Tibetan
དབང་དང་དྲག་པོའི་དཀྱིལ་འཁོ༵ར་ཀུན་གྱི༷་ཁྱབ༷་བདག༷ །སངས་རྒྱས་ཀུན་གྱི་མེས་པོར་བྱོན་པས་ན་སངས་རྒྱས་རྣམས་ལས་ཀྱང་མཆོག་སྟེ་རྫོགས་ཆེན་གྱི་སྟོན་པ་ཐུན་མོང་མ་ཡིན་པ་ཐོག་མའི་མགོན་པོ་ཀུན་ཏུ་བཟང་པོ་རིག་པ་བདེ༷་བར་གཤེ༷གས་པའི་སྙིང་པོ༷འི་རང་ཞལ་མངོན་དུ་གྱུར་པ་སྒོམ་མེད་ཆུ་བོའི་རྒྱུན་གྱིས་སྐྱོང་བ་ནི་མི༷་ ཕྱེད་དད་པས་འདུད་པ་སྟེ་ཡུལ་དང་ཡུལ་ཅན་གཉིས་མེད་དུ་རྟོགས་པ་དོན་དམ་ལྟ་བ་མཇལ་བའི་ཕྱག་གོ། །དགོས་པ་ནི། ཚོགས་རྫོགས་པས་བར་ཆད་ཞི་ཞིང་བརྩམས་པ་མཐར་ཕྱིན་པ་དང་བློ་གྲོས་མཆོག་ཏུ་གྱུར་པ་དང་རང་ཉིད་དམ་པར་རྟོགས་པའི་དགོས་པ་ཡོད་དོ། །གཉིས་པ་རྒྱུད་དོན་དངོས་ལ་གསུམ་སྟེ། རྒྱུད་འབྱུང་བའི་རྒྱ་གླེང་གཞི རྐྱེན་གླེང་སློང་། འབྲས་བུ་ཡོངས་ཤེས་རྒྱུད་དོན་དངོས་སོ །དང་པོ་ལ་བཞི་སྟེ། ཆོས་ཅན་གྱི་སྣང་བ་དབྱིངས་སུ་ཐིམ་ཚུལ། ཆོས་ཉིད་ཀྱི་གནས་ལུགས་མངོན་དུ་གྱུར་ཚུལ། ལྷུན་གྲུབ་ཀྱི་སྣང་བ་སྟོན་འཁོར་དུ་མཆེད་ཚུལ། ཞར་བྱུང་སློབ་མའི་མཚན་ཉིད་བསྟན་པའོ། །དང་པོ་ནི། འཁོར་འདས་སོགས་གསུངས་ཏེ། ཚེ་རབས་དུ་མར་སྦྱངས་པའི་ཡོན་ཏན་སྟོབས་སུ་གྱུར་པའི་མཐུས་མ་རིག་འཁྲུལ་ངོར་སྣང་བའི་འཁོ༵ར་འད༷ས་ལམ་གསུམ༷་གྱིས་བསྡུས་པའི་ཆོས་ཐམས་ཅད་ཡེ་གཞི་ཀ་དག་མཉམ༷་པ༷་ཉིད་ཀྱི༷་ངང༷་སྟོང༷་ཁྱབ༷་ནམ༷་མཁའ་རྣམ༷་པར་དག༷་པ༷འི་དབྱིངས་དེ་རུ༷་ཞི་ཞིང་། རེ་ཞིག་གི་བར་དུ་གནས་ལུགས་དེའི་ངང་དུ་འབྱམས་ཀླས་ཏེ་གནས་པའི་ངོ་བོ་ལམ་བྱེད་ཀ་དག་ཁྲེགས་ཆོད་ཀྱི་དོན་མཐར་ཐུག་པ་མངོན་སུམ་ཁོང་དུ་ཆུད་པའོ་ཞེས་སོ། །གཉིས་པ་ནི། ཐོག་མའི་སངས་རྒྱས་ཀུན་ཏུ ༄༅། །བཟང་པོའམ་སྤྲོས༷་བྲལ༷་ཆོས་སྐའི་རྣལ༷་འབྱོར༷་ཆེ༷ན་པོ༷་ངས་གཞི་དེ་ལས་གཞི་སྣང་མཆེད་པའི་ཚེ་གཞན་སྣང་འཁྲུལ་པར་མ་སོང་བར་ཆོས་ཉིད་རང་སྣང་ཆེན་པོར་རིག་པས་རིག་གདངས་སྣང་བ་ལམ་བྱེད་ལྷུན་གྲུབ་ཐོད་རྒལ་གྱི་ལམ་མཐར་ཐུག་པ་མངོན་སུམ་དུ་གྱུར་པ་སྟེ། དེ་ཡང་ངོ་བོ་དག་ཆེན་གྱི་ཡེ༵་ཤེས༷་གཅིག་ལ་ཞིང་དང་སྟོན་འཁོར་རྒྱ་མཚོ་སྒྱུ་འཕྲུལ༷་རོལ་རྩལ༷་དུ་དུ་མཆེད་ཅིང་ཤར༷་བུའི་ཚུལ༵་ནི་འདི་ལྟ་སྟེ་ཞེས་པའོ །གསུམ་པ་ནི། གཞི་ཡི་ཆོས་སྐུ་ནས རོལ་པ་རུ༔ ཞེས་པའི་བར་གྱིས་བསྟན་ཏེ། གདོད་མ་གཞི༷་ཡི༷་ཆོ༷ས་སྐུ་བདེ༷་བར་གཤེ༷གས་པའི་སྙིང༷་པོ༷་ཉིད༷་ནི་སྤྲོས༷་པའི་མཐའ་བརྒྱད་དང་བྲལ༷་བ་རྣམ༷་པར་ཐར༷་པའི་སྒོ་གསུམ༷་དང་ལྡན༷་པའི་ཕྱིར་ཡེ༵་སང༷ས་རྒྱས༷་པ་སྟེ། སངས་རྒྱས་ཀུན་གྱི་མེས་པོར་སངས་རྒྱས་པ་དང་དེའི་རང་གདངས་འགགས་པ་མེད་པ་ལྷུན་གྲུབ་ལོངས་སྤྱོད་རྫོགས་པའི་སྐུ་ཀུན་བཟང་མཚོ་སྐྱེས་རྡོ་རྗེ་དང་རོལ་རྩལ་སྣ་ཚོགས་སུ་ཤར་བ་སྤྲུལ་པའི་སྐུ་བྱང་ཆུབ་སེམས་དཔའ་རིག་པའི་རྡོ་རྗེ་ལ་སོགས་པ་སྟེ་སྐུ་གསུམ༷་མཉམ སྦྱོར༷་གྱི་དབྱིང༷ས་སུ་སྟོན༷་འཁོ༷ར་དགོངས་པ༷་དབྱེར༷་མེ༷ད་པའི་རོལ་པ༷་རུ༷་ཤར་བ་ལ་བརྟེན་ནས་ཟབ་ཆོས་འདི་ཉིད་བདེ་བླག་ཏུ་ཤེས་ཤིང་ཁོང་དུ་ཆུད་པ་ཡིན་ནོ་ཞེས་བསྟན་ནོ། །གནས་གང་དུ་སྟོན་འཁོར་ ཚོགས་པ་དེའི་ཚེ་ན་རྒྱུད་དོན་འབྱུང་བར་ངེས་པས་ན་གླེང་གཞི་དང་། དབྱེ་ན་ཐུན་མོང་དང་ཐུན་མིན་གཉིས་ལས་ཕྱི་མའོ། །བཞི་པ་ནི། བདག་དང་ནས། ཕ་ཕོག་ཕེབས༔ ཞེས་གསུངས་ཏེ། དུས་གསུམ་གྱི་རྒྱལ་བ་ཐམས་ཅད་ཀྱི་ཐུགས་རྒྱུད་རྣམ་པར་མི་རྟོག་པའི་ཡེ་ཤེས་ལ་འཇུག་པའི་སྒོ་དམ་པ་འདི་ཉིད། རིག་པ་འཛིན་པ་བདག༷་དང༷་སྐལ༷་བ༷་མཉམ་པ༷འི་སྐྱེས༷་བུ་འགའ༵་ཞིག་གིས་སྔོན་རབས་དུ་མར་གོམས་པའི་ལཱས་སྨོན༷་བསོད་ནམ༷ས་བཟ༷ང་པོ༷འི་དཔ༷ལ་དུ་ཤར༷་བ་ཡིན་པའི་ཕྱིར། ལམ་འདི༷་ཉམས་སུ་ལེན་པའི་ལ༷ས་འཕྲོ་མེ༷ད་པའི་སྐྱེ་བོ་རྣམ༷ས་སྒོ་འདི་དང་མི་འཕྲད་པའམ། འཕྲད་ཀྱང་མི་མོས་པའམ། ཅུད་ཟད་མོས་ནས་འཆད་ཉན་ལ་བརྩོན་ཀྱང་། ཤེས་རབ་ཆུང་ཞིང་བརྩོན་འགྲུས་ཞན་པས་རི་མོའི་ཟས་ནོར༷་དང་འཕྲད་པ་བཞིན་དུ་ཐོབ་ལེན་མེད་པ་སྟེ། བཟུང་ན་ཚིག་མི་ཟིན བསམ་ན་དོན་མི་གོ །བསྒོམས་ན་རྒྱུད་ལ་མི་སྐྱེ་བའི་ཕྱིར་རོ །དེས་ན་སྐལ༷་པ་བཟ༷ང་པོའི་སྐྱེས༷་བུ་དད་བརྩོན་ཤེས་རབ་དང་ལྡན་པ་དག༷་གི༷་སྤྱོད༷་ཡུལ༷་དུ༷་ནམ་ཡང་ཟད་མི་ཤེས་པའི་ཆོས་ཉིད༷་ནམ༷་མཁ༷འ་མཛོ༷ད་འདི༷༷་རང་བྱུང་པདྨས་ཕ༷་ཕོ༷ག་ཏུ་ཕེ༷བས་པའམ་གནང་བ་ཡིན་པས། མ་འོངས་པ་ན་ལམ་འདི་ལ་བརྟེན་ནས་གྲོལ་བ་ཐོབ་པ་ཡང་མང་དུ་འབྱུང་སྲིད་དོ་ཞེས་པའང་ཤུགས་ཀྱིས་བསྟན་ནོ།། ༄༅། །གཉིས་པ་རྐྱེན་གླེང་སློང་ནི། སྟོན་མཆོག་ཀུན་བཟང་སོགས་ནས། རང་རྩལ་འཁོར༔ ཞེས་གསུངས་ཏེ། གང་གླེང་བྱ་རྒྱུད་དོན་གླེང་བར་བསྐུལ་བ་ནི་གླེང་སློང་བ སྟེ་བསྟན་པ་འབྱུང་བའི་རྐྱེན་བྱེད་པ་ཡིན་པའི་ཕྱིར། འདིར་ཡང་ཆོས་ཉིད་ཀྱི་རང་སྒྲས་བསྐུལ་ཏེ་འཁོར་རྣམས་ཀྱིས་ཞུས་པས་རྒྱུད་དོན་མ་འོངས་གདུལ་བྱའི་བློ་དང་འཚམས་པར་འབྱུང་མ་རག་པ་སྟེ། རང་སྣང་གི་སྟོན༷་པ་སངས་རྒྱས་གཞན་ལས་མཆོ༷ག་ཏུ་གྱུར་པ་ཀུན༷་ཏུ་བཟ༷ང་པོ་འཁོར་འདས་ཀུན་གྱི་ཁྱབ༷་བདག༷་རྡོ་རྗེ༷་འཆང་ཆེན་པོ་ཡི༷ས། ཡེ་ཤེས་སྒྱུ་འཕྲུལ་རོལ་པའི་སྣང་ཆ་འཁོ༵ར་དུ་ངོམ༷ས་པ༷་རྣམས་ལ༵་ཉོན་ཅིག་ཅེས་པའི་ཚིག་གིས་སྣ་དྲངས་ཏེ་སྟོན་པ་དང་གཉིས་མེད་རོལ་པའི་རང་རྩལ༷་སྤྲུལ་པའི་འཁོ༵ར་རྣམས་ལ་གསུངས་པའོ། །འདི་ལ་ཡང་ཐུན་མོང་དང་ཐུན་མིན་གཉིས་ལས་ཕྱི་མ་སྟེ། སྟོན་འཁོར་དགོངས་པ་དབྱེར་མེད་པའམ་སྟོན་པ་ཉིད་ལ་ཉིད་ཀྱིས་བསྐུལ་ཏེ་གསུངས་པ་ལས་གཞན་མིན་པའི་ཕྱིར་རོ། །སྐབས་འདིའི་དགོས་འབྲེལ་ཡན་ལག་བཞི་ནི རྒྱུད་འདིའི་བརྗོད་བྱ་ཆོས་སྐུའི་གཞིར་གནས་ཀྱི་རིག་པ། རྗོད་བྱེད་ཚིག་གི་རྒྱུད་འདི་ལ་ཐོས་བསམ་བྱས་པས་དེ་རྟོགས་པ་དགོས་པ། རྟོགས་དོན་བརྩོན་འགྲུས་ལྷོད་པ་མེད་པས་ཉམས་སུ་བླངས་པས་ཚེ་ འདིའམ་བར་དོར་གྲོལ་བ་ཉིང་དགོས། དེ་དག་གཅིག་ལ་གཅིག་རྟེན་གྱི་འབྲེལ་བ་གྲུབ་པ་འབྲེལ་བ་སྟེ། བཞི་དང་ལྡན་པ་རྒྱུད་དམ་བསྟན་བཅོས་ཡང་དག་གི་མཚན་ཉིད་དོ། །གསུམ་པ་འབྲས་བུ་ཡོངས་ཤེས་རྒྱུད་དོན་དངོས་བཤད་པ་ལ་གསུམ་སྟེ། ཀ་དག་ཁྲེགས་ཆོད་ཀྱི་ལམ་དང་ལྷུན་གྲུབ་ཐོད་རྒལ་གྱི་ལམ་བསྟན་པ གཞི་འབྲས་དབྱེར་མེད་པའི་ངོ་བོ་མངོན་དུ་གྱུར ཚུལ་ལོ། །དང་པོ་ལ་གསུམ་སྟེ། ཆོས་ཀུན་གྱི་བྱེད་པོ་སེམས་སུ་ངོས་བཟུང་། དེ་གཞི་མེད་རྩ་བྲལ་དུ་གཏན་ལ་དབབ། དབང་པོའི་བྱེ་བྲག་གིས་ལམ་ལ་འཇུག་ཚུལ་ལོ། །དང་པོ་ནི། ཀུན་བྱེད་རྒྱལ་པོ་སྒོ་གསུམ་གཙོ་ལ་བརྟག༔ ངོས་བཟུང་ཞེས་ཏེ། ཆོས་ཀུན་བྱེད༷་པའི་མཁན་པོའམ་རྒྱལ༷་པོ༷་སྒོ་གསུམ༷་གྱི་གཙོ་བོ་སེམས་ལ༷་བརྟག༵་པའི་ཚུལ་ནི། དེ་ཡང་ཉིན་མཚན་བར་དོའི སྐབས་རྣམས་སུ་སེམས་བདག་འཛིན་གྱི་དབང་གིས་ལུས་ངག་གཉིས་སེམས་ལ་སྣང་བ་དང་། བར་དུ་བདེ་སྡུག་མྱོང་བ་པོ་དང་། མཐར་ལུས་སེམས་གཉིས་སོ་སོར་གྱེས་པའི་ཚེ་ལུས་རོ་རུ་སོང་། ངག་ཡུལ་མེད་དུ་ཡལ་བའི་ཚེ་སེམས་ལས་ཀྱི་རྗེས་སུ་འབྲངས་ནས་འཁོར་བར་འཁྱམས་པའི་མཁན་པོ་སྟེ་རྒྱུ་མཚན་གསུམ་གྱི་སྒོ་ནས་སམ། ཡང་ན་གསུམ་ཀ་སེམས་ལས་མེད་དེ་ ༄༅། །སེམས་གཅིག་པུར་ཁོ་ཐག་ཆོད་པས་ཀྱང་གཙོ་བོ་སེམས་སུ་དོ༷ས་བཟུང་བ་སྟེ། སྔ་མ་ནི་ཐ་སྙད་སྣང་ཚུལ་དང་། ཕྱི་མ་ནི་ཐ་སྙད་གནས་ཚུལ་དང་བསྟུན་ནས གཏན་ལ་དབབ་པའོ། །ཕྱི་མ་འདིའི་དོན་ཅུང་ཟད་བཤད་ན།པཎ་ཆེན་ན་རོ་པའི་ལྟ་བ་མདོར་བསྡུས་ལས སྣང་ཞིང་སྲིད་པའི་ཆོས་རྣམས་ཀུན། །རང་རིག་སེམས་ལས་གུད་ན་མེད། སྣང་ཞིང་གསལ་བ་ཡིན་པའི་ཕྱིར། །དཔེར་ན་རང་རིག་ཉམས་མྱོང་བཞིན། །གལ་ཏེ་སེམས་དེ་མ་ཡིན་ན། །འབྲེལ་བ་མེད་ཕྱིར་མི་སྣང་ཐལ། །དེ་ལྟར་ཀུན་རྫོབ་གཏན་ལ་དབབ། ཅེས་གསུངས་པ་ལྟར་ན། འཁྲུལ་ངོར་ལུས་སེམས་གཉིས་ཐ་དད་པ་ལྟར་ཤར་ཡང་གནས་ཚུལ་ལྟར་ན་རྟོག་མེད་ཀྱི་ཤེས་པར་མངོན་སུམ་སྣང་ཞིང་གསལ་པོར་ཉམས་སུ་མྱོང་བའི་རྟགས་ཀྱིས་བེམ་པོ་མ་ཡིན་པར་རང་རིག་རང་གསལ་ཙམ་དུ་གྲུབ་སྟེ དཔེར་ན་བདེ་སྡུག་ཉམས་སུ་མྱོང་བའི་ཤེས་པ་བཞིན་ནོ །གལ་ཏེ་སེམས་མ་ཡིན་པར་བེམ་པོ་ཡིན་ན་སྣང་མུན་ལྟར་ཕན་ཚུན་འབྲེལ་མི་ཤེས་པའི་ཕྱིར་ནམ་ཡང་སྣང་བའི་ལམ་དུ་མི་འགྱུར་བས་ལུས་ངག་གཉིས་སམ་སྣང་བའི་ཆོས་ཐམས་ཅད་སེམས་སུ་གྲུབ་པའོ། །གཉིས་པ་ནི། ཀུན་བྱེད་རྒྱལ་པོ་སོགས་ཏེ དེ་ལྟར་སྒོ་གསུམ་མམ་ཆོས་ཀུན་བྱེད་པའི་རྒྱལ་པོར་གྱུར་པའི་སེམས་དེ་ནི་ཡོད་པ་དངོས་ཅན་དང་། མེད་པ་དངོས་མེད་ཀྱི་ཕྱོགས་གང་ལྟར་འདུག་བརྟག་པས། སེམས་ནི་གཞི་རྩ་དང་བྲལ བའི་ཕྱིར་ན་གཟུགས་དབྱིབས་ཁ་དོག་མ་གྲུབ་པ་དང་། སེམས་ཀྱི་ཡུལ་ལྟར་སྣང་བ་འབྱུང་ལྔ་དང་ཡུལ་ལྔ། རྟེན་ལྟར་སྣང་བ་རང་གི་ལུས་ཏེ། དེ་ཐམས་ཅད་ཀྱང་དོན་དམ་དཔྱོད་བྱེད་ཀྱི རིག་པས་བརྟག་ན་གཅིག་དང་དུ་མ་གང་གི་ཡང་ངོ་བོར་མ་གྲུབ་པ་ནམ་མཁའ་ལྟར་གནས་པའི་ཕྱིར། བྱུང་གནས་འགྲོ་གསུམ་ཐམས་ཅད་ཡུལ་མེད་ཟང༷་ཐལ་གྱི་ངུང་དུ་ཐག་ཆོད་པ་ནི་ཁྲེགས་ཆོད་ལམ་གྱི་དོ༷་བོར་ལྷུན༷་གྱིས་གྲུབ༷་པ་སྟེ་གནས་ལུགས་ཀྱི་ཡིན་ལུགས་ཤེས་པ་ཙམ་ལས་གསར་ཐོབ་མིན་པའི་ཕྱིར་རོ། །གསུམ་པ་ལ་དབང་པོ་རབ་ལམ་ལ་འཇུག་ཚུལ་དང་དབང་པོ་འབྲིང་ཐ་གཉིས་ལམ་ལ་འཇུག་ཚུལ་ལོ །དང་པོ་ནི། གཅིག་ཅར་སོགས་ཏེ དེ་ལྟར་དབང་རབ་གཅིག་ཅར་བའི་རིགས་ཅན་རྣམས་ཀྱིས་སེམས་ཉིད་གཞི་མེད་རྩྭ་བྲལ༷་དུ་གཏན་ལ་ཕབ་པ་ཙམ་གྱིས་སོ་སོར་རྟོག་པའི་ཤེས་རབ་རང་ཡལ་དུ་སོང་བའི་རྗེས་ཤེས་ཡངས་པ་གོ་མ་འགགས་པ་ངོ་འཕྲོད་པ་ནི་སེམས་ལས་འདས་པའི་ཡེ་ཤེས་ཡིན་པས་ན་ཡང་དག་པའི་ལམ་དུ་ཚུད༵་པའོ།། ༄༅། །གཉིས་པ་ལ་གཉིས་ལས། དང་པོ་ནི། ཡང་དེ་ལྟར་ངོ་འཕྲོད་པའི་སྐལ་བ་དང་མི་ལྡན་པ་གཞན་དག་གནས་དབེན་པར་ཕྱིན་ཏེ་བླ་མའི་རྣལ་འབྱོར་བསྒོམ་ཞིང་དབང་བཞི་བླངས་མཐར་ཕྱིའི་ནམ༷་མཁའི་དབྱིངས་དང་། རྡེའུ་དང་ཤིང་བུའམ་སྐུ་གཟུགས་ཡི་གེ་སོགས་དང་། སྙིང་གར་འོད་ལྔའི་ཐིག་ལེ་གསལ་འཚེར་བསྒོམ་པ་དག་ལ༷་སེམས་བཟུང་སྟེ་བབ༷ས་ཀྱིས༷་མཉམ་པར་བཞག་པས་གདོད་མའི་གནས་ལུགས་བདུན༷་ཕྲག་གསུམ་གྱི༷་རིམ་པས་ཤེས་རབ་ཀྱི་མིག་གིས་མཐོང་ནས་ངེས་གས༷ང་རྫོགས་པ་ཆེན་པོའི་ལམ་དུ་འཛུད་པར་བྱེད་པའོ།། གཉིས་པ་ལ། རྣམ་པ་ལམ་བྱེད་དང་། ངོ་བོ་ལམ་བྱེད་གཉིས་ལས དང་པོ་ལ་བསྟན་བཤད་བསྡུ་གསུམ་ལས དང་པོ་ནི། དབང་པོ་དམན་པའི་སོགས་ནས སྐྱེལ༔ ཞེས་པའི་བར་གྱིས་བསྟན་ཏེ། དེ་ལྟར་ངོ་འཕྲོད་པའི་སྐལ་བ་མེད་པའི་དབ༷ང་པོ༷་དམ༷ན་པའི་རིགས་ཅན་དག༷་ལ༷་ཡང༷་། ཐོག་མར་ཤེས་པ་ལ་གནས་པ་དང་། རྣམ་པར་རྟོག་པ་འགྱུ་བ་སྟེ་གཉིས་སུ་དབྱེ་བའི་ཚུལ་གྱིས་ངོ་སྤྲད༷་ནས༷། དང་པོ་རྣམ་པ་སེམ༷ས་ལ༷་ལ༷མ་བྱས་ནས་མཐར་རིག༷་པའི་དབྱིང༷ས་སུ་སྐྱེལ༷་བའོ། །གཉིས་པ་ཚུལ་དེ་རྒྱས་པར་བཤད་པ་ལ་བཞི་སྟེ། ལམ་གྱི་ངོ་བོ་དྲན་པ། དག་བྱ་ཉམས་ཀྱི་བྱེ་བྲག །སྤང་གཉེན་གྱི་ངོ་བོ། གདམས་ངག་གི་སྣང་བ་དང་འབྲལ་མི་རུང་བའི་ཚུལ་ལོ། །དང་པོ་ནི། དང་པོ་གཉིས་ནས་སོགས། མི་རྟོག་པ༔ ཞེས་པའི་བར་གྱིས བསྟན་ཏེ། དེ་ཡང་ལམ་གྱི་ངོ་བོ་དྲན་པ་རྣམ་པ་བཞིར་དབྱེ་སྟེ་བསྟན་པ་ལས། དང་པོ༷་གནས་འགྱུ་གཉིས༷་སུ་དབྱེ་ནས་ཐ་དད་པ་ལྟར་སྣང་བ་དེ་གོམས་པའི་སྟོབས་ཀྱིས་གཅིག་ཏུ་གྱུར་པའི་ཆ་ནས་རྩེ་གཅིག་གི་དྲན་པ་དང༷་། སྔར་བཞིན་འབད་རྩོལ་གྱིས་མ༷་བལྟས་པར་བཞག་པུས་ཀྱང་རང་རྩལ་མངོན་དུ་གྱུར་པའི་ཆ་ནས་མངོན་གྱུར་གྱི་དྲན་པ་དང༷་། སྟོང་པ་ཧར་སང་དྲན་མེད་སྟོང་པ་རྒྱ་ཡན་དུ་གནས་པ་དྲན་སྟོང་མལ་དུ་འཁོད་པའམ་ཀུན་གཞི་དང་། རགས་པའི་དྲན་པ་ཞི་ནས་སྟོང༷་གས༷ལ་གྱི་ལེ་བའི་ད༷ང་དུ་གནས༷་པ་ལ་ར༷ང་གས༷ལ་གྱི་དྲན་པའམ་ཀུན་གཞིའི་རྣམ་ཤེས་ཞེས་བརྗོད་པ་དང་དེ་ཡང་དྲན་པ་སྔ་མ༷་གཉི༷ས་ཀྱིས་རྩལ་གང༷་ཤར༷་མདོ༷ན་སུམ་དུ་བྱེད༷་པ་དང་། ཕྱི་མ༷་གཉིས་ཀྱི་སྐབས་སུ་ནི༷་འཛིན་སྟང༷ས་ཕྲ་བ་ཁོ༵་ན༷་ལ་བརྟེན་ཅིང་གནས་པ་ལ༷ས་གདངས་སྣང་བ་དང་། རྩལ་རྣམ༷་པ༷ར་རྟོག༷་པ༷་ཐམས་ཅད་འག༷གས་པ༷ས་མི༷་རྟོག༷་པ༷་ཙམ་མོ། །འདི་དག་ནི་ལམ་རྐྱེན་གྱིས་བསླངས་ཏེ་ཀུན་གཞི་གཉིས་ཀྱི་ཐོག་ཏུ་ཕེབས་པས་ན་ཐོག་ཕེབས་ཀྱི་ཀུན་གཞི་ ༄༅། །སྟེ། སློབ་དཔོན་འགའ་ཞིག་དང་པོ་རོ་གཅིག་དང་། གཉིས་པ་སྤྲོས་བྲལ་དུ་བཞེད། འགའ་ཞིག་ལུང་མ་བསྟན་དུ་བཞེད་ཀྱང་གང་ལྟར་ཡང་སེམས་ཀྱི་ངོ་བོའི ཐོག་ཏུ་ཕེབས་པའོ། །གཉིས་པ་ནི། ཀུན་ལ་བདེ་དང་སྟོང་པ་ནས འབྱུང་༔ ཞེས་པའི་བར་གྱིས་བསྟན་ཏེ། དེ་ལྟ་བུའི་ལམ་གྱི་གནས་སྐབས་ཀུན་ལ་དྲན་པའི་འཛིན་སྟངས་ཕྲ་རགས ཀྱིས་བཅིངས་པའི་རྒྱུས། བདེ༷་བ་མེ་དྲོད་ལྟ་བུ་དང་། གསལ་སྣང་ནམ་ལངས་པ་ལྟ་བུ སྟོང་པའམ་མི་རྟོག་པ་རྒྱ་མཚོ་རླབས་དང་བྲལ་བ་ལྟ་བུ་སོགས་སྣ་ཚོགས་པ་མ་ངེས་པར་འབྱུང་སྲིད་ཀྱང་། ཉམས་སྣང་རྫུན་པོ་ཆེ་ལ་ཡིད་ཆེས་དང་བློ་གཏད་མེད་པར་མི་ཤེས་པར་མཐར་ཐུག་གི་ཡོན་ཏན་དུ་བཟུང་ནས་ཞེན་པ་དང༷་ཆགས་པའི་ཡུལ༷་དུ་གྱུར༷་ན་ཁམས་གསུམ་གྱི་རྒྱུ་ལས་མ་འདས་པས་ཡུན་རིང་པོར་བསྒོམས་ཀྱང་འཁོར་བ་ལས་མི་འཕགས་པ༷་དང༵་། གཞན་ཡང་ཕྱི་ལྷོང་ལྷ་འདྲེའི་ཆོ་འཕྲུལ ནང་ལྷོང་ལུས་ཀྱི་ན་ཚ། གསང་ལྷོང་སེམས་ཀྱི་དགའ་སྡུག་སོགས་ལུས༷་ངག་ཡི༷ད་གསུམ་ལ༷་ན༷་ཚ༵་དང་མི༷་བདེ༷་བའི་ཉམ༷ས་སྣ་ཚོགས་པ་གཅིག་ཏུ་སོ་ཟིན་མེད་པཱར་རིམ་པ༷་བཞི༷ན་དུ་འབྱུང༷་བའི་ཚུལ་རྣམས་ཀྱང་བླ་མའི་ཞལ་ལས་ལེགས་པར་ཤེས་དགོས་སོ།། གསུམ་པ་ལ་སྤང་བྱའི་ངོ་བོ་ངོས་བཟུང་། དངོས་གཉེན་ལམ་གྱི་མཆོག་ཏུ་བསྟན་པའོ། །དང་པོ་ནི། བཟང་པོར་རེ་རློམས་ནས། ཐོགས༔ ཞེས་པའི་བར་གྱིས་བསྟན་ཏེ། དེ་ཡང་རྙེད་བཀུར་སྙན་གྲགས་སོགས་བཟ༷ང་པོ་ལྟར་སྣང་བ་ཐམས་ཅད་ལ་རེ་རློམ༷ས་ཀྱིས་མངོན་ཞེ༷ན་སྐྱེས་ནས་ཆགས་ཤིང་ཞེན་པས། དེའི་དབང་དུ་ཤོར་ནས་མི་ཚེ་འདའ་བ་དང༵་། དགྲས་ལོག་སྒྲུབ དང་མི་ཁ་གཤེ་སྐུར་སོགས་དྭན་པ་ལྟར་སྣང་བ་ཐམས་ཅད་ལ་དོགས་ནས་མྱ་ངན་དང་སྡུག་བསྔལ་བྱེད་པའམ། མདོར་ན་ལྷ་དང་གནོད་བྱེད་བདེ་སྡུག་ཐམས་ཅད་རཱང་རྒྱུད་པར་བལྟས༷་ཚད་གོལ་ཤོར༷་ནོར༷་སའི་གེགས་གསུམ་གྱི་འཕྲང༷་ལ༷་ཐོགས་ཏེ་ཐར་པ་ཆེན་པོའི་གྲོང་ཁྱེར་མཆོག་ཏུ་བརྒལ་མི་ནུས་སོ་ཞེས་ཏེ་འདིའི་གནད་དོན་བསླངས་ཏེ་སྟོན་ན། བཟང་ངན་བདེ་སྡུག་སོགས་ཅི་ལྟར་སྣང་ཡང་སྣང་བ་ཙམ་གྱིས་འཆིང་བར་མི་འགྱུར་བས་དགག་མི་དགོས་པའི་ཚུལ། སློབ་དཔོན་འཕགས་པ་ལྷས། འདི་ནི་སྣང་ཙམ་དགག་མིན་ཏེ། །བདེན་པར་རྟོག་པ་ལྡོག་བྱ་ཡིན།། ཞེས་གསུངས་པའི་ཕྱིར་དགག་བྱའི་རྩ་བ་དངོས་ནི་སྣང་ཐོག་དེར་བདེན་གྲུབ་ཏུ་ཡོད་པར་འཛིན་པའི་བློ་དེ་ཡིན་ལ། ཕྱི་རོལ་ན་འདྲེ་གདོན་བསླུ་བདུད་ལྟར་སྣང་བ་ཐམས་ཅད་རྩ་བ་དེ་ལས་འབྱུང་ ༄༅། །བཤ་སྟག་ཡིན་པས། དེ་མ་ཐུལ་བར་ཕྱི་རོལ་གྱི་འདྲེ་གདོན་སོགས་སོ་སོར་བཏུལ་བས་ཟད་པར་མི་འགྱུར་རོ། །གཉིས་པ་ནི། ཀུན་གྱི་སྤྱི་ཆིངས་སོགས་ནས། མིག་གཅིག་ཡིན༔ ཞེས་གསུངས་ཏེ། སྤང་བྱ་ཀུན་གྱི་གཉེན་པོ་སྤྱི་ཆིངས་དང་ལམ་ཐམས་ཅད་ཀྱི་གན༷ད་དོན་གཅི༷ག་པུ་ནི བཟང་པོ་དང་ངན་པ་བདེ༷་སྡུག༷་བ༷ར་མ་གསུམ༷་གྱི་མྱོང༷་ཚོར༷་ཐམས་ཅད་ཀུན༷་སྣང་ཡང་བདེ༷ན་པ་མེ༷ད་པ་འཁྲུལ་སྣང་ཉམ༷ས་ཀྱི༷་རྫུན༷་རཱིས་དེ༷ས་པ༷་རུ༷་ཤེས༷་ཏེ༷་ངན་པ་དག༷ག་པ་དང་། བཟང་པོ་སྒྲུབ༷་པ་མེད་པར་རོ་སྙོམས་པར་བཞག༷་པ༷ས་རྐྱེན་ངན་ལམ་དུ་ལོངས་ཤིང་འགལ་རྐྱེན་གྲོགས་སུ་འཆར་བས་ན་མི་མཐུན་པའི་ཕྱོགས་གོལ་ཤོར་ནོར་ས་གསུམ་ཚར་གཅོད་ཅིང་མཐུན་ཕྱོགས་གནས་ལུགས་ཟབ་མོའི་དོན་མ་ནོར་བར་མཐོང་བའི་ཤེས་ར༷བ་ནི་ལམ་ལ་འཇུག་པ་རྣམས་ལ་མེད་དུ་མི་རུང་བ་ཡིན་པས་ན་མི༷ག་གཅི༷ག་པ་ལྟ་བུ་ཡི༷༷ན་ནོ། །དེ་ཡང་གང་སྣང་བ་ཐམས་ཅད་འཁྲུལ་སྣང་དང་བདེན་པར་མ་གྲུབ་པའི་ཚུལ་རྒྱས་པར་གཏན་ལ་དབབ་པ་ནི་འཆད་འགྱུར་ལས་ཤེས་དགོས་སོ། །འདི་ལྟར་བྱ་རྩོལ་མེད་པའི་དོན་རྟོགས་པ་རྒྱལ་བས་བསྔགས་པའི་ལམ་དངོས་ཡིན་ཀྱང་། དེ་ལྟ་བུ་འབྱུང་བའི་ཐབས་སུ་དང་པོར་དམིགས གཏད་ཅན་གྱི་ཞི་གནས་དང་རྟོག་དཔྱོད་ཀྱི་ལྷག་མཐོང་གཉིས་ཟུང་འབྲེལ་དུ་གོམས་དགོས་པས་རྩེ་གཅིག་ནས་ཤེས་རིག་མངོན་འགྱུར་གྱི་བར་རྣམས་ཀྱིས་ཞི་གནས་དང་། སྐབས་འདིས་ལྷག་མཐོང་དོན་གྱིས་བསྟན་པས་འདི་དག་ཡ་བྲལ་དུ་མ་སོང་བར་དང་པོའི་ལས་ཅན་རྣམས་ཀྱིས་ཉམས་སུ་ལེན་དགོས་པས་སྐབས་འདིར་རིམ་བཞིན་དུ་བསྟན་ནོ། །བཞི་པ་ནི། འགའ་ཞིག་ནས། བསྟེན༔ ཞེས་པའི་བར་གྱིས་བསྟན་ཏེ། འགའ་གླུུག་ལམ་སྟོན་བཤེ༷ས་གཉེན་དམ་པ་དང་ཐག་རིང་བར་གྱུར༷་ནས༷། ལམ་དང་ལམ་མིན་ལ་ཐེ་ཚོམ་དང་སྒྲོ་འདོགས་གཅོད་མི་ཤེས་པ འབྱུང་སྲིད་པས། སྔར་བཤད་པའི་གནས་འགྱུ་གཉིས་དང་དྲན་པའི་རྣམ་བཞག་བཞི་སྟེ་ས་བརྒྱ༷ད་ལྔ་པོ༷་ལ༷མ་གྱི༷་དམ༷་པ་སྟེ་ཉམས་ལེན་ལ་འཇུག་པའི་ཐོག་མར་མེད་དུ་མི་རུང་བར་ཤེས་ནས་ཚུལ་བཞིན་ཤེས་པའི་ངེས་ཤེས་བརྟན་པོ་རྙེད་པའི་སྒོ་ནས་བཟུང་དགོས་སོ །དེ་ཡང་དང་པོའི་ཉམས་ལེན་ཙམ་ལས་གནས་ལུགས་མཐར་ཐུག་ཏུ་བཟུང་ནས་རྩེ་གཅིག་དེ་ཁོ་ན་ཉམས་སུ་ལེན་པ་ལ༷་བརྩོན་པའམ། ཡང་ན་རྒྱུད་ཚོད་དང་སྦྱར་ནས་གྲིམ་ལྷོད་རན་པར་བསྟེན་མི་ཤེས་པར། ཆུ་རྒྱུན་གྱི་འོལ་ཁ་བཀག་པ་ལྟར། རྣམ་རྟོག་བཀག་པའི་ཤེས་པ་རྩེ་གཅིག་པ་ཁོ་ན་ལྟ་སྒོམ་གྱི ༄༅། །མཆོག་ཏུ་བཟུང་ནས་ཉམས་སུ་ལེན་པ་ལ་ཧ་ཅང་བརྩོན་དྲག་ན༷་རྩ་ཁམས་ཀྱི་བྱེད་ལས་ཏེ་ཆུ་ཁམས་པ་དང་ས་ཁམས་པ་འགའ་ཞིག་ལ་སེམ༷ས་རྟོག་དཔྱོད་བྱེད་ཀྱི༷་རྩལ༷་ཉམས་ཏེ་དྲན་པའི་ད༷ང་བརྟན༷་པར་གྱུར་ནས༷་མི༷་ཡི༷་ལུས༷་ལ༷་བླུན་ཅིང་རྨོངས་པའི་ཆ་ནས་དུད༷་འགྲོའི༵་སེམ༷ས་སུ་འགྱུར༷་པ་སྟེ་འདི་ལ་དགོངས་ནས། འཇམ་དབྱངས་ས་སྐྱ་པཎ་ཆེན་གྱིས ཐོས་པ་མེད་པའི་བསྒོམ་པ་ཙམ །འབད་ཀྱང་དུད་འགྲོའི་སྒྲུབ་ཐབས་ཡིན། །ཞེས་གསུངས་སོ། །ཡང་མེ་ཁམས་པ་དང་རླུང་ཁམས་པ་འགའ་ཞིག༷་ལ་སེམས་སྨྱོ་འབོགས་དང་བརྒྱལ་བ་སོགས་ལམ་ལོག་མགོ་རྨོངས་དག༷་ཏུ་འཕྱན་པར་གྱུར་པ་དེ༷་ཕྱིར༷་ལམ་འདིའི་གནད་དོན་ཇི་བཞིན་སློང་ཤེས་པའི་དགེ༷་བའི་བཤེ༷ས་གཉེན་དམ་པ་འབྲལ་མེད་དུ་བསྟེན༷་ནས་སྒྲོ་འདོགས་གཅོད་པའམ་དེ་ལྟ་བུའི་སྐལ་བ་དང་མི་ལྡན་ཡང་ལམ་འདིའི་སྒོ་ནས་གྲུབ་པ་བརྙེས་པའི་རིག་འཛིན་གོང་མ་རྣམས་ཀྱི་མན་ངག་ལ་ཚུལ་བཞིན་བལྟ་རྟོགས་གོམས་འདྲིས་བྱེད་པ་ཡང་སྙོམས་ལས་སུ་མ་སོང་བ་ཞིག་མེད་ཐབས་མེད་པ་ཡིན་ནོ །གསུམ་པ་མཇུག་བསྡུས་ཏེ་བསྟན་པ་ནི། མདོར་ན་འདི་དག་ནས སྐྱེས་བུ་རྣམས༔ ཞེས་པའི་བར་གྱིས་བསྟན་ཏེ མདོ༷ར་ན་སྔར་བསྟན་ པའི་གཞི་གནས་ནས་གསལ་རིག་གི་ཤེས་པ་དང་ཀུན་གཞིའི་རྣམ་ཤེས་ཀྱི་བར་འདི༷་དག༷་ནི་རྣམ་པ་སེམ༷ས་ལ༷་ལ༷མ་བྱེད༷་པའི་སྐབ༷ས་ཏེ་གནས་ལུགས་རང་བཞིན་ཤེས་པའི་ལྷག་མཐོང་དང་བྲལ་བས་སྲིད་པའི་སྡུག་བསྔལ་