Tibetan
ཡིན་ཏེ ནམ་མཁའ་འདི་ལ་འགྲོ་བ་ལྷ་དང་བཅས་པ་བདུད་དང་བཅས་པའི་མཚོན་ཆ་འབུམ་ཕྲག་རི་བ་དུ་མས་བཏབ་ཀྱང་རྨ་མི་འབྱུང་བས་ན་མི་ཆོད་པ། ནམ་མཁའ་འདི་ལ་རང་ངོས་ནས་མི་འགྱུར་བ་དང་ཕ་རོལ་བའི་རྐྱེན་གྱིས་བཤིག་མི་ཐུབ་པས་ན་མི་ ༄༅། །ཤིགས་པ ནམ་མཁའ་འདི་འཁོར་འདས་ཐམས་ཅད་ཀྱི་མཆེད་གཞིར་གནས་ཀྱང་ནམ་མཁའ་རང་གི་ངོ་བོར་འགྱུར་བ་མེད་པས་ན་བདེན་པ། ནམ་མཁའ་འདི ལ་སེམས་ཅན་ངན་པའི་སྐྱོན་དང་། སངས་རྒྱས་བཟང་པོའི་ཡོན་ཏན་དང་། ཁ་དོག་བཟང་ངན་གྱི་བསླད་མི་འཇུག་པས་ན་སྲ་བ། ནམ་མཁའ་འདི་ལ་དུས་ཀྱིས་མི་འཕོ་བ་དང་། གནས་ཀྱིས་མི་འཕོ་བ་སྟེ་འགྱུར་བ་མེད་པས་ན་བརྟན་པ། ནམ་མཁའ་འདི་རྡུལ་ཕྲ་རབ་ཡན་ཆད་ཀྱི་ཁོངས་སུ་མ་ཞུགས་པ་མེད་པས་ན་ཐམས་ཅད་ནམ་མཁའི་རོལ་པར་འབིག་པས་ཐོགས་པ་མེད་པ། ནམ་མཁའ་འདི་ལ་གཞན་གང་གི་གནོད་པས་མི་ཚུགས་པས་ན་ཐམས་ཅད་ལས་མ་ཕམ་པ་སྟེ་རྡོ་རྗེའི་ཆོས་བདུན་དང་ལྡན་པ་ཡིན། རྫས་གཞན་གང་ལ་འང་༴སོགས། བྱས་མ་བྱས་དང་། ཀུན་རྫོབ་རྫས་ཀྱི་རྡོ་རྗེ་ལའང་རྣམ་པ་གསུམ། བྲམ་ཟེའུ་ཞོ་འཐུང་གི་རུས་པ་ལས་བྱས་པའི་ཚངས་པའི་འཁོར་ལོ། རཱ་ཧུ་ལའི་མདའ་གཞུ བརྒྱ་བྱིན་གྱི་རྡོ་རྗེ། དབང་ཕྱུག་གི་རྩེ་གསུམ་རྣམས་ལ་རྡོ་རྗེའི་ཆོས་བདུན་དང་ལྡན་ཟེར་ཡང་། རི་རབ་ཀྱི་ཁོང་གསེང་ནས་བྲམ་ཟེའུ་ཞོ་འཐུང་ཟེར་བ་ཚེ་དུས་ལས་འདས་པའི་རུས་པ་ཞུ་བཏུལ་བྱས་ནས་ཕྱག་མཚན་གྱི་རྣམ་པར་བཟོས་ནས་ འཁོར་ལོ་སོགས་བྱས་ཚེ། དེ་ལ་རྡོ་རྗེའི་ཆོས་བདུན་མི་དགོས་ཆོས་གཅིག་གི་མཚན་ཉིད་ཀྱང་ཚང་བ་མ་ཡིན། གཉན་ཆེན་ཐང་ལྷའི་བྱང་ཕྱོགས་ན་རྡོ་རྡོ་རྗེ་ཕ་ལམ་ཟེར་བ་ཞིག་ཡོད་ཀྱང་། དེ་དང་པོ་གཅིག་བཅག་ཚེ་ཟླུམ་པོ། གཉིས་བཅག་ཚེ་གྲུ་བཞི། གསུམ་བཅག་ཚེ་ཟླ་གམ།བཞི་བཅག་ཚེ་གྲུ་གསུམ། དེ་ཕན་ཆད་རྐྱེན་གང་གིས་ཀྱང་འཇིག་མི་ནུས་ཟེར་ཡང་། དེ་གཅིག ལས་དུ་མར་འབྱུང་ཚེ་རྡོ་རྗེའི་ཆོས་བདུན་མི་དགོས་ཆོས་གཅིག་ཀྱང་མི་ཚང་།རྒྱ་ནག་བེ་ཅོན་ན་ལྕགས་རྡོ་རྗེ་ཕ་ལམ་ཟེར་བ་ཞིག་ཡོད་ཀྱང་། དེ་འབྱུང་བ་མེ་མ་གཏོགས་གང་གིས་ཀྱང་བཞུ་བཏུལ་བྱེད་ནུས་པ་མ་ཡིན་ཟེར་ཡང་། འབྱུང་བ་མེས་བཞུ་བཏུལ་བྱེད་ནུས་པའི་ཚེ་ན་རྡོ་རྗེའི་ཆོས་བདུན་མི་དགོས་ཆོས་གཅིག་གི་མཚན་ཉིད་ཀྱང་མི་ཚང་། དེ་བཞིན་དུ་རྫས་གཞན་གང་ལའང་མཚོན་གྱིས་བཏབ་ཚེ་རྨ་འབྱུང་བས་ན་མི་ཆོད་པའི་མཚན་ཉིད་མི་ཚང་ཞིང་ཆོད་པ་དང་བཅས་པ་ཞིག་ཡིན།གཞན་རྐྱེན་གྱིས་གཞོམ་ཞིང་འཇིག་ནུས་པས་ན་མི་ཤིགས་པའི་མཚན་ཉིད་མི་ཚང་ཞིང་འཇིག་པ་དང་བཅས་པ་ཞིག་ཡིན གཅིག་དང་གཉིས་གསུམ་དུ་མར་འགྱུར་བས་ན་བདེན་པའི་མཚན་ཉིད་མི་ཚང་ཞིང་རྫུན་པ་དང་བཅས་པ་ཞིག་ཡིན། ཁ་དོག་དཀར་པོ་དང་ ༄༅། །སེར་པོ་དམར་པོ་ཁྲ་ཁྲ་དང་སོལ་ཁུ་ལ་སོགས་པའི་ནག་པོ་རྣམས་ཀྱིས་བསླད་འཇུག་པས་སྲ་བའི་མཚན་ཉིད་མི་ཚང་ཞིང་མི་སྲ་བ་དང་བཅས་པ་ཞིག་ཡིན། དུས་ལས་འཕོ་བ་དང་།གནས་ལས་འཕོ་བ་སྟེ་གཡོ་འགུལ་བརྟན་གནས་མེད་པས་ན་བརྟན་པའི་མཚན་ཉིད་མི་ཚང་ཞིང་མི་བརྟན་པ་དང་བཅས་པ་ཞིག་ཡིན། དངོས་པོ་ཅན་ཐམས་ཅད་གང་ལ་ཐོགས་པ་དང་བཅས་པ་ཡིན་པས་ན་ཐོགས་པ་མེད་པའི་མཚན་ཉིད་མི་ཚང་ཞིང་ཐོགས་པ་དང་བཅས་པ་ཞིག་ཡིན། རྐྱེན་གཞན་གྱིས་སྟོང་པར་བྱེད་ནུས་པས་ན་མ་ཕམ་པའི་མཚན་ཉིད་མི་ཚང་ཞིང་ཕམ་པ་དང་བཅས་པ་ཞིག་ཡིན།དེ་ལྟར་སྣང་བའི་ཆོས་ཐམས་ཅད་སྣང་དུས་ཉིད་ནས་མེད་པ་དང་མ་གྲུབ་པའི་མཚན་ཉིད་ཅན་དེ་དག་ནི་སྣང་དུས་ཉིད་ནས་སྟོང་པ་གཞི་རྩ་དང་བྲལ་བའི་དོན་གྱི་ཡིན་ཏེ། དེ་ལ་དངོས་པོ་རགས་པ་རྡོ་ལྟ་བུ་ཞིག་ཕྱེ་མར་འཐག་ནས་རྡུལ་དུ་ཕབ་པས་རྡུལ། རྡུལ་བདུན་ཆར་བཏང་བས་རྡུལ་ཕྲན རྡུལ་ཕྲན་བདུན་ཆར་བཏང་བས་ཆ་མེད། ཆ་མེད་ཅང་མེད་སྟོང་པའི་རང་བཞིན་མེད་དང་མ་གྲུབ་པའི་མཚན་ཉིད་དེ་དག་ནི་སྣང་དུས་ཉིད་ནས་སྟོང་པ་གཞི་རྩ་དང་བྲལ་བ་ཞིག་ཡིན། དངོས་པོ་རགས་པ་དེ་ཡང་ལག་པའི་འདུ་བྱེད་ཀྱི་བྱ བ་དང་བྱེད་པས་མེད་པར་བཏང་བ་ལས དང་པོ་ཡོད་པ་རེད་སེམས་ན་རྨི་ལམ་གྱི་སྐབས་སུ་དངོས་པོ་རགས་པ་རྡོ་ལྟ་བུ་ཞིག་ཕྱེ་མར་འཐག་ནས་རྡུལ་དུ་ཕབ་པས་རྡུལ། རྡུལ་བདུན་ཆར་བཏང་བས་རྡུལ་ཕྲན། རྡུལ་ཕྲན་བདུན་ཆར་བཏང་བས་ཆ་མེད། ཆ་མེད་ཅང་མེད་སྟོང་པ་ཞིག་བྱེད་པ་རྨིས་ཀྱང་དེ་རིང་ཉིན་མོའི་སྐབས་སུ་སྣང་བ་དེ་དང་པོ་མཐོང་བ་དང་། བར་དུ་རེག པ་དང་། མཐའ་མ་ཁ་དང་ལག་པས་བྱ་བ་བྱེད་ནས་རྡུལ་དུ་ཕབ་པས་རྡུལ། རྡུལ་བདུན་ཆར་བཏང་བས་རྡུལ་ཕྲན