Tibetan
ཤིང་འོད་ཀྱི་ངང་དུ་ཡལ་བ་ནི་འོད་ཕུང་དང་། འགའ་ཞིག་གི་ལུས་མཁའ་ལ་འཇའ་སྤྲིན་འཁྲིགས་པའི་འོད་ཀྱི་སྣམ་བུས་དཀྲིས་ཤིང་འཇའ་ཚོན་གྱི་ངང་དུ་ཡལ་བ་ནི་འཇའ་ལུས་ཆེན་པོ་སྟེ་དེ་གཉིས་ནི་ཚེ་ཚད་ཀྱི་དུས་སུ་ལུས་སེམས་མ་བྲལ་བར་སངས་རྒྱས་པའོ། །འགའ་ཞིག་གི་ལུས་སེམས་བྲལ་བའི་རྗེས་སུ་འཇའ་དང་འོད་ཀྱི་ངང་དུ་ཕུང་པོ་ལྷག་མ་མེད་པར་ཡལ་བ་ནི་འཇའ་ལུས་ཆུང་ངུ་དང་། འགའ་ཞིག་གཞིའི་འོད་གསལ་ ཤར་བའི་གནས་སྐབས་སུ་ཞག་གྲངས་བདུན་ཕྲག་ཚུན་ཆད་དུ་ལུས་ཀྱི་རྡོས་པ་ཇེ་ཆུང་དུ་སོང་ནས་མཐར་སྐྲ་དང་སེན་མོ་ཙམ་སྙིགས་མར་ལུས་ཏེ་ལུས་རྡུལ་ཕྲན་དུ་དེངས་པ་ནི་འཕོ་བ་ཆུང་ངུ་ཞེས་བྱ་སྟེ། འདི་ནི་དབང་པོ་ཡང་རབ་རྣམས་ལ་ཁྲེགས་ཆོད་དུ་ཡང་འབྱུང་ངོ་། །དེ་ལྟར་འོད་ཕུང་དང་གཅིག །འཇའ་ལུས་ཆེན་པོ་དང་གཉིས འཇའ་ལུས་ཆུང་ངུ་དང་འཕོ་ཆུང་ངམ་རྡུལ་ཕྲན་དུ་དེངས་པ་གཉིས་གཅིག་ཏུ་བརྩིས་ཏེ་གསུམ་ནི་འཇའ་ལུས༷་དྭང༷ས་མར༷་གྲོལ༷་བ༷་རྣམ༷་པ་གསུམ་འབྱུང༷་སྟེ། སྔ་མ་གཉིས་དབང་པོ་འབྲིང་དང་ཕྱི་མ་གཉིས་དབང་པོ་ཐ་མའི་གྲོལ་ལུགས་དང་། སྔ་མ་འཕོ་ཆེན་ནི་དབང་པོ་རབ་རྣམས་ཀྱི་གྲོལ་ལུགས་སོ །དེ་ལ་ཡང་ལ་ལས་ནི་འཇའ་ལུས་ལ་ཁ་ཆེམས་མེད་པར་འདོད་ཀྱང་། སྔ་མ་འཕོ་ཆེན་དུ་གྲོལ་བ་དེ་ཀ་ཡིན། ལ་ལས་ནི་འཇའ་ལུས་ལ་ཟུག་ཟེར་མེད་པར་འདོད་པ་འོད་ཕུང་དང་འཇའ་ལུས་ཆེན་པོ་དེ་ཀ་ཡིན། ལ་ལས་ནི་འཇའ་ལུས་ལ་འཕོ་བ་ཡོད་པར་འདོད་པ་དེ་འཇའ་ལུས་ཆུང་ངུ་དང་རྡུལ་ཕྲན་དུ་དེངས་པ་དེ་ཀ་ཡིན་ནོ། །དེ་ལྟར་དང་པོ་རང་གྲོལ་ལྷུམས་འཇུག་གི་ཆོས་སྐུ་དང་། བར་མ་གཉིས་ཟུང་འཇུག་གཉིས་མེད་ཀྱི་ཆོས་སྐུ་དང་། ཐ་མ་གཉིས་འཕོ་བ་ཡེ་ཤེས་ཀྱི་ཆོས་སྐུ་དང་ ༄༅། །གསུམ་པོ་གང་དུ་གྲོལ་ཡང་ཆོས་ཀྱི་སྐུ་གཡོ་བ་མེད་པ་སྐུ་དང་ཡེ་ཤེས་ཀྱི་རོལ་པར་འབྱམས་ཀླས་པའོ། །སྐབས་འདིར་སྣང་བཞིའི་འཕེལ་འགྲིབ་ཀྱི་གོ་དོན་ནི དཔེར་ན་ཟླ་བ་རང་ངོས་ནས་འཕེལ་འགྲིབ་མེད་ཀྱང་ཚེས་ཀྱི་དབང་གིས་འཕེལ་འགྲིབ་ཏུ་སྣང་བ་ལྟར་འོད་གསལ་གྱི་སྣང་བ་ཡང་རང་ངོས་ནས་འཕེལ་དུ་མེད་ཀྱང་རིག་པའི་གཤིས་ལ་ལོངས་སྤྱོད་རྫོགས་པའི་ཡོན་ཏན་ཐམས་ཅད་མ་ལུས་པར་རྫོགས་པ་དེ་ཉིད་གོམས་ཤུགས་ཀྱི་དབང་གིས་ལམ་གྱི་སྣང་བར་མཐོང་ཞིང་རྩལ་རྫོགས་པར་བྱེད། དེ་ལྟར་སྣང་བའང་རིག་གདངས་ཕྱིར་ཤར་གྱི་གཟུགས་བརྙན་ཙམ་ལས་ངོ་བོ་ཉིད་མ་ཡིན་པས་བདེ་གཤེགས་སྙིང་པོའི་རང་གདངས་ཕྱིར་སྣང་བ་ཟད་དགོས་པའི་གནད་ཀྱིས་རིག་པ་གཡོ་བྱེད་ཀྱི་རླུང་ཕྲ་བ་དང་བཅས་པ་ཤིན་ཏུ་རྣམ་པར་དག་པ་བློ་ཟད་ཆོས་ཟད་ཀྱི་སྣང་བ་གདོད་མའི་དབྱིངས་སུ་བཙན་ས་ཟིན་པ་ནི་དོན་དམ་མཐར་ཐུག་ཏུ་བཞེད་དོ། །བཞི་པ་གོང་འཕེལ་ཉམས་ཀྱི་བྱེ་བྲག་བསྟན་པ་ནི ཉམས་སྣང་བཟང་ངན་ནས། དབྱིངས་སུ་བསྐྱལ༔ ཞེས་གསུངས་ཏེ། སྔར་བཤད་ཟིན་པའི་ཉམས་སྣང་གོང་དུ་འཕེལ་བའི་སྐབས་དེར་རགས་པའི་སྣང་བ་དང་རྩ་རླུང་ཐམས་ཅད་ཕྲ་བ་ཆོས་ཉིད་འོད་གསལ་ཆེན་པོའི་ དབྱིངས་སུ་འཇུག་པའི་སྐབས་ཡིན་པས་ཉམ༷ས་ཀྱི་སྣང༷་བ་བཟ༷ང་པོ་དང་ང༷ན་པ་ལྟར་སྣང་བ་གཅིག་ཏུ་མ༷་ངེས་པར་སྣ་ཚོགས་པ་འབྱུང་བའི་སྟོབས་ཀྱིས༷་རེས་འགའ་ལུས་བདེ༷་ཞིང་སེམས་དགའ་བ་དང༷་། རེས་འགའ་ནི་ལུས་ལ་ན་ཚ་སེམས་ལ་སྡུག༷་བསྔལ༷་སོགས་རིམ་པ༷་བཞིན༷་དུ་འབྱུང༷་བ་དང་། ལྷར་སྣང་འདྲེར་སྣང་མངོན་ཤེས་སྣ་ཚོགས་པ་འཆར་བ་དང་། རེས་འགའ་དད་མོས་ངེས་འབྱུང་དྲག་པོ་བཟོད་མེད་དུ་སྐྱེ་བ་དང་རེས་འགའ་ནི་ང་རྒྱལ་དྲག་པོས་རྒྱུད་ཁེངས་ནས་རང་ལྟ་ལ་དཔང་བསྟོད་བྱེད་པ་དང་། གཞན་ཡང་ཞིང་དང་གནས་ཀྱི་མཁའ་འགྲོས་ལྟར་སྣང་གི་རྗེས་སུ་ཁྲིད་ནས་བསླུ་བ་ནི། ཞིང་གི་མཁའ་འགྲོ་སྟེ་གནས་ཡུལ་གྱི་མཁའ་འགྲོ་མ་དེ་དག་ཡེ་ཤེས་དབྱིངས་ཀྱི་མཁའ་འགྲོ་མ་རུ་མིང་དང་ཚུལ་བརྫུས་ནས་ལུང་སྟོན་པ་འབྱུང་སྟེ། དེ་ལ་བདེན་ཞེན་སྐྱེས་ནས་དེ་དག་གི་སྨྲས་པ་ལྟར་བསྒྲུབ་ན། བདག་ཉིད་མཁའ་འགྲོ་མའི་དབང་དུ་གྱུར་ནས་འཁོར་བའི་གནས་སུ་ངེས་པར་མཐའ་མེད་དུ་འཁྲུལ་ལོ། །གནས་ཀྱི་མཁའ་འགྲོ་མ་སྟེ་འཇིག་རྟེན་གྱི་མཁའ་འགྲོ་མ་རྣམས་ཡུལ་གྱི་བུད་མེད་དག་གི་སྙིང་ལ་ཞུགས་ནས་ཐབས་སྣ་ཚོགས་ཀྱིས་བསླུ་བ་འབྱུང་སྟེ་དེ་དག་གི་དབང་དུ་གྱུར་ན་འཁོར་བ་མཐའ་མེད་པར་ཕྱིར་ལྡོག་པ་ ༄༅། །ཡིན། དེའི་དུས་སུ་འཁོར་འདས་རང་སྣང་ལས་མི་གཞན་པའི་ཚུལ་ཇི་ལྟ་བ་བཞིན་དུ་ཤེས་པའི་ངང་བདེན་མེད་སྒྱུ་མ་རྨི་ལམ་ལྟ་བུར་ཤེས་ནས་དེར་འཛིན་དང་བྲལ་བར་ཞེན་མེད་ཀྱི་ངང་དུ་བཞག་པས་མཁའ་འགྲོ་མ་བདག་གི་དབང་དུ་གྱུར་ནས་གསང་བ་མཆོག་གི་དངོས་གྲུབ་མ་བཙལ་རང་བབས་སུ་ཐོབ་པར་འགྱུར་རོ། །འདིའི་དུས་སུ་བར་ཆད