Tibetan
པས་མཁའ་འགྲོ་མ་དེ་ལ་ཕ་གིའི་མི་དེ་དག་གང་ལགས་དྲིས་པས། མཁའ་འགྲོ་མ་ན་རེ། གྲུབ་ཆེན་བརྒྱད་ཅུ་དང་རིག་འཛིན་ཆེན་པོ་བརྒྱད་ཀྱིས་ཞལ་གཟིགས་པ་ཡིན་ཟེར།དེར་བདག་གིས་ཕྱག་བྱས་ནས་གསོལ་བ་བཏབ་པས་སྤྲིན་གྱི་གསེབ་ནས་བླ་མ་སྙིང་པོའི་བུམ་ཞྭ་ཅན་ཞིག་བྱུང་ནས་ཕྱག་གཉིས་བདག་གི་མགོ་ཐོག་ཏུ་བཞག་སྟེ་འདི་སྐད་དོ། །ང་ནི་རིག་འཛིན་ཧཱུྃ་ཆེན་ཀཱ་ར་ཞེས་བྱ་བ་ཡིན། ཁྱོད་ནི་ངའི་ཕྲིན་ལས་ཀྱི་སྤྲུལ པ་ཡིན། འགྱུར་བ་མེད་པ་སྐུ་བུམ་པའི་དབང་ཡོངས་སུ་རྫོགས་པ་ཐོབ་པར་གྱུར་ཅིག །འགག་པ་མེད་པ་གསུང་གསང་བའི་དབང་ཡོངས་སུ་རྫོགས་པ་ཐོབ་པར་གྱུར་ཅིག །འཁྲུལ་པ་མེད་ ༄༅། །པ་ཐུགས་ཤེས་རབ་ཡེ་ཤེས་ཀྱི་དབང་ཡོངས་སུ་རྫོགས་པ་ཐོབ་པར་གྱུར་ཅིག །མཚན་མ་ཚིག་དང་བྲལ་བ་ལྷུན་གྲུབ་བདེ་བ་ཆེན་པོའི་དབང་ཡོངས་སུ་རྫོགས་པ་ཐོབ་པར་གྱུར་ཅིག །ཉི་མ་དེ་རིང་ནས་བཟུང་སྟེ་ཁྱོད་དང་ང་གཉིས་ཐ་དད་མེད་པའི་དབང་དམ་པ་ཐོབ་པར་གྱུར་ཅིག །ཅེས་གསུངས་ནས་བདག་ལ་ཐིམ་པའི་སྣང་བ་བྱུང་། དེ་ནས་མཁའ འགྲོ་མ་ཉི་འོད་འབར་མ་ཞེས་བྱ་བ་ཡིན་ཟེར་བའི་སྐུ་མདོག་དཀར་མོ་དར་དམར་པོའི་ཨང་རག་གྱོན་པ་གཡས་ཉི་ཟེར་བཟུང་ཞིང་གཡོན་པས་བརྡའི་མེ་ལོང་ཐོགས་པ་ཞིག་བདག་གི་ཐད་དུ་བྱུང་ནས་འདི་སྐད་ཅེས། སྐྱེས་བུ་དམ་པ་ཁྱོད་ཀྱིས་ལྟོས། །བརྡ་འདི་གོ་འམ་ལེགས་པར་དཔྱོད། །མ་འོངས་འབྱུང་འགྱུར་ལེགས་ཉེས་པྲ། །མི་ཤེས་པ་ན་ང་ཡིས་སྟོན །ཞེས་ཟེར་བ་ན བདག་གིས་མི་ཤེས་སྨྲས་པས། བརྡ་དེ་བཀྲོལ་ནས་ཚུལ་བཞིན་དུ་བཤད་བྱུང་དེ་ནས་སྲིན་མོ་སྐྲ་དམར་ཞིང་མིག་ཟླུམ་པ་བཞིས་དར་གྱི་འདོ་ལེ་བཞི་ཁྲམ་དུ་བཟུང་ནས་ཁྱོད་འདིའི་སྟེང་དུ་སྡོད་ཟེར་བ་བཞིན་བདག་དར་གྱི་སྟེང་དུ་བསྡད་མ་ཐག་ཏུ་ནམ་མཁའི་ཁམས་ནས་ཕ་རི་ལ་སླེབས་པས། རི་བོ་དེའི་འདབས་རྒྱ་མཚོའི་ཕ་མཐའ་དེ་ན་བྲག་དམར་མདའ་མདུང་རལ་གྲི་ཁ་ཊྭཱྃ་ཏྲི ཤུལ་འབར་བའི་རྣམ་པས་ཁོར་ཡུག་ཏུ་བསྐོར་བའི་བར་མཚམས་ཞིག་ཏུ་གྲུ་འདོར་བའི་ལམ་ལ་ལྕགས་ཀྱི་ཐེམ་སྐས་བཙུག་པ་ཞིག་སྣང་། རིའི་རྩ་བ་ཐང་ཆེན་པོས་བསྐོར་བའི་དཀྱིལ་དུ་དངུལ གྱི་མཁར་དང་། དེ་བཞིན་དུ་གསེར་ལས་བྱས་པ་དང་། ཟངས་ལས་བྱས་པ་དང་། ལྕགས་ལས་བྱས་པའི་མཁར་རྣམས་ལ་ལ་ནི་ཉིས་ཐོག། །ལ་ལ་ནི་གསུམ་ཐོག །ལ་ལ་ནི་བཞི་ཐོབ།། ལ་ལ་ནི་དགུ་ཐོག་གི་བར་བསམ་གྱིས་མི་ཁྱབ་པས་རི་དེ་ཡོངས་སུ་འཁོར་བ། དེར་རིག་འཛིན་དྲང་སྲོང་གི་ཚོགས་བསམ་གྱིས་མི་ཁྱབ་པ་བཞུགས་པའི་དབུས་ན་མི་མགོ་སྐམ་རློན་བརྩིག་པའི་མཁར་དགུ་ཐོག་གི་སྟེང་ཁང་དུ་སྲིན་རྒྱལ་རཀྴ་ཐོད་ཕྲེང་ཞེས་བྱ་བ་ཁྲོ་བོ་ནག་པོ་དབུ་དགུ་ཕྱག་བཅོ་བརྒྱད་ཡོད་པ། ཡུམ་སྲིན་མོ་དམར་མོ་འཇིགས་སུ་རུང་ཞིང་བལྟར་མི་བཟོད་པ་གཉིས་ལ། བློན་རཀྴ་ཀ་ལ་དང་། རཀླུ་རག་རོལ་དང་།རཀྴ་དབུགས་ལེན་དང་། རཀྴ་སྟོབས་ཆེན་དང་རཀྴ་ཉིན་མོ་རྒྱུ་དང་། རཀྴ་མཚན་མོ་རྒྱུ་དང་། རཀྴ་སྲིན་མོའི་སྤྱི་ཁྱོ་དང་རཀྴ་སྲིན་མོའི་གྲོང་རྒྱུ་དང་། ལངྐ་ཤོད་དབང་དང་། ལངྐ་ཤོད་འཛིན་དང་། མི་ཡུལ་རྒྱུ་དང་། མི་ཡུལ་དབང་བྱེད་དང་། མི་རྣམས་ཡོངས་བདུད་ཅེས་བྱ་བ་ལ་སོགས་པའི་སྲིན་པོའི་འཁོར་ཚོགས་ ༄༅། །སྟོང་གིས་བཀའ་ཉན་ཅིང་ལས་བསྒྲུབ་པ དེ་དག་ཤར་ན་གནས་ཤིང་ཤར་གླིང་ལ་དབང་བསྒྱུར་བའོ །ལྷོ་རུ་དུང་གི་མཁར་དར་དཀར་གྱི་དབྱིབས་སུ་འདུག པའི་ནང་དུ་སྲིན་རྒྱལ་རྡོ་རྗེ་དྲག་རྩལ་ཞེས་བྱ་བ་ཁྲོ་བོ་དཀར་པོ་འཇིགས་སུ་རུང་བ་ལ་འཁོར་སྟོང་གིས་བསྐོར་ནས་ལྷོ་གླིང་ལ་མངའ་དབང་མཛད་པ། ནུབ་ཏུ་ལྕགས་མཁར་ནག་པོའི་ནང་དུ་སྲིན་རྒྱལ་རཀྴ་གདོང་དྲུག་ཞེས་བྱ་བ་ཁྲོ་བོ་སེར་ནག་འཇིགས་སུ་རུང་བ་ལ་འཁོར་སྟོང་ཕྲག་ལྔས་བསྐོར་ནས་ནུབ་གླིང་ལ་མངའ་དབང་མཛད་པ། བྱང་དུ་རིན་པོ་ཆེ་བེེ་ཌཱཪྻ་ལས་གྲུབ་པའི མཁར་རྒྱ་ཆེ་ལ་དཔངས་མཐོ་བའི་ནང་དུ་སྲིན་རྒྱལ་དྲག་ཁྲོས་ཐོད་ཕྲེང་ཞེས་བྱ་བ་ཁྲོ་བོ་ལྗང་སྔོན་འཇིགས་སུ་རུང་བ་ལ་འཁོར་སྟོང་ཕྲག་བརྒྱད་ཀྱིས་བསྐོར་ནས་བྱང་གླིང་ལ་མངའ་དབང་མཛད་པ། དེ་དག་ཐམས་ཅད་ཀྱང་ཐུགས་ཞི་བ་ཆོས་ཀྱི་དབྱིངས་ལས་མ་གཡོས་བཞིན་དུ་སྐུ་རབ་འཇིགས་གཏུམ་ཞིང་རྔམས་པའི་ཆ་ལུགས་ཅན་ཤ་སྟག་གོ། །བདག་གིས་མཁའ་འགྲོ་སྔོན་མོ་དེ་ལ་གནས་འདི་གང་ལགས་ཅེས་དྲིས་པས། དེ་ན་རེ། གནས་འདི་ས་སྤྱོད་སྤྲུལ་པའི་ཞིང་ཁམས་ཡིན་ཏེ མི་དགེ་བཅུ་སྤངས་ནས་ཚོགས་དུ་མ་བསགས་ཤིང་སྨོན་ལམ་རྒྱ་ཆེན་པོ་བཏབ་པ་ རྣམས་སྐྱེ་བའི་གནས་ཡིན། ཕྱོགས་མཚམས་སུ་རིན་པོ་ཆེ་ཤེལ་ལས་གྲུབ་པའི་ཁང་བཟང་ན་གསེར་གྱི་ཁྲི་དར་གྱིས་བཀབ་པ་འདི་རྣམས་གཟོད་སྐྱེས་བུ་མང་པོ་འབྱོན་པར་གྱུར་བ་རྣམས་ཀྱི་བཞུགས་གདན་ཡིན་ཟེར། དེ་ནས་རི་རྒྱལ་དེའི་རྩེ་མོ་ནས་དཔག་ཚད་གཅིག་འཕགས་པའི་སྟེང་གི་ནམ་མཁར་ཕྱིན་ཚེ་ས་གཞི་ཐམས་ཅད་འཇའ་རིས་ཀྱིས་གང་བ་ཟ་འོག་ཁ་ཕྱེས་པ་ལྟ་བུ་ལ། སྨན་སྣ་ཚོགས་པའི་སྤངས་རིར་དྲི་བཟང་གི་ན་བུན་འཐུལ་ཞིང་ཁ་དོག་སྣ་ཚོགས་པའི་མེ་ཏོག་གིས་ཡོངས་སུ་ཁེབས་པ། མནན་ན་ནེམ་ཞིང་བཏེགས་ན་འཕར་བ། སའི་ངོས་ལ་རྐང་པའི་མཐིལ་གྱིས་རེག་པས་ལུས་ངག་ཡིད་གསུམ་བདེ་བས་མྱོས་པར་བྱེད་པ། རྒྱ་ཁྱོན་ཚད་མེད་པའི་གནས་དེར་རིན་པོ་ཆེ་སྣ་ལྔ་ལས་གྲུབ་པའི་གཞལ་ཡས་ཁང་མཚན་ཉིད་ཐམས་ཅད་ཡོངས་སུ་རྫོགས་པའི་ནང་དུ་དཔའ་བོ་དང་མཁའ་འགྲོ་མའི་ཚོགས་ཀྱིས་བྲོ་གར་འཁྲབ་པ། མཆོད་པའི་ལྷ་མོ་དཔག་ཏུ་མེད་པས་མཆོད་པའི་སྤྲིན་རྒྱ་མཚོ་རྒྱུན་མི་འཆད་པར་སྤྲོ་བའི་དབུས་སུ་རིག་འཛིན་གྲུབ་ཐོབ་རྒྱ་མཚོ་ལྟ་བུའི་དབུས་ན་རིན་པོ་ཆེ་སྣ་ཚོགས་ལས་གྲུབ་པའི་ཁྲི་རྒྱ་ཆེ་ལ་དཔངས་མཐོ་བའི་སྟེང་དུ་ཨོ་རྒྱན་ཆེན་པོ་པདྨ་འབྱུང་གནས་སྐུ་བྱད་བལྟ་བས་ཆོག་མི་ཤེས་པ། དེ་ཉིད་ཀྱི་ ༄༅། །གཡས་སུ་དགའ་རབ་རྡོ་རྗེ། གཡོན་དུ་བི་མ་ལ་མི་ཏྲ། མདུན་གྲལ་དུ་རྗེ་འབངས་ཉི་ཤུ་རྩ་ལྔ་ལ་སོགས་པ་རྒྱ་བོད་ཀྱི་རིག་འཛིན་གྲུབ་ཐོབ་བསམ་གྱིས་མི་ཁྱབ་པ ཐམས་ཅད་གནས་དེ་ཉིད་དུ་བཞུགས་སོ། དེ་ནས་བར་ཁང་རིན་པོ་ཆེ་ཤེལ་ལས་གྲུབ་པའི་གཞལ་ཡས་ཁང་རྒྱ་ཆེ་ལ་ཁྱོན་ཡངས་པའི་ནང་དུ་པདྨ་དང་ཉི་ཟླའི་གདན་ལ་པདྨ་འཇིག་རྟེན་གསུམ་མགོན་ཞེས་བྱ་བ་སྐུ་མདོག་དཀར་གསལ་ཞལ་གཅིག་ཕྱག་བཞི་པ་མཚན་དཔེས་མཛེས་ཤིང་བལྟ་བས་ཆོག་མི་ཤེས་པ་ཞིག་ལ་བྱང་ཆུབ་སེམས་དཔའི་འཁོར་ཚོགས་རྒྱ་མཚོ་ལྟ་བུས་བསྐོར་བ་ལ་ཆོས་སྟོན་ཏེ། ཡང་སྟེང་ཁང་རིན་པོ་ཆེ་བེེ་ཌཱུརྻ་ལས་གྲུབ་པའི་གཞལ་ཡས་ཁང་ཡངས་པའི་ནང་དུ་རིན་པོ་ཆེ་པདྨ་རཱ་གའི་ཁྲི་པདྨ་དང་ཟླ་བའི་གདན་ལ་པདྨ་དྲི་མེད་འོད་སྣང་ཞེས་བྱ་བ་སྐུ་མདོག་དམར་པོ་མཚན་དང་དཔེ་བྱད་ཀྱིས་སྤྲས་པ་ཞིག་གིས་རང་སྣང་རིག་པའི་འཁོར་ལ་བརྡས་ཆོས་སྟོན་ནས་བཞུགས་པ་སྟེ། སྐུ་གསུམ་གྱི་སྟོན་པ་དེ་དག་ལ་བདག་གིས་ཕྱག་འཚལ་ཞིང་བསྐོར་བ་བྱས་ནས་སྨོན་ལམ་རྒྱ་ཆེན་པོ་བཏབ་ཅིང་དབང་དང་གདམས་པས་རྒྱུད་སྨིན་པར་བྱས་སོ། །རི་བོ་དེའི་སྐེད་དུ་ཤིང་མ་བུ་ན་ཞེས་བྱ་བ་ལ་དྲིལ་བུ་གཡེར་ཁ་ལ་སོགས་པ་སྒྲ་སྙན་པའི་ སིལ་སྙན་མང་པོ་མེ་ཏོག་དང་འབྲས་བུའི་ཚུལ་དུ་སྐྱེས་པ། གཞན་ཡང་ལྗོན་པའི་ཤིང་སྣ་ཚོགས་ལས་ཉེ་བར་སྤྱོད་པའི་མཆོད་པ་དཔག་ཏུ་མེད་པ་རྒྱུན་མི་འཆད་པར་འཕྲོ་བ་དང་། ཤར་ན་རི བོ་གསལ་ལྡན་ཞེས་བྱ་བ་དཀར་ལ་གསལ་བ་མེ་ལོང་ལྟ་བུའི་དྭངས་ཤེལ་ལས་གཟུགས་ཀྱི་འདོད་ཡོན་དུ་མ་འཕྲོ་བ། རི་དེའི་རྩེ་རུ་ཨོ་རྒྱན་སྡུག་བསྔལ་ངེས་སེལ་ཞེས་བྱ་བ་ལ་འཁོར་ཚོགས བསམ་གྱིས་མི་ཁྱབ་པས་བསྐོར་བ། ལྷོ་ཕྱོགས་སུ་རི་བོ་འདོད་ལྡན་ཞེས་བྱ་བ་གསེར་ལས་གྲུབ་པ་ལས་འདོད་རྒུའི་དཔལ་ཡོན་ཕུན་སུམ་ཚོགས་པ་ན་བུན་ལྟར་སྤྲོ་བའི་རྩེ་རུ་ཨོ་རྒྱན་རིན་ཆེན་རྒྱལ་པོ་ཞེས་བྱ་བ་ལ་འཁོར་ཚོགས་བརྒྱད་ཁྲིས་བསྐོར་བ། ནུབ་ཏུ་ཟངས་རི་དམར་པོ་དགུང་ལ་སྙེགས་པའི་ངོས་ནས་དྲི་བཟང་སྣ་ཚོགས་པའི་ན་བུན་འཐུལ་བའི་རྩེ་རུ་པདྨ་བདེ་བའི་འབྱུང་གནས་ཞེས་བྱ་བ་ལ་འཁོར་དཔག་ཏུ་མེད་པས་བསྐོར་བ བྱང་དུ་རི་བོ་འབིག་བྱེད་ཅེས་བྱ་བ་རིན་པོ་ཆེ་ལྕགས་ལས་གྲུབ་པ་ཟས་དང་གོས་ཀྱི་རིགས་སྣ་ཚོགས་ནམ་མཁའ་གང་བར་སྤྲོ་བའི་རྩེ་མོ་ན་ཨོ་རྒྱན་གཡུལ་ལས་རྣམ་པར་རྒྱལ་བ་ཞེས་བྱ་བ་ལ་འཁོར་ཚོགས་བྱེ་བ་འབུམ་གྱིས་བསྐོར་བ། རི་བོ་དེ་དག་ལས་འཕྲོས་པའི་འདོད་ཡོན་མཆོད་པའི་སྤྲིན་སྣ་ཚོགས་པས་དབུས་ཀྱི་ཟངས་ ༄༅། །མདོག་དཔལ་གྱི་རི་བོ་ལ་ཁྱབ་པའོ། །རྒྱ་མཚོའི་ཕྱི་རིམ་ཐང་ཆེན་པོས་བསྐོར་བའི་མཐའ་རྫ་རི་དང་ནགས་རི་མང་པོས་ཡོངས་སུ་བསྐོར་བའི་ཕྱི་རོལ་དུ་ཐང་དང་ལུང་པ་མང་པོ་ངམ་གྲོག་ཅན་གྱི་གནས་རྣམས་སུ་སྲིན་པོའི་གྲོང་ཁྱེར་བསམ་གྱིས་མི་ཁྱབ་པ་གནས་པ། སྲིན་པོ་སྲིན་མོ་དེ་དག་ཀྱང་སྲོག་ཆགས་ཀྱི་རིགས་མཐོང་བ་ཐམས་ཅད་མགྱོགས་པའི་ཤུགས་ཀྱིས་བཟུང་ནས་ཤ་གསོན་མར་ཟ་བ་འཕར་སྤྱང་ལྟ་བུ་གཞན་ཡང་རཀྴི་ལི་ལ་ཞེས་བྱ་བའི་ཤིང་འབྲས་དང་། བུ་ལང་ཁ་ཕ་ཞེས་བྱ་བའི་ས་བོན་ས་ལ་བཏབ་པའི་འབྲས་བུ་ལ་ཁ་ཟས་ཀྱི་མཆོག་ཏུ་ལོངས་སྤྱོད་པ་ཤ་སྟག་སྣང་ངོ །དེ་ལྟར་དག་པའི་སྣང་བ་བསམ་གྱིས་མི་ཁྱབ་པ་ཤར་ཚེ་བདག་གིས་ཨོ་རྒྱན་ཆེན་པོའི་ཞབས་ལ་ཕྱག་འཚལ་ནས་མགོ་བོས་གཏུག་སྟེ། དཔལ་ཨོཾ་རྒྱན་ཆོས་ཀྱི་རྒྱལ་པོ་ཁྱེད་མཁྱེན་ནོ། །ཐུགས་རྗེས་བཟུང་དུ་གསོལ དབང་བསྐུར་དུ་གསོལ བྱིན་གྱིས་བརླབ་ཏུ་གསོལ། ལུང་བསྟན་དུ་གསོལ། ཞེས་ཞུས་པས། ཕྱག་གཉིས་བདག གི་མགོ་ཐོག་ཏུ་བཞག་སྟེ། བུ་ཁྱོད་ལ་སྨིན་བྱེད་ཀྱི་དབང་མཆོག་དམ་པ་ཡོངས་སུ་རྫོགས་པ་ཐོབ་པར་གྱུར་ཅིག །དུས་གསུམ་གྱི་རྒྱལ་བ་སྲས་དང་བཅས་པའི་སྐུ་གསུང་ཐུགས་ཡོན་ཏན་ཕྲིན ལས་ཀྱི་བྱིན་རླབས་དངོས་གྲུབ་དམ་པ་ཡོངས་སུ་རྫོགས་པ་ཐོབ་པར་གྱུར་ཅིག །སྒོ་གསུམ་རྡོ་རྗེ་གསུམ་གྱི་རོལ་པར་འཕོས་ཤིང་སྨིན་ཅིང་གྲོལ་ནས་ཁམས་གསུམ་ཆོས་ཀྱི་རྒྱལ་པོར་དབང་འབྱོར་ཏེ། འབྲེལ་ཚད་རྣམ་པར་གྲོལ་བའི་ས་ལམ་ལ་སྦྱོར་ནུས་པར་ཤོག་ཅིག །ད་ཁྱོད་འདིར་སྡོད་ལ་ལེགས་པར་ཉོན་ཅིག་དེང་སང་སྙིགས་མ་ལྔ་བདོ་བའི་དུས་ངན་ལ་ཐུག་པས་སྨོན་ལམ་ལས་ཀྱིས་འབྲེལ་བའི་སྐྱེས་བུ་རྣམས་ལ་གདམས་ངག་གི་ཡང་བཅུད་རྣམས་སྟོན་ལ་ཟབ་ཆོས་རྣམས་ཀྱི་དབང་ལུང་ཐམས་ཅད་རྫོགས་པར་གྱིས་ཤིག །གཞི་ཁྲེགས་ཆོད་ཀྱི་ལྟ་བའི་གཏིང་དཔོག་ཅིང་ལ་བཟླ་བ་དང་། ལམ་ཐོད་རྒལ་གྱི་གནད་དོན་དང་ལམ་རྟགས་ཀྱི་ཡོན་ཏན་ཐམས་ཅད་ཁོང་དུ་ཆུབ་པར་གྱིས་ཤིག །གེགས་སེལ་བདུད་གཅོད་ཟབ་མོ་ཐེག་པ་ཆེན་པོའི་ལམ་དང་འབྲེལ་བའི་སྒོ་ནས་སྟོན་ཅིག །དེ་ནི་རྐྱེན་ངན་ཐོག་བརྫིས་སུ་གཅོད་པའི་གདམས་པ ལྟས་ངན་གཡང་དུ་ལེན་པའི་མན་ངག །ན་ཚ་ལམ་དུ་སློང་བའི་ཟབ་ཁྱད་ཡིན་ཏེ་འདིའི་གནད་དོན་ཚང་བར་ཤེས་པ་སྔོན་དུས་ཡོད་ཀྱང་དེང་དུས་ནི་མེད དེང་སང་གསང་སྔགས་ཐེག་པ་ཆེན་པོའི་བསྟན་པ་ཉམས་དམའ་བ་ནི་སེམས་ཅན་ལས་དང་བསོད་ནམས་དམན་པའི་སྟོབས་ཀྱིས་སློབ་དཔོན་ ༄༅། །རྣམས་ཐེག་པ་འོག་མའི་ལམ་བློ་ཡིད་རྣམ་པར་རྟོག་པ་མྱོང་ཞེན་ཅན་ལ་དགའ་ཞིང་དེ་མཆོག་ཏུ་འཛིན་ནས་གཞན་ལའང་དེ་ལྟར་སྟོན་པ་ཤ་སྟག་ལས་མེད་ལ་གདུལ་བྱ་བསོད་ནམས་དམན་པ་རྣམས་དེ་དང་འཕྲད་པ་ཡིན། དེའི་ཕྱིར་ངས་ཁྱོད་ལ་ཚེ་གཅིག་མངོན་འཚང་རྒྱ་བའི་ལམ་བཟང་རྫོགས་པ་ཆེན་པོའི་གདམས་པ་ཟབ་མོ་འཆད་པར་བྱའོ།། ཞེས་གསང་ཆེན་གཟུང་འཛིན་རང་གྲོལ་གྱི་རྒྱུད་ཆེན་ལུང་ལྟར་གསུངས་པ་བདག་གི་རྒྱུད་ལ་སྤར་གྱིས་བཏབ་པ་བཞིན་གསལ་ཞིང་བརྟན་པར་གྱུར་པ་དང་། ཚེ་འདིར་མངོན་སངས་རྒྱས་པའི་ལམ་བཟང་མྱུར་ལམ་རྫོགས་པ་ཆེན་པོ་འདི་རང་གིས་ཉམས་སུ་ལོངས་ལ་གཞན་དག་ལ་ཡང་དག་པར་སྟོན་ཅིག །ཅེསགསུངས་པ་ན། སླར་ཡང་འདི་སྐད་ཅེས་ཞུས་སོ། །རྒྱལ་དང་རྒྱལ་སྲས་ཐམས་ཅད་ཀྱི་སྤྱི་གཟུགས་འགྲོ་བ་ཡོངས་ཀྱི་སྐྱབས་མགོན་རིན་པོ་ཆེ་བདག་གི་ཚེ་འདི་ལ་བསྟན་དང་འགྲོ་བའི་ལེགས་ཉེས་ཇི་ལྟ་བུ་ལགས་བསྟན་དུ་གསོལ། ཞེས་ཞུས་པས། ཨོ་རྒྱན་ཆེན་པོའི་ཞལ་ནས རིགས་ཀྱི་བུ་དེང་དུས་ངན་སྙིགས་མ་ལ་ཐུག་པ་དང་སྨོན་ལོག་བདུད་ཀྱི་མགོ་འཕང་མཐོ་རུ་འཕགས་པའི་དབང་གིས་ལེགས་པ་ཉུང་ཞིང་ཉེས་པ་ཤིན་ཏུ་མང་བ་ཡིན། ཁྱོད་ཀྱི་ཚེ་སྟོད་འདིར་ཡུལ་ཉེས་ཆེན་པོ་ནི་མེད་དེ། ཚེའི་སྨད་ཆ་ལ་བབས་པའི་ཚེ་མཐའ་མིའི་རྫས་སྔགས་ཀྱི་རྐྱེན་ལས་ནད་མཚོན་མུ་གེའི་དུ་རུ་ཀ་དར་ནས་སྐྱི་ཟིང་ཟིང་པ་འབྱུང་འོན་ཀྱང་ཁྱོད་ཀྱི་ཚེ་འདི་མ་རྫོགས་ཀྱི་བར་དུ་མདོ་སྔགས་ཀྱི་བསྟན་པ་ལོག་ལམ་བདུད་ལ་མི་འཆོར་ངེས་པ་ཡིན། རེ་ཞིག་ནས་ཡུལ་འདིར་མདོ་སྔགས་ཀྱི་བསྟན་པ་མེ་སྟག་ཙམ་ཡང་མི་གནས་ཤིང་བདུད་བསྟན་མཆེད་དེ་བདེ་བའི་སྐབས་ཏིལ་འབྲུ་ཙམ་ཡང་མི་འབྱུང་། ཁྱོད་ཀྱི་ཚེ་སྨད་དུ་འདུ་བ་རྒྱས་ཤིང་བསྟན་པ་འཕེལ་རྒྱས་འདྲ་བ་འབྱུང་། བདག་གི་གདུལ་བྱའི་ལྷག་མ་ལས་ལྡན་གྱི སྐྱེས་བུ་མང་པོ་ཚེ་འདིར་རྣམ་པར་གྲོལ་བའི་ས་ལ་སྦྱོར་བའི་ཕྱིར་ཕྲིན་ལས་ཀྱི་བྱེད་པོར་ཁྱོད་འཇིག་རྟེན་ཁམས་སུ་བཏང་བ་ཡིན། དེ་ཕྱིར་དེའི་ཚུལ་སོམས་ལ་གཞན་དོན་ཅི་ནུས་སུ་བསྒྲུབ་པ་ལ་སྐྱོ་ངལ་མེད་པར་མཛོད་ཅིག་ཅེས་གསུངས་སོ །དེ་ནས་སྔར་གྱི་མཁའ་འགྲོ་མ་དེས་ད་འགྲོ་ཟེར་བ་ལ། བདག་གིས་འགྲོ་གྲབ་བྱས་པས། མོ་ན་རེ། ཀྱེ་ཧོ་སྐལ་ལྡན་རིགས་ཀྱི་བུ།། རྨི་ལམ་སྣང་བའི་རྫུན་རིས་འདིར། །འགྲོ་སྡོད་གཉིས་ཀ་ཡོད་མ་ཡིན། །སྣང་བ་གནས་སུ་འགྱུར་བ་སྟེ། །དབྱིངས་ལ་གཏོད་དང་དབྱིངས་སུ་སད། །གོའམ་ཞེས་ཟེར་ནས་བདག་ལ་ཐིམ། ༄༅། །དེ་ནས་བདག་གིས་རིག་པ་དབྱིངས་སུ་གཏད་པས་གཉིད་སད་དོ། །ལོ་ཁྱིམ་དེའི་སྟོན་ཟླ་ཐ་ཆུང་གི་ནུབ་མཁའ་འགྲོ་མ་སེར་མོ་གསེར་བཙོ་མ་ལྟ་བུའི་འོད་འབར་བ་ལྭ་བ་ལྗང་ཁྲ་གྱོན་པ་ཞིག་གིས། རི་བོ་གངས་མེད་རྣོ་རྩེ་ཞེས་པའི་རྩེ་རུ་ལྟད་མོ་ལ་ཨེ་འགྲོ་ཟེར་བ་ལ། བདག་གིས་འགྲོ་ཞེས་སྨྲས་པས་དེ་མ་