Tibetan
རིགས་ཀླུ་ཡི་རྟགས་བྱུང་ན།། རས་སམ་གྲོ་ག་ཤིང་ཤུན་ལ།། རྒྱལ་རིགས་ཀླུ་ཡི་གཟུགས་བྲིས་ལ།། ལིངྒ་དེ་ཡི་སྙིང་ག་རུ།། ནཱ་ག་མཱ་ར་ཡ་ཞེས་བྲི།། ལིངྒ་དེ་ཡི གཡས་ཕྱོགས་སུ།། རྒྱལ་རིགས་མཱ་ར་ཡ་ཞེས་བྲི།། གཡོན་དུ་ནཱ་ག་གཏུབས་དང་མྱོགས་ཞེས་བྲི།། དེ་ལྟར་ལིངྒ་བྱས་པ་ཡིས།། མགྲིན་པར་ལིངྒ་རེ་རེ་བྲི།། དེ་ལྟར་ལིངྒ་བྱས་ཟིན་ནས།། བྲུབ་ཁུང་གྲུ་གསུམ་སྔོན་པོར བྱ།། དེ་ཡི་ཐ་མ་ཟླུམ་པོར་བརྩིགས།། ཟླུམ་པོའི་ཁ་དོག་སྔོ་ནག་ལ།། མེ་རི་ཡིས་ནི་མཛེས་པར་བྲི།། ཟླུམ་པོར་བརྩེགས་པའི་སྟེང་དག་ཏུ།། རྡོ་རྗེ་བེ་ཅོན་གཟུགས་ཉིད་བྲི།། གྲུ་གསུམ་བརྩེགས་པའི་སྟེང་དག་ཏུ།། ཁ ཊྭཱྂ་རྡོ་རྗེ་རྒྱ་གྲམ་བྲི།། དེ་ཡི་ནང་དུ་ལིངྒ་གཞུག། སྐེ་ཚེ་ཉུང་དཀར་ཉུང་ནག་དང།། བཙན་དུག་ལ་སོགས་དུག་རྣམས་དང།། དུར་ཁྲོད་ཐལ་བའི་རྫས་རྣམས་ནི།། དུར་ཕོར་དག་གི་ནང་དུ་བླུག། དེ་ལ་གསང་སྔགས རབ་བཏབ་ཅིང།། ལིངྒ་དེ་ལ་བྲབ་པར་བྱ།། བལ་པོ་སེའུའི་ལྕུག་མའམ།། སྙག་ཤད་དག་གི་ལྕུག་མ་ཡིས།། ནད་པའི་སྙིང་ག་དག་ནས་དེད།། ལུས་ཀུན་ཁྱབ་བར་བརྡོལ་བྱ་ཞིང།། བདག་ཉིད་གླང་ལ་ལན་གསུམ བསྐོར།། ས་ལ་ལན་ནི་གསུམ་བརྡབ་ཅིང།། ལིངྒ་དེ་ལ་བསྟིམ་པར་བྱ།། གསང་སྔགས་བཟླས་པ་རབ་ཏུ་བྱ།། བདག་ཉིད་དབང་ཆེན་ལྡན་པ་ཡིས།། གསང་སྔགས་བཟླ་ཞིང་ལྕུག་མས་བརྡེགས།། ཀླད་སྐོར་ས་ལ བརྡབ་པ་དང།ལིངྒ་དག་ལ་ཡང་ཡང་བསྟིམ།། བཅོམ་ལྡན་པདྨ་རྟ་མཆོག་དང།། ཕྱག་རྡོར་ལ་སོགས་འཁོར་རྣམས་ལ།། གཏོར་མ་རྒྱན་ལྡན་དག་གིས་ཀྱང།། དུས་གསུམ་དག་ཏུ་མཆོད་པར་ བྱ།། མཚམས་ནི་མ་ཐོན་བར་དུ་ཡང།། དཔལ་གྱི་གཏོར་མ་གཏའ་རུ་བཟུང།། ཞག་བདུན་བར་དུ་བསྒྲུབ་པ་དང།། དེ་ནས་ལིངྒ་དེ་ཉིད་ནི།། ཡུགས་ས་མོ་ཡི་ཞབས་མས་གཏུམ།། བྲ་མའི་ཤིང་གི་མེ་ཡིས སྦར།། དུག་དང་གོང་གི་ཐུན་གྱིས་བྲབ།། དྲག་སྔགས་དེ་ཉིད་རབ་ཏུ་བཟླས།། བདག་ཉིད་ཁྲོ་བོའི་ཏིང་འཛིན་བརྟན།། ཐུན་དང་ལྕུག་མས་རབ་ཏུ་བྲབ། ཐུན་དང་ལྕུག་མས་བྲབ་ཚེ་ན།། ནད་པའི་ལུས་ཀྱི་ནད་རྣམས ཀུན།། ཕྱག་ན་རྡོ་རྗེའི་མཐུ་རྩལ་དང།། གཤིན་རྗེ་གཤེད་ཀྱི་བརྟུལ་ཤུག་དང།། རྟ་མགྲིན་རྒྱལ་པོའི་དྲག་ཤུལ་དང།། མི་གཡོ་བ་ཡི་དྲག་སྔགས་དང།། རྟེན་འབྲེལ་རྫས་ཀྱི་བདེན་པ་ཡིས།། ནད་པའི་ལུས་ཀྱི་ནད