Tibetan
རྦབ་འདྲེ་ཀུན༔ རིམ་དགུ་ས་ཡི་འོག་ཏུ་མནན༔ མ་ཤོར་ཐེག་པ་རིམ་དགུའི་རྒྱ༔ ཨོཾ་ལཾ༔ ཨཱཿ ལཾ༔ ཧཱུྃ་ལཾ༔ སུཾ་ལཾ༔ སྟཾ་བྷ་ཡ་ནན༔ དེ་ནས་དངོས་གྲུབ་བླང་བ་ལ༔ ཧཱུྃ༔ འཇམ་དཔལ་སྨྲ་བའི་སེང་གེ་ཡི༔ སྐུ་གསུང་ཐུགས་ཡོན་ཕྲིན་ལས་ཀྱི༔ དབང་དང་དངོས་གྲུབ་ཅི་མཆིས་པ༔ མ་ལུས་བདག་ལ་ཐོབ་པར་སྩོལ༔ སརྦ་སིདྡྷི་ཕ་ལ་ཧཱུྃ༔ དེ་ནས་བཤགས་པ་བྱ་བ་ལ༔ འཇམ་དཔལ་ཡབ་ཡུམ་སྤྱན་སྔ་རུ༔ བདག་གི་ཚེ་རབས་སྡིག་ལྟུང་ཀུན༔ གནོང་འགྱོད་དྲག་པོས་མཐོལ་ཞིང་བཤགས༔ བྱང་ཞིང་དག་པར་མཛད་དུ་གསོལ༔ ཡི་གེ་བརྒྱ་པ་བརྗོད༔ དེ་ནས་བསྔོ་བ་སྨོན་ལམ་ནི༔ ཧཱུྃ༔ བདག་གིས་དུས་གསུམ ཨོཾ༔ བསགས་པའི་དགེ༔ འགྲོ་ཀུན་སངས་རྒྱས་ཐོབ་ཕྱིར་བསྔོ༔ སྡུག་བསྔལ་གྱིས་བཅིང་སེམས་ཅན་རྣམས༔ ཕྱམ་ཅིག་སངས་རྒྱས་ཐོབ་པར་ཤོག༔ དེ་ནས་བཀྲ་ཤིས་བྱ་བ་ལ༔ ཧཱུྃ༔ འདི་བསྒྲུབས་དགེ་བའི་བསོད་ནམས་ཀྱིས༔ བདག་ཅག་འཁོར་དང་བཅས་རྣམས་ཀུན༔ འདི་ཕྱིའི་དགེ་ལེགས་ཡོན་ཏན་ཀུན༔ གོང་འཕེལ་བསྟན་རྒྱས་བཀྲ་ཤིས་ཤོག༔ རྟག་ཆད་ཀྱི་མཐའ་བསལ་བ་ནི༔ ཧཱུྃ༔ དབྱིངས་ལས་སྤྲུལ་པ་སྒྱུ་མའི་ལྷ༔ ཡེ་ཤེས་རོལ་པའི་དབྱིངས་སུ་ཨ༔ མཁའ་ལ་འཇའ་ཚོན་ཤར་བ་བཞིན༔ རྗེས་ཐོབ་སྒྱུ་མའི་ལྷ་སྐུར་བཞེངས༔ སྔགས་ཅུང་ཟད་བཟླས༔ བསྐྱེད་དང་བསྒོམ་བཟླས་གནད་ལྡན་པས༔ འདི་ལྟར་བསྒྲུབ་ལ་དབང་ཐོབ་པས༔ རྣལ་འབྱོར་དམ་ལྡན་གང་སུ་དག༔ ཤེས་རབ་ཡེ་ཤེས་རྩལ་འབར་ཏེ༔ རྣམ་གྲོལ་འབྲས་བུ་ཐོབ་པར་འགྱུར༔ བཀའ་སྲུང་ཁྱབ་འཇུག་ཆེན་པོས་སྲུངས༔ ས་མ་ཡ༔ རྒྱ་རྒྱ་རྒྱ༔ གུ་ཧྱ༔ ཞེས་པ་འདི་ཉིད་རིགས་སྲས་དྲི་མེད་འོད་ཟེར་གྱིས་ནན་དུ་བསྐུལ་ངོར་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བའོ། །དགེའོ། །དགེའོ།། དགེའོ །ལེགས་སོ། །སརྦ་མངྒ་ལཾ།། །། T11615 - 064 ཨོཾ༔ དག་སྣང་ཡེ་ཤེས་དྲྭ་བ་ལས༔ འཇམ་དཔལ་སྨྲ་བའི་སེང་གེའི་སྒོམ་བཟླས་ཡེ་ཤེས་ཉི་མ་བཞུགས༔ ཤཾཤཥཋ༔ ན་མོ་གུ་རུ་པདྨ་ཀ་ར་ཡེ༔ འཇམ་དཔལ་བསྒོམ་པའི་གནད་བྱང་ནི༔ ཨཱཿ སྣང་བ་ཐམས་ཅད་སྟོང་པར་ཞི༔ ཀ་དག་མངོན་གྱུར་སྤྲོས་མཐའ་བྲལ༔ དབྱིངས་ལས་ཧྲཱིཿ ཡིག་དམར་པོ་ཤར༔ ལྷུན་གྲུབ་བདེ་ཆེན་ཞིང་ཁམས་སུ༔ པདྨ་ཉི་ཟླ་བརྩེགས་པའི སྟེང་༔ སེང་གེ་སྔོན་པོ་རབ་ཏུ་འགྱིང་༔ དེ་སྟེང་ཧྲཱིཿཡིག་ཡོངས་གྱུར་ལས༔ འཇམ་དཔལ་དམར་པོ་པད་རཱག་མདོག༔ རབ་མཛེས་གཞོན་ནུའི་ལང་ཚོས་བརྒྱན༔ ཕྱག་གཡས་རལ་གྲི་གཡོན་པོ་ཏི༔ ཞི་འཛུམ་ལོངས་སྐུའི་ཆས་རྣམས་རྫོགས༔ ཞབས་གཉིས་རྡོ་རྗེའི་སྐྱིལ་ཀྲུང་བཞུགས༔ ཐུགས་ཀར་ཉི་ཟླའི་གྭའུའི་སྦུབས༔ ཧྲཱིཿ དམར་ཉིད་ལ་སྔགས་ཀྱིས་བསྐོར༔ མདུན་དུ་པདྨ་ཟླ་གདན་ལ༔ དབྱངས་ཅན་མཐིང་ག་བཞེངས་སྟབས་བཞུགས༔ ཕྱག་ན་རལ་གྲི་པོ་ཏི་བསྣམས༔ ཞི་འཛུམ་མཚན་དཔེའི་ལང་ཚོས་མཛེས༔ ལོངས་སྐུའི་ཆས་རྫོགས་འོད་ཕུང་འབར༔ ཐུགས་ཀར་འོད་ཀྱི་ཐིག་ལེའི་སྦུབས༔ ཧྲཱིཿ སྔོན་ཉིད་ལ་སྔགས་གཡོན་འཁོར༔ ཤེས་རབ་ཡེ་ཤེས་འོད་ཟེར་གྱིས༔ དུས་གསུམ་རྒྱལ་བའི་དབང་དངོས་གྲུབ༔ འཇའ་ཡི་ སྤྲིན་དཔུང་འཐིབས་པ་བཞིན༔ ཚུར་འདུས་བདག་ལ་ཐིམ་པར་དམིགས༔ ཤེས་རབ་ཡེ་ཤེས་འབར་བར་བསྒོམ༔ ཨོཾ་ཧྲཱིཿ དྷི་མ་མི་དྷི་པཾ་མཉྫུ་ཤྲཱི་མུཾ་ཧྲཱིཿ པྲཛྙཱ་ཝརྡྷ་ནི་ཧྲཱིཿ དྷི་སྭཱ་ཧཱ༔ ཤེས་པ་གཞན་དུ་མ་ཡེངས་པར༔ ལྷ་ཡི་ང་རྒྱལ་བརྟན་པ་དང་༔ མི་ཚིག་རྣམས་ཀྱིས་བར་མ་ཆོད༔ སྔགས་ཀྱི་བཟླས་པ་དག་ལ་འབད༔ ཤེས་རབ་ཡེ་ཤེས་རབ་རྒྱས་ཤིང་༔ ཚེ་འདིར་རྣམ་པར་གྲོལ་འགྱུར་རོ༔ ས་མ་ཡ༔ རྒྱ་རྒྱ་རྒྱ༔ ཞེས་པ་འདི་ཡང་རང་གི་ཚ་བོ་ལྷ་རྗེས་བསྐུལ་ངོར་བདུད་འཇོམས་རྡོ་རྗེས་ཕབ་པའོ། །དགེའོ།། T1615 - 066 དག་སྣང་ཡེ་ཤེས་དྲྭ་བ་ལས༔ འཇམ་དཔལ་སྨྲ་བའི་སེང་གེའི་སྒྲུབ་ཐབས་ཡེ་ཤེས་འོད་ཟེར་བཞུགས་སོ༔ ན་མོ་གུ་རུ་བྷྱ༔ མགོའ་རྨཧ༔ དང་པོ་སྐྱབས་སུ་འགྲོ་བ་ལ༔ ན་མོ༔ སྐྱབས་ཀྱི་དམ་པ་དཀོན་མཆོག་གསུམ༔ རྩ་གསུམ་རྒྱལ་བ་རྒྱ་མཚོའི་ཚོགས༔ ཡོངས་འདུས་བདག་ཉིད་བླ་མ་དང་༔ འཇམ་དཔལ་དབྱངས་ལ་སྐྱབས་སུ་མཆི༔ ལན་གསུམ༔ དེ་ནས་སེམས་བསྐྱེད་པ་ནི༔ ཧོཿ མ་གྱུར་འགྲོ་བ་སེམས་ཅན་རྣམས༔ རྫོགས་པའི་སངས་རྒྱས་ཐོབ་བྱའི་ཕྱིར༔ འཇམ་དཔལ་སྨྲ་བའི་སེང་གེ་ཡི༔ བསྒོམ་བཟླས་ཟབ་མོ་ལྷུར་ལེན་བྱ༔ ལན་གསུམ༔ དེ་ནས་དངོས་གཞི་ལྷ་བསྐྱེད་པ་ནི༔ རང་སྣང་ལྷུན་གྲུབ་བདེ་ཆེན་ཞིང་༔ འོད་གསལ་ཆོས་སྐུའི་ཕོ་བྲང་དབུས༔ མ་ཆགས་པདྨ་ཉི་ཟླའི་སྟེང་༔ རང་ཉིད་སྐད་ཅིག་དྲན་རྫོགས་སུ༔ མཁྱེན་རབ་དབང་ཕྱུག་འཇམ་པའི་དབྱངས༔ དམར་གསལ་ལོ་བརྒྱད་གཞོན་ནུའི་ཚུལ༔ ཞི་འཛུམ་མཚན་དང་དཔེ་བྱད་རྫོགས༔ ཕྱག་གཡས་ཤེས་རབ་རལ་གྲི་དང་༔ གཡོན་པས་བརྒྱད་སྟོང་གླེགས་བམ་བསྣམས༔ ལོངས་སྤྱོད་རྒྱན་རྫོགས་སྐྱིལ་ཀྲུང་བཞུགས༔ འཇའ་འོད་ཐིག་ལེའི་ཀློང་དུ་བསྐྱེད༔ ཐུགས་ཀར་ཉི་ཟླའི་གྭའུ་རུ༔ ཧྲཱིཿཡིག་དམར་པོ་གསལ་འཚེར་གྷྲྀ།༔ ལཿ སྔགས་ཀྱི་ཕྲེང་བས་བསྐོར་བ་ལས༔ འོད་འཕྲོས་རྒྱལ་བ་སྲས་བཅས་ཀྱི༔ མཁྱེན་བརྩེ་ནུས་བཅུད་མ་ལུས་པ༔ འོད་དམར་རྣམ་པར་ཚུར་བསྡུས་ཏེ༔ སྲོག་གི་སྙིང་པོར་བཅུད་དུ་དྲིལ༔ ཤེས་རབ་ཡེ་ཤེས་འབར་བར་བསྒོམས༔ ཨོཾ་ཧྲཱིཿ དྷི་མ་མི་དྷི་པཾ་མཉྫུ་ཤྲཱི་མུཾ་ཧྲཱིཿ པྲཛྙཱ་ཝརྡྷ་ནི་ཧྲཱིཿ དྷི་སྭཱ་ཧཱ༔ དེ་ནས་བསྟོད་པ་བྱ་བ་ལ༔ ཧཱུྃ་ཧྲཱིཿ ཀ་དག་ཆོས་སྐུ་སྤྲོས་པའི་མཐའ་དང་བྲལ༔ ལྷུན་གྲུབ་འགགས་མེད་སྐུ་དང་ཡེ་ཤེས་རྫོགས༔ ཐུགས་རྗེ་ཐབས་ཀྱིས་འགྲོ་བའི་དོན་མཛད་པའི༔ མགོན་པོ་འཇམ་དཔལ་དབྱངས་ལ་ཕྱག་འཚལ་བསྟོད༔ ཅེས་ཤེས་པ་གཞན་དུ་མ་ཡེངས་པར་ལྷའི་ང་རྒྱལ་དང་འགྲོགས༔ མི་ཚིག་གིས་བར་མ་ཆད་པར་སྔགས་ཀྱི་ཕྲེང་བ་ཉེར་གཅིག་པ་སྒྲ་དག་ལྷག་ཆད་མེད་པར་བཟླ༔ སྟན་གྱི་དྲོད་མ་ཡལ་བར་ལུས་ཀྱི་འགུལ་བསྐྱོད་དང་བྱ་བ་སྤང་བར་བྱའོ༔ གནད་དེས་ཉི་ཟླ་ཤར་བ་མེ་ཏོག་འཐུ་བ་མཚོན་ཆ་གླེགས་བམ་མཐོང་བ་ནམ་མཁའ་གཡའ་དག་པ་རྣམས་རྨི་བ་དང་༔ ལྷ་ཞལ་མཐོང་བ་ཉམས་རྟོགས་གློ་བུར་དུ་སྐྱེ་བ་མངོན་ཤེས་འཆར་བ་རྣམས་འགྲུབ་པའི་མཚན་མར་ངེས་པར་འབྱུང་ངོ་༔ བསྐྱེད་པའི་གནད་ལྷའི་ང་རྒྱལ་མེད་ན་ལོ་བརྒྱར་བསྒྲུབ་ཀྱང་ལྷ་གང་འགྲུབ་མི་སྲིད་པས༔ བསྒོམ་བཟླས་མ་བྲལ་བ་གནད་དུ་ཤེས་པར་གྱིས་ཤིག༔ དེ་ནས་རིང་པོར་མི་ཐོགས་པར་དངོས་གྲུབ་ཀྱི་པྲ་ལྟས་འབྱུང་ངོ་༔ ས་མ་ཡ༔ རྒྱ་རྒྱ་རྒྱ༔ གུ་ཧྱ༔ ཞེས་པ་འདི་སྐལ་ལྡན་སློབ་བུ་ཡེ་ཤེས་འོད་ རྒྷཾ།༔ ཟེར་གྱིས་བསྐུལ་ངོར་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བ་ཨོ་རྒྱན་རང་ཤར་ལ་གཏད་རྒྱའོ། །དགེའོ །དགེའོ །སརྦ་མངྒ་ལཾ།། ། སྒྲུབ་གཉིས་སོ། 65ཐབས་T1615 - 069 T1615 - 069 T11615 - 070 ཨོཾ༔ དག་སྣང་ཡེ་ཤེས་དྲྭ་བ་ལས༔ འཇམ་དཔལ་སྨྲ་བའི་སེང་གེའི་མངོན་རྟོགས་བཞུགས༔ ཧྲཱི༔ གཞི་དབྱིངས་ནམ་མཁའ་རྣམ་དག་ཀློང་༔ གཞི་སྣང་བཀོད་པ་འཕྲུལ་གྱི་ཞིང་༔ གཞི་རྩལ་ཡེ་ཤེས་སྒྱུ་མའི་སྐུ༔ འཇམ་དཔལ་སྨྲ་བའི་སེང་གེ་དམར༔ ཞི་འཛུམ་མཚན་དང་དཔེ་བྱད་སྤྲས༔ མཛེས་སྒེག་གཞོན་ནུའི་ལང་ཚོ་ཅན༔ ཕྱག་གཡས་ཤེས་རབ་རལ་གྲི་ཕྱར༔ གཡོན་པས་བརྒྱད་སྟོང་གླེགས་བམ་བསྣམས༔ ལོངས་སྐུའི་ཆས་རྫོགས་སྐྱིལ་ཀྲུང་བཞུགས༔ མཐིང་མདོག་སེང་ཆེན་འགྱིང་བའི་ཁྲིར༔ འཇའ་འོད་གུར་ཁྱིམ་ཀློང་དུ་བསྐྱེད༔ མདུན་དུ་དབྱངས་ཅན་ལྷ་མོ་སྔོ༔ བཞེངས་སྟབས་རལ་གྲི་གླེགས་བམ་བསྣམས༔ དར་དང་རིན་ཆེན་རྒྱན་གྱིས་སྤྲས༔ དགྱེས་ཆགས་བཞད་པའི་བཞིན་རས་ངོམས༔ གཞོན་ཚུལ་འོད་དང་བཀྲག་མདངས་འབར༔ གནས་གསུམ་རྡོ་རྗེའི་སྙིང་པོ་འབྲུ་གསུམ་ལས༔ འོད་འཕྲོས་བདེ་བ་ཅན་དང་འོག་མིན་ནས༔ ཡེ་ཤེས་ལྷ་ཚོགས་སྤྱན་དྲངས་གཉིས་མེད་བསྟིམ༔ ཡབ་ཀྱི་ཐུགས་ཀར་པད་ཟླའི་གདན་ལ་ཧྲཱིཿ ཡིག་དམར་པོ་དང་༔ ཡུམ་གྱི་ཐུགས་ཀར་པད་ཉིའི་གདན་ལ་དྷིཿ ཡིག་སྔོན་པོ་ནི༔ གསལ་ལ་སྔགས་ཀྱི་ཕྲེང་བ་གཡས་གཡོན་འཁོར༔ བཟླས་པས་ དུས་གསུམ་རྒྱལ་བ་སྲས་བཅས་ཀྱི༔ ཤེས་རབ་ཡེ་ཤེས་དབང་བྱིན་མ་ལུས་པ༔ རང་ཉིད་ལ་ཐིམ་མཁྱེན་གཉིས་ཡེ་ཤེས་འབར༔ རྫོགས་སངས་རྒྱས་ཀྱི་གོ་འཕང་བདེ་བ་ཆེ༔ སྔགས་བཟླས་ནི༔ ཨོཾ་ཧྲཱིཿ དྷི་མ་མི་དྷི་པཾ་མཉྫུ་ཤྲཱི་མུཾ་ཧྲཱིཿཔྲཛྙཱ་ཝརྡྷ་ནི་ཧྲཱིཿ དྷི་སྭཱ་ཧཱ༔ འདི་བསྒོམ་འདི་བཟླས་རྣལ་འབྱོར་གང་སུ་དག༔ ཤེས་རབ་ཡེ་ཤེས་ཡོན་ཏན་དཔལ་ཐོབ་འགྱུར༔ བསླུ་མེད་རྡོ་རྗེའི་ངེས་ཚིག་ས་མ་ཡ༔ འདི་ནི་ཁྲག་འཐུང་བདུད་འཇོམས་དཔའ་བོ་ཡི། །དག་སྣང་ཉམས་ཀྱི་སྣང་བ་དེ་ཡི་ཆ། །རྡོ་རྗེ་ཁྲོ་ལོད་འཆོལ་བའི་གླུ་རུ་གྱེར། །རྡོ་རྗེ་རྣམ་རྒྱལ་དགེ་འདུན་གཉིས་ཀྱི་ངོར། །མ་ནུས་རྒན་པོ་དེ་ཡིས་བྲིས་པ་དགེའོ། །དགེའོ།། 9 ས་འཇམ་དཔལ་སྨྲ་སེང་ས་འཇམ་དཔལ་སྨྲ་སེང་Tl1615 - 072 ཨོཾཿ དག་སྣང་ཡེ་ཤེས་དྲྭ་བ་ལས༔ མགོན་པོ་འཇམ་དཔལ་དབྱངས་ཀྱི་གསོལ་འདེབས་བྱིན་རླབས་ཆར་འབེབས་བཞུགས་སོ༔ ན་མོ་གུ་རུ་ཝེ༔ ཧྲཱིཿ དུས་གསུམ་རྒྱལ་བའི་མཁྱེན་གཉིས་ཡེ་ཤེས དཔལ༔ ཡོངས་འདུས་བདག་ཉིད་མགོན་པོ་འཇམ་པའི་དབྱངས༔ བཟོད་མེད་གདུང་ཤུགས་དྲག་པོས་གསོལ་བ་འདེབས༔ བདག་བློའི་མ་རིག་མུན་པ་བསལ་དུ་གསོལ༔ ཧྲཱིཿ ངྷི་མ་མི ངྷི་པཾ་མཉྫུ་ཤྲཱི་མུཾ་ཧྲཱིཿཔྲཛྙཱ་ཝརྡྷ་ནི་ཧྲཱིཿ དྷི་སྭ་ཧཱཿ མགོན་པོ་འཇམ་དཔལ་ཡིད་ལ་བྱས་ནས་སུ༔ སྔགས་འདི་བརྗོད་པས་ཤེས་རབ་རྩ་ཁ་འབྱེད༔ རིག་པའི་གནས་ཆེན་ཀུན་ལ་མཁས་པར་འགྱུར༔ ས་མ་ཡ༔ རྒྱ་རྒྱ་རྒྱ༔ ཨྠི༔ ཞེས་ཀུན་བཟང་བདེ་ཆེན་རྡོ་རྗེས་བསྐུལ་ངོར་བདུད་འཇོམས་པས་སོ། །དགེའོ། །དགེའོ། །དགེའོ།། །།ཨོཾཿ མི་བརྗེད་པའི་གཟུངས་བཞུགས་སོ༔ ཧྲཱིཿ དྷི་དྷརྨ་ག་ག་ཧྲཱི༔ ཞེས་ཤུ་དག་དཀར་པོ་ལ་སྔགས་འདི་བཏབ་ཅིང་ཟོས་པས་ཤེས་རབ་མེ་ལྟར་འབར་ཞིང་མི་བརྗེད་པའི་གཟུངས་ཐོབ་བོ། །རིགས་སྲས་དྲི་མེད་འོད་ཟེར་གྱིས་ནན་དུ་བསྐུལ་ངོར་བདུད་འཇོམས་རྡོ་རྗེས་སྨྲས་པ་དགེའོ།། །། T11615 - 074 ཨོཾ༔ དག་སྣང་ཡེ་ཤེས་དྲྭ་བ་ལས༔ འཇམ་དཔལ་སྨྲ་བའི་སེང་གེའི་སྒྲུབ་ཐབས་བཞུགས་སོ༔ ན་མོ་གུ་རུ་ཝེ༔ གནྱ།ཐ།༔ འཇམ་དཔལ་སྨྲ་སེང་སྒྲུབ་པ་ལ༔ འདི་ལྟར་བསྐྱེད་རིམ་གནད་ལྡན་བྱ༔ ཨ༔ སྣང་སྲིད་ཐམས་ཅད་སྟོང་པ་ཉིད༔ ཆུ་ལས་ཆུ་ལྦུར་རྡོལ་བ་བཞིན༔ ཡེ་ཤེས་ལྔ་ཡི་འོད་ཀློང་དུ༔ རྩལ་ཆེན་སེང་གེ་སྔོན་པོའི་སྟེང་༔ པདྨ་ཉི་ཟླའི་གདན་སྟེང་དུ༔ ཧྲཱིཿ ལས་མགོན་པོ་འཇམ་དཔལ་དབྱངས༔ དམར་གསལ་ལོངས་སྐུའི་ཆས་རྫོགས་ཤིང་༔ ཞི་འཛུམ་མཚན་དཔེའི་ལང་ཚོས་མཛེས༔ ཕྱག་གཡས་ཤེས་རབ་རལ་གྲི་ཕྱར༔ གཡོན་པས་བརྒྱད་སྟོང་གླེགས་བམ་བསྣམས༔ ཞབས་གཉིས་རྡོ་རྗེ་སྐྱིལ་ཀྲུང་བཞུགས༔ ཐུགས་ཀར་འཁོར་ལོ་རྩིབས་བཞིའི་སྟེང་༔ རལ་གྲི་ཧྲཱིཿ དམར་མཚན་པ་ལ༔ སྔགས་ཕྲེང་གཡས་སུ་འཁོར་བར་བསམ༔ མདུན་དུ་པདྨ་ཟླ་རྒྱས་སྟེང་༔ ཧྲཱིཿ ལས་དབྱངས་ཅན་ལྷ་མོ་སྔོ༔ བཞེངས་སྟབས་རལ་གྲི་པུསྟི་བསྣམས༔ ཞི་འཛུམ་དར་དང་རཏྣས་བརྒྱན༔ མཚན་དཔེས་མཛེས་ཤིང་ལང་ཚོ་རྒྱས༔ ཐུགས་ཀར་པདྨ་འདབ་བརྒྱད་སྟེང་༔ ཧྲཱིཿ ལ་སྔགས་ཕྲེང་གཡོན་དུ་འཁོར༔ ཡབ་ཡུམ་སྐུ་ཡི་གཟི་འོད་ཀྱིས༔ དུས་གསུམ་རྒྱལ་བ་སྲས་བཅས་ཀྱི༔ མཁྱེན་བརྩེ ནུས་དཔལ་ཡོན་ཏན་དང་༔ བརྟན་གཡོའི་དྭངས་བཅུད་མ་ལུས་པ༔ འོད་ཀྱི་རྣམ་པར་བསྡུས་ནས་སུ༔ ཐུགས་སྲོག་སྔགས་ཀྱི་འཁོར་ལོར་བསྟིམ༔ ཤེས་རབ་ཡེ་ཤེས་འབར་བར་བསྒོམ༔ ཨོཾ་ཧྲིཿ དྷི་མ་མི་ངྷི་པཾ་མཉྫུ་ཤྲཱི་མུཾ་ཧྲཱིཿ པྲཛྙཱ་ཝརྡྷ་ནི་ཧྲཱིཿ ངྷི་སྭ་ཧཱཿ ཤེས་པ་གཞན་དུ་མ་ཡེངས་པར༔ ལྷ་ཡི་ཏིང་འཛིན་ཉིད་དང་འགྲོགས༔ མི་ཚིག་དག་གིས་མ་བསླད་པར༔ སྔགས་ཀྱིས་བཟླས་པ་གནད་དུ་བསྣུན༔ གནད་དེས་ཤེས་རབ་ཡེ་ཤེས་དཔལ༔ འཕེལ་རྒྱས་མཆོག་གི་དངོས་གྲུབ་ཐོབ༔ ས་མ་ཡ༔ རྒྱ་རྒྱ་རྒྱ༔ ཞེས་པ་འདི་ཡང་བཙུན་པ་པདྨས་བསྐུལ་ངོར་བདུད་འཇོམས་རྡོ་རྗེས་ཆོས་ཉིད་ནམ་མཁའི་མཛོད་ལས་བསྒྱུར་བའོ། །དགེའོ། །དགེའོ། །དགེའོ། །སརྦ་མངྒ་ལཾ།། །། མ T1615 - 076 ཨོཾ༔ དག་སྣང་ཡེ་ཤེས་དྲྭ་བ་ལས༔ ངག་དབང་དབྱངས་ཅན་ལྷ་མོའི་མངོན་རྟོགས་དངོས་གྲུབ་ཆར་འབེབས་བཞུགས༔ ན་མོ་གུ་རུ་པདྨ་ཀ་ར་ཡེ༔ གཀུ་ཀ་ཀ༔ དང་པོ་སྐྱབས་སུ་འགྲོ་བ་ལ༔ ན་མོ༔ བསླུ་མེད་དཀོན་མཆོག་རྣམ་གསུམ་ལ༔ བྱང་ཆུབ་བར་དུ་སྐྱབས་སུ་མཆི༔ སེམས་བསྐྱེད་ནི༔ མར་གྱུར་མཁའ་མཉམ་སེམས་ཅན་རྣམས༔ སྲིད་པའི་མཚོ་ལས་བསྒྲལ་བར་བྱ༔ ལན་གསུམ༔ དེ་ནས་ལྷ་བསྐྱེད་པ་ནི༔ སྣ་ཚོགས་སྣང་བ་གཟུང་འཛིན་ཆོས༔ སྒྱུ་མའི་འཁྲུལ་འཁོར་ཞིག་པ་བཞིན༔ ཆོས་ཉིད་དེ་བཞིན་ཉིད་དུ་ཨཱཿ མ་རྟོགས་སེམས་ཅན་སྙིང་རེ་རྗེ༔ རིག་པ་རྒྱུ་ཡི་ཡི་གེ་ཧྲཱི༔ དེ་ལས་འོད་ཕུང་རབ་འཕྲོས་པས༔ སྒྱུ་མའི་ཆོ་འཕྲུལ་ཇི་བཞིན་དུ༔ རྣམ་དག་ཞིང་ཁམས་བཀོད་ལེགས་པའི༔ དབུས་སུ་ལྷུན་གྲུབ་གཞལ་ཡས་ཁང་༔ མཚན་ཉིད་བཀོད་པ་རབ་རྫོགས་པའི༔ དབུས་སུ་པདྨ་འདབ་བཞིའི་སྟེང་༔ ཉི་ཟླའི་གདན་ལ་ཡེ་ཤེས་ཀྱི༔ དབྱངས་ཅན་ལྷ་མོ་སྐུ་མདོག་དམར༔ འགྲོ་དོན་རྒྱུན་ཆད་མེད་པའི་རྟགས༔ ཞབས་གཉིས་བཞེངས་པའི་སྟབས་སུ་བཞུགས༔ བཅུ་དྲུག་གཞོན་ནུ་མཚན་དཔེས་སྤྲས༔ ཞི་འཛུམ་མཛེས་པའི་ལང་ཚོ་ཅན༔ རིངས་པའི་ཚུལ་གྱིས་མཁའ་ལ་གཟིགས༔ ལྗང་སྔོན་ རལ་པའི་ལན་ཚར་ཅན༔ རིན་ཆེན་དབུ་རྒྱན་ཅོད་པན་དང་༔ སྙན་ཆ་ཕྲེང་བ་དར་དཔྱངས་དང་༔ ཤམ་ཐབས་སྐུ་རེག་ལ་སོགས་པའི༔ ལྷ་མོའི་ཆས་རྫོགས་གཞན་ཡིད་འཕྲོག༔ ཕྱག་གཡས་རལ་གྲི་འབར་བ་དང་༔ གཡོན་པས་གསལ་བྱེད་མེ་ལོང་བསྣམས༔ རིགས་བདག་ཀུན་ཏུ་བཟང་མོ་ལ༔ དུས་གསུམ་བདེ་གཤེགས་ཡོངས་སུ་རྫོགས༔ སྲིད་པ་དཔྱིད་ཀྱི་རྒྱལ་མོ་ནི༔ ལྗང་སྐྱ་མྱུ་གུ་དྲིལ་བུ་བསྣམས༔ སྲིད་པ་དབྱར་གྱི་རྒྱལ་མོ་ནི༔ ཕྱག་གཡས་མེ་ཏོག་ཆུན་པོ་དང་༔ གཡོན་པས་ཉི་གཞོན་འོད་འབར་བསྣམས༔ སྲིད་པ་སྟོན་གྱི་རྒྱལ་མོ་ནི༔ དམར་སྐྱ་འབྲས་ཀྱི་སྙེ་མ་འཛིན༔ སྲིད་པ་དགུན་གྱི་རྒྱལ་མོ་ལྗང་༔ ཕྱག་ན་རྩྭ་ཕྱག་རླུང་གཡབ་བསྣམས༔ དེ་ལྟར་དུས་བཞིའི་རྒྱལ་མོ་ནི༔ མཛེས་སྡུག་ལྟ་བས་ཆོག་མི་ཤེས༔ གཞོན་དང་དར་དང་ཁྲོ་བ་དང་༔ གནམ་སའི་ཆ་ལུགས་ཚུལ་འཆང་མ༔ ཕྱོགས་བཞི་གཙོ་མོ་ལ་འདུད་ཅིང་༔ སྤྱན་ཟུང་གདུལ་བྱའི་ཡུལ་ལ་གཟིགས༔ ཡེ་ཤེས་འཇའ་སྐུ་སྟོང་གསལ གྱི༔ འོད་ཀྱིས་འགྲོ་བློ་ཁ་ལོ་བསྒྱུར༔ གནས་གསུམ་འོད་ཟེར་རབ་འཕྲོས་པས༔ དབྱིངས་ནས་དབྱིངས་བཞུགས་ཡེ་ཤེས་པ༔ ཁ་བ་བབས་ལྟར་སྤྱན་དྲངས་བསྟིམ༔ དེ་ནས་སྤྱན་འདྲེན་ ཨོཾཿ བཞུགས་གསོལ་ནི༔ ཧྲཱིཿ ལྷ་མོ་ཨུ་མ་དབྱངས་ཅན་མ༔ སྤྲུལ་པའི་འཁོར་ཚོགས་དང་བཅས་པ༔ དབྱིངས་ནས་སྤྱན་འདྲེན་གཤེགས་སུ་གསོལ༔ གདན་གསུམ་དཀྱིལ་འཁོར་ཆེན་པོ་འདིར༔ བཞུགས་ནས་བདག་རྒྱུད་བྱིན་གྱིས་རློབས༔ ཧ་རི་ནི་ས་ས་མ་ཡ་ཛ་ཛ་ཏིཥྛ་ལྷན༔ དེ་ནས་ཕྱག་འཚལ་མཆོད་འབུལ་ནི༔ མ་རིག་མུན་པ་དྲུང་འབྱིན་ཕྱིར༔ ལྷ་མོ་ཁྱོད་ལ་ཕྱག་འཚལ་ལོ༔ འདི་ལྟར་སྣང་བའི་ཆོས་སོ་ཅོག༔ འདོད་ཡོན་ལྔ་ཡི་མཆོད་པ་འབུལ༔ ན་མོ་ན་མ་ཧོཿ མ་ཧཱ་སརྦ་ག་ཎ་ཙཀྲ་པཱུ་ཛ་ཧོཿ དེ་ནས་བསྟོད་པ་བྱ་བ་ནི༔ ཨེ་མ་ཧོཿ དུས་གསུམ་རྒྱལ་བ་ཐམས་ཅད་བསྐྱེད་པའི་ཡུམ༔ རྗེ་བཙུན་འཕགས་མ་ལྷ་མོ་དབྱངས་ཅན་མ༔ གཉིས་མེད་གུས་པའི་ཚུལ་གྱིས་ཕྱག་འཚལ་བསྟོད༔ སྐད་ཅིག་འབྲལ་མེད་རྗེས་སུ་བཟུང་དུ་གསོལ༔ ཇི་ལྟ་ཇི་སྙེད་མཁྱེན་གཟིགས་ཡེ་ཤེས་ཀྱིས༔ མི་ཤེས་མ་རིག་མུན་པ་དྲུང་འབྱིན་ནས༔ ཤེས་རབ་ཡེ་ཤེས་མེ་ལྟར་འབར་བར་མཛོད༔ དེ་ནས་ཡི་གེ་བརྒྱ་པ་ཅི་ནུས་བཟླས་མཐར༔ འཛབ་དམིགས་ནི༔ རང་ཉིད་ལྷ་ཡི་ཐུགས་ཀ་རུ༔ དྭངས་མ་ལྔ་ཡི་ཐིག་ལེའི་དབུས༔ རལ་གྲི་ཧྲཱིཿ ཡིག་མཚན་པ་ཅན༔ ཚོན་གང་མཐའ་བསྐོར་འོད་ཟེར་གྱི༔ ཐག་པ་གཡས་སུ་% འཁོར་བར་བསྒོམ༔ ཧྲཱིང་ཧྲཱིང་ཧྲཱིང་༔ བསྒྲུབ་སྔགས་བཟླ་བ་ནི༔ རང་གི་ཐུགས་ཀའི་འོད་ཟེར་གྱིས༔ དུས་བཞིའི་རྒྱལ་མོ་བཞི་བསྐུལ་ཏེ༔ དེ་དག་ལས་ནི་འོད་འཕྲོས་པས༔ སངས་རྒྱས་བྱང་སེམས་ཉན་རང་དང་༔ པཎྜི་ཏ་དང་མཁས་བཙུན་སོགས༔ ཀུན་གྱི་ཤེས་རབ་ཡེ་ཤེས་དཔལ༔ བསྡུས་ཏེ་རང་གི་སྙིང་གར་ཐིམ༔ འབྱུང་བཞིའི་བཅུད་དང་དྭངས་མ་དང་༔ ལྷ་འདྲེ་མི་གསུམ་ཚེ་བསོད་ནམས༔ བསྡུས་ཏེ་ཐུགས་སྲོག་ཧྲཱིཿལ་བསྟིམས༔ དུས་བཞིའི་ལྷ་མོ་སོ་སོ་ཡི༔ ཐུགས་ཀར་འོད་ཀློང་ཧ་དང་རི༔ ནི་ས་ལ་ནི་སྔགས་ཀྱིས་བསྐོར༔ ཧྲཱྀཿ ཧཿ རིཿ ནིཿ ས་པྲཛྙཱ་ཛྙཱ་ན་སིདྡྷི་ཧཱུྃ༔ ཅི་ནུས་བཟླ༔ དེ་ནས་ལས་ལ་སྦྱོར་བ་ནི༔ རང་གི་སྙིང་གའི་འོད་ཟེར་གྱིས༔ ལུས་ངག་ཡིད་གསུམ་ཀུན་ཁྱབ་ནས༔ མི་ཤེས་རྨོངས་དང་མ་རིག་ལས༔ མུན་པ་དྲུང་ནས་འབྱིན་པར་བསམ༔ ཧྲཱི་ཧ་རི་ནི་ས་སོགས༔ ཧཱུྃ༔ དེ་ལྟར་བསྐྱེད་རིམ་གནད་ལྡན་ཅིང་༔ བཟླས་པ་གྲངས་སུ་འཁྱོལ་སྲིད་ན༔ ཉི་མ་སྤྲིན་ལས་ཐོན་པ་བཞིན༔ ཤེས་རབ་ཡེ་ཤེས་རྩལ་རྒྱས་འབར༔ ས་མ་ཡ༔ རྒྱ་རྒྱ་རྒྱ༔ གུ་ཧྱ༔ ཞེས་པ་འདི་ཡང་ཕན་གྲོགས་ཀྱི་མཆོག་གྱུར་སྐལ་བཟང་ལྷ་མོས་བསྐུལ་ངོར་བདུད་འཇོམས་རྡོ་རྗེས་དག་སྣང་ཡེ་ཤེས་དྲྭ་བ་ལས་བསྒྱུར་བའོ། །དགེའོ། །དགེའོ། །དགེའོ། །སརྦ་མངྒ་ལཾ།། ། ཨོཾ༔ དག་སྣང་ཡེ་ཤེས་དྲྭ་བ་ལས༔ འཇམ་དཔལ་ནག་པོའི་མངོན་རྟོགས་ཡིད་སྦྱིན་དཔལ་སྟེར་བཞུགས་སོ༔ ཨོཾཿ ན་མོ་གུ་རུ་ཝེ༔ ལྔ་བརྒྱ་ཐ་མའི་དུས་ཀྱི་ཚེ༔ ནད་དང་རིམས་ཀྱི་ཁ་དར་ནས༔ སྐྱེ་འགྲོའི་སྲོག་ལ་འཚེ་བ་མང་༔ དེ་ཚེ་འཇམ་དཔལ་ནག་པོ་ཡི༔ སྒོམ་བཟླས་བརྟེན་པས་ནད་ལས་རྒྱལ༔ དེ་ནས་སྐྱབས་སེམས་བསྒོམ་པ་ནི༔ ན་མོ༔ བྱང་ཆུབ་སྙིང་པོར་མཆིས་ཀྱི་བར༔ འཇམ་པའི་དབྱངས་ལ་སྐྱབས་སུ་མཆི༔ མ་གྱུར་སེམས་ཅན་ཀུན་དོན་དུ༔ འཇམ་དཔལ་ནག་པོའི་བསྒོམ་བཟླས་བྱ༔ ལན་གསུམ་བྱ༔ དེ་ནས་རྟེན་དང་བརྟེན་པ་ལ༔ ཧཱུྃ༔ མ་དག་འཁོར་བ་དག་དབྱིངས་སྟོང་པར་ཞིག༔ སྐད་ཅིག་སྒྱུ་འཕྲུལ་རོལ་པའི་ཏིང་འཛིན་ལས༔ སྣང་སྲིད་ཐམས་ཅད་འོད་གསལ་ཆོས་སྐུའི་ཞིང་༔ དེ་དབུས་ཡེ་ཤེས་ལྔ་རྫོགས་གཞལ་ཡས་སུ༔ ཁྱུང་ལྔ་ལྕགས་སྡིག་ཕག་ནག མགོ་དགུ་ཡིས༔ བཏེགས་པའི་རིན་ཆེན་ཁྲི་སྟེང་པད་ཉིའི་ལྟེར༔ རང་རིག་ཧཱུྃ་ལས་བཅོམ་ལྡན་འཇམ་པའི་དབྱངས༔ མཐིང་ནག་ཕྱག་གཡས་རལ་གྲི་མེ་འབར་ཕྱར༔ གཡོན་པས་བརྒྱད་སྟོང་པ་ཡི་གླེགས་བམ་བསྣམས༔ ཁྲོ་ཚུལ་དམར་ཟླུམ་སྤྱན་གསུམ་གཡོ་ཞིང་འཁྲུགས༔ ཞལ་གྱི་མཆེ་བ་ཟླ་ལྟར་མན་དུ་གཙིགས༔ ཤངས་ནས་ཕག་ཁྱུང་སྡིག་པའི་ཚྭ་ཚྭ་འཕྲོ༔ བུ་ག་དགུ་ནས་དུག་དང་མེ་རླུང་འཕྱོ༔ ནད་རིམས་གདོན་དང་བཅས་པ་ཐམས་ཅད་བསྲེགས༔ སྐུ་སྨད་སྟག་ཤམ་གསོལ་ཞིང་ཕྱེད་སྐྱིལ་བཞུགས༔ བ་སྤུ་ཐམས་ཅད་དུག་ཁྱུང་ནག་པོ་ལ༔ སྤྲུལ་པ་ཟ་བྱེད་ཁྱུང་གི་ཚྭ་ཚྭ་འཕྲོ༔ དམར་སེར་དབུ་སྐྲ་གྱེན་དུ་འབར་བ་ལས༔ ཟ་བྱེད་ཕག་དང་ལྕགས་སྡིག་དཔག་མེད་འཕྲོ༔ གནོད་བྱེད་ཐམས་ཅད་ཧབ་ཧབ་ཟས་སུ་རོལ༔ བསྐལ་པ་དུས་མཐའི་མེ་ལྟར་འབར་ཀློང་ནས༔ གར་དགུའི་ཉམས་ལྡན་རྔམས་བརྗིད་གཟི་འོད་འབར༔ ཞལ་ནས་དྲག་སྔགས་ཚྭ་ཚྭ་འཕྲོས་པ་ཡིས༔ ནད་གདོན་བར་ཆད་ཐམས་ཅད་ལྷག་མེད