Tibetan
དང་། དེ་ལས་ཡུལ་དང་ཡུལ་ཅན་སོ་སོར་འཛིན་མ་རིག་པའི་ཤེས་པ་དེ་ལ་ལྷན་གཅིག་སྐྱེས་པའི་མ་རིག་པ་དང་། དེ་ལས་ཕྱི་ནང་སྣོད་བཅུད་དུ་སྣང་བའི་ཆོས་ཐམས་ཅད་ལ་མིང་སོ་སོར་བཏགས། དོན་སོ་སོར་བཟུང་། དངོས་པོ་སོ་སོར་འཐས་པ་དེ་ལ་ཀུན་ཏུ་བཏགས་པའི་མ་རིག་པར་བརྗོད་པ་ཡིན། མ་རིག་པ་རྣམ་པ་གསུམ་གྱི་བྱེད་ལས་ཀྱིས་ཁམས་གསུམ་འཁོར་བར་སྣང་ཞིང་འཁྲུལ་ཏེ་འཆིང་བར་བྱེད་པའི་རྒྱུ་ནི་ང་དང་བདག་ཏུ་འཛིན་པའི་འདྲེ་ཡིན་ཏེ མཁས་གྲུབ་ཀྱི་མཆོག་ཀརྨ་གླིང་པས། ང་དང་བདག་ཏུ་འཛིན་པའི་འདྲེ། །ཁམས་གསུམ་འཁོར་བའི་འདྲེ་བོ་ཆེ། །གསུངས་པ་བཞིན། ང་དང་བདག་ཏུ་འཛིན་པའི་གཞི་རྩ་བཅད་དགོས་པ་ཡིན་ཏེ དེའི་ཕྱིར་ང་ཞེས༴སོགས། ས་ལ་གཏུག་གོ། །དེ་ལ་ང་ཞེས་བྱ་བ་དེ་སྟེང་ནམ་མཁའ་ནས་ཐུར་དུ་བྱུང་བ་ཨེ་ཡིན་སྙམ་ན་ནམ་མཁའ་འདི་ང་ཡིན་ན་ང་ལས་ང་བྱུང་ནི་རེད། ས་ལས་ས་རྡུལ་བྱུང་། ཆུ་ལས་ཆུ་ཐིག༔ མེ་ལས་མེ་སྟག༔ རླུང་ལས་རླུང་བསིལ་བྱུང་བ་བཞིན་དུ་ནམ་མཁའ་འདི་ང་ཡིན་ན་ང་ ༄༅། །ལས་ང་བྱུང་ནི་རེད། ནམ་མཁའ་ང་མིན་པ་ལས་ང་མི་བྱུང་ས་མིན་པ་ལས་ས་རྡུལ་མི་བྱུང་ཆུ་མིན་པ་ལས་ཆུ་ཐིག༔ མེ་མིན་པ་ལས་མེ་སྟགཿ རླུང་མིན་པ་ལས་རླུང་བསིལ་མི་འབྱུང་བ་བཞིན་དུ། ནམ་མཁའ་ང་མིན་པ་ལས་ང་འབྱུང་བ་མ་ཡིན། འབྱུང་བ་སའི་ཆུའི་མེའི་རླུང་གི་ཁམས་ནས་ང་བྱུང་བ་ཨེ་ཡིན་སྙམ་ན་འབྱུང་བ་ས ཆུ་མེ་རླུང་ང་ཡིན་ན་ང་ལས་ང་འབྱུང་སྟེ། ས་ལས་ས་རྡུལ་འབྱུང་། ཆུ་ལས་ཆུ་ཐིག༔ མེ་ལས་མེ་སྟག༔ རླུང་ལས་རླུང་བསིལ་འབྱུང་བ་བཞིན་དུ་འབྱུང་བ་སའི་ཆུའི་མེའི་རླུང་གི ཁམས་ང་ཡིན་ན་ང་ལས་ང་བྱུང་ནི་རེད། འབྱུང་བ་ས ཆུ་མེ་རླུང་ང་མིན་པ་ལས་ང་མི་འབྱུང་། ས་མིན་པ་ལས་ས་རྡུལ་མི་འབྱུང་། ཆུ་མིན་པ་ལས་ཆུ་ཐིག མེ་མིན་པ་ལས་མེ་སྟག། རླུང་མིན་པ་ལས་རླུང་བསིལ་མི་འབྱུང་བ་བཞིན་དུ། འབྱུང་བ་སའི་ཆུ་མེ་རླུང་ཁམས་ང་མིན་པ་ལས་ང་འབྱུང་བ་མ་ཡིན། དེ་བཞིན་དུ་ཕྱི་འབྱུང་བ་ལྔའི་ཁམས་ནས ང་མ་བྱུང་། དངོས་པོ་ཅན་ལས་ང་འབྱུང་བ་ཨེ་ཡིན་སྙམ་ན། དངོས་པོ་ཡོད་པ་ལས་ང་དངོས་མེད་ཞིག་འབྱུང་སྲིད་པ་མ་ཡིན། ང་དངོས་པོ་ཅན་བྱུང་ན་ང་དེའི་གཟུགས་དབྱིབས་ཁ་དོག་ སོགས་མངོན་སུམ་མིག་གིས་མཐོང་རྒྱུ དོན་དམ་ལག་པས་འཛིན་རྒྱུ་ཞིག་ཡོད་དགོས་ཀྱང་དེ་ནི་ཡོད་པ་མ་ཡིན། ནང་རང་ལུས་ལས་བྱུང་བ་ཨེ་ཡིན་སྙམ་ན མགོའི་སྐྲ་རྩེ་མན་ཆད་རྐང་གི་སེན་རྩེ་ཡན་ཆད་ཀྱི་བར་ལ་བརྟགས་ཤིང་དཔྱད་ན་འདི་ནས་བྱུང་བ་རེད་སྙམ་པའི་ཡུལ་གཏན་ནས་རྙེད་པ་མ་ཡིན་ནོ། །དེའི་ཕྱིར་ན་ང་ཞེས་བྱ་བ་དེ་དང་པོ་བྱུང་ཁུངས་མེད་པའི་ས་ལ གཏུགས་དགོས་སོ། །བར་དུ་གནས་པའི༴སོགས། ངེས་པའོ། །བར་དུ་གནས་པའི་ས་ཞིག་ལོས་ཡོད་སྙམ་ན། འབྱུང་བ་ལྔའི་ཁམས་ལ་ནི་ང་མི་གནས། གནས་ན་འབྱུང་བ་བཤིག་བཏུལ་བྱས་ཚེ་ནང་དུ་ཟུག་རྔུ་མྱོང་དགོས་ཀྱང་འབྱུང་བ་མ་ཡིན ནང་རང་ལུས་ལ་བརྟགས་ན་ཡང་མགོ་ལ་ནི་མགོ་ཟེར་བ་ལས་ང་མི་ཐོག། །དེ་བཞིན་དུ་མགོ་ལྤགས་ལ་མགོ་ལྤགས་བརྗོད་པ་ལས་ང་ཟེར་བ་མ་ཡིན། རུས་པ་ལ་རུས་པ་བརྗོད་པ་ལས་ང་ཟེར་བ་མ་ཡིན། དེ་བཞིན་དུ་མིག་ལ་ནི་མིག་བརྗོད་པ་ལས་ང་ཟེར་བ་མ་ཡིན། རྣ་བ་ལ་ནི་རྣ་བ་བརྗོད་པ་ལས་ང་ཟེར་བ་མ་ཡིན། སྣ་ལ་ནི་སྣ་བརྗོད་པ་ལས་ང་ཟེར་བ་མ་ཡིན། ལྕེ་ལ་ནི་ལྕེ་བརྗོད་པ་ལས་ང་ཟེར་བ་མ་ཡིན སོ་ལ་ནི་སོ་བརྗོད་པ༴ ཀླད་པ་ལ་ཡང་ཀླད་པ་བརྗོད་པཿ ཤ་ལ་ནི་ཤ་བརྗོད་པཿ ཁྲག་ལ་ནི་ ༄༅། །ཁྲག་བརྗོད་པཆུ་སེར་ལ་ནི་ཆུ་སེར་བརྗོད་པཿ རྩ་རྒྱུས་ལ་ནི་རྩ་རྒྱུས་བརྗོད་པཿ དེ་དག་རྣམས་ལ་ནི་རང་རང་གི་མིང་བརྗོད་པ་ལས་ང་ཟེར་བ་མ་ཡིན ཡང་ལག་པ་ལ་ནི་དེ་བཞིན་དུ་ལག་པ་བརྗོད་པ་ལས་ང་ཟེར་བ་མ་ཡིན། སོག་པ་ལ་ནི་སོག་པ་བརྗོད་པ༴ དཔུང་པ་ལ་ནི་དཔུང་པ་བརྗོད་པ༴ ལག་ངར་ལ་ནི་ལག་ངར་བརྗོད་པ། སོར་མཛུབ་རྣམས་ལའང་རང་རང་གི་མིང་བརྗོད་པ་ལས་ང་ཟེར་བ་མ་ཡིན། དེ་བཞིན་དུ་སྒལ་ཚིགས་ལའང་སྒལ་ཚིགས་བརྗོད་པ་ལས་ང་ཟེར་བ་མ་ཡིན། རྩིབ་མ་ལ་ནི་རྩིབ་མཿ བྲང་ལ་ནི་བྲང་བརྗོད་པ༴ གློ་བ་ལ་ནི་གློ་བ་བརྗོད་པ༴ སྙིང་ལ་ནི་སྙིང་བརྗོད་པ༴ མཆིན་ཁྲི་ལ་ནི་མཆིན་ཁྲི་བརྗོད་པཿ མཆིན་པ་ལ་ནི་མཆིན་པ་བརྗོད་པ། མཚེར་པ་ལ་ནི་མཚེར་པ་བརྗོད་པ། རྒྱུ་མ་ལ་ནི་རྒྱུ་མ་བརྗོད་པ༴ མཁལ་མ་ལ་ནི་མཁལ་མ་བརྗོད་པཿ དྲི་ཆུ་ལ་ནི་དྲི་ཆུཿ གཤང་ལྕི་ལ་ནི་གཤང་ལྕི་བརྗོད་པ། དེ་བཞིན་དུ་རྐང་པ་ལ་ནི་རྐང་པ་བརྗོད་པ བརླ་ལ་ནི་བརླ་བརྗོད་པ༴ དཔྱི་ལ་ནི་དཔྱི་བརྗོད་པ༴ རྗེ་ངར་ལ་ནི་རྗེ་ངར་བརྗོད་པ༴ བོལ་བ་ལ་ནི་བོལ་བ་བརྗོད་པ༴ སོར་མཛུབ་རྣམས་ལ་ནི་སོར་མཛུབ་བརྗོད་པ༔ དེ་དག་རྣམས་ཀྱི་ཕྱིའི་ལྤགས་པ་ལ་ཟིན་ ནི་ལྤགས་པ་བརྗོད་པ༴ བར་གྱི་ཤ་ཚིལ་ལ་ནི་ཤ་ཚིལ་བརྗོད་པ། ནང་གི་རུས་པ་ལ་ནི་རུས་པ་བརྗོད་པ༴ གསང་བ་རྐང་ལ་ནི་རྐང་བརྗོད་པ་ལས་ང་ཟེར་བ་མ་ཡིན རྣམ་པར་ཤེས་པ་ལའང་རྣམ་པར་ཤེས་པ་ཟེར་བ་ལས་ང་མི་ཐོག །དེའི་ཕྱིར་བར་དུ་གནས་པའི་ས་དང་བདག་པོ་མེད་པའི་སྟོང་པ་ཉིད་དུ་ངེས་པའོ། །དེ་བཞིན་དུ་ཐ་མ་འགྲོ་བའི༴སོགས བརྗོད་པ་ལྟ་བུའོ།། ཐ་མ་འགྲོ་བའི་ཡུལ་ཞིག་ལོས་ཡོད་བསམ་ན། ང་ཞེས་བྱུང་གནས་དང་བྲལ་ཚེ།ཐ་མ་འགྲོ་ས་མེད་ངེས་པ་ཡིན་ཀྱང་། གལ་སྲིད་ཡོད་པའི་དབང་དུ་བཏང་ན། ཉིན་སྣང་གི་ང་དང་རྨི་སྣང་གི་ང་གཉིས་གཅིག་རེད་དང་གཉིས་རེད། གཅིག་ཡིན་ན་མདང་གི་རྨི་ལམ་གྱི་ངའི་ལུས་ལ་རྡོ་དང་དབྱུག་པས་བསྣན་པའི་སྐྲང་དང་། མཚོན་གྱིས་བརྒྱབ་པའི་རྨ་དེ། དེ་རིང་ཉིན་མོའི་སྐབས སུ་ཡང་ལུས་ལ་རྨ་ཡོད་དགོས་ཀྱང་དེ་ནི་ཡོད་པ་མ་ཡིན། ཐ་དད་པ་ཞིག་རེད་སྙམ་ན་ལོ་གཅིག་གི་ནང་ན་ཉིན་སུམ་བརྒྱ་དང་དྲུག་ཅུ། མཚན་སུམ་བརྒྱ་དང་དྲུག་ཅུ། ཉིན་ཞག་བདུན་བརྒྱ་དང་ཉི་ཤུ་ཡོད་པས། དེ་ལ་ལུས་ཀྱང་བདུན་བརྒྱ་དང་ཉི་ཤུ་ཡོད་དགོས་ཏེ དེ་ཉིད་ཤི་བའི་རོ་རུ་གྱུར་ན་ཤར་ལྷོ་ནུབ་བྱང་ཕྱོགས་བཞི་མཚམས་བརྒྱད་ཐམས་ཅད་རོ་དེས་གང་ཡོད་དགོས་ཀྱང་ ༄༅། །དེ་ནི་ཡོད་པ་མ་ཡིན། དེ་དག་མ་ཤི་བར་གསོན་པོར་ཡོད་ན་ཡང་དེ་བཞིན་དུ་ངའི་དམག་དཔུང་ཆེན་པོས་གང་ཡོད་དགོས། ཡོད་ན་མངོན་སུམ་མིག་གིས་མཐོང་རྒྱུ། དོན་དམ་ལག་པས་འཛིན་རྒྱུ། དབང་པོའི་སྒོ་རུ་མངོན་རྒྱུ་ཞིག་ཡོད་དགོས་ཀྱང་དེ་ནི་ཡོད་པ་མ་ཡིན། དེས་ན་མེད་པ་ཅང་མེད་ཀྱི་ཕྱོགས་སུ་སོང་བ་ཨེ་ཡིན་སྙམ་ན། ང་མེད་པ་ཞིག་ནི་མེད་པའི་ཁམས་སུ་འགྲོ་ཚུལ་མེད། ཡོད་པ་ཞིག་ཡིན་ན་ང་བདེན་གྲུབ་ཅན་དུ་ཡོད་དགོས་ཀྱང་། དེ་ནི་སྔར་གཏན་ལ་ཕབ་ནས་མ་རྙེད་པ་ཡིན་པས་ད་རུང་ཡང་རྙེད་པར་མི་འགྱུར་བའི་ཕྱིར་ན་ཐ་མ་འགྲོ་སའི་ཡུལ་དང་བདག་པོ་ཐམས་ཅད་ལས་འདས་པ་ཉིད་ཡིན་ནོ། །རྒྱུ་མཚན་དེའི་ཕྱིར་ན་ང་ཞེས་བྱ་བ་དེ་མེད་བཞིན་ཡོད་པར་སྣང་བ་མིག་ནད་ཀྱི་རྐྱེན་གྱིས་ནམ་མཁར་སྐྲ་ཤད་སྣང་བ་དང་། མིང་བརྗོད་པ་དེ་དག་ཐམས་ཅད་ཀྱང་རི་བོང་གི་རྭ་ཞེས་བརྗོད་པ་དང་། ནམ་མཁའི་པདྨོ་བརྗོད་པ་བཞིན་དུ་བདེན་པར་གྲུབ་པ་ནི་རྡུལ་ཕྲ་རབ་ཀྱི་ཆ་ཙམ་ཞིག་ཀྱང་ཡོད་པ་མ་ཡིན་ཏེ། ཀུན་བྱེད་ལས། འཁོར་བའི་རྩ་བ་ང་དང་ང་ཡི་བ། །མེད་བཞིན་འཁྲུལ་པའི་རྩ་བ་ཆོད་གྱུར་ན། །ཀུན་བྱེད་རྒྱལ་པོ་རང་བྱུང་རང་ལ་ཐིམ །ཞེས་གསུངས་པ་བཞིན་ཡིན་ནོ། །དེ་ཡན་ཆད་ ཀྱི་འཛིན་པ་གང་ཟག་གི་བདག་བདག་མེད་དུ་གཏན་ལ་དབབ་པ་སོང་ངོ་། །གཉིས་པ་ཆོས་ཀྱི༴སོགས ཤེས་པར་བྱའོ། །གཉིས་པ་གཟུང་བ་ཆོས་ཀྱི་བདག་མེད་དུ་གཏན་ལ་ཕབ་པ་དེ་ལའང་བཞི་ལས། དང་པོ་མིང་གི་གདགས་གཞི་བཙལ་བ་ནི མིང་རྣམས་ཐམས་ཅད་མེད་བཞིན་བཏགས་ཏེ། ཡོད་པར་འཛིན་པ་ལས་མེད་པར་མ་རིག་པ་ཉིད་ནི་ཀུན་ཏུ་བཏགས་པའི་མ་རིག་པ ཉིད་དུ་ཤེས་པར་བྱའོ། །དེ་ཡང་མགོ་ཞེས་བྱ་བ་ཅིའི་ཕྱིར་ཅི་ལ་བཏགས ལུས་ཆགསཔའི་དང་པོ་མགོ་ཡིན་པས་མགོ་བཏགས་པ་ཨེ་ཡིན་སྙམ་ན། ལུས་ཆགས་པའི་དང་པོ་མགོ་མ་སྐྱེས། ལྟེ་བ་སྤྲུལ་པའི་འཁོར་ལོ་ནས་རིམ་བཞིན་དུ་ཆགས་པ་ཡིན། དེའི་ཕྱིར་ན་མགོ་མི་ཐོག །ཟླུམ་པོ་ཡིན་པས་མགོ་བཏགས་པ་རེད་སྙམ་ན། སྲན་མ་དང་རིལ་བུ་ལ་སོགས་པ་ཟླུམ་པོ་ཐམས ཅད་ཀྱི་མིང་ལ་མགོ་མི་ཐོག །སྟེང་དུ་བསྟན་པ་ལ་མགོ་བཏགས་པ་ཡིན་སྙམ་ན། སྟེང་འོག་ནམ་མཁའ་ལ་བཏགས་ན་ནམ་མཁའ་ལ་སྟེང་འོག་མེད། ཁ་དོག་མཐིང་གར་སྣང་བ་དེ་སྟེང་ཡིན་སྙམ་ན། རྒྱུད་ཕལ་ཆེར་ན་རི་རབ་ཀྱི་ལྷོ་ཕྱོགས་བེེ་ཌཱུཪྻའི་འོད་རྒྱ་མཚོར་ཕོག་པའི་འོད་བར་སྣང་དུ་ཤར་བའི་ཁ་དོག་མཐིང་གར་གསུངས་པ་དང་། རྒྱུད་ལ་ལར་ནམ་མཁའ་འདི་གཏིང་ ༄༅། །ཟབ་པའི་ཁ་དོག་མཐིང་ག་ཡིན་ཏེ། དཔེར་ན་ཆུ་ཆུང་ངུ་རྣམས་ཀྱི་ཁ་དོག་སྐྱ་བོར་སྣང་བ་དང་ཆུ་སྣོད་དུ་བླང་ཚེ་ཁ་དོག་སྐྱ་བོར་འདུག་པ་ཡིན ཆུ་ཅུང་ཟད་གཏིང་ཟབ་པ་རྣམས་ཆུ་མདོག་མཐིང་གར་སྣང་ཡང་། ཆུ་སྣོད་དུ་བླང་ཚེ་ཆུ་མདོག་སྐྱ་བོ་ལས་སྔོན་པོ་མིན ཆུ་ཤིན་ཏུ་གཏིང་ཟབ་པ་ལ་བལྟས་ན་ཆུ་མདོག་སྔོ་ནག་ཏུ་སྣང་ཡང་། ཆུ་སྣོད་དུ་བླང་ཚེ་སྔར་བཞིན་ཆུ་མདོག་སྐྱ་བོ་ལས་སྔོ་ནག་མིན་ནོ །དེ་བཞིན་དུ་ནམ་མཁའ་འདི་ཤིན་ཏུ་གཏིང་ཟབ་པ་ལས་ཁ་དོག་མཐིང་ག་རུ་སྣང་བ་ཡིན་གསུངས དེས་ན་འདི་ནས་སྟེང་གི་ཕྱོགས ལ་སོགས་པར་གསུངས་པ་དེ་རྫུན་ཡིན་ནམ་སྙམ་ན། རྫོགས་པའི་སངས་རྒྱས་ཀྱིས་གསུངས་པའི་ཆོས་ལའང་། དུས་ལ་དགོངས་པ་དང་། སྐབས་ལ་དགོངས་པ་དང་། གང་ཟག་ལ་དགོངས་པ་སོགས་ཡོད་པའི་ཕྱིར་ན་མཐའ་གཅིག་ཏུ་ངེས་པ་ནི་མེད་དེ། གཞུང་ཕལ་ཆེར་དུ་ཕ་མ་བསད་ན་མཚམས་མེད་པའི་ལས་ཡིན་པར་གསུངས་ཀྱང་། རྒྱལ་པོ་མ་སྐྱེས་དགྲའི་མྱ་ངན་བསལ་བའི་སྤྲིང་ཡིག་ཏུ། ཕ་དང་མ་སྲེད་ལེན་ནི་བསད་བྱ་ཞིང་། །རྒྱལ་པོ་ཀུན་གཞིའི་རྣམ་ཤེས་གཙང་སྦྲ་ཅན་གཉིས འཇིག་ལྟ་མཆོག་འཛིན་དང་། ཚུལ་ཁྲིམས་ལྟ་བ་མཆོག་འཛིན། བཅོམ། །ཡུལ་ འཁོར་སྐོར་བཅས་བཅོམ་པ་ན་སེམས་སེམས་འབྱུང་མཆན། །མི་དེ་དག་པ་ཉིད་དུ་འགྱུར། །ཞེས་གསུངས་པ་བཞིན། སྟེང་འོག་ངེས་ཅན་དུ་ཡོད་དགོས་པའི་རྒྱུ་མཚན་ཡོད་པ་མ་ཡིན དེའི་ན་མགོའི་གདགས་གཞིའི་སྟེང་དུ་ཚུགས་ཐུབ་ཏུ་གྲུབ་པ་ཞིག་ཡོད་པ་ཡིན་སྙམ་ན། སྐྲ་ལ་ནི་སྐྲ་ཟེར་བ་ལས་མགོ་མ་ཡིན། སྐྲ་རྩེ་ལ་སྐྲ་རྩེ་ཟེར་བཿ སྐྲ་སྐེད་ལ་སྐྲ་སྐེད་ཟེར་བ སྐྲ་རྩ་ལ་སྐྲ་རྩ་ཟེར་བཿ ལྤགས་པ་ལ་ལྤགས་པ་ཟེར་བ་ལས་མགོ་མ་ཡིན རུས་པ་ལ་རུས་པ་ཟེར་བ་ལས་མགོ་མ་ཡིན། ཀླད་པ་ལ་ཀླད་པ་ཟེར་བ་ལས་མགོ དེ་བཞིན་དུ་མིག་ལ་མིག་ཟེརཿ རྣ་བ་ནི་རྣ་བ་ཟེར༴ སྣ་ལ་ནི་སྣ་ཟེར ལྕེ་ལ་ནི་ལྕེ་ཟེར་བ་ལས་མགོ་མ་ཡིན། དེ་ལྟར་སོ་སོར་ཕྲལ་བས་མགོ་མ་ཡིན་ཀྱང་། ལྷན་དུ་ཚོགས་པ་ལ་མགོ་ཟེར་བ་ཡིན་སྙམ་ན་སྲོག ཆགས་ཞིག་གི་མགོ་བཅད་ནས་རྡུལ་དུ་ཕབ། རྡུལ་རྡུལ་ཕྲན་དུ་ཕབ། རྡུལ་ཕྲན་ཆ་མེད་དུ་འཐག་ནས་ལྷོ་རྒྱལ་འཛམ་བུའི་གླིང་གི་མི་རྣམས་ལ་བསྟན་ཀྱང་རྡུལ་བརྗོད་པ་ལས་མགོ་མི་ཐོག། དེ་ཉིད་ཆུ་ཡིས་སྦྲུས་པའི་འདག་པ་ལའང་འདག་པ་ཟེར་བ་ལས་མགོ་མི་ཐོག །དེའི་ན་ཉིན་སྣང་གི་མགོ་དང་། རྨི་སྣང་གི་མགོ་གཉིས་གཅིག་རེད་དང་གཉིས་རེད། གཅིག་ཡིན་ན་མདང་གི་ ༄༅། །རྨི་ལམ་གྱི་སྐབས་སུ་ཁྱོད་ཀྱི་མགོ་ལ་རྡོ་དང་དབྱུག་པས་བསྣུན་པའི་སྐྲང་དང་མཚོན་གྱིས་བརྒྱབ་པའི་རྨ་འདི་དེ་རིང་ཉིན་མོའི་སྐབས་ཀྱི་མགོ་དེར་ཡོད་དགོས ཀྱང་དེ་ནི་ཡོད་པ་མ་ཡིན། ཡང་ན་ཐ་དད་པ་ཞིག་ཡིན་སྙམ་ན། ལོ་གཅིག་གི་ནང་དུ་ཉིན་སུམ་བརྒྱ་དང་དྲུག་ཅུ མཚན་སུམ་བརྒྱ་དང་དྲུག་ཅུ། ཉིན་ཞག་བདུན་བརྒྱ་དང་ཉི་ཤུ་ཐམ་པ་ཡོད པས། དེ་ལ་མགོ་ཡང་བདུན་བརྒྱ་དང་ཉི་ཤུ་ཐམ་པ་ཡོད་དགོས། ཡོད་ན་ཤིང་ཏ་ལའི་ལོ་མ་བརྩེགས་པ་བཞིན་དུ་སྟེང་འོག་གི་ཚུལ་དང་། ཡང་ན་ཤིང་ཤུན་མང་གི་ལྤགས་ཤུན་བརྩེགས་པ་བཞིན་དུ་ཕྱི་ནང་གི་ཚུལ་དུ་ཡོད་དགོས།ཡོད་ན་མངོན་སུམ་མིག་གིས་མཐོང་རྒྱུ དོན་དམ་ལག་པས་འཛིན་རྒྱུ དབང་པོའི་སྒོ་རུ་མངོན་རྒྱུ་ཞིག་ཡོད་དགོས་ཀྱང་དེ་ནི་ཡོད་པ་མ་ཡིན། དེའི་ཕྱིར་ན་མགོ་ཞེས་བྱ་བ་བརྗོད་པ་ཙམ་གྱིས་བརྗོད་གཞི་ཡུལ་མེད་དུ་འདུག་པའི་ངང་ཚུལ་ཇི་ལྟ་བ་བཞིན་དུ་ཤེས་པར་བྱེད་དགོས་པ་ཡིན་ནོ། །དེ་བཞིན་དུ་མིག་ལ་ཡང་༴སོགས དེས་སྟོན་ཏོ། །དེ་བཞིན་དུ་མིག་གི་གདགས་གཞིའི་སྟེང་དུ་ཚུགས་ཐུབ་ཏུ་གྲུབ་པ་ཞིག་ཡོད་པ་ཡིན་སྙམ་ན། དེ་ལྟར་མིག་ལའང་ཆུ་བུར་ཟུང་དུ་ཡོད་པ་ལ་ནི་མིག་ཟེར་བ་མ་ཡིན། ལྤགས་ལ་ནི་ཟིན་ ལྤགས་ཟེར་བ་ལས་མིག་མ་ཡིན། མིག་ཆུ་ལ་མིག་ཆུ་ཟེར་བ་ལས་མིག་མ་ཡིན མིག་རྩ་ལ་མིག་རྩ་ཟེར་བ་ལས་མིག་མ་ཡིན ཁྲག་ལ་ཁྲག་ཟེར་བ་ལས་མིག་མ་ཡིན། དེ་དག་ལའང་རང་རང་གི་མིང་བརྗོད་པ་ལས་མིག་མ་ཡིན དེ་ལྟར་སོ་སོར་བྲལ་བ་ལ་མིག་མི་ཐོག་ཀྱང་ལྷན་དུ་ཚོགས་པ་ལ་མིག་བཏགས་པ་ཡིན་སྙམ་ན། སྲོག་ཆགས་ཞིག་གི་མིག་བླང་ནས་རྡུལ་དུ་ཕབ། རྡུལ་རྡུལ་ཕྲན་དུ་ཕབ། རྡུལ་ཕྲན་ཆ་མེད་དུ་བཏང་ནས་ལྷོ་རྒྱལ་འཛམ་བུའི་གླིང་གི་མི་རྣམས་ལ་བསྟན་ཀྱང་རྡུལ་བརྗོད་པ་ལས་མིག་མི་ཐོག །དེ་ཉིད་ཆུ་ཡིས་སྤྲས་པའི་འདག་པ ལའང་འདག་པ་ཟེར་བ་ལས་མིག་མི་ཟེར། གཟུགས་མཐོང་མཁན་ཞིག་ཡིན་པས་མིག་བཏགས་པ་ཡིན་སྙམ་ན སྲོག་ཆགས་ཤི་བ་མང་པོའི་མིག་བླངས་ཏེ སེམས་ཅན་མིག་ལོང་ཡོད་པ་ཞིག་གི་མིག་ཤུལ་ལ་བཞག་ན་དེས་གཟུགས་མཐོང་དགོས་ཀྱང་དེ་ནི་མཐོང་བ་མ་ཡིན། དེའི་ན་རྨི་སྣང་གི་མིག་དང་ཉིན་སྣང་གི་མིག་གཉིས་གཅིག་རེད་དང་གཉིས་རེད། གཅིག་ཡིན་ན་མདང་རྨི་ལམ་གྱི་སྐབས་ཁྱོད་ཀྱི་མིག་ལོང་སོང་བ་རྨིས་ན། དེ་རིང་ཉིན་མོའི་སྐབས་ཀྱི་མིག་འདི་ལོང་ཡོད་དགོས་ཀྱང་དེ་ནི་ཡོད་པ་མ་ཡིན། དེ་རིང་ཉིན་མོའི་སྐབས་ཀྱི་མིག་འདི་ལོང་ ༄༅། །ཡོད་པ་ཞིག་ཡིན་ན། མདང་རྨི་ལམ་གྱི་སྐབས་ཀྱི་མིག་དེས་གཟུགས་མི་འདྲ་བ་སྣ་ཚོགས་མཐོང་ཀྱང་། དེ་རིང་ཉིན་མོའི་སྐབས་ཀྱི་མིག་འདིས་ནི་གཟུགས གཅིག་ཀྱང་མཐོང་མྱོང་བ་མ་ཡིན། ཡང་ན་ཐ་དད་པ་ཞིག་རེད་སྙམ་ན། ལོ་གཅིག་གི་ནང་དུ་ཉིན་སུམ་བརྒྱ་དང་དྲུག་ཅུ མཚན་སུམ་བརྒྱ་དང་དྲུག་ཅུ། ཉིན་ཞག་བདུན་བརྒྱ་དང་ཉི་ཤུ་ཐམ་པ་ཡོད་པས། དེ་ལ་མིག་ཀྱང་བདུན་བརྒྱ་དང་ཉི་ཤུ་ཐམ་པ་ཡོད་དགོས། ཡོད་ན་ཡེ་ཐོག་མ་མེད་པའི་དུས་ནས་ད་ལ་ཐུག་གི་བར་གྱི་མིག་དེ་དག་ཡང་ན་ཤིང་ཏ་ལའི་ལོ་མ་བརྩེགས་པ་བཞིན་དུ་སྟེང་འོག་གི་ཚུལ་དང་། ཡང་ན་ཤིང་ཤུན་མང་གི་ལྤགས་ཤུན་བརྩེགས་པ་བཞིན་དུ་ཕྱི་ནང་གི་ཚུལ་དུ་ཡོད་དགོས། ཡོད་ན་མངོན་སུམ་མིག་གིས་མཐོང་རྒྱུ། དོན་དམ་ལག་པས་འཛིན་རྒྱུ། དབང་པོའི་སྒོར་མངོན་རྒྱུ་ཞིག་ཡོད་དགོས་ཀྱང་དེ་ནི་ཡོད་པ་མ་ཡིན། དེའི་ན་ངའི་མིག་འདི་ལོང་སོང་ན་ཕྱིན་ཆད་གཟུགས་མི་མཐོང་སྙམ་ན། ཁྱོད་ཀྱིས་དང་པོ་གཟུགས་མཐོང་མཁན དེ་ངའི་མིག་ཡིན་སྙམ་པ་དང་། བར་དུ་ངའི་མིག་ལོང་སོང་བས་གཟུགས་མི་མཐོང་སྙམ་པས། ཐ་མ་ཡང་གཟུགས་མི་མཐོང་བའི་སྣང་བ་ཤར་བ་རེད་མ་གཏོགས། དེ་རིང་ཉིན་མོའི་སྐབས ཀྱི་མིག་དེ་བཙུམ་ནས་གཉིད་ཚེ་རྨི་ལམ་གྱི་སྐབས་གཟུགས་སྣ་ཚོགས་པ་ཞིག་མཐོང་མཁན་ཡོད་ཀྱང་། དེ་རིང་ཉིན་མོའི་སྐབས་ཀྱི་མིག་འདིས་ནི་གཟུགས་གཅིག་ཀྱང་རིག་མྱོང་བ་མ་ཡིན དེ་བཞིན་དུ་བར་སྲིད་དང་ཕྱི་མའི་དུས་རྣམས་སུའང་ད་ལྟའི་ལུས་རོ་དང་བཅས་པ་ཤུལ་དུ་བོར་ནས་ཤི་སོང་ཡང་། བར་སྲིད་དང་ཕྱི་མའི་དུས་ཀྱི་གཟུགས་མཐོང་མཁན་དེ། རང་གི་སེམས ཡེ་གནས་ཀྱི་ཤེས་པའི་རང་གཟུགས་རང་གིས་མཐོང་བ་ཙམ་ལས་ཆུ་བུར་གྱི་མིག་འདིས་ནི་གཟུགས་གཅིག་ཀྱང་མཐོང་མྱོང་བ་མ་ཡིན་ཏེ། དེའི་ཕྱིར་ན་བཅོམ་ལྡན་འདས་ཀྱིས། མིག་གི་རྣམ་པར་ཤེས་པ་ནི་མཐའ་ཡས་སོ། །ཞེས་གསུངས་སོ། །རྣ་བ་ཡང་སོགས། མ་ཡིན། དེ་བཞིན་དུ་རྣ་བའི་གདགས་གཞིའི་སྟེང་དུ་ཚུགས་ཐུབ་ཏུ་གྲུབ་པ་ཞིག་ཡོད་པ་ཡིན་སྙམ་ན། རྣ་བ་ཡང་དེ་བཞིན་དུ་སྦུ་གུ་ནི་སྦུ་གུ་ཟེར་བ་ལས་རྣ་བ་མ་ཡིན། ལྤགས་ལ་ནི་ལྤགས་ཟེར་བ་ལས་རྣ་བ་མ་ཡིན། ཤ་ལ་ནི་ཤ་ཟེར་བ་ལས་རྣ་བ་མ་ཡིན རྩ་རྒྱུས་ལ་རྩ་རྒྱུས་ཟེར་བ་ལས་རྣ་བ མ་ཡིན། ཁྲག་ལ་ཁྲག་ཟེར་བ་ལས་རྣ་བ་མ་ཡིན ཆུ་སེར་ལ་ཆུ་སེར་ཟེར་བ་ལས་རྣ་བ་མ་ཡིན། དེ་རྣམས་རང་རང་གི་མིང་བརྗོད་པ་ལས་རྣ་བ་མི་ཟེར། དེ་ལྟར་སོ་སོར་བྲལ་བ་ལ་རྣ་བ་མི ༄༅། །ཐོག་ཀྱང་། ལྷན་དུ་ཚོགས་པ་ལ་རྣ་བ་བཏགས་པ་ཡིན་སྙམ་ན། སྲོག་ཆགས་ཞིག་གི་རྣ་བ་བཅད་ནས་རྡུལ་དུ་ཕབ རྡུལ་རྡུལ་ཕྲན་དུ་ཕབ། རྡུལ་ཕྲན་ཆ་མེད་དུ་བཏང་ནས་ལྷོ་རྒྱལ་འཛམ་བུའི་གླིང་གི་མི་རྣམས་ལ་བསྟན་ཀྱང་རྡུལ་བརྗོད་པ་ལས་རྣ་བ་མི་ཐོག །དེ་ཉིད་ཆུས་སྤྲས་པའི་འདག་པ་ལ་ཡང་འདག་པ་ཟེར་བ་ལས་རྣ་བ་མི་ཟེར། སྒྲ་ཐོས་མཁན་ཞིག་ཡིན་པས་རྣ་བ་བཏགས་པ་ཡིན་སྙམ་ན སྲོག་ཆགས་ཤི་བ་མང་པོའི་རྣ་བ་བླང་ནས་སེམས་ཅན་རྣ་བ་འོན་ཡོད་པ་ཞིག་གི་རྣ་ཤུལ་ལ་བཞག་ན་དེས་སྒྲ་ཐོས་དགོས་ཀྱང་དེ་ནི་ཐོས་པ་མ་ཡིན། དེའི་ན་ཉིན་སྣང་གི་རྣ་བ་དང་། རྨི་སྣང་གི་རྣ་བ་གཉིས་གཅིག་རེད་དང་གཉིས་རེད། གཅིག་ཡིན་ན་མདང་རྨི་ལམ་གྱི་སྐབས་སུ་ཁྱོད་ཀྱི་རྣ་བ་འོན་སོང་བ་རྨིས་ན། དེ་རིང་ཉིན་མོའི་སྐབས་ཀྱི་རྣ་བ་འདི་འོན་ཡོད་དགོས་ཀྱང་དེ་ནི་ཡོད་པ་མ་ཡིན དེ་རིང་ཉིན་མོའི་སྐབས་ཀྱི་རྣ་བ་འདི་འོན་ཡོད་པ་ཞིག་ཡིན་ན།།མདང་རྨི་ལམ་གྱི་སྐབས་སུ་སྒྲ་སྣ་ཚོགས་པ་ཐོས་ཀྱང་དེ་རིང་ཉིན་མོའི་སྐབས་ཀྱི་རྣ་བ་དེས་སྒྲ་གཅིག་ཀྱང་ཐོས་མྱོང་བ་མ་ཡིན། ཡང་ན་ཐ་དད་པ་ཞིག་རེད་སྙམ་ན ལོ་གཅིག་གི་ནང་ན་ཉིན་སུམ་བརྒྱ་དང་དྲུག་ཅུ མཚན་སུམ་བརྒྱ་དང་དྲུག་ཅུ ཉིན་ཞག་བདུན་བརྒྱ་དང་ཉི་ཤུ་ཐམ་པ་ཡོད་པས། དེ་ལ་རྣ་བ་ཡང་བདུན་བརྒྱ་དང་ཉི་ཤུ་ཐམ་པ་ཡོད་དགོས། ཡོད་ན་ཡེ་ཐོག་མ་མེད་པའི་དུས་ནས་ད་ལ་ཐུག་གི་བར་གྱི་རྣ་བ་དེ་དག་ཡང་ན་ཤིང་ཏ་ལའི་ལོ་མ་བརྩེགས་པ་བཞིན་དུ་སྟེང་འོག་གི་ཚུལ་དང་། ཡང་ན་ཤིང་ཤུན་མང་གི་ལྤགས་ཤུན་བརྩེགས་པ་བཞིན་དུ་ཕྱི་ནང་གི་ཚུལ་དུ་ཡོད་དགོས།ཡོད་ན་མངོན་སུམ་མིག་གིས་མཐོང་རྒྱུ། དོན་དམ་ལག་པས་འཛིན་རྒྱུ དབང་པོའི་སྒོ་རུ་མངོན་རྒྱུ་ཞིག་ཡོད་དགོས་ཀྱང་དེ་ནི་ཡོད་པ་མ་ཡིན། དེའི་ན་ངའི་རྣ་བ་འདི་འོན་སོང་ན་ཕྱིན་ཆད་སྒྲ་མི་ཐོས་སྙམ་ན། ཁྱོད་ཀྱི་དང་པོ་སྒྲ་ཐོས་མཁན་དེ་ངའི་རྣ་བ་ཡིན་སྙམ་པ་དང་། བར་དུ་ངའི་རྣ་བ་འོན་སོང་བའི་སྒྲ་མི་ཐོས་སྙམ་པས། ཐ་མ་ཡང་