Tibetan
འཇིག་རྟེན་ཕ་རོལ་དོན་གཉེར་བས། །འདི་འབྲས་རྫོགས་པར་འགྱུར་བ་ཡིན། །ཞེས་དད་པ་ བསྐྱེད་ནས་སློབ་དཔོན་དཔལ་སྡོམ་པའི་སྐུ་རྡོ་རྗེ་ཕག་མོ་ལ་སྙོམས་པར་ཞུགས་པས་སློབ་མ་དེ་རྣམས་རང་གི་སྤྱི་བོའམ་ཁ་ནས་བཅུག་སྟེ།རྡོ་རྗེ་ནས་འཐོན་ནས་ཤེས་རབ་ཀྱི་པདྨར་གནས་པ་ལ་རང་གི་སྙིང་གའི་ས་བོན་གྱི་འོད་ཟེར་གྱིས་བཀུག་པའི་ཤེས་རབ་དང་བཅས་པའི་དེ་བཞིན་ གཤེགས་པ་རྣམས་འདོད་ཆགས་ཆེན་པོས་ཞུ་བར་གྱུར་ཏེ།རྣམ་པར་སྣང་མཛད་ཀྱི་སྒོ་ནས་ཨ་ཝ་དྷཱུ་ཏཱི་དང་རྡོ་རྗེ་ལས་འཐོན་བར་གྱུར་པ་རྣམས་ཀྱིས་མངོན་པར་དབང་བསྐུར་བ་རྣམས་དཀྱིལ་འཁོར་གྱི་ཤར་གྱི་སྒོར་བཞག་ནས་འཇུག་པར་གསོལ་བ་འདེབས་སུ་བཅུག་སྟེ། རྣལ་འབྱོར་ པ་དང་མཆོག་སྦྱོར་བའི།།སྟོན་པ་ཁྱོད་ནི་དཔའ་བོ་ཆེ། །བྱང་ཆུབ་ཆེན་པོའི་ཚུལ་བསྟན་པ། །མགོན་པོ་ཆེན་པོ་བདག་འཚལ་ལོ། །དམ་ཚིག་དེ་ཉིད་བདག་ལ་སྩོལ། །བྱང་ཆུབ་སེམས་ཀྱང་བདག་ལ་སྩོལ། །དཔའ་བོ་དཔའ་མོའི་དབང་ཕྱུག་མ། །ཕག་མོ་ཧེ་རུ་ཀ་ཉིད་ཀྱི། །གསང་ བའི་གདན་སོགས་ཀུན་དུ་དག་།ཇི་ལྟར་ལུས་ལ་གནས་པ་ལགས། །སངས་རྒྱས་ཆོས་དང་དགེ་འདུན་ཏེ། །སྐྱབས་གསུམ་པོ་ཡང་བདག་ལ་སྩོལ། །ཐར་པ་ཆེན་པོའི་གྲོང་མཆོག་ཏུ། །མགོན་པོ་བདག་ནི་གཞུག་ཏུ་གསོལ། །ཞེས་སོ། །དེའི་རྗེས་སུ་སློབ་མ་གཅིག་གཙོ བོར་བྱས་ནས།བུ་ཚུར་ཤོག་ཅིག་ཐེག་ཆེན་པོའི། །གསང་སྔགས་སྤྱོད་ཚུལ་ཆོ་ག་ནི། །ཁྱོད་ལ་ཡང་དག་བསྟན་པར་བྱ། །ཁྱོད་ནི་ཚུལ་ཆེན་སྣོད་ཡིན་གྱི། །སྐུ་གསུང་ཐུགས་ཀྱི་རྡོ་རྗེ་ཅན། །དུས་གསུམ་འབྱུང་བའི་སངས་རྒྱས་རྣམས། །རྡོ་རྗེ་སྔགས་ཀྱི་མཐུ་ཡིས་ནི། །ཡེ་ ཤེས་མཉམ་མེད་ཡང་དག་བརྙེས།།གསང་སྔགས་སྦྱོར་བ་མཉམ་མེད་པ། །གང་གི་ཤཱཀྱ་སེང་གེ་སོགས། །མཆོག་རྣམས་ཀྱིས་ནི་བདུད་ཀྱི་སྡེ། །མི་བཟད་ཆེ་བ་སྟོབས་ཆེན་བཅོམ། །འཇིག་རྟེན་རྗེས་འཇུག་རྟོགས་ནས་ནི། །འཁོར་ལོ་བསྐོར་ནས་མྱ་ངན་འདས། །དེ་བས་ ཀུན་མཁྱེན་ཐོབ་བྱའི་ཕྱིར།།བུ་ཡིས་བློ་གྲོས་འདི་གྱིས་ཤིག་།ཅེས་ཡང་དག་པར་འཛིན་དུ་གཞུག་གོ། །དེ་ནས། དཀོན་མཆོག་གསུམ་ལ་སྐྱབས་སུ་མཆི། །སྡིག་པ་ཐམས་ཅད་སོ་སོར་བཤགས། །འགྲོ་བའི་དགེ་ལ་རྗེས་ཡི་རང་། །སངས་རྒྱས་བྱང་ཆུབ་ཡིད་ཀྱིས་གཟུང་། ། ཞེས་ལན་གསུམ་བརྗོད་པས་བྱང་ཆུབ་ཏུ་སེམས་བསྐྱེད་པ་འཛིན་དུ་གཞུག་སྟེ། སངས་རྒྱས་དང་བྱང་ཆུབ་སེམས་དཔའ་ཐམས་ཅད་བདག་ལ་དགོངས་སུ་གསོལ། བདག་མིང་འདི་ཞེས་བགྱི་བས་དུས་འདི་ནས་བཟུང་ནས་ཇི་སྲིད་བྱང་ཆུབ་སྙིང་པོ་ལ་མཆིས་ཀྱི་བར་དུ་བླ་ན་མེད་པའི་བྱང