Tibetan
གསུངས། བདག་གིས་འདི་ལྟར་ནམ་མཁའ་མིག་གིས་མཐོང་བས་མ་ལགས་ཏེ། སེམས་ཀྱིས་སེམས་མ་མཐོང་ན་ནམ་མཁའ་མངོན་དུ་གྱུར་པས་ཅི་ལ་ཕན་ཞུས་པས། སེམས་ཀྱིས་སེམས་ལ་བལྟ་བ་ནི་བལྟ་མཁན་བལྟ་ས་གཉིས་སུ་ཡོད་པས་ཤེས་པས་རྣམ་རྟོག་ལ་བལྟ་བ་མི་རྒན་གྱིས་བྱིས་པའི་རྩེད་མོ་ལ་བལྟ་བ་དོན་མེད་པ་དང་མཚུངས་པ་ཡིན། འཁོར་འདས་ཐམས་ཅད་ནམ་མཁའ་ཉིད་ ལས་མི་གཞན་པར་ནམ་མཁའ་ཉིད་དུ་རོ་གཅིག་པའི་ངང་ཚུལ་ཤེས་ཕན་ཆད་ནམ་མཁའ་མིག་གིས་མ་བོར་ཙམ་གྱིས་ཆོག་པའི་དོན་ནི་ཡེ་གནས་ཀྱི་ཤེས་པ་དེ་མིག་ཤེས་སུ་སྣང་ཞིང་མིག་དེ་ཤེས་པ་དེ་ལས་ངོ་བོ་གཞན་དུ་མེད་པའི་ཚུལ ཤི་བའི་རོ་ལ་གཟུགས་སྣང་བའི་མིག་མེད། རྨི་ལམ་དུ་མིག་མེད་པ་ལས་གཟུགས་སྣང་མངོན་དུ་བྱེད། བར་དོ་བ་ལ་ཡང་མིག་མེད་དེ་གཟུགས་སྣང་མངོན་དུ་བྱེད་པ་དེས་ཤེས། ཡེ་གནས་ཀྱི་ཤེས་པ་ཡིན།སེམས་ཅན་ཐམས་ཅད་ཀྱིས་གཞི་མངོན་དུ་མ་གྱུར་པས་འཁྲུལ་པ་ཡིན་པ་ལས། དེ་ལས་གཞན་པའི་རྣམ་རྟོག་མ་མཐོང་བས་འཁྲུལ་པ་མ་ཡིན་པའི་ཚུལ། སེམས་ཅན་ཐམས་ཅད་རྣམ་པར་རྟོག་པ་མངོན་ཞེན་ལ་བརྟེན་ནས་འཁྲུལ་པའི་ཚུལ་ལ་ལྟོས་ཤིག །དེས་ན་རྣམ་པར་རྟོག་པ་ནི་བསྒྱུར་བྱ་ཡིན། འཁོར་འདས་ཀྱི་ཆོས་ཐམས་ཅད་ནམ་མཁའི་རང་བཞིན་ལས་མ་འདས་པར་ངེས་ཤེས་གཏིང་ནས་འདྲོངས་པ་ཞིག་བྱུང་ཕན་ཆད་ནམ་མཁའ་རྣམ་པར་དག་པ་ཞེས་བྱ་བ་ཡིན་པས་དུས་གསུམ་དུ་ངང་མངོན་དུ་གྱུར་པ་ལས་འདས་མི་རུང་སྟེ འདི་ལ་གོམས་འདྲིས་ཀྱི་གནད་ཐེང་ན་མཐར་ཆོས་ཉིད་སྤྲོས་མཐའ་བྲལ་བའི་དབྱིངས་མངོན་དུ་འགྱུར་བ་ནི་དཔེར་ན་ནམ་ལངས་ཚེ་མུན་པ་མེད་ ༄༅། །པ་ལྟ་བུར་སྒོམ་སྒྲུབ་འབད་རྩོལ་དང་བྲལ་བ་ཞིག་གི་ཐོག་ཏུ་ཕེབས་པར་འགྱུར་ངེས་སོ། །ཞེས་གསུངས་ཤིང་མི་སྣང་བར་ཡལ་ལོ །དུས་དེ་ནས་བཟུང་སྟེ བདག་གིས་ནམ་མཁའ་མིག་གིས་མ་བོར་ཙམ་ལ་ལམ་བྱས་ནས་རྩེ་གཅིག་ཏུ་ཉམས་སུ་བླངས་ནས་ཆོས་ཉིད་ཕྱོགས་མཐའ་དང་བྲལ་བའི་དབྱིངས་ཐོག་ཏུ་ཕེབས་ནས་རྟོགས་པ་ཀློང་བརྡོལ་བ་ཡིན། འཁོར་འདས་གང་ལས་ཆོས་ཀུན་ཡོངས་སྣང་ཞིང་། །སྤྲོས་པའི་ཆོས་སོ་ཅོག་དང་རྣམ་བྲལ་བ། །གདོད་མའི་གཞི་དབྱིངས་ནམ་མཁའི་ངོ་བོ་ཉིད། །ནམ་མཁའ་ཉིད་ལས་གཞན་གྱི་དཔེས་མི་མཚོན། །བདེ་བར་གཤེགས་པའི་ཤེར་ཕྱོགས་མདོ་ལས་ཀྱང་། །ཤེས་རབ་ཕ་རོལ་ཕྱིན་ལ་རྣལ་འབྱོར་དུ།།བྱེད་ན་ནམ་མཁའ་རྣལ་འབྱོར་བྱེད་དོ་ཞེས། །གསུངས་པའི་དོན་གྱི་མཐར་ཐུག་དགོངས་པས་རིག །ཇི་ལྟར་ཕྱི་རོལ་ཇི་བཞིན་ནང་དེ་བཞིན། །ཕྱི་ནང་གང་ཡིན་ནང་གི་རང་གདངས་ཏེ། །ནང་གདངས་གང་ཡིན་ཕྱི་རོལ་ལྟ་བུར་མངོན། །ཐ་དད་ཆོས་སུ་མིང་བརྡས་སྒྲོ་རུ་བཏགས། །སྨྲ་བསམ་བརྗོད་མེད་བརྗོད་པས་ཚུལ་བྱས་ཤིང་། །མཚོན་མེད་དོན་དེ་མཚོན་པས་ཡོངས་མཚོན་པ། །དུས་གསུམ་རྒྱལ་རྣམས་ཐབས་ལ་མཁས་ཚུལ་ཏེ། །དོན་ དམ་དབྱིངས་ལ་དཀྲི་བའི་འཇུག་སྒྲོ་ལགས །ཡེ་རིག་ཡུལ་འཛིན་ཤེས་པར་འཕོས་པ་ལ །རིག་རྩལ་ཤེས་རབ་ཆེན་པོས་རྒྱས་ཐེབ་ན། །མིག་དབྱིངས་ཀ་ཏི་ཤེལ་གྱི་གསང་ལམ་ནས། ཕྱི་ནང་དབྱེར་མེད་སྟོང་པའི་དེ་ཉིད་རིག །ཐེག་མཆོག་རྒྱལ་པོའི་གཏམ་གྱི་སེང་གེའི་སྒྲས །བློ་དམན་རི་དྭགས་ཚོགས་རྣམས་སྐྲག་བྱེད་དེ། །ཤིན་ཏུ་ཟབ་པར་གྱུར་པའི་ཆོས་ཚུལ་ལ། ཕལ་གྱིས་བརྒྱུད་མར་རྒོལ་བ་ཆོས་ཉིད་ཡིན། །ནང་གི་དམ་པ་ཡེ་གནས་ཆོས་སྐུ་དེ། །རང་གི་ཡེ་ཤེས་མིག་གིས་མཐོང་བ་ལས། །གཞན་པའི་དོན་གྱི་ཐབས་ཚུལ་འགའ་མཆིས་ན། ཟབ་ཞི་སྤྲོས་བྲལ་རྟོགས་དཀར་གསུངས་པ་ཅི །དེ་ནས་ལོ་ཁྱིམ་བཅོ་བརྒྱད་ལ་བབས་པའི་དབྱར་ཟླ་འབྲིང་པོའི་ཚེས་བཅུའི་ཉིན་མོ་དགུང་ཐུན་གྱི་མཚམས་སུ་ཟོ་ལག་བཟུང་སྟེ་ཆུ་ལེན་དུ་ཕྱིན་པ་ན་ནམ་མཁའ་ནས་གཏོར་མ་ཞིག་ཟོ་ལག་གི་ནང་དུ་ལྷུང་བྱུང་བས་ནམ་མཁར་གྱེན་དུ་བལྟས་པས་བྱ་རོག་ཞིག་འཕུར་འདུག་པ་མཐོང་བས་དེས་འཕང་བར་ཤེས་ཤིང་དངོས་གྲུབ་ཀྱི་པྲ་ལྟས་སུ་གོ་ནས་གནས་གསུམ་དུ་གཏུག་སྟེ་ཟོས དོ་ནུབ་མཁའ་འགྲོ་མ་གསལ་ཁྱབ་དབང་མོ་ཡིན་ཟེར་བའི་བུ་མོ་ཞིག་ན་རེ་ཁར་སང་གི་གཏོར་མ་དེ་ནི་བལ་ཡུལ་ཤིང་ཀུན་གྱི་ཚལ་ནས་བལ་པོ་སུ་ ༄༅། །ཁ་ཤཱི་ཞེས་བྱ་བའི་སྒྲུབ་གཏོར་མགོན་པོ་བྱ་རོག་གདོང་ཅན་ལ་མཁའ་འགྲོ་རྡོ་རྗེ་ཕག་མོས་བསྐུར་བ་ཡིན་ཏེ་ཐུན་མོང་གི་དངོས་གྲུབ་ངེས་པར་ཐོབ་ཟིན་པ་ཡིན་པས་ཁྱོད་དགའ་བར་གྱིས་ཤིག་ཅེས་ཟེར་ཞིང་མི་སྣང་བར་ཡལ ལོ་ཁྱིམ་དེའི་དགུན་ཟླ་ར་བའི་ཚེས་བཅུའི་ཉིན་ཕྱུགས་རྫི་ལ་ཕྱིན་པའི་ལམ་ཁ་ཞིག་ཏུ་རྡོའི་རིལ་བུ་ཡུངས་འབྲུ་ཙམ་དགུ་རྡོ་ཕ་ཝང་ཞིག་གི་ཐོག་ཏུ་སྔོ་ཧྲིལ་ལེ་འདུག་པ་མཐོང་བའི་མོད་ལ། ཀཱ་ཡ་ཝཱཀ་ཙིཏྟ་སརྦ་སིདྡྷི་ཕ་ལ་ཧོཿ ཞེས་པས་གནས་ལྔར་གཏུག་སྟེ་རོལ་བར་བྱས དོ་ནུབ་མཁའ་འགྲོ་ནམ་མཁའི་དབྱིངས་ཕྱུག་མ་ཡིན་ཟེར་བ་ཞིག་གིས་འདི་སྐད་ཟེར། ཡེ་ཡེ། ཨ་མའི་བུ་ཆུང་ཉོན་ཅིག །ཐེག་པའི་རྣམ་གྲངས་དུ་མ། །དོན་ཀུན་འདུས་པའི་ཀློང་མཛོད། །དེ་དག་རྫོགས་པ་ཆེན་པོ། །ཐིག་ལེ་དགུ་རུ་སྣང་བ། །ཁྱོད་ལ་ཨ་མས་གནང་ཡོད །དངོས་གྲུབ་ཡིན་པར་ཤེས་པའི། །བུ་ཆུང་ཤེས་རབ་ཅན་ཁྱོད། །བླ་མེད་མཆོག་གི་དངོས་གྲུབ། །ངེས་པར་ཐོབ་པ་ཡིན་ནོ། །ད་ནི་སྒོམ་པ་ཟབ་མོ། །གནད་དུ་བསྣུན་པར་ནུས་ན། །དགོངས་པ་ཀློང་དུ་བརྡལ་བའི། །དགོངས་གཏེར་སྐོར་གསུམ་རྡོལ་ནས། །འགྲོ་དོན་རྒྱ་ཆེར་འགྲུབ་འོང་། །ཞེས་ཟེར་ཞིང་མི་སྣང་བར་ཡལ ལོ། །ཡང་ལོ་ཁྱིམ་དེའི་དགུན་ཟླ་ཐ་ཆུང་གི་ཚེས་བཅོ་ལྔའི་ཉིན་སྦྱིན་བདག་མགོན་བསྟན་ཞེས་བྱ་བའི་ཀློག་འདོན་དུ་ཡོད་པའི་སྐབས་ཤིག་བུད་མེད་རྒན་མོ་ཞིག་གིས་ཁྱོད་ལ་ཟས་འདི་སྦྱིན་གྱི་ལྷག་མེ་དུ་རོལ་ཅིག་ཟེར་ནས་གྲོ་མ་སྤར་གང་སྟེར་བྱུང་བ་བདག་གིས་ཟ་གྲབ་བྱེད་དུ་ཡོད་པའི་སྐབས་སུ། མི་དམར་རྟ་དམར་ལ་ཞོན་པ་ཞིག་གིས་མདུང་དར་གྱིས་བདག་གི་ལག་སྐེ་རུ་བརྒྱབ་ནས་ཐར་གྱིས་གཏོར་བ་ལ་བདག་ཞེ་སྡང་སྐྱེས་ཏེ་ཁྱོད་ཀྱིས་ཅི་ཡིན་ཞེས་ང་རོའི་སྐད་ཀྱིས་སྨྲས་པས། ཁོ་ན་རེ། མོ་འདྲེས་ནད་ཀྱི་ས་བོན་འདེབས་པ་ཡིན་པས་ཟ་ཨེ་སྲིད་ཟེར། བདག་གིས་ཁྱོད་སུ་ཡིན་བྱས་པས། ང་ནི་བཙན་རྒྱལ་སྲོག་ལེན་དམར་པོ་ཡིན ཁྱོད་ཀྱི་བར་ཆད་སེལ་བའི་ལས་བྱེད་ཡིན་ཟེར། ངས་ཁྱོད་མཆོད་ན་ཇི་ལྟར་འདོན་སྨྲས་པས ང་དམ་མ་བསྒྲགས་པར་བོས་ན་འོང་བའི་སྐབས་མེད དེའི་ཕྱིར་འདི་ལྟར་དམ་སྒྲོགས་ལ་བོས ཧྲཱིཿ ཞེས་སྲོག་ནས་ཟུངས་ལ། དད་པ་དང་ནི་དམ་ཚིག་གཉན་པོ་ཡིས། །གནོད་སྤྲིན་བཙན་རྒྱལ་འཁོར་བཅས་འདིར་གཤེགས་ཤིག །གསོལ་ལོ་མཆོད་དོ་ཐུགས་དམ་གཉན་པོ་བསྐང་། །ཅི་འདོད་བསམ་བཞིན་འགྲུབ་པའི་ཕྲིན་ལས་མཛོད། །ཅེས་བརྗོད་ན་ང་གནས་ནས་སླེབས་འོང་ཞེས་ཟེར་ཞིང་ཉི ༄༅། །མ་ནུབ་ཕྱོགས་སུ་དམར་ཤར་གྱིས་བཞུད་སོང་ངོ་། །དེ་ནས་ལོ་ཁྱིམ་བཅུ་དགུ་ལ་བབས་པའི་ཚེ་བྲག་ལུང་ཞེས་བྱ་བའི་བྲག་ཕུག་ནང་དུ་སོང་བས་དེའི་ནང་ནས བུད་མེད་ན་སོ་རྒན་སོང་ཞིག་གིས་ཁྱོད་གར་འགྲོ་ཅི་ཡིན་ཟེར་བར། ང་འདི་རུ་ཐུན་ཞིག་བཟུང་ནས་འདུག་འདོད་པ་ཡིན། ཁྱོད་སུ་ཡིན་དྲིས་པས། བུད་མེད་ན་རེ། ང་ནི་གནས་འདིའི་བདག་མོ་བཙན་སྲོག་རྔམ་ཅན་གྱི་བུད་མེད་ཡིན། ཁྱོད་འདི་རུ་སྡོད་ན་ངས་གསོད་ངེས་པ་ཡིན། ཞེས་ཟེར་ཞིང་རྒྱབ་ཏུ་མཛུབ་ཚུགས་བྱས་ཏེ་ཕ་ཀི་ནི་ཁྱོད་འཆི་ལྟས་རེད་ཟེར། བདག་གིས་ཕྱིར་བལྟས་བྱས་པས་སྲེ་མོང་ཞིག་གིས་སྦྲུལ་རོ་ཞིག་དྲུད་ནས་འགྲོ་འདུག་པས་བསམ་པ་ལ་ང་ཤི་ཡང་གསོད་མཁན་ནི་བུད་མེད་འདི་ཡིན་ངེས་པས་འདི་གསོད་དགོས་སྙམ་དུ་ལག་པ་ལ་བརླབས་པས་ཡལ་སོང་། དེ་ནས་བདག་དེར་བསྡད་ཅིང་མདོ་བཟློག་ལན་གསུམ་བྱས་ཚེ་བྲག་གི་ནང་ནས་བྲག་ཆ་ལྟར་སྒྲ་འདི་གྲགས་བྱུང་།དེ་རུ་མ་འདུག་དང་ལྟས་ངན་བསྟན་པ་རྩེད་མེ མིན་རེ་ཀན་ཟེར། ལོ་ཁྱིམ་དེའི་དགུན་ཟླ་འབྲིང་པོའི་ནང་དུ་འཇམ་དཔལ་སྨྲ་བའི་སེང་གེའི་བསྒོམ་བཟླས་ལ་ཞུགས་ཚེ་ཟླ་བ་གཅིག་ཙམ་སོང་བའི་མཐར་རིལ་བུ་རྣམས་འཕེལ་ཞིང་འཕུར་བྱུང་། དེ་ནུབ་འཇམ་དཔལ་གྱི་ཞལ་མཐོང་ནས་འདི་སྐད་ཅེས། བུ་ཁྱོད་ཀྱི་ཅི་འདོད་པ་ངས་སྦྱིན་གྱི་གསུངས་པ་ལ། ངས་ཡི་གེ་མཁས་པ་ཞིག་འདོད་ཀྱི་ཞུས་པས། ཡི་གེ་ནི་མི་སྐྱ་འགས་ཀྱང་ཤེས སྲིད་དེ་ཅི་བྱེད་གསུངས། འོ་ན་ཤེས་རབ་ཞིག་འདོད་ཞུས་པས། ཀྱེེ། རིགས་ཀྱི་བུ་ཁྱོད་ཚུར་གསོན་དང་། །ཀློག་འདོན་མཁས་ཙམ་ཤེས་རབ་མིན། །འདི་བསླབ་ཤེས་པ་ཐུན་མོང་ཡིན། ཤེས་རབ་བྱ་བ་དེ་མ་ཡིན། །ཆོས་ཉིད་དེ་བཞིན་ཉིད་ཀྱི་ངང་། །མངོན་གྱུར་སྟོང་ཉིད་དོན་རྟོགས་ན། །ཤེས་རབ་དོན་གྱི་དམ་པ་ཡིན། །ང་ཉིད་མི་གཡོའི་ངང་དུ་གནས །ཁྱབ་བརྡལ་ཆེན་པོར་སྤྲོས་དང་བྲལ། །ང་ཉིད་གསལ་ཁྱབ་ཆེན་པོར་བརྡལ། །ཆོས་ཉིད་ནམ་མཁའི་ཁོར་ཡུག་ལ། །ཤེས་རབ་ཆེན་པོའི་ཉི་མ་ཡིན། །ལམ་འབྲས་ཆོས་རྣམས་ཐམས་ཅད་ཀུན། །ཟད་མེད ཀློང་ནས་བརྡོལ་བའི་ཚེ། །ང་ཉིད་སྙིང་ལ་ཞུགས་པ་ཡིན། །འཁོར་འདས་ཆོས་རྣམས་ཐམས་ཅད་ཀུན །རྨི་ལམ་སྒྱུ་མ་ལྟར་མཐོང་ཚེ། །ང་ཡི་དགོངས་བརྒྱུད་འཕོས་པ་ཡིན། །སེམས་སྣང་ནམ་མཁའི་རོལ་པ་རུ། །ཕྱམ་བརྡལ་ཉིད་དུ་རྟོགས་པའི་ཚེ། །ང་ཡི་དགོངས་པ་འཕོས་པ་ཡིན། །ཤེས་རབ་ཆེན་པོའི་སྤྱན་ཡངས་པས། །ནམ་མཁའ་མངོན་དུ་གྱུར་པའི་ཚེ། །ང་དང་ ༄༅། །གཉིས་སུ་མེད་པ་ཡིན། །ཤེས་རབ་ཆེན་པོ་ཁྱོད་ལ་ཐོབ། །ཡེ་ཤེས་མིག་ཀྱང་ཁྱོད་ཀྱིས་ཐོབ། །ད་ནི་ང་དང་ཁྱོད་གཉིས་པོ། །གཉིས་སུ་མེད་པའི་ངང་དུ་ཨ། ཞེས་གསུངས་ཤིང་སྒྲུབ་ཐབས་སྔགས་དང་བཅས་པ་གནང་ནས་སྙིང་གར་ཐིམ་པས་ཆོས་ཉིད་ཀྱི་ངང་དུ་ཡུན་ཅིག་འབྱམས་ཀླས་སོ། །ལོ་ཁྱིམ་ཉི་ཤུ་ལ་བབས་པའི་དཔྱིད་ཟླ་འབྲིང་པོའི་ཚེས་བརྒྱད་ཀྱི་ནུབ་རྨི་ལམ་ན་ཡུལ་ཡངས་པ་ཆེན་པོ་མེ་ཏོག་སྣ་ཚོགས་རྒྱས་པའི་ཚལ་ཞིག་ཏུ་རིན་པོ་ཆེ་དུང་ལས་གྲུབ་པའི་མཆོད་རྟེན་ལ་མཁའ་འགྲོ་མ་མང་པོས་བཀུར་སྟི་བྱེད་ཀྱིན་འདུག་པའི་གམ་དུ་སླེབས། དེའི་ཚེ་བུམ་སྒོའི་ནང་དུ་བཅོམ་ལྡན་འདས་མགོན་པོ་མི་བསྐྱོད་པ་ཡིན་ཟེར་བའི་བླ་མ་ཆོས་གོས་རྣམ་གསུམ་ཀླུབས་ཤིང་ཕྱག་གཉིས་ས་གནོན་དང་མཉམ་བཞག་མཛད་པ་ཞིག་ཞལ་ནས་ཅིའང་མི་གསུང་བར་བཞུགས་པ་ལ སྐུ་ལས་སྒྲ་བྲག་ཆ་ལྟ་བུར་རང་བྱུང་དུ་གྲགས་པ་ནི ཨ་ཨེ། འདུས་བྱས་ཆོས་རྣམས་ཐམས་ཅད་ཀུན །སྒྱུ་མ་སྒྱུ་མའི་རྫུན་རིས་མང་། སྒྱུ་མས་སྒྱུ་མཁན་བསླུས་པའི་དཔེ །སྨིག་རྒྱུ་རྒྱུ་རྐྱེན་ཚོགས་པའི་འཕྲུལ། །རི་དྭགས་ཆུ་རུ་རློམས་པའི་དཔེ། །རྨི་ལམ་སྣང་བ་སྣ་ཚོགས་པ། །རྨི་མཁན་དངོས་ཞེན་འཁྲུལ་པའི་དཔེ། ཐར་ གཟུགས་བརྙན་མཐོང་བ་མངོན་སུམ་ཡང་།འཆར་ཡུལ་ལས་ནི་གཞན་མ་གྲུབ །དྲི་ཟའི་གྲོང་ཁྱེར་ཆེན་པོ་ཡང་། །རང་སྣང་ལས་ནི་གཞན་མ་གྲུབ། །བྲག་ཆ་སྣང་བར་གྱུར་བ་ཡང་ཀི་སྒྲ་གཅིག་ལས་གཞན་མ་ཡིན། །ཆུ་ལས་ཆུ་ཟླ་སྣང་ན་ཡང་། །ཆུ་ཉིད་ལས་ནི་ཟླ་བ་མིན། །ནམ་མཁར་འཇའ་ཚོན་སྣང་བ་ཡང་། །ནམ་མཁའ་ཉིད་ལས་གཞན་མ་གྲུབ། །མིག་ལ་རབ རིབ་སྣང་བ་དེ །མིག་རྐྱེན་ལས་ནི་གཞན་མ་ཡིན །མེ་ལས་མེ་འོད་སྣང་བ་ཡང་། །མེ་ཉིད་ལས་ནི་གཞན་མ་ཡིན། །ང་ལས་ཕ་རོལ་སྣང་བ་ཡང་།།བདག་ཉིད་ལས་ནི་གཞན་མ་ཡིན། གཞི་ལས་གཞི་སྣང་མཆེད་པ་ཀུན། །གཞི་ཉིད་ལས་ནི་གཞན་མ་ཡིན། །སེམས་ལ་སྣང་བའི་ཆོས་སོ་ཅོག །སེམས་ལས་དངོས་པོ་གཞན་མ་ཡིན། །ནམ་མཁའ་ནམ་མཁར་འཛིན་པས་འཆིང་། །གཞི་ཞེས་གཞན་དུ་འཛིན་པས་འཆིང་།རྣམ་རྟོག་སེམས་ཀྱི་ཆོ་འཕྲུལ་ལ །མངོན་ཞེན་དགྲ་རུ་འཛིན་པས་འཆིང་། །རྣམ་རྟོག་གནས་གྱུར་ཡེ་ཤེས་ལ། །འཚོ་སྐྱོང་བཅོས་དང་འགོགས་པས་འཆིང་། །ཨ་ནི་ནམ་མཁའ་རྣམ་དག་དབྱིངས། །ཨ་ནི་སྐྱེ་དང་འགགས་པ་མེད། །ཆོས་དབྱིངས་ཡེ་ཤེས་སྙིང་པོ་ལ། །བརྗོད་པ་ཙམ་ནས་ཁྱབ་ཅིང་བརྡལ། །བརྗོད་གཞི་ ༄༅། །ཀུན་ཏུ་ཨ་རང་བྱུང་། །ཁྱོད་དང་ང་གཉིས་གཉིས་སུ་མེད། །བཟང་ངན་རེ་དོགས་སྤང་བླང་མེད། །ཡོད་དང་མེད་པའི་ཐ་སྙད་མེད། །ཐོབ་ཤོར་མེད་དོ་ཆོས་སྐུའི་དབྱིངས། །དོན་འདི་རྟོགས་ན་རྣལ་འབྱོར་ཡིན། །ཞེས་གསུངས་ཤིང་བདག་ལ་ཐིམ་པའི་སྣང་བ་བྱུང་ངོ་། །རང་སྣང་སྟོན་པ་རྒྱལ་བ་མི་བསྐྱོད་པས། །ངག་གི་རྩོལ་བས་འདུ་བྱེད་ཀྱིས་མིན་པར། །གསལ་སྟོང་སྐུ་ལས་གྲགས་སྟོང་འགགས་མེད་སྒྲས། །སྣ་ཚོགས་དཔེ་ཡིས་ཀུན་རྫོབ་རྟེན་འབྱུང་ཚུལ། །སྐྱེ་མེད་ཡི་གེས་གནས་ལུགས་དོན་བསྟན་པས། །སྣང་སྟོང་གཉིས མེད་བཅིང་དང་གྲོལ་མེད་པའི། །ནང་དབྱིངས་གཞི་དང་གཞི་སྣང་གྲོལ་འཁྲུལ་ཚུལ། །ཇི་བཞིན་རྟོགས་ནས་རྟག་ཆད་གཡང་ལས་གྲོལ །སྐུ་གསུང་ཐུགས་དང་སྒོ་གསུམ་དབྱེར་མེད་གྱུར། །ཧོར་ཟླ་བཅུ་གཉིས་པའི་ཚེས་ལྔའི་ནུབ་རྨི་ལམ་ན་བུད་མེད་དམར་མོ་ཞིག་གིས་སང་ཉིན་མཐོང་བ་མངོན་སུམ་པ་ཞིག་འབྱུང་རྒྱུ་ཡིན། ཁྲོ་དང་ཐབ་ཆ་ལ་བཅག་གྲུམ་ཆེན་པོ་བྱེད་འོང་ཟེར་ནས་ཡལ་སོང་། སང་ཉིན་སྦྱིན་བདག་མགོན་བསྟན་གྱི་སྲིང་མོ་སྐྱ་རིས་མ་སླེབས་བྱུང་བ་དང་མཉམ་དུ་བྱིས་པ་ཐལ་སྐྱ་ཞིག་བྱུང་ནས་ལྷག་ལྷག་དགོད་ཅིང་སྒྱེད་པུ་གསུམ་གྱི་ཐོག་ཏུ་ འཆམས་སྟབས་བྱེད་པ་མཐོང་བས། བདག་གིས་སྦྱིན་བདག་མགོན་བསྟན་ལ་ཁྱོད་ཀྱི་ཐབ་ཆ་ལ་གཟབ་པར་རེམ་ཞིག །ཐེའུ་རང་ཞིག་གིས་སྒྱེད་ཐོག་ན་རྩེ་བགད་བྱེད་འདུག་གི་སྨྲས་པས གཟབ་པར་བྱེད་ངེས་སོ་ཟེར། དེ་ནས་ཁལ་བཀལ་ཏེ་དེ་ཐོག་ཏུ་ཁྲོ་ཆེ་ཆུང་གསུམ་གཅིག་གི་ནང་དུ་གཅིག་བཅུག་སྟེ་བཅིང་ཐག་ལེན་དུ་ཕྱིན་པ་ན་གཡག་གིས་གློ་མཆོང་ཞིག་བྱས་ནས་ཁྲོ་གསུམ་པོ་རྡོ་ལ་བརྒྱབ་ནས་གཏོར་ཐལ། དེ་ནས་རང་ལོ་ཉེར་གཅིག་ལ་བབས་པའི་ཧོར་ཟླ་དང་པོའི་ཚེས་བཅུ་གསུམ་གྱི་ནུབ་མཁའ་འགྲོ་མ་སྔོན་མོ་དར་དཀར་གྱི་ཨང་རག་གསོལ་བ་རིན་པོ་ཆེའི་ཕྲེང་བ་མང་པོའི་རྒྱན་གྱིས་བརྒྱན་པ་ཞིག་བདག་གི་མདུན་དུ་སླེབས་མ་ཐག་མཁའ་ལ་ཉི་མ་ཤར་བ་བཞིན་དུ་སྣང་བ་གསལ་ཞིང་ཁྱོན་ཡངས་པའི་ཡུལ་མེ་ཏོག་སེར་པོས་ས་གཞི་གང་བའི་འོད་ནམ་མཁའ་ལ་འཕགས་པའི་སར་བུད་མེད་རྒན་གཞོན་གྱི་ཚོགས་མང་པོས་གླུ་འདི་ལྟར་གྱེར་འདུག །ཡེ་ཡེ། ངེད་མི་མིན་མཁའ་འགྲོའི་གླིང་ན། །ཁྱོ་མེད་ཞེ་རེ་རྨོངས་ཀྱི། །སྲིད་པའི སྡིག་གྲོགས་མི་མཁོ། །ཟག་མེད་བདེ་བ་སྟེར་བའི །ཐབས་མཆོག་བདེ་ཆེན་རྒྱལ་པོ། །རྙེད་རྒྱུ་ཨེ་ཡོད་སྙམ་ཀྱང་། །རེ་བའི་རྡོས་ཐག་ཆད་ཐལ། །ཐབས་མཆོག་བདེ་ཆེན་དབང་པོར། ༄༅། །བདེ་སྟོང་སྙོམས་པར་ཞུགས་ན། །གཅེས་པའི་བུ་ཞིག་རྙེད་བསམ། །འཁོར་བའི་དཔྱང་རྡོའི་བུ་ཚ། །ཀུན་ལ་ཡོད་ཀྱང་དགོས་མེད། །ཤེས་རབ་རིག་པའི་བུ་མཆོག །སུ་ལ་མེད་པས་ཨེ་རྙེད། །རྙེད་ན་ནམ་མཁའ་མཛོད་ཀྱི །དགའ་སྟོན་ཆེན་པོ་ལོས་བྱེད །ཅེས་ཡིད་འཕྲོག་པ་ཙམ་དུ་སྙན་པའི་གླུ་རིང་ལེན་ཅིང་། ཡང་མཁའ་འགྲོ་མ་ཞིག་གི ངག་ནས་འདི་སྐད་གླུ་རིང་ལེན་འདུག་གོ། །ཡེ་ཡེ། དགའ་དགའ་མཁའ་འགྲོའི་གྲོང་ཁྱེར། །སྐྱིད་སྐྱིད་མཁའ་སྤྱོད་གླིང་ཡིན། །མེད་མེད་གཞན་ན་མེད་དང་། །ཡོད་ཡོད་རང་ལ་རྫོགས་ཡོད། །གོ་གོ་གཏིང་ནས་གོ་དགོས། །ཤེས་ཤེས་དོན་གྱིས་ཤེས་དགོས། །རྟོགས་རྟོགས་ངང་གིས་རྟོགས་དགོས། །རིག་རིག་མངོན་དུ་གྱུར་དགོས། །གྲོལ་གྲོལ་རང་སར་གྲོལ་དགོས།། མི་མིན་མཁའ་འགྲོའི་གླུ་འདི། །མ་འོངས་དུས་སུ་བརྡ་ཡིན། །མ་བརྗེད་རབ་ཏུ་མ་བརྗེད། །ཁྱབ་ཁྱབ་ཀུན་ཏུ་ཁྱབ་པ། །བརྡལ་བརྡལ་ཀུན་ཏུ་བརྡལ་བ། །དག་དག་ཀ་དག་མཁའ་ལས།། གྲོལ་གྲོལ་ཡེ་གྲོལ་མ་ང་། །གྲུབ་གྲུབ་ལྷུན་གྲུབ་སྒྱུ་མ། །རང་རང་གཟུགས་བརྙན་ངོ་མ། །དོན་དོན་ཁྱོད་ཀྱི་དོན་དུ། །བཤད་བཤད་ཚིག་གིས་བཤད་ཡོད། །ད་ནི་ཚིག་འདི་ཉོན་དང་།། དེང་དུས་དཔག་བསམ་ལྗོན་ཤིང་། །ཡལ་ག་ལོ་འདབ་ཕྲ་ཞིང་། །འབྲས་བུ་མེ་ཏོག་མ་སྨིན། །ཤིང་གཞན་ཞིག་དང་ནོར་བས། །སུ་ལ་མཁོ་དགོས་མེད་ཀྱང་། །ཤིང་ལ་སྐྱེ་འགགས་མི འབྱུང་། །རྩལ་ལྡན་སེང་གེ་དཀར་མོ། །ཤར་གྱི་ཕྱོགས་སུ་མཆོང་ཚེ། །བསྡོངས་ཟླ་སེང་ཆུང་ཟུང་དང་། །འཕྲད་ནས་རང་སྐད་འདོན་པ། །སྙན་པའི་དབྱངས་སུ་མངོན་ནས། །སྡེར་ཆགས་ཁྱུ་ཚོགས་འགུགས་སྲིད །རབ་མཐོ་གངས་དཀར་རྩེ་རུ། །མ་བགྲོད་ངང་གིས་སླེབས་འོང་། །སྡེར་བཞི་གངས་ལ་བགྲད་ཅིང་། །སྤྱན་མིག་སྟེང་དུ་གཟིགས་པའི །རྩལ་ཆེན་གྲོགས་བཟང་གཉིས་འཛོམ། །བྱ་བྲལ་བྲག་སྐྱིབ་འཛིན་ཅིང་། །ཕྲུ་གུ་གཟན་གྱིས་སྐྱོངས་ཏེ། །ནམ་མཁར་དལ་གྱིས་འགྲོ་བའི། །ཐང་དཀར་བཅུ་ཕྲག་གཉིས་འབྱུང་། །རྒྱ་སྟག་ནགས་ཚལ་འཛིན་ཅིང་། །དཔའ་བའི་རྔམས་སྟབས་མིག་གིས །ཡངས་པའི་ཡུལ་ལ་བལྟ་ཞིང་། །རོ་བརྒྱའི་ཟས་བཅུད་སྤྱོད་པའི། །རྩལ་ཆེན་བཅུ་ཕྲག་གསུམ་ཡོད། །གསུང་སྙན་ཁུ་བྱུག་སྔོན་མོ། །སྤང་ལྗོངས་གཟན་ཚོལ་བྱེད་ཅིང་། །ལྗོན་ཤིང་རྩེ་རུ་ཕྱིན་ཏེ། །གསུང་སྙན་སྒྲོགས་པ་བཞི་འབྱུང་། །ནོར་བུ་ལག་ཏུ་ཐོགས་ནས། །རྒྱ་མཚོའི་གཏིང་ནས་རྩལ་རྫོགས། །ནམ་མཁའི་ ༄༅། །ཁམས་སུ་སླེབས་ཏེ། །ས་གསུམ་སྐད་ཀྱིས་འགེངས་པའི །གཡུ་འབྲུག་སྔོན་མོ་བདུན་བྱུང་། །དུག་ལ་ཁ་ཟས་བྱེད་ཅིང་། །མདངས་ལྔ་འོད་དུ་འབར་བའི། རྨ་བྱ་མཛེས་ལྡན་བཅུ་དྲུག །ལུས་མེད་མཁའ་འགྲོའི་མཛའ་ཡིན། །སྲིད་པའི་འདམ་རྫབ་ཁྲོད་ནས །ནོར་བུ་རིན་ཆེན་རྙེད་དེ། །བཀུར་སྟི་ཆེན་པོ་བྱེད་འབྲས། །དབུལ་ཕོངས་འབྱོར་རྒུད་སེལ་བའི། །ཕྱུག་པོ་ནོར་ལྡན་བརྒྱ་ཡོད། །གསེར་གྱི་རྡོ་རྗེ་རྩེ་དགུ །ད་དུས་འཕྱར་བའི་དུས་མིན། །ལྷོ་ཕྱོགས་བདུད་ཀྱི་ཕོ་ཉས། །བདུད་ཀྱི་དཔུང་ཚོགས་བསགས་ཏེ །ཡུལ་མང་མི་བདེའི་ལ་ཡོག །ལས་ཀ་དམག་འཁྲུག་གཡུལ་འགྱེད །འཚུབས་མ་བཞིན་དུ་ལངས་ཚེ། །དུས་ལ་བབ་ལྟས་ངེས་པ། །ཁར་སང་ཁྱོད་ཀྱིས་བྲིས་པའི། །ཡི་གེ་གཞན་ལ་མ་སྟོན། ཝ་དང་སྤྲེའུའི་ཁྲོད་དུ། །མི་ཡིས་ཀི་སྒྲ་མ་སྒྲོགས། །ཀུན་གྱི་སྙིང་ལ་ཕོག་ནས། །རིང་པའི་ཡུལ་དུ་བྲོས་འགྲོ། །དེ་ལྟར་སེམས་ལ་ཞོག་དང་། །རིམ་གྱིས་མཐོ་སར་སླེབས་ཡོང་། ལུས་མེད་མཁའ་འགྲོའི་གླིང་འདི། །ཡུལ་མེད་ཟང་ཐལ་ཆེན་པོར། །མི་གནས་མི་འགགས་སྤྲོས་བྲལ། །རྨི་ལམ་བཞིན་དུ་སད་འགྲོ། །ཞེས་ཟེར་ཞིང་སྒྱུ་མའི་འཁྲུལ་འཁོར་ལྟ་བུར་ཞིག སོང་། ལོ་ཁྱིམ་དེའི་དབྱར་ཟླ་ཐ་ཆུང་གི་ཚེས་བཅུའི་ཉིན་གསེར་གྱི་བྲག་ལུང་ཐང་གི་ཆུ་འགྲམ་ན་མེ་ཏོག་རབ་ཏུ་རྒྱས་པའི་ཚལ་ཞིག་ཏུ་ཕྱིན་ནས་བསྡད་ཡོད་པའི་ཚེ་ཡིད་ལ་དགའ་བདེའི་ཉམས་བསམ་གྱིས་མི་ཁྱབ་པ་ཤར་བའི་སྐབས་དེར་སྦྲང་བུ་ཞིག་གིས་མེ་ཏོག་ལ་འཁོར་ཞིང་གླུ་འདི་ལེན་པའི་སྣང་བ་བྱུང་། བཾ་བཾ །སྤང་ལྗོང་མེ་ཏོག་གི་ཚལ་དུ། །