རྡུལ་ཕྲན་བདུན་ཆར་བཏང་བས་ཆ་མེད། ཆ་མེད་ཅང་མེད་སྟོང་པ་ཞིག་བྱེད་མ་མྱོང་བས་ན་དེས་ཀྱང་སྟོན་པ་ཡིན་ནོ། །རྡོ་རྗེ་ཆོས་བདུན་གྱི་སྒོ་ནས་གཏན་ལ་ཕབ་པ་སོང་ངོ་། །ཤེས་པ་མཆེད་འགགས་ཀྱི་སྒོ་ནས་གཏན་ལ་ཕབ་པ་ནི། མིག་འབྱེད་བཙུམ་དང་༴སོགས མི་འགྱུར་རོ། །མིག་འབྱེད་བཙུམ་དང་གོམ་པ་འདེགས་འཇོག་གི་སྐབས་མེད་བཞིན་དུ་སྣང་། སྣང་བཞིན་དུ་འགགས། འགགས་བཞིན་དུ་མཆེད་པར་འགྱུར་བའི་ཆོས་ཅན ཡིན། དེའི་ན་སྔ་མ་འགགས་ཤིང་ཡལ་ཏེ་ཕྱིས་མཆེད་པ་མ་ཡིན་ཏེ། ཡུལ་གཞན་དུ་སོང་ཚེ་ལམ་ཁ་ལ་ས་རྡོ་རི་བྲག་རྩི་ཤིང་ནགས་ཚལ་ཇི་ལྟར་སྣང་ཡང་ཕྱིར་ལོག་ཚེ་སྔ་མ་ལྟར་ཐམས་ཅད་ ༄༅། །བདེན་གྲུབ་ཅན་དང་གནས་ཁང་ཕྱི་ནང་གི་མཆེད་འགགས་ཀྱི་སྣང་བ་སྔར་བཞིན་བདེན་གྲུབ་ཏུ་ཡོད་པར་བསམ་ན། མདང་རྨི་ལམ་གྱི་སྐབས་སུ་ལུང་པའི་ཚུར ངོས་ནས་ཕར་ངོས་སུ་བསྒྲོད་དུས་ལམ་ཁ་རུ་ས་རྡོ་རི་བྲག་རྩི་ཤིང་ནགས་ཚལ་ཇི་ལྟར་དུ་སྣང་ཡང་ཕྱིར་འོང་སྐབས་སྔ་མ་ལྟར་བདེན་གྲུབ་ཅན་དང་གནས་ཁང་ཕྱི་ནང་གི་རྒྱུ་རྫས་ལོངས་སྤྱོད་ཐམས་ཅད་ཕྱི་ནང་གི་མཆེད་འགགས་ཀྱི་སྣང་བ་སྔར་བཞིན་བདེན་གྲུབ་ཏུ་ཡོད་པ་ཞིག་རྨིས་ཀྱང་།དེ་རིང་ཉིན་མོའི་སྐབས་སུ་སྣང་བ་དེ་དག་གོང་བཞིན་གཅིག་ཀྱང་གྲུབ་མ་མྱོང་བས་དེས་ཀྱང་སྟོན་པ་ཡིན། དཔེར་ན་མི་ཞིག་གི་ལྷམ་ཆུས་ཁྱེར་སོང་ན། སང་ཕོད་རོག་པ་ཞིག་དང་གཉིས་ཀ་ཆུ་ཁ་དེར་ཐོན་ཚེ། སྔར་ལྷམ་བོར་བའི་མི་དེས་ངའི་ལྷམ་འདི་ནས་ཆུས་ཁྱེར་ཟེར། རོག་པ་དེས་ཆུ་འདིས་ཁྱེར་མ་མྱོང་ཟེར་ཡང་དེ་བདེན་ཏེ། ཅིས་ཕྱིར་ཞེ་ན་བདག་པོ་ཕ་རི་ནས་ཚུར་རིར་ཕྱིན་ཚེ་ལྷམ་ཁྱེར་བའི་ཆུ་སོང་ཚར་བ་ཡིན། དེ་བཞིན་དུ་ས་ཐོབ་ཀྱི་བྱང་ཆུབ་སེམས དཔའ་རྣམས་ཀྱིས་དར་གྱི་ཆོ་ལུང་གནམ་ལ་བཀྱག་ནས་ས་ལ་བརྡབ་པའི་བར་ལ་བསྐལ་ཆེན་ཞིག་ཆགས་འཇིག་བྱེད་པ་མཁྱེན་པ་ཡིན། དེ་བཞིན་དུ་རྣལ་འབྱོར་པས་ཀྱང་ཉིན་ཞག་ཕྲུག་གཅིག གི་བསྐལ་ཆེན་ཞིག་ཆགས་འཇིག་བྱེད་པ་ཡིན་པའི་ཚུལ་ནི་གོ་དགོས་ཏེ སློབ་དཔོན་ཨཱཪྻ་དེ་ཝས། ཤེས་རབ་ཆུང་ངུས་ཆོས་འདི་ལ། །ཐེ་ཚོམ་ཙམ་ཞིག་ཟ་མི་སྲིད། །ཐེ་ཚོམ་ཙམ་ཞིག ཟོས་གྱུར་ན། །སྲིད་པ་ཧྲུལ་པོར་བྱེད་པར་འགྱུར། །ཅེས་གསུངས་པ་བཞིན་དུ། སེ་གོལ་ཞིག་གཏོགས་པའི་ཡུན་ལ་དུས་མཐའི་སྐད་ཅིག་མ་དང་། དུས་མཐའི་སྐད་ཅིག་མའི་ཆ་གཅིག་དེ དྲུག་ཅུར་ཕྱེ་བ་ཐང་ཅིག །ཐང་ཅིག་གི་ཆ་གཅིག་བཞི་བཅུར་ཕྱེ་བ་ཡུད་ཙམ་སྟེ། ཡུད་ཙམ་ཞིག་ལའང་བསྐལ་པ་ཆགས་འཇིག་འགྲོ་བ་ཡིན། དེ་བཞིན་དུ་འདི་ལ་གོམས་འདྲིས་ཡང་ཡང་བཏང་ནས་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་སྟོང་ཉིད་ཆེན་པོ་གཅིག་གི་ཡོ་ལང་སྟོང་ཉིད་ཆེན་པོ་གཅིག་གི་ཁོར་ཡུག་ཏུ་ཐག་ཆོད་པ་ཞིག་མ་བྱས་ན། རྣམ་མཁྱེན་གྱི ལམ་དུ་ཕྱོགས་ཙམ་ཉེ་བར་མི་གྱུར་རོ། ཁྱེའུ་ཆུང་ཤེས་རིག་གི་རྩེ་མོ་ཁྱོད་ཀྱིས་འདིའི་དོན་ལ་རབ་ཏུ་ལྟོས་ལ་སྣང་བ་ཐམས་ཅད་ནམ་མཁའ་ཉིད་དུ་རྟོགས་པས་ནམ་མཁའ་གོ་འབྱེད་པའི་རྣལ་འབྱོར་པ་ཞིག་མཛོད་ཅིག་ཅེས་གསུངས་ཤིང་མི་སྣང་བར་གྱུར་ཏོ། །དེ་ལ་ངེས་པ་བསྐྱེད་ཕྱིར་དྲི་བ་རྩོད་ལན་གྱི་ཚུལ་དུ་ངོ་སྤྲད་པ་ནི། དེ་ལྟར་གཏན་ལ༴སོགས། མཆེད་པ་ཡིན དེ་ལྟར་ ༄༅། །གཏན་ལ་དབབ་པས་སྣང་བ་ཐམས་ཅད་རང་ས་ཉིད་ནས་སྟོང་པར་ཤེས་ཀྱང་། ཕྱི་སྣང་བ་སྣོད་ཀྱི་འཇིག་རྟེན ནང་གཡོ་བ་བཅུད་ཀྱི་སེམས་ཅན། བར་འདོད་ཡོན་ལྔའི་ཡུལ་སྣང་འདི་དག་ཐམས་ཅད་ཤུལ་དུ་བོར་ནས་ཡུལ་གཞན་དུ་ཡུལ་ནས་ཡུལ་དུ་འགྲོ་བ་རིགས་དྲུག་གི་ཁམས་སོགས་གནས་རིགས་གཞན་དུ་འགྲོ་བ་དང་། སེམས་ཅན་ཐམས་ཅད་ཀྱང་རང་རང་གི་རྒྱུད་ཅན་དུ་ཡོད་པར་བསམ་དུ་ཡོད་པའི་གནས་སྐབས་ན། རྨི་ལམ་དག་པའི་སྣང་ངོར་ངའི་བླ་མ་དྲི་མེད་འོད་ཟེར་དང་ཞལ་མཇལ་བའི་ཚེ་ན་དྲི་བ་དང་དྲི་ལན་གྱི་ཚུལ་དུ། རྨི་སྣང་དང་སྐྱེ་འཆི་འགྲོ་འོང་གི་རྣམ་པར་སྣང་བའི་ཚུལ་རྣམས་གཏན་ལ་ཕབ་ནས་སྣང་ཙམ་ཉིད་ནས་དངོས་ཡུལ་མ་གྲུབ་པའི་དོན་ངོ་སྤྲད་པ་ནི། ཀྱེ་རིགས་ཀྱི་བུ་ཕྱི་སྣང་བ་སྣོད་ཀྱི་འཇིག་རྟེན་རྒྱ་ཆེ་བ། ནང་གཡོ་བ་བཅུད་ཀྱི་སེམས་ཅན་གྲངས་མང་བ། བར་འདོད་ཡོན་ལྔའི་ཡུལ་སྣང་བཀོད་ལེགས་པ་བདེན་གྲུབ་ལྟར་སྣང་བ་འདི་དག་ཐམས་ཅད། དཔེར་ན་སྒྱུ་མའི་འཁྲུལ་འཁོར་དབྱིངས་སུ་ཞིག་པ་བཞིན་དུ་རྨི་ལམ་གཉིད་དུ་ཕྱོགས་པའི་གནས་སྐབས་ན་ཀུན་གཞི་སྟོང་ཧད་ཀྱི་ནམ་མཁར་ཐིམ་པ་ཡིན། དེ་ལ་ཀུན་གཞི་མཚན་ཉིད་པ་ཡང་ཟེར། ཀུན་གཞི་ཐོག་ཕེབས་ ཡང་ཟེར། གདངས་རྩལ་གྱི་གོ་འགགས་པ་མི་ཤེས་རྨོངས་པའི་རང་བཞིན་ཅན་སེམས་ཕྱོགས་གཅིག་པ་སྒོ་ང་ལྟ་བུ་ཞིག་ཡིན། སེམས་མེད་པའི་གནས་སྐབས་ལྔ་ནི། གཉིད་འཐུག་པོའི གནས་སྐབས་དང་། བརྒྱལ་བའི་སྐབས་དང་། འཆི་སྲིད་ཀྱི་སྐབས་དང་། ཕོ་མོ་སྙོམས་འཇུག་བྱེད་པའི་སྐབས་དང་། སྒོམ་ཆེན་ཉམས་ཀྱིས་བསླང་བའི་སྐབས་རྣམས་ནི་སེམས་མེད་པའི་གནས་སྐབས་ལྔ་ཡིན་ཏེ། ཀུན་གཞི་ཐོག་ཕེབས་ཀྱང་ཟེར་བ་ཡིན། རིག་འཛིན་འཇིགས་མེད་གླིང་པས། ཀུན་གཞིའི་ངང་ལས་ལས་རླུང་གཡོ་བའི་འཕྲུལ། །བག་ཆགས་སེམས་ཉིད མངལ་རྒྱར་འཐུམ་པ་ལས། །གསུངས་པ་བཞིན་ཀུན་གཞིའི་ཁམས་དེ་ལས་འཛིན་པ་ཕྲ་ཞིང་ཕྲ་བ་ཞིག་འགུལ་བ་ནི་འཛིན་པ་ལས་ཀྱི་རླུང་ཡིན། དེ་ལས་ཀུན་གཞིའི་ཁམས་སུ་ནམ་ལངས ཁའི་སྐྱ་རེངས་དང་པོ་ལྟ་བུའི་གསལ་ཆ་གཅིག་ཐོན་པ་ནི་ཀུན་གཞིའི་རྣམ་ཤེས་དང་། དེ་ལས་ང་མེད་པ་ལ་ང་རུ་འཛིན་པའི་ཤེས་པ་མདུང་ཚུགས་པ་ཞིག་སྐྱེ་བ་ནི་ཉོན་ཡིད་སྔ་མ་དང་། དེ་ལས་བདག་ལུས་སྣང་ཙམ་པ་ལ་རྐྱེན་བྱས་ནས་སྣོད་བཅུད་དུ་སྣང་བའི་ཆོས་ཐམས་ཅད་རགས་པ་མངོན་གྱུར་གྱི་ཚུལ་དུ་མེད་ཅིང་། ཕྲ་བ་ལྐོག་འགྱུ་ཚུན་ཆད་དུ་ཉོན་ཡིད་དང་། དེ་ལས་ ༄༅། །ཡིད་དྭངས་ཤིང་གསལ་བ་ཚོགས་དྲུག་གི་རྟོག་པ་མཆེད་མ་རག་པ་དེ་ལ་ཡིད་དང་། དེ་ལས་གཟུགས་སྒྲ་དྲི་རོ་རེག་བྱའི་སྣང་བ་མཆེད་པའི་ནུས་པ་བཞག་པ་ནི སྒོ་ལྔའི་རྣམ་ཤེས་ཏེ་ཡུལ་དང་། གཟུགས་སྒྲ་དྲི་རོ་རེག་བྱའི་སྣང་བ་དངོས་སུ་མཆེད་པ་གཟུང་བ་དང་།དེ་ལ་ཉེ་བར་ལེན་པའི་སེམས་རྟོག་ཕྲ་མོ་འབྱུང་བ་འཛིན་པ་སེམས་ཏེ། གཟུང་འཛིན གཉིས་འཐས་པ་ལས་འཁོར་བ་ཡོངས་སུ་མཆེད་པ་ཡིན དེ་ལྟར་རྨི་སྣང་མཆེད་པའི་ཡུལ་ནི་ཀུན་གཞིའི་རྣམ་ཤེས་ཡིན། དེ་ལས་ང་རུ་འཛིན་པའི་ཤེས་པ་ལངས་ནས་སྒོ་ལྔའི་རྣམ་ཤེས་ཕྲ་མོའི་རྟེན་ལ་ཞུགས་ནས་རྨི་སྣང་མཆེད་པ་དང་ངར་འཛིན་དེ་སྒོ་ལྔ་རགས་པའི་རྟེན་ལ་ཞུགས་ནས་ཉིན་སྣང་མཆེད་པ་ཡིན།བདག་མེད་པ་ལ་བདག་ལུས་སྣང་ཙམ་པའི་ཤེས་པ་དེ་ལས་རྨི་ལམ་གྱི་སྣང་སྲིད་སྣོད་བཅུད་འདོད་ཡོན་ཐམས་ཅད་མཆེད་དེ། དེ་ལ་བདེན་གྲུབ་ཏུ་བཟུང་ནས་མངོན་ཞེན་སྐྱེས་པས་འཁྲུལ་དུ་ཡོད་པའི་གནས་སྐབས་ན། སླར་ཡང་རྨི་ལམ་གྱི་སྣང་སྲིད་སྣོད བཅུད་ཐམས་ཅད་འཇའ་ཚོན་ནམ་མཁའ་ལ་ཡལ་བ་ལྟར་ཀུན་གཞི་སྟོང་ཧད་ཀྱི་ནམ་མཁར་ཐིམ་པ་ཡིན། སླར་ཡང་ཀུན་གཞིའི་ངང་ལས་ལས་རླུང་གཡོ་བའི་ཆོ་འཕྲུལ་ཞིག་གིས་སྔར་བཞིན་ ཉིན་སྣང་མཆེད་པ་ཡིན་ཞེས་གསུངས་པ་ལ། བདག་གིས་འདི་སྐད༴སོགས། ཆོད་པ་བྱུང་། ཡང་བདག་གིས་ལུས་སྣང་ཙམ་མ་ཡིན་པར་ཕའི་རྒྱུ་ལས་བྱས། མའི་རྐྱེན་ལས་བྱས དེ་གཉིས་རྒྱུ་རྐྱེན་འཐས་པ་ལས་ངའི་ལུས་དངོས་ཅན་བདེན་གྲུབ་ཏུ་བྱུང་བ་རུ་ངེས་པ་ཡིན་ནམ་སྙམ་ཞུས་ཚེ། ཡང་བླ་མའི་ཞལ་ནས དེ་ལྟར་ཁྱོད་ཀྱི་ལུས་འདི་ཕ་དང་མའི་རྒྱུ་རྐྱེན་ལས་བྱུང་བ་ཞིག་ཡིན་སྙམ་ན། ཡེ་ཐོག་མ་མེད་པའི་དུས་ནས་ད་ལ་ཐུག་གི་བར་གྱི་ཕའི་ཐོག་མཐའ་བྱུང་གནས་འགྲོ་གསུམ་གང་དུ་ཡོད་པ་དང་། མའི་ཐོག་མཐའ་བྱུང་གནས་འགྲོ་གསུམ་གང་དུ་ཡོད་སྨོས་ཤིག་གསུངས། དེ་ལྟར་ཡོད་ཀྱང་བདག་གི་མི་དྲན་པ་ཡིན་མ་གཏོགས། ཕ་མ་མེད་པའི་ལུས་མི་སྲིད་པར་སེམས་ཀྱིས་ཞུས་ཚེ། དེའི་ན་ཡེ་ཐོག་མ་མེད་པའི་དུས་ནས་ད་ལ་ཐུག་གི་བར་གྱི་ཕ་མའི་ཐོག་མཐའ་མ་དྲན་ཀྱང་། རྨི་ལམ་གྱི་ལུས་དེའི་ཕ་མའི་ཐོག་མཐའ་བྱུང་གནས་འགྲོ་གསུམ་དང་། དེ་བཞིན་དུ་བར་སྲིད་ཀྱི་ལུས་དེའི་ཕ་མའི་ཐོག་མཐའ་བྱུང་གནས་འགྲོ་གསུམ་དང་། དམྱལ་བ་ཡང་སོས་ཀྱི་ལུས་ལན་ཁྲི་ཕྲག་མང་པོར་ཡང་ཤི་ཡང་སོས་བྱེད་པའི་ལུས་དེའི་ཕ་མའི་ཐོག་མཐའ་བྱུང་གནས་འགྲོ་གསུམ་གང་ལགས་ལྟོས་ཤིག་གསུངས་པས། ༄༅། །ལུས་སྣང་ཙམ་ལས་བདེན་གྲུབ་ཅན་དུ་མ་གྲུབ་པར་ཐག་ཆོད་པ་བྱུང་གསུངས། ཡང་ཀྱེ་བླ་མ་ལགས༈སོགས། ཆོད་པ་བྱུང་། ཀྱེེ་བླ་མ་ལགས་བདག་གི་ལུས མལ་སར་གོས་ཀྱིས་གཡོགས་ནས་ཉལ་ཏེ། མི་ཡུལ་གནས་ཁང་དང་བཅས་པ་མི་འགྱུར་བར་གནས་ཀྱང་རྨི་ལམ་གྱི་སྣང་བ་སྣོད་བཅུད་དང་བཅས་པ་ཐམས་ཅད་ཡུལ་གཞན་ཞིག་ནས་ཤར་བ་ཡིན་པར་སེམས་འདུག་གིས་ཞུས་པས། ཡང་བླ་མའི་ཞལ་ནས་རྨི་ལམ་གྱི་སྐབས་ཀྱི་ཕྱི་སྣང་བ་སྣོད་ཀྱི་འཇིག་རྟེན་རྒྱ་ཆེ་བ་རི་རབ་ཁང་ཁྱིམ་ཡུལ་ལ་སོགས་པ་དང་།ནང་གཡོ་བ་བཅུད་ཀྱི་སེམས་ཅན་གྲངས་མང་བ་མཐོ་བ་མི་དང་དམའ་བ་སྲོག་ཆགས་ཡན་ཆད་དང་། བར་འདོད་ཡོན་ལྔའི་ཡུལ་སྣང་བཀོད་ལེགས་པ། མིག་གི་ཡུལ་དུ་གཟུགས། རྣ་བའི་ཡུལ་དུ་སྒྲ། སྣའི་ཡུལ་དུ་དྲི ལྕེའི་ཡུལ་དུ་རོ། ལུས་ཀྱི་ཡུལ་དུ་རེག་བྱར་སྣང་བའི་རྨི་སྣང་དེ དེ་རིང་གི་ལུས་འདིའི་མགོ་དང་ཡན་ལག་ཕྱི་ནང་སྟོད་སྨད་གང་གི་ནང་དུ་མཆེད་པའི་ཡུལ་ལ་ལྟོས་ཤིག། ལུས་ཀྱི་མགོ་ནང་དུ་གནས་པ་ཡིན་སྙམ་ན་ཀླད་པ་ལ་སོགས་པས་གང་ཡོད་པས་ན་རྨི་སྣང་གི་ཡུལ་ཡངས་པ་ཆེན་པོ་ཞིག་མགོ་ནང་དུ་ཚུད་དོན་ཡོད་པ་མ་ཡིན། དེ་བཞིན་དུ་ཡན་ལག་རྣམས་ ཀྱང་རང་རང་གི་ཤ་ཁྲག་རུས་པ་རྐང་ལ་སོགས་པས་གང་ཡོད་པས་ན་ཡུལ་ཡངས་པ་ཆེན་པོ་ཞིག་ཚུད་དོན་མེད། ལུས་ཀྱི་སྟོད་ལ་གནས་པ་ཡིན་སྙམ་ན་སྟོད་ལ་ནི་གློ་བ་དང་མཆིན་པ་ལ་སོགས་པས་གང་ཡོད་པས་རྨི་སྣང་གི་ཡུལ་ཡངས་པ་ཆེན་པོ་ཞིག་ཆུད་དོན་མེད། ལུས་ཀྱི་སྨད་ལ་གནས་པ་ཡིན་སྙམ་ན་སྨད་ལ་རྒྱུ་མ་ལ་སོགས་པས་གང་ཡོད་པས་རྨི་སྣང་གི་ཡུལ་ཡངས་པ་ཆེན་པོ་ཞིག་ཆུད་དོན་མེད་གསུངས་པས། དེ་མ་ཡིན་པར་ཐག་ངེས་པར་ཆོད་པ་ཡིན་ནོ། །ཡང་བླ་མ་ལགས། ཡུལ་གཞན་ཞིག་༴སོགས མེད་པ་ཡིན་ནོ། །ཡང་བླ་མ་ལགས་ཡུལ་གཞན་ཞིག་ཏུ་རྣམ་པར་ཤེས་པ་སོང་བའི་ཚེ་རྨི་ལམ་གྱི་སྣང་བ་ཤར་བ་དང་། ཚུར་ལུས་ནང་དུ་ཞུགས་ཚེ་ཉིན་སྣང་ཤར་བ་ཡིན་སྙམ་གྱི་ཞེས་ཞུས་པས། བླ་མའི་ཞལ་ནས་འོ་ན་དེ་ལྟར་ལགས་ན་ལུས་གནས་ཁང་ལྟ་བུ་རུ་ཡོད་ཚེ་རྨི་ལམ་གྱི་སྐབས་རྣམ་པར་ཤེས་པ་འབྱུང་འཇུག་བྱེད་པའི་སྒོ་གནས་ཁང་གི་སྒོ་ལྟ་བུ་ཞིག་ཡོད་དགོས་པས། དེ་ལྟར་གནས་ཁང་གི་སྒོ་ལྟ་བུ་དེ་ངོས་ཟིན་དགོས་པས་དེ་ངོས་ཟུངས་ལ་ང་ལ་སྟོན་ཅིག་གསུངས་པས། དེ་ལོས་ཡོད་དང་མི་དྲན་པ་ཡིན་སྙམ་གྱི་ཞུས་པའི་ཚེ་ན། དཔེར་ན་གནས་ཁང་གི་སྒོ་ཞིག་ཏུ་ལན་གཅིག་འབྱུང་འཇུག་བྱས་ ༄༅། །ཀྱང་། དེ་ཕྱིན་ཆད་སྒོ་ངོས་ཟིན་པ་ཤུགས་ལ་འབྱུང་བ་ཡིན། ཁྱོད་ལོ་རེ་རེར་ཉིན་ཞག་བདུན་བརྒྱ་དང་ཉི་ཤུ་ཐམ་པར་འབྱིན་འཇུག་བྱས་པ་ལན་གཅིག་ངོས་མ་ཟིན་ཀྱང་ལན་གཅིག་ངོས་ཟིན་དགོས། དེ་ད་དུང་ངོས་མི་ཟིན་པ་ནི་སྒོ་རང་བཞིན་གྱིས་གྲུབ་པ་མེད་པའི་མཚང་ཤུགས་ལ་ཐོན་པ་ཡིན་གསུངས། དེས་ན་ཁྱོད་ཀྱི་སེམས་ཀྱི་གནས་ས་ཡང་ངོས་ཟིན་དགོས་ཏེ། ལུས་ཀྱི་སྟོད་དུ་གནས་ན་སྨད་ལ་ཚེར་མ་ཟུག་པ་ཙམ་གྱིས་སྟོད་ལ་སྡུག་བསྔལ་དང་ཟུག་རྔུ་མྱོང་དོན་མེད། ལུས་ཀྱི་སྨད་དུ་གནས་ན་སྟོད་ལ་ཚེར་མ་ཟུག་པ་ཙམ་གྱིས་སྨད་ལ་ཟུག་རྔུ་སྡུག་བསྔལ་མྱོང་བའི་དོན་ཅི་ལ་ཡོད། དེའི་ན་རྨི་ལམ་གྱི་སྐབས་དང་པོ་བུག་སྒོ་ནས་འབྱུང་འཇུག་བྱེད་པའི་རྣམ་པར་ཤེས་པ་ཕྲ་མོ་ཡུངས་འབྲུ་ལྟ་བུ་ཞིག་དང་། ཚུར་ལུས་ནང་དུ་ཞུགས་ཚེ་ཡར་འཕེལ་ཏེ་ལུས་ཁྱབ་པ་དང་།ད་ལྟ་མར་གྲིབ་སྟེ་བུག་སྒོ་ཕྲ་མོ་ནས་ཐོན་པ་ཙམ་དུ་ཆེ་ཆུང་བྱེད་པ་མི་རིགས་པ་ཡིན་ཀྱང་།ད་ཁྱོད་ཀྱིས་ཟེར་བ་ལྟར་རིགས་པ་དང་བཅས པའི་དབང་དུ་བཏང་ན། བེམ་རིག་བྲལ་ནས་ཤི་བའི་དུས་སུ་ད་དུང་ན་སོ་གཞོན་པས་ཤི་མ་རན་བསམས་ཏེ། སླར་ཡང་རྣམ་པར་ཤེས་པ་བེམ་པོར་ཚུར་འཇུག་ན་ཆོག་ཀྱང་དེ་ཅིའི་ཕྱིར་མི་ འཇུག །ཡུལ་གཞན་དུ་སོང་བའི་རྨི་ལམ་གྱི་སྣང་བའི་ཡུལ་དེ། དེ་རིང་ཉིན་མོའི་སྐབས་ཀྱི་ཡུལ་འདིའི་སྟེང་ན་ཡོད་དང་འོག་ན་ཡོད།ཕྱོགས་བཞི་མཚམས་བརྒྱད་གང་ན་ཡོད་པ་ཡིན ཉིན་སྣང་གི་འབྱུང་བ་སྣོད་བཅུད་དང་། མཚན་མོ་རྨི་ལམ་གྱི་འབྱུང་བ་སྣོད་བཅུད་གཅིག་རེད་དང་ཐ་དད་པ་རེད། གཅིག་ཡིན་བསམ་ན་གཉིད་ཀྱིས་མཚམས་བཅད་དམ་མ་བཅད། གཉིད་ཀྱིས་མཚམས་བཅད་ན་ཉིན་སྣང་དང་གཅིག་མ་ཡིན། མཚམས་མ་བཅད་ན་ཐ་དད་པ་མ་ཡིན། ཡང་ན་དེ་རིང་ཉིན་མོའི་སྣང་བ་དང་མདང་རྨི་ལམ་གྱི་སྣང་བ་གཉིས་སྟེང་འོག་ཏུ་ཡོད་དམ། ཕྱི་ནང་བྱས་སམ དེ་གཉིས་གཅིག་གི་ཕྱོགས་སུ་མི་ངེས་པའི་ཐབས་མེད་པ་ཡིན་ནོ་གསུངས། ཡང་བདག་གི་བླ་མ་ལགས༔སོགས། དེས་སྟོན་ཏོ། ཡང་བདག་གི་བླ་མ་ལགས། དེས་ན་ཐག་གང་ལ་གཅོད། ས་གང་གིས་འཛིན། བླ་མ་མཆོག་ཉིད་ཀྱིས་བསྟན་དུ་གསོལ། ཞེས་ཞུས་ཚེ། བླ་མའི་ཞལ་ནས ཚེ་རབས་ཐོག་མཐའ་མེད་པའི་དུས་ཀུན་ཏུ་སྐྱེ་མ་མྱོང་བཞིན་དུ་སྐྱེ་སྣང་ཙམ་དུ་ཟད། འཆི་མ་མྱོང་བཞིན་དུ་འཆི་སྣང་ཙམ་དཔེར་ན་རྨི་སྣང་གནས་འགྱུར་ནས་ཉིན་སྣང་མཆེད་པ་ཙམ་དང་། ཉིན་སྣང་གནས་འགྱུར་ནས་རྨི་སྣང་མཆེད་པ་ཙམ་ལས ༄༅། །སྐྱེ་འཆི་རང་ངོས་ནས་གྲུབ་པ་ཡོད་པ་མ་ཡིན། དེ་བཞིན་དུ་མིག་གི་ཡུལ་དུ་གཟུགས རྣ་བའི་ཡུལ་དུ་སྒྲ། སྣའི་ཡུལ་དུ་དྲི། ལྕེའི་ཡུལ་དུ་རོ། ལུས་ཀྱི་ཡུལ དུ་རེག་བྱ། ཡིད་ཀྱི་ཡུལ་དུ་སྣ་ཚོགས་ཆོས་ཁམས་རྒྱ་མཚོའི་སྣང་བ་དེ་དག་ཐམས་ཅད་མེད་བཞིན་དུ་མཐོང་ཐོས་ཚོར་མྱོང་མྱང་བ་