Tibetan
རང་གཞན་ལ་གཏན་གྲོས་གདམས་ངག་གི་ཚུལ་དུ་བརྗོད་པའི་ཕྲེང་བ་སྙིང་གི་བདུད་རྩི། རང་གཞན་ལ་གཏན་གྲོས་གདམས་ངག་གི་ཚུལ་དུ་བརྗོད་པའི་ཕྲེང་བ་སྙིང་གི་བདུད་རྩི། རང་གཞན་ལ་གཏན་གྲོས་གདམས་ངག་གི་ཚུལ་དུ་བརྗོད་པའི་ཕྲེང་བ་སྙིང་གི་བདུད་རྩི་ཞེས་བྱ་བ་བཞུགས་སོ། ། འཁོར་ལོའི་མགོན་པོ་བཀའ་དྲིན་མཚུངས་མེད་རྡོ་རྗེ་འཆང་ཆོས་ཀྱི་རྗེ། ཆོས་ཀྱི་རྒྱལ་པོ། ཀུན་མཁྱེན་པདྨ་ཉིན་བྱེད་དབང་པོས་ཐུགས་རྗེས་གཟིགས་ཤིག །ཀྱེ་མ། བདག་མིའི་ལུས་ནི་ཐོབ། བསྟན་པའི་སྒོ་རུ་ནི་ཞུགས། ལམ་ཕྱིན་ཅི་མ་ལོག་པ་ནི་རྙེད། མཚན་ལྡན་གྱི་བླ་མ་ནི་མཇལ། རྙེད་དཀའ་བ་དག་རྙེད་ཅིང་རང་དབང་རང་ལ་ཡོད་པའི་དུས་འདིར། ཟིན་དུས་མེད་ཅིང་སྙིང་པོས་དབེན་པའི་ཚེ་འདིའི་བྱ་བ་རྨི་ལམ་སྒྱུ་མ་ལྟ་བུ་ཡུད་ཙམ་པས་བློ་མི་འབྲིད་པར། བཤུལ་ཐག་རིང་པོ་ཚེ་ཕྱི་མ་ཕན་ཆད་ལ་ཕན་པའི་བསམ་སྦྱོར་ཆོས་མཐུན་སྣ་རེ་ཡིན་ཀྱང་ཅི་ནས་བྱ། ག་རེད་རེས་རང་མགོ་རང་གིས་མ་བཏོན་ན། འདོན་རོགས་བྱེད་མཁན་སུ་ཡོད། འཁོར་བ་མཐའ་མེད་ནས་ཐར་དུས་ ནམ་ཡོད། ཆོས་ལྡན་གྱི་རྟེན་བཟང་པོ་ནམ་ཐོབ། སངས་རྒྱས་འབྱུང་བའང་དཀོན་ལ་རབ་ཏུ་བྱུང་བའང་དཀོན་ན། སྨིན་གྲོལ་གྱི་ཆོས་ཚུལ་ཟབ་མོ་དང་འཕྲད་པའི་སྐལ་པ་འདི་ལྟ་བུ་ནི་རྙེད་མི་སྲིད་པའི་ཚོད་དུ་གདའ། དེས་ན་དེང་ནས་བཟུང་སྟེ་རྗེ་བཙུན་པདྨ་ཉིན་བྱེད་དབང་པོའི་སྐུ་གསུང་ཐུགས་དང་རོ་གཅིག་མ་གྱུར་གྱི་བར་དུ་དམ་པའི་ཆོས་དང་མི་མཐུན་པའི་བློ་ངན། སྤྱོད་ངན་ཐ་ན་རྨི་ལམ་དུའང་མི་འབྱུང་བར་བྱ། འགྲོ་འདུག་ཟ་ཉལ་ཅི་བྱས་ཀྱང་རུང་སྟེ་རང་རྒྱུད་རང་གིས་བརྟག །རང་སྐྱོན་རང་གིས་བསལ། མ་ི་རྡོག་གཅིག་བཏོན་པ་ལ་སེམས་ཀྱི་འཕེན་པ་བཟང་ངན་ལན་གཅིག་བལྟ། ཟས་ཁམ་གཅིག་ཟ་བ་ལ་བློའི་སྐོར་རྫོགས་ལན་གཅིག་བྱེད། གནོད་པ་དང་མི་དགེ་བའི་ བསམ་སྦྱོར་རྣམ་པ་ཀུན་ཏུ་དོར་ནས་ལུས་ངག་ཡིད་གསུམ་བྱང་ཆུབ་ཀྱི་སེམས་རིན་པོ་ཆེ་ལ་ཧྲིལ་དྲིལ་བ་ནི་དམ་དུ་བཅའ་བ་དང་པོ་སྟེ། རྣམ་ཀུན་བྱང་ཆུབ་སེམས་ཀྱི་འཕན་པ་བཏང་། །བདེ་ན་བྱིན་རླབས་སྡུག་ན་ལས་སུ་ཤེས། བདེ་སྡུག་ཀུན་ལ་བཏང་ལེན་དམིགས་པ་བསྒོམ། །རང་སེམས་དཀར་ཞིང་དཀོན་མཆོག་མི་ཁྲེལ་བྱ། བདག་ལྟ་བུའི་སྐལ་དམན་ལ་ཞལ་དངོས་སུ་སྟོན་ཅིང་སྨིན་གྲོལ་གྱི་བྱིན་རླབས་སྩོལ་བ། སངས་རྒྱས་ཀུན་ལས་བཀའ་དྲིན་ཆེ་བའི་བླ་མ་རིན་པོ་ཆེར་ལུས་དང་སྲོག་ལ་མི་བལྟ་བར་མཉེས་པ་ཁོ་ན་བསྒྲུབ་ཅིང་མི་མཉེས་པ་སྐད་ཅིག་ཀྱང་མི་བྱ།
Chinese
为自他以恒常劝诫窍诀方式宣说的心髓甘露之鬘。
English
A garland of nectar of the heart, spoken to oneself and others in the manner of constant advice and pith instructions.