Tibetan
གྱིས་འབྲེལ་བའི། །སྐྱེས་བུ་ཁྱོད་ཉིད་བར་ཆད་ལས་དབེན་ནོ། །ད་ནི་མི་ཚེ་སྟོང་ཟད་ལ་མ་བཏང་།ཤེས་རབ་རིག་པའི་གཞོན་ནུ་མཆོག་རྩལ་ལྡན། །དད་མོས་ངེས་འབྱུང་གྲོགས་བཟང་དང་འགྲོགས་ཤིང་། །བརྩོན་འགྲུས་དྲག་པོའི་རྟ་མཆོག་ལ་ཞོན་ཏེ།།ཐར་པ་ཆེན་པོའི་གྲོང་ཁྱེར་དུ་སླེབ་ཤོག །སེམས་དང་སེམས་བྱུང་ཁམས་གསུམ་གྱི་སེམས་ཅན །མ་ལུས་ཀ་དག་གདོད་མ་ཡི་གཞི་རུ །རྟོགས་གྲོལ་མངོན་གྱུར་སངས་རྒྱས་སུ་སྨོན་ནོ། །ཞེས་པ་སྙིང་གཏམ་ཚིགས་སུ་བཅད་པ་འདི་ཉིད་རིག་འཛིན་བདུད་འཇོམས་རྡོ་རྗེས་སློབ་བུ་ངག་དབང་ཕྲིན་ལས་ལ་གདམས་པ་དུས་གསུམ་ཀུན་ཏུ་ཡོངས་སུ་དགེ་བར་གྱུར་ཅིག །ཛ་ཡནྟུ།། །། ༄༅། །ཨོ་རྒྱན་ལ་གདམས་པའི་གླུ་དབྱངས་ཆོས་ཉིད་རང་སྒྲ་བཞུགས་སོ། །གཞི་ཁྱབ་བདག་གདོད་མའི་དབྱིངས་ལ་འདུད། །ཚུར་གསོན་དང་སྐལ་ལྡན་སྙིང་གི་བུ། །ང་རྒན་པོས་འཆོལ་བའི་རྒྱང་གླུ་འདོམས །ཡུལ་ངོས་བཟུང་བྲལ་བ་ཡངས་པའི་མཁར། །ངས་ཆོས་ཉིད་ནམ་མཁའི་མཛོད་ཆེན་འཕྲུལ། །འདི་སྤྱོད་མཁན་ཨུ་དུམ་ཝ་ར་ཙམ། ཁྱོད་སྤྱོད་དང་སྤྱོད་ལ་སྤྲོ་སྤྲོ་ཡང་། །བཅུད་སེང་ལྕམ་དཀར་མོའི་འོ་མ་བཞིན །སྣོད་གང་རུང་བ་ཡིས་ཐུབ་པར་དཀའ། །ངའི་ཆོས་ནི་གཞན་ལས་ཁྱད་འཕགས་པའི། །དོན་ཆེ་བ་གསུམ་གྱི་བཅུད་དང་ལྡན། །ངེས་དང་པོ་ལྷ་ཡི་སྒོམ་སྒྲུབ་ལ། །ཚུལ་སྐྱོ་སུན་མེད་པའི་ཉམས་ལེན་བརྩོན། །སྒོ་གསུམ་པོ་རྡོ་རྗེ་གསུམ་དུ་སྨིན། །རྩལ་གང་ཤར་ལམ་གྱི་འཇུག་སྒྲོར་ཤར། ཡང་རྩ་ཐིག་རླུང་གི་དག་སྦྱང་བརྩོན །རྩ་ཨ་ཝ་ངྷཱུ་ཏིའི་མདུད་རྒྱ་ཁྲོལ། །དབྱིངས་ཡེ་ཤེས་མཉམ་སྦྱོར་རླུང་མཛོད་རྡོལ། །རྩལ་གང་ཤར་གདམས་ངག་སྙིང་པོར་ཤར། །ངས་སྔོན་སྦྱངས་ལས་ཀྱི་འཕྲོ་སད་ནས །དོན་ཆོས་ཉིད་བདེན་པ་མངོན་སུམ་མཐོང་། །ལྷ་རིགས་ཀུན་རིག་པ་གཅིག་ཏུ་རྟོགས། །དཔེ་ཧྲུལ་དང་བསླབ་སྦྱངས་ལ་མ་ལྟོས །གཞི་ཆོས་ཉིད་ནམ་མཁའི་ཀློང་ མཛོད་རྡོལ། །ད་སྣང་བ་བརྡའ་དང་དཔེ་རུ་ཤར། །འདི་མཆོག་གི་གྲུབ་རྟགས་མ་ལགས་སམ །ཕྱིའི་མིག་འཕྲུལ་བརྫུ་དང་ཅུང་མ་འདྲ། །གཞན་འགུགས་པའི་ཕོ་ཉ་བྲན་དུ་མེད། སྔོན་རིག་འཛིན་བརྒྱུད་པའི་དགོངས་རྒྱུད་མཛོད། །མི་བདག་གི་བློ་ཡི་བུམ་པར་ཞུགས །དེའི་མཐུས་ཀྱང་གདམས་པ་ཐེབས་པ་ཡིས །ངའི་བུ་སློབ་དོན་གྱི་རིག་འཛིན་ཡིན །ད་འཁོར་བར་མི་ལྡོག་གདིང་ཞིག་ཐོབ། །མི་ཕལ་པ་ཞིག་དང་ཅུང་མ་འདྲ། །ཡུལ་གཞན་གྱི་མགོ་སྐོར་བྱེད་དུ་མེད། །ངའི་འཁོར་འབངས་སྐལ་ལྡན་དམ་པ་རྣམས། །ཚེ་གཏན་གྱི་སོ་ནམ་ལྷུར བླངས་ནས། །བློ་རྩེ་གཅིག་དམ་པའི་ཆོས་ལ་དྲིལ །དོན་སྙིང་པོའི་སྒྲུབ་པ་ལྷུར་ལེན་བྱས། །མི་གཞན་གྱི་སྤྱོད་ཡུལ་དང་མི་མཐུན། །ཆེ་གྲགས་པ་མཐོ་རློམས་ཆེད་མི་གཉེར། །དེ་གཞན ལས་འཕགས་པའི་ཁྱད་ཆོས་ཡིན །ཆོས་དོན་གཉེར་བྱེད་པའི་སྒྲུབ་པ་པོས །ཁ་ལག་པ་མི་དལ་ལས་སྤངས་ན། །ཆོས་ངེས་པའི་དོན་ཞིག་ཅིས་མི་རྟོགས །མགོ་རལ་པའི་ཅོད་པན བཅིངས་པ་ཡི། །ཁོང་རྣལ་འབྱོར་ཆས་སུ་ཞུགས་པ་དག །ཡུལ་ཀུན་ཏུ་དལ་མེད་རྒྱུ་ཉུལ་སྤངས །གནས་གཅིག་ཏུ་སྡོད་ན་ཅི་མ་རུང་།བུ་བུ་མོ་མོ་གྲོགས་མེད་པ་ཡི། །ཁོང་དགེ་ ༄༅། །བཙུན་བནྡེ་རྒན་གཞོན་ཀུན །རང་གཅིག་ལས་ཆགས་ཞེན་ཡུལ་མེད་དེ། །རང་མགོ་འདོན་བསྒྲུབ་ན་ཅི་མ་རུང་། །ཡུལ་གྲྭ་སློབ་སྐྱོང་བའི་བླ་ཆེན་ཚོས། རང་ཡོན་ཏན་རྒྱ་མཚོ་ཙམ་མཆིས་ཏེ། །ཡུལ་གཞན་ལ་གདམས་ངག་ཆུ་བདོ་བབ། །དེས་བདག་གཞན་འཚེང་བ་མཚར་ཆེ་ཡང་། །རྨིག་རྗེས་ཆུ་ཙམ་གྱིས་སྐོམ་སེལ་མིན། །ཚུལ་རང་རྒྱུད་འདི་ལ་བློས་གཞིག་ནས །དེར་བསྟུན་པའི་བྱ་བྱེད་རན་ཤེས་ན། །མི་དེ་ལས་མཁས་པ་སུ་ཞིག་ཡོད། །ལས་རྒྱུ་འབྲས་སྤངས་བླངས་མཆོག་ཏུ་ངེས །ཨ་ཧོ། རྨི་སྣང་དང་ཉིན་སྣང་མཆེད་སྡུད། །སྒྱུ་མ་དང་མིག་འཕྲུལ་མཚར་རེ། །སྣོད་བཅུད་དང་འདོད་ཡོན་ཡུལ་དྲུག །མིང་ཚུལ་དང་དངོས་པོའི་གཞི་རྩ། །མ་གྲུབ་པར་སྟོང་པར་ཧར་སངས །རྒྱུ་འབྲས་དང་ལྷ་འདྲེ་འཁོར་འདས། །ཡུལ་མེད་དང་གཞི་མེད་རྩ་བྲལ། །ཡེ་སྟོང་དང་སྟོང་ཆེན་རོལ་པ། །གནས་ལུགས་ཀྱི་རང་བཞིན་གཞི་དབྱིངས། །ཀ་དག་དང་སྤྲོས་བྲལ་ངེས་པ། །སྐྱོན་ཡོན་གྱིས་བཅོས་བསྒྱུར་མ་སོང་། །རང་བྱུང་གི་ཆོས་སྐུ་འདི་ན། །ཐེག་པ་ཡི་འཇུག་སྒོ་མང་པོ། །ཆོས་ཉིད་ཀྱི་རྩལ་དུ་ཨེ་གོ། །ཚེ་རབས་ཀུན་རང་ས་འདི་ལས། །སྐྱེ་འཆི་དང་བསྒྲེས་རྒུད་མ་མྱོང་།། མ་རིག་པའི་བག་རྡུལ་ཕྲ་མོ། །སྣང་སེམས་ཀྱི་གཞི་རུ་ལངས་ནས། །ཚོགས་ཡུལ་གྱིས་སྒྱུ་འཕྲུལ་ངོམ་ལ །ལྟད་མོ་རང་བལྟས་པས་བསླུས་སོ། །ད་ཙམ་ནས་ཚུལ་བཞིན་རྟོགས་པའི།། ཡེ་ཤེས་ཀྱི་མཐོང་ཆེན་ཕྱེས་ནས །ཆིངས་གསུམ་དང་གནད་དྲུག་གཅིག་བསྣན །ཡུལ་མེད་ཀྱི་དབྱིངས་ལ་ཡན་པས། །མ་དག་པ་སྙིགས་མའི་སྣང་བ། །དག་དབྱིངས་དེ་དྭངས་མའི་མཁར་སངས། །སྣོད་བཅུད་ཀུན་དབྱིངས་ཐིག་རོལ་པར། །འཕོས་པ་ཡི་འཕོ་ཆེན་རེད་ན །ལྷུན་གྲུབ་ཀྱི་སྐུ་དང་ཡེ་ཤེས། །མངོན་སུམ་དུ་ཤེས་རབ་མིག་གིས། །མཐོང་བ་རང་ལྟད་མོར་མངོན་བྱུང་། །འདི་དུས་ཀྱི་སྒོ་གསུམ་འདི་དག །མི་གཡོ་དང་མི་འགུལ་ངང་གནས །བརྟན་ཐོབ་ཀྱི་ཡེ་ཤེས་སོ་མ། །ཐར་ལམ་ཞིག་ངེས་པར་ཟིན་བྱུང་། །ཤེས་རབ་དང་ཡེ་ཤེས་སྤྱན་ཚུད། །འོད་གསལ་གྱི་སྣང་བ་གོང་འཕེལ། །སྣང་སྲིད་ཀུན་འཇའ་ཐིག་རོལ་པར། །འཕེལ་སྨིན་གྱི་རྣལ་འབྱོར་དམ་པའི། །སྒོ་གསུམ་ལ་བདེ་སྡུག་ཟུག་རྔུ །མ་ངེས་པར་ཆལ་མ་ཆོལ་མང་། །འབྱུང་སྲིད་དེ་མ་དག་བསྐལ་ངན། །དག་གྲོལ་གྱི་དབྱིངས་སུ་འཇིག་པའི། །ངང་ཚུལ་དེ་ཤེས་པ་གནད་མཆོག །ལྷུན་གྲུབ་ཀྱི་སྐུ་དང་ཡེ་ཤེས །ལོངས་སྐུ་ཡི་བཀོད་པར་ཚད་ ༄༅། །ཕེབས། །ཟང་ཐལ་དང་འོད་ལུས་ངང་གྱུར། །གྲུབ་བརྒྱད་ཀྱི་རྩེ་འཇོ་ལ་རོལ་མཐར། །ཆོས་ཟད་ཀྱི་རྣལ་འབྱོར་ཆེན་པོ། །བློ་འདས་ཀྱི་རོལ་པ་འབྱམས་ཀླས། ཤེས་སྒྲིབ་ཀྱི་དྲི་མ་སངས་ཚེ། །གཞོན་ནུ་ཡི་བུམ་སྐུ་མངོན་གྱུར། །འཇའ་ལུས་དང་འཕོ་ཆེན་ངོ་མ། །འཁོར་འདས་ཀུན་མཉམ་གྲོལ་སངས་རྒྱས །ཁྱོད་རང་ལ་གཅེས་ནོར་མཆོག་ཏུ། སྟེར་བ་ཡང་སྔོན་གྱི་ལས་སྨོན། །བཟང་པོ་ཡི་རྒྱུ་འབྲས་ངེས་པ། །ཚེ་འདི་རུ་འཇའ་ལུས་ཐོབ་པའི། །ལས་འཕྲོ་དང་སྨོན་ལམ་མཐུ་ཡོད། །རེམ་རེམ་དང་ཁམས་གསུམ་ཆོས་རྒྱལ།། དེ་རིང་ནས་སླེབ་འདུག་ཨེ་གོ། །གནས་འདི་ཡང་ས་སྤྱོད་འོག་མིན། །དཔའ་བོ་དང་མཁའ་འགྲོའི་འདུ་བ། །འགྲོ་དོན་གྱི་ཆེད་དུ་ཕེབས་འདུག །སྒྲུབ་ཚད་ཀྱིས་གྲུབ་པ་ཐོབ་འོང་། མི་རྒན་པོ་བདུད་འཇོམས་རྡོ་རྗེས། །བློ་བདེ་བའི་མཚར་གླུ་བླངས་ཡོད། །ཁྱོད་སློབ་བུ་ཨོ་རྒྱན་རྡོ་རྗེའི །རྒྱུད་སྨིན་ཅིང་གྲོལ་བར་སྨོན་ནོ། །དགེའོ། T11618 - 359 T11618 - 360 ༄༅། །བློ་འཕེལ་ལ་གདམས་པའི་གླུ་ཆུང་པདྨའི་དོ་ཤལ་བཞུགས། ན་མོ་གུ་རུ་ཝེ། སྨོན་ལམ་ལས་ཀྱིས་འབྲེལ་བའི། །སྐྱེས་མཆོག་བློ་འཕེལ་དབང་པོ། །དལ་འབྱོར་རྙེད་དཀའ་དྲན་ནས། །མི་ལུས་དོན་ལྡན་ཞིག་མཛོད། །འཆི་བ་སྙིང་ནས་དྲན་ཏེ། །བློ་ཕུག་ཆོས་ལ་དྲིལ་ཤོག །འཁོར་བའི་སྡུག་བསྔལ་དྲན་ཏེ། །ཐར་པ་དོན་དུ་གཉེར་མཛོད།། གཏན་གྱི་བདེ་བ་འདོད་ན། །རྒྱུ་འབྲས་བླང་དོར་མ་བརྗེད །འདི་སྣང་རྨི་ལམ་ཙམ་སྟེ། །རྟག་འཛིན་ལེ་ལོར་མ་བཏང་། །ཚེ་ལ་ཚད་ཐེབས་མེད་ཀྱི །མྱུར་དུ་སྒོམ་བསྒྲུབ་བརྩོན་མཛོད། ངར་འཛིན་འཁྲུལ་པའི་སེམས་ལ། །བརྟགས་ན་བདག་མེད་སྟོང་པ། །གཟུང་བའི་ཆོས་ལ་བརྟགས་ན། །ཡུལ་མེད་ཟང་ཐལ་རོལ་པ། །ཐམས་ཅད་སྟོང་པ་ཉིད་ལས། །བདེན་པར་གྲུབ་པ་མེད་དོ། །མེད་བཞིན་འཁྲུལ་སྣང་ཤར་བའི། །དཔེ་ནི་རྒྱ་མཚོའི་གཟའ་སྐར། །རྒྱ་མཚོའི་ངང་ལ་མ་གྲུབ། །སྣང་བ་གཞི་ལས་མཆེད་ཀྱང་། །གཞི་ཡི་ངང་ན་མ་གྲུབ། །མདོར་ན་སྣང་སྲིད་འཁོར་འདས། །གདོད་ནས་གཞི་ལས་མ་འདས། །གཞི་ཉིད་རྟོགས་ན་སངས་རྒྱས། །གཞན་ལ་འབད་རྩོལ་མི་དགོས། །ལྟ་བ་ངོ་མ་ལོས་ཡིན། །མ་སྒོམ་ད་ལྟའི་ཤེས་པ། །ངོ་T11618 - 361 འཕྲོད་མངོན་དུ་གྱུར་ན། །བསྒོམ་བྱ་སྒོམ་བྱེད་མེད་པའི། །སྒོམ་པ་ངོ་མ་ལོས་ཡིན། །ལྟ་སྤྱོད་རང་ཚུགས་ཟིན་ནས། །ལོག་ལམ་རྒྱབ་ཏུ་བོར་ན། །སྤྱོད་པ་བརྟུལ་ཞུགས་ཆེན་པོ།། སྤྱོད་པ་ངོ་མ་ལོས་ཡིན། །བདེ་སྐྱིད་ལུས་སེམས་དགའ་ཡང་། །བདེ་ཉམས་ནམ་མཁའི་སྤྲིན་བཞིན། །མི་རྟག་རྫུན་གྱི་འཁོར་ལོ། །བདེན་ཞེན་མེད་པ་གནད་ཡིན། །སྡུག་བལ་ནི་ཚ་སྣ ཚོགས། །མ་ངེས་རླུང་ལྟར་འཚུབས་ཀྱང་། །བྱུང་གནས་འགྲོ་གསུམ་བྲལ་བའི །བདེན་མེད་ཉམས་ཀྱི་རི་མོ། །ལྷ་སྐད་འདྲེ་སྐད་ཐོས་ཀྱང་། །སྲིད་པ་གསུམ་ན་མེད་པའི། །སྟོང་སྐད ག་ཞའི་གནས་མངོན། །རེ་དང་དོགས་པ་ཆོད་ཅིག །ཆེ་གྲགས་སྙན་པ་ཐོས་ཀྱང་། །ཉི་མ་ནུབ་ཁའི་འོད་བཞིན། །ཤེས་ནས་རང་རྒྱུད་ཐུལ་ལ། །མངོན་ཞེན་ཆོད་དང་ཕོ་རབ། །འུ་ཅག་ལས་སྨོན་ལྡན་པས། །ཆོས་ཉིད་བདེན་པ་མཐོང་ཡང་། །མི་ཚེའི་ལྷག་མ་འདི་རུ། །མི་འཇིགས་དབྱིངས་ལ་ཕེབས་མཛོད། །བཞུགས་སྟངས་གཟིགས་སྟངས་བསྣུན་ནས། །ཤེས་རབ་མིག་ཡངས་ཕྱེས་དང་། །ལྷུན་གྲུབ་དྭངས་མའི་དབྱིངས་སུ། །དག་དབྱིངས་ཐིག་ཚོམ་མངོན་ཚེ། །ཆོས་ཉིད་མངོན་སུམ་ངོ་མ། །ཤེས་རབ་མིག་གི་དཀྱིལ་དུ། །ཡེ་ཤེས་མཐོང་སྤྱན་ཚུད