒྲིབ་པའི་ཆ་ལ་བཟང་ངན་ཅུང་ཟད ཀྱང་མེད་དེ། ཀུན་མཁྱེན་ཆེན་པོས རང་བྱུང་རིག་པ་དོན་དམ་ཉི་མ་ལ། །དགེ་སྡིག་དཀར་ནག་གཉིས་ཀྱི་སྤྲིན་གྱིས་བསྒྲིབས། །བླང་དོར་འབད་རྩོལ་བྱེད་པའི་གློག་འཁྱུགས་ནས།། བདེ་སྡུག་འཁྲུལ་སྣང་ཆར་གྱི་རྒྱུན་བབས་པས། །འཁོར་བའི་ས་བོན་འགྲོ་དྲུག་ལོ་ཐོག་རྒྱས། །ཀྱེ་མ་ཉམ་ཐག་འགྲོ་ཀུན་སྙིང་རེ་རྗེ། །མཐར་ཐུག་ངེས་པ་དོན་གྱི་སྙིང་པོ་ལ། །གསེར་སྒྲོག ཐག་སྒྲོག་འཆིང་བ་མཉམ་པ་ལྟར། །ཆོས་དང་ཆོས་མིན་སེམས་ཀྱིས་འཆིང་བ་མཉམ། །དཀར་ནག་སྤྲིན་ཚོགས་གང་ཡང་མེད་པ་ན། །ཆོས་དབྱིངས་མཁའ་ལ་དོན་དམ་ཉི་མ་ཤར། ཞེས་གསུངས་པ་བཞིན་ཡིན་ནོ །ཡང་ཕན་སྐྱོབ་ཀྱི་ལྷ་༴སོགས ཚུལ་དང་། ཕན་བྱེད་ཀྱི་ལྷ་གཏན་ལ་ཕབ་པར་བྱེད་པ་ལ། དང་པོ་བྱུང་ས། བར་དུ་གནས་ས། ཐ་མ་འགྲོ་ས་གསུམ་ལ་ བརྟགས་པས་ཡུལ་མེད་པ་ཡིན། དབང་པོའི་ཡུལ་དུ་ལྷ་ཞེས་སྣང་བ་ཡིན་ན་ལྷའི་གཟུགས་སྒྲ་དྲི་རོ་རེག་བྱ་འདི་ཡིན་ཟེར་རྒྱུ་ཞིག་ཡོད་དགོས་ཀྱང་དེ་ནི་བདེན་གྲུབ་ཅན་དུ་མེད། འབྱུང་བ་སྣོད་བཅུད་ཀྱི་ཁམས་ནས་བྱུང་བ་ཡིན་བསམ་ན འབྱུང་བ་ས་ལྟ་བུ་ལ་མཚོན་ན་ས་དེ་རྡུལ་དུ་ཕབ རྡུལ་རྡུལ་ཕྲན་དང་ཆ་མེད་དུ་བཏང་ན་ཡང་ས་ཟེར་བ་ལས། ལྷ་ཟེར་བ་དེའི་ཁོང་ནས་བྱུང་ཚུལ་གཏན་ནས་ཡོད་པ་མ་ཡིན། དེ་བཞིན་དུ་འབྱུང་བ་རང་རང་གི་མིང་སོ་སོར་བཏགས་པ་ལས་ལྷ་ཟེར་བ་མ་ཡིན། ཐ་དད་པ་ཞིག་ཡིན་སྙམ་ན། ལྷ་དངོས་མེད་ཞིག་ཡིན་ན་བདག་དངོས་ཅན་ལ་ཕན་བཏགས་ཚུལ་མེད། ལྷ་དངོས་ཅན་ཞིག་ཡིན་ན་ལྷ་དེས་ཁྱོད་ལ་ཁ་འཛིན་དང་སྡོང་གྲོགས་བྱེད་དུས་མི་རིག་པའི་ཐབས་མེད། དེ་དུས་རིག་ན་ལྷ་དེའི་གཟུགས་དབྱིབས་ཁ་དོག སོགས་མངོན་སུམ་མིག་གིས་མཐོང་རྒྱུ དོན་དམ་ལག་པས་འཛིན་རྒྱུ དབང་པོའི་སྒོ་རུ་མངོན་རྒྱུ་ཞིག་ཡོད་དགོས་ཀྱང་དེ་ནི་ཡོད་པ་ཡིན། གཞི་བདག་དྲེགས་རྩལ་ཅན་ཞིག་ཡིན། རི་བོ་འདི་ལ་གནས་ཡོད། ཕན་བཏགས་ནི་ཞིག་ཡིན་བསམ་ན་ཕན་ཇི་ལྟར་བཏགས། རི་དེ་ལྷ་ཡིན་ན་སྲུང་སྐྱོབ་བྱེད་དུས་རི་བོ་དེ་ཐོན་ཡོང་ནས་ཁྱོད་ལ་སྲུང་སྐྱོབ་བྱེད་དགོས། དེ་མིན་ན་ཕན ༄༅། །བཏགས་ལུགས་མེད། རིའི་ཁུང་ན་ཡོད་པ་ཡིན་ན་ལམ་ཞིག་ལོས་ཡོད། མིན་ན་ས་བརྐོས་ནས་སོང་ན་དེར་ལོས་ཐོན། རི་དེའི་འོག་ཏུ་ཡོད་ན་ས་བརྐོས་ནས བལྟས་ན་ལོས་རིག་དང་དེ་ནི་ཡོད་པ་མ་ཡིན།དེ་ཕ་ཁུ་ཆེ་རྒན་གྱི་རིང་ནས་མཆོད་གསོལ་བསང་དང་རླུང་རྟ་བྱས་ན་ཁ་འཛིན་སྡོང་གྲོགས་བྱེད་པ་ཡིན། མ་མཆོད་ན་ན་ཚ་དང་མི་འདོད་པ འོང་བ་ཡིན་བསམ་ན། ལྷ་གཟུགས་མེད་ཀྱིས་གཟུགས་ཅན་ལ་ཕན་བཏགས་ལུགས་མེད ལྷ་གཟུགས་ཅན་ཞིག་ཡིན་ནབཟང་ཤིང་དང་དར་ཟབ་མཆོད་རྫས་སོགས་ཀྱིས་བསང་མཆོད་བྱས་ཚེ་ལོངས་སྤྱོད་ནི་ཞིག་ཡོད་དགོས་ཀྱང་དེ་ནི་ཡོད་པ་མ་ཡིན། བསང་གི་དུད་པ་བར་སྣང་ལ་ཡལ་བསང་རྫས་བསྲེགས་པ་རྣམས་ཐལ་བར་ལོག་ནས་ཤུལ་དུ་ཡོད་པ་རླུང་གིས་ཁྱེར་བ་མ་གཏོགས། སུས་ཀྱང་མ་ཁྱེར་བར་ལུས་འདུག །དེ་བཞིན་དུ་རླུང་རྟ་ཡིན་ཟེར་བ་དར་རས་ཁ་དོག་སྣ་ཚོགས་བཙུག་པ་ཐམས་ཅད་ཀྱང་ལོ་ཆ་རེའི་འཕྲོ་རུ་ཡང་ལ་ལ་ཆུས་རུལ། ལ་ལ་འཐོར་ནས་ཆུ་ཆར་གྱིས་ཟོས་ནས་ཡལ་འགྲོ་བ་མ་གཏོགས་ལྷ་ཞེས་དངོས་སུ་སྤྱོད་མཁན་མེད་པ་མཐོང་ཆོས་སུ་ཡོད། ཡང་ན་གཤེད་ན་རྫ་བྲག་ཤིན་ཏུ་འཇིགས་སུ་རུང་བ་ཞིག་ཡོད་པ་དེར་བདག་ སོང་ནས་ས་རྐོ་རྡོ་གློག་བྱས་པའི་རྐྱེན་གྱིས་སེར་བ་དང་ཐོག་འབྲུག་གློག་གསུམ་བསམ་གྱིས་མི་ཁྱབ་པ་བྱས་ནས་ཅིག་མིན་ན་བདག་བསད་བཏང་བསམ་ན། དཔེར་ན་ཁྱོད་མདང་རྨི་ལམ་གྱི སྐབས་སུ་གཞི་བདག་དྲེགས་རྩལ་ཤིན་ཏུ་འཇིགས་སུ་རུང་བ། རི་རྩེ་གངས་ཀྱིས་བཟུང་། རི་སྐེད་རྫ་རིས་བཟུང་། རི་རྩ་ནགས་ཀྱིས་བཟུང་ཡོད་པ་ཞིག་ལ་ཐོན་ནས་ལུང་གཉན་ཀྭིས་བཏབ ཤིང་གཉན་སྟ་རིས་བཅད།རྩྭ་གཉན་ཟོར་བས་བྲེག །ས་གཉན་འཇོར་གྱིས་རྐོས།ཆུ་གཉན་གཟའ་རིས་བཅུས་པ་སོགས་བྱས་ཚེ། དེ་ལ་རྐྱེན་བྱས་ནས་དེ་མ་ཐག་ཏུ་རྫ་སྐེད་ནས་སྨུག་པ་གཡག་རྔ་ཙམ་ཞིག་ཆད་དེ་གནམ་ལ་སོང་བས་སྐད་ཅིག་ཏུ་ཐོག་འབྲུག་གློག་གསུམ་བསམ་གྱིས་མི་ཁྱབ་པ་བྱུང་ནས་མི་བཟོད་པར་སྣང་ཡང་།དེ་རིང་ཉིན་མོའི་སྐབས་སུ་སེར་འབྲུ་རྡོག་མ་གཅིག་ཀྱང་འོང་མ་མྱོང་། འདི་དང་འདྲ་མཚུངས་པ་ཞིག་ཡིན་པས་ཕན་བྱེད་ཀྱི་ལྷ་ཡང་ཁྱོད་ཀྱི་སྣང་ཉམས་ཙམ་མ་གཏོགས། དོན་ལ་གཞི་རྩ་དང་བྲལ་བ་ཡེ་ནས་བདེན་གྲུབ་ཅན་དུ་རྡུལ་ཙམ་ཡང་གྲུབ་མ་མྱོང་། དེའི་ན་ལྷ་ཞེས་བསྒྲུབ་རྒྱུ་མེད་པ་ཞིག་ཡིན་སྙམ་ན་དེ་ནི་མ་ཡིན་ཏེ། རང་གི་རྟོགས་པའི་རྩལ་ལས་མེད་པ་ལ་ཡོད་པར་བསྒྲུབ་པ་ནི་མེད་པའི་དབྱིངས་ནས་དབང་པོའི་སྒོ་རུ་ ༄༅། །མངོན་སུམ་དུ་སྣང་བའི་ལྷ་བསྒྲུབ་པའི་རྒྱུ་རང་ལ་ཡོད་པས་དོན་གྱི་འགྲུབ་པ་ཡིན། རང་ལ་ཡོད་པར་མི་ཤེས་པར་གཞན་ཕ་རོལ་ཞིག་ན་ལྷ་རང་རྒྱུད་པ་ཞིག་ཏུ་བཟུང་ནས་བསྒྲུབ་པ་ནི། དཔེར་ན་གཡག་རྭའི་ནང་དུ་ཕུ་བཏབ་པ་དང་། ལུང་སྟོང་དུ་ཀྭི་བཏབ་པ་ཁྱད་པར་སྤུ་རྩེ་ཙམ་ཡང་མེད། དེའི་ཕྱིར་ན་ལྷ་གང་བསྒྲུབ་ཀྱང་རང་གི་ཤེས་པ་གོ་མ་འགགས་པ་གཅིག་པུ་དེས་བསྒྲུབ་ན་སེམས་རྟོག་ཁོ་ནས་འགྲུབ་པ་ཡིན་གསུངས། གནོད་བྱེད་ཀྱི་འདྲེ་ཡང་༴སོགས སྟོན་ཏོ། །དེ་བཞིན་དུ་གནོད་བྱེད་ཀྱི་འདྲེ་ཞེས་བྱ་བ་དེ་ཡང་དང་པོ་བྱུང་ས་བར་དུ་གནས་ས་ཐ་མ་འགྲོ་ས་གསུམ་ལ་བརྟགས་པས་ཡུལ་མེད་པ་ཞིག་ཡིན། དབང་པོའི་ཡུལ་དུ་འདྲེ་ཞེས་སྣང་བ་ཡིན་ན། འདྲེའི་གཟུགས་སྒྲ་དྲི་རོ་རེག་བྱ་འདི་ཡིན་ཟེར་རྒྱུ་ཞིག་ཡོད དགོས་ཀྱང་། དེ་ནི་བདེན་གྲུབ་ཅན་དུ་མ་གྲུབ་པ་ཞིག་ཡིན། འབྱུང་བ་སྣོད་བཅུད་ཀྱི་ཁམས་ནས་བྱུང་བ་ཡིན་བསམ་ན། འབྱུང་བ་ས་ལྟ་བུ་ལ་མཚོན་ན་ས་དེ་རྡུལ་དུ་ཕབ རྡུལ་རྡུལ་ཕྲན་དང་། རྡུལ་ཕྲན་ཆ་མེད་དུ་བཏང་ན་ཡང་ས་ཟེར་བ་ལས འདྲེ་ཞེས་འདིའི་ཁུང་ནས་འབྱུང་ཚུལ་གཏན་ནས་ཡོད་པ་མ་ཡིན། དེ་བཞིན་དུ་འབྱུང་བ་རང་རང་གི་མིང་བརྗོད་པ་མ་གཏོགས་འདྲེ་ ཞེས་བརྗོད་པ་མེད། མི་ཞིག་ལ་གནས་བསམ་ན་མི་དེའི་མགོའི་སྐྲ་རྩེ་མན་ཆོད་རྐང་གི་སེན་རྩེ་ཡན་ཆོད་ཀྱི་བར་ལ་བརྟགས་ཤིང་དཔྱད་ན་གནས་པའི་ཡུལ་གཏན་ནས་མི་རྙེད། རྣམ་ཤེས་འདྲེ་ཡིན་བསམ་ན་མི་གཅིག་ལ་རྣམ་ཤེས་གཉིས་ཡོད་ཚུལ་མེད། ང་ལ་ནད་གཞི་ཡོད་པ་འདི་འདྲེ་ཡིན་བསམ་ན་འདྲེ་དེས་ནད་སྤར་ཆིང་བྱས་ནས་ཁྱོད་ཀྱི་ཁོག་པའི་ནང་དུ་བླུགས་པ་ཡིན་ནམ ཡང་ན་མདའ་མདུང་ལ་སོགས་བརྒྱབ་པ་ཡིན་ན་ཁྱོད་ཀྱི་ལན་བྱས་ན་ལོས་ཆོག་དང་དེ་ནི་ཡོད་པ་མིན། མདང་རྨི་ལམ་ན་བན་རྒན་གསེར་ཞྭ་ཅན་ཞིག་རྨིས་པ་དེ་རྒྱལ་པོ་ཡིན་བསམ་ན། དེ་རིང་ཉིན་མོའི་སྐབས་ཀྱི་བླ་རྒན་གསེར་ཞྭ་ཅན་ཐམས་ཅད་རྒྱལ་པོ་ཡིན་དགོས་ཀྱང་དེ་མ་ཡིན། རྨི་ལམ་ན་རྒན་མོ་ཞིག་རྨིས་པས་དེ་འདྲེ་མོ་ཡིན་བསམ་ན། དེ་རིང་ཉིན་མོའི་སྐབས་ཀྱི་རྒན མོ་ཡོད་ཚད་པོ་འདྲེ་མོ་ཡིན་དགོས་ཀྱང་དེ་ནི་མ་ཡིན། རྨི་ལམ་ན་བྱིས་པ་གོས་ངན་ཅན་ཞིག་རྨིས་པས་དེ་བསེ་རག་ཡིན་བསམ་ན། དེ་རིང་ཉིན་མོའི་སྐབས་ཀྱི་བྱིས་པ་ཐམས་ཅད་པོ་བསེ་རག་ཡིན་དགོས་ཀྱང་དེ་ནི་མ་ཡིན། དེའི་ན་ནད་ཞིག་བྱུང་ཚད་པོ་འདྲེ་ཡིན་བསམ་ན། ཤ་ཟ་དུས་ལག་པ་གྲིས་བཅད་པ་དེ་ཡང་འདྲེ་ཡིན་དགོས། དེ་བཞིན་དུ་ཟས་ཀྱིས་བརྒྱག་ཆེས་ན་དེ་ ༄༅། །ཡང་འདྲེ་ཡིན་དགོས། ཉི་མའི་ནང་ལ་བསྡད་ན་དང་པོ་ཕན་སྣང་སྐྱེས་ཀྱང་རྗེས་སུ་ཚ་བས་མ་བཟོད་ན་དེ་ཡང་འདྲེ་ཡིན་དགོས་ཀྱང་དེ་ནི་མ་ཡིན། དེ་བཞིན་དུ་བདེ་བ་དང་སྡུག་བསྔལ་ཐམས་ཅད་སེམས་ཀྱི་སྣང་ཉམས་རྨི་ལམ་ལྟ་བུ་ལས་ལྷས་ཕན་བཏགས་པ་དང་། འདྲེས་གནོད་བྱས་པ་གཉིས་གདགས་གཞིའི་སྟེང་ནས་ཅི་ཡང་མ་གྲུབ་ཅིང་། ཡུལ་མེད་དུ་སྟོང་པ་ལས་མེད་པར་མཐོང་བ་ཡིན། དེ་བཞིན་དུ་མི་རྣམས་འཁྲུལ་པའི་དབང་གིས་ལུས་ཀྱི་སྟོད་སྨད་གཉིས་ལ་ཡང་བཟང་ངན་དུ་འཛིན་ཅིང་ཞྭ་གཙང་མར་འཛིན་ཅིང་ཁྱིམ་སྟོད་ལ་བཞག །ལྷམ་ངན་པར་བཟུང་ནས་ཁྱིམ་སྨད་དུ་བཞག །ཁྱིམ་སྟོད་ལྷ་རུ་བཟུང་ནས་བཟང་པོ་དང་།ཁྱིམ་སྨད་འདྲེ་རུ་བཟུང་ནས་ངན་པ་རུ་འཛིན་ཞིང་དཔེར་ན་གཞན་གྱི་རྫས་ལྟ་བུ་ལ་མཚོན་ན། སྐྱེ་བོ་ནག་པོ་ཞིག་འོང་ན་ཁྱིམ་ཚང་ཁོང་རྩོག་ཞིག་ཡིན། དེ་ཡང་ཁྱིམ་སྟོད་ལ་མ་བཞག་གདོན་ནོ་སྨད་ན་ཞོག་ཟེར་བ་ཡིན།ཁྱིམ་སྟོད་ལྷ་རུ་བཟུང་བའི་ལྷ་དེ་སྣོད་ཁུག་ཐམས་ཅད