Tibetan
ལས་འདའ་བ་མེད་པ་ནི་བསྡུས་པ དང་། གནས་ལུགས་མངོན་དུ་གྱུར་ཚེ་མ་དག་སྣོད་བཅུད་ཀྱི་སྣང་ཞེན་ཐམས་ཅད་དག་པ་ཆོས་ཉིད་ཀྱི་འཁོར་ལོར་ཡེ་ནས་གཉིས་སུ་མེད་པར་རོ་གཅིག་ཏུ་གྱུར་པ་ནི་རྟོགས་པ་སྟེ། བརྟན་བསྡུས་རྟོགས་གསུམ་གྱི་ངོ་བོར་ཡེ་ནས་བཞུགས་པས་ན་རྡོ་རྗེ། གཞི་སྣང་ལྷུན་གྲུབ་ཀྱི་འཁོར་ལོ་ཤར་བའི་ཚེ་ན། མ་སྨིན་པའི་རིག་པ་ལྷན་སྐྱེས་ཀྱི་མ་རིག་པས་བསླད་ནས་རྒྱུ་གསུམ་རྐྱེན་བཞིའི་དབང་གིས། ཕྱི་འབྱུང་བ་ལྔ། ནང་ཕུང་པོ་ལྔ། གསང་བ་སེམས་དང་སེམས་བྱུང་གི་རྣམ་པར་ལམ་གྱིས་བྱུང་ནས གཉུག་མ་མི་འགྱུར་བའི་རྡོ་རྗེ་གསུམ་ལུས་ངག་ཡིད་གསུམ་དུ་བསྒྲིབ་པའི་ཚེ་ན། རྩ་རླུང་ཐིག་ལེའི་ཁམས་ཐམས་ཅད་ཀྱང་གདོད་ནས་སྐུ་གསུམ་གྱི་རང་བཞིན་དུ་བཞུགས་པའི་ལྷ་ཚོགས་རྣམས་ཀྱང་། ཏིལ་གྱི་གོང་བུ་རྒྱས་པ་ལྟ་བུར་རྡོ་རྗེ་ཕུང་པོའི་ལུས་ལ་བརྟེན་ནས་གནས་པ་ཡིན་ཏེ། དེའི་ཕྱིར་མང་དུ་བསགས་པའམ་ཚོགས་པ་ལ་གྲོང་ཁྱེར་གྱི་སྒྲར་བརྗོད་པ་ཡིན། དེ་ཡང་སྒྱུ་ཡེ་ཤེས་ལྔ་ལ། འཕྲུལ་སྐུ་ལྔ་ཞིང་ལྔ་སོགས་སུ་རྣམ་པར་འཕྲུལ པའི་བཀོད་པ་ཐམས་ཅད་ཀྱང་མ་བཙལ་འབད་མེད་དུ་གཞི་རང་གི་རོལ་པར་རང་བྱུང་དུ་ཤར་བ་ཡིན་ཏེ། དེ་ཡང་གཞི་དུས་སུ་སྙིང་གར་ཞི་བ་བཞི་བཅུ་རྩ་གཉིས་དང་། ཞི་བའི་གདངས་ལས དུང་ཁང་དུ་ཁྲག་འཐུང་ཁྲོ་བོ་ལྔ་བཅུ་རྩ་བརྒྱད་ཀྱི་རྣམ་པར་བཞུགས་ཤིང་། གཞན་ཡང་ཕུང་ཁམས་གཤེགས་པ་གཤེགས་མ། དབང་ཡུལ་སེམས་དཔའ་སེམས་མ ཡན་ལག་སྒོ་སྐྱོང་ཕོ མོ་སོགས་གདན་གསུམ་ཚང་བ་ལྷའི་འཁོར་ལོ་རྡོ་རྗེ་དབྱིངས་ཀྱི་ལྷ་ཚོགས་ཐམས་ཅད་མ་བཙལ་ལྷུན་གྲུབ་ཏུ་གནས་ཤིང་རྫོགས་པ་ལ། ངེས་ཤེས་ཁྱད་པར་ཅན་འཁྲུངས་ནས་ལྷ་དང་རང་སྣང་དབྱེར་མེད་དུ་མཐོང་བར་སྒོ་གསུམ་མི་ཕྱེད་གཅིག་ཏུ་འདུམ་པའི་དད་པའི་སྒོ་ནས་གུས་པ་ཆེན་པོས་སྤང་བླང་ཞེན་འཛིན་དང་བྲལ་བར་གཉིས་མེད་རིག་པའི་ཆོ་འཕྲུལ་ཙམ་དུ་ཕྱག་འཚལ་བའོ།། ཨགྒིཎྡསྨྀ་རྒྱནྡ་རྒྱརྒྱ་རྒྱ༔ བརྡ་ཡིག་འདི་རྣམས་ནི་ཆོས་འདི་འབྱུང་བའི་ཁུངས་ཡིན་ནོ །གསུམ་པ་བརྩམ་པར་དམ་བཅའ་བ་ནི བདག་འདྲ་རིག་འཛིན་སོགས འདི་བསྟན་བྱ༔ ཞེས་པས་བསྟན་ཏེ། དེ་ལ་འདིར་དུས་གསུམ་གྱི་རྒྱལ་བ་ཐམས་ཅད་ཀྱི་ཕྲིན་ལས་གཅིག་ཏུ་བསྡུས་པའི་བདག་ཉིད་ཆེན་པོ་དོན་གཉིས་ཀྱི་མཛད་པ་མཐར་ཕྱིན་ནས། རང་དོན་དུ་ཆོས་ཀྱི་སྐུ་ ༄༅། །བརྙེས་ཟིན་ཀྱང་། གདུལ་བྱའི་ལས་སྨོན་གྱི་དབང་གིས་གང་འདུལ་གྱི་སྤྲུལ་པའི་སྐུར་བཞེངས་པ་བདག་འདྲ་ལྷུན་གྱིས་གྲུབ་པའི་རིག་འཛིན་གྱི་རྣམ་པར་གནས་ཤིང་། རྡོ་རྗེ་ལྟ་བུའི་སྐུ་སྐྱེ་འཆི་བསྒྲེས་རྒུད་དང་བྲལ་བ འཇའ་ལུས་སྒྱུ་མའི་སྐུར་སྣང་བ་པད་འབྱུང་གཤོག་རྒོད་རྩལ་ངས་སམ་བདག་གིས། ཚེ་རབས་མང་པོའི་སྔོན་རོལ་ནས་ཚོགས གཉིས་ཀྱི་འཇུག་སྒོ་རྣམ་པར་དག་པའི་མཐུ་ཚད་མེད་པ་དང་ལྡན་ཞིང་། སྨོན་ལམ་བཟང་པོས་ཉིང་མཚམས་སྦྱར་ནས། རང་བཞིན་རྫོགས་པ་ཆེན་པོའི་ཆོས་དང་བླ་མར་འཕྲད་ཅིང་། ཐེག་མཆོག་སྙིང་པོའི་དོན་ལ་འབྲེལ་བ་བཞག་པའི་ལས་འཕྲོ་རྣམས་ད་ལྟ་དུས་འཛོམ་པའི་སྐལ་བ་བཟང་པོའི་སྐྱེས་བུ་དད་པ་དང་ལྡན་ཞིང་དམ་ཚིག་གཙང་བ་ཁོ་ནའི་ཟ་ཐང་ངམ་སྐལ་བ་རུ། ཐེག་པ་གཞན་གྱིས་འགྲན་ཟླ་དང་བྲལ་བའི་མྱུར་ལམ མ་དག་སྣོད་བཅུད་སྙིགས་མའི་སྣང་ཞེན་ཐམས་ཅད་འཕོ་ཆེན་དྭངས་མའི་དབྱིངས་སུ་བཙན་ཐབས་ཉིད་དུ་བཤིག་པར་བྱེད་པའི་གདམས་པ་ཟབ་མོ་འདི་བསྟན་པར་བྱའོ་ཞེས་ཁུར་དུ་བཞེས་པ་ཡིན་ནོ། །གཉིས་པ་བར་དུ་དགེ་བ་གཞུང་གི་དོན་ལའང་། སྔོན་འགྲོ་དང་། དངོས་གཞི། རྗེས་དང་གསུམ་ལས། དང་པོ་ཁྲེགས་ཆོད་ཀྱི་ལྟ་བས་གཞི་བཟུང་བ། ཐུན་མོང་གི་སྔོན་འགྲོ་སྤྱིར་བསྟན་པ། ཐུན་མོང་མ་ཡིན་པའི་སྔོན་འགྲོ་བྱེ་བྲག་ཏུ་བཤད་པའོ། །དང་པོ་ཁྲེགས་ཆོད་ཀྱི་ལྟ་བས་གཞི་བཟུང་བ་ནི། སྒོ་འདི་ཉམས་སུ་སོགས། བརྟན་ཐོབ་མཐར༔ ཞེས་པས་བསྟན་ཏེ། དེ་ལྟ་བུའི་འོད་གསལ་ཐོད་རྒལ་གྱི་སྒོ་ཟབ་མོ་འདི་ཉིད་ཉམས་སུ་ལེན་པར་འདོད་པའི་སྐྱེས་བུ་ལས་སྨོན་དང་ལྡན་པ་དག་གིས། དང་པོ་སྣང་སྲིད་འཁོར་འདས་ཀྱིས་བསྡུས་པའི་ཆོས་ཐམས་ཅད་བདག་མེད་པ་ལ་བདག་གི་གདགས་གཞི། དངོས་པོ་མེད་པ་ལ་དངོས་པོའི་སྣང་གཞི འཁོར་འདས་སུ་རང་རྒྱུད་པར་མེད་པ་ལ་རང་རྒྱུད་བདེན་གྲུབ་ཏུ་བལྟ་བའི་གཞི་འཛིན་པ་གང་ཟག་གི་བདག་དང་། དེ་ལས་མཆེད་པ་གཟུང་བ་ཆོས་ཀྱི་བདག་གཉིས་ཀྱི་རང་བཞིན་ཡེ་ནས་བདེན་པར་མ་གྲུབ་ཅིང་སྐྱེ་འགགས་གནས་གསུམ་དང་བྲལ་བའི་སྟོང་ཉིད་དབུ་མ་ཆེན་པོའི་བདག་ཉིད་དུ་གཏན་ལ་ཕབ་ནས། འཁོར་འདས་མཉམ་ཉིད་ཆོས་སྐུའི་ངང་དུ་འུབ་ཏུ་འདུས་ཤིང་ཡོངས་སུ་ཆུབ་པའི་གནས་ལུགས་ཇི་བཞིན་པར་རྟོགས་ཤིང་། སྣང་སྲིད་སྣོད་བཅུད་འཁོར་འདས་ཀྱི་ཆོས་སོ་ཅོག་ཐམས་ཅད་རིག་པའི་རོལ་པ་ལས་མ་འདས་ཤིང་། རིག་སྟོང་ཁྱབ་བརྡལ་ཆེན་པོར་ངེས་ནས་གཉིས ༄༅། །མེད་མཉམ་པ་ཉིད་དུ་རྫོགས་པའི་དོན་ལ་མངའ་དབང་བསྒྱུར་བས་ལྟ་བའི་དོན་གཤིས་ཐོག་ཏུ་ཕེབས་པ་དང་། ཇི་ལྟ་བ་མཁྱེན་པའི་ཡེ་ཤེས་ཀྱི་གཞི་ལ་དབང བསྒྱུར་བས་དག་པ་གཞིའི་བཞུགས་ཚུལ་དང་། ཇི་སྙེད་པ་གཟིགས་པའི་ཡེ་ཤེས་ཀྱི་ལམ་ལ་དབང་བསྒྱུར་ཏེ ལམ་གྱི་བཞག་ཐབས་དང་ས་ལམ་གྱི་རིམ་པ་རྣམས་གཅིག་ཅར་དུ་རྟོགས་པའི་ཤེས་རབ་ཆེན་པོ་དེ་ཡི་སྟོབས་ཀྱིས་གནས་ལུགས་རྫོགས་པ་ཆེན་པོའི་ཡིན་ལུགས་ཇི་ལྟ་བ་བཞིན་དུ་ཡེ་བབ་སོར་བཞག་གི་ཏིང་ངེ་འཛིན་གྱིས་མངོན་དུ་བྱེད་ཅིང་ངང་ལས་གཡོ་བ་མེད་པའི་བརྟན་པ་ཐོབ་པའི་མཐར། ཤིན་ཏུ་མྱུར་ལམ་ཐོད་རྒལ་གྱི་གདམས་པ་འདི་ཉིད་ཉམས་སུ་བླངས་ན་གེགས་དང་གོལ་ས་ཐམས་ཅད་ཤུགས་ལ་ཆོད་དེ་ལམ་མཐར་ཕྱིན་པའི་མན་ངག་ཟབ་མོ་ཡིན་ནོ།། གཉིས་པ་ཐུན་མོང་གི་སྔོན་འགྲོ་ལའང་། སྤྱི་དང་བྱེ་བྲག་གཉིས་ལས དང་པོ་སྤྱིར་བསྟན་པ་བློ་ལྡོག་རྣམ་པ་བཞི་སྟེ དེ་ལ་འདིར་དལ་འབྱོར་རྙེད་པར་དཀའ་བ་ལ་བསམ་ནས་ཚེ་འདིའི་བྱ་བ་དགྲ་འདུལ་གཉེན་སྐྱོང་ཆགས་སྡང་ལ་སོགས་པ་ཐམས་ཅད་སྤང་ཞིང་། སྒོ་གསུམ་གྱི་བྱ་བ་དམ་པའི་ཆོས་ཁོ་ནར་བློ་ཕུག་གཏད་ནས་ཆོས་མིན་གྱི་བྱ་བ་རྒྱང་ནས་སྤང་བ་དང་། འདུས་ བྱས་ཀྱི་ཆོས་ཐམས་ཅད་མི་རྟག་པའི་ངང་ཚུལ་ཤེས་བཞིན་དུ། ཆོས་བསྒྲུབ་བློ་ཙམ་དང་ཕྱི་བཤོལ་དུ་མི་འཇོག་པར། དཔེར་ན་སྒེག་མོའི་མགོ་ལ་མེ་ཤོར་བ་ལྟ་བུར་ལེ་ལོ་དང་གཡེང་བ་མེད་པར་དམ་པའི་ཆོས་ལ་བརྩོན་ཞིང་སྙིང་པོ་ལོན་པར་བྱེད་པ་གལ་ཆེའོ། །འཁོར་བ་མཐོ་དམན་གང་དུ་སྐྱེས་ཀྱང་སྡུག་བསྔལ་གྱི་རང་བཞིན་ལས་མ་འདས་ཤིང་། བྱ་བ་དང་བྱེད་པ་ཐམས་ཅད འཁོར་བའི་གཞི་མ། སྡུག་བསྔལ་གྱི་ས་བོན དཔེར་ན་མི་གཙང་བའི་འདམ་གྱི་ཁྲོད་ན་དྲི་ཞིམ་མེད་པ་ལྟ་བུ འཁོར་བའི་གནས་སུ་བདེ་བའི་གོ་སྐབས་སྐད་ཅིག་ཀྱང་མེད་པའི་དོན་ཤེས་བཞིན་དུ། ད་རེས་དལ་འབྱོར་གྱི་ལུས་རྟེན་བཟང་པོ་འདི་ལ་བརྟེན་ནས་རྣམ་མཁྱེན་རྒྱལ་བའི་གོ་འཕང་དོན་དུ་གཉེར་བ་ལ་འབད་པར་བྱའོ། །ལས་འབྲས་ལ་ཡིད་ཆེས་རྙེད་ནས་བླང་དོར་གྱི