ཆུབ་ཀྱི་མཆོག་ཏུ་སེམས་བསྐྱེད་པར་བགྱིའོ།།ཇི་ལྟར་དུས་གསུམ་མགོན་པོ་རྣམས། །བྱང་ཆུབ་ཏུ་ནི་ངེས་མཛད་པའི། །བྱང་ཆུབ་སེམས་ནི་བླ་མེད་པ། །དམ་པ་བདག་གིས་བསྐྱེད་པར་བགྱི། །ཚུལ་ཁྲིམས་བསླབ་པ་རྣམ་པ་གསུམ། །དགེ་བ་དང་ནི་ཆོས་སྡུད་དང་། ། སེམས་ཅན་དོན་བྱེད་ཚུལ་ཁྲིམས་ནི། །བདག་གིས་སོ་སོར་བརྟན་པོར་གཟུང་། །སངས་རྒྱས་ཆོས་དང་དགེ་འདུན་ཏེ། །དཀོན་མཆོག་གསུམ་མཆོག་བླ་ན་མེད། །སྡོམ་པ་སངས་རྒྱས་རྣལ་འབྱོར་བྱུང་། །དེང་ནས་བརྩམས་ཏེ་གཟུང་བར་བགྱི། །རྡོ་རྗེ་ཆེན་པོ་རིགས་བསྡུས ལ།།རྡོ་རྗེ་དྲིལ་བུ་ཕྱག་རྒྱ་ཡང་། །དེ་ཉིད་ཀྱིས་ནི་རབ་ཏུ་གཟུང་། །སློབ་དཔོན་དག་ཀྱང་གཟུང་བར་བགྱི། །རིན་ཆེན་པོ་ཡི་རིགས་མཆོག་གི་།དམ་ཚིག་ཡིད་དུ་འོང་བ་ལ། །ཉིན་རེ་བཞིན་དུ་ལན་དྲུག་ཏུ། །སྦྱིན་པ་རྣམ་བཞི་རྟག་ཏུ་སྦྱིན། །པདྨ་ཆེན་པོའི་རིགས་དག་པ། །བྱང་ཆུབ་ ཆེན་པོ་འབྱུང་བ་ལ།།ཕྱི་དང་གསང་བ་ཐེག་པ་གསུམ། །དམ་ཆོས་སོ་སོར་གཟུང་བར་བགྱི། །ལས་ཆེན་རིགས་ནི་བསྡུས་པ་ལ། །སྡོམ་པ་ཐམས་ཅད་ཡང་དག་ལྡན། །མཆོད་པའི་ལས་ནི་ཅི་ནུས་བཞིན། །ཀུན་ནས་སོ་སོར་གཟུང་བར་བགྱི། །རྩ་བའི་ལྟུང་བ་སྤང་བགྱི་ཞིང་། ། དེ་བཞིན་སྦོམ་པོའི་ལྟུང་བ་སྤང་། །སེམས་ཅན་རྣམས་ལ་བསྙེན་བཀུར་བགྱི། །ཐམས་ཅད་དུ་ཡང་བྱམས་པའི་སེམས། །ལུས་ཀྱི་ལས་ནི་རྣམ་པ་གསུམ། །ངག་གི་རྣམ་པ་བཞི་དག་དང་། །ཡིད་ཀྱི་རྣམ་པ་གསུམ་དག་གི་།དགེ་བའང་བདག་གིས་བསྐྱང་བར་བྱ། །མྱོས་པའི བཏུང་བ་སྤང་བགྱི་ཞིང་།།རྒོད་པའི་བྱ་བའང་དེ་བཞིན་ཏེ། །ཐེག་པ་དམན་ལ་དགའ་བ་ཡང་། །རབ་ཏུ་འབད་པས་མི་བྱའོ། །ལྷ་སོགས་དེ་བཞིན་གཙོ་བོ་ལ། །མ་གུས་པར་ཡང་མི་བགྱིའོ། །ཕྱག་རྒྱ་ལ་སོགས་བྱེད་པ་རྣམས། །མནན་པར་ཡང་ནི་མི་བྱའོ། །བྱང་ཆུབ་སེམས་ནི་ བླ་མེད་པ།།དམ་པ་དག་ནི་བསྐྱེད་བགྱིས་ནས། །སེམས་ཅན་ཀུན་གྱི་དོན་གྱི་ཕྱིར། །སྡོམ་པ་མཐའ་དག་གཟུང་བར་བགྱི། །མ་བརྒལ་བ་རྣམས་བདག་གིས་བསྒྲལ། །མ་གྲོལ་བ་རྣམས་བདག་གིས་དགྲོལ། །དབུགས་མ་ཕྱིན་པ་དབུགས་དབྱུང་ཞིང་། །སེམས་ཅན་མྱ་ངན་ འདས་ལ་དགོད།།ཅེས་ལན་གསུམ་བརྗོད་དུ་གཞུག་གོ། །དེ་ནས་ཁཎྜ་རོ་ཧིའི་སྔགས་ཀྱིས་བསྲུངས་ལ། དེ་རྣམས་ཀྱི་སྙིང་ག་དང་མགྲིན་པ་དང་སྤྱི་བོར་གནས་པའི་རྡོ་རྗེ་དང་པདྨ་དང་འཁོར་ལོའི་སྟེང་དུ་ཉི་མ་དང་ཟླ་བ་ལ་གནས་པའི་ཧཱུཾ་ནག་པོ་དང་། དམར་པོ་དང་ཨོཾ་དཀར་པོ་རྣམས་ རྣམ་པར་བསྒོམས་ནས་དྲིའི་ཆུ་རྡོ་རྗེ་དང་བཅས་པས་བླངས་ནས་སྙིང་ག་དང་མགྲིན་པ་དང་སྤྱི་བོ་རྣམས་སུ་ཧཱུཾ་ཨཱཿོཾ་བརྗོད་ཅིང་།རེག་ལ་སྤྱི་བོར་མེ་ཏོག་མདུན་དུ་བདུག་སྤོས་དང་མར་མེ། སྙིང་གར་དྲི་རྣམས་དབུལ་བར་བྱའོ། །དེ་ནས་ལས་ཐམས་ཅད་པའི་སྔགས་བཟླས་པའི་ཨ་ཤྭ་དྠ་ ལ་སོགས་པའི་སོ་ཤིང་ལྟུང་བ་མ་ཡིན་ཞིང་དྲང་ལ་སྲོག་ཆགས་མེད་ཅིང་རྨ་མེད་པ་དྲིའི་ཆུས་བཀྲུས་ཏེ་རྩེ་མོར་མེ་ཏོག་བཅིངས་པ་སློབ་མ་རྣམས་ཀྱི་སྙིང་གར་སྦྱིན་ཏེ་ཁ་སྦྱངས་ལ།དེ་དག་ཀྱང་བ་ལང་གི་ཀོ་བ་ཙམ་དུ་བྱུགས་པའི་སའི་ཆ་ལ་ཤར་དུ་མངོན་པར་ཕྱོགས་པས་སོ་ཤིང་གི་རྩེ་མོ་ བསྐྱུར་ནས།ོཾ་བཛྲ་ཧཱ་ས་ཧཿཞེས་བརྗོད་ཅིང་ལྟོས་པ་མེད་པར་དོར་ཏེ་སྟེང་དུ་བལྟས་ནས་སོ། །སོ་ཤིང་དེ་དག་ལྟུང་བ་དང་རྗེས་སུ་མཐུན་པའི་དངོས་གྲུབ་ཏུ་འགྱུར་བ་ཡང་བརྗོད་པར་བྱའོ། །ཤར་དང་བྱང་དང་ནུབ་དང་ལྷོ་དང་སྟེང་དང་། འོག་ཏུ་ཕྱོགས་པར་ལྟུང་ན་ཞི་བ་དང་རྒྱས་པ་དང་ དབང་དང་མངོན་སྤྱོད་དང་རིག་པ་འཛིན་པ་དང་ས་འོག་རྣམས་འགྲུབ་ལ།ཕྱི་རོལ་དུ་ལྷུང་ན་དངོས་གྲུབ་མེད་དོ། །དེ་ནས་བཾ་ལས་སྐྱེས་པའི་ཆུ་དེ་བཟླས་པ་ཞལ་བསིལ་གྱི་དོན་དུ་བྱིན་ནས་ལས་ཐམས་ཅད་པའི་སྔགས་ཀྱིས་ལན་བདུན་མངོན་པར་བསྔགས་པའི་དྲིའི་ཆུ་ཁྱོར་བ་གསུམ། ཨོཾ་ཧྲཱིཿ་ བི་ཤུདྦྷ་དྷརྨྨ་སརྦྦ་པཱ་པ་ནི་ཤཱ་སྱ་བི་ཤོདྷ་ཡ་སརྦྦ་བི་ཀལྤཱ་ན་པ་ན་ཡ་ཧཱུཾ་ཞེས་བརྗོད་དེ་འཐུང་དུ་གཞུག་གོ།།དེ་ནས་དེ་རྣམས་ཕྱི་རོལ་དུ་འདུག་ཏུ་བཅུག་ནས་ཧཱུཾ་ལས་བྱུང་བའི་ཀུ་ཤ་མང་པོ་རྩེ་མོ་མ་ཉམས་པ་ལས་ཐམས་ཅད་པས་མངོན་པར་བསྔགས་པ་རྣམས་མལ་སྟན་གྱི་དོན་དང་། དེ་བཞིན་དུ་དྷཱི་ ཡིག་ལས་སྐྱེས་པའི་ཀུ་ཤ་གཅིག་སྔས་ཀྱི་དོན་དུ་ཨོཾ་བཛྲ་ཏཱི་ཀྵྞ་བཾ་ཞེས་བྱ་བའི་སྔགས་ཀྱིས་སྦྱིན་ནོ།།དེ་ནས་ཧཱུཾ་ལས་སྐྱེས་པའི་སྐུད་པ་དམར་པོ་ལུས་ཀྱི་ཚད་སུམ་བསྒྲིལ་དུ་བྱས་ནས་མདུད་པ་གསུམ་བྱས་ཏེ། ལས་ཐམས་ཅད་པས་བསྔགས་པ་དེ་རྣམས་ཀྱི་དཔུང་པ་གཡོན་པ་ལ་བཅིངས་ ཏེ།ོཾ་བུདྡྷ་མཻ་ཏྲི་རཀྵ་སརྦྦཱ་ན་སྭཱ་ཧཱ། ཞེས་བརྗོད་ཅིང་བསྲུངས་ནས་སྤྲོ་བ་བསྐྱེད་པར་བྱ་བ་ནི། འཇིག་རྟེན་དུ་ནི་ཀུན་མཁྱེན་རྣམས། །རེས་འགའ་འབྱུང་ངམ་མི་འབྱུང་སྲིད། །ུ་དུ་མ+Wཱ་རའི་མེ་ཏོག་བཞིན། །བརྒྱ་ལམ་ན་ནི་རེས་འགའ་འབྱུང་། །གང་གིས་སེམས་ཅན་མཉམ་མེད་དོན། ། མྱ་ངན་མི་འདའ་བྱེད་པར་ནུས། །གསང་སྔགས་སྤྱོད་པའི་ཚུལ་འབྱུང་བ། །དེ་བས་ཀྱང་ནི་ཤིན་ཏུ་དཀོན། །བསྐལ་པ་བྱེ་བ་དུ་མ་རུ། །སྡིག་པ་གང་ཞིག་སྔོན་བྱས་པ། །དཀྱིལ་འཁོར་འདི་འདྲ་མཐོང་བ་ཡིས། །དེ་དག་ཐམས་ཅད ཟད་འགྱུར་ན།།གྲགས་པ་མཐའ་ཡས་སྔགས་སྤྱོད་པའི། །ཚུལ་ལ་གནས་ན་སྨོས་ཅི་དགོས། །སྐྱོབ་པའི་གསང་སྔགས་བཟླས་ན་ནི། །གོ་འཕང་བླ་ན་མེད་པར་འགྱུར། །སྤྱོད་མཆོག་འདི་ལ་གང་རྣམས་ཀྱི། །བློ་གྲོས་ཤིན་དུ་དྲི་མ་མེད། །དེ་རྣམས་ཀྱི་ནི་སྡུག་བསྔལ་ཀུན། །འབྱུང་ བའི་ངན་འགྲོ་ཡང་དག་ཞི།།བདག་ཉིད་ཆེན་པོ་ཁྱེད་རྣམས་ཀྱིས། །དེ་རིང་རྙེད་པ་མཉམ་མེད་རྙེད། །གང་གིས་ཁྱེད་རྣམས་རྒྱལ་བ་ཀུན། །བདག་ཉིད་ཆེན་པོ་སྲས་བཅས་ཀྱིས། །བསྟན་འདི་ཀུན་ལ་ཡོངས་སུ་གཟུང་། །གནས་པ་སྐྱེ་བར་འགྱུར་བ་ནི། །དེ་ཡིས་ཁྱེད་རྣམས་ཐེག་ཆེན་ ལ།།ལེགས་པར་སྐྱེ་བ་ཉིད་དུ་འགྱུར། །ཐེག་པ་ཆེན་པོ་ཆེར་འབྱུང་བའི། །ལམ་མཆོག་འདི་ནི་དཔལ་དང་ལྡན། །གང་གིས་ཁྱེད་རྣམས་འགྲོ་འགྱུར་བས། །དེ་བཞིན་གཤེགས་པར་འགྱུར་བ་ཡིན། །ཞེས་བྱ་བ་ཉན་དུ་བཅུག་ནས་དེའི་རྗེས་ལ་དེ་རྣམས་ལ་ལས་ཐམས་ཅད་པའི་སྔགས་ ཀྱིས་ཡང་དག་པར་བསྲུངས་ནས་བཟླས་པའི་དོན་དུ་ལས་ཐམས་ཅད་པའི་སྔགས་བཤད་ནས་ནང་པར་སྔ་བར་ང་ལ་རྨི་ལམ་སྨྲོས་ཤིག་ཅེས་བརྗོད་དེ་དཀྱིལ་འཁོར་གྱི་ཐ་མལ་ཡོལ་བས་བཅད་པའམ་ཕྱི་རོལ་གྱི་གནས་གཞན་དུ་ཡང་རུང་སྟེ་སེང་གེའི་ཉལ་སྟབས་ཀྱིས་ཉལ་དུ་གཞུག་གོ་ཞེས བྱ་བ་ནི་སློབ་མ་ལྷག་པར་གནས་པའོ།། །།དེ་ནས་སློབ་དཔོན་གྱིས་སློབ་མ་ལྷག་པར་གནས་པའི་ཆེད་དུ་བཀོད་པའི་ལྷའི་དཀྱིལ་འཁོར་མངོན་པར་མཆོད་ནས་ཡེ་ཤེས་ཀྱི་ཐིག་ལ་སོགས་པའི་དོན་དུ་ནམ་མཁའ་ལ་བཏེག་ཅིང་བཀོད་ནས་ཤར་དུ་མངོན་པར་ཕྱོགས་ཤིང་དཀྱིལ་འཁོར་གྱི