རྣམས་ཀུན།། ཐོན་ནས་འབྱུང་པོའི་ལིང་གར་བསྟིམ།། དེ་ནས་མེ་སྦར་དྲག་སྔགས་བཟླས།། དེ་ནས་བྱིན་སྲེག་ཟིན་པ་དང།། བག་ཟན་དག་གིས་གཟུགས་བྱས་ལ།། བསྲེག་པའི་ཐལ་བ་དག་དང་བཅས།། ཁམ་སའི བླུག་མའི་ནང་དུ་གཞུག།ཐུན་གྱིས་བྲབས་ལ་ལྕུག་མས་བྲབ།། ཆུ་མིག་ཤར་དུ་བལྟས་པ་ཡི།། འགྲམ་དུ་འདོམ་གསུམ་ཚད་དུ་སྦ།། དེ་ལྟར་སྦྱོར་བ་ཆེན་པོ་ནི།། ཉི་ཤུ་རྩ་བརྒྱད་བྱས་གྱུར་ན།། རྒྱལ་རིགས་གདོན་ ལས་ཐར་བར་འགྱུར།། གང་དག་མི་ཡི་རིགས་རྣམས་ལ།། རྗེ་རིགས་ཀླུ་ཡིས་ཟིན་གྱུར་ན།། དྲག་པོའི་ལས་ཀྱིས་གསོ་བྱེད་པའི།། སྦྱོར་བ་འདི་ལ་བརྩོན་པར་བྱ།། དེ་གཉིས་སྦྱོར་བ་ཆེན་པོ་ནི།། བཅོམ་ལྡན་ཕྱག་ན རྡོ་རྗེ་ཡི།། བདག་ཉིད་ཏིང་འཛིན་ལྡན་པ་ཡིས།། འབྲུབ་ཁུང་གོང་དང་འདྲ་བ་ལས།། དྲག་པོའི་ཐུན་དང་སྦྱོར་བ་ནི།། ར་ཕག་ཚིལ་དང་བོང་ཚིལ་དང།། བ་ཚིལ་ཁྱི་ཚིལ་ལ་སོགས་པ།། སྦྱིན་སྲེག་རྫས་སུ་རྒྱས་པར གསུངས།། ལིང་ག་རྣམ་པ་གསུམ་བྱ་སྟེ།། མིང་བྱང་གོང་དང་འདྲ་བའོ།། རྨ་བྱ་མཛེས་པས་ལུས་ལ་བྱབ།། ལིངྒ་ཉིད་ལ་བསྟིམ་ཞིང་བཟླས།། སེང་ལྡིང་ཕུར་པ་སོར་བརྒྱད་ལ།། དབང་ཆེན་གསང་སྔགས་བྲིས་པ ཡང།། བདག་ཉིད་ཐོང་ག་གཡས་པ་ལ།། ལེ་བརྒན་དར་གྱིས་དྲིལ་ལ་གདགས།། ལྕགས་ཀྱི་ཕུར་བུ་སོར་བཞི་ལ།། རྡོ་རྗེ་གཏུམ་པོའི་སྔགས་བྲིས་ལ།། བདག་གི་ཐོང་ག་གཡོན་པ་ལ།། དར་སྔོན་དག་གིས་དྲིལ་ལ གདགས།། དེ་ནས་ཏིང་འཛིན་ལྡན་པ་དེས།། རྨ་བྱས་བྱབ་ཅིང་ལིང་གར་བསྟིམ།། ལིངྒ་གཅིག་ལ་ཐུན་གྱིས་བྲབ།། གཅིག་ལ་ནད་པའི་ནད་རྣམས་བསྟིམ།། གཅིག་ལ་ཚིལ་བུའི་དུད་བས་བདུག། ད་ལྟར་གསང་བ རབ་ལྡན་པས།། བསྒྲུབ་པའི་ཚད་ནི་གོང་དང་མཐུན།། ལིངྒ་རོ་རས་དག་གིས་གཏུམ།། སྐྱེར་བའི་ཤིང་གི་མེ་སྦར་ཞིང།། ལིངྒ་གཉིས་ནི་བསྲེགས་པར་བྱ།། དེས་ནི་སྦྱོར་བ་ཟིན་པ་དང།། ཆུ་མིག་ནུབ་ཏུ་བལྟ་བའི སར།། ལིངྒ་གཅིག་དང་བཅས་པ་ནི།། གོང་དང་འདྲ་བར་སྦ་བར་བྱ།། དེ་ལྟར་སྦྱོར་བ་ཉིད་བྱས་ན།། རྗེའུ་རིགས་གདོན་ལས་ཐར་བར་འགྱུར།། བྲམ་ཟེའི་རིགས་ཀྱི་རྟགས་བྱུང་ན།། བདག་ཉིད་རྣལ འབྱོར་ཆེན་པོ་ཉིད།། གཤིན་རྗེ་གཤེད་ཀྱི་ཏིང་འཛིན་གྱིས།། སྐྱེར་པའི་ཕུར་པ་སོར་བཞི་ལ།། གཤིན་རྗེ་གཤེད་ཀྱི་སྔགས་བྲིས་ལ།། བདག་ཉིད་ཐོང་ག་གཡོན་པ་ན།། དར་སེར་དག་གིས་དྲིལ་ལ་བཏག། དབང་ཆེན ཕུར་པ་གོང་དང་མཚུངས།། བེང་དུག་བཙན་དུག་ལ་སོགས་ཏེ།། དུག་གི་རྣམ་པ་ཅི་སྙེད་དང།། ཁྲག་སྣ་ཅི་སྙེད་ཡོད་པ་དང།། ཁྱི་ལུད་དྲི་ཆེན་མངལ་ཁྲག་དང།། ཡུགས་ས་མོ་ཡི་ཞབས་མ་ནི།། ཐུན་དང་བྲབ་བའི རྫས་སུ་བསྟན།། ཕག་པ་དག་གི་སྣ་རྩེ་ལ།། གསང་སྔགས་བཟླའ་ཞིང་ལུས་ལ་བྱབ།། ལིངྒ་ཉིད་ལ་བསྟིམ་པར་བྱ།། དེ་ནས་བསྒྲུབ་པ་ཐ་མ་ལ།། དུག་ཤིང་སྐྱར་བའི་མེ་སྦར་ཞིང།། རྫས་རྣམས་ཐབ་ཏུ་བསྲེག་པར བྱ།། ཁྲག་གིས་གཏོར་ཞིང་ལིང་ག་བསྲེག། དེ་ལ་སྦྱོར་བ་ཟིན་པ་དང།། ཐལ་བ་ལིང་གར་བཅས་པ་ནི།། ཆུ་མིག་ལྷོ་ངོས་བལྟ་བ་རུ།། གོང་དང་འདྲ་བར་སྦ་བར་བྱ།། བྲམ་ཟེའི་རིགས་ལས་ཐར བར་འགྱུར།། དམངས་རིགས་རྟགས་ནི་བྱུང་བ་ན།། བཅོམ་ལྡན་རྟ་མགྲིན་དམར་པོ་བསྒོམ།། དབང་ཆེན་ཕུར་པ་གོང་དང་འདྲ།། ར་གན་ཕུར་བ་སོར་བཞི་ལ།། རྟ་མགྲིན་དག་གི་སྔགས་བྲིས་ལ།། བདག་ཉིད་ཐོང ག་གཡོན་པ་ལ།། དར་སྣ་ཚོག་ཀྱིས་དྲིལ་ལ་གདགས།། ཤོག་བུའི་ལིངྒ་བརྒྱ་རྩ་བསྲེག། བཅའ་ལུག་གོང་དང་འདྲ་བ་ལ།། དབུས་ཀྱི་ཆུ་མིག་དག་ཏུ་ཡང།། གོང་དང་འདྲ་བར་སྦ་བར་བྱ།། དེ་ནི་དམངས་རིགས གདོན་ལས་ཐར།། གདོལ་པའི་རིགས་ཀྱི་རྟགས་བྱུང་ན།། འཕགས་པའི་རྒྱལ་པོ་མི་གཡོ་བསྒོམ།། རྫས་དང་བྱ་ཐབས་གོང་དང་འདྲ།། དབང་ཆེན་ཕུར་པ་གོང་དང་འདྲ།། དངུལ་གྱི་ཕུར་པ་སོར་བཞི་ལ།། མི་གཡོ བ་ཡི་སྔགས་བྲིས་ལ།། བདག་ཉིད་ཐོང་ག་གཡོན་པ་ལ།། དར་དཀར་དག་གིས་དྲིལ་ལ་གདགས།། དེ་ནས་སྦྱོར་བ་ཟིན་པ་དང།། ཟླ་གམ་མཛོ་མོའི་མེ་སྦར་ཞིང།། ལིངྒ་བསྲེག་ཅིང་གསང་སྔགས་བཟླས།། ཆུ་མིག བྱང་དུ་བལྟ་བར་ཡང།། གོང་དང་འདྲ་བར་སྦ་བར་བྱ།། དེས་ནི་གདོལ་པའི་གདོན་ལས་ཐར།། རིགས་ལྔ་ཀླུ་ཡི་ཟིན་གྱུར་ན།། རེས་འགའ་ན་ཞིང་རེས་འགའ་གྲང།། ཤེས་པ་རྨུགས་ཤིང་ཉལ་ལ་དགའ།། སྐྱུར་དང དམར་ལ་མི་དགའ་ཞིང།། དཀར་དང་མངར་ལ་དགའ་བ་ན།། ཀླུ་རིགས་ལྔ་ཡི་ཟིན་པ་ངེས།། རྨི་ལམ་དག་ལ་བྱོལ་སོང་དང།། ཁྱི་དང་ཕག་དང་ཉ་སྦྲུལ་དང།། སེམས་ཅན་གཟུགས་ནི་སྣ་ཚོགས་འབྱུང།། དེ་རྣམས བཅོས་པར་བྱ་བའི་ཐབས།། སྣ་ཚོགས་སྦྱོར་བ་རབ་ཏུ་བྱ།། དེ་ལྟར་གསད་པར་བྱ་བའི་ཐབས།། དྲག་སྔགས་འདི་ཡིས་བྱ་བར་གསུངས།། ཨོྂ་ཤྲཱི་བཛྲ་ཙཎྜ་ནཱ་གའི་རོ་སྙིང་ཤ་ཀུ་རུ་མཱ་ར་ཡ་ཛ་ཛྭ། ནཱ་ག་དུཥྟན་ཕཊ། ནཱ ག་སྙིང་ཐིག་མཱ་ར་ཡ་ཕཊ།ནཱ་གའི་སྲོག་ཁ་ལོང། ལྡར་ཡ་ཕཊ། གསང་སྔགས་དེ་སྐད་བཟླས་པ་ཡིས།། ཀླུ་རྣམས་ཐམས་ཅད་དབང་མེད་པར།། སྲོག་རྩ་དྲངས་ནས་བརྒྱལ་སྟེ་འཆི།། ཡང་ན་འདར་ ཞིང་སྐྲག་པ་ཡིས།། མིག་རྩ་རིག་རིག་གཞན་དུ་བྲོས།། སྐྲག་ཅིང་སྡངས་པས་བཀའ་ཉན་བྱེད།། སྦྱོར་བ་ཡང་དང་ཡང་བྱ་ཞིང།། གསང་སྔགས་ལན་འབུམ་བཟླས་པ་ན།། རིགས་ལྔའི་ཀླུ་རྣམས་བསྐྲད་བར བྱེད།། དྲགས་ན་རང་ངམ་འཁོར་ལ་ལྡོག། ཕྱིར་མི་ལྡོག་པའི་བྱ་ཐབས་ལ།། བདག་ཉིད་དབང་དུ་བསྒོམ་པ་ཡིས།། སྐྲ་ནི་སྤྱི་བོའི་གཙུག་ཏུ་བཅིངས།། རྨ་བྱའི་སྒྲོ་ནི་སྤྱི་བོར་བཙུགས།། གཡས་པས་རལ་གྲི་རབ ཏུ་ཐོགས།། གཡོན་པ་དག་ནི་ཕུར་བའོ།། ཕག་པའི་སྣ་ནི་དབུང་པ་གཡས།། སིང་ལྡེང་ཕུར་པ་ཐང་ག་གཡས།། ལྕགས་ཕུར་ཐོང་ག་གཡོན་དུའོ།། གླ་རྩི་བཙན་དུག་སྐེ་ལའོ།། ཡུངས་ཀར་རྡོ་རྗེ་རྩེ་དགུའོ།། དེས་ནི ཕྱིར་ལ་ལྡོག་མི་འགྱུར།། དེ་ནས་སྦྱོར་བ་ཅི་བྱས་ཀྱང།། རང་ལ་ལྡོག་པའི་མིང་མེད་དོ།། དེས་ནི་ཀླུ་རྣམས་གདོན་ལས་ཐར།། ས་བདག་རིགས་ཀྱིས་ཟིན་པ་ན།། རྟགས་དང་འཇུག་པའི་མཚན་ཉིད་བསྟན།། འཇུག པའི་ས་ལ་ངེས་པ་མེད།། ལུས་པོའི་བཀྲག་ནི་སེར་པོར་འགྱུར།། མཁྲིས་པ་དག་ལ་གནས་བཅས་ནས།། ཆུ་སེར་དག་ལ་ཟ་བར་བྱེད།། ལུས་ཀྱི་སྟོབས་རྣམས་ཤོར་བ་དང།། ཟས་ནི་མངར་སྐྱུར་ཅི་ཟོས་པ།། ཁོང པར་དྲོས་ན་སྐྱུགས་པར་བྱེད།། རྐང་པ་ཀྱོག་དང་ལག་པ་ཀྱོག། མེ་མི་ཐུབ་ལ་འགྲོ་མི་ནུས།། ས་ལ་ཉལ་ཞིང་འདོད་ཆགས་ཆེ།། དང་པོ་སྐྱ་རྦབ་དག་ཏུ་འགྱུར།། ལུས་པོའི་ཤ་སྐམ་འགྲམ་ཤ་མེད།། དྲི་ཆུའི་མདོག་ནི་ཆུ རྩའི་ཁུ།། ཕོ་སྟོད་མི་བདེ་སྐད་ཀྱང་འགགས།། གཏམ་ནི་སྨྲ་སྙིང་མི་འདོད་ཅིང།། སོ་ཡི་རྩི་འཆོར་རྐང་མཐིལ་སེར།། མཐེབ་དང་འཛུབ་མོའི་བར་ཤ་ཤོར།། སེན་མོ་ཉིད་ཀྱང་སེར་པོ་ལ།། མཆིན་པ་ན་ཞིང་ཡན་ལག ན།། ཕྱིས་ནི་སྐམ་པོར་འགྲོ་བར་ངེས།། དེ་ལྟ་བུ་ཡི་རྟགས་རྣམས་ནི།། ས་བདག་གདོན་དུ་ཤེས་པར་བྱ།། དེ་དག་དང་པོ་བཅོས་པའི་ཐབས།། ས་སྣ་མི་མཐུན་སྣ་ཚོགས་དང།། རིན་ཆེན་གཏོར་མས་མཆོད་པར བྱ།། ཀླུ་ཡི་སྐབས་ནས་འབྱུང་བ་བཞིན།། འདིར་ཡང་སྦྱོར་བ་དེ་ལྟར་བརྩམ།། ཀླུ་ཡི་གཟུགས་བརྙན་མ་གཏོགས་པ།། བུམ་པའི་སྦྱོར་བའི་དཀྱིལ་འཁོར་ནི།། ཀླུ་ཡི་སྐབས་དང་མཐུན་པའོ།། རིན་ཆེན་གཏོར་མ་སྣ ཚོགས་དང།། ཀླུ་ཡི་སྐབས་ནས་བྱུང་བ་ཡི།། མཆོད་པའི་སྔགས་དང་གཏོར་སྔགས་སོ།། ཕྱག་རྒྱ་བུམ་པ་ལྟ་བུས་མཆོད།། ས་བདག་གནས་པའི་ས་རུ་བསྐྱལ།། དེ་ནི་ས་བདག་གདོན་ལས་ཐར།། དེ་ཡིས་ཐར་བར མ་གྱུར་ན།། དྲག་པོའི་སྦྱོར་བ་བརྩམས་པར་བྱ།། ཤིན་ཏུ་དབེན་པའི་གནས་ཉིད་དུ།། འབུག་ཁུང་གྲུ་གསུམ་རྩེ་སྤྲད་གསུམ།། ས་བཟང་དག་གི་འདས་པས་བརྩིག། གཅིག་ནི་དཀར་པོ་བསྐུ་བར་བྱ།། གཉིས་ནི་ནག དང་དམར་པོ་བྱ།། དེ་ཡི་ཕྱི་རིམ་གྲུ་བཞི་སྟེ།། གྲུ་བཞིའི་ངོས་ལ་མེ་རི་བྲི།། ཁ་ལ་རྡོ་རྗེས་བསྐོར་བར་བྱ།། གྲུ་གསུམ་ཁ་ནི་ཐོད་པས་བསྐོར།། བག་ཟན་གྲོག་མཁར་ས་དག་ལ།། རྔ་མོང་གཟུགས་ནི ནག་པོ་བྱ།། དེ་ཡི་སྟེང་དུ་བསྐྱོན་བྱས་ལ།། རྩངས་པའི་གཟུགས་དང་དམིགས་པས་བསྐྱོན།། རྩངས་པ་དེ་ཡི་སྙིང་ག་རུ།། ཡི་གེ་དག་ནི་སྔོན་པོར་བྲི།། གྲོ་ག་ཤིང་ཤུན་དག་ལ་ཡང།། ས་བདག་མཱ་ར་ཡ་ཞེས བྲི།། གཟུགས་ཀྱི་ཁོང་པར་གཞུགས་པར་བྱ།། དེ་ནི་ལྷོ་ཕྱོགས་ཁ་བསྟན་ལ།། བྲུབ་ཁུང་ནང་དུ་གཞུགས་པར་བྱ།། ཤོག་ཤོག་ལིང་ག་རེ་རེ་ལ།། སྙིང་གར་ས་བདག་མཱ་ར་ཡ།། སྔགས་དེ་བྲིས་ལ་བྲུབ་ཁུང ནང།། དཔལ་གྱི་གཏོར་མ་དག་ཀྱང་བྱ།། བདག་ཉིད་དབང་ཆེན་རབ་གསལ་པས།། བྲུབ་ཁུང་སྟེང་དུ་གཏོར་མ་བཞག། གཏོར་མའི་ནང་དུ་གཟུགས་དེ་གཞུག། བདག་ཉིད་དཔྲལ་བའི་ཧཱུ~ྂ་ཉིད་ལས།། འཕགས་པ་མི གཡོ་ཞེས་བྱ་བའི།། ཁྲོ་རྒྱལ་རལ་གྲི་ཐོག་པར་བསམ།། བདག་གི་མདུན་དུ་ཡོད་པ་ཡི།། མི་དེར་མི་གཡོའི་དབང་བསྐུར་བྱ།། བདག་ཉིད་དཔལ་ཆེན་ལྡན་པ་ཡིས།། སློབ་མ་མཚན་ལྡན་དེ་ལ་ཡང།། ཤིན་ཏུ་རྣོ་བའི རལ་གྲི་བསྐུར།། ནད་པ་དེ་ལ་བསྐོར་བྱ་ཞིང།། རལ་གྲི་གླང་ལ་བསྐོར་བར་བྱ།། ནད་པའི་ལུས་ལ་ཐུག་པར་བྱ།། གཟུགས་དེ་ལ་ཡང་བསྟིམ་པར་བྱ།། སློབ་དཔོན་གསང་བའི་དབང་ཐོབ་དེས།། གསང་སྔགས་འདི