གནད་མ་ནོར་བར་ལས་འབྲས་ཕྲ་ཞིང་ཞིབ་པར་མ་བསྲུང་ན། རང་བྱས་ལས་ཀྱི་རྣམ་སྨིན་བསླུ་བ་མེད་པར་རང་ཐོག་ཏུ་མྱོང་དགོས་པའི་རྒྱུ་མཚན་ལ་བསམ་ཞིང་། ལྟ་བ་མཐོ་སྐད་དང་ཐོས་རྒྱ་ཆེ་བར་རློམས་ནས་ལས་འབྲས་ཁྱད་དུ་མི་བསད་པར། དགེ་སྡིག་བླང་དོར་གྱི་གནས་ལ་མ་རྨོངས་པར་ཚུལ་བཞིན་ཤེས་པར་བྱས་ཏེ། གནས་ངན་འཁོར་བའི་རྒྱ་མཚོ་ལས་བརྒལ་བའི ༄༅། །ཕྱིར་དུ། དཔལ་ལྡན་བླ་མ་དམ་པའི་ཞབས་སུ་བཏུད་དེ། གཏན་གྱི་བདེ་བ་རྣམ་མཁྱེན་རྒྱལ་བའི་གོ་འཕང་རིན་པོ་ཆེ་འདི་ཉིད་ཚེ་ལུས་གཅིག་གིས་ཐོབ་པའི་ཕྱིར་དུ་མི་ཚེ་ཆོས་ལ་དྲིལ་ནས་བློ་གཏད་བླ་མ་དང་དཀོན་མཆོག་གསུམ་ལ་བཅའ། སྒྲུབ་གནས་དབེན་ཁྲོད་ལ་བྱེད གྲོགས་རིག་པའི་ཡེ་ཤེས་དང་འགྲོགས གོས་ལྷག་སྐྱོབ་ཙམ་དང་། ཟས་སྲོག་འཚོ་ཙམ་ལ་བརྟེན་ནས་ཆོས་བརྒྱད་ཀྱི་འདུ་སྒོ་རྒྱང་ནས་སྤངས་ཏེ་སྒྲུབ་པ་ལྷུར་ལེན་གྱི་གོ་ཆ་མི་དམན་པར་བྱ་བ་ནི་གནད་གལ་པོ་ཆེ་ཡིན་ནོ། །བྱེ་བྲག་ཐུན་མིན་ནང་གི་སྔོན་འགྲོ་ལ འཁོར་འདས་རུ་ཤན་དབྱེ་དགོས་ཏེ། ཐལ་འགྱུར་ལས། འཁོར་འདས་རུ་ཤན་མ་ཕྱེ་ན། །ཁམས་གསུམ་ལུས་ངག་ཡིད་ཀྱི་ཡང་།།འབྲེལ་བ་ཆོད་པར་མི་འགྱུར་བས།།འཁོར་འདས་རུ་ཤན་དབྱེ་བར་བྱ། །ཞེས་གསུངས་པས། དེས་ན་སེམས་ཅན་རྣམས་ཀྱི་ལུས་ངག་ཡིད་གསུམ་གྱི་ཆོས་ཉིད་ཡེ་ནས་རང་བཞིན་རྣམ་པར་དག་ཀྱང་། གནས་སྐབས་འཁྲུལ་པ་སྣང་ཞེན་གྱིས་བསྒྲིབས་པས་ཐོག་མ་མེད་པ་ནས་ད་ལྟ་ཡན་ཆད་དུ་རིགས་དྲུག་གི་གནས་རྣམས་སུ་བར་མེད་དུ་འཁོར་ཞིང་སྡུག་བསྔལ་མྱོང་བས་ན། ད་རེས་སྒོ་གསུམ་འཁོར་འདས་རུ་ཤན་དབྱེ་བར་བྱས་ཏེ ཕྱིན་ཆད་འཁོར་བར་སྐྱེ་བའི་གཞི་རྩ་ཆོད་པ་ཞིག་བྱ་དགོས་པའི་ཕྱིར་དུ་རུ་ཤན་དབྱེ་དགོས་པས། དང་པོ་རུ་ཤན་དབྱེ་བ་ལའང་། གནས་ཀྱི་ཁྱད་པར་དང་། ཕྱི་ནང་གསང་གསུམ་གྱི་རུ་ཤན དབྱེ་བ་བསྟན་པ་གཉིས་ལས། དང་པོ་གནས་ཀྱི་ཁྱད་པར་ནི སྒོ་གསུམ་མངོན་ཞེན་སོགས། གུ་ཧྱ༔ ཞེས་པའི་བར་གྱིས་བསྟན་ཏེ། དེ་ལ་འདིར་མ་དག་པའི་སྒོ་གསུམ་གྱི་མངོན་པར་ཞེན་པ་བཟློག་པའི་ཕྱིར་དུ། གནས་དབེན་པའི་སར་བསམ་གཏན་གྱི་ཚེར་མ་མེད་པ། ཉིན་མོ་མི་ཡི་རྒྱུ་འགྲུལ་དང་མཐོང་ཚོར་མེད་པ། མཚན་མོ་དགྲས་གླགས་ཅོར་མེད་པའི་ས་རུ་ཕྱིན་ཏེ གཏོར་མ་ཆ་གསུམ་དུ་བྱས་ནས་སྦྱངས་སྤེལ་བསྒྱུར་གསུམ་གྱི་སྔགས་དང་ཕྱག་རྒྱ་ཏིང་ངེ་འཛིན་གྱིས་མི་ཟད་པའི་གཏེར་དུ་བྱིན་གྱིས་བརླབས་ཏེ། དཔལ་མགོན་བདུན་ཅུ་རྩ་ལྔ་ལ་སོགས་པའི་དཀར་ཕྱོགས་སྐྱོང་བ་རྣམས་དང་ལྷ་སྲིན་སྡེ་བརྒྱད་ཡུལ་ལྷ་གཞི་བདག་ཟོ་དོར་དྲེགས་པ་ཅན་རྣམས་དཀོན་མཆོག་གསུམ་གྱི་བདེན་པའི་སྟོབས་ཀྱིས། ལྷ་སྔགས་དང་ཕྱག་རྒྱ་ཏིང་ངེ་འཛིན་གྱིས་བཀུག་ནས། གསེར་སྐྱེམས་གཡུ་སྐྱེམས་དང་གཏོར་མ་རྣམས་འདོད་རྒུའི་དཔལ་ཡོན་ཕུན་སུམ་ཚོགས་པ་འབྱུང་བའི་བདག་ཉིད་ཅན་དུ་བསྒྱུར་ཏེ་ཕུལ་ཞིང་། གསང་སྤྱོད་ཟབ་མོའི་ལམ་ ༄༅། །ལ་བར་དུ་གཅོད་པའི་འགལ་རྐྱེན་བཟློག་ཅིང་མཐུན་རྐྱེན་ལེགས་ཚོགས་ཐམས་ཅད་སྒྲུབ་པ་དང་། ས་དང་ལམ་གྱི་རྐྱེན་ངན་བར་ཆད་ཐམས་ཅད་སེལ་བའི་སྡོང་གྲོགས་སུ་བསྐུལ་བས་ཁས་བླངས་པར་བསམ་པ་དང་། གླུད་དང་ལན་ཆགས་འབྲས་ཆན་ཐམས་ཅད་སྦྱངས་བསྒྱུར་སྤེལ་གསུམ་གྱི་སྔགས་དང་ཕྱག་རྒྱ་ཏིང་ངེ་འཛིན་གྱིས་བརླབས་ཤིང་མི་ཟད་པའི་གཏེར་དུ་བསྒྱུར་ཏེ བདག་ཉིད་པདྨ་ཧེ་རུ་ཀའི་ང་རྒྱལ་དང་ལྡན་པའི་ངང་ནས་སྦྱིན་ཡུལ་ཐམས་ཅད་མདུན་དུ་བཀུག་ཅིང་གཏོར་མ་བཏང་ནས་ཚིམས་པར་བྱས་ཏེ། གནས་སྐབས་སུ་གསང་སྤྱོད་ཟབ་མོ་བསྒྲུབ་པ་ལ་བར་དུ་གཅོད་པར་བྱེད་པའི་བགེགས་དང་ལོག་འདྲེན་བར་ཆད་བྱེད་པ་ཐམས་ཅད་བསྐྲད་ཅིང་རང་གནས་སུ་སོང་བར་བསམ་པ་དང་། གང་དག་གདུག་ཅིང་སྡང་བའི་སེམས་དང་ལྡན་པ་ཐམས་ཅད་ཡེ་ཤེས་སྒྱུ་འཕྲུལ་གྱི་རྩལ་སྣང་ཁྲོ་ཚོགས་ཐུན་མཚོན་མེ་དཔུང་འབར་བས། མཐའི་རྒྱ་མཚོ་ཆེན་པོའི་ཕ་རོལ་གླིང་བར་མུན་པའི་སྨག་རུམ་རི་རབ་ཀྱི་ཟོམ་དུ་བསྐྲད་ཅིང་རྨོངས་པར་བྱས་ཏེ་ཕྱིར་མི་ལྡོག་པར་བསམ་པ་དང་མཚམས་གཅོད་ཀྱི་མེ་རི་མ་གཏོགས་ཁྲོ་ཚོགས་ཐུན་མཚོན་རྣམས་ཚུར་འདུས་པ་ལས། ཡེ་ཤེས་ལྔའི་རང་གདངས་ འཁོར་ལོ། རྡོ་རྗེ། རིན་ཆེན། པདྨ། རྒྱ་གྲམ་ལ་སོགས་སྲུང་བའི་འཁོར་ལོ་རིམ་པ་ལྔ་རུ་བསྐྱེད་པའི་ནང་དུ་ཚུད་པས། བགེགས་དང་ལོག་པར་འདྲེན་པའི་ཚོགས་ཐམས་ཅད་ཉེ་མི་ནུས་པར་བསམ་པའོ། །དེ་དག་གིས་གནས་ཀྱི་ཁྱད་པར་བསྟན་པ་སྟེ། སྔོན་དུ་འགྲོ་བའི་རིམ་པའི་ལེའུ་སྟེ་དང་པོའོ། །ས་མ་ཡ་དམ་ཚིག་གི་རྒྱ གུ་ཧྱ་ནི་སྐལ་མེད་ལོག་ལྟ་ཅན་ལ་གསང་རྒྱས བཏབ་པའི་དོན་ནོ།། །།གཉིས་པ་ཕྱི་ནང་གསང་གསུམ་གྱི་རུ་ཤན་དབྱེ་བ་བསྟན་པ་ནི། དེ་ནས་འཁོར་འདས་སོགས། དབྱེ་བ་ལ༔ ཞེས་པས་བསྟན་ཏེ། དེ་ནས་འཁོར་འདས་རུ་ཤན་འབྱེད་པར་བྱེད་པ་དེ་ལ། ཕྱིའི་རུ་ཤན་རིགས་དྲུག་གི་སྤྱོད་པའི་རྣམ་འགྱུར་དང་། ནང་གི་རུ་ཤན་གནས་དྲུག་གི་ས་བོན་བསྲེགས་སྦྱངས་བྱེད་པ་དང་། གསང་བའི་རུ་ཤན་ལུས་རྡོ་རྗེར་བསྒོམ་པར་བྱེད་པ་དང་རྣམ་པ་གསུམ་ལས དང་པོ་ཕྱི་ལྟར་རུ་ཤན་དབྱེ་བར་བྱེད་པ་དེ་ལའང་། ཀུན་སློང་གི་ཁྱད་པར་དང་ཇི་ལྟར་བྱ་བའི་ཚུལ་དངོས་དང་། ཇི་ཙམ་སྦྱང་བའི་ཚད་དང་། དེ་ལྟར་བྱས་པའི་ཕན་ཡོན་དང་བཞི་ལས། དང་པོ་ཀུན་སློང་གི་ཁྱད་པར་བསྟན་པ་ནི། བླ་མ་སྤྱི་བོར་བསྒོམས་ཤིང་སོགས། སེམས་མཆོག་བསྐྱེད༔ ཅེས་པས་བསྟན་ཏེ། འདི་ལྟར་ ༄༅། །འཁོར་བ་ན་གནས་པའི་སེམས་ཅན་རྣམས་ཀྱི་མ་རིག་པའི་སྒྲིབ་པ་དབྱིངས་སུ་སངས་ཏེ། གཟུང་འཛིན་འཁྲུལ་པའི་འཕྱང་བ་ཐད་ཀར་ཞིག་ནས་རང་གནས་ཡེ་ཤེས་ཆེན་པོ་མངོན་དུ་གྱུར་ཅིང་། ཆོས་ཅན་གྱི་སྣང་བ་ཆོས་ཉིད་ཀྱི་ཀློང་དུ་ཟད་ནས་སྐུ་གསུམ་མཉམ་བརྡལ་གྱི་དབྱིངས་ཆེན་པོར་འབྱམས་ཀླས་པར་བྱའོ་སྙམ་དུ། དོན་དམ་བྱང་ཆུབ་ཀྱི་སེམས་རིན་པོ་ཆེས་རང་རྒྱུད་ཆོས་ལ་བསྐུལ་ནས། ཟབ་མོའི་ལམ་གྱི་གཙོ་བོར་གྱུར་པ་བླ་མའི་རྣལ་འབྱོར་བསྒོམ་པ་ལ་འབད་དགོས་པ་གལ་ཆེ་སྟེ།དགྱེས་པ་རྡོ་རྗེ་ལས།གཞན་གྱིས་བརྗོད་མིན་ལྷན་ཅིག་སྐྱེས། །གང་དུ་ཡང་ནི་མི་རྙེད་དེ། །བླ་མས་དུས་ཐབས་བསྟན་པ་དང་། །བདག་གི་བསོད་ནམས་ལས་ཤེས་བྱ།།ཞེས་དང་།དམ་ཚིག་བཀོད་པ་ལས། མཚན་དང་དཔེ་བྱད་ལྡན་པའི་ལྷ། །བསྐལ་པ་འབུམ་དུ་བསྒོམས་པ་བས། །བླ་མ་དྲན་པ་འབུམ་ཆར་མིན །བསྙེན་སྒྲུབ་བཟླས་པ་ས་ཡ་བས། །བླ་མའི་གསོལ་འདེབས་ལན་གཅིག་མཆོག །ཅེས་གསུངས་པའི་ཕྱིར་ན། རང་ལ་བཀའ་དྲིན་གསུམ་ལྡན་གྱི་སྒོ་ནས་རྗེས་སུ་འཛིན་ཅིང་། སྨིན་གྲོལ་རིམ་གཉིས་ཀྱི་མྱུར་ལམ་ཟབ་མོ་སྟོན་པར་བྱེད་པའི་བླ་མ་དམ་པ་དེ་ཉིད་ནི་མཆོག་གསུམ་རྩ་ གསུམ་ཀུན་འདུས་ཀྱི་ངོ་བོ་ཡིན་པ་དང་། གསང་སྔགས་ཟབ་མོའི་ལམ་གྱི་ཡེ་ཤེས་དང་ཡོན་ཏན་ལ་སོགས་པ་ཅི་སྐྱེ་བ་ཐམས་ཅད་བླ་མ་ཚུལ་བཞིན་བསྟེན་པ་ལ་རག་ལས་ཤིང་རིམ་པ་གཉིས་ཀྱི་དངོས་གྲུབ་ཐམས་ཅད་ཀྱང་བླ་མ་དག་ལ་བརྟེན་ནས་འབྱུང་བ་ཡིན་པས་ན། ཨ་ཏི་བཀོད་པ་ཆེན་པོ་ལས། གང་གིས་བླ་མ་རྡོ་རྗེ་འཆང་།།སྙིང་གི་དཀྱིལ་དང་སྤྱི་བོའི་གཙུག །ཡན་ལག་མཐིལ་སོགས་གང་བསྒོམས་པ། །སངས་རྒྱས་སྟོང་གི་ཡོན་ཏན་དེ། །གང་ཟག་དེ་ཡིས་འཛིན་པར་འགྱུར།།ཞེས་གསུངས་སོ། དེའི་ན་གསོལ་བ་འདེབས་པའི་རྟེན་དུ་བླ་མ་བསྒོམ་པར་བྱེད་པ་ལ། རང་གནས་ཀྱི་ཡུལ་དག་པ་མཁའ་སྤྱོད་ཀྱི་ཞིང་ཁམས་རྒྱ་ཆེ་ལ་ཁྱོན་ཡངས་པ་རྣམ་པར་དག་པའི་བཀོད་པ་ཕུན་སུམ་ཚོགས་པར་གསལ་གདབ། རང་གི་སྤྱི་བོའི་གཙུག་གི་མདུན་གྱི་ནམ་མཁར་ཡེ་ཤེས་ལྔའི་རང་མདངས་འཇའ་དང་འོད་ཕུང་ཐིག་ལེའི་དབུས་སུ་རང་གི་རྩ་བའི་བླ་མ་དེ་ཉིད་ཀྱི་སྐུ་མདོག་ཕྱག་མཚན་སོགས་བླ་མའི་རྣམ་པ་རང་རང་གི་གཞུང་བཞིན་བསྒོམས་ནས། ཐ་མལ་ཀུན་རྟོག་གི་བློ་ངན་སྤངས་ཤིང་། སྐུ་མཚན་དང་དཔེ་བྱད་བཟང་པོས་སྤྲས་པ། འོད་དང་འོད་ཟེར་འཕྲོ་བའི་ཀློང་ན་ལྷམ་མེར་བཞུགས་པ། གསུང་དབྱངས་ཡན་ལག་དྲུག ༄༅། །ཅུའི་ཆོས་ཀྱི་སྒྲ་བསམ་གྱིས་མི་ཁྱབ་པ་སྒྲོགས་པ། ཐུགས་ཏིང་ངེ་འཛིན་གྱི་སྒོ་བརྒྱ་ཕྲག་དུ་མ་ལ་མཉམ་པར་བཞག་པ། དེ་ལྟ་བུའི་རྒྱལ་བ་ཀུན་གྱི་སྤྱི་གཟུགས མཁྱེན་བརྩེ་ནུས་པའི་བདག་ཉིད་ཅན་དུ་གསལ་གདབ་སྟེ། བླ་མའི་ཡོན་ཏན་དང་བཀའ་དྲིན་དྲན་པའི་ངང་ནས་མོས་གུས་གདུང་ཤུགས་དྲག་པོ་བསྐྱེད་པ་དང་ཆབ་གཅིག་ཏུ། ལུས་གུས་པའི སྒོ་ནས་ཕྱག་འཚལ། ངག་གུས་པའི་སྒོ་ནས་གསོལ་འདེབས་ལ་འབུངས་ཤིང་། ཡིད་གུས་པའི་སྒོ་ནས་ཐུགས་ཡིད་རོ་གཅིག་ཏུ་བསྲེས་ནས་དབང་བཞི་བླངས་ཏེ། བླ་མའི་ཐུགས་རྣམ་པར་མི་རྟོག་པའི་ཡེ་ཤེས་ཆེན་པོའི་བྱིན་རླབས་རྣམས་བདག་དང་མཁའ་ཁྱབ་ཀྱི་སེམས་ཅན་ཐམས་ཅད་ལ་ཕོག་པས། དབང་བཞི་ཡེ་ཤེས་ཀྱི་ཆུ་བོས་རྒྱུད་སྨིན་ཅིང་གྲོལ་བར་མཛད་དུ་གསོལ་སྙམ་དུ། བླ་མའི་གནས་གསུམ་ལས་འོད་ཟེར་དཀར་དམར་མཐིང་གསུམ་འཕྲོས་ནས། རང་གི་གནས་གསུམ་དུ་ཐིམ་པས་སྒོ་གསུམ་གྱི་ལས་ཉོན་སྡིག་སྒྲིབ་བག་ཆགས་དང་བཅས་པ་བྱང་སྟེ། དབང་དང་དངོས་གྲུབ་མ་ལུས་པ་ཐམས་ཅད་གཅིག་ཆར་དུ་ཐོབ་ཅིང་སྐུ་བཞི་ཡེ་ཤེས་ལྔ་མངོན་དུ་གྱུར་པར་བསམ་མོ། །སླར་ཡང་བླ་མ་ཉིད་འོད་ལྔའི་གོང་བུར་གྱུར་ནས། རང་གི་སྒོ་གསུམ་ བླ་མའི་སྐུ་གསུང་ཐུགས་རྡོ་རྗེ་གསུམ་དང་དབྱེར་མེད་མཉམ་པ་ཉིད་སྤྲོས་བྲལ་བདེ་བ་ཆེན་པོའི་ངང་དུ་ཅི་གནས་སུ་མཉམ་པར་བཞག་གོ། །དེས་བརྒྱུད་ལྡན་བླ་མ་དམ་པའི་དོན་རྒྱུད་ཀྱི་བྱིན རླབས་ཐམས་ཅད། རབ་བུམ་པ་གང་བྱོས་དང་། འབྲིང་བརྐོས་ཕོར་ནས་སཱཙྪ་ཐོན་པ་ལྟ་བུ་དང་། ཐ་ནའང་ཚོན་གྱིས་ཁ་དོག་བསྒྱུར་བ་ལྟར བླ་མའི་དགོངས་རྒྱུད་ཀྱི་བྱིན་རླབས་དངོས སུ་འབེབས་ཤིང་། ཉམས་དང་རྟོགས་པའི་ཡོན་ཏན་ཐམས་ཅད་འབད་པ་དང་རྩོལ་བ་མ་དགོས་པར། བརྒྱུད་ལྡན་བླ་མ་དམ་པར་གསོལ་འདེབས་དང་མོས་གུས་ཁོ་ནར་བརྟེན་ནས་རང་རྒྱུད་ལ་རྟོགས་པ་ཤུགས་ལ་འཆར་ཞིང་སྐྱེ་བ་དང་། ས་དང་ལམ་གྱི་གེགས་དང་གོལ་ས་ཐམས་ཅད་ཀྱང་ངང་གིས་གྲོལ་ཏེ། བདེ་བར་གཤེགས་པ་རྣམས་ཀྱིས་ཀྱང་བྱིན་གྱིས་བརླབས་ཤིང་། རིག་འཛིན་དང་མཁའ་འགྲོའི་ཚོགས་རྣམས་ཀྱིས་ལུང་བསྟན་ཅིང་དབུགས་དབྱུང་བ་སོགས་ཡོན་ཏན་ཁྱད་པར་ཅན་མང་པོ་འབྱུང་བའི་གཞིར་གྱུར་པས་ན།རྗེ་བཙུན་རིན་པོ་ཆེའི་ཞལ་ནས བླ་མ་ལ་གདུང་བ་སྐྱེས་ཙ་ན། །ཉམས་དང་བྱིན་རླབས་སྐྱེ་བར་ངེས །ཞེས་དང་། ཇི་སྐད་དུ། བླ་མ་རྟག་ཏུ་བསྟེན་པའི་མིས །མཁའ་འགྲོའི་གཟུགས་རྣམས་མཐོང་བ་དང་།དེ་ཡི་ ༄༅། །བྱིན་རླབས་འཇུག་པ་དང་། །དུས་གསུམ་ལུང་ཡང་སྟོན་པ་དང་། །སྐྱེ་ཤི་གཉིས་ལ་དབང་ཐོབ་འགྱུར། །ཞེས་གསུངས་སོ། །མདོར་ན་བླ་མ་དགེ་བའི་བཤེས གཉེན་ནི། འདས་པའི་སངས་རྒྱས་རྣམས་ཀྱི་གདུང་འཚོབ། མ་འོངས་རྒྱལ་བ་རྣམས་ཀྱི་འབྱུང་གནས ད་ལྟའི་སངས་རྒྱས་རྣམས་ཀྱི་ཕྲིན་ལས་གཅིག་ཏུ་འདུས་པའི་རང་གཟུགས རིགས་དང་དཀྱིལ་འཁོར་ཐམས་ཅད་ཀྱི་འབྱུང་གནས་དམ་པར་གྱུར་པས་ན་མདོ་ལས།དེ་བཞིན་གཤེགས་པ་ནི་སེམས་ཅན་རྣམས་ལ་ཡོངས་སུ་སྣང་བའང་མ་ཡིན་ལ།དགེ་བའི་བཤེས གཉེན་ནི་ཡོངས་སུ་སྣང་ཞིང་ཆོས་སྟོན་པས། དེ་བཞིན་གཤེགས་པ་ལས་དགེ་བའི་བཤེས་གཉེན་ལྷག་པར་ཟུངས་ཤིག།ཅེས་གསུངས་པས་ན། རིམ་གཉིས་ཀྱི་ལམ་སོགས་ཆོས་ཅི་དང་ཅི་ཉམས་སུ་བླང་ནའང་། ཐོག་མར་ལམ་ཐམས་ཅད་ཀྱི་གཞུང་ཤིང་ལྟ་བུ་བླ་མའི་རྣལ་འབྱོར་ཡིན་པས་