བདག་པོའི་རྣལ་འབྱོར་དང་ལྡན་པས་གཞོན་ནུ་མ་མ་ཉམས་པས་བཀལ་བའམ་དཔའ་བོའི་རིན་གྱིས་ཉོས་པའམ།དུར་ཁྲོད་ནས་རྙེད་པ་ཡང་རུང་སྟེ་དྲི་བཟང་པོ་དང་བཅས་པའི་ཡུངས་ཀར་གྱི་ཕྱེ་མ་བདུད་རྩི་ལྔས་དཀར་པོ་དང་སེར་པོ་དང་དམར་པོ་དང་ལྗང་གུ་དང་། ནག་པོའི་ཁ་དོག་རྣམས་ ཀྱིས་སོ་སོ་སོ་སོར་ཁ་བསྒྱུར་བའི་ཐིག་སྐུད་རྣམས་བྷྲཱུཾ་ཨཱཾ་ཛྲཱཾ་ཁཾ་ཧཱུཾ་གི་ས་བོན་ལ་སོགས་པས་རྣམ་པར་སྣང་མཛད་ལ་སོགས་པའི་རང་བཞིན་རྣམས་ལག་པ་གཡོན་པའི་མཐིལ་དུ་སོར་མོའི་རྩེ་མོ་ནས་བརྩམས་ནས་སོར་མོའི་རྩ་བའི་བར་དུ་བཀོད་ལ།ནམ་མཁའ་ལ་བཞུགས་པའི་དེ་བཞིན་གཤེགས་པ་ ལྔ་རང་རང་གི་ཕྱོགས་ཀྱི་དེ་བཞིན་གཤེགས་པ་རྣམས་བསྡུས་པར་གྱུར་པའི་ཐུགས་ཀ་རྣམས་སུ་བུཾ་ཡིག་ལ་སོགས་པ་ལས་གྲུབ་པའི་ཡེ་ཤེས་ཀྱི་ཐིག་འོད་ཟེར་གྱི་རང་བཞིན་དུ་བལྟས་ཏེ།ོཾ་ཨཱཿ་ཤཱ་ཤྭ་ཏ་བཛྲ་སཱུ་ཏྲེ་མེ་པྲ་ཡཙྪ་མ་ཧཱ་མཎྜལ་སཱུ་ཏྲཾ་ཎཱ་ཡ་ཧཱུཾ། ཞེས་པ་འདིས་རང་ རང་གི་མཚན་བཅུག་པའི་རྣམ་པར་སྣང་མཛད་ལ་སོགས་པ་ལ་གསོལ་བ་གདབ་པར་བྱའོ།།དེ་ནས་ཛཿཡིག་ལས་བྱུང་བའི་སེར་པོར་སྣང་བ་ཟླ་བ་དང་ཉི་མའི་མིག་གཉིས་ཨོཾ་དཱི་པྟ་དྲྀཥྚཱ་དཀུ་ཤི་ཛཿཞེས་འདོན་བཞིན་པས་རབ་ཏུ་མྱུར་བར་གཡོ་བའི་མིག་གི་རྫི་མས་འགུགས་པའི་མིག་ གིས་ལྕགས་ཀྱུའི་ལྟ་སྟངས་ཀྱིས་རྣམ་པར་སྣང་མཛད་ལ་སོགས་པ་མངགས་པ་རྣམས་བཀུག་ནས་ལག་པ་ན་གནས་པའི་ཐིག་ལ་གཞུག་པར་བྱའོ།།དེ་ཉིད་ཀྱི་ཕྱིར་དེ་རྣམས་ཀྱི་མེ་ལོང་ལ་སོགས་པའི་ཡེ་ཤེས་ལྔའི་རང་བཞིན་རྣམས་སོ་སོ་ལ་ཡེ་ཤེས་བཞི་དང་རྗེས་སུ་འབྲེལ་བའི་ ཕྱིར་ཉི་ཤུ་རྩ་ལྔར་ཕྱེ་བར་གྱུར་པ་ཡིན་ནོ།།དེའི་རྗེས་སུ་ཁཎྜ་རོ་ཧཱའི་བདག་ཉིད་ཅན་གྱི་ལས་ཀྱི་རྡོ་རྗེ་ཅན་ཐིག་སྐུད་འཛིན་པ་དང་ལྷན་ཅིག་ཏུ་ཐིག་ལྔ་ལྔ་རྣམས་ཐིག་རེ་རེར་བསྒྲིལ་ནས་དེ་ནས་དེ་བཞིན་དུ་ཐིག་ལྔ་པོ་དེ་རྣམས་ཐིག་གཅིག་ཏུ་བསྒྲིལ་ཏེ། ཨོཾ་ཨ་ནྱོ་ནྱཱ་ནུ་ག་ཏཱཿསརྦ་དྷརྨཱཿ་པར་ སྤ་རཱ་ནུ་པྲ་བིཥྜཱཿ་སརྦ་དྷ་རྨྨཱཿ་ཨ་དྱནྛཱ་ནུ་པྲ་བིཥྜཱཿ་སརྦ་དྷ་རྨ་ཨོཾ་ཨཱཿཧཱུཾ།ཞེས་འདོན་ཞིང་བསྒྲིལ་བར་བྱའོ། །བསྒྲིལ་བ་ཉིད་ནི་སློབ་དཔོན་དང་སློབ་མའི་ལག་པ་གཡོན་གྱི་སོར་མོ་བཞི་རྣམས་ཀྱི་དབུས་སུ་བཅུག་ནས་རྒྱབ་ནས་འཐོན་པ་སླར་ཡང་རྒྱབ་ནས་འཐོན་པར་བྱས་པ་དེ་དག་རྡོ་རྗེ་ ཁུ་ཚུར་གྱི་མཛུབ་མོའི་རྒྱབ་ཀྱི་ས་ལ་སྦྱར་བ་གསུམ་གྱི་མཐར་ཐུག་པའི་ལྷག་པོ་དོར་ནས་དཀྱིལ་འཁོར་ཇི་ལྟ་བ་ལས་ཉིས་འགྱུར་ཀྱིས་རིང་པ།སྦོམས་སུ་སྒོའི་ཉི་ཤུ་ཆའི་ཚད་ཡེ་ཤེས་ལྔའི་རང་བཞིན་གྱི་ཉི་ཤུ་རྩ་ལྔར་ཕྱེ་བ་རྣམས་དྲིའི་ཆུ་དང་བདུད་རྩི་ལྔ་དང་བ་བྱུང་ལྔས་སྦངས་པ་ཡི་ གེ་གསུམ་གྱི་ནང་དུ་ཆུད་ཅིང་དྲིས་ཉེ་བར་བྱུགས་པ་རྣམས་གསེར་ལ་སོགས་པའི་སྣོད་དུ་གཞག་པ་ལས་ཐམས་ཅད་པའི་ཆུ་དང་དེའི་སྔགས་ཀྱིས་དང་ཨོཾ་ཨ་ཨཱ་ཨཾ་ཨཿ་ཧི་ཏས་བསང་གཏོར་བྱས་ནས་དྲི་བཟངས་དང་མེ་ཏོག་ལ་སོགས་པས་མཆོད་ཅིང ལག་པས་རེག་ནས་ལས་ཐམས་ཅད་པའི་སྔགས་ཀྱིས་བསྲུང་བར་བྱའོ།།དེ་ནས་སྔགས་པ་གཡས་པ་དང་ཅིག་ཤོས་ཀྱི་མིག་དག་མ་དང་ཊ་ལས་སྐྱེས་པའི་ཉི་མ་དང་ཟླ་བ་སྟེ་འདི་དག་།དྲྀཥྚི་མཊ་ཞེས་པས་བརྟན་པར་བྱས་ནས་ཧཱུཾ་བཟླས་པའི་བདུད་རྩིའི་ཆུ་དང་ཡུངས་ ཀར་དང་དྲིའི་ཆུས་བྲན་པའི་ཐིག་ལ་ལག་པ་གཡས་པའི་རྡོ་རྗེས་རེག་སྟེ།ོཾ་བཛྲ་ས་མ་ཡ་སཱུ་ཏྲཾ་མཱ་ཏི་ཀྲ་མ་ཧཱུཾ། ཨོཾ་ཨཱཿཧཱུཾ་ཞེས་བརྒྱ་རྩ་བརྒྱད་བཟླས་པས་བྱིན་གྱིས་བརླབ་པར་བྱའོ། །དཀྱིལ་འཁོར་གྱི་ས་ཡང་། ཨོཾ་སརྦ་སཾ་ཤོ་དྷ་ཡ་ཧཱུཾ་ཕཊ་ཅེས་བྱ་བ་འདིས་བུམ་པ་ཐམས་ཅད་ཀྱི་ ཆུས་དག་བྱེད་བྱས་ནས་དྲིས་ཉེ་བར་བྱུགས་ལ་མེ་ཏོག་ཕྱི་རོལ་དུ་དགྲམ་ཞིང་ནམ་མཁའི་དཀྱིལ་གྱི་མཐིལ་ན་གནས་པའི་སྡོམ་པའི་དཀྱིལ་འཁོར་ལ་མཆོད་ཡོན་ལ་སོགས་པ་དབུལ་བ་སྔོན་དུ་འགྲོ་བས་མཆོད་ཅིང་ཕྱག་བྱས་ནས་རང་ཉིད་དཔལ་སྡོམ་པའི་བདག་ཉིད་ཅན་དང་ལས་ཀྱི རྡོ་རྗེ་ཅན་ལས་ཐམས་ཅད་པའི་གཟུགས་ཅན་ཏེ་ཛཿ་ཡིག་ལས་སྐྱེས་པའི་ཉི་མ་དང་ཟླ་བ་སེར་པོ་འདི་དག་བསམས་ནས་རྡོ་རྗེའི་རྐང་སྟབས་ཀྱི་ཚུལ་གྱིས་ཐིག་སྐུད་གཡོན་པའི་རྡོ་རྗེ་ཁུ་ཚུར་གྱིས་བཟུང་བ་ལྟེ་བར་བཟུང་ཞིང་སྒྲུབ་པའི་གྲོགས་པོས་ཀྱང་ཐིག་སྐུད་དེ་བཞིན་དུ་བཟུང་ནས་ཛྫཿ ཛྫཿཛྫཿཞེས་པའམ།ཛཿཛཿཛཿགསུམ་གྱིས་ཀྱང་རུང་སྟེ་བཏང་ཞིང་ཛྫ་ཛྫཿཛྫཿགིས་སླར་ཡང་དེ་ཁོ་ན་བཞིན་དུ་དྲངས་ནས་མངོན་དུ་ཕྱོགས་པས་ནུབ་ཀྱི་ཕྱོགས་ན་གནས་པས་ཤར་དུ་ལྟ་བ་དང་། ལྷོའི་ཕྱོགས་ན་གནས་པས་བྱང་དུ་ལྟ་བས་ཏེ། ཚངས་པའི་ཐིག་གཉིས་པོ་ལྟེ་བ་དང་ མཉམ་པར་བར་སྣང་ལས་ཏེ།སེམས་ཅན་གྱི་དོན་དུ་ཁྱེད་རྣམས་ཀྱི་དུས་དེ་ཡིན་གྱི་འདིར་གཤེགས་སུ་གསོལ་ལོ་ཞེས་བྱ་བའི་བརྡའི་དོན་ཅན་ཐིག་གི་སྒྲ་རྣམས་ཀྱིས་ནམ་མཁའ་ཐམས་ཅད་ཁྱབ་པའི་དེ་བཞིན་གཤེགས་པ་རྣམས་ལ་ཡང་དག་པར་བསྐུལ་ཞིང་བཀུག་ནས་ ཐིག་ལ་གཞུག་པར་བྱའོ།།ོཾ་བཛྲ་ས་མ་ཡ་སཱུ་ཏྲཾ་ཀྲ་མ་ཧཱུཾ་ཧཱུཾ་སྭཱ་མ་ཧཱ་ཞེས་བརྗོད་དེ་རྡོ་རྗེ་དང་བཅས་པའི་མཐེ་བོང་དང་མཛུབ་མོ་དག་གིས་ཐིག་སྐུད་བཟུང་ལ་སེ་གོལ་གྱི་སྒྲ་བྱ་ཞིང་གདབ་པར་བྱའོ། །དེ་ཁོ་ན་བཞིན་ཏུ་འོག་ཏུ་ཚངས་པའི་ཐིག་གཉིས་ཀྱང་སྟེ། དེ་ལྟར་ཐིག་ གདབ་པ་ཐམས་ཅད་ལ་ཐིག་གི་ཆོ་གར་ཤེས་པར་བྱའོ།།དེ་ལྟར་སློབ་དཔོན་ནུབ་ཀྱི་ཕྱོགས་སུ་གནས་ནས་ཤར་དུ་ལྟ་བ་དང་ལྷོའི་ཕྱོགས་སུ་གནས་ནས་བྱང་དུ་བལྟས་ཏེ། རྐང་པ་གཡོན་པ་སྐྱིལ་ཀྲུང་བཅས་པ་ས་ལ་བཙུགས་ནས་འདུག་པ་དང་ལས་ཀྱི་རྡོ་རྗེ་ཅན་དེ་ལས་བཟློག་ པས་འདུག་སྟེ་རྡོ་རྗེ་ཁུ་ཚུར་གྱིས་ཐིག་སྐུད་བཟུང་ལ་རྒྱབ་ཀྱི་གཡོན་སྐོར་དུ་འགྲོ་ཞིང་ལྷན་ཅིག་པས་ཚངས་པའི་ཐིག་གཉིས་འོད་ཟེར་གྱི་ཕྲེང་བའི་མཐར་ཐིག་བྱའོ།།མེའི་མཚམས་སུ་གནས་པས་རླུང་གི་མཚམས་ཀྱི་ཐིག་དང་བདེན་བྲལ་དུ་གནས་ནས་དབང་ལྡན་གྱི་མཚམས་ཀྱི་ ཐིག་གདབ་སྟེ།གཉི་ག་ཡང་སྒོའི་ཚད་བཅུ་བདུན་ནོ། །མེའི་མཚམས་སུ་གནས་ནས་བྱང་དུ་བལྟས་ཏེ་ཤར་གྱི་རྩ་བའི་ཐིག་དང་རླུང་གི་མཚམས་སུ་གནས་ནས་ལྷོར་བལྟས་ཏེ་ནུབ་ཀྱི་རྩ་བའི་ཐིག་དང་དེ་ཉིད་དུ་གནས་ནས་ཤར་དུ་བལྟས་པས་བྱང་གི་རྩ་བའི་ཐིག་དང་མེའི་མཚམས་ སུ་གནས་ནས་ནུབ་ཏུ་བལྟས་པས་ལྷོའི་རྩ་བའི་ཐིག་གདབ་པར་བྱ་སྟེ་ཁྲུ་ལ་སོགས་པའི་ཚད་དུའོ།།དེ་ཡང་རྩ་བའི་ཐིག་གཅིག་གི་བརྒྱད་ཆ་ནི་སྒོ་ཡིན་པའི་ཕྱིར་སྒོའི་བཞི་ཆ་གཅིག་ནི་ཆ་ཆུང་གཅིག་གོ། །དེ་ནས་ཚངས་ཐིག་གི་གཡས་དང་ཅིག་ཤོས་ཀྱི་ལོགས་སུ་ཆ་ཆུང་ གཉིས་གཉིས་ནི་རྩ་བའི་ཐིག་གི་སྒོའི་གནས་སོ་ཞེས་ཤེས་ནས་སློབ་དཔོན་བཅོམ་ལྡན་འདས་ཀྱི་སྐུས་དཀྱིལ་འཁོར་གྱི་དབུས་ཀྱི་གནས་ཐར་བའི་སྒོའི་གེགས་སུ་གྱུར་པའི་སྒྲིབ་པ་ཐ་དག་བསལ་བར་བྱའོ་ཞེས་མོས་ཏེ།ཧིཿཡིག་གིས་གཡས་དང་ཅིག་ཤོས་ཀྱི་མིག་དག་ ཉི་མ་དང་ཟླ་བའི་རྣམ་པ་ཁྲོ་བོའི་ལྟ་བས་ཀུན་ནས་ཡོངས་སུ་བལྟས་ན་སྒོ་བཞི་པོ་དག་དབྱེ་ཞིང་དབྱི་བར་བྱའོ།།དེ་ནས་འཆད་པར་འགྱུར་བའི་ཕུར་བུའི་ཚུལ་གྱིས་གཙོ་བོའི་པདྨ་ལ་སོགས་པའི་ཐིག་བྱའོ། །ཚངས་ལས་ཆ་ཆུང་བཞི་ཡི་མཐར། །ཟེའུ་འབྲུའི་ཐིག་ནི་ཟླུམ་པོ་སྟེ། དེ་ལས་ཆ་ཆུང་བརྒྱད་རྣམས་ཀྱིས། །འདབ་མ་བརྒྱད་སོགས་བྲི་བར་བྱ། །རྩ་བའི་ཕྱི་རོལ་གཅིག་གཉིས་གཅིག་།གཉིས་དང་གཅིག་དང་གཅིག་ཡིན་ཏེ། །ཐིག་དྲུག་ཟུར་ནས་ངོས་སུ་སྟེ། །ཚངས་ལས་རིམ་པས་རིང་བར་ནི། །ཆ་ཆུང་གསུམ་དུ་དང་པོ གཉིས།།ཆ་ཆུང་གཉིས་ཐིག་རྩེར་རེག་པའོ། །གསུམ་ནི་ཆ་ཆུང་བདུན་དུའོ། །སྟེགས་བུའི་ཐིག་ལས་དྲང་པོའི་ཐིག་།གསུམ་པོ་ཆ་ཆུང་ལྔ་པ་སྟེ། །སྣམ་བུ་སོ་སོ་སོ་སོ་ཡི། །ཞེང་དུ་ཆ་ཆུང་རེ་རེ་ཡིན། །རྩ་བའི་རྩེ་ནས་འཐོན་པའི་ཐིག་།ཆ་ཆུང་བཞི་སྟེ་ཆ་ཆུང་གཉིས། ། ཐད་ཀ་དང་ནི་སྟེང་དུ་ཡང་། །ཐད་ཀར་ཆ་བརྒྱད་འཁྱོག་པོ་གསུམ། །གདུང་གི་ཐིག་གི་ཆ་ཕྲན་མཐར། །ཐད་ཀར་ཆ་ཆུང་བཅུ་པའོ། །ཀ་བའི་རྩེ་ལས་སྒོ་ཚད་ཀྱིས། །རྟ་བབས་སྣམ་བུ་སྟེང་དུའོ། །ནོར་ལྷ་ནོར་ལྷ་ཉི་མ་དང་། །རྒྱལ་བ་ནོར་ལྷ་རྒྱལ་བ་དང་། །ཉི་མ་ནོར་ལྷ་ཉི་མ རྒྱལ།།ནོར་ལྷ་ཡི་ནི་རིམ་པས་སོ། །སྒོ་ཡི་ཆ་ཡིན་སྟེང་དུ་སྟེ། །འདི་རྣམས་ཐད་ཀའི་ཚད་བཤད་པ། །ཚངས་ལས་གཡས་དང་གཡོན་དུ་ནི། །ཆ་ཆུང་ཕྱེད་བཅས་ཆུ་གཏེར་མཐར། །སྣམ་བུ་ཆ་ཆུང་ཕྱེད་དང་གསུམ། །ཐིག་ནི་ཆ་ཆུང་ཕྱེད་དང་བཞི། །ཆ་ཆུང་ལྔ་ནས་གཉིས་པ་ དང་།།གསུམ་པ་ཡང་ནི་ཆ་ཆུང་གསུམ། །ཆ་ཆུང་བཞི་ནས་བཞི་པ་གསུམ། །ཆ་ཆུང་ཕྱེད་དང་བཞི་ནས་ལྔ། །ཕྱེད་དང་བཞི་གསུམ་ནས་དྲུག་པ། །ཆ་ཆུང་ལྔའོ་དེ་ནས་གསུམ། །ཆ་ཆུང་བརྒྱད་དེ་གཅིག་ནི་བདུད། །ཆ་ཆུང་དྲུག་ནི་ཐ་མའོ། །སྣམ་བུ་རྣམས་མཐར་སོན་ པའི་ཐིག་།གཞན་གྱི་མཐའ་དང་ལྷན་ཅིག་སྟེ། །སྐྱོག་པོ་གཅིག་གོ་འདི་ནང་དུའང་། །ཆ་ཆུང་ཕྱེད་ཀྱི་དེ་བཞིན་གཞན། །དེ་ཡི་ཕྱི་རོལ་ཆོས་འཁོར་ལོ། །རྭ་རྩེ་ཆ་ཆུང་གཉིས་པའོ། །དེ་ནས་ཀ་བའི་རྩེ་ལས་ཐད་ཀར་ཅུང་ཟད་སོང་ནས་མ་ཀ་རའི་ཁ་ནས་འཐོན་པ་ཕྱིར་ཕྱུང་སྟེ ཆ་ཕྲན་གསུམ་དབུས་དང་ཇི་ལྟར་རིགས་པར་དབུས་མའི་རྩེ་མོའི་བར་དུ་སོང་བའོ།།སྣ་ཚོགས་རྡོ་རྗེ་རྩེ་མོ་ལྔ་པའི་ཕྱོགས་ལ་ནི་དེའི་གློ་དག་ཏུ་གཞན་བྱའོ། །དེ་ནས་དཀྱིལ་འཁོར་གྱི་ལྟེ་བར་འོག་ཏུ་རྩེ་གཅིག་པ་སྟེང་དུ་རྩེ་མོ་ལྔ་པའི་རྡོ་རྗེ་ཕུར་བུ་ཧཱུཾ་ལས་སྐྱེས་ཤིང་