Tibetan
ཤ་བརྗོད་པ་ལས་དཔྱི་མི་ཐོག །ལྤགས་ལ་ནི་ལྤགས་བརྗོད་པ་ལས་དཔྱི་མི་ཐོག །རུས་པ་ལ་རུས་པ་བརྗོད་པ་ལས་དཔྱི་མི་ཐོག །རྩ་རྒྱུས་ལ་རྩ་རྒྱུས་བརྗོད་པ་ལས་དཔྱི་མི་ཐོག །དེ་རྣམས་ལ་རང་རང་གི་མིང་བརྗོད་པ་ལས་དཔྱི་མི་ཐོག །དེ་ལྟར་སོ་སོར་བྲལ་བ་ལ་མི་ཐོག་ཀྱང་། ལྷན་དུ་ཚོགས་པ་ལ་བཏགས་པ་ཡིན་སྙམ་ན། སྲོག་ཆགས་ཞིག་གི་དཔྱི་བཅད་ནས་རྡུལ་དུ་ཕབ རྡུལ་རྡུལ་ཕྲན་དུ་ཕབ། རྡུལ་ཕྲན་ཆ་མེད་དུ་བཏང་ནས་ལྷོ་རྒྱལ་འཛམ་བུའི་གླིང་གི་མི་རྣམས་ལ་བསྟན་ཀྱང་རྡུལ་བརྗོད་པ་ལས་དཔྱི་མི་ཐོག། དེ་ཉིད་ཆུ་ཡིས་སྦྲས་པའི་འདག་པ་ལ་ཡང་འདག་པ་བརྗོད་པ་ལས་དཔྱི་མི་ཟེར། དེའི་ཕྱིར་ན་དཔྱིའི་གདགས་གཞི་ཡུལ་མེད་དུ་སྟོང་སོང་བ་ཡིན་ནོ། །དེ་བཞིན་དུ་བརླ་ཡང་མིང་གི་གདགས་གཞིའི་སྟེང་དུ་ཚུགས་ཐུབ་ཏུ་གྲུབ་པ་ཞིག་ཡོད་པ་ཡིན་སྙམ་ན། ཕྱིའི་ལྤགས་ལ་ལྤགས་བརྗོད་པ་ལས་བརླ་མི་ཐོག །བར་གྱི་ཤ་ལ་ཤ་བརྗོད་པ་ལས་བརླ་མི་ཐོག །ནང་གི་རུས་པ་ལ་རུས་པ་བརྗོད་པ་ལས་བརླ་མི་ཐོག །རྩ་རྒྱུས་ལ་རྩ་རྒྱུས་བརྗོད་པ་ལས་བརླ་མི་ཐོག །གསང་བ་རྐང་ལ་རྐང་བརྗོད་པ་ལས་བརླ་མི་ཐོག །དེ་ལྟར་སོ་སོར་བྲལ་བ་ལ་བརླ་མི་ཐོག་ཀྱང་། ལྷན་དུ་ ཚོགས་པ་ལ་བརླ་བཏགས་པ་རེད་སྙམ་ན། སྲོག་ཆགས་ཞིག་གི་བརླ་བཅད་ནས་རྡུལ་དུ་ཕབ རྡུལ་རྡུལ་ཕྲན་དུ་ཕབ། རྡུལ་ཕྲན་ཆ་མེད་དུ་བཏང་ནས་ལྷོ་རྒྱལ་འཛམ་བུའི་གླིང་གི་མི་རྣམས་ལ་བསྟན་ཀྱང་རྡུལ་བརྗོད་པ་ལས་བརླ་མི་ཐོག །དེ་ཉིད་ཆུ་ཡིས་སྦྲུས་པའི་འདག་པ་ལ་ཡང་འདག་པ་བརྗོད་པ་ལས་བརླ་མི་ཐོག །དེའི་ཕྱིར་ན་བརླའི་གདགས་གཞི་ཡུལ་མེད་དུ་སྟོང་སོང་བ་ཡིན་ནོ། །དེ་བཞིན་དུ་རྗེ་ངར་ཡང་གདགས་གཞིའི་སྟེང་དུ་ཚུགས་ཐུབ་ཏུ་གྲུབ་པ་ཞིག་ཡོད་པ་ཡིན་སྙམ་ན། ཕྱིའི་ལྤགས་ལ་ལྤགས་བརྗོད་པ་ལས་རྗེ་ངར་མི་ཐོག། །བར་གྱི་ཤ་ལ་ཤ་བརྗོད་པ་ལས་རྗེ་ངར་མི་ཐོག །ནང་གི་རུས་པ་ལ་རུས་པ་བརྗོད་པ་ལས་རྗེ་ངར་མི་ཐོག །རྩ་རྒྱུས་ལ་རྩ་རྒྱུས་བརྗོད་པ་ལས་རྗེ་ངར་མི་ཐོག །གསང་བ་རྐང་ལ་རྐང་བརྗོད་པ་ལས་རྗེ་ངར་མི་ཐོག དེ་ལྟར་སོ་སོར་བྲལ་བ་ལ་རྗེ་ངར་མི་ཐོག་ཀྱང་། ལྷན་དུ་ཚོགས་པ་ལ་རྗེ་ངར་བཏགས་པ་ཡིན་སྙམ་ན། སྲོག་ཆགས་ཞིག་གི་རྗེ་ངར་བཅད་ནས་རྡུལ་དུ་ཕབ། རྡུལ་རྡུལ་ཕྲན་དུ་ཕབ། རྡུལ་ཕྲན་ཆ་མེད་དུ་བཏང་ནས་ལྷོ་རྒྱལ་འཛམ་བུའི་གླིང་གི་མི་རྣམས་ལ་བསྟན་ཀྱང་རྡུལ་བརྗོད་པ་ལས་རྗེ་ངར་མི་ཐོག །དེ་ཉིད་ཆུ་ཡིས་སྦྲས་པའི་འདག་པ་ལ་ཡང་འདག་པ་བརྗོད་པ་ལས་རྗེ་ ༄༅། །ངར་མི་ཐོག །དེའི་ཕྱིར་ན་རྗེ་ངར་གྱི་མིང་གི་གདགས་གཞི་ཡུལ་མེད་དུ་སྟོང་སོང་བ་ཡིན་ནོ། །ཕྱིའི་རི་བོ༴སོགས། མ་ཡིན། དེ་བཞིན་དུ་ཕྱི་སྣོད་ཀྱི་འཇིག་རྟེན ལའང་རི་བོ་ལྟ་བུ་ལ་མཚོན་ན། རི་བོའི་གདགས་གཞིའི་སྟེང་དུ་ཚུགས་ཐུབ་ཏུ་གྲུབ་པ་ཞིག་ཡོད་པ་ཡིན་སྙམ་ན། ས་ལ་ནི་ས་ཟེར་བ་ལས་རི་བོ་མི་ཐོག །དེ་བཞིན་དུ་རྩྭ་ལ་རྩྭ་བརྗོད་པ་ལས་རི་བོ་མི་ཟེར། ཤིང་ལ་ཤིང་བརྗོད་པ་ལས་རི་བོ་མི་ཟེར རྡོ་ལ་ནི་རྡོ་བརྗོད་པ་ལས་རི་བོ་མི་ཟེར། བྲག་ལ་བྲག་བརྗོད་པ་ལས་རི་བོ་མི་ཟེར། ཆུ་ལ་ཆུ་བརྗོད་པ་ལས་རི་བོ་མི་ཟེར། རླན་ལ་རླན་བརྗོད་པ་ལས་རི་བོ་མི་ཐོག །དེ་ལྟར་སོ་སོར་བྲལ་བ་ལ་རི་བོ་མི་ཐོག་ཀྱང་། ལྷན་དུ་ཚོགས་པ་ལ་རི་བོ་བཏགས་པ་ཡིན་སྙམ་ན། ཆ་གཅིག་ཚུར་བཅད་ནས་ལྷོ་རྒྱལ་འཛམ་བུའི་གླིང་གི་མི་ལ་བསྟན་ཀྱང་ས་བོང་རྡོ་བོང་བརྗོད་པ་ལས་རི་བོ་མི་ཐོག །དེ་ཉིད་རྡུལ་དུ་ཕབ། རྡུལ་རྡུལ་ཕྲན་དུ་ཕབ། རྡུལ་ཕྲན་ཆ་མེད་དུ་བཏང་ནས་ལྷོ་རྒྱལ་འཛམ་བུའི་གླིང་གི་མི་རྣམས་ལ་བསྟན་ཀྱང་རྡུལ་བརྗོད་པ་ལས་རི་བོ་མི་ཐོག །ཆུ་ཡིས་སྦྲུས་པའི་འདག་པ་ལ་ཡང་འདག་པ་བརྗོད་པ་ལས་རི་བོ་མི་ཟེར། དེའི་ཕྱིར་ན་རི་བོའི་མིང་གི་གདགས་གཞི་ཡུལ་མེད་དུ་སྟོང་སོང་བ་ ཡིན་ནོ། །ཁང་ཁྱིམ་གྱི༴སོགས། མ་གྲུབ་པ་ཡིན། དེ་བཞིན་དུ་ཁང་ཁྱིམ་གྱི་གདགས་གཞིའི་སྟེང་དུ་ཚུགས་ཐུབ་ཏུ་གྲུབ་པ་ཞིག་ཡོད་པ་ཡིན་སྙམ་ན། ས་ནི་ས་བརྗོད་པ་ལས་ཁང་པ་མི་ཟེར། རྡོ་ནི་རྡོ་བརྗོད་པ་ལས་ཁང་པ་མི་ཟེར རྩིག་པ་ལའང་རྩིག་པ་བརྗོད་པ། ཀྭ་བ་ནི་ཀྭ་བ་བརྗོད་པ་ལས་ཁང་པ་མི་ཟེར། གཤམ་ནི་གཤམ་བརྗོད་པ་ལས་ཁང་པ་མི་ཟེར། གདུང་མ་ལ་གདུང་མ་བརྗོད་པ་ལས་ཁང་པ་མི་ཟེར། དེ་བཞིན་དུ་ཕྱི་ལ་ཕྱི་བརྗོད་པ་ལས་ཁང་པ་མི་ཟེར། ནང་ན་ནང་བརྗོད་པ་ལས་ཁང་པ་མི་ཐོབ །དེ་ལྟར་སོ་སོར་བྲལ་བ་ལ་ཁང་པ་མི་ཐོག་ཀྱང་ལྷན་དུ་ཚོགས་པ་ལ་ཁང་པ་བཏགས་པ་ཡིན་སྙམ་ན། དེ་དག་དུམ་བུ་གཅིག་ཚུར་བཅད་ནས། འཛམ་བུའི་གླིང་གི་མི་ལ་བསྟན་ཀྱང་ས་བོང་རྡོ་བོང་བརྗོད་པ་ལས་ཁང་པ་མི་ཟེར། དེ་ཉིད་རྡུལ་དུ་ཕབ། རྡུལ་རྡུལ་ཕྲན་དུ་ཕབ། རྡུལ་ཕྲན་ཆ་མེད་དུ་བཏང་ནས་ལྷོ་རྒྱལ་འཛམ་བུའི་གླིང་གི་མི་རྣམས་ལ་བསྟན་ཀྱང་རྡུལ་བརྗོད་པ་ལས་ཁང་པ་མི་ཐོག །ཆུ་ཡིས་སྦྲས་པའི་འདག་པ་ལའང་འདག་པ་བརྗོད་པ་ལས་ཁང་པ་མི་ཐོབ། །དེའི་ཕྱིར་ན་ཁང་པའི་གདགས་གཞི་ཡུལ་མེད་དུ་སྟོང་སོང་བ་ཡིན་ནོ །མི་རྟ་ཁྱི༴སོགས། དེས་སྟོན་ཏོ། །དེ་བཞིན་དུ་མི་དང་རྟ་དང་ཁྱིའི་གདགས ༄༅། །གཞིའི་སྟེང་དུ་ཚུགས་ཐུབ་ཏུ་གྲུབ་པ་ཞིག་ཡོད་པ་ཡིན་སྙམ་ན། མིག་ལ་མིག་བརྗོད་པ་ལས་མི་དང་རྟ་དང་ཁྱི་མི་ཐོག །རྣ་བ་ལ་རྣ་བ་བརྗོད་པ་ལས་མི་དང་རྟ དང་ཁྱི་མི་ཐོག །སྣ་ལ་སྣ་བརྗོད ལྕེ་ལ་ལྕེ་བརྗོད དེ་དག་རྣམས་ཀྱི་ཕྱིའི་ལྤགས་ལ་ལྤགས་བརྗོདཿ བར་གྱི་ཤ་ལ་ཤ་བརྗོད༔ ཁྲག་ལ་ཁྲག་བརྗོད༔ ནང་གི་རུས་པ་ལ་རུས་པ་བརྗོདཿ གསང་བ་རྐང་ལ་རྐང་བརྗོདཿ རྩ་ལ་རྩ་བརྗོདཿ རྒྱས་པ་ལ་རྒྱས་པ་བརྗོད་རྣམ་པར་ཤེས་པ་དང་བཅས་པ་ལའང་རང་རང་གི་མིང་བརྗོད་པ་ལས་མི་དང་རྟ་དང་ཁྱི་མི་ཐོག །དེའི་ཕྱིར་ན མི་རྟ་ཁྱི་དང་བཅས་པའི་མིང་གི་གདགས་གཞི་ཡུལ་མེད་དུ་སྟོང་སོང་བ་ལྟར་ཐམས་ཅད་དེས་ཀྱང་སྟོན་ཏོ་གསུངས་སོ། །དཔེར་ན་རྫས་རྣམས༴སོགས། བཞིན་ནོ། །དཔེར་ན་རྫས་རྣམས་ལའང་རྔ་ལྟ་བུ་ལ་མཚོན་ན ཤིང་ལ་ཤིང་བརྗོད་པ་ལས་རྔ་མི་ཐོག །ཀོ་བ་ལ་ཀོ་བ་བརྗོདཿ ཕྱི་ལ་ཕྱི་བརྗོད༴ ནང་ལ་ནང་བརྗོད་པ་ལས་རྔ་མི་ཐོག །དེའི་ཕྱིར་ན་རྔའི་གདགས་གཞི་ཡུལ་མེད་དུ་སྟོང་སོང་བ་ཡིན། དེ་བཞིན་དུ་གྲི་ཡང་ལྕགས་ལ་ལྕགས་བརྗོད་པ་ལས་གྲི་མི་ཐོག །སོ་ལ་སོ་བརྗོདཿ ལྟག་པ་ལ་ལྟག་པ་བརྗོདཿ རྩེ་མོ་ལ་རྩེ་མོ་བརྗོདཿ ཡུ་བ་ལ་ཡུ་བ༔ དེའི་ཕྱིར་ན་གྲིའི་གདགས་གཞི་ཡུལ་མེད་དུ་སྟོང་སོང་བ་ཡིན མིང་འགྱུར་བ་ཡང་དཔེར་ན་གྲི་ཡིས་འབུག་བྱས་ཚེ་འབུག་བརྗོད་པ་ལས་གྲི་ཟེར་བ་མ་ཡིན། འབུག་གིས་ཁབ་བྱས་ཚེ་ཁབ བརྗོད་པ་ལས་འབུག་མི་ཟེར། དེ་བཞིན་དུ་མིང་སྔ་མ་ཐམས་ཅད་ཡུལ་མེད་དུ་སོང་བ་བཞིན། འདམ་བུ་གཅིག་ཁོག་སྟོང་ན་ཐམས་ཅད་སྟོང་པ་རུ་ཤེས་དགོས། དེའི་ཕྱིར་ན་དོན་ལ་ཐམས་ཅད་བློས་བཏགས་པ་ཙམ་ལས་བདེན་གྲུབ་ཅན་དུ་གྲུབ་པ་རྡུལ་ཕྲ་རབ་ཀྱི་ཆ་ཙམ་ཡང་མེད་པའི་ཚུལ་ཤེས་པར་གྱིས་ཤིག །དེ་ལྟར་གང་ཟག་གི་བདག་ཅེས་བྱ་བ་དང་མིང་གི་གདགས་གཞི་བཙལ་བ་འདི་གཉིས་ཀ་བདག་གི་བླ་མ་འཕགས་མཆོག་ཐུགས་རྗེ་ཆེན་པོས་རྨི་ལམ་གྱི་སྐབས་སུ་གསུངས་པ་ལ་བརྟེན་ནས་བདག་གིས་རྟོགས་པ་ཡིན་ནོ་གསུངས་སོ། །དེ་ནས་སྟོང་པ་ལས་སྣང་ཕྱོགས་རྟེན་འབྲེལ་གྱི་རོལ་པར་འཆར་ཚུལ་ནི། སླར་ཡང་ཨོ་རྒྱན༴སོགས། སྣང་བ་ལྟ་བུའོ། །སླར་ཡང་ཨོ་རྒྱན་མཚོ་སྐྱེས་རྡོ་རྗེ་ཡེ་ཤེས་སྒྱུ་མའི་སྐུ་དང་མཇལ་བའི་ཚེ་ན་གདམས་པ་སྣང་བ་སྒྱུ་མར་སྦྱོང་བའི་གདམས་པ་རྒྱུ་རྐྱེན་འཕྲད་པའི་རྟེན་འབྲེལ་དུ་ངོ་སྤྲོད་པ་ཡིན། དེ་ལ་ཨོ་རྒྱན་ཆེན་པོས སྒྱུ་མ་སྨིག་རྒྱུ་རྨི་ལམ་གཟུགས་བརྙན་དང་། །དྲི་ཟའི་གྲོང་ཁྱེར་བྲག་ཆ་ ༄༅། །ལྟ་བུར་སྤྱོད། །ཆུ་ཟླ་ཆུ་བུར་མིག་ཡོར་སྤྲུལ་པ་སོགས། །ཤེས་བྱ་སྒྱུ་མའི་དཔེ་བཅུ་དེ་བཞིན་དུ། །འཁོར་འདས་ཆོས་རྣམས་ཁྱོད་ཀྱིས་ཤེས་པར་གྱིས། གསུངས་པ་བཞིན། རྟེན་འབྲེལ་སྒྱུ་མའི་དཔེ་བཅུར་ངོ་སྤྲོད་པ་ནི། རྒྱུ་གཞི་དབྱིངས་དྭངས་གསལ་འཆར་རུང་གི་ནུས་པ་ཅན་ལ་རྒྱུ་བྱས། རྐྱེན་ངར་འཛིན་གྱི་ཤེས་པ་དང་འཕྲལ་བྱུང་གི་རྣམ་པར་རྟོག་པ་ལ་རྐྱེན་བྱས། དེ་གཉིས་རྒྱུ་རྐྱེན་དུས་འཛོམ་པའི་ཚེ་ན་རྟེན་འབྲེལ་སྣ་ཚོགས་ཆོས་ཁམས་རྒྱ་མཚོའི་སྣང་བ་མེད་བཞིན་དུ་འབྱུང་བ་ཡིན། རྟེན་གང་ལ་བརྟེན་ན་གཞི་ལ་བརྟེན། འབྲེལ་སུ་དང་འབྲེལ་ན་གཞི་དང་སྣ་ཚོགས་ཆོས་ཁམས་རྒྱ་མཚོའི་སྣང་བ་གཉིས་མེད་ཟུང་འཇུག་ཏུ་འབྲེལ།འབྱུང་ཅི་འབྱུང་ན་སྣ་ཚོགས་ཆོས་ཁམས་རྒྱ་མཚོའི་སྣང་བ་མེད་བཞིན་དུ་འབྱུང་བ་ཡིན། དེའི་དཔེ་སྒྱུ་མ་ལྟ་བུ་ཞིག་ཡིན་ཏེ དཔེར་ན་སྒྱུ་མ་མཁན་གྱི་སྐྱེས་བུ་དེ་ཡུལ་ངམ་འབྲོག་འཇིགས་སུ་རུང་བ་ཤིང་ཚེར་མ་ཅན་དང་རྡོ་གསེག་མ་ཅན་རི་མཐོ་ལུང་ཟབ་ཞིག་ཏུ་ཕྱིན་ཏེ། ལྟད་མོ་མཁན་མང་པོ་ཞིག་བསྡུས་ནས སྒྱུ་མའི་རྫས་སྔགས་ནམ་མཁའ་ལ་གཏོར་ནས་བསམ་བྱ་ནི། རྐྱ་མིའི་ཉིན་ལམ་བཅོ་བརྒྱད་ཀྱིས་བསྐོར་སའི་ཐང་ཆེན་པོ་ཞིག་གི་དབུས་སུ་མཁར་གྲུ་ བཞི་དང་སྒོ་བཞི་དགུ་ཐོག་གན་ཛ་ར་དང་བཅུ་ཐོག་ཡོད་པ། ཕྱིའི་ལྕགས་རི་རིན་པོ་ཆེ་སྣ་ཚོགས་ལས་གྲུབ་པས་བསྐོར་བའི་ནང་དུ་བཟོ་རིགས་ཆེན་པོ་བཅོ་བརྒྱད་ཡོད་པ། ས་གཞིའི་ཁམས