Tibetan
གྱིས་མནན། །གྲགས་པ་སྒྲ་ཡི་བདུད་བྱུང་ན། །ཆོས་ཉིད་སྒྲ་དང་བྲལ་བའི་ཕྱིར། །རྗེས་སུ་འབྲང་མེད་རང་བཞིན་ནི། །ལྟ་བའི་རིག་པས་ཟིལ་གྱིས་ མནན། །འཇིགས་པ་གཟུགས་ཀྱི་བདུད་བྱུང་ན། །གཞི་ལ་སྣང་བ་མེད་པའི་ཕྱིར། །དངོས་མེད་ཤེས་པའི་ཏིང་འཛིན་གྱིས། །གཟུགས་ཅན་མཚན་མ་ཟིལ་གྱིས་མནན། །བསླུ་བ་རྫུན་གྱི་བདུད་བྱུང་ན། །ཆོས་སྐུ་ཚིག་ལས་འདས་པའི་ཕྱིར། །བདེན་པར་འཛིན་པའི་སྐྱོན་དང་བྲལ། །རྫུན་ལ་བདེན་མེད་ཟིལ་གྱིས་གནོན། །ད་ཡང་འདུས་པའི་སྙིང་པོ་ཉོན། །བྱིང་བ་བསལ་བའི་བདུད་བྱུང་ན། །གཉིད་གསུམ་བསྲེས་པའི་གདམས་ངག་གིས། །གཏི་མུག་ཆོས་སྐུར་རབ་ཐིམ་པས། །ཡེ་གནས་ལྟ་བའི་ཟིལ་གྱིས་གནོན། །རྨུགས་པ་བདེ་བའི་བདུད་བྱུང་ན། །འཕེལ་འགྲིབ་མེད་པའི་དོན་ཤེས་ཕྱིར། །བདེ་ཆེན་ཡེ་གནས་ལྟ་བ་ལ། །མཉམ་ཉིད་རིག་པས་ཟིལ་གྱིས་མནན། །རྒོད་པ་མི་རྟོག་བདུད་བྱུང་ན། །སྣང་བའི་བག་ཆགས་བརྟས་པ་ལས། །རང་རིག་བག་ཆགས་མེད་པའི་ཕྱིར། །སྤང་སྡུད་ཞེན་མེད་ཟིལ་གྱིས་མནན། །འཕྲོ་བ་མི་གཡོའི་བདུད་བྱུང་ན། །ཡེ་ནས་མི་གཡོ་ཆོས་སྐུ་ལ། །གོམས་པའི་དབང་གིས་ཏིང་འཛིན་གསལ། །མི་བརྗེད་གཟུངས་ཀྱི་ཟིལ་གྱིས་མནན། །ད་ཡང་འདུས་པའི་སྙིང་པོ་ཉོན། །ལྟ་སྒོམ་བདུད་ནི་དེ་དག་ཀྱང་། །རང་བྱུང་ཆོས་སྐུའི་དོན་རྟོགས་པས། །གང་བྱུང་ཟིལ་མནན་རང་བརླགས་པས། །འབྲས་བུ་ཡེ་ཤེས་ལྷུན་གྱིས་གྲུབ། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། ལྟ་སྒོམ་གྱི་བདུད་ཟིལ་གྱིས་མནན་པའི་ལེའུ་སྟེ་ཉེར་བཞི་པའོ།། །།ད་ཡང་འདུས་པའི་སྙིང་པོ་ཉོན། །དེ་དོན་ངང་ལ་གནས་པའི་ཚེ། །འདུ་འཛི་ལོངས་སྤྱོད་བདུད་བྱུང་ན། །ཏིང་འཛིན་དགྲ་རུ་ཤེས་པ་ཡིས། །འདོད་ཆུང་ཆོག་ཤེས་ཟིལ་གྱིས་མནན། །ཞེན་པ་གནས་ཀྱི་བདུད་བྱུང་ན། །ཡུལ་ལ་ངེས་མེད་མ་ཆགས་པས། །ལྟ་བ་རང་རིག་ཡུལ་མེད་ཕྱིར། །ཞེན་པ་མེད་པའི་ཟིལ་གྱིས་མནན། །ཡོན་ཏན་གཡེང་བའི་བདུད་བྱུང་ན། །བདག་དོན་མ་གྲུབ་བར་དུ་ཡང་། །མི་དབང་མི་བཏང་དོན་དྲན་པས། །གཞན་དོན་མི་བྱ་ཟིལ་གྱིས་མནན། །འཁོར་ངན་སེམས་འཁྲུགས་བདུད་བྱུང་ན། །མཐར་ཐུག་འདྲེལ་པ་མེད་པའི་ཕྱིར། །གནས་སྐབས་འདྲེལ་པ་ཏིང་འཛིན་དགྲ། །གདུང་སེམས་བསྐྱུངས་པའི་ཟིལ་གྱིས་མནན། །ད་ ཡང་འདུས་པའི་སྙིང་པོ་ཉོན། །ཟིལ་གྱིས་མནན་ཐབས་དེ་དག་ཀྱང་། །སྤང་ལེན་དགག་བསྒྲུབ་མེད་པར་འདུས། །ལྟ་སྒོམ་སྤྱོད་པ་གཅིག་གི་ངང་། །དེ་ཕྱིར་འབྲས་བུ་ལྷུན་གྱིས་གྲུབ། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། སྤྱོད་པའི་བདུད་ཟིལ་གྱིས་མནན་པའི་ལེའུ་སྟེ་ཉེར་ལྔ་པའོ།། །།དེ་ཡང་རྡོ་རྗེ་སེམས་དཔའ་ཉོན། །མཁའ་འགྲོའི་ལུང་སྟོན་བདུད་བྱུང་ན། །རང་རིག་འགྱུར་མེད་རྟོགས་པ་ལས། །གཞན་དུ་ལུང་སྟོན་བསླུ་བར་ཤེས། །རེ་དོགས་མེད་པར་ཟིལ་གྱིས་མནན། །ཉམས་མྱོང་ཞེན་པའི་བདུད་བྱུང་ན། །སྔ་ཕྱི་མེད་པའི་ཆོས་སྐུ་ནི། །ཏིང་འཛིན་རྐྱེན་གྱིས་མི་འགྱུར་ཕྱིར། །ཞེན་མེད་ལྟ་བའི་ཟིལ་གྱིས་མནན། །ཞེ་འདོད་ཚུལ་འཆོས་བདུད་བྱུང་ན། །གང་ཡང་མ་བཅོས་དོན་དྲན་ནས། །རང་བྱུང་ཆོས་སྐུའི་གདེང་ལྡན་པས། །རྟོག་པ་དྲང་པོས་ཟིལ་གྱིས་མནན། །བདེ་བ་བོགས་འདོན་བདུད་བྱུང་ན། །རང་བྱུང་ཡེ་ཤེས་རྟེན་མེད་ཕྱིར། །དབང་ལ་མི་ལྟོས་འཕེལ་འགྲིབ་མེད། །རྐྱེན་ལས་མི་འབྱུང་ཟིལ་གྱིས་མནན། །གདེང་མེད་སྐུར་འདེབས་བདུད་བྱུང་ན། །ཆོས་སྐུར་སྒྲོ་སྐུར་བྲལ་བའི་ཕྱིར། །ལུང་ལྡན་ཅན་ལ་གནོད་མི་ནུས། །ལྟ་སྤྱོད་མཁན་གྱི་ཟིལ་གྱིས་མནན། །ང་རྒྱལ་སྒྲོ་འདོགས་བདུད་བྱུང་ན། །རང་བྱུང་དོན་ལ་སྒྲོ་འདོགས་བྲལ། །ངེས་པའི་གདམས་ངག་དམ་པ་འདི། །སྣོད་ངན་གསང་བས་ཟིལ་གྱིས་མནན། །ད་ཡང་འདུས་པའི་སྙིང་པོ་ཉོན། །དེ་དག་ཉམས་ཀྱི་བདུད་དྲུག་ཀྱང་། །རྟོགས་ན་རྣལ་འབྱོར་དམ་པའི་ལམ། །དེ་ཕྱིར་ལྟ་བ་བརྗེད་མེད་བྱ། །དེ་དོན་སངས་རྒྱས་དགོངས་པ་ཡིན། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། ཉམས་ཀྱི་བདུད་ཟིལ་གྱིས་གནན་པར་བསྟན་པའི་ལེའུ་སྟེ་ཉེར་དྲུག་པའོ།། །།རྡོ་རྗེ་སེམས་དཔས་ཡང་ཞུས་པ། །སངས་རྒྱས་རྣམ་བཞི་ཇི་ལྟར་དབྱེ། །བར་དོར་སངས་ནི་ཇི་ལྟར་རྒྱ། །སངས་རྒྱས་མཛད་སྤྱོད་ཇི་ལྟར་འབྱུང་། །ཀུན་རིག་རྒྱལ་པོས་བཤད་དུ་གསོལ། །ཞུས་པའི་དོན་གསན་བཀའ་སྩལ་པ། །དང་པོ་རྒྱུ་ཡི་སངས་རྒྱས་ནི། །རང་བྱུང་ངོ་བོ་ཉིད་ཀྱི་སྐུ། །སེམས་ཅན་ཀུན་གཞིའི་མུན་གསེབ་ན། །རང་བྱུང་མ་རིག་སྒྲིབ་པ་སྟེ། །དེ་ཡི་གཏན་ཚིགས་ངེས་པ་ནི། །རྟག་ཆད་བྲལ་ཀྱང་ངོ་མ་ཤེས། །འཁོར་འདས་གཉིས་ཀ་སེམས་ ལ་རྫོགས། །དེ་ཡིས་དེ་ཉིད་མཚོན་པའི་དཔེ། །ཏིལ་ལ་མར་གྱིས་ཁྱབ་པ་ལྟར། །ནམ་མཁའ་ཨ་དང་རྡོ་རྗེ་ཡིས། །ཕྱོགས་འགའ་འདྲ་བའི་དཔེ་ཡིས་མཚོན། །འབྲས་བུ་རང་ལ་ཡོད་པའི་ཕྱིར། །རྒྱུ་རྐྱེན་གཞན་ལ་རག་མ་ལུས། །དེ་ཕྱིར་རང་བྱུང་ཀུན་ཁྱབ་དེས། །གཞན་དོན་བྱས་ཟིན་བཙལ་མི་དགོས། །དེ་ཡང་འདུས་པའི་སྙིང་པོ་ཉོན། །རྟོགས་པ་སྐད་ཅིག་སངས་རྒྱས་དེ། །ངོ་བོ་ཀུན་གཞི་གཞི་ཆ་ལ། །ལུང་ལྡན་བླ་མས་དོན་བསྟན་པས། །མ་རིག་སངས་ནས་རིག་པ་རྒྱས། །དེ་ཡི་ཆེད་དུ་གཏན་ཚིགས་ནི། །འཁོར་འདས་འབྱུང་བའི་གློ་བུར་ངེས། །གཞི་ལ་མེད་པས་རང་ཡིད་ཆེས། །དེ་ཕྱིར་རྩོལ་བའི་ནད་དང་བྲལ། །དེ་ཡིས་དེ་ཉིད་མཚོན་པའི་དཔེ། །མུན་ཁང་སྒྲོན་མ་བཏེག་པ་དང་། །ནམ་ལངས་ཉི་མ་ཤར་བ་དང་། །ལོང་བས་རིན་ཆེན་རྙེད་པ་འདྲ། །དེ་ཡི་འབྲས་བུ་ངེས་པ་ནི། །བག་ཆགས་ཉོན་མོངས་ཟིལ་གྱིས་མནན། །ཡུལ་མེད་རང་རིག་ཆོས་སྐུར་ལྡན། །དེ་ལ་ཡིད་ཆེས་འབྲས་བུའི་མཆོག །དེ་ཡང་རྡོ་རྗེ་སེམས་དཔའ་ཉོན། །ལམ་ལ་གནས་པའི་སངས་རྒྱས་དེ། །ངོ་བོ་ལྟ་བ་གཞི་དེས་ཕྱིར། །རྒྱུན་དུ་འབྲལ་མེད་ལྷག་མཐོང་གསལ། །ཡེ་ཤེས་ངོས་ཟིན་ཡེངས་པ་མེད། །དེ་ཕྱིར་ལམ་ཆེན་ཆོས་སྐུའི་ཀློང་། །དེ་ཡི་ཡིད་ཆེས་གཏན་ཚིགས་ནི། །ཉོན་མོངས་མི་འབྱུང་བག་ཆགས་བྲལ། །སྤང་སྡུད་ཞེན་པའི་རྟོག་པ་སངས། །རང་རིག་སྒྲིབ་མེད་ཡེ་ཤེས་རྒྱས། །དེ་ཡིས་དེ་ཉིད་མཚོན་པའི་དཔེ། །མར་མེ་རླུང་གིས་མ་བསྐྱོད་དང་། །སྤྲིན་མེད་ཉི་མ་རང་གསལ་དང་། །མི་གཡོ་རྒྱ་མཚོ་དྭངས་པ་འདྲ། །འབྲས་བུ་ཡེ་ཤེས་དེ་ཉིད་ནི། །ལྟ་བ་གདེང་ལྡན་ཡིད་ཆེས་པའི། །རང་རིག་ཡེ་ཤེས་ཉམས་ཤར་བས། །འཁོར་བར་ལྟུང་མེད་འབྲས་བུའི་མཆོག །ད་ཡང་འདུས་པའི་སྙིང་པོ་ཉོན། །འབྲས་བུ་མངོན་གྱུར་སངས་རྒྱས་ཏེ། །རང་རིག་ངོ་བོ་ཉིད་ཀྱི་སྐུ། །ཡེ་ཤེས་ཐུགས་ཀྱིས་ཐམས་ཅད་མཁྱེན། །ངེས་པའི་དོན་ལ་འགྱུར་བ་མེད། །ཡིད་ཆེས་ངེས་པའི་གཏན་ཚིགས་ནི། །ལུས་དང་བྲལ་བའི་བར་དོ་ལ། །མ་རིག་སྒྲིབ་པ་ཐམས་ཅད་སངས། །རང་བྱུང་རིག་པའི་ཡེ་ ཤེས་རྒྱས། །དེ་ཡི་མཐུན་དཔེ་མཚོན་པ་ནི། །ཡིད་བཞིན་ནོར་བུ་རིན་པོ་ཆེ། །དགོས་འདོད་ཐམས་ཅད་འབྱུང་བ་དང་། །ཅི་བསམ་འགྲུབ་པའི་དཔེ་དང་འདྲ། །དེ་ཡི་འབྲས་བུ་ངེས་པ་ནི། །རང་རིག་ཆོས་སྐུ་ཡེ་ཤེས་ལ། །གཟུགས་སྐུ་རྣམ་གཉིས་དུས་གཅིག་འབྱུང་། །འགྲོ་དོན་མཛད་ཀྱང་སྐྱོན་མི་གོས། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། སངས་རྒྱས་རྣམ་པ་བཞིའི་དབྱེ་བ་བསྟན་པའི་ལེའུ་སྟེ་ཉེར་བདུན་པའོ།། །།ཀུན་རིག་སྟོན་པས་བཀའ་སྩལ་པ། །རྣལ་འབྱོར་རྟོགས་པའི་གདེང་ལྡན་པས། །ཚེ་ཡི་ཐ་མ་འཆི་བའི་དུས། །ས་ཆུ་མེ་རླུང་རིམ་ཐིམ་སྟེ། །དབུགས་ནི་ཐུམ་ཐུམ་བྱེད་པའི་ཚེ། །འདི་ཡི་སྣང་བ་ནུབ་ཀ་དང་། །ཕྱི་མའི་སྣང་བ་འཆར་ཀ་རུ། །རྣམ་ཤེས་སྣང་བ་སྐྱེས་པའི་ཚེ། །དུ་བ་སྨིག་རྒྱུ་ལྟ་བུར་མཐོང་། །འབྱུང་བ་དངོས་མེད་ཞིག་པ་སྙམ། །དེ་ཚེ་སྣང་བ་འདི་ནུབ་ནས། །རང་སྣང་མཆེད་པ་སྲིན་བུ་མེ། །བག་ཙམ་གསལ་བའི་དོན་མཐོང་སྟེ། །སྣང་བ་ཐོབ་པའི་དུས་སུ་ནི། །མར་མེའི་རྩེ་ལྟར་རྟག་པ་དཀའ། །དེ་ནས་ཡེ་ཤེས་བརྟན་པའི་དུས། །ནམ་ལངས་ཉི་མ་ཤར་བ་ལྟར། །རང་རིག་ཆོས་སྐུར་ཝལ་གྱིས་གསལ། །ཡུལ་མེད་རིག་པ་རང་བྱུང་ཐུགས། །ས་ཟིན་ངེས་པའི་ཡེ་ཤེས་དེ། །སྔར་གོམས་དབང་གིས་འགྱུར་བ་མེད། །དཔེར་ན་ཁབ་ལེན་ལྕགས་འདུ་བཞིན། །རང་རིག་ཆོས་སྐུ་ངོས་ཟིན་པས། །སངས་རྒྱས་ཡོན་ཏན་ཐམས་ཅད་འདུས། །ད་ཡང་རྡོ་རྗེ་སེམས་དཔའ་ཉོན། །རང་བྱུང་རང་རིག་ཡེ་ཤེས་ནི། །སང་ངེས་ལ་ལེ་ཡེ་རང་གསལ། །དེ་ཕྱིར་རང་བྱུང་ཡེ་ཤེས་སྐུ། །ཕྱིས་ནི་བར་དོར་ལུས་མི་ལེན། །ཡུལ་ལ་མི་འཇུག་ཆགས་སྡང་མེད། །མངལ་དུ་འཇུག་པ་མེད་པའི་ཕྱིར། །སངས་རྒྱས་ཞེས་ནི་དེ་ལ་བྱ། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། སངས་རྒྱས་པའི་དུས་བསྟན་པའི་ལེའུ་སྟེ་ཉེར་བརྒྱད་པའོ།། །།སྟོན་པས་འཁོར་ལ་ཡང་གསུངས་པ། །སངས་རྒྱས་ཆོས་སྐུའི་མཛད་སྤྱོད་ཀྱང་། །ཡེ་ཤེས་ལུས་ཅན་ཆོས་སྐུ་ནི། །རྟོག་མེད་རང་བྱུང་ཡེ་ཤེས་ཐུགས། །ཐམས་ཅད་མཁྱེན་པའི་རིག་པ་གསལ། །སངས་རྒྱས་ཀུན་གྱི་ཐུགས་སུ་བཤད། །རང་བྱུང་མིག་གིས་ཐམས་ཅད་གསལ། །ཡེ་ཤེས་སྤྱན་གཅིག་དྲི་མ་མེད། །མཐོང་ལ་མི་རྟོག་དུས་མཉམ་ཕྱིར། །ཆོས་ཀྱི་སྐུ་ཡི་སྤྱན་ཞེས་བྱ། །ད་ཡང་རྡོ་རྗེ་སེམས་དཔའ་ཉོན། །མཉམ་ཉིད་མི་གཡོ་རང་བྱུང་སྙན། །དངོས་མེད་སྒྲ་ཐོས་རྗེས་འབྲངས་བྲལ། །དེ་ཐོས་ཆོས་ཉིད་རང་བྱུང་སྒྲ། །དེ་ཡང་འགྱུར་མེད་ཡེ་ཤེས་སྙན། ། གདངས་གསལ་འགྱུར་མེད་ཉམས་ཀྱི་དྲི། །རྟོག་མེད་ཚོར་བ་བྱང་ཆུབ་སྐུ། །ཡེ་ཤེས་སྣ་ཡིས་དྲི་མཆོག་ཚོར། །དེ་ལ་ཞེན་མེད་སངས་རྒྱས་ཤངས། །ད་ཡང་རྡོ་རྗེ་སེམས་དཔའ་ཉོན། །ཆོས་སྐུ་རོ་མཆོག་ཉམས་སུ་བསྟར། །སྨྲ་མེད་བདེ་གསལ་སངས་རྒྱས་ལྗགས། །ཡེ་ཤེས་ལྗགས་ཀྱིས་རང་རིག་མྱོང་། །དེ་དོན་དགོངས་པ་རང་བྱུང་སྐུ། །ད་ཡང་འདུས་པའི་སྙིང་པོ་ཉོན། །དངོས་མེད་རིག་གསལ་ཡེ་ཤེས་ལུས། །ཡེ་ཤེས་སྐུ་ལ་སྐྱེ་ཤི་མེད། །དེ་དོན་མི་འགྱུར་ཡོན་ཏན་རྫོགས། །དེ་ཕྱིར་སངས་རྒྱས་ཆོས་ཀྱི་སྐུ། །དེ་ལྡན་སྐད་ཅིག་དུས་དེ་རུ། །གཟའ་སྐར་གཟུགས་བརྙན་རྒྱ་མཚོ་བཞིན། །དུས་གཅིག་འཛམ་གླིང་ཕྲག་བརྒྱ་རུ། །འགྲོ་དོན་གཟུགས་སྐུ་དུས་གཅིག་ཁྱབ། །ཅི་རིགས་པ་ཡི་ཆོས་རྣམས་སྟོན། །དཔེ་ནི་སྤྲིན་མེད་ནམ་མཁའ་འདྲ། །རྟགས་ནི་སངས་རྒྱས་ཆོས་སྐུ་མཁྱེན། །དེ་ཡི་ཡོན་ཏན་བརྗོད་མི་ལངས། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། སངས་རྒྱས་ཀྱི་མཛད་སྤྱོད་བསྟན་པའི་ལེའུ་སྟེ་ཉེར་དགུ་པའོ།། །།རྡོ་རྗེ་སེམས་དཔས་ཡང་ཞུས་པ། །མ་རྟོགས་འཁོར་བར་འཁྱམས་པ་དང་། །གདམས་ངག་མེད་པའི་སྐྱོན་ནི་གང་། །དེ་ཡི་ལྟུང་སྒོ་གང་དུ་ལྟུང་། །ཀུན་རིག་སྟོན་པས་བཤད་དུ་གསོལ། །དེ་སྐད་ཞུས་པའི་དོན་གསན་ནས། །འཁོར་གྱི་ཚོགས་ལ་བཀའ་སྩལ་པ། །རྒྱུད་ལུང་མན་ངག་ཆོས་རྣམས་ཀུན། །སྣང་བ་བཞི་རུ་བློས་བྱས་ནས། །སྒྲོ་སྐུར་གཉིས་ལ་ཞེན་པའི་ཕྱིར། །བྱས་པའི་དོན་མེད་སྡུག་བསྔལ་སྣོན། །ད་ཡང་རྡོ་རྗེ་སེམས་དཔའ་ཉོན། །དཔེར་ན་བྱ་སྒྲོ་རླུང་ཁྱེར་ལྟར། །ངེས་མེད་གཞི་ལ་བློ་གཏད་ནས། །མ་རྟོགས་རྩོལ་བསྒྲུབ་ཅི་སྤྱད་ཀྱང་། །མི་གྲོལ་དུག་ལྔ་རྒྱས་པར་འགྱུར། །དམུས་ལོང་བྱང་ཐང་འཁོར་བ་བཞིན། །ངེས་དོན་མ་རྟོགས་ཅི་བསྒོམས་ཀྱང་། །ཤེས་རབ་མིག་མེད་བག་ཆགས་བརྟས། །གོལ་ས་མི་ཆོད་ནོར་བའི་ལམ། །དེ་ཡང་འདུས་པའི་སྙིང་པོ་ཉོན། །དཔེར་ན་འདབ་ཆགས་གཤོག་ཆག་ལྟར། །ལྟ་སྤྱོད་གཅིག་ཏུ་མ་ཤེས་པས། །རེས་འཇོག་བླང་དོར་བློས་བྱས་ཕྱིར། །མ་རྟོགས་ཆོས་སྤྱོད་ལས་རྣམས་ འཁྲུགས། །ས་བོན་མ་བཏབ་སོ་ནམ་བཞིན། །ངེས་དོན་མ་རྟོགས་ཆོས་སྤྱོད་ཀྱང་། །འབྲས་བུ་མེད་ཅིང་རང་བརླག་ནས། །མནར་མེད་འཁོར་བའི་རྒྱ་མཚོར་ལྟུང་། །དེ་ཕྱིར་མན་ངག་མེད་པའི་ཆོས། །ལུས་ངག་ལས་སུ་སྤྱད་གྱུར་ཀྱང་། །སྡུག་བསྔལ་རྒྱུ་ལས་ཕན་མི་ནུས། །མ་རྟོགས་ཆོས་སྐུ་དེ་བཞིན་ནོ། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། མ་རྟོགས་པ་འཁྱམས་པའི་ལེའུ་སྟེ་སུམ་ཅུ་པའོ།། །།ཀུན་རིག་སྟོན་པས་བཀའ་སྩལ་པ། །འཁོར་འདས་གཉིས་ཀྱི་བར་དོ་ཡི། །ཐོག་མཐའ་གཅོད་པའི་དོན་མེད་ན། །ས་མཁན་མེད་པའི་ཚོང་པ་བཞིན། །སྐྱེ་ཤིའི་སྡུག་བསྔལ་ལས་མི་ཐར། །སྐྱེ་ཤི་གཉིས་ཀྱི་བར་དོ་རུ། །ཆོས་སྐུ་ངོ་སྤྲོད་དོན་མེད་ན། །སྒྲོན་མེ་མེད་པའི་མུན་པ་བཞིན། །མ་རིག་པ་ལ་སངས་དུས་མེད། །ད་ཡང་རྡོ་རྗེ་སེམས་དཔའ་ཉོན། །དུས་བཞི་མཉམ་པར་སྤྱོར་བ་ཡི། །རྒྱུན་དུ་འབྲལ་མེད་དོན་མེད་ན། །ཆུ་བྲན་ཐན་པས་སྐམས་པ་བཞིན། །ལྟ་བ་སྒོམ་པས་རྐྱེན་མི་ཐུབ། །སྲིད་པ་དག་གི་བར་དོ་ནི། །སངས་རྒྱས་དུས་ཀྱི་དོན་མེད་ན། །རིན་ཆེན་འདམ་དུ་སྟོར་བ་འདྲ། །འབྲས་བུ་མི་འབྱུང་མངལ་དུ་འཇུག །ད་ཡང་འདུས་པའི་སྙིང་པོ་ཉོན། །ཐེག་པ་གཞན་དང་རྩོད་དུས་སུ། །གལ་མདོ་ངེས་པའི་དོན་མེད་ན། །གོ་མཚོན་མེད་པའི་དཔའ་བོ་བཞིན། །མན་ངག་ཟབ་མོའི་ཁྱད་མི་ཐོན། །དེ་ཕྱིར་གོལ་ས་དེ་དག་གིས། །རང་སེམས་སྙིང་པོ་མ་རྟོགས་ཕྱིར། །གདམས་ངག་མེད་ཕྱིར་འཁོར་བའི་སྐྱོན། །བསྐལ་པར་བགྲངས་ཀྱང་དེ་མི་ཐོབ། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། གདམས་ངག་མེད་པའི་སྐྱོན་བསྟན་པའི་ལེའུ་སྟེ་སོ་གཅིག་པའོ།། །།དེ་ནས་ཀུན་རིག་རྒྱལ་པོ་ཡིས། །དད་ལྡན་འཁོར་ལ་བཀའ་སྩལ་པ། །མི་རྟོག་དབྱིག་གུའི་ཐུན་ཚོད་ཀྱིས། །མདོ་སྡེ་ཁ་ཏོན་བཏོན་གྱུར་ཀྱང་། །བདག་བསྟོད་གཞན་ལ་སྨད་པ་ཡིས། །ངན་སོང་སྒོ་རུ་ངེས་པར་ལྟུང་། །གཞན་གྱི་བསམ་སྦྱོར་བཟང་པོ་ལ། །བར་ཆོད་བྱེད་པའི་བདུད་ཡིན་ཏེ། །མ་རྟོགས་སེར་སྣ་བྱེད་པ་ཡིས། །བདུད་ཀྱི་སྒོར་ལྟུང་འཁོར་བར་འཁྱམས། ། གཞན་གྱི་ཆོས་ལ་ཕྲག་དོག་པས། །ཡོན་ཏན་མང་དུ་ལྡན་གྱུར་ཀྱང་། །རང་སེམས་སྙིང་པོ་མ་རྟོགས་ན། །གནོད་སྦྱིན་སྒོར་ལྟུང་རྟག་ཏུ་འཁོར། །མཉམ་ཉིད་མ་རྟོགས་རང་རྒྱུད་དུ། །ཆགས་སྡང་ཕོ་ཚོད་སྤྱོད་པའི་ལས། །དུག་ལྔ་རང་ཁར་སྤྱད་ཉེས་པས། །སྲིན་པོའི་སྒོར་ལྟུང་རྟག་ཏུ་འཁོར། །རང་དབང་ཏིང་འཛིན་མ་ཐོབ་པར། །འཁོར་དང་རིས་སུ་གཅད་བསམ་པས། །བདག་ཉིད་ཆེ་འདོད་འཁོར་སྡུད་པ། །ཤོ་གམ་གཅན་ཆེན་རྟག་ཏུ་འཁོར། །ཇི་བཞིན་མ་ནོར་མ་རྟོགས་པར། །ལྟ་ལོག་གཞན་གྱི་སློབ་དཔོན་བྱེད། །རང་ཉིད་མི་ཤེས་གཞན་གྲོལ་བ། །རུ་ཏྲའི་སྒོར་ལྟུང་རྟག་ཏུ་འཁོར། །ཚིག་ཚོགས་ཕྲིན་ལས་ཅི་མཁས་ཀྱང་། །མ་རྟོགས་དངོས་པོར་འཛིན་པ་ཡིས། །རང་རྒྱུད་དམ་རྫས་མངོན་ཞེན་ཕྱིར། །བགེགས་དང་བྱ་རོག་སྒོར་ལྟུང་འཁོར། །ཐབས་ལམ་དབང་ལ་ཁུངས་ཕྱུང་སྟེ། །འདོད་ཆགས་རང་ཁར་བསྟེན་བྱས་པས། །ལྟ་བས་མ་ཟིན་བདེ་ལ་ཞེན། །ལྷ་ཆེན་སྒོར་ལྟུང་འཁོར་བར་འཁྱམས། །མ་རྟོགས་ང་དང་བདག་འཛིན་པས། །གསང་སྔགས་ལྟ་སྤྱོད་ཡིན་ཟེར་ནས། །སེམས་ཅན་སྲོག་ལ་བརྩེ་མེད་གཅོད། །མུ་སྟེགས་རྟག་ཆད་