Tibetan
གཞན་ཡང་སྣ་ཚོགས་པ་དང་། ཁྱད་པར་དབྱིངས་ལ་ཁ་ཏོག་ལྔ་ལྡན་མ་ཤར་གྱི་བར་དུ་ལྟ་སྟངས་ཐ་དད དུ་བལྟ་བ་དང་། དབྱིངས་དང་ཐིག་ལེའི་རྭ་བར་ལུག་རྒྱུད་བཙོན་དུ་བཟུང་ནས་བསྒོམ་དགོས་པར་གསུངས་ཀྱང་། སྐབས་འདིའི་ཁྲིད་ཡིག་རྣམས་སུ་དེ་ལྟ་བུའི་དམིགས་བསལ་མ་གསུངས་ལ། སྤྱིར་གང་ལྟར་བྱས་ཀྱང་འོད་གསལ་གསལ་བ་དང་འཆར་བདེ་བ་དེ་ལྟར་དུ་སྡོད་པ་དང་། བཞུགས་སྟངས་ཀྱང་གང་བདེ་ཞིང་ཕན་པ་དང་རན་པ་གང་ཡིན་པ་ལས་གསུམ་ཀ་རྫོགས་མི་དགོས་པ་དང་། ཉམས་གོང་འཕེལ་གྱི་སྐབས་སུ་བདེ་རྩུབ་ཀྱི་ཉམས་སྣ་ཚོགས་འབྱུང་བར་གསུངས་པ་སོགས་ནི་འདིའི་ཁྱད་པར་ཙམ་ཡིན་པར་ཤེས་དགོས་སོ། །ཡང་སྤྲོས་པ་ལ་དགའ་ན་བཞུགས་སྟངས་རེས་མོས་སུ་སྡོད་ཅིང་བར་སྐབས་སུ་དགེ་སྦྱོར་ལ་འབད། སྤྲོས་པ་མེད་ན་བྱ་བ་དགུ་སྤྲུགས་སུ་བཏང་ནས་ཉིན་མཚན་ཁོར་ཡུག་ཏུ་བསྒོམ་པ་ལ་འབད། ཉིན་མོ་ལས་བསྒོམ་མི་ནུས་པ་རྣམས་ཀྱིས་ཉིན་མོར་བར་མཚམས་མེད་པར་འབད། མཚན་མོ་ཐུན་གྱི་སྟོད་སྨད་ཀྱི་དམིགས་བསལ་གསུམ་དང་། བར་བར་རླུང་ལྔ་རང་སར་དག་ནས་རྣམ་པར་མི་རྟོག་པ་སྐྱེ་བའི ཡན་ལག་ཨ་ཡིག་ཁ་དོག་ལྔ་ལྡན་བརྩེགས་མར་བསྒོམ་པ་དང་། འཆི་བ་སྦྱངས་པའི་ཚུལ་རྣམས་ཀྱང་ཤེས་པར་བྱས་ནས་བརྩོན་དགོས་སོ། །གཉིས་པ་གཞུང་གི་དོན་ལ་ལྔ་སྟེ་ཁྲེགས ཆོད་ལས་ཀྱང་ཐོད་རྒལ་ཁྱད་པར་འཕགས་ཚུལ། སྣང་བཞི་རིམ་གྱིས་འབྱུང་ཚུལ དབང་རབ་ཚེ་འདིར་གྲོལ་ཚུལ། གོང་འཕེལ་ཉམས་ཀྱི་བྱེ་བྲག། དབང་པོ་འབྲིང་ཐ་གཉིས་ཆོས་ཉིད་དང་སྲིད་པ་བར་དོར་གྲོལ་ཚུལ་ལོ། །དང་པོ་ནི། ཤེས་པ་དང་པོ་ནས། འཕོ་བའི་གདམས་པ་སྟེ༔ ཞེས་གསུངས་ཏེ། དེ་ཡང་སྔར་བཤད་པ་ལྟར་སྤྱིར་འགྲོ་བ་རྣམས་ཀྱི་ཉིན་མཚན་བར་དོ་གསུམ་གྱི་སྐབས་སུ་སྣང་ཚུལ་སྣ་ཚོགས་པ་ཀུན་སེམས་ཅན་སོ་སོའི་རྒྱུད་ཀྱི་ཤེས་པ་དང་པོ་ཡུལ་དུ་སྟེ་སྣོད་བཅུད་འདོད་ཡོན་གྱི་རྣམ་པར་མཆེད་པ་ཡི་མ་དག་སྙིགས་མའི་སྣང་བ་དེ་དག་སྐབས་འདིར་ཐབས་ལ་མཁས་པའི་ལམ་གྱིས་བཙན་ཐབས་ཉིད་དུ་ནི་འོད་གསལ་དྭངས་མའི་དབྱིངས་སུ་འཕོ་བའི་གདམས་པ་ཡིན་པས་ན་ཁྱད་པར་འཕགས་པ་སྟེ། དེ་ཡང་འཁོར་བའི་སྣང་སེམས་ཐམས་ཅད་ཆོས་ཉིད་ཀྱི་དབྱིངས་སུ་འཕོ་བར་བྱེད་པས་ན། ཐ་མལ་པ་འདུ་ཤེས་གསུམ་ལྡན་གྱི་འཕོ་བ་རྣམ་ཤེས་དབྱིབས་དང་ཁ་དོག་ཅན་དུ་བསྒོམས་ནས་སྟེང་ཕྱོགས་སུ་འཕེན་པ་ལས་ཁྱད་ ༄༅། །པར་འཕགས། སྐུ་དང་ཡེ་ཤེས་ཀྱི་རོལ་པ་མངོན་གྱུར་ཆེན་པོའི་ངང་དུ་བརྟན་པ་ཐོབ་པར་བྱེད་ཅིང་དོན་གྱི་སྐུ་གསུམ་རང་ཐོག་ཏུ་གྲོལ་བའི་གདམས་པ་ཡིན་པས་ན། བསྐྱེད་རིམ་ལྟ་བུའི་བློ་བཅོས་ཡིད་བྱེད་བྱ་རྩོལ་གྱིས་མི་གཟུགས་ལྟ་བུའི་ལྷ་རང་རྒྱུད་པ་བསྒོམ་པ་ལས་ཁྱད་པར་འཕགས། འོད་གསལ་གྱི་ཆོས་ཉིད་དབང་པོའི་སྒོ་རུ་མངོན་སུམ་དུ་སྣང་བས་ན་ཁྲེགས་ཆོད་ལྟ་བུའི་མུན་སྒོམ་ལས་ཁྱད་པར་འཕགས་པའོ། །ཀུན་མཁྱེན་བླ་མས་ཁྱད་པར་འཕགས་ཚུལ་བདུན་གསུངས་པ་ཁྲིད་ཡིག་ཡེ་ཤེས་བླ་མ་ལས་ཤེས་པར་བྱ་དགོས་སོ།། གཉིས་པ་སྣང་བཞི་རིམ་གྱིས་འབྱུང་ཚུལ་ལ་བཞི་ལས།དང་པོ་ཆོས་ཉིད་མངོན་སུམ་གྱི་སྣང་བ་ནི།ཤེས་པ་དང་པོ་ནས།ལྟད་མོར་མངོན༔ ཞེས་གསུངས་ཏེ། ཤེས༷་པ༷་དང༷་པོ༷་འོད་གས༷ལ་གྱི་སྣང༷་བ༷་རུ་མཆེད་པ་དེ༷་ཉིད་ཐ་མལ་གྱི་དབང་པོ་མ་ཡིན་པར་ཤེས་རབ་ཀྱི་མིག་ལ་ལྟད༷་མོར་མངོ༵ན་པས་ན་ཆོས་ཉིད་མངོན་སུམ་གྱི་སྣང་བ་སྟེ། དེའི་ཕྱི་རྟགས་སུ་དབྱིངས་སྣང་ཡོལ་བ བཀྲམ་པ་ལྟ་བུ་ལྷུན་ཆགས་ཤིང་ངང་བརྟན་པ་དང་། ཐིག་ལེ་ཉ་མིག་ཙམ་ལས་མཐེབ་སྐོར་ཙམ་དུ་སྣང་བའོ། །ནང་རྟགས་སུ་བུམ་དབང་གི་ནུས་པ་ལུས་ཀྱི་རྡོས་པ་ལ་ཐེབས་པས། ལུས་ འགུལ་སྙིང་མི་འདོད་པར་སྡོད་པ་དང་། ངག་སྨྲ་སྙིང་མི་འདོད་པར་གནས་པ་དང་། སེམས་གར་གཏད་དུ་སྡོད་ཚུགས་པའོ། །འདིའི་དུས་སུ་བར་ཆད་ནའང་རང་བཞིན་སྤྲུལ་པར་དབུགས འབྱིན་པ་ནི། ཕྱིའི་དབྱིངས་སྣང་གི་རྟགས་དང་པོ་ཙམ་མཐོང་བས་མ་ཡིན་པར་ནང་དུ་ཤེས་རབ་ཀྱི་མིག་རྡུལ་དང་བྲལ་བའི་བདེན་པ་མཐོང་བའི་གནད་ཀྱིས་ཡིན་ཏེ། ཀློང་གསལ་ལས། རིག་པ་མངོན་སུམ་མཐོང་བ་ནི །བདེན་པ་མཐོང་བའི་གནད་ཀྱིས་སུ། །ཁམས་གསུམ་ལྡོག་པ་མ་ཡིན་ནོ །ཞེས་གསུངས་སོ། །གཉིས་པ་ཉམས་གོང་འཕེལ་གྱི་སྣང་བ་ནི སྣང་བ་འོད་གསལ་ཆེན་པོར་མཆེད་དེ་འཕེལ༔ ཞེས་གསུངས་ཏེ། དེ་ཡང་རླུང་སེམས་ཀྱི་འདུ་བས་སྐྱེད་པས་ཤེས་ཉམས་འདག་བྱའི་རྟགས་བཅུ་ལྟ་བུ་མ་ཡིན་པར་ནང་དུ་ཆོས་ཉིད་ཀྱི་ངོ་བོ་སྟོང་པར་མཐོང་བས། དེའི་གདངས་རང་བཞིན་འོད་གསལ་བའི་ཡེ་ཤེས་ཕྱི་རོལ་དུ་མི་འགྱུར་བར་སྣང་བའི་འོད་གས༷ལ་གྱི་སྣང་བ་ཆེན་པོ༷་དེ་ཉིད་གོམས་པའི་སྟོབས་ཀྱིས་གོང་ནས་གོང་དུ་མཆེད་དེ༷་འཕེ༷ལ་བས་ན་ཉམས་གོང་འཕེལ་ཏེ འདིའི་ཕྱི་རྟགས་སུ་འོད་སྣང་ཆེར་མཆེད་དེ་དབྱིངས་རིག་སྨིན་མཚམས་ནས་བྲལ་ཏེ། འོད་ལྔ་རྩིབ་ཤར་དང་། གྱེན་འགྲེང་དང་། ༄༅། །ཟླུམ་འཁྲིགས་དང་། མཆོད་རྟེན་ལྟ་བུ་དང་། པདྨ་སྟོང་ལྡན། མཁར་ཐབས་དང་། མདའ་དང་། མདུང་རྩེ་ལྟ་བུ་དང་། དྲྭ་བ་དྲྭ་ཕྱེད། མིག་མང་རིས་ལ སོགས་མ་ངེས་པར་སྣང་ལ། ཐིག་ལེ་སྟོང་པའི་སྒྲོན་མ་ཡང་མཐེབ་སྐོར་ཙམ་ནས་བ་ཕུབ་ཙམ་དུ་འཕེལ་ཞིང་། རིག་པ་འདབ་ཆགས་འཕུར་སྐྱེན་པ་དང་། རི་དྭགས་རྩིབས་ལ་རྒྱུག་པ དང་། ཤ་ར་ཎ་དལ་གྱིས་འགྲོ་བ་དང་། བུང་བ་མེ་ཏོག་ལ་ལྡིང་བ་ལྟ་བུར་དལ་གྱིས་འགྲོ་བ་ནི་ཅུང་ཟད་གོམས་པ་དང་བར་དུ་གོམས་པའི་ཐ་སྙད་བཏགས་ཤིང་། མཆོག་ཏུ་གོམས་པའི་ཚད་ནི་གང་དུ་བལྟས་པའི་སྟོང་ཁམས་འོད་གསལ་གྱི་སྣང་བས་ཁྱབ་ཅིང་འགུལ་འཕྲིག་མེད་པར་གནས་པ་ཡིན་ནོ། །ནང་རྟགས་སྒོ་གསུམ་ལ་འཆར་བའི་ཚུལ་ནི་གསང་དབང་གི་ནུས་པ་རྩ་རླུང་ལ་ཐེབས་པའི་རྟགས་སུ་དང་པོ་སྙིང་ག་ནས་མགྲིན་པའི་བར་གྱི་ནང་རོལ་དུ་ན་ཚ་མི་བདེ་བའི་ཟུག་རྔུ་སྣ་ཚོགས་རླུང་དང་བད་ཀན་ལྟ་བུར་ལྡང་བ་སོགས་ཉམས་མ་ངེས་པ་འཆར་བ་དང་། ལུས་སྒེག་ཆོས་ངོ་ཚ་དང་བྲལ་ཏེ་སྐྱེས་བུ་ཆང་གིས་མྱོས་པ་ལྟ་བུར་ཟ་ཟི་བྱ་སྤྱོད་སྣ་ཚོགས་པས་སྡོད་མི་ཚུགས་པ་དང་། ངག་ཀྱང་སྨྱོན་པའི་ཅ་ཅོ་ལྟར་གླུ་དང་མགུར་མ་ལ་སོགས་པ་མ་ངེས་ པར་རང་ཚིག་ཏུ་རྡོལ་བ་དང་། སེམས་ཀྱང་གཟའ་གཏད་མེད་པར་སྨྱོན་པ་འུར་ལངས་པ་ལྟ་བུར་གཏད་མེད་རྒྱ་འབྱམས་སུ་ཡན་པའོ། །སྐབས་འདིར་འཆི་བའི་དབང་དུ་གྱུར་ནས མཚམས་ཆད་ནའང་ཆོས་ཉིད་བར་དོར་ལོངས་སྤྱོད་རྫོགས་སྐུར་གྲོལ་བ་ཐོབ་པའོ། །གསུམ་པ་རིག་པ་ཚད་ཕེབས་ཀྱི་སྣང་བ་ནི། རིག་པ་བཅུད་དུ་སྨིན་པའི་ཕྱག་རྒྱར་ངོམས༔ ཞེས་གསུངས་ཏེ། རིག་པ༷་བཅུད༷་དུ་སྨིན༷་པ་ཡེ་ཤེས་ལྷའི་ཕྱག༷་རྒྱར༷་ངོམས་པ་ནི་རིག་པ་ཚད་ལ་ཕེབས་པ་ཞེས་བྱ་བ་སྟེ། དེ་ཡང་ཕྱི་རྟགས་སུ་དབྱིངས་ཀྱི་སྣང་བ་གྲུ་ཆད་དང་པདྨ་འཁོར་ལོ་སོགས་གཞལ་ཡས་ཁང་ལྟ་བུའི་ཀློང་དུ་དང་པོ་ཐིག་ལེ་ལྔ་ཚོམ་གྱི་ནང་དུ་རྒྱལ་བ་རིགས་ལྔའི་སྐུ་ཕྱེད་ཆར་སྣང་བ་དང་། བར་དུ་སྐུ་རྐྱང་ཚང་བར་འཆར་བ་དང་། ཐ་མ་ཡབ་ཡུམ་ཟུང་འབྲེལ་འཁོར་སེམས་དཔའ་སེམས་མ་བཞི་བཞི་དང་བཅས་པ་འཆར་བ་དང་། དེ་ཡང་ཆེས་ཆེར་གོམས་པའི་སྟོབས་ཀྱི་ཕྱི་གཞལ་ཡས་ཁང་དང་ནང་ཐོད་པ་ར་རི་གསུམ་གྱིས་བརྩིགས་པའི་གཞལ་ཡས་ཁང་མེ་རི་འབར་བའི་ཀློང་དུ་ཁྲག་འཐུང་ཁྲོ་བོ་རོལ་པའི་དཀྱིལ་འཁོར་ཡབ་ཡུམ་འཁྲིལ་སྦྱོར་དང་ཡབ་རྐྱང་རྣམས་གླང་ཆེན་གྱི་ཀོ་རློན་མི་ལྤགས་ཀྱི་རྐེད་དཀྲིས་དང་། སྟག་ལྤགས་ཀྱི་ཤམ་ ༄༅། །ཐབས་ཀྱིས་ཀླུབས་པ་མཚོན་ཆ་ཐོགས་པ་ཆེ་བ་གནམ་ས་ཙམ་ནས་ཆུང་བ་སྲན་མ་ཙམ་གྱི་བར་དུ་ཚད་མ་ངེས་པར་སྣང་བ་ཡིན་ནོ། །སྣང་སྲིད་ཐམས་ཅད་འཇའ་འོད་མེ་དཔུང་གི་རྣམ་པས་གང་ཞིང་ཡོངས་སུ་ཁེབས་པའི་རྣམ་པར་སྣང་བ་དང་། ཡུལ་ཁབ་མིག་ཙམ་གྱི་ནང་དུ་ལྷ་སྐུ་རྒྱན་རྫོགས་པས་གང་ཞིང་གསལ་བར་སྣང་བ་ནི་ཚད་ཕེབས་ཀྱི་རྩལ་རྫོགས་པའི་ཚད་དུ་འཆར་བའོ། །ནང་རྟགས་སུ་ཤེར་དབང་གི་ནུས་པ་སེམས་དང་ཐིག་ལེ་རུ་ཕེབས་པའི་རྟགས་སུ་རླུང་སེམས་གཉིས་ལ་རང་དབང་ཐོབ་ནས་གྲུབ་པ་བརྒྱད་ལ་མངའ་བརྙེས་པ་དང་། ལུས་འོད་གསལ་དུ་སྨིན་ནས་རི་བྲག་སོགས་ཐོག་རེག་གི་གནས་ཐམས་ཅད་ཟང་ཐལ་དུ་འགྲོ་བ་དང་། ངག་རྡོ་རྗེ་གསུང་གི་རོལ་པར་སྨིན་ཅིང་དག་ནས་ཅི་སྨྲས་ཐམས་ཅད་གཞན་གྱི་རྣ་བར་སྙན་ཅིང་རྒྱུད་ལ་ཕན་ཐོགས་པ་དང་། རྒྱུ་དང་རྐྱེན་ལ་མི་ལྟོས་པར་ཡང་དག་པའི་རྒྱུད་ལུང་མན་ངག་གི་ཆོས་ཚིག་ཐམས་ཅད་རང་རྡོལ་དུ་འབྱུང་བ་དང་། སེམས་རིག་པར་གྲོལ། རིག་པ་རང་ཐོག་ཏུ་སད་ཅིང་ཤེས་རབ་ལ་ཡེ་ཤེས་ཀྱི་སྤྱན་ཚུད་པས་སྣང་སྲིད་འཁོར་འདས་ཐམས་ཅད་རྒྱ་མཚོ་ཆེན་པོ་ལ་གཟའ་སྐར་བཀྲ་བ་ལྟར་གསལ་འགྲིབ་མེད་པའི་མངོན་ཤེས་ཀྱིས་ གཟིགས་ཤིང་དེར་འཛིན་དང་བདེན་ཞེན་ལས་འདས་པ་ཡིན། འདིའི་དུས་སུ་རིག་པ་ལ་རང་དབང་ཐོབ་པས་ཡུལ་དང་རྐྱེན་ལ་མི་ལྟོས་པར་གོལ་ཤོར་གྱི་གནས་ལ་མི་ཐོགས་ཤིང་རང་སྟོབས་ཀྱིས་བརྒལ་བ་དང་། སྣང་བ་ལ་རང་དབང་བསྒྱུར་ནས་སྣང་སྲིད་གཏེར་དུ་བསྒྱུར་ཀྱང་གཏེར་དུ་འགྱུར་བ་དང་། སྐྱེ་བ་ལ་རང་དབང་ཐོབ་ནས་སེམས་ཅན་སུམ་སྟོང་ལ་རིག་པ་གཏད་པས་སྤྲུལ་པའི་སྐུ་སུམ་སྟོང་འབྱུང་ཞིང་འགྲོ་དོན་བྱེད་པ་