Tibetan
རྡོ་རྗེ་ཕག་མོའི་སྔགས་ཀྱིས་ནི། །མགུལ་པར་མགུལ་དོས་བརྒྱན་པ་ཡིན། །སྙིང་པོ་ཡི་ནི་སྔགས་ཀྱི་ལྷ། །ཕྲེང་བ་བརྒྱ་ཡི་ཕྱེད་ཀྱིས་བརྒྱན། །ཡི་གེ་བདུན་པའི་སྔགས་ཀྱིས་ནི། ། སྙན་ལ་སྙན་ཆས་བརྒྱན་པ་ཡིན། །སངས་རྒྱས་མཁའ་འགྲོ་མ་སྔགས་ཀྱིས། །པགས་པའི་གོས་ནི་འཛིན་པ་ཡིན། །རྣལ་འབྱོར་མ་དྲུག་སྔགས་ཀྱིས་ནི། །སྐེད་པ་སྐེ་རགས་ཀྱིས་བརྒྱན་པ། །གོ་ཆ་དྲུག་གི་དཔའ་བོ་ཡི། །སྐུ་ནི་ཕྱག་རྒྱ་འདི་ཡིས་མཛེས། །འཁོར་ལོ་ཀུན་གྱི་རྣལ་འབྱོར་མའི། ། སྔགས་ཀྱིས་བཏུང་བའི་ཐོད་པ་ཡིན། །རྣམ་སྣང་ཞེས་བྱའི་སྔགས་གང་ཡིན། །ཐོད་པས་བརྒྱན་པའི་དབུ་ཐོད་ཡིན། །དཔའ་བོ་ཉི་ཤུ་རྩ་བཞི་ཡིས། །ལུས་ལ་ཁམས་གསུམ་རྣམ་པར་བརྟག་།ཁ་ཌྭཱཾ་ག་ནི་ལྷ་ཡི་སྐུ། །ཤེས་རབ་ཌ་མ་རུ་ཡི་སྒྲ། །ཉིན་མོའང་བཅོམ་ལྡན་དཔའ་བོ་སྟེ། །རྣལ འབྱོར་མ་ནི་མཚན་མོར་བཤད།།སྤྲུལ་པ་ལས་བྱུང་དཔའ་བོ་རྣམས། །ཡན་ལག་དྲུག་ཅུ་སེམས་ཀྱིས་སྤྲུལ། །དག་པ་ཆོས་ཀྱི་སྤྲུལ་པ་ནི། །ཕག་མོའི་གཟུགས་སུ་བསྟན་པ་ཡིན། །ཤྲཱི་ནི་གཉིས་མེད་ཡེ་ཤེས་ཏེ། །ཧེ་ནི་རྒྱུ་སོགས་སྟོང་པ་ཉིད། །རུ་ནི་བཀོད་པ་དང་བྲལ་བ། །ཀ་ནི་གང་དུའང་ མི་གནས་པའོ།།སེམས་ལ་གནས་པའི་རྣལ་འབྱོར་པ། །མྱ་ངན་འདས་པ་མི་རྟོག་ཀྱང་། །འཕོ་བའི་ཚེ་ན་རྣལ་འབྱོར་པ། །དཔལ་ལྡན་ཧེ་རུ་ཀ་སོགས་དང་། །དཔའ་བོ་རྣལ་འབྱོར་མ་རྣམས་ནི། །ཕྱག་ན་མེ་ཏོག་སྣ་ཚོགས་ཐོགས། །སྣ་ཚོགས་རྒྱལ་མཚན་བ་དན་དང་། ། རོལ་མོའི་སྒྲ་ནི་སྣ་ཚོགས་དང་། །གླུ་ཡི་མཆོད་པ་སྣ་ཚོགས་ཀྱིས། །འཆི་བ་ཞེས་འདི་རྣམ་རྟོག་སྟེ། །མཁའ་སྤྱོད་གནས་སུ་འཁྲིད་པར་བྱེད། །དེ་ལྟར་ཀུན་བསམས་རྣལ་འབྱོར་དག་།འཇིགས་པ་ཐམས་ཅད་རྣམ་སྤངས་ཏེ། །འཁོར་ལོ་བདེ་མཆོག་བདེ་བའི་མཆོག་།རྣལ འབྱོར་བློ་ལྡན་ཆེན་པོ་སྤྱོད།།རིགས་ལྔ་དག་ཏུ་ཀུན་སྤྱོད་པ། །རིགས་གཅིག་ཏུ་ནི་རྣམ་པར་བརྟག་།ཚངས་པར་སྤྱོད་པར་རྟག་གྱུར་ནས། །རྐང་པ་བརྒྱད་པའི་སྔགས་ཀྱིས་མཆོད། །རྣམ་པར་མི་རྟོག་བདག་ཉིད་སེམས། །འདོད་པའི་ཡོན་ཏན་ལྔ་ལ་སྤྱོད། །དོགས་པ་ཐམས་ཅད་རྣམ་ སྤངས་ཏེ།།སྔགས་པ་སེང་གེ་བཞིན་དུ་སྤྱོད། །དེ་ལྟར་བདག་ཉིད་རྣམ་བསམས་ཏེ། །སྔགས་མི་འདོར་ཞིང་ཤིན་ཏུ་བསྲུང་། །རྐང་པ་གཡས་བརྐྱང་བས་གནས་ཤིང་། །ཕྱག་རྒྱ་བཅིངས་ཏེ་མཉམ་གཞག་པས། །མཛུབ་མོ་མདུད་བྱས་གུང་མོ་ངེས་པར་སྦྱར། །མཐེ་བོ་རྡོ་རྗེ་བརྟན་པོར་རབ་ཏུ་ སྦྱར།།དེ་ནི་དཔྲལ་བའི་ཕྱོགས་དབུས་རབ་བཞག་ནས། །བསྐོར་ཞིང་བསྐོར་བས་ཀུན་དུ་བསྐྱོད་པར་བྱ། །ོཾ་ཨཱཿ་ཨ་ར་ལླི་ཧོ། །ཛཿ་ཧཱུཾ་བཾ་ཧོཿ་བཛྲ་ཌཱ་ཀི་ནཱི་ས་མ་ཡ་སྟྭཾ་དྲྀ་ཤྱ་ཧོ། །ཞེས་བྱ་བ་འདི་གསུམ་མམ་བཞིའམ་ལྔའི་བར་དུ་བརྗོད་པར་བྱའོ། །དེ་ནས་ལག་པ་གཡས་པ་དང་གཡོན་པ་བསྐོར་ ཞིང་མཁའ་འགྲོ་མའི་བདེ་བ་དེའི་སྙིང་པོའི་ཕྱག་རྒྱ་བསྟན་ཏེ།རྣལ་འབྱོར་སྟན་ནི་མཐོན་པོ་ལ། །གཅེར་བུ་སྐྲ་ནི་གྲོལ་གྱུར་པས། །ལྷོར་ནི་ལུས་བལྟས་གནས་བྱས་ལ། །མཚན་ཕྱེད་གཏོར་མ་སྦྱིན་པར་བྱའོ། །རྡོ་རྗེ་ཐལ་མོ་གྱེན་དུ་ཁ་ཕྱེ་ལ་དེ་ནས་གསང་སྔགས་འདི་བརྗོད་པར་བྱ་སྟེ། ཨོཾ་ཁ་ཁ་ ཁཱ་ཧི་ཁཱ་ཧི།སརྦ་ཡཀྵ་རཱ་ཀྵ་ས་བྷཱུ་ཏ་པྲེ་ཏ་པི་ཤཱ་ཙ་ཨུན་མ་ད། ཨ་པ་སྨ་ར་ཌཱ་ཀི་ནྱ་ད་ཡ། ཨི་མཾ་བ་ལིཾ་གྲྀ་ཧྣཾ་ཏུ་ས་མ་ཡཾ་ར་ཀྵྣྟུ། སརྦ་སིདྡྷི་མྨེ་པྲ་ཡཙྪ་ནྟུ། ཡ་ཐཻ་བཾ་ཡ་ཐེཥྚཾ། བྷུ་ཉྫ་ཐ་པི་པ་ཐ་ཛི་གྷྲ་ཐ་མཱ་ཏི་ཀྲ་མ་ཐ། མ་མ་སརྦ་ཀཱརྟ་ཡ། སཏ་སུ་ཁ་བི་བྲྀ་ད་དྷ་ཡེ། ས་ཧ་ཡི་ཀཱ་བྷ་བནྟུ་ཧཱུཾ་ཧཱུཾ་ཕཊ་ སྭཱ་ཧཱ།རྣལ་འབྱོར་པས་ནི་ལག་གཡོན་གྱིས། །དཔའ་བོའི་བརྡ་ནི་བསྟན་པར་བྱ། །འདི་དག་དཔའ་བོ་རྣམས་ཀྱི་གཞི། །བརྡ་རྣམས་དག་ནི་རབ་ཏུ་འཇུག་།ཁམས་གསུམ་རྒྱུ་དང་མི་རྒྱུ་བའི། །འགྲོ་བ་ཐམས་ཅད་གཡོན་ལས་བྱུང་། །ཤིང་ལ་རྡོ་རྗེ་སེམས་དཔའ་སྟེ། །ཡལ་གར་རྣམ་ པར་སྣང་མཛད་གནས།།བླ་མར་པདྨ་གར་དབང་ཕྱུག་།སོ་ལ་དཔའ་བོ་དྲུག་སྦྱིན་ཏེ། །མཐེའུ་ཆུང་ནམ་མཁའ་མི་ཟད་སྐུ། །སེན་མོ་ངོས་ལ་རྟ་མགྲིན་ཏེ། །དཔའ་བོ་ཀུན་གྱི་གཞི་ཡིན་པས། །ལག་པ་གཡོན་པ་དག་ལ་བྱ། །ལག་པའི་མཐིལ་ལ་ཕོ་ཉ་མོ། །སྙོམས་པར་འཇུག་པ་ ལ་ཕྱོགས་པའོ།།རྒྱབ་ཏུ་ཤིན་ཏུ་ངེས་པ་ཡིན། །བརྡ་ལྔ་པོ་དག་བྱས་ནས་ནི། །སྒྲུབ་པ་པོ་ཡིས་བསྟན་བྱས་ཏེ། །ས་ནི་སྤྱན་ཞེས་བྱ་བར་བཤད། །ཆུ་ཁམས་གསོད་བྱེད་མ་རུ་ཤེས། །མེ་དང་རླུང་ནི་སྒྲོལ་མ་དང་། །གོས་དཀར་མོ་ནི་རབ་ཏུ་གྲགས། །བར་སྐབས་དག་གི་སྟོང་པ་ནི། ། དེ་བཞིན་ཕ་རོལ་ཕྱིན་པ་ཡིན། །མཁས་པས་རྒྱབ་ཀྱིས་གཤེགས་གསོལ་བྱ། །དེ་ལྟར་དཔའ་བོའི་བརྡ་བྱས་ཏེ། །དེར་ནི་ལྷན་ཅིག་ཟས་བརྩམ་བྱ། །ནག་པོའི་ཕྱོགས་ཀྱི་ཚེས་བཅུ་དང་། །དཀར་པོའི་ཕྱོགས་ཀྱིའང་དེ་བཞིན་འགྱུར། །རྡོ་རྗེ་ལྷ་མོ་ཤ་ཆང རྣམས་ཀྱིས་ཀྱང་།།ངེས་པར་རབ་ཏུ་འབད་དེ་མཆོད་པར་བྱ། །ནག་པོའི་ཚེས་བརྒྱད་ནག་པོའི་བཅུ་བཞི་དང་། །དཀར་པོའི་ཚེས་བརྒྱད་དཀར་པོའི་བཅུ་བཞི་ལ། །རྡོ་རྗེ་ལྷ་མོ་ཤ་ཆང་རྣམས་ཀྱིས་ཀྱང་། །ངེས་པར་རབ་ཏུ་འབད་དེ་མཆོད་པར་བྱ། །དེ་དག་མཆོད་པ་དེ་ལ་རབ་དགྱེས་ ཤིང་།།དཔལ་ལྡན་ཧེ་རུ་ཀ་ཡང་ཆགས་གྱུར་པའི། །ཐུགས་དགྱེས་གྱུར་ནས་མཆོག་ནི་སྩོལ་བར་འགྱུར། །འདི་ལྟར་མཆོག་ནི་དེ་དག་ལག་མཐིལ་གནས། །བྱང་ཆུབ་རྡོ་རྗེས་འདི་བྱས་ལས། །དགེ་ཆེན་དག་ནི་གང་སྐྱེས་པ། །ངན་འགྲོ་བྱང་ཆུབ་རྡོ་རྗེ་ཡི། །གོ་འཕང་མཆོག་ནི་ཐོབ་ པར་ཤོག་།ཀུན་སྤྱོད་མངོན་འབྱུང་ཞེས་བྱ་བ་ལུས་པ་དང་མཁའ་འགྲོ་ངེས་བརྗོད་བླ་མ་དང་། །ལཱུ་ཡི་བ་ལ་སོགས་པ་ཡིས་ནི་མཛད་པར་བལྟས་ནས་ཀྱང་། །འཁོར་ལོའི་གཙོ་བོ་དཔལ་དག་སྐྱེ་བ་གཅིག་ཏུ་ཡོངས་སུ་གོམས་མཛད་ནས། །དཔལ་ལྡན་སམྦ་ར་རོལ་སྒྲུབ་ཐབས་བྱང་ཆུབ་གང ཡིན་དེ་ལ་ཕྱག་འཚལ་ལོ།།སློབ་དཔོན་བྱང་ཆུབ་རྡོ་རྗེའི་ཞལ་སྔ་ནས་ཀྱིས་མཛད་པ་སམྦར་ཤེས་རབ་བྱེད་པ་ཞེས་བྱའི་འགྲེལ་པ། དཔལ་བདེ་མཆོག་གི་མངོན་པར་རྟོགས་པ་རྫོགས་སོ། །རྒྱ་གར་གྱི་མཁན་པོ་བྷ་དྲ་ཤྲཱི་བོ་དྷི་དང་། ལོ་ཙཱ་བ་དགེ་སློང་དགེ་བའི་བློ་གྲོས་ཀྱིས་བསྒྱུར་ཅིང་ ་ཞུས་ཏེ་གཏན་ལ་ཕབ་པ།་