Tibetan
ཚོགས་མ་ལུས་པ་འབྱུང་བར སྡུད་པ་ལས། སངས་རྒྱས་སྲས་དང་ཉན་ཐོས་རང་རྒྱལ་ལྷ་རྣམས དང་། །འགྲོ་བ་ཀུན་གྱི་བདེ་སྐྱིད་ཆོས་རྣམས་ཇི་སྙེད་པ། །དེ་ཀུན་ཤེས་རབ་ཕ་རོལ་ཕྱིན་པ་མཆོག་ལས་བྱུང་། །ཞེས་པ་ལྟར་རོ། །དེས་ན་དེ་ཉིད་ལས།སེམས་ཅན་ཀུན་གྱི་ཡོན་ཏན་མཆོག་ཏུ་འགྲོ་བ་དང་། །སངས་རྒྱས་ཡེ་ཤེས་མཆོག་ཏུ་རྨད་དུ་བྱུང་བ་དང་། །ཆོས་ཀྱི་སྦྱིན་པ་རབ་མཆོག་དམ་པ་སྦྱིན་འདོད་གང་། །ཕན་མཛད་རྣམས་ཀྱིས་གནས་མཆོག་འདི་ལ་བསྟེན་པར་གྱིས། ཞེས་བདེ་བར་གཤེགས་པ་མཆོག་གིས་བདག་ཅག་ལ་གདམས་ངག་ཏུ་གནང་བ་དོན་ལྡན་དུ་བྱའོ། །དེ་ལྟ་བུའི་ཚུལ་ལ་གཅིག་ཏུ་ཡིད་ཆེས་བརྟན་པའི་སྒོ་ནས་བྱིན་རླབས་ཉེ་བརྒྱུད་ཀྱི་མན་ངག་ཟབ་མོའི་ཁྲིད་ཡིག་ལེགས་པར་གསལ་བར་བྱས་པ་འདིས་ཀྱང་དུས་ངན་སྙིགས་མའི་སྐྱོན་ཚོགས་མཐའ་དག་ཞི་བ་དང་། རྒྱལ་བསྟན་རིན་པོ་ཆེ་ཕྱོགས་དུས་ཀུན་ཏུ་དར་ཞིང་རྒྱས་ཏེ་འགྲོ་བ་ཀུན་གྱི་བདེ་སྐྱིད་གོང་འཕེལ་དུ་གྱུར་ནས་རང་གཞན་དོན་གཉིས་ལྷུན་གྱིས་གྲུབ་པའི་དགེ་མཚན་ཀུན་ཏུ་གསལ་བར་འགྱུར་པར་གདོན་མི་ཟའོ། །སླར་ཡང་སྨྲས་པ། གང་ཞིག་ངག་བརྗོད་རྟོག་བསམ་ལས་ འདས་སོ་སོ་རང་རིག་ཡེ་ཤེས་མཆོག་གི་ཚུལ། །སྐྱེ་དང་འགགས་མེད་ནམ་མཁའི་རང་བཞིན་འཕགས་ཚོགས་ཀུན་ཡུམ་ཤེས་རབ་ཕ་རོལ་ཕྱིན། །དུས་གསུམ་རྒྱལ་ཀུན་བསྐྱེད་པའི་ས་བོན་གཅིག གྱུར་ཐབས་མཆོག་བྱང་ཆུབ་སེམས་ཀྱི་གྲོགས་དང་བཅས། །བྱང་ཆུབ་སྤྱོད་པའི་རྗེས་བསླབ་སྒྲིབ་ཀུན་གཅོད་ལ་དམ་ཆོས་བདུད་གཅོད་ཅེས་སུ་གྲགས། །སྐྱེས་མཆོག་དམ་པའི་ཀླུ་དབང་ལས་བྱུང་བདག་བློའི་གསེར་ལྡན་ཁྱོན་དུ་ཡོངས་འཁྱིལ་བ །རྣམ་དག་ལུང་རིག་རིན་ཆེན་གཏེར་གྱུར་དོན་ཟབ་ཡན་ལག་བརྒྱད་ཀྱི་རོ་བཅུད་ལྡན། །ལྷག་བསམ་དགའ་བ་བརྒྱ་པའི་མཐུས་བསྒྲུབ་སྨིན་གྲོལ་འཆི་མེད་སྲོག་འཚོའི་དཔལ་སྦྱིན་པའི །ལེགས་བཤད་བདུད་རྩིའི་རོལ་མཚོ་ལེགས་པར་གྲུབ་ཀྱི་སྐལ་ལྡན་སྐྱེ་བོས་དགའ་སྟོན་མཛོད། །སངས་རྒྱས་ཀུན་བདག་གཏེར་ཆེན་བླ་མ་དེའི། །རྡོ་རྗེ་ལུང་གིས་གནང་བ་ཐོབ་པ་དང་། །དགོངས་བརྒྱུད་སྙིང་ལ་འཕོས་པའི་རྟེན་འབྱུང་གིས །འདི་བྱས་བྱིན་རླབས་རྒྱ་མཚོའི་གཏེར་མཛོད་ཡིན། །སྔོན་རབས་དམ་པའི་གདམས་བཅུད་མིག་སྨན་ལ། ཆགས་སྡང་གཏམ་གྱི་དུག་ངད་བསྲེས་བསྲེས་ནས །ཕྱོགས་འཛིན་རྨོངས་པའི་རབ་རིབ་སླར་བསྐྱེད་བཞིན །བློ་གྲོས་མིག་བཟང་འབྱེད་རློམ་བདུད་ཀྱི་ལས །རིང་བརྒྱུད་ཡེ་ཤེས་མཁའ་འགྲོའི་ ༄༅། །གསུང་གི་དོན། །ཉེ་བརྒྱུད་གྲུབ་པའི་ཁྱུ་མཆོག་ས་ར་ཧའི །ཐུགས་བཅུད་ཆུ་བོ་གཅིག་འདྲེས་ཟབ་ཁྲིད་འདི །བརྒྱུད་གསུམ་རིག་འཛིན་ཡོངས་ཀྱི་དགོངས་པའི་མཐིལ། །ལྟས་ངན་གཡང་ལེན་བདུད་ཀྱི་གཅོད་ཡུལ་ནི །ཞེ་སྡང་གདུག་པའི་ཡིད་ཅན་འདྲེ་གདོན་ཀྱང་། །ཐབས་ཀྱིས་རྗེས་བཟུང་བྱང་ཆུབ་ལ་འགོད་པའི། །སྙིང་རྗེའི་ཆོས་ཡིན་དྲག་ཤུལ་ལས་མ་ཡིན། །རྙེད་བཀུར་དོན་གཉེར་ཕུང་བྱེད་བྱུར་སེམས་ཀྱིས། །ཟོག་པོའི་འཆོལ་སྤྱོད་བརྟུལ་ཞུགས་སྤྱོད་པར་རློམ། །འདྲེ་འདུལ་བསྲུང་སྐྱོབ་གོལ་སའི་གཡང་འཕྱན་པའི། །མི་ནག་གཅོད་སྔགས་ཕོ་མོའི་གོ་འཕང་མཐོ། །དེ་ལྟ་ནའང་ཡང་དག་ལྟར་སྣང་གི། །རྣམ་དབྱེ་བདག་འདྲས་འབྱེད་པ་མི་འཚལ་ཡང་། །མ་གཅིག་ཡེ་ཤེས་མཁའ་འགྲོའི་བཀའ་ལུང་དང་། །བསྟུན་ན་ཚུལ་དང་ཚུལ མིན་ཅིས་མི་རྟོགས། །འཁོར་འདས་མཉམ་ཉིད་བཟང་ངན་རོ་སྙོམས་པ། །མ་བཅོས་གནས་ལུགས་མངོན་དུ་འགྱུར་བྱེད་དོ། །གཅེས་འཛིན་ཕུང་པོ་གཟན་དུ་བསྐྱུར་བྱས་ནས །རྒྱལ་སྲས་སྤྱོད་པ་ཕ་མཐར་ཕྱིན་བྱེད་ཡིན །སྟོང་ཉིད་རྟོགས་པས་སྲིད་རྩ་བདག་འཛིན་དང་། །སྙིང་རྗེ་ཆེན་པོས་བདག་གཅེས་འཁྲི་བ་གཅོད །ལྷར་སྣང་གོམས་པས་ཐ་མལ་སྣང་ཞེན་དང་། །གཉུག་མའི་དོན་རིག གཟུང་འཛིན་ཀུན་རྟོག་གཅོད། །དེ་ལས་གཞན་དུ་ལྷ་མཆོད་འདྲེ་བརྡུང་དུ། །ཚེ་འདིའི་ལག་ཆར་ཁྱེར་བའི་གཅོད་ལོག་གིས། །འཆིང་བྱེད་རྙེད་བཀུར་གྲགས་སྙན་སྒྲུབ་པ་ནི། །ཡང་དག་ལམ་གྱི་ཚུལ་ལས་རྣམ་པར་གོལ། །གྲུབ་བརྒྱའི་མེས་པོའི་བཀའ་ལུང་རྡོ་རྗེའི་ཚིག །དཔའ་བོ་མཁའ་འགྲོ་བྱེ་བའི་སྙིང་གི་ཏིག །རྣམ་གསལ་ལེགས་བཤད་ཚིག་གི་མཆོད་སྤྲིན་འདིས །གནས་གསུམ་མཁའ་འགྲོ་དགྱེས་པའི་གར་མཛོད་ཅིག །དུག་གསུམ་རྣམ་རྟོག་དགྲ་གཤེད་དཔུང་དང་བཅས། །དྲག་ཤུལ་ཉམས་ཀྱིས་འདུལ་བ་གཤིན་བཙན་ཀླུ །སྣང་སྲིད་སྟོང་པའི་དབྱིངས་བསྒྱུར་རེ་མ་ཏཱི། སྲོག་བདག་བཀའ་སྲུང་རྣམ་བཞིས་ཆོས་འདི་སྲུངས། །བདག་ཀྱང་སྐྱེས་ཐོབ་བློ་གྲོས་མི་ལྡན་ཀྱང་། །སྐྱེ་སྔོན་ལེ་ལོའི་རྒྱུ་མཐུན་མ་སྨད་པས །ངན་ཞེན་བྱ་བས་གཡེང་བའི་འདུ་བྱེད་ཉིད།། སྟོབས་བཙན་འདི་ཙམ་འབྲི་ལའང་ཡུན་རིང་ཐོགས། །འོན་ཀྱང་བློ་བརྩོན་སྙིང་སྟོབས་ཆེ་ལྡན་པའི །རྣལ་འབྱོར་སྔགས་སྐྱེས་ཟུང་གིས་ཡང་དང་ཡང་། །བསྐུལ་བས་བཏང་སྙོམས་སྡོད་པའི་རང་དབང་བྲལ། །བརྩོན་པ་བསྐྱེད་དེ་འདི་བརྩམ་མཐའ་རུ་ཕྱིན། །བདག་བློ་ཐོག་མེད་དུས་ཀྱི་རྨོངས་པ་ཡི། །དབང་གྱུར་མ་རྟོགས་ལོག་པར་བཤད་པའི་སྐྱོན། །ཅི་མཆིས་དཔང་གྱུར་ལྷ་དང་བླ་མ ༄༅། །དང་། །གཟུར་གནས་སྨྲ་དབང་མཁས་པའི་དྲུང་དུ་འཆགས། །དགེ་བ་འདི་ཡིས་བསོད་ནམས་ཡེ་ཤེས་ཚོགས། །རབ་རྫོགས་ས་ལམ་ཡོན་ཏན་མཐར་ཕྱིན་ནས། རྣམ་འདྲེན་རྒྱལ་བའི་གོ་འཕང་མྱུར་ཐོབ་སྟེ། །དོན་གཉིས་ལྷུན་གྱིས་གྲུབ་པའི་དཔལ་ཐོབ་ཤོག །ཅེས་ཉེ་བརྒྱུད་གཅོད་ཀྱི་ཁྲིད་ཡིག་གསལ་བར་བཀོད་པ་ལེགས་བཤད་བདུད་རྩིའི་རོལ་མཚོ་ཞེས་བྱ་བ་འདི་ནི་རྒྱལ་བ་ཀུན་གྱི་ངོ་བོ་བཀའ་དྲིན་མཚུངས་མེད་གཏེར་ཆེན་ཆོས་ཀྱི་རྒྱལ་པོའི་ཞལ་སྔ་ནས་ཀྱི་ཟབ་ཆོས་མཐའ་དག་གི་བདག་པོར་མངའ་གསོལ་ཞིང་། འདི་ཉིད་ཀྱི་བཤད་པ་འབྲི་བར་བཀས་གནང་བ་དང་། ཐོས་བསམ་སྒོམ་པའི་ཡོན་ཏན་མཆོག་མངའ་རྣལ་འབྱོར་གྱི་དབང་ཕྱུག་རྨ་ཐོག་པའི་རྣམ་འཕྲུལ་དུ་ལུང་གིས་བསྔགས་པ་རང་སློབ་རེ་ཀོང་བླ་མ་དགེ་འདུན་གྱིས་སྔ་མོ་ནས་ནན་ཏན་ཆེན་པོས་བསྐུལ་བ་དང་། དེ་རྗེས་ཕུར་ཐོགས་རིགས་སྔགས་འཆང་བ་ཀུན་བཟང་པདྨ་ཆོས་འཛིན་དང་། མགྲོན་ལུང་པ་དད་དམ་ལྡན་པ་རྡོ་རྗེ་སྨན་རྒྱལ་ནས་རྗེ་རྟ་ནག་པའི་ཚད་མའི་མཐའ་དཔྱོད་ཆེན་པོའི་དཔེ་ཆ་འབྱོར་བས་གཡར་དམ་བཅས་པ་དང་། དཔྱོད་ལྡན་དམ་པ་ཤེས་རབ་ནས་ཀྱང་དངུལ་ཊཾ་ལ་སོགས་པ་དང་བཅས། གཏེར་ཆེན་རིན་པོ་ཆེའི་རིགས་སྲས་མཁྱེན་དང་བརྩེ་བའི་དབང་ཕྱུག