Tibetan
སྤེལ་རང་གི་ཉམས་སུ་ལོངས༔ སུ་མ་མགུ་ཡང་རང་བློ་བདེ་བས་ཆོག༔ ངོམས་པར་མ་བྱེད་གསང་བས་ཉམས་སུ་ལོངས༔ གཞན་གྱིས་གཤེ་སྐུར་འདེབས་ཤིང་ཡོ་ལོག་ཀྱང་༔ རང་དོན་ལྐོག་ཏུ་འགྲུབ་ན་དེས་ཆོག་གོ༔ རང་དོན་ཤོར་བའི་མདོ་མེད་ཀླད་མེད་ལ༔ ཀུན་གྱིས་བཀུར་ཡང་བསོད་ནམས་འཛད་རྒྱུ་ལས༔ ཅི་ཡང་མི་ཕན་ཕྱི་མར་དམྱལ་བར་ལྟུང་༔ ངོམས་པ་ཅན་གྱིས་དངོས་གྲུབ་འགྲུབ་པ་དཀོན༔ གསང་བར་འཛིན་པས་མི་འགྲུབ་གང་ཡང་མེད༔ ཚེ་འདི་མི་རྟག་སྤྲིན་བར་ཉི་ཞུར་ལ༔ ཆེ་འདོད་དྲག་འདོད་རེ་རློམས་ཟོབ་མ་ཆེ༔ རང་ལས་རང་ཉིད་སྐྱོབ་མཁན་གང་མེད་ན༔ གསོག་འཇོག་མ་བྱེད་མཆོད་སྦྱིན་ལས་ལ་ཐོངས༔ རྫུན་གྱི་མཐའ་མ་རང་ལ་འཁོར་བ་འོང་༔ མི་མགོ་མ་བསྐོར་རང་མགོ་ཐོན་ཐབས་གྱིས༔ བླ་བཙུན་མཚམས་སྒྲུབ་མི་བྱེད་དཀོར་འབྱམས་མཁན༔ རང་གི་བསྐྱེད་རྫོགས་བསྒྲུབ་པའི་ཡོན་ཏན་ལ༔ བསམ་མནོ་མི་བཏང་བ་རྣམས་སྨྱོན་པའོ༔ ལས་ཀྱི་རྣམ་སྨིན་སྨྱོན་པ་ཁྱི་ཁྲིད་འདྲ༔ དེ་ལྟར་མ་བྱེད་ལས་ཅན་སྐལ་ལྡན་རྣམས༔ གསང་བའི་སྒོ་སྡོམ་སྒོ་གསུམ་སྒྲུབ་ལ་བརྩོན༔ ཚེ་འདིར་མཆོག་གི་དངོས་གྲུབ་འཐོབ་པར་འགྱུར༔ ས་མ་ཡ༔ རྒྱ་རྒྱ་རྒྱ༔ པདྨ་བདག་གི་སྙིང་ཐིག་ཟབ་མོ་འདི༔ ཡེ་ཤེས་མཚོ་རྒྱལ་ཁྱོད་ཀྱིས་ཡི་གེར་ཐོབས༔ ཧོཿ གསོན་ཞིག་དགོངས་ཤིག་མཁའ་འགྲོ་ཆོས་སྐྱོང་ ཐེོཾ༔ ཚོགས༔ སྔགས་ཀྱི་སྲུང་མ་ཨེ་ཀ་ཙ་ཏི་མ༔ མ་ཅིག་དཔལ་ལྡན་ལྷ་མོ་རེ་མ་ཏཱི༔ མ་མོ་བཅུ་གཉིས་དབང་མོ་ཉེར་བརྒྱད་དང་༔ བསྭེ་ལྕགས་དུང་གི་སྐྱེས་བུ་འཁོར་དང་བཅས༔ བསེ་མོ་མཆེད་བཞི་བཅུ་ཕྲག་ཉེར་ལྔ་དང་༔ རེ་ཏཱི་སྟོང་དང་རྩ་གཉིས་འཁོར་དང་བཅས༔ བདུད་མགོན་སེང་གདོང་ཡབ་ཡུམ་བཀའ་འཁོར་དང་༔ གནོད་སྦྱིན་ཤན་པ་དམར་ནག་ཡབ་ཡུམ་འཁོར༔ བཙན་དམར་སྲོག་གི་ཤན་པ་སྐྱ་གཅིག་དང་༔ བཀའ་འཁོར་ལྷ་སྲིན་སྡེ་བརྒྱད་འཁོར་བཅས་ལ༔ བཀའ་འདི་གཏད་དོ་གཉེར་རོ་བཅོལ་ལོ་རྒྱ༔ ཕྱོགས་རྣམས་ཀུན་ཏུ་དར་ཞིང་རྒྱས་པར་མཛོད༔ ཚུལ་བཞིན་ཉམས་སུ་ལེན་པའི་གང་ཟག་ལ༔ བདེན་པ་མཆོག་སྟོན་ཕྲིན་ལས་ཐོགས་མེད་སྒྲུབས༔ ཕ་མ་བུ་ཚ་བཞིན་དུ་གྲོགས་མཛོད་ལ༔ ཕྱི་ནང་གསང་བའི་བར་ཆད་ཐམས་ཅད་ཟློག༔ དགེ་ལེགས་ཡར་ངོའི་ཟླ་ལྟར་འཕེལ་རྒྱས་མཛོད༔ མི་སྲུན་བཀའ་ལོག་དམ་ཉམས་བསྟན་བཤིག་དང་༔ ལྟ་ལོག་ལོག་སྤྱོད་རས་ཆོད་ཟོབ་རྫུན་མཁན༔ སྐུར་འདེབས་གླེང་མོ་མཁན་དང་སྒྲོ་འདོགས་མཁན༔ མ་ལུས་མ་འགྱང་སྲོག་རྩ་དམར་པོ་ཆོད༔ སྙིང་ཁྲག་ཐང་ལ་ཕོས་ཤིག་ས་མ་ཡ༔ དབང་པོ་བསྣུབ་ལ་སྐྱེ་རྒྱུད་རྩད་ནས་ཆོད༔ དམ་ཚིག་གཉན་གྱི་ཕྲིན་ལས་འདི་ བཅོལ་ལོ༔ དམ་ཚིག་དབང་གིས་ཕྲིན་ལས་སྒྲུབ་མཛོད་ཅིག༔ ཚེ་ལོ་ཉི་ཤུ་པ་ལ་མ་ཐུག་བར༔ བཀའ་འདིའི་བསྟན་པ་མི་ནུབ་དར་རྒྱས་མཛོད༔ ཐུབ་པར་སྲུངས་ཤིག་བཛྲ་ས་མ་ཡ༔ ང་ཡི་ཐུགས་སྤྲུལ་གར་དབང་བདུད་འཇོམས་གླིང་༔ སྐྱེས་མཆོག་དམ་པ་དེ་དང་འཕྲད་པར་ཤོག༔ གསེར་སྨད་རྔ་རོལ་སྟག་རྩེས་སྤྲད་སོ་གྱིས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ གསང་རྒྱ༔ བཀའ་རྒྱ༔ དགོངས་རྒྱ༔ ཟབ་རྒྱ༔ གཉན་རྒྱ༔ བརྡ་ཐིམ༔ ས་མ་ཡ༔ རྒྱ་རྒྱ་རྒྱ༔ ཞེས་པ་སྔགས་ནག་གར་དབང་བདུད་འཇོམས་རྡོ་རྗེའམ་གླིང་པ་འོད་གསལ་མི་འགྱུར་རྡོ་རྗེས་གསེར་སྨད་རྔ་རོལ་སྟག་རྩེའི་གཡས་ལོགས་རྡོ་རྗེ་བྲག་ནས་བཏོན་ཏེ་མི་ལོ་བཞི་ལ་བཀའ་རྒྱས་བཏབ་ནས། མཐར་སྨར་སྟོད་འབྲོས་ཕུག་མཁའ་འགྲོའི་འདུ་གླིང་དུ་དག་པར ཕབ་པའི་ཡི་གེ་པ་ནི་ཧོར་གྱི་བནྡེ་ཕུན་ཚོགས་བཀྲ་ཤིས་སོ །དགེའོ། །དགེའོ །དགེའོ། །སརྦ་མངྒ་ལཾ། །། ༈ ཨེ་མ། ཨོ་རྒྱན་ཆེན་པོའི་ཐུགས་ཐིག་ཟབ་མོ་འདི། རྒྱས་པར་ཕབ་པའི་སྟབས་ཀ་མ་ལྡན་ཡང་། །གལ་ཆེན་ཐམས་ཅད་ཚང་བར་ཕབ་པ་ཡང་། །ཆད་ལྷག་ཁ་སྐོང་ཙམ་རེ་མ་གཏོགས་པ། །ཕ་ཆོས་བུ་ཡིས་མ་བསླད་ཕྱི་རབས་རྣམས། །ཀུན་གྱིས་ ཐོ༔ སྤངས་པའི་མ་ནུས་སྤྲང་པོ་ང་། །ཕ་ཅིག་ཨོ་རྒྱན་ཆེན་པོའི་གཏེར་དང་འཕྲད། །དྲི་མེད་དམ་ཆོས་རྒྱ་མཚོའི་དགོངས་མཛོད་བརྡོལ། །དཔའ་བོ་མཁའ་འགྲོ་རྒྱ་མཚོས བུ་ལྟར་བསྐྱངས། །འཁོར་སློབ་སྐལ་ལྡན་ཆོས་ཉིད་བཙན་ས་ཟིན། །དངོས་མེད་ལྷ་འདྲེ་དཀར་ཕྱོགས་ཆོས་ལམ་བཀོད། །སླར་ཡང་ཨོ་རྒྱན་པདྨ་འབྱུང་གནས་ཀྱིས། །ཞལ་གཟིགས་ལུང་བསྟན