T11618 - 362 ༄༅། །ནས། །སྣོད་བཅུད་དབྱིངས་ཐིག་རོལ་པ། །ཤར་བ་ཉམས་སྣང་གོང་འཕེལ། །སྣང་བ་ཐིག་ཚོམ་དབྱིངས་དང་། །སྲིད་པ་སྐུ་ལྔའི་ཚོམ་བུ། །སྨིན་ནས་དག་པ རབ་འབྱམས། །མངོན་གྱུར་རིག་པ་ཚད་ཕེབས །གཟུང་འཛིན་ཟེར་ཐག་ཆད་ནས། །ཁམས་གསུམ་འཁོར་བ་དང་བཅས། །ཀ་དག་གདོད་མའི་གཞི་ལ། །དག་མཉམ་ཆོས་ཉིད་ཟད་པ། མི་རིང་མྱུར་ལམ་རྙེད་འོང་། །མ་གཡེལ་མྱུར་དུ་བགྲོད་ཤོག །མ་ནུས་རྒན་པོས་ཁ་ཏ། །གཅེས་པའི་བུ་ལ་སྟེར་ཡོད། །བློ་མཆོག་རང་ཞལ་མཐོང་བའི། །བློ་ལྡན་སྐྱེས་བུ་དམ་པ།། བློ་རྩེ་གཅིག་ཏུ་བསྡུས་ལ། །བློ་ཕུག་ཆོས་ལ་དྲིལ་དང་། །བློ་དབྱིངས་ཡེ་ཤེས་འཕེལ་ནས། །བློ་འདས་ཆེན་པོར་གྲོལ་ངེས །ཞེས་པ་འདི་ཡང་ཁྲག་འཐུང་རྡོ་རྗེ་ཁྲོ་ལོད་རྩལ་གྱིས་སྨྲས་པའི་དགེ་བ་ཟབ་མོའི་མཐུ་ལ་བརྟེན་ནས་སློབ་བུ་དེའི་རྒྱུད་ལ་ཡོན་ཏན་དེ་དག་འཁྲུངས་ནས་མི་སློབ་པའི་འབྲས་བུ་ཐོབ་པར་ཤོག་ཅིག །མངྒ་ལཾ། །། T11618 - 363 T1618 - 364 ༄༅། །ཇོ་མོ་བྱང་མཚོ་ལ་གདམས་པའི་གླུ་དབྱངས་བདུད་རྩི་ཐིག་པ་བཞུགས་སོ། །མགོན་དུས་གསུམ་སངས་རྒྱས་འདུས་པའི་དཔལ། །རྗེ་ཨོ་རྒྱན་མཚོ་སྐྱེས་རྡོ རྗེས་སྐྱོངས། །ཚུར་གསོན་དང་ཆོས་ལམ་ཞུགས་པ་མོ །ཁྱོད་ངེས་པར་དམ་ཆོས་བསྒྲུབ་འདོད་ན །རྗེ་བླ་མ་བྱིན་རླབས་ཀྱི་གཏེར་མཛོད་ཡིན །དེ་དད་གུས་ཀྱི་ལྡེ་མིག་འཛོམ་པར་གྱིས། གྲོགས་མཆེད་ལྕམ་ཐར་པའི་ལམ་གྲོགས་ལ །བརྩེ་ཆེན་པོས་བསྙེན་བཀུར་རེམ་ལ་མཛོད། །མ་འགྲོ་ཀུན་ཕ་མ་ཤ་སྟག་ཡིན། །ཆོས་ཅི་བྱེད་དེ་ཕྱིར་དོན་གཉེར་མཛོད། །ཚེ་མི་རྟག་རྨི་ལམ་གནས་སྐབས་ཙམ། །དོན་སོམས་ལ་བློ་སྣ་ཆོས་ལ་དྲིལ །ཡུལ་སྣོད་བཅུད་སྒྱུ་མའི་འཁྲུལ་འཁོར་འདྲ། །དེ་དྲན་མཛོད་རྣམ་གཡེང་ལེ་ལོ་སྤོངས། །རྒྱུ་ཟས་ནོར་མདོ་མེད་སྨིག་རྒྱ་འདྲ། དེ་འདོད་སྲེད་རེ་དང་རློམ་པ་སྤོངས །ཚེའི་སུམ་གཉིས་ཟད་ལ་བློས་གཞིག་སྟེ །ད་མ་འགྱང་དམ་པའི་ཆོས་ལ་འབད། །དུ་ད་བར་བདེ་སྐྱིད་འབྱུང་མ་མྱོང་། །ཕྱིས་བདེ་སྐྱིད་འབྱུང་བ་དེ་ལས་དཀའ། །ཟས་སྲོག་འཚོ་ཙམ་གྱིས་ངོམས་མཛོད་ལ། །གོས་ལྷག་སྐྱོབ་ཙམ་གྱིས་ཆོག་པར་གྱིས། །ནམ་འཆི་བའི་དུས་ལ་བབ་པའི་ཚེ། །བློ་ལྷག་མ་མེད་པ་ཞིག་ཏུ་རེམ། །ང་མི་རྒན་ གྱིས་བརྩེ་བའི་ཁ་ཏ་ཡིན། །དོན་ཉམས་སུ་ལོངས་དང་སྐལ་ལྡན་ལགས། །ཨ་ཧོ། སྣོད་བཅུད་དང་སྣང་སྲིད་འདི་ག །མ་གྲུབ་པའི་སྣང་ཉམས་སྟོང་པར། །རྨི་ལམ་དང་སྒྱུ་མར་ཨེ གོ། །ཚོགས་དྲུག་གི་སྣང་ཆ་སྒྱུ་འཕྲུལ །རྒྱ་མཚོ་ལ་གཟའ་སྐར་ངོམས་བཞིན། །རྟེན་འབྱུང་གི་རོལ་པར་རྫུན་པའི །ངང་ཚུལ་ལ་ལྟོས་དང་ཨེ་རི། །ཡུལ་མེད་ཀྱི་ཟང་ཐལ་ངེས་པ།། ཆོས་ཉིད་ཀྱི་གཞི་དབྱིངས་གནས་ལུགས། །དེ་ག་རུ་ཡིན་པ་ཨེ་གོ། །དུས་གསུམ་གྱི་རྒྱལ་དང་རྒྱལ་སྲས། །ལྷ་སྔགས་དང་དཀྱིལ་འཁོར་རོལ་པ། །མ་ལུས་པར་གཅིག་རྫོགས་ངེས་པ། ཀུན་གཟིགས་ཀྱི་མིག་ལ་མངོན་བྱུང་། །རྒྱུ་འབྲས་དང་ས་ལམ་ཐམས་ཅད། །རྫོགས་ཆེན་གྱི་རྒྱལ་པོ་ཡེ་རྫོགས། །སྦྱང་བགྲོད་ལ་མི་ལྟོས་སྐྱིད་པར། །སྐྱིད་ཉལ་ཞིག་མཛོད་དང་ཨེ་གོ།། མཉམ་བཞག་ལ་བཅོས་བསྒྱུར་མེད་དང་། །མ་བཅོས་པ་གསུམ་ལ་ཆམ་ཞོག །རྗེས་ཐོབ་ལ་དམིགས་གཏད་མེད་དང་། །ཡེ་ཡིན་གྱི་མངོན་གྱུར་ཆེར་ཞོག །གཞི་དབྱིངས་ཀྱི་ཡེ་ཤེས་རྫོགས་ལྡན། །མངོན་གྱུར་ཞིག་སངས་རྒྱས་ངོ་མ །དེ་བར་དུ་ཉམས་ལེན་མ་དོར། །ད་ལྟ་ཡི་སྣང་སེམས་འདི་བཞིན། །ཕྱི་མར་ཡང་གྲོལ་འཁྲུལ་དེས་ཤེས། །གྲོལ་ཐོབ་མཆོག་མ་ཐོབ་ ༄༅། །བར་དུ། །ཉམས་ལེན་ལ་མ་གཡེལ་གནད་ཡིན །སངས་རྒྱས་ཀྱི་ཞལ་ཐིག་ངེས་པ། །དྲོད་རླངས་དང་མ་བྲལ་སོ་མ། །ཆོས་ཉིད་ཀྱི་མཛོད་ལས་རྙེད་བྱུང་། སྙིང་སྲོག་གི་བཅུད་དུ་ཟུངས་ཤིག །མི་རྒན་གྱི་འཆོལ་གཏམ་ཡིན་ཡང་། །རང་འདྲ་ལ་ཕན་པར་ཅི་ཆ། །ཞེས་པ་འདི་ཡང་ཇོ་མོ་བྱང་མཚོའི་ངོར་མི་རྒན་བདུད་འཇོམས་པས་སོ། །དགེའོ།། སརྦ་མངྒ་ལཾ།། 363364 363 T1618 - 367 T11618-368 ༄༅། །རིགས་ལྡན་ལ་གདམས་པའི་གཏམ་རྣ་བའི་དབང་པོའི་བདུད་རྩི་ཞེས་བྱ་བ་བཞུགས། མགོན་དུས་གསུམ་རྒྱལ་བ་འདུས་པའི་སྐུ །དཔལ་ཨོ་རྒྱན་ཆོས་ཀྱི་རྒྱལ་པོས་སྐྱོངས། །ཁྱོད་གྲོལ་འཁྲུལ་བར་གྱི་མཚམས་ཤེད་ན །སེམས་བར་མ་དོ་རུ་འཁྱམས་པ་ཡི །སྐྱོན་ཡུལ་བརྒྱད་དག་ལ་ཁ་འཁྱོལ་ཏེ། །ལས་ཆོས་བརྒྱད་ཡུལ་དུ་འཁྲུལ་ཞེན་ན། དོན་རྣམ་མཁྱེན་བསྒྲུབ་པའི་དུས་ཚིགས་ཡོལ །ཚུལ་དེ་ལྟར་བདུད་ཀྱི་འབངས་གྱུར་ན། །ཆོས་བཤད་པ་སྨྲ་བས་ཅི་ཞིག་བྱ །རྐྱེན་བདུད་ཡུལ་མུན་པའི་གྲོང་ཁྱེར་དུ །ཞེན་ཆགས་པའི་སྐྱེས་བུ་ཕལ་པ་ལ། །དོན་ལྟ་སྒོམ་སྤྱོད་པའི་ཚིག་ཙམ་གྱིས །ཚིག་བཤད་པ་གོ་བས་ཅི་ལ་ཕན། །དོན་ལྟ་བ་ཟབ་མོ་ལྷུར་ལེན་ན །སྤྱིར་སྣང་སྲིད་འཁོར་འདས་ཆོས་རྣམས་ཀུན།། དཔེ་རྨི་ལམ་བར་དོའི་སྣང་བ་བཞིན། །གཞི་སྟོང་ཉིད་ཀྱི་ཆོ་འཕྲུལ་ངེས་པ་རུ། །འུབ་ཆུབ་པའི་རོལ་པར་རྟོགས་གྱུར་ན། །དེ་ལྟ་བའི་རྒྱལ་པོར་ལྷུན་གྱིས་གྲུབ། །ཆོས་ཤེས་ན་ལྟ་བ་ངེས་པ་ཡིན། །དེ་གཞན་དུ་བཟུང་ན་འཁྲུལ་པ་ཡིན། །དེ་མེད་དང་མ་གྲུབ་ངང་ཤེས་པའི། །དབྱིངས་ཉིད་ཀྱིས་འཇའ་ཚོན་ཤར་བ་དང་། །ཆུ་ཉིད་ཀྱིས་གཟའ་སྐར་སྣང་བ་བཞིན། །གཞི་ཉིད་ཀྱིས འཁོར་འདས་ཀུན་སྣང་བ། །ཚུལ་བཞིན་དུ་ཤེས་ན་ལྟ་བ་ལགས། །དོན་སྟོང་ཉིད་ལྟ་བ་རིན་པོ་ཆེ། །མངོན་གྱུར་དུ་རིག་པ་རིག་པ་སྟེ། །རིག་པ་ལས་བསྒོམ་པ་གཞན་ན་མེད། །ད་ཆོས་བརྒྱད་ཀྱི་བློ་ལ་མ་ཞེན་པས། །ནམ་མཁའ་དང་འཇའ་ཚོན་ཇི་བཞིན་དུ། །སྣང་སྲིད་ཀྱི་སྣང་བ་སྒྱུ་མ་བཞིན །བདེན་ཞེན་དང་བྲལ་བའི་ངང་གནས་ཀྱི །ཡེ་ཤེས་དེ་མངོན་གྱུར་སྒོམ་པ་ཡིན། །ཡེ་ཤེས་ཀྱི་ངང་ལས་མི་འདའ་བར། །ངང་མངོན་གྱུར་བྱེད་པ་སྤྱོད་པ་སྟེ །ཚུལ་དེ་ལྟར་མངོན་གྱུར་རྣལ་འབྱོར་ལམ །ཚེ་འདི་ཡི་ཉི་ཞུར་མ་ནུབ་བར། །ཚེ་བསྒྲུབ་པ་མཉམ་པ བྱེད་ནུས་པའི །སྐལ་ལྡན་ན་ཚེ་འདིར་རྣམ་པར་གྲོལ། །ཡིད་མི་བདེ་སྲིད་པའི་འདམ་རྫབ་ལས། །དབྱུང་འདོད་ན་དབེན་པའི་རི་ལ་སྙོགས །ཡུལ་འཁོར་བར་ཕྱིར་ཆགས་མ་བྱེད་ཅིག གདམས་ངག་གི་རྩ་བ་དེ་ཙམ་ཡིན། །ཚིག་མང་པོའི་དགོས་པ་དེ་ལས་མེད། །དེ་སེམས་ལ་ཞོག་ཅིག་རིགས་ལྡན་པ །བདུད་འཇོམས་པས་སོ།། །། T1618 - 370 ༄༅། །དུས་གསུམ་རྒྱལ་བའི་སྤྱི་གཟུགས་མཆོག །ཨོ་རྒྱན་མཚོ་སྐྱེས་རྡོ་རྗེས་སྐྱོངས། །བསྐལ་པ་མང་པོའི་གོང་རོལ་ནས། །ཚོགས་དང་ལས་སྨོན་བཟང་པོའི་མཐུས། །དལ་འབྱོར་དོན་ལྡན་སྐྱེས་བུ་ཁྱོད། །མངོན་སུམ་སྣང་བ་མཐར་ཕྱིན་ནས །ཉམས་སྣང་གོང་འཕེལ་ཐོག་ཕེབས་པ། །མ་ངེས་སྣང་བ་ཆལ་མ་ཆོལ །བརྟན་གནས་མེད་པར་འཆལ་བ་ལ། །མངོན་ཞེན་རེ་དང་དོགས་པ་སྤོངས། །འཕེལ་འགྲིབ་ཉམས་ཀྱི་རྟགས་ལ་ནི། །བདེ་དང་གསལ་དང་མི་རྟོག་པ། །མྱོང་ཞེན་ཅན་དུ་ངོམས་པ་ཡིན །ཕྱི་སློང་ལྷ་འདྲེའི་ཆོ་འཕྲུལ་དང་། །ནང་སློང་ལུས་ཀྱི་ན་ཚ་དང་། །གསང་སློང་སེམས་ཀྱི་དགའ་སྡུག་རྣམས། །མ་ངེས་འབྱུང་བ་ཤེས་མཛོད་ཅིག །འཕེལ་འགྲིབ་ཉམས་ཀྱི་རྟགས་ཉིད་དང་།བསླུ་བ་མཁའ་འགྲོའི་བརྡ་རྟགས་དང་། །བར་ཆད་བདུད་ཀྱི་བསླུ་བྲིད་རྟགས། །རིམ་བཞིན་འབྱུང་བ་ཤེས་མཛོད་ལ། །གང་ལ་དངོས་འཛིན་ཞེན་པ་དང་། །རེ་དང་དོགས་པ་ཐད་ཀར་ཆོད། །ཡང་དག་རྫོགས་པའི་སངས་རྒྱས་ཀྱི། །ས་ལ་རིང་པོར་མི་ཐོགས་པས། །དུས་འདིར་བར་ཆད་བདུད་དབང་དུ། །མ་ཤོར་སྐལ་བཟང་སྐྱེས་བུ་ཁྱོད །མོ་གྲོགས་དབང་དུ་མ་གྱུར་བར། །ཐོད་རྒལ་T11618 - 371 གསང་ལམ་འདི་སྤྱོད་ན། །ཕུང་པོ་ལྷག་མ་མེད་པ་རུ། །འཇའ་ལུས་ཐོབ་པ་པདྨའི་བཀའ། །བསླུ་མེད་རྡོ་རྗེའི་གཏན་ཚིག་ཡིན། །སྙིང་ལ་འཆོངས་ཤིག་སྐལ་ལྡན་བུ། །ལ་ལས་ལྷ་བབ་འདྲེ་བབ་ཟེར། །ལ་ལས་འཁྲུལ་པ་སྨོས་སོ་ཟེར །དེ་ལྟར་དངོས་གྲུབ་ཐོབ་པའི་ལྟས །ཕྱི་ནང་བར་ཆད་གེགས་སེལ་མཆོག །རེ་དོགས་ཆགས་སྡང་ཐད་ཀར་ཆོད །མཉམ་པ་ཉིད་དུ ཆམ་ཞོག་དང་། །སུ་མ་མགུ་ཡང་ཞེ་བློ་བདེ །ཅི་སྣང་ཅི་འབྱུང་ཅི་ཤར་ཀུན །ཆུ་ལ་རིས་མོ་བྲིས་པ་བཞིན། །བདེན་མེད་ཉམས་ཀྱི་རི་མོ་རུ། །ཤེས་ནས་ཞེན་མེད་རྣལ་འབྱོར་ལམ། གནད་དོན་བསྡུས་ན་འདི་ལས་མེད། །མི་རྒན་བདག་གི་སྙིང་གཏམ་ཡིན། །སེམས་ལ་ཞོག་ཅིག་ཆོས་ལྡན་པ། །རྣམ་པར་གྲོལ་བ་གདོན་མི་ཟ། །ཞེས་མི་རྒན་བདུད་འཇོམས་པས་སྨྲས་པ ཡོངས་སུ་དགེ་བར་གྱུར་ཅིག །ཞུས་སོ། ། T11618 - 372 ༄༅། །ཁྱབ་བདག་འཁོར་ལོའི་མགོན་པོ་པདྨ་འབྱུང་།མི་འབྲལ་བདེ་ཆེན་འཁོར་ལོའི་རྒྱན་དུ་བཞུགས། །ཐུགས་གསང་ནམ་མཁའ་མཛོད་ཀྱི་ཀློང་ཆེན་པོ། །བདག་གི་རྒྱུད་ལ་མྱུར་དུ་འཕོ་བར་ཤོག །སྨོན་ལམ་ལས་ཀྱིས་འབྲེལ་བའི་སྐྱེས་བུ་ཁྱོད། །རྩེ་གཅིག་སྙིང་པོའི་སྒྲུབ་པ་ལ་བརྩོན་ནས། །གཏན་དུ་བདེ་བའི་ས་ལ་བརྒལ་འདོད་ན །ཚེ་འདིའི་སྣང་བ་རྨི་ལམ་གནས་སྐབས་ཙམ། །གཏན་དུ་སྡོད་གྲབ་མ་བྱེད་རིགས་ཀྱི་བུ། །འཁོར་བའི་བྱ་བ་བྱིས་པའི་རྩེད་མོ་འདྲ། །ཟིན་མེད་ལས་ཀ་སྤོངས་ཤིག་རིགས་ཀྱི་བུ །ཆེ་མཐོའི་གྲགས་འདོད འཇའ་ཚོན་རི་མོ་འདྲ། །འདོད་པ་ཐོག་ཁེལ་མེད་དོ་སྐལ་ལྡན་བུ། །འདོད་ཡོན་ལོངས་སྤྱོད་སྒྱུ་མའི་དགའ་སྟོན་འདྲ། །རྟག་དང་བརྟན་གནས་མེད་དོ་སྐལ་ལྡན་བུ། །