ནི་དྲག་ཏུ་བཟླས།། ཧརིཿབཛྲ་པཱ་ཎི་ནཱ་ག་དུ། སྙིང་ཁྲག་ཚལ་པ་སྙིང་ཁྲག་ལ་ཧབ་ཧབ་ཧུབ་ཧུབ།། མཱ་ར་ཡ་སྙིང་ལ་ཛ་དུ་ཡ་ཛ་ཛ། དེ་ནས་སློབ་དཔོན་མཚན་ལྡན་དེས།། རྩ་བའི་སྔགས་ཀྱི་རྗེས་སུ་ཡང།། སྔགས་འདི བཟླས་ཤིང་རལ་གྲི་ཕྱར།མཱ་ཧཱ་ནཱ་ག་པ་ཏི་སྥ་ར་ན་ཕཊ་ཕཊ། རལ་གྲི་དག་ལ་བཟླ་བྱ་ཞིང།། ནད་པ་དེ་ཡི་གཟུགས་ལ་བསྟིམ།། དེ་ནས་གང་ཡང་རུང་བའི་མིས།། གཟུགས་དེ་ལྷོ་ཕྱོགས་དག་ཏུ་བསྐྱལ།། དེ་ནས་ ལོག་ནས་འོང་བ་དང།། སློབ་དཔོན་དེ་ཡིས་སྦྱིན་སྲེག་བྱ།། ཚེར་མ་ཅན་གྱི་ཤིང་དག་ལ།། རྂ་དང་ལྡན་པས་མེ་ཉིད་སྦར།། དེས་ནི་ས་བདག་གནོད་ལས་ཐར།། ཕྱིས་ནི་ལྡང་བར་མི་ནུས་སོ།། གང་དག་གཉན་གྱིས ཟིན་གྱུར་ན།། རྟགས་ནི་འདི་རྣམས་འབྱུང་བར་ངེས།། འཇུག་པའི་སྒོ་ནི་གསུས་པའོ།། སྙིང་གར་གནས་ཤིང་ཆུ་སེར་འབུད།། སྐད་ནི་འཛེར་ཞིང་ཤ་མདོག་ནག། ཤ་ཡི་རྒྱུ་ཡང་ཆུང་བར་འགྱུར།། ཡང་ན་རྫིས་པ་དག ཏུ་འགྱུར།། ལག་པའི་མཁྲིག་མ་ཕྲ་བར་ངེས།། དོན་མེད་རྨ་རྣམས་འབྱུང་བ་དང།། དབང་པོའི་ཆགས་པ་མི་སྐྱེ་དང།། གསུས་པ་ན་ཞིང་སྐམ་པར་བྱེད།། ཚིགས་པ་ན་ཞིང་ཆུ་སེར་འབྱུང།། སྐབས་སུ་ཁོལ་བུར་ན་བ དང།། སྨིན་མའི་བཀྲག་ནི་ཉམས་པར་འགྱུར།། མཛེ་ཡི་རྟགས་རྣམས་འབྱུང་བ་དང།། རྐང་པའི་མཐིལ་ནས་འཕྲིག་པ་རྣམས།། གཉན་གྱི་ནད་དུ་ཤེས་པར་བྱ།། འགྲོ་བར་བྱེད་པའི་ཚེ་ན་ཡང། རྐང་པ་འཁོར ཞིང་ལུས་པོ་འཁྱོམ།། ཁ་དང་སྣ་དང་མིག་རྣམས་ནས།། ཆུ་ནི་དུས་མིན་འབྱུང་བ་དང།། ཕྱིས་ཀྱང་གཉན་གྱི་མཛེ་རུ་འགྲོ། དེ་ལ་སོགས་པའི་མཛེ་རིགས་ནི།། རྣམ་པ་བརྒྱད་ཉིད་ལྡན་པ་ན།། གཉན་གྱི གདོན་གྱིས་ཟིན་པར་ངེས།། དེ་དག་བཅོས་པའི་ཐབས་འདིའོ།། དང་པོ་ཞི་བས་མཆོད་པར་བྱ།། ཆབ་གཏོར་མཆོད་རྟེན་གདབ་པར་བྱ།། དེས་ཀྱང་ཕན་པར་མ་གྱུར་ན།། དབང་ཆེན་ཏིང་འཛིན་ལྡན་པ་ཡིས།། གྲུ གསུམ་ཐབ་ཁུང་བརྩིག་པར་བྱ།། བྲུབ་ཁུང་ནག་པོར་བརྩིགས་པའི་སྟེང།། ཁ་ཊྭཱྂ་རྡོ་རྗེའི་གཟུགས་སུ་བྲི།། དུར་ཁྲོད་ཤིང་དང་ཚེར་མའི་ཤིང།། དུག་ཤིང་ཚོགས་ཀྱིས་གྲུ་གསུམ་བརྩིགས།། གདོན་གྱི་གཟུགས་ནི་སྔོ སྐྱར་བྱ།། བལ་ནག་སྐྲ་ནི་ཐུར་ལ་བསྙིལ།། སྙིང་གར་ཡི་གེ་པྲེ་ཉིད་བྲི།། སྐུད་པ་ནག་པོ་སུམ་བསྒྲིལ་གྱིས།། ལིངྒ་དེ་ཡི་སྐེ་ལ་གདགས།། ཕུར་པ་བཞི་ལ་ཕྱོགས་བཞིར་བརྟོད།། གྲི་དང་གདུག་པའི་མཚོན་ཆ བསྣམས།། བདག་ཉིད་ཁ་ཡང་ལྷོ་རུ་བསྟན།། དེ་ནས་ཏིང་འཛིན་ལྡན་པ་ཡིས།། བགེགས་རྣམས་བཀུག་ཅིང་གཟུགས་ལ་བསྟིམ།། སྐུད་པ་ནག་པོ་གཟུང་བྱ་ཞིང།། གསང་སྔགས་འདི་ཡིས་ལིངྒ་བཅིང།། ཨོྂ་ཧརཱིཿབཛྲ བྷནྡྷ་ཧཱུ~ྂ།དུཥྟ་གྷྲྀ་ཧྣ་བནྡྷ་ཧཱུ~ྂ། གསང་སྔགས་བཟླ་ཞིང་ལིངྒ་བཅིང།། དེ་ལྟར་ཡང་ནས་ཡང་བྱས་ཤིང།། རྨི་ལམ་ཁུགས་པར་མཐོང་བ་དང།། གདབ་པའི་གནས་ལྔར་ཕུར་བུ་གདབ།། དེ་ནས་གྲི་ཡིས་གཏུབ་པར་ བྱ།། རྡོ་རྗེས་བརྡུང་ཞིང་སྔགས་འདི་བཟླས།། ཤྲཱི་བཛྲ་པཱ་ཎི། ས་ནཱ་ག་དུ་ལིང་སྙིང་ལ་གཏུབ། སྙིང་ཁྲག་ཚལ་པ་མཱ་ར་ཡ་རྦད།། དེ་ནས་བརྡུངས་ཤིང་ཧོམ་དུ་བསྲེག། དེ་ནས་བྲུབ་ཁུང་དེ་ཉིད་དུ།། གྲུ་གསུམ་བཞིན་དུ གཏིང་དུ་བརྐོ།། སོལ་བ་ལ་སོགས་ཐོ་རལ་རྣམས།། གཏིང་དུ་བྲུབ་ཅིང་ས་ཡིས་བརྫིས།། དེ་ཡི་སྟེང་དུ་བཞག་པའི་རྫས།། གཡམ་པ་སྔོན་པོ་ལེབ་མོ་ལ།། རྡོ་རྗེ་རྒྱ་གྲམ་བྲིས་པས་བཅད།། དབང་ཆེན་ཏིང་འཛིན་ལྡན པ་ཡིས།། ཁྲོ་བོ་བརྗིད་པའི་སྟོབས་ཀྱིས་འགྲོ།། དབང་གི་རྟ་བྲོ་བརྡུང་བར་བྱ།། ཧ་ཧ་ཞེས་བྱ་གད་རྒྱངས་སྒྲོགས།། པདྨཱནྟ་ཀྲྀཏ་གླུ་ཆེན་བླངས།། དེ་ནས་གྲི་ཡིས་བཙབ་པར་བྱ།། དེ་ཡི་གསང་སྔགས་འདི་དག་གོ། ཚེ ད་ཚེ་ད་མཱ་ར་ཡ།ཁཱ་བེ་ན་ཧཱུ~ྂ་ཕཊ། ལན་ནི་ཉི་ཤུ་རྩ་གཅིག་བརྗོད།། ཕྱིས་ནི་མི་ལྡང་བ་ཡི་སྔགས་འདི་ཡིན།། དུཥྟ་ཀྲ་ཧ་ན།། སྟྭྂ་བྷ་ན་ཀུ་རུ་ལམ།། དེ་ཉིད་བཅོ་བརྒྱད་དག་གིས་འགྲུབ།། དེ་ལྟར་བཅོ་བརྒྱད་བྱས་གྱུར་ ན།། གཉན་གྱི་གདོན་ལས་ཐར་བར་གྱུར།། སྦྱོར་བ་འདི་ཉིད་བྱས་པ་ན།། ས་བདག་གདོན་ལས་ཐར་བར་འགྱུར།། དེ་ལྟར་ལས་རྣམས་རྫོགས་བྱས་ན།། ཀླུ་དང་གཉན་དང་ས་བདག་དང།། ས་གདོན་ལས་ནི་རབ ཏུ་ཐར།། མཛེ་ཡི་ནད་རྣམས་ཞི་བར་འགྱུར།། དེས་ནི་ལས་རྣམས་མྱུར་པའོ།། གང་དག་མི་ཡི་རིགས་རྣམས་ལ།། མཛེ་ལ་སོགས་པའི་ནད་རྣམས་ནི།། རིམས་དང་སྨཡོ་འབོགས་ནད་ལ་སོགས།། མ་མོའི་གདོན་ལས