Tibetan
བསྐྱེད་རིམ་ཐབས་ཀྱི་ལམ་ཟབ་མོ༔ མ་དག་འཁྲུལ་པའི་བག་ཆགས་སྦྱོང་བའི་ཕྱིར༔ འཁོར་བའི་སྒོ་དང་བསྟུན་ནས་གདུལ་བྱ་ཡི༔ གཉིས་སྣང་བག་ཆགས་སྦྱོང་ཕྱིར་བསྟན་པ ཡིན༔ དེ་ལས་ཡེ་ཤེས་ལྷ་དང་ཞིང་ཁམས་ཀུན༔ བདེན་པར་གྲུབ་པ་སྣོད་བཅུད་ཅན་ལྟ་ན༔ སངས་རྒྱས་སེམས་ཅན་ལྟ་བའི་ལོག་རྟོག་དང་༔ བསྐྱེད་རིམ་རང་རྒྱུད་པ་རུ་གོལ་བ་ཡིན༔ ཞི་བ་སྒོམ་སྒྲུབ་གཟུགས་ཀྱི་ཁམས་སུ་གོལ༔ ཁྲོ་བོ་སྒོམ་སྒྲུབ་བདུད་དང་རཱུ་དྲར་འཁྲུལ༔ ཅིའི་ཕྱིར་ཞེ་ན་དེ་དོན་འདི་ལྟ་སྟེ༔ མ་དག་ཕུང་པོ་ལྔ་དང་འབྱུང་བ་ལྔ༔ དུག་ལྔ་རྣམ་ཤེས་བརྒྱད་དང་སེམས་སྣང་ལས༔ འདས་ཤིང་སྐུ་དང་ཡེ་ཤེས་རབ་རྒྱས་པ༔ ཕྱོགས་དང་སྤྲོས་མཐའ་ཀུན་ལས་འདས་པ་ཡིན༔ རྫོགས་པའི་སངས་རྒྱས་ཞལ་ཕྱག་མཚན་མ་བྲལ༔ མཚན་མའི་གཟུགས་སུ་བཅོས་པའི་ཀུན་རྫོབ་ཆོས༔ ཐབས་ལས་དོན་དམ་མ་ཡིན་ཚུལ་ཤེས་ནས༔ ཉམས་སུ་བླང་ན་དངོས་གྲུབ་མཆོག་ཆེན་འཐོབ༔ གཟུགས་མཚན་སྣོད་བཅུད་ཡུལ གོལ་ངེས་དོན་དུ༔ བཟུང་ནས་ལོ་བརྒྱར་བསྒྲུབ་ཀྱང་འཁྲུལ་རྒྱུ་ལས༔ ཐར་པའི་ལམ་ལ་ཕྱོགས་ཙམ་ཉེ་བ་མིན༔ དེ་ལྟར་བསྐྱེད་རིམ་གནད་དང་དོན་ཚུལ་བཞིན༔ རྟོགས་ནས་ཉམས་སུ་ལོངས་ཤིག་སྐལ་ལྡན་རྣམས༔ དང་པོ་རྩེ་གཅིག་བསྒོམ་བཟླས་གནད་དུ་བསྣུན༔ བར་དུ་གཉིས་མེད་རོལ་པར་ཤེས་པ་དང་༔ ཐ་མ་བྱང་ཆུབ་ཆེན་པོར་གྲོལ་བ་གནད༔ དེ་ནི་བསྐྱེད་རིམ་མ་ནོར་ལམ་གྱི་རིམ༔ མཎྜ་ལ་གུ་ཧྱ༔ ཀྱེ་ཧོཿ ཡང་ཅིག་གསོན་དང་སྐལ་ལྡན་ལས་ཅན་རྣམས༔ མངོན་སུམ་རང་ངོ་རང་བྱུང་སངས་རྒྱས་སུ༔ རང་གྲོལ་བྱེད་པ་ཤེས་རབ་ཟབ་མོའི་ལམ༔ ངོ་འཕྲོད་ཕྱིར་ན་རྫོགས་རིམ་ལ་འཇུག་གནད༔ དབེན་པའི་གནས་མཆོག་ཉམས་དགའི་སྐྱེད་མོས་ཚལ༔ མི་ཡིས་མཐོང་ཚོར་རྒྱུ་འགྲིམ་མེད་པ་ཡི༔ ཡངས་ཤིང་ཁོད་སྙོམས་རབ་ཏུ་མཐོ་བའི་ས༔ ཏིང་འཛིན་ཤུགས་ཀྱིས་སྐྱེ་བའི་གནས་བཟང་པོར༔ དང་པོའི་ལས་ཅན་རྣམས་ཀྱིས་བསྒོམ་པར་འོས༔ ལུས་ནི་དྲང་བསྲང་གཡོ་འགུལ་མེད་པར་བཞག༔ ཐེོཾ།༔ ངག་ནི་སྨྲ་བརྗོད་སྤངས་ནས་རླུང་དལ་བསླབ༔ སེམས་ནི་བསམ་མནོ་བྲལ་བར་ཤིག་གེར་བཞག༔ གང་ཤར་འགྱུ་དྲན་ཤེས་པའི་རྒྱུན་གྱིས་བསྐྱང་༔ འདི་ལ་ཆེར་གོམས་སྟོབས་ཀྱིས་བདེ་སྡུག་ཉམས༔ མ་ངེས་སྣ་ཚོགས་འབྱུང་བ་ངོ་ཤེས་གནད༔ བདེ་བའི་ཉམས་ནི་ལུས་དང་ངག་དང་ཡིད༔ དགའ་བདེ་བརྗོད་དུ་མེད་པས་མྱོས་གྱུར་ཏེ༔ གཡོ་འགུལ་མི་ཕོད་ངང་ལ་གནས་པར་འགྱུར༔ འདི་ཉིད་ཉམས་སུ་ཤེས་ནས་ཞེན་མེད་དུ༔ བཅོས་བསྒྱུར་སྤང་ལེན་མེད་པར་བཞག་པས་གྲོལ༔ དེ་ལྟར་ཉམས་སུ་ཤེས་པར་མ་གྱུར་ཏེ༔ ལམ་བྱས་ཆེད་བསྒོམ་ཆགས་པས་འཆིང་གྱུར་ནས༔ བརྟན་ཅིང་འཐས་ནས་རྟག་ཏུ་ཞེན་པ་ནི༔ སྒོམ་ཞེས་ཡང་དག་ལྟ་བ་ཟབ་མོ་སྟེ༔ འདི་ལས་མེད་དོ་ང་ནི་ལས་སྐལ་ལྡན༔ གཞན་ལ་འདི་འདྲའི་ལྟ་སྒོམ་མེད་སྙམ་བློས༔ ཤིན་ཏུ་བཟློག་པར་དཀའ་བའི་གོལ་སར་འཕྱན༔ འདོད་ཁམས་ལྷ་ཡི་འཁོར་བ་འཐོབ་པར་འགྱུར༔ གསལ་བའི་ཉམས་ནི་གང་ཤར་རྟོག་ཚོགས་ཀུན༔ གསལ་ལ་མ་འགགས་ཧྲིག་གེར་མངོན་པར་འཆར༔ སྤྱོད་འགྲོས་སྨྲ་བརྗོད་ཀུན་གྱི་གནོད་འཚེ་མེད༔ ཕྱི་རུ་ལྷར་སྣང་འདྲེར་སྣང་མངོན་ཤེས་གསལ༔ འདི་དུས་བདེན་མེད་ཉམས་སུ་ཤེས་ པའི་ངང་༔ རེ་དོགས་ཞེན་ཆགས་ཆེད་སྒོམ་མེད་པ་རུ༔ རང་སར་བཞག་པས་ཕན་གནོད་མེད་པར་ཡལ༔ དེ་ལྟར་གནད་དང་ལྡན་པར་མ་གྱུར་ན༔ ངེས་པར་ཡང་དག་ལྟ་བ་འདི་ཀའོ༔ འདི་བས་ལྷག་པའི་ལྟ་སྒོམ་གང་ཡང་མེད༔ ང་ནི་འགྲན་ཟླ་བྲལ་བའི་སྐྱེས་བུའོ༔ སྙམ་ནས་མངོན་ཤེས་འདོན་ཞིང་དཀོར་ལ་རློམ༔ སྟོང་སྐད་ཆེར་སྒྲོག་གཞན་དག་ཁྱད་དུ་གསོད༔ བཟློག་པར་དཀའ་བའི་ལམ་འདིར་གོལ་བའི་མི༔ ཆེ་གྲགས་ཡོན་ཏན་ལྡན་པའི་སློབ་དཔོན་དང་༔ འཕྲད་ནས་རྗེས་སུ་ཟིན་པར་མ་གྱུར་ན༔ ཉེས་པ་བསགས་ཀུན་བགེགས་དང་དམ་སྲིར་འཁྲུལ༔ རྩེ་གཅིག་གོམས་འདྲིས་བྱེད་པའི་གང་ཟག་ཀྱང་༔ གཟུགས་ཁམས་དཔལ་འཐོབ་བདེ་བའི་རོས་མྱོས་ཀྱང་༔ འཁོར་བའི་གནས་ལས་མི་འདའ་སྐྱོན་དེས་བཅིང་༔ འདི་ནི་ཤིན་ཏུ་ལམ་སློང་དཀའ་བའི་ཕྱིར༔ གནད་འདིར་ལྟོས་ཤིག་མ་འོངས་བརྒྱུད་འཛིན་རྣམས༔ མི་རྟོག་པ་ཡི་ཉམས་ནི་འདི་ལྟ་སྟེ༔ སེམས་འཛིན་བག་གིས་བཅིངས་པའི་སྟོབས་དབང་གིས༔ གང་ཤར་རྟོག་ཚོགས་ཀུན་གྱི་སྒོ་འགགས་ནས༔ སྟོང་པའི་མི་གཡོ་བ་རུ་ཧར་གྱིས་གནས༔ འདི་དུས་བཅོས་བསྒྱུར་སྤང་ལེན་ཆེད་སྒོམ་དང་༔ ཆགས་ཞེན་མཆོག་འཛིན་མེད་པའི་ངང་ ཝྃ༔ ཉིད་ལས༔ གང་ཤར་སྐྱོང་བ་ལག་ལེན་གནད་དུ་ཆེ༔ འདི་ནི་སྒོམ་གྱི་མཐར་ཐུག་ཡིན་སྙམ་ནས༔ རྩེ་གཅིག་ཞེན་ཆགས་ཆེད་སྒོམ་བྱས་གྱུར་ནས༔ མི་གཡོའི་བསམ་གཏན་ཧད་པོར་གོལ་བའི་མི༔ ཟག་བཅས་དགེ་བའི་མཆོག་ཆེན་ཡིན་ན་ཡང་༔ སྲིད་རྩེའི་ལྷ་བཞིར་བདེ་བར་ངལ་གསོས་ཀྱང་༔ མཐར་ཐུག་འཁོར་བ་གཞན་དུ་འཕོ་འགྱུར་ཏེ༔ གཏན་གྱི་བདེ་བ་མ་ཡིན་སྐྱོན་དེས་བཅིངས༔ དེ་ཕྱིར་གོལ་ས་ཆེན་པོ་རྣམ་པ་གསུམ༔ ཤེས་པས་ས་དང་ལམ་གྱི་གྲོགས་སུ་འགྱུར༔ ས་ལམ་སྦྱང་བགྲོད་ཐེམ་གྱི་ཐེག་པ་ལ༔ ཉམས་ཀྱི་རྟོགས་པ་གོང་འཕེལ་བྱེད་པར་འགྱུར༔ མཎྜ་ལ་གུ་ཧྱ༔ ས་ལམ་ཉམས་སུ་ལེན་པའི་གང་ཟག་ལ༔ འཇུར་དྲན་སྒྲོག་གིས་བཅིངས་པའི་རྐྱེན་དབང་གིས༔ དབང་པོའི་ཡུལ་དུ་མི་འདོད་ཟུག་རྔུ་ནི༔ མ་ངེས་འབྱུང་སྟེ་ངོ་ཤེས་གནད་དུ་ཆེ༔ མི་སྲིད་པ་ཡི་ནད་གཞན་འབྱུང་མིན་ཏེ༔ རླུང་མཁྲིས་བད་ཀན་ཚ་གྲང་འདུས་པ་དང་༔ གྲིབ་གདོན་རྨ་སྐྲང་ལ་སོགས་མ་ངེས་འབྱུང་༔ དེ་ཚེ་རྨི་ལྟས་མོ་རྩིས་ཉམས་སྣང་འཁྲུགས༔ སྨན་དཔྱད་རིམ་གྲོ་བྱས་ཀྱང་ཕན་གནོད་མེད༔ འདི་དུས་ཉམས་ཀྱི་སྣང་བར་ངོས་ཟིན་ཅིང་༔ རེ་དོགས་སྤང་བླང་བྲལ་བའི་ ངང་ལ་བཞག༔ འཛིན་སྟངས་བཤིགས་པས་ངེས་པར་གྲོལ་འགྱུར་རོ༔ དེ་ལ་བདེན་འཛིན་དོགས་པ་ཆེར་སྐྱེས་ཏེ༔ ཕན་པར་རློམས་ནས་བྱ་བ་བྱས་གྱུར་ན༔ ཚེ་དང་སྲོག་ལ་ཧུར་ཐུམ འབྱུང་བ་དང་༔ དོགས་པའི་ཡུལ་གྱིས་བསླུས་ཏེ་ཉེར་ཚེར་གོལ༔ སེམས་འཛིན་སྟངས་ཀྱིས་བསྡམས་པའི་རྐྱེན་དབང་གིས༔ སྙིང་མི་དགའ་ཞིང་མཐོང་ཚོར་དགྲ་རུ་མངོན༔ གང་ཤར་ཐམས་ཅད་རི་གཟར་རྦབ་རྡོ་བཞིན༔ གང་བབས་ས་རུ་ཕུང་ཁྲོལ་བྱེད་ལྟར་གནོད༔ འགའ་ཞིག་མྱ་ངན་ཆེན་པོས་ནོན་པ་བཞིན༔ སྡུག་བསྔལ་བཟོད་གླག་མེད་པ་མྱོང་བར་འགྱུར༔ འགའ་ཞིག་ཞེ་སྡང་ཕྲག་དོག་ཆེན་པོས་གདུང་༔ ཁྲོ་ཞིང་འཐབ་སྙིང་འདོད་ཅིང་ཤིན་ཏུ་སྡང་༔ འགའ་ཞིག་ངེས་འབྱུང་སྐྱོ་ཤས་ཆེར་རྒྱས་ཏེ༔ ཡུལ་ངན་སྤང་བར་འདོད་ཀྱང་སྤང་མི་ནུས༔ འགའ་ཞིག་སྣང་བ་ལོག་པར་འཁྲུལ་པ་ཡི༔ སྔངས་བསྐྲག་འཇིགས་སྣང་བྲོས་སྙིང་འདོད་པ་འབྱུང་༔ འགའ་ཞིག་དད་པ་ཡལ་ཞིང་ལོག་ལྟས་གདུང་༔ དམ་ཚིག་སྡོམ་པ་ཉམས་ཤིང་ཉོན་མོངས་འཁྲུགས༔ ཚོགས་དྲུག་ཡུལ་དུ་འདྲེ་གདོན་ལྟས་ངན་འཆར༔ འགའ་ཞིག་དགའ་བདེ་ང་རྒྱལ་ཆེན་པོས་མྱོས༔ འགའ་ཞིག་ཐོམ་མེ་བ་རུ་དུབ་པ་སོགས༔ འཇུར་དྲན་འཛིན་སྟངས མདུད་རྒྱས་བཅིང་རྐྱེན་དེས༔ སེམས་ཀྱི་ཟུག་རྔུ་བསླངས་པས་ཉམས་དེ་བསླང་༔ འདི་དུས་བླ་མ་དམ་པར་མ་འཕྲད་ན༔ ལ་ལ་སྨྱོ་ཞིང་ལ་ལ་དབང་པོ་ལྐུག༔ ལ་ལ་རྐྱེན་ངན་དབང་གྱུར་ལ་ལས་ནི༔ རང་སྲོག་གཅོད་དང་ནད་ཆེན་དག་གིས་གདུང་༔ ལ་ལ་དུད་འགྲོ་ལྟ་བུ་བླུན་རྨོངས་དུབ༔ གེགས་དེ་སེལ་བའི་གདམས་ངག་འདི་ལྟ་སྟེ༔ ས་ལམ་ཡོན་ཏན་མཆོག་ཏུ་བསྔགས་པ་བརྗོད༔ ཉམས་ཀྱི་སྣང་བར་ངོ་སྤྲོད་རེ་དོགས་བཅད༔ སེམས་འཛིན་འཇུར་བུའི་མདུད་རྒྱ་བཀྲོལ་བར་བསླབས༔ བཅོས་བསྒྱུར་ཨ་འཐས་ཐེར་ཟུག བློས་བཅོས་ཆོས༔ ཤུགས་འབྱུང་གུ་ཡངས་ངང་དུ་ཡན་པར་བཤིག༔ དེ་ལྟར་ལམ་དུ་ཚུད་པར་མ་གྱུར་ན༔ སེམས་སློང་འཁྲུལ་རྟོག་དེ་ཡིས་བསླུས་པའི་མི༔ ཚེ་རབས་ཀུན་ཏུ་སྔ་མའི་བག་ཆགས་རྒྱུས༔ ཕྱི་མའི་རྐྱེན་བསླང་སྡུག་བསྔལ་དག་གིས་གདུང་༔ མཁའ་རྒྱུའི་ཡི་དྭགས་དམ་སྲི་ལ་སོགས་པ༔ ཕན་ཚུན་འཚེ་བ་ཅན་དུ་གྱུར་པས་ན༔ འཚོ་སྨན་འདོད་པས་དུག་ལ་སྤྱོད་ལྟ་བུར༔ ཤེས་པར་གྱིས་ཤིག་མ་འོངས་བརྒྱུད་འཛིན་རྣམས༔ མཎྜ་ལ་གུ་ཧྱ༔ ཡང་ཅིག་གསོན་དང་པདྨའི་འཁོར་སློབ་རྣམས༔ ཚེ་གཅིག་ཡང་དག་ལམ་ལ་རྨོངས་གྱུར་༥ ནས༔ རླུང་སེམས་བཙན་ཐབས་བཅིངས་པའི་ཆོ་ག་ལ༔ བརྟེན་ནས་ལས་རླུང་རྩ་རུ་འཇུག་གྱུར་ནས༔ སེམས་ཀྱི་ཞེན་པ་ཉལ་བས་བབ་དལ་ནས༔ གསལ་བའི་ཉམས་ཀྱིས་གཞི་བྱས སྣང་བར་འགྱུར༔ ལུས་ཀྱི་རྩ་འདར་འཕར་གཡོ་མཆོང་རྒྱུག་བྱེད༔ ལྷ་དང་འདྲེ་ཡི་རྣམ་འགྱུར་མ་ངེས་སྟོན༔ ངག་ནས་གླུ་དབྱངས་ལེན་ཅིང་བཤུག་སྒྲ་དང་༔ ཀུ་འདེབས་ཧཱུྃ་སྒྲ་ལ སོགས་མ་ངེས་སྒྲོགས༔ སེམས་ལ་ལྷ་ཀླུ་མི་མིན་འདྲེར་སྣང་འཆར༔ རེས་འགའ་དགའ་བདེ་རེས་འགའ་སྡུག་སྣང་འཆར༔ འདི་དུས་ཡང་དག་ལམ་དུ་གཟུད་པའི་ཕྱིར༔ རླུང་རིག ཤུགས་འབྱུང་ངང་དུ་ལྷོད་དེ་བཞག༔ ལྟ་བ་ཟབ་མོའི་ཤུབ་ནས་བཏོན་ཏེ་བཞག༔ སྒོམ་པ་ཟབ་མོའི་འཆིང་ཐག་བཅད་ནས་བཞག༔ སྤྱོད་པ་དམ་པོའི་ལྕགས་སྒྲོག་གཏོར་ཏེ་བཞག༔ འཛིན་རྩོལ་དམ་གྱིས་དཀྲིས་པའི་རླུང་དང་སེམས༔ ཆུ་རྒྱུན་འོལ་ཁ་བཀག་པས་འཕྱུར་བ་ལྟར༔ མ་ངེས་སོ་ཟིན་མེད་པའི་ཟུག་རྔུས་གདུང་༔ རང་བབས་ངང་དུ་ཤིག་གེར་བཀྲོལ་ཏེ་བཞག༔ མ་དགྲོལ་དག་གིས་གྲོལ་བར་གདོན་མི་ཟ༔ དེ་མིན་ལྷར་བཟུང་མཆོག་འཛིན་བྱས་པ་དང་༔ འདྲེར་བཟུང་གཏོ་བཅོས་བྱེད་པའི་ལོག་སྤྱོད་ཀུན༔ སྡེ་བརྒྱད་དག་ཏུ་གོལ་བའི་ ཐེོཾ༔ གཡང་ས་ཡིན༔ ཤེས་པར་གྱིས་ཤིག་མ་འོངས་བརྒྱུད་འཛིན་རྣམས༔ མ་འོངས་བསྐལ་པ་དུས་ཀྱི་སྙིགས་མ་ལ༔ བསླུ་བྱེད་བླུན་པོས་འུར་ཁྲིད་འདོམས་པའི་དུས༔ རང་མགོ་འཁོར་བའི་བདུད་པོ་གྲགས་འདོད་ཅན༔ གྲོང་ཡུལ་ཁ་ལོ་བསྒྱུར་བའི་སྟོབས་ལྡན་པ༔ ཐབས་མཁས་བྱི་ལ་ལྟ་བུའི་སློབ་དཔོན་འགས༔ ལས་ངན་རླུང་གིས་བསྡུས་པའི་སློབ་མ་ལ༔ ལུས་ནི་ཆོས་བདུན་གནད་ཀྱིས་འཆིང་ཆེར་གཅུན༔ ངག་གནད་འབྱུང་འཇུག་རླུང་གི་སྒོ་བསྡམ་ཞིང་༔ སེམས་ཀྱི་འཇུར་དྲན་འཆར་སྒོ་བཀག་པ་ཡི༔ ངང་དུ་རྩེ་གཅིག་སྡོད་པ་གདམས་པར་འཆད༔ ལོ་ཟླར་དཀའ་ཐུབ་བསྐྱེད་པའི་སྡུག་ཁུར་རིན༔ ངན་སོང་གསུམ་པོ་ཉོས་ལོན་དེ་རུ་འཕྱན༔ འགའ་ཞིག་སྐྱེ་འགག་ཅན་གྱི་སེམས་རྟོག་ལ༔ ལམ་བྱས་སྒོམ་གྱི་མཆོག་ཏུ་བསྔགས་པ་བརྗོད༔ འདི་ཐོག་ལུས་པའི་བླུན་རྨོངས་ཨ་ཙ་མ༔ འཁྲུལ་པར་ཉིང་འཁྲུལ་བསྣན་ནས་འཕེལ་ཁ་བསྐྱེད༔ ཁྱོད་ཀྱིས་རྣམ་པར་དཀྲོལ་བའི་རྣམ་དཀར་གྱི༔ བློ་དང་ཡིད་ཀྱི་སོ་ནམ་གང་དུ་གདའ༔ རྣམ་པར་རྟོག་པ་སྐྱེ་དང་འགག་པ་ཅན༔ གྲོལ་ནས་ངོ་བོར་ཕན་ཆེར་བཏགས་པ་ནི༔ གློག་འགྱུས་ནམ་མཁའ་རྟག་ཏུ་བསྒྱུར་དང་མཚུངས༔ སངས་རྒྱས་ ས་ལས་དཔག་ཚད་གྲངས་མེད་དུ༔ དབེན་ཅིང་དགོན་པའི་ས་རུ་རིང་པར་སོང་༔ དེ་ཕྱིར་མ་འོངས་ང་ཡི་བརྒྱུད་འཛིན་རྣམས༔ སྲིད་པའི་ཁུར་ཆེན་བོར་ནས་ཡང་དག་སར༔ བྱ་བྱེད་བྲལ་བའི་ངང་དུ་ངལ་གསོས་ཤིག༔ མཎྜ་ལ་གུ་ཧྱ༔ ཀྱེ་ཧོཿ ཡང་ཅིག་གསོན་དང་སྐལ་ལྡན་ལས་ཅན་རྣམས༔ ཤེས་པ་ཡེ་གནས་རང་བྱུང་ཆེན་པོ་འདིས༔ འགྱུ་དྲན་རྟོག་པར་བལྟས་པ་འདི་ཀ་ལ༔ གནས་འགྱུ་གཉིས་སུ་ངོ་སྤྲོད་བྱེད་ལགས་ཏེ༔ དེ་མིན་རྣམ་རྟོག་སྔ་མ་ཤར་བའི་རྗེས༔ གཉེན་པོ་བཏང་ཟེར་ཕྱི་མ་ཡང་སེམས་པ༔ གནས་འགྱུ་གཉིས་སུ་ངོ་སྤྲད་བྱེད་པ་ནོར༔ གནས་དང་འགྱུ་བ་གཉིས་མེད་ངང་གྱུར་ནས༔ གང་ཤར་ཤེས་པ་མཉམ་པ་དབྱེར་མེད་པ༔ རང་གྲོལ་ངོ་སྤྲོད་བྱེད་པ་ཡིན་ལགས་ཏེ༔ བལྟ་བྱ་ལྟ་ཡུལ་གཉིས་སུ་འདུག་པ་ལ༔ རང་གྲོལ་ངོ་སྤྲོད་བྱས་ན་ནོར་བ་ཡིན༔ ཤར་དང་གྲོལ་བ་གཉིས་སུ་མེད་པ་ཡི༔ ངང་དུ་གྱུར་པ་རང་གྲོལ་དུས་མཉམ་སྟེ༔ རྣམ་པར་རྟོག་པ་གཅིག་ལས་གཉིས་མཆེད་པར༔ ཤར་གྲོལ་དུས་མཉམ་སྟོན་པ་ནོར་ལ་འཁྲུལ༔ ཀློང་གྲོལ་ངོ་བོའི་ངང་དུ་བཞག་པ་ལ༔ གང་ཤར་མ་བཅོས་ངང་ཀློང་གྲོལ་ལ་བྱ༔ དེ་མིན་རྣམ་པར་རྟོག་པ་ཐམས་ཅད་ཀུན༔ བཅོས་ ༦ཐྱཾ།༔ བསྒྱུར་གཉེན་པོས་བཅིངས་པར་ནོར་ན་འཁྲུལ༔ བསྒོམ་མེད་རྒྱ་ཡན་ཞེས་བྱ་འདི་ལྟ་སྟེ༔ སྒོམ་པའི་འཛིན་སྟངས་ཐམས་ཅད་རང་ཞིག་ནས༔ མི་སྒོམ་རང་སར་བཞག་པས་ངང་གནས་ཀྱི༔ ཡེ་ཤེས་རྒྱུན་ཆགས་ཤེས་རབ་གཏིང་གསལ་བ༔ ཡེངས་འཁྲུལ་ཐོབ་ཤོར་བྲལ་བ་དེ་ཀའོ༔ དེ་མིན་ལྟ་སྒོམ་བློ་ཡིས་བཏང་བ་ཡིས༔ ལུང་མ་བསྟན་དུ། འཁྲུལ་ན་ནོར་བ་ཡིན༔ ཐ་མལ་ཤེས་པ་ལམ་བྱེད་བྱ་བ་ནི༔ ད་ལྟའི་ཤེས་པ་སྐྱེ་འགགས་མེད་པ་འདི༔ ངོ་བོའི་ངང་དུ་ལམ་བྱེད་པ་ལ་བྱ༔ དེ་མིན་སེམས་ཅན་འཁྲུལ་པའི་རྒྱུ་ལྟ་བུར༔ ཉོན་མོངས་རང་ཁར་བྱུང་རྒྱལ་བྱེད་པ་ནོར༔ སྣང་སྟོང་ཟུང་འཇུག་ལམ་བྱེད་བྱ་བ་ནི༔ སྣང་བའི་ཆོས་ཀུན་ཡེ་སྟོང་ཆེན་པོའི་ཚུལ༔ ཚུལ་བཞིན་མཐོང་མཐར་རང་བྱུང་ཤེས་རབ་ཀྱིས༔ རང་ཤེས་རང་གསལ་ངང་གནས་དེ་ཀའོ༔ དེ་མིན་སྣང་བའི་ཆོས་རྣམས་ཐམས་ཅད་ཀུན༔ སྟོང་པའི་ཡིན་ལུགས་ཙམ་ཡང་མི་ཤེས་པར༔ སྒྱུ་མ་རྨི་ལམ་ལྟ་བུར་རྒྱས་འདེབས་པ༔ སྣང་སྟོང་ཟུང་འཇུག་བྱ་བ་ནོར་ལ་འཁྲུལ༔ རྫོགས་པ་ཆེན་པོའི་ལྟ་བ་ཞེས་བྱ་ནི༔ སྐུ་དང་ཡེ་ཤེས་ཤེས་རབ་ཡོན་ཏན་རྫོགས༔ སྣང་བའི་ཆོས་ཀུན་མ་བཅོས་རང་ཤར་རྫོགས། ཐམས་ ཅད་ངོ་བོ་ཉིད་དེ་ངོ་བོའི་ཀློང་༔ ཁྱབ་བྱེད་ཤེས་རབ་ཆེན་པོས་ངང་གསལ་བ༔ འདི་ནི་རང་བཞིན་རྫོགས་པ་ཆེན་པོ་སྟེ༔ དེ་མིན་སེམས་ཀྱི་རྣམ་པར་རྟོག་པ་ནི༔ སྐད་ཅིག་སྐྱེ་ཞིང་སྐད ཅིག་ཉིད་དུ་འགགས༔ འདི་ལ་རྫོགས་ཆེན་རློམ་པ་ཤིན་ཏུ་འཁྲུལ༔ དུས་ཀྱི་ཐ་མ་བསྟན་པ་ཉམས་དམའི་ཚེ༔ འདི་ལ་རྫོགས་ཆེན་ཟེར་བའི་བླུན་རྨོངས་འབྱུང་༔ འགའ་ཞིག་བདག་མེད་རྣམ་པ་གཉིས་ཀྱི་དོན༔ ཕྱོགས་ཙམ་མི་ཤེས་ཕྱི་ནང་བར་གསུམ་གྱི༔ སྣང་སེམས་གཉིས་འཛིན་རང་ཁར་སོར་བཞག་སྟེ༔ འཁོར་འདས་རང་རྒྱུད་པ་རུ་སྔར་བཞིན་གོལ༔ རྐྱེན་གང་མི ཐུབ་གསལ་རིག་ཕུར་ཁུང་ལ༔ རྫོགས་པ་ཆེན་པོར་འདོད་པ་དེ་ཡང་ནོར༔ ཞི་གནས་སེམས་ཀྱི་རྣམ་རྟོག་ཕྲ་རགས་ཀུན༔ གདོད་མ་གཞི་ཡི་རྒྱ་མཚོ་ཆེན་པོར་ཞི༔ སྡུག་བསྔལ་ཀུན་བྲལ་བདེ་བ་ཆེན་པོའི་ངང་༔ ངོ་བོ་རང་གསལ་སྤྲོས་པའི་མཐའ་དང་བྲལ༔ རྟོག་མེད་མཉམ་པ་ཉིད་ཀྱི་ངང་དུ་གནས༔ འདི་ནི་མཚན་མ་མེད་པའི་ཞི་གནས་སོ༔ དེ་མིན་རྟོག་པ་སྤངས་པའི་མི་རྟོག་པ༔ སྟོང་ལ་གསལ་ཞིང་རྟོག་པའི་སྒོ་འགགས་ཤིང་༔ བདེ་ཉམས་ལྷུག་གེ་བ་རུ་གནས་པ་ལ༔ ཞི་གནས་ངེས་པར་སྨྲ་བ་ཤིན་ཏུ་ནོར༔ ལ་ལས་གདིང་བཅས་དེ་ཐོག་ལུས་ནས་འཁྲུལ༔ ལྷག་མཐོང་ ཐ༹ཾ༔ སྣང་བ་གཟུང་དང་འཛིན་པའི་ཆོས༔ ཡུལ་མེད་ཟང་ཐལ་ངང་དུ་ཧར་སངས་ཏེ༔ སྒོམ་ཆོས་ལམ་གྱི་འཆིང་བ་ཀུན་གྲོལ་ནས༔ ཁྱབ་བརྡལ་ནམ་མཁའ་ལྟ་བུའི་ཀློང་ཆེན་པོར༔ རྣམ་པའི་རྣམ་པར་རྟོག་པ་སྐྱེ་འགག་ཅན༔ ངོ་བོ་ཡེ་གནས་ཡེ་ཤེས་རང་ངོར་སངས༔ ཁྱབ་བྱེད་ཤེས་རབ་ཆེན་པོ་མངོན་གྱུར་པ༔ ལྷག་མཐོང་རིག་པ་མཐའ་གྲོལ་ཆེན་པོ་ཡིན༔ དེ་མིན་དྲན་རིག་དབྱེར་མེད་ལྟ་སྒོམ་ཅན༔ རྨོངས་པས་ལྷག་མཐོང་འདོམས་པ་ནོར་ལ་འཁྲུལ༔ དེ་ལྟར་ནོར་ལ་འཁྲུལ་པའི་གེགས་རྣམས་ཀུན༔ ཤེས་ནས་མ་ནོར་ལམ་དུ་འཇུག་པ་ནི༔ ལག་ལེན་གནད་དུ་ཆེའོ་སྐལ་ལྡན་རྣམས༔ བླ་སློབ་གོ་བ་ལོག་ནས་ནོར་འཁྲུལ་ཏེ༔ རྣམ་པ་ལམ་བྱེད་དག་ལ་བསྔགས་པ་བརྗོད༔ ལྟ་བའི་མཐར་ཐུག་འདི་ལས་མེད་དོ་གླེང་༔ དེ་ཐོག་ལུས་ན་འཁོར་བར་རྟག་ཏུ་འཁོར༔ ཤེས་པར་གྱིས་ཤིག་པདྨའི་བརྒྱུད་འཛིན་རྣམས༔ མཎྜ་ལ་གུ་ཧྱ༔ ཀྱེ་ཧོཿ ཡང་ཅིག་གསོན་དང་སྐལ་ལྡན་ལས་ཅན་རྣམས༔ བླུན་པོས་རང་བསླུས་མགོ་འཁོར་ནོར་བའི་འཕྲང་༔ འགའ་ཞིག་ཐོས་ཆུང་མཆོག་འཛིན་བྱས་ནས་སུ༔ རྒྱུད་ཀྱི་གཞུང་དུ་བཤད་པའི་གོ་དོན་མཐོང་༔ འདི་ནི་བདག་གིས་ཤེས་སོ་རྟོགས་སོ་ སྙམ༔ ང་རྒྱལ་ཁེངས་སེམས་བསྐྱེད་བསྲིང་གཞན་ཁྱད་གསོད༔ ཆེ་གྲགས་བླ་མ་ཞིག་གིས་མཐོང་སར་སོང་༔ ངེས་པའི་དོན་ནི་ཚིག་གཅིག་མ་ལོན་ཀྱང་༔ ང་ནི་སློབ་དཔོན་དེ་ཡི འབངས་ཆེན་ཡིན༔ ཐེག་པ་ཆེ་གེ་མོ་འདི་ང་ཡིན་ནོ༔ ང་ཚོའི་ལྟ་བ་གཞན་ལས་ཁྱད་འཕགས་ཟེར༔ ཤེས་རྒྱུད་སྔར་ལས་སྤུ་གང་མ་འཕགས་ཏེ༔ སེང་གེ་ལྟ་བུར་ང་རྒྱལ་ལྡོག་པ་མེད༔ འདོད་སྲེད་ཁྱི་སྤྲང་ལྟ་བུར་ཆོག་མི་ཤེས༔ དེ་ཚོས་ཐེག་པར་བདག་བསྟོད་བྱ་བ་ན༔ རྒྱལ་པོ་ཆེན་པོའི་དཀོར་གྱི་བང་མཛོད་ཆེར༔ ཉམ་ཐག་སྤྲང་པོ་ཞིག་གིས་མཐོང་བའི་མོད༔ འདི་ནི་ང་ཡི་ལོངས་སྤྱོད་ཡིན་སེམས་ནས༔ གཞན་ལ་འུད་སྐད་ཆེར་སྒྲོགས་བྱེད་དང་མཚུངས༔ མ་འོངས་སྙིགས་མ་ལྔ་བདོའི་དུས་ཀྱི་ཚེ༔ མཐོང་ཆོས་རྟོགས་པ་ནོར་བ་འདི་གྲངས་མང་༔ འདི་རུ་འཁྲུལ་ཀུན་བདུད་དང་དམ་སྲིར་གོལ༔ འགའ་ཞིག་ལོ་གཅིག་ཙམ་ཡང་མ་བསྒོམ་པར༔ མི་སེམས་ཟབ་མོའི་ཆོས་ལ་ལོག་ལྟ་བྱེད༔ ཆོས་སྤང་ལས་ངན་བསགས་པས་དམྱལ་བར་ལྟུང་༔ འགའ་ཞིག་བརྟག་དཔྱད་བློས་གཞིག་ཆེར་བྱས་ནས༔ བདག་མེད་དོན་གོ་རྟོགས་པར་འཁྲུལ་ནས་སུ༔ ཞེན་ཆགས་འདོད་སྲེད་ང་རྒྱལ་སྡང་སེམས་སོགས༔ རང་སར་འདུག་ལ་ ཐེོཾ།༔ དཔྱོད་པར་བྱེད་པ་ཡིས༔ ཤེས་རབ་རྒྱང་ཞགས་བག་གིས་བསྒྲིབ་རྐྱེན་གྱིས༔ སྣང་དང་སྣང་མིན་དགེ་དང་སྡིག་པའི་ཆོས༔ རྒྱུ་དང་འབྲས་བུ་མེད་དོ་སྟོང་པ་ཉིད༔ སྙམ་ནས་ལྷ་སྒོམ་སྔགས་བཟླས་སྤངས་ནས་སུ༔ རྒྱུ་འབྲས་སྨད་ཅིང་དུས་རྣམ་ཐམས་ཅད་དུ༔ གཞན་དག་ལ་ཡང་དེ་ལྟར་ཅ་ཅོ་སྒྲོགས༔ ཉིན་དུས་ཆོས་བརྒྱད་བྱ་བར་བག་མེད་སྤྱོད༔ མཚན་མོ་གཏི་མུག་རོ་ཉལ་ངང་དུ་བཏང་༔ ལོ་ཟླ་ཙམ་དུ་བསྒོམ་པའི་མཉམ་བཞག་མེད༔ སྟོང་ཉིད་ལྟ་བ་རྟོགས་ཟེར་སྟོང་སྐད་མཐོ༔ ཡུལ་ལ་བདེན་ཞེན་ཟོག་ཏུ་སྤྱོད་པ་མངོན༔ ལྷ་མེད་འདྲེ་མེད་ཟེར་ཞིང་མཐོ་དཀར་བྱེད༔ རེ་དང་དོགས་པ་གཞན་ལས་ཆེ་བར་མངོན༔ ཆོས་རྣམས་སྒྱུ་མ་སྨིག་རྒྱུ་རྨི་ལམ་ལྟར༔ ངས་ནི་རྟོགས་སོ་ཟེར་ཞིང་ཐ་ནའང་༔ རྨི་ལམ་སྣང་བར་བདེན་ཞེན་བྱེད་པ་ཡོད༔ ཡུལ་མེད་ཟང་ཐལ་ཆེན་པོ་ངས་རྟོགས་ཟེར༔ མངོན་ཤེས་གཞན་ལ་འདོམས་པ་དེ་ཅིའི་ཕྱིར༔ འཆི་ཁ་ཐ་མལ་པ་ལས་ཉེན་པ་ནི༔ རྫུན་ཆེར་སྨྲ་དང་རྒྱུ འབྲས་ཁྱད་བསད་པའི༔ ཉེས་པ་ཆེན་པོ་དེ་ཡི་རྒྱུ་རྐྱེན་ནོ༔ ཡང་ཟབ་ཉམས་སུ་ལེན་པའི་སྐལ་ལྡན་ན༔ དང་པོ་ཐོས་པ་རྒྱ་མཚོ་མིག་ལྟ་བུ༔ བར་དུ་རྩེ་གཅིག་མཉམ་བཞག་རྗེས་ཐོབ་ཀྱི༔ གནད་དང་ལྡན་པས་ལོ་མང་བསྒོམ་པ་གནད༔ ཡང་ན་དང་པོ་གོ་བ་གོམས་འདྲིས་གནད༔ བར་དུ་རྒྱུད་ལ་མྱོང་བར་ཉམས་ལེན་གནད༔ ཐ་མ་རྟོགས་ནས་གྲོལ་སར་སྐྱེལ་བ་གནད༔ ཤེས་པ་ཙམ་གྱིས་ཆོག་སྙམ་སྙོམས་ལས་སུ༔ ལུས་ནས་བག་མེད་དབང་དུ་གྱུར་པ་ནི༔ དཔེར་ན་སྤྲང་པོས་རིན་ཆེན་གསེར་རྙེད་དེ༔ གསེར་དུ་མཐོང་ནས་ཕྲག་པར་རྟག་ཏུ་ཁུར༔ དེ་ལ་མ་སྤྱོད་མུ་གེས་ཤི་དང་མཚུངས༔ ད་ལྟ་ནད་དང་སྡུག་བསྔལ་མི་འདོད་རྐྱེན༔ བྱུང་དང་འབྱུང་བའི་ཡུལ་ཞིག་མཆིས་གྱུར་ན༔ ངན་སོང་སྡུག་བསྔལ་གྱིས་ཀྱང་ཅིའི་མི་