སྨིན་གྲོལ་རྟག་ཏུ་ཐོབ། །དེ་ལྟར་བསམ་ན་སྤྲང་བན་ཞེ་བློ་བདེ། །ཉེས་འགལ་ལྷད་དང་བྲལ་བའི་ཆོས་འདི་ཉིད། །ཨོ་རྒྱན་ཆེན་པོས་མངོན་སུམ་བསྟན་པ་ཡིན། །གཞི་དབྱིངས་བཀོད་པ་ལྷུན་གྲུབ་གཞལ་ཡས་སུ། །ཆོས་ཉིད་དོན་གྱི་རིག་སྐུ་རང་ངོར་མཇལ། །སྣང་བ་ལྷ་ཡི་ཞིང་ཁམས་ཡེ་གྲུབ་ལ། །ཡེ་རིག་ཆོས་སྐུ་གདོད་མའི་མགོན་པོ་ཡི །རྩལ་སྣང་སྒྱུ་འཕྲུལ་དྲྭ་བའི་འཁོར་ལོར་རིག། ལྷ་དང་དཀྱིལ་འཁོར་རང་ངོར་ཐག་ཆོད་དོ། །བྱ་རྩོལ་མེད་པའི་ཆོས་ཉིད་བདག་གིས་རྙེད། །སུ་མ་མགུ་ཡང་རང་ཉིད་ཞེ་བློ་བདེ །དགེ་འདིས་སངས་རྒྱས་བསྟན་པ་རབ་རྒྱས་ནས། །ནག་ཕྱོགས བདུད་ཀྱི་དབང་པོ་བསྣུབ་གྱུར་ཅིག །སརྦ་མངྒ་ལཾ།། T1604 - 496 ༄༅། །ཨོཾ་སྭསྟི། སྤྲུལ་པའི་གཏེར་ཆེན་བདུད་འཇོམས་གླིང་པའི་ཟབ་གཏེར་ཟབ་གསང་མཁའ་འགྲོའི་སྙིང་ཐིག་གི་ཆོས་སྡེ་ལས། གླེགས་བམ། ༼ཛ༽ པ་འདིར། དབུ་ཤོག་ལྡེབ་གཅིག་གིས་ཐོག་དྲངས་ཏེ། ཐུགས་སྒྲུབ་གསང་བའི་རྒྱ་ཅན་དཔལ་ཆེན་རྡོ་རྗེ་གཞོན་ནུའི་སྒྲུབ་སྐོར་ལ་གཉིས་ལས ཐོག་མར། དཔལ་ཆེན་ཕྲིན་ལས་བཅུ་བདུན་གྱི་ཁ་བྱང་ཐེམ་གྱི་བང་མཛོད་ལྡེབ་༢༡ གཉིས་པ་རྡོ་རྗེ་གཞོན་ནུའི་གསང་སྒྲུབ་ལས་བཞི་ལྷུན་གྲུབ་ལ་ནང་གསེས་རྩ་བ་རྡོ་རྗེ་གཞོན་ནུའི་གཙོ་སྒྲུབ་དང་། ཡན་ལག་སྲས་མཆོག་ཀཱི་ལ་རིགས བཞི། བདུད་འདུལ་ཁྲོ་བོ་བཅུ། རཏྣ་ཀཱི་ལ་ཡའི་ཞར་བྱུང་སྡེ་ལྔ་ནོར་སྒྲུབ་བཅས་སོ་སོའི་སྒོས་སྒྲུབ སྒོས་དབང་། སྒོས་ཀྱི་མན་ངག་ལས་ཚོགས་སོགས་ནང་གསེས་ལེ་ཚན་དཀྱུས་གཅིག་ཏུ་འཁོད་པའི་ཆོས་སྡེ་གཅིག་ལ་ལྡེབ་༢༢༥ བཅས། པོད་འདིར་ཆོས་ཚན་གཉིས་ལ་ལྡེབ་༢༤༧ དང་། གླེགས་བམ་གྱི་དཀར་ཆག་རང་ཉིད་ལྡེབ ༡ བཅས་བསྡོམས་ལྡེབ་གྲངས ༢༤༨ བཞུགས། ༈ གྲུབ་པའི་འཁོར་སྒྱུར་བདུད་འཇོམས་གླིང་པ་ཡི། །ཟབ་གཏེར་གསང་བའི་ཆོས་མཛོད་ཡིད་བཞིན་ནོར། །ཀུན་བཟང་མིང་གིས་སྤར་དུ་བཏབ སྤེལ་དགེས། །ཟབ་ཆོས་ཕྲིན་ལས་མི་ནུབ་རྟག་ཁྱབ་ཤོག ༈ པདྨའི་རིང་ལུགས་སྔ་འགྱུར་རྫོགས་པ་ཆེ། །ངེས་དོན་སྙིང་པོའི་ཤིང་རྟ་བདུད་འཇོམས་གླིང་།གང་གི་ཟབ་གཏེར བསྟན་པ་སྲིད་མཐའི་བར། །མི་ནུབ་བཤད་དང་སྒྲུབ་པས་འཛིན་གྱུར་ཅིག །དགེའོ།། མ T11604 - 498