ཐམས་ཅད་མེ་ཏོག་དཀར་པོ་དང་དམར་པོ་དང་སེར་པོ་དང་ལྗང་ཁུ་དང་སྔོན་པོས་ཁེབས་པ། བྱ་དང་རི་དྭགས་སྤུ་སྡུག་མཛེས་ཤིང་ཡིད་དུ་འོང་བས་གང་བ། རྒྱ་བོད་ཧོར་གསུམ་གྱི་མི་དང་རྟ་དང་། གླང་པོ་ཆེ་ལ་སོགས་པ་བསམ་གྱིས་མི་ཁྱབ་པའི་གྱེས་འདུ་རྒྱུན་མི་ཆད་པ་ཞིག་བསམ་པས། ཕ་རོལ་བ་ལྟད་མོ་མཁན་རྣམས་ཀྱི་མིག་སྣང་ལ་དེ་བཞིན་དུ་སྣང་བ་ཡིན། དེ་ཡང་རྒྱུ རྐྱེན་འཕྲད་པའི་རྟེན་འབྲེལ་ལས་བྱུང་སྟེ། རྒྱུ་ནམ་མཁའ་དྭངས་གསལ་འཆར་རུང་གི་ནུས་པ་ཅན་དང་། ཕ་རོལ་གྱི་མིག་གཟུགས་འཆར་རུང་གི་ནུས་པ་ཅན་དེ་ལ་རྒྱུ་བྱས རྐྱེན་སྒྱུ་མའི་རྫས་སྔགས་དང་སྒྱུ་མ་མཁན་གྱི་བསམ་བྱ་ལ་རྐྱེན་བྱས། དེ་གཉིས་རྒྱུ་རྐྱེན་དུས་འཛོམ་པའི་ཚེ་ན་རྟེན་འབྲེལ་སྒྱུ་མའི་སྣང་བ་མེད་བཞིན་དུ་འབྱུང་། རྟེན་གང་ལ་བརྟེན་ན་ནམ་མཁའ་ལ་བརྟེན འབྲེལ་སུ་དང་འབྲེལ་ན་ནམ་མཁའ་དང་སྒྱུ་མའི་སྣང་བ་གཉིས་མེད་ཟུང་འཇུག་ཏུ་འབྲེལ། འབྱུང་ཅི་འབྱུང་ན་སྒྱུ་མའི་སྣང་བ་མེད་བཞིན་དུ་འབྱུང་བ་ཡིན་ནོ། །འདི་ལྟར་སྣང་བའི་ཆོས་ཐམས་ ༄༅། །ཅད་སོགས། ལྟ་བུའོ། །དེ་ལ་ཕྱི་སྣང་བ་སྣོད་ཀྱི་འཇིག་རྟེན་རྒྱ་ཆེ་བ། ནང་གཡོ་བ་བཅུད་ཀྱི་སེམས་ཅན་གྲངས་མང་བ། བར་འདོད་ཡོན་ལྔའི་ཡུལ་སྣང་བཀོད་ལེགས་པ་དེ་དག་ཐམས་ཅད་མེད་བཞིན་དུ་ངར་འཛིན་གྱི་ཤེས་པའི་དབང་གིས་སྣང་བ་ནི་དཔེ་སྨིག་རྒྱུ་ལྟ་བུ་ཞིག་ཡིན། དེ་ཡང་རྒྱུ་རྐྱེན་འཕྲད་པའི་རྟེན་འབྲེལ་ལས་བྱུང་སྟེ རྒྱུ་ནམ་མཁའ་དྭངས་གསལ་འཆར་རུང་གི་ནུས་པ་ཅན་ལ་རྒྱུ་བྱས རྐྱེན་ས་གཞིའི་ཁམས་སུ་དྲོད་གཤེར་འཛོམ་པ་ལ་རྐྱེན་བྱས། དེ་གཉིས་རྒྱུ་རྐྱེན་དུས་འཛོམ་པའི་ཚེ་ན་རྟེན་འབྲེལ་སྨིག་རྒྱུའི་སྣང་བ་མེད་བཞིན་དུ་འབྱུང་། རྟེན་གང་ལ་བརྟེན་ན་ནམ་མཁའ་ལ་བརྟེན། འབྲེལ་སུ་དང་འབྲེལ་ན་ནམ་མཁའ་དང་སྨིག་རྒྱུའི་སྣང་བ་གཉིས་མེད་ཟུང་འཇུག་ཏུ་འབྲེལ། འབྱུང་ཅི་འབྱུང་ན་སྨིག་རྒྱུའི སྣང་བ་མེད་བཞིན་དུ་འབྱུང་བ་ཡིན་ནོ །ཡུལ་ལ་འདིར་རྩ་བ་དང་བསྟུན་ན། ཉིན་སྣང་རྨི་སྣང་༴སོགས། ལྟ་བུའོ། །ཞེས་དགོས་པ་འདུག་སྟེ། རྩ་བར་ཚིག་འབྲུ་ཆད་སོང་བའམ། ཡང་ན་འདིར་ནོར་བ་འདྲ་བས་དཔྱད། མཆན། མངོན་པར་ཞེན་པ་རྨི་ལམ་ན༔སོགས ཡིན་ནོ། །དེ་ཡང་རྨི་ལམ་གྱི་སྐབས་སུ་ཕྱི་སྣང་བ་སྣོད་ཀྱི་འཇིག་རྟེན་རྒྱ་ཆེ་བ། ནང་གཡོ་བ་བཅུད་ཀྱི་སེམས་ཅན་གྲངས་མང་བ། བར་འདོད་ ཡོན་ལྔའི་ཡུལ་སྣང་བཀོད་ལེགས་པ་དེ་དག་ཐམས་ཅད་ལ་འདི་རྨི་ལམ་ཡིན། ངས་ཡུལ་གཞན་ཞིག་ན་ཡོད་པར་མི་བསམ་པར་བདེན་གྲུབ་ཅན་དུ་འཛིན་པ་ཡིན། དེ་བཞིན་དུ་བརྩིགས་པའི་མཁར་རྨོས་པའི་ཞིང་། བསགས་པའི་རྒྱུ་རྫས་ལོངས་སྤྱོད་ཐམས་ཅད་ལ། ངའི་ཕ་ཁུ་བཟང་པོའི་དུས་ནས་ཡིན་བསམ་པ་དང་། དེ་བཞིན་དུ་དགྲ་དང་གཉེན་དང་གནས་དང་ཡུལ་བདག་པོ་འདི་དང་འདིའོ་རུ་བཟུང་ནས་རྨི་ལམ་གྱི་ཡུལ་ལ་བདེན་ཞེན་གྱིས་འཆིང་བ་བཞིན་དུ་ཉིན་སྣང་དང་རྨི་སྣང་བར་སྲིད་དང་ཕྱི་མའི་སྣང་བ་ཐམས་ཅད་ལ་རྨི་ལམ་གྱི་སྣང་བ་བཞིན་དུ་མེད་བཞིན་སྣང་བ་ལ་བདེན་ཞེན་གྱི་དབང་གིས་འཁྲུལ་པ་ནི་དཔེ་རྨི་ལམ་ལྟ་བུ་ཞིག་ཡིན དེ་ཡང་རྒྱུ་རྐྱེན་འཕྲད་པའི་རྟེན་འབྲེལ་ལས་བྱུང་སྟེ རྒྱུ་གཞི་དབྱིངས་དྭངས་གསལ་འཆར་རུང་གི་ནུས་པ་ཅན་ལ་རྒྱུ་བྱས། རྐྱེན་སྐྱེས་བུ་གཉིད་དུ་ཕྱོགས་པའི་ཤེས་ཉམས་ལ་རྐྱེན་བྱས དེ་གཉིས་རྒྱུ་རྐྱེན་དུས་འཛོམ་པའི་ཚེ་ན་རྟེན་འབྲེལ་རྨི་ལམ་གྱི་སྣང་བ་མེད་བཞིན་དུ་འབྱུང་། རྟེན་གང་ལ་བརྟེན་ན་གཞི་ལ་བརྟེན། འབྲེལ་སུ་དང་འབྲེལ་ན་གཞི་དང་རྨི་ལམ་གྱི་སྣང་བ་གཉིས་མེད་ཟུང་འཇུག་ཏུ་འབྲེལ། འབྱུང་ཅི་འབྱུང་ན་རྨི་ལམ་གྱི་སྣང་བ་མེད་བཞིན་དུ་འབྱུང་བ་ཡིན་ནོ། །ནང་ང་རུ་འཛིན ༄༅། །པའི་བདག་རྐྱེན་ལས༴སོགས། སྣང་བ་ལྟ་བུའོ། །དེ་ཡང་ང་མེད་པ་ལ་ང་རུ་བཟུང་། བདག་མེད་པ་ལ་བདག་ཏུ་བཟུང་བའི་བདག་ཞིག་ཚུར་བཅད་པའི་རྐྱེན་ལས གཞན་སྣོད་བཅུད་དང་སྣང་བ་ཐ་དད་དུ་སྣང་བ་ནི་དཔེ་གཟུགས་བརྙན་ལྟ་བུ་ཞིག་ཡིན། དེ་ཡང་རྒྱུ་རྐྱེན་འཕྲད་པའི་རྟེན་འབྲེལ་ལས་བྱུང་སྟེ རྒྱུ་མེ་ལོང་དྭངས་གསལ་འཆར་རུང་གི་ནུས་པ ཅན་ལ་རྒྱུ་བྱས། རྐྱེན་ཕ་རོལ་བའི་བྱད་དང་གཟུགས་བསྟན་པ་ལ་རྐྱེན་བྱས། དེ་གཉིས་རྒྱུ་རྐྱེན་དུས་འཛོམ་པའི་ཚེ་ན་རྟེན་འབྲེལ་གཟུགས་བརྙན་གྱི་སྣང་བ་མེད་བཞིན་དུ་འབྱུང་། རྟེན་གང་ལ་བརྟེན་ན་མེ་ལོང་ལ་བརྟེན།འབྲེལ་སུ་དང་འབྲེལ་ན་མེ་ལོང་དང་གཟུགས་བརྙན་གྱི་སྣང་བ་གཉིས་མེད་ཟུང་འཇུག་ཏུ་འབྲེལ།འབྱུང་ཅི་འབྱུང་ན་གཟུགས་བརྙན་གྱི་སྣང་བ་མེད་བཞིན་དུ་འབྱུང་བ་ཡིན། བདག་འཛིན་གྱིས་ཀུན་ནས་༴སོགས སྣང་བ་ལྟ་བུའོ། །དེ་ལ་ང་མེད་པ་ལ་ང་རུ་བཟུང་། བདག་མེད་པ་ལ་བདག་ཏུ་འཛིན་པའི་བདག་འཛིན་གྱིས་ཀུན་ནས་དཀྲིས་པའི་དབང་གིས་གྲོང་ཁྱེར་དྲུག་གི་འཇིག་རྟེན་རེས་མོས་སུ་སྣང་བ་ནི་ཚེ་འདིའི་ཉོན་མོངས་པ་ཞེ་སྡང་གིས་ཀུན་ནས་བསླང་བའི་སྒོ་ནས་སྡིག་པ་མི་དགེ་བའི་ལས་ཞིག་བསགས་བསགས་ནས་འཆི་བའི་ནད་ ཀྱིས་ཐེབས་ཏེ་ནང་དབུགས་ཁྲོག་གི་ཆད་ཀྱི་བར་དུ་ཉོན་མོངས་པ་ཞེ་སྡང་གིས་ཀུན་ནས་བསླང་བའི་སྒོ་ནས་སྡིག་པ་མི་དགེ་བའི་ལས་ཞིག་ལ་སྲེད་ལེན་གྱིས་གསོས་ཐེབས་པ་ནི། མེ་གསོས་པ་ལ་སྦུད་པ་ཕོག་ཚེ་མེ་ལྕེ་དམར་ལྷབ་ཀྱིས་འབར་བ་བཞིན་དུ དམྱལ་བའི་སྣང་བ་མེད་བཞིན་དུ་མཆེད་པ་ཡིན། དེ་ཡང་རྒྱུ་རྐྱེན་འཕྲད་པའི་རྟེན་འབྲེལ་ལས་འབྱུང་སྟེ། རྒྱུ་གཞི་དབྱིངས་དྭངས་གསལ་འཆར་རུང་གི་ནུས་པ་ཅན་ལ་རྒྱུ་བྱས རྐྱེན་འཆི་ཁའི་སྲེད་ལེན་གྱིས་གསོས་ཐེབས་པ་ལ་རྐྱེན་བྱས། དེ་གཉིས་རྒྱུ་རྐྱེན་དུས་འཛོམ་པའི་ཚེ་ན་རྟེན་འབྲེལ་དམྱལ་བའི་སྣང་བ་མེད་བཞིན་དུ་འབྱུང་རྟེན་གང་ལ་བརྟེན་ན་གཞི་ལ་བརྟེན འབྲེལ་སུ་དང་འབྲེལ་ན་གཞི་དང་དམྱལ་བའི་སྣང་བ་གཉིས་མེད་ཟུང་འཇུག་ཏུ་འབྲེལ། འབྱུང་ཅི་འབྱུང་ན་དམྱལ་བའི་སྣང་བ་མེད་བཞིན་དུ་འབྱུང་བ་ཡིན། ཚེ་འདིའི་ཉོན་མོངས་པ་འདོད་ཆགས་ཀྱིས་ཀུན་ནས་བསླང་བའི་སྒོ་ནས་སྡིག་པ་མི་དགེ་བའི་ལས་ཞིག་བསགས་བསགས་ནས་འཆི་བའི་ནད་ཀྱིས་ཐེབས་ཏེ། ནང་དབུགས་ཁྲོག་གི་ཆད་ཀྱི་བར་དུ་ཉོན་མོངས་པ་འདོད་ཆགས་ཀྱིས་ཀུན་ནས་བསླང་བའི་སྒོ་ནས་སྡིག་པ་མི་དགེ་བའི་ལས་ཞིག་ལ་སྲེད་ལེན་གྱིས་གསོས་ཐེབས་པ་ནི། མེ་གསོས་པ་ལ་སྦུད ༄༅། །པ་ཕོག་ཚེ་མེ་ལྕེ་དམར་ལྷབ་ཀྱིས་འབར་བ་བཞིན་དུ། ཡི་དྭགས་ཀྱི་སྣང་བ་མེད་བཞིན་དུ་མཆེད་པ་ཡིན། དེ་ཡང་རྒྱུ་རྐྱེན་འཕྲད་པའི་རྟེན་འབྲེལ་ལས་བྱུང་སྟེ རྒྱུ་གཞི་དབྱིངས་དྭངས་གསལ་འཆར་རུང་གི་ནུས་པ་ཅན་ལ་རྒྱུ་བྱས། རྐྱེན་འཆི་ཁའི་སྲེད་ལེན་གྱི་གསོས་ཐེབས་པ་ལ་རྐྱེན་བྱས། དེ་གཉིས་རྒྱུ་རྐྱེན་དུས་འཛོམ་པའི་ཚེ་ན་རྟེན་འབྲེལ་ཡི་དྭགས་ཀྱི་སྣང་བ་མེད་བཞིན་དུ་འབྱུང་རྟེན་གང་ལ་བརྟེན་ན་གཞི་ལ་བརྟེན། འབྲེལ་སུ་དང་འབྲེལ་ན་གཞི་དང་ཡི་དྭགས་ཀྱི་སྣང་བ་གཉིས་མེད་ཟུང་འཇུག་ཏུ་འབྲེལ། འབྱུང་ཅི་འབྱུང་ན་ཡི་དྭགས་ཀྱི་སྣང་བ་མེད་བཞིན་དུ་འབྱུང་བ་ཡིན