Tibetan
སྒྲུབ་མ་གྲུབ་སྟེ། །མཁོ་མཁོ་དགོས་དགོས་རྒྱུན་མི་ཆད །ཤི་ན་དམ་སྲི་ཉུ་ལེར་སྐྱེ། །དེ་འདྲའི་ལད་མོ་མ་བྱེད་རེམ། །མདོ་ཤོར་འདི་ཕྱིའི་སྐལ་ཆད་འགས། །ཚེ་འདིའི་སོ་ནམ་བྱེད་མི་ཐུབ།། དེ་ཚེ་མཚམས་སྒྲུབ་བྱེད་སྙིང་འདོད། །མཚམས་སྒྲུབ་བྱེད་ལ་བབ་པའི་དུས །སྡོད་སར་མི་ཚུགས་ཉུག་ཉུག་བྱེད། །ཝ་སྤྱང་ལྟ་བུར་ཀུན་ཏུ་རྒྱུ། །དེ་འདྲའི་ལད་མོ་མ་བྱེད་རེམ། །མདོར་ན དུས་དང་རྣམ་ཀུན་ཏུ། །རི་དྭགས་རྨས་པ་ཇི་བཞིན་དུ། །གཅིག་པུར་སྡོད་ལ་སྒྲུབ་པ་གྱིས། །སྲོག་འཚོ་ཙམ་གྱི་ཁ་ཟས་ལས། །གཏན་ནོར་གསོག་སེམས་མ་སྐྱེ་ཞིག །ལྷག་སྐྱོབ་ཙམ་གྱི་གོས་ཧྲུལ་ལས། །མཛེས་བཟང་འཇམ་པར་མ་རེ་ཞིག །ལྟ་སྒོམ་ཟབ་མོ་ཉམས་ལེན་གནད། །རྣམ་རྟོག་ཕྲེང་བར་མ་རྩི་ཞིག །དེ་དག་ཚུལ་བཞིན་ཉམས་ལེན་ན། །རྩ་བའི་བླ་མའི་ཞབས ཏོག་ཡིན། །དྲིན་ཆེན་ཕ་མའི་དྲིན་ལན་ཡིན། །དཀོན་མཆོག་གསུམ་གྱི་བསྟན་པ་ཡིན། །སེམས་ཅན་ཡོངས་ཀྱི་འགྲོ་དོན་ཡིན། །བཀའ་ཤོག་འདི་ཡི་རྣམ་ཐར་ནི །ཤཱཀྱ་ཐུབ་པའི་བཀའ་ཤོག་ཡིན། །མར་མེ་མཛད་ཀྱི་ལུང་བསྟན་ཡིན །བྱམས་པ་མགོན་པོའི་ཐུགས་དམ་ཡིན། །པདྨ་འབྱུང་གནས་ཞལ་ཆེམ་ཡིན། །བརྒྱུད་འཛིན་ཡོངས་ཀྱི་སྲོག་རྩ་ཡིན །བདུད་འཇོམས་རྡོ་རྗེའི་སྨྱོ་གཏམ་ཡིན། །ཉམས་སུ་བླང་ན་དམ་པ་ཡིན། །ཡལ་བར་དོར་ན་ང་ངལ་བས། །ཁྱོད་ཀྱི་ཉེས་པ་ཕྲ་མོ་བསགས། །ཨ་ཧོ། ཡེ་གཞི་ཡི་ཆོས་སྐུ་ཀུན་བཟང་ཉིད་ཨེ་རི །འཁོར་འདས་ཀྱི་ཆོས་ཀུན་དག་མཉམ་ཞིག་རེད་ན། །ཡེ་གནས་ཀྱི་ཡེ་ཤེས་མངོན་གྱུར་དུ་ཐལ་ཐལ། །སངས་རྒྱས་ནི་རང་ས་དེ་ཉིད་དུ་ཨེ་གོ། །མ་བལྟས་དང་ཆོས་ཉིད་མངོན་སུམ་དུ་མཐོང་བྱུང་། T11618 - 228 ༄༅། །མ་བསྒོམ་དང་རིག་པ་ཚད་ཕེབས་སུ་བུད་ཐལ། །མ་བསྒྲུབ་དང་ཡེ་ཤེས་རང་བྱུང་དེ་འགྲུབ་ཡོད། །མ་རྩོལ་དང་འགྲོ་དོན་གཅིག་ཆར་དུ་འགྲུབ་ཐལ །མི་མངོན་པའི་རྒན་པོའི་སྐྱིད་ཉལ་ལ་ལྟོས་དང་། །མ་བརྟེན་པའི་རང་རིག་བླ་མ་རུ་ཤར་བྱུང་།མ་བྲིས་དང་སྣང་བ་བརྡ་དཔེ་རུ་ཤར་ཐལ། །མ་བཅོས་པས་རྒན་པོའི་འབད་རྩོལ་འདྲ་མིན་ཏེ། འབྲོག་བན་དང་བདུད་འདུལ་སྦྱངས་སྟོབས་དེ་ངོ་མཚར། །པད་འབྱུང་གིས་རྗེས་བཟུང་རྒན་པོ་ཡི་སྐྱིད་པ །སྨོན་ལམ་དང་ལས་འབྲེལ་མཐུན་པ་ཡི་བུ་ཆུང་། །དགའ་སྤྲོ་ཡི་ངང་ནས་ཕ་རྗེས ལ་མཆོང་ཤོག །ཐོགས་འགོར་གྱི་སྲིད་ཡུལ་ལྟད་མོ་རུ་མ་མངོན། །ཤེས་རིག་གི་རྒྱལ་པོའི་ཞིང་ཁམས་དེ་མཚར་རོ། །ཁམས་གསུམ་གྱི་འཁོར་བ་གཅིག་ཆར་དུ་འདྲེན་པའི། །སྟོབས་ལྡན གྱི་དབང་ཕྱུག་ཆོས་ཟད་ལ་ཆས་འགྲོ །ཕ་རྗེས་སུ་བུ་ཡིས་ཟིན་པ་ཞིག་བཀའ་ཡིན །ཅེས་པ་འདི་སློབ་འབངས་སུ་གྱུར་པ་དོན་རྟོགས་ཞེས་བྱ་བ་ལ་ཁྲག་འཐུང་བདུད་འཇོམས་རྡོ་རྗེས་ཤིན་ཏུ་གཅེས་པའི་སྙིང་གཏམ་གདམས་པའོ། །དགེའོ། །དགེའོ། །དགེའོ།། T11618 - 230 ༄༅། །རྣལ་འབྱོར་ཆོས་ཉིད་འོད་ཟེར་ལ་གདམས་པ་ཉམས་ཀྱི་གླུ་དབྱངས་བཞུགས་སོ། །འགྲོ་བའི་མགོན་པོ་མཉམ་མེད་ཤཱཀྱའི་ཏོག །བོད་ཁམས་མུན་སེལ་མཁན ཆེན་ཞི་བ་འཚོ། །གསང་སྔགས་བསྟན་པའི་སྲོག་ཤིང་པདྨར་སྐྱེས །དབྱེར་མེད་རང་རིག་དོན་གྱི་བླ་མར་འདུད། །གྲངས་མེད་ཚོགས་སྨོན་ལས་འཕྲོ་བཟང་པོའི་འབྲས། །ད་རེས་དལ་འབྱོར་ལྡན་པའི་མི་ལུས་ཐོབ། །རྙེད་དཀའ་དྲན་ནས་དོན་དང་ལྡན་པར་མཛོད། །ཚེ་འདིའི་སྣང་བ་སྒྱུ་མའི་ལྟད་མོ་འདྲ། །ནམ་འཆི་ཆ་མེད་དྲན་མཛོད་བློ་སྣ་བསྟུང་།ཁམས་གསུམ་འཁོར་བ་སྡུག་བསྔལ་ཡོ་ལངས་ལ། །ཐར་པ་དོན་དུ་གཉེར་མཛོད་སྐལ་ལྡན་བུ །དཀར་ནག་ལས་འབྲས་གདོན་མི་ཟ་བར་སྨིན། །བླང་དོར་གནས་ལ་མཁས་པ་ལག་ལེན་གནད། །ཐར་པའི་ལམ་སྟོན་དགེ་བའི་བཤེས་གཉེན་ཡིན། །དཔྲལ་བའི་མིག་བཞིན་རྩི་བཀུར་བྱེད་པ་དང་། །སྒྲུབ་དང་དཀྱིལ་འཁོར་ཡོངས་ཀྱི་བདག་པོར་བསྟེན། །དམ་ཚིག་སྡོམ་པ་ཐར་པའི་སྲོག་རྩ་ཡིན། སྲོག་གི་གཏའ་རུ་ཟུངས་ཤིག་སྐལ་ལྡན་བུ །རྣམ་མཁྱེན་གསལ་ལམ་བྱང་ཆུབ་སེམས་མཆོག་ཡིན། །འགྲོ་དོན་བར་མེད་མཛོད་ཅིག་སྐལ་ལྡན་བུ། །སྐྱེས་བུ་གསུམ་གྱི་ལམ་རིམ་དམ་པའི་ ཆོས། །རྒྱལ་བའི་བཀའ་སྟེ་ཕྱོགས་རིས་མ་བྱེད་ཅིག །མདོ་སྔགས་བསྟན་པའི་ཉི་མ་འོད་པོ་ཆེ། །བདུད་འབངས་ཀླ་ཀློའི་སྤྲིན་དང་ཉེ་ལ་ལྟོས། །བཟློག་བྱེད་མཐུ་ནུས་རླུང་ཆེན་བྲན་པ་ཡི། སྐྱེ་བོ་མཆིས་ན་ཕྱོགས་རིས་དོན་ལྡན་ལེགས །དེ་མིན་དོན་མེད་སྡིག་ཆེན་བསགས་པ་ཡིས། །ཐར་པའི་སྐར་ཁུང་བསྣུབ་པས་དོན་ཅི་མཆིས། །འགའ་ཞིག་གོ་ས་མཐོ་ལ་སྲེད་པ་ཡིས།། ཐ་མ་བྱ་བྱེད་མང་པོའི་སྣ་ཀ་ཟིན། །སོས་དལ་མེད་པར་གཏོ་ཡས་དག་ལ་འབྱམས། །འདོད་དང་སྲེད་པས་རྒྱུད་ཁེངས་གྲོང་ཡུལ་ཉུལ། །ཤི་བའི་ནང་པར་ལས་མཐའ་ཟིན་དུས་མེད། དེ་འདྲའི་ལས་ངན་མ་བྱེད་སྐལ་ལྡན་བུ། །འགའ་ཞིག་དགྲ་འདུལ་གཉེན་སྐྱོང་བྱ་བ་ཡིས །ཁེ་དྲག་བསྒྲུབ་འདོད་མི་ཚེ་དེ་ལ་ཟད། །ཤི་བའི་ནང་པར་འགྱོད་ཀྱང་འཕྱིས་པ་ཡིན །དེ་དོན་སེམས་ལ་ཞོག་དང་སྐལ་ལྡན་བུ། །གྲོང་ཡུལ་ཉུལ་ཚེ་གཅིག་པུར་སྡོད་སྙིང་འདོད །གཅིག་པུར་སྡོད་ཚེ་གྲོང་ཡུལ་འགྲོ་སྙིང་འདོད། །བློ་སྣ་མང་པོས་བསམ་པའི་དོན་ཀུན་འཆོར། བློ་སྣ་གཅིག་ཏུ་དྲིལ་དང་ཕོ་རབ་ཡིན། །ཐོས་པ་སློབ་ཚེ་བསྒོམ་པ་ཉམས་ལེན་འདོད། །སྒོམ་སྒྲུབ་བྱེད་ཚེ་བཟླས་བརྗོད་བྱེད་ལ་སྤྲོ །ཡིད་ཆེས་མེད་པས་དོན་ཀུན་འགྲུབ་དུས་མེད། །མི་ ༄༅། །ཆོས་བསྒྲུབ་པས་ལམ་ལ་གཡེལ་ཞིང་རྨོངས །ལྷ་ཆོས་བསྒྲུབ་ཚེ་ལེ་ལོས་རྣམ་པར་གཡེངས །འདི་ཕྱིའི་ཟོང་ཟད་མདོ་མེད་སྐལ་བ་ཆད། །མི་ཡི་ནང་ནས གཟུགས་བརྙན་ཙམ་པོ་བ། །དེ་དོན་ཡིད་ལ་ཞོག་ཅིག་དོན་ལ་གཉེར། །མི་ཚེ་རྨི་ལམ་གནས་སྐབས་ཙམ་འདི་ལ། །རྟག་འཛིན་ཞེན་པ་ཆོད་ལ་གཏན་བདེ་སྒྲུབས། །ཚེ་འདིར་ཐར་པའི་ལམ སྣ་ཟིན་པ་ཞིག །མཛོད་དང་མི་ཡི་ནང་ནས་ཁྱུ་མཆོག་ཡིན །ད་ནི་ཐར་པ་ཆེན་པོའི་གྲོང་འཇུག་ན། །སྦྱང་གཞི་མ་དག་འཁོར་བའི་སྒོ་གསུམ་པོ། །སྦྱང་བྱེད་རྡོ་རྗེ་གསུམ་གྱི་གྲོང་འཕོ་འཇུག །མངོན་པར་ཞེན་པ་དྲུག་ལས་བཟློག་པའི་ཕྱིར། །ཞིང་དང་གཞལ་ཡས་སྟོན་འཁོར་གདན་གོས་རྒྱན། །གསལ་ཞིང་དག་པ་དྲན་པའི་གནད་ཀྱིས་ཟུངས། །སྒྱུ་མ་རྨི་ལམ་ཆུ་ཟླ གཟུགས་བརྙན་དང་། །རྨི་ལམ་ཅི་བཞིན་སྟོང་པའི་རྒྱ་ཡིས་ཐོབ །གསལ་སྣང་རྒྱུན་བཟུང་རྣམ་མཁྱེན་ལམ་སྣར་བསྐྱལ །འཁོར་འདས་རང་སྣང་རོལ་པར་ཐག་བཅད་ནས། །རེ་དང་དོགས་པའི་མཚན་མ་ཞིག་པའི་ཕྱིར། །ཆིངས་ཆེན་གསུམ་གྱི་མན་ངག་གནད་ལྡན་པས །གཉན་ཁྲོད་དག་ཏུ་ངེས་མེད་རྒྱུ་བྱས་ནས །རྣམ་རྟོག་དག་ལ་ཐོག་བརྫིས་བྱ་བ་དང་། །བདུད་T11618 - 233 བཞི་དབྱིངས་སུ་གཅོད་པའི་ལམ་ལ་བསླབ། །གཅེས་འཛིན་ཕུང་པོ་མཆོད་སྦྱིན་གཟན་དུ་མཛོད །སྣང་བ་སྒྱུ་མ་རྨི་ལམ་ལྟ་བུར་སྦྱང་། །རྐྱེན་ངན་དངོས་གྲུབ་མཆོག་ཏུ་བསྒྱུར་བ་དང་། ལྟས་ངན་གཡང་དུ་ལེན་པ་མན་ངག་གནད། །ན་དགའ་ཤི་སྐྱིད་སྐྱིད་སྡུག་རོ་སྙོམས་པ །གཅོད་ཀྱི་མན་ངག་ཟབ་ཁྱད་མཆོག་ཏུ་ཤེས། །ཚེ་གཅིག་སྙིང་པོའི་སྒྲུབ་ལ་གཞོལ་བ་དང་།། གཞན་གྱི་རྐྱེན་དབང་མི་བཏང་རྣལ་འབྱོར་ལམ། །གྲོང་ཕྱོགས་འདྲེ་བརྡུང་མཁན་དང་ཁྲིམས་གཉེར་མཁན། །མོ་གྲོགས་བུ་སྐྱོང་མཁན་དུ་འཆོལ་བ་ནི །བདུད་ཀྱི་འབངས་སྤུན་དེ་ལས་རིང་བར་བྲོས། །རྣལ་འབྱོར་སྤྱོད་པའི་གནད་ཡིན་མཆོག་ཏུ་ཟུངས། །ད་ནི་མ་རིག་བདག་ལྟའི་རཱུ་དྲ་འདི། །དང་པོ་འཛིན་པ་རླུང་གི་གཞི་བཟུང་ནས། །ཆོས་དབྱིངས་མདངས་བསྒྲིབ་ནམ་མཁའ་བེམ་སྟོང་ཤར། །མེ་ལོང་མདངས་བསྒྲིབ་རྒྱ་མཚོ་ཆུ་རུ་ཤར། །མཉམ་ཉིད་མདངས་བསྒྲིབ་ས་ཡི་གཞི་ཡང་ཤར །སོར་རྟོག་མདངས་བསྒྲིབ་མེ་དང་དྲོད་དུ་ཤར། །དེ་ནི་སྣོད་ཀྱི་འཇིག་རྟེན་ཅེས་སུ་གྲགས། །འབྱུང་ཆེན་དེ་ཡི་དྲོད་དང་རླངས་པའི་ཚུལ། ཤ་སོགས་འབྱུང་ཕྲན་ལྔ་འདུས་སེམས་ཅན་ཤར། །དེ་ཡང་བཅུད་ལས་དྭངས་མ་སྙིགས་མའི་ཚུལ། །སྣང་བའི་ཡུལ་གྱུར་ ༄༅། །གནས་རིགས་དྲུག་ཏུ་གྲགས། །དོན་ལ་བདག་ཏུ་ལྟ་བའི་རཱུ་དྲ་ཡི །ཤ་ཁྲག་དྲོད་དབུགས་ཕུང་ཁམས་སྐྱེ་མཆེད་དེ། །དོན་ལ་འཁྲུལ་སྣང་ལས་ནི་གཞན་མ ཡིན། །འདི་དོན་རྟོགས་ན་རཱུ་དྲ་ངང་གིས་གྲོལ །ཨ་ཧོ། གཞི་མེད་དང་རྩ་བྲལ་ཆོས་སྐུ་ཡི་ཡོ་ལངས །མ་རིག་པའི་མུན་པ་རྣམ་གསུམ་གྱིས་བསྒྲིབ་ནས །ལྷུན་གྲུབ་ཀྱི་སྣང་བ་རྟེན འབྱུང་དུ་གོ་འཕོས། །བདག་ལྟ་ཡི་རཱུ་དྲ་འཁོར་བ་རུ་ལངས་ནས། །སྐྱེ་འགགས་ཀྱི་སྣང་བ་དུས་གསུམ་དུ་ཤར་ཚེ། །ཚོགས་བརྒྱད་ཀྱི་སྒྱུ་འཕྲུལ་མ་ངེས་པར་མངོན་པས། །ཡུལ་དྲུག་གི སྣང་བ་གོ་རྟོག་ཏུ་འཕོས་འགྱུར། །བདག་འཛིན་གྱི་ལས་རླུང་འབྱུང་བཞི་རུ་གྲུབ་ནས། །ཡེ་ཤེས་ཀྱི་མདངས་ལྔ་གདངས་ཐོག་ཏུ་ནུབ་སྟེ །གདངས་ལྔ་ལ་མངོན་ཞེན་འབྱུང་ལྔ་རུ་འཐས་པས། །སྣོད་བཅུད་ཀྱི་རོལ་པ་རྟེན་མེད་དུ་ཤར་བ། །འདི་སྣང་དང་ཕྱི་སྣང་རྨི་སྣང་གི་སྲིད་པ །འབྱུང་ལྡོག་ཏུ་ཤར་ལ་མངོན་ཞེན་དང་ཉེར་ལེན། །རེ་དོགས་ཀྱི་ཡུལ་ཞེན་འཕྲུལ་འཁོར་ལ་ཁ་འབྱམས། །ཤེས་རིག་གི་རྒྱལ་པོ་ཤེས་རབ་ཀྱི་སྤྱན་གྱིས། །ཆོས་ཉིད་ཀྱི་ཡུལ་ལ་ལྟད་མོ་རུ་བལྟས་པས །མ་གྲུབ་དང་མ་བྱུང་མི་གནས་པའི་རང་བཞིན །མེད་བཞིན་དུ་ཡོད་འཛིན་ གཅིག་པུ་ཡི་སྣང་ལས། །མིང་དངོས་དང་འབྱུང་གནས་འགྲོ་གསུམ་གྱིས་སྟོང་པའི། །སྟོང་ཉིད་དང་ངང་ཚུལ་རྨི་སྣང་གིས་སྟོན་བྱུང་། །སྣང་སེམས་དང་འཁོར་འདས་རོ་གཅིག་གི་རོལ པར། །སྟོང་ཉིད་ཀྱི་རྒྱལ་པོ་མངོན་གྱུར་དུ་མཐོང་བའི། །བདག་མེད་ཀྱི་ཤེས་རབ་ལྟ་སྒོམ་གྱི་སྤྱི་ཆིངས། །སྤྲོས་བྲལ་ནི་རྣམ་ཐར་གསུམ་ལྡན་གྱི་ངོ་བོར །གནས་ལུགས་དང་ཡིན་ལུགས གཉིས་མེད་དུ་འདྲེས་པའི། །དབུ་མ་ནི་རབ་ཏུ་མི་གནས་པ་འདི་ན། །དབུ་མ་ཡི་རྒྱལ་པོ་ཆོས་ཀུན་གྱི་འབྲས་བུ། །འཁོར་འདས་དང་ལམ་གསུམ་ཡེ་གཞི་ཡི་རྒྱུད་དུ། །རྒྱ་མཚོ་དང་ཆུ་ཕྲན གཉིས་མེད་དུ་གཅིག་བཞིན། །ཆོས་རྣམས་ཀུན་ཆོས་ཉིད་ཆེན་པོ་རུ་རོལ་པའི། །རྫོགས་ཆེན་གྱི་ལྟ་བ་འདི་ཀ་ནི་ཨེ་རེད། །ཡེ་སྟོང་གི་རིག་པ་སྤྲོས་མཐའ་དང་བྲལ་བའི། །ཆོ་འཕྲུལ་དང་སྣང་སྲིད་སྒྱུ་མཁན་དང་འཕྲུལ་བཞིན །ངོ་འཕྲོད་དུ་གདིང་ཐོབ་ཕྱག་ཆེན་གྱི་ལྟ་བ །འདི་ཀུན་ཀྱང་སོར་རྟོག་ཤེས་རབ་ཀྱིས་གཏན་དབབ །བདག་མེད་ཀྱི་ཤེས་རབ་མངོན་གྱུར་དུ་ཕེབས་ཚེ། །ལྟ་བ་ནི་ཀུན་གྱི་སྤྱི་ཆིངས་དེ་ཁོ་ན། །ལམ་ལ་ནི་རྣམ་གྲངས་གདུལ་བྱ་ཡི་ཁམས་དབང་། །སོ་སོ་རུ་བསྟན་པའི་འཇུག་སྒོ་ནི་ཐ་དད། །དོན་དམ་གྱི་དབྱིངས་སུ་ཆོས་ཉིད་དུ་རོ་གཅིག ༄༅། །ཡིན་མིན་གྱི་ཁས་ལེན་ཕྱོགས་ཆད་དུ་བཟུང་ན། །ཆོས་སྤོང་གི་ལས་ངན་དེ་ལས་ནི་མི་གཞན། །ཤེས་བྱ་ཡི་སེམས་རྟོག་ཆོས་ཉིད་དུ་ཞིག་ཏེ །ཤེས་ཡུལ་དང་ཤེས་བྱེད་གཉིས་འཛིན་ལས་འདས་པའི། །ཡེ་གནས་ཀྱི་ཡེ་ཤེས་མངོན་གྱུར་དུ་ཡན་ཐོང་།རྫོགས་ཆེན་གྱི་རིག་པ་འུ་ཅག་གི་བགོ་སྐལ །བློ་ཡིད་དང་སེམས་ཀྱིས་བཅས་བཅོས་ནི་མ་ཡིན། ཡེ་གྲོལ་ལ་ཡང་གྲོལ་ལྷན་པ་ཡང་མི་དགོས །མ་རིག་པའི་མུན་ཁམས་རིག་པ་རུ་སངས་ནས །སངས་རྒྱས་ཀྱི་དགོངས་པ་གནས་ཡུལ་ལ་མི་ལྟོས། །གདོད་མ་ཡི་མགོན་པོ་རང་ས་ན་ཨེ་རིག །ཧེ་ཧེ། ཤེས་པ་ནི་དངོས་པོའི་སྣང་ཡུལ་དུ་མཆེད་དེ། །རྣམ་རྟོག་གི་འཁྲུལ་པ་ཉེར་ལེན་གྱིས་བསླུས་པའི། །མངོན་ཞེན་ནི་སྐུ་དང་ཡེ་ཤེས་སུ་འཕོ་ཕྱིར། །གནས་ལུགས་ཀྱི་སྒྲོན་མ་རྣམ་དྲུག་གི་གཞི་ལ། །ལམ་སྒྲོན་ནི་བཞི་པོ་གནད་གཅིག་ཏུ་བསྣུན་པས །ཤེས་རབ་ཀྱི་མིག་ལ་ཡེ་ཤེས་ཀྱི་སྤྱན་ཚུད །འོད་གསལ་གྱི་མཐོང་ཆེན་ལྟད་མོ་རུ་མངོན་པའི །སྣང་བཞི་ཡི་ཉམས་རྟོགས་རིམ་པ་བཞིན་འབྱུང་མཐར །ས་བཅུ་དང་ལམ་ལྔ་གཅིག་ཆར་དུ་བརྒལ་ནས། །འཕོ་ཆེན་གྱི་རྣལ་འབྱོར་ཆོས་སྐུ་རུ་གྲོལ་འགྲོ །རྣམ་མཁྱེན་གྱི་སངས་རྒྱས་ཕྱི་ཡུལ་ལ་མ་རེ། ཚེ་རབས་ནི་མང་པོར་ལས་དབང་གི་སྣ་ཁ། །འཁྲུལ་སེམས་ཀྱིས་བསྒྱུར་ནས་ཅི་འགྱུར་ཡང་མི་ཤེས། །ལུས་རྟེན་དང་ལས་སྣང་རང་དབང་ནི་མེད་པས། །ཚེ་འདི་རུ་གྲོལ་ཐབས་ངེས་པ ཞིག་རེམ་རེམ། །ཆོས་ཀུན་གྱི་སྙིང་པོ་བཅུད་དྲིལ་དུ་བསྡུས་ནས །ཆོས་སྐུ་ཡི་ཀློང་མཛོད་ཆེན་པོ་ནས་བྱུང་སྟེ། །ཆོས་རྒྱལ་གྱི་དབང་པོའི་འཁོར་ལོ་ནི་འདི་ཀ །ཆོས་ཉིད་ཀྱི་འོད་ཟེར་མཐའ་རྒྱས་སུ་སྨོན་ནོ། །བདུད་འཇོམས་པས་སོ། །དགེའོ། །དགེའོ། །དགེའོ། །སརྦ་མངྒ་ལཾ། མ མས་གསུང་མགུར་སྐོར མས་གསུང་མགུར་སྐོར T11618 - 238 ༄༅། །སྐྱབས་གནས་དམ་པ་དཀོན་མཆོག་རིན་པོ་ཆེ། །འབྲལ་མེད་སྤྱི་གཙུག་འཁོར་ལོའི་རྒྱན་དུ་བཞུགས། །སྨོན་ལམ་ལས་ཀྱིས་འབྲེལ་བའི་སྐྱེས་བུ་ཁྱོད །ངེས་པར་དམ་པའི་ཆོས་ཞིག་བསྒྲུབ་འདོད་ན། །སང་བྱེད་གནང་བྱེད་བློ་སྣ་རིང་པོ་བསྟུང་། །འཆི་བ་ཐོག་རྒྱུག་བྱུང་ཚེ་ཅི་ཞིག་བྱེད། །ཁོར་ཡུག་རྒྱ་མཚོ་གླིང་བརྒྱད་རིས་བསྐོར་བའི། རིན་ཆེན་རྣམ་བཞིའི་རི་རབ་ལྷུན་པོ་ཡང་།མེ་བདུན་ཆུ་གཅིག་རླུང་གིས་འཐོར་སྲིད་ལ། །བསམ་སྟེ་མི་རྟག་འཆི་བ་འདི་ལ་སོམས། །ཕ་ཀི་སྤང་ལྗོངས་མེ་ཏོག་བཀྲ་བ་ཡི །མཛེས་རྒྱན་ཡིད་ལ་སྤྲོ་བའི་དབྱར་མོ་ཆེ། །གྲང་ཆེན་དགུན་གྱི་རྒྱལ་མོས་བཅོམ་པའི་ཚེ། །ཡིད་དུ་མི་འོང་བ་ཡི་གནས་སུ་སྟོན །ནམ་ཟླ་འགྱུར་ལྡོག་སོམས་ལ་མི་རྟག་སྒོམས། །ནམ་མཁར་གླིང་བཞི ནག་གིས་འཁོར་བ་ཡི། །རབ་དཀར་ཟླ་བའི་འཕེལ་འགྲིབ་བྱེད་པ་དང་། །ཞག་གི་ཉིན་མཚན་འགྱུར་ལ་ལྟད་མོ་ལྟོས། །མི་རྟག་འཆི་བ་སྙིང་ནས་དྲན་པར་གྱིས། །མཁྱེན་གཟིགས་ཡོན་ཏན་དུ་མས་རབ་བརྒྱན་ཅིང་། །ཉན་རང་བྱང་སེམས་ཚོགས་ཀྱིས་རབ་བསྐོར་བའི། །ཁམས་གསུམ་འགྲོ་བའི་སྐྱབས་གྱུར་མིའི་སེངྒེ་། །མྱ་ངན་འདའ་ཚུལ་བསམ་སྟེ་མི་རྟག་སྒོམས། །ཚངས་ པ་དབང་ཕྱུག་བརྒྱ་བྱིན་ལ་སོགས་པ། །འཇིག་རྟེན་སྲིད་པ་ཀུན་ལས་མངོན་མཐོ་བའི །མེས་པོ་འདི་དག་འཆི་བའི་དབང་གྱུར་ན། །རང་ལ་ལྟ་ཅི་སོམས་ལ་འཆི་བ་སྒོམས། །དེ་སྔོན་སྐྱེས