བདུད་ཀྱི་བསླུ་བ་འབྱུང་བ་ནི་ཡིད་བརྟན་མི་རུང་བའི་ཉམས་རྟོགས་གློ་བུར་དུ་སྐྱེ་བ་དང་། ཕ་རོལ་གྱི་སེམས་ཤེས་སྙམ་པ་དང་ལུས་ཁ་དོག་སྣ་ཚོགས་སུ་སྤྲུལ་ནུས་པའི་སྣང་བ་དང་། གྲིབ་མ་གཉིས་མེ་ལོང་ལ་གཟུགས་བརྙན་གཉིས་སུ་འཆར་བ་རྣམས་བྱུང་ན་བདུད་དབང་དུ་ཉེ་བའི་ལྟས་ཡིན་པས། དེའི་དུས་སུ་གུ་གུལ་གྱི་དུད་པས་བདུག་ཅིང་། བདུད་རྩི་ཆེ་ཆུང་གི་ཆུས་བཀྲུས་ཏེ་ཡན་ལག་ལ་ལྡེར་ཚོ་རྙིང་པའི་འདག་པ་བྱུག་སྟེ བར་ཆད་སེལ་བའི་སྔགས་བརྗོད་པས་སེལ་ལོ། །ལྟར་སྣང་གི་རྗེས་སུ་ཁྲིད་ནས་བསླུ་བ་ཡང་བགེགས་ཡི་དམ་གྱི་གཟུགས་སུ་བརྫུས་ནས་ཞལ་ངོམས་ཤིང་ལུང་སྟོན་པ་འབྱུང་བ་རྣམས་ནི་བདུད་ཀྱི་བསླུ་བ་ཡིན་པར་ངེས་པས། དེའི་དུས་སུ་འཁོར་འདས་ཐམ༷ས་ཅད་རང་སྣང་ལས་མེད་ཅིང་གཟུགས་དང་མཚན་མར་ གྲུབ་པའི་ལྷ་དང་སངས་རྒྱས་ཐམས་ཅད་འཁྲུལ་པ་ལས་མེད་པའི་ཚུལ་ཤེས་ནས་ཞེན་ཆགས་དང་རེ་བ་མི་བྱེད་པ་དང་། འདྲེ་དང་གདོན་བགེགས་ཀྱིས་གནོད་འཚེ་དང་ཐན་དང་ལྟས་ངན སོགས་ངན་པ་ལྟར་སྣང་བ་ཐམས་ཅད་ཉམས་སྣང་རྫུན་པོ་ཆེར་ཤེས་ནས་དོགས་པ་དང་སྤོང་སེམས་མེད་པའི་ཆོས་ཉིད་མཉམ་པ་ཉིད་ཀྱི་དབྱིངས་སུ་བཞག་པས་རྐྱེན་ངན་ལམ་དུ་ལོངས་ཤིང་འགལ་རྐྱེན་གྲོགས་སུ་ཤར་ནས་ཉམས་དང་རྟོགས་པའི་བོགས་འདོན་དུ་འགྱུར་བས་ན་ལམ་མཐར་བསྐྱལ༵་བའམ་ཕྱིན་པར་བྱེད་པ་ཡིན་ནོ། །ལྔ་པ་དབང་པོ་འབྲིང་ཐ་ཆོས་ཉིད་དང་སྲིད་པ་བར་དོར་གྲོལ་ཚུལ་ནི། དེ་ལྟར་ལམ་མཐར་ནས། དབུགས་འབྱིན་འགྱུར༔ ཞེས་གསུངས་ཏེ། དེ༷་ལྟར༷་ཚེ་འདིར་ལམ་མཐ༷ར་མ༷་ཕྱིན༷་པའི་སྐྱེས༷་བུ་དབང་པོ་འབྲིང་དང་ཐ་མ་དག༷་བར་དོར་གྲོལ་ཚུལ་ལ་གསུམ། ངོ་བོ། དབྱེ་བ། སོ་སོའི་ལམ་ཁྱེར་རོ། །དང་པོ་ནི། གཞི་ཀ་དག་ལས་གཞན་དུ་སྣང་བ་ཐམས་ཅད་བར་དོའི་གནས་སྐབས་ཡིན་ཏེ། གཞི་སྣང་ཡེ་ཤེས་སུ་འཆར་བའི་སྣང་ཆ ནི་དག་པ་ཆོས་ཉིད་ཀྱི་བར་དོ་དང་། འཁྲུལ་སྣང་འགྲོ་དྲུག་གིས་བསྡུས་པའི་ཆོས་སོ་ཅོག་ནི་མ་དག་འཁྲུལ་པའི་བར་དོ་སྟེ་དབྱིངས་ལས་ཤར་ཞིང་དབྱིངས་སུ་མ་རྫོགས་ཀྱི་བར་གྱི་སེམས་པ་ས་ ༄༅། །བོན་དང་བཅས་པ་བར་དོའོ། །གཉིས་པ་ལ་བཞི་སྟེ། སྐྱེ་གནས་སམ་རང་བཞིན་གྱི་བར་དོ། འཆི་ཁའི་བར་དོ། ཆོས་ཉིད་ཀྱི་བར་དོ། སྲིད་པ་བར་དོའོ།། དང་པོ་ནི། མའི་མངལ་དུ་སྐྱེ་བ་གྲུབ་ནས་འཆི་ནད་ཀྱིས་བཏབ་པ་ཚུན་ཆད་དོ། །གཉིས་པ་ནི་འཆི་བ་ལ་ཕྱོགས་པ་ནས་ནང་དབུགས་ཆད་པ་ཚུན་ཆད་དོ། །གསུམ་པ་ནི། ནང་དབུགས་ཆད་ནས་འོད་གསལ་གྱི་སྣང་བ་ཤར་ཏེ་ལྷུན་གྲུབ་ཀྱི་སྣང་བ་ཐིམ་པ་ཚུན་ཆད་དོ། །བཞི་པ་ནི། ལྷུན་གྲུབ་ཀྱི་སྣང་བ་ཐིམ་ནས་ཕྱི་མའི་སྐྱེ་སྲིད་གྲུབ་པ་ཚུན་ཆད་དོ། །གསུམ་པ་ནི་བར་དོ་རྣམ་པ་བཞི་ལ་དཔེ་དོན་གཉིས་གཉིས་ཏེ་དྲུག་གི་སྒོ་ནས་བསྟན་པ་སྟེ དང་པོ་སྐྱེ་གནས་ཀྱི་བར་དོ་ལ་ཐོས་བསམ་གྱིས་སྒྲོ་འདོགས་ཆོད་ནས་ལྟ་སྒོམ༷་གྱི་གན༷ད་རྟོགས་པ་ཐྱི་བྱ༷་ཚང་དུ་འཇུག༷་པ་ལྟ་བུ་དང༷་། གཉིས་པ་འཆི་ཁའི་བར་དོ་ལ་འཆི་སྲིད༷་ངོས་ཟིན༷་པར་བྱེད་པ་སྔར་སྒོམ་པའི་གདམས་པ་རྣམས་བློ་ལ་གསལ་གདབ་པ་སྒེག༷་པོ༷ས་མེ་ལོང་གི་གཟུགས་བརྙན༷་ལ་བལྟ་བ་ལྟ་བུ་དང༷་། གསུམ་པ་ཆོས་ཉིད་ཀྱི་བར་དོ་ལ་ཀ་དག་གི་གནས༷་ལུག༷ས་དོ༷ས་ཟིན་ནས་ཡིད་ཆེས་པ་སྔར༷་འདི༷ས་ཀྱི་མི༷་དང་འཕྲད༷་པ་ལྟ་བུ་དང༷་། ལྷུན་གྲུབ་འོད་གས༷ལ་གྱི་སྣང་ཆ་རང་སྣང་དུ་ངོས་ཟིན་ནས་དབྱིངས་སུ་ ཞུགས་པའམ་གྲོལ་བ་མ༷་པང་དུ་བུ་འཇུག་པ་ལྟ་བུ་དང༵་། བཞི་པ་སྲིད་པ་བར་དོ་རིགས་དྲུག་གང་རུང་དུ་སྐྱེ་བའི་ལྟས་རྣམས་ངོས་ཟིན་ནས་སྔར་གྱི་གདམས་པའི་ཉམས་ལེན་གྱི་འཕྲོ་མཐུད༷་པའི་གཞིའི་འོད་གསལ་ཀ་དག་གི་ཆོས་སྐུ་སླར་ཡང་འཆར་བ་ནི་འདྲེན༷་ཆུར༷་ལྷ༷་འཛུག༷་པ་ལྟ་བུ་དང༷་འདྲ་སྟེ་གྲོལ་བ་ཐོབ་པར་གྱུར་རོ། །ཡང་ན་མ་དག་མངལ་གནས་ཀྱུ་སྐྱེ་བའི་སྒོ་ངན་པ་དེ་རྣམས་འགག་པར་བྱེད་པ་རྣམ་དག་དབུགས་ཆེན་འབྱིན་པའི་ཞིང་ཁམས་གང་རུང་ཡིད་ལ་བྱས་པས་དེར་བགྲོད་པ་ཉེས་ཅན་བཙོན་ནས་ཐར་བ་ལྟ་བུ་དང་། སོགས་ཁུངས་ནས་དབྱེ་སྒོ་གཞན་ལྟར་བསྒོམ་པ་བསམ་གཏན་གྱི་བར་དོ་དང་། རྨི་ལམ་འཁྲུལ་པའི་བར་དོ་གཉིས་བསྟན་ནོ།།དེ་ལྟར་དཔེ་དྲུག༷་གིས་མཚོན་ནས་དོན་ཉམས་ལེན་གྱི་གནད༷་དང༷་ལྡན༷་པ༷་ཞིག་མཆོ༷ག་ཏུ་ཤེས༷་ཤིང་བརྩོན་པ་མེད་དུ་མི་རུང་བ་ཡིན་ལ དེ༷་ལྟར་ཉམས་སུ་བླངས་པའི་མཐུ་ཡི༷ས་ཆོས་ཉིད་བར་དོར་གྲོལ༷་སྲིད༷་པའམ་ཡང༷་ན༷་སྲིད་པ་བར་དོར་དག་པའི་ཞིང་དུ་དབུག༷ས་འབྱིན༷་པར་འགྱུར༷་བ་ཡིན་ནོ།། འདི་དག་གི་དོན་རྒྱས་པ་ནི་ཁྲིད་གཞུང་རྣམས་ལས་རྟོགས་པར་བྱ་དགོས་སོ། །ལེའུའི་སྐབས་བསྡུ་བ་ནི ཤེས་རིག་རྡོ་རྗེ་རྣོན་པོ་ནས བདུན་པའོ༔ ༈ གསུམ་པ་གཞི་འབྲས་ ༄༅། །དབྱེར་མེད་ཀྱི་ངོ་བོ་མངོན་དུ་གྱུར་པའི་ཚུལ་ལ་གསུམ་སྟེ། ཐོབ་བྱ་འབྲས་བུའི་ངོ་བོ་ངོས་བཟུང་། དེ་ཇི་ལྟར་ཐོབ་པའི་ཚུལ་བཤད། ཐོབ་ནས་གཞན་དོན་མཛད་ཚུལ་ལོ། །དང་པོ་ནི། མཐར་ཐུག་ནས། སྐུ་ཉིད་དེ༔ ཞེས་གསུངས་ཏེ། ལམ་ལ་གོམས་པ་མཐ༷ར་ཐུག༷་པས་སྤང་བྱའི་སྒྲིབ་པ་ལས་རྣམ༷་པར་གྲོལ༷་ཞིང་རྟོགས་བྱའི་ཡེ་ཤེས་མངོན་དུ་གྱུར་བ༷འི་ངོ་བོ་ལ་འབྲས༷་བུ་ཞེས་གྲགས་ལ༷། དེ་ཡང་ཁམས་དབང་ལ་ལྟོས་པའི་ཐེག་པ་སོ་སོའི་དབང་གིས་འབྲས་བུ་ཐོབ་ཚུལ་དང་དྲི་མ་སྦྱོང་ཚུལ་ཐ་དད་པ་ལས། སྐབས་འདིའི་འབྲས་བུ་ནི། གཞི༷་ཡི༷་ཆོས་སྐུ་བདེ༷་བར་གཤེ༷གས་པའི་སྙིང༷་པོ༷་ཉིད༷་ནི རྒྱུ་དང་རྐྱེན་ལ་མ་ལྟོས་པར་ཡེ་ནས་སྐུ་དང་ཡེ་ཤེས་ཡོན་ཏན་རྒྱ་མཚོའི་བདག་ཉིད་ཆོས་སྐུ་གདོ༷ད་མའི་མགོན་པོར་ལྷུན༷་གྱིས༷་གྲུབ༷་པའི་ཕྱིར་ཡེ་ནས་སངས་རྒྱས་པའི་རང་བཞིན་དང་དྲི་མ་སྦྱོང་ཚུལ་ཡང་རྩོལ་མེད་རང་བཞག་རྫོགས་པ་ཆེན་པོའི་ལམ་ལ་གོམས་པ་ཚད་དུ་ཕྱིན་པས། རྩ་བ་བདག་རྟོག་ལས་བྱུང་བའི་སྣང་སེམས་ཀྱི་སྒྲིབ་པ་བག་ཆགས་དང་བཅས་པ་ལྷག་མེད་དུ་དག་ནས་ཐོབ་བྱ༷་མཐར་ཐུག་གཞོ༷ན་ནུ་བུམ༷་པ༷འི་སྐུ་ཉིད་མངོན་དུ་གྱུར་པ་ནི་སངས་རྒྱས་པ་དང་། དེ་ལྟ་བུའི་དག་པ་གཉིས་དང་ལྡན་པའི་ངོ་བོ་ སྟོང་པའི་ཡེ་ཤེས་ཆོས་སྐུ རང་བཞིན་འོད་གསལ་བའི་ཡེ་ཤེས་ལོངས་སྐུ ཐུགས་རྗེ་འགགས་པ་མེད་པའི་ཡེ་ཤེས་སྤྲུལ་སྐུ་སྟེ་དབྱིངས་ནང་གསལ་གྱི་སྐུ་གསུམ་དང་། དག་དང་མ་དག་པའི་གདུལ་བྱར་སྣང་བ་མཚན་དཔེས་བརྒྱན་པའི་ལོངས་སྐུ མཛད་པ་བཅུ་གཉིས་སྟོན་པ་མཆོག་གི་སྤྲུལ་པའི་སྐུ་སོགས་ཏེ་ཡེ་ཤེས་ཕྱིར་གསལ་གྱི་སྐུ་གཉིས་སུ་གནས་སོ། །གཉིས་པ་དེ་ཇི་ལྟར་ཐོབ་པའི་ཚུལ་ནི། དབང་པོ་རབ་ཀྱིས་ནས གཞི་རུ་བཞུགས༔ ཞེས་གསུངས་ཏེ། དེ་ཡང་དབ༷ང་པོ༷་ཡང་ར༷བ་ཤེས་བརྩོན་དང་ལྡན་པ་རྣམས་ཀྱིས་ཀ་དག་ཁྲེགས་ཆོད་ཀྱི་ལྟ་བ་དང་། ལྷུན་གྲུབ་ཐོད་རྒལ་གྱི་བསྒོམ་པ་མཐར་ཕྱིན་པས་ཚེ༷་ལུས་གཅི༷ག་པོ་འདིར་རང་གཞི་གདོད་མའི་གནས་ལུགས་ཇི་བཞིན་པ་མངོན་དུ་གྱུར་ནས་ཆོས་སྐུར་འཚང་རྒྱ་བ་དང་། དབང་པོ་འབྲིང་དང༷་སྟེ་ཆོས་སྐུར་གྲོལ་བའི་སྐལ་བ་མེད་པ་རྣམས་ཀྱིས་ཆོས་ཉིད་བར་དོར་རིག་གདངས་ཞི་ཁྲོའི་འཆར་ཆ་རྣམས་རང་སྣང་དུ་ངོས་ཟིན་པའི་སྐུ་དང་ཡེ་ཤེས་ཡོན་ཏན་རྒྱ་མཚོའི་སྤྱི་དཔལ་ལོངས་སྤྱོད་རྫོགས་པའི་སྐུར་འཚང་རྒྱ་བ་དང་། དབང་པོ་ཐ་མཱཾ་རྣམས་ཆོས་ཉིད་ཀྱི་བདེན་པ་དང་རིག་འཛིན་བླ་མ་རྣམས་ཀྱི་བྱིན་རླབས་ཀྱིས། མངོན་པར་དགའ་བ། དཔལ་དང་ལྡན་པ། པདྨ་ ༄༅། །བརྩེགས་པ། ལས་རབ་རྫོགས་པ་སྟེ་བཞི་དང་། དེ་དག་གི་མདུན་གྱི་བར་སྣང་ལ་སྤྲུལ་པའི་ཁྲོ་བོའི་ཞིང་ཁམས་དུར་ཁྲོད་མེ་རི་འབར་བ་ཞེས་བྱ་བ་སྟེ་རྣམ༷་དག༷་དབུགས་ཆེན་འབྱིན༷་པའི་ཞིང༷་ཁམས་ལྔའི་གཞི༷་རུ༷་ལོ་ལྔ་བརྒྱ་ལྔ་བཅུར་བཞུག༵ས་ནས་ཡང་དག་པའི་ལམ་ལ་སྦྱངས་པ་མཐར་སོན་ཏེ་འཚང་རྒྱ་བའོ། །དེ་ཡང་ཀུན་མཁྱེན་ཨ་བྷྱ་དྭི་པས་འདི་ལྟར རྣམ་དག་དབུགས་ཆེན་འབྱིན་པའི་ཞིང་ཁམས་ལྔ་ནི་སྟོན་པ་རྡོ་རྗེ་འཆང་གི་བྱིན་རླབས་ལས་རང་བཞིན་དུ་བཀོད་པས་ན་རང་བཞིན་སྤྲུལ་པའི་ཞིང་ཁམས་ཞེས་བྱ་ལ། ལས་འཕྲོ་ཅན་ལ་དེ་ཉིད་མངོན་སུམ་དུ་སྣང་བའི་རྒྱུ་ནི་ཁམས་བདེ་གཤེགས་སྙིང་པོའི་ཁྱབ་བྱེད་ཀྱི་སྙིང་ཁ་ན་མེ་ལོང་ལྟ་བུ་ལ་སོགས་པའི་ཡེ་ཤེས་བཞི་རང་གསལ་བས་གཞི་སྣང་ལྷུན་གྲུབ་རིན་པོ་ཆེའི་སྒོ་ལོངས་སྐུའི་ཕྱོགས་བཞིན་དུ་གདོད་མ་ཉིད་ནས་ལམ་གྱི་སྣང་བར་ཡོད་པའི་རང་བཞིན་དུ་གསལ་བ་ལ་ཤར་ལ་སོགས་པའི་བརྡས་བཏགས་པ་ཉིད་ཐུན་མོང་བ་ཁ་ཅིག་ལྟར་ཕྱོགས་གཤེད་ན་ཡོད་པར་མི་༢ བལྟའོ། །དཔག་ཚད་ཀྱི་ངེས་པ་བཤད་པས་འགལ་ལོ་སྙམ་ན། ཞིང་ཁམས་དེ་དག་ཁམས་གསུམ་པའི་ཆོས་ཉིད་ལས་རྒྱང་རིང་པོ་ཉིད་དུ་འཕགས་པས་དེ་སྐད་བཤད་པས་སྒྲ་ཇི་བཞིན་པ་མ་ ཡིན་ལ། དེ་བཞིན་དུ་ཁྲོ་བོའི་དཀྱིལ་འཁོར་སྟེང་ན་བཞུགས་པའང་དུང་ཁང་དུ་ཁྲོ་བོའི་ལྷ་ཚོགས་ཡེ་ནས་བཞུགས་པའི་རྣམ་ཆ་ལས་ཤར་བ་ཡིན་ནོ། །ཞེས་གསུངས་པ་ལྟར་ཤེས་པར་བྱའོ། གསུམ་པ་ཐོབ་ནས་གཞན་དོན་མཛད་ཚུལ་ནི། རྣམ་པ་ཀུན་ཏུ་ནས། རྒྱུན་མི་འཆད༔ ཅེས་གསུངས་ཏེ། དེ་ལྟར་ཆོས་ཀྱི་སྐུ་རུ་གཅིག་ཏུ་ཞི་བར་བཞུགས་པ་དེའི་ཚེ་ལྷུན་གྱིས་གྲུབ་པའི་ཡེ་ཤེས་དང་ཐུགས་རྗེའི་ཆ་ལས་གཟུགས་སྐུ་གཉིས་སྣང་བས་རྣམ༷་པ༷་ཀུན༷་ཏུ་གདུལ༷་བྱའི་གནས་སྐབས་དང་མཐར་ཐུག་གི་དོན་མཛད་པས་འགྲོ་བ་རྣམས་ཀྱི་དཔ༷ལ་དང་མགོན་པོར་གྱུར་པ་སྟེ། རང་ངོས་ནས་འཁྲུལ་པའི་སྣང་བ་ཆ་དང་བཅས་པ་སྤངས་པས་འཁྲུལ་སྣང་མེད་བཞིན་དུ་གཞན་ལ་མེད་པ་གསལ་སྣང་ཙམ་དུ་འཆར་བ་དེ་གཟིགས་ནས་ཆོས་སྟོན་པའོ། །དེ་ཡང་སངས་རྒྱས་རྣམས་ལ་རང་བཞིན་ཤུགས་ཀྱི་ཐུགས་རྗེ་ཡོད་པས་ལོངས་སྐུ མཁའི་ཟླ་བ༷་དང་སྤྲུལ་སྐུ་ཆུ་ཟླ་ལྟ་བུར༷ ལས་དག་པ་དང་མ་དག་པའི་གདུལ་བྱ་རྣམས་ལ་ཅིར་ཡང་སྟེ་སྣ་ཚོགས་སུ་སྣང༵་རུང་བའོ། །ཡང་མཐའ་དང་མུ་མེད་པའི་འགྲོ་བ་རྣམས་ཀྱིས་རང་གཞི་བདེ་གཤེགས་སྙིང་པོའི་གནས་ལུགས་མ་མཐོང་ཞིང་གཉིས་སུ་འཛིན་པའི་བག་ཆགས་འཐས་པའི་སྟོབས་ཀྱིས་རང་སྣང་ ༄༅། །འཁྲུལ་པ་རྨི་ལམ་ལྟར་སྣང་བ་ནི་གདང༷ས་ཀྱི༷ཐྱི༷་འཁོ༷ར་བ༷༷་སྟེ། དེ་ཉིད་ལམ་རྟོགས་གོམས་ཀྱིས་དབྱིངས་སུ་མ༷་ཞིག༷་གི་བར༵་དུ། དབྱིངས་ནང་གསལ་སྐུ་གསུམ་གྱི་ཡེ༵་ཤེས་ཕྱིར་གསལ་དུ་ཤར་བ་གཟུགས་སྐུ་གཉིས་ཀྱི་རོལ་གར༷་ཡང་རྒྱུན༷་མི༷་འཆུད་པར་འབྱུང་ཞིང་འགྲོ་དོན་མཛད་པ་དང་། གང་དུ་གདུལ་བྱའི་ཆུ་སྣོད་ཡོལ་བའི་ཚེ་ན་གདུལ་བྱའི་སྣང་བས་བསྡུས་པའི་སྤྲུལ་སྐུའི་ཆུ་ཟླ་ལོངས་སྐུའི་མཁའ་ཟླ་ལ་ཐིམ་པ་དང་། དེ་ཡང་གཅིག་ཤོས་ནས་གཅིག་ཤོས་ལ་ཐིམ་པ་ལྟ་བུ་མེད་ཀྱང་ཕྱིར་གསལ་གྱི་གདངས་ལོངས་སྐུའི་རང་སྣང་ནང་དབྱིངས་སྤྲོས་པ་མེད་པའི་ངང་དུ་ཐིམ་ནས་ཆོས་སྐུའི་ཡེ་ཤེས་ཆེན་པོར་འཁྱིལ་བ་ལ་དབུ་མ་པ་རྣམས་འཇུག་པ་ཆོས་དབྱིངས་སུ་ཞི་བའི་འགོག་པ་དམ་པ་དང་། རྫོགས་ཆེན་པ་རྣམས་ནང་གསལ་ཐིམ་ལ་མ་རྨུག་པའི་ཡེ་ཤེས་གཞོན་ནུ་བུམ་པའི་སྐུ་ཞེས་བཞེད་པར་གསུངས་སོ། །ལེའུའི་སྐབས་བསྡུ་བ་ནི ཤེས་རིག་ནས རྫོགས་སོ༔ ༈ གསུམ་པ་མཇུག་དོན་མཛད་བྱང་ནི། ཞེས་པ་འདི་ནི་སོགས་ནས སྤྲུགས་པར་གྱུར་ཅིག །ཅེས་པའི་བར་གྱིས་བསྟན་ནོ ༈ སྨྲས་པ། རྨོངས་པའི་སེམས་འདིས་མི་གཙང་སྒྱུ་མའི་ལུས་འདི ྋ བདག་ཏུ་བཟུང་ཕྱིན་ཆད། །བྱས་ཚད་ཐམས་ཅད་འཁོར་བའི་རྒྱུ་སྟེ་འབྲས་བུ་སྡུག་བསྔལ་ལས་མི་འཕགས། །སྲིད་པའི་ཕུན་ཚོགས་གནས་སྐབས་ལེགས་ཀྱང་མི་བདེན་སྒྱུ་མའི་བསླུ་བྲིད