ཚེ་འདིའི་ཉོན་མོངས་པ་གཏི་མུག་གིས་ཀུན་ནས་བསླང་བའི་སྒོ་ནས་སྡིག་པ་མི་དགེ་བའི་ལས་ཞིག་བསགས་བསགས་ནས་འཆི་བའི་ནད་ཀྱིས་ཐེབས་ཏེ། ནང་དབུགས་ཁྲོག་གི་ཆད་ཀྱི་བར་དུ་ཉོན་མོངས་པ་གཏི་མུག་གིས་ཀུན་ནས་བསླང་བའི་སྒོ་ནས་སྡིག་པ་མི་དགེ་བའི་ལས་ཞིག་ལ་སྲེད་ལེན་གྱིས་གསོས་ཐེབས་པ་ནི། མེ་གསོས་པ་ལ་སྦུད་པ་ཕོག་ཚེ་མེ་ལྕེ་དམར་ལྷབ་ཀྱིས་འབར་བ་བཞིན་དུ། དུད་འགྲོའི་སྣང་བ་མེད་བཞིན་དུ་མཆེད་པ་ཡིན དེ་ཡང་རྒྱུ་རྐྱེན་འཕྲད་པའི་རྟེན་འབྲེལ་ལས་བྱུང་སྟེ རྒྱུ་གཞི་ དབྱིངས་དྭངས་གསལ་འཆར་རུང་གི་ནུས་པ་ཅན་ལ་རྒྱུ་བྱས རྐྱེན་ཕྱི་ཁའི་སྲེད་ལེན་གྱིས་གསོས་ཐེབས་པ་ལ་རྐྱེན་བྱས དེ་གཉིས་རྒྱུ་རྐྱེན་དུས་འཛོམ་པའི་ཚེ་ན་རྟེན་འབྲེལ་དུད་འགྲོའི་སྣང་བ་མེད་བཞིན་དུ་འབྱུང་རྟེན་གང་ལ་བརྟེན་ན་གཞི་ལ་བརྟེན། འབྲེལ་སུ་དང་འབྲེལ་ན་གཞི་དང་དུད་འགྲོའི་སྣང་བ་གཉིས་མེད་ཟུང་འཇུག་ཏུ་འབྲེལ། འབྱུང་ཅི་འབྱུང་ན་དུད་འགྲོའི་སྣང་བ མེད་བཞིན་དུ་འབྱུང་བ་ཡིན། ཚེ་འདིའི་ཉོན་མོངས་པ་དུག་ལྔ་དང་ཟག་བཅས་ཀྱི་དགེ་བ་བཅུ་འདྲེས་མར་སྤྱད་སྤྱད་ནས་འཆི་བའི་ནད་ཀྱིས་ཐེབས་ཏེ། ནང་དབུགས་ཁྲོག་གི་ཆད་ཀྱི་བར་དུ་ཟག་བཅས་ཀྱི་དགེ་བ་བཅུའམ། དུག་ལྔ་གང་རུང་ཞིག་ལ་སྲེད་ལེན་གྱིས་གསོས་ཐེབས་པ་ནི མེ་གསོས་པ་ལ་སྦུད་པ་ཕོག་ཚེ་མེ་ལྕེ་དམར་ལྷབ་ཀྱིས་འབར་བ་བཞིན་དུ། མིའི་སྣང་བ་མེད་བཞིན་དུ་མཆེད་པ་ཡིན། དེ་ཡང་རྒྱུ་རྐྱེན་འཕྲད་པའི་རྟེན་འབྲེལ་ལས་བྱུང་སྟེ རྒྱུ་གཞི་དབྱིངས་དྭངས་གསལ་འཆར་རུང་གི་ནུས་པ་ཅན་ལ་རྒྱུ་བྱས རྐྱེན་ཕྱི་ཁའི་སྲེད་ལེན་གྱིས་གསོས ཐེབས་པ་ལ་རྐྱེན་བྱས། དེ་གཉིས་རྒྱུ་རྐྱེན་དུས་འཛོམ་པའི་ཚེ་ན་རྟེན་འབྲེལ་མིའི་སྣང་བ་མེད་བཞིན་དུ་འབྱུང་རྟེན་གང་ལ་བརྟེན་ན་གཞི་ལ་བརྟེན འབྲེལ་སུ་དང་འབྲེལ་ན་གཞི་དང་མིའི་ ༄༅། །སྣང་བ་གཉིས་མེད་ཟུང་འཇུག་ཏུ་འབྲེལ འབྱུང་ཅི་འབྱུང་ན་མིའི་སྣང་བ་མེད་བཞིན་དུ་འབྱུང་བ་ཡིན། ཚེ་འདིའི་ཉོན་མོངས་པ་ཕྲག་དོག་གིས་ཀུན་ནས་བསླང་བའི་སྒོ་ནས་སྡིག་པ་མི་དགེ་བའི་ལས་ཞིག་བསགས་བསགས་ནས་འཆི་བའི་ནད་ཀྱིས་ཐེབས་ཏེ། ནང་དབུགས་ཁྲོག་གི་ཆད་ཀྱི་བར་དུ་ཉོན་མོངས་པ་ཕྲག་དོག་གིས་ཀུན་ནས་བསླང་བའི་སྒོ་ནས་སྡིག་པ་མི་དགེ་བའི་ལས་ཞིག་ལ་སྲེད་ལེན་གྱིས་གསོས་ཐེབས་པ་ནི། མེ་གསོས་པ་ལ་སྦུད་པ་ཕོག་ཚེ་མེ་ལྕེ་དམར་ལྷབ་ཀྱིས་འབར་བ་བཞིན་དུ ལྷ་མིན་