Tibetan
བུ་ཡིན་པའི་ཕྱིར་ན་གྲུབ་མཆོག་ས་ར་ཧ་པའི་སྙིང་ཐིག་ཟབ་མོ་ཞེས་དེ་ལྟ་བུའི་ཟབ་ཆོས་ཁྱད་པར་ཅན་གྱི་གདམས་པ་ཟབ་མོ་ཞིག་འདི་ན་བཞུགས་སོ་ཞེས་པའི་དོན་ཡིན་ནོ། དེ་ལྟར་མཚན་བརྗོད་པ་ལ། དགོས་པ་རབ་འབྲིང་ཐ་གསུམ་ཡོད་དེ སྐྱེ་བོ་རབ་ལ་མཚན་ཐོས་པ་ཙམ་གྱིས་དབུ་ནས་ཞབས་སུ་བསྡུ་བའི་དོན་ཐམས་ཅད་ཁོང་དུ་ཆུད་པའི་དགོས་པ། འབྲིང་གིས་དམག་མི་ལ་མདའ་བྱང་བཏགས་པ་བཞིན་དུ་ཐེག་པ་ཆེ་ཆུང་གི་ཕྱོགས་སུ་གཏོགས་ཤེས་པའི་དགོས་པ། སྐྱེ་བོ་ཐ་མས་ཀྱང་སྨན་སྣོད་ལ་ཁ་བྱང་བཏགས་པ་བཞིན་གླེགས་བམ་བཙལ་སླ་བའི་དགོས་པ་སོགས་ཡོད་དེ། ལང་ཀར་གཤེགས་པ་ལས། མིང་དུ་གདགས་པར་མ་མཛད་ན། །འཇིག་རྟེན་ཐམས་ཅད་རྨོངས་པར་འགྱུར། །དེ་བས་མགོན་པོ་ཐབས་མཁས་པས། །ཆོས་རྣམས་མིང་དུ་གདགས་པར་མཛད།།ཅེས་གསུངས་པས་མཚན་དོན་ཤེས་པ་ཙམ་གྱིས་གཞུང་དོན་ཡོངས་རྫོགས་ཁུང་དུ་ཆུད་པ་ཡང་ཡོད་པའི་ཞལ་བྱང་དུ་མཚན་སྨྲོས་སོ། མཆོད་པར་བརྗོད་པ་ལ། དཔལ་ཨོ་རྒྱན་སོགས་ནི། རྒྱུ་དམིགས་བཅས་བསོད་ནམས་ཀྱི་ཚོགས་དང་། དམིགས་མེད་ཡེ་ཤེས་ཀྱིས་ཚོགས་གཉིས་རྒྱ་མཚོ་ལྟ་བུ་བསགས་པའི་སྟོབས་ལས་ ༄༅། །འབྲས་བུ་དོན་གཉིས་ལྷུན་གྱིས་གྲུབ་པའི་དཔལ་ཕུན་སུམ་ཚོགས་པའི་ཕྱིར་ན་དཔལ། དཔལ་དེ་ཡི་མཐུ་ལས་ཡེ་ཤེས་ཡོན་ཏན་གྱི་ཕུང་པོ་བསམ་གྱིས་མི་ཁྱབ་པའི རང་བཞིན་སྐྱེ་རྒུའི་བསོད་ནམས་ཀྱི་ཞིང་དུ་མངོན་པར་སྤྲུལ་ཏེ་འབྱུང་བའི་གནས་ནི རྒྱ་གར་ནུབ་ཕྱོགས་ཨོ་རྒྱན་གྱི་ཡུལ་ཞེས་པས་ནུབ་བྱང་གི་མཚམས་ཏེ། ཡུལ་མིང་གི་སྨོས་པ་ནི་ཨོ་རྒྱན། དེར་དྷ་ན་ཀོ་ཥའི་མཚོ་གླིང་ཞེས་པར་གེ་སར་པདྨའི་སྡོང་པོ་ལྷུམས་སུ་ཕ་ཡི་རྒྱུ་ལས་མ་བསྐྱེད། མ་ཡི་རྐྱེན་ལས་མ་གྲུབ་ཅིང་རིག་པ་ཐོལ་སྐྱེས་ཀྱི་ཚུལ་དུ་འཇའ་ཚོན་ལྟ་བུའི་སྐུ རང་བྱུང་རང་ཤར་ཆེན་པོར་འཁྲུངས་པ་ནི་མཚོ་སྐྱེས དེ་འདྲ་བའི་ཡ་མཚན་རྨད་དུ་བྱུང་བ་ངོ་མཚར་སྤྲུལ་པའི་སྐུ་རིན་པོ་ཆེ་མཚུངས་ཟླ་དང་བྲལ་བ། དེ་ནི་གདུལ་བྱའི་དབང་གིས་བསམ བཞིན་དུ་འགྲོ་བའི་མོས་ངོར་སྣང་ཞིང་སྐྱེ་འཆི་བ་སྒྲེས་རྒུད་དང་བྲལ་བ། འཇིགས་མེད་རྡོ་རྗེ་ལྟ་བུའི་སྐུ་བརྙེས་ཏེ་འཆི་མེད་ཚེ་ལ་དབང་བའི་རིག་འཛིན་གྱི་ས་རུ་བཞུགས་ནས་འཇའ་ལུས་སྒྱུ་མའི་སྐུས་འགྲོ་བ་སེམས་ཅན་གྱི་དོན་རྟག་ཁྱབ་ལྷུན་གྲུབ་ཏུ་མཛད་ཀྱང་། ངེས་པའི་དོན་དུ་རྒྱལ་བ་རྡོ་རྗེ་འཆང་དབང་དངོས་དང་རྣམ་དབྱེར་ཐ་དད་མ་མཆིས་པའི་བདག་ཉིད་ཅན་ཡིན་པ་རྡོ་རྗེ། དེ་ལྟ་བུའི་རིག་འཛིན་མཁའ་འགྲོའི་དབང་ཕྱུག་ཀུན་བཟང་མཚོ་སྐྱེས་རྡོ་རྗེ་དེ་དང་རྒྱ་བོད་རིག་འཛིན་གྲུབ་ཐོབ་ཐམས་ཅད་ལས་མཆོག་ཏུ་གྱུར་པ་གྲུབ་རིགས་རྒྱ་མཚོའི་གཙུག་གི་ནོར་བུ་ལྟར་ཆེས་ཆེ་བ་ལྷག་པའི་མཆོག་ཐུན་གྲུབ་པ་བརྒྱད་ལ་མངའ་བརྙེས་ཤིང་ཕྱི་ནང་གི་འབྱུང་བ་ལྔ་ལ་རང་དབང་བསྒྱུར་ཏེ། སྟོབས་སོགས་ཡོན་ཏན་རྒྱ་མཚོའི་ཕ་རོལ་དུ་ཕྱིན་པ། གྲུབ་པའི་དབང་ཕྱུག་ས་ར་ཧ་པ་རྣམ་གཉིས་ཀྱིས། བདུད་འཇོམས་དཔལ་གྱི་རྡོ་རྗེའི་ངའི་ཞེས་ཉེ་བའི་ཚིག་གིས་བོས་ཏེ། བརྒྱུད་འཛིན་སྐལ་བ་དང་ལྡན་པའི་བུ་སློབ་ཕོ་མོ་ཐམས་ཅད་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་མཐུ་སྟོབས་ནུས་པས་རྒྱུད་བྱིན་གྱིས་བརླབས་ནས་སྒོ་གསུམ་རྡོ་རྗེ་གསུམ་གྱི་རོལ་པ་རུ་སྨིན་ཅིང་གྲོལ་བར་མཛད་པ་དང་། དུས་ནམ་དུའང་སྐད་ཅིག་ཙམ་ཡང་འབྲལ་བ་མེད་པར་ཐུགས་བརྩེ་བ་ཆེན་པོའི་སྒོ་ནས་རྗེས་སུ་བཟུང་སྟེ། བློ་ལོག་པའི་ལམ་དུ་མི་འགྲོ་ཞིང་རྒྱུད་དམ་པའི་ཆོས་དང་འདྲེས་ནས སྲིད་པ་ཁམས་གསུམ་ལས་རྣམ་པར་རྒྱལ་བའི་ཆོས་ཀྱི་འཁོར་ལོ་བསྒྱུར་བའི་རྒྱལ་སྲིད་ཆེན་པོ་རུ་མངའ་གསོལ་ཞིང་དབང་འབྱོར་ཏེ་འཁོར་བ་སྡུག་བསྔལ་གྱི་གནས་རིས་ལས་དབུགས་དབྱུངས་ཞིང་། འགྲོ་ཁམས་ཁ་ལོ་ ༄༅། །བསྒྱུར་ཞིང་འདྲེན་པའི་དེད་དཔོན་དམ་པ་རུ་ཆེ་བའི་གཟེངས་བསྟོད་པར་མཛད་དུ་གསོལ། ཞེས་པའོ། །ཇི་སྐད་དུ། བསྟན་བཅོས་བྱེད་པར་རྩོམ་པ་ལ། མཆོད་པར་བརྗོད་པ་འབྲས་མེད་མིན །སྟོན་པ་དང་ནི་བསྟན་བཅོས་ལ། །དང་འདུན་བསྐྱེད་པར་བྱ་ཕྱིར་རོ། །ཅེས་པའི་སྒོ་ནས་རང་གཞན་གྱི་ཚོགས་རྫོགས་ཤིང་བར་ཆད་ཞི་ནས་གཞུང་མཐར་ཕྱིན་པར་འགྱུར་ཏེ མདོ་རྒྱ་ཆེར་རོལ་པ་ལས།བསོད་ནམས་ལྡན་པའི་མི་ཡི་བསམ་པ་རྣམས་ཀྱང་འགྲུབ། ཅེས་དང་། སངས་རྒྱས་མང་བྱེད་ཀྱིས་མདོར། གང་ཞིག་རྒྱལ་བ རྣམ་འདྲེན་ལ། །བྱ་བ་ཆུང་དུ་བྱེད་གྱུར་པ །དེ་དག་མཐོ་རིས་སྣ་ཚོགས་དག །བསྒྲོད་ནས་བྱང་ཆུབ་ཐོབ་པར་འགྱུར། །ཞེས་གསུངས་པ་ནི་མཆོད་པར་བརྗོད་པའོ། །དེའི་གླེང་གཞིའི