དང་། སྒྲོལ་བ་ལ་རང་དབང་ཐོབ་པས་མཚམས་མེད་པ་ལྔ་སྤྱོད་པའི་སྡིག་པོ་ཆེ་ལའང་རིག་པ་གཏད་པ་ཙམ་གྱིས་སྒྲོལ་ནུས་པ་དང་། ཕྱི་འབྱུང་བ་ལ་རང་དབང་བསྒྱུར་བས་ཇི་ལྟར་བསྒྱུར་ཀྱང་བསྒྱུར་དུ་བཏུབ་པ་དང་། ནང་འབྱུང་བ་ལ་རང་དབང་བསྒྱུར་བས་ལུས་ལ་གཉེར་མ་མེད་ཅིང་མེ་ལོང་གི་བྱད་ལྟར་དྭངས་པ་དང་། སྐྲ་དཀར་ནག་པོར་འགྱུར་ཞིང་སོའུ་སྐྱེ་བ་དང་ལུས་ལ་རིགས་ལྔའི་ཕྱག་རྒྱ་དང་ཡི་གེ་བཀྲ་བ་དང་། སྐྲ་སེན་སྐྱེ་བའི་རྒྱུན་ཆད་པ་དང་། ཕྱི་ནང་གི་སྲིན་བུ་ཐམས་ཅད་གྲོལ་བའི་རྟགས་སུ་ཤིག་སྲོ་མི་འབྱུང་བ་དང་། ལུས་ཤིང་བལ་ལྟར་ཡངས་ཤིང་དབུགས་ཀྱི་འགྲོ་འོང་མི་མངོན་པ་རྣམས་ནི་ཡང་དག་པའི་ལམ་མཐར་ཕྱིན་པའི་རྟགས་གོར་མ་ཆག་པའོ། །ཚད་ཕེབས་ཀྱི་དུས ༄༅། །འདིར་བར་དོ་མེད་པར་རང་གྲོལ་བའོ། །བཞི་པ་ཆོས་ཉིད་ཟད་པའི་སྣང་བ་ནི། སྣང་སེམས་ཟད་པས་ཆོས་ཉིད་དབྱིངས་སུ་བརྒལ༔ འཕོ་ཆེན་གཞོན་ནུ་བུམ་སྐུར་སངས་རྒྱས་ཏེ༔ ཞེས་གསུངས་ཏེ། ཕྱི་འཁྲུལ་སྣང་གི་ཆ་དང་ནང་འཁྲུལ་རྟོག་སེམ༷ས་དང་སེམས་བྱུང་གི་བག་ཆགས་ཐམས་ཅད་ཟད་པ་དང་། གསང་བ་འོད་གསལ་གྱི་སྣང་བ་ཐམས་ཅད་ཀྱང་ཟད་པས་ཆོས་ཉིད༷་བརྗོད་དུ་མེད་པའི་དབྱིང༷ས་སུ་བརྒལ༵་བས་ན་ཆོས་ཉིད་ཟད་པ་ཞེས་གསུངས་ཏེ། དེ་ལྟར་ཟད་པའི་ཟད་ལུགས་ལ་གཉིས་ཀྱི རིམ་གྱིས་ཟད་པ་ནི་སྣང་བ་བཞི་ཚད་དུ་ཕྱིན་པ་གང་ཡིན་པ་དང་།བློ་མཆོག་གཅིག་ཅར་བ་རེ་ཙམ་ནི་མངོན་སུམ་གྱི་སྣང་བ་མཐོང་བ་ཉིད་གོམས་སུ་བཅུག་པས་གོང་འཕེལ་དང་ཚད་ཕེབས་ཀྱི་རིམ་པ་ལ་མ་ལྟོས་པར་ཟད་པའང་ཡོད་དེ། ཕྱི་རྟགས་སུ་དབྱིངས་དང་ཐིག་ལེ་ཟད་པའི་སྔ་ཐོག་ཏུ་དབྱིངས་ཀྱི་སྣང་བ་མཐིང་གའི་ཀློང་དུ་ཐིག་ལེ་མཐིང་ག་བསེ་ཕུབ་ཙམ་གྱི་ནང་དུ་མི་བསྐྱོད་པ་གཙོ་བོར་བཞུགས་པའི་མཐིང་ག་ལྔ་ཚོམས་སུ་ཤར་བའི་བར་མཚམས་སུ་རྡོ་རྗེ་ལུ་གུ་རྒྱུད་མཐིང་ནག་མུ་མེན་གྱི་ཕྲེང་བ་བསྟར་ལ་བརྒྱུས་པ་ལྟར་འཆར་རོ། །སྐུ་དེ་དག་གི་ཐུགས་ཀ་ནས་འོད་ཟེར་མཐིང་གའི་སྣམ་བུ་ རང་གི་སྙིང་གར་ཟུག་པའི་སྟེང་དུ་ཐིག་ལེ་མཐིང་ག་བེེ་ཌཱཪྻའི་ཕོར་པ་ཁ་སྦུབས་པ་ལྟ་བུར་བརྩེགས་མར་བྱས་པ་འཆར་རོ། །དེ་རྫོགས་པའི་ཚེ་དབྱིངས་དཀར་གསལ་གྱི་ཀློང་དུ་ཐིག་ལེ་དཀར་པོ་བསེ་ཕུབ་ཙམ་གྱི་ནང་དུ་རྣམ་པར་སྣང་མཛད་གཙོ་བོར་བཞུགས་པའི་གཙོ་འཁོར་ལྔ་ཚོམས་སུ་ཤར་བའི་གོ་མཚམས་སུ་རྡོ་རྗེ་ལུ་གུ་རྒྱུད་ཤེལ་གྱི་ཕྲེང་བ་བརྒྱུས་པ་ལྟར་འཆར་རོ། །སྐུ་དེ་དག