དུ་བཙལ་ཀྱང་ལྷ་ཚང་མི་རྙེད ཁྱིམ་སྨད་འདྲེ་རུ་བཟུང་བའི་འདྲེ་དེ་བཙལ་ཀྱང་འདྲེ་ཚང་མི་རྙེད། དེའི་ཕྱིར་ན་ལྷ་འདྲེ་ཞེས་པ་ཡེ་ནས་གྲུབ་མ་མྱོང་ཀྱང་། མེད་ལ་ཡོད་པར་སྣང་བ་རང་གི འཁྲུལ་པའི་སྣང་བ་ཙམ་མ་གཏོགས། བདེན་གྲུབ་ཅན་དུ་རྡུལ་ཙམ་ཡང་མེད། དེའི་ན་བཟང་པོ་ལྷ་རུ་འཛིན་པའི་རེ་བ། ངན་པ་འདྲེ་རུ་འཛིན་པའི་དོགས་པ་རྒྱུན་མི་ཆད་པར་འབྱུང་ཡང་། རང་གི་བདག་འཛིན་གྱི་འཆིང་བ་དམ་པོའི་སྟོབས་ཀྱིས་བདེ་སྡུག་གི་ཉམས་རྒྱུན་མི་ཆད་པར་འབྱུང་བ་ཐམས་ཅད་འཁོར་བའི་གཤིས་ཉམས་ཁོ་ན་ལས་གཞན་དུ་གྲུབ་པ་རྡུལ་ཙམ་ཡང་ཡོད་པ་མ་ཡིན། དེའི་ན་རྨི་ལམ་ཁོ་ནས་ཀྱང་སྟོན་ཏོ། །འདིའི་གནད་དོན༴སོགས ངེས་པའོ། །འདིའི་གནད་དོན་དང་ཡིན་ལུགས་ཤེས་པ་ནི་སྒོམ་པ་ཐམས་ཅད་ཀྱི་གེགས་སེལ་ཡིན་ཏེ། གང་གི་གེགས་སེལ་དགོས་ན་སྒོམ་པ་ལ་ཡིད་མི་ཆེས་པ་དང་བློ་མི་གཏོད་པའི་གེགས་སེལ་བ་ཡིན། དེའི་ན་ཆོས་ཉིད་ཀྱི་དོན་ལ་ཡིད་ཆེས་ཤིང་ཐེ་མི་ཚོམ་པའི་སྒོམ་པ་ཉམས་སུ་ལེན་པ་དང་། སྒོམ་པ་ཉམས་སུ་ལེན་པའི་མཐུས་གདིང་ཐོབ་པར་འགྱུར་བ་དང་། གདིང་ཐོབ་པའི་སྟོབས་ཀྱིས་མ་རིག་པའི་སྒྲིབ་པ་དང་བྲལ་ནས་རིག་པའི་ཡོ་ལང་ཆེན་པོར་དབང་བསྒྱུར་བའི་གདིང་ཐོབ་ནས་གྲོལ་བ་ཐོབ་པར་འགྱུར་རོ། །དེའི་ན་ཞི་བྱེད་བདུད་གཅོད་ཟབ་མོའི་རྩབ་ཡིན་ཏེ། རང་རིག་ལས་གཞན་ན་ལྷ་རང་རྒྱུད་པ་མེད་པ་དང་། རྣམ་རྟོག་ལས་གཞན་ན་འདྲེ་རང་རྒྱུད་པ་མེད ༄༅། །པར་ཐག་ཆོད་ན་བདུད་བཞི་དབྱིངས་སུ་གཅོད་པར་འགྱུར་བ་ཡིན། སྒྲུབ་པ་གཏོ་ཡས་པ་དག་ལ་ཡང་འདི་མེད་ཐབས་མེད་པ་ཡིན་ཏེ། ཆོས་ཐམས་ཅད་སྒྱུ་མ ཙམ་དུ་རྟོགས་པར་གྱུར་ན་སྒྱུ་མ་ལྟ་བུའི་བསྒྲལ་འདྲེན་གྱིས་སྒྱུ་མ་ལྟ་བུའི་འགྲོ་བ་རྣམས་གནས་ངན་ལས་བསྒྲལ་ནས་འདྲེན་པར་ནུས་པའི་སྒྱུ་མའི་རྣལ་འབྱོར་དུ་འགྱུར་བ་ཡིན། མིའི་གདན་ཐོག