ཐག་ཏུ་ལག་པ་གཡས་པའི་སོར་མོ་ནས་བཟུང་སྟེ་སྟེང་ཕྱོགས་ཀྱི་ནམ་མཁའ་ལ་དཔག་ཚད་བདུན་དུ་འཕགས་པའི་གནས་སུ་ཕྱིན་ཚེ་རི་བོ་ཆེན་པོ་རྒྱ་ཆེ་ལ་དཔངས་མཐོ་བ་ཚད་ཀྱིས་གཞལ་མི་ནུས་པ་ཞིག་གི་རྩེ་མོར་སླེབས་ཏེ་བལྟས་པས། ནུབ་བྱང་མཚམས་ན་མེ་འབར་ཞིང་འུར་སྒྲས་ས་གསུམ་གཡོ་ཞིང་འདར་བ་ཞིག་མཐོང་བ་དང་། བདག་གིས་མཁའ་འགྲོ་མ་དེ་ལ་འདི་གང་ཡིན་དྲིས་པས། དེ་ན་རེ། འདི་ཨོ་རྒྱན་རང་བྱུང་གི་དུར་ཁྲོད་ཅེས་བྱ་བ་ཡིན་ཟེར དེར་ཨེ་འགྲོ་སྨྲས་པས། འགྲོ་ཟེར་ནས་ཕྱིན་པས་ས་གཞི་ཐམས་ཅད་རུས་པ་སྐམ་པོ་སྤུངས་པའི་རི་བོ་དགུང་ལ་སྙེགས་པས་ཡོངས་སུ་འཁོར་བའི་དབུས་སུ་མི་ལྤགས་རློན་པའི་ཐང་ཆེན་པོ་ཚད་དང་རྒྱ་དཔག་ཏུ་མེད་པ། གནས་དེའི་ཐོ་ཕྱི་ཉེ་འཁོར་ཀུན་ཏུ་རྩྭ་དང་ཤིང་ཐམས་ཅད་མདའ་མདུང་རལ་གྲིའི་ནགས་ཚལ་གྱི་རྣམ་པ། ཁྲག་རྣག་ ཆུ་སེར་གྱི་ཆར་པ་བབས་པ། མེ་ལྕེ་དམར་ནག་གི་སྤྲིན་དཔུང་འཁྲིགས་པ། ས་གཞི་ཐམས་ཅད་དུ་མི་རོའི་གྲམ་ཁྲོད་བརྡལ་བ། ཁྲག་མཚོ་དམར་པོས་མཐའ་ནས་བསྐོར་བ། ཐུན་དང་མཚོན་ཆའི་ཚོགས་སྐྱིན་ཐང་ལྟར་དུ་འཚུབས་པ། སྒྲ་གྲགས་ཚད་ཐམས་ཅད་ཕཊ་ཕེཾ་བྷྱོ་ཟློག་གི་སྒྲ་འབྲུག་སྟོང་ལྡིར་བའི་ང་རོ་ལྟར་སྒྲོགས་པ། གཅན་གཟན་གདུག་པ་ཅན་སྣ་ཚོགས་ཀྱིས་ངར སྐད་སྒྲོགས་ཤིང་རྒྱུག་མཆོང་བྱེད་པའི་གནས་རབ་ཏུ་འཇིགས་ཤིང་སྐྱི་གཡའ་བའི་དབུས་ཀྱི་ཐང་པོ་ཆེ་དེར་མི་མགོ་སྐམ་པོས་ཁ་བད་བྱས་ཤིང་། རྙིང་པས་རྩིག་པ་བྱས་པ། རློན་པས་རྨང་བཏིང་བའི་གཞལ་ཡས་ཁང་ཡངས་ཤིང་རྒྱ་ཆེ་བའི་ལྟེ་བར་མི་རོ་གསར་རྙིང་མང་པོ་བརྩིགས་པའི་ཁྲིའི་སྟེང་དུ་པདྨ་དང་ཉི་མའི་གདན་ལ། ཡེ་ཤེས་ཀྱི་མཁའ་འགྲོ་མ་རྡོ་རྗེ་ཕག་མོ་ཡིན་སྐད པའི་མཁའ་འགྲོ་མཐིང་ནག་ཁྲོས་ཤིང་གཏུམ་པའི་སྤྱི་བོར་ཕག་ཞལ་ནག་པོ་གྱེན་དུ་ངུར་བས་དཔའ་བོ་དང་མཁའ་འགྲོ་མ་རྣམས་དབང་དུ་སྡུད་པ། ཕྱག་གཡས་པས་གྲི་གུག་ནམ་མཁའ་ལ་ཕྱར་ཞིང་གཡོན་པས་ཐོད་ཁྲག་ཐུགས་ཀར་བསྣམས་པ སྐུ་གཅེར་བུ་མི་མགོའི་ཕྲེང་བས་དོ་ཤལ་བྱས་པ་འཇིགས་ཤིང་བལྟར་མི་བཟོད་པ་ཞིག་གི་གཡས་སུ་མཁའ་འགྲོ་མ་ཡེ་ཤེས་མཚོ་རྒྱལ་ ༄༅། །སྐུ་མདོག་དམར་ནག་ཤིན་ཏུ་ཁྲོས་པའི་ཉམས་ཅན་གཡས་ལྕགས་ཀྱུ་དང་གཡོན་པས་བྷནྡྷ་བསྣམས་པ། གཡོན་དུ་བལ་མོ་ཤཱཀྱ་ངྷེ་ཝ་ཁྲོ་མོ་ནག་མོ་ཐོད་དབྱུག་དང་ཐོད་ཁྲག་བསྣམས་པ དེ་མཐར་རིགས་ལྔ་དབྱིངས་ཀྱི་ཌཱ་ཀི་ཁྲོ་མོ་མི་སྲུན་འཇིགས་པའི་ཆ་ལུགས་ཅན་ལ་མཁའ་འགྲོ་མ་བྱེ་བ་འབུམ་གྱིས་བསྐོར་བ། ལ་ལ་ནི་སྔོ་སང་། ལ་ལ་དཀར་མོ། ལ་ལ་སེར་མོ། ལ་ལ་དམར་མོ ལ་ལ་ལྗང་མོ། ལ་ལ་མཐིང་ནག་ལ་སོགས་པ་ཁ་དོག་དང་ཆ་ལུགས་མ་ངེས་པ། སྤྲུལ་པ་སྣ་ཚོགས་ཀྱི་རོལ་གར་བསྒྱུར་བའོ། །དེར་བདག་གིས མཁའ་འགྲོ་མ་རྣམས་ལ་གུས་པས་ཕྱག་འཚལ་ཏེ་ཐལ་མོ་སྦྱར་ནས་འདི་སྐད་ཅེས་ཞུས་སོ། །ཀྱེེ། སྔོན་ནས་ལས་འབྲེལ་ལྷག་པའི་ལྷ། །མཁའ་འགྲོའི་གཙོ་ལ་གུས་ཕྱག་འཚལ། བདག་རྒྱུད་བྱིན་གྱིས་བརླབ་ཏུ་གསོལ །ཡེ་ཤེས་མཁའ་འགྲོ་སྒྲུབ་ཐབས་ཀྱི །བསྐྱེད་རྫོགས་ཟབ་མོ་བསྟན་དུ་གསོལ །ཞེས་ཞུས་པའི་ལན་དུ། མཁའ་འགྲོའི་གཙོ་མོ་གསུམ་གྱིས་དགོངས་པ་གཅིག་དང་དབྱངས་གཅིག་གིས་འདི་སྐད་ཅེས་གསུངས་སོ། །ཀྱེ་ཧོ་སྐལ་ལྡན་རིགས་ཀྱི་བུ། །དེང་སང་འཇིག་རྟེན་བོད་ཡུལ་ན། །གཏེར་སྟོན་སྐད་པ་མང་ལགས་ཏེ།། ྋ མཐོ་ལ་རློམས་ཤིག་གཡོ་དང་སྒྱུས། །བསམ་སྤྱོད་བརྩམ་ཆོས་མང་ལ་ལྟོས། །འགྲོ་དོན་འབྱུང་བ་ཕར་ཞོག་དང་། །རང་མགོ་རང་གིས་བསྐོར་ལ་ལྟོས། །ལ་ལ་ལོག་པ་བདུད་ཀྱིས་བརླབ། །ལ་ལ་སེམས་འཛིན་ཉམས་ཀྱིས་བསླུ། །ལ་ལ་མཐོ་རློམ་ཆོ་ལེ་འདོམས། །གཏེར་ཆོས་ཕབ་པའི་དགོས་པ་མེད། །མཐའ་མི་དབུས་སུ་རྡིབ་པ་ཡིས། །ལོག་པའི་ཆོས་ཀྱི་སྤྲིན་དཔུང་གིས། །དམ་ཆོས་ཉི་ཞལ་བསྒྲིབ་ལ་ལྟོས། །ངལ་བ་དོན་མེད་སྤྱོད་པ་སྤོངས། །ཁྱོད་ཀྱང་གདུལ་བྱའི་ལྷག་སྡུད་ལས། །བསྟན་པ་ཡུན་དུ་གནས་པ་ལ། །བློ་ཐག་རིང་དུ་མ་བསྐྱེད་ཅིག །སྤྲེལ་དམར་ཐལ་མོ་རྡེབ་པ་ལས། །རཀྟ་དམར་པོའི་ཆར་པ་འབེབས། །མེ་ཁྱུང་གཤོག་པ་གཡབ་པ་ལས། །སྔོན་མོ་ལྕགས་ཀྱི་ཡོ་ལངས་གཡོ། །གསེར་ཁྱི་སེར་པོའི་ངར་སྐད་ཀྱིས། །ས་འོག་དབྱར་རྒྱུ་འདར་བ་དང་། །གསེར་ཕག་ས་སློག་བྱེད་པ་ལས། །དུག་སྦྲུལ་ནག་པོ་མལ་ནས་སློང་། །ཞེས་སོགས་མང་དུ་གསུངས་པའི་མཐར། །མཁའ་འགྲོ་འདུས་པ་གྲི་གུག་འབར་བའི་རྒྱུད་དང་བདུད་གཅོད་ཟང་ཐལ་སྒོ་འབྱེད་རྣམས་གསུངས་ནས། བུ་ཁྱོད་ལ་ལས་ལྡན་གྱི་སློབ་བུ་མཆོག་བཅུ་དྲུག །ཕྲན་བརྒྱ་ཕྲག་དང་། ཐར་པའི་ས་བོན་ཐེབས་པ་སྟོང་