གྱུར་པས་ན།། མ་མོའི་རིགས་ལ་བསམ་ཡས་ཀྱང།། གདོན་ནི་རྣམ་པ་ལྔ་རུ་འདུས།། ས་ལ་དབང་པའི་མ་མོ་དང།། འབྱུང་བ་ཆུ་ལ་དབང་བ་དང།། མེ་ལ་དབང་བའི་མ་མོ་དང།། དེ་བཞིན་རླུང་ལ དབང་བ་དང།། ནམ་མཁའ་དག་ལ་དབང་པའོ།། དེ་དག་སྲུང་བའི་ཐབས་ལ་ཡང།། རྣམ་པ་གཉིས་སུ་ང་ཡིས་བཤད།། གཞན་དག་མངགས་པའི་ཕོ་ཉ་དང།། འཕྲལ་གྱི་གདན་རྣམས་ལས་ཀྱི་འཕྲོ།། རྣམ་པ གཉིས་སུ་ང་ཡིས་བཤད།། བསྲུང་བའི་ཐབས་ནི་རེ་རེའོ།། བརྟག་པའི་ཐབས་ནི་འདི་ལྟ་སྟེ།། གཞན་གྱིས་མངགས་བའི་གདོན་རྣམས་ནི།། གདོན་གྱིས་ཟིན་པའི་མི་དེ་ཡང།། གདོང་ནི་ནག་ལ་སྐམ་པའོ།། ལུས་པོ ལྗི་ཞིང་ཚིག་པ་ཟ།། མིག་རྩ་དམར་ཞིང་ཁྲོ་ལ་དགའ།། ཤེས་པ་བྱིང་ཞིང་ཕོ་མཆིན་ན།། རྨི་ལམ་ཆུ་བོ་ཆེན་པོ་རྨི།། དེ་ལྟར་བྱུང་བའི་མི་དེ་ཡང།། སྔགས་པའི་མཐུ་ཡིས་ཟིན་པར་ངེས།། དེ་དག་བཅོས་པའི་ཐབས་ཉིད ནི།། དང་པོ་མདོས་དང་ཞི་བས་བཟློག། དེས་ཀྱང་ཐར་བར་མ་གྱུར་ན།། དབང་ཆེན་ཏིང་འཛིན་ལྡན་པ་ཡིས།། བདག་ཉིད་མལ་གྱི་འོག་ཏུ་ཡང།། གྲུ་གསུམ་དག་ནི་ནག་པོར་བྱ།། ནང་དུ་སྔགས་པའི་གཟུགས བརྙན་རྣམས།། མ་མོའི་གཟུགས་བརྙན་གཞུག་པར་བྱ།། སྟེང་དུ་དུར་ཁྲོད་རྡོ་ལེབ་ལ།། གླིང་བཞི་རི་རབ་བྲིས་པས་མནན།། དབང་ཆེན་ཏིང་འཛིན་ལྡན་པ་ཡིས།། དེ་ཡི་སྟེང་དུ་ཉལ་བྱ་ཞིང།། འཁོར་ལོ ཉིད་ཀྱང་བསྐོར་བར་བྱ།། གསང་སྔགས་འདི་ནི་མཚན་བརྒྱ་བཟླས།། ཧརི་ཧརི་མ་ཏྲི་མཱ་ར་ཡ་བཟློག། མ་ཏྲི་མ་ཏྲི་རང་ལ་མཱ་ར་ཡ་ཟློག་ཟློག། རྦད་རྦད།། རྩ་བའི་གསང་སྔགས་ལན་བདུན་བརྗོད།། དེ་ནས་སྔགས་དེ་ནུས ཚད་བགྲང།། དེས་ནི་བྱད་ཁ་ཐམས་ཅད་བཟློག། མ་མོའི་ཕྱིར་བཟློག་གསང་བའོ།། རྣམ་སྨིན་ཡིན་ན་ཐར་བར་དཀའ།། དགེ་སྦྱོར་རྫོགས་ན་བཟློག་བ་སྲིད།། འཕྲལ་གྱི་གདོན་དུ་གྱུར་བ་ན།། ས་ལ་དབང་བའི རྟགས་རྣམས་ནི།། འདི་ལྟ་ཉིད་དུ་འབྱུང་བར་ངེས།། ལུས་པོ་ལྗི་ཞིང་ཉལ་ལ་དགའ།། དྲན་པ་ཉམས་ཤིང་ཤི་འབྲས་འདོན།། ཤེས་པ་བྱིང་ནས་མགོ་བོ་འཁོར།། མིག་ཀྱང་མི་མཐོང་ཁྲག་ལྟ་བུ།། རྣ་བ་འོན་ནས་སྒྲ མི་ཐོས།། རྐང་ལག་འདར་ཞིང་གློ་སྙིང་རྨུགས།། དེ་ལྟ་བུ་ཡི་རྟགས་རྣམས་ནི།། ཐ་མ་མཛེ་རུ་འགྲོ་བར་ངེས།། དེ་ནི་ས་ལ་དབང་བའོ།། དེ་ལ་བཟློག་པ་བྱ་བའི་ཐབས།། དང་པོ་ཞི་བའི་ལས་ཀྱིས མཆོད།།