ནས་རང་གི་ཚོགས་རྫོགས་ཟེར་བའི་དཔེ་བཞིན་དུ། རང་གཞན་གྱི་དོན་གཉིས་རྒྱ་ཆེན་པོ་འགྲུབ་པ་ཡིན། དེ་ལྟར་མ་ཡིན་པར་ཉོན་མོངས་རང་ཁར་སྤྱོད་ནས་ཟན་སྒོང་ལ་ཕུར་པ་འདེབས་པའི་སྡང་ཞེན་ཙམ་གྱིས་ནི་འདྲེ་གདོན་འདུལ་བ་ལྟ་ཞོག །གཞི་བསམ་སྦྱོར་བ་མཐར་ཐུག་གསུམ་གྱིས་སྡིག་པའི་ལས་རྫོགས་མ་རག་པར་གྱུར་ནས་ངན་སོང་གི་འབྲས་བུ་བསྐྱེད་པར་འགྱུར་བ་ཡིན་གསུངས་སོ། །ཀྱེེ་ཞེས་བོས་ནས་སེམས་མེད་རིག་པའི་ཁྱེའུ་ཆུང་ཁྱོད་ཀྱིས་གདུལ་བྱ་རྣམས་ལ་སྟོན་དང་གསང་ཆེན་ཐེག་པ་ཆེན་པོའི་རྣལ་འབྱོར་པ་ཤ་སྟག་འབྱུང་སྲིད་དོ། །ཅེས་གསུངས་ཤིང་མི་གནང་བར་གྱུར་ཏོ། །བཞི་པ་རེ་དོགས་ཀྱི་རྫུན་ཕུག་གཏིབ་པ་ནི ཡང་འོད་གསལ་དག་པའི༴སོགས། བདག་ཏུ་ལྟ་བ་ལས་མ་འདས། ཡང་འོད་གསལ་དག་པ་ཆོས་ཉིད་ཀྱི་སྣང་ངོར རིག་སྐུ་དཔལ་ཆེན་ཕྱག་ན་རྡོ་རྗེ་དང་དངོས་སུ་ཞལ་མཇལ་བའི་ཚེ་ན་བདག་གིས་འདི་སྐད་ཞུས། ཀྱེེ་ཞེས་བོས་ཏེ་རྒྱལ་བ་རྡོ་རྗེ་འཆང་ཆེན་པོ་ལགས། སངས་རྒྱས་ཞེས་བྱ་བ་རང་གཞི་ཀུན་ཏུ བཟང་པོ་རང་ཐོག་ཏུ་རང་སངས་རྒྱས་པ་ཡིན་ནམ། ཡང་ན་གཞན་ཞིག་གི་ཡུལ་ནས་ཡུལ་དུ་ཁ་བརྒྱུད་ནས་འགྲོ་རྒྱུ་ཡིན་ནམ་དེ་གཉིས་གང་གི་ཕྱོགས་སུ་ངེས་པ་ཡིན་ཞུས་ཚེ། དེ་ཉིད་ཀྱི་ཞལ་ནས།ཀྱེེ་ཧོ་སྐལ་ལྡན་རིགས་ཀྱི་བུ།ཡུལ་ཡངས་པ་ཆེན་པོ་ཞིག་ཏུ་མི་རྗེ་རྒྱལ་པོ་གཟུགས་བཟང་ཞིང་ཡིད་དུ་འོང་བ་མཐོང་ན་མི་མཐུན་པ་མེད་པ།རྣམ་རྟོག་ཞི་བས་ཞི་བ། ཉོན་མོངས་པའི་ཚ་གདུང་ཐམས་ཅད་དང་བྲལ་བས་བསིལ་བ་དྭངས་པ་རྙོག་པ་དང་བྲལ་བ། བཞིན་ལེགས་མཛེས་སྡུག་བལྟ་བས་ཆོག་མི་ཤེས་པ་ཞིག་ཡོད་པར་སེམས་ན་སངས་རྒྱས་དེའི་ཕ་མ་སུ་ཡིན། ཕ་མ་ལས་སྐྱེས་པ་ཞིག་ཡིན་ན་སྐྱེ་བའི་མཐའ་ཅན་ཡིན འདི་ན་གནས་ནས་བཞུགས་ཡོད་བསམ་ན་རྟག་པའི་མཐའ་ཅན་ཡིན རྟག་པའི་ཐ་མ་ཡང་དགག་པ་དང་བཅས་པ་ཞིག་ཡིན། དེ་ལྟར་སྐྱེ་འགག་གནས་གསུམ་དང་བཅས་པའི་སྐྱོན་དེ་གསུམ་གྱིས་བཅིང་ནས་བཟུང་སྟེ་སེམས་ཅན་དུ་ངེས་པར་གདོན་མི་ཟ་བ་ཡིན། དེ་བཞིན་དུ་ཞིང་ཁམས་ཞེས་ཡུལ་ཡངས་པ་ཆེན་པོ ༄༅། །སྣོད་ཀྱི་འཇིག་རྟེན་རྒྱ་ཆེ་བ། བཅུད་ཀྱི་སེམས་ཅན་གྲངས་མང་བ་ལ་མཚན་གཞི་བྱས་ན དེའི་ཡུལ་ཆོས་ཀྱི་བདག་འཛིན་ཞེས་བརྗོད། ལུས་ཅན་གྱི་སངས རྒྱས་ཀྱི་ལུས་དེ་གང་ཟག་གི་བདག་ཡིན་ཏེ། བདག་འཛིན་གཉིས་ཀ་ལས་མ་འདས་ན་སེམས་ཅན་དུ་གདོན་མི་ཟ་བར་འགྱུར་བ་ཡིན། སངས་རྒྱས་ལ་མིག་ཡོད་པར༴སོགས། ཞེས་བྱའོ།། དེ་ལྟ་བུའི་སངས་རྒྱས་རང་མཚན་པ་དེ་ལ་མིག་ཡོད་པར་བསམ་ན། མིག་གི་རྣམ་པར་ཤེས་པ་ཡང་ཡོད་དགོས། མིག་མིག་གི་མིག་གི་དབང་པོ་མཆན། རྣམ་པར་ཤེས་པ་དང་བཅས་པ་གྲུབ པ་ཞིག་ཡོད་ན། དེའི་གཟུགས་སུ་སྣང་བ་མི་མཆེད་པའི་ཐབས་ཡོད་པ་མ་ཡིན། གཟུགས་སུ་སྣང་བ་མཆེད་ནས་བཟུང་སྟེ། དེ་མིག་གི་གཟུང་བ་ཡུལ་ཡིན། ཡུལ་དེ་གྲུབ་ཕན་ཆད གཟུགས་དེ་ཉེ་བར་ལེན་པའི་སེམས་རྟོག་ཕྲ་མོ་ཞིག་མི་འབྱུང་བའི་ཐབས་མེད། དེ་ནི་མིག་གི་འཛིན་པ་སེམས་ཡིན། སེམས་གང་ལ་ཡོད་པ་དེ་ལ་སེམས་ཅན་ཞེས་བརྗོད། དེ་ལྟ་བུའི་སངས་རྒྱས་རང་མཚན་པ་དེ་ལ་རྣ་བ་ཡོད་པར་བསམ་ན། རྣ་བའི་རྣམ་པར་ཤེས་པ་ཡང་ཡོད་དགོས། རྣ་རྣ་བའི་རྣམ་པར་ཤེས་པ་དང་བཅས་པ་གྲུབ་པ་ཞིག་ཡོད་ན། སྒྲ་རུ་སྣང་བ་མི་མཆེད་པའི་ ཐབས་མེད། སྒྲ་རུ་སྣང་བ་མཆེད་ནས་བཟུང་སྟེ། དེ་རྣ་བའི་གཟུང་བ་ཡུལ་ཡིན། ཡུལ་དེ་གྲུབ་ཕན་ཆད་སྒྲ་དེ་ཉེ་བར་ལེན་པའི་སེམས་རྟོག་ཕྲ་མོ་ཞིག་མི་འབྱུང་བའི་ཐབས་མེད། དེ་ནི་རྣ་བའི་འཛིན་པ་སེམས་ཡིན སེམས་གང་ལ་ཡོད་པ་དེ་ལ་སེམས་ཅན་ཞེས་བརྗོད། དེ་ལྟ་བུའི་སངས་རྒྱས་རང་མཚན་པ་དེ་ལ་སྣ་ཡོད་པར་བསམ་ན། སྣའི་རྣམ་པར་ཤེས་པ་ཡང་ཡོད་དགོས། སྣ་སྣ་ཡི་རྣམ་པར་ཤེས་པ་དང་བཅས་པ་གྲུབ་པ་ཞིག་ཡོད་ན། དྲི་རུ་སྣང་བ་མི་མཆེད་པའི་ཐབས་མེད དྲི་རུ་སྣང་བ་མཆེད་ནས་བཟུང་སྟེ། དེ་སྣའི་གཟུང་བ་ཡུལ་ཡིན། ཡུལ་དེ་གྲུབ་ཕན་ཆད་དྲི་དེ་ཉེ་བར་ལེན་པའི་སེམས་རྟོག་ཕྲ་མོ་ཞིག་མི་འབྱུང་བའི་ཐབས་མེད། དེ་ནི་སྣའི་འཛིན་པ་སེམས་ཡིན། སེམས་གང་ལ་ཡོད་པ་དེ་ལ་སེམས་ཅན་ཞེས་བརྗོད། དེ་ལྟ་བུའི་སངས་རྒྱས་རང་མཚན་པ་དེ་ལ་ལྕེ་ཡོད་པར་བསམ་ན