ཚུལ་ཟབ་གཏེར་གཅོད་ཀྱི་ཁྲིད་གཞུང་རང་ནས་བྱུང་བའི་དོན་ཅུང་ཟད་གསལ་བར་བཤད་ན། རྒྱུད་ལས། སྟོན་པ་ལ་སོགས་རབ་དབྱེ་བས། །ཕུན་སུམ་ཚོགས་པ་ལྔར་བརྗོད་དོ། །ཞེས་གསུངས་པ་ལྟར་ཕུན་སུམ་ཚོགས་པ་ལྔ་ལས གནས་ཕུན་སུམ་ཚོགས་པ་འཛིན་པས་བདག་ཏུ་བཟུང་བའི་ཡུལ་གྱི་རྣམ་པར་སྣང་བ་ནི་ཕན་ཚུན་གཅིག་འབྲེལ་ཞིང་སོ་སོར་འབྱེད་མི་ནུས་པས་ ན་འཕྱང་པ་དང་། ཤིན་ཏུ་རྒྱ་ཆེ་བར་ཡོད་པས་ན་ཆེན་པོ་སྟེ། དེ་ལྟ་བུའི་གཟུང་འཛིན་ཐ་མལ་གྱི་རྟོག་པ་ཡུལ་དང་བཅས་པའི་ཀུན་རྫོབ་ཀྱི་སྣང་བ་མཐའ་དག་ཐོག་མར་གང་ལས་ལྡང་བའི་རང་གི་མལ་གནས་ལྟ་བུ་ནི་གཞི་དབྱིངས་འོད་གསལ་དེའི་ངང་དུ་ནུབ་ཅིང་ཞིག་པས་བདག་མེད་པའི་གནས་ལུགས་དོན་དམ་པའི་ས་མངོན་སུམ་དུ་མཐོང་བའི་ཡེ་ཤེས་རྩོལ་མེད་དུ་སྒྲིབ་བྱེད་ཀུན་རྟོག་གི་འཛིན་པ་མ་ལུས་པ་ཐད་ཀར་རམ་དེ་མ་ཐག་ཏུ་གྲོལ་བའི་ཚུལ་གྱིས་མངོན་གྱུར་དུ་བརྡོལ་བའི་ངེས་དོན་གསང་བའི་ནམ་མཁའ་བདེ་ཆེན་ཀུན་ཏུ་བཟང་མོའི་བྷ་ག་ཡངས་པའི་ཀློང་དུ་ཤེས་རབ་ཀྱི་ཕྱོགས་སྟོང་པ་ཨེ་དང་། ཐབས་ཀྱི་ཕྱོགས་བདེ་བ་ཆེན་པོ་ནི་ཝཾ་སྟེ་ཨེ་ཝཾ་ཟུང་འཇུག་གི་རྣམ་རོལ་སྟོན་འཁོར་སོགས་ཀྱི་བཀོད་པ་ཅིར་ཡང་ངོམས་པའི་གནས་རང་སྣང་དོན་གྱི་འོག་མིན་དེ་རུ། གནད་བསྡུ་ན་གཟུང་འཛིན་དང་བྲལ་བའི་རང་སྣང་དག་པའི་ཡེ་ཤེས་ཀྱིས་གང་སྣང་དག་པ་རབ་འབྱམས་སུ་ཤར་བ་ནི་སྟོན་འཁོར་སོགས་གང་དུ་སྣང་བའི་གནས་ལྟ་བུ་ཡིན་པས་ན་དེའི་སྒྲས་བསྟན་པ་སྟེ། སྒྱུ་འཕྲུལ་རྒྱས་པ་ལས། གཟུང་འཛིན་བྲལ་བའི་ཡེ་ཤེས་ནི། །དེ་བཞིན་གཤེགས་པ་ཀུན་གྱི་གནས། །ཞེས་གསུངས་པ་ལྟར་རོ། །སྟོན་པ་ཕུན་སུམ་ཚོགས་པ་དཔལ་ ༄༅། །རྡོ་རྗེ་འཆང་དང་གཉིས་སུ་མེད་པ་དོན་ལ་སྟོན་འཁོར་ཐ་མི་དད་ཀྱང་དད་པའི་ཚུལ་གྱིས་སྒྱུ་འཕྲུལ་གྱི་རྣམ་རོལ་ཅི་དགར་སྟོན་པ་ལ་མངའ་དབང་སྒྱུར་བའི་རྒྱལ་པོ་དཔལ་ལྡན་ས་ར་ཧ་པས། འཁོར་ཕུན་སུམ་ཚོགས་པ་སྟོན་པ་རང་གི་ཡེ་ཤེས་ཀྱི་རོལ་རྩལ་འཁོར་དུ་ངོམས་པ་སྟེ་འཁོར་གྱི་རྣམ་པར་བསྟན་པའི་ཐོག་མ་ཐབས་ཡེ་ཤེས་ཉི་མ་དང་ཤེས་རབ་ཟླ་བའི་དབང་པོ་གཉིས་ཏེ། དེའི་ཐབས་ཤེས་གཉིས་ཀྱི་ངོ་བོའི་འཁོར་གཉིས་ལས། གཞུང་གཞན་དུ་བརྡ་དོན་