གི་ཐུགས་ཀ་ནས་འོད་ཀྱི་སྣམ་བུ་དཀར་པོ་ཟླ་བ་ལྟར་དཀར་བ་རང་གི་སྙིང་གར་ཟུག་པའི་སྟེང་དུ་དུང་གི་ཕོར་པ་ཁ་སྦུབས་པ་ལྟ་བུའི་ཐིག་ལེ་བརྩེགས་མས་བརྒྱན་པ་འཆར་རོ། །དེ་རྫོགས་པའི་རྗེས་སུ་དབྱིངས་སྣང་སེར་པོའི་ཀློང་དུ་ཐིག་ལེ་སེར་པོ་ཕུབ་ཀྱི་སྦ་འཁོར་ཙམ་གྱི་ནང་དུ་རིན་འབྱུང་གཙོ་བོར་བཞུགས་པའི་གཙོ་འཁོར་ལྔ་ཚོམས་ཤར་བའི་བར་མཚམས་རྡོ་རྗེ་ལུ་གུ་རྒྱུད་གསེར་གྱི་ཕྲེང་བ་ལྟ་བུ་ཆེ་ལ་འོད་དང་ལྡན་པ་འཆར་རོ །སྐུ་དེ་དག་གི་ཐུགས་ཀ་ནས་འོད་ཟེར་སེར་པོའི་སྣམ་བུ་རང་གི་སྙིང་གར་ཟུག་པའི་སྟེང་དུ་གསེར་གྱི་ཕོར་པ་ཁ་སྦུབས་པ་ལྟ་བུར་ཐིག་ལེ་བརྩེགས་མར་འཆར་རོ། །དེའི་རྗེས་སུ་དབྱིངས་དམར་པོའི་ཀློང་དུ་ཐིག་ལེ་དམར་པོ་བསེ་ཕུབ་ཙམ་གྱི་ནང་དུ་སྣང་མཐའ་ཡབ་ཡུམ་གཙོ་བོར་བཞུགས་པའི་གཙོ་འཁོར་ལྔ་ཚོམས་ཤར་བའི་ ༄༅། །གོ་མཚམས་རྡོ་རྗེ་ལུ་གུ་རྒྱུད་གོང་ལྟར་དཀྲིས་ཤིང་འཁྱུད་པའི་རྣམ་པར་འཆར་རོ། །ལྷ་དེ་དག་གི་ཐུགས་ཀ་ནས་འོད་ཀྱི་སྣམ་བུ་དམར་པོ་རང་གི་སྙིང་གར་ཟུག པའི་སྟེང་དུ་ཐིག་ལེ་དམར་པོ་བྱེ་རུའི་ཕོར་པ་ཁ་སྦུབས་པ་ལྟ་བུའི་བརྩེགས་མས་བརྒྱན་པར་འཆར་རོ། །དེ་རྫོགས་པའི་རྗེས་སུ་དབྱིངས་སྣང་ལྗང་གུའི་ཀློང་དུ་ཐིག་ལེ་ལྗང་གུ་བསེ་ཕུབ་ཙམ་གྱི་ནང་དུ་དོན་གྲུབ་ཡབ་ཡུམ་གཙོ་བོར་བཞུགས་པའི་འཁོར་སེམས་དཔའ་སེམས་མ་བཞི་དང་བཅས་པ་འཆར་རོ། །དེ་དག་གི་གོ་མཚམས་སུ་རྡོ་རྗེ་ལུ་གུ་རྒྱུད་གཡུ་ཕྲེང་ལྟར་དཀྲིས་ཤིང་འཁྱུད་པའི་རྣམ་པར་འཆར་རོ། །སྐུ་དེ་དག་གི་ཐུགས་ཀ་ནས་འོད་ལྗང་གུའི་སྣམ་བུ་རང་གི་སྙིང་གར་ཟུག་པའི་སྟེང་དུ་ཐིག་ལེ་ལྗང་གུ་དཔེར་ན་གཡུའི་ཕོར་པ་ཁ་སྦུབས་པ་ལྟ་བུར་འཆར་རོ།། འོད་དེ་དག་ཤར་མ་ཐག་ཏུ་འོད་ཟེར་ཆེན་པོའི་དབང་ནོད་པས་རང་ལུས་འོད་ཀྱི་ཀློང་དུ་ལག་སོར་བཀྲམ་པའི་རྣམ་པ་ཙམ་ལས་མེད་པར་གྱུར་ནས་འོད་གསལ་དུ་དེངས་པ་དང་། ཕྱི་ནང་སྣོད་བཅུད་སྣང་བ་ཐམས་ཅད་འོད་གསལ་དུ་དེངས་ནས་མ་དག་པའི་སྣང་བ་རྡུལ་ཕྲན་ཙམ་ཡང་མི་བྱུང་ངོ་། །དུང་ཁང་དུ་ཁྲག་འཐུང་རོལ་པའི་དཀྱིལ་འཁོར་ཐམས་ཅད་སྟེང་ཕྱོགས་ཀྱི་ ནམ་མཁར་སྣང་བའི་ཚེ་ན་རང་ལུས་ཀྱང་འོད་ཀྱི་ངང་དུ་ལན་ཚྭ་ཆུ་རུ་ཞུ་བ་ལྟར་དེངས་པའི་སྐད་ཅིག་ཏུ་ཤེས་པ་སྐར་མདའ་ཙམ་དུ་རྒྱུ་བས་སྣང་སེམས་ཀྱི་སྐབས་འབྱེད་པ་ཙམ་མོ། །དེ་ནས་རིམ་གྱིས་ཟད་པ་ནི་འོད་གསལ་གྱི་སྣང་བ་སྐུ་དང་ཐིག་ལེ་ཐམས་ཅད་སྤྲིན་ཕུང་དབྱིངས་སུ་ཡལ་བ་ལྟར་རིམ་གྱིས་ཡལ་ཏེ་དག་དང་མ་དག་པའི་སྣང་བ་ཟད་པའོ། །ནང་རྟགས་སུ་ཀུན་གཞིའི སྒྲིབ་པ་དབྱིངས་སུ་དེངས་ནས་མ་རིག་པ་གཞི་ལ་སངས། ཉོན་ཡིད་ཀྱི་ངར་འཛིན་རང་སར་ཞི་བས་གཟུང་འཛིན་གྱི་འཆིང་བ་གྲོལ། ཡུལ་འཛིན་གྱི་ཤེས་པ་ངོ་བོར་གྲོལ་བས་བློ་ཡི་ཟུང་ཟད། ཚོགས་བརྒྱད་ཀྱི་རྟོག་པ་ཡེ་ཤེས་སུ་འཕོས་ཏེ་སེམས་དང་སེམས་བྱུང་གི་རྟོག་པ་ཟད།མཆེད་གཞིའི་སེམས་རྟོག་ཟད་པས་མཆེད་པ་རང་སར་ཡལ། ཡུལ་འཛིན་གྱི་ཤེས་པ་ཟད་པས་གཟུང་བའི་ཡུལ་ཟད། བདག་འཛིན་གྱི་རྒྱ་གྲོལ་ཏེ་ཟག་བཅས་ཀྱི་ཕུང་པོ་ཟད་པའོ། །འདིའི་དུས་སུ་ལུས་དུར་ཁྲོད་ཀྱི་མི་རོ་རྟོག་མེད་ལྟ་བུར་སྲོག་གཅོད་སྟོང་གིས་བསྐོར་ཀྱང་བག་ཚ་བ་ཅུང་ཟད་ཙམ་ཡང་མེད་ལ། ངག་བྲག་ཆ་ལྟ་བུར་སོང་ནས་སྒྲ་ཐམས་ཅད་ཀྱི་རྗེས་སུ་ཟློ་བ་དང་། སེམས་ན་བུན་ནམ་མཁའ་ལ་ཡལ་བ་ལྟར་རིག་པ་གདོད་མའི་མགོན་པོའི་དབྱིངས་སུ་མྱ་ངན་ལས་ ༄༅། །འདས་པས་འཁྲུལ་མི་ཤེས་པའོ། །འདིའི་དུས་སུ་རང་རིག་གདོད་མའི་མགོན་པོའི་གོ་འཕང་མངོན་དུ་འགྱུར་བ་དེ་ལས་ཡུལ་རྐྱེན་ལ་མི་ལྟོས་པའི་ཕྱིར་སངས རྒྱས་སུམ་སྟོང་གི་ཞལ་མཐོང་ཡང་དད་པ་ཅུང་ཟད་ཙམ་ཡང་མེད་པའི་གདིང་ཐོབ། རང་རིག་ཆོས་སྐུ་མཚན་མ་དང་བྲལ་བའི་དབྱིངས་སུ་ཆམ་བརྡལ་བས་བདུད་དང་གཤེད་མ་འབུམ་གྱིས་བསྐོར་ཀྱང་བག་ཚ་བ་ཅུང་ཟད་ཙམ་ཡང་མེད་པའི་གདིང་ཐོབ། རང་ངོར་རང་གདིང་ཐོབ་པ་ལས་མྱང་འདས་རང་མཚན་པ་མེད་པའི་དོན་གཤིས་ཐོག་ཏུ་ཕེབས་པས་རྒྱུ་འབྲས་རྣམ་སྨིན་ལ་མི་རེ་བའི་གདིང་ཐོབ། རང་ངོ་གདོད་ནས་འཁྲུལ་མི་ཤེས་པའི་ངང་དུ་གྲོལ་བས་འཁོར་བ་དང་ངན་སོང་ལ་དོགས་པ་མེད་པའི་གདིང་ཐོབ་པ་སྟེ་གདིང་ཆེན་བཞི་ཐོབ་པའོ། །ད་དུང་ཡང་ཤེས་སྒྲིབ་ཕྲ་བའི་ཕྲ་བ་བག་ལ་ཉལ་བ་ལངས་ཏེ་མཁའ་ལ་གློག་འཁྱུགས་ནས་སྣང་བ་སྟོན་པ་བཞིན་དུ་སྐབས་རེ་ལ་རང་ལུས་འོད་ཀྱི་ཀློང་དུ་འོད་ལུས་ལག་སོར་བཀྲམ་པ་ཙམ་སྣང་སྟེ། སྣང་སེམས་སྐབས་འབྱེད་ཅིང་གཏམ་དང་ཆོས་ཚིག་སྔར་བཞིན་སྨྲ་བའི་སྐབས་འགའ་མཆིས་པ་ཤེས་པར་བྱ་བ་དང་། དེ་ལྟར་ཞག་བཅུའམ་ཟླ་བ་ལྔའམ་བཅུའི་ཚེ་ན་ཤེས་སྒྲིབ་ཕྲ་བ་དབྱིངས་ སུ་དེངས་ནས་ཇི་ལྟ་བ་མཁྱེན་པ་དང་ཇི་སྙེད་པ་གཟིགས་པའི་ཡེ་ཤེས་ཀྱི་རྩལ་རྫོགས་ཏེ་ཀ་དག་གཞིའི་ཆོས་སྐུ་དང་ལྷུན་གྲུབ་སྐུ་དང་ཡེ་ཤེས་ཀྱི་རོལ་པ་ལ་མངའ་དབང་བསྒྱུར་ནས་འཕོ་ཆེན་གཞོན་ནུ་བུམ༷་སྐུར༷་སང༷ས་རྒྱས༷་ཏེ༷་དེའི་ཁྱད་ཆོས་དགུ་ནི ཁྲིད་གཞུང་ལས ཀྱེ་རིག་པའི་རྡོ་རྗེ་ལ་སོགས་པའི༔ འདུས་པའི་འཁོར་རྣམས་གསན་ཅིང་དགོངས༔ ལྷུན་གྲུབ་གཞོན་ནུ་བུམ་སྐུ་ལ༔ ཁྱད་དུ་འཕགས་པའི་ཡོན་ཏན་ནི༔ མ་རིག་སྒྲིབ་པ་དབྱིངས་སངས་ཏེ༔ ཀུན་གཞི་ལས་ནི་ཆོས་སྐུ་འཕགས༔ མདངས་ཀྱི་ཡེ་ཤེས་མངོན་གྱུར་ཏེ༔ གདངས་གསལ་ལས་ནི་ཁྱད་པར་འཕགས༔ བདག་མེད་ཆེན་པོ་མངོན་གྱུར་ཏེ༔ བདག་སྣང་ལས་ནི་ཁྱད་པར་འཕགས༔ སྐུ་དང་ཡེ་ཤེས་མངོན་གྱུར་ཏེ༔ སྣང་བ་ལས་ནི་ཁྱད་དུ་འཕགས༔ ཇི་སྙེད་གཟིགས པ་མངོན་གྱུར་ནས༔ སེམས་ལས་ཡེ་ཤེས་ཁྱད་དུ་འཕགས༔ རང་ཐོག་རང་སངས་རྒྱས་པ་ལས༔ ཞིང་ཁམས་བགྲོད་ལས་ཁྱད་པར་འཕགས༔ སྤྲོས་མཐའ་ཀུན་དང་བྲལ་བ་ལས༔ རྟེན་འབྲེལ་རྒྱུ་ལས་ཁྱད་པར་འཕགས༔ རྣམ་ཐར་བརྒྱད་དང་ལྡན་པ་ལ༔ ལམ་འབྲས་ཀུན་ལས་ཁྱད་དུ་འཕགས༔ དབྱིངས་དང་ཡེ་ཤེས་མཉམ་བརྡལ་བས༔ སྲིད་པ་ལས་ནི་ཁྱད་དུ་ ༄༅། །འཕགས༔ ཁྱད་འཕགས་ཆེ་བ་དགུ་ལྡན་འདི༔ ཡང་དག་རྫོགས་པའི་སངས་རྒྱས་ལ༔ རྒྱལ་བ་ཀུན་གྱིས་མངོན་པར་བསྟོད༔ ཅེས་གསུངས་སོ༔ གསུམ་པ་དབང་རབ་ཚེ་འདིར་གྲོལ་ཚུལ་ནི རྟགས་ཀྱང་མཁའ་ལ་ནས། རྣམ་གསུམ་འབྱུང་༔ ཞེས་གསུངས་ཏེ། དེ་ལྟར་ཀ་དག་ཆོས་ཀྱི་སྐུ་མངོན་དུ་གྱུར་པས་ཡང་དག་པར་རྫོགས་པའི་སངས་རྒྱས་པའི་རྟག༷ས་ཀྱང༷་དྭངས་མའི་ལུས་དེ་ཆུ་ལ་ཆུ་ཐིམ་པའམ་ནམ་མཁ༵འ་ལ༷་ནམ་མཁའ་ཐིམ་པ་ཇི་ལྟ་བ་བཞིན༷་དུ༷་ཚེ་ཚད་དང༷་དུས༷་དང་ལས་ཀྱི་ཚད༷་ཐོགས་པ་མཐ༷ར་མི༷་ཐུག༷་པའམ་མི་ལྟོས་པར་ཆོས་དབྱིངས་སྤྲོས་པ་དང་བྲལ་བ་འཕོ་ཆེན་གཞོན་ནུ་བུམ་པའི་སྐུར་སངས་རྒྱས་པའོ། །འགའ་ཞིག་ལུས་ལ་འོད་འཁྲིགས་