སྒོར་ལྟུང་འཁྱམས། །ད་ཡང་འདུས་པའི་སྙིང་པོ་ཉོན། །མ་རྟོགས་དབང་གིས་རྩིང་སྤྱོད་པ། །ལུས་ངན་འདི་ཡིས་ལེན་པའི་ཕྱིར། །ལས་ངན་དགུ་པོ་གང་སྤྱད་ཀྱང་། །དམྱལ་བར་ངེས་འགྲོ་གཏན་དུ་འཁྱམས། །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། མ་རྟོགས་པའི་ལྟུང་སྒོ་བསྟན་པའི་ལེའུ་སྟེ་སོ་གཉིས་པའོ།། །།དེ་ནས་འདུས་པའི་འཁོར་རྣམས་ལ། །ཀུན་རིག་རྒྱལ་པོས་དོན་གཏད་པ། །ཐེག་པའི་རྒྱལ་པོ་ལྷུན་རྫོགས་འདི། །དད་ལྡན་འཁོར་རྣམས་ཁྱེད་ཀྱིས་ཀྱང་། །རྒྱུད་འདི་ཡིད་ལ་བརྣགས་ཤིང་བཅང་བར་གྱིས། །ཡང་དག་ངེས་པའི་རྒྱུད་ཆེན་འདི། །དད་མེད་སྣང་འཚོང་ཉམས་པ་ལ། །འདི་སྤེལ་སློབ་དཔོན་བསྒྲལ་བའི་གནས། །འདི་ལ་ཡིད་དུ་མི་འོང་རྐྱེན་རྣམས་འབྱུང་། །དེ་ཡང་རྡོ་རྗེ་སེམས་དཔའ་ཉོན། །སྣོད་དང་མི་ལྡན་མི་ངན་ནི། །ཚུལ་ འཆོས་བྱེད་ཅིང་སློབ་དཔོན་སྨོད། །ནོར་ཕོངས་ཆོས་འདོད་ཐབས་ཀྱིས་འབྲུ། །དེ་ལྟའི་སྣོད་ངན་གང་ཟག་ལ། །ཡེ་ཤེས་ལྟ་བའི་རྒྱུད་ཆེན་འདི། །ནམ་ཡང་བསྟན་པར་མ་གསུངས་སོ། །ད་ཡང་འདུས་པའི་སྙིང་པོ་ཉོན། །བསྟན་པ་འཇིག་པའི་དུས་འདིར་ནི། །རྫོགས་པ་ཆེན་པོའི་བསྟན་པ་འབྱུང་། །དེ་ཚེ་སྣོད་ལྡན་འབྱུང་སྲིད་ན། །ཡང་དག་ངེས་དོན་རྒྱུད་འདི་གཏད། །དེ་ལྟར་མ་བྱས་ངེས་དོན་འདི། །ནོར་འདོད་ཕྱིར་ནི་འདི་བསྟན་ན། །སངས་རྒྱས་བཀའ་ཆད་འབྱུང་ངེས་ཏེ། །མཁའ་འགྲོ་ཆོས་སྐྱོང་དགྲར་ལངས་ནས། །སྲིན་པོས་སྲོག་བཅད་མནར་མེད་ལྟུང་། །ད་ཡང་འཁོར་རྣམས་ཡང་ཉོན་ཅིག །གལ་ཏེ་ཟས་ནོར་ཕངས་མེད་པ། །ཡིད་འཐད་འབུལ་ན་ངེས་དོན་འདི། །གཞན་ལ་མི་སྤེལ་མནའ་བོར་ལ། །སྦ་བསྐྱིལ་མེད་པར་ལྷུག་པར་བསྟན། །སྣོད་ལྡན་མ་ཕྲད་དུས་ཚེ་ན། །ཆོས་སྐྱོང་ཡོད་པའི་ལྷ་ཁང་ངམ། །ལྷ་འདྲེ་ཡོད་པའི་བྲག་དཀྱིལ་དུ། །སྨོན་ལམ་བཏབ་ནས་སྦས་ལ་བཞག །རྫོགས་པ་ཆེན་པོ་དོན་འདུས་རིག་པའི་གསུང་། རང་བྱུང་བདེ་བའི་འཁོར་ལོའི་རྒྱུད་ལས། རྒྱུད་གཏད་པའི་ལེའུ་སྟེ་སུམ་ཅུ་སོ་གསུམ་པའོ།། །།བི་མ་ལ་དང་གཉགས་ཛྙཱ་ནས་བསྒྱུར་བའོ།། །།