སོགས་སྦྱར་བའི་སྐབས་ཐབས་ཟླ་བ་དང་ཤེས་རབ་ཉིད་ཉི་མས་མཚོན་པར་གསུངས་ཀྱང་། འདིར་དེ་ལས་བཟློག་ནས་རིམ་པ་བཞིན་ཉི་མ་དང་ཟླ་བའི་མིང་གིས་བཏགས་པ་ནི་ཐབས་དེ་ཡང་ཤེས་རབ་དང་མ་བྲལ་བ་དང་ཤེས་རབ་ཀྱང་ཐབས་དང་མ་བྲལ་བ་མཚོན་པའི་ཕྱིར་ཡིན་ནོ། །དེ་གཉིས་ལ་གུས་པས་ཉན་པར་བཀའ་བསྒོས་ཏེ།ཆོས་ཕུན་སུམ་ཚོགས་པ་ཆོས་ཉིད་གནས་ལུགས་མངོན་དུ་གྱུར་པའི་ཡེ་ཤེས་ཀྱི་ཀློང་གི་ཡང་མཛོད་དེ། དཔེར་ན་མཛོད་ཀྱི་ནང་ནས་ཀྱང་ཡང་མཛོད་ཆེན་པོ་སྒོ་ཕྱེས་ནས་གཅེས་ནོར་ཕྱུངས་ཏེ་སྦྱིན་པ་བཞིན་དུ་ཡེ་ཤེས་དེའི་ཀློང་ནས་དགོངས་དོན་མཐར་ཐུག་པའི་དོན་གཞན་ལ་གསལ་བར་བསྟན་པ་ཡིན་ལ། དེ་ཡང་མཛོད་ཁང་དེ་ན་ཡོད་པའི་ལོངས་སྤྱོད་ཀྱི་ནང་ནས་མཆོག་ཏུ་གྱུར་པ་ཡིད་བཞིན་གྱི་ནོར་བུ་རིན་པོ་ཆེ་ལས་དགོས་འདོད་འབྱུང་བ་བཞིན་དུ་གནས་སྐབས་དང་མཐར་ཐུག་གི་ཡོན་ཏན་གྱི་འབྱུང་གནས་དཀོན་པའི་མཆོག་ཏུ་གྱུར་པས་ན་རིན་པོ་ཆེ། བརྗོད་བྱ་རྟོགས་པའི་ཆོས་ཀྱི་དོན་ཟབ་མོ་རང་བཞིན་གཏིང་དཔག་དཀའ་ཞིང་མཐར་གཏུག་པའི་ཚུལ་གྱིས་མི་ཟད་ལ། རྗོད་བྱེད་ལུང་གི་ཆོས་ཀྱིས་བསྡུས་པ་བློ་གཟུ་བོར་གནས་པའི་མཁས་པ་རྣམ་དཔྱོད་ཅན་གྱིས་ཐོས་ན་ཡིད་ལ་དགའ་བའི་རྒྱན་ལྟ་བུ། ཐུགས་བསྐྱེད་སྨོན་ལམ་བསམ་གྱིས་མི་ཁྱབ་པའི་མཐུ་ལས་ལས ཅན་གྱི་གདུལ་བྱ་གཅིག་ནས་གཅིག་བརྒྱུད་དུ་འཕོ་བའི་ཚུལ་གྱིས་སྲིད་པ་ཇི་སྲིད་བར་རྒྱུན་མི་ཆད་པས་འཁོར་ལོ་སྟེ། ལུང་རྟོགས་ཆོས་ཀྱི་འཁོར་ལོ་ཞེས་བྱ་བའི་སྒྲ་བཤད་དོན་གྱིས་ཚང་ལ། གསང་ཞིང་གབ་པའི་དོན་གསལ་བར་སྟོན་པའི་གབ་བྱང་ཆེན་པོ་འདི་ཉིད་བདག་ཀློང་གྲོལ་རྡོ་རྗེ་མི་འགྱུར་ཞེས་གཏེར་སྟོན་ཆེན་པོ་རང་ལ་དཔེར་ན་ཕ་གཅིག་པུས་བུ་གཅིག་པུ་ལ་ནོར་བཟང་པོའི་བགོ་སྐལ་ཕོག་པ་བཞིན་དུ་གཅེས་ནོར་དུ་གནང་བ་ཡིན་ནོ། །དེ་ཡང་གཉིས་འཛིན་འཁྲུལ་པའི་རྟོག་ཚོགས་མ་ལུས་པ་རིག་པའི་ཀློང་དུ་གྲོལ་བས་སྤང་བ་དང་། མི་མཐུན་ཕྱོགས་ཀྱི་ཉེས་པས་ ༄༅། །མི་བརྫི་བའི་རྟོགས་པའི་ཡེ་ཤེས་རྡོ་རྗེ་ལྟ་བུ་མངའ་ཞིང་། དེ་ལྟ་བུའི་སྤང་རྟོགས་ཀྱི་ཡོན་ཏན་མི་ཉམས་ཤིང་འགྱུར་བ་མེད་པ་དང་ལྡན་པས་ན་མཚན་དེ་ལྟར