Tibetan
ཐུག༔ འཇའ་ལུས་དྭངས་མར་གྲོལ་བ་རྣམ་གསུམ་འབྱུང་༔ ཉམས་སྣང་བཟང་ངན་མ་ངེས་སྣ་ཚོགས་ཀྱིས༔ བདེ་དང་སྡུག་བསྔལ་རིམ་པ་བཞིན་དུ་འབྱུང་༔ ཐམས་ཅད་རེ་དོགས་མེད་པའི་དབྱིངས་སུ་བསྐྱལ༔ དེ་ལྟར་ལམ་མཐར་མ་ཕྱིན་སྐྱེས་བུ་དག༔ ལྟ་སྒོམ་གནད་རྟོགས་ཐི་བྱ་ཚང་འཇུག་དང་༔ འཆི་སྲིད་ངོས་ཟིན་སྒེག་མོས་བརྙན་བལྟ་དང་༔ གནས་ལུགས་ངོས་ཟིན་སྔར་འདྲིས་མི་འཕྲད་དང་༔ འོད་གསལ་དབྱིངས་ཞུགས་མ་པང་བུ་འཇུག་དང་༔ གདམས་པའི་འཕྲོ་མཐུད་འདྲེན་ཆུར་ཝ་འཛུག་དང་༔ མངལ་གྱི་སྒོ་འགག་ཉེས་ཅན་བཙོན་ཐར་སོགས༔ དཔེ་དྲུག་གནད་དང་ལྡན་པ་མཆོག་ཏུ་ཤེས༔ དེ་ཡིས་གྲོལ་སྲིད་ཡང་ན་དབུགས་འབྱིན་འགྱུར༔ ཤེས་རིག་རྡོ་རྗེ་རྣོན་པོའི་རྒྱུད་ལས༔ འོད་གསལ་ཐོད་རྒལ་ཆེན་པོའི་ ལམ་ཉམས་སུ་ལེན་པའི་ཚུལ་བསྟན་པའི་སྐབས་ཏེ་བདུན་པའོ༔ མཐར་ཐུག་རྣམ་པར་གྲོལ་བའི་འབྲས་བུ་ལ༔ གཞི་ཡི་ཆོས་སྐུ་བདེ་གཤེགས་སྙིང་པོ་ཉིད༔ ཆོས་སྐུ་གདོད་མའི་མགོན་པོར་ལྷུན་གྱིས་གྲུབ༔ འཐོབ་བྱ་གཞོན་ནུ་བུམ་པའི་སྐུ་ཉིད་དེ༔ དབང་པོ་རབ་ཀྱིས་ཚེ་གཅིག་མངོན་དུ་འགྱུར༔ འབྲིང་དང་ཐ་མས་སྐུ་དང་ཡོན་ཏན་དཔལ༔ རྣམ་དག་དབུགས་འབྱིན་ཞིང་ལྔའི་གཞི་རུ་བཞུགས༔ རྣམ་པ་ཀུན་ཏུ་གདུལ་བྱའི་དཔལ་མགོན་པོར༔ ཟླ་བ་ཆུ་ཟླ་ལྟ་བུར་ཅིར་ཡང་སྣང་༔ གདངས་ཀྱི་འཁོར་བ་དབྱིངས་སུ་མ་ཞིག་བར༔ དབྱིངས་ཀྱི་ཡེ་ཤེས་རོལ་གར་རྒྱུན་མི་འཆད༔ ཤེས་རིག་རྡོ་རྗེ་རྣོན་པོའི་རྒྱུད་ལས༔ གཞི་ཡི་བཞུགས་ཚུལ་བསྟན་པའི་སྐབས་ཏེ་བརྒྱད་པའི་བདག་ཉིད་ཅན་གྱིས་རྫོགས་སོ༔ ཞེས་པ་འདི་ནི་ཁྲག་འཐུང་བདུད་འཇོམས་དཔའ་བོའི་ཡེ་ཤེས་སྒྱུ་མར་རོལ་པའི་སྣང་ཉམས་སུ་ཤར་བ་ལས། རེ་ཞིག་གི་དུས་སློབ་བུ་བྱ་བྲལ་བ་པདྨ་བཀྲ་ཤིས་དང་། ཨོ་རྒྱན་རྡོ་རྗེ། རིག་པའི་མྱུ་གུ བློ་གྲོས་དབང་པོ་རྣམས་ཀྱིས་ནན་དུ་བསྐུལ་བ་དོན་ཡོད་པའི་ཕྱིར་གཏན་ལ་ཕབ་པའི་དགེ་བས་ཁམས་གསུམ་གྱི་འཁོར་བ་དོང་ནས་སྤྲུགས་པར་གྱུར་ཅིག །དགེའོ །དགེའོ། །དགེའོ། །སརྦ་མངྒ་ལཾ། །། ༄༅། །ཨོཾ་སྭསྟི། སྤྲུལ་པའི་གཏེར་ཆེན་བདུད་འཇོམས་གླིང་པའི་ཟབ་གཏེར་གསང་བའི་ཆོས་སྡེ་ལས། དག་སྣང་ཡེ་ཤེས་དྲྭ་བའི་སྐོར་གྱི་གླེགས་བམ་༼ཙ༽ པ་འདིར། དབུ་ཤོག་ལྡེབ་གཅིག་གིས་ཐོག་དྲངས་ཏེ། ཟབ་གཏེར་ཀུན་གྱི་རྒྱབ་ཆོས་ཁྲིད་ཡིག་གི་སྐོར་ལ། གནས་ལུགས་རང་བྱུང་གི་རྒྱུད་རྡོ་རྗེའི་སྙིང་པོ་ལྡེབ ༢༥༦ དགོངས་བརྡ་སྙན་རྒྱུད་ཆིག་རྫོགས་ཀྱི་མན་ངག་གསང་ཁྲིད་བཀའ་རྒྱ་མ་ལྡེབ ༤༨ ཤེས་རིག་རྡོ་རྗེ་རྣོན་པོའི་རྒྱུད་ལྡེབ ༧ བཅས། པོད་འདིར་ཆོས་ཚན་གསུམ་ལ་ལྡེབ་༣༡༢ དང་། གླེགས་བམ་གྱི་དཀར་ཆག་རང་ཉིད་ལྡེབ ༡ བཅས་བསྡོམས་ལྡེབ་གྲངས ༣༡༣ བཞུགས། ༈ གྲུབ་པའི་འཁོར་སྒྱུར་བདུད་འཇོམས་གླིང་པ་ཡི། །ཟབ་གཏེར་གསང་བའི་ཆོས་མཛོད་ཡིད་བཞིན་ནོར། །ཀུན་བཟང་མིང་གིས་སྤར་དུ་བཏབ་སྤེལ་དགེས །ཟབ་ཆོས་ཕྲིན་ལས་མི་ནུབ་རྟག་ཁྱབ་ཤོག ། ༈ པདྨའི་རིང་ལུགས་སྔ་འགྱུར་རྫོགས་པ་ཆེ། །ངེས་དོན་སྙིང་པོའི་ཤིང་རྟ་བདུད་འཇོམས་གླིང་། །གང་གི་ཟབ་གཏེར་བསྟན་པ་སྲིད་མཐའི་བར། །མི་ནུབ་བཤད་དང་སྒྲུབ་པས་འཛིན་གྱུར་ཅིག །དགེའོ། །།