Tibetan
ཚིག་ སྔགས་རྣམས་བདུན་རེ་འདོན་ཅིང་རབ་གནས་བྱའོ༔ དེ་ནས་ལྷ་བསྐྱེད་ནི༔ ཨོཾ་མ་ཧཱ་ཤུ་ནྱ་ཏཱཿ ཀོཉ་ཧཾ༔ སྟོང་པ་ཉིད་དུ་གྱུར༔ སྟོང་པའི་ངང་ལས་མདུན་དུ་རིན་པོ་ཆེའི་ས་གཞི་རྒྱ་ཆེ་ལ་ཁྱོན་ཡངས་པ་མེ ཏོག་རྣམ་པ་སྣ་ཚོགས་ཀྱིས་བརྒྱན་པའི་དབུས་སུ་ཡིད་བཞིན་གྱི་ནོར་བུ་དཀར་པོའི་ཤར༔ སེར་པོའི་ལྷོ༔ དམར་པོའི་ནུབ༔ ལྗང་གུའི་བྱང་སོགས་ལོགས་བཞི་གྲུབ་པ༔ རིན་པོ་ཆེ་གསེར གྱི་ཡ་ཕུབ་ལ་བེེ་ཌཱཪྻའི་ཏོག་གིས་མཛེས་པ༔ ནམ་མཁའ་མཛེས་པའི་རྒྱན་དུ་དར་སྣ་ཚོགས་པའི་གནམ་ཡོལ་དང་དར་དང་གདུགས་དང་འཕན་དང་རྒྱལ་མཚན་སྣ་ཚོགས་པས་བརྒྱན་པ༔ བར་སྣང་མཛེས་པའི་རྒྱན་དུ་འདོད་ཡོན་དང་ལོངས་སྤྱོད་སྤེལ་བའི་ལྷ་མོ་མང་པོས་མཛེས་པའི་གར་འཁྱུག་ཅིང་སྙན་པའི་གླུ་ལེན་པ༔ འཇའ་དང་འོད་ཀྱི་དྲྭ་བ་དང་དྲྭ་ཕྱེད་ཀྱི་ཚུལ་དུ་བརྒྱན་པའི་གཞལ་ཡས་ཁང་དེའི་དབུས་སུ༔ རིན་པོ་ཆེ་སྣ་ཚོགས་ཀྱི་ཁྲི་རྒྱ་ཆེ་ལ་དཔངས་མཐོ་བའི་སྟེང་དུ༔ བདག་ཡི་དམ་གྱི་ཐུགས་ཀ་ནས་ཡི་གེ་ཧཱུྃ་དཀར་པོ་འཕྲོས་པ་ལས་འོད་ཟེར་ཡར་འཕྲོས་པས་རྒྱལ་བ་སྲས་དང་བཅས་པ་ཐམས་ཅད་ལ་མཉེས་པའི་མཆོད་པ་དཔག་ཏུ་མེད་པ་ཕུལ༔ ཞིང་ཁམས་གཞལ་ཡས་ཁང་ལྷ་དང་བཅས་པ་ཚུར་འདུས་ཧཱུྃ་ལ་ཐིམ༔ མར་འཕྲོས་པས་ཁམས་ ཐོ།༔ གསུམ་སེམས་ཅན་ཐམས་ཅད་གཏན་དུ་བདེ་བའི་ས་ལ་བཀོད༔ ཁམས་གསུམ་སེམས་ཅན་གྱི་ཚེ་བསོད་འབྱུང་བ་ལྔའི་དྭངས་བཅུད་དང་བཅས་པ་ཚུར་འདུས་ལ་ཐིམ༔ བླ་རྡོ་མི་དམིགས་པ་ཡི་གེ་ཧཱུྃ་དུ་གྱུར༔ ཧཱུྃ་ཡོངས་སུ་གྱུར་པ་ལས་ཨ་པ་ར་ཙིཏྟ་ནོར་བདག་ཆེན་པོ༔ སྐུ་མདོག་དཀར་པོ་ཁྲོ་བོའི་ཆ་བྱད་ཅན༔ རལ་པ་རྟིང་རྩར་སླེབས་པ༔ སྤྱན་མིག་འབུར་ཞིང་དྲུལ་ལ་ཁད་པ༔ ཁྲོ་གཉེར་སྡུད་ཅིང་མཆེ་བ་གཙིགས་པ༔ ཕྱག་གཡས་རིན་པོ་ཆེ་འབར་བ་བསྣམས་ཤིང་༔ གཡོན་པས་ནེའུ་ལེའི་རྐྱལ་པའི་ཁ་ནས་རིན་པོ་ཆེ་སྣ ཚོགས་སྐྱུག་ནས་སྒྲུབ་པ་པོ་ལ་ནོར་ལོངས་སྤྱོད་དཔག་ཏུ་མེད་པ་སྟེར་ཞིང་༔ ཞབས་གཉིས་གྱད་ཀྱི་འདོར་ཐབས་སུ་བསྒྲད་པ༔ སྐུ་སྨད་ལ་སྟག་ཤམ་གསོལ་ཞིང་ནོར་བུ་ཁ་དོག་ལྔའི་ཕྲེང་བས་རབ་ཏུ་སྤྲས་ཤིང་བརྒྱན་པ༔ རྒྱ་མཚོའི་ནང་གི་ཟླ་གཟུགས་བཞིན་དུ༔ དབུའི་དུང་ཁང་ན་སྨུག་འཛིན་དཀར་པོ་འབྲུག་ལ་ཞོན་པ་གཡས་བེ་ཅོན་དང་གཡོན་ནེའུ་ལེ་བསྣམས་པ༔ མགྲིན་པ་ན་ཛམ་ལྷ་དམར་པོ་གཡས་ནོར་བུ་དང་གཡོན་ནེའུ་ལེ་བསྣམས་པ༔ སྙིང་ག་ན་རྣམ་སྲས་སེར་པོ་གཡས་རྒྱལ་མཚན་དང་གཡོན་ནེའུ་ལེ་བསྣམས་པ༔ ལྟེ་བར་ཛམ་ལྷ་སེར་པོ་ གཡས་ནོར་བུ་དང་གཡོན་ནེའུ་ལེ་བསྣམས་པ༔ གསང་གནས་སུ་ཛམ་ལྷ་ནག་པོ་གཡས་བྷན་ཁྲག་དང་གཡོན་ནེའུ་ལེ་བསྣམས་པ༔ ཀུན་ཀྱང་དར་དང་རིན་པོ་ཆེའི་རྒྱན་དུ་མས་སྤྲས་པ༔ བག་དྲོ་ཞིང་ལྷུན་ཆགས་པ༔ འོད་དང་འོད་ཟེར་འཁྲིགས་པའི་ཀློང་དུ་བཞུགས་པར་བསྒོམ༔ དེ་ལྟར་ནོར་བདག་ཨ་པ་ར་དཀར་པོ་ནོར་ལྷ་ཡོངས་འདུས་ཀྱི་བདག་ཉིད་ཆེན་པོ་རུ་གསལ་བའི་སྤྱི་བོར་ཨོཾ་དཀར་པོ༔ མགྲིན་པར་ཨཱཿ དམར་པོ༔ ཐུགས་ཀར་ཙིཏྟ་ཧཱུྃ་མཐིང་ནག་བསྒོམ༔ དེ་དག་ལས་འོད་ཟེར་དཔག་ཏུ་མེད་པ་འཕྲོས་པས་བྱང་ཕྱོགས་ལྕང་ལོ་ཅན་ནས་གནོད་སྦྱིན་ནོར་གྱི་བདག་པོ་ཨ་པར་ཙིཏྟ་ལ་གནོད་སྦྱིན་ནོར་ལྷ་རྒྱ་མཚོའི་ཚོགས་ཀྱིས་བསྐོར་བ་དང་བཅས་པ་སྤྱན་དྲངས་ཏེ་བསྐྱེད་པའི་ལྷ་ལ་སིབ་སིབ་ཐིམ་པར་བསྒོམ་ལ༔ དེ་ནས་སྤྱན་འདྲེན་པ་ནི༔ ཀྱེེ༔ དད་པ་དང་ནི་དམ་ཚིག་གིས༔ གནོད་སྦྱིན་ཆེན་པོ་གཤེགས་སུ་གསོལ༔ ནོར་གྱི་བདག་པོ་གཤེགས་སུ་གསོལ༔ ཨ་པར་ཙིཏྟ་གཤེགས་སུ་གསོལ༔ ཛམ་ལྷ་རིགས་ལྔ་གཤེགས་སུ་གསོལ༔ འཁོར་དང་བཅས་པ་གཤེགས་སུ་གསོལ༔ བཛྲ་ས་མ་ཡ་ཛ་ཛཿ དེ་ནས་བཞུགས་སུ་གསོལ་བ་ནི༔ རྟེན་རྫས་འདི་དང་གཉིས་མེད་དུ༔ གཏན་དུ་བཞུགས་ནས་དངོས་གྲུབ་སྩོལ༔ བཛྲ་ས་མ་ཡ་ ཐོ།༔ ཏིཥྛ་ལྷན༔ དེ་ནས་མངའ་གསོལ་ཕྱག་འཚལ་བྱ་བ་ནི༔ གཏན་གྱི་སྲུང་མར་མངའ་གསོལ་ལོ༔ སྒོ་གསུམ་གུས་པས་ཕྱག་ཀྱང་འཚལ༔ ན་མོ་པུ་རུ་ཤ་ཡ་ཧོཿ དེ་ནས་མཆོད་འབུལ་ལ༔ ཉེར་སྤྱོད་བདུན་དང་འདོད་ཡོན་ལྔ༔ སྨན་གཏོར་རཀྟའི་མཆོད་པ་འབུལ༔ དངོས་འབྱོར་ཡིད་ཀྱིས་རྣམ་སྤྲུལ་པའི༔ འདོད་རྒུའི་དཔལ་ཡོན་ནམ་མཁའ་མཛོད༔ རང་རང་ཡིད་ལ་གང་འདོད་པའི༔ ལོངས་སྤྱོད་དཔག་བསམ་ཤིང་དང་ནི༔ ནོར་བུ་ཅི་བཞིན་འབྱུང་འགྱུར་གྱི༔ མཆོད་སྤྲིན་མི་ཟད་གཏེར་དུ་འབུལ༔ བཞེས་ནས་དངོས་གྲུབ་ཆར་དུ་ཕོབ༔ ཨོཾ་བཛྲ་ཨརྒྷཾ་པཱདྱཾ་པུཥྤེ་དྷཱུཥྤེ་སོགས་ནས་ཤཔྡ་རཱུ་པ་ཤཔྡ་གནྡྷེ་རཱ་ས་སྤཪྴ་མ་ཧཱ་སརྦ་པཉྩ་ཨ་མྲྀ་ཏ་རཀྟ་བ་ལིཾ་ཏ་ཁཱ་ཧི༔ དེ་ནས་བསྟོད་པ་ལ༔ ཧཱུྃ༔ དུས་གསུམ་སངས་རྒྱས་ཐམས་ཅད་ཀྱི༔ ཕྲིན་ལས་མངའ་བདག་འདོད་འབྱུང་གནས༔ འགྲོ་བའི་དབུལ་ཕོངས་འབྱོར་རྒུད་སྐྱོབ༔ ནོར་བདག་རྒྱལ་པོ་ཨ་པ་ར༔ གནོད་སྦྱིན་ཡོངས་ཀྱི་མངའ་བདག་ལ༔ གདུང་དབྱངས་རོལ་མོའི་སྒྲ་ཡིས་བསྟོད༔ རབ་འབྱམས་ཕྲིན་ལས་ཡོངས་གྲུབ་ཅིང་༔ འདོད་རྒུའི་དཔལ་ཡོན་ཆར་དུ་ཕོབ༔ མི་ཟད་གཏེར་དུ་འཕེལ་རྒྱས་མཛོད༔ དམ་ལ་མ་འདའ་ས་མ་ཡ༔ དེ་ནས་འབོད་པའི་དམིགས་པ་དང་༔ གསལ་བའི་གཟེར་གྱིས་སྔགས་འདི་བརྗོད༔ ཨོཾ་ཙིཏྟ་ཡཀྴ་ཁུག་དུང་དུང་ཤོག༔ ཨོཾ་ཙིཏྟ་ཁ་ལ་ཡ༔ སྙིང་ལ་བྲེང་བྲེང་༔ དུང་དུང་༔ མི་སྙིང་སྒུལ་སྒུལ་སྭཱ་ཧཱ༔ ཙིཏྟ་སྲོག་སྙིང་གཞན་སྣང་དབང་དུ་སྡུད་པ་ལ༔ ཨོཾ་ཙིཏྟ་ནྲྀ་འགུལ་འགུལ༔ རྒྱུག་རྒྱུག༔ བྲེང་བྲེང་༔ དུང་དུང་༔ མི་སྙིང་སྒུལ་སྒུལ་སྭཱ་ཧཱ༔ ཙིཏྟ་སྲོག་སྙིང་མཁའ་འགྲོ་གནད་ལ་དབབ་པ༔ ཨོཾ་ཙིཏྟ་ཧ་རི་ནི་ས་ས་མ་ཡ་མ་མ་ཁ་ཤི་བཾ་སྭཱ་ཧཱ༔ བསྒྲུབ་གནད་མི་ཚིག་གང་གིས་བར་མི་གཅོད༔ སྟན་གྱི་དྲོད་མི་ཡལ་བར་སྒྲུབ་ཚུགས་ཟུངས༔ ཤེས་པ་གཞན་དུ་མི་ཡེངས་ལྷ་གསལ་ཞིང་༔ སྤྲོ་བསྡུའི་འོད་ཀྱིས་ཕྱོགས་བཅུའི་རྒྱལ་བ་དང་༔ རྒྱལ་སྲས་བྱང་ཆུབ་སེམས་དཔའ་མ་ལུས་པ༔ ནོར་བདག་ཆེན་པོའི་སྐུར་གྱུར་རྟེན་ལ་བསྟིམས༔ ཡང་གཅིག་བཀའ་སྲུང་དྲེགས་པའི་ཚོགས་རྣམས་དང་༔ གནོད་སྦྱིན་རིགས་དང་འབྱུང་བ་ལྔ་ཡི་ལྷ༔ སྟོང་གསུམ་ཡུལ་ལྷ་གཞི་བདག་རྟེན་བརྟེན་པ༔ ནོར་བདག་ཨ་པར་དཀར་པོའི་སྐུར་གྱུར་ཏེ༔ རྒྱ་མཚོ་ལ་ནི་ཁ་ཆར་བབ་པ་བཞིན༔ བསྐྱེད་དང་གསལ་བའི་ལྷ་ལ་ཡང་ཡང་བསྟིམ༔ དམིགས་པ་བར་སྐབས་ཡང་ཡང་བསྐྱར་བ་གནད༔ གཉིད་དུ་ཕྱོགས་པའི་ཚེ་ཡང་གསལ་གཟེར་གྱི༔ ངང་དང་མི་འབྲལ་བ་ནི་བརྟན་འཐས་གནད༔ དེ་ཡིས་རིང་པོར་མི་ཐོགས་འབྲས་བུར་འགྱུར༔ ཞེས་སྨྲ་བཅད་མི་དང་མི་འཕྲད་བཟླས་པས་རྟགས་འདི་ལྟར་འབྱུང་༔ མལ་དུ་མགོ་མཇུག་བཟློག་པ་དང་༔ ཁྱིམ་འོད་ཀྱིས་གང་བ་དང་༔ བྲང་བརྡུང་བ་ཡང་འོང་ངོ་༔ ཐོ།༔ དེའི་དུས་སུ་རང་གསང་བདག་གི་ང་རྒྱལ་གྱིས་གོང་ནོན་དུ༔ ཨོཾ་བཛྲ་ཙཎྚ་མ་ཧཱ་རོ་ཥ་ཎ་ཧཱུྃ་ཕཊ༔ ཅེས་བརྒྱའམ་སྟོང་ཙམ་རེ་བཟླས་ན༔ ཡང་འགྲུབ་པའི་ལྟས་འདི་ལྟར་འབྱུང་༔ ལོ་ཏོག་རྒྱས་པ་དང་༔ ཉི་ཟླ་ཤར་བ་དང༔ བྱ་དཀར་མང་པོ་ལྡིང་ཞིང་འབབ་པ་དང་༔ ཁྲོམ་མང་པོ་འདུ་བ་དང་༔ མི་མང་པོས་ཕྱག་འཚལ་བ་དང་༔ ཚོགས་པ་མང་པོ་འདུ་བ་དང་༔ གཞན་གྱིས་ཟས་ནོར་མང་པོ་སྟེར་བ་དང་༔ ཁྱིམ་ལ་ཟས་ནོར་ལོངས་སྤྱོད་ཀྱིས་གང་བ་དང་༔ རྐང་འགྲོས་མང་པོ་འདུ་བ་སོགས་བྱུང་ན་ཤིན་ཏུ་བཟང་བ་ཡིན༔ ཁྱིམ་སྟོང་པ་དང་༔ རྟ་ཆུས་ཁྱེར་བ་དང་༔ ཨ་ཙ་ར་འཐབ་པ་དང་༔ གཞན་གྱིས་རང་ལ་རྒོལ་བ་རྣམས་བྱུང་ན་རྡོ་རྗེ་གཏུམ་པོའི་སྔགས་ཀྱི་མགོ་མཇུག་འདྲེན་ཏེ༔ སྔགས་མཐུད་མཇུག་བཟློག་ནས་བཟླས༔ དེས་ཀྱང་མི་ཕན་ན༔ ཐོད་པ་ལ་ཟངས་ཁབ་ཀྱིས་གཟིར༔ རང་གི་མལ་འོག་ཏུ་དོང་བྲུས་པའི་ནང་དུ་གཞུག་སྟེ་འགུགས་གཞུག་ནན་དུ་བྱས༔ དེ་ནས་ཡང་སྔགས་འབྲུ་བཟློག་ཏུ་བཟླས་པས་གོང་བཞིན་དུ་བཟང་པོ་རྨིས་བྱུང་ཚེ་དེ་དུས་ཁོ་ལ་བདེན་པ་བདར་བསང་སྦྱངས་བྱ༔ བསྐང་གསོལ་ལ་འབད་པར་བྱའོ༔ ཟངས་ཁབ་དར་སྣ་ལྔ་ཡིས་དྲིལ་ཏེ་རང་གི་གོང་བ་ལ་བཏགས་པ་གོང་ནོན་དུ་མཆོག་གོ༔ འཁུ་དུས་ཐམས་ཅད་ལ་ཟངས་ཁབ་ཀྱིས་གཟིར་རོ༔ བྱ་སྦྱིན་དང་ཡས་གླུད་བཏང་བར་བྱ་བ་དང་༔ ཆུ་སྦྱིན་དང་༔ ཚོགས་མཆོད་ཅི་མང་བཏང་བར་བྱའོ༔ དང་པོ་རྫས་འབྱོར་ན་ཕྱིས་ལོངས་སྤྱོད་འཕེལ་བའི་གནད་དུ་ཆེ་བས༔ ནས་ཁལ་ཕྱེད་ལ་གཏོར་མ་བྱ༔ བྲེ་ལྔའི་ཆངས་བུ་བྱ༔ མར་སྲང་བརྒྱད་ཀྱིས་ དཀར་རྒྱན་བྱ་བ་དང་༔ ཤ་ཁོག་ཕྱེད་ཀྱིས་ཚོགས་ཤ་དང་གཏོར་ཤ་བྱ་བ་གནད་ཡིན་ནོ༔ དེ་ལྟར་རྩེ་གཅིག་ཏུ་འབད་ཅིང་བསྒྲུབ་པས་རབ་ཞག་བཅུ་ནས་འགྲུབ༔ འབྲིང་ཟླ་བ་ཕྱེད་ཀྱིས་འགྲུབ༔ ཐ་ན་ཞག་ཉེར་གཅིག་གིས་འགྲུབ༔ ཡང་ཐ་བསོད་ནམས་ཤིན་ཏུ་དམན་པས་ཀྱང་ཞག་བཞི་བཅུ་ནས་ངེས་པར་འགྲུབ་པ་སྟེ༔ དང་པོ་ཕྱུགས་འཕེལ་ཞིང་དེ་ནས་ཟས་ནོར་ལོངས་སྤྱོད་རིམ་གྱིས་འཕེལ་བར་འགྱུར་རོ༔ སྤྱིར་གནོད་སྦྱིན་ཕོ་མོ་གང་བསྒྲུབ་ཀྱང་དུག་དང་གྲིབ་ཆེ་སྟེ་ཕྱུགས་ལ་གོད་ཁ་འབྱུང་སྲིད་པས་དེ་ཕྱིར་དབེན་པའི་རི་ལ་བསྒྲུབ་ཅིང་རྟགས་བརྟན་པོ་བྱུང་མཐར་ཁྱིམ་དུ་སྒྲུབ་པ་ལག་ལེན་གྱི་གནད་ཡིན་ནོ༔ བཀའ་སྲུང་གནོད་སྦྱིན་ཆེན་པོས་སྲུངས་ཤིག༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱ༔ ཟབ་རྒྱ༔ གསང་རྒྱ༔ གུ་ཧྱ༔ ཞེས་པ་འདི་ཉིད་ཁྲག་འཐུང་བདུད་འཇོམས་རྡོ་རྗེས་གསེར་སྨད་རྔ་ལ་སྟག་རྩེའི་གཡས་ལོགས་ནས་བཏོན་ཏེ། མཐར་རྟེན་འབྲེལ་དུས་ལ་བབ་ཚེ་ཆོས་ཀྱི་བདག་པོ་གདོང་དབོན་ལྷུན་གྲུབ་རྡོ་རྗེ་དང་དགེ་ལེགས་དཔལ་བཟང་པོ་དབལ་ཤུལ་ཐུབ་བསྟན་གྲགས་པ་གསུམ་གྱིས་ནན་དུ་བསྐུལ་ངོར་གཏན་ལ་དབབ་པའི་ཡི་གེ་པ་ནི་སྐལ་ལྡན་གྱི་སློབ་བུ་མཁྱེན་རབ་རྒྱ་མཚོའོ། །དགེའོ། །དགེའོ། །དགེའོ། །སརྦ་མངྒ་ལཾ།། ྋ T11609 - 184 ཐོ།༔ ཟབ་གསང་མཁའ་འགྲོའི་སྙིང་ཐིག་ལས༔ ནོར་བདག་ཨ་པར་དཀར་པོའི་གསོལ་མཆོད་འདོད་རྒུའི་ལྷུན་གྲུབ་བཞུགས་སོ༔ ན་མོ་གུ་རུ་པདྨ་ཀ་ར་ཡེ༔ བྷ་ངྷརྨཨཧྲ༔ འབྱོར་ཚོགས་གཏོར་མ་སྐྱེམས་སོགས་བཤམས༔ སྭ་བྷཱ་ཝ་ཡིས་སྦྱངས་བྱས་ཏེ༔ ནམ་མཁའ་མཛོད་ཀྱི་སྔགས་རྒྱས་མཐར༔ ཧཱུྃ༔ གསང་བདག་རྡོ་རྗེ་གཏུམ་པོ་ཡི༔ བཀའ་དང་དམ་ཚིག་དཔང་བཙུགས་ཏེ༔ གནོད་སྦྱིན་ཨ་པ་ར་ཙིཏྟ༔ འབོད་དོ་སྒྲུབ་མཆོད་གནས་འདི་རུ༔ མ་ཐོགས་མྱུར་དུ་གཤེགས་སུ་གསོལ༔ རྟེན་རྫས་བླ་རྟེན་འདི་ལ་བཞུགས༔ དཔག་བསམ་ཤིང་དང་ཡིད་བཞིན་ནོར༔ ཇི་བཞིན་གནོད་སྦྱིན་རྒྱལ་པོ་ཁྱོད༔ དགོས་འདོད་འབྱུང་བའི་གནས་སུ་བརྟེན༔ དངོས་འབྱོར་ཡིད་ཀྱིས་རྣམ་སྤྲུལ་ཏེ༔ དཀར་གསུམ་མངར་གསུམ་ཆང་སྐྱེམས་དང་༔ ཤ་ཁྲག་འབྲུ་སྣ་སྨན་སྣ་དང་༔ གོས་དར་ལྷབ་ལྷུབ་སྟག་གཟིག་ལྤགས༔ རིན་ཆེན་སྣ་ཚོགས་གོ་མཚོན་རིགས༔ གཟུགས་འགྲོས་དཀོར་ནོར་ལོངས་སྤྱོད་སོགས༔ ཚོགས་དང་གཏོར་མ་འདོད་རྒུའི་གཏེར༔ ཉེར་སྤྱོད་འདོད་ཡོན་སྨན་གཏོར་ཁྲག༔ ཟག་མེད་བདེ་བ་སྐྱེད་བྱེད་པའི༔ མཆོད་པའི་བྱེ་བྲག་སྣ་ཚོགས་ཀྱིས༔ ནོར་བདག་ཨ་པར་འཁོར་བཅས་ལ༔ གསོལ་ལོ་མཆོད་དོ་ ཐུགས་དམ་བསྐང་༔ རྣམ་སྲས་ཛམ་ལྷ་འཁོར་བཅས་ལ༔ གསོལ་ལོ་མཆོད་དོ་ཐུགས་དམ་བསྐང་༔ ནོར་བདག་ལྷ་མོ་མཆེད་འཁོར་ལ༔ གསོལ་ལོ་མཆོད་དོ་ཐུགས་དམ་བསྐང་༔ འགྲུབ་པའི་ལྟས་མཚན་མྱུར་དུ་སྟོན༔ ལོངས་སྤྱོད་གཏེར་གྱི་དངོས་གྲུབ་སྩོལ༔ སྐད་ཅིག་མི་འབྲལ་གྲོགས་མཛོད་ལ༔ ཕྲིན་ལས་རབ་འབྱམས་ཡོངས་འགྲུབ་མཛོད༔ ཅེས་བརྗོད༔ ཟས་སྣ་མང་འབྱོར་བསགས་པའི་གཏོར་མ་ལ༔ སྦྱངས་སྤེལ་འདོད་རྒུའི་དཔལ་དུ་བསྒྱུར་བ་ཡིས༔ ཉིན་བཞིན་བསྐང་གསོལ་བརྒྱ་ཕྲག་ཚར་དུ་བསྐྱལ༔ དེ་ཡིས་རིང་པོར་མི་ཐོགས་འགྲུབ་འགྱུར་རོ༔ བཀའ་སྲུང་དྲེགས་པ་གནོད་སྦྱིན་བཙན་རྒྱལ་དང་༔ གཟའ་བདུད་རྒྱལ་པོ་རཱ་ཧུ་ལ་ཡིས་སྲུངས༔ ས་མ་ཡ༔ རྒྱ་རྒྱ་རྒྱ༔ གཏེར་རྒྱ༔ སྦས་རྒྱ༔ གཏད་རྒྱཿ ཟབ་རྒྱ༔ གསང་རྒྱ༔ གུ་ཧྱ༔ ཞེས་པ་འདི་ཡང་ཁྲག་འཐུང་བདུད་འཇོམས་རྡོ་རྗེས་གསེར་སྨད་རྔ་ལ་སྟག་རྩེའི་གཡས་ལོགས་ཤྭ་བྲག་རྡོ་རྗེ་ནས་སྤྱན་དྲངས་ཏེ་མཐར་རྟེན་འབྲེལ་དུས་ལ་བབས་པས་ཆོས་ཀྱི་བདག་པོ་གདོང་དབོན་ལྷུན་གྲུབ་རྡོ་རྗེ་དང་དགེ་ལེགས་དཔལ་བཟང་ཐུབ་བསྟན་ལུང་རྟོགས་རྒྱ་མཚོ་རྣམས་ཀྱིས་ནན་དུ་བསྐུལ་ངོར་གཏན་ལ་ཕབ་པའི་ཡི་གེ་པ་ནི་ཀུན་བཟང་ཆོས་གྲགས་སོ།། དགེའོ །དགེའོ །དགེའོ །ལེགས་སོ། །སརྦ་མངྒ་ལཾ།། ། ཐོ༔ ཟབ་གསང་མཁའ་འགྲོའི་སྙིང་ཐིག་ལས༔ ནོར་བདག་ཨ་པ་རའི་བསྐང་གསོལ་དཔག་བསམ་རྒྱས་པ་བཞུགས་སོ༔ #བྷ།གྷནཾ།༔ ན་མོ་གུ་རུ་པདྨ་ཀ་ར་ཡེ༔ ནོར་བདག་ཨ་པར བསྒྲུབ་པ་ཡི༔ སྐལ་བཟང་སྐྱེས་བུ་དམ་པ་ལ༔ བསྐང་གསོལ་དཔག་བསམ་རྒྱས་པ་དགོས༔ ཇ་ཆང་འོ་སྐྱེམས་དཀར་དམར་གྱིས༔ གཏོར་མ་ཟས་སྣ་ཅི་འབྱོར་བཤམས༔ ནམ་མཁའ་མཛོད་ཀྱི་སྔགས་བརྗོད་མཐར༔ ཧཱུྃ༔ འདའ་ཀ་དམ་ཚིག་གཉན་པོ་ཡིས༔ གནོད་སྦྱིན་ཆེན་པོ་སྤྱན་འདྲེན་ནོ༔ ཨ་པར་ཙིཏྟ་སྤྱན་འདྲེན་ནོ༔ བླ་རྡོ་སྲོག་གི་རྟེན་ལ་བཞུགས༔ དངོས་གྲུབ་བསྒྲུབ་ཕྱིར་ཕྱག་འཚལ་ལོ༔ ཉེར་སྤྱོད་བདུན་དང་འདོད་ཡོན་ལྔ༔ ཕྱི་མཆོད་ཚོགས་ཀྱིས་ཐུགས་དམ་བསྐང་༔ སྨན་གཏོར་རཀྟ་ལོངས་སྤྱོད་ཚོགས༔ རིན་ཆེན་སྨན་འབྲུ་དར་ཟབ་དཀོར༔ ནང་མཆོད་རྣམ་པ་སྣ་ཚོགས་ཀྱིས༔ གསོལ་ལོ་མཆོད་དོ་ཐུགས་དམ་བསྐང་༔ བླ་རྡོ་རྟེན་གཏོར་གཏེར་བུམ་དང་༔ གསང་མཆོད་ཚོགས་ཀྱིས་གསོལ་མཆོད་བསྐང་༔ དཀར་དམར་གཏོར་མ་ཟས་སྣ་དང་༔ ཇ་ཆང་འོ་སྐྱེམས་འདོད རྒུའི་དཔལ༔ ལོངས་སྤྱོད་མི་ཟད་གཏེར་ཆེན་གྱིས༔ གསོལ་ལོ་མཆོད་དོ་ཐུགས་དམ་བསྐང་༔ མ་འགྱངས་མྱུར་དུ་གྲུབ་རྟགས་སྟོན༔ ལོངས་སྤྱོད་ནོར་གྱི་དངོས་གྲུབ་སྩོལ༔ འདོད་TI1609 - 187 དོན་མ་ལུས་ཡོངས་འགྲུབ་ཅིང་༔ བཀྲ་ཤིས་བདེ་ལེགས་དཔལ་རྒྱས་མཛོད༔ ལྟོག་འགོང་དབུལ་འདྲེ་རྡུལ་དུ་རློགས༔ དམ་ལ་མ་འདའ་ས་མ་ཡ༔ འདི་ལ་རྟག་ཏུ་བརྩོན་བྱས་ཤིང་༔ ཁྱད་པར་བསྒྲུབ་དུས་འབད་པ་གནད༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཞེས་པ་འདི་ནི་ཁྲག་འཐུང་བདུད་འཇོམས་རྡོ་རྗེའི་གཏེར་མའོ། །དགེའོ།། 8 དུད་འཇོམས་བཀའ་སྲུང་ཨ་པར་ཙིཏྟ་T1609 - 188 ཟོཾ།༔ ཟབ་གསང་མཁའ་འགྲོའི་སྙིང་ཐིག་ལས༔ ནོར་བདག་ཨ་པར་དཀར་པོའི་སྲོག་གི་རྟེན་ལ་དབབ་པ་ནི༔ བླ་རྡོ་སྲོག་རྟེན་མེད་མི་རུང་༔ དེ་ནས་བསྒྲུབ་དུས་རྟེན་དབབ་འདི༔ བདུན་ལས་མི་ཉུང་བརྗོད་པར་བྱ༔ བྷ།ཟླང྄༔ ན་མོ༔ དཀོན་མཆོག་རྩ་གསུམ་ཆོས་སྐྱོང་སྲུང་མའི་ཚོགས་ཀྱི་བདེན་པ་དང་༔ དོན་དམ་ཆོས་ཉིད་རྣམ་པར་དག་ཅིང་༔ ཀུན་རྫོབ་རྒྱུ་འབྲས་བསླུ་བ་མེད་པའི་བདེན་པས་གནོད་སྦྱིན་ཨ་པ་ར་ཙིཏྟའི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་དམིགས་རྟེན་བླ་རྡོ་འདི་ལ་རབ་ཏུ་གནས་ཤིང་རབ་ཏུ་བརྟན་པར་གྱུར་ཅིག༔ ཛཿ ཧཱུྃ་བཾ་ཧོཿ ཞེས་བརྗོད་མཐར༔ འགྲུབ་པའི་བདེན་བརྗོད་ཀྱང་བྱ༔ དེ་ནས་ལྷ་བསྐྱེད་གཞུང་ལ་འཇུག༔ གནོད་སྦྱིན་ཤན་པ་དམར་ནག་འཁོར་དང་བཅས་པ་ཐམས་ཅད་དང་༔ རྣམ་སྲས་ཛམ་ལྷ་རིགས་ལྔ་ལ་སོགས་གཏེར་བདག་ནོར་ལྷའི་རིགས་སུ་གཏོགས་པ་ཐམས་ཅད་ཨ་པ་ར་ཙིཏྟའི་སྐུར་གྱུར་ཏེ་བླ་རྡོར་ཐིམ་པར་ཡང་ཡང་བསམ་མོ༔ དུས་བཞིར་སྦྱོར༔ ས་མ་ཡ༔ རྒྱ་རྒྱ་རྒྱ༔ བརྡ་ཐིམ༔ ཁྲག་འཐུང་རྡོ་རྗེ་གྲོ་ལོད་རྩལ་གྱི་གཏེར་མའོ།། །། T1609 - 190 རྒྱོ༹ཾ་༔ ཟབ་གསང་མཁའ་འགྲོའི་སྙིང་ཐིག་ལས༔ ཆོས་སྐྱོང་རྒྱལ་པོ་ཆེན་པོའི་སྲོག་དབང་ཟབ་མོ་བཞུགས་སོ༔ སྲོག་གཅིག་T11609 - 191 ཐོ།༔ ན་མོ་གུ་རུ་པདྨ་ཀ་ར་ཡེ༔ ཉས་ཐགས༔ མ་འོངས་དུས་ཀྱི་བརྒྱུད་འཛིན་རྣམས༔ ཆོས་སྐྱོང་ཆེན་པོ་འདི་བསྒྲུབ་ན༔ དང་པོ་སྲོག་དབང་ཟབ་མོ་དགོས༔ དེ་ལ་སྐུ་གཟུགས་སྔགས་ཕྲེང་དང་༔ བེེ་ཡིག་བསེ་ཁྲབ་བསེ་རྨོག་དང་༔ དར་ཚོན་རིན་ཆེན་རྒྱལ་མཚན་དང་༔ ནེ་འུ་ལེ་དང་གཏོར་མ་བཤམས༔ དང་པོ་སྲོག་སྒྲུབ་པ་ནི༔ ཧཱུྃ༔ རང་ཉིད་གསང་བའི་བདག་པོའི་མདུན་གྱི་དབང་རྫས་སྒྲུབ་རྫས་ཐམས་ཅད་ཆོས་སྐྱོང་བའི་རྒྱལ་པོ་ཆེན་པོ་རྣམ་ཐོས་སྲས་ཀྱི་སྐུ་གསུང་ཐུགས་ཡོན་ཏན་ཕྲིན་ལས་མི་ཟད་པ་རྒྱན་གྱི་འཁོར་ལོའི་རོལ་པར་ཡོངས་སུ་རྫོགས་པར་གྱུར༔ དེ་ལས་འོད་ཟེར་དཔག་ཏུ་མེད་པ་འཕྲོས་T11609 - 192 ་ཝྃ།༔ པས་བྱང་ཕྱོགས་གཏེར་གྱི་གཞལ་ཡས་ནས་གནོད་སྦྱིན་རྣམ་སྲས་རིགས་ལྔའི་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་མ་ལུས་ཤིང་ལུས་པ་མེད་པར་སྤྱན་དྲངས་ལ་བསྟིམ་མོ༔ ཨོཾ་བཻ་ཤྲ་མ་ཎ་ཡེ་སརྦ་ཡཀྴ་ཛམ་བྷ་ལ་བཛྲ་ས་མ་ཡ་ཛ་ཛཿ ཛཿ ཧཱུྃ་བཾ་ཧོཿ སྲོག་གནས་པར་གྱུར༔ བླ་གནས་པར་གྱུར་ཅིག༔ མཐོང་ངམ་ཐོས་སམ་དྲན་ནམ་རེག་པ་ཙམ་གྱིས་སྐུ་གསུང་ཐུགས་ཡོན་ཏན་ཕྲིན་ལས་ཐམས་ཅད་ལ་དབང་འབྱོར་བར་གྱུར་ཅིག༔ ཨོཾ་བེེ་ཤྲ་མ་ཎ་ཡེ་ཀ་ཡ་ཝཱཀ་ཙིཏྟ་སརྦ་ཨ་བྷི་ཥིཉྩ་འདུས་སྭཱ་ཧཱ༔ ཅི་མང་བཟླའོ༔ མཐར་བསྟོད་པ་ཡང་བྱའོ༔ དེ་ནས་T11609 - 193 དབང་བསྐུར་བ་ནི༔ སློབ་མ་རྣམས་གྲལ་དུ་འཁོད༔ ཁྲུས་དང་གཙང་སྦྱངས་ནན་དུ་བྱ༔ བགེགས་བསྐྲད་སྲུང་འཁོར་བསྒོམ༔ མཎྜལ་ཕུལ་ཞིང་གསོལ་བ་གདབ་པ་ནི༔ ཀྱེ་ཧོཿབླ་མ་ཆེ་མཆོག་གསང་བའི་བདག༔ ཁྱེད་ལ་སྐྱབས་མཆི་ཉམས་ཆག་བཤགས༔ ཆོས་སྐྱོང་རྒྱལ་པོ་ཆེན་པོ་ཡི༔ སྲོག་གི་དབང་མཆོག་བསྐུར་དུ་གསོལ༔ ལན་གསུམ་མཐར༔ ཀྱེ་ཧོཿ ལས་དང་སྐལ་ལྡན་བུ་མཆོག་རྣམས༔ ཁྱེད་ཅག་དབང་གི་སྒོར་ཞུགས་ན༔ དམ་ཚིག་སྲུངས་ཤིང་སྒྲབ་ལ་བརྩོན༔ དེས་ན་དབང་ཡང་བསྐུར་བགྱིའོ༔ ཞེས་གསུངས༔ དེ་ནས་དམ་ཆུ་སྦྱིན་པ་ནི༔ ཀྱེ༔ གསང་བ་ཆེན་པོའི་བདུད་རྩི་མཆོག༔ དམ་དུ་བསྲུང་ན་དངོས་གྲུབ་འཐོབ༔ ཉམས་ན་དམྱལ་བར་ཚིག་འགྱུར་རོ༔ མ་ཉམས་སྲུངས་ཤིག་སྐལ་ལྡན་བུ༔ ས་མ་ཡ་ན་ར་ཀན༔ ཅེས་བསྐྱལ་བཅུག་གོ༔ ཨོཾ་མ་ཧཱ་ཤུ་ནྱ་ཏཱ་སོགས་སྐད་ཅིག་གིས་སྟོང་པའི་ངང་ལས་སློབ་མ་དེ་ཉིད་ཡི་གེ་བེེཿ སེར་པོ་ཡོངས་སུ་གྱུར་པ་ལས་ཆོས་སྐྱོང་རྒྱལ་པོ་ཆེན་པོ་རྣམ་ཐོས་སྲས་ཀྱི་སྐུར་བསྒོམ༔ གོང་བཞིན་ལྷ་བསྐྱེད་སྤྱན་འདྲེན་ཐམས་ཅད་ཚང་བར་བརྗོད་ནས་ཡེ་ཤེས་བསྐྱེད་དབབ་བྱ༔ མཐར༔ ཡེ་ཤེས་དབབ་པ་དེ་རབ་ཏུ་བརྟན་པར་གྱུར་ཅིག༔ ཏིཥྛ་བཛྲ་བརྗོད༔ སྲོག་ཐོབ་པར་བསམ༔ སྐུ་གཟུགས་དེ་རྣམ་ཐོས་སྲས་དངོས་སུ་བསྒོམ་སྟེ་གཏད་པ་ནི༔ ཧཱུྃ༔ ཟོཾ།༔ ཡེ་ནས་མ་སྐྱེས་ཆོས་སྐུའི་ངང་༔ འགྲོ་བའི་དོན་དུ་སྐུར་བཞེངས་པ༔ ཆོས་སྐྱོང་རྒྱལ་ཆེན་རྣམ་ཐོས་སྲས༔ གནོད་སྦྱིན་ཡོངས་ཀྱི་དབང་ཕྱུག་གི༔ སྐུ་ཡི་བཀོད་པ་ཡོངས་རྫོགས་ཀུན༔ སྐལ་ལྡན་ཁྱོད་ལ་དབང་བསྐུར་རོ༔ སྐུ་ལ་དབང་བསྒྱུར་དབང་ཐོབ་ཤོག༔ ཨོཾ་བེེ་ཤྲ་མ་ཎ་ཡེ་ས་མ་ཡ་ཀཱ་ཡ་ཨ་བྷི་ཥིཉྩ་ཨོཾ༔ དེ་ནས་སྔགས་ཕྲེང་ཐོགས་ལ༔ ཧཱུྃ༔ ཆོས་སྐྱོང་རྒྱལ་པོ་ཆེན་པོ་ཡི༔ སྲོག་གི་སྙིང་པོ་ཡི་གེ་བརྒྱད༔ སྐལ་ལྡན་ཁྱོད་ལ་དབང་བསྐུར་རོ༔ གསུང་ལ་དབང་བསྒྱུར་དབང་ཐོབ་ཤོག༔ རྩ་སྔགས༔ ཝཱཀ་ཨ་བྷི་ཥིཉྩ་ཨཱཿ དེ་ནས་བེེཿ ཡིག་གཏད་ལ༔ ཧཱུྃ༔ ཆོས་སྐྱོང་རྒྱལ་ཆེན་རྣམ་ཐོས་སྲས༔ གནོད་སྦྱིན་ཡོངས་ཀྱི་དབང་ཕྱུག་ཆེའི༔ སྲོག་