ལྕེའི་རྣམ་པར་ཤེས་པ་ཡང་ཡོད་དགོས ལྕེ་ལྕེ་ཡི་རྣམ་པར་ཤེས་པ་དང་བཅས་པ་གྲུབ་པ་ཞིག་ཡོད་ན རོ་རུ་སྣང་བ་མི་མཆེད་པའི་ཐབས་མེད། རོ་རུ་སྣང་བ་མཆེད་ནས་བཟུང་སྟེ། དེ་ལྕེའི་གཟུང་བ་ཡུལ་ཡིན། ཡུལ་དེ་གྲུབ་ཕན་ཆད་རོ་རུ་ཉེ་བར་ལེན་པའི་སེམས་རྟོག་ཕྲ་མོ་ཞིག་མི་འབྱུང་བའི་ཐབས་མེད། ༄༅། །དེ་ནི་ལྕེའི་འཛིན་པ་སེམས་ཡིན། སེམས་གང་ལ་ཡོད་པ་དེ་ལ་སེམས་ཅན་ཞེས་བརྗོད། དེ་ལྟ་བུའི་སངས་རྒྱས་རང་མཚན་པ་དེ་ལ་ལུས་ཡོད་པར་བསམ་ན ལུས་ཀྱི་རྣམ་པར་ཤེས་པ་ཡང་ཡོད་དགོས། ལུས་ལུས་ཀྱི་རྣམ་པར་ཤེས་པ་དང་བཅས་པ་གྲུབ་པ་ཞིག་ཡོད་ན རེག་བྱའི་སྣང་བ་མི་མཆེད་པའི་ཐབས་མེད། རེག་བྱའི་སྣང་བ་མཆེད་ནས བཟུང་སྟེ། དེ་ལུས་ཀྱི་གཟུང་བ་ཡུལ་ཡིན། ཡུལ་དེ་གྲུབ་ཕན་ཆད་རེག་བྱ་ཉེ་བར་ལེན་པའི་སེམས་རྟོག་ཕྲ་མོ་ཞིག་མི་འབྱུང་བའི་ཐབས་མེད། དེ་ནི་ལུས་ཀྱི་འཛིན་པ་སེམས་ཡིན། སེམས་གང་ལ་ཡོད་པ་དེ་ལ་སེམས་ཅན་ཞེས་བརྗོད། སངས་རྒྱས་ཞེས་གཟུང་འཛིན༴སོགས།སེམས་ཅན་ནོ།།དེའི་ན་སངས་རྒྱས་ནི་གཟུང་འཛིན་ལས་འདས་པའི་བདག་ཉིད་ཅན་ཞིག་དགོས་མ་གཏོགས། གཞན་སངས་རྒྱས་རང་རྒྱུད་པ་ཞིག་ཡོད་པར་སྲིད་ན་དེའི་ཡོན་ཏན་སེམས་ཅན་ལ་འཇུག་པ་ཡང་མི་དང་མི་ལྟ་བུའོ། །སངས་རྒྱས་དེའི་ཡོན་ཏན་སེམས་ཅན་གྱི་རྒྱུད་ལ་འཇུག ཚུལ་མེད། སངས་རྒྱས་དེ་གཞན་ལ་ཆོས་སྟོན་པ་པོ་ཞིག་ཡིན་པས་སངས་རྒྱས་བཏགས་པ་ཡིན་བསམ་ན། སྟོན་པ་པོ་བདག་དང་སྟོན་བྱའི་ཆོས་དང་སྟོན་ཡུལ་སེམས་ཅན་དུ་སྣང་སེམས་ འཛིན་པ་ཡོད་ན། དེའི་སངས་རྒྱས་དེ་ནི་སེམས་ཅན་ལས་འཕགས་པའི་ཁྱད་ཆོས་ཏིལ་འབྲུ་ཙམ་ཡང་མེད་པས་ཐམས་ཅད་སེམས་ཅན་ཡིན་ནོ། །སངས་རྒྱས་དེ་ཡུལ་ས་བདེ་བ་གཟུགས མཛེས་པ། མཛའ་གྲོགས་ལེགས་པ ལོངས་སྤྱོད་དང་བདེ་སྐྱིད་ཆེ་བ།ཁྲོ་བ་དང་ཆགས་པ་མེད་པ་ཞིག་ཡིན་ཏེ།དེ་སངས་རྒྱས་ཀྱི་