དངོས། །དེ་ཕྱིར་དེ་ཤེས་བདག་མེད་དོན་འདི་ཐར་འདོད་རྣམས་ཀྱིས་བསྟེན་བྱར་གདམས། །འཁོར་འདས་ཆོས་ཀུན་རང་སྣང་ཙམ་དང་གཞི་མེད་རྩ་བྲལ་མ་རྟོགས་ན། །ཉི་ཚེའི་སྟོང་པ་ཤེས པ་ཁོ་ནས་ཐེག་ཆེན་འཕགས་ས་ཐོབ་པ་མིན། །ངོ་བོ་ཀ་དག་རིག་གདངས་ལྷུན་གྲུབ་སྣང་བ་ལམ་བྱེད་མ་རྟོགས་ན། །སྣང་གསུམ་འཕོ་བའི་བག་རྡུལ་བཅོམ་ནས་དང་པོའི་གནས ལུགས་མངོན་མིན་པས། །སྲིད་ཞིའི་ཁམས་ན་འགྲན་ཟླ་བྲལ་ཞིང་མ་ལུས་སྐྱེ་རྒུའི་མགོན་གཅིག་པུ། །བྱོན་དང་འབྱོན་འགྱུར་རྒྱལ་བ་ཀུན་གྱི་བསྒྲོད་པ་གཅིག་པུའི་ལམ་མཆོག་འདི།། རླབས་ཆེན་ཐུགས་རྗེ་ཆེན་པོའི་ཤུགས་དང་གདུལ་བྱའི་བསྐལ་མང་ལེགས་བྱས་མཐུས། །ལན་གཅིག་སྣང་ཕྱིར་འདི་ན་རྙེད་དཀའ་ཨུ་དུམ་ཝ་ར་ལས་ཀྱང་དཀོན། །མཚན་ཐོས་ཙམ་གྱིས སྡིག་པོ་ཆེ་ཡང་ངན་སོང་གནས་ལས་སྒྲོལ་གསུངས་ན། །ཐོས་བསམ་བསྒོམས་པས་ཉམས་སུ་ལེན་གང་སྲིད་མཐའི་བྱང་ཆུབ་སེམས་དཔར་ངེས། །ཚུལ་དེར་གཞིག་ན་རྙེད་པ་དོན་ཆེ་ཡིད་ ༄༅། །བཞིན་ནོར་བུ་ལས་ལྷག་པས། །ཉིན་དང་མཚན་དུ་གཡེལ་མེད་བརྩོན་རྣམས་ཆོས་པ་ཀུན་གྱི་རྩེ་མོར་བསྔགས། །རྫོགས་ཆེན་ཆོས་ལས་ཟབ་པ་མེད་ཀྱང་གང་ཟག་རྒྱུད་དང་འབྲེལ་མིན་པར། །ཁ་ལྟ་མཐོན་པོའི་ང་རྒྱལ་ཁོ་ནས་ལས་འབྲས་ཁྱད་གསོད་ངན་འགྲོའི་རྒྱུ། །མཚོན་གྱིས་གཏུབ་ཀྱང་ཉམས་ལེན་གདུང་བྲལ་གྲུབ་པའི་ས་མཐོར་མ་གཤེགས་པར། །ལས་འབྲས་འདོར་ལེན་ཟབ་མོའི་གདམས་ངག་གཅིག་དྲིལ་བརྩོན་པ་ཤིན་ཏུ་གཅེས། །རྫོགས་ཆེན་མཉམ་བཞག་སྨྲ་བརྗོད་བྲལ་ཡང་དང་པོའི་ལས་ཅན་འཇུག་པའི་སྐབས། རང་གིས་བསམ་པ་གཞན་ལ་འཆད་ཀྱང་ལུང་རིགས་སྣང་བ་དང་འགྲོགས་བཞིན། །གནས་ཚུལ་ཟབ་དང་སྣང་ཚུལ་རྒྱ་ཆེའི་བབས་དང་མི་འགལ་འཆད་ཚུལ་རྣམས། །ངེས་པར་བྱས་ནས་ཡོད་མེད་ཡིན་མིན་དགག་སྒྲུབ་ཚུལ་བཞིན་སྨྲ་ཤེས་གལ། །བརྟུལ་ཞུགས་གྲུབ་པའི་དཔའ་བོ་ཡིན་ན་ཡུལ་ངན་རྐྱེན་གྱིས་མི་བརྫི་ཡང་། །བྱིས་པའི་བློ་ཅན་བདག་འདྲའི་རིགས་ཅན་བཟང་ངན་སྣང་བས་མཐོ་དམན་བྱེད། །ཕྱི་དང་ནང་གི་རྣམ་གཡེང་ཞི་བ་དབེན་པའི་གནས་མཆོག་ཉམས་དགའ་རུ། །དོན་མེད་དོན་ཆུང་བྱ་བ་སྤངས་ནས་དོན་ཆེན་སྙིང་པོའི་སྒྲུབ་ལ་གཞོལ། །གནས་ ལུགས་མཐར་ཐུག་ནམ་མཁའི་དབྱིངས་བཞིན་མཁས་ཤིང་གྲུབ་པའི་རོལ་གནས་ལ། །སྐྱེས་སྦྱངས་བྲལ་བ་སོ་སྐྱེས་བློ་གྲོས་སྦྲང་བུའི་རླབས་ཀྱིས་བརྒལ་མིན་