པའི་འགྲོ་བ་ཐམས་ཅད་ཀུན། །ད་སྐབས་གཅིག་ཀྱང་མེད་པའི་ཚུལ་ལ་སོམས། །བརྩིགས་སྨེས་ཁང་ཞིག་བདག་མེད་བོར་ནས་སུ། །ཤི་བའི་ཚུལ་སོམས་མི་རྟག་འཆི་བ་སྒོམས། རང་གི་ཡིད་ལ་དྲན་ནས་ད་བར་དུ། །ཉེ་འབྲེལ་ཡུལ་མི་མཆོག་དམན་ཆེ་ཆུང་མི། །ཡུན་རིང་སྡོད་བསམ་དཀའ་སྤྱད་སོ་ནམ་འབད། །ལས་འཕྲོ་བོར་ནས་ཤི་བ་རྣམས་ལ་སོམས། །རང་གི་སྔོན་ཆད་མི་ཚེ་ལོ་དེ་རུ། །སྐད་ཅིག་ཙམ་གྱི་སྣང་བ་ལས་མི་རིང་། །ད་དུང་ལོ་བརྒྱ་ལོན་ཀྱང་འཆི་བའི་དུས །ས་སྟེང་མིག་གི་མཐོང་ཙམ་ལས་མི་རིང་། །རང་རེས་ད་སྔོན་དཀའ་སྤྱད་སོ་ནམ་འབད། །ལུས་དང་སྲོག་ལ་མི་བསམ་ཟས་ནོར་བསྒྲུབ །འབྲས་བུ་མི་འབྱིན་སྒྱུ་མ་རྨི་ལམ་ལྟའི །དེ་ཚུལ་སོམས་ལ་འཆི་བ་མི་རྟག་སྒོམས། །འགའ་ཞིག་ན་སོ་རྒན་སོང་སྟོབས་རྒུད་ཀྱང་། །དེར་མི་སེམས་པར་ཆེ་གྲགས་མཐོ་ས་འདོད། །ལོ་མང་སྡོད་ཆས་འདོམས་ཤིང་ཆགས་སྡང་བྱེད། །དེ་ཚུལ་སོམས་ལ་འཆི་བ་མི་རྟག་སྒོམས། །འགའ་ཞིག་མི་འཆོར་ནད་ཀྱིས་ ༄༅། །ཐེབས་འདུག་ཀྱང་། །ད་དུང་ལོ་གྲངས་མང་པོའི་ཆས་དོན་བཤད། །བཟའ་མི་དག་ལ་མཁོན་འཐབ་ཚིག་རྩུབ་སྨྲ། །དེ་ཚུལ་སོམས་ལ་འཆི་བ་མི་རྟག་སྒོམས། འགའ་ཞིག་ཚེ་གཅིག་འཆི་བ་མི་དྲན་པར། །འཆི་བའི་ནང་པར་དགེ་བ་མ་འགྲུབ་འགྱོད། །བྲང་ལ་སྤར་ཤད་བྱེད་ཅིང་མཆིལ་མས་བརྣང་། །འགྱོད་པ་འཕྱི་འོ་སོམས་ལ་མི་རྟག་སྒོམས།། འགའ་ཞིག་བསགས་བསགས་ནོར་ལ་ཞེན་ཆགས་ནས། །གཞན་གྱིས་སྤྱོད་རན་བསམ་ཞིང་ཕྱིར་མིག་ལྟ །ད་དུང་དོམ་དང་བུ་ལོན་ཁ་རུ་གླེང་། །ལས་ངན་དེ་ཚུལ་སོམས་ལ་མི་རྟག་སྒོམས། །འགའ་ཞིག་བུ་དང་ཚ་བོ་བཟའ་མི་ལ། །བརྩེ་བརྩེ་གདུང་སེམས་དེ་དོན་ལྟོ་གོས་འཚོལ། །འཆི་བའི་ནང་པར་གཤིན་མིག་གསོན་ལ་བལྟས། །གསོན་པོའི་སྡོད་ཆས་ཁ་ཆེམ་གཏམ་བརྡོལ་བརྗོད། །ལས་དེར་སོམས་ལ་འཆི་བ་མི་རྟག་སྒོམས། །འགའ་ཞིག་དོན་མེད་བན་དྲེད་གཟུགས་བཟུང་ནས། །ཚེ་གཅིག་ཚོང་དང་ཁེ་སྤོག་གཡོ་ཁྲམ་བྱེད། །ཕོ་བརྒྱག་ཙམ་ཞིག་ཟ་བར་མི་སྤོབ་ནས། །གཤིན་ཆགས་འདྲེ་རུ་སོམས་ལ་འཆི་བ་སྒོམས། །འགའ་ཞིག་མི་ཚེ་སྟོང་ཟད་ལོ་དེ་ནས །འཆི་བའི་ནང་པར་འཇིགས་སྐྲག་གིས་གདུང་བཞིན། །ལྕགས་མ་ རླུང་བསྐྱོད་ལྟ་བུར་འདར་ཞིང་བསྔངས། །ཡི་ཆད་སྡུག་ཁུལ་ཤི་བ་དེ་དྲན་མཛོད། །འགའ་ཞིག་འདི་སྣང་ཡུན་ཐུང་སྣང་བ་ཡིས །ཡུལ་ལ་སྤྲོ་ཞིང་ཕྱོགས་སུ་མཐོང་སྐར་བལྟ། །མིག་གཉིས་སྔོ་ཧྲིལ་བལྟ་བཞིན་ཤི་ལ་ལྟོས། །འགའ་ཞིག་གཤིན་པོའི་རོ་དོམ་མང་པོ་བླངས། །བསྟན་དང་འགྲོ་དོན་ཡིན་སྙམ་རང་མགོ་འཁོར། །ཐ་མ་རྣམ་སྨིན་རང་གི་ཕྲག་ལ་བཀལ། དྲིན་ཆེན་ལན་རིང་དྲན་མཁན་མེད་ལ་ལྟོས །ཚེ་གཅིག་གཅེས་སྤྲས་གྱིས་བསྐྱང་སྒྱུ་མའི་ལུས། །གོས་རྒྱན་མལ་ས་ཁ་ཕོར་བཅས་པ་རྣམས། །ཤུལ་དུ་ལུས་ནས་དུར་ཁྲོད་གནས་སུ་བསྐྱལ།། མེད་དང་མི་མཐོང་ཐབས་ལ་བརྩོན་པར་ལྟོས། །འཁོར་བའི་ལས་ཀ་ཟད་མཐའ་མེད་ལ་ལྟོས། །མི་རིང་མྱུར་དུ་ལྷ་ཆོས་དོན་གཉེར་མཛོད། །མི་ཆོས་ལྷ་ཆོས་གཉིས་ཀ་འགྲུབ་ཐབས་མེད། ལས་སྣ་ཟིན་པ་དམ་པའི་ཆོས་ལ་ཆོས། །མི་ཚེ་སྐད་ཅིག་སྣང་བ་ཡུད་ཙམ་ལ །སྡོད་གནས་བཟང་ངན་མེད་པར་ཆར་སྐྱོབ་ཙམ ཁ་ཟས་མང་ཉུང་མེད་དེ་སྲོག་འཚོ་ཙམ །རྒྱབ་གོས་བཟང་ངན་མེད་དེ་ལྷག་སྐྱོབ་ཙམ །དེས་ཆོག་ངེས་ཤེས་བསྟེན་ན་ཆོས་པ་རབ། །ཉིན་མཚན་མེད་པར་ཆོས་ལ་དྲིལ་བ་དང་། །བདེ་སྡུག་མེད་པར་དཀའ་སྤྱད་ནུས་པ་དང་། །མཐོ་དམན་T11618 - 242 ༄༅། །མེད་པར་འཆི་བ་དྲན་པ་དང་། །ཐང་ལྷོད་མེད་པར་ཆོས་ཉིད་བསྒོམ་པ་དང་། །ཐོག་མཐའ་མེད་པར་བསྒོམ་བསྒྲུབ་བྱེད་པ་རྣམས། །ཆོས་པའི་སྤྱི་ནོར་ཡིན་ནོ་སྐལ་ལྡན་བུ། །དེ་འདྲའི་ལས་གཅིག་འགྲུབ་ན་སྐུ་དྲིན་ཆེ། །འཁོར་འདས་རང་སྣང་ཉིད་དུ་རོ་གཅིག་པའི། །གཞི་ཡི་ཆོས་སྐུ་བདེ་གཤེགས་སྙིང་པོ་ཡི། །རང་ཞལ་མངོན་གྱུར་ས་ལམ་གཅིག་རྫོགས་པའི། །རྫོགས་པ་ཆེན་པོ་སྒོམས་ཤིག་པད་བསོད་པ། །མ་དག་སྣང་བ་དག་དབྱིངས་དྭངས་མ་རུ། །བཙན་ཐབས་ཉིད་དུ་འཕོ་བའི་ལམ་ཟབ་མོ། །ཚེ་གཅིག་མངོན་འཚང་རྒྱ་བའི་ཆོས་ཉིད་མཆོག །འོད་གསལ་ཐོད་རྒལ་བསྒོམ་མཛོད་པད་བསོད་པ། །ལོ་སྒྲུབ་ཟླ་སྒྲུབ་མཆོག་འཛིན་མ་བྱེད་པར། །ལོ་དགུ་སྒྲུབ་ལ་གཞོལ་ན་གདིང་ཆེན་ཐོབ། །སྔོན་གྱི་ལས་འཕྲོ་ཡོད་པས་གྲོལ་ལ་ཉེ། །འཇའ་ལུས་འཕོ་ཆེན་ཐོབ་མཛོད་སྐུ་དྲིན་ཆེ། །དུས་ཀུན་གདམས་པའི་མཆོག་ཏུ་འདི་ཟུངས་ལ། །ཉར་ཚག་མ་བྱེད་ལྟད་མོའི་གནས་སུ་ཟུངས། །སློབ་དཔོན་གྱིས་ལ་བཀའ་ལྟར་ཉན་པ་དང་། །དད་རྟེན་གྱིས་ལ་དབུ་སྔས་ཉིད་དུ་གླན། །དུས་གསུམ་རྒྱལ་བའི་ཞལ་བསྡུར་མན་ངག་ཡིན། །འདི་ལས་ལྷག་པ་