རིན་པོ་ཆེ་མཆོག་ནས་དྲི་མེད་ལྷ་རྫས་བཅས་བཀས་བསྐུལ་བ་དང་། ཉེ་ཆར་རྡོ་རྗེའི་ལུང་ཟིན་གྱི་སྐྱེས་མཆོག་ཕུར་ཐོགས་པ་རྡོ་རྗེ་རྣམ་པར་རྒྱལ་བས་དངུལ་སྲང་གང་གི་མཎྜལ་དང་། དད་དམ་ཤེས རབ་མཆོག་ལྡན་རི་ཁྲོད་པ་ཀུན་དགའ་ནས་ཀྱང་དངུལ་ཞོ་ལྔ་བཅས་བསྐུལ་བའི་ངོར། བླ་མ་སངས་རྒྱས་དུ་མའི་ཞབས་རྡུལ་སྤྱི་བོས་བླངས་ཤིང་གསར་རྙིང་རིས་མེད་ཀྱི་གྲུབ་མཐའི་ཟབ་གནད་ཤེས་པ་སྐྱེས་མིང་པ་པདྨ་ལུང་རྟོགས་རྒྱ་མཚོས་བྲིས་པའི་ཡི་གེ་པ་ནི་བསྐུལ་བ་པོའི་གཙོ་བོ་རྣམ་པར་རྒྱལ་བ་སྟེ། དགེ་བས་རྒྱལ་བསྟན་སྤྱི་དང་དམ་ཆོས་བདུད་གཅོད་མཆོག་གི་བསྟན་པ་ཕྱོགས་དུས་ཀུན་ཏུ་དར་ཞིང་རྒྱས་པར་གྱུར་ཅིག། ། ༈ པདྨའི་རིང་ལུགས་སྔ་འགྱུར་རྫོགས་པཆེ། །ངེས་དོན་སྙིང་པོའི་ཤིང་རྟ་བདུད་འཇོམས་གླིང་། །གང་གི་ཟབ་གཏེར་བསྟན་པ་སྲིད་མཐའི་བར། །མི་ནུབ་བཤད་དང་སྒྲུབ་པས་འཛིན་གྱུར་ཅིག །དགེའོ། །དགེའོ། །དགེའོ། །སརྦ་བི་ཛ་ཡནྟུ།། ༄༅། །ཨོཾ་སྭསྟི། སྤྲུལ་པའི་གཏེར་ཆེན་བདུད་འཇོམས་གླིང་པའི་ཟབ་གཏེར་གསང་བའི་ཆོས་སྡེ་ལས་འཕྲོས་པའི་ཁ་སྐོང་སྐོར་གྱི་གླེགས་བམ་༼ཝ༽ པ་འདིར། དབུ་ཤོག་ལྡེབ་གཅིག་གིས་ཐོག་དྲངས་ཏེ། གསང་ཆེན་ཐེག་པའི་ཡང་ཞུན་གཅོད་ཀྱི་གདམས་པ་གྲུབ་མཆོག་ས་ར་ཧ་པའི་སྙིང་ཐིག་ཟབ་མོའི་འགྲེལ་པ་ལེགས་བཤད་བདུད་རྩིའི་རོལ་མཚོ་ཞེས་བྱ་བ་ཆོས་བདག་པདྨ་ལུང་རྟོགས་རྒྱ་མཚོས་མཛད་པ་ཆོས་ཚན་གཅིག་ལ་ལྡེབ་༣༧༥ དང་། གླེགས་བམ་གྱི་དཀར་ཆག་རང་ཉིད་ལྡེབ ༡ བཅས་བསྡོམས་ལྡེབ་གྲངས་༣༧༦ བཞུགས། ༈ གྲུབ་པའི་འཁོར་སྒྱུར་བདུད་འཇོམས་གླིང་པ་ཡི། །ཟབ་གཏེར་གསང་བའི་ཆོས་མཛོད་ཡིད་བཞིན་ནོར། །ཀུན་བཟང་མིང་གིས་སྤར་དུ་བཏབ་སྤེལ་དགེས། །ཟབ་ཆོས་ཕྲིན་ལས་མི་ནུབ་རྟག་ཁྱབ་ཤོག ༈ པདྨའི་རིང་ལུགས་སྔ་འགྱུར་རྫོགས་པ་ཆེ། །ངེས་དོན་སྙིང་པོའི་ཤིང་རྟ་བདུད་འཇོམས་གླིང་། །གང་གི་ཟབ་གཏེར་བསྟན་པ་སྲིད་མཐའི་བར། །མི་ནུབ་བཤད་དང་སྒྲུབ་པས་འཛིན་གྱུར་ཅིག །དགེའོ།། ྋ 751