གསོལ་བའོ། །དུས་ཕུན་སུམ་ཚོགས་པ་དེ་ལྟར་ཡེ་ཤེས་རང་སྣང་གི་གནས་དང་སྟོན་འཁོར་ཚོགས་ཤིང་འཛོམ་པ་དེའི་ཚེ་དེའི་དུས་ནའོ། །འདི་ནི་ཕལ་པའི་བསྟན་བཅོས་འགའ་ཞིག་ལྟར་ཐ མལ་གྱི་རྟོག་དཔྱོད་ཀྱིས་ཀུན་ནས་བསླངས་པའི་སྒྲ་ཚིག་རང་ག་བ་ནི་མ་ཡིན་ཏེ། རང་བྱུང་འོད་གསལ་བའི་ཡེ་ཤེས་རང་རྩལ་དག་པའི་སྣང་བ་མུ་མཐའ་མེད་པར་ཤེས་བྱ་ཀུན་ལ་མཉམ་པར་བརྡལ་ཞིང་ཁྱབ་པ་ཆེན་པོའི་རང་བཞིན་ལ་རྨོངས་པའི་མུན་པ་སེལ་བའི་ཤེས་རབ་མཆོག་གིས་གསལ་སྒྲོན་རང་ཤུགས་ཀྱིས་ཤར་ནས། བྱ་བས་བསྒྲུབས་ཏེ་བྱ་ཞིང་བྱེད་པའི་རྩོལ་བས་སྐྱེད་པ་མེད་པར་ཡེ་ནས་གནས་པའི་གཞི་གནས་ཡེ་ཤེས་ལྔའི་རང་བཞིན་ནང་གསལ་འབྱུང་ཆེན་དྭངས་མ་ལྔའི་འོད་ཀྱི་མདངས་གློ་བུར་གྱི་དྲི་མའི་སྒྲིབ་གཡོགས་དང་བྲལ་ནས་ཕྱིར་སྣང་སྐུ་དང་ཞིང་ཁམས་ཀྱི་རྣམ་པར་སྣང་བ་ན་དེ་དང་དབྱེར་མེད་པའི་ཡེ་ཤེས་ཀྱི་རླུང་གི་རང་གདངས། གསུང་རྡོ་རྗེ་རྣམ་པ་ཐམས་ཅད་པའི་ངོ་བོ་རྗོད་བྱེད་ཚིག་གི་རྣམ་པར་ཤར་བ་ཡིན་པའི་ཕྱིར་རོ། །དེ་ལྟ་ བུའི་གདམས་པའི་རྣམ་གྲངས་གཞན་ཡང་མང་དུ་ཡོད་པ་སྐབས་སུ་བབས་པ་འདི་ཡང་སྟོན་ཡུལ་གྱི་གང་ཟག་ནི་ཕྱིས་འབྱུང་དུ་ཡང་མཐའ་ཡས་པ་འབྱུང་བས་ན་མིང་འདི་དང་འདི་གྲངས་འདི་ཙམ་མོ་ཞེས་སོགས་ངོ་བོ་དང་གྲངས་ངོས་བཟུང་དང་བྲལ་བ་ཡིན། དེ་ཡང་སྐྱེ་བ་དུ་མའི་སྔོན་རོལ་ནས་ཚོགས་རྒྱ་ཆེན་པོ་བསགས་ཤིང་ལེགས་སྨོན་གྱི་མཐུ་གྲུབ་པ་རྣམ་པར་དཀར་བའི་ལས་ཀྱི་འཕྲོ་བཟང་པོ་དང་བཅས་པའི་རྒྱུ་རྐྱེན་ཚོགས་ཤིང་དུས་ལ་བབས་པར་འཛོམ་པའི་ཆེད་དུ་བྱ་བའི་གདུལ་བྱ་སྐལ་བ་དང་ལྡན་པ་གང་དང་གང་ཡིན་པ་དེ་དང་དེའི་ཟ་ཐང་སྟེ་ལོངས་སྤྱོད་ལྟ་བུའི་ཚུལ་དུ་ཉམས་སུ་བླང་བྱར་རང་བྱུང་བའོ། །སྒྱུ་འཕྲུལ་གསང་བའི་སྙིང་པོའི་འཆད་ཚུལ་དག་ལས་སྟོན་པ་རང་དང་དུས་མཉམ་པ་ལྷན་ཅིག་པའི་འཁོར་དང་། ཕྱི་ནས་བསྟན་ཡུལ་གོ་ཕྱེ་བའི་འཁོར་གཉིས་ཀྱི་རྣམ་དབྱེ་མཛད་པ་ལྟར འདིར་ཡང་ཐོག་མའི་འཁོར་གཉིས་དང་པོ་དང་ཕྱིས་འབྱུང་འདི་དག་ཕྱི་མར་བསྟན་པ་ཡིན་ནོ། །ཟབ་གཏེར་རྡོ་རྗེའི་གསུང་ཐོད་རྒལ་གྱི་ཁྲིད་ཡིག ལས། འོད་གསལ་བདེ་བ་ཆེན་པོའི་དབྱིངས་ཀློང་དེ་ཉིད་དུ༔ གཞི་ཡི་ཆོས་སྐུ་བདེ་གཤེགས་སྙིང་པོ་དང་ཞལ་མི་གཉིས་པ་གྲུབ་བརྒྱའི་དབང་ཕྱུག་ས་ར་ཧ་པ་ཆེན་པོའི་ཞལ་གྱི་དཀྱིལ་འཁོར་ ༄༅། །ངོམས་ནས༔ ཞེས་གསུངས་པ་ལྟར། སྐབས་འདིར་གཞི་ཡི་ཆོས་སྐུ་བདེ་བར་གཤེགས་པའི་སྙིང་པོའི་ངོ་བོ་རང་གི་སྟོན་པར་ཤར་བ་དང་སྔོན་གྱི་དུས་སུ་གྲུབ་པའི་དབང་ཕྱུག་གི་རྣམ་པར་བསྟན་པའི་གཞི་སྣང་གི་སྟོན་པ་དེ་གཉིས་ཀྱང་རང་ཅག་གི་གཟུང་འཛིན་གྱི་རྟོག་པས་ཐ་དད་དུ་བཅོས་པ་ཙམ་ལས་དོན་ལ་དབྱེར་མེད་པ་ཡིན་ལ། དུས་འདིར་ཡང་འོད་གསལ་བདེ་བ་ཆེན་པོའི་དབྱིངས་ཀློང་དུ་ངོ་བོ་གཅིག་པར་གྱུར་ཅིང་། དེར་མ་ཟད། རྒྱལ་བ་ཐམས་ཅད་ཡེ་ཤེས་ཀློང་དུ་གཅིག །ཅེས་པ་ལྟར་ཕྱོགས་བཅུ་དུས་བཞིའི་རྒྱལ་བ་ཀུན་དང་ཡང་ངོ་བོ་གཅིག་པར་སོང་བས་ན རྒྱུད་བརྟག་པ་གཉིས་པ་ལས། འཆད་པ་པོ་ང་ཆོས་ཀྱང་ང་། །རང་གི་ཚོགས་ལྡན་ཉན་པ་ང་། །ཞེས་གསུངས་པ་ལྟར་སྟོན་པ་དེའི་རྣམ་འཕྲུལ་འཁོར་དང་ཆོས་ཀྱི་རྣམ་པར་འཕྲུལ་པ་སྔོན་བྱུང་གི་དུས་སུ་རྒྱལ་བ་རྡོ་རྗེ་འཆང་གིས་གསང་བ་ཆེན་པོའི་རྒྱུད་སྡེ་རྣམས་ཇི་ལྟར་གསུངས་པ་དང་ཚུལ་མཐུན་པས་ན། གཞན་སོ་སྐྱེ་རང་ག་བ་ཞིག་གིས་རྒྱུད་རྣམས་ལ་ཁུངས་བཅོལ་རློམས་ཀྱི་བསྟན་བཅོས་ཕལ་མོ་ཆེ་དང་ཆེས་མཚུངས་པ་མ་ཡིན་ཅིང་གནམ་ས་ལྟར་ཁྱད་པར་ཆེ་སྟེ། འདི་ནི་སྣང་ཚོད་ལ་བསྟན་བཅོས་ཡིན་ཀྱང་གནས་ཚོད་ལ རྒྱལ་བའི་བཀའ་ཡིན་བྱས་ཀྱང་ཆོག་པ་ཡིན་ནོ། །སྟོན་པ་ས་ར་ཧ་པར་སྣང་བ་ནི གཏེར་སྟོན་ཆེན་པོ་ཉིད་བདག་ཅག་གི་སྟོན་པའི་འཁོར་མཆོག་ཟུང་གཉིས་ཀྱི་ནང་ནས་ཤེས་རབ་ཅན་གྱི་མཆོག་འཕགས་པ་ཤཱ་རིའི་བུའི་རྣམ་འཕྲུལ་ཡིན་པར་རང་ཉིད་ཀྱིས་ཞལ་གྱིས་བཞེས་ལ། དེ་ནི་རྒྱུད་འགའ་ཞིག་ལས་བྱང་སེམས་སྒྲིབ་པ་རྣམ་པར་སེལ་བ་ཡིན་པར་གསུངས་པ་སོགས་ལྟར་སྤྲུལ་པའི་ཉན་ཐོས་ཡིན་གྱི་ཐེག་དམན་གྱི་གང་ཟག་རང་ག་བ་མ་ཡིན་ལ དེས་གདུལ་བྱའི་སྣང་ངོར་དཔལ་ས་ར་ཧའི་ལས་ཀྱི་ཕྱག་རྒྱར་ཚོང་དཔོན་གྱི་བུ་མོའི་རྣམ་པར་བསྟན་དུས་ཐུགས་བསྐྱེད་སྨོན་ལམ་གྱི་མཐུས་ཡིན་ཏེ། ཐོད་རྒལ་གྱི་ཁྲིད་ཡིག་ལས། ཀྱེེ༔ ཤེས་རབ་ཕུལ་ཕྱིན་འཕགས་པ་ཤཱ་རིའི་བུ༔ ཚོང་དཔོན་བུ་མོའི་རྣམ་པར་བཞེངས་ནས་སུ༔ ང་ཡི་ས་ལམ་བརྒལ་བའི་ཤིང་རྟ་འདྲེན༔ བདེ་སྟོང་སྙོམས་འཇུག་རོ་ལ་རོལ་པའི་ཚེ༔ བྱང་ཆུབ་སེམས་ཀྱི་ཐུགས་བསྐྱེད་གདིང་ལྡན་པས༔ མ་འོངས་ལྔ་བརྒྱའི་དུས་ཀྱི་སྙིགས་མའི་ཚེ༔ བདག་ནི་སྦས་པའི་རྣལ་འབྱོར་དམ་པར་གྱུར༔ དཔའ་བོ་ཆེན་པོ་ཁྱེད་ཀྱིས་རྗེས་བཟུང་ནས༔ སྐལ་བཟང་གདུལ་བྱ་འདུལ་བའི་སྟོབས་ལྡན་ཅིང་༔ ཐབས་ཤེས་གཉིས་མེད་གདམས་པའི་ཤིང་རྟ ༄༅། །ཡིས༔ འབྲེལ་ཚད་ཆོས་སྐུའི་ས་ལ་བརྒལ་གྱུར་ཅིག༔ པདྨ་ལས་སྐྱེས་སངས་རྒྱས་གར་དབང་པོའི༔ ཕྲིན་ལས་དཔལ་གྱུར་འཁོར་བ་དོང་སྤྲུགས་ཤོག༔ ཅེས་པའི་ཐུགས་བསྐྱེད་སྨོན་ལམ་རྣམ་དག་པའི༔ རྟེན་འབྲེལ་དུས་ལ་བབས་པ་དེང་གི་དུས༔ ཞེས་གསུངས་པ་ལྟར་ཡིན་པའི་ཕྱིར་རོ། །སླར་ཡང་ཚིགས་སུ་བཅད་དེ་གདམས་པ། ཡུལ་དང་ཡུལ་ཅན་ལག་སྦྲེལ་ཕྲེང་བའི་མུ༔ དཔེ་རྟགས་གཤིས་ལུགས་ཐབས་ཤེས་སྙོམས་ཞུགས་པའི༔ བདེ་སྟོང་ཀློང་རྒྱས་འདེབས་མའི་ལྟོ་བར་སྦྲུམ༔ མཐའ་སྡུད་ཀུན་ཆུབ་བུམ་པའི་རྒྱལ་པོར་ཟུངས༔ སྟོང་ཆེན་ནམ་མཁའ་སྟོང་པའི་དཔེར་ཆེ་བས༔ འདམ་བུའི་ཁུང་བུ་སྟོང་པའི་ཧར་མི་སངས༔ ཞེས་པའི་དོན་ནི། ཡུལ་ཡུལ་ཅན་ལག་པ་གཉིས་སྦྲེལ་བ་ལྟར་གོང་དུ་འཕྱང་པ་ཞེས་པ་དང་དོན་གཅིག་ཏུ་གོ་དགོས་ལ། དེ་ནི་ཐོག་མ་མེད་པ་ནས་ད་ལྟའི་བར་རྒྱུན་མི་ཆད་པས་ཕྲེང་བ་ཞེས་བྱ་ལ། ཕྱིས་ཀྱང་ཇི་སྲིད་གཉེན་པོའི་ཡེ་ཤེས་མ་སྐྱེས་ཀྱི་བར་དེའི་མུའམ འཕྲོ་རྒྱུན་མི་ཆད་པར་འབྱུང་བ་ཡིན་ནོ། །དེ་ལ་སོགས་པའི་འཁོར་འདས་ཀྱི་རྣམ་པ་མ་ལུས་པ་ནི་སེམས་ཉིད་འོད་གསལ་བའི་བདག་ཉིད་བདེ་བར་གཤེགས་པའི་སྙིང་པོའི་རྩལ་ལས་བྱུང་བ་ ཡིན་ཏེ། དཔལ་ས་ར་ཧ་པ་ཆེན་པོས། སེམས་ཉིད་གཅིག་པུ་ཀུན་གྱི་ས་བོན་ཏེ །གང་ལས་སྲིད་དང་མྱ་ངན་འདས་འཕྲོ་བ། །ཞེས་གསུངས་པ་ལྟར་རོ། །དེ་ཡང་ཀུན་བྱེད་རྒྱལ་པོའི་རྒྱུད་ལས། དོན་འདི་ངེས་པར་རྟོགས་འདོད་ན། །དཔེ་ནི་ནམ་མཁའ་ལྟ་བུར་བརྟག །དོན་ནི་ཆོས་ཉིད་སྐྱེ་བ་མེད། །རྟགས་ནི་སེམས་ཉིད་འགགས་པ་མེད །ཅེས་གསུངས་པ་ལྟར། གཞི་དབྱིངས་དོན་དམ་པའི་བདེན་པ་དེ་ནི་ནམ་མཁའ་ལྟ་བུར་ཤེས་པར་བྱ་ལ། རྟགས་ནི་སེམས་ཉིད་འགགས་མེད་ཀྱི་རྩལ་ལས་བྱུང་བའི་སྣང་ཆ་འདི་དག་གིས་མཚོན། དོན་ནི་ཆོས་ཉིད་སྐྱེ་བ་མེད པའི་གཤིས་ལུགས་སུ་གནས་པ་ཡིན། དེ་ལས་དཔེ་དོན་ནི་གོ་སླ་ལ། རྟགས་དཔེ་མཚོན་ཚུལ གཞི་སྣང་རྩལ་གྱི་སྣང་ཆ་འདི་དག་ཡོད་པས་ནི་འདི་དག་གི་སྣང་གཞི་མཐར་ཐུག་གཞི་དབྱིངས་གཤིས་ཀྱི་གནས་ལུགས་ཤིག་ཡོད་པར་གྲུབ་སྟེ དེ་མེད་ན་དེ་དག་གང་ལས་སྣང་བའི་གཞི་མེད་པའི་ཕྱིར། དེ་ཕྱིར་གང་ལས་སྣང་བའི་གཞི་དེ་མེད་ན་དེ་ལ་བརྟེན་ནས་བྱུང་བའི་སྣང་བ་མེད་པས། གང་འབྱུང་བའི་སྣང་ཆ་འགག་མེད་དུ་ཡོད་པས་དེ་གང་ལས་བྱུང་བའི་སྣང་གཞི་ཡོད་པར་གྲུབ་པ་ནི་ཚད་མའི་གཞུང་ལས་མེ་རྒྱུ་དང་དུ་བ་འབྲས་བུ་ཡིན་ལ་རྒྱུ་མེད་དུ་འབྲས་བུ་ ༄༅། །ཞིག་འབྱུང་མི་སྲིད་པའི་ཕྱིར། མེ་མེད་ན་དུ་བ་མི་འབྱུང་བས། དུ་བའི་རྟགས་ཀྱིས་མེ་ཡོད་པར་སྒྲུབ་པ་དང་རིག་པའི་འགྲོས་མཐུན་ལ། གཞན་ཡང་གཞི་དབྱིངས་བདེན་པའི་སྤྲོས་པ་ཀུན་དང་བྲལ་བའི་རང་བཞིན་ཅན་ཞིག་ཡིན་ན་རྩལ་གྱི་སྣང་བ་དག་སྣང་དུ་རུང་ལ་མིན་ན་མི་རུང་བ་ནི། དཔལ་མགོན་འཕགས་པ་ཀླུ་སྒྲུབ་ཀྱིས། གང་ལ་སྟོང་པ ཉིད་རུང་བ། །དེ་ལ་ཐམས་ཅད་རུང་བ་ཡིན། །གང་ལ་སྟོང་ཉིད་མི་རུང་བ །དེ་ལ་ཐམས་ཅད་རུང་མ་ཡིན། །ཅེས་གསུངས་པ་དང་གོ་དོན་གནད་གཅིག་ཏུ་འབབ་པ་ཡིན་ནོ། །དོན་དེ་ལ་དགོངས་ནས་ཆོས་དབྱིངས་རིན་པོ་ཆེའི་མཛོད་ལས་ཀྱང་། བྱང་ཆུབ་སེམས་ཀྱི་མཚོན་དཔེ་ནམ་མཁའ་འདྲ། །ཞེས་དང་། དོན་ནི་རང་རིག་མཁའ་མཉམ་བྱང་ཆུབ་སེམས། །ཞེས་དང་། རྟགས་ནི་རྩལ་ལས་ཅིར་ཡང་འཆར་བ་སྟེ །ཞེས་གསུངས་པ་དང་། དེ་དག་གི་དོན་བསྡུས་ཏེ རང་བྱུང་ཡེ་ཤེས་ཆོས་ཉིད་ཕྱོགས་ཡན་ལ། །དཔེ་དོན་རྟགས་ཀྱི་ངེས་པས་མཚོན་ཏེ བསྟན། །ཞེས་གསུངས་པ་ཡིན་ནོ། །རྟགས་ཀྱིས་མཚོན་ཚུལ་དེ་ལྟར་བཤད་པ་ནི། གཞི་ལས་གཞི་སྣང་འཆར་ཚུལ་ལ་ངེས་པ་བསྐྱེད་པ་དང་། སྐབས་དོན་དང་འབྲེལ་ཞིང་གོ་ཡང་སླ་བའི་ དབང་དུ་བྱས་ཀྱི། ཆོས་དབྱིངས་མཛོད་རྩ་འགྲེལ་གྱི་དགོངས་པ་ལྟར་ན་རྒྱ་མཚོ་དྭངས་པར་ནམ་མཁའི་གཟའ་སྐར་གྱི་གཟུགས་བརྙན་ཤར་བ་མཚོ་དེར་ཤར་ཙམ་ལས་ངོ་བོ་ངོས་བཟུང་མེད་པར་ངེས་པ་ན་འཆར་གཞིའི་རྒྱ་མཚོ་ཡང་དྭངས་གསལ་དུ་གོ་བ་ལྟར།རིག་དབྱིངས་ལས་ཤར་བའི་སེམས་དེ་སྣང་ཙམ་ལས་སྟོང་པའི་རང་བཞིན་ལས་མ་འདས་པར་རྟོགས་པ་ན། དེའི་གནས་ལུགས་མཐར་གཏུག་ན་འཆར་གཞིར་བཏགས་པའི་རིག་དབྱིངས་དེའི་རང་བཞིན་དང་དབྱེར་མེད་པས་ན། དེ་ཡང་སྟོང་པ་ནམ་མཁའ་ལྟ་བུར་མཚོན་ཞིང་གོ་བར་བྱེད་པའི་དོན་དུ་གསུངས་ཏེ། འདི་ནི་རྫོགས་པ་ཆེན་པོའི་ལུགས་ཀྱི་སེམས་རིག་