Tibetan
ལག་པ་གཡས་པའི་མཐེབ་མཛུབ་ཀྱི་བར་མེ་ཏོག་ཅུང་ཟད་བཟུང་། སོར་མོ་ལྷག་མ་རྣམས་བརྐྱང་ལ་དྲི་བཟང་དང་བ་བྱུང་གིས་གཡས་བསྐོར་དུ་ཁྱབ་པར་བྱུག་ཅིང་ངག་ཏུ། ཨོཾ་བཛྲ་བྷཱུ་མི་ཨཱཿཧཱུྃ། ཞེས་བརྗོད་དེ། ཨོཾ་ནི་མཆོག་དང་ནོར་སྟེར་བ་སོགས་དང་ནོར་བུ་འཛིན་པ་སྟེ་དགོས་འདོད་ཐམས་ཅད་འབྱུང་བའི་ནོར་བུ་ལྟ་བུར་གྱུར་པས་ན། འདིར་ཡང་ཕྱི་སྣོད་ཀྱི་དཔལ་འབྱོར་ཕུན་སུམ་ཚོགས་པ་འདོད་རྒུར་འབྱུང་བྱེད་དུ་བྱས་ཀྱང་རུང་སྟེ། གང་ལྟར་ཡང་རྒྱལ་བའི་སྐུ་གསུང་ཐུགས་ཀྱི་བྱིན་རླབས་འདུས་པའི་ཡི་གེ་ཁྱད་པར་རྩ་སྔགས་ཐམས་ཅད་ཀྱི་མགོ་འདྲེན་ཡིན་པས་འདིར་ཡང་སྨོས་ལ། བཛྲ་བྷཱུ་མི་ནི་རྡོ་རྗེའི་ས་གཞི་སྟེ་རྡོ་རྗེ་ནི་མི་ཆོད་པ་དང་མི་ཤིགས་པ་ལ་འཇུག་པས་འོག་གི་ས་གཞི་དེ་ཉིད་སྲ་ཞིང་བརྟན་པའི་དོན་ནོ། །དེ་ལྟར་འོག་གཞི་འབྱུང་བ་རིམ བརྩེགས་ཀྱི་སྟེང་དུ་དབང་ཆེན་གསེར་གྱི་ས་གཞི་རྒྱ་ཁྱོན་ཤིན་ཏུ་ཆེ་བར་གྲུབ་པར་བསམ ཨོཾ་བཛྲ་རེ་ཁེ་ཨཱཿཧཱུྃ ཞེས་མགོའི་ཨོྃ་ནི་སྐུ་དང་མཇུག་གི་ཨཱཿ དང་ཧཱུྃ་ནི་གསུང་དང་ཐུགས་ཀྱི་ས་བོན་ཡིན་པས་སྔགས་དེས་ནུས་ལྡན་དུ་བྱིན་གྱིས་རློབ་བྱེད་ཡིན་ལ བཛྲ་རེ་ཁེ་ཞེས་པ་ནི་རྡོ་རྗེའི་རི་མོ་སྟེ་རྡོ་རྗེ་གོང་ལྟར་དང་། རི་མོ་ཞེས་པ་བྲིས་པ་ལྟ་བུར་གླིང་བཞིའི་ཁོར་ཡུག་བསྐོར་བའི་ལྕགས་རི་སྟེང་སྔགས་དེ་བརྗོད་བཞིན་དྲི་བཟང་གི་ཆུ་དང་བཅས། སྲིན་ལག་གིས་མཎྜལ་གྱི་མཐའ་བསྐོར་ཞིང་། ཕྱི་ཡི་ལྕགས་རི་ཁོར་ཡུག་གིས་བསྐོར་བའི་དབུས་སུ་ཞེས་པའི་ཚེ་གསེར་གྱི་ས་གཞི་དེའི་མཐའ་སྐོར་དུ་ལྕགས་རི་རེ་རེ་དང་། དེ་དག་ཐམས་ཅད་ཀྱི་འོག་གཞི་རླུང་དཀྱིལ་གྱི་སྟེང་གི་མཐའ་སྐོར་དུ་ལྕགས་རི་གཅིག་གིས་བསྐོར་བར་བསྒོམ། དབུས་སུ་ཧཱུྃ་ཞེས་བརྗོད་པ་དང་གཡས་པའི་མཐེབ་མཛུབ་ན་ཡོད་པའི་མེ་ཏོག་དབུས་སུ་བཞག་པས་བགེགས་བསལ་བར་བསམ་པའམ། ལུགས་གཅིག་ཏུ་རི་རབ་བསྐྱེད་པའི་ས་བོན་ཡིན་པར་གསུངས་པའང་ཡོད་ལ། གང་ལྟར་ཡང་དབུས་སུ་རིའི་རྒྱལ་པོ་རི་རབ་དབྱིབས་གྲུ་བཞི་པ། ཤར་དངུལ། ལྷོ་བེེ་ཌཱུརྻ ནུབ་པདྨ་རཱ་བ། །བྱང་གསེར་ལས་གྲུབ་པ། དཔངས་སུ་དཔག་ཚད་ཁྲི་ཕྲག ༄༅། །བཅུ་དྲུག་ཡོད་པའི་བརྒྱད་ཁྲི་རྒྱ་མཚོར་ནུབ་ཅིང་བརྒྱད་ཁྲི་སྟེང་དུ་འཕགས་པ་བང་རིམ་བཞི་ལྡན་ནང་ནས་རིམ་པས་མཐོ་བའི་གསེར་རི་བདུན་བྲེ་ནང་བྲེ་བཅུག་པ་ལྟ་བུའི་བར་དུ་རོལ་མཚོ་བདུན་དང་སྤེལ་མར་ཡོད་པ རི་རབ་ཀྱི་རྩེ་མོར་སུམ་ཅུ་རྩ་གསུམ་གྱི་ལྷ་གནས་དབུས་སུ་རྣམ་པར་རྒྱལ་བའི་ཁང་བཟང་ཉི་མ་སྟོང་གི་གཟི་འོད་འབར་བ། མཐའ་བསྐོར་དུ་ཡོངས་འདུ་ས་བརྟོལ་སོགས་དཔག་བསམ་གྱི་ཤིང་དང་ཁྲུས་ཀྱི་རྫིང་བུ་དང་། རིན་པོ་ཆེའི་གཞལ་མེད་ཁང་དང་། ལྷའི་བདུད་རྩི་དང་། ལྷའི་གོས་པཉྩ་ལི་ཀ་དང་། རིན་པོ་ཆེའི ཕྲེང་བ་བརྗོད་ཀྱིས་མི་ལང་བ་དང་ལྷའི་རྔ་བོ་ཆེ་ཆོས་ཀྱི་སྒྲ་དབྱངས་སྒྲོག་པ་སོགས་མཆོད་རྫས་དཔག་ཏུ་མེད་པས་གང་བ།བང་རིམ་བཞི་ལ་རྒྱལ་ཆེན་རིགས་བཞིའི་ལྷ་གནོད་སྦྱིན་ལག་ན་གཞོང་ཐོགས་སོགས་དང་། ཀླུའི་རྒྱལ་པོ་རྣམས་གསེར་རི་དང་རོལ་མཚོ་ལ་དཔལ་འབྱོར་དང་བཅས་ཏེ་གནས་པར་བསམ། ཤར་ལུས་འཕགས་པོ་ཞེས་བརྗོད་ཚེ་ཤར་དུ་ཚོམ་བུ་འགོད་ཅིང་། འཛམ་གླིང་ལ་ལྟོས་པའི་རི་རབ་ཀྱི་ཤར་ན་ཡོད་ཅིང་། འཛམ་བུའི་གླིང་པའི་མི་ལས་ལུས་ཉིས་འགྱུར་གྱིས་འཕགས་པས་ལུས་འཕགས་པོ་དེ་གླིང་དབྱིབས་ཟླ་གམ་བཅད་ཁ་རི་རབ་ལ་བསྟན་ པ། ས་དང་བར་སྣང་ཐམས་ཅད་དཀར་བ། མི་རྣམས་གཟུགས་བཟང་ཞིང་སེམས་རྒྱུད་འཇམ་པ། ལོངས་སྤྱོད་ཆེ་བ། རིན་པོ་ཆེ་མང་པོས་གང་བ་གསལ་གདབ། ལྷོ་འཛམ་བུའི་གླིང ཞེས་བརྗོད་པ་དང་ལྷོར་ཚོམ་བུ་འགོད་ཅིང་། ཤིང་ཏྲི་ཤའི་འབྲས་བུ་མཚོར་ལྷུང་བའི་སྒྲས་ཛམ་བུ་ཞེས་སྐད་འབྱིན་པས་འཛམ་བུའི་གླིང་དུ་གྲགས་པ་དབྱིབས་ཤིང་རྟ་ལྟ་བུའམ་སོག་ཀ་ངོས་ཆུང་བ་རི་རབ་ལ་བསྟན་པ། ས་དང་བར་སྣང་ཐམས་ཅད་སྔོ་བ དབུས་ན་བསྐལ་པ་ཞིག་དུས་ཀྱང་མི་འཇིགས་པ་རྡོ་རྗེའི་གདན། ཤར་ན་འཕགས་པ་འཇམ་དཔལ་གྱི་གནས་རི་བོ་རྩེ་ལྔ། ལྷོ་ན་འཕགས་པ་སྤྱན་རས་གཟིགས་ཀྱི་གནས་རི་བོ་ཏ་ལ། ནུབ་ན་ཨོ་རྒྱན་མཁའ་འགྲོའི་གླིང་།བྱང་ན་ཆོས་རྒྱལ་རིགས་ལྡན་གྱི་གནས་ཕོ་བྲང་ཤམྦྷ་ལ་སོགས་གྲུབ་པའི་གནས་དུ་མ་དང་བཅས་པ། མཆོད་རྫས་མང་པོས་གང་བ་གསལ་གདབ ནུབ་བ་གླང་སྤྱོད་ཅེས་བརྗོད་པ་དང་ནུབ་ཏུ་འབྲུ་ཚོམ་འགོད་ཅིང་། བ་གླང་དང་ནོར་བུ་ལ་ལོངས་སྤྱོད་པས་ན་བ་གླང་སྤྱོད་དེ་དབྱིབས་ཟླུམ་པོ། གནམ་ས་ཐམས་ཅད་དམར་བ། ལོངས་སྤྱོད་ཚད་མེད་པ་དང་ལྡན་པར་གསལ བྱང་སྒྲ་མི་སྙན་ཞེས་བརྗོད་པ་དང་བྱང་དུ་འབྲུ་ཚོམ་འགོད་ཅིང་འཆི་བའི་ཞག་བདུན་གྱི་ ༄༅། །གོང་དུ་སྒྲ་མི་སྙན་པ་འབྱུང་བས་སྒྲ་མི་སྙན་ཏེ་དབྱིབས་གྲུ་བཞི། གནམ་ས་ཐམས་ཅད་སེར་པོ། མི་རྣམས་གཟུགས་བཟང་ཞིང་འོད་དང་ལྡན་པ། ལོངས་སྤྱོད་ལྷ་དང་མཉམ་པ་མཆོད་རྫས་ཁྱད་པར་དུ་འཕགས་པས་གང་བར་གསལ་གདབ། དེ་ཡང་རང་ཅག་འཛམ་བུའི་གླིང་ལ་ལྟོས་ནས་ལྷོར་སོགས་སུ་བཞག་པ་སྟེ། ཤར་ཞེས་པ་ཉི་ཟླའི་འཆར་ཕྱོགས་ལ་ལྟོས་ཏེ་བཞག་དགོས་པ་ལས་ཉི་ཟླས་རི་རབ་ལ་བསྐོར་ནས་འགྲོ་བས་ཤར་སོགས་ཀྱི་དབྱེ་བ་འབྱེད་དུ་མེད་ལ། དེ་ལས་གཞན་དུའང་འཇོག་བྱེད་མེད་པས་སོ། །དེས་ན་ཉི་ཟླས་རི་རབ་ལ་གཡས་བསྐོར་དུ་གླིང་རང་རང་གི་སྟེང་དུ་འཆར་ནུབ་བྱེད་ཕྱིར་ཉི་ཟླ་འཆར་ཕྱོགས་ལ་ཤར། ལྕགས་རིའི་ཕྱོགས་ལྷོ། ཉི་ཟླ་ཐལ་ཕྱོགས་ནུབ། རི་རབ་ཀྱི་ཕྱོགས་བྱང་དུ་བཞག་པའོ།། དཔེར་ན་ལུས་འཕགས་པའི་ཤར་སྒྲ་མི་སྙན ལྷོར་ལུས་འཕགས་པ། ནུབ་འཛམ་བུའི་གླིང་། བྱང་བ་གླང་སྤྱོད་དུ་འགྱུར་བ་བཞིན་ནོ། །དེ་དག་གི་གཡས་གཡོན་དུ་དབྱིབས་དང་ལོངས་སྤྱོད་མིའི་ཤ་ཚུགས་སོགས་ཆ་འདྲ་བའི་གླིང་ཕྲན་བརྒྱད་ཡོད་པའི་ལུས་དང་ལུས་འཕགས་ཞེས་བརྗོད་པའི་ཚེ། ཤར་གྱི་ཚོམ་བུའི་ནུབ་དང་ཤར་དུ་ཚོམ་བུ་ཆུང་ངུ་རེ་འགོད་ཅིང་གླིང་ཕྲན་གཉིས་ སུ་བསམ། རྔ་ཡབ་དང་རྔ་ཡབ་གཞན་ཅེས་བརྗོད་ཚེ་ལྷོའི་ཚོམ་བུའི་ནུབ་དང་ཤར། གཡོ་ལྡན་དང་ལམ་མཆོག་འགྲོ་ཞེས་ནུབ་ཀྱི་ནུབ་དང་ཤར། སྒྲ་མི་སྙན་དང་སྒྲ་མི་སྙན་གྱི་ཟླ་ཞེས་བྱང་གི ནུབ་དང་ཤར་དུ་འབྲུ་ཚོམ་རེ་བཀོད་ལ། གླིང་རང་རང་གི་གླིང་ཕྲན་གཉིས་གཉིས་སུ་བྱུང་བར་བསམ། དེ་ནས་གླིང་ཆེན་བཞི་པོའི་ནང་དུ་ཚོམ་བུ་འགོད་རིམ་གྱིས་རིན་པོ་ཆེའི་རི་བོ་ཞེས་ཤར་གླིང་གི་དབུས་སུ་ལོངས་སྤྱོད་ཀྱི་གཙོ་བོ་པདྨ་རཱ་ག །ཨིནྡྲ་ནཱི་ལ། བེེ་ཌཱུརྻ། མརྒད། རྡོ་རྗེ་ཕ་ལམ། མུ་ཏིག །བྱི་རུ་སོགས་རིན་པོ་ཆེ་སྣ་ཚོགས་སྤུངས་པའི་རི་བོ་རྒྱ་ཆེ་ཞིང་དཔངས་མཐོ་བའམ། ཡང་ན་རིན་པོ་ཆེའི་རི་དཔངས་མཐོ་ཞིང་ངོས་ཡངས་པ། རིན་པོ་ཆེ་འོད་སྣ་ཚོགས་འཆར་བ་ཞེས་གསུངས་པའང་ཡོད། དཔག་བསམ་གྱི་ཤིང་ཞེས་ལྷོ་གླིང་གི་དབུས་སུ ལོངས་སྤྱོད་ཀྱི་གཙོ་བོ་དཔག་བསམ་གྱི་ཤིང་གི་སྡོང་པོ་ཤིན་ཏུ་ཆེ་བ་རྩ་བ་གསེར། སྡོང་པོ་དངུལ། ཡལ་ག་བེེ་ཌཱུརྻ ལོ་མ་ཤེལ། འདབ་མ་སྤུག །མེ་ཏོག་མུ་ཏིག་དམར་པོ། འབྲས་བུ་རྡོ་རྗེའི་སྙིང་པོ་སྟེ། རིན་པོ་ཆེ་སྣ་བདུན་ལས་གྲུབ་པའི་ཤིང་ཕུན་སུམ་ཚོགས་པའི་དགོས་འདོད་ཐམས་ཅད་འབྱུང་བ། འདོད་འཇོའི་བ་ཞེས་ནུབ་གླིང་གི་དབུས་སུ་ལོངས་སྤྱོད་ཀྱི་གཙོ་བོ་འདོད་ ༄༅། །འཇོའི་བ་རྭ་ཅོ་རྡོ་རྗེ་ཕ་ལམ། རྨིག་པ་ཨིནྡྲ་ནཱི་ལ། རྔ་མ་དཔག་བསམ་གྱི་ལྗོན་པ་ལས་གྲུབ་པ་འདྲ་བ་ནོག་དང་། ལྐོག་ཤལ་ཕུན་སུམ་ཚོགས་པ། ཁ་དོག་དམར་སེར་གཟུགས་བཟང་ཞིང་བལྟ་ན་སྡུག་པ། འོ་མ་ལ་སོགས་པའི་དགོས་འདོད་ཐམས་ཅད་ཟད་པ་མེད་པར་འབྱུང་བ། མ་རྨོས་པའི་ལོ་ཏོག་ཅེས་བྱང་གླིང་གི་དབུས་སུ་ལོངས་སྤྱོད་ཀྱི གཙོ་བོ་མ་རྨོས་མ་བཏབ་པར་སྐྱེས་པའི་འབྲས་སཱ་ལུའི་ལོ་ཏོག་ཡངས་ཤིང་རྒྱ་ཆེ་བ་རྩ་བ་སོར་བཞི་པ་ཤུན་པ་དང་ཕུབ་མ་མེད་པ། ནང་བརྔས་ན་ནུབ། ནུབ་བརྔས་ན་ནང་མི་མངོན་པ། ཁ་དོག་རོ་བཅུད་ཕུན་སུམ་ཚོགས་པའི་ཚལ་ཡོད་པར་བསམ། དེ་ནས་གླིང་སོ་སོའི་ལོངས་སྤྱོད་ཀྱི་གཙོ་བོའི་ནང་ངོས་དང་། མཚམས་བཞིར་ཚོམ་བུ་རིམ་བཞིན་འགོད་དེ འཁོར་ལོ་རིན་པོ་ཆེ་ཞེས་སོགས་རྐང་པ་བརྒྱད་བརྗོད་པའི་ཚེ། རིན་པོ་ཆེའི་ནང་ངོས་ཀྱི་བར་སྣང་ལ་འཁོར་ལོ་རིན་པོ་ཆེ་གཞན་གྱིས་མ་བྱས་པར་འཁོར་སྒྱུར་གྱི་བསོད་ནམས་ཀྱི་མཐུས་རྒྱུ་འཛམ་བུའི་ཆུ་བོའི་གསེར་ལས་གྲུབ་ཅིང་རྩིབས་སྟོང་དང་ལྡན་པ། ཚད་དཔག་ཚད་ལྔ་བརྒྱ་ཡོད་པ། འཇིག་རྟེན་ན་ཉི་མ་གཉིས་པ་ལྟ་བུའི་མཛེས་པའི་ཡོན་ཏན་དང་། ནམ་མཁར་འཕགས་ཏེ་དཔག་ཚད་ གསུམ་གྱི་ལམ་ཉི་ལམ་ཉི་མ་གཅིག་གིས་ཐོགས་པ་མེད་པར་འགྲོ་བའི་ཡོན་ཏན་དང་། འཁོར་ལོ་རིན་པོ་ཆེའི་མཐུས་ནམ་མཁའི་ལམ་ནས་གླང་པོ་དང་།རྟ་དང་ཤིང་རྟ་དང་། རྐང་ཐང་གི་དཔུང་ཚོགས་ཡན་ལག་བཞི་དང་ལྷན་ཅིག་ཏུ་གླིང་བཞི་དང་།རྒྱལ་ཆེན་བཞིའི་ལྷ་གནས་སོགས་སུ་གང་དུ་འགྲོ་བར་འདོད་པ་དེར་དེས་བགྲོད་པར་བྱེད་པའི་ཡོན་ཏན་དང་། འཁོར་ལོས སྒྱུར་བའི་རྒྱལ་པོས་གང་མི་ཐོས་པ་ཐམས་ཅད་དེས་གྲོགས་བྱས་ཏེ་ཐོས་པར་བྱེད་པའི་ཡོན་ཏན། བསྔོ་བའམ་སྔར་སྦྱིན་འདོད་ཀྱི་སེམས་པ་མེད་ཀྱང་རྒྱལ་པོ་དེ་ལ་བློན་པོའམ་གྲོགས་སོ་སོས་མཐོང་མ་ཐག་ཏུ་འདོད་པ་ཐམས་ཅད་འབུལ་བར་བྱེད་པའི་ཡོན་ཏན་ཏེ་ལྔ་དང་ལྡན་པ་ཞིག་ཡོད་པར་བསམ། དཔག་བསམ་གྱི་ཤིང་གི་ནང་ངོས་ཀྱི་བར་སྣང་ལ་བེེ་ཌཱུཪྻའི་རང་བཞིན་ཅན་གྱི་ནོར་བུ་རིན་པོ་ཆེ་མཚན་མོའང་དཔག་ཚད་བརྒྱད་ཚུན་ཆད་ཀྱི་མུན་པ་སེལ་ཞིང་། ཉིན་པར་འོད་ཀྱི་ཚ་གདུང་སེལ་བར་བྱེད་པའི་ཡོན་ཏན་དང་། སྐོམ་པས་གདུང་བ་རྣམས་ལ་དེ་ལས་ཡན་ལག བརྒྱད་ལྡན་གྱི་ཆུ་བྱུང་ནས་སྐོམ་པ་སེལ་བར་བྱེད་པའི་ཡོན་ཏན་དང་། རྒྱལ་པོས་གང་བསམ་པ་ཕལ་ཆེར་དེ་ལས་བྱུང་བའི་ཡོན་ཏན ཟུར་བརྒྱད་ལས་ཁ་དོག་སྣ་ཚོགས་པའི་འོད་འབྱུང་བའི་ ༄༅། །ཡོན་ཏན། དཔག་ཚད་བརྒྱད་ཚུན་ཆད་ཀྱི་འགྲོ་བའི་རིམས་དང་ནད་སེལ་ཞིང་། ཡིད་མཉམ་པར་བཞག་པ་འདོད་དོན་ཐམས་ཅད་འགྲུབ་པར་བྱེད་པའི་ཡོན་ཏན་དང་། རླུང་ངན་པས་ཆར་མི་བཟད་པར་མངོན་པར་འབབ་པར་མི་ནུས་པའི་ཡོན་ཏན། མྱ་ངམ་དང་གཡང་ས་སོགས་མི་དགེ་བའི་བདག་འབྲས་ཀྱིས་གདུང་བ་རྣམས་ལ་ཤིང་ལྗོན་པ་དང་ནེའུ་སེང་མཚེའུ་སོགས་དགའ་ཚལ་ཕུན་སུམ་ཚོགས་པ་འབྱུང་བའི་ཡོན་ཏན། དུད་འགྲོར་མི་སྐྱེ་ཞིང་དེ་དག་གིས་མི་གནོད་པ་དང་། དུས་མིན་འཆི་བ་འཇོམས་པའི་ཡོན་ཏན་ཏེ་བརྒྱད་དང་ལྡན་པ་ཞིག་ཡོད་པར་བསམ། འདོད་འཇོའི་བའི་ནང་ངོས་ཀྱི་བར་སྣང་ལ་བཙུན་མོ་རིན་པོ་ཆེ་ཡིད་དུ་འོང་ཞིང་ལྟ་ན་སྡུག་པ་ལུས་ལས་ཙནྡན་དང་སྤོས་དང་ཁ་ནས་ཨུཏྤ་ལའི་དྲི་ཞིམ་པ་འབྱུང་ཞིང་རྒྱ་མཚོའི་ནང་ན་གནས་པའི་བྱ་ཀ་ལནྟ་ཀ་ལྟར་གང་གིས་རེག་ན་བདེ་བའི་མཆོག་སྟེར་བ། གླིང་དེར་གནས་པའི་སྐྱེ་བོ་རྣམས་ཀྱི་བཀྲེས་པ་དང་སྐོམ་པ་དང་མྱ་ངན་རྣམས་སེལ་བར་བྱེད་ཅིང་། བུད་མེད་ཀྱི་སྐྱོན་སྐྱེས་པ་གཞན་ལ་སེམས་པ་དང་། སེར་སྣ་དང་མི་རིགས་པ་ལ་ཆགས་པ་དང་། མི་རིགས་པའི་གནས་ལ་རྗེས་སུ་དགའ་བ་དང་། ཁྱིམ་ཐབས་ཀྱི་སྲོག་གཅོད་པར་ འདོད་པ་ལྔ་སྤངས་ཤིང་། ཡོན་ཏན་ནི་རྒྱལ་པོ་རང་གི་བསམ་པ་དང་མཐུན་པར་འགྱུར་བ་དང་། བུ་མང་པོ་བཙའ་བར་འགྱུར་བ་དང་། བུད་མེད་གཞན་ལ་མ་དང་སྤུན་ཟླ་ལྟར་སེམས་པས རིགས་མཐུན་པར་འགྱུར་བ་དང་། རྒྱལ་སྲིད་ཀྱི་ཡོན་ཏན་གོང་འཕེལ་དུ་གྱུར་ནས་སྲིད་མཐོ་བར་འགྱུར་བ་དང་། ཁྱིམ་ཐབས་དང་བུད་མེད་གཞན་ལ་ཕྲག་དོག་མི་བྱེད་པ་སྟེ་ལྔའི་སྟེང་དུ། གཞན་ཡང་བུད་མེད་རིན་པོ་ཆེའི་ཡོན་ཏན་ཚིག་ཅལ་ཅོལ་མེད་པར་གྱུར་པ་དང་། ལོག་པར་ལྟ་བ་མེད་པར་གྱུར་པ་དང་། ཁྱིམ་ཐབས་མེད་ཀྱང་སྒྲ་དང་དྲི་དང་རོ་དང་རེག་བྱ་དག་གིས་དབང་དུ་མི་འགྱུར་བ་སྟེ་ཡོན་ཏན་བརྒྱད་དང་ལྡན་པ་ཞིག་ཡོད་པར་བསམ། མ་རྨོས་པའི་ལོ་ཏོག་གི་ནང་ངོས་ཀྱི་བར་སྣང་ལ་བློན་པོ་རིན་པོ་ཆེ་རྡོ་རྗེ་དང་རིན་པོ་ཆེ་མཐོན་ཀ་དང་མརྒད་དང་སྤུག་ལ སོགས་པའི་རིན་པོ་ཆེ་སྣ་ཚོགས་ཀྱིས་ཕྱོགས་རབ་ཏུ་འགེངས་ཤིང་འབྱོར་པ་ཤིན་ཏུ་ཆེ་བ། ནམ་ཡང་མི་ཉམས་པར་གནས་པ། གཡོ་སྒྱུ་མེད་ཅིང་གཞན་ལ་གནོད་འཚེ་མི་བྱེད་པ། སྐྱེ་བོ་ཐམས་ཅད་ཀྱིས་ཕ་ལྟ་བུར་འཛིན་ཅིང་། མཐོང་བ་ཙམ་གྱིས་ཡིད་དགའ་བར་འགྱུར་བའི་ཡོན་ཏན་དང་ལྡན་པ་ཞིག་ཡོད་པར་བསམ། ཤར་ལྷོའི་ནམ་མཁའ་ལ་གླང་པོ་རིན་པོ་ཆེ་རྐང་ལག ༄༅། །བཞི། སྣ མཚན་མ། མཇུག་མ་མ་ཟག་པ་སྟེ་ཡན་ལག་བདུན་ས་ལ་གནས་པ། མདོག་གངས་རི་ལྟར་དཀར་བ། གླང་པོ་ཕལ་པ་སྟོང་གི་སྟོབས་དང་ལྡན པ། གླང་པོ་གཞན་གྱིས་དེའི་རྫི་ཚོར་བ་ཙམ་གྱིས་ཀྱང་མདུན་དུ་འདུག་པར་མི་ནུས་པ། ཆུ་དང་སྐམ་ས་དང་བར་སྣང་སྟེ་གསུམ་ལ་གཡུལ་འགྱེད་པར་འགྱུར་བ། ཤུགས་ཉིན་གཅིག་ལ འཛམ་བུའི་གླིང་ལན་གསུམ་བསྐོར་བར་ནུས་པ། ཅང་ཤེས་པ་སྐུད་པས་ཀྱང་དཀྲི་བར་རུང་ཞིང་། ཁྱད་པར་རྒྱལ་པོས་ཞོན་པའི་ཚེ་མ་བསྐུལ་ཡང་རྒྱལ་པོའི་བསམ་པ་བཞིན་འཇུག་པར་འགྱུར་བ་དང་། ཞོན་པ་པོའི་ལུས་མི་འཁྲུག་ཅིང་སྲོག་ཆགས་གཞན་ལ་མ་གནོད་པར་དལ་གྱིས་འགྲོ་ཞིང་འགྱིང་བག་དང་ལྡན་པ་དང་། བྱིས་པ་རྣམས་ལ་འཇིགས་པར་མི་བྱེད་པ། མཆོག་ཏུ་བཀའ་ཉན་ཅིང་ཕ་རོལ་གྱི་སྡེ་ལས་རྒྱལ་བར་བྱེད་པའི་ཡོན་ཏན་དང་ལྡན་པ་ཞིག་ཡོད་པར་བསམ། ལྷོ་ནུབ་ཀྱི་བར་སྣང་ལ་རྟ་མཆོག་རིན་པོ་ཆེ་མདོག་མེ་ཏོག་ཀུ་མུད་ཏ་ལྟར་དཀར་བ། ལྷའི་ནོར་བུའི་གཙུག་རྒྱན་དང་སྒ་སྟན་སོགས་རྒྱན་དཔག་ཏུ་མེད་པ་དང་། བཀྲ་ཤིས་པའི་རི་མོ་དུ་མས་བརྒྱན་པ མདོག་དང་དབྱིབས་དང་བོང་ཚད་ཕུན་སུམ་ཚོགས་པ། རྒྱལ་པོས་འཛམ་ གླིང་ལན་གསུམ་བསྐོར་ཅིག་ཅེས་བསྒོ་ན་ཉིན་གཅིག་ལ་ངལ་བ་མེད་པར་བསྐོར་བར་བྱེད་པ། ལུས་ལ་ནད་སོགས་ཀྱི་སྐྱོན་མེད་ཅིང་གཟི་བརྗིད་དང་ལྡན་པ། ཞོན་པ་པོའི་ལུས་མི་འཁྲུག་ཅིང་ཀུན་གྱི་ཡིད་དུ་འོང་བའི་ཡོན་ཏན་དང་ལྡན་པ་ཞིག་ཡོད་པར་བསམ ནུབ་བྱང་གི་བར་སྣང་ལ་དམག་དཔོན་རིན་པོ་ཆེ་སྐྱེ་བོ་གཞན་ལ་གནོད་འཚེ་མེད་ཅིང་ཆོས་མ་ཡིན་པའི་སྤྱོད་པ་ཐམས་ཅད་སྤོང་བ། འཇིག་རྟེན་གྱི་བྱ་བ་མཐའ་དག་ལ་མཁས་ཤིང་ཡང་དག་པའི་ཐ་སྙད་དང་ལྡན་པའི་ལས་སྒྲུབ་པ་ལ་ལུས་སེམས་སྐྱོ་ངལ་མེད་པ། རྒྱལ་པོའི་ཡིད་ལ་གང་བསམ་པ་ཐམས་ཅད་སྨྲ་མི་དགོས་པར་ཤེས་ནས་སྒྲུབ་པར་བྱེད་པ། བསྟན་འགྲོ་ལ་འཚེ་བའི་ཕ་རོལ་གྱི་རྒོལ་བ་འཇོམས་པའི་དཔུང་ཚོགས་ཡན་ལག་བཞི་ཕ་རོལ་གྱི་དགྲ་སྡེའི་ཕྱོགས་སུ་འགྲོ་བ་དང་། སྒར་ཕབ་སྟེ་གནས་པ་དང་། ཚུར་ལྡོག་པའི་གཡུལ་གྱི་བྱ་བ་ཐམས་ཅད་ལ་མཁས་ཤིང་དབང་བསྒྱུར་བ་ལ་སོགས་པ་རྒྱལ་པོའི་བྱ་བ་ཐམས་ཅད་བྱེད་པའི་ཡོན་ཏན་དང་ལྡན་པ་ཞིག་ཡོད་པར་བསམ། རྒྱལ་སྲིད་བདུན་གྱི་གྲངས་འདྲེན་པ་ལ་མི་མཐུན་པ་ཁྱིམ་བདག་རིན་པོ་ཆེ་དམག་དཔོན་གྱི་ཚབ་ཏུ་བསྒྲངས་ནས། དམག་དཔོན་མ་བསྒྲང་བ་དང་། མདོ་ལས་བློན་པོ་དང་དམག་དཔོན་གཉིས ༄༅། །གཅིག་ཏུ་བྱས་ནས་ཁྱིམ་བདག་ལོགས་སུ་བསྒྲང་བ། དེ་གཉིས་གང་རུང་རེ་བསྒྲངས་ནས་བློན་པོ་རིན་པོ་ཆེ་ཟུར་དུ་བྱས་ཏེ བློན་པོ་རིན་པོ་ཆེ་གཟུགས་བཟང ཞིང་སྟོབས་ཆེ་བ་རྩལ་དང་ལྡན་ཅིང་ཐམས་ཅད་ལ་དཔྱད་བཟོད་པས་བདག་པོ་ལ་སྙིང་ཉེ་ཞིང་ངང་གིས་བརླིང་བ་དེད་དཔོན་བཞིན་བཟང་ལྟ་བུ་ཞེས་གསུངས་པ་རྣམས་ལས། འདིར་ནི་མངོན་བྱུང་གི་མདོ་ལས བཟོད་ལྡན་མཚུངས་པའི་ཁྱིམ་བདག་ནོར་ལྡན་ཏེ། །བློན་པོ་རིན་ཆེན་ཞེས་གསུངས་པ་ལྟར་དེ་གཉིས་གཅིག་ཏུ་བྱས་ན་དམག་དཔོན་ལོགས་སུ་བསྒྲང་བའི་ལུགས་སུ་བྱས་པ་སྟེ་དཔག་བསམ་འཁྲི་ཤིང་ལས། དེ་ནས་དེ་ཡི་རིན་ཆེན་བདུན། །དེ་ཚེ་འབྱུང་འགྱུར་འཁོར་ལོ་རྟ། །ནོར་བུ་གླང་པོ་བུད་མེད་དང་། །ཁྱིམ་བདག་དམག་དཔོན་སྔོན་འགྲོ་བའོ། །ཞེས་པ་དང་མཐུན་ནོ། །འོན་ཏེ་འཁོར་ལོས་སྒྱུར་བ་གླིང་གཅིག་དང་། གཉིས་དང་གསུམ་དང་། བཞི་ལ་དབང་བ་རིམ་པ་བཞིན་ལྕགས་དང་། ཟངས་དང་། དངུལ་དང་། གསེར་གྱི་འཁོར་ལོས་སྒྱུར་རྒྱལ་རྣམས་ལས། དང་པོ་གཉིས་གཞན་ལ་གཡུལ་འཐབ་པ་སོགས་མི་དགོས་ཀྱང་རིམ་པ་བཞིན་མཚོན་པ་ཙམ་དང་གཡུལ་བཤམ་པ་ཙམ་དགོས་པས་དམག་དཔོན་རིན་པོ་ཆེ་ དགོས་ལ། འཁོར་སྒྱུར་ཕྱི་མ་གཉིས དེ་ཙམ་ཡང་མི་དགོས་པར་དགྲ་སྡེ་སོགས་དབང་དུ་འདུ་བས་ན་འདིར་གསེར་གྱི་འཁོར་ལོར་གསུངས་པ་དང་། གླིང་བཞིར་དབང་བའི་འཁོར་སྒྱུར་གྱི་ཉེར་སྤྱོད་འབུལ་བ་ཡང་རིགས་པས་ན། འདིར་དམག་དཔོན་དགོས་པ་ཅི་ཡིན་སྙམ་ན། དེ་ནི་རྩོད་ལྡན་སྙིགས་མའི་དུས་འདིར་ཆོས་ཚུལ་བཞིན་སྒྲུབ་པ་རྣམས་ལ་རྒྱུ་མཚན་མེད་པར་སྡང་བ་མང་བས། དེ་དག་གི་གནོད་པས་མི་བརྫི་ཕྱིར་དམག་དཔོན་རིན་ཆེན་ཕུལ་ཏེ་མི་མཐུན་པའི་ཕྱོགས་ཐམས་ཅད་ལས་རྒྱལ་བའི་རྟེན་འབྲེལ་བསྒྲིགས་ན་དོན་ཤིན་ཏུ་ཆེ་བ་ལ་དགོངས་པ་ཡིན་ནོ།། ཞེས་ཚད་ལྡན་མཁས་པའི་གསུངས་ལས་བྱུང་ངོ་། །བྱང་ཤར་གྱི་བར་སྣང་ལ་གཏེར་ཆེན་པོའི་བུམ་པ་རྒྱུ་གསེར་ལས་གྲུབ་པ། ལྟོ་བ་ཆེ་བ། མགྲིན་པ་རིང་བ། མཆུ་འཕྱང་བ། ཞབས་ཞུམ་པ། ཡལ་ག་དང་འདབ་མ་ཤིན་ཏུ་རྒྱས་ཤིང་འབྲས་བུས་བརྒྱན་པའི་དཔག་བསམ་གྱི་ཤིང་གིས་ཁ་བརྒྱན་ཅིང་། རིན་པོ་ཆེ་སྣ་ཚོགས་ཀྱི་རྒྱན་དཔག་ཏུ་མེད་པས་སྤྲས་པ། ལྷ་རྫས་ཀྱི་དར་བཟང་པོས་མགུལ་པ་བཅིངས་ཤིང་ནང་དུ་འདོད་རྒུའི་གཏེར་གྱིས་ཡོངས་སུ་གང་བ། འགྲོ་བ་ཀུན་ལ་དགོས་འདོད་ཐམས་ཅད་ཡིད་བཞིན་དུ་འབྱུང་བའི་ཡོན་ཏན་དང་ལྡན་པ་ཞིག་ཡོད་ ༄༅། །པར་བསམ། དེ་ནས་ཚོམ་བུ་དེ་རྣམས་ཀྱི་ནང་དུ་ཕྱོགས་མཚམས་བརྒྱད་དུ་ཚོམ་བུ་རིམ་བཞིན་འགོད་དེ། སྒེག་པ་མ་ཞེས་སོགས་རྐང་པ་བརྒྱད་བརྗོད་པའི་ཚེ འཁོར་ལོ་རིན་པོ་ཆེའི་ནང་ངོས་ཀྱི་བར་སྣང་ལ། སྒེག་མོ་དཀར་མོ་ཕྱག་གཉིས་ཁྲོ་བོའི་ཁུ་ཚུར་གྱིས་རྡོ་རྗེ་རྩེ་ལྔ་པ་རེ་རེ་དཀུ་གཡས་གཡོན་དུ་སྙེམས་པའི་ཚུལ་གྱིས་འཛིན་ཅིང་། མགོ་གཡོན དུ་ཅུང་ཟད་འདུད་ཅིང་འགྱིང་བའི་ཚུལ་དང་ནོར་བུ་རིན་པོ་ཆེའི་ནང་ངོས་ཀྱི་བར་སྣང་ལ། ཕྲེང་བ་མ་སེར་མོ་ཕྱག་གཉིས་ཁྲོ་བོའི་ཁུ་ཚུར་གྱིས་རྡོ་རྗེ་རིན་ཆེན་ཕྲེང་བ་དཔུང་པའི་ཐད་དུ་ཕྱར་ནས་མཆོད་ཡུལ་རྣམས་ལ་དབང་བསྐུར་བར་མཛད་པའི་ཚུལ་དང་། བཙུན་མོ་རིན་པོ་ཆེའི་ནང་ངོས་ཀྱི་བར་སྣང་ལ གླུ་མ་དམར་སྐྱ་ཕྱག་གཉིས་རྡོ་རྗེས་མཚན་པའི་པི་ཝང་སེར་པོ་སྦྲེང་བ་ལ་བརྩོན་ཞིང་། ཡིད་འཕྲོག་པའི་གླུ་དབྱངས་ཤིན་ཏུ་སྙན་པ་སྒྲོགས་པའི་ཚུལ་དང་། བློན་པོ་རིན་པོ་ཆེའི་ནང་ངོས་ཀྱི་བར་སྣང་ལ། གར